သတင်း

တနင်္သာရီတိုင်း မောတောင်၌ လူတဦး သေဆုံးခဲ့သော လူနာတင်ကား ပစ်ခတ်မှု လက်သည် မပေါ်သေး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၀ ရက်။ တနင်္သာရီတိုင်း၊ မြိတ်ခရိုင်၊ မောတောင်မြို့တွင် "သင်္ဂဟမိတ္တ" နာရေးကူညီမှုအသင်းပိုင် လူနာတင်ကားတစ်စီး ပစ်ခတ်ခံရပြီးနောက် လက်ရှိအချိန်အထိ မည်သည့်အဖွဲ့က ကျူးလွန်သည်ဆိုသည်ကို နှစ်ဖက် လက်နက်ကိုင် တပ်များဘက်က တစ်စုံတစ်ရာ ထုတ်ပြန်ထားခြင်း မရှိသေးကြောင်း ကူညီဆောင်ရွက်ပေးနေသူများက ပြောသည်။ မောတောင်မြို့ အနီးတစ်ဝိုက်တွင် စစ်အုပ်စုတပ်နှင့် ကရင်အမျိုးသား လွတ်မြောက်ရေးတပ်မတော် (KNLA)၊ အခြားတော်လှန်ရေးတပ်ဖွဲ့ တို့ စစ်ရေးလှုပ်ရှားနေကြပြီး ယခု ပစ်ခတ်ခံရသည့် တနင်္သာရီ-မောတောင်လမ်း (သိန်ခွန်းကျေးရွာ လမ်းပိုင်း) မှာ စစ်အုပ်စုတပ်က ၂၀၂၄ ခုနှစ်မှစ၍ ပြန်လည်ထိန်းချုပ်ထားသည့် နယ်မြေ ဖြစ် သည်။ မွန်ပြည် လူ့အခွင့်အရေး ဖောင်ဒေးရှင်း ပရိုဂရမ်ဒါရိုက်တာ နိုင်အဲမွန်က “အခုအထိတော့ ဘယ်အဖွဲ့ကရယ်လို့ အတည်မပြုနိုင်သေးပါဘူး။ စစ်ကော်မရှင်က ရာခိုင်နှုန်းတော့ များပါတယ်။ ဒီလို ရာဇဝတ်မှုကို ကျူးလွန်ရဲ တယ်ဆိုရင်” ဟု ပြောသည်။ စက်တင်ဘာလ ၇ ရက် နေ့လယ်ပိုင်းခန့်တွင် အသက် ၃၃ နှစ်အရွယ် ကိုသားကြီး (ခ) ဇော်မင်းထွန်း ဆိုသူသည် သူငယ်ချင်း ၃ ဦးနှင့်အတူ မောတောင်မြို့သို့ အဆိုပါ လူနာတင်ကားဖြင့် ကားကြုံလိုက်ပါလာစဉ် မောတောင်မြို့ ၏ အနောက်တောင်ဘက် ၅၁ မိုင်ခန့်အကွာ၌ ပစ်ခတ်ခံခဲ့ရခြင်း ဖြစ်သည်။ အဆိုပါ ပစ်ခတ်မှုကြောင့် ကိုသားကြီးမှာ နဖူးတည့်တည့်၌ ကျည်ထိမှန်ခဲ့ပြီး မောတောင်မြို့သို့ မရောက်မီ နာရီ ဝက်ခန့်အလိုတွင် ပွဲချင်းပြီး သေဆုံးခဲ့ရသည်။ သေနတ်ထိမှန်ပြီးနောက် ယာဉ်တိမ်းမှောက်မှု ဖြစ်ပွားခဲ့သော်လည်း ကားပေါ်တွင် ပါလာသည့် ကျန် ၂ ဦးမှာ အသက်ဘေးမှ လွတ်မြောက်ခဲ့ပြီး ထိခိုက်ဒဏ်ရာ ရရှိခြင်း မရှိပေ။ “မြိတ်ကနေ မောတောင်ကို ပြန်လာတာ ဟိုင်းဝေးလမ်းပါ။ အဲဒီလမ်းပေါ်က ရေဖြူရွာ အရောက်မှာ စပစ်တာ ပါ။ အဲဒီနေ့ စောစောပိုင်းမှာ တိုက်ပွဲဖြစ်ခဲ့တာ ရှိတယ်၊ သို့သော် ကားကို ပစ်တဲ့အချိန် တိုက်ပွဲမဖြစ်ဘူးလို့ ပြော တယ်။ ကားကို ဦးတည်ပစ်တာလို့ ကောက်ချက်ချလို့ ရပါတယ်” ဟု နိုင်အဲမွန်က ဆက် ပြောသည်။ ပြီးခဲ့သည့် စက်တင်ဘာလ ၅ ရက်နေ့ကလည်း အဆိုပါလမ်းပိုင်း၌ တနင်္သာရီမြို့နယ်ရှိ ရေဘေးသင့်ပြည်သူများ ထံ သွားရောက်ကူညီသည့် ကူညီရေးယာဉ်များ ပစ်ခတ်ခံခဲ့ရသဖြင့် ကြက်ခြေနီ တပ်ဖွဲ့ဝင်တစ်ဦး ဒဏ်ရာရရှိခဲ့ သည်။ စစ်အာဏာသိမ်းပြီးနောက်ပိုင်း တနင်္သာရီတိုင်းနှင့် ကရင်ပြည်သို့ သွားရောက်သည့် မော်တော်ယာဉ်များမှာ မကြာ ခဏ ပစ်ခတ်မှုနှင့် လုယက်မှုများ ရင်ဆိုင်နေရပြီး ဖြစ်စဉ်အများစုမှာ လက်သည်မပေါ်ဘဲ ကျန်ရစ်လေ့ရှိကြောင်း ဒေသခံများက ပြောသည်။ ဓါတ်ပုံ - Crd #မောတောင်

တနင်္သာရီတိုင်း မောတောင်၌ လူတဦး သေဆုံးခဲ့သော လူနာတင်ကား ပစ်ခတ်မှု လက်သည် မပေါ်သေး

တနင်္သာရီတိုင်း မောတောင်၌ လူတဦး သေဆုံးခဲ့သော လူနာတင်ကား ပစ်ခတ်မှု လက်သည် မပေါ်သေး သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၀ ရက်။ တနင်္…

