သတင်း

စစ်တွေ ရွှေမင်းဂံ ရေတပ်စခန်းကို AA လက်နက်ကြီးဖြင့် ပစ်ခတ်ပြီး တိုက်ပွဲပြင်းထန်နေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ နိုဝင်ဘာလ ၆ ရက်။ ရခိုင်ပြည်၊ စစ်တွေမြို့ရှိ ရွှေမင်းဂံ ရေတပ်စခန်းကို အာရက္ခတပ်တော် (ULA/AA) က လက်နက်ကြီးများဖြင့် ပစ်ခတ် တိုက်ခိုက်နေပြီး ရေတပ်စခန်း ဝန်းကျင်၌ နှစ်ဖက် တိုက်ပွဲများ အပြင်းအထန် ဖြစ်ပွားလျက်ရှိကြောင်း ဒေသတွင်း စစ်ရေးသတင်းရင်းမြစ်များက ပြောသည်။ အဆိုပါ ရွှေမင်းဂံ ရေတပ်စခန်း အနီးဝန်းကျင်၌ အောက်တိုဘာလ နောက်ဆုံးပတ်မှ စတင်၍ တိုက်ပွဲများ ဖြစ်ပွားခဲ့ပြီး နိုဝင်ဘာ ၄ ရက်နှင့် ၅ ရက်နေ့များတွင် တိုက်ပွဲများ ပိုမို ပြင်းထန်လာခဲ့ခြင်း ဖြစ်သည်။ လက်ရှိ စစ်ရေးအခြေအနေနှင့် ပတ်သက်၍ စစ်တွေ-ပုဏ္ဏားကျွန်း နယ်စပ်ရှိ ဒေသခံ စစ်ရေးသတင်းရင်းမြစ် တစ်ဦးက ယခုကဲ့သို့ ပြောသည်။ ဒေသခံစစ်ရေးသတင်းရင်းမြစ်က “တိုက်ပွဲတွေက အခုလပိုင်းမြို့နဲ့ ပိုပြီးနီးကပ်လာတယ်။ ရွှေမင်းဂံနား တဝိုက်က စစ်တပ်ရေယာဉ် တွေကို အေအေပစ်တဲ့ လက်နက်ကြီး ထိတယ်လို့သိရတယ်။ စစ်တပ်ကလည်း ရေတပ် သင်္ဘောတွေက အေအေရှိနိုင်တဲ့ နေရာတွေကို လက်နက်ကြီးတွေနဲ့ ပစ်နေတယ်။ ရွှေမင်းဂံ အောက် ဘက်ပိုင်း နဲ့ ပုဏ္ဏားကျွန်းဘက် အခြမ်းတွေကနေ မြို့နဲ့နီးအောင် အေအေတက်လာနေတယ်” ဟု ပြောသည်။ လက်ရှိတွင် ရွှေမင်းဂံ ရေတပ်စခန်းအနီး မေယုမြစ်ဘေး အနီးတဝိုက်ရှိ ချောင်းနွယ်မင်းဂံ၊ ရဲရိုးပြင်နှင့် ရေချမ်း ပြင် ရွာဘက်တို့၌ နှစ်ဖက်တပ်များ လက်နက်ငယ်၊ လက်နက်ကြီးများဖြင့် ပြင်းထန်စွာ တိုက်ခိုက်လျက် ရှိသည်။ စစ်အုပ်စုတပ်၏ ရေတပ်သင်္ဘောများသည် ရွှေမင်းဂံအနီး မြစ်အတွင်းနှင့် ဆတ်ရိုးကျ ချောင်းဝတို့တွင် နေရာယူ ထားပြီး အတွဲလိုက်ဒုံးများ အသုံးပြု၍ ခုခံတိုက်ခိုက်လျက် ရှိသည်။ စစ်တွေမြို့တွင်းသို့ စစ်ရေး နီးကပ်လာမှုနှင့် ပတ်သက်၍ အခြား စစ်ရေးသတင်းရင်းမြစ်တစ်ဦးကလည်း “ပါဒလိတ် တပ်ရင်းတွေထဲကို အေအေက ပြီးခဲ့တဲ့အပတ်က လက်နက်ကြီးနဲ့ ပစ်ခတ်လို့ ဗိုလ်မှူးအဆင့်တွေပါ ကျတယ်လို့ သတင်းထွက်တယ်။ အခု ရွှေမင်းဂံ ရေတပ်စခန်းကို စစ်မြူနေပြီ။ ချောင်းနွယ်မင်းဂံဘက်က ထိုးစစ်လုပ်လာတာ။ ရဲရိုးပြင်ဘက်ကနေ မြို့ထဲဘက်ကို အေအေက တအိအိ ဖြည်းဖြည်းချင်း စစ်နယ်ချဲ့လာ နေတယ်” ဟု ပြောပြောသည်။ ထို့ပြင် စစ်တွေမြို့ မြောက်ဘက် ဒေသကွပ်ကဲမှုစစ်ဌာနချုပ် (ဒကစ) နှင့် ၄ မိုင်ကျော်အကွာ ပါဒလိတ်ရွာရှိ ခလရ (၂၃၂)၊ ခမရ (၃၄၄)၊ အမှတ် (၁၀) ပညာရေးသင်တန်းကျောင်းနှင့် အမှတ် (၃၄၃) စစ်လက်နက်ပစ္စည်းတပ်ခွဲ စသည့် စစ်အုပ်စုတပ်စခန်းများကိုပါ ULA/AA ဘက်မှ လက်နက်ကြီးများဖြင့် ပစ်ခတ်မှုများ ရှိနေသည်။ လက်ရှိတွင် ULA/AA သည် အမြင့်ကျွန်း၊ ရေချမ်းပြင်၊ ကံ့ကော်ကျွန်း ဝန်းကျင်ရှိ စစ်အုပ်စုတပ်စခန်းများကို မြေပြင် ထိုးစစ်ဆင်နေပြီး ရွှေမင်းဂံ ရေတပ်ဝန်းကျင်နှင့် ငတောက်တက် ဝန်းကျင်တို့၌လည်း တိုက်ပွဲများ ဆက်လက် ပြင်းထန်လျက် ရှိသည်။ စစ်တွေမြို့နယ်အတွင်း စစ်အုပ်စုတပ်စခန်း ၁၀ ခုထက်မနည်းကို ၂ လအတွင်း ULA/AA ဘက်က ထိန်းချုပ်ထား ခဲ့ပြီး တိုက်ပွဲများအတွင်း နှစ်ဖက် ထိခိုက်သေဆုံးမှုများ ရှိနေသဖြင့် ဒဏ်ရာရသူများကို စစ်တွေ ပြည်သူ့ဆေးရုံ ကြီးနှင့် စစ်ဆေးရုံများတွင် ဆေးကုသမှု ပေးနေရသည်။ ဓါတ်ပုံ - (၂၀၂၆ ခုနှစ်၊ ဩဂုတ်လက ရခိုင်ပြည်မြောက်ပိုင်း ပင်လယ်ပြင်အတွင်း စစ်ကြောင်းလှုပ်ရှားနေသည့် အာရက္ခတပ်တော် (AA) တပ်ဖွဲ့ဝင်များ / ) #ရွှေမင်းဂံ

စစ်တွေ ရွှေမင်းဂံ ရေတပ်စခန်းကို AA လက်နက်ကြီးဖြင့် ပစ်ခတ်ပြီး တိုက်ပွဲပြင်းထန်နေ

စစ်တွေ ရွှေမင်းဂံ ရေတပ်စခန်းကို AA လက်နက်ကြီးဖြင့် ပစ်ခတ်ပြီး တိုက်ပွဲပြင်းထန်နေ သတင်းနှင့် မီဒီယာ ကွန်ရက်။၂၀၂၆ ခုနှစ်၊ နိုဝင်ဘာလ ၆ ရက်။ ရခိုင်ပ…

