သတင်း

မလေးပြန်ရခိုင်ဒေသခံအချို့ကို ဆက်လက်ထိန်းသိမ်းထားဆဲဖြစ် သတင်းနှင့် မီဒီယာကွန်ရက်။ ၂၀၂၆ ခုနှစ်၊ အောက်တိုဘာလ ၃၀ ရက်။ မလေးရှားနိုင်ငံမှ ပြစ်ဒဏ်ကျခံပြီးနောက် မြန်မာနိုင်ငံသို့ ပြန်လည်ရောက်ရှိလာသည့် ရခိုင်ဒေသခံများကို စစ်အုပ်စုက ရက်ပေါင်းများစွာ ထိန်းသိမ်းထားရာမှ အောက်တိုဘာလ ၂၈ ရက်နေ့တွင် အချို့ကို ပြန်လည် လွှတ်ပေးခဲ့သော်လည်း ကျန်ရှိနေသေးသူများမှာမူ မိသားစုနှင့် အဆက်အသွယ်မရဘဲ ဆက်ထိန်းသိမ်းခံနေ ရဆဲဖြစ်ကြောင်း မိသားစုဝင်များနှင့် တာဝန်ရှိသူများက ပြောသည်။ မလေးရှားနိုင်ငံမှ ပြန်လည်ပို့ဆောင်လိုက်သည့် မြန်မာနိုင်ငံသား ၁,၅၀၀ နီးပါးအနက် ရခိုင်ပြည်ဒေသခံ ၄၀၀ ကျော်ကို ရန်ကုန်မြို့ရှိ ယာယီထိန်းသိမ်းရေးစခန်းများတွင် စစ်အုပ်စုက ၂၄ ရက်အကြာ ဆက်လက် ထိန်းသိမ်း ထားခဲ့ခြင်း ဖြစ်သည်။ ထို့နောက် မလေးရှားလွှတ်တော်အတွင်း တုံ့ပြန်မှုများနှင့် သတင်းဌာနများ၏ ဖော်ပြချက်များ ထွက်ပေါ်လာ ပြီးနောက် အောက်တိုဘာလ ၂၈ ရက် နံနက်ပိုင်းမှစ၍ မှတ်ပုံတင်နှင့် အချက်အလက်များ တောင်းခံကာ မိသားစုဝင်များ သို့မဟုတ် အသိမိတ်ဆွေများ၏ အာမခံချက်ဖြင့် အချို့ကို ပြန်လည်လွှတ်ပေးခဲ့ခြင်း ဖြစ်သည်။ သို့သော် ထိုသို့လွှတ်ပေးရာတွင် လာရောက်ထုတ်ယူမည့် မိသားစုဝင်မရှိသူများ၊ အဆက်အသွယ် မရရှိသေးသူ များနှင့် အာမခံပေးမည့်သူ မရှိသေးသူများအတွက် မည်သို့စီစဉ်ဆောင်ရွက်ပေးမည်ကို ရှင်းလင်းစွာ မသိရ သေးဘဲ အချို့မှာ ငွေကြေးပေးဆောင်ရမည့် အခြေအနေများနှင့်ပါ ရင်ဆိုင်နေရကြောင်း ကူညီဆောင်ရွက်ပေးနေသူများက ဆိုသည်။ ရန်ကုန်မြို့၊ သာကေတမြို့နယ်မှ ရခိုင်အမျိုးသမီးတစ်ဦးက “လွှတ်ပေးတာတွေ လုပ်နေပါတယ် မှန်ပါတယ်၊ တချို့လွှတ်ပေးတယ်၊ တချို့ဘယ်မှာမှန်းမသိ။ စစ်တပ်ကလည်း လူအသိမခံချင်ဘူး။ အဲ့တော့ လာထုတ်တဲ့ ရခိုင်တွေကလည်း အသိခံချင်ရင် ပြန်ဖမ်းတာ၊ ငွေတောင်းတာတွေ လုပ်ဖို့ကြောက်တယ်။ နောက်တစ်ခုက ဆွေမျိုးတော်စပ်သူတွေ လာထုတ်ဆိုတော့ အထောက်အထားနဲ့ ပြန်ထုတ်ရတာလေ။ အဲ့တော့ ဆွေမျိုး မရှိတဲ့ သူ၊ အာမခံသူမရှိသူတွေ ဘယ်လိုလုပ်ရမလဲ ဆိုတာ ညှိနေတယ်၊ သေချာတယ် ငွေတော့ပေးရတော့မယ်” ဟု ပြောသည်။ ဖမ်းဆီးခံထားရသူများနှင့် နီးစပ်သည့် ရခိုင်ပြည်မြောက်ပိုင်း ဒေသခံအမျိုးသားတစ်ဦးကလည်း လက်ရှိ အခြေအနေများနှင့်ပတ်သက်၍ ယခုကဲ့သို့ ပြောသည်။ “အကုန်လုံး လွတ်ပေးတယ်ဆိုတာ ဘယ်သူပြောတာလဲ၊ အာမခံနိုင်လား။ အခုအဆက်အသွယ် မရသေးတာရယ်၊ မိသားစုတွေက ရခိုင်မှာရောက်နေလို့ မလာနိုင်လို့ ထုတ်လို့မရတာတွေရှိတယ်။ သူတို့ထိန်းသိမ်းထားတဲ့နေရာကို ဝင်ပြီးစုံစမ်းလို့ရလား၊ ပြောနေတာတွေနဲ့ လက်တွေ့လိုက်လုပ်နေရတာ ကွာခြားနေတယ်။ သိရသလောက် အများကြီးကျန်သေးတယ်။ ကျနော့်ဆွေမျိုးတစ်ယောက် ထုတ်လို့မရသေးဘူး။ ကျနော့်မိန်းမရဲ့ ဦးလေးလည်း လှိုင်သာယာမှာ သွားရှာတာ လူများနေတယ်၊ နောက်နေ့မှလာလို့ ပြန်လွှတ်တယ်။ ကိုယ့်ဆွေမျိုးတွေ လွတ်လာ တိုင်း အားလုံးလွတ်ပြီမပြောပါနဲ့။” စစ်အုပ်စုတပ်ဘက်က အလုပ်အကိုင်များ ရှာဖွေပေးမည်ဟုဆိုကာ ဆက်လက်ထိန်းသိမ်းထားခဲ့သော်လည်း ယခုကဲ့သို့ မိသားစုဝင်များ ကိုယ်တိုင် သွားရောက်ခေါ်ဆောင်မှသာ ပြန်လွှတ်ပေးနေသည့်အပေါ် မိသားစု ဝင်များနှင့် တော်လှန်ရေးအင်အားစုများဘက်က မေးခွန်းထုတ်စရာများ ဖြစ်ပေါ်နေလျက် ရှိသည်။ ထို့ပြင် အဆိုပါ ရခိုင်အမျိုးသားက “ရခိုင်လူမျိုးမို့လို့ အစကတည်းက မလွှတ်ချင်လို့ တမင်ဖမ်းထားတာ။ အခု အများကြီး ကျန်နေသေးသလို အာမခံထုတ်ပေးမယ့်သူ မရှိရင် မထွက်ရတော့ဘူးလား၊ သူတို့ဆီ ဘယ်လို ဆက် သွယ်ရမယ်ဆိုတာ မသိသလို ဆွေမျိုးတွေ မရှိရင် မထွက်ရတော့ဘူးလား” ဟု ဆက်ပြောသည်။ ရန်ကုန်မြို့ရှိ လှိုင်သာယာ (အနောက်) မြို့နယ်ခန်းမနှင့် သန်လျင်မြို့နယ် သာသနာ့ဗိမ္မာန်တို့တွင် ထိန်းသိမ်းခံ ထားရသော ရခိုင်ဒေသခံများမှာ စစ်တွေ၊ ရသေ့တောင်၊ မြေပုံ၊ အမ်း၊ ကျောက်ဖြူ၊ ရမ်းဗြဲ၊ မာန်အောင်၊ တောင်ကုတ်၊ သံတွဲ၊ ဂွ၊ ဘူးသီးတောင်၊ မောင်တောအပြင် ကျောက်တော်၊ မြောက်ဦး၊ မင်းပြား၊ ပေါက်တောနှင့် ပုဏ္ဏားကျွန်း စသည့် မြို့နယ်များစွာမှ ဖြစ်ကြပြီး စစ်တပ်နှင့် ရဲတပ်ဖွဲ့ဝင်များ၏ တင်းကျပ်သော စောင့်ကြည့်မှု အောက်တွင် ဆက်လက်ရှိနေဆဲ ဖြစ်သည်။ မလေးရှားနိုင်ငံခြားရေးဝန်ကြီး Datuk Seri Mohamad Hasan က မလေးရှားမှ နေရပ်ပြန်ပို့ခံရသူများအနက် ၃၀၀ ခန့်မှာ ရန်ကုန်မြို့ရှိ စစ်ဘက်ဆိုင်ရာ ထိန်းသိမ်းရေးစခန်းများတွင် ဆက်လက်ဖမ်းဆီးခံထားရဆဲဟူသော သတင်းများနှင့်ပတ်သက်၍ မြန်မာနိုင်ငံထံမှ ရှင်းလင်းချက် တောင်းခံသွားမည်ဖြစ်ကြောင်း ပြောဆိုခဲ့ပြီးနောက် ယခုကဲ့သို့ ရခိုင်လူမျိုးအချို့ ပြန်လည်လွတ်မြောက်လာခြင်း ဖြစ်သည်။ သို့သော် မြန်မာနိုင်ငံသို့ အောက်တိုဘာလ ၄ ရက်နေ့ကတည်းက ပြန်လည်ရောက်ရှိလာခဲ့ကြသည့် ရခိုင်ဒေသခံ ၄၂၉ ဦးအနက် လက်ရှိအချိန်အထိ လွတ်မြောက်လာသူမှာ တစ်ရာပင်မပြည့်သေးဘဲ အများစုမှာ အဆက် အသွယ် ပြတ်တောက်နေဆဲဖြစ်သည်။ ဓါတ်ပုံ - (မလေးရှားမှ ပြန်လာသည့် ရခိုင်တိုင်းရင်းများအား တွေ့ရစဉ်။ / Original uploader)

