သတင်း

စစ်ထဲ အဓမ္မ သွင်းခံရပြီး တပ်အတွင်း ဖိနှိပ်ရက်စက်မှုများ ခံနေရဟု AA ထံ အလင်းဝင်သူများ ထွက်ဆို သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၂၂ ရက်။ စစ်တပ်သည် အင်အား ပြတ်လပ်လာမှုကြောင့် မြို့ပြများ၌ ပေါ်တာဆွဲခြင်းနှင့် မူးယစ်ဆေးဝါးဖြင့် မတရား စွပ်စွဲကာ စစ်ထဲ အတင်းအဓမ္မ သွင်းယူနေပြီး ရှေ့တန်းစစ်မျက်နှာ၌လည်း ညှဉ်းပန်းနှိပ်စက်မှုများနှင့် အလွန် အကျွံ အဓမ္မခိုင်းစေမှုများကို ကျူးလွန်ခံနေရကြောင်း အာရက္ခတပ်တော် (AA) ထံ အလင်းဝင်လာ သူများက ထွက်ဆိုလိုက်သည်။ ရန်ကုန်နှင့် မန္တလေးမြို့ကြီးများတွင် ဖမ်းဆီးခံခဲ့ရသည့် တပ်သား စိုးမင်းသိန်းနှင့် တပ်သား အောင်ကျော်နိုင်တို့ သည် စစ်သင်တန်းကျောင်းတွင် ထွက်ပြေးရန် ကြိုးပမ်းစဉ် ပြန်လည်မိဖမ်းမိ၍ အပြင်းအထန် ညှဉ်းပန်းနှိပ်စက် ခံခဲ့ရသလို၊ ကျောက်ဖြူစစ်မျက်နှာ ရှေ့တန်းစခန်းများသို့ ရောက်ရှိချိန်၌လည်း နေ့စဉ်နှင့်အမျှ ရိုက်နှက်နှိပ်စက် ခံခဲ့ရကြောင်း ပြောသည်။ မန္တလေးမြို့တွင် ဖမ်းဆီးခံခဲ့ရပြီး စစ်သင်တန်းကျောင်း၌ ထွက်ပြေးစဉ် ပြန်မိခဲ့သည့် တပ်သား အောင်ကျော်နိုင်က “သင်တန်းကျောင်းကိုရောက်တော့ ည ၉ နာရီလောက်မှာ ကျနော်တို့ကို မှောက်ပြီးတော့ တစ်ယောက် အချက် ၂၀ စီ ရိုက်ခံရပါတယ်။ ရိုက်ခံပြီးတော့ ကျနော်တို့ကို ခြေကျင်းခတ်တယ်။ ခြေကျင်းထည့်တယ်။ ဒေါက်ထည့် ပါတယ်” ဟု ၎င်းတို့ကြုံတွေ့ခဲ့ရသည့် ရက်စက်သည့် အပြစ်ပေးခံရမှုများကို ပြောပြသည်။ အလားတူ ရန်ကုန်မြို့၌ အလုပ်မှအပြန် မတရား စွပ်စွဲဖမ်းဆီးခံခဲ့ရသည့် တပ်သား စိုးမင်းသိန်းကလည်း “ရုံးကို ခေါ်သွားတဲ့အချိန်မှာ ကျနော်တို့ကို လက်ထဲကို မူးယစ်ဆေးဝါးတွေ ထည့်ပြီးတော့ ဓာတ်ပုံရိုက်တယ်။ ဓာတ်ပုံ ရိုက်ပြီးတော့ မင်းတို့ စစ်ထဲဝင်မလား၊ ထောင်ကျခံမလားမေးတယ်။ ကျနော်တို့ ဘာမှမပြောဘူး။ ထပ်နှိပ်စက် တယ်။ ရိုက်တယ်။ ရိုက်တော့ ကျနော်တို့လည်း တပ်ထဲဝင်မယ်လို့ ပြောလိုက်တယ်” ဟု မတရား ဖိအားပေး ခံခဲ့ ရပုံကို ထွက်ဆိုခဲ့သည်။ ကျောက်ဖြူစစ်မျက်နှာ ရှေ့တန်းစခန်းများသို့ ရောက်ရှိချိန်တွင်လည်း ပြည်သူ့စစ်တပ်သားများကိုသာ ကတုတ် ကျင်းတူးခြင်း၊ မျောတုံးထမ်းခြင်းနှင့် ကင်းစောင့်ခြင်းကဲ့သို့သော အလုပ်ကြမ်းများကို လုပ်ကိုင်ခိုင်းပြီး၊ အနည်း ငယ်မျှ မလုပ်နိုင်ပါက ရိုက်နှက်ဆဲဆိုမှုများကို နေ့စဉ်နှင့်အမျှ ကျူးလွန်ခံနေရသည်ဟု ဆိုသည်။ ထို့ပြင် ရှေ့တန်းစစ်မြေပြင်၏ ရက်စက်သည့် ဖိအားများနှင့် ညှဉ်းပန်းနှိပ်စက်မှုများကြောင့် ပြည်သူ့စစ်တပ်သား များ စိတ်ဓာတ်ကျဆင်းကာ ကိုယ့်ကိုယ်ကိုယ် အဆုံးစီရင်မှုများကိုပါ နေ့စဉ်နီးပါး မြင်တွေ့ခဲ့ရကြောင်း တပ်သား စိုးမင်းသိန်းက ယခုကဲ့သို့ ဆက် ပြောသည်။ “နေ့တိုင်းလိုလို ဆဲဆိုကြိမ်းမောင်းတယ်။ ကျနော်တို့တွေ ရှေ့မှာလည်း တွေ့ရပါတယ်။ ကျနော်တို့ ပစတွေထဲက ဆိုလို့ရှိရင် ကိုယ့်လည်ပင်းကို ထောက် ပြီးတော့ ပစ်သတ်လိုက်တဲ့ သူတွေလည်း တွေ့ရပါတယ်။ ခြေထောက် တွေကို ပစ်လိုက်တဲ့သူတွေလည်း တွေ့ပါတယ်။ ရှေ့တန်းမှာ တိုက်ပွဲ ဖြစ်ပြီးတော့ ဒဏ်ရာရလာတဲ့သူတွေကို လေး၊ ငါး၊ ခြောက်ယောက် ထမ်းစင်တွေနဲ့ ထမ်းသွားတာလည်း တွေ့ရပါတယ်။” ထိုကဲ့သို့ တပ်တွင်း၌ ရက်စက်စွာ ကျူးလွန်ခံနေရမှုများနှင့် အသက်အန္တရာယ် စိုးရိမ်လာရသည့်အတွက် အဆိုပါ တပ်သား ၂ ဦးသည် သူငယ်ချင်းများနှင့် တိုင်ပင်ကာ အလံဖြူပြ၍ AA ထံ အလင်းဝင်ရောက်ခဲ့ကြခြင်း ဖြစ် သည်။ ဓာတ်ပုံ – အာရက္ခတပ်တော် (AA) ထံသို့ ဘက်ပြောင်းအလင်းဝင်ရောက်လာကြသည့် ပြည်သူ့စစ်တပ်သား အောင်ကျော်နိုင်နှင့် စိုးမင်းသိန်းတို့ကို တွေ့ရစဉ်။ / AA ပြန်ကြားရေးဌာန #AA #စစ်သုံ့ပန်း

စစ်ထဲ အဓမ္မ သွင်းခံရပြီး တပ်အတွင်း ဖိနှိပ်ရက်စက်မှုများ ခံနေရဟု AA ထံ အလင်းဝင်သူများ ထွက်ဆို

စစ်ထဲ အဓမ္မ သွင်းခံရပြီး တပ်အတွင်း ဖိနှိပ်ရက်စက်မှုများ ခံနေရဟု AA ထံ အလင်းဝင်သူများ ထွက်ဆို သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၂၂ …