  • November 6, 2026
ရှမ်းမြောက် မိုးမိတ်၌ စစ်အုပ်စု စစ်ကြောင်းထိုး၍ တိုက်ပွဲပြင်းထန်နေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ နိုဝင်ဘာလ ၆ ရက်။ ရှမ်းပြည်မြောက်ပိုင်း၊ မိုးမိတ်မြို့နယ်အတွင်း မန္တလေးဘက်မှ စစ်ကူ ရောက်ရှိလာသည့် စစ်အုပ်စုတပ်နှင့် ကချင်လွတ်လပ်ရေး တပ်မတော် KIA ပူးပေါင်းတပ်များအကြား တိုက်ပွဲများ ဆက်လက် ပြင်းထန်နေသည်။ စစ်အုပ်စုတပ်သည် ဂျက်တိုက်လေယာဉ်များ၊ ဒရုန်းများနှင့် လက်နက်ကြီးများ အမြောက်အများ အသုံးပြုကာ မြို့ပြင် ၇ မိုင်နှင့် ၈ မိုင် ဝန်းကျင်သို့ ထိုးစစ်ဆင်နေခြင်း ဖြစ်သည်။ လက်ရှိ စစ်ရေးအခြေအနေနှင့် ပတ်သက်၍ တော်လှန်ရေး ပူးပေါင်းတပ်ဖွဲ့ တာဝန်ရှိသူတစ်ဦးက “မိုးမိတ်ဘက် မှာ စစ်အုပ်စုဘက်က မန္တလေးကနေ စစ်ကူအများအပြား ဖြည့်တင်းပြီး အင်အားသုံး ထိုးစစ်ဆင်လာတာပါ။ KIA ပူးပေါင်းတပ်တွေ တပ်စွဲထားတဲ့ ရှေ့တန်းနေရာတွေကို ခြေလျင်တပ်တင်မကဘဲ လက်နက်ကြီး၊ ဒရုန်း တွေနဲ့ ဂျက်ဖိုက်တာတွေကိုပါ ဆက်တိုက်အသုံးပြုပြီး ဗုံးကြဲ တိုက်ခိုက်နေပါတယ်” ဟု ပြောသည်။ စစ်အုပ်စုတပ်သည် ၎င်းတို့၏ စစ်ကြောင်းများ အထိနာပြီး နောက်ဆုတ်ခဲ့ရပြီးနောက် အင်အား ထပ်မံဖြည့်တင်းကာ လေကြောင်းကနေပါ နေ့စဉ်ရက်ဆက် ဗုံးကြဲ တိုက်ခိုက်နေသည်။ ထိုသို့ မိုးမိတ်-မြစ်ဆုံ လမ်းပိုင်း တိုက်ပွဲအတွင်း စစ်အုပ်စုဘက်က ထိခိုက်ကျဆုံးမှု အခြေအနေနှင့် ပတ်သက်၍ မြေပြင်ရှိ စစ်ရေးသတင်းရင်းမြစ် တစ်ဦးကလည်း ယခုကဲ့သို့ ဆက်ပြောသည်။ စစ်ရေးသတင်းရင်းမြစ်တစ်ဦးက “စစ်အုပ်စုက တပ်ရင်း ၄ ရင်းပေါင်းပြီးမှ စစ်ကြောင်းတစ်ကြောင်းတည်းနဲ့ ငါးအိုးဘက်ကို ထိုးတက်လာတာပါ။ အဲဒီလို ထိုးစစ်ဆင်လာတာကို တော်လှန်ရေးတပ်ပေါင်းစုတွေက ဝိုင်းဝန်း ပိတ်ဆို့ တိုက်ခိုက်ခဲ့တာ ဖြစ်တဲ့အတွက် စစ်အုပ်စုတပ်ဖွဲ့ဝင် အမြောက်အမြား သေဆုံးပြီး စစ်ကြောင်းတစ်ခုလုံး ကစင့်ကလျား ပြိုကွဲဆုတ်ခွာသွားခဲ့ရပါတယ်။ တပ်ရင်းမှူးတစ်ဦးလည်း ဒဏ်ရာပြင်းထန်စွာ ရရှိခဲ့သလို ဒုတိယ တပ်ရင်းမှူးလည်း ဖြစ်စဉ်နေရာမှာတင် သေဆုံးသွားခဲ့ပါတယ်” ဟု ပြောသည်။ လက်ရှိ မိုးမိတ်မြို့နယ်အတွင်း၌ စစ်အုပ်စုတပ်၏ ခမရ ၁၁၄၊ ခမရ ၁၁၅ နှင့် ခမရ ၅၀၆ တပ်များ ပူးပေါင်းကာ မြို့ပြင် ၄ နေရာထက်မနည်း၌ စစ်ရေးလှုပ်ရှားလျက် ရှိသည်။ စစ်အုပ်စုတပ်သည် မိုးမိတ် - မဘိမ်း - ငါးအိုး - ရွှေကူ - ဗန်းမော် လမ်းကြောင်းကို ပြန်လည်စိုးမိုးနိုင်ရန် အင်အား ၁,၀၀၀ ကျော်ဖြင့် စစ်ကြောင်း ၃ ကြောင်းခွဲ၍ ထိုးစစ်ဆင်နေခြင်း ဖြစ်သည်ဟု စစ်ရေးသတင်းရင်း မြစ်များက ပြောသည်။ အဆိုပါ မိုးမိတ်ဒေသ စစ်ရေးဖြစ်စဉ်များအတွင်း KIA ပူးပေါင်းတပ်များဘက်က စစ်အုပ်စုထံမှ လက်နက်မျိုးစုံ ၃၀ ကျော်မှ ၅၀ နီးပါးနှင့် ဂျမ်မာ (Jammer) စက်ပစ္စည်းများကို အောက်တိုဘာ လကုန်ပိုင်းက သိမ်းဆည်းရမိခဲ့ သေးသည်။ ဓါတ်ပုံ - (၂၀၂၄ ခုနှစ်၊ ဇူလိုင်လ ၃၁ ရက်က မိုးမိတ်မြို့ကို တော်လှန်ရေး ပူးပေါင်းတပ်များ သိမ်းပိုက်အပြီး တွေ့ရသည့် မန္တလေးပြည်သူ့ကာကွယ်ရေးတပ်မတော် (MDY PDF) တပ်ဖွဲ့ဝင်များ။ - ပုံဟောင်း / MDY PDF) #မိုးမိတ်

ရှမ်းမြောက် မိုးမိတ်၌ စစ်အုပ်စု စစ်ကြောင်းထိုး၍ တိုက်ပွဲပြင်းထန်နေ

ရှမ်းမြောက် မိုးမိတ်၌ စစ်အုပ်စု စစ်ကြောင်းထိုး၍ တိုက်ပွဲပြင်းထန်နေ သတင်းနှင့် မီဒီယာ ကွန်ရက်။၂၀၂၆ ခုနှစ်၊ နိုဝင်ဘာလ ၆ ရက်။ ရှမ်းပြည်မြောက်ပိုင်း…