မလေးပြန်ရခိုင်ဒေသခံအချို့ကို ဆက်လက်ထိန်းသိမ်းထားဆဲဖြစ်

မလေးပြန်ရခိုင်ဒေသခံအချို့ကို ဆက်လက်ထိန်းသိမ်းထားဆဲဖြစ် သတင်းနှင့် မီဒီယာကွန်ရက်။၂၀၂၆ ခုနှစ်၊ အောက်တိုဘာလ ၃၀ ရက်။ မလေးရှားနိုင်ငံမှ ပြစ်ဒဏ်ကျခံပြ…

  • October 30, 2026
ထားဝယ်ခရိုင် အတွင်း ရွာသားတစ်ဦးကို စစ်အုပ်စုတပ် ဖမ်းဆီးသတ်ဖြတ် သတင်းနှင့်မီ ဒီယာကွန်ရက် ၂၀၂၆ ခုနှစ်၊ အောက်တိုဘာလ ၃၀ ရက်။ ထားဝယ်ခရိုင်၊ သရက်ချောင်းမြို့နယ်ရှိ ဝဲရစ်ကျေးရွာတွင် ဒေသခံရွာသားတစ်ဦးကို စစ်အုပ်စု စစ်ကြောင်းက ဖမ်းဆီးပြီး သေနတ်ဖြင့် ပစ်ခတ်သတ်ဖြတ်ခဲ့ကြောင်း ဒေသခံများက ပြောသည်။ အောက်တိုဘာလ ၂၇ ရက်နေ့က ဝဲရစ်ကျေးရွာဘက်သို့ စစ်ကြောင်းပြန်ထိုးလာသည့် စစ်အုပ်စုတပ်က အသက် ၃၀ နှစ်အရွယ် ကိုဇော်ဦးကို ဖမ်းဆီးပြီးနောက် သေနတ်ဖြင့် ပစ်သတ်ခဲ့ခြင်းဖြစ်ကာ ရွာသားအချို့ကိုလည်း ထပ်မံဖမ်းဆီးခဲ့သေးကြောင်း ဆိုသည်။ အသက် ၄၀ ခန့်အရွယ် ဒေသခံရွာသားတစ်ဦးက “ဖမ်းပြီးတာနဲ့ တစ်ခါတည်း ပစ်သတ်လိုက်တာဗျာ၊ မေးမြန်း စစ်ဆေးတာတောင် မလုပ်ဘဲနဲ့ တော်တော်လေးကို ရက်စက်တာ၊ အလောင်းကိုလည်း ဒီအတိုင်း ပစ်ထားခဲ့ကြ တယ်” ဟု ပြောသည်။ ထိုသို့ ပစ်သတ်ခံရပြီးနောက် သတ်ဖြတ်ခံရသည့် ရုပ်အလောင်းကို ဒေသခံရွာသားများက အောက်တိုဘာလ ၂၈ ရက်နေ့ မနက်ပိုင်းတွင် စစ်အုပ်စုတပ် မရှိတော့ချိန်၌ သွားရောက်သယ်ဆောင်လာပြီး မီးသင်္ဂြိုဟ်ပေးခဲ့ကြရ သည်ဟု ၎င်းက ဆက်လက်ပြောပြသည်။ ထို့ပြင် သရက်ချောင်းမြို့နယ်အတွင်း စစ်အုပ်စုတပ်၏ စစ်ကြောင်းထိုးမှုများ၊ နှစ်ဖက်တိုက်ပွဲများနှင့် လေကြောင်းတိုက်ခိုက်မှုများ ရှိနေခြင်းကြောင့် ပိတိုင်ကျေးရွာမှ ကညင်ချောင်းကျေးရွာအထိ မြိတ်-ထားဝယ် ကားလမ်းမှာ အောက်တိုဘာလ ၂၃ ရက်နေ့မှ ၂၈ ရက်နေ့အထိ ခြောက်ရက်ကြာ ပိတ်ဆို့ပြတ်တောက်ခဲ့ပြီး ကားအစီးရေ ရာနှင့်ချီ ပိတ်မိခဲ့သည်။ အဆိုပါလမ်းကို အောက်တိုဘာလ ၂၉ ရက်နေ့ နံနက်ပိုင်းတွင် လက်နက်ကိုင်တပ်များက ပြန်လည် သွားလာခွင့် ပြုခဲ့သဖြင့် ကားများ ဖြတ်သန်းသွားလာနေကြပြီဖြစ်သော်လည်း လမ်းကို ပြန်လည်ဖွင့်လှစ်ပေးသည့် အကြောင်း အရင်းနှင့် မည်မျှကြာသည်အထိ သွားခွင့်ရမည်ကိုမူ မသိရသေးကြောင်း ကားသမားများက ပြောဆိုသည်။ လက်ရှိတွင် သရက်ချောင်းမြို့နယ်အတွင်း စစ်အုပ်စုတပ်ဖွဲ့က စစ်ကြောင်းထိုး လှုပ်ရှားနေခြင်းကြောင့် ကတွဲ၊ ရငဲ၊ ကမြိုင်၊ ဝဲရစ်နှင့် သိမ်ကုန်းကျေးရွာများမှ ဒေသခံပြည်သူများမှာ အိုးအိမ်စွန့်ခွာကာ ဘေးလွတ်ရာသို့ ထွက်ပြေးတိမ်းရှောင်နေကြရသည်။ စစ်ကြောင်းထိုးစဉ်အတွင်း ကျေးရွာသားများကို ဖမ်းဆီးကာ သတ်ဖြတ်ခံရခြင်း၊ အလောင်းဖျောက်ဖျက်ခံရခြင်း၊ နေအိမ်များမှ စားနပ်ရိက္ခာနှင့် ပစ္စည်းများကို အဓမ္မယူဆောင်ခံရခြင်းအပြင် ကျေးရွာများဘက်သို့ လက်နက်ကြီး များဖြင့် ပစ်ခတ်ခြင်းစသည့် အခက်အခဲများကိုပါ ဒေသခံပြည်သူများ ဆက်လက် ရင်ဆိုင်နေကြရဆဲ ဖြစ်သည်။ ဓါတ်ပုံ - (ဝဲရစ်ကျေးရွာ ဆိုင်းဘုတ်။ / Credit to Original Uploader) #ထားဝယ်ခရိုင်

ထားဝယ်ခရိုင် အတွင်း ရွာသားတစ်ဦးကို စစ်အုပ်စုတပ် ဖမ်းဆီးသတ်ဖြတ်

ထားဝယ်ခရိုင် အတွင်း ရွာသားတစ်ဦးကို စစ်အုပ်စုတပ် ဖမ်းဆီးသတ်ဖြတ် သတင်းနှင့်မီ ဒီယာကွန်ရက်၂၀၂၆ ခုနှစ်၊ အောက်တိုဘာလ ၃၀ ရက်။ ထားဝယ်ခရိုင်၊ သရက်ချောင်…