  • October 22, 2026
အင်းတော်၌ လမ်းမှားဝင်လာသည့် အရပ်သား ၂ ဦးကို စစ်တပ်က ဖမ်းဆီးပြီး ၁ ဦးကို အနီးကပ် ပစ်သတ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၂၂ ရက်။ စစ်ကိုင်းတိုင်း၊ အင်းတော်မြို့နယ်၌ စစ်အုပ်စုတပ် စခန်းချထားသည့် မအူကုန်းကျေးရွာအနီးသို့ လမ်းမှားဝင် ရောက်လာသည့် အရပ်သား အမျိုးသား ၂ ဦးကို စစ်အုပ်စုတပ်က ဖမ်းဆီးပြီး ၁ ဦးအား အနီးကပ် ပစ်သတ်ခဲ့ ကြောင်း အမျိုးသားညီညွတ်ရေးအစိုးရ (NUG) ပြည်သူ့ကာကွယ်ရေးတပ်မတော် (စစ်ရုံးချုပ်) က ရုပ်သံဖိုင်နှင့် တကွ ထုတ်ပြန်လိုက်သည်။ အဆိုပါ အရပ်သား ၂ ဦးသည် ညောင်ကုန်းကျေးရွာဘက်မှ ဆိုင်ကယ်တစ်စီးဖြင့် ထွက်လာစဉ် စစ်အုပ်စုတပ် တပ်စွဲထားသည့် နေရာသို့ အောက်တိုဘာလ ၁၉ ရက် နံနက် ၁၁ နာရီ ၂၀ မိနစ်ခန့်က လမ်းမှား ရောက်ရှိသွားပြီး နောက် ဖမ်းဆီးခံခဲ့ရခြင်း ဖြစ်သည်။ ဖမ်းဆီးခံရသူများအနက် အသက် ၂၃ နှစ်ခန့်ရှိ အမျိုးသားတစ်ဦးကို လက်နောက်ပြန် ကြိုးတုပ်ကာ မြေပြင်တွင် မှောက်ခိုင်းပြီး သေနတ်ဒင်ဖြင့် အကြိမ်ကြိမ် ရိုက်နှက်နှိပ်စက်ခဲ့သည့်အပြင် သေနတ်ဖြင့် အနီးကပ် ပစ်သတ်ကာ ရုပ်အလောင်းကို လမ်းဘေးတွင် စွန့်ပစ်ထားခဲ့ကြောင်း NUG က ထုတ်ပြန်သည်။ ထို့ပြင် အသက် ၅၀ ကျော်အရွယ်ရှိ အခြား အမျိုးသားတစ်ဦးကိုလည်း လက်နောက်ပြန် ကြိုးတုပ်၍ ရိုက်နှက် နှိပ်စက်ပြီးနောက် လယ်ပြင်ကျေးရွာဘက်သို့ ဖမ်းဆီးခေါ်ဆောင်သွားခဲ့သည်။ မြေပြင်တွင် တာဝန်ထမ်းဆောင်နေသည့် ကာကွယ်ရေးတပ်ဖွဲ့ဝင် တစ်ဦးက “ဒီလမ်းက ရွှေဘို-မြစ်ကြီးနား လမ်းမကြီး။ ဒီရွာကလည်း ကားလမ်းမ နဘေးကရွာပဲ။ သူတို့ရဲ့အချက်အလက်အတိအကျတော့ မသိဘူး။ အသက် ၅၀ ကျော်က တစ်ယောက်၊ နောက်ထပ် အသက် ၂၀ ကျော်ကတစ်ယောက်လို့ သိထားတာ။ သူတို့ ဘယ်လို တော်စပ်လည်းတော့ မသိဘူးဗျ” ဟု ပြောသည်။ လက်ရှိတွင် အင်းတော်မြို့နယ်အတွင်း စစ်အုပ်စု၏ စစ်ကြောင်းလှုပ်ရှားမှုများနှင့် တိုက်ပွဲများအပြင် လေကြောင်းမှ ပြင်းထန်စွာ တိုက်ခိုက်မှုများပါ ဆက်လက် ဖြစ်ပွားလျက်ရှိသည်။ အဆိုပါ ကာကွယ်ရေးတပ်ဖွဲ့ဝင်က “လေကြောင်းပစ်ကူတွေကတော့ မြို့သိမ်းကာလတုန်းကထက်တောင် အလွန်အကျွံ သုံးစွဲနေပါတယ်။ ဗွီဒီယိုက အထိနာနေတဲ့ စစ်ကြောင်းဟာ ပိန်းအင်းရွာမှာ ပြည်သူကို ပစ်သတ် နေတဲ့ ဗွီဒီယို ဖြစ်ပါတယ်” ဟု ဆက် ပြောသည်။ စစ်အုပ်စုတပ်သည် တိုက်ပွဲနှင့် သက်ဆိုင်ခြင်းမရှိသည့် အပြစ်မဲ့ အရပ်သားများကို ပစ်မှတ်ထား ဖိနှိပ်သတ်ဖြတ် နေပြီး ယင်းလုပ်ရပ်များသည် စစ်ရာဇဝတ်မှု ပြောင်ပြောင်တင်းတင်း ကျူးလွန်နေခြင်းဖြစ်ကြောင်း NUG စစ်ရုံး ချုပ်က ထောက်ပြထားသည်။ ထို့ပြင် ခရီးသွား ပြည်သူများအနေဖြင့် အဆိုပါ စစ်ရာဇဝတ်မှုများနှင့် မကြုံတွေ့ရစေရန် လမ်းခရီး အခြေအနေ များကို ကြိုတင်စုံစမ်းကြရန်နှင့် သက်ဆိုင်ရာ နယ်မြေအလိုက် ထုတ်ပြန်ထားသည့် လုံခြုံရေး သတိပေးချက် များကို အထူးဂရုပြု လိုက်နာကြရန် တိုက်တွန်းထားသည်။ လက်ရှိတွင် ဖမ်းဆီးခေါ်ဆောင်ခံလိုက်ရသည့် အသက် ၅၀ ကျော်အရွယ် အမျိုးသား၏ အသက်အန္တရာယ် အခြေအနေနှင့် မည်သည့်နေရာ၌ ထိန်းသိမ်းထားသည်ဆိုသည့် အချက်များကို အသေးစိတ် မသိရသေးပေ။ စစ်ကိုင်းတိုင်းအထက်ပိုင်းနှင့် ကချင်ပြည်ကို ဆက်သွယ်ပေးထားသည့် မန္တလေး-သပိတ်ကျင်း-ထီးချိုင့်-ကသာ-အင်းတော်-မိုးညှင်း-မြစ်ကြီးနား ကုန်စည်စီးဆင်းရာ အဓိက လမ်းကြောင်းကို အလုံးစုံ ထိန်းချုပ်နိုင်ရန် စစ်အုပ်စု တပ်က ကြိုးပမ်းနေသဖြင့် စစ်ရေးအရ အရေးပါသည့် အင်းတော်မြို့နယ်အတွင်း တိုက်ပွဲများ ဆက်လက် ပြင်းထန်လျက်ရှိသည်။ ဓာတ်ပုံ – (အင်းတော်မြို့နယ်၌ စစ်အုပ်စုတပ်၏ ရိုက်နှက်ပစ်သတ်ခြင်းခံရပြီး ဒရွတ်တိုက် ဆွဲခေါ်သွားခံရသည့် မြင်ကွင်း။ / NUG စစ်ရုံးချုပ်) #အင်းတော်

အင်းတော်၌ လမ်းမှားဝင်လာသည့် အရပ်သား ၂ ဦးကို စစ်တပ်က ဖမ်းဆီးပြီး ၁ ဦးကို အနီးကပ် ပစ်သတ်

အင်းတော်၌ လမ်းမှားဝင်လာသည့် အရပ်သား ၂ ဦးကို စစ်တပ်က ဖမ်းဆီးပြီး ၁ ဦးကို အနီးကပ် ပစ်သတ် သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၂၂ ရက်။ …