  • September 10, 2026
AA ထိန်းချုပ်နယ်မြေ ၅ ခုကို စစ်တပ်က ‘၄၉၂၆ စစ်ဆင်ရေး’ ဖြင့် ထိုးစစ်ဆင်နေသော်လည်း ခြေမချနိုင်သေး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၀ ရက်။ အာရက္ခတပ်တော် (AA) ထိန်းချုပ်ထားသည့် နယ်မြေ နေရာ ၅ ခုကို စစ်အုပ်စုတပ်က "၄၉၂၆ စစ်ဆင်ရေး" အမည်ဖြင့် ထိုးစစ်ဆင်နေသော်လည်း လက်ရှိအချိန်အထိ အဆိုပါ စိုးမိုးနယ်မြေများသို့ စစ်အုပ်စုတပ်မှ ခြေ မချနိုင်သေးကြောင်း စစ်ဆင်ရေးနယ်မြေရှိ သတင်းအရင်းအမြစ်များက ပြောသည်။ AA ထိန်းချုပ်နယ်မြေများနှင့် ထိစပ်နေသည့် နေရာများ၌ စစ်တပ်က ထိုးစစ်ဆင်နေခြင်းကြောင့် တိုက်ပွဲအချို့ ဖြစ်ပွားလျက်ရှိသည်။ သို့သော်လည်း AA စိုးမိုးနယ်မြေများအတွင်း တပ်စွဲခြင်းနှင့် စခန်းသိမ်းပိုက်ခြင်းများ မပြုလုပ်နိုင်သေးပေ။ စက်တင်ဘာလ ၄ ရက်နေ့တွင် စတင်ခဲ့သည်ဆိုသော အဆိုပါ စစ်ဆင်ရေးအတွင်း စစ်တပ်သည် စစ်တွေ မြို့နှင့် ပုဏ္ဏားကျွန်း အစပ်နယ်မြေများ၊ ကျောက်ဖြူ-စနဲ လမ်းပိုင်း၊ ဧရာဝတီတိုင်းနှင့် ရခိုင်ပြည်အစပ် (ဂွမြို့နယ် အစပ်)၊ မကွေးတိုင်းနှင့် ရခိုင်ပြည်အစပ်၊ ပဲခူးတိုင်းနှင့် ရခိုင်ပြည်အစပ် နေရာများ၌ တိုက်ပွဲများ ဖြစ်ပွားနေခြင်း ဖြစ်သည်။ ဧရာဝတီ-ရခိုင် နယ်စပ်တွင် နေထိုင်သည့် စစ်ရေးသတင်းအရင်းအမြစ် တစ်ဦးက “၄၉၂၆ စစ်ဆင်ရေးဆိုတာက အခုမှသိလာတာပေါ့။ ကျနော်တို့ ဧရာဝတီဘက်မှာက ရိုးမပေါ်ကို စစ်တပ်စစ်ကြောင်းထိုးနေတာက ပုံမှန်လိုဆို ပေမယ့် ထူးခြားလာတာက ဩဂုတ်လ ဒုတိယအပတ်ကစပြီး ဧရာဝတီ ရခိုင်အစပ်ကိုရောက်လာတဲ့ စစ်ကြောင်း တွေ များလာတယ်၊ နောက် စစ်မှုထမ်းသစ်တွေကို ရိုးမအစပ်နေရာတွေမှာ ထွက်ပြေးတာ ဒဏ်ရာရတာတွေကို တွေ့လာရတယ်။ နောက်ပြီး ရခိုင်ရိုးမပေါ်ကို အတင်းစစ်ကြောင်းထိုးတာ ပေါ်တာဆွဲတာတွေများလာတာတွေကို တွေ့ရတယ်၊ ရေကြည်မြို့နယ် သာပေါင်းမြို့နယ်တွေ ရေကြောင်းမှာဆို ရွှေသောင်ယံဘက်ကထိုးလာတာတွေ ဒါတွေဟာ သူတို့စစ်ဆင်ရေးကို ပေါလွင်စေတာပါ” ဟု ပြောသည်။ စစ်အုပ်စုတပ်သည် အဆိုပါ စစ်ဆင်ရေးကို ဖော်ဆောင်ရန်အတွက် ဩဂုတ်လကတည်းက ဧရာဝတီ၊ မကွေးနှင့် ပဲခူးတိုင်းတို့သို့ စစ်ကြောင်းများ စေလွှတ်၍ အင်အားဖြည့်တင်းခဲ့သည်။ ထို့ပြင် စစ်အုပ်စုတပ် လက်ရှိ ထိန်းချုပ်ထားဆဲဖြစ်သည့် ကျောက်ဖြူနှင့် စစ်တွေမြို့နယ်များအတွင်း AA စိုးမိုး နယ်မြေများနှင့် ထိစပ်နေသည့် နေရာများသို့လည်း အင်အားဖြည့်တင်းကာ စစ်ကြောင်းထိုးခဲ့သည်။ လက်ရှိတွင် ကျောက်ဖြူမြို့နယ်၊ တောင်မော်ဦး ရေတပ်စခန်းမှ အဝတောင်စခန်းသို့ အင်အားဖြည့်တင်း၍ ကျောက်ဖြူ-စနဲဘက်သို့ အင်အားအများအပြားဖြင့် ထိုးစစ်ဆင်နေသကဲ့သို့ စစ်တွေမြို့နယ်မှလည်း ပုဏ္ဏားကျွန်း မြို့နယ်ဘက်သို့ အင်အားဖြည့်ကာ စစ်ကြောင်းထိုးနေသဖြင့် တိုက်ပွဲများ ပြင်းထန်နေပြီး လေကြောင်းနှင့် လက်နက်ကြီး ပစ်ကူများ ပေးလျက်ရှိသည်။ စစ်တွေမြို့နယ် စစ်ရေးသတင်းအရင်းအမြစ် အမျိုးသားတစ်ဦးက “လက်ရှိ ကျနော်တို့ စစ်တွေ ဝါဘိုဘက်တွေ၊ ပုဏ္ဏားကျွန်းအစပ်တွေမှာ တိုက်ပွဲဖြစ်နေပြီး စစ်တွေမြို့ထဲအထိ လက်နက်ကြီးကျလာတာပါ။ တဆက်တည်း ကျောက်ဖြူဘက်မှာလည်း တိုက်ပွဲရှိတယ်လေ။ အခုတစ်ခေါက် စစ်တွေနဲ့ ကျောက်ဖြူနယ်စပ်ကို ထိုးလာတဲ့ စစ်ကြောင်းတွေဟာ သတိထားစရာပါ။ အခု နှစ်ဘက် အကျအဆုံးနဲ့ တိုက်ပွဲပြင်းထန်နေပါတယ်” ဟု ပြော သည်။ ထို့ပြင် မကွေးတိုင်း မင်းတုန်းမြို့နယ်၊ ပဲခူးတိုင်း ပန်းတောင်မြို့နယ်နှင့် ပြည်မြို့နယ် ပဒါန်းရိုးမပေါ်တို့တွင်လည်း တိုက်ပွဲများ ဖြစ်ပွားလျက်ရှိရာ ညောင်ကျိုးနှင့် ပွိုင့် ၆၆၆ ကုန်း အနီးဝန်းကျင်၌ တိုက်ပွဲများ ဖြစ်ပွားနေသကဲ့သို့ မကွေးတိုင်း ပဒါန်းမြို့နယ် နတ်ရေကန် ဗျူဟာကုန်းအနီးနှင့် ပဇီကျေးရွာ ဝန်းကျင်တို့တွင်လည်း တိုက်ပွဲများ ရှိနေသည်။ အဆိုပါ "၄၉၂၆ စစ်ဆင်ရေး" နှင့် ပတ်သက်၍ စစ်အုပ်စုဘက်က တရားဝင် ထုတ်ပြန်ကြေညာခြင်း မရှိသေး သော်လည်း စစ်အုပ်စု ထောက်ခံသည့် ဝါဒဖြန့် လော်ဘီချန်နယ်များတွင် ကျယ်ကျယ်ပြန့်ပြန့် ရေးသားဖော်ပြနေ ကြပြီး ရခိုင်ပြည်အတွင်းသို့ ထိုးစစ်ဆင်ရန် ကြိုးပမ်းလျက်ရှိသည်။ ဓါတ်ပုံ - (အေအေတပ်ဖွဲ့အချို့ / ပုံဟောင်း - Crd) #၄၉၂၆စစ်ဆင်ရေး

AA ထိန်းချုပ်နယ်မြေ ၅ ခုကို စစ်တပ်က ‘၄၉၂၆ စစ်ဆင်ရေး’ ဖြင့် ထိုးစစ်ဆင်နေသော်လည်း ခြေမချနိုင်သေး

AA ထိန်းချုပ်နယ်မြေ ၅ ခုကို စစ်တပ်က ‘၄၉၂၆ စစ်ဆင်ရေး’ ဖြင့် ထိုးစစ်ဆင်နေသော်လည်း ခြေမချနိုင်သေး သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၀ …

