သတင်း

ချင်းတော်လှန်ရေး အစိုးရက အခြေခံကျောင်း ၃၇၀ ကျော်နှင့် တက္ကသိုလ်၊ ဆေးကျောင်းများပါ တိုးချဲ့ဖွင့်လှစ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၁ ရက်။ ချင်းလဲန်းကောင်စီ/ ချင်းပြည်အစိုးရသည် စစ်ရေးပဋိပက္ခများ ကြားထဲမှပင် ဒေသတွင်း ပညာရေးနှင့် ကျန်းမာရေးကဏ္ဍများကို အရှိန်အဟုန်မြှင့် တိုးချဲ့ဆောင်ရွက်လျက်ရှိသည်။ အခြေခံပညာကျောင်းများနှင့် တက္ကသိုလ်များကို ကိုယ်တိုင်ဖွင့်လှစ်ထားရုံမက အိမ်နီးချင်းနိုင်ငံများတွင် အဆင့် မြင့်ပညာ ဆက်လက်သင်ကြားနိုင်ရန်ပါ သက်ဆိုင်ရာ အာဏာပိုင်များ၊ တက္ကသိုလ်များနှင့် ညှိနှိုင်းနေ ကြောင်း ချင်းပြည်အစိုးရ၏ ၂ နှစ်ခွဲကာလ အုပ်ချုပ်ရေးဖော်ဆောင်မှု အစီရင်ခံစာတွင် ဖော်ပြထားသည်။ အဆိုပါ လုပ်ငန်းစဉ်များနှင့် ပတ်သက်၍ ကျန်းမာရေးဝန်ကြီး ဒေါက်တာ ရှာရွန်ပါရ် က ယခုကဲ့သို့ ပြောသည်။ ၎င်းက “ကျမတို့ ဒီလို ခက်ခဲနေတဲ့ ကာလအတွင်းမှာပင်လျှင် အခြေခံ ကျောင်းပေါင်း ၃၇၃ ကျောင်း ဖွင့်လှစ်နိုင် ခဲ့တယ်။ အခုလည်း လက်ရှိ ဖွင့်လှစ်နေပါတယ်။ ပြီးတော့ ကျောင်းသား ကျောင်းသူ အနေနဲ့ကတော့ သုံးသောင်းခွဲကျော် ရှိပါတယ်။ ပြီးတော့ ဆရာ/မ တွေ ၃၀၀၀ ကျော်နဲ့ ဒီကျောင်းများကို သင်ကြားရေး လုပ် ငန်းဆောင်ရွက်နေတာ ဖြစ်တယ်။ အခု လက်ရှိမှာ ကျမတို့က chin national university ဆိုပြီးတော့ အဆင့် မြင့် ပညာအတွက်လည်း စပြီးတော့ သင်ကြားရေးတွေ စနေပါပြီ။ ၂၀၂၅ ကနေ စပါတယ်။ အခုဆိုရင် အဓိက မေဂျာ ၄ ခုနဲ့ စပြီးတော့ သင်ကြားနေပြီ ဖြစ်ပါတယ်လို့” ဟု ပြောသည်။ ၂၀၂၄ ခုနှစ်မှ စတင်၍ ချင်းပြည်အနှံ့ ကျေးရွာပေါင်း ၆၆၁ ရွာတွင် အခြေခံပညာကျောင်းပေါင်း ၃၇၃ ကျောင်း၌ ကျောင်းသား၊ ကျောင်းသူ ၃၅,၀၀၀ ကျော်ကို ဆရာ/ဆရာမ ၃,၀၀၀ ကျော်ဖြင့် ပုံမှန်ဖွင့်လှစ် သင်ကြားပေးနေ ခြင်း ဖြစ်သည်ဟု ဆိုသည်။ ထို့ပြင် မြို့နယ်နှင့် ဒေသ ၅ ခုတွင် တက္ကသိုလ်အကြိုသင်တန်းကျောင်းများအပြင် ချင်းအမျိုးသားတက္ကသိုလ် (CNU) ၌လည်း ပညာရေး၊ ဥပဒေ၊ နည်းပညာနှင့် အသက်မွေးဝမ်းကျောင်း ဌာန ၃ ခုဖွင့်လှစ်၍ ကျောင်းသား ၄၀၀ ကျော်ကို သင်ကြားပေးလျက်ရှိသည်။ တစ်ဖက်တွင်လည်း ကျန်းမာရေးဝန်ထမ်းများနှင့် လူငယ်များ အဆင့်မြင့်ပညာရေး သင်ယူနိုင်ရန် အမျိုးသား ညီညွတ်ရေးအစိုးရ (NUG) နှင့် ပူးပေါင်းကာ ဆေးကျောင်းနှင့် သူနာပြုကျောင်းများကိုပါ ဖွင့်လှစ်ထားရှိသည်။ ဒေါက်တာ ရှာရွန်ပါရ် က “ဒီ NUG နဲ့ ပေါင်းပြီး ကျမတို့ medical school nursing school တွေ ကျမတို့ ဆောင်ရွက်နေတာ ဖြစ်ပါတယ်။ ကျမတို့ ကျန်းမာရေးစနစ်တည်ထောင်ဖို့ဆိုရင် အဓိက အရေးကြီးဆုံးက လူ တွေပဲ ဖြစ်တယ်။ အဲဒါကြောင့် ကျမတို့က ကျန်းမာရေး လူ့စွမ်းအားအရင်းအမြစ်ကိုလည်း အဓိကထားပြီး တော့ မွေးထုတ်တယ်။ သူတို့ရဲ့ အရည်အချင်းတွေ တိုးတက်အောင် ကျမတို့ ဆောင်ရွက်နေတာ ဖြစ်ပါတယ်။ အခုဆိုရင် ကျမတို့ nursing and midwifery school ၂၀၂၄ ကနေစထည့်တာ second Batch ဖြစ်သွားပါပြီ အခုဆိုရင် ၁၁၂ ယောက်ပေါ့နော်။ သင်ကြားနေပါတယ်။ ပြီးတော့ medical school ကို ကျမတို့ မနှစ်ကတည်း က စပြီးတော့ ပြင်ဆင်နေတာ ဒီနှစ်မှာ ကျမတို့စပြီးတော့ First Batch ဖွင့်နိုင်ပါပြီ။ ၃၇ ယောက် စာသင်ကြား နေပါတယ် ဆိုတာလေးကို တင်ပြချင်ပါတယ်” ဟု ဆက် ပြောသည်။ ချင်းပြည်အစိုးရ ပညာရေးဝန်ကြီးဌာနအနေဖြင့် (Chinland) ဖက်ဒရယ် ဒီမိုကရေစီ ပညာရေးမူဝါဒနှင့် ပညာရေး မဟာဗျူဟာ လုပ်ငန်းစဉ် (၂၀၂၅-၂၀၃၀) တို့ကို ရေးဆွဲထားပြီးဖြစ်ကြောင်း ဖော်ပြထားသည်။ ရှေ့ဆက်၍ အဆင့်မြင့်ပညာရေး မူဝါဒ ရေးဆွဲရေး၊ နိုင်ငံတကာ အဖွဲ့အစည်းများနှင့် ချိတ်ဆက်ရေး၊ ဆရာ/မများ အရည်အသွေး မြှင့်တင်ရေးနှင့် ပညာသင်ဆုများ တိုးချဲ့ပေးနိုင်ရေးတို့ကို ဦးစားပေး ဆောင် ရွက်သွားမည်ဖြစ်၍ ပြည်တွင်း/ပြည်ပရှိ ချင်းလူမျိုးများနှင့် နိုင်ငံတကာ အဖွဲ့အစည်းများအနေဖြင့် ဘက်ပေါင်းစုံမှ ပါဝင်ကူညီကြရန် ဖိတ်ခေါ်ထားသည်။ ဓါတ်ပုံ - ပုံဟောင်း #Chinlandcouncil

