သတင်း

ရခိုင်တွင် စစ်တပ်၏ လေကြောင်းတိုက်ခိုက်မှုများကြောင့် အမျိုးသမီး သေဆုံးသူ မြင့်တက်လာ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၃ ရက်။ ရခိုင်ပြည်အတွင်း မြေပြင်တိုက်ပွဲများတွင် အာရက္ခတပ်တော် (AA) နှင့် စစ်အုပ်စုတပ်တို့ တိုက်ပွဲများ ပြင်းထန် လျက်ရှိပြီး စစ်အုပ်စုတပ်ဘက်မှ လေကြောင်းနှင့် လက်နက်ကြီးများဖြင့် ဆက်တိုက် ပစ်ခတ်တိုက်ခိုက်နေခြင်း တို့ကြောင့် ဒေသခံ အမျိုးသမီးများ ထိခိုက်သေဆုံးမှု သိသိသာသာ မြင့်တက်လာနေကြောင်း ဒေသခံများနှင့် ပရဟိတဆောင်ရွက်နေသူများက ပြောသည်။ လက်ရှိတွင် ရခိုင်ပြည် မြောက်ပိုင်းနှင့် တောင်ပိုင်းရှိ မြို့နယ်များအပြင် နယ်စပ်ဒေသ ၄ နေရာထက်မက၌ တိုက်ပွဲများ ပြင်းထန်နေပြီး စစ်အုပ်စုတပ်ဘက်မှ စစ်ရေးအရ အရေးနိမ့်လာချိန်တွင် အရပ်သားများ လှုပ်ရှား သွားလာသည့် နေရာများနှင့် ကျေးရွာများကို လေကြောင်းမှ ပစ်မှတ်ထား ဗုံးကြဲနေသည်ဟု ဆိုသည်။ ပရဟိတဆောင်ရွက်နေသူ အမျိုးသားတစ်ဦးက “ဩဂုတ်လနဲ့ စက်တင်ဘာလမှာ ရခိုင်ကို ဗုံးကြဲတာ ပိုများလာ တယ်။ ရခိုင်တောင်ပိုင်း ဂွ၊ သံတွဲ၊ တောင်ကုတ်အပြင် မြောက်ပိုင်းက မြို့တွေမှာလည်း အမျိုးသမီး သေဆုံးတာ တွေ များတယ်။ သံတွဲ ကျောက်ကြီးက ဘုန်းကြီးကျောင်းနားကို စစ်တပ် ဗုံးကြဲတာမှာ သေဆုံးတာ အမျိုးသမီး တွေ ပိုများတယ်။ အခု ပုဏ္ဏားကျွန်း၊ ရသေ့တောင်၊ စစ်တွေ နယ်စပ် အပါအဝင် ရခိုင်တစ်ပြည်လုံးကို ကြဲနေ တာပါ” ဟု လက်ရှိ မြေပြင်အခြေအနေကို ပြောသည်။ ပြီးခဲ့သည့် ဩဂုတ်လ ၁၀ ရက်နေ့ကလည်း သံတွဲမြို့နယ်၊ ကျောက်ကြီးကျေးရွာ ဘုန်းကြီးကျောင်း အနီးပတ်ဝန်း ကျင်သို့ စစ်အုပ်စုတပ်က လေကြောင်းမှ ဗုံးကြဲတိုက်ခိုက်ခဲ့သဖြင့် အမျိုးသမီး ၁၁ ဦး အပါအဝင် ဒေသခံ ၁၆ ဦး ဗုံးစထိမှန် သေဆုံးခဲ့ပြီး ပြည်သူအများအပြား ဒဏ်ရာရရှိခဲ့သည်။ နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ၏ စက်တင်ဘာလ ၂၂ ရက်နေ့ ထုတ်ပြန်ချက် အရ ပြီးခဲ့သည့် ဇူလိုင်လ ၁ ရက်မှ စက်တင်ဘာလ ၂၂ ရက်အထိ သုံးလနီးပါး ကာလအတွင်း နိုင်ငံတစ်ဝန်း စစ်အုပ်စုတပ်ကြောင့် အမျိုးသမီး စုစုပေါင်း ၈၉ ဦး သေဆုံးခဲ့ရာတွင် ရခိုင်ပြည်မှ အယောက် ၃၀ ပါဝင်သဖြင့် အမျိုးသမီး သေဆုံးမှု အများဆုံး ဒေသဖြစ်ခဲ့ကြောင်း ဖော်ပြထားသည်။ AAPP ၏ စာရင်းများအရ အဆိုပါ သုံးလတာအတွင်း သေဆုံးခဲ့ရသည့် အမျိုးသမီး ၈၉ ဦးအနက် ၇၆ ဦးမှာ လေကြောင်းမှ တိုက်ခိုက်ခံရမှုကြောင့် သေဆုံးခဲ့ရခြင်းဖြစ်ပြီး အသက် ၁၈ နှစ်အောက် မိန်းကလေး ၁၂ ဦး ပါဝင်သည် ဟု ဆိုသည်။ AAPP က “သေဆုံးရသည့် အကြောင်းအရင်းအနေဖြင့် (၇၆) ဦးမှာ လေကြောင်းဖြင့် တိုက်ခိုက်မှု ကြောင့် အများဆုံး သေဆုံးခဲ့ပြီး သေဆုံးသူများအနက် ရခိုင်ပြည်နယ်၌ (၃၀) ဦးဖြင့် အများဆုံး သေဆုံးခဲ့သည်” ဟု သတင်းထုတ်ပြန်ချက်တွင် ထည့်သွင်းဖော်ပြထားသည်။ ၂၀၂၁ ခုနှစ် ဖေဖော်ဝါရီလ ၁ ရက် စစ်အာဏာသိမ်းချိန်မှ ၂၀၂၆ ခုနှစ် စက်တင်ဘာလ ၂၂ ရက်နေ့အထိ စစ်အုပ်စု တပ်နှင့် ၎င်း၏ လက်ပါးစေများကြောင့် နွေဦးတော်လှန်ရေးကာလအတွင်း သေဆုံးခဲ့ရသည့် ပြည်သူ စုစုပေါင်း ၈,၄၁၈ ဦး ရှိပြီဖြစ်ကြောင်းလည်း AAPP ၏ စာရင်းများတွင် ဖော်ပြထားသည်။ ဓါတ်ပုံ - (စစ်တပ်၏ လေကြောင်းတိုက်ခိုက်မှုကြောင့် သေဆုံးခဲ့ရသည့် ပလက်ဝ၊ စိမ်းညှင်းဝကျေးရွာမှ မူလတန်းကျောင်းသားနှင့် ဒေသခံများ။ / AA) #ရခိုင်ပြည်နယ် #AA #စစ်အုပ်စု

ရခိုင်တွင် စစ်တပ်၏ လေကြောင်းတိုက်ခိုက်မှုများကြောင့် အမျိုးသမီး သေဆုံးသူ မြင့်တက်လာ

ရခိုင်တွင် စစ်တပ်၏ လေကြောင်းတိုက်ခိုက်မှုများကြောင့် အမျိုးသမီး သေဆုံးသူ မြင့်တက်လာ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၂၃ ရက်။ ရခိ…