  • October 30, 2026
SSJAC ၏ စွပ်စွဲချက်များ မြေပြင်အခြေအနေနှင့် ကွဲလွဲနေကြောင်း MNDAA ချေပ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၂၈ ရက်။ ရှမ်းပြည် မြောက်ပိုင်းတွင် တိုင်းရင်းသားများ၏ အခြေခံရပိုင်ခွင့်နှင့် ယဉ်ကျေးမှုများအပေါ် ကိုးကန့်တပ် (MNDAA) က အတင်းအကျပ် ခြိမ်းခြောက်လွှမ်းမိုးနေသည်ဟူသော ရှမ်းပြည်ပူးပေါင်းဆောင်ရွက်ရေး ကော်မတီ (SSJAC) ၏ စွပ်စွဲကန့်ကွက်ချက်များကို မြေပြင်အခြေအနေနှင့် လုံးဝကွဲလွဲနေကြောင်း MNDAA က ပြန်လည်ချေပ ငြင်းဆိုလိုက်သည်။ အောက်တိုဘာလ ၂၇ ရက်နေ့က MNDAA ၏ အထူးဒေသ (၁) အုပ်ချုပ်ရေးကော်မတီက “ရှမ်းပြည် ပူးပေါင်း ဆောင်ရွက်ရေး ကော်မတီ (SSJAC) သို့ အိတ်ဖွင့်ပေးစာ” ထုတ်ပြန်ကာ ပြီးခဲ့သည့် အောက်တိုဘာလ ၂၃ ရက်နေ့ က SSJAC ၏ ထုတ်ပြန်ချက်ပါ စွပ်စွဲချက်များသည် တိုင်းရင်းသားများအကြား လူမျိုးရေးပဋိပက္ခဖြစ်ပွားစေရန် ရည်ရွယ်ချက်ရှိရှိ လှုံ့ဆော်ခြင်းသာဖြစ်ကြောင်း တုံ့ပြန်ခဲ့ခြင်း ဖြစ်သည်။ SSJAC ၏ ထုတ်ပြန်ချက်တွင် ဘာသာစကားအသုံးပြုရန် ဖိအားပေးခြင်း၊ မြေယာသိမ်းဆည်းခြင်း၊ နိုင်ငံခြားသား ဝင်ရောက်လွှမ်းမိုးမှုနှင့် မြို့ရွာအမည်များ အတင်းအကျပ် ပြောင်းလဲခြင်း စသည့် အချက်များ ပါဝင်ခဲ့သည်။ သို့သော် ဤအချက်များနှင့်ပတ်သက်၍ ဘာသာစကားနှင့် ပညာရေးဆိုင်ရာကိစ္စများတွင် မြန်မာဘာသာကို မူလ အတိုင်း သင်ကြားပေးနေပြီး အင်္ဂလိပ်စာကို သူငယ်တန်းမှစတင်ကာ တရုတ်ဘာသာကို ရွေးချယ်သင်ယူနိုင်သည့် ဘာသာရပ်အဖြစ်သာ သင်ကြားပေးခြင်းဖြစ်ကြောင်း၊ ဒေသခံတိုင်းရင်းသားများ၏ ဘာသာစကားများကိုလည်း သင်ကြားခွင့်ပြုထားကြောင်း MNDAA က ရှင်းလင်းဖော်ပြထားသည်။ သို့သော် ရှမ်းမြောက်ဒေသခံ ပြည်သူတစ်ဦးက “လက်ရှိမြေပြင်အုပ်ချုပ်ရေးမှာတော့ ဒေသခံ ရှမ်း၊ တအာင်းနဲ့ နောက်ပြီး ဗမာ (မြန်မာ) ဘာသာစာတွေနဲ့ ရေးသားထားတဲ့ ဆိုင်းဘုတ်တွေကို ဖြုတ်၊ တရုတ်စာ ဆိုင်းဘုတ်တွေ နဲ့ အစားထိုး အဲ့လိုမျိူးလုပ်တယ်။ ကွတ်ခိုင်မှာဆိုရင် စစ်တပ် တပ်ရင်းကိုတောင် တရုတ်စာနဲ့ ရေးထားတာ။ မြို့ အဝင်ဆိုင်းဘုတ်တွေလည်း အဲ့လိုပဲလေ။ ကျနော်တို့ ရှမ်းပြည်က ရှမ်းမြောက်က အခုဆိုရင် နေရာတော်တော် များများမှာ တရုတ်စာတွေပဲ။ သိန္နီမြို့မှာဆိုရင် သမိုင်းအမွေအနှစ်နေရာတွေပါ မကျန်ဘူး” ဟု မြေပြင် အခြေ အနေကို ပြောသည်။ မြေယာပိုင်ဆိုင်ခွင့်နှင့် ပတ်သက်၍လည်း နိုင်ငံခြားသားများကို မြေယာပိုင်ဆိုင်ခွင့် ခွင့်ပြုထားခြင်း မရှိဘဲ အထူး ဒေသ (၁) မှတ်ပုံတင်ကိုင်ဆောင်ထားသူများ သို့မဟုတ် မြန်မာနိုင်ငံသားများသာ တရားဝင်ပိုင်ဆိုင်ခွင့်ရှိကြောင်း၊ မြို့ရွာအမည်များကိုလည်း မူလအမည်များအတိုင်း ဆက်လက်ထားရှိပြီး အချို့ဒေသများတွင် အုပ်ချုပ်ရေး လွယ် ကူစေရန် ကိုးကန့်ဘာသာစကားဖြင့် တွဲဖက်အသုံးပြုခြင်းသာ ရှိကြောင်း ငြင်းဆိုထားသည်။ လွတ်လပ်စွာ ထုတ်ဖော်ပြောဆိုခွင့်ကိုလည်း ဥပဒေဘောင်အတွင်းသာ ဆောင်ရွက်စေခြင်းဖြစ်ကြောင်း ဆိုသည်။ သို့သော် လက်နက်ကိုင် အဖွဲ့အစည်းများအချင်းချင်း အပြန်အလှန် တုံ့ပြန်ပြောဆိုမှုများနှင့် တင်းမာမှုများ မြင့်တက်လာနေခြင်းကြောင့် ဒေသခံပြည်သူများအကြားတွင် ကြီးမားသော စိုးရိမ်ပူပန်မှုများ ဖြစ်ပေါ်လျက် ရှိသည်။ ‘ ၁၀၂၇ စစ်ဆင်ရေး’ ၃ နှစ်ပြည့် အချိန်အခါသမယနှင့် တိုက်ဆိုင်နေချိန်တွင် ရှမ်းမြောက်ဒေသအတွင်း တကျော့ ပြန် တိုက်ပွဲများနှင့် လူမျိုးရေးပဋိပက္ခများ ထပ်မံဖြစ်ပွားလာမည်ကို ဒေသခံများက စိုးရိမ်နေကြသည်။ ဒေသတွင်း ဖြစ်ပေါ်နေသော အခြေအနေများနှင့်ပတ်သက်၍ ဒေသခံပြည်သူတစ်ဦးက “အခုလို အဖွဲ့အစည်းတွေ အချင်းချင်း စကားတင်တာတွေ၊ သဘောထားကွဲလွဲတာတွေ လုပ်လာကြတော့ မြေပြင်မှာရှိတဲ့ ပြည်သူတွေက အစစအရာရာ စိုးရိမ်နေရတယ်။ တကျော့ပြန်ပဋိပက္ခတွေ ဖြစ်လာမှာကို တကယ်ကို ရင်တထိတ်ထိတ်နဲ့ ဖြတ် သန်းနေရပါတယ်” ဟု ပြောသည်။ လက်ရှိတွင် ဒေသတွင်း တည်ငြိမ်အေးချမ်းမှုကို ထိခိုက်စေပြီး လူမျိုးရေးပဋိပက္ခအသွင် ဖန်တီးလာမည့် မည် သည့်နိုင်ငံရေး၊ လူမှုရေး လှုပ်ရှားမှုကိုမဆို ဥပဒေနှင့်အညီ ပြင်းပြင်းထန်ထန် တုံ့ပြန်သွားမည်ဖြစ်ကြောင်း MNDAA က ဆိုသည်။ ထိုသို့ လှုပ်ရှားမှုများကြောင့် ဖြစ်ပေါ်လာမည့် မလိုလားအပ်သော အကျိုးဆက်များအတွက် SSJAC ဘက်မှသာ အပြည့်အဝ တာဝန်ယူရမည်ဖြစ်ကြောင်း MNDAA က တင်းမာသည့် သတိပေးချက် ထုတ်ပြန်ထားသည်။ ဓါတ်ပုံ - (တအာင်းနှင့်ရှမ်းရွာ အဝင် ဆိုင်းဘုတ်များ ဖျက်ဆီးခံထားရပုံ / Credit to Original Uploader) #SSJAC #MNDAA

SSJAC ၏ စွပ်စွဲချက်များ မြေပြင်အခြေအနေနှင့် ကွဲလွဲနေကြောင်း MNDAA ချေပ

SSJAC ၏ စွပ်စွဲချက်များ မြေပြင်အခြေအနေနှင့် ကွဲလွဲနေကြောင်း MNDAA ချေပ သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၂၈ ရက်။ ရှမ်းပြည် မြော…