ချင်းတော်လှန်ရေး အစိုးရက အခြေခံကျောင်း ၃၇၀ ကျော်နှင့် တက္ကသိုလ်၊ ဆေးကျောင်းများပါ တိုးချဲ့ဖွင့်လှစ်

ချင်းတော်လှန်ရေး အစိုးရက အခြေခံကျောင်း ၃၇၀ ကျော်နှင့် တက္ကသိုလ်၊ ဆေးကျောင်းများပါ တိုးချဲ့ဖွင့်လှစ် သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာ…

  • September 21, 2026
ပဲခူး-ရခိုင် အစပ် ရိုးကျော်လမ်း တိုက်ပွဲ၌ တပ်ရင်းမှူး အပါအဝင် စစ်သား အများအပြား သေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၁ ရက်။ ရခိုင်ပြည်၊ တောင်ကုတ်မြို့နယ်နှင့် ပဲခူးတိုင်း၊ ပန်းတောင်းမြို့နယ်တို့ကို ဆက်သွယ်ထားသည့် ရိုးကျော်လမ်း တိုက်ပွဲတွင် စစ်အုပ်စုတပ်ဘက်က တပ်ရင်းမှူးအဆင့်ရှိ ဗိုလ်မှူးတစ်ဦး အပါအဝင် စစ်တပ်ဘက်မှ အရာရှိနှင့် တပ်ဖွဲ့ဝင် အများအပြားသေဆုံးခဲ့သည်။ စက်တင်ဘာလ ပထမအပတ်မှစ၍ ၁၉ ရက်နေ့အထိ စစ်အုပ်စုတပ်နှင့် အာရက္ခတပ်တော် (AA) တို့အကြား ရိုးကျော်လမ်းတွင် တိုက်ပွဲများ အပြင်းအထန် ဖြစ်ပွားခဲ့ပြီး ဗိုလ်မှူးတစ်ဦး အပါအဝင် စစ်အုပ်စုတပ်ဘက်မှ အရာရှိနှင့် တပ်ဖွဲ့ဝင်အများအပြား သေဆုံးခဲ့ကြောင်း ဒေသခံ စစ်ရေးသတင်းအရင်းအမြစ်များက ပြောသည်။ ပန်းတောင်းမြို့နယ်ရှိ အမှတ် (၁၆) ကာကွယ်ရေးပစ္စည်းစက်ရုံ (ကပစ ၁၆) ၏ အဓိက ကာကင်းပွိုင့်တစ်ခု ဖြစ် သည့် ၆၆၆ ကုန်းနှင့် ညောင်ကျိုးစခန်းတို့ကို ပြန်လည်ရရှိရေးအတွက် စစ်အုပ်စုတပ်က စက်တင်ဘာလ ပထမ အပတ်မှစ၍ အင်အား ၂၀၀ ကျော်ဖြင့် စစ်ကြောင်းခွဲကာ ထိုးစစ်ဆင်ခဲ့သော်လည်း AA ရဲ့ တန်ပြန်ထိုးစစ်ကြောင့် အထိနာကာ တပ်ပြန်ဆုတ်ခဲ့ရခြင်း ဖြစ်သည်။ အဆိုပါ တိုက်ပွဲအတွင်း ပန်းတောင်းအခြေစိုက် ခလရ (၉၂) မှ တပ်မတော်ကာကွယ်ရေးဦးစီးချုပ်၏ ဂုဏ်ပြု လက်မှတ် ရရှိထားသူ၊ စစ်တက္ကသိုလ် အပတ်စဉ် (၅၂) ဆင်း ဗိုလ်မှူး ဝေကမ္ဘာစိုး သေဆုံးခဲ့သည့်အပြင် ၆၆၆ ကုန်းအနီးရှိ စစ်အုပ်စု၏ ယာယီထောက်ပို့စခန်းတစ်ခုကိုပါ အာရက္ခတပ်တော် (AA) က ထပ်မံ သိမ်းပိုက်ရရှိခဲ့ သည်။ ပဲခူးဒေသခံ စစ်ရေးသတင်းအရင်းအမြစ် အမျိုးသားတစ်ဦးက “၆၆၆ ကုန်းနဲ့ ညောင်ကျိုးစခန်းကို AA ဆီက ပြန်ယူဖို့ စက်တင်ဘာလ အစကတည်းက စစ်တပ်က အင်အား ၂၀၀ လောက်နဲ့ စစ်ကြောင်းခွဲပြီး ထိုးတာ။ ပထမ တော့ စစ်ကြောင်းအားနဲ့ ထိုးနေတာ အခြေအနေကောင်းတယ်ဆိုပေမဲ့ ရက်တာရှည်လာတော့ AA ရဲ့ တန်ပြန် ထိုးစစ်မှာ ဗိုလ်မှူးဝေကမ္ဘာစိုး ကျသွားတယ်။ ညောင်ကျိုးရွာနား တိုက်ပွဲမှာ ကျသွားတာ။ အဲဒါကြောင့် စစ်တပ် က တပ်ဆုတ်လိုက်ရတော့ ၆၆၆ ကုန်းအနီး စစ်တပ် ထောက်ပို့စခန်းကိုပါ AA က ထပ်ရလိုက်တယ်” ဟု ပြော သည်။ ထို့ပြင် အဆိုပါ တိုက်ပွဲများတွင် စစ်အုပ်စုတပ်က စစ်ရေးအတွေ့အကြုံ မရှိသည့် စစ်မှုထမ်းသင်တန်းဆင်း ပြည်သူ့စစ်သစ်များကို ရှေ့တန်းတင်ကာ တိုက်ခိုင်းခဲ့သည့်အတွက် အာရက္ခတပ်တော်၏ ကြိုတင်ပြင်ဆင်ထား သည့် တန်ပြန်တိုက်ခိုက်မှုများကြောင့် စစ်အုပ်စုတပ်ဘက်မှ အကျအဆုံး ပိုမိုများပြားခဲ့ရခြင်း ဖြစ်သည်။ လက်ရှိတွင် ညောင်ကျိုးဘက်သို့ ထိုးစစ်ဆင်လာသည့် စစ်အုပ်စုတပ်သည် လေလာတောင်နှင့် ညောင်ကျိုး ကျေးရွာအကြားတွင် ကြားဖြတ်တိုက်ခိုက်ခံရပြီး တိုက်ပွဲများ ဆက်လက် ဖြစ်ပွားနေသည့်အတွက် ဆင်လန် ကျေးရွာ အထိုင်စခန်းမှ လက်နက်ကြီးနှင့် ဒရုန်းများဖြင့် ပစ်ကူပေးနေရသည်။ တိုက်ပွဲအတွင်း အထိနာသွားသည့် စစ်အုပ်စုတပ်သည် ကပစ (၁၆) ဘက်သို့ တပ်ဆုတ်သွားခဲ့ရပြီး လက်ရှိတွင် အင်အား ပြန်လည်ဖြည့်တင်းကာ တောင်ကုတ်-ပန်းတောင်း လမ်းပေါ်သို့ ထပ်မံတက်ရောက်ရန် ပြင်ဆင်လျက် ရှိကြောင်း မြေပြင်သတင်းရင်းမြစ်က ပြောသည်။ တောင်ကုတ်-ပန်းတောင်း ရိုးကျော်လမ်းပေါ်ရှိ ညောင်ကျိုး ဗျူဟာစခန်းကုန်းကို ၂၀၂၅ ခုနှစ် ဧပြီလ ၂ ရက်တွင် လည်းကောင်း၊ ၆၆၆ ပွိုင့်ကုန်းကို ၂၀၂၅ ခုနှစ် အောက်တိုဘာလ ၁၄ ရက်တွင်လည်းကောင်း အာရက္ခတပ်တော် (AA) က တိုက်ခိုက်သိမ်းပိုက် ထိန်းချုပ်ထားခဲ့ခြင်း ဖြစ်သည်။ ဓါတ်ပုံ - (ပုံဟောင်း / AA) #ပန်းတောင်းမြို့နယ်