  • October 22, 2026
ကချင်ပြည် ဗန်းမော်နှင့် ရွှေကူတို့တွင် တိုက်ပွဲများ ပြင်းထန်နေပြီး စစ်အုပ်စုက စစ်အုပ်ချုပ်ရေး သက်တမ်းတိုး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၂၁ ရက်။ ကချင်ပြည်အတွင်းရှိ ဗန်းမော်နှင့် ရွှေကူမြို့နယ်များတွင် ကချင်လွတ်လပ်ရေးတပ်မတော် (KIA) နှင့် ပူးပေါင်း တပ်များက မြေပြင်ထိုးစစ်များကို ပြင်းထန်စွာ ခုခံတိုက်ခိုက်နေသဖြင့် စစ်အုပ်စုတပ်ဘက်မှ အကျအဆုံးနှင့် အထိနာလျက်ရှိရာ ထိုဒေသများ အပါအဝင် နိုင်ငံတဝှမ်းရှိ မြို့နယ် ၅၅ ခု၏ စစ်အုပ်ချုပ်ရေး သက်တမ်းကို ၃ လ ဆက်လက် တိုးမြှင့်လိုက်သည်။ ဗန်းမော်မြို့နယ်အတွင်း၌ မြို့ကို အလုံးစုံ ပြန်လည်ထိန်းချုပ်ရန် ဧရာဝတီမြစ်ကြောင်းမှတစ်ဆင့် သင်္ဘောများဖြင့် တပ်ကူအင်အား ၁,၀၀၀ ကျော် ပို့ဆောင်ကာ မြေပြင်မှ ထိုးစစ်ဆင်လာသည့် စစ်အုပ်စုတပ်ကို KIA ပူးပေါင်းတပ် များက ကြားဖြတ် တိုက်ခိုက်ခဲ့ရာ အောက်တိုဘာလ ၂၁ ရက်နေ့အထိ စစ်သင်္ဘောနှင့် ရေယာဉ် ၂၁ စင်းအထိ နစ်မြုပ် ပျက်စီးခဲ့ပြီး ဖြစ်သည်။ ရေကြောင်းနှင့် မြေပြင် နှစ်ဖက်စလုံးတွင် အထိနာနေသော စစ်အုပ်စုတပ်သည် ဗန်းမော်မြို့ အရှေ့၊ မြောက်နှင့် တောင်ဘက် သုံးမျက်နှာအပြင် မိုးမောက်မြို့အကြား ၃ မိုင်နေရာများသို့ ဂျက်တိုက်လေယာဉ်များဖြင့် နေ့စဉ် နီးပါး ဗုံးကြဲ ပစ်ကူပေးလျက်ရှိသည်။ မြေပြင်ရှိ တော်လှန်ရေးတပ်ဖွဲ့ဝင်တစ်ဦးက “စစ်ကောင်စီဘက်က မြို့ကို အလုံးစုံ ပြန်ယူဖို့အတွက် မြစ်ကြောင်း ကနေ တပ်ကူတွေ အလုံးအရင်းနဲ့ တက်လာပြီး ထိုးစစ်ဆင်နေတာပါ။ ဒါပေမဲ့ ကျနော်တို့ ပူးပေါင်းတပ်တွေ ဘက်က ကြားဖြတ် တိုက်ခိုက်လို့ သင်္ဘောတွေပါ နစ်မြုပ်ပျက်စီးတာတွေ ရှိတဲ့အပြင် မြေပြင်မှာလည်း အပြင်း အထန် ခုခံနေရတော့ သူတို့ဘက်က အထိနာပြီး ဂျက်ဖိုက်တာတွေနဲ့ နေ့တိုင်း ရမ်းသန်း ဗုံးကြဲတိုက်ခိုက်နေတာ ပါ” ဟု ပြောသည်။ အလားတူ ရွှေကူမြို့နယ် အရှေ့ခြမ်း မန်နားနှင့် စီသာကျေးရွာအစပ်တို့တွင်လည်း တိုက်ပွဲဖြစ်ပွားခြင်း မရှိဘဲ စစ်အုပ်စုတပ်က အသေခံဒရုန်းများဖြင့် ဗုံးကြဲတိုက်ခိုက်ခဲ့မှုကြောင့် ဒေသခံ အရပ်သားပြည်သူ တစ်ဦး သေဆုံးကာ နှစ်ဦး ဒဏ်ရာရရှိခဲ့သည်။ အဆိုပါ ဖြစ်စဉ်ကို သိသူ ဒေသခံတစ်ဦးက “အသေခံဒရုန်းနဲ့ ဗုံးသီး ၂ လုံး ချသွားတယ်။ မန်နားနဲ့ စီသာအစပ် လမ်းဆုံမှာ ကျတယ်လို့ ပြောတယ်ဗျ။ အဲ့ဒီမှာပဲ တစ်ယောက်ကတော့ သေသွားတယ်။ နှစ်ယောက်က ဒဏ်ရာရ သွားတယ်” ဟု ပြောသည်။ ထိုသို့ တိုက်ပွဲများ ပြင်းထန်နေချိန်တွင် စစ်အုပ်စုသည် ကချင်ပြည်အတွင်း KIA ထိန်းချုပ်ထားသည့် ဆွမ်ပရာ ဘွမ်၊ အင်ဂျန်းယန်၊ ဆော့လော်၊ ချီဖွေမြို့များ အပါအဝင် ရွှေကူမြို့နယ်တို့ကို အရေးပေါ် အခြေအနေ (စစ်အုပ် ချုပ်ရေး) သက်တမ်းကို နောက်ထပ် ရက် ၉၀ ထပ်မံ တိုးမြှင့်ကြောင်း အောက်တိုဘာလ ၁၈ ရက်စွဲဖြင့် ဆက်လက် ထုတ်ပြန်ကြေညာခဲ့သည်။ လက်ရှိတွင် ဗန်းမော်နှင့် ရွှေကူ ဒေသများအတွင်း စစ်အုပ်စုတပ်၏ လက်နက်ကြီး ပစ်ခတ်မှုများနှင့် လေကြောင်း ရန် အန္တရာယ်ကြောင့် ဒေသခံ ပြည်သူများမှာ ဘေးလွတ်ရာသို့ ထွက်ပြေးတိမ်းရှောင်နေကြရဆဲ ဖြစ်သည်။ ဓါတ်ပုံ - Crd #ဗန်းမော် #ရွှေကူ

ကချင်ပြည် ဗန်းမော်နှင့် ရွှေကူတို့တွင် တိုက်ပွဲများ ပြင်းထန်နေပြီး စစ်အုပ်စုက စစ်အုပ်ချုပ်ရေး သက်တမ်းတိုး

ကချင်ပြည် ဗန်းမော်နှင့် ရွှေကူတို့တွင် တိုက်ပွဲများ ပြင်းထန်နေပြီး စစ်အုပ်စုက စစ်အုပ်ချုပ်ရေး သက်တမ်းတိုး သတင်းနှင့် မီဒီယာ ကွန်ရက်။၂၀၂၆ ခုနှစ်၊ အေ…

  • October 21, 2026
ချင်းပြည် ကန်ပက်လက်၊ ကျင်ဒွေးမြို့အနီးသို့ စစ်အုပ်စုတပ် စစ်ကြောင်းထိုး ရောက်ရှိလာ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၂၁ ရက်။ အာရက္ခတပ်တော် (AA) နှင့် ချင်းတော်လှန်ရေး ပူးပေါင်းတပ်များ ထိန်းချုပ်ထားသည့် ချင်းပြည်တောင်ပိုင်း၊ ကန် ပက်လက်မြို့နယ်၊ ကျင်ဒွေးမြို့နှင့် ၈ မိုင်ခန့်အကွာ မောချောင်းကျေးရွာအနီးသို့ စစ်တပ်က လက်နက်ကြီး နှင့် လေကြောင်း ပစ်ကူများ သုံး၍ စစ်ကြောင်းထိုး ရောက်ရှိလာကြောင်း ဒေသခံများနှင့် စစ်ရေး သတင်းမြစ် များက ပြောသည်။ ကန်ပက်လက် ထိုးစစ်အတွက် စစ်အုပ်စုတပ်သည် တပ်မ ၇၇ အပါအဝင် တပ်မ ၅၅၊ ၈၈၊ ၉၉ နှင့် ၁၀၁ တို့မှ အင် အား ၁,၀၀၀ ခန့် ထုတ်နှုတ် အသုံးပြုထားပြီး လက်ရှိတွင် ကျင်ဒွေးဒေသသို့ အင်အား ၇၀၀ ကျော်ဖြင့် မောချောင်းကျေးရွာကို ကျော်လွန်ကာ အောက်တိုဘာလ ၁၈ ရက်နှင့် ၁၉ ရက်တို့တွင် မြို့အနီးသို့ ထိုးစစ်ဆင်လာ ခြင်း ဖြစ်သည်။ ချင်းဒေသခံ စစ်ရေးသတင်းရင်းမြစ် တစ်ဦးက “ကျင်ဒွေးက မတူပီ၊ ကန်ပက်လက်နဲ့ ရခိုင်ပြည် အမ်း၊ မင်းပြား ဘက်ကို တက်ဖို့လုပ်နေတာ။ စစ်တပ်က မဟာဗျူဟာမြောက် စစ်ရေးလမ်းကြောင်းပေါ်က မောချောင်း ချောင်းဖျားဒေသက ရွာငယ်တွေကိုပါ ကျော်လာတဲ့သဘော။ သိရတာက တပ်မ ၇၇ ကနေပြီးတော့ စစ်ကြောင်း ထိုးလာတာပါ” ဟု ပြောသည်။ အဆိုပါ စစ်ကြောင်းသည် စက်တင်ဘာလ ၂၆ ရက်မှ စတင်ကာ ကျင်ဒွေးမြို့ကို ပြန်လည် ထိန်းချုပ်နိုင်ရန် စစ်ကြောင်းထိုးလာခြင်း ဖြစ်ပြီး ပြည်သူ့စစ်မှုထမ်း သာမန်တပ်သားသစ်များအပြင် တော်လှန်ရေး အဖွဲ့အစည်း အချို့မှ အညံ့ခံ ပူးပေါင်းခဲ့သူများကိုပါ ရှေ့တန်းတွင် ထည့်သွင်း အသုံးပြုထားသည်။ ဒေသခံ ချင်းတော်လှန်ရေး သတင်းအရင်းအမြစ်တစ်ဦးကလည်း “စစ်ကြောင်းဟာ လေကြောင်းပစ်ကူတွေ နေ့စဉ်နီးပါးရယူပြီး ကျင်ဒွေးမြို့ကို ဦးတည်လာနေတာ။ အသေခံ၊ ကာမီကာဇေ ဒရုန်းတွေပါ အသုံးပြုနေ တာလေ။ ညအချိန်ကို အဓိကထား လှုပ်ရှားတယ်။ ပြည်သူ့စစ်တွေကို ရှေ့မှာထားတယ်၊ လူသားလှိုင်းအဖြစ် သုံးတယ်လို့ ပြောလို့ရတယ်” ဟု ပြောသည်။ ထိုသို့ အလုံးအရင်းဖြင့် ထိုးစစ်ဆင်လာသည့် စစ်အုပ်စု စစ်ကြောင်းကို AA၊ ချင်းကာကွယ်ရေးတပ်တော် (CDF) နှင့် ယောကာကွယ်ရေးတပ်တော် (YDF) ပူးပေါင်းတပ်ဖွဲ့တို့က အပြင်းအထန် ခုခံတိုက်ခိုက်လျက်ရှိပြီး တိုက်ပွဲ များအတွင်း စစ်အုပ်စုတပ်ဖွဲ့ဝင် အများအပြားကို အရှင်ဖမ်းဆီးရမိသည့်အပြင် လက်နက်ခဲယမ်း အမြောက် အများကိုပါ သိမ်းဆည်းရရှိထားသည်။ ဓါတ်ပုံ - (ပုံဟောင်း / Crd) #ကန်ပက်လက် #ကျင်ဒွေးမြို့