  • September 10, 2026
ပလက်ဝတွင် ရခိုင်စာနှင့် မြန်မာစာကို စိတ်ကြိုက်တစ်ဘာသာ ရွေးချယ်သင်ယူနိုင်ဟု ULA ထုတ်ပြန် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၉ ရက်။ အာရက္ခတပ်တော် (AA) ထိန်းချုပ်ထားသည့် ပလက်ဝခရိုင်အတွင်း အခြေခံပညာ ၁၂ တန်း သင်ရိုး၌ ရခိုင်စာပေ အစားထိုး သင်ကြားခိုင်းမှုအပေါ် ကန့်ကွက်မှုများ ထွက်ပေါ်နေချိန်တွင် ရခိုင်စာကို မသင်မနေရ မဟုတ်ဘဲ မြန်မာစာနှင့် ရခိုင်စာအနက် စိတ်ကြိုက်တစ်ဘာသာ ရွေးချယ် သင်ယူနိုင်ကြောင်း ULA က ထုတ်ပြန်လိုက်သည်။ အဆိုပါကိစ္စနှင့်ပတ်သက်၍ ULA ၏ အာရက္ခအမျိုးသား ပညာရေးဌာနက စက်တင်ဘာလ ၉ ရက်တွင် ထုတ်ပြန် လိုက်ခြင်း ဖြစ်သည်။ ထုတ်ပြန်ချက်အရ ULA/AA ထိန်းချုပ်ထားသော ပလက်ဝခရိုင်အတွင်းမှ ၁၂ တန်း ကျောင်းသား၊ ကျောင်းသူများ အနေဖြင့် ရခိုင်ဘာသာနှင့် မြန်မာဘာသာ နှစ်ခုအနက် မိမိတို့ စိတ်ကြိုက် တစ်ဘာသာကို ရွေးချယ်သင်ယူနိုင်ပြီး အရွယ်ရောက်ပြီးသည့် လူငယ်များ ပညာသင်ကြားခွင့် ရရှိရေးကိုသာ အဓိက ဆောင်ရွက်နေခြင်းဖြစ်ကြောင်း ဆိုထားသည်။ စစ်တပ်၏ လေကြောင်းတိုက်ခိုက်မှု အန္တရာယ်အောက်မှ အကန့်အသတ်များကြားတွင် ဒေသခံ ပြည်သူ များ၏ လူမှုစီးပွား၊ ကျန်းမာရေးနှင့် ပညာရေး ကဏ္ဍများကို ခေတ်ကာလနှင့် လျော်ညီသည့် မူဝါဒများဖြင့် ဆောင်ရွက်လျက်ရှိကြောင်းလည်း ထုတ်ပြန်ချက်တွင် ဖော်ပြထားသည်။ ရခိုင်ပြည်တွင်းရှိ ကျောင်းဆရာတစ်ဦးက “ကျနော်တို့လည်း ဒီကိစ္စနဲ့ပတ်သက်ပြီး ကန့်ကွက်တာတွေ ဘာတွေ ကြားပါတယ်။ အခုလို ထုတ်ပြန်လိုက်တော့ သိသွားတာပေါ့။ ဘယ်နေရာမှာမဆို ဒေသခံလူမျိုးတွေ ကျောင်း သားတွေရဲ့ သဘောထားကို ကြည့်သင့်ပါတယ်။ အခုမှ စသင်ရမှာဆိုတော့ ကျောင်းသားရော ဆရာရော ခက်ခဲကြ ပါတယ်” ဟု ပြောသည်။ ပလက်ဝခရိုင်အတွင်း ၁၂ တန်း ရခိုင်စာ သင်ရိုးသစ်ကို မြန်မာစာနေရာတွင် အစားထိုး ရေးဆွဲထားသော်လည်း အတင်းအဓမ္မ မသင်မနေရ မဟုတ်ဘဲ နှစ်သက်ရာ ဘာသာကို ရွေးချယ်နိုင်သည့် မူဝါဒကို ကျင့်သုံးမည်ဟု ဆိုသည်။ လက်ရှိ ပလက်ဝခရိုင်အတွင်း ၁၂ တန်း ပညာသင်ယူနေသည့် ကျောင်းသား ၁၅၈ ဦး ရှိသည့်အနက် ရခိုင်လူမျိုး ၁၃၈ ဦး၊ ခူမီးလူမျိုး ၁၆ ဦး၊ ဒိုင်းနက်လူမျိုး ၃ ဦးနှင့် မြိုလူမျိုး ၁ ဦး ပါဝင်သည်။ ရက္ခိုင်အမျိုးသားအဖွဲ့ချုပ်/အာရက္ခတပ်တော် (ULA/AA) ၏ ပလက်ဝခရိုင် အပါအဝင် ရခိုင်ပြည်တွင်းရှိ (ULA/AA ထိန်းချုပ်နယ်မြေတွင်းရှိ) ကျောင်းများတွင် ၁၂ တန်း သင်ရိုးသစ်နှင့် ပတ်သက်၍ ဝေဖန်မှုများ ရှိနေ သည့်အပြင် ကမ္ဘာလုံးဆိုင်ရာ ခူမီးအဖွဲ့အစည်း (GKO) ကလည်း စက်တင်ဘာလ ၆ ရက်နေ့တွင် ထုတ်ပြန်ချက်ထုတ်၍ ကန့်ကွက်ထားသည်။ အလားတူ ခူမီးအမျိုးသား စည်းလုံးညီညွတ်ရေးပါတီ (KNUP) ကလည်း အထက်တန်းသင်ရိုးသစ် ရေးဆွဲ၍ ရခိုင်ဘာသာစာဖြင့် ပြဌာန်းသင်ကြားမှုသည် ခူမီးချင်းလူမျိုးများနှင့် အခြား ချင်းတိုင်းရင်သားများအပေါ် မထီမဲ့မြင် ပြုလုပ်ခြင်းဖြစ်သည်ဟု ထုတ်ပြန်ကန့်ကွက်ထားသည်။ ဒေသခံ ပြည်သူအများစု၏ သဘောဆန္ဒ မပါဘဲ ရခိုင်ဘာသာစကားဖြင့် သင်ရိုးညွှန်းတမ်း ပြဋ္ဌာန်းခြင်းသည် တိုင်းရင်းသားချင်း စိတ်ဝမ်းကွဲပြားစေနိုင်ကြောင်း GKO က ထောက်ပြထားခဲ့သည်။ ဓါတ်ပုံ - Crd #ရခိုင်စာ

ပလက်ဝတွင် ရခိုင်စာနှင့် မြန်မာစာကို စိတ်ကြိုက်တစ်ဘာသာ ရွေးချယ်သင်ယူနိုင်ဟု ULA ထုတ်ပြန်

ပလက်ဝတွင် ရခိုင်စာနှင့် မြန်မာစာကို စိတ်ကြိုက်တစ်ဘာသာ ရွေးချယ်သင်ယူနိုင်ဟု ULA ထုတ်ပြန် သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၉ ရက်။ …