ပဲခူး-ရခိုင် အစပ် ရိုးကျော်လမ်း တိုက်ပွဲ၌ တပ်ရင်းမှူး အပါအဝင် စစ်သား အများအပြား သေဆုံး

ပဲခူး-ရခိုင် အစပ် ရိုးကျော်လမ်း တိုက်ပွဲ၌ တပ်ရင်းမှူး အပါအဝင် စစ်သား အများအပြား သေဆုံး သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၂၁ ရက်။ …

  • September 21, 2026
တောင်ကြီး ပတ်စ်ပို့ရုံးတွင် ပွဲစားများအား ရုံးလုပ်ငန်းများ လုပ်ပိုင်ခွင့် ပေးထား သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၁ ရက်။ ရှမ်းပြည် တောင်ပိုင်း၊ တောင်ကြီးမြို့ရှိ နိုင်ငံကူးလက်မှတ်ထုတ်ပေးရေးရုံးတွင် ရုံးတာဝန်ခံကိုယ်တိုင် ပွဲစားများ ကို ရုံးအတွင်းနေရာပေးကာ ရုံးဝန်ထမ်းများကဲ့သို့ လုပ်ပိုင်ခွင့်ပေးထားသည့်အပြင် ပြည်သူများထံမှ ငွေကြေးများ ကိုပါ ကောက်ခံခိုင်းနေကြောင်း ပတ်စ်ပို့ သွားရောက်ပြုလုပ်သူများက ပြောသည်။ တောင်ကြီးမြို့ ပတ်စ်ပို့ရုံးတာဝန်ခံ (OC) ဒေါ်ဥမ္မာဆိုသူက ပြီးခဲ့သည့် ဩဂုတ်လအတွင်း ဝန်ထမ်းမလုံလောက်ဟု အကြောင်းပြကာ ပွဲစား ၃၀ ထက်မနည်းကို ရုံးလုပ်ငန်းများ စေခိုင်းထားပြီး ရုံးတာဝန်ခံအခန်း၊ ဓာတ်ပုံရိုက်ခန်း နှင့် စာအုပ်ထုတ်ခန်းတို့တွင် နေရာချထားပေးထားခြင်း ဖြစ်သည်။ ယခုရက်ပိုင်းအတွင်း ပတ်စ်ပို့ရုံးသို့ သွားရောက်ခဲ့သူတစ်ဦးက “တောင်ကြီးရုံးက ပွဲစားလား၊ ဝန်ထမ်းလား တောင် ခွဲမရတော့ဘူး။ အခန်းထဲမှာ လုပ်ပေးနေတာလည်း ပွဲစားတွေ။ အပြင်မှာ လုပ်မလား လိုက်မေးနေတာ လည်း ပွဲစားလို့ ပြောလို့ရတယ်။ ပွဲစားက လုပ်တဲ့သူတွေထက်တောင် များနေတာ။ တိုကင်နဲ့ဆိုတော့ သူတို့ လုပ်ကွက် ဖြစ်နေတာပေါ့” ဟု ပြောသည်။ ထိုသို့ ရုံးအတွင်း နေရာယူထားသည့် ပွဲစားများက ဖောင်ကြေးအဖြစ် ရှမ်းပြည်မြောက်ပိုင်းမှ လာရောက် လျှောက်ထားသူများကို ကျပ် ၇ သောင်းနှင့် ရှမ်းပြည်တောင်ပိုင်း ဒေသခံများကို ကျပ် ၅ သောင်းအသီးသီး ကောက်ခံနေကြကြောင်း ဆိုသည်။ လက်ရှိ စနစ်အရ ပတ်စ်ပို့ (နိုင်ငံကူးလက်မှတ်/စာအုပ်) ပြုလုပ်ရန်အတွက် တိုကင်စနစ်ဖြင့် သတ်မှတ်ထားပြီး တောင် ကြီးရုံးတွင် တစ်ရက်လျှင် လူဦးရေ ၁၅၀ ဝန်းကျင်သာ ပေးဆောင်ရာ၌ အဆိုပါ တိုကင်များကိုလည်း တောင်ကြီးရုံးတွင် တစ်ခုလျှင် ၄ သောင်းခွဲကျပ်နှုန်းဖြင့် ပတ်စ်ပို့ ပြုလုပ်သူများက ဝယ်ယူနေကြရသည်။ အွန်လိုင်းမှ QR စနစ်ဖြင့် တိုကင်ရယူသည့် စနစ်ကို စစ်အုပ်စုက ဖော်ဆောင်ထားသော်လည်း မြေပြင်တွင် ပွဲစားများ၏ စေခိုင်းမှုဖြင့်သာ အဆင်ပြေနေသည့်အတွက် ပွဲစားကြေး အနည်းငယ် ကျဆင်းသွားသည်မှအပ ထူးခြားသည့် ပြောင်းလဲမှု မရှိသေးကြောင်း ပြည်ပသို့ ထွက်ခွာရန် စောင့်ဆိုင်းနေသူများက ဝေဖန်နေကြသည်။ ပတ်စ်ပို့ လျှောက်ထားရာတွင် ကိုယ်တိုင် ပြုလုပ်သူများမှာ အနည်းဆုံး ၃ ရက်ခန့် တန်းစီစောင့်ဆိုင်းရသော် လည်း ပွဲစားနှင့် အပ်သူများမှာမူ တစ်ရက်တည်းဖြင့် ကိစ္စပြီးပြတ်ကြောင်း ဆိုကြသည်။ ပြည်ပသို့ ထွက်ခွာရန် စောင့်ဆိုင်းနေသူတစ်ဦးက “တိုကင်က QR ပေးတယ်။ အဲဒါက ပွဲစားရော၊ ဒီတိုင်း လုပ် တဲ့သူရော တန်းစီရတာ။ ဒါပေမဲ့ ပွဲစားက တန်းစီပြီးတာနဲ့ နောက်ရက် ချိန်းသွားပြီးရင် ကိစ္စပြတ်ပြီ။ ကိုယ် တိုင်လုပ်ရင် လက်ဗွေနှိပ်တာနဲ့ မျက်စိ Scan ဖတ်တာ ထပ်ပြီး သွားရတယ်။ အဲဒါလည်း တော်တော် စောင့်ရ တယ်” ဟု ပြောသည်။ တောင်ကြီး ပတ်စ်ပို့ရုံးတွင် အစအဆုံး ကိုယ်တိုင် လုပ်ဆောင်ပါက ကျပ် ၁ သိန်းဝန်းကျင် ကုန်ကျပြီး ပွဲစားနှင့် အပ်ပါက ကျပ် ၃ သိန်းခွဲခန့် ကုန်ကျသည့်အပြင် စာအုပ်ထုတ်ယူသည့် အခါတွင်လည်း ကျပ် ၁ သောင်း ထပ်မံ ပေးဆောင်ရကြောင်း ပတ်စ်ပို့ ပြုလုပ်ခဲ့သူများက ပြောသည်။ ဓါတ်ပုံ - (ပုံဟောင်း / Crd) #တောင်ကြီး #ပတ်စ်ပို့