  • November 6, 2026
ကျန်ရှိနေဆဲ မလေးပြန် ရခိုင်များ ပြန်ထုတ်ရန် သိန်းရာဂဏန်းထိ တောင်းဆိုနေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ နိုဝင်ဘာလ ၆ ရက်။ မလေးရှားမှ ပြန်ပို့ခံရပြီး သန်လျင် သာသနာ့ဗိမာန်၌ ထိန်းသိမ်းခံထားရသည့် ရခိုင်တိုင်းရင်းသားများကို စစ်အုပ်စုတပ်နှင့် ပျူစောထီးများက ကျပ်သိန်းတစ်ရာကျော်အထိ တောင်းခံနေသည်။ ထို့ပြင် ၎င်းတို့အား စစ်မှုထမ်းရန် ရောင်းစားမည့် အန္တရာယ်များနှင့်လည်း ရင်ဆိုင်နေရကြောင်း ဒေသခံများနှင့် ရန်ကုန်ရောက် ရခိုင်အသိုင်းအဝိုင်းက ဆိုသည်။ မလေးရှားမှ ပြန်ပို့ခံရသည့် မြန်မာနိုင်ငံသား ၁,၄၇၆ ဦးအနက် ရခိုင်တိုင်းရင်းသား ၄၂၉ ဦး ပါဝင်သည်။ ၎င်းတို့အနက် ၂၁၇ ဦးကို သန်လျင် သာသနာ့ဗိမာန်၌လည်းကောင်း၊ ကျန် ၂၁၂ ဦးကို လှိုင်သာယာ (အနောက်ပိုင်း) မြို့နယ်ခန်းမ၌လည်းကောင်း ထိန်းသိမ်းထားသည်မှာ တစ်လကျော်ပြီ ဖြစ်သည်။ လက်ရှိတွင် သန်လျင် သာသနာ့ဗိမာန် ဝန်းကျင်၌ စစ်အုပ်စုတပ်နှင့် ရဲများက အရပ်ဝတ်ဖြင့် စောင့်ကြည့်နေပြီး လာရောက်ဆက်သွယ်သူများအနက် ရခိုင်တိုင်းရင်းသားများကို ဖမ်းဆီးစစ်ဆေးမှုများ ပြုလုပ်လျက်ရှိသည်။ ထိန်းသိမ်းခံထားရသည့် အခြေအနေနှင့် ပတ်သက်၍ သန်လျင် ဒေသခံ ရခိုင်အမျိုးသားတစ်ဦးက “သာသနာ့ ဗိမာန်နားကို အခုဘယ်သူတွေ စုံစမ်းဖို့သွားလို့ရလဲ။ နောက်တစ်ခုက ဘယ်နှစ်ယောက်လွတ်ပြီးလဲ အတိအကျ တစ်ခုမှ မသိရဘူး၊ သတင်းအမှောင်ပဲ။ သိချင် ဆက်သွယ်ချင်ရင် သန်လျင် လူမိုက်အဖွဲ့နဲ့ ပျူစောထီးအဖွဲ့ကို ဘုရားကုန်းနားမှာ စကားပြော၊ သူတို့က စစ်တပ် အရာရှိနဲ့ချိတ်ပေးတယ်၊” ဟုပြောသည်။ သူက ဆက်ပြီး “ရခိုင်တွေကိုလာထုတ်တဲ့ သူရဲ့ပြော စကားနဲ့အနေအထားပေါ်မူတည်ပြီး သိန်း ၃၀ ကနေ တစ်ကျော်အထိတောင်းနေတာ ဘယ်သူမှထုတ်လို့ရတယ်၊ ငွေပေးရတယ်မပြောရဲဘူး။ အခုသတင်းထွက်လာတာ ပျူနဲ့အုပ်ချုပ်ရေးမှူးတွေပေါင်းပြီး ရခိုင်တွေကို စစ်မှုထမ်းဖို့ရောင်းတဲ့အဆင့်အထိ ရောက်လာပြီ” ဟု ပြောသည်။ မလေးပြန် ရခိုင်တိုင်းရင်းသားအချို့ကို သန်လျင်မြို့နယ် ဒုတိယမြို့နယ်အုပ်ချုပ်ရေးမှူး ဦးအာကာကျော်နှင့် အမှုထမ်းရပ်ကွက်အုပ်ချုပ်ရေးမှူး ကျော်ဇင်လတ်တို့ ပူးပေါင်းကာ စစ်မှုထမ်းရန် ရောင်းစားမှုများ ပြုလုပ်နေ ကြောင်း ဒေသတွင်း မီဒီယာများက ဖော်ပြသည်။ စစ်မှုထမ်း အဖြစ် ရောင်းစားနေသည်ဆိုသည့် စွပ်စွဲချက်နှင့် ပတ်သက်၍ သတင်းနှင့် မီဒီယာ ကွန်ရက်မှ သီးခြား အတည်ပြုချက် မရရှိသေးပါ။ ထိန်းသိမ်းခံထားရသူများကို အစားအသောက် မဝရေစာသာ ကျွေးမွေးထားပြီး ပြင်ပမှ လာရောက်လှူဒါန်း ကျွေးမွေးလိုသည့် ကမ်းလှမ်းချက်များကိုလည်း လက်မခံဘဲ ငြင်းပယ်ထားသည်။ သန်လျင် သာသနာ့ဗိမာန်နှင့် နီးစပ်သည့် အမျိုးသမီးတစ်ဦးက “ရခိုင်တွေကို ထောင်သားတွေလိုထားတယ်၊ မင်း တို့ အကုန်စစ်မှုထမ်းရမယ်၊ အသက်ကြီးရင်ထမင်းချက် မင်းတို့ အေအေဘာကယ်နိုင်လဲ ဆိုပြီး ညဘက် မူးလာ ရင် စစ်သားတွေက ဆူတယ် ဆဲတယ်။ အရက်ဖိုး Kpay နဲ့ လွဲဖို့တောင်းတယ်။ မနက်ကျတန်းစီ သန့်ရှင်းရေး လုပ်၊ မိသားစုက အချက်အလက် အပြည့်အစုံနဲ့ လာခေါ်ရင်ထုတ်ပေးတယ်ဆိုတာ ပျူစောထီး လူမိုက်တွေနဲ့ ဆက်သွယ်မှ ရတာ။ သူတို့က ပွဲစားတွေ လာထုတ်တာ တော်တော်ရှားတယ်။ အခု ၂ လ အတွင်း အကုန်စစ်မှု ထမ်း ပို့တော့မယ်လို့ ကြားတယ်” ဟု ပြောသည်။ တစ်ဖက်တွင်လည်း လှိုင်သာယာ (အနောက်ပိုင်း) ၌ ထိန်းသိမ်းထားသူများအနက် အချို့ကို ပြန်လွှတ်ပေးခဲ့သည် ဟု စစ်အုပ်စုက ဆိုသော်လည်း အမှန်တကယ်တွင် အာမခံပေးနိုင်သူရှိပြီး ကျပ်သိန်း ၅၀ အထိ ပေးနိုင်သူများကိုသာ လွှတ်ပေးခဲ့ခြင်း ဖြစ်သည်။ ငွေကြေး မပေးနိုင်သည့် ကျန်ရှိသူများကိုမူ စစ်အုပ်စုတပ်က ဆက်လက် ထိန်းသိမ်းထားဆဲ ဖြစ်သည်။ မလေးရှားနိုင်ငံခြားရေးဝန်ကြီး Datuk Seri Mohamad Hasan က မလေးရှားမှ နေရပ်ပြန်ပို့ခံရသူများအနက် ၃၀၀ ခန့်မှာ ရန်ကုန်မြို့ရှိ စစ်ဘက်ဆိုင်ရာ ထိန်းသိမ်းရေးစခန်းများတွင် ဆက်လက်ဖမ်းဆီးခံထားရဆဲဟူသော သတင်းများနှင့်ပတ်သက်၍ မြန်မာနိုင်ငံထံမှ ရှင်းလင်းချက် တောင်းခံသွားမည်ဖြစ်ကြောင်း ပြောဆိုထားသည်။ ဓါတ်ပုံ - (မလေးရှားမှ ပြန်လာသည့် ရခိုင်တိုင်းရင်းများအား တွေ့ရစဉ်။ / Original uploader) #myanmarmigrantworker

ကျန်ရှိနေဆဲ မလေးပြန် ရခိုင်များ ပြန်ထုတ်ရန် သိန်းရာဂဏန်းထိ တောင်းဆိုနေ

ကျန်ရှိနေဆဲ မလေးပြန် ရခိုင်များ ပြန်ထုတ်ရန် သိန်းရာဂဏန်းထိ တောင်းဆိုနေ သတင်းနှင့် မီဒီယာ ကွန်ရက်။၂၀၂၆ ခုနှစ်၊ နိုဝင်ဘာလ ၆ ရက်။ မလေးရှားမှ ပြန်ပိ…