  • September 10, 2026
တနင်္သာရီတိုင်း လောင်းလုံးတွင် စစ်တပ် စစ်ကြောင်းထိုးစဉ် ဒရုန်းဖြင့် တိုက်ခိုက်ခံရပြီး အထိနာ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၉ ရက်။ တနင်္သာရီတိုင်း၊ လောင်းလုံးမြို့နယ်၊ ဝေဒီကျေးရွာသို့ စစ်ကြောင်းထိုးဝင်ရောက်လာသည့် စစ်အုပ်စုတပ်သည် တော်လှန်ရေးတပ်ဖွဲ့များ၏ ဒရုန်းဖြင့် ဗုံးကြဲတိုက်ခိုက်မှုကြောင့် အထိနာသွားပြီးနောက် ရွာဘုန်းကြီးကျောင်း၌ တပ်စွဲကာ ရမ်းသမ်းပစ်ခတ်နေကြောင်း ဒေသခံများက ပြောသည်။ အင်အား ၁၀၀ ဝန်းကျင်ပါရှိသည့် အဆိုပါ စစ်အုပ်စုတပ်စစ်ကြောင်းသည် လောင်းလုံးမြို့ပေါ်မှတစ်ဆင့် စက် တင်ဘာလ ၈ ရက် နံနက်ပိုင်းတွင် ပြင်းထိန်ကျေးရွာသို့ စီးနင်းဝင်ရောက်ကာ ညအိပ်တပ်စွဲခဲ့ပြီးနောက် စက်တင် ဘာလ ၉ ရက် ဒီနေ့ နံနက် ၃ နာရီခွဲဝန်းကျင်တွင် အရှေ့ဘက်ရှိ ဝေဒီကျေးရွာဘက်သို့ ဆက်လက် စစ်ကြောင်း ထိုးစဉ် တိုက်ပွဲ ဖြစ်ပွားခဲ့ခြင်း ဖြစ်သည်။ တိုက်ပွဲအတွင်း တော်လှန်ရေးတပ်ဖွဲ့များက ဒရုန်းများအသုံးပြု၍ စစ်အုပ်စုတပ်စစ်ကြောင်းကို ဆက်တိုက် လိုက်လံတိုက်ခိုက်ခဲ့သဖြင့် စစ်အုပ်စုတပ်ဘက်မှ ထိခိုက်သေဆုံးမှုများပြားကာ အထိနာသွားခဲ့သည်။ ဖြစ်စဉ်နှင့် ပတ်သက်၍ ဒေသတွင်း စစ်ရေးသတင်းအရင်းအမြစ်တစ်ဦးက “မနက်အစောပိုင်း ရွာထဲ စစ်ကြောင်း ဝင်လာချိန်မှာပဲ တိုက်ပွဲစဖြစ်တာပါ။ တော်လှန်ရေးတပ်တွေဘက်က ဒရုန်းနဲ့ ဆက်တိုက်လိုက်ဗုံးကြဲတော့ စစ်တပ်ဘက်က တော်တော်လေး အထိနာသွားတယ်။ အခုတော့ ဝေဒီရွာ ဘုန်းကြီးကျောင်းထဲ တပ်စွဲထားပြီး ပတ်ဝန်းကျင်ကို လက်နက်ကြီး၊ လက်နက်ငယ်တွေနဲ့ ရမ်းပြီး ပြန်ပစ်ခတ်နေတာ” ဟု ပြောသည်။ လက်ရှိတွင် အဆိုပါ စစ်အုပ်စုတပ်စစ်ကြောင်းသည် ဝေဒီကျေးရွာ ဘုန်းကြီးကျောင်းအတွင်း တပ်စွဲထားပြီး ကျေးရွာအတွင်းသို့လည်းကောင်း၊ အနီးအနားရှိ ကျေးရွာများဘက်သို့လည်းကောင်း လက်နက်ကြီး၊ လက်နက် ငယ်များဖြင့် ဆက်တိုက် ရမ်းသမ်းပစ်ခတ်နေသည်။ စစ်ကြောင်း၏ ရမ်းသမ်းပစ်ခတ်မှုများနှင့် စစ်ရေးတင်းမာမှုများကြောင့် ပြင်းထိန်ကျေးရွာနှင့် ဝေဒီကျေးရွာတို့ အပါအဝင် အနီးအနားကျေးရွာများမှ ဒေသခံပြည်သူများသည် ဘေးလွတ်ရာသို့ ထွက်ပြေးတိမ်းရှောင်နေကြ ရပြီး လက်ရှိအချိန်အထိ နေရပ်သို့ ပြန်လည်မဝင်ရောက်နိုင်ကြသေးပေ။ ဒေသခံအမျိုးသားတစ်ဦးကလည်း “ပြင်းထိန်ရွာဘက်ကနေ စစ်ကြောင်းတက်လာကတည်းက တိုက်ပွဲဖြစ်တာ။ ဆက်တိုက် ဖြစ်နေတာလို့ ပြောလို့ရတယ်။ ဒရုန်းတွေနဲ့ပါ ဗုံးလာချတော့ ရွာသားတွေလည်း ဘေးလွတ်ရာကို အမြန်ထွက်ပြေးနေကြရတယ်။ ” ဟု ပြောသည်။ အဆိုပါ စစ်အုပ်စုတပ်စစ်ကြောင်းသည် မည်သည့်နေရာသို့ ဆက်လက်ထွက်ခွာမည်ကို အတည်မပြုနိုင်သေးဘဲ စစ်ကြောင်း၏ လှုပ်ရှားမှုကို စောင့်ကြည့်၍ ပြည်သူများအနေဖြင့် သတိပြုသွားလာနေထိုင်ကြရန် တော်လှန်ရေး အင်အားစုများက အသိပေးထားသည်။ ဓါတ်ပုံ - (ပုံဟောင်း-လောင်းလုံး ပကဖ / လောင်းလုံးမြို့နယ်တိုက်ပွဲအတွင်းတွေ့ရသည့် တော်လှန်ရေးရဲဘော်) #လောင်းလုံးမြို့နယ်

တနင်္သာရီတိုင်း လောင်းလုံးတွင် စစ်တပ် စစ်ကြောင်းထိုးစဉ် ဒရုန်းဖြင့် တိုက်ခိုက်ခံရပြီး အထိနာ

တနင်္သာရီတိုင်း လောင်းလုံးတွင် စစ်တပ် စစ်ကြောင်းထိုးစဉ် ဒရုန်းဖြင့် တိုက်ခိုက်ခံရပြီး အထိနာ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၉ ရက်။…

  • September 9, 2026
စစ်တွေ-ပုဏ္ဏားကျွန်း နယ်စပ်တွင် ‘၄၉၂၆’ စစ်ဆင်ရေးကြောင့် ရက်ဆက် တိုက်ပွဲပြင်းထန်နေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၉ ရက်။ ရခိုင်ပြည်၊ စစ်တွေမြို့နှင့် ပုဏ္ဏားကျွန်းမြို့နယ် နယ်စပ်တွင် စစ်အုပ်စုတပ်၏ “၄၉၂၆ စစ်ဆင်ရေး” ကြောင့် အာရက္ခတပ်တော် (AA) နှင့် ရက်ဆက် တိုက်ပွဲပြင်းထန်နေပြီး စစ်အုပ်စုတပ်က လေကြောင်း၊ ရေကြောင်း လက် နက်ကြီး ပစ်ကူများ ပေးနေကြောင်း ဒေသခံ စစ်ရေးသတင်းအရင်းအမြစ်များက ပြောသည်။ အာရက္ခတပ်တော် (AA) ထိန်းချုပ်ထားသော ပုဏ္ဏားကျွန်းမြို့နယ်အတွင်းသို့ စစ်အုပ်စုတပ်က ပြန်လည်ခြေ ကုတ်ယူ ထိန်းချုပ်ရန် ကြိုးပမ်းနေခြင်းဖြစ်ပြီး စစ်တွေမြို့နယ်ဘက်ရှိ မင်းချောင်းတံတားကို ဖြတ်ကျော်ကာ ဝင်ရောက်လာသည့် စစ်အုပ်စုတပ်နှင့် တိုက်ပွဲဖြစ်ပွားနေသည်မှာ ရက်သတ္တပတ်ရှိပြီ ဖြစ်သည်။ ဖြစ်စဉ်နှင့် ပတ်သက်၍ စစ်တွေဒေသခံ စစ်ရေးသတင်းအရင်းအမြစ် အမျိုးသားတစ်ဦးက “စစ်တွေမြို့နယ် မင်းချောင်းတံတားအနီးနဲ့ ပုဏ္ဏားကျွန်းမြို့နယ် ကွမ်းတောင်ကျေးရွာအနီး တိုက်ပွဲတွေ ဖြစ်ပွားနေတယ်။ စစ်သားအလောင်းတွေကို မြင်ခဲ့တဲ့သူတွေရှိတယ်။ တချို့လယ်ကွင်းတွေကို ဘယ်ဘက်ကမှ မဆင်းပဲတောတန်း တွေမှာ ဖြစ်နေတာပါ။ စစ်တပ်က အခုရက်ပိုင်းပြန်ဆုတ်သွားပေမယ့် ထပ်တက်လာလို့ အေအေနဲ့ ရက်ဆက် ဖြစ်နေတာပါ။ ဖြစ်နေတာ ခြောက်ရက်ကျော်လာပြီ၊ နှစ်ဘက်လုံး ကျတယ်ကြားတယ်၊ စစ်တပ်က ထိုးစစ် ဆိုတော့ ပိုထိတယ်” ဟု ပြောသည်။ အာရက္ခတပ်တော် ထိန်းချုပ်ထားသည့် ပုဏ္ဏားကျွန်းမြို့နယ်ရှိ ကွမ်းတောင်၊ စပါးထားနှင့် အောင်မြေကုန်း စသည့် ကျေးရွာများအနီးသို့ စစ်အုပ်စုတပ်က “၄၉၂၆ စစ်ဆင်ရေး” ဖြင့် စစ်ကြောင်းထိုး ဝင်ရောက်လာသောကြောင့် နှစ်ဖက်စလုံး ရှေ့မတိုးနိုင်ဘဲ မျက်နှာချင်းဆိုင် စစ်ဆိုင်ထားရာမှ လက်ရှိတိုက်ပွဲများ ပြင်းထန်နေခြင်းဖြစ်သည်။ အဆိုပါ ကျေးရွာများသည် ပုဏ္ဏားကျွန်းမြို့နယ်နှင့် စစ်တွေမြို့နယ် နယ်နိမိတ်ချင်း ထိစပ်နေသည့် ပုဏ္ဏားကျွန်း -စစ်တွေ ကားလမ်းမကြီး တစ်လျှောက်တွင် တည်ရှိပြီး စစ်တွေမြို့မှ ၁၅ မိုင်မှ မိုင် ၃၀ အတွင်း ကွာဝေးကာ စစ်အုပ်စုတပ်က ယခုရက်ပိုင်းအတွင်း အင်အားဖြည့်တင်း၍ စစ်ကြောင်းထိုးလာခြင်း ဖြစ်သည်။ ပြီးခဲ့သည့် ရက်ပိုင်းက စစ်တွေမြို့နယ်၊ မင်းချောင်းတံတားအနီးနှင့် ပုဏ္ဏားကျွန်းမြို့နယ်၊ ကွမ်းတောင်ကျေးရွာ အနီးတို့တွင် တိုက်ပွဲများ ဖြစ်ပွားခဲ့ပြီးနောက် စစ်အုပ်စုတပ်သည် စစ်တွေမြို့နယ် အမြင့်ကျွန်းတံတားဘက်သို့ နောက်ဆုတ်ခဲ့သော်လည်း လက်ရှိတွင် အင်အားပြန်လည်တိုးမြှင့်၍ စစ်ကြောင်းထိုး တက်လာနေသည်။ အခြား စစ်ရေးသတင်းအရင်းအမြစ် တစ်ဦးက “တိုက်ပွဲရှိနေတာ မြို့ထဲကတောင်ကြားရတယ်၊ လက်နက်ကြီး တွေပစ်တယ်။ စစ်သားအလောင်းတွေကို လယ်ကွင်းတွေ၊ ပုဇွန်ကန်တွေ၊ ချောင်းစပ်တွေမှာတွေ့နေရသလို အေအေဘက်ကလည်း ကျတယ်လို့ ကျနော်တို့သိထားတယ်။ အေအေလည်း ထိတယ်။ စစ်တပ်က ပုဏ္ဏားကျွန်း ကို ရအောင်လုပ်နေတာ” ဟု ပြောသည်။ စစ်အုပ်စုတပ်သည် လက်ရှိတွင် ပုဏ္ဏားကျွန်းဘက်ရှိ ကျေးရွာအချို့သို့ တက်လိုက်၊ ဆုတ်လိုက်ဖြင့် စစ်ရေးလှုပ် ရှားနေပြီး ရေကြောင်းမှ လက်နက်ကြီးများ၊ ဒရုန်းများနှင့် လေကြောင်းပစ်ကူများကို ဆက်တိုက် အသုံးပြု လျက် ရှိသည်။ ပြီးခဲ့သည့် စက်တင်ဘာလ ၄ ရက်မှ စတင်ကာ ပုဏ္ဏားကျွန်းသို့ ထိုးစစ်ဆင်လာသော စစ်အုပ်စုတပ်သည် စက် တင်ဘာလ ၄ ရက်နှင့် ၅ ရက်နေ့ တိုက်ပွဲများအတွင်း အကျအဆုံး များပြားခဲ့သော်လည်း ဆက်လက် စစ်ကြောင်း ထိုးနေခြင်း ဖြစ်သည်။ စစ်တွေ အမြင့်ကျွန်းဘက်ရှိ ရေတပ်မှ လက်နက်ကြီးပစ်ကူနှင့် လေကြောင်းမှ ဗုံးကြဲတိုက်ခိုက်မှု ပစ်ကူများရယူ ကာ မင်းချောင်းတံတားဘက်မှတစ်ဆင့် ပုဏ္ဏားကျွန်းမြို့နယ် ကွမ်းတောင်ဘက်သို့ ဆက်လက် စစ်ကြောင်းထိုး လျက်ရှိသည်။ ဓာတ်ပုံ – (စစ်တွေမြို့ရှိ စစ်တပ်မှ ပစ်ခတ်သည့် လက်နက်ကြီးကျည်များ ပုဏ္ဏားကျွန်းမြို့နယ်အတွင်း ကျရောက် ပေါက်ကွဲခဲ့စဉ် / APM - ပုံဟောင်း) #၄၉၂၆စစ်ဆင်ရေး