တောင်ကြီး ပတ်စ်ပို့ရုံးတွင် ပွဲစားများအား ရုံးလုပ်ငန်းများ လုပ်ပိုင်ခွင့် ပေးထား

တောင်ကြီး ပတ်စ်ပို့ရုံးတွင် ပွဲစားများအား ရုံးလုပ်ငန်းများ လုပ်ပိုင်ခွင့် ပေးထား သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၂၁ ရက်။ ရှမ်း…

  • September 21, 2026
စစ်ရှိန်မြင့်လာ၍ စစ်တွေ- ပုဏ္ဏားကျွန်း အစပ်ရှိ ဒေသခံထောင်ပေါင်းများစွာ ဘေးလွတ်ရာသို့ ရွှေ့ပြောင်းနေရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၁ ရက်။ ရခိုင်ပြည်၊ စစ်တွေနှင့် ပုဏ္ဏားကျွန်းမြို့နယ် အစပ်တွင် စစ်အုပ်စုတပ်နှင့် အာရက္ခတပ်တော် (AA) တို့အကြား တိုက်ပွဲများ အပြင်းအထန် ဖြစ်ပွားနေပြီး စစ်အုပ်စု၏ လေကြောင်းနှင့် လက်နက်ကြီး တိုက်ခိုက်မှုများကြောင့် ဒေသခံထောင်ပေါင်းများစွာ ဘေးလွတ်ရာသို့ ထွက်ပြေး ရွှေ့ပြောင်းနေကြရသည်။ တိုက်ပွဲများ ပိုမိုပြင်းထန်လာနေသည့်အတွက် ပုဏ္ဏားကျွန်းမြို့နယ် တောင်ပိုင်းရှိ ကျေးရွာ ၁၅ ရွာထက်မနည်းမှ ဒေသခံများကို ဘေးလွတ်ရာသို့ အမြန်ဆုံး ရွှေ့ပြောင်းကြရန် အာရက္ခတပ်တော် (AA) က အိမ်တိုင်ရာရောက် ကွင်းဆင်းကာ သတိပေးနိုးဆော်ထားသည်။ ပြီးခဲ့သည့် စက်တင်ဘာ ဒုတိယအပတ်မှစ၍ စစ်တွေ-ပုဏ္ဏားကျွန်း နယ်စပ်ရှိ စပါးထား၊ ဆားကုန်းပို့၊ ခမောင်း တော ကာကင်းစခန်းနှင့် အမြင့်ကျွန်း တံတားဂိတ်များကို စစ်အုပ်စုတပ်က စစ်ကြောင်းထိုး ထိန်းချုပ်ရန် ကြိုး ပမ်းခဲ့သော်လည်း AA က ပြန်လည် တိုက်ခိုက် သိမ်းပိုက်ခဲ့သည့်အတွက် စစ်အုပ်စုတပ်ဘက်က လက်နက်ကြီးနှင့် လေကြောင်း ပစ်ကူများ သုံးကာ နယ်မြေ ပြန်လည်ရရှိရေး အပြင်းအထန် ထိုးစစ်ဆင်နေခြင်း ဖြစ်သည်။ အဆိုပါ စစ်ရေးအခြေအနေကြောင့် စစ်တွေနှင့် ပုဏ္ဏားကျွန်း အစပ်ရှိ ငှက်ကြီးကျွန်း၊ အလယ်ကျွန်း၊ ပဒေသာ၊ မက္ကာလာကျ၊ ကျွန်းချေ၊ ဆားပြင်ကြီးနှင့် တောင်ပေါက် စသည့် ကျေးရွာများမှ သက်ကြီးရွယ်အိုများနှင့် အပြစ်မဲ့ ပြည်သူများ ပိတ်မိမနေစေရန် အာရက္ခတပ်တော် တာဝန်ရှိသူများက အသိပေး ရွှေ့ပြောင်းခိုင်းနေခြင်း ဖြစ်သည်။ ဒေသခံ စစ်ရေးသတင်းအရင်းအမြစ် အမျိုးသားတစ်ဦးက “စစ်တွေနဲ့ ပုဏ္ဏားကျွန်း အစပ်က ရွာတွေကို စစ်တပ် က လေယာဉ်တွေရော၊ ဒရုန်းတွေပါ သုံးပြီး အုပ်စုလိုက် ဗုံးကြဲနေတာ။ တိုက်ပွဲက ၂ ပတ်ကျော် ပြင်းထန်လာ တာပါ။ ရွာတွေထဲ သက်ကြီးရွယ်အိုတွေနဲ့ ကလေးတွေ ကျန်ခဲ့မှာစိုးလို့ AA က အိမ်တိုင်ရာရောက် လာပြီး