  • November 6, 2026
ရခိုင်ပြည် မြောက်ဦးကို စစ်အုပ်စုတပ် ဗုံးကြဲ၍ ကိုယ်ဝန်ဆောင် အမျိုးသမီး သေဆုံးပြီး ၁၂ ဦး ဒဏ်ရာရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ နိုဝင်ဘာလ ၆ ရက်။ ရခိုင်ပြည်အတွင်း စစ်အုပ်စုတပ်သည် အရပ်သား ပြည်သူများ နေထိုင်ရာ ကျေးရွာများနှင့် ဆေးရုံများကို ပစ်မှတ် ထား၍ ညဉ့်အချိန်ပါမကျန် လေကြောင်းမှ ဗုံးကြဲတိုက်ခိုက်မှုများ ဆက်တိုက် ပြုလုပ်လျက်ရှိရာ နိုဝင်ဘာလ ပထမပတ်အတွင်း၌ပင် ကိုယ်ဝန်ဆောင်များနှင့် ကလေးငယ်များ အပါအဝင် အရပ်သား ၁၃ ဦးထက်မနည်း သေဆုံးခဲ့ကြောင်း ဒေသခံများနှင့် သတင်းရင်းမြစ်များက ပြောသည်။ ပြီးခဲ့သည့် နိုဝင်ဘာလ ၅ ရက် ည ၁၁ နာရီခွဲဝန်းကျင်က မြောက်ဦး-အဉ္ဇနပူရ (မင်းပြား) အဝေးပြေး ကားလမ်း အနီးရှိ နန်းကျားကျေးရွာအတွင်းသို့ စစ်အုပ်စုတပ်၏ ဂျက်တိုက်လေယာဉ်တစ်စီးက ပေါင် ၅၀၀ ဗုံးတစ်လုံး ကြဲ ချတိုက်ခိုက်ခဲ့သဖြင့် လူနေအိမ်အချို့ ပြိုပျက်ခဲ့ရသည်။ အဆိုပါ လေကြောင်းတိုက်ခိုက်မှုကြောင့် နန်းကျားကျေးရွာမှ အသက် ၃၅ နှစ်အရွယ် ကိုယ်ဝန် ၄ လရှိ ကိုယ်ဝန် ဆောင် အမျိုးသမီး ဒေါ်သဲသဲမွန်မှာ ဖြစ်စဉ်နေရာတွင်ပင် သေဆုံးသွားခဲ့ပြီး ဦးအောင်ကျော်ဇော၊ ဒေါ်အေးအေး၊ ဦးမောင်နီထွန်း၊ ဦးထွန်းဝင်း၊ ဒေါ်မလှနု၊ ဒေါ်လုံးပု၊ မောင်သန်းနိုင်၊ ဦးကျော်ထွန်းစိန်၊ ဒေါ်သန်းသန်းစိုး၊ မပပဝင်း လှိုင်နှင့် မအေးအေးသန်းတို့အပါအဝင် အပြစ်မဲ့ အရပ်သား ၁၂ ဦး ဒဏ်ရာရရှိခဲ့သည်။ မြောက်ဦးမြို့ဒေသခံတစ်ဦးက “ကျနော်တို့ ကျေးရွာက စစ်ရေးနဲ့လည်း ဘာမှ မသက်ဆိုင်ပါဘူး။ ဒါကိုမှ လူအိပ် ချိန် သန်းခေါင်ယံမှာ လေကြောင်းကနေ ပေါင် ၅၀၀ ဗုံးနဲ့ လာချတာ။ နန်းကျား ဘုရားသိမ်နားမှာ ဗုံးကျတာ ဖြစ်လို့ နာရီဝက်လောက်အကြာ သွားကြည့်တော့ ကိုယ်ဝန်ဆောင် မိခင်ကို အရေးပေါ် ဆေးရုံပို့နေကြတုန်း၊ မနက်အစောပိုင်း ၁ နာရီလောက်မှာတော့ ဆေးရုံမှာ ဆုံးသွားခဲ့တာပါ။ အခုဆိုရင် ဘယ်နေရာမှလည်း လုံခြုံမှု မရှိတော့ပါဘူး” ဟု ပြောသည်။ စစ်အုပ်စုတပ်သည် ပြီးခဲ့သည့် နိုဝင်ဘာလ ၁ ရက် ညနေပိုင်းကလည်း မြောက်ဦးမြို့ ထမ္မရာဇ်ရပ်ကွက်ရှိ ယာယီ သားဖွားဆေးရုံကို ဂျက်တိုက်လေယာဉ် နှစ်စီးဖြင့် ဗုံးကြဲတိုက်ခိုက်ခဲ့ရာ လသားအရွယ် မွေးကင်းစ ကလေးငယ် ၂ ဦး အပါအဝင် အရပ်သား ၅ ဦး သေဆုံးပြီး ၉ ဦး ဒဏ်ရာရရှိခဲ့သေးသည်။ ယခု နိုဝင်ဘာလ ပထမပတ်အတွင်း၌ပင် စစ်အုပ်စုတပ်သည် စစ်ရေးပစ်မှတ် မဟုတ်သည့် မြောက်ဦး၊ ကျောက် တော်၊ ကျောက်ဖြူနှင့် စနဲ ဒေသများရှိ လူနေရပ်ကွက်များ၊ စာသင်ကျောင်းများနှင့် ယာယီ ဆေးကုသရေး စခန်း များကိုပါ အဓိက ပစ်မှတ်ထား၍ လေကြောင်းမှ အကြမ်းဖက် တိုက်ခိုက်မှုများ ပြုလုပ်ခဲ့သည်။ ထိုသို့ ဆေးရုံများနှင့် ပြည်သူ့အသုံးအဆောင် လမ်းတံတားများကိုပါ ပစ်မှတ်ထား တိုက်ခိုက်နေမှုများနှင့် ပတ် သက်၍ အာရက္ခတပ်တော် (ULA/AA) ၏ ပြောရေးဆိုခွင့်ရှိသူ ဦးခိုင်သုခက “ဒီသားဖွားဆေးရုံကို ဗုံးကြဲခံရ တဲ့ ဖြစ်ရပ်ဟာ လူ့သမိုင်းတစ်လျှောက်မှာ အဆိုးရွားဆုံးနဲ့ ဝမ်းနည်းကြေကွဲဖွယ်ရာ ဖြစ်ရပ်ဆိုးတွေထဲက တစ်ခုဖြစ် ပါတယ်။ ဒီရက်ပိုင်းမှာ မြန်မာစစ်တပ်ဟာ ဒီအာရက္ခပြည်ထဲက စစ်ရေးနဲ့ မသက်ဆိုင်တဲ့ ဆေးရုံတွေ၊ အများ ပြည်သူ အသုံးပြုတဲ့ လမ်းတံတားတွေကို ပစ်မှတ်ထား တိုက်ခိုက်ဖျက်ဆီးမှုတွေ ဆက်တိုက်ရှိနေပါတယ်။ ဒီ လုပ်ရပ်တွေဟာ အင်မတန် အောက်တန်းကျ ရုပ်မာတဲ့ လုပ်ရပ်တွေ ဖြစ်ပါတယ်” ဟု ဝေဖန်ထောက်ပြထား သည်။ ရှေ့တန်း စစ်မျက်နှာများတွင် အရှုံးနှင့် ရင်ဆိုင်နေရသည့် စစ်အုပ်စုတပ်သည် လေကြောင်း တိုက်ခိုက်မှုများကို သာ အဓိက အားပြုကာ စစ်ရာဇဝတ်မှုများကို ပြောင်ပြောင်တင်းတင်း ကျူးလွန်နေခြင်း ဖြစ်ပြီး၊ လက်ရှိတွင် ရခိုင်ပြည်သူများမှာ ရုပ်ပိုင်းဆိုင်ရာရော စိတ်ပိုင်းဆိုင်ရာပါ လုံခြုံမှု မရှိတော့ဘဲ စိုးရိမ်ထိတ်လန့်နေကြသည်။ ဓါတ်ပုံ - Deep Sigh #Rakhine #Airstrike

ရခိုင်ပြည် မြောက်ဦးကို စစ်အုပ်စုတပ် ဗုံးကြဲ၍ ကိုယ်ဝန်ဆောင် အမျိုးသမီး သေဆုံးပြီး ၁၂ ဦး ဒဏ်ရာရ

ရခိုင်ပြည် မြောက်ဦးကို စစ်အုပ်စုတပ် ဗုံးကြဲ၍ ကိုယ်ဝန်ဆောင် အမျိုးသမီး သေဆုံးပြီး ၁၂ ဦး ဒဏ်ရာရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ နိုဝင်ဘာလ ၆ ရက…

  • November 6, 2026
တာချီလိတ်ရှိ ဟိုတယ်တစ်ခုကို ဝင်ရောက်စီးနင်းပြီး ကျားဖြန့်ငွေလိမ်မှုနှင့် ဆက်စပ်သည့် ထိုင်းနိုင်ငံသား ၈၃ ဦးကို ဖမ်းဆီး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ နိုဝင်ဘာ ၆ ရက်။ ထိုင်း-မြန်မာနယ်စပ် တာချီလိတ်မြို့ရှိ ဟိုတယ်တစ်ခုကို ရဲတပ်ဖွဲ့က ဝင်ရောက်စီးနင်းခဲ့ရာ တရားမဝင် အွန်လိုင်းငွေလိမ်လည်မှု (ကျားဖြန့်) လုပ်ငန်းလုပ်ကိုင်နေသည့် ထိုင်းနိုင်ငံသား ၈၃ ဦးကို ကွန်ပျူတာ၊ ဖုန်းများနှင့်အတူ ဖမ်းဆီးရမိခဲ့သည်။ ပြီးခဲ့သည့် အောက်တိုဘာ ၃၁ ရက်က မြဝတီ-မယ်ဆိုင် နယ်စပ် မဲဆိုင်မြစ်နှင့် မီတာ ၃၀၀ ခန့်သာ ကွာဝေးသည့် တာချီလိတ်မြို့၊ ဆန်ဆိုင်းရပ်ကွက်ရှိ ဟိုတယ်တစ်ခုတွင် တရားမဝင် အွန်လိုင်းရုံးခန်း ဖွင့်လှစ်ထားကြောင်း သတင်းအရ ဝင်ရောက်စစ်ဆေးခဲ့ရာမှ ယခုကဲ့သို့ ဖမ်းဆီးရမိခြင်း ဖြစ်သည်။ အဆိုပါဟိုတယ်၏ ၃ လွှာနှင့် ၄ လွှာတို့တွင် ကွန်ပျူတာများဖြင့် အလုပ်လုပ်ကိုင်နေသည့် ထိုင်းအမျိုးသား ၄၂ ဦးနှင့် အမျိုးသမီး ၄၁ ဦး၊ စုစုပေါင်း ၈၃ ဦးကို ဖမ်းဆီးရမိခဲ့ခြင်းဖြစ်သည်။ စီးနင်းမှုအတွင်း လပ်တော့ပ် ကွန်ပျူတာ ၄၀ လုံးနှင့် လက်ကိုင်ဖုန်း ၇၅ လုံးကိုလည်း သက်သေခံပစ္စည်းအဖြစ် သိမ်းဆည်းရမိခဲ့သည်။ တာချီလိတ် အခြေစိုက် အွန်လိုင်း သတင်းဌာန တစ်ခု အဆိုအရ အဆိုပါ ဟော်တယ်မှာ ရာဝရတ် ဟိုတယ် ဖြစ်ပြီး နိုဝင်ဘာလ ၂ ရက်နေ့မှ စ၍ အာဏာပိုင်များက ယာယီ ချိတ်ပိတ်ထားလိုက်သည်ဟု ဆိုသည်။ ဖမ်းဆီးရမိသူများအား တာချီလိတ်မြို့မရဲစခန်းသို့ ပို့ဆောင်ထားပြီး အွန်လိုင်းငွေလိမ်လည်မှု၊ ကောလ်စင်တာ လောင်းကစား လုပ်ငန်းများနှင့် ပတ်သက်သည့် ပုဒ်မများဖြင့် အရေးယူရန် ဆောင်ရွက်လျက်ရှိသည်။ တာချီလိတ်မြို့သည် လွန်ခဲ့သည့် ၄ နှစ်မှ ၅ နှစ်အတွင်း အွန်လိုင်းလောင်းကစားနှင့် အွန်လိုင်းငွေလိမ်လည်မှု လုပ်ငန်းများ အခြေစိုက်ရာ ဒေသတစ်ခုဖြစ်ခဲ့ပြီး ၂၀၂၄ နှင့် ၂၀၂၅ ခုနှစ်အတွင်း တရုတ်နှင့် မြန်မာအာဏာပိုင်များ၏ တင်းကြပ်စွာ နှိမ်နင်းမှုများကြောင့် အချို့ဂိုဏ်းများ ရွှေ့ပြောင်းသွားခဲ့ရသည်။ ထို့ပြင် နယ်စပ်ဖြတ်ကျော် အွန်လိုင်းငွေလိမ်လည်မှုများကို နှိမ်နင်းရန်အတွက် ထိုင်းအစိုးရက ၂၀၂၅ ခုနှစ် အစပိုင်းမှစ၍ တာချီလိတ်အပါအဝင် နယ်စပ်ဒေသများသို့ စက်သုံးဆီ၊ လျှပ်စစ်ဓာတ်အားနှင့် အင်တာနက်လိုင်းများ ဖြတ်တောက် ကန့်သတ်ထားသည်။ မကြာသေးမီက ပြုလုပ်ခဲ့သည့် AFTF (အပြည်ပြည်ဆိုင်ရာ ငွေကြေးခဝါချမှု စောင့်ကြည့်ရေးအဖွဲ့က ငွေလိမ်ဂိုဏ်းများ ဆက်လက်ရှိနေမှုနှင့် ငွေကြေးခဝါချမှုတွေ ကြောင့် မြန်မာနိုင်ငံကို အမည်ပျက်စာရင်းတွင် ၅ နှစ်မြောက် ထည့်သွင်းခဲ့သည်။ ဖေဖော်ဝါရီ ၂၀၂၇ ခုနှစ် ဖေဖော်ဝါရီ နောက်ဆုံးထားပြီး ပြုပြင်ပြောင်းလဲမှုများ မလုပ်ဆောင်ပါက ပိုမို တင်းကျပ်သည့် ပိတ်ဆို့ အရေးယူမှုများ လုပ်ဆောင်သွားမည် ဟုလည်း သတိပေးထားသည်။