  • September 23, 2026
စစ်ကိုင်း၊ ရှမ်းနှင့် ကချင်တွင် စစ်အုပ်စုက လေကြောင်းမှ ဆက်တိုက် ဗုံးကြဲ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၃ ရက်။ စစ်ကိုင်းတိုင်း အင်းတော်မြို့နှင့် ရှမ်းပြည် မဘိမ်းမြို့တို့ကို စစ်အုပ်စုတပ်က လေကြောင်းမှ ဆက်တိုက် ဗုံးကြဲ တိုက်ခိုက်ခဲ့သလို KIO ထိန်းချုပ်နယ်မြေများ၌လည်း လေကြောင်းအန္တရာယ် သတိပေးချက်များ ထုတ်ပြန်ထား သည်။ စက်တင်ဘာလ ၂၃ ရက် ယနေ့နံနက် ၁၁ နာရီခွဲခန့်တွင် တိုက်ပွဲဖြစ်ပွားခြင်းမရှိဘဲ အင်းတော်မြို့နယ်ထဲက နေရာ အချို့နှင့် ကျေးရွာများကို စစ်အုပ်စုတပ်က လေကြောင်းမှ ဗုံးကြဲခဲ့သဖြင့် မီးလောင်ကျွမ်းမှုများ ဖြစ်ပွားခဲ့သည်။ ထို့ပြင် ရှမ်းပြည် မြောက်ပိုင်း မဘိမ်းမြို့နယ်အတွင်းသို့လည်း စက်တင်ဘာလ ၂၂ ရက်နေ့က ဗုံးအလုံးရေ ၄၀ ခန့် ကြဲချခဲ့သည့်အပြင် ယနေ့နံနက်ပိုင်းတွင်လည်း ထပ်မံတိုက်ခိုက်ခဲ့ကြောင်း မြေပြင်ရှိ တော်လှန်ရေးတပ်ဖွဲ့ဝင် တစ်ဦးက ပြောသည်။ “မနေ့ကလည်း အလုံး ၄၀ ကျော်လောက် လာကြဲသွားတာ။ ဒီနေ့မနက်မှာလည်း လေယာဉ်သံတွေကြားရပြီး ထပ်ကြဲသွားတယ်။ အိမ်ထဲက ဗုံးခိုကျင်းထဲမှာပဲ ပုန်းနေရတော့ အပြင်မှာ ထိခိုက်ပျက်စီးမှု အခြေအနေ ဘယ် လောက်ရှိလဲဆိုတာ သေချာ မသိရသေးဘူး” ဟု လက်ရှိအခြေအနေကို ပြောသည်။ စစ်အုပ်စုတပ်သည် စစ်ရေးအရ အထိနာရှုံးနိမ့်ချိန်တိုင်း အရပ်သားပစ်မှတ်များကို လေကြောင်းမှ ဦးတည် တိုက် ခိုက်လေ့ရှိသဖြင့် ဖားကန့်၊ မိုင်ဂျာယန်၊ လိုင်ဇာနှင့် လွယ်ဂျယ် စသည့် KIO ထိန်းချုပ်နယ်မြေများတွင် ပြည်သူ များ ဗုံးခိုကျင်းများ ပြုလုပ်ထားကြရန်နှင့် ညအချိန် မီးမထွန်းကြရန် ဒေသတွင်း အုပ်ချုပ်ရေးအဖွဲ့များက ညွှန်ကြားထားသည်။ ဖားကန့်ဒေသရှိ KIO အုပ်ချုပ်ရေးနှင့် နီးစပ်သူတစ်ဦးက “ဆိုင်းတောင်နဲ့ ယူမာဘက်တကြောမှာ ပြည်သူတွေကို ညအချိန် မီးမထွန်းကြဖို့နဲ့ ဗုံးခိုကျင်းတွေထဲမှာပဲ အိပ်ကြဖို့ သတိပေးထားတယ်။ အထူးသဖြင့် မိုးကုန် ပွင့်လင်း ရာသီကူးတော့မှာဆိုတော့ တိုက်ပွဲတွေ ပိုပြင်းထန်လာပြီး လေကြောင်းနဲ့ လက်နက်ကြီး အန္တရာယ် ပိုဆိုးလာမှာ ကို ပြည်သူတွေရော အားလုံးက စိုးရိမ်နေကြတာပါ။ မနေ့ညကလည်း သေနတ်သံတွေ လက်နက်ကြီးသံတွေ ကြားလိုက်ရသေးတယ်” ဟု ပြောသည်။ ဗန်းမော်နှင့် နန့်ဖားကျေးရွာဘက်တွင် စစ်အုပ်စုတပ်က စစ်ကြောင်းထိုးလာသဖြင့် စက်တင်ဘာလ ၁၉ ရက်နှင့် ၂၀ ရက်နေ့တို့တွင် KIO/KIA တပ်များနှင့် တိုက်ပွဲများ ပြင်းထန်ခဲ့ပြီး မိုင်ဂျာယန်မြို့ပေါ်သို့လည်း စစ်တပ်၏ လေယာဉ်များ ဝဲပျံခဲ့သည်ဟု ဒေသခံများက ပြောသည်။ ထို့ကြောင့် လက်ရှိတွင် ကချင်လွတ်လပ်ရေးအဖွဲ့ KIO က မိုင်ဂျာယန်မြို့ရှိ ကျောင်းများကို လုံခြုံရေးအရ ပိတ်ထားလိုက်ပြီဟု လွယ်ဂျယ်ဒေသခံတစ်ဦးက ပြောသည်။ စစ်ကိုင်းတိုင်း အင်းတော်မြို့နယ်တွင်လည်း ကချင်လွတ်လပ်ရေးတပ်မတော် (KIA)၊ ကျောင်းသားတပ်မတော် (ABSDF) နှင့် PDF ပူးပေါင်းတပ်များ၏ ပြန်လည်ထိုးစစ်ကြောင့် စစ်အုပ်စုတပ်များ ဆုတ်ခွာခဲ့ရသည်။ ထို့ပြင် ဧရာဝတီ မြစ်ကြောင်းအတိုင်း တက်လာသည့် စစ်အုပ်စု စစ်သင်္ဘောများကို တော်လှန်ရေးတပ်များက တိုက်ခိုက်ခဲ့သည့် မိုးမောက်၊ ရွှေကူနှင့် ဗန်းမော်ဒေသတို့တွင်လည်း စစ်အုပ်စုတပ်က ရွာများကို ပစ်မှတ်ထား၍ လေကြောင်းမှ အကြိမ်များစွာ ဗုံးကြဲတိုက်ခိုက်လျက်ရှိကြောင်း မြေပြင်သတင်းရင်းမြစ်အချို့က ပြောသည်။ #အင်းတော်မြို့ #မဘိမ်းမြို့

စစ်ကိုင်း၊ ရှမ်းနှင့် ကချင်တွင် စစ်အုပ်စုက လေကြောင်းမှ ဆက်တိုက် ဗုံးကြဲ

စစ်ကိုင်း၊ ရှမ်းနှင့် ကချင်တွင် စစ်အုပ်စုက လေကြောင်းမှ ဆက်တိုက် ဗုံးကြဲ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၂၃ ရက်။ စစ်ကိုင်းတိုင်း…