စစ်တွေ-ပုဏ္ဏားကျွန်း နယ်စပ်တွင် ‘၄၉၂၆’ စစ်ဆင်ရေးကြောင့် ရက်ဆက် တိုက်ပွဲပြင်းထန်နေ

စစ်တွေ-ပုဏ္ဏားကျွန်း နယ်စပ်တွင် ‘၄၉၂၆’ စစ်ဆင်ရေးကြောင့် ရက်ဆက် တိုက်ပွဲပြင်းထန်နေ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၉ ရက်။ ရခိုင်…

  • September 9, 2026
ပဲခူးတိုင်းအတွင်းရှိ ကပစ (၁၆) နှင့် အမြောက်တကမ်းအထိ အာရက္ခတပ်တော် ထိုးစစ်ရောက်ရှိ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၉ ရက်။ ပဲခူးတိုင်း၊ ပြည်ခရိုင်၊ ပန်းတောင်းမြို့နယ်ရှိ စစ်အုပ်စုတပ်၏ ကာကွယ်ရေးပစ္စည်းစက်ရုံ ကပစ (၁၆) နှင့် ကပစ (၉) နောက်ကျောဘက်တို့တွင် အာရက္ခတပ်တော် (AA) ပူးပေါင်းအင်အားနှင့် စစ်အုပ်စုတပ်တို့ တိုက်ပွဲများ နေ့စဉ် ပြင်းထန်နေပြီး ကပစ (၁၆) နှင့် အမြောက်တကမ်းအထိ AA ရောက်ရှိလာကြောင်း မြို့ခံများက ပြော သည်။ ကပစ (၁၆) နှင့် ကပစ (၉) တို့၌ တပ်စွဲထားသည့် ဟောင်ဝစ်ဇာ (Howitzer) အမြောက်များဖြင့် စက်တင်ဘာ ၄ ရက်မှ ယနေ့အထိ ပစ်ခတ်သံများ ဆက်တိုက် ထွက်ပေါ်နေသလို လေကြောင်းမှလည်း ဗုံးကြဲတိုက်ခိုက်မှုများ ပြုလုပ်လျက်ရှိသည်။ ကပစ (၉) အနီးနေထိုင်သည့် ဒေသခံတစ်ဦးက ”ကပစ ၁၆ ရဲ့ နောက်ဘက် မသုန်ရွာဘေးချောင်းစပ်မှာ အမြောက် နှစ်လက်ထိုင်ထားပြီး ဆော်နေတာ အေအေက တောင်ပေါ်ကနေ ပစ်ရင်ရတယ်။ ဒါပေမဲ့ ရွာမလွတ် လို့ မပစ်တာ လို့ ပြောတယ်။ ကပစ ၉ ကလည်း အမြောက်နဲ့ ကျောက်ဖူးကြိုးဝိုင်းထဲ ပစ်ထည့်နေတယ်” ဟု ပြော သည်။ စစ်အုပ်စုတပ်ဘက်မှ အသုံးပြုနေသည့် ဟောင်ဝစ်ဇာ အမြောက်များသည် အမျိုးအစားနှင့် အသုံးပြုသည့် ကျည် ပေါ် မူတည်၍ အဝေးဆုံး ၁၁ ကီလိုမီတာ (၇ မိုင်ခန့်) အထိ ရောက်ရှိနိုင်သည်။ ဟောင်ဝဇ်ဇာ အမြောက်များသည် အမြင့်ထောင်ပစ်သော အမြောက်များဖြစ်ပြီး တောင်ကုန်းတောင်တန်း အတားအဆီးများနောက်ကွယ်ရှိ ပစ်မှတ်များကို ပစ်ခတ်ရန် အသုံးပြုသည်။ ဥသျှစ်ပင်အနီးတဝိုက် ကျေးရွာများရှိ ဒေသခံများ၏ ပြောကြားချက်အရ ညဘက်များတွင်သာ ပစ်ခတ်သံများ တိတ်ဆိတ်သွားလေ့ရှိပြီး မိုးမလင်းမီအချိန်မှစ၍ ပြန်လည်ပစ်ခတ်နေကြသဖြင့် AA ဘက်မှ တန်ပြန်ထိုးစစ် ပြန်လည် စတင်လာခြင်း ဖြစ်သည်ဟု ရွာသားများက သုံးသပ်နေကြသည်။ မြေပြင်ကင်းထောက် စစ်ရေးသတင်းမြစ်တစ်ဦးက ”စက်တင်ဘာ ၅ ရက်နေ့ ညနေစောင်းကလည်း အရေးပေါ် မီးတွေဖွင့် အရမ်းမောင်းလာတဲ့ ကျောက်ကားပေါ်မှာ ပိုက်တန်းလန်းနဲ့ စစ်သားတွေ မြင်လိုက်တယ် ဘယ်ပို့လဲ မသိဘူး” ဟု ပြောဆိုသည်။ ပြီးခဲ့သည့် ဖေဖော်ဝါရီလကလည်း အာရက္ခတပ်တော်က စစ်အုပ်စု၏ ကာကွယ်ရေးပစ္စည်းစက်ရုံများကို ဦးတည် တိုက်ခိုက်ခဲ့သဖြင့် ကပစ (၁၆) ၌ လုပ်ငန်းများ ရပ်နားကာ ခံစစ်ပြင်ထားခဲ့ဖူးသည်။ လက်ရှိအခြေအနေအရ ကပစ (၁၆) နှင့် အနီးဆုံးရှိ ကျွဲကန်တောင်စခန်းအထိ AA က သိမ်းပိုက်ထားပြီး ဆက်လက် ထိုးစစ်ဆင်နေခြင်း ဖြစ်သည်။ အာရက္ခတပ်တော် သိမ်းပိုက်ထားသည့် ကပစ (၁၆) ၏ ပွိုင့် ၆၆၆ စခန်းသည် တချိန်က သူရဲတန်းကြိုးဝိုင်း အတွင်းရှိ သစ်မှောင်ခိုဂိတ်တစ်ခု ဖြစ်ခဲ့ပြီး အဆိုပါ စခန်းအနီးတွင် ရခိုင်ပြည်၊ သံတွဲမြို့နယ်၊ လှရွှေလှေဘက်သို့ ပေါက်သည့် သစ်ထုတ်လမ်းတစ်လမ်းရှိသည်။ ဓာတ်ပုံ – Crd #ကပစ၁၆ #ပဲခူးတိုင်း