တာချီလိတ်ရှိ ဟိုတယ်တစ်ခုကို ဝင်ရောက်စီးနင်းပြီး  ကျားဖြန့်ငွေလိမ်မှုနှင့် ဆက်စပ်သည့် ထိုင်းနိုင်ငံသား ၈၃ ဦးကို ဖမ်းဆီး

တာချီလိတ်ရှိ ဟိုတယ်တစ်ခုကို ဝင်ရောက်စီးနင်းပြီး  ကျားဖြန့်ငွေလိမ်မှုနှင့် ဆက်စပ်သည့် ထိုင်းနိုင်ငံသား ၈၃ ဦးကို ဖမ်းဆီး သတင်းနှင့် မီဒီယာ ကွန်ရက်။၂၀…

  • November 6, 2026
ကောလင်း၌ NUG ဆေးရုံ ဗုံးကြဲခံရ၍ CDM ဆရာဝန်ကြီး အပါအဝင် ၅ ဦး သေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ နိုဝင်ဘာလ ၅ ရက်။ စစ်ကိုင်းတိုင်း၊ ကောလင်းမြို့နယ် အရှေ့ခြမ်း၊ လျှော်ဖြူကုန်းကျေးရွာရှိ ဒေသခံပြည်သူများ အဓိက အားကိုး အားထားပြုနေရသည့် ဆေးရုံကို စစ်အုပ်စုတပ်က လေကြောင်းမှ ဗုံးကြဲတိုက်ခိုက်ခဲ့သဖြင့် CDM ဆရာဝန်ကြီး တစ်ဦး အပါအဝင် ကျန်းမာရေးဝန်ထမ်း ၅ ဦးသေဆုံးပြီး လူနာများလည်း ထိမှန်ဒဏ်ရာ ရရှိခဲ့သည်။ အမျိုးသားညီညွတ်ရေးအစိုးရ (NUG) ၏ ဆေးရုံကို စစ်အုပ်စုတပ်က တိုက်ပွဲဖြစ်ပွားခြင်း မရှိဘဲ တိုက်လေယာဉ် ဖြင့် ရည်ရွယ်ချက်ရှိရှိ ဗုံးကြဲတိုက်ခိုက်ခဲ့သဖြင့် CDM ဆရာဝန်ကြီး ဒေါက်တာဇာနည်ထွန်း အပါအဝင် ကျန်းမာ ရေးဝန်ထမ်း ၅ ဦး သေဆုံးကာ လူနာအများအပြား ထိခိုက်ဒဏ်ရာ ရရှိခဲ့ကြောင်း ဒေသခံများနှင့် Kawlin Revolution (KR) က ထုတ်ပြန်ထားသည်။ မြေပြင်စစ်ရေးသတင်းရင်းမြစ်တစ်ဦးက “လျှော်ဖြူကုန်းရွာမှာ ပြည်သူတွေကို ဆေးကုသပေးနေတဲ့ ဆေးရုံကို အာဏာသိမ်း စစ်အုပ်စုတပ်က မြေပြင် တိုက်ပွဲ ဖြစ်ပွားတာမျိုး မရှိဘဲ ည ၇ နာရီဝန်းကျင်မှာ လေကြောင်း ကနေ ဗုံးကြဲတိုက်ခိုက်ခဲ့တာ ဖြစ်ပါတယ်။ ဒီလို လေကြောင်း တိုက်ခိုက်မှုကြောင့် ဒေါက်တာ ဇာနည်ထွန်း (ခ) ပွကြီး အပါအဝင် ကျန်းမာရေးဝန်ထမ်းတွေ အခင်းဖြစ်ပွားရာ နေရာမှာပဲ သေဆုံးခဲ့ရသလို၊ ဆေးရုံမှာ ဆေးကု သမှု ခံယူနေကြတဲ့ အရပ်သား ပြည်သူ ၅ ဦးထက်မနည်းလည်း ဒဏ်ရာရတာရှိတယ်” ဟု ပြောသည်။ ပြီးခဲ့သည့် နိုဝင်ဘာလ ၄ ရက်၊ ည ၇ နာရီဝန်းကျင်တွင် ကောလင်းမြို့နယ်၊ ပေပင်ချောင်နှင့် လျှော်ဖြူကုန်း ကျေးရွာကြား၊ ရွှေဘို-မြစ်ကြီးနား ဗျူဟာလမ်းမကြီးအနီးရှိ အဆိုပါ ဆေးရုံကို စစ်အုပ်စုတပ်က တိုက်လေယာဉ် ဖြင့် တိုက်ရိုက် ဗုံးကြဲခဲ့ခြင်းဖြစ်သည်။ ထိုသို့ ဗုံးကြဲတိုက်ခိုက်ခဲ့မှုကြောင့် ဆရာဝန်ကြီး ဒေါက်တာဇာနည်ထွန်းနှင့် အကူသူနာပြု ၄ ဦး၊ စုစုပေါင်း ၅ ဦး ပွဲချင်းပြီး သေဆုံးခဲ့ရသည့်အပြင် ဆေးရုံ၌ ဆေးဝါးကုသမှု ခံယူနေသည့် အရပ်သားလူနာ အများအပြားလည်း ထိခိုက်ဒဏ်ရာ ရရှိခဲ့ကြသည်။ အရပ်သား ဆေးရုံကို ပစ်မှတ်ထား ဗုံးကြဲခဲ့သည့် ဖြစ်စဉ်နှင့် ပတ်သက်၍ ကောလင်းနယ်ခံတစ်ဦးက “ဒီနေရာက စစ်ရှောင်ပြည်သူတွေနဲ့ ဒေသခံတွေ ကျန်းမာရေး စောင့်ရှောက်မှု ခံယူနေတဲ့ သာမန် ဆေးရုံ သက်သက်ပါပဲ။ စစ်စခန်းတို့ ဘာတို့ဆိုတာ လုံးဝ မဟုတ်ပါဘူးဗျာ။ ဒီစစ်ခွေးတွေက တမင်ကို ပစ်တာ။ အရပ်သားဆေးရုံကို ရည်ရွယ်ချက်ရှိရှိ ဗုံးကြဲ တိုက်ခိုက်တာ။ ပြီးရင် သိတဲ့အတိုင်း အပြစ်လွတ်အောင် PDF တွေရှိလို့ ဗုံးကြဲတာ တိုက်တာ၊ PDF စခန်းကို တိုက်လိုက်တာ ဆိုပြီးလျှောက်ပြီး ဝါဒဖြန့်တာ။ ဒါက သူတို့ အမြဲလုပ်နေကျပဲ” ဟု ပြောသည်။ လက်ရှိတွင် စစ်အုပ်စုတပ်သည် ထီးချိုင့်ဘက်မှတစ်ဆင့် ကောလင်းနယ်အတွင်းသို့ စစ်ကြောင်းထိုး ဝင်ရောက် ရန် ကြိုးပမ်းလျက်ရှိပြီး ကောလင်း၊ ဝန်းသို၊ အင်းတော်၊ မော်လူး၊ ထီးချိုင့်နှင့် ပင်လည်ဘူးမြို့နယ်များအတွင်း နေ့စဉ် လေကြောင်းတိုက်ခိုက်မှုများ ပြုလုပ်နေသဖြင့် ပြည်သူ့ကာကွယ်ရေးတပ်ဖွဲ့များက ဒေသခံပြည်သူများ အနေဖြင့် လေကြောင်းအန္တရာယ်ကို သတိပြုကြရန် နှိုးဆော်ထားသည်။ စစ်အုပ်စုတပ်သည် နိုင်ငံတစ်ဝန်းရှိ ဆေးရုံဆေးခန်းများနှင့် စာသင်ကျောင်းများကို ပစ်မှတ်ထား ဗုံးကြဲလျက်ရှိ ရာ၊ NUG လူ့အခွင့်အရေးဆိုင်ရာ ဝန်ကြီးဌာန (MOHR) ၏ ထုတ်ပြန်ချက်အရ စစ်အာဏာသိမ်းသည့် ၂၀၂၁ ခုနှစ်၊ ဖေဖော်ဝါရီလမှ ၂၀၂၆ ခုနှစ်၊ ဇွန်လအထိ ၅ နှစ်ကျော်ကာလအတွင်း အရပ်သားပြည်သူ နေထိုင်ရာ နေရာများကို လေကြောင်းမှ ဗုံးကြဲမှု ၁၂,၈၉၆ ကြိမ် ကျူးလွန်ခဲ့ပြီး အရပ်သား ၅,၈၄၆ ဦး သေဆုံးခဲ့ကာ ဆေးရုံ၊ ဆေးခန်းနှင့် စာသင်ကျောင်း အများအပြား ပျက်စီးခဲ့ကြောင်း သိရသည်။ ဓါတ်ပုံ - (စစ်အုပ်စုတပ်၏ လေကြောင်းမှ ဗုံးကြဲတိုက်ခိုက်မှုကြောင့် ပျက်စီးသွားသည့် ကောလင်းမြို့နယ်၊ လျှော်ဖြူကုန်းကျေးရွာရှိ မြင်ကွင်း - ပုံဟောင်း / Kawlin Info) #ကောလင်း #CDM