  • September 23, 2026
မောင်တော ဟိန္ဒူဘုရားကျောင်းအနီး စစ်တပ် ထောင်ထားသည့် မိုင်းများကို AA ရှင်းလင်း သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၃ ရက်။ ရခိုင်ပြည်၊ မောင်တောမြို့နယ်ရှိ ဟိန္ဒူဘုရားကျောင်းဝန်းအတွင်း စစ်အုပ်စုတပ် ထောင်ထားခဲ့သည့် မြေမြှုပ်မိုင်း များကို အာရက္ခတပ်တော် (AA) က ရှာဖွေရှင်းလင်းခဲ့ကြောင်း ဒေသခံများက ပြောသည်။ မောင်တောမြို့နယ်တောင်ပိုင်း၊ ကျောက်ပန္ဒူကမ်းခြေအနီးရှိ ဟိန္ဒူဘာသာဝင်များ ကိုးကွယ်သည့် “မဟာရာမယ ဏ ဟရိနာမ ရာမ” ဟိန္ဒူဘုရားကျောင်း ကွင်းပြင်နှင့် အနီးဝန်းကျင်တွင် စစ်အုပ်စုတပ် ထောင်ထားခဲ့သည့် M-14 မြေမြှုပ်မိုင်း ၄ လုံးကို စက်တင်ဘာလ ၁၈ ရက် နံနက်ပိုင်းတွင် AA မိုင်းရှင်းလင်းရေး တပ်ဖွဲ့က ရှာဖွေတွေ့ရှိ၍ ရှင်းလင်းခဲ့ခြင်း ဖြစ်သည်။ လက်ရှိတွင် အဆိုပါ ဘုရားကျောင်း အဝင်အထွက် လမ်းကြောင်းများ၌ မိုင်းရှင်းလင်းရေး လုပ်ငန်းများကို ဆက် လက် ဆောင်ရွက်လျက် ရှိသည်။ ဒေသခံ ရခိုင်ပြည်မြောက်ပိုင်း အာရက္ခတပ်တော်နှင့် နီးစပ်သူ အမျိုးသားတစ်ဦးက “မောင်တောမှာ စစ်တပ် ထောင်ထားခဲ့တဲ့ မိုင်းတွေကို လူမျိုးဘာသာမရွေး နေထိုင်တဲ့ နေရာတွေမှာ ရှင်းလင်းနေတာ။ အခုနှစ်ပိုင်းတွေမှာ ပိုပြီး လုပ်လာတယ်။ မွတ်ဆလင်ရွာတွေ ဟိန္ဒူရွာတွေကလည်း တောင်းဆိုတာတွေ ရှိတယ်။ မောင်တောက စစ်တပ် တပ်စွဲခဲ့တဲ့ နေရာတွေကို အဓိက ရှင်းတယ်။ လမ်းမကြီးတွေ၊ ကျေးရွာတွေကိုလည်း မိုင်းရှင်းလင်း ပေးနေတယ်” ဟု ပြောသည်။ မောင်တောမြို့နယ်အတွင်း စစ်အုပ်စုတပ် စခန်းချ တပ်စွဲခဲ့သည့် နေရာများ၌ မြေမြှုပ်မိုင်းများနှင့် မပေါက်ကွဲ သေးသည့် စစ်လက်နက်ပစ္စည်းများ ကျန်ရှိနေဆဲဖြစ်ရာ ၂၀၂၆ ခုနှစ် ဇန်နဝါရီလမှ စက်တင်ဘာလအထိ ၉ လ တာကာလအတွင်း AA မိုင်းရှင်းလင်းရေးတပ်ဖွဲ့က မိုင်းစုစုပေါင်း ၁၁၉ လုံးအထိ ရှင်းလင်းခဲ့ကြောင်း ထုတ်ပြန် ချက်များအရ သိရသည်။ တပ်စခန်းဟောင်းများ၊ ဘာသာရေးကျောင်းများ၊ လမ်းပိုင်းများ၊ တောင်တန်း၊ စိုက်ပျိုးရေး ဧရိယာများနှင့် လူသွားနည်းသည့် လမ်းကြောင်းများတွင် မိုင်းရှင်းလင်းရေး ဆောင်ရွက်နေသော်လည်း မိုင်းအန္တရာယ် ကျန်ရှိ နေသေးသဖြင့် သွားလာရေး အထူးသတိပြုကြရန် ဒေသခံများကို အသိပေးထားသည်။ ထို့ပြင် AA ထိန်းချုပ်ရာ ဒေသများ၌ မိုင်းအန္တရာယ် အသိပညာပေးခြင်း၊ လက်ကမ်းစာစောင်များ ဖြန့်ဝေခြင်းနှင့် အန္တရာယ်ရှိနိုင်သည့် နေရာများ၌ သတိပေးဆိုင်းဘုတ်များ တပ်ဆင်ခြင်းတို့ကိုလည်း ပြုလုပ်လျက် ရှိသည်။ #မောင်တောမြို့နယ်

မောင်တော ဟိန္ဒူဘုရားကျောင်းအနီး စစ်တပ် ထောင်ထားသည့် မိုင်းများကို AA ရှင်းလင်း

မောင်တော ဟိန္ဒူဘုရားကျောင်းအနီး စစ်တပ် ထောင်ထားသည့် မိုင်းများကို AA ရှင်းလင်း သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၂၃ ရက်။ ရခိုင်ပြ…

  • September 23, 2026