ပဲခူးတိုင်းအတွင်းရှိ ကပစ (၁၆) နှင့် အမြောက်တကမ်းအထိ အာရက္ခတပ်တော် ထိုးစစ်ရောက်ရှိ

ပဲခူးတိုင်းအတွင်းရှိ ကပစ (၁၆) နှင့် အမြောက်တကမ်းအထိ အာရက္ခတပ်တော် ထိုးစစ်ရောက်ရှိ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၉ ရက်။ ပဲခူးတ…

  • September 9, 2026
မြဝတီတွင် စစ်ဘေးရှောင်စခန်း ဒရုန်းဖြင့် ဗုံးကြဲခံရ၍ ကလေးတစ်ဦးအပါအဝင် ၂ ဦး သေဆုံး သတင်းနှင့် မီဒီယာကွန်ရက်။ ၂၀၂၆ ခုနှစ်၊ စက်တင်ဘာလ ၈ ရက်။ ကရင်ပြည်၊ မြဝတီမြို့နယ်တောင်ပိုင်း၊ ဖလူးဒေသရှိ ပလောတပို့ (အမိုးပြာ) စစ်ဘေးရှောင်စခန်းကို စစ်အုပ်စု တပ်က ဒရုန်းဖြင့် ဗုံးကြဲတိုက်ခိုက်ခဲ့သဖြင့် အသက် ၄ နှစ်အရွယ် ကလေးငယ်တစ်ဦးနှင့် အမျိုးသမီးတစ်ဦး သေဆုံးခဲ့ကြောင်း လူ့အခွင့်အရေး အဖွဲ့အစည်းများ တာဝန်ရှိသူများနှင့် စခန်းတာဝန်ခံက ပြောသည်။ မြေပြင်တိုက်ပွဲဖြစ်ပွားခြင်း မရှိဘဲ စစ်ဘေးရှောင်များ နေ့လယ်စာ သုံးဆောင်နေချိန်၌ စစ်အုပ်စုတပ်က အဆိုပါ စစ်ဘေးရှောင်စခန်း တည့်တည့်ကို ဒရုန်းဖြင့် ပြီးခဲ့သည့် စက်တင်ဘာလ ၄ ရက် မွန်းလွဲ ၁ နာရီခန့်တွင် ဗုံးကြဲ တိုက်ခိုက်ခဲ့ခြင်းဖြစ်သည်။ မွန်ပြည်လူ့အခွင့်အရေး ဖောင်ဒေးရှင်း (Human Rights Foundation of MonLand) မှ ပရိုဂရမ် ဒါရိုက်တာ နိုင်အဲမွန်က “စစ်အုပ်စုရဲ့ ဒရုန်းဗုံးထိတာပါ။ ပလောတပို့စခန်းအနီး လမ်းမတန်းပေါ်ကို ကြဲချတာပါ။ ပထမတလုံးက လမ်းမတန်းဘေး အိမ်တအိမ်နားကျတယ်၊ နေအိမ်ထဲက ကလေး အစမှန်ပြီး နေရာမှာပဲ ဆုံးတယ်။ လည်ပင်းထိတာ။ နောက် အမျိုးသမီးတဦးက ဒုတိယကြဲတဲ့အလုံးကို ထိတယ်။ ကေ့စ်နှစ်ခုပေ့ါ။ နေရာနှစ်နေရာ။ နှစ်ဦးစလုံးက မိသားစု နှစ်စုက လာတာဖြစ်တယ်” ဟု ပြောသည်။ ဒရုန်းဖြင့် ဗုံးကြဲတိုက်ခိုက်ခံရမှုကြောင့် မင်းလက်ပံကျေးရွာမှ ပလောတပို့စခန်းသို့ စစ်ဘေးတိမ်းရှောင်လာသည့် အသက် ၄ နှစ်အရွယ် ကလေးငယ်မှာ အခင်းဖြစ်နေရာတွင် ပွဲချင်းပြီး သေဆုံးခဲ့ရသည်။ ထို့ပြင် နေအိမ်သို့ ပြေးဝင်ခိုလှုံသည့် အသက် ၄၀ အရွယ် အမျိုးသမီးတစ်ဦးလည်း ထပ်မံ ထိမှန်ခဲ့ပြီး မဲဆောက် ဆေးရုံသို့ ပို့ဆောင်ကုသစဉ် ထိုည ၇ နာရီခန့်တွင် သေဆုံးသွားခဲ့ကြောင်း သိရသည်။ စစ်အုပ်စုတပ်၏ လေကြောင်းနှင့် ဒရုန်းအန္တရာယ် စိန်ခေါ်မှုများနှင့် ပတ်သက်၍ မနိုင်အဲမွန်က ယခုကဲ့သို့ ဆက်ပြောသည်။ “နောက်ပိုင်း စွမ်းဆောင်ရည်မြင့် ဒရုန်းတွေနဲ့ လှည့်တိုက်တာ ပိုများလာတယ်။ အရင်လို လေယာဉ်နဲ့က တစ်ခါ တစ်လေပဲ ကင်းထောက်ပုံစံ ကြားတော့တယ်။ လက်နက်ကြီးနဲ့ အဝေးက နေလှမ်းပစ်တာတွေလည်း တချို့ ရှိတယ်။ စခန်းတိုင်းနဲ့ ရွာတွေမှာတော့ အခုနောက်ပိုင်း လုံခြုံရေးနဲ့ ကာကွယ်ရေး အစီအမံတွေ ပြင်ဆင်မှုတွေ ရှိလာခဲ့တာ တွေ့ရတယ်။ သို့သော် နေ့တဓူဝ လှုပ်ရှားမှုတွေကြား ရှောင်တခင် တိုက်ခိုက်မှုတွေကိုတော့ တုံပြန်နိုင်စွမ်းနည်းကြတယ်။ ဒါကြောင့်လည်း ထိခိုက်တာတွေ တိမ်းပါးတာတွေ ဖြစ်နေဆဲပါပဲ” ဟု ၎င်းက သုံးသပ်ပြောဆိုသည်။ အဆိုပါ ပလောတပို့ (အမိုးပြာ) စစ်ဘေးရှောင်စခန်းသည် ပြီးခဲ့သည့် ၂၀၂၁ ခုနှစ် ဒီဇဇင်ဘာလ တတိယအပတ် လေးကေ့ကော်မြို့သစ် တိုက်ပွဲအပြီးတွင် ယာယီစစ်ရှောင်တဲများအဖြစ်မှ စခန်းအဖြစ် တည်ထောင်လာခဲ့ခြင်း ဖြစ်သည်။ ပြီးခဲ့သည့် မတ်လ ၁၄ ရက်နေ့ကလည်း အဆိုပါ စစ်ဘေးရှောင်စခန်းကို စစ်အုပ်စုတပ်က ဒရုန်းဖြင့် တိုက်ခိုက်ခဲ့ သဖြင့် အမျိုးသားတစ်ဦး သေဆုံးပြီး ၂ ဦး ပြင်းထန်ဒဏ်ရာ ရရှိခဲ့သေးသည်။ လက်ရှိတွင် အဆိုပါ စခန်း၌ ကော့ကရိတ်မြို့နယ်အတွင်းရှိ နန်းရွှေမိတ်၊ မိဖာလဲ့၊ ထီဖိုးစံ၊ နောင်ကိုင်း၊ နောင်တပ္ပံ၊ မြပတိုင်၊ နောင်တပွဲနှင့် နောင်မိ စသည့် ကျေးရွာများမှ စစ်ဘေးရှောင် ပြည်သူများ လာရောက်ခိုလှုံလျက်ရှိ ကြောင်း စခန်းတာဝန်ခံများထံမှ သိရသည်။ ဓာတ်ပုံ – (Human Rights Foundation of MonLand) #မြဝတီ #HURFOM