ကောလင်း၌ NUG ဆေးရုံ ဗုံးကြဲခံရ၍ CDM ဆရာဝန်ကြီး အပါအဝင် ၅ ဦး သေဆုံး

ကောလင်း၌ NUG ဆေးရုံ ဗုံးကြဲခံရ၍ CDM ဆရာဝန်ကြီး အပါအဝင် ၅ ဦး သေဆုံး သတင်းနှင့် မီဒီယာ ကွန်ရက်။၂၀၂၆ ခုနှစ်၊ နိုဝင်ဘာလ ၅ ရက်။ စစ်ကိုင်းတိုင်း၊ ကောလ…

  • November 5, 2026
ငပြီကျွန်းကို နှစ်ဖက်စလုံး မထိန်းချုပ်နိုင်သေး သတင်းနှင့် မီဒီယာကွန်ရက်။ ၂၀၂၆ ခုနှစ်၊ နိုဝင်ဘာလ ၅ ရက်။ ရခိုင်ပြည်၊ ပေါက်တောမြို့နယ်ရှိ ငပြီကျွန်းတွင် တိုက်ပွဲများ ဆက်လက် ပြင်းထန်နေပြီး စစ်အုပ်စုတပ်နှင့် အာရက္ခတပ်တော် (AA) တို့အကြား မည်သူမျှ ကျွန်းကို အပြည့်အဝ မထိန်းချုပ်နိုင်သေးကြောင်း ဒေသတွင်း စစ်ရေးသတင်း အရင်းအမြစ်များက ပြောသည်။ ငပြီကျွန်း၌ နိုဝင်ဘာလ ၂ ရက်၊ ၃ ရက်နှင့် ၄ ရက်နေ့အထိ တိုက်ပွဲများ ဆက်လက် ပြင်းထန်လျက်ရှိကာ နှစ်ဘက် အကျအဆုံးများပြားလျက်ရှိပြီး၊ စစ်အုပ်စုတပ်သည် ကမ်းတက်စစ်ကြောင်း နှစ်ကြောင်းဖြင့် လေကြောင်းကိုပါ အသုံးပြု၍ တိုက်ခိုက်လျက် ရှိသည်။ အဆိုပါ ကမ်းတက်စစ်ကူ စစ်ကြောင်း ၂ ကြောင်းတွင် ခမရ - ၄၄ နှင့် စစ်တွေမြို့သို့ ရောက်ရှိနေသည့် ရခိုင်ပြည် တစ်ဝန်း အာရက္ခတပ်တော် ထိန်းချုပ်နယ်မြေများမှ ဆုတ်ခွာအင်အားများ ပါဝင်နေပြီး ကျွန်းပေါ်တွင် လက်နက် ကြီး၊ လက်နက်ငယ်များဖြင့် အပြန်အလှန် ပစ်ခတ်တိုက်ခိုက်မှုများ ပြင်းထန်နေခြင်း ဖြစ်သည်။ ဒေသခံ စစ်ရေးသတင်း အရင်းအမြစ်က “ငပြီကျွန်းမှာက တိုက်ပွဲငြိမ်နေရာနေ စဖြစ်တာသုံးရက်ရှိပြီ။ အေအေ က အကျအဆုံးရှိသလို စစ်တပ်ကလည်း ကျတယ်။ အခုအထိ ဘယ်ဘက်က အင်အားသာနေတယ်လို့ မပြော နိုင်သလို ဘယ်ဘက်ကမှလည်း ကျွန်းကို မထိန်းချုပ်နိုင်သေးဘူး။ စစ်တပ်နေဗီတွေဟာ ရိက္ခာတွေ အင်အားတွေ နဲ့ ကျွန်းနားကို နေစဉ်ချင်းကပ်နေတယ်။ အေအေကလည်း ချောင်းလက်တက်တွေက အင်အားတွေ ဖြည့်တဲ့ အပြင် ကျွန်းပေါ်မှာ ငြိမ်ပြီးကင်းပုံးဝပ်နေတဲ့ တပ်စိပ်တွေက စစ်တပ်ကို တော်တော်အခက်တွေ့စေတယ်လို့ စစ်တွေ စစ်တပ်အသိုင်းအဝိုင်းက ပြောနေတာ ရှိနေတယ်” ဟု ပြောသည်။ စစ်အုပ်စုသည် ပြီးခဲ့သည့် အောက်တိုဘာလ ၇ ရက်နေ့ကစတင်ကာ အဆိုပါ ငပြီကျွန်းကို အင်အား အလုံး အရင်းဖြင့် ထိုးစစ်ဆင်ခဲ့ခြင်းဖြစ်ပြီး ကျွန်းပေါ်သို့ အင်အား ၂ ရာခန့် တက်ရောက်နိုင်ခဲ့သော်လည်း အကျအဆုံး များပြားသည့်အတွက် အင်အား ဆက်လက် ဖြည့်တင်းနေရသကဲ့သို့ အာရက္ခတပ်တော် (AA) ဘက်ကလည်း ဒဏ်ရာရ တပ်ဖွဲ့ဝင်များကို ပေါက်တောမြို့သို့ ပို့ဆောင် ကုသလျက်ရှိသည်။ ငပြီကျွန်းရှိ စစ်အုပ်စုတပ်သည် အောက်တိုဘာလ နောက်ဆုံးအပတ်တွင် ကျွန်းပေါ်မှ ဒဏ်ရာရ တပ်ဖွဲ့ဝင်များကို ပြန်လည် ဆွဲထုတ်သွားနိုင်ခဲ့ပြီး စစ်ကူများပါ ကမ်းတက်နိုင်ခဲ့ကာ ရေလမ်းကြောင်းမှတစ်ဆင့် အဆက်မပြတ် ထိုးစစ်ဆင်လျက် ရှိသည်။ စစ်တွေအစပ်ရှိ စစ်ရေးသတင်း အရင်းအမြစ်တစ်ဦးကလည်း ”ငပြီကျွန်းတိုက်ပွဲက စစ်တွေကို ရိုက်ခတ် ပါတယ်။ အခုစစ်တွေ မှာ ပေါ်တာဆွဲဖို့ရှာတာအပြင် ပြည်နယ်အရံက ရဲတွေကိုပါ ကျွန်းပေါ်တက်ခိုင်းထားတာ လို့ သိရတယ်။ ရခိုင်လူမျိုး စစ်သားရဲတွေ ငပြီကျွန်းမှာ အများကြီးကျတယ်။ စစ်တွေက နှစ်ဖက်ညှပ် တိုက်ခံ နေရတာလေ။ ရွှေမင်းဂံရေတပ်စခန်းနဲ့ အမှတ် (၃) ဗျူဟာ ရေတပ်ဌာနချုပ်တွေက ရိက္ခာတွေ အင်အားတွေ စစ်သင်္ဘောတွေ၊ စက်လှေတွေနဲ့ ငပြီကျွန်းဘက် အခုရက်ပိုင်းသွားနေတာ ကမ်းကပ်လို့ တချို့က ရသွားတယ်။ တချို့ကမရသေးဘူး” ဟု ရှင်းပြသည်။ ပြီးခဲ့သည့် အောက်တိုဘာလ ၂၆ ရက်နေ့ကလည်း စစ်အုပ်စုတပ်၏ ရေတပ်နေဗီ စစ်သင်္ဘော ၃ စီးကို အာရက္ခ တပ်တော် (AA) က တိုက်ခိုက်ခဲ့ရာ ၂ စီး ထိမှန်ပျက်စီးခဲ့သဖြင့် လက်ရှိတွင် လေကြောင်းတိုက်ခိုက်မှုများကို ပိုမို အားပြုလာနေဟု ဆိုကြသည်။ ကျွန်းပေါ်တွင် အာရက္ခတပ်တော်က စစ်အုပ်စု၏ ထိုးစစ်ကို တုံ့ပြန်တိုက်ခိုက်ခဲ့ရာ၌ တပ်ဖွဲ့ဝင်အချို့ကို ဖမ်းဆီး ရမိခဲ့သည့်အပြင် လက်နက်ခဲယမ်းများကိုလည်း သိမ်းဆည်းရမိခဲ့ပြီး စစ်အုပ်စုတပ်ကို ကျွန်းပေါ်ရှိ နေရာအချို့ တွင် ဆက်လက် ပိတ်ဆို့ထားသည်။ လက်ရှိတွင် ပုဏ္ဏားကျွန်းမြို့နယ်အတွင်း ကုလားတန်မြစ် အနောက်ဘက်ရှိ ရဲရုပ်ပြင်၊ အောင်မြေကုန်းနှင့် ခမောင်းတောကျေးရွာများကို အာရက္ခတပ်တော်က ထိုးစစ်ဆင်ထားသလို၊ စစ်တွေမြို့အနီး ကျားမသောက်၊ ဂန့်ဂေါ်ကျွန်းနှင့် တောကန်ကျေးရွာများဘက် အထိပါ စစ်ရေးလှုပ်ရှားမှုများ ရှိနေကြောင်း ဆိုသည်။ (Photo: Credit to the original uploader / Video Screenshot) #ငပြီကျွန်း