ကရင်နီတွင် စစ်တပ်က အရပ်သားများကို ဒရုန်းဖြင့် ပစ်မှတ်ထား သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၃ ရက်။ ရှမ်း-ကရင်နီအစပ်နှင့် ကရင်နီပြည်တွင် စစ်အုပ်စုတပ်သည် စစ်ဘေးရှောင်စခန်းများ၊ ကျေးရွာများ၊ စာသင် ကျောင်းများနှင့် စိုက်ပျိုးရေးခင်းများကို အသေခံဒရုန်းနှင့် လေကြောင်းသုံး၍ ပစ်မှတ်ထား ဆက်တိုက် တိုက်ခိုက် နေသည်ဟု ဒေသခံများနှင့် စစ်ရှောင်များက ပြောသည်။ မိုးဗြဲ-နန်းမယ်ခုံ-ဒီးမော့ဆို လမ်းမကြီးအား ပြန်လည်ထိန်းချုပ်နိုင်ရန် ကြိုးပမ်းနေသည့် စစ်အုပ်စုတပ်သည် မြေပြင်၌ ရှေ့မတိုးနိုင်ဘဲ အထိနာနေသောကြောင့် လေကြောင်းနှင့် ဒရုန်းအသုံးပြု တိုက်ခိုက်မှုများကို ပိုမို ခပ်စိပ် စိပ် ပြုလုပ်လာခြင်းဖြစ်သည်။ စက်တင်ဘာလ ၂၂ ရက် နံနက်ပိုင်းတွင်လည်း ကရင်နီပြည်၊ ဖရူဆိုမြို့နယ် အရှေ့ဘက်ခြမ်း (ကေးလျားမြို့နယ်) ရှိ ကျေးရွာတစ်ရွာသို့ စစ်အုပ်စုတပ်က ဒရုန်းဖြင့် ဗုံးကြဲတိုက်ခိုက်ခဲ့သဖြင့် အမျိုးသားတစ်ဦး ဦးခေါင်းနှင့် နောက်ကျောတို့တွင် ဒရုန်းဗုံးစ ထိမှန်ဒဏ်ရာ ရရှိခဲ့သည်။ စစ်ရှောင်များကို အကူအညီပေးနေသူ တစ်ဦးက “စစ်အုပ်စုတပ်က နေသာတဲ့ရက်ဆို နေ့စဉ်ရက်ဆက် ဒရုန်းနဲ့ ကင်းထောက်တာတွေ၊ တောင်ယာလုပ်ငန်းခွင်တွေကို ပစ်မှတ်ထား တိုက်ခိုက်တာတွေ လုပ်နေတာပါ။ အခု ရက်က တောင်ယာပေါင်းရှင်းရမယ့် ရာသီဖြစ်ပေမဲ့ လုံခြုံရေးအရ ခင်းထဲမသွားရဲကြတော့ သီးနှံတွေ ပျက်စီး မှာ သေချာနေသလို ရှေ့ဆက် စားနပ်ရိက္ခာ အခက်အခဲတွေပါ ကြုံလာရနိုင်ပါတယ်” ပြောသည်။ ထို့ပြင် ရှမ်း-ကရင်နီနယ်စပ်၊ မိုးဗြဲမြို့ရှိ ဝါရီဆူးပလိုင်ကျေးရွာ၌ စက်တင်ဘာလ ၂၁ ရက်နေ့၊ ညနေ ၄ နာရီ အချိန်ခန့်တွင် စစ်ဘေးရှောင်စခန်းမှ ထင်းသယ်ရန် ရွာအတွင်းသို့ ခဏပြန်လာသည့် အသက် ၅၀ ဝန်းကျင် အမျိုးသမီးတစ်ဦးမှာ စစ်အုပ်စုတပ် ပစ်ခတ်လိုက်သည့် လက်နက်ကြီး ကျရောက်ပေါက်ကွဲမှုကြောင့် သေဆုံးခဲ့ ရသည်။ မိုးဗြဲဒေသခံတစ်ဦးက “ဝါရီဆူးပလိုင်ရွာနားထိ စစ်တပ်စစ်ကြောင်း မရောက်သေးပေမဲ့ လက်နက်ကြီးနဲ့ အဝေး ကနေ ခကြာခဏ လှမ်းပစ်နေတာပါ။ ဒရုန်းတွေလည်း နေ့တိုင်း ဝဲနေတော့ ရွာထဲ ခဏပြန်တာတောင် အသက် အန္တရာယ် ရှိနေတယ်” ဟု ပြောသည်။ ပြီးခဲ့သည့် စက်တင်ဘာလ ၁၆ ရက်ကလည်း ဒီးမော့ဆိုမြို့နယ် အနောက်ဘက်ခြမ်းရှိ မိဘမဲ့ကလေးကျောင်းကို စစ်အုပ်စုတပ်က အသေခံဒရုန်းဖြင့် တိုက်ခိုက်ခဲ့ရာ ကစားနေသည့် အသက် ၉ နှစ်အရွယ် ကလေးငယ်တစ်ဦး သေဆုံးခဲ့ရသည့်အပြင်၊ ဖရူဆိုမြို့နယ် မိုဆိုရွာအနီး ဒရုန်းကျရောက်မှုကြောင့် KNDF တပ်ဖွဲ့ဝင် ၅ ဦး ကျဆုံးခဲ့ ရသည်။ စက်တင်ဘာလဆန်းပိုင်းမှစ၍ ဒီးမော့ဆို၊ လွိုင်ကော်၊ မိုးဗြဲနှင့် ဖရူဆိုမြို့နယ်တို့တွင် စစ်အုပ်စုတပ်၏ ဒရုန်းနှင့် လေကြောင်းတိုက်ခိုက်မှုများကြောင့် ကလေးငယ်များ အပါအဝင် အရပ်သား ၂၀ ထက်မနည်း သေဆုံးခဲ့ပြီး ဖြစ်သည်။ စစ်ရေးတင်းမာမှုနှင့် စစ်အုပ်စုတပ်၏ လေကြောင်းတိုက်ခိုက်မှုများကြောင့် လွိုင်ကော်အရှေ့ဘက်ခြမ်းရှိ စစ်ဘေးရှောင် ပြည်သူများသည်လည်း ဘေးလွတ်ရာသို့ ထပ်မံ ထွက်ပြေးတိမ်းရှောင်နေကြရသည်။ လက်ရှိတွင် စစ်အုပ်စုတပ်၏ ကင်းထောက်ဒရုန်းနှင့် အသေခံဒရုန်းများ အသုံးပြုမှု ခပ်စိပ်စိပ် ရှိနေသဖြင့် ဒေသခံပြည်သူများနှင့် စစ်ဘေးရှောင်များအနေဖြင့် လူစုလူဝေးပွဲများ ပြုလုပ်ခြင်းကို ရှောင်ရှားကြရန်နှင့် လေကြောင်းအန္တရာယ် သတိထားကြရန် တော်လှန်ရေးအဖွဲ့အစည်းများက နှိုးဆော်ထားသည်။ ထို့ပြင် မိုးဗြဲ PDF ကလည်း လုံခြုံရေးအခြေအနေအရ မိုးဗြဲမြို့အနောက်ဘက်ခြမ်းရှိ လွယ်ဝိုင်း၊ လွယ်ယင်း တောင်ခြေ၊ ခေါင်းစံလမ်းနှင့် သွားလာခွင့် ပိတ်ပင်ထားသည့် လမ်းကြောင်းများသို့ ဖြတ်သန်းသွားလာခြင်း မပြုကြရန် အသိပေး ထုတ်ပြန်ထားသည်။ ဓါတ်ပုံ - Crd #ကရင်နီ