ချင်းပြည် ကန်ပက်လက်၊ ကျင်ဒွေးမြို့အနီးသို့ စစ်အုပ်စုတပ် စစ်ကြောင်းထိုး ရောက်ရှိလာ

ချင်းပြည် ကန်ပက်လက်၊ ကျင်ဒွေးမြို့အနီးသို့ စစ်အုပ်စုတပ် စစ်ကြောင်းထိုး ရောက်ရှိလာ သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၂၁ ရက်။ အာရ…

  • October 21, 2026
ရခိုင်ပြည် ကျောက်တော်နှင့် ပေါက်တောကို စစ်တပ်က လေယာဉ်အုပ်စုလိုက်ဖြင့် ညဉ့်နက်သန်းခေါင် ဗုံးကြဲ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၂၁ ရက်။ ရခိုင်စစ်မြေပြင်တွင် အကျအဆုံး များစွာဖြင့် တပ်ပြန်ဆုတ်နေရသည့် စစ်အုပ်စုတပ်သည် ကျောက်တော်နှင့် ဝီရဌာနီ (ပေါက်တော) မြို့နယ်တို့ရှိ တောင်တန်းများနှင့် အရပ်သား လူနေရပ်ကွက်များကို ဂျက်ဖိုက်တာနှင့် Y-12 လေယာဉ် အုပ်စုလိုက်ဖြင့် ဗုံးကြဲတိုက်ခိုက်ခဲ့သည်။ ကျောက်တော်မြို့နယ်၊ အပေါက်ဝကျေးရွာ အနောက်ဘက်ရှိ ဦးစွန်းတောင် တောင်တန်းကို အောက်တိုဘာလ ၂၀ ရက်နေ့၊ နံနက် ၃ နာရီမှ စတင်ကာ ၄ နာရီကျော်အထိ ဂျက်ဖိုက်တာ အနည်းဆုံး ၅ စီးနှင့် Y-12 လေယာဉ် ၃ စီးခန့်ဖြင့် ပေါင် ၅၀၀ ဗုံးများ အပါအဝင် ဗုံးအလုံး ၂၀ ကျော် ကြဲချခဲ့ခြင်း ဖြစ်သည်။ အဆိုပါ တောင်တန်းသည် ကန်စောက်တောင်နှင့် တစ်ဆက်တည်း တည်ရှိပြီး အနီးနားတွင် ဦးစွန်းတောင် အောက်၊ ဦးစွန်းတောင်အထက်၊ ညလီကန်၊ ကန်ချေပြင်နှင့် နီချေရွာ စသည့် ကျေးရွာများ တည်ရှိကာ ယခင် တိုက်ပွဲကာလကလည်း ကန်စောက်တောင် အမြောက်တပ် (၃၇၇) တပ်မှ စစ်အုပ်စုတပ်ဖွဲ့ဝင်များ စခန်းချခဲ့ဖူး သည့် နေရာလည်း ဖြစ်သည်။ ကျောက်တော် ဒေသခံ အမျိုးသမီးတစ်ဦးက “တစ်ညလုံးနီးပါး ဆက်တိုက် ဗုံးလာကြဲတာ၊ တစ်စီးပြီးရင် တစ်စီး လာပစ်တာပဲ။ လေယာဉ်အုပ်စုလိုက် လာပြီး နာရီနဲ့ချီ ကြဲနေတော့ ကလေးတွေဆို လေယာဉ်သံ ကြားတာနဲ့တင် ကြောက်လန့်နေကြပြီ။ မနက်ထိ လုံးဝမအိပ်ရဲဘူး မိုးလင်းပေါက်ပဲ။ အရင်လို ဗုံးတစ်လုံးကြဲပြီး ပြန်သွားတာ မဟုတ်ဘဲ ဆက်တိုက်ကြဲတော့ ဒေသခံတွေ စိတ်ပိုင်းဆိုင်ရာပါ ထိခိုက်ရတယ်” ဟု ပြောသည်။ ထို့ပြင် ပေါက်တောမြို့နယ်တွင်လည်း အောက်တိုဘာလ ၂၀ ရက်နေ့ ည ၁၀ နာရီခွဲကျော်၌ Y-12 နှင့် ဂျက်ဖိုက် တာများဖြင့် ညဉ့်နက်သန်းခေါင် ဗုံးကြဲခဲ့ရာ မြို့ပေါ် ရပ်ကွက်အတွင်းသို့ ဗုံး ၈ လုံး ကျရောက်ခဲ့သည့် အပြင် အနီးဝန်းကျင်ရှိ ဓားကိုင်တောင်တန်းနှင့် ပိန္နဲချောင်း တောင်တန်းတို့သို့ ဗုံးအလုံး ရာနှင့်ချီ ကြဲချခဲ့သည်။ ပေါက်တော မြို့ခံတစ်ဦးက “မြို့ပေါ် ရပ်ကွက်ထဲကိုလာကြဲတာဗျ။ ကိုယ်တို့ဒီမြို့ပေါ်ရပ်ကွက်ထဲကို ဗုံး ၈ လုံး ကျတယ်။ တောင်တန်းနှစ်ခုပေါ်ကိုတော့ ဗုံးအလုံးရေ ရာနဲ့ချီ ကြဲတာ။ ငပြီကျွန်း ဘက်မှာ တိုက်ပွဲပြင်းထန် နေတော့ လေကြောင်းကနေ ပေါင် ၅၀၀ ဗုံးတွေ ရော၊ လက်နက်ကြီးတွေပါ ပစ်ကူပေးပြီး အရပ်သားတွေပါ မကျန် ရမ်းသန်း တိုက်ခိုက်နေတာ” ဟု ပြောသည်။ အဆိုပါ ပေါက်တောမြို့နယ် ငပြီကျွန်း မြေပြင်တိုက်ပွဲများအတွင်း စစ်အုပ်စုတပ်ဘက်မှ ၃ ရက်အတွင်း ၁၀၀ နီးပါး သေဆုံးထားပြီးနောက် အရပ်သား ပြည်သူများ စခန်းချရာနှင့် ကျေးရွာများအနီးသို့ လေကြောင်းမှ ပစ်မှတ်ထား တိုက်ခိုက်လာခြင်း ဖြစ်သည်။ စစ်အုပ်စုတပ်သည် ဆုံးရှုံးသွားသည့် မြို့နယ်များကို ပြန်လည်ရရှိရန် စစ်ကြောင်း ၇ ခုဖြင့် ထိုးစစ်ဆင်နေသော် လည်း အာရက္ခတပ်တော် (AA) ၏ ခုခံစစ်ကြောင့် အထိနာကာ တပ်ပြန်ဆုတ်နေရချိန်၌ စစ်ရေးနှင့် မသက်ဆိုင် သည့် အရပ်သား ပစ်မှတ်များကို နေ့စဉ်ရက်ဆက် လေကြောင်းမှ တိုက်ခိုက်နေသဖြင့် ဒေသခံများ ဘေးလွတ် ရာသို့ ထွက်ပြေး တိမ်းရှောင်နေကြရသည်။ ဓာတ်ပုံ - (မြန်မာစစ်အုပ်စုတပ်၏ တိုက်လေယာဉ်တစ်စင်းကို တွေ့ရစဉ်။ - ပုံဟောင်း /AFP) #ကျောက်တော #ပေါက်တော

ရခိုင်ပြည် ကျောက်တော်နှင့် ပေါက်တောကို စစ်တပ်က လေယာဉ်အုပ်စုလိုက်ဖြင့် ညဉ့်နက်သန်းခေါင် ဗုံးကြဲ

ရခိုင်ပြည် ကျောက်တော်နှင့် ပေါက်တောကို စစ်တပ်က လေယာဉ်အုပ်စုလိုက်ဖြင့် ညဉ့်နက်သန်းခေါင် ဗုံးကြဲ သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၂…