  • October 29, 2026
မကွေးတိုင်းအတွင်း ထွက်ပြေးသည့် ဘက်ပြောင်းရဲဘော်နှင့် စစ်သုံ့ပန်းများ ပြန်လည်ဖမ်းဆီးရမိ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၂၈ ရက်။ မကွေးတိုင်း၊ ပေါက်မြို့နယ်ရှိ တော်လှန်ရေးအကျဉ်းစခန်းတစ်ခုမှ စစ်သုံ့ပန်းများကို ခေါ်ဆောင်ကာ စစ်အုပ်စုဆီ ဘက်ပြောင်းရန် ထွက်ပြေးခဲ့သည့် တော်လှန်ရေးတပ်ဖွဲ့ဝင်နှင့် စစ်သုံ့ပန်း အများစုကို တော်လှန်ရေးတပ်များက ပြန်လည်ဖမ်းဆီးရမိလိုက်ပြီ ဖြစ်သည်။ ပြီးခဲ့သည့် အောက်တိုဘာလ ၂၁ ရက်နေ့က မကွေးတိုင်းဆေးတပ်ဖွဲ့မှ ရဲဘော်ဖိုးသားဆိုသူသည် ကင်းတာဝန်ကျ စဥ် တော်လှန်ရေးတပ်ဖွဲ့များ ဖမ်းဆီးထိန်းသိမ်းထားသည့် စစ်သုံ့ပန်း ၁၃ ဦးကို ခေါ်ဆောင်ထွက်ပြေးခဲ့ပြီး အခြား PDF ရဲဘော် ၃ ဦးကိုပါ ဓားစာခံအဖြစ် ဖမ်းဆီးခေါ်ဆောင်သွားခဲ့ခြင်း ဖြစ်သည်။ ထိုကဲ့သို့ ထွက်ပြေးလွတ်မြောက်သွားခဲ့သော သုံ့ပန်းများနှင့် ရဲဘော်ဖိုးသားကို တော်လှန်ရေးတပ်ဖွဲ့များက နယ်မြေခံ သတင်းအချက်အလက်များရယူကာ အပြင်းအထန် လိုက်လံရှာဖွေခဲ့ရာ အောက်တိုဘာလ ၂၆ ရက်နေ့ တွင် ရဲဘော်ဖိုးသားကို ပြန်လည်ဖမ်းဆီးရမိခဲ့သလို ခေါ်ထုတ်သွားခဲ့သည့် စစ်သုံ့ပန်း ၁၃ ဦးအနက် ၁၀ ဦးကို လည်း ထပ်မံဖမ်းဆီးရမိခဲ့ခြင်း ဖြစ်သည်။ မြေပြင်သတင်းရင်းမြစ်တစ်ဦးက “သူတို့ကို ဖမ်းမိပြီဗျ။ ပေါက်နဲ့ ဆောကြားမှာ ပြန်မိတာ။ အခု လွတ်နေတဲ့သူ တွေကိုလည်း ထပ်ပြီးရှာနေကြတယ်။ ဓါးစာခံအဖြစ် ဖမ်းသွားတဲ့ ရဲဘော် ၃ ယောက်ကိုလည်း ပြန်ကယ်နိုင်ခဲ့ တယ်လို့ ပြောတယ်ဗျ” ဟု ပြောသည်။ ထို့ပြင် အဆိုပါ ဖြစ်စဉ်အတွင်း ဓားစာခံအဖြစ် ဖမ်းဆီးခံထားရသည့် PDF ရဲဘော် ၃ ဦးကိုလည်း ဘေးကင်းလုံခြုံ စွာဖြင့် ပြန်လည်ကယ်ထုတ်နိုင်ခဲ့ပြီး၊ လက်ရှိတွင် လွတ်မြောက်နေဆဲ ကျန်ရှိနေသေးသော စစ်သုံ့ပန်း ၃ ဦးကို လည်း တော်လှန်ရေးတပ်ဖွဲ့များက ဆက်လက်ရှာဖွေ နေကြသည်။ အဆိုပါ ဖြစ်စဉ်နှင့်ပတ်သက်၍ တော်လှန်ရေးတပ်ဖွဲ့နှင့် နီးစပ်သူတစ်ဦးက “ဒီလို သုံ့ပန်းတွေနဲ့အတူ တပ်ဖွဲ့ဝင် တစ်ယောက်ပါ ထွက်ပြေးသွားတာဟာ လုံခြုံရေးအရရော စည်းကမ်းပိုင်းဆိုင်ရာအရပါ အရေးကြီးတဲ့ သင်ခန်း စာတစ်ခုပါပဲ။ သတင်းအချက်အလက် တိတိကျကျနဲ့ ပြန်ဖမ်းမိလို့သာ တော်သေးတာပေါ့၊ မဟုတ်ရင် လုံခြုံရေးပိုင်းမှာ ကြီးမားတဲ့ ထိုးနှက်ချက်တစ်ခု ဖြစ်သွားနိုင်ပါတယ်” ဟု ပြောသည်။ ယခုကဲ့သို့ ထွက်ပြေးလွတ်မြောက်ရန် ကြိုးပမ်းခဲ့ကြသည့် စစ်သုံ့ပန်းများသည် ပြီးခဲ့သည့် ဇွန်လအတွင်းက ပခုက္ကူမြို့နယ်၊ မြစ်ခြေမြို့ ရဲစခန်းသိမ်းတိုက်ပွဲအတွင်း တော်လှန်ရေးတပ်ဖွဲ့များက အရှင် ဖမ်းဆီးရမိခဲ့ကြသူများ ဖြစ်ကြသည်။ မကွေးတိုင်းအတွင်း တော်လှန်ရေးတပ်ဖွဲ့များ ထိန်းချုပ်ရာနယ်မြေများတွင် စစ်ရေးတင်းမာနေဆဲဖြစ်ပြီး၊ ယခုကဲ့ သို့ စစ်သုံ့ပန်းထိန်းသိမ်းရေးနှင့် လုံခြုံရေးဆိုင်ရာ စိန်ခေါ်မှုများလည်း ရှိနေဆဲဖြစ်ကာ တော်လှန်ရေး အင်အားစု များအနေဖြင့် အကျဉ်းစခန်းလုံခြုံရေးများကို ပိုမိုတင်းကျပ်စွာ ကိုင်တွယ်ဆောင်ရွက်လျက်ရှိကြောင်း ဆိုသည်။ ဓါတ်ပုံ - (ဇွန်လ ၁၀ ရက်နေ့က တော်လှန်ရေးတပ်များ ဖမ်းဆီးရမိခဲ့သည့် စစ်သုံ့ပန်းများ။ / ပြည်သူ့ကာကွယ် ရေးတပ်မတော် - PDF) #PDF #မကွေးတိုင်း

မကွေးတိုင်းအတွင်း ထွက်ပြေးသည့် ဘက်ပြောင်းရဲဘော်နှင့် စစ်သုံ့ပန်းများ ပြန်လည်ဖမ်းဆီးရမိ

မကွေးတိုင်းအတွင်း ထွက်ပြေးသည့် ဘက်ပြောင်းရဲဘော်နှင့် စစ်သုံ့ပန်းများ ပြန်လည်ဖမ်းဆီးရမိ သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၂၈ ရက်။ …