ကရင်နီတွင် စစ်တပ်က အရပ်သားများကို ဒရုန်းဖြင့် ပစ်မှတ်ထား

ကရင်နီတွင် စစ်တပ်က အရပ်သားများကို ဒရုန်းဖြင့် ပစ်မှတ်ထား သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၂၃ ရက်။ ရှမ်း-ကရင်နီအစပ်နှင့် ကရင်နီပြ…

  • September 23, 2026
ပုဏ္ဏားကျွန်းကို စစ်အုပ်စု လေကြောင်းမှ ဗုံးကြဲ၍ ပြည်သူ ၂ ဦး သေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၃ ရက်။ ရခိုင်ပြည်၊ ပုဏ္ဏားကျွန်းမြို့နယ်၊ ဖက်ကျကျေးရွာကို စစ်အုပ်စုတပ်က လေကြောင်းမှ ဗုံးကြဲတိုက်ခိုက်ခဲ့သဖြင့် စစ်ဘေးရှောင် အပါအဝင် ဒေသခံ အမျိုးသား နှစ်ဦး သေဆုံးခဲ့ကြောင်း ဒေသတွင်း သတင်းအရင်းအမြစ်များ က ပြောသည်။ ပုဏ္ဏားကျွန်းမြို့နယ်၊ ဖက်ကျကျေးရွာသို့ စက်တင်ဘာလ ၂၃ ရက်နေ့၊ နံနက်အစောပိုင်း ၁၂ နာရီ ၄၀ မိနစ်ခန့်တွင် စစ်အုပ်စုတပ်က ဂျက်ဖိုက်တာ အမျိုးအစား တိုက်လေယာဉ် နှစ်စီးနှင့် Y-12 လေယာဉ်တို့ကို အသုံးပြုကာ ဗုံးအလုံးရေ ၂၀ နီးပါး ကြဲချတိုက်ခိုက်ခဲ့ခြင်းဖြစ်သည်။ အဆိုပါ ဗုံးသီးများသည် ကျေးရွာ စာသင်ကျောင်း အနီးဝန်းကျင်နှင့် ဒေသခံများ နေထိုင်ရာ ရပ်ကွက်များ အတွင်းသို့ ကျရောက်ပေါက်ကွဲခဲ့သည်။ အဆိုပါ လေကြောင်းတိုက်ခိုက်မှုကြောင့် ပုဏ္ဏားကျွန်းမြို့၊ စံပြရပ်ကွက်မှ ဖက်ကျကျေးရွာသို့ လာရောက် စစ်ဘေးရှောင်နေသူ အသက် ၅၇ နှစ်အရွယ် ဦးမောင်မြကြည် နှင့် ဖက်ကျကျေးရွာ ဒေသခံ အသက် ၇၆ နှစ်အရွယ် ဦးအောင်သန်းမောင် တို့မှာ ဗုံးစထိမှန်ကာ ပြင်းထန်ဒဏ်ရာများ ရရှိပြီး သေဆုံးသွားခဲ့ရသည်။ ဒေသခံ ပရဟိတသမား အမျိုးသားတစ်ဦးက “ဟိုရက်ကပဲ ကုလားချောင်းကျေးရွာကို ကြဲလို့ တစ်ယောက် သေတယ်။ အခု ဖက်ကျကို ကြဲလို့ ၂ ယောက်သေတယ်။ တော်တော်ဆိုးနေတာပါ” ဟု ပြောသည်။ ပုဏ္ဏားကျွန်းမြို့နယ်ကို အခု စစ်ကြောင်းထိုးပြီး တိုက်ပွဲတွေဖြစ်နေတယ်၊ ပြည်သူတွေလည်း ရှောင်ကြရတယ်၊ တော်တော်ဆိုးနေတာပါ။ လက်ရှိ စစ်တွေ-ပုဏ္ဏားကျွန်းမြို့နယ်အစပ်မှာ တိုက်ပွဲများ ပြင်းထန်နေတာပါ။ အရပ်သားပြည်သူတွေ နေထိုင်ရာ ရပ်ရွာတွေကို လေကြောင်းဗုံးကြဲတာ၊ လက်နက်ကြီးပစ်ခတ်တာတွေ ဆက်တိုက် ပြုလုပ်နေတယ်။ ပုဏ္ဏားကျွန်းမြို့နယ်က ကွမ်းတောင်၊ စပါးထား၊ ဖက်ကျနဲ့ ဒီပါရုံ အပါအဝင် ကျေးရွာ ၂၀ ကျော်က ဒေသခံ ထောင်နဲ့ချီ ဘေးလွတ်ရာ တိမ်းရှောင်နေကြရတယ်” ဟု ပြောသည်။ ဖက်ကျကျေးရွာသည် ပြီးခဲ့သည့် စက်တင်ဘာလ ၁၇ ရက် ညဉ့် ၁၁ နာရီခွဲခန့်ကလည်း စစ်အုပ်စုတပ်၏ မီးလောင်ဗုံး ကြဲချတိုက်ခိုက်မှု ခဲ့ရဖူးပြီး ဒေသခံ နေအိမ်တစ်လုံး တည့်တည့်ထိမှန် မီးလောင်ပြာကျခဲ့သည့်အပြင် ဒေသခံတစ်ဦး ဒဏ်ရာပြင်းထန်စွာ ရရှိခဲ့သည်။ ထို့အပြင် စက်တင်ဘာလ ၂၀ ရက် ညနေပိုင်းကလည်း ပုဏ္ဏားကျွန်းမြို့နယ်၊ ကုလားချောင်းကျေးရွာအတွင်းသို့ စစ်အုပ်စုတပ်က ဂျက်ဖိုက်တာဖြင့် ဗုံးသီး ၂ လုံး ကြဲချခဲ့သဖြင့် အသက် ၅၅ နှစ်အရွယ် ဦးစောသိန်း သေဆုံးခဲ့ရသေးသည်။ ဒေသခံ အမျိုးသားတစ်ဦးက “ပုဏ္ဏားကျွန်းမြို့နယ်ကို အခု စစ်ကြောင်းထိုးပြီး တိုက်ပွဲတွေ ဖြစ်နေတယ်။ ပြည် သူတွေလည်း ရှောင်ကြရတယ်၊ တော်တော်ဆိုးနေတာပါ။ လက်ရှိ စစ်တွေ-ပုဏ္ဏားကျွန်းမြို့နယ်အစပ်မှာ တိုက် ပွဲတွေ ပြင်းထန်နေတာပါ။ အရပ်သားပြည်သူတွေ နေထိုင်ရာ ရပ်ရွာတွေကို လေကြောင်းဗုံးကြဲတာ၊ လက်နက် ကြီး ပစ်ခတ်တာတွေ ဆက်တိုက် ပြုလုပ်နေတယ်။ ပုဏ္ဏားကျွန်းမြို့နယ်က ကွမ်းတောင်၊ စပါးထား၊ ဖက်ကျနဲ့ ဒီပါရုံ အပါအဝင် ကျေးရွာ ၂၀ ကျော်က ဒေသခံ ထောင်နဲ့ချီ ဘေးလွတ်ရာ တိမ်းရှောင်နေကြရတယ်” ဟု ပြော သည်။ လက်ရှိတွင် စစ်အုပ်စုတပ်သည် စက်တင်ဘာလ ၄ ရက်နေ့မှစ၍ ပုဏ္ဏားကျွန်းမြို့နယ်အတွင်းသို့ စစ်အင်အား ၁,၀၀၀ ကျော်ဖြင့် စစ်ကြောင်းများခွဲကာ ထိုးစစ်ဆင်တိုက်ခိုက်လျက်ရှိပြီး စစ်တွေ-ပုဏ္ဏားကျွန်း နယ်စပ်အနီး တိုက်ပွဲများ ပြင်းထန်နေသည်။ စစ်အုပ်စုတပ်ဘက်မှ စစ်ရေးနှင့် မသက်ဆိုင်သည့် အရပ်သား ပြည်သူများ နေထိုင်ရာ ကျေးရွာများသို့ လေကြောင်းဗုံးကြဲခြင်းနှင့် လက်နက်ကြီးများဖြင့် ဆက်တိုက် ပစ်ခတ်တိုက်ခိုက်နေသဖြင့် ကွမ်းတောင်၊ စပါး ထား၊ ဖက်ကျ နှင့် ဒီပါရုံ ကျေးရွာ အပါအဝင် ရွာပေါင်း ၂၀ ကျော်မှ ဒေသခံ ထောင်ပေါင်းများစွာ ဘေးလွတ်ရာ သို့ အရေးပေါ် တိမ်းရှောင်နေကြရသည်။ ဓါတ်ပုံ - Crd #ပုဏ္ဏားကျွန်းမြို့နယ်

