အမေရိကန် နိုင်ငံရောက် နိုင်ငံခြား သားများ ငွေလွှဲမှုကို အခွန် ၂၅ % ထိတိုးမြှင့်ရန် ပြင်ဆင်နေ
သတင်းနှင့် မီဒီယာကွန်ရက်။
၂၀၂၆ ခုနှစ်၊ မေလ ၂၆ ရက်။
အမေရိကန်ပြည်ထောင်စုအတွင်းရှိ နိုင်ငံခြားသားများ မိခင်နိုင်ငံသို့ ပြန်လည်ပေးပို့နေသည့် ပြည်ပငွေလွှဲခ (Remittance) အပေါ် အခွန်နှုန်းထားကို ၂၅ ရာခိုင်နှုန်းအထိ တိုးမြှင့်ကောက်ခံရန် ရစ်ပတ်ဘလီကန် ပါတီဝင်များက ဥပဒေကြမ်းတစ်ခု ရေးဆွဲလျက်ရှိသည်။
တက္ကဆက်ပြည်နယ် လွှတ်တော်အမတ် ချစ်ပ်ရွိုင်း (Chip Roy) တင်သွင်းလိုက်သည့် “REMITANCE ဥပဒေကြမ်း” အရ လက်ရှိကျင့်သုံးနေသည့် အခွန် ၁ ရာခိုင်နှုန်း နှုန်းထားမှသည် အမေရိကန်နိုင်ငံသားမဟုတ်သော နိုင်ငံခြားသားများအားလုံးအတွက် ပြည်ပငွေလွှဲခွန်ကို ၂၅ ရာခိုင်နှုန်းအထိ မြှင့်တင်ရန် တောင်းဆိုထားခြင်းဖြစ်သည်။
အဆိုပါဥပဒေကြမ်းသည် အမေရိကန်ဒေါ်လာများ ပြည်ပသို့ စီးထွက်မှုကို ထိန်းချုပ်ရန် ရည်ရွယ်ခြင်းဖြစ်ကြောင်း တင်ပြထားသော်လည်း၊ စီးပွားရေးပညာရှင်များကမူ ယခုကဲ့သို့ အခွန်တိုးမြှင့်လိုက်ခြင်းကြောင့် ရွှေ့ပြောင်းလုပ်သားများသည် ကုန်ကျစရိတ်ကာမိစေရန် အမေရိကန်နိုင်ငံအတွင်း ပိုမိုကြာရှည်စွာ နေထိုင်အလုပ်လုပ်ကိုင်ကြမည့် ဘေးထွက်ဆိုးကျိုးများ ရှိလာနိုင်ကြောင်း သတိပေးထားကြသည်။
တစ်ချိန်တည်းမှာပင် သမ္မတ ဒေါ်နယ်ထရမ့်၏ အုပ်ချုပ်ရေးအဖွဲ့ကလည်း ဘဏ်များနှင့် ဘဏ္ဍာရေးထိန်းသိမ်းရေး အေဂျင်စီများသို့ ညွှန်ကြားချက်အသစ် ထုတ်ပြန်ထားပြီး၊ တရားမဝင် ရွှေ့ပြောင်းနေထိုင်သူများ၏ နယ်စပ်ဖြတ်ကျော် ငွေလွှဲပြောင်းမှုများကို ပိုမိုတင်းကျပ်စွာ စောင့်ကြည့်စစ်ဆေးရန် အမိန့်ပေးထားသည်။
ထိုအမိန့်ကြောင့် တရားမဝင်ရွှေ့ပြောင်းလုပ်သားများ၏ ငွေလွှဲမှုများ ငြင်းပယ်ခံရခြင်းမျိုး ပိုမိုရှိလာနိုင်သည်ဟု သုံးသပ်ရသည်။
ယခု ငွေလွှဲခွန်တိုးမြှင့်မည့် အစီအစဉ်သည် မကြာသေးမီကမှ ထွက်ပေါ်ထားသည့် “Green Card လျှောက်ထားသူများသည် မိခင်နိုင်ငံသို့ ပြန်ပြီးမှသာ လျှောက်ထားရမည်” ဆိုသည့် စည်းမျဉ်းအသစ်နှင့်အတူ၊ ထရမ့်အစိုးရ၏ လူဝင်မှုကြီးကြပ်ရေးဆိုင်ရာ ဘက်ပေါင်းစုံမှ တင်းကျပ်ဖြိုခွင်းမည့် မူဝါဒတွန်းအားပေးမှုများ၏ အစိတ်အပိုင်းတစ်ခုဖြစ်သည်။
သို့သော်လည်း ဤအခွန်တိုးမြှင့်ရေး ဥပဒေကြမ်းအပေါ် ကွန်ဆာဗေးတစ် အုပ်စုများက ထောက်ခံနေကြသော်လည်း စီးပွားရေးလုပ်ငန်းရှင် အစုအဖွဲ့အချို့ကမူ ကန့်ကွက်နေကြခြင်းကြောင့် လွှတ်တော်အတွင်း ဆက်လက်အခြေအတင် ဖြစ်လာနိုင်ခြေ ရှိနေသည်။