မြဝတီတွင် စစ်ဘေးရှောင်စခန်း ဒရုန်းဖြင့် ဗုံးကြဲခံရ၍ ကလေးတစ်ဦးအပါအဝင် ၂ ဦး သေဆုံး

မြဝတီတွင် စစ်ဘေးရှောင်စခန်း ဒရုန်းဖြင့် ဗုံးကြဲခံရ၍ ကလေးတစ်ဦးအပါအဝင် ၂ ဦး သေဆုံး သတင်းနှင့် မီဒီယာကွန်ရက်။၂၀၂၆ ခုနှစ်၊ စက်တင်ဘာလ ၈ ရက်။ ကရင်ပြည်…

  • September 8, 2026
စစ်ကိုင်းတိုင်း ရေဦးတွင် တိုက်ပွဲမရှိဘဲ လေကြောင်းမှ ဗုံးကြဲခံရ၍ အရပ်သား ၇ ဦး သေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၈ ရက်။ စစ်ကိုင်းတိုင်း၊ ရေဦးမြို့နယ်အတွင်း မြေပြင်တိုက်ပွဲဖြစ်ပွားခြင်း မရှိဘဲ စစ်အုပ်စုတပ်က လေကြောင်းမှ ရည် ရွယ်ချက်ရှိရှိ ဗုံးကြဲပစ်ခတ်ခဲ့သဖြင့် အမျိုးသမီးတစ်ဦး အပါအဝင် ဒေသခံ အရပ်သားပြည်သူ ၇ ဦး ထက်မနည်း ပွဲချင်းပြီး သေဆုံးခဲ့ကြောင်း ဒေသခံ ပြည်သူ့ကာကွယ်ရေးတပ်ဖွဲ့ (ပကဖ)နှင့် ဒေသခံများက ပြောသည်။ စက်တင်ဘာလ ၇ ရက် ညနေ ၅ နာရီခန့်တွင် မုံရွာမြို့ အနောက်မြောက်တိုင်းစစ်ဌာနချုပ် (နမခ) မှ တက်လာ သည့် ဂျိုင်ရိုကော်ပတာ (Gyrocopter) များနှင့် Mi-35P တိုက်ခိုက်ရေး ရဟတ်ယာဉ်တို့သည် ရေဦးမြို့ နယ်၊ တင်းတိမ်ရံကျေးရွာရှိ ဈေးနှင့် ကပ်လျက်တည်ရှိသော ကားဝပ်ရှော့သို့ တည့်တည့် ဗုံးကြဲချခဲ့ခြင်း ဖြစ်သည်။ အဆိုပါ လေကြောင်း တိုက်ခိုက်မှုကြောင့် အသက် ၂၀ မှ ၅၀ နှစ်ကြားရှိ အမျိုးသမီးတစ်ဦးနှင့် အမျိုးသား ၆ ဦး နေရာတွင်ပင် သေဆုံးခဲ့ရပြီး နောက်ထပ် အမျိုးသား ၃ ဦး ဒဏ်ရာရရှိကာ ကားဝပ်ရှော့နှင့် ဈေးဆိုင်ခန်းအချို့ ပျက်စီးခဲ့ရသည်။ အလားတူ ကား ၁၀ ထက်မနည်းလည်း ပျက်စီးသွားခဲ့သည်။ ရေဦးမြို့နယ် ဒေသခံတစ်ဦးက “ဗုံးကြဲတာက ညနေ ၅ နာရီကျော်လောက်မှာ ဖြစ်တာပါ။ အရပ်သားတွေရှိတဲ့ ကားအလုပ်ရုံကို ဝပ်ရှော့နေရာကို ဂျိုင်ရိုကော်ပတာနိမ့်နိမ့်နဲ့ တည့်တည့်ကို လာကြဲသွားတာ။ ၇ ယောက် သေသွားတယ်။ လေယာဉ်ပေါ်ကနေ စက်သေနတ်တွေနဲ့ပါ လိုက်ပစ်တော့ ဘေးက အိမ်တွေလည်း မှန်တယ်။ ကြောက်လန့်ပြီး အရပ်သားတွေလည်း ဘေးလွတ်ရာကို ထွက်ပြေးနေကြရတယ်” ဟု ပြောသည်။ ထို့ပြင် အဆိုပါ လေကြောင်း တိုက်ခိုက်မှုအတွင်း လေယာဉ်ပေါ်မှပါ စက်လတ်များဖြင့် လိုက်လံပစ်ခတ်ခဲ့သဖြင့် ဒေသခံများ ဘေးလွတ်ရာသို့ ရွှေ့ပြောင်းတိမ်းရှောင်နေကြရသည်။ ရေဦးမြို့နယ် ပကဖ တာဝန်ရှိသူတစ်ဦးက “ကျနော်တို့ နယ်ဘက်မှာ စစ်တပ်က မြို့ပေါ်ကိုပဲ ထိန်းချုပ်ထားနိုင် တာ။ မြို့ ပတ်ဝန်းကျင် ရွာတွေကို စစ်တပ်က ထိန်းချုပ်နိုင်စွမ်း မရှိဘူး။ မြေပြင်မှာ တိုက်ပွဲမရှိ၊ တော်လှန်ရေး တပ်ဖွဲ့တွေ မရှိဘဲနဲ့ အခုလို အရပ်သားပစ်မှတ်တွေကို ရည်ရွယ်ချက်ရှိရှိ လေကြောင်းကနေ ဆက်တိုက် တိုက် ခိုက်နေတာပါ။ ပြည်သူတွေအနေနဲ့ လေကြောင်းသတင်းတွေကို အမြဲနားစိုပြီး ပုန်းခိုကျင်းတွေထဲ ကြိုတင် ဝင်ရောက်နေထိုင်ကြဖို့ သတိပေးချင်ပါတယ်” ဟု ပြောသည်။ တင်းတိမ်ရံကျေးရွာသည် စစ်အာဏာသိမ်းပြီးချိန်မှစ၍ စစ်အုပ်စုတပ် စစ်ကြောင်းများ၏ အကြိမ်ကြိမ် မီးရှို့ ဖျက်ဆီးခြင်း ခံခဲ့ရသလို စာသင်ကျောင်း အပါအဝင် ကျေးရွာအတွင်းသို့ လေကြောင်းမှ ဗုံးကြဲခံနေရသည့် ကျေးရွာလည်း ဖြစ်သည်။ စစ်အုပ်စုတပ်သည် စက်တင်ဘာလ ၇ ရက်နေ့၌ ရေဦးမြို့နယ် တင်းတိမ်ရံကျေးရွာအပြင် ချောင်းဦးမြို့နယ် အတွင်းသို့ပါ ဂျိုင်ရိုကော်ပတာများဖြင့် လေကြောင်းတိုက်ခိုက်မှု ပြုလုပ်ခဲ့သည်။ အလားတူ စက်တင်ဘာလ ၆ ရက်နေ့ကလည်း အနီးဝန်းကျင်ရှိ ကနီမြို့နယ်၊ ယာကြီးကျေးရွာအနီးတွင် စစ်အုပ်စု တပ်နှင့် ပြည်သူ့ကာကွယ်ရေးတပ်တို့ ထိတွေ့တိုက်ပွဲများ ဖြစ်ပွားခဲ့သည်။ စစ်အုပ်စုတပ်သည် မုံရွာ-ယာကြီး-ကလေး လမ်းပိုင်းကို အင်အား ၈၀၀ နီးပါးဖြင့် စစ်ကြောင်းထိုးနေသဖြင့် မုံရွာ-ယာကြီး-ကလေး ကားလမ်းဘေးဝဲယာရှိ ချောင်းမ၊ အောင်မင်္ဂလာ၊ သင့်ငံနှင့် ယာကြီးအုပ်စုအတွင်းရှိ ကျေးရွာ ၄ ရွာမှ ဒေသခံများ ဘေးလွတ်ရာသို့ ထွက်ပြေးတိမ်းရှောင်နေကြရသည်။ အဆိုပါ စစ်ကြောင်းသည် ယာကြီးကျေးရွာအုပ်စုအတွင်းရှိ ရွာမကျေးရွာနှင့် ရေဖြူကျေးရွာတို့တွင် တပ်စွဲကာ ဒဏ်ရာရ စစ်သည်များကို ဆေးကုသမှု ပေးနေပြီး အနီးနား ပတ်ဝန်းကျင်သို့ လက်နက်ကြီး၊ လက်နက်ငယ်များ ဖြင့် ရမ်းသန်းပစ်ခတ်လျက်ရှိသည်။ ဓာတ်ပုံ - (ဗုံးကြဲပစ်ခတ်မှုကြောင့် ပျက်စီးသွားသည့် အခြေအနေ မြင်ကွင်း / Crd) #စစ်ကိုင်းတိုင်း