ပုဏ္ဏားကျွန်းကို စစ်အုပ်စု လေကြောင်းမှ ဗုံးကြဲ၍ ပြည်သူ ၂ ဦး သေဆုံး

ပုဏ္ဏားကျွန်းကို စစ်အုပ်စု လေကြောင်းမှ ဗုံးကြဲ၍ ပြည်သူ ၂ ဦး သေဆုံး သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၂၃ ရက်။ ရခိုင်ပြည်၊ ပုဏ္ဏားက…

  • September 23, 2026
မကွေး - ရခိုင်အစပ်တိုက်ပွဲ စစ်တပ်က တပ်ရင်းမှူး ၂ ဦး သေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၃ ရက်။ မကွေးတိုင်း၊ မင်းတုန်းမြို့နယ်နှင့် ရခိုင်ပြည်အစပ်တွင် အာရက္ခတပ်တော် (AA) နှင့် ဖြစ်ပွားသည့် တိုက်ပွဲအတွင်း စစ်အုပ်စုတပ်ဘက်မှ တပ်ရင်းမှူး နှစ်ဦး အပါအဝင် အကျအဆုံး များပြားနေ ကြောင်း ဒေသတွင်း စစ်ရေးသတင်းအရင်းအမြစ်များက ပြောသည်။ စစ်အုပ်စုတပ်သည် ရခိုင်ပြည်၊ အမ်းမြို့နယ်အတွင်းသို့ ပြန်လည် ထိုးဖောက်ဝင်ရောက်နိုင်ရန် အတွက် မင်းတုန်း မြို့နယ် သဖန်ရောင်၊ ဝက်ကော်၊ ပြောင်းကျေးရွာများနှင့် ပွိုင့် (၉၄၈) တောင်ကုန်းဝန်းကျင်သို့ ဩဂုတ်လ ကတည်းက စစ်အင်အားဖြည့်တင်းကာ တကျော့ပြန် ထိုးစစ်ဆင်လာခြင်းဖြစ်သည်။ အဆိုပါ ထိုးစစ်အတွင်း ဖြစ်ပွားခဲ့သော တိုက်ပွဲများ၌ စစ်အုပ်စုတပ် မကွေးအခြေစိုက် တပ်မ (၅၅) လက်အောက် ခံ တပ်ရင်းများမှ တပ်ရင်းမှူး နှစ်ဦးဖြစ်သည့် ဒုတိယဗိုလ်မှူးကြီး တင်မျိုးထွဋ် နှင့် ဒုတိယဗိုလ်မှူးကြီး မြတ်သင်း ကျော် တို့ ကျဆုံးသွားကြောင်း ဒေသတွင်း သတင်းများက ဆိုသော်လည်း သီးခြား အတည်မပြုနိုင်သေးပေ။ မကွေးဒေသခံ စစ်ရေးသတင်းအရင်းအမြစ်တစ်ဦးက “မင်းတုန်းမြို့နယ် သဖန်ရောင်- တလိုင်းတောင်း ရိုးမ ကျော် လမ်းမှာ တိုက်ပွဲဖြစ်လိုက် ပြန်ငြိမ်သွားလိုက်နဲ့ဖြစ်နေတာပါ။ အခုရက်ပိုင်း တိုက်ပွဲပြင်းထန်တယ်၊ စစ်တပ် အင်အားဖြည့်နေတာ ဩဂုတ်လကတည်းကပါ။ အခုတော့ ပြောင်းရွာ၊ ဝက်ကော်ရွာ၊ သဖန်းရောင်၊ ပွိုင့် ၉၄၈ အဲ့နေရာတွေမှာ စစ်ကြောင်းထိုးတဲ့ စစ်တပ်နဲ့ အေအေ တိုက်ပွဲပြင်းထန်နေတာပါ။ လက်ရှိ တိုက်ပွဲတွေ ဆက်ရှိနေတယ်၊ စစ်တပ် အထိအခိုက်များတယ်၊ အရာရှိတွေတောင် ကျတယ်” ဟု ပြောသည်။ ထို့ပြင် မင်းတုန်းမြို့နယ်၊ ကံကြိုးကျေးရွာအနီးနှင့် ပွိုင့် (၉၄၈) တောင်ကုန်းအနီး၌ စက်တင်ဘာလ ၂၀ ရက်နှင့် ၂၁ ရက်နေ့များတွင် တိုက်ပွဲများ ပြင်းထန်စွာ ဖြစ်ပွားခဲ့ပြီး စက်တင်ဘာလ ၂၃ ရက် နံနက်ပိုင်းအထိ နှစ်ဖက်ကြား ထိတွေ့တိုက်ပွဲများ ဆက်လက်ရှိနေသည်။ အဆိုပါ တိုက်ပွဲများအတွင်း စစ်အုပ်စုတပ် စစ်ကြောင်းများထံမှ သိမ်းဆည်းရမိခဲ့သော လက်နက်ခဲယမ်းများ၊ စစ်အသုံးအဆောင်ပစ္စည်းများနှင့် စစ်အုပ်စုတပ်ဖွဲ့ဝင် ရုပ်အလောင်းအချို့၏ ဓာတ်ပုံများကို အာရက္ခတပ်တော် (AA) က စက်တင်ဘာလ ၂၂ ရက် ညပိုင်းတွင် သတင်းထုတ်ပြန်ခဲ့သည်။ စစ်အုပ်စုတပ်သည် ရခိုင်နှင့် မင်းတုန်း ကုန်သွယ်စီးဆင်းနေသည့် အဓိကလမ်းကြောင်းဖြစ်သော တလိုင်းတောင်း လမ်းကို ပိတ်ဆို့ထားပြီး AA ရှိနိုင်သည့် နေရာများကို ဂျက်ဖိုက်တာဖြင့် ဗုံးကြဲတိုက်ခိုက်မှုများ ဆက်တိုက်ပြု လုပ်လျက်ရှိသည်။ မြေပြင်တွင်လည်း အင်အား ၁,၀၀၀ နီးပါးဖြင့် အနီးဝန်းကျင်ကျေးရွာများသို့ စစ်ကြောင်းများခွဲ၍ ထိုးစစ်ဆင်နေ သဖြင့် နှစ်ဖက်တိုက်ပွဲများ ပြင်းထန်နေခြင်းဖြစ်သည်။ ဒေသခံ အမျိုးသမီးတစ်ဦးက “မင်းတုန်းရခိုင်အစပ်ကျေးရွာတွေက မတည်ငြိမ်တာ နှစ်ချီနေပါပြီ။ ရွာတွေထဲ ပြန်နေလိုက် ပြေးလိုက်ပါပဲ။ သဖန်ရောင်၊ ဝက်ကော်၊ ပြောင်း နဲ့ ပတ်ဝန်းကျင် ကျေးရွာတွေက လူတွေက အကုန်ထွက်ပြေးနေကြတယ်” ဟု ပြောသည်။ လက်ရှိတွင် သဖန်ရောင်၊ ဝက်ကော်နှင့် ပြောင်းကျေးရွာအပါအဝင် မင်းတုန်း-ရခိုင်နယ်စပ် ကျေးရွာများမှ ဒေသခံများမှာ အိုးအိမ်ပစ်ဘေးလွတ်ရာသို့ အရေးပေါ် ထွက်ပြေးတိမ်းရှောင်နေကြရပြီး စစ်အုပ်စုတပ်၏ လေကြောင်းတိုက်ခိုက်မှုနှင့် မြေပြင်ထိုးစစ်များကြောင့် နှစ်ဖက်တိုက်ပွဲမှာ ဆက်လက် အရှိန်မြင့်တက်နေဆဲ ဖြစ်သည်။ ဓါတ်ပုံ - ULA/AA #မင်းတုန်းမြို့နယ်