ဘေးလွှတ်ရာ ရွှေ့ကြဖို့ အသိပေးနေတာ ဖြစ်ပါတယ်” ဟု ပြောသည်။ လက်ရှိတွင် ငှက်ကြီးကျွန်း၊ အလယ်ကျွန်း၊ မက္ကာလာကျ၊ ကွန်းတောင်၊ ညောင်ရည်ချောင်း၊ ရဲရိုးပြင်နှင့် ဝါဘို အပါအဝင် ကျေးရွာ ၂၀ နီးပါး၏ ကောင်းကင်ယံတွင် စစ်အုပ်စု၏ တိုက်လေယာဉ်များ အဆက်မပြတ် ပျံဝဲနေ သည့်အပြင် ရဟတ်ယာဉ်များ၊ စစ်ရေယာဉ်များနှင့် ဒရုန်းများပါ အသုံးပြု၍ ရွာများအတွင်းသို့ လက်နက်ကြီး များဖြင့် ပစ်ခတ်နေသည့်အတွက် ပြည်သူများမှာ အိုးအိမ်များကို စွန့်ခွာ၍ ဘေးလွှတ်ရာသို့ ရွှေ့ပြောင်းနေ ကြရသည်။ သို့သော်လည်း ဒေသတွင်း၌ သမားရိုးကျ လမ်းကြောင်းအများစု ပိတ်ဆို့ခံထားရခြင်း၊ စစ်အုပ်စုတပ်က မြစ် ကြောင်းနှင့် ကုန်းလမ်း အထွက်ပေါက်များကို လက်နက်ကြီးနှင့် လေကြောင်းမှ စောင့်ကြည့် ပစ်ခတ်နေခြင်း တို့ကြောင့် စစ်ဘေးရှောင်များအတွက် ခရီးလမ်း အန္တရာယ်ကြီးမားလှသည့်အပြင် သယ်ယူပို့ဆောင်ရေး ယာဉ် စရိတ်များ မြင့်တက်နေခြင်း၊ သက်ကြီးရွယ်အိုများနှင့် နာတာရှည်လူနာများကို ရွှေ့ပြောင်းရန် ခက်ခဲခြင်းတို့ ကြောင့် ထွက်ပြေးတိမ်းရှောင်ရာတွင် ကြီးမားသည့် အခက်အခဲများနှင့် ရင်ဆိုင်နေကြရသည်။ ဒေသခံ အမျိုးသမီးတစ်ဦးက “လက်နက်ကြီးသံတွေ၊ လေယာဉ်သံတွေ ကြားရတော့ ဘာမှမယူနိုင်ဘဲ ဗုံးခိုကျင်း ထဲကို ပြေးရတာပါ။ သက်ကြီးရွယ်အိုတွေကို ထမ်းပြေးရတာရော၊ ကလေးတွေနဲ့မို့ လမ်းမှာ စစ်တပ်က လေယာဉ်နဲ့ ဗုံးကြဲမှာရော အရမ်းကြောက်ရတာ။ လမ်းစရိတ်တွေကလည်း အရင်ထက် နှစ်ဆ၊ သုံးဆလောက် ပေးနေရတော့ တော်တော်လေး ဒုက္ခရောက်နေကြရတယ်” ဟု ပြောသည်။ လက်ရှိတွင် စစ်အုပ်စုတပ်သည် ပုဏ္ဏားကျွန်းနှင့် စစ်တွေ နယ်စပ်တစ်လျှောက် စစ်အင်အားနှင့် လက်နက်ကြီး ပစ်အားများကို ဆက်တိုက် ဖြည့်တင်းနေပြီး အရပ်သားပစ်မှတ်များကိုပါ ဦးတည် တိုက်ခိုက်နေသည့်အတွက် ဒေသတွင်း တိုက်ပွဲများ ပိုမိုပြင်းထန်လာနိုင်ဖွယ်ရှိကြောင်း ဒေသခံများနှင့် စစ်ရေးလေ့လာသူများက သုံးသပ် ထားကြသည်။ ဓါတ်ပုံ - (ပုံဟောင်း / ရခိုင်စစ်ရှောင်ပြည်သူများ - Crd) #စစ်တွေ #ပုဏ္ဏားကျွန်း #AA

စစ်ရှိန်မြင့်လာ၍ စစ်တွေ- ပုဏ္ဏားကျွန်း အစပ်ရှိ ဒေသခံထောင်ပေါင်းများစွာ ဘေးလွတ်ရာသို့ ရွှေ့ပြောင်းနေရ

စစ်ရှိန်မြင့်လာ၍ စစ်တွေ- ပုဏ္ဏားကျွန်း အစပ်ရှိ ဒေသခံထောင်ပေါင်းများစွာ ဘေးလွတ်ရာသို့ ရွှေ့ပြောင်းနေရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘ…