ငပြီကျွန်းကို နှစ်ဖက်စလုံး မထိန်းချုပ်နိုင်သေး

ငပြီကျွန်းကို နှစ်ဖက်စလုံး မထိန်းချုပ်နိုင်သေး သတင်းနှင့် မီဒီယာကွန်ရက်။၂၀၂၆ ခုနှစ်၊ နိုဝင်ဘာလ ၅ ရက်။ ရခိုင်ပြည်၊ ပေါက်တောမြို့နယ်ရှိ ငပြီကျွန်း…

  • November 5, 2026
သာယာဝတီထောင်၌ သက်ကြီး နိုင်ကျဉ်းများကိုပါ အဓမ္မခိုင်းစေပြီး ငွေကြေးတောင်းခံနေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ နိုဝင်ဘာလ ၄ ရက်။ ပဲခူးတိုင်း၊ သာယာဝတီအကျဉ်းထောင်တွင် စစ်အုပ်စု၏ ထောင်အာဏာပိုင်များက နိုင်ငံရေးအကျဉ်းသားများ အပေါ် အဓမ္မအလုပ်ခိုင်းစေခြင်းနှင့် ငွေကြေးအဓမ္မတောင်းခံမှုများကို ပိုမိုပြုလုပ်လာနေကြောင်း မြန်မာနိုင်ငံလုံး ဆိုင်ရာ နိုင်ငံရေးအကျဉ်းသားများကွန်ရက် (PPNM) တာဝန်ရှိသူက ပြောသည်။ သာယာဝတီအကျဉ်းထောင်၌ ဒုထောင်ပိုင် အပါအဝင် ထောင်အာဏာပိုင်များက အသက် ၆၀ အထက် သက်ကြီး ရွယ်အိုများနှင့် နာမကျန်းဖြစ်နေသူ နိုင်ငံရေးအကျဉ်းသားများကိုပါ အဓမ္မအလုပ်ခိုင်းစေနေပြီး၊ အလုပ်မလုပ်နိုင် ပါက တစ်ဦးလျှင် ငွေကျပ် ၁ သိန်းစီ ပေးဆောင်ရမည်ဟုဆိုကာ ငွေကြေးအဓမ္မ တောင်းခံလျက်ရှိသည်ဟု PPNM က ဆိုသည်။ PPNM ၏ ဦးဆောင်ကော်မတီဝင်ဖြစ်သူ မရောင်နီလင်းက “တခြားထောင်တွေမှာဆိုရင် ပုံမှန်အားဖြင့် ငွေကြေး ကောက်ခံတယ်၊ အလုပ်လုပ်ခိုင်းတယ်ဆိုတာတွေက လူငယ်တွေလောက်ပဲ များတယ်ပေါ့နော်။ အသက်ကြီးပိုင်း တွေ ဆိုလို့ရှိရင် တချို့ထောင်တွေက အဲ့လို ငွေကြေး မကောက်ခံတာမျိုးပေါ့နော်။ အလုပ်မခိုင်းတာမျိုးတွေ ရှိတယ်။ ဒါပေမဲ့ ဒီထောင်မှာက အသက်ကြီးတဲ့ သူတွေကိုပါ အလုပ်လုပ်ခိုင်းတယ်၊ ပြီးတော့ အလုပ် မလုပ်နိုင် ရင် ငွေတောင်းခံတယ် ပေါ့နော်” ဟု ပြောသည်။ ငွေကြေး မပေးဆောင်နိုင်သူများကို နံနက်ထောင်တံခါးဖွင့်ချိန်မှ ညနေ တံခါးပိတ်ချိန်အထိ နေပူထဲ၌ စိုက်ပျိုးရေး နှင့် ရေလောင်း၊ ပေါင်းသင်ခြင်းစသည့် အလုပ်ကြမ်းများကို ပိုမိုခိုင်းစေပြီး၊ အမျိုးသားအဆောင်များတွင် အခန်း ပြောင်း၊ အဆောင်ပြောင်းရွှေ့၍ ဖိနှိပ်မှုများ ပြုလုပ်လျက်ရှိသည်။ အဆိုပါ အကျဉ်းထောင်အတွင်း အောက်တိုဘာလတစ်လတည်း၌ပင် သီတင်းကျွတ်အကြောင်းပြချက် အပါ အဝင် ငွေကြေးအဓမ္မ ကောက်ခံမှု ၈ ကြိမ်အထိ ရှိခဲ့ပြီး နိုင်ငံရေးအကျဉ်းသားများအပြင် အခြားအကျဉ်းသား များထံမှပါ ငွေကြေးကောက်ခံကာ မတရားသဖြင့် ခေါင်းပုံဖြတ် အမြတ်ထုတ်နေကြသည်။ မရောင်နီလင်းက ဆက်လက်၍ “အဓိကကတော့ အောက်တိုဘာလ တစ်လတည်းမှာပဲ ငွေကြေးကောက်ခံမှုတွေ ၈ ခါ တောင် မှ ရှိခဲ့တယ်ပေါ့လေ။ သီတင်းကျွတ်ဆိုလို့ရှိရင်လည်း သီတင်းကျွတ်မို့လို့ ပိုက်ဆံကောက်တာမျိုး ပေါ့နော် ဒါမျိုးတွေ ရှိနေတယ်။ အထဲက နိုင်ငံရေးအကျဉ်းသား အကျဉ်းသူတွေ အပါအဝင် အခြား အကျဉ်း သားတွေကိုလည်း ကောက်တာကို တွေ့ရတယ်။ ဒီလိုမျိုး ငွေကြေးကောက်ခံမှုတွေက ဒီ အထဲမှာကျနေတဲ့ အကျဉ်းသားတွေ ဆီကနေမှ မတရားသဖြင့်ပေါ့နော် အမြတ် ထုတ်နေတယ်၊ ခေါင်းပုံဖြတ်နေတယ်လို့ ကျနော် တို့အနေနဲ့ သုံးသပ်မိပါတယ်” ဟု ရှင်းပြသည်။ ထို့ပြင် အကျဉ်းထောင်အတွင်း ပေးဝေသည့် သောက်ရေမှာ မသန့်ရှင်းသဖြင့် အကျဉ်းသားများက ဈေးဘားမှ တစ်ဆင့် ကိုယ်ပိုင်ငွေဖြင့် ဝယ်ယူနေကြရသည့်အပြင်၊ ရောဂါဝေဒနာ ခံစားရပါကလည်း ဗီတာမင် B1 နှင့် Cevit ဆေးပြားများကိုသာ ထုတ်ပေးလျက်ရှိသည်။ အစားအသောက်များမှာလည်း အာဟာရဓာတ် မလုံလောက်သဖြင့် အောက်ပိုင်းချည့်နဲ့သည့် ရောဂါခံစားနေရ သော်လည်း ဆေးဘက်ဆိုင်ရာ မှတ်ချက်များတွင် ထောင်အာဏာပိုင်များက အမှန်အတိုင်း မရေးဘဲ လိမ်လည် ရေးသားနေကြသည်။ ထောင်အာဏာပိုင်တို့၏ ဖိနှိပ်မှုများနှင့် ပတ်သက်၍ PPNM မှ မရောင်နီလင်းက “ပြင်ပအဖွဲ့အစည်းတွေနဲ့ နိုင်ငံတကာတွေကိုတော့ ကျွန်တော်တို့ ဒီအကျဉ်းထောင်မှာ ဖိနှိပ် ခံရတာတွေက ဒီသာယာဝတီထောင်မှာတင် မဟုတ်ဘူးပေါ့နော်။ အခြားအကျဉ်းထောင်တွေမှာလည်း ဒီလိုမျိုး ဖိနှိပ် ခံရတာမျိုးတွေက ရှိနေပါတယ်။ ဒါက သတင်းထုတ်ပြန်နေရုံနဲ့တင် မလုံလောက်တော့ဘူး။ ထိရောက်တဲ့ အရေးယူမှုတွေ ပြုလုပ်ဖို့ လိုအပ်ပါတယ်လို့ ပြောချင်ပါတယ်ရှင်” ဟု ထောက်ပြတောင်းဆိုထားသည်။ အကျဉ်းထောင်များအတွင်း နိုင်ငံရေးအကျဉ်းသားများနှင့် အကျဉ်းသားများအပေါ် ယခုကဲ့သို့ ဖိနှိပ်ငွေကြေး တောင်းခံမှုများ မရှိစေရေးအတွက် ဆက်လက်စောင့်ကြည့်သွားမည်ဟု PPNM က နိုဝင်ဘာလ ၃ ရက်နေ့တွင် ထုတ်ပြန်ထားသည်။ ဓါတ်ပုံ - (သာယာဝတီအကျဉ်းထောင် အပြင်ဘက်မြင်ကွင်းကို တွေ့ရစဉ် - ပုံဟောင်း။ / AAPP) #သာယာဝတီထောင်