မကွေး – ရခိုင်အစပ်တိုက်ပွဲ စစ်တပ်က တပ်ရင်းမှူး ၂ ဦး သေဆုံး

မကွေး - ရခိုင်အစပ်တိုက်ပွဲ စစ်တပ်က တပ်ရင်းမှူး ၂ ဦး သေဆုံး သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၂၃ ရက်။ မကွေးတိုင်း၊ မင်းတုန်းမြို့န…

  • September 23, 2026
ART ဆေး ပြန်ရသော်လည်း ဆေးပြတ်မည်ကို မြစ်ကြီးနားနှင့် ဝိုင်းမော် လူနာများ စိုးရိမ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၂ ရက်။ ကချင်ပြည်၊ မြစ်ကြီးနားနှင့် ဝိုင်းမော်မြို့နယ်တို့တွင် သက်ဆိုင်ရာက ပြတ်လပ်နေသည့် HIV ရောဂါထိန်းချုပ် ဆေး (ART) များကို ပြန်လည်ထုတ်ပေးနေပြီ ဖြစ်သော်လည်း ဆေးဝါးရရှိမှု ပမာဏ အကန့်အသတ်ဖြင့်သာ ပေးနေသည့်အတွက် ပုံမှန်မှီဝဲနေရသူများအနေဖြင့် ဆေးဝါး ထပ်မံပြတ်လပ်သွားမည်ကို စိုးရိမ်လျက်ရှိကြသည်။ ပြီးခဲ့သည့် စက်တင်ဘာလဆန်းပိုင်းမှစ၍ သက်ဆိုင်ရာ ဆေးရုံများတွင် ART ဆေးဝါး ပြတ်လပ်မှုများ ကြုံတွေ့ ခဲ့ရပြီးနောက် စက်တင်ဘာလ ၂၁ ရက်နေ့မှ စတင်ကာ မြစ်ကြီးနား ပြည်သူ့ဆေးရုံကြီး ART ဌာန၌ တစ်ပတ်လျှင် ၃ ရက်၊ စာအုပ်ပြသ၍ တစ်ကြိမ်လျှင် ဆေးတစ်လစာစီ ပြန်လည်ထုတ်ပေးနေခြင်း ဖြစ်သည်။ အမည်မဖော်လိုသည့် စေတနာ့ဝန်ထမ်းတစ်ဦးက “မြစ်ကြီးနားကို ဆေးတွေပို့လိုက်တာက ၁၈ ရက်နေ့ကပါ။ ဆိုတော့ ၂၁ ရက်နေ့ကို အကုန်ပြန်ထုတ်ပေးနိုင်အောင် ပြင်ဆင်ထားတယ်။ အခုလည်း ထုတ်ပေးနေပါပြီ။ ဆေးလုံးဝပြတ်သွားတာမျိုး မဖြစ်အောင်တော့ ကြိုးစားနေကြပါတယ်။ တခြားတော့ ဘာမှ ပြောလို့မရဘူး” ဟု ပြောသည်။ ယခင်က ဆေးတစ်ကြိမ်ထုတ်လျှင် ၂ လမှ ၃ လစာအထိ ပုံမှန်ရရှိခဲ့သော်လည်း စစ်အုပ်စုတပ် အာဏာသိမ်းပြီး နောက်ပိုင်း အစိုးရဆေးရုံများက တာဝန်ယူ ထုတ်ပေးချိန်မှစ၍ ဆေးဝါးရရှိမှု နည်းပါးလာခဲ့ကြောင်း ဆေးလာ ရောက်ထုတ်ယူသူများက ဆိုသည်။ မြစ်ကြီးနားမြို့သို့ ဆေးလာရောက်ထုတ်ယူသည့် ဒေသခံတစ်ဦးက “အရင်ကဆိုရင် ဆေးရုံကို ၃ လမှ တစ်ခေါက် ပဲ သွားရတာ။ အခုကျတော့ ဆေးရုံက အခြေအနေကြည့်ပြီး တစ် ပတ်စာ၊ ဆယ့်ငါးရက်စာ၊ အခုဆိုရင် တစ်လ စာလောက်ပဲ အကန့်အသတ်နဲ့ ခွဲတမ်းချပေးတော့တာ။ နယ်ဘက် ကလာရတဲ့ သူတွေဆို လမ်းစရိတ်လည်း မလွယ်ဘူး။ စစ်ဆေးရေးဂိတ်တွေကို ခက်ခက်ခဲခဲ ဖြတ်သန်းပြီးမှ ဆေးလာထုတ်ရတာဆိုတော့ ဆေးရုံကို ခကြာခဏ မလာနိုင်ကြဘူး။ ဆေးပြန်ရပြီဆိုပေမဲ့ နောက်ပိုင်း ထပ်ပြတ်သွားမှာကို အရမ်းစိုးရိမ်ရတယ်” ဟု ပြောသည်။ အလားတူ မူးယစ်ပြန်လည်ထူထောင်ရေး သင်တန်းကျောင်းများတွင် ရှိနေသူများနှင့် လမ်းပန်းဆက်သွယ်ရေး ခက်ခဲသည့် ဝေးလံခေါင်ဖျား ဒေသမှ လူနာများမှာလည်း ဆေးဝါးခွဲတမ်း နည်းပါးခြင်းနှင့် လမ်းစရိတ် အခက်အခဲများကြောင့် ဆေးပုံမှန် ထုတ်ယူနိုင်ရေးအတွက် စိန်ခေါ်မှုများစွာ ကြုံတွေ့နေရသည်။ ART ဆေး (Anti-retroviral therapy) ဆိုသည်မှာ ခန္ဓာကိုယ်အတွင်းရှိ HIV ဗိုင်းရပ်စ်ပိုးများ ထပ်မံ မပွားလာ စေရန် ထိန်းချုပ်ပေးသည့် ဆေးဝါးဖြစ်ပြီး အစဉ်ဆက်မပြတ် သောက်သုံးမှသာ သက်တမ်းစေ့ နေထိုင်နိုင်သလို အခြားသူများထံ ကူးစက်မှုကိုလည်း လျှော့ချပေးနိုင်မည် ဖြစ်သည်။ ကမ္ဘာ့ကျန်းမာရေးအဖွဲ့ (WHO) ၏ HIV ကုသရေး လမ်းညွှန်ချက်များအရ ART ဆေးကို တစ်လအတွင်း ၃ ကြိမ်ထက်မက သောက်သုံးရန် ပျက်ကွက်ပါက ဆေးယဉ်ပါးမှု ဖြစ်လာနိုင်ပြီး ရောဂါပိုး ပိုမိုပြန့်ပွားလာကာ ကိုယ်ခံအားစနစ် ပျက်စီးပြီး AIDS ရောဂါအဆင့်သို့ ရောက်ရှိကာ အသက်အန္တရာယ် ပေါ်ပေါက်နိုင်ကြောင်း သတိပေးထားသည်။ ART ဆေး ပုံမှန်သောက်သုံးနေရသည့် လူနာတစ်ဦးက “ကျနော်တို့အတွက် ဒီဆေးက အသက်ပဲ။ တစ်ရက်မှ ပျက်လို့မရဘူး။ ဆေးမသောက်ရရင် ကိုယ်ခံအားတွေ ကျပြီး ရောဂါပိုးတွေ ပွားလာမှာလေ။ ဩဂုတ်လတုန်းက မြစ်ကြီးနား၊ မိုးညှင်း၊ ဖားကန့်နဲ့ ဝိုင်းမော်ဘက် တွေ ကို ၃ လစာအထိ နောက်ဆုံးထား ထုတ်ပေးခဲ့တာ။ စက်တင်ဘာလဆန်းမှာ လုံးဝ ဆေးထုတ်မပေးနိုင်တော့လို့ အားလုံး စိတ်ခြောက်ခြားခဲ့ရတယ်။ အခု တစ်လစာ ပြန်ပေးပေမဲ့ အခြေအနေက စိတ်မချရသေးပါဘူး” ဟု ပြောသည်။ လက်ရှိတွင် ကချင်ပြည်အတွင်း ART ဆေး ပုံမှန်မှီဝဲနေရသူ ဦးရေ ၂ သောင်း ၈ ထောင်နီးပါး ရှိနေပြီး ဒေသတွင်း တိုက်ပွဲများနှင့် လမ်းပန်းဆက်သွယ်ရေး အခက်အခဲများကြားမှ ဆေးဝါး ရေရှည် ပုံမှန်ရရှိနိုင်ရေးအတွက် စိုးရိမ်ပူပန်မှုများ မြင့်တက်လျက်ရှိသည်။ ဓာတ်ပုံ - Crd #ART #HIV