  • September 21, 2026
ကနေဒါကို ဥရောပသမဂ္ဂ (EU) မိတ်ဖက်အဖွဲ့ဝင် ဖြစ်ရေး ပြင်သစ်သမ္မတ ထောက်ခံ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၁ ရက်။ ပြင်သစ်သမ္မတ အီမန်နျူရယ် မက်ခရွန်သည် ကနေဒါနိုင်ငံအား ဥရောပသမဂ္ဂ (EU) ၏ ပထမဦးဆုံး မိတ်ဖက်အဖွဲ့ဝင်နိုင်ငံ (Associate Member) အဖြစ် ပါဝင်လာရေး ကြိုးပမ်းမှုကို အပြည့်အဝ ထောက်ခံကြောင်း ထုတ်ဖော်ပြောကြားလိုက်သည်။ ပြီးခဲ့သည့် တနင်္ဂနွေနေ့က ကနေဒါနိုင်ငံ၌ ပြင်သစ်သမ္မတ မက်ခရွန်နှင့် ကနေဒါဝန်ကြီးချုပ် မာခ် ကာနီ (Mark Carney) တို့ တွေ့ဆုံဆွေးနွေးခဲ့ကြခြင်းဖြစ်သည်။ တွေ့ဆုံမှုအတွင်း နည်းပညာ၊ ကာကွယ်ရေး၊ စွမ်းအင်နှင့် စီးပွားရေးကဏ္ဍတို့၌ နှစ်နိုင်ငံကြား ရင်းနှီးသော မဟာမိတ်ဆက်ဆံရေး ပိုမိုခိုင်မာစေရန် သဘောတူညီခဲ့ကြသည်။ အထူးသဖြင့် အာကာသနည်းပညာနှင့် ကာကွယ်ရေးကဏ္ဍတို့တွင် အခြေခံအဆောက်အအုံများကို ပူးတွဲအသုံးပြုရန်နှင့် စွမ်းအင်၊ ဆက်သွယ်ရေးနှင့် ရာသီဥတုပြောင်းလဲမှုဆိုင်ရာ ကိစ္စရပ်များ၌ ပူးပေါင်းဆောင်ရွက်မှု တိုးမြှင့်သွားမည်ဖြစ်သည်။ အမေရိကန်ပြည်ထောင်စုနှင့် ဆက်ဆံရေး တင်းမာလာချိန်တွင် ကနေဒါနိုင်ငံအနေဖြင့် ဥရောပဘက်သို့ ဦးလှည့်လာခြင်းဖြစ်ပြီး၊ ဥရောပကော်မရှင် ဥက္ကဋ္ဌ အာဆူလာ ဖွန်ဒါ လေယန် ကလည်း ကနေဒါကို EU ၏ မိတ်ဖက်အဖွဲ့ဝင်နိုင်ငံ ဖြစ်လာစေရန် လွန်ခဲ့သည့် ရက်ပိုင်းက အဆိုပြုထားသည်။ ကနေဒါဝန်ကြီးချုပ် မာခ် ကာနီ ကလည်း ဥရောပနှင့် နီးကပ်သော ဆက်ဆံရေး ထူထောင်ခြင်းသည် ကနေဒါနိုင်ငံအတွက် ရွေးချယ်စရာ လမ်းကြောင်းသစ်များ ရရှိစေမည်ဖြစ်သကဲ့သို့ ဘက်ပေါင်းစုံမှ စီးပွားရေးအရ ဖိအားပေး ခြိမ်းခြောက်ခံရမှုများကိုလည်း လျှော့ချနိုင်မည်ဖြစ်ကြောင်း ပြောကြားခဲ့သည်။ #EUAssociateMember

ကနေဒါကို ဥရောပသမဂ္ဂ (EU) မိတ်ဖက်အဖွဲ့ဝင် ဖြစ်ရေး ပြင်သစ်သမ္မတ  ထောက်ခံ

ကနေဒါကို ဥရောပသမဂ္ဂ (EU) မိတ်ဖက်အဖွဲ့ဝင် ဖြစ်ရေး ပြင်သစ်သမ္မတ  ထောက်ခံ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၂၁ ရက်။ ပြင်သစ်သမ္မတ အီ…