  • October 21, 2026
ချင်းပြည် ပလက်ဝ၌ ၂ ရက်ဆက် လေကြောင်းတိုက်ခိုက်ခံရ၍ ၆ လသား ကလေးငယ် အပါအဝင် ၉ ဦး သေဆုံး သတင်းနှင့် မီဒီယာ ကွန်ရက် ၂၀၂၆ ခုနှစ်၊ အောက်တိုဘာလ ၂၁ ရက်။ ချင်းပြည်တောင်ပိုင်း၊ ပလက်ဝမြို့နယ်ရှိ ပီချောင်းဆုံ ကုန်တင်ဆိပ်ကို စစ်အုပ်စုတပ်က ၂ ရက်ဆက်တိုက် လေကြောင်းမှ ဗုံး ၅၀ နီးပါး ကြဲချတိုက်ခိုက်ခဲ့သဖြင့် ၆ လသားအရွယ် ကလေးငယ်တစ်ဦး အပါအဝင် အရပ် သား ၉ ဦး ထက်မနည်း သေဆုံးခဲ့ကြောင်း ဒေသခံများက ပြောသည်။ ရခိုင်ပြည်အတွင်းသို့ အိန္ဒိယဘက်မှ ကုန်စည်များ စီးဆင်းရာ အဓိက ကျောရိုးဖြစ်သည့် ပီချောင်းဆုံ ကုန်တင် ဆိပ်နှင့် အနီးဝန်းကျင်ကို စစ်အုပ်စုတပ်က အောက်တိုဘာလ ၁၈ ရက်နှင့် ၁၉ ရက်တို့တွင် ဂျက်ဖိုက်တာနှင့် Y-12 လေယာဉ်များ အသုံးပြု၍ ဗုံးသီး အမြောက်အမြား ကြဲချခဲ့ခြင်း ဖြစ်သည်။ အောက်တိုဘာလ ၁၈ ရက် ပထမရက် တိုက်ခိုက်မှုတွင် သံထောင်ရွာမှ မိသားစုတစ်စု အပါအဝင် အသက် ၆ လသား ကလေးငယ်၊ ခရီးသည်များနှင့် ကုန်သည် စုစုပေါင်း ၉ ဦး သေဆုံးကာ ၄ ဦး ထိခိုက်ဒဏ်ရာ ရရှိခဲ့ပြီး ပျံကျဈေးဆိုင်များပါ လုံးဝ ပျက်စီးသွားခဲ့သည်။ ဒေသခံတစ်ဦးက “ဗုံးကြဲတာက တကယ့်ကို အဓိက ကုန်ဆိပ်နေရာကို တည့်တည့်ကြဲတာ။ သံထောင်ရွာက မိသားစုတစ်စုဆို လပွဲချင်းပြီး ဆုံးသွားတယ်။ ဒဏ်ရာတွေ ပြင်းထန်တယ်။ စစ်တပ်က တိုက်ပွဲမှာ ရှုံးရင် အရပ်သားတွေကိုပဲ ဒီလို မလိုမုန်းထား ပစ်မှတ်ထား တိုက်ခိုက်နေတာ” ဟု ပြောသည်။ စစ်တွေနှင့် ပေါက်တောမြို့နယ်များအတွင်းရှိ တိုက်ပွဲများ၌ စခန်းကြီးများနှင့် ကာကင်းများ လက်လွှတ်ဆုံးရှုံးနေ ရသည့် စစ်အုပ်စုတပ်သည် ပလက်ဝမြို့နယ်ရှိ ပီချောင်းဆုံ ကုန်တင်ဆိပ်ကို ၂ ရက်ဆက်တိုက် လေကြောင်းမှ ဗုံး ၅၀ နီးပါး ကြဲချတိုက်ခိုက်ခဲ့ခြင်း ဖြစ်သည်ဟု ဆိုသည်။ အောက်တိုဘာလ ၁၉ ရက် ဒုတိယရက်တွင်လည်း အဆိုပါ ကုန်တင်ဆိပ်နှင့် လုံးတူ-တွီစပ် လမ်းခွဲတို့ကို ထပ်မံ ဗုံးကြဲခဲ့သဖြင့် ခရီးသည်တင်ယာဉ်များ၊ ကုန်တင်ယာဉ်များနှင့် ဆိုင်ခန်းများ ထိခိုက်ပျက်စီးခဲ့ကာ ဒေသခံတစ်ဦး ဒဏ်ရာရရှိခဲ့သည်။ စစ်အုပ်စုတပ်သည် ပြီးခဲ့သည့် စက်တင်ဘာလ ၂၈ ရက်ကလည်း ကျောက်တော်မြို့ရှိ အိန္ဒိယဈေးကို လေကြောင်းမှ ဗုံးကြဲခဲ့ပြီးနောက် ယခုအခါ အိန္ဒိယဘက်မှ ကုန်စည်ဝင်ရောက်ရာ ကုန်ဆိပ်များကို ပစ်မှတ်ထား ဖျက်လိုဖျက်ဆီး ပြုလုပ်လာခြင်း ဖြစ်ကြောင်း စစ်ရေးလေ့လာသူများက သုံးသပ်ကြသည်။ လက်ရှိတွင် ရခိုင်နှင့် ချင်းပြည်အတွင်း စစ်ရေးအရ အထိနာပြီး စခန်းများ ဆက်တိုက် လက်လွှတ်နေရချိန်၌ စစ်အုပ်စုတပ်သည် စည်ကားသည့် ဈေးများ၊ ကျေးရွာများနှင့် စစ်ဘေးရှောင်စခန်းများကို လေကြောင်းမှ ပစ်မှတ်ထား တိုက်ခိုက်နေခြင်း ဖြစ်သည်ဟု ဆိုသည်။ စစ်အုပ်စုတပ်သည် ၂၀၂၆ ခုနှစ် မေလလယ်မှစ၍ မင်းတပ်၊ ကန်ပက်လက်၊ ရွှေအောင်သာ စသည့် စစ်မျက်နှာ များတွင် ချင်းပြည်သူ့တပ်မတော်နှင့် မဟာမိတ် ပူးပေါင်းတပ်များ၏ ခုခံတိုက်ခိုက်မှုကြောင့် မြေပြင်တွင် အထိနာနေပြီးနောက် ကျင်ဒွေးမြို့ဘက်သို့ ဦးတည်ကာ စစ်ကြောင်း ထပ်မံထိုးလာခြင်း ဖြစ်သည်။ ယခုတိုက်ခိုက်မှုအတွင်း စစ်အုပ်စုတပ်သည် ပီချောင်းဆုံနှင့် လုံးတူ-တွီစပ် လမ်းခွဲတို့သို့ ၂ ရက်အတွင်း ဂျက်ဖိုက် တာဖြင့် ဗုံးသီး ၄ လုံး၊ Y-12 လေယာဉ်ဖြင့် ဗုံးသီး ၁၁၂ လုံးအထိ စုစုပေါင်း ဗုံးသီး ၁၁၆ လုံးခန့် အလွန်အမင်း ကြဲချတိုက်ခိုက်ခဲ့ကြောင်း ချင်းပြည်သူ့အစည်းအရုံး (CPU/CPA) ၏ အောက်တိုဘာလ ၂၀ ရက်နေ့က ထုတ်ပြန်သည်။ မြေပြင်တွင် အထိနာနေသည့် စစ်အုပ်စုတပ်သည် ရှုံးမဲမဲကာ အရပ်သား ပြည်သူလူထုအပေါ် သူရဲဘောကြောင် စွာ နေ့ညမရွေး လေကြောင်းမှ ဗုံးကြဲတိုက်ခိုက်မှုများ ဆက်တိုက် ပြုလုပ်လာနေကြောင်း CPU/CPA က ထောက်ပြထားသည်။ သို့သော် “မိမိတို့ ပြည်သူများ၏ အသက်အိုးအိမ်နှင့် ဘိုးဘွားပိုင် ရေမြေတောတောင်များကို အစွမ်းကုန် ကာကွယ်သွားမည်” ဖြစ်ပြီး CPU ထိန်းချုပ်နယ်မြေအတွင်းရှိ ပြည်သူများအနေဖြင့်လည်း စစ်အုပ်စုတပ်၏ လေကြောင်း အန္တရာယ်ကို အထူးဂရုစိုက်ကြရန် အသိပေး ထုတ်ပြန်ထားသည်။ ဓာတ်ပုံ – (ပလက်ဝမြို့နယ်အတွင်းရှိ ပီချောင်းဆုံ ကုန်တင်ဆိပ်ကမ်း အနီးဝန်းကျင်ကို တွေ့ရစဉ်။ - CPU/CPA) #ပလက်ဝ

ချင်းပြည် ပလက်ဝ၌ ၂ ရက်ဆက် လေကြောင်းတိုက်ခိုက်ခံရ၍ ၆ လသား ကလေးငယ် အပါအဝင် ၉ ဦး သေဆုံး

ချင်းပြည် ပလက်ဝ၌ ၂ ရက်ဆက် လေကြောင်းတိုက်ခိုက်ခံရ၍ ၆ လသား ကလေးငယ် အပါအဝင် ၉ ဦး သေဆုံး သတင်းနှင့် မီဒီယာ ကွန်ရက်၂၀၂၆ ခုနှစ်၊ အောက်တိုဘာလ ၂၁ ရက်။ ခ…