သာယာဝတီထောင်၌ သက်ကြီး နိုင်ကျဉ်းများကိုပါ အဓမ္မခိုင်းစေပြီး ငွေကြေးတောင်းခံနေ

သာယာဝတီထောင်၌ သက်ကြီး နိုင်ကျဉ်းများကိုပါ အဓမ္မခိုင်းစေပြီး ငွေကြေးတောင်းခံနေ သတင်းနှင့် မီဒီယာ ကွန်ရက်။၂၀၂၆ ခုနှစ်၊ နိုဝင်ဘာလ ၄ ရက်။ ပဲခူးတိုင်…

  • November 4, 2026
မကွေးတိုင်း မင်းတုန်းမြို့နယ်တွင် စစ်အုပ်စုတပ် ပိတ်ဆို့ခံရပြီး တိုက်ပွဲပြင်းထန် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ နိုဝင်ဘာလ ၄ ရက်။ မကွေးတိုင်း၊ မင်းတုန်းမြို့နယ် အနောက်ခြမ်းမှတစ်ဆင့် ရခိုင်ပြည်နယ်၊ မအီမြို့သို့ စစ်အုပ်စုတပ်က ဝင်ရောက် ရန် ကြိုးပမ်းခဲ့သဖြင့် တလိုင်းတောင် ကျော်လမ်း၌ အာရက္ခတပ်တော် (AA) နှင့် ပူးပေါင်းတပ်ဖွဲ့တို့အကြား တိုက်ပွဲများ ပြင်းထန်လျက်ရှိကြောင်း ဒေသတွင်း စစ်ရေးသတင်း အရင်းအမြစ်များက ပြောသည်။ အဆိုပါ စစ်အုပ်စု စစ်ကြောင်းနှစ်ကြောင်းသည် အောက်တိုဘာလ ၃၁ ရက်မှ နိုဝင်ဘာလ ၂ ရက်နေ့အထိ သဖန်ရောင်နှင့် တလိုင်းတောင် ရိုးတောင်ကျော်လမ်းအတိုင်း ရခိုင်ပြည်နယ် မအီမြို့ဘက်သို့ စစ်ကြောင်းထိုး လာပြီး ယာယီစခန်းများ ချထားရာ AA နှင့် မဟာမိတ်တပ်ဖွဲ့များက ဝင်ရောက်တိုက်ခိုက်ခဲ့ခြင်း ဖြစ်သည်။ ဒေသခံ စစ်ရေးသတင်းအရင်းအမြစ် အမျိုးသားတစ်ဦးက “တိုက်ပွဲတွေက ငကုန်းနဲ့ ကံကြိုးအနီးမှာဖြစ်တာ အေအေနဲ့တပ်ပေါင်းစုက တလိုင်းတောင်ကျော်လမ်းမှာ နည်းနည်းလွတ်ထားပြီး အတွင်းဝင်လာမှာတိုက်တော့ စစ်တပ်ကျတယ်၊ သဖန်ရောင်နဲ့ တလိုင်းတောင်ကျော်လမ်းတွေအတိုင် ရခိုင်မအီဘက်ကို တက်လာတာ လမ်းပြ တွေ ဒေသခံပေါ်တာသမားတွေပါတယ်၊ တချို့တပ်စိပ်တွေ ပြန်လှည့်ပေမယ့် တချို့က အေအေပိုင်နက်ထဲ ရောက်သွားပြီး ပိတ်ဆို့ခံလိုက်ရပြီ” ဟု ပြောသည်။ ကံကြိုးရွာနှင့် ငကုန်းရွာကြားတွင် တိုက်ပွဲများ ပြင်းထန်ခဲ့ပြီး နောက်ဆုတ်သွားသည့် စစ်အုပ်စု စစ်ကြောင်းကို AA နှင့် ပူးပေါင်းတပ်များက ပိတ်ဆို့တိုက်ခိုက်ခဲ့သည်။ အဆိုပါ တိုက်ပွဲအတွင်း စစ်အုပ်စုတပ်စိတ်အချို့ ပြန်လည်ဆုတ်ခွာနိုင်ခဲ့သော်လည်း ရခိုင်ရိုးမ AA ထိန်းချုပ်နယ် မြေအတွင်းသို့ ရောက်ရှိသွားသည့် အင်အား ၅၀ ခန့်ရှိ စစ်အုပ်စုတပ်မှာ ပိတ်ဆို့ခံထားရပြီး အဆက်အသွယ် ပြတ်တောက်လျက်ရှိသည်။ မင်းတုန်းဒေသက အခြား စစ်ရေးသတင်းအရင်းအမြစ် တစ်ဦးကလည်း “မင်းတုန်းမှာ တစ်မြို့လုံး စစ်သားတွေ ရောက်နေတာလေ။ ထွက်ပြေတာ ဒဏ်ရာရတာတွေရှိသလို အခု ရခိုင်ရိုးပေါ်ကို လစ်ရင်လစ်သလို စစ်ကြောင်း ထိုးတာ အေအေနဲ့ ပူးပေါင်းတပ်ကလည်း အပေါ်က နေရာယူထားတယ်။ လေကြောင်းကလည်း ပြစ်ကူပေး နေ တယ်။ အဲ့ဘက်အစပ်တွေကို ဒေသခံတွေမသွားနိုင်တာကြာပြီး စစ်တပ်ကရိုးခြေရင်နဲ့ ၂ မိုင်အကွာကတည်းက ပိတ်ထားတယ်” ဟု ပြောသည်။ လက်ရှိတွင် သဖန်ရောင်နှင့် တလိုင်းတောင် လမ်းပိုင်းတို့၌ နှစ်ဖက်တိုက်ပွဲများ ပြင်းထန်နေဆဲဖြစ်ပြီး စစ်အုပ်စု ဘက်မှ လေကြောင်းပစ်ကူအချို့ အသုံးပြုနေရကာ အာရက္ခတပ်တော် AA ဘက်ကလည်း လက်နက်အများအပြား သိမ်းဆည်းရမိခဲ့ သည်။ စစ်အုပ်စုသည် တလိုင်းတောင်-သဖန်ရောင် ကျော်လမ်းအတိုင်း စစ်ကြောင်းထိုးနေသည်မှာ ၁ နှစ်ခန့် ရှိလာပြီ ဖြစ်သော်လည်း ရခိုင်ရိုးမပေါ်သို့ တက်ရောက်နိုင်ခြင်း မရှိသေးပေ။ မင်းတုန်းမြို့နယ် အနောက်ဘက်ခြမ်းတွင် စစ်အုပ်စုသည် အင်အား ၁,၀၀၀ ကျော်ခန့်ဖြင့် ထိုးစစ်ဆင်နေပြီး AA ထိန်းချုပ်ထားသည့် နတ်ရေကန် လေကြောင်းရန်ကာကွယ်ရေးစခန်း၊ အမ်းမြို့နှင့် မအီမြို့တို့ကို ပြန်လည်ထိန်း ချုပ်ရန်အတွက် အမ်း-ပဒန်း လမ်းအတိုင်း စစ်ကြောင်းထိုးလျက်ရှိသည်။ (Photo - Credit to original uploader) #မင်းတုန်းမြို့နယ်

မကွေးတိုင်း မင်းတုန်းမြို့နယ်တွင် စစ်အုပ်စုတပ် ပိတ်ဆို့ခံရပြီး တိုက်ပွဲပြင်းထန်

မကွေးတိုင်း မင်းတုန်းမြို့နယ်တွင် စစ်အုပ်စုတပ် ပိတ်ဆို့ခံရပြီး တိုက်ပွဲပြင်းထန် သတင်းနှင့် မီဒီယာ ကွန်ရက်။၂၀၂၆ ခုနှစ်၊ နိုဝင်ဘာလ ၄ ရက်။ မကွေးတို…

  • November 4, 2026
×Close