  • September 21, 2026
ညောင်ဦး-ချောက် လမ်းဘေးရှိ ကျေးရွာများ မီးရှို့ခံရပြီး အရပ်သား ထောင်ချီ စစ်ဘေးရှောင်နေရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၉ ရက်။ မန္တလေးတိုင်း၊ ညောင်ဦးမြို့နယ်အတွင်း ညောင်ဦးမြို့နှင့် မြို့နယ်အစပ် စဉ့်ကူရွာကြားရှိ ကျေးရွာများကို စစ်တပ်က ရွာစဉ်လှည့်ကာ စစ်ကြောင်းထိုး မီးရှို့နေသဖြင့် အမျိုးသမီးများ၊ ကလေးငယ်များနှင့် သက်ကြီးရွယ်အိုများ အပါအဝင် အရပ်သား ထောင်ချီ၍ စစ်ဘေးလွတ်ရာသို့ တိမ်းရှောင်နေကြရသည်။ မန္တလေးတိုင်း၊ ညောင်ဦးမြို့နယ်အဆုံးရှိ စဉ့်ကူရွာမှ စတင်ကာ ချောက်-ညောင်ဦး ကားလမ်းဘေး ဘယ်၊ ညာရှိ ကျေးရွာများကို စစ်အုပ်စုတပ်က နေ့စဉ် စစ်ကြောင်းထိုး၍ နေအိမ်များ မီးရှို့ခြင်း၊ ပစ္စည်းများ လုယက်ခြင်းနှင့် ပြည်သူများကို ဖမ်းဆီးခြင်းတို့ ပြုလုပ်နေခြင်းဖြစ်သည်။ မီးလောင်ဖျားမြောက်ရွာမှ အသက် ၅၀ ကျော်အရွယ် အမျိုးသမီးတစ်ဦးက “နေ့စဉ် စစ်ကြောင်းထိုးနေတာ တစ်ပတ်ကျော်သွားပြီ။ နေအိမ်တွေ မီးရှို့၊ သေနတ်နဲ့ပစ်၊ ဒရုန်းနဲ့ဗုံးကြဲ ရွာတိုင်းကို လုပ်နေတာ။ ဗုံးမှန်ပြီး သေကြတယ်၊ တချို့ အဖမ်းခံကြရတယ်။ ပစ္စည်းဆိုတာကတော့ အဝတ်အထည်ကောင်းရင်တောင် ယူသွား ကြတာ” ဟု ပြောသည်။ ပြီးခဲ့သည့် စက်တင်ဘာလ ၁၃ ရက်နေ့က မီးလောင်ဖျားမြောက်ရွာကို စစ်အုပ်စုတပ်က ဒရုန်းဖြင့် ဗုံးချခဲ့သဖြင့် သားအမိ ၃ ဦး အပါအဝင် အမျိုးသမီး ၄ ဦး သေဆုံးခဲ့ပြီး အမျိုးသားတစ်ဦး ဒဏ်ရာရရှိခဲ့သည်။ ထို့ပြင် စက်တင်ဘာလ ၁၄ ရက်နှင့် ၁၅ ရက်တို့တွင် ကျောက်ပြင်ကန်ကျေးရွာကို မီးရှို့ခဲ့သဖြင့် အိမ်ခြေ ၂၀၀ ကျော် မီးလောင်ဆုံးရှုံးခဲ့ရပြီး အသက် ၅၀ ကျော်အရွယ် အမျိုးသား ၂ ဦးကိုလည်း ဖမ်းဆီးခေါ်ဆောင်သွားခဲ့ သည်။ အဆိုပါ စစ်အုပ်စုတပ်သည် ယာတောကြီးကျေးရွာမှ စစ်ရှောင်လာသည့် အမျိုးသမီး ၆ ဦးနှင့် တွေ့ဆုံစဉ် ၎င်းတို့ပါလာသည့် ဖုန်း ၆ လုံးနှင့် အစားအသောက်များကို လုယူသွားခဲ့ကြောင်း ဒေသခံများက ဆိုသည်။ မီးလောင်ဖျားမြောက်ရွာမှ အမျိုးသမီးတစ်ဦးကလည်း “အိမ်တွေကို မီးမရှို့ခင် စိတ်ကြိုက်ပစ္စည်းတွေကို ကားပေါ်တင်ယူသွားတာ။ လိုချင်တာ မရှိတော့ဘူးဆိုမှ မီးရှို့ခဲ့ကြတာ။ နေစရာ၊ ဝတ်စရာ၊ စားစရာ ဘာမှ မရှိတော့ဘူး” ဟု ပြောသည်။ စဉ့်ကူ၊ ပြည်တော်သာ၊ မီးလောင်ဖျားတောင်ရွာ၊ မီးလောင်ဖျားမြောက်ရွာ၊ ရွာသစ်၊ ကြအိုကျွန်း၊ ကြအို၊ မြေသန့်တောင်၊ ဇက၊ မအူပင်နှင့် ပျော်ဘွယ် စသည့် ချောက်-ညောင်ဦး ကားလမ်းဘေးရှိ ကျေးရွာ ၁၁ ရွာမှ ဒေသခံများသည် ဧရာဝတီမြစ် အနောက်ဘက်ကမ်းသို့ စစ်ဘေးတိမ်းရှောင်နေကြရသည်။ အလားတူ ပုဂံမြို့ အရှေ့တောင်ဘက်၊ ကျောက်ပန်းတောင်း-ညောင်ဦး ကားလမ်းကြားရှိ ယာတောကြီး၊ ပျဉ်းချောင်း၊ သဖျင်းကန်၊ မကျီးတိုင်း၊ ကျောက်ကန်၊ ကန်နီပေါက်၊ ရွာလေး၊ ချောင်းဝ၊ အနောက်အုံ၊ ဇီးစမြင်၊ ကျောက်ပြင်ကန်နှင့် မြောင် စသည့် ကျေးရွာ ၁၂ ရွာမှ ပြည်သူများသည် ချောက်ကြိုချောက်ကြားများသို့ စစ်ဘေးတိမ်းရှောင်နေရသည်ဟု ဆိုသည်။ စက်တင်ဘာလ ၁၁ ရက်နေ့မှစ၍ စစ်အုပ်စုတပ်သည် အင်အား ၂၀၀ ကျော်ခန့်ဖြင့် စစ်ကြောင်း ၂ ကြောင်းခွဲကာ ရွာစဉ်လှည့်စစ်ကြောင်းထိုးနေခြင်းဖြစ်ပြီး စက်တင်ဘာလ ၁၇ ရက်နေ့ညက မီးလောင်ဖျား၊ ကြအိုနှင့် ကြအို ကျွန်းကျေးရွာတို့တွင် စခန်းချ၍ သေနတ်များ ပစ်ဖောက်ခဲ့ကြောင်း ဒေသခံများက ပြောသည်။ အဆိုပါ စဉ့်ကူမြို့နယ်နှင့် ညောင်ဦးမြို့နယ်အတွင်းရှိ စစ်ကြောင်းထိုးခံနေရသော ဒေသသည် နိုင်ငံတကာအဆင့် မဟာဗျူဟာမြောက် မြန်မာ-တရုတ် ရေနံနှင့် သဘာဝဓာတ်ငွေ့ပိုက်လိုင်း စွမ်းအင်စီမံကိန်းကြီး ဖြတ်သန်း ဖောက်လုပ်ထားသည့် ဒေသလည်းဖြစ်သည်။ ဓာတ်ပုံ - (စစ်အုပ်စုတပ်၏ မီးရှို့မှုကြောင့် ပျက်စီးသွားသည့် ကျေးရွာတစ်ရွာမှ မြင်ကွင်း။ / Crd) #ညောင်ဦးမြို့နယ်

ညောင်ဦး-ချောက် လမ်းဘေးရှိ ကျေးရွာများ မီးရှို့ခံရပြီး အရပ်သား ထောင်ချီ စစ်ဘေးရှောင်နေရ

ညောင်ဦး-ချောက် လမ်းဘေးရှိ ကျေးရွာများ မီးရှို့ခံရပြီး အရပ်သား ထောင်ချီ စစ်ဘေးရှောင်နေရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၉ ရက်။ …