  • October 21, 2026
ဧရာဝတီတိုင်း သာပေါင်းနှင့် ရခိုင်ရိုးမအစပ်၌ တိုက်ပွဲပြင်းထန်၊ ဒုတိုင်းမှူး ကိုယ်တိုင် စစ်ဆင်ရေးဆင်းကွပ်ကဲ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၂၀ ရက်။ ဧရာဝတီတိုင်း၊ သာပေါင်းမြို့နယ်နှင့် ရခိုင်ရိုးမ အစပ်ကျေးရွာများတွင် တိုက်ပွဲများ ပြင်းထန်လျက်ရှိပြီး စစ်အုပ်စု ဘက်က အဆင့်မြင့် အရာရှိကြီးများ ကိုယ်တိုင် မြေပြင်ဆင်း၍ အနီးကပ် ကွပ်ကဲနေသော်လည်း ထိခိုက်သေဆုံး မှု များပြားနေကြောင်း ဒေသခံ စစ်ရေးသတင်းအရင်းအမြစ်များက ပြောသည်။ သာပေါင်းမြို့နယ်အတွင်းရှိ ကြက်သွန်ကွင်း - သဲဖြူ - မကျီးဇင် လမ်းပေါ်ရှိ သာပေါင်းကလေး၊ ကင်ပွန်းချဉ်နှင့် သဲဖြူ စသည့်နေရာများတွင် အောက်တိုဘာလ ၁၅ ရက်မှ ၁၈ ရက်နေ့အထိ တိုက်ပွဲများ ဖြစ်ပွားခဲ့ပြီး စစ်အုပ်စု ဘက်မှ အရာရှိအချို့ ကျဆုံးမှုများ ရှိခဲ့သည်။ ဧရာဝတီတိုင်း စစ်ရေးသတင်းအရင်းအမြစ် အမျိုးသားတစ်ဦးက “အေအေပူးပေါင်းတပ်က အခု ကြက်သွန် ကွင်း - သဲဖြူ - မကျီးဇင်လမ်းပိုင်းကို ထိုးစစ်လုပ်လာတာ အင်အားများတယ်။ ခမရ (၅၃၄) က ဒုတပ်ရင်းမှူး အပါအဝင် ထိခိုက်သေဆုံးသူ များတယ်လို့ သိရတယ်။ ဧရာဝတီတိုင်း ရိုးမတောင်ခြေကနေတဆင့် ရခိုင်ဘက်ဆီ ထိုးစစ်ဆင်ဖို့ကြိုးစားတဲ့ အာဏာသိမ်းစစ်တပ်ရဲ့ အဖြတ်လိုက် တပ်စုတွေကို ရိုးမတောင်ခြေက သာပေါင်း ကလေးကျေးရွာ အနီးဝန်းကျင်မှာ ဖြတ်တိုက်တာ” ဟု ပြောသည်။ သဲဖြူကျေးရွာအနီး တိုက်ပွဲတွင် စစ်အုပ်စုဘက်မှ ထိခိုက်သေဆုံးသူ များပြားခဲ့ပြီး ရုပ်အလောင်း ၃၀ နီးပါးနှင့် လက်နက်ခဲယမ်းများကို အာရက္ခတပ်တော် (AA) နှင့် ပူးပေါင်းမဟာမိတ်တပ်များက အောက်တိုဘာလ တတိယ ပတ်အတွင်း သိမ်းဆည်းရမိခဲ့သည်။ လက်ရှိတွင် ရေကြည်နှင့် သာပေါင်းမြို့နယ် ရိုးမတောင်တန်းတစ်လျှောက်၌ စစ်အုပ်စုသည် ဂွရိုးမမှတစ်ဆင့် ရခိုင်ပြည် တောင်ပိုင်းသို့ ဝင်ရောက်နိုင်ရန် ကြိုးပမ်းနေခြင်းဖြစ်ပြီး AA နှင့် ထိတွေ့တိုက်ပွဲများ ဖြစ်ပွားလျက် ရှိကာ စစ်အုပ်စုဘက်က လေကြောင်းနှင့် လက်နက်ကြီး ပစ်ကူများပါ အသုံးပြုနေသည်။ ထို့ပြင် စစ်အုပ်စုသည် ရိုးမတောင်ခြေတစ်လျှောက်ရှိ ကျေးရွာအချို့တွင် ယာယီအထိုင်စခန်းချ၍ ဒေသခံများနှင့် ရခိုင်စစ်ဘေးရှောင်များကို ပေါ်တာဆွဲခြင်း၊ ရိုးမပေါ်တက်ရာတွင် ဓါးစာခံအဖြစ် ခေါ်ဆောင်ခြင်းများ ပြုလုပ်နေ သည်။ ဒေသခံ စစ်ဘေးရှောင် အမျိုးသမီးတစ်ဦးက “ဘိုးတော်ချောင်းဖျား ဒေသမှာ တိုက်ပွဲတွေ မကြာခဏရှိနေ တယ်။ စစ်တပ်က ထွက်ပြေးလာတာတွေလည်း ရှိပါတယ်။ စခန်းသိမ်းတာတွေ လေကြောင်းပစ်ကူတာတွေ အပြင် ပေါ်တာဆွဲတာတွေ ရှိတယ်။ သူတို့ဘက်က စစ်သားတွေပြောတာ ဒုတိုင်းမှူး ဗိုလ်မှူးကြီး ရဲလင်းအောင် ကိုယ်တိုင် သဲဖြူဒေသအထိ ဆင်းပြီး စစ်ဆင်ရေးကို အနီးကပ် ကွပ်ကဲနေတယ်။ စစ်မှုထမ်းသစ်တွေကိုလည်း ရာထူး တိုးပေးမယ်၊ ရိုးမပေါ် အတင်းတက်ခိုင်းတယ်လို့လည်း ကြားပါတယ်” ဟု ပြောသည်။ စစ်အုပ်စုသည် ရခိုင်ရိုးမတစ်လျှောက် ရေကြည်နှင့် သာပေါင်းမြို့နယ်အတွင်းရှိ ရှေ့တန်းစစ်မျက်နှာများသို့ တပ်မ (၆၆) လက်အောက်ခံ ခလရ (၁) နှင့် ခလရ (၁၁) တပ်ရင်းများကို စေလွှတ်၍ တိုက်ခိုက်လျက်ရှိသည်။ စစ်အုပ်စုသည် အောက်တိုဘာလ ဒုတိယပတ်မှစတင်ကာ စစ်ရေးပြင်ဆင်မှုများနှင့် အင်အားဖြည့်တင်းမှုများ ပြုလုပ်၍ ရခိုင်ပြည်၊ ဂွမြို့နယ်သို့ ဦးတည်ကာ ကြည်း၊ ရေ၊ လေ စစ်ဆင်ရေးများကို လုပ်ဆောင်လျက်ရှိသည်။ ဓာတ်ပုံ – (စစ်အုပ်စုတပ်ဖွဲ့ဝင်များ (ပုံဟောင်း) / Crd)

ဧရာဝတီတိုင်း သာပေါင်းနှင့် ရခိုင်ရိုးမအစပ်၌ တိုက်ပွဲပြင်းထန်၊ ဒုတိုင်းမှူး ကိုယ်တိုင် စစ်ဆင်ရေးဆင်းကွပ်ကဲ

ဧရာဝတီတိုင်း သာပေါင်းနှင့် ရခိုင်ရိုးမအစပ်၌ တိုက်ပွဲပြင်းထန်၊ ဒုတိုင်းမှူး ကိုယ်တိုင် စစ်ဆင်ရေးဆင်းကွပ်ကဲ သတင်းနှင့် မီဒီယာ ကွန်ရက်။၂၀၂၆ ခုနှစ်၊ အေ…