  • October 29, 2026
နယ်စပ်ဖြတ်ကျော် လက်နက်ကြီးကျည်ကျမှုကြောင့် ထိုင်းဒေသခံများ ဆန္ဒထုတ်ဖော် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၂၈ ရက်။ မြန်မာ-ထိုင်းနယ်စပ် မြဝတီမြို့နယ်ဘက်တွင် ဖြစ်ပွားနေသော တိုက်ပွဲများကြောင့် လက်နက်ကြီးကျည်များ ထိုင်းနိုင်ငံဘက်ခြမ်းသို့ ဆက်တိုက် ကျရောက်ပေါက်ကွဲလျက်ရှိရာ ထိုင်းဒေသခံပြည်သူများမှာ အသက် အန္တရာယ်အတွက် စိုးရိမ်ပူပန်လာကြပြီး လူစုလူဝေးဖြင့် ဆန္ဒထုတ်ဖော် တောင်းဆိုခဲ့ကြသည်။ တာ့ခ်ခရိုင်၊ မဲဆောက်မြို့နယ်၊ မဲ့ကို့ကင်းကျေးရွာရှိ အထက်တန်းကျောင်း အားကစားကွင်းတွင် ဒေသခံပြည်သူ နှစ်ရာကျော် စုဝေးခဲ့ကြပြီး အောက်တိုဘာလ ၂၇ ရက်နေ့တွင် ဆန္ဒထုတ်ဖော်ခဲ့ကြခြင်း ဖြစ်သည်။ မြန်မာဘက်မှ ပစ်ခတ်လိုက်သည့် လက်နက်ကြီးကျည်များကြောင့် နေ့စဉ်နှင့်အမျှ အသက်အန္တရာယ် စိုးရိမ်နေ ရမှုများနှင့် အိမ်ခြေ၊ အဆောက်အအုံ ထိခိုက်ပျက်စီးမှုများအတွက် သက်ဆိုင်ရာ အာဏာပိုင်များအနေဖြင့် ထိရောက်စွာ တာဝန်ယူဖြေရှင်းပေးရန် ပြင်းပြင်းထန်ထန် တောင်းဆိုခဲ့ကြခြင်း ဖြစ်သည်။ နယ်စပ်ဒေသ တိုက်ပွဲများနှင့်ပတ်သက်၍ မဲဆောက်ရှိ မြန်မာတစ်ဦးက “မြန်မာဘက်က ပစ်တဲ့ လက်နက်ကြီး ကျည်တွေက ထိုင်းဘက်ခြမ်းကို ဆက်တိုက်ကျလာနေတယ်။ အဲ့ဒါကို စိတ်ပူကြတယ်။ စိုးရိမ်ကြတာပေါ့ဗျာ နော်။ က ဘယ်အချိန် ဘယ်နေရာမှာ ထပ်ကျလာမလဲ ထိခိုက်မှုတွေ ထပ်ဖြစ်လာအုံးမလား ဆိုပြီး စိုးရိမ်ပူပန် နေကြတာဗျ။ လူထုရဲ့ အသက်အန္တရာယ်အတွက် လုံးဝမလုံခြုံတော့ဘူး အဲ့ဒီအတွက် အခုလိုမျိုး အားလုံးက စုပြီး ဆန္ဒထုတ်ဖော်ကြတာဗျ” ဟု ပြောသည်။ ပြီးခဲ့သည့် တစ်နှစ်အတွင်း နယ်စပ်ဖြတ်ကျော် တိုက်ပွဲများကြောင့် ထိုင်းဘက်ခြမ်းတွင် မြန်မာအမျိုးသမီး နှစ်ဦး အသက်ဆုံးရှုံးခဲ့ရသလို ထိုင်းနိုင်ငံသားများအပါအဝင် ဒေသခံ လေးဦးထက်မနည်း ထိခိုက်ဒဏ်ရာရရှိခဲ့ကာ ကျောင်းနှင့် လူနေအိမ် ကိုးလုံးထက်မနည်း ထိခိုက်ပျက်စီးခဲ့ရသည်။ ထို့ပြင် မြန်မာဘက်မှ စစ်ဘေးရှောင် နှစ်ရာကျော်မှာလည်း မဲ့ကို့ကင်းကျေးရွာဘက်၌ ဆက်လက်တိမ်းရှောင်နေ ဆဲ ဖြစ်သည်။ မြဝတီမြို့နယ်၊ ဖလူးနှင့် မင်းလက်ပံရွာဘက်များတွင် စစ်အုပ်စုတပ်နှင့် တော်လှန်ရေးပူးပေါင်းတပ်များအကြား တိုက်ပွဲများ ပြင်းထန်နေခြင်းက နယ်စပ်ဖြတ်ကျော်ကျည် ကျရောက်ရသည့် အဓိကအကြောင်းရင်း ဖြစ်သည်။ မြေပြင်စစ်ရေးသတင်းရင်းမြစ်တစ်ဦးက “တိုက်ပွဲတွေက ပြင်းထန်နေဆဲဖြစ်ပြီး လက်နက်ကြီးကျည်တွေ နယ် စပ်ကို ကျော်လာတာတွေအတွက် ထိုင်းစစ်တပ်ဘက်က အထူးစောင့်ကြည့်နေတယ်လို့ ထိုင်းသတင်းတွေမှာ ပြောထားပြီးသား။ ခင်ဗျားတို့လည်း တွေ့မှာပဲ။ ပြည်သူတွေရဲ့ အိုးအိမ်စည်းစိမ်ကို တမင်သက်သက် ထိခိုက်လာ တယ်ဆိုရင် လုပ်ထုံးလုပ်နည်းအတိုင်း ခိုင်မာတဲ့ တုံ့ပြန်မှုတွေ ဆက်လုပ်သွားမယ်လို့ ပြောလိုက်ပြီလေနော်” ဟု ပြောသည်။ နယ်စပ်ဖြတ်ကျော် ကျည်ကျရောက်မှုများနှင့် ပတ်သက်၍ ထိုင်းစစ်တပ်က နယ်စပ်ဘေး အန္တရာယ် ကာကွယ် ရေး အစီအမံများကို တရားဝင် ထုတ်ပြန်ထားသည်။ မြန်မာဘက်မှ ကျည်များ ထပ်မံကျရောက်လာပါက သတိပေးသည့် မီးခိုးဗုံးကျည်များဖြင့် တုံ့ပြန်ပစ်ခတ်သွား မည်ဖြစ်ပြီး၊ ထိုင်းနိုင်ငံသားများ၏ အိုးအိမ်စည်းစိမ်ကို ရည်ရွယ်ချက်ရှိရှိ ထိခိုက်စေပါက အချိုးကျ တန်ပြန် တိုက်ခိုက်သွားမည်ဟု တင်းမာသည့် သတိပေးချက် ထုတ်ပြန်ထားသည်။ လက်ရှိတွင် သောင်ရင်းမြစ်တစ်လျှောက် လုံခြုံရေးတပ်ဖွဲ့များ တိုးမြှင့်ချထားကာ ကင်းလှည့်ခြင်း၊ စစ်ကားများ အပြင် ဒရုန်းနှင့် လေယာဉ်များဖြင့် အနီးကပ် စောင့်ကြည့်ခြင်းများကို လုပ်ဆောင်နေသည်။ ထို့ပြင် ထိုင်းနိုင်ငံခြားရေးဝန်ကြီးဌာနနှင့် စစ်တပ်တို့ ပူးပေါင်းကာ နှစ်နိုင်ငံ နယ်စပ်ကော်မတီများမှတစ်ဆင့် တရားဝင် ကန့်ကွက်လွှာပေးပို့ခြင်းနှင့် လျော်ကြေးပေးရန် တောင်းဆိုသွားရန်လည်း ပြင်ဆင်နေကြသည်။ ဓါတ်ပုံ - siamrath

နယ်စပ်ဖြတ်ကျော် လက်နက်ကြီးကျည်ကျမှုကြောင့် ထိုင်းဒေသခံများ ဆန္ဒထုတ်ဖော်

နယ်စပ်ဖြတ်ကျော် လက်နက်ကြီးကျည်ကျမှုကြောင့် ထိုင်းဒေသခံများ ဆန္ဒထုတ်ဖော် သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၂၈ ရက်။ မြန်မာ-ထိုင်း…