စစ်ကိုင်းတိုင်း ရေဦးတွင် တိုက်ပွဲမရှိဘဲ လေကြောင်းမှ ဗုံးကြဲခံရ၍ အရပ်သား ၇ ဦး သေဆုံး

စစ်ကိုင်းတိုင်း ရေဦးတွင် တိုက်ပွဲမရှိဘဲ လေကြောင်းမှ ဗုံးကြဲခံရ၍ အရပ်သား ၇ ဦး သေဆုံး သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၈ ရက်။ စစ်က…

  • September 8, 2026
ဗန်းမော်-ရွှေကူ အစပ် ဧရာဝတီမြစ်ကူးတံတားကို စစ်တပ် ဗုံးကြဲ၍ ရထားလမ်းနှင့် ကားလမ်း ပျက်စီး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၇ ရက်။ ကချင်ပြည်၊ ဗန်းမော်မြို့နယ်နှင့် ရွှေကူမြို့နယ်အစပ်ရှိ လမ်းပန်းဆက်သွယ်ရေးနှင့် စစ်ရေးအရ အရေးပါသော စင်းခန်း ဧရာဝတီမြစ်ကူး သံမဏိသံဘောင်တံတားကို စစ်အုပ်စုတပ်က လေကြောင်းမှ ပေါင် ၅၀၀ ဗုံးများဖြင့် ကြဲချဖျက်ဆီးခဲ့သဖြင့် တံတားပေါ်ရှိ ရထားလမ်းနှင့် ကားလမ်းများ ထိခိုက်ပျက်စီးသွားခဲ့သည်။ ဗန်းမော်မြို့သို့ ရေကြောင်းမှ စစ်ကူနှင့် လက်နက်ရိက္ခာ ပို့ဆောင်သည့် စစ်အုပ်စု၏ စစ်သင်္ဘောတန်းများမှာ စင်းခန်းတံတားအနီး၌ တိုက်ခိုက်ခံရပြီး တပ်ဖွဲ့ဝင်အချို့ အလံဖြူထောင် အလင်းဝင်ခဲ့ပြီးနောက် စစ်အုပ်စုတပ်က အဆိုပါ မြစ်ကူးတံတားကို ဂျက်ဖိုက်တာဖြင့် ပေါင် ၅၀၀ ဗုံးနှစ်လုံး ကြဲချဖျက်ဆီးခဲ့ခြင်းဖြစ်သည်။ လေကြောင်းတိုက်ခိုက်မှုကြောင့် တံတား၏ အရှေ့ဘက်ခြေရင်းပိုင်းရှိ သံဘောင်များ ပျက်စီးသွားပြီး ကားတစ်စီး စာခန့် တံတားကြမ်းပြင် ပေါက်ထွက်သွားသည့်အပြင် ရထားသံလမ်းပါ လုံးဝအသုံးပြု၍ မရတော့သည်အထိ ထိခိုက်ပျက်စီးခဲ့ရသည်။ လက်ရှိ မြေပြင်အခြေအနေနှင့် ပတ်သက်၍ ဗန်းမော်ဒေသခံတစ်ဦးက ”စင်းခန်းတံတားဆိုတာ ကသာ၊ ဗန်းမော် နဲ့ စစ်ကိုင်း၊ ရှမ်းမြောက်ဘက်ကို ဆက်ထားတဲ့ အဓိက သွေးကြောပဲ။ ရထားရော ကားပါ သွားလို့ရတဲ့ တံတား ကို အခုလို ဖျက်ဆီးလိုက်တော့ စစ်အုပ်စုထက် စားဝတ်နေရေးနဲ့ ခရီးသွားလာရေးအတွက် ဒေသခံ ပြည်သူတွေ ပဲ ပိုဒုက္ခရောက်ကုန်တာ။ အခုလည်း အနားမှာ တိုက်ပွဲတွေ ဆက်ဖြစ်နေတော့ မြေပြင်မှာ သွားကြည့်ဖို့တောင် မလွယ်ဘူး” ဟု ပြောသည်။ စင်းခန်းဒေသသည် ဧရာဝတီမြစ်ကြောင်းအတိုင်း မန္တလေးမှ ဗန်းမော်သို့ ဆန်တက်လာသည့် ရေယာဉ်များ ဖြတ် သန်းရသော ဒုတိယမြစ်ကျဉ်းအနီးတွင် တည်ရှိသဖြင့် ကုန်းလမ်းရော ရေလမ်းပါ စစ်ရေးအရ အလွန်အရေးပါ သည့် နေရာတစ်ခု ဖြစ်သည်။ စင်းခန်းဒေသ စစ်ရေးအခြေအနေနှင့် ပတ်သက်၍ ဗန်းမော်ဒေသ အခြေစိုက် တော်လှန်ရေးတပ်ဖွဲ့ဝင်တစ်ဦးက ”စင်းခန်းနားမှာ တိုက်ခိုက်ခံရလို့ ကျန်ခဲ့တဲ့ စစ်သားတွေအပြင် ဝဲမ၊ ဆင်စခန်းနဲ့ နောင်မိုဘက်က ဒီကောင် (စစ်အုပ်စုတပ်) တွေဘက်က တပ်မဟာ ၈ နယ်မြေမှာ နယ်မြေရှင်းလင်းရေး ဆက်လုပ်နေတာပါ။ သူတို့ဘက် က ရေကြောင်း စစ်ကူတွေ တိုက်ခိုက်ခံရပြီး အလင်းဝင်တာတွေ ရှိလာတော့မှ ဒီအဓိက တံတားကို လေယာဉ်နဲ့ ဗုံးကြဲဖျက်ဆီး သွားတာ ဖြစ်ပါတယ်” ဟု သုံးသပ်ပြောဆိုသည်။ လက်ရှိတွင် မန္တလေးဘက်မှ ဗန်းမော်သို့ စစ်အုပ်စု၏ ရေယာဉ်တန်းများ ထပ်မံဆန်တက်လာနေသလို ရွှေကူနှင့် ဗန်းမော်မြို့နယ်အကြားတွင် ကချင်လွတ်လပ်ရေးတပ်မတော် (KIA) ပူးပေါင်းတပ်များနှင့် စစ်အုပ်စုတပ်တို့ အကြား တိုက်ပွဲများ ဆက်လက် ပြင်းထန်လျက်ရှိသည်။ #ရွှေကူ #ဗန်းမော် #ဧရာဝတီမြစ်ကူးတံတား

ဗန်းမော်-ရွှေကူ အစပ် ဧရာဝတီမြစ်ကူးတံတားကို စစ်တပ် ဗုံးကြဲ၍ ရထားလမ်းနှင့် ကားလမ်း ပျက်စီး

ဗန်းမော်-ရွှေကူ အစပ် ဧရာဝတီမြစ်ကူးတံတားကို စစ်တပ် ဗုံးကြဲ၍ ရထားလမ်းနှင့် ကားလမ်း ပျက်စီး သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၇ ရက်။ …

  • September 7, 2026
×Close