  • October 20, 2026
စစ်ကိုင်း အထက်ပိုင်း ဝန်းသိုနယ်တွင်း တိုက်ပွဲများ ဆက်လက်ပြင်းထန်နေပြီး ဒေသခံများ တိမ်းရှောင်နေရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၂၀ ရက်။ စစ်ကိုင်းတိုင်း၊ ဝန်းသိုမြို့နယ်အတွင်း အနောက်ဘက် အင်းတော်မြို့နယ်မှ စစ်ကြောင်းထိုးနေသည့် စစ်အုပ်စုတပ်သည် နမ်းခမ်းဒေသအထိ ထိုးဖောက်ရောက်ရှိလာပြီး နမ်းခမ်းနှင့် ထန်းတပင်ကျေးရွာဘက်တွင် တော်လှန်ရေးတပ်ဖွဲ့များနှင့် တိုက်ပွဲများ ပြင်းထန်စွာ ဖြစ်ပွားနေကြောင်း ဒေသခံများက ပြောသည်။ ဝန်းသိုမြို့တွင် စစ်တပ် တပ်ရင်းများ ရှိနေပြီး မြို့ပြင်နယ်မြေများကို တော်လှန်ရေး တပ်များက ထိန်းချုပ်ထားသည်။ အင်းတော်မြို့နယ် မဲဇာကျေးရွာဘက်မှ စတင်ထွက်ခွာလာသည့် စစ်အုပ်စု စစ်ကြောင်းသည် အောက်တိုဘာလ ၁၂ ရက်နေ့ကစတင်ကာ ဝန်းသိုမြို့နယ်အတွင်းသို့ ဝင်ရောက်လာခဲ့ပြီး တပ်လွင်၊ ကျောက်တောနှင့် ဆင်ကုန်း ကျေးရွာများဘက်တွင် တိုက်ပွဲများ ဆက်တိုက် ဖြစ်ပွားခဲ့သည်။ ယခုအခါ အဆိုပါစစ်ကြောင်းသည် မဲဇာနှင့် နမ်းခမ်းကြားရှိ ထန်းတပင်နှင့် ညောင်ကိုင်းကျေးရွာများဘက်သို့ ဆက်လက်တိုးလာကာ နမ်းခမ်းဒေသအထိ ရောက်ရှိလာခြင်း ဖြစ်သည်။ မဲဇာဒေသခံတစ်ဦးက “ဒီနေ့မနက်ကို တိုက်ပွဲဖြစ်နေတာ ထန်းတစ်ပင်မှာလည်း ဖြစ်နေတုန်းပဲ။ နမ်းခမ်းမှာ တော့ မနေ့ညက စစ်ကြောင်းရောက်လာပြီး တိုက်ပွဲဖြစ်နေကြတာ” ဟု အောက်တိုဘာလ ၁၉ ရက်နေ့က ပြောသည်။ နမ်းခမ်းတွင် ရွှေတူးဖော်မှုများ ရှိနေသည်။ နှစ်ဖက် တိုက်ပွဲများအတွင်း ထိခိုက်သေဆုံးမှုများ ရှိနေသော်လည်း အသေးစိတ် အချက်အလက်များကို အတည် ပြုရန် ခက်ခဲနေဆဲ ဖြစ်သည်။ စစ်အုပ်စုတပ်သည် မြေပြင်စစ်ကြောင်းထိုးမှုများအပြင် Y-12 လေယာဉ်နှင့် ဂျက်ဖိုက်တာများကို အသုံးပြုကာ တိုက်ပွဲဧရိယာနှင့် ထန်းတပင်ကျေးရွာဘက်သို့ ဗုံးအလုံးပေါင်း ၃၀ ထက် မနည်း အကြောင်းမဲ့ ကြဲချတိုက်ခိုက်ခဲ့ သည်။ အခြား ဒေသခံအမျိုးသားတစ်ဦးက “တိုက်ပွဲဖြစ်ပွားနေတဲ့ ဆင်ကုန်းတို့၊ ကျောက်တောတို့၊ အဲ့ဘက် နေပြီးတော့ စစ် တပ်က ရှေ့တိုးလာပြီးတော့ အခုက ထန်းတပင်နဲ့ ညောင်ကိုင်းမှာရှိတဲ့ နမ်းခမ်းကြားမှာပဲ တိုက်ပွဲတွေ ဖြစ် တာပေါ့။ Y-12 နဲ့ ဗုံးတော့ ကြဲသွားတယ်။ တိုက်ပွဲဖြစ်ပွားတဲ့ ထန်းတပင်ရယ်၊ ညောင်ကိုင်းရယ်။ လေကြောင်း တိုက်ခိုက်မှု က နှစ်ကြိမ်ပေါ့။ ဝန်းသိုနယ်ထဲကို စဝင်တာကတော့ ၁၂ ရက်နေ့ကနေ စပြီးတော့ ဝင်တာ။ မဲဇာနဲ့ နမ်းခမ်း ကြားက ဒေသခံတွေလည်း ရှောင်ကြတယ်။ နမ့်ခမ်း ဂျိုးတောင်တို့ဘက်တွေကလည်း ရှောင်ကုန်ကြ ပြီ၊ ပစ္စည်းတွေလည်း သိမ်းထားကုန်ကြပြီ” ဟု ပြောသည်။ ထိုကဲ့သို့ လေကြောင်းဖြင့်ပါ ဗုံးကြဲတိုက်ခိုက်မှုများနှင့် တိုက်ပွဲများ ဆက်တိုက်ဖြစ်ပွားနေခြင်းကြောင့် မဲဇာနှင့် နမ်းခမ်းအကြား၊ ဂျိုးတောင်နှင့် အနီးဝန်းကျင်ကျေးရွာကြီးများမှ ဒေသခံပြည်သူ သောင်းနှင့်ချီမှာ ဘေးလွတ်ရာ သို့ ထွက်ပြေးတိမ်းရှောင်နေကြရသည်။ နမ်းခမ်းဒေသသည် ယခင်ကတည်းက လေကြောင်းတိုက်ခိုက်မှုများ မကြာခဏ ကြုံတွေ့ရသည့်နေရာဖြစ်သဖြင့် ဒေသခံအချို့မှာ ကျေးရွာအတွင်း နေထိုင်ခြင်းမပြုဘဲ လယ်တောတဲများ၌ ကြိုတင်တိမ်းရှောင်နေထိုင်ကြခြင်း ကြောင့် တိုက်ပွဲဖြစ်ပွားချိန်တွင် ကျေးရွာအတွင်း ပိတ်မိသူ နည်းပါးမည်ဟု ခန့်မှန်းရသည်။ မဲဇာဒေသခံက “ပိတ်မိတာတွေကတော့ ရှိလားမပြောတတ်ဘူး။ ရှိရင်လည်းနည်းလောက် တယ်။ ဘာလို့လဲဆိုတော့ တော်တော်များများက ရှောင်ချိန်လည်းရထားတယ် ဆိုတော့လေ။ ပြီးတော့ နမ်းခမ်း က ခဏ ခဏ ဗုံးကြဲခံရတော့လေ။ ဒေသခံတွေက လယ်တောတဲတွေမှာ နေကြတယ်။ သူတို့လောက်ပဲကျန်မှာ ကျန်တာ တွေ အများစုကတော့ ရှောင်တိမ်းချိန်ရကြပါတယ်” ဟု ဆက်ပြောသည်။ နမ်းခမ်းနှင့် ဂျိုးတောင်ကျေးရွာများသည် ယခင်က စစ်အုပ်စုတပ်နှင့် ရဲစခန်းများ အခြေစိုက်ခဲ့သည့် နေရာများ ဖြစ်ပြီး လွန်ခဲ့သည့် ၃ နှစ်ဝန်းကျင်မှစတင်ကာ တော်လှန်ရေးအင်အားစုများ ထိန်းချုပ်ထားသည့် နယ်မြေများ ဖြစ်လာခဲ့သည်။ ထို့ပြင် နမ်းခမ်းသည် ရွှေတူးဖော်ရေးလုပ်ငန်းများဖြင့် စည်ကားသည့် ဒေသတစ်ခုဖြစ်ပြီး အာဏာမသိမ်းမီက မြို့နယ်ခွဲအဖြစ် သတ်မှတ်ခံခဲ့ရကာ ဒေသတွင်း စီးပွားရေးအတွက် အလွန်အရေးပါသော နေရာလည်း ဖြစ်သည်။ အထက်ပါ ဒေသခံအမျိုးသားက “နမ်းခမ်းမှာက ရွှေတွေလုပ်ကြတယ်။ ရွှေမှော်လုပ်ပြီး စည်ကားသွားတဲ့ရွာ ပေါ့။ တောင်သူတွေလည်းရှိတယ်။ ရွှေလုပ်ငန်းကတော့ အဓိကလုပ်ကြတာ ဟုတ်တယ်” ဟု ပြောသည်။ တိုက်ပွဲများ ဆက်လက်ပြင်းထန်နေပါက ဒေသခံများ နေရပ်စွန့်ခွာရခြင်းအပြင် ဒေသတွင်း အဓိကစီးပွားရေး ဖြစ်သည့် ရွှေတူးဖော်ရေးနှင့် စိုက်ပျိုးရေးလုပ်ငန်းများပါ ရပ်ဆိုင်းသွားနိုင်သည့် အခြေအနေနှင့် ရင်ဆိုင်နေရ သည်။ ဝန်းသိုမြို့ပေါ်ရှိ စစ်အုပ်စု၏ ခမရ (၁၁၁) နှင့် ခမရ (၁၂၀) တပ်ရင်းများဘက်ကလည်း စစ်ရေးပြင်ဆင်မှုများ ဆက်လက်လုပ်ဆောင်နေကြောင်း ဒေသခံများက ဆိုသည်။ ထို့ကြောင့် ကောလင်းခရိုင် အမှတ် (၄) တပ်ရင်းက လည်း ဝန်းသို၊ ကောလင်းနှင့် ဗန်းမောက်မြို့နယ်များအတွင်းရှိ ဒေသခံပြည်သူများအနေဖြင့် လေကြောင်း တိုက်ခိုက်မှုအန္တရာယ်နှင့် မြေပြင်စစ်ကြောင်းများ၏ လှုပ်ရှားမှုကို အထူးသတိပြုကြရန် သတိပေး ထုတ်ပြန်ထား သည်။ ဓါတ်ပုံ - (ပုံဟောင်း / Crd)

စစ်ကိုင်း အထက်ပိုင်း ဝန်းသိုနယ်တွင်း တိုက်ပွဲများ ဆက်လက်ပြင်းထန်နေပြီး ဒေသခံများ တိမ်းရှောင်နေရ

စစ်ကိုင်း အထက်ပိုင်း ဝန်းသိုနယ်တွင်း တိုက်ပွဲများ ဆက်လက်ပြင်းထန်နေပြီး ဒေသခံများ တိမ်းရှောင်နေရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ …

  • October 20, 2026
ရခိုင်ရှိ AA ထိန်းချုပ်မြို့များတွင် ဆန်ပြတ်လပ်မှုနှင့်အတူ ငွေကြေးကျပ်တည်းမှု ဆိုးရွားစွာ ကြုံတွေ့နေရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၂၀ ရက်။ ရခိုင်ပြည်အတွင်း အာရက္ခတပ်တော် (AA) ထိန်းချုပ်ထားသည့် မြို့နယ်များတွင် စစ်အုပ်စုတပ်၏ လမ်းပန်းဆက် သွယ်ရေး ပိတ်ဆို့ထားမှုကြောင့် စားနပ်ရိက္ခာ ဆန်ပြတ်လပ်မှု အကျပ်အတည်းနှင့်အတူ ငွေစက္ကူ ရှားပါးသည့် ပြဿနာကို ဒေသခံ ပြည်သူများနှင့် စစ်ဘေးရှောင်များ ဆိုးရွားစွာ ရင်ဆိုင်နေကြရကြောင်း မြေပြင် ဒေသခံ များနှင့် စစ်ဘေးရှောင်အရေး ကူညီပေးနေသူများထံမှ သိရသည်။ ရခိုင်ပြည် တောင်ပိုင်းရှိ သံတွဲ၊ တောင်ကုတ်နှင့် ဂွ မြို့နယ်တို့တွင် လက်ရှိ၌ ဆန်ဝယ်ယူရန် ခက်ခဲနေသည့်အပြင် ဆန်စက်များတွင်ပါ ကြိုတင်အော်ဒါ မှာယူမှသာ အကန့်အသတ်ဖြင့် ဝယ်ယူခွင့် ရရှိတော့သည်။ ပြင်ပပေါက်ဈေးအရ ဆန်ကြမ်းတစ်အိတ်လျှင် ကျပ် ၁ သိန်းခွဲမှ ၁ သိန်း ၆ သောင်းအထိ ဈေးနှုန်း မြင့်တက်နေ သဖြင့် စစ်ဘေးရှောင်များနှင့် ဒေသခံများ ဝယ်ယူရန် ခက်ခဲလာနေသည်။ ဒေသခံ ပရဟိတသမားတစ်ဦးက “လက်ရှိ ရခိုင်တောင်ပိုင်းက စစ်ရှောင်တွေက တော်တော်ဒုက္ခရောက်ရတယ်။ စစ်တပ်က ဗုံးကြဲနေတော့ အလုပ်လည်း လုပ်စားလို့မရသလို စပါးလည်း စိုက်လို့မရ လှူတဲ့သူတွေလည်း မရှိ တော့ တော်တော်ခက်ခဲနေတာပါ။ အခုတောင်းစားတဲ့သူတွေ ခိုးတဲ့သူတွေများလာပါတယ်။ ဆန်ကြမ်း တွေ လည်း ဈေးတက်လာပါတယ်။ တခြားပြည်နယ်တွေနဲ့ အဆက်အသွယ် မရသလို ရခိုင်မြောက်ပိုင်းမြို့တွေကို လည်းသွားဖို့က ခက်ခဲပါတယ်” ဟု ပြောသည်။ ပြီးခဲ့သည့် အောက်တိုဘာလ ၆ ရက်နေ့မှစ၍ စစ်အုပ်စုတပ်၏ လေကြောင်းဗုံးကြဲမှုများ ကြောင့် သံတွဲ၊ တောင် ကုတ်နှင့် ဂွ မြို့နယ်တို့တွင် စစ်ဘေးရှောင် ၆၀၀ နီးပါး ထပ်မံ တိုးလာနေပြီး အကူအညီများ အရေးပေါ် လိုအပ်လျက် ရှိသည်။ ထို့ပြင် ရခိုင်ပြည်တစ်ဝှမ်း၌ စစ်ရေးပဋိပက္ခများကြောင့် လမ်းပန်းဆက်သွယ်ရေး ပြတ်တောက်ခြင်း၊ စိုက်ပျိုးရေး လုပ်ငန်းများ လျော့ကျလာခြင်းတို့အပြင် ဘဏ်လုပ်ငန်းယန္တရားများ လုံးဝရပ်ဆိုင်းလုနီးပါး ဖြစ်နေခြင်းကြောင့် ငွေစက္ကူ ပြတ်လပ်မှုနှင့် ရင်ဆိုင်နေရသည်။ ရခိုင်မြောက်ပိုင်း ငွေလဲလုပ်ငန်း လုပ်ကိုင်သူ အမျိုးသမီးတစ်ဦးက “သံတွဲ တောင်ကုတ်ဘက်တွေမှာလည်း ငွေသားက အဆင်မပြေ။ မြောက်ဦး၊ ကျောက်တော်ဘက် လာထုတ်တာတွေရှိတယ်။ ငွေသားက ခက်ခဲနေတယ် မလည်ပတ်ဘူးဆိုတော့ ခက်ခဲပါတယ်။ ရခိုင်တပြည်လုံး ပိုက်ဆံ အသစ်မမြင်ဖူးဘူး။ ဆိုင်တွေကလည်း ငွေသား နွမ်းရင် လက်မခံဘူး။ ကျမတို့ဆီလည်း ထုတ်လို့မရဘူး။ ငွေအသစ်က မမြင်ဘူးတာကြာပြီ။ ကျမတို့လည်း ဝန်ဆောင်ခက အခြေအနေအရ ယူရတာပါ” ဟု ပြောသည်။ ငွေသား ထုတ်ယူရာတွင် ယခင်က ကျပ် ၁ သိန်းလျှင် ၂,၀၀၀ မှ ၃,၀၀၀ ကျပ်ခန့်သာ ပေးရသော်လည်း လက်ရှိ တွင် ၇,၀၀၀ မှ ၈,၀၀၀ ကျပ်အထိ ပေးဆောင်နေရပြီး အချို့နေရာများ၌ ထုတ်ယူသည့် ပမာဏအပေါ် မူတည်၍ ၁၀ ရာခိုင်နှုန်း (ကျပ် ၁ သိန်းလျှင် ၁ သောင်းကျော်) အထိ ဝန်ဆောင်ခ ပေးနေရကြောင်း ဒေသခံများက ဆို သည်။ ရခိုင်ပြည်အတွင်းရှိ ပြည်သူများ၏ ဘဏ်အကောင့် အများစုကို စစ်အုပ်စုက ပိတ်သိမ်းခဲ့ပြီးနောက်ပိုင်း ငွေစက္ကူ ရှားပါးမှု ပိုမိုကြီးမားလာကာ ပြည်သူများမှာ Mobile Banking (KPay, Wave Money) စနစ်ကိုသာ အမှီပြုနေရ သော်လည်း မြေပြင်တွင် ငွေသား ပြတ်လပ်နေသဖြင့် အေးဂျင့် ဝန်ဆောင်ခများမှာ မကြုံစဖူး မြင့်တက်လျက် ရှိသည်။ ငွေသား ရှားပါးမှုကြောင့် ဒေသတွင်း အသေးစားနှင့် အလတ်စား စီးပွားရေးလုပ်ငန်းများ (MSMEs) ရပ်ဆိုင်းသွား သည့်အပြင် ကျန်းမာရေးကဏ္ဍတွင်လည်း အရေးပေါ် ဆေးရုံတက်ရန် သို့မဟုတ် ခွဲစိတ်ရန် လိုအပ်သည့် လူနာများမှာ ဆေးရုံသို့ ပေးချေရန် ငွေသားမရှိသဖြင့် အခက်အခဲနှင့် ရင်ဆိုင်နေရသည်။ စစ်အုပ်စုသည် AA ထိန်းချုပ်ထားသည့် မြို့နယ်များကို လေကြောင်းနှင့် ကုန်းကြောင်း လမ်းကြောင်းများ အား လုံး ပိတ်ဆို့ထားသဖြင့် ငွေစက္ကူသစ် စီးဝင်နိုင်ခြင်း မရှိပါက ရေရှည်တွင် ကုန်သွယ်မှုစနစ် ပျက်စီးကာ ကုန်ချင်း လဲလှယ်သည့် စနစ် (Barter System) သို့ ကူးပြောင်းသွားနိုင်သည့် အန္တရာယ်ရှိနေပြီး လက်ရှိအချိန်အထိ ဒေသ တွင်း သက်ဆိုင်ရာ အာဏာပိုင်များဘက်ကလည်း ထိရောက်သည့် ဖြေရှင်းနည်း ထုတ်ပြန်နိုင်ခြင်း မရှိသေးပေ။ ဓာတ်ပုံ – (ကျောက်တော်မြို့နယ်ရှိ စစ်ဘေးရှောင်စခန်းတစ်ခုသို့ ရောက်ရှိလာသည့် စစ်ဘေးရှောင် ပြည်သူများ ကို တွေ့ရစဉ်။ (ပုံဟောင်း) / AFP)

ရခိုင်ရှိ AA ထိန်းချုပ်မြို့များတွင် ဆန်ပြတ်လပ်မှုနှင့်အတူ ငွေကြေးကျပ်တည်းမှု ဆိုးရွားစွာ ကြုံတွေ့နေရ

ရခိုင်ရှိ AA ထိန်းချုပ်မြို့များတွင် ဆန်ပြတ်လပ်မှုနှင့်အတူ ငွေကြေးကျပ်တည်းမှု ဆိုးရွားစွာ ကြုံတွေ့နေရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တ…

  • October 20, 2026
×Close