  • October 29, 2026
ရခိုင်ပြည် ကစ္ဆပနဒီမြစ်တွင်း စစ်တပ်ရေယာဉ် ၃ စီး တိုက်ခိုက်ခံရပြီး ၂ စီး နစ်မြုပ်၊ ၁ စီး ပျက်စီး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၂၈ ရက်။ ရခိုင်ပြည်၊ စစ်တွေမြို့၊ ကစ္ဆပနဒီမြစ်အတွင်း ကျောက်ချရပ်နားထားသော စစ်အုပ်စုတပ်၏ စစ်သင်္ဘော ၃ စီးကို အာရက္ခတပ်တော် (AA) က တိုက်ခိုက်ခဲ့ရာ စစ်သင်္ဘော ၂ စီး နစ်မြုပ်ပြီး ၁ စီး ပျက်စီးသွားခဲ့ကြောင်း အေအေနှင့် နီးစပ်သူများက ပြောသည်။ စစ်တွေမြို့နှင့် ရသေ့တောင်မြို့အကြားရှိ ကစ္ဆပနဒီမြစ်အတွင်း ကျောက်ချရပ်နားနေသည့် ဖရီးဂိတ် (Frigate) အဆင့် စစ်သင်္ဘောတစ်စီးအပါအဝင် စစ်ရေယာဉ်သုံးစီး အောက်တိုဘာလ ၂၆ ရက် (သီတင်းကျွတ်လပြည့်နေ့) ညအချိန်က တိုက်ခိုက်ခံခဲ့ရခြင်း ဖြစ်သည်။ တိုက်ခိုက်မှုနှင့်ပတ်သက်၍ အေအေနှင့် နီးစပ်သူ အမျိုးသားတစ်ဦးက “သီတင်းကျွတ်လပြည့်နေ့ ညအချိန်မှာ အေအေက အဆင့်မြင့်နည်းပညာနဲ့ ပစ်ခတ်တိုက်ခိုက်ခဲ့တယ်လို့ အတွင်းသတင်းတွေအရ သိရပါတယ်။ စစ်သင်္ဘော ၃ စီးကို ရေအောက်ကလာတဲ့ ဒုံးကျည်နဲ့ပစ်တာလို့ ပြောနေကြတယ်။ ၂ စီး နစ်မြုပ်ပျက်စီးတယ်။ ကျွန်တော်တို့ သိသလောက် ငပြီကျွန်းဘက် တက်ဖို့ကြိုးစားတဲ့ ရေယာဉ်တွေပါ” ဟု ပြောသည်။ အေအေ၏ တိုက်ခိုက်မှုကို ခံရသည့် အဆိုပါ စစ်ရေယာဉ်အုပ်စုသည် စစ်တွေမြို့၏ လုံခြုံရေးတာဝန်ယူထား သည့် ရေတပ်အုပ်စုဖြစ်ပြီး ငပြီကျွန်းဘက်သို့လည်း လက်နက်ကြီး ပစ်ကူပေးနေသည့် ရေယာဉ်များ ဖြစ်သည်။ လက်ရှိတွင် အာရက္ခတပ်တော်၌ ရေပြင်စစ်ပွဲများတွင် စစ်အုပ်စုတပ်၏ စစ်ရေယာဉ်များကို ပြန်လည် ပစ်ခတ်တိုက်ခိုက်နိုင်သည့် အဆင့်မြင့်လက်နက်များ ရှိနေပြီဖြစ်ကြောင်းလည်း နီးစပ်သူအချို့က ဆိုသည်။ စစ်တွေမြို့နယ်အတွင်း တိုက်ပွဲများကြောင့် အကျအဆုံးများ ရှိနေသည့် စစ်အုပ်စုတပ်သည် အောက်တိုဘာလ နောက်ဆုံးအပတ်အတွင်း ရသေ့တောင်မြို့နယ်ရှိ ကျေးရွာ ၂ ရွာကို လေကြောင်းဖြင့် ဗုံးကြဲတိုက်ခိုက်ခဲ့ရာ အရပ်သား ၄ ဦးထက်မနည်း ထိခိုက်ဒဏ်ရာရရှိခဲ့သည်။ မြေပြင်အခြေအနေနှင့် ပတ်သက်၍ အခြားဒေသခံ သတင်းရင်းမြစ်တစ်ဦးက “စစ်တွေမြို့နဲ့ ဆက်စပ်တဲ့ ပတ် ဝန်းကျင် တစ်ခုလုံးလို့ ပြောလို့ရတယ်။ စစ်တွေ တစ်ဝိုက်မှာ ရွှေမင်းဂံချောင်းဝကနေစပြီး မယူမြစ်ဝအထိ တိုက်ပွဲတွေ တောက်လျှောက်ဖြစ်နေတယ်။ အဲ့တိုက်ပွဲတွေဟာ ရေကြောင်းမြစ်လက်တက်တွေ၊ ချောင်းငယ်၊ မြစ်ငယ်တွေမှာ ဖြစ်နေတာဖြစ်လို့ စစ်တွေဒေသခံတွေ ကြောက်လန့်တာတွေ ရှိနေပါတယ်” ဟု ပြောသည်။ လက်ရှိတွင် စစ်တွေမြို့ကို ကာကွယ်ရန် စစ်အုပ်စုတပ်သည် စစ်သင်္ဘောများနှင့် အမြန်တိုက်ခိုက်ရေးရေယာဉ် များကို ကမ်းရိုးတန်းရေပြင်တွင် ပုံမှန်ကင်းလှည့်သွားလာခိုင်းခြင်းနှင့် အနီးကပ် လုံခြုံရေးယူထားခြင်းများကို လုပ်ဆောင်နေသည်။ ထို့ပြင် စစ်တွေမြို့နယ်အတွင်းနှင့် အနီးတစ်ဝိုက်ရှိ ရေတပ်စခန်းများတွင် ခုခံစစ်ပြင်ဆင်မှုကို အထူးတင်းကျပ် ထားပြီး အမြောက်ကြီးများဖြင့် ပစ်ခတ်နိုင်ရန် ပြင်ဆင်ထားသည်။ အေအေ၏ ထိုးစစ်နှင့် ရေကြောင်းစိုးမိုးနိုင်ခြေကို စိုးရိမ်နေသည့်အတွက် စစ်တွေမြို့သို့ ဆက်သွယ်သည့် ပင်လယ်ပြင်နှင့် မြစ်ကြောင်းသွား လမ်းကြောင်းများကိုလည်း စစ်ကောင်စီတပ်က တင်းကျပ်စွာ စစ်ဆေးရေး လုပ်ဆောင်နေသည်။ ထိုသို့သော အခြေအနေများကြောင့် ဒေသခံ ရေလုပ်သားများ၊ ငါးဖမ်းလှေများနှင့် ဒေသန္တရစက်လှေများကို သတ်မှတ်ဧရိယာပြင်ပသို့ ထွက်ခွာခွင့် တင်းကျပ်စွာ ကန့်သတ်ထားပြီး၊ သတ်မှတ်ချိန်နှင့် ဧရိယာဘောင်အတွင်း သာ ငါးဖမ်းဆီးခွင့်ပြုထားသည်။ ဓါတ်ပုံ - (၂၀၂၄ ခုနှစ်၊ ဖေဖော်ဝါရီလတွင် ကျောက်တော်မြို့နယ်၊ အပေါက်ဝရွာအနီး၌ AA ၏ တိုက်ခိုက်မှုကို ခံခဲ့ရပြီးနောက် တွေ့ရသည့် စစ်အုပ်စုတပ်၏ စစ်သင်္ဘောတစ်စီး။ / AA Info Desk) #AA #ကစ္ဆပနဒီမြစ်

ရခိုင်ပြည် ကစ္ဆပနဒီမြစ်တွင်း စစ်တပ်ရေယာဉ် ၃ စီး တိုက်ခိုက်ခံရပြီး ၂ စီး နစ်မြုပ်၊ ၁ စီး ပျက်စီး

ရခိုင်ပြည် ကစ္ဆပနဒီမြစ်တွင်း စစ်တပ်ရေယာဉ် ၃ စီး တိုက်ခိုက်ခံရပြီး ၂ စီး နစ်မြုပ်၊ ၁ စီး ပျက်စီး သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ …

  • October 29, 2026
စစ်မှုထမ်းဥပဒေကြောင့် မိအေးအခါခါနာရသည့် ရှမ်းတောင်ဒေသ ဆိုင်းနှောင်ရေးသည်။ သတင်းနှင့် မီဒီယာ ကွန်ရက် ၂၀၂၆ ခုနှစ်၊ အောက်တိုဘာလ ၂၇ ရက် “တစ်ဖက်ကို ငါးသောင်း တူတူထည့်ရတာပေါ့။ နောက်တော့ တောင်ကြီးမှာ ကလေးမရှိတော့ရင် သုံးသောင်းထားပေးတယ်။ ကလေးရှိတဲ့အိမ်က ပုံမှန်ငါးသောင်းပေါ့။ စုစုပေါင်း တစ်လ ရှစ်သောင်း ထည့်ရတယ်။ နောက်ပိုင်း ပိုကောက်မယ်လို့လည်း ပြောတယ်” အင်းလေးဒေသမှ တောင်ကြီးမြို့သို့ ပြောင်းရွှေ့လာသည့် အိမ်ရှင်မတစ်ဦးက ၎င်းတို့ မိသားစု နေရပ်ရင်းနှင့် လက်ရှိနေထိုင်ရာ နေရာနှစ်ခုလုံးအတွက် စစ်မှုထမ်းကြေး ပေးဆောင်နေရသည့် အခြေအနေကို ပြောပြခဲ့ခြင်း ဖြစ်သည်။ နေရပ်ရင်း အိမ်ထောင်စုစာရင်းရှိရာ ဒေသအတွက် ပေးရသည့်အပြင် လက်ရှိ ရောက်ရှိနေသည့် တောင်ကြီးမြို့တွင်လည်း ထပ်မံပေးဆောင်နေရသဖြင့် အိမ်ထောင်စု တစ်စုတည်းမှ စစ်မှုထမ်းကြေး နှစ်ဆ ထမ်းပိုးထားရပြီး လူထုအတွက် လူမှုစီးပွား ကျပ်တည်းမှုများ ပိုမိုဆိုးရွားလာခဲ့သည်။ တောင်ကြီးမြို့နယ် တောင်ပိုင်းနှင့် မြောက်ပိုင်းရှိ ဒေသခံများအတွက် အခက်အခဲက ထိုမျှနှင့် မပြီးသေးပေ။ စစ်အုပ်စုက စစ်မှုထမ်း စုဆောင်းစရိတ် ကောက်ခံနေသည့်အပြင် ဒေသတွင်း အာဏာသက်ရောက်နေသည့် ပအိုဝ်းပြည်သူ့စစ် (PNA) ဘက်ကလည်း စစ်မှုထမ်းကြေး၊ ရိက္ခာကြေးနှင့် အခြားခေါင်းစဉ် အမျိုးမျိုးဖြင့် ငွေကြေးများ ကောက်ခံလျက် ရှိသည်။ ထို့ပြင် ရပ်ကွက်/ကျေးရွာ အုပ်ချုပ်ရေးမှူးများကိုလည်း သီးသန့် ပေးဆောင်ရသေးသဖြင့် အိမ်ထောင်စုတစ်စုတည်းက အဖွဲ့အစည်းပေါင်းစုံ၏ ငွေကြေးတောင်းခံမှုကို ရင်ဆိုင်နေရကာ "မိအေးအခါခါနာ" အဖြစ်သို့ ရောက်ရှိနေရသည်။ +++ ပအိုဝ်းဒေသနှင့် ငွေကြေးဖိအားများ +++ ၂၀၂၄ ခုနှစ် ဖေဖော်ဝါရီလတွင် စစ်မှုထမ်းဥပဒေ အသက်ဝင်လာပြီးနောက် တောင်ကြီးမြို့နယ်အတွင်းရှိ ပအိုဝ်းတိုင်းရင်းသား ဒေသခံများမှာ စစ်မှုထမ်း စုဆောင်းမှုဆိုင်ရာ ငွေကြေးဖိအားများကို ပိုမိုရင်ဆိုင်လာကြရသည်။ တောင်ကြီးမြို့နယ်သည် ပအိုဝ်းကိုယ်ပိုင် အုပ်ချုပ်ခွင့်ရဒေသ နယ်နိမိတ်အတွင်း တရားဝင် မပါဝင်သော်လည်း မြို့နယ် လူဦးရေ၏ ၇၀ ရာခိုင်နှုန်းခန့်နှင့် ကျေးရွာများတွင် ၉၀ ရာခိုင်နှုန်းခန့်မှာ ပအိုဝ်းတိုင်းရင်းသားများ နေထိုင်ကြပြီး PNA ၏ အာဏာစက် အားကောင်းသည့် ဒေသ ဖြစ်သည်။ စစ်အာဏာသိမ်းပြီးချိန်မှစ၍ PNA က ခေါင်းစဉ်အမျိုးမျိုးဖြင့် ငွေကြေးများ ကောက်ခံခဲ့ရာမှ ယခုအခါ စစ်အုပ်စုကပါ ထပ်မံကောက်ခံလာသဖြင့် ဒေသခံများမှာ ပြင်းထန်သော စီးပွားရေး အကျပ်အတည်းနှင့် ရင်ဆိုင်နေရသည်။ ဒေသခံ အမျိုးသမီးတစ်ဦးက "လတိုင်းတော့ မမှန်ဘူး။ စစ်မှုထမ်းကြေး၊ တော်ကြာ ရိက္ခာကြေး၊ ပြီးရင် ဘာပွဲညာပွဲပေါ့။ တချို့ရွာတွေကျတော့လည်း လတိုင်း ပုံမှန်ကောက်တယ်။ ရွာလူကြီးအပေါ် မူတည်နေတာ" ဟု ပြောသည်။ ကျေးရွာနှင့် ရပ်ကွက်အများစုတွင် လစဉ် ပျမ်းမျှကောက်ခံမှုများ ရှိသကဲ့သို့ မဲပေါက်သူ သို့မဟုတ် စစ်မှုထမ်းရန် အမိန့်စာရောက်လာသည့် အိမ်ထောင်စုများမှာ သိန်းရာဂဏန်းအထိ တစ်လုံးတစ်ခဲတည်း ထည့်ဝင်ကြရသည်။ အောက်ခြေ လူတန်းစားများမှာ စစ်မှုထမ်းကြေး ရရှိရန်အတွက် လူစားထိုးအဖြစ် သွားရောက်လုပ်ကိုင်ကြရသော်လည်း အုပ်ချုပ်ရေးအဖွဲ့များ၏ အကျင့်ပျက်ခြစားမှုကြောင့် ရရှိသင့်သည့် ငွေကြေးကို အပြည့်အဝ မရရှိကြပေ။ လူစားထိုး စစ်မှုထမ်းအဖြစ် သွားရောက်နေသူတစ်ဦး၏ မိခင်က "သားက ပိုက်ဆံအပြည့် မရလိုက်ဘူး။ ရာအိမ်မှူးက ဖြတ်စားထားတာ။ အုပ်ကြီးဆီ တိုင်တော့လည်း တစ်နှစ်ကျော်ပြီ၊ ဘာမှထူးမလာဘူး။ သားအသုံးလိုရင် ထုတ်ပေးရတယ်လို့ပဲ ဖြေရှင်းကြတယ်။ စားထားတဲ့သူတွေပဲ အမှန်ကို သိမှာ" ဟု ဆိုသည်။ +++ ပြည်ပရောက်သူများနှင့် အကြွေးနွံနစ်သူများ +++ ပြည်တွင်း၌သာမက ပြည်ပသို့ ထွက်ခွာသွားသည့် လူငယ်များအတွက်လည်း နေရပ်ရင်းမှ မိသားစုများက စစ်မှုထမ်းကြေးကို သုံးဆခန့် ပိုမိုထည့်ဝင်နေကြရသည်။ စစ်မှုထမ်းရန် အကျုံးဝင်သူတစ်ဦး၏ မိခင်က "သား ထိုင်းမှာတုန်းက အိမ်က ပိုထည့်ရတယ်။ သူများ ငါးသောင်းဆို သားက သိန်းကျော် ပေးရတာ။ ဟိုမှာနေလည်း ဒီမှာ ပိုထည့်နေရတော့ မထူးဘူးဆိုပြီး ပြန်လာလိုက်တယ်" ဟု ပြောသည်။ စစ်မှုထမ်းရန် တိမ်းရှောင်ရင်း ထိုင်းနှင့် မလေးရှားနိုင်ငံတို့သို့ တရားမဝင် ထွက်ခွာကြသူများမှာလည်း လမ်းခရီး အန္တရာယ်၊ ကုန်ကျစရိတ်နှင့် ဖမ်းဆီးခံရမည့် ဘေးများ ရင်ဆိုင်ကြရသည်။ တရားမဝင် ပြည်ပထွက်ခွာဖူးသူ လူငယ်တစ်ဦးက "သွားတုန်းက ကားသေးသေးလေးမှာ ၈ ယောက်တက်စီးရတယ်၊ စရိတ် သိန်း ၃၀ ကုန်တယ်။ ဟိုရောက်တော့ ဘတ်ရိုက်ပေမဲ့ အလုပ်မရဘူး။ အကူအညီမဲ့ပြီး အောက်လမ်းကပဲ ပြန်ဝင်လာရတော့ အကြွေး သိန်း ၃၀ ကျန်ခဲ့တယ်။ အခု အကြွေးလည်း ဆပ်နေရတယ်၊ စစ်မှုထမ်းကြေးလည်း တစ်လ ၈ သောင်း ဆက်ပေးနေရတယ်" ဟု ဆိုသည်။ +++ ပေါ်တာဆွဲ ဖမ်းဆီးမှုများနှင့် စိုးရိမ်ချက်များ +++ စစ်မှုထမ်းကြေး ကောက်ခံမှုများအပြင် အဓမ္မ ပေါ်တာဆွဲ ဖမ်းဆီးမှုများကြောင့်လည်း လူငယ်များနှင့် မိသားစုများ လုံခြုံရေးအတွက် စိုးရိမ်နေကြရသည်။ ပြီးခဲ့သည့် ဇူလိုင်လ ၁၅ ရက် ညပိုင်းက တောင်ကြီးမြို့ မြို့မဈေးအနီးတွင် အလုပ်မှပြန်လာသည့် လူငယ် ၂၆ ဦး အဓမ္မဖမ်းဆီးခံခဲ့ရပြီး ဗထူးတပ်လေ့ကျင့်ရေးကျောင်းမှတစ်ဆင့် ကရင်နီ စစ်မျက်နှာသို့ ပို့ဆောင်ခံခဲ့ရသည်။ တောင်ကြီးမြို့မှ ဈေးသည် ကိုမင်းမင်း (အမည်လွှဲ) က "တောင်ကြီးမှာ ပေါ်တာဆွဲတာ ငြိမ်တယ်လို့ ပြောလို့မရဘူး။ သတင်းမထွက်အောင် ဖုံးထားကြတာ။ Facebook မှာ တင်ဖို့တောင် ကြောက်နေရတော့ ဘုရားဖြူဘက်မှာ ဆွဲသွားရင် ဘယ်သူမှ မသိနိုင်ဘူး" ဟု ပြောသည်။ ထို့ပြင် စစ်မှုထမ်းပြီး ပြန်လာသူများကိုပင် စာရင်းများ ထပ်မံကောက်ယူထားပြီး ပြန်လည်ခေါ်ယူရန် ပြင်ဆင်နေကြောင်း သတင်းများ ထွက်ပေါ်နေသည်။ အင်းလေးဒေသမှ စစ်မှုထမ်းပြီး ပြန်ရောက်လာသူတစ်ဦး၏ မိခင်က "သူက စစ်မှုထမ်းရလို့ ကရင်နီကို သွားခဲ့ရတာ။ ပြန်လာတော့ တအားကြောက်လန့်နေပြီး လူတောမတိုးနိုင်ဘူး။ အခု စာရင်း ထပ်ကောက်ထားတယ်။ သင်တန်းပေးစရာ မလိုလို့ အရင်သွားဖူးသူတွေကိုပဲ ထပ်ခေါ်မယ်ကြားတယ်။ နောက်တစ်ခေါက်ဆို ဘုရားကယ်မှပဲ ရတော့မယ်" ဟု ရင်ဖွင့်သည်။ ကရင်နီဒေသမှ တောင်ကြီးသို့ စစ်ဘေးရှောင်လာသည့် ဈေးဆိုင်ပိုင်ရှင်တစ်ဦးကလည်း "ဟိုမှာက ၈ သောင်း၊ ဒီမှာက ၅ သောင်း ထည့်ရတယ်။ အိမ်ထောင်စုစာရင်း မရှိလည်း ထည့်ရမယ်ဆိုလို့ ထည့်နေရတာ။ တစ်လတစ်လ အိမ်ငှားစရိတ်၊ ကလေးကျောင်းစရိတ်နဲ့ စစ်မှုထမ်းကြေးပေးဖို့ တော်တော် ရုန်းကန်နေရတယ်" ဟု ပြောသည်။ ရှမ်းပြည်တောင်ပိုင်းတွင် စစ်မှုထမ်းဥပဒေ၏ ရိုက်ခတ်မှုကြောင့် မိသားစုများ၏ စီးပွားရေး ပျက်စီးရုံသာမက သားသမီးများ၏ အသက်အန္တရာယ်နှင့် အနာဂတ်ပါ ပျောက်ဆုံးနေရပြီး၊ မိခင်များအတွက်မူ "အိမ်ပြန်လာနိုင်ပါဦးမလား" ဆိုသည့် မေးခွန်းဖြင့် သားအပြန်ကို ရင်တမမနှင့် မျှော်လင့်နေကြရဆဲ ဖြစ်သည်။