ART ဆေး ပြန်ရသော်လည်း ဆေးပြတ်မည်ကို မြစ်ကြီးနားနှင့် ဝိုင်းမော် လူနာများ စိုးရိမ်

ART ဆေး ပြန်ရသော်လည်း ဆေးပြတ်မည်ကို မြစ်ကြီးနားနှင့် ဝိုင်းမော် လူနာများ စိုးရိမ် သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၂၂ ရက်။ ကချင်…

  • September 23, 2026
ရခိုင်တွင် ငွေသားပြတ်လပ်မှုကြောင့် ငွေထုတ်ခ မြင့်တက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၂ ရက်။ ရခိုင်ပြည်အတွင်း အာရက္ခတပ်တော် (AA) ထိန်းချုပ်ထားသည့် မြို့နယ်အချို့၌ ဒေသတွင်း ငွေကြေးလည်ပတ် စီးဆင်းမှု နည်းပါးလာပြီး လက်ငင်းငွေသား ရရှိရန် ခက်ခဲနေသဖြင့် ငွေလွှဲ၊ ငွေထုတ် ဝန်ဆောင်ခများ မြင့်တက် လာနေသည်ဟု ဒေသခံများက ပြောသည်။ ပြည်ပနှင့် အခြားဒေသများမှ AA ထိန်းချုပ်နယ်မြေများသို့ ငွေလွှဲပို့ရာတွင် ယခင်က ငွေတစ်သိန်းလျှင် ဝန်ဆောင် ခ ၅,၀၀၀ ကျပ်ကျော်မှ ရာခိုင်နှုန်း အဆင့်ဆင့် တိုးမြင့်လာခဲ့ပြီး ယခု စက်တင်ဘာလ နောက်ဆုံးပတ်တွင် တစ်သိန်းလျှင် ၇,၀၀၀ ကျပ်အထိ ဝန်ဆောင်ခ ပေးနေရကြောင်း ဒေသခံများက ပြောသည်။ စစ်အုပ်စု၏ လေကြောင်းတိုက်ခိုက်မှုများ၊ လမ်းပန်းဆက်သွယ်ရေး အခက်အခဲများနှင့် သယ်ယူပို့ဆောင် ရေး ထိန်းချုပ်ခံထားရမှုများကြောင့် ဒေသတွင်း၌ စီးပွားရေး လုပ်ကိုင်ရခက်ခဲကာ ပြည်ပရောက် မိသားစုဝင်များ လှေခါးထစ်ပေးပို့သည့် ငွေကြေးကိုသာ အဓိက အားထားနေရသူများမှာ ငွေထုတ်ခ မြင့်တက်လာသည့်အတွက် ထပ်မံ အခက်တွေ့နေကြရသည်။ ရခိုင်ပြည်တောင်ပိုင်းတွင် နေထိုင်သည့် ဒေသခံ အမျိုးသမီးတစ်ဦးက “အခု ကျမတို့ဒေသမှာ စီးပွားရေးလည်း မကောင်းဘူး။ နေ့စဉ်လိုလို ဗုံးကြဲနေတာကြောင့် လုပ်စားလို့က ဘာမှမရဘူး။ ပင်လယ်ဆင်းတာ၊ လယ်စိုက်တာ လည်း မအောင်မြင်ဘူး။ အဲတော့ နိုင်ငံခြားမှာ အလုပ်လုပ်နေတဲ့ သားသမီးတွေ၊ တခြားနေရာမှာ လုပ်နေကြတဲ့ ဆွေမျိုးတွေ၊ လင်တွေ၊ မိသားစုတွေဆီက ငွေကို အားထားပြီး စားနေရတာ။ အဲ့အချိန်မှာ ငွေလွှဲခတွေက ဈေး တက်လာတယ်။ တစ်သိန်းကို ခုနစ်ထောင်လောက် ပေးနေရတယ်။ အဲ့ဒါ နေရာတိုင်းမှာမရ၊ ထုတ်မယ့် နေရာကို မိုင်ချီပြီး သွားထုတ်ရတာပါ။ တော်တော် ခက်ခဲပါတယ်” ဟု ပြောသည်။ ထို့ပြင် ၂၀၂၆ ခုနှစ် ဇွန်လ ၁၁ ရက်တွင် KBZ Bank ၏ စနစ်အဆင့်မြှင့်တင်မှု ပြုလုပ်ပြီးနောက် KPay နှင့် KBZ ဘဏ် ဒစ်ဂျစ်တယ် ဝန်ဆောင်မှု အကောင့်အချို့ ပိတ်ပင်ခံရခြင်း သို့မဟုတ် အသုံးပြုခွင့် ကန့်သတ်ခံရခြင်းတို့ ကြောင့် ငွေလွှဲဝန်ဆောင်မှု လုပ်ကိုင်သူများအနေဖြင့် လက်ငင်းငွေသား ထုတ်ပေးရာတွင် ပိုမို ကြန့်ကြာ ခက်ခဲ လာခြင်း ဖြစ်သည်။ ယခုကဲ့သို့ ငွေထုတ်ခများ ဆက်တိုက်မြင့်တက်ပြီး ငွေသားရှားပါးလာရသည့် အကြောင်းရင်းနှင့် ပတ်သက်၍ ဒေသတွင်း ငွေလွှဲဝန်ဆောင်မှု လုပ်ကိုင်သူတစ်ဦးက ယခုကဲ့သို့ ပြောသည်။ “လမ်းကြောင်းတွေ ပိတ်ထားတော့ ဒေသတစ်ခုနဲ့တစ်ခု ငွေသားသယ်ဖို့က တော်တော်ခက်တယ်။ အပြင်မှာ ငွေစက္ကူအသစ် လည်ပတ်မှု မရှိသလောက်ဖြစ်နေသလို တဖက်မှာလည်း ဘဏ် KPay အကောင့်တွေ မကြာ ခဏ အပိတ်ခံရတာ၊ ကန့်သတ်ခံရတာတွေ ရှိတယ်။ ငွေထုတ်ပေးမယ့်သူတွေဘက်မှာ လက်ငင်းငွေသားရဖို့ အရင်းအနှီးနဲ့ သွားရေးလာရေးစရိတ် ပိုများလာတဲ့အခါ ဝန်ဆောင်ခကို တိုးယူရတော့တာပါ။” အခြားတစ်ဖက်တွင်လည်း ငွေသား ရှားပါးမှုနှင့်အတူ လက်ရှိ လည်ပတ်နေသည့် ငွေစက္ကူများအနက် ဟောင်း နွမ်း စုတ်ပြဲနေသော ငွေစက္ကူများကို အချို့သော စျေးဆိုင်များက လက်ခံရန် ငြင်းဆန်ကြသဖြင့် လက်ထဲတွင် ငွေရှိနေသော်လည်း လိုအပ်သည့် ကုန်ပစ္စည်းများကို ချက်ချင်း ဝယ်ယူ၍ မရသည့် အခြေအနေများနှင့်လည်း ကြုံတွေ့နေရသည်။ လက်ရှိတွင် ပြည်ပရောက် မိသားစုဝင်များ၏ ထောက်ပံ့ငွေဖြင့် မိသားစု စားဝတ်နေရေး၊ ကလေးများ၏ ပညာ ရေးနှင့် ဆေးဝါးစရိတ်များအတွက် တိုက်ရိုက် သုံးစွဲနေရသည့် အိမ်ထောင်စုများမှာ အပိုကုန်ကျစရိတ်များ ပေးဆောင်နေရသဖြင့် ငွေသားစီးဆင်းမှု ပုံမှန်ဖြစ်ရေးနှင့် ဒစ်ဂျစ်တယ် ငွေကြေး ဝန်ဆောင်မှု အခက်အခဲများကို အမြန်ဆုံး ဖြေရှင်းပေးရန် လိုအပ်နေကြောင်း ဒေသခံများက ထောက်ပြထားကြသည်။ ဓာတ်ပုံ - (AFP / မြန်မာငွေစက္ကူ ရေတွက်နေသူတစ်ဦးအား ၂၀၂၁ ခုနှစ် ဧပြီလ ၁၉ ရက်နေ့က တွေ့ရစဉ်။) #AA #ရခိုင်ပြည်နယ်

ရခိုင်တွင် ငွေသားပြတ်လပ်မှုကြောင့် ငွေထုတ်ခ မြင့်တက်

ရခိုင်တွင် ငွေသားပြတ်လပ်မှုကြောင့် ငွေထုတ်ခ မြင့်တက် သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၂၂ ရက်။ ရခိုင်ပြည်အတွင်း အာရက္ခတပ်တော် (AA…

  • September 23, 2026
ဆော်ဒီအာရေဗျအား ဗြိတိန်က လေကြောင်းစစ်ရေးအကူအညီ ပေးမည် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၂ ရက်။ အီရန်ကျောထောက်နောက်ခံပြု ဟူသီသူပုန်များ၏ တိုက်ခိုက်မှုကို ရင်ဆိုင်နေရသည့် ဆော်ဒီအာရေဗျနိုင်ငံအား ကာကွယ်ရေးဆိုင်ရာ စစ်ရေးအကူအညီများ ပေးအပ်သွားမည်ဟု ဗြိတိန်ဝန်ကြီးချုပ် အန်ဒီ ဘန်းဟမ်း (Andy Burnham) က ပြောကြားခဲ့သည်။ အဆိုပါ စစ်ရေးအကူအညီမှာ သီတင်းပတ်အနည်းငယ်ခန့်သာ ကြာမြင့်မည့် ကာလတို ကူညီမှုဖြစ်သည်။ ဆိုက်ပရပ်စ်နိုင်ငံရှိ ဗြိတိန်လေတပ်စခန်းမှ Voyager အမျိုးအစား လေထဲတွင် ဆီဖြည့်ပေးနိုင်သည့် လေယာဉ်တစ်စင်း စေလွှတ်၍ ဆော်ဒီတိုက်လေယာဉ်များကို ကူညီပေးသွားမည်ဖြစ်သည်။ မကြာသေးမီရက်ပိုင်းက ယီမင်နိုင်ငံရှိ ဟူသီသူပုန်များသည် ဆော်ဒီမြို့တော် ရိယတ် (Riyadh) နှင့် ပင်လယ်နီကမ်းရိုးတန်းရှိ စွမ်းအင်ထုတ်လုပ်ရေးစခန်းများကို ဒရုန်းများ၊ ဗာလစ်စတစ်ဒုံးကျည်များဖြင့် ပစ်ခတ်တိုက်ခိုက်ခဲ့သည်။ ပင်လယ်နီ ရေကြောင်းလမ်းကြောင်းမှာ ကမ္ဘာ့စီးပွားရေးအတွက် အရေးပါသောကြောင့် ကုန်ဈေးနှုန်းကြီးမြင့်မှုနှင့် စီးပွားရေးထိခိုက်မှုများကို ကာကွယ်ရန် ဆော်ဒီ၏ အကူအညီတောင်းခံမှုကို လက်ခံခဲ့ခြင်းဖြစ်ကြောင်း ဗြိတိန်ဝန်ကြီးချုပ်က ဆိုသည်။ ဗြိတိန်အနေဖြင့် စစ်ရေးအကူအညီ ပမာဏအနည်းငယ်သာ ပေးအပ်ခြင်းဖြစ်သော်လည်း ၂၀၁၄ ခုနှစ်ကတည်းက စတင်ခဲ့သည့် ယီမင်စစ်ပွဲအတွင်း ဗြိတိန် ပိုမိုပါဝင်ပတ်သက်လာမည်ကို စိုးရိမ်မှုများလည်း ထွက်ပေါ်လျက်ရှိသည်။ #Andy_Burnham

ဆော်ဒီအာရေဗျအား ဗြိတိန်က လေကြောင်းစစ်ရေးအကူအညီ ပေးမည်

ဆော်ဒီအာရေဗျအား ဗြိတိန်က လေကြောင်းစစ်ရေးအကူအညီ ပေးမည် သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၂၂ ရက်။ အီရန်ကျောထောက်နောက်ခံပြု ဟူသီသူပ…

  • September 22, 2026
×Close