  • September 20, 2026
စစ်တွေ-ပုဏ္ဏားကျွန်း အစပ်တွင် AA တန်ပြန်ထိုးစစ်ဆင်၍ စစ်အုပ်စု ကာကင်းစခန်းအချို့ သိမ်းပိုက်ခံရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၉ ရက် ရခိုင်ပြည်၊ စစ်တွေ-ပုဏ္ဏားကျွန်းအစပ်တွင် စစ်အုပ်စုတပ်နှင့် အာရက္ခတပ်တော် (AA) တို့အကြား တိုက်ပွဲများ ပြင်းထန်လျက်ရှိပြီး AA က စစ်အုပ်စုတပ်၏ ကာကင်းစခန်းအချို့ကို ထိန်းချုပ်သိမ်းပိုက်ထားကြောင်း မြေပြင် စစ်ရေးသတင်းရင်းမြစ်များက ပြောသည်။ စစ်အုပ်စုတပ်သည် စစ်တွေ-ပုဏ္ဏားကျွန်းအစပ်သို့ စက်တင်ဘာလ ၄ ရက်နေ့မှစ၍ ထိုးစစ်ဆင်တိုက်ခိုက်လာ ခြင်း ဖြစ်ပြီး တိုက်ပွဲဖြစ်ပွားနေသည်မှာ ၁၆ ရက်ခန့်ရှိပြီဖြစ်သည်။ အဆိုပါ တိုက်ပွဲများအတွင်း နှစ်ဖက်အကျအဆုံးများရှိနေပြီး စစ်အုပ်စုတပ်၏ စပါးထား၊ ဆားကုန်းပို့၊ ခမောင်း တော ကာကင်းစခန်းများနှင့် ရွှေမင်းဂံရေတပ်စခန်း၏ ကာကင်းစခန်းဖြစ်သည့် အမြင့်ကျွန်း တံတားဂိတ်များကို AA က ထိန်းချုပ်သိမ်းပိုက်ထားခြင်းဖြစ်သည်။ ဒေသခံစစ်ရေးသတင်းရင်းမြစ် အမျိုးသားတစ်ဦးက “ပထမ ၁၄ ရက်နေ့ကတည်းက စစ်တပ် စစ်ကြောင်းတွေ စစ်တွေ - ပုဏ္ဏားကျွန်းအစပ်ကို ထိုးလာတော့ စပါးထား၊ ဆားကုန်းပို့၊ ခမောင်းတော ကာကင်းစခန်းတွေကို စစ်တပ်က ထိန်းလိုက်တယ်၊ ရက်ကြာရှည်လာတော့ အေအေရဲ့ တန်ပြန်ထိုးစစ်ကို မနိုင်တော့လို့ အကျအဆုံးနဲ့ ပြန်ဆုတ်တယ်၊ လက်ရှိ ပင်လယ်ရေပြင်တွေမှာလည်း စစ်တပ်အလောင်းတွေ များတယ်” ဟု ပြောသည်။ လက်ရှိတွင် စစ်အုပ်စုတပ်သည် စစ်တွေ-ပုဏ္ဏားကျွန်းအစပ်ရှိ မင်းချောင်းတံတား၊ ဝါဘို၊ အမြင့်ကျွန်း၊ ရဲရိုးပြင်၊ ဆားတောင်ပို့၊ ခမောင်းတောနှင့် ကွမ်းတောင် ကျေးရွာတို့တွင် စစ်အင်အား ရာချီ ဖြန့်ကျက်ထားဆဲ ဖြစ်သည်။ ဒေသခံတစ်ဦးက “လက်ရှိမင်းချောင်းတံတား၊ ဝါဘို အမြင့်ကျွန်း၊ ရဲရိုးပြင်၊ ဆားတောင်ပို့၊ ခမောင်းတော၊ ကွမ်းတောင် ဘက်တွေ မှာ စစ်တပ် ဘက်က စစ်အင်အားတိုးပြီးဖြန့်တယ်။ ဒါပေမယ့် အေအေသတ်ကွင်း ထဲဝင်သလိုဖြစ်နေတယ်။ ရခိုင် ကို အပြင်ဘက်က စစ်ကြောင်းထိုးမရတော့ အတွင်းထဲက သူတို့ထိန်းချုပ်တဲ့ စစ်တွေကတဆင့် အင်အားဖြည့်ပြီး စစ်ကြောင်းထိုးတာ အေအေကလည်းတော်တော်ခုခံယူနေရတယ်” ဟု ပြောသည်။ ထို့ပြင် စစ်အုပ်စုတပ်သည် စစ်တွေ-ပုဏ္ဏားကျွန်းအစပ်သို့ လေယာဉ်အုပ်စုလိုက်ဖြင့် လာရောက်ဗုံးကြဲ တိုက်ခိုက် နေသည့် အပြင် လက်နက်ကြီးများ၊ ဒရုန်းများဖြင့်လည်း နေ့စဉ် ပစ်ခတ်လျက်ရှိရာ AA ဘက်ကလည်း လက်နက်ကြီးများဖြင့် ပြန်လည်ပစ်ခတ်နေသဖြင့် တိုက်ပွဲများ အပြင်းအထန် ဖြစ်ပွားနေသည်။ လက်ရှိစစ်ရေး အနေအထားအရ AA သည် ပုဏ္ဏားကျွန်းဘက်မှတစ်ဆင့် စစ်တွေမြို့အနီးသို့ တန်ပြန်ထိုးစစ်ဖြင့် ရှေ့တိုးလာလျက်ရှိသည်။ အလားတူ စက်တင်ဘာလ ၁၈ ရက် နံနက်ပိုင်းမှ နေ့လယ်ပိုင်းအထိ စစ်တွေ၊ ပုဏ္ဏားကျွန်း၊ ဝီရဌာနီ (ပေါက်တော) နှင့် သံတွဲမြို့များကို စစ်အုပ်စုတပ်က ဂျက်ဖိုက်တာ လေယာဉ်များ အုပ်စုလိုက်အသုံးပြု၍ လေကြောင်းမှ တိုက်ခိုက်ခဲ့သည်။ စစ်အုပ်စုတပ်သည် လေကြောင်းနှင့် ရေကြောင်း ပစ်ကူအပြင် ရွှေမင်းဂံရေတပ်စခန်း၊ အမြင့်ကျွန်းရှိ လက်နက် ကြီးအထိုင်စခန်း၊ စစ်တွေပါဒလိတ်တပ်ရင်း၊ အမြောက်တပ်၊ ခလရ (၂၀)၊ ခလရ (၂၃၂)၊ ခလရ (၂၇၀)၊ ခမရ (၃၄၄) စသည့် စစ်တွေ-ပုဏ္ဏားကျွန်း ကားလမ်းပေါ်တွင် အခြေစိုက်ထားသည့် တပ်ရင်းများမှလည်း လက်နက်ကြီးများဖြင့် တိုက်ပွဲဖြစ်ပွားရာနေရာများသို့ ဆက်continuous ပစ်ကူပေး တိုက်ခိုက်လျက်ရှိသည်။ ဓာတ်ပုံ - Crd #AA #စစ်တွေ #ပုဏ္ဏားကျွန်း

စစ်တွေ-ပုဏ္ဏားကျွန်း အစပ်တွင် AA တန်ပြန်ထိုးစစ်ဆင်၍ စစ်အုပ်စု ကာကင်းစခန်းအချို့ သိမ်းပိုက်ခံရ

စစ်တွေ-ပုဏ္ဏားကျွန်း အစပ်တွင် AA တန်ပြန်ထိုးစစ်ဆင်၍ စစ်အုပ်စု ကာကင်းစခန်းအချို့ သိမ်းပိုက်ခံရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၉ ရ…

  • September 20, 2026
ရခိုင်တွင် AA ထိန်းချုပ်ထားသော မြို့နယ် သုံးခုကို စစ်တပ် လေကြောင်းမှ ဗုံးကြဲ၊ အရပ်သားတစ်ဦး ဒဏ်ရာရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၈ ရက်။ ရခိုင်ပြည်အတွင်း အာရက္ခတပ်တော် (AA) ထိန်းချုပ်ထားသည့် မြို့နယ်များကို စစ်အုပ်စုတပ်က ဆက်တိုက် လေကြောင်းတိုက်ခိုက်မှုများ ပြုလုပ်လျက်ရှိရာ သံတွဲ၊ ပုဏ