စစ်မှုထမ်းဥပဒေကြောင့် မိအေးအခါခါနာရသည့် ရှမ်းတောင်ဒေသ

စစ်မှုထမ်းဥပဒေကြောင့် မိအေးအခါခါနာရသည့် ရှမ်းတောင်ဒေသ ဆိုင်းနှောင်ရေးသည်။ သတင်းနှင့် မီဒီယာ ကွန်ရက်၂၀၂၆ ခုနှစ်၊ အောက်တိုဘာလ ၂၇ ရက် “တစ်ဖက်ကို…

  • October 28, 2026
ငပြီကျွန်းကမ်းတက်တိုက်ပွဲတွင် စစ်အုပ်စု အကျအဆုံးများပြီး ထပ်မံကမ်းတက်ရန် ကြိုးစားနေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၂၇ ရက်။ ရခိုင်ပြည်၊ စစ်တွေမြို့အရှေ့ဘက် ပေါက်တောမြို့နယ်အပိုင် ငပြီကျွန်းပေါ်တွင် စစ်အုပ်စုတပ်က အကျအဆုံးများ စွာဖြင့် ဆက်လက် ကမ်းတက်ရန် ကြိုးပမ်းလျက်ရှိကြောင်း ဒေသတွင်း စစ်ရေးသတင်း အရင်းအမြစ်များက ပြောသည်။ လက်ရှိ အခြေအနေအရ ကမ်းတက်နိုင်ခဲ့ပြီး ကျွန်းပေါ်တွင် ကျန်ရှိနေသည့် စစ်အုပ်စု လက်ကျန်စစ်သား အများစု မှာ လက်နက်ချ အလင်းဝင်ရောက်မှုများ ရှိနေသကဲ့သို့ သေဆုံးမှုများလည်း ရှိနေသည်။ စစ်အုပ်စု၏ ငပြီကျွန်း ကမ်းတက်ရန် ကြိုးပမ်းသည့် တိုက်ပွဲများတွင် အထိအခိုက်နှင့် အကျအဆုံး အင်မတန် များပြားခဲ့ပြီး ပထမဦးဆုံး ကမ်းတက်ရန် ကြိုးစားသည့်နေ့မှာပင် အတပ်ဖွဲ့ဝင် ၅၀ ခန့် ကျဆုံးခဲ့ကြောင်း အာရက္ခတပ်တော် (AA) နှင့် နီးစပ်သူ တစ်ဦးက ပြောသည်။ “တချို့တွေ ကမ်းပေါ်ရောက်လာတဲ့သူတွေလည်းပဲ ထိခိုက်၊ သေဆုံးတာ၊ ဖမ်းဆီးခံရတာတွေ ရှိပါတယ်။ နောက် ပိုင်းလည်းပဲ သူတို့ဘက်က ဆက်တိုက် ကမ်းတက်ဖို့ ကြိုးစားတဲ့ ဖြစ်စဉ်တွေမှာလည်းပဲ အထိအခိုက်၊ အကျ အဆုံးတွေ အင်မတန်များပါတယ်။ အေအေဆီမှာ အညံခံလိုက်ရတာတွေ များတော့ ကြည်း၊ ရေ၊ လေ အင်အား အလုံးအရင်းသုံး တိုက်နေတာ အခုတော့ အားပျော့သွားပြီ” ဟု ၎င်းက ပြောသည်။ အောက်တိုဘာ ၂၃ ရက်နေ့မှ ၂၅ ရက်နေ့အထိ ငပြီကျွန်းတိုက်ပွဲအတွင်း စစ်အုပ်စု တပ်သားများမှာ ရိက္ခာပြတ် လပ်ပြီး လက်နက်ချ အလင်းဝင်ရောက်ခဲ့မှုများ ရှိခဲ့သလို ကျေးရွာအချို့တွင် အဆက်အသွယ် ပြတ်တောက်နေ သည့် တပ်စိပ် အချို့လည်း ရှိနေဆဲ ဖြစ်သည်။ ဒေသခံ အမျိုးသား တစ်ဦးက “လေယာဉ်တွေနဲ့ ငပြီကျွန်းဘက်ကို ဗုံးကြဲတာတွေရှိနေပေမယ့် ကမ်းတက်ဖို့ လုပ်တဲ့ သင်္ဘောတွေတော့ မတွေ့တော့ဘူး၊ ရွှေမင်းဂံ ရေတပ်စခန်းကလည်း ပုဏ္ဏားကျွန်းနယ်စပ်ကို အာရုံစိုက် ရတော့ ဒီဘက်သိပ် မလာတော့ဘူး။ အေအေက ပြန်ထိန်းထားတယ်လို့ပြောနေတယ်။ ကျွန်းပေါ်မှာ ကျန်နေတဲ့ စစ်သားတွေ ငါးကန်၊ ပုဇွန်ကန်တွေမှာ ပုန်းနေတယ်လို့ ကြားတယ်၊ အေအေက မကြာခင် ဖမ်းမိမယ် ရိက္ခာတွေ လည်း ပြတ်နေတယ်” ဟု ပြောသည်။ စစ်အုပ်စုသည် Y-12 ထောက်ပို့လေယာဉ်များနှင့် တိုက်လေယာဉ် ၁၀ စီး ကျော်၊ စစ်သင်္ဘော ငါးစီးခန့်ဖြင့် ပစ်ကူပေးကာ အောက်တိုဘာ ၇ ရက်နေ့က ငပြီကျွန်းပေါ်သို့ စတင် ကမ်းတက်ခဲ့ခြင်း ဖြစ်သည်။ ထို့နောက် အောက်တိုဘာ ၁၇ ရက်နောက်ပိုင်းတွင် ဒုတိယအကြိမ် ကမ်းထပ်တက်ရန် ကြိုးပမ်းခဲ့သော်လည်း အထိအခိုက် အကျအဆုံးများပြားကာ ကမ်းမတက်နိုင်တော့ဘဲ ဖြစ်နေသည်။ လက်ရှိတွင် အာရက္ခတပ်တော်က စစ်တွေမြို့ပတ်လည် အခြေစိုက်တပ်ရင်းများနှင့် ဒကစတို့နှင့် အနီးဆုံးအထိ ချဉ်းကပ်ထားပြီး မြင့်ကျွန်းဝန်းကျင်ရှိ စစ်တပ်စခန်းများနှင့် ဝါဘိုအနီးဝန်းကျင် စခန်းများကိုလည်း သိမ်းပိုက်ရယူ ထားသည်။ ဓာတ်ပုံ – (ရက္ခိုင့်တပ်တော် (AA) တပ်ဖွဲ့ဝင်တချို့ စစ်ရေးလေ့ကျင့်နေကြစဉ် - ပုံဟောင်း။ / AA Info Desk) #ငပြီကျွန်း

ငပြီကျွန်းကမ်းတက်တိုက်ပွဲတွင် စစ်အုပ်စု အကျအဆုံးများပြီး ထပ်မံကမ်းတက်ရန် ကြိုးစားနေ

ငပြီကျွန်းကမ်းတက်တိုက်ပွဲတွင် စစ်အုပ်စု အကျအဆုံးများပြီး ထပ်မံကမ်းတက်ရန် ကြိုးစားနေ သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၂၇ ရက်။ ရ…

  • October 27, 2026
ကျောက်ဖြူ တောင်မော်ဦးရေတပ်အနီး တိုက်ပွဲများ ပြန်လည်ပြင်းထန်လာ

ကျောက်ဖြူ တောင်မော်ဦးရေတပ်အနီး တိုက်ပွဲများ ပြန်လည်ပြင်းထန်လာ

ကျောက်ဖြူ တောင်မော်ဦးရေတပ်အနီး တိုက်ပွဲများ ပြန်လည်ပြင်းထန်လာ သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၂၇ ရက်။ ရခိုင်ပြည်၊ ကျောက်ဖြူမြ…

  • October 27, 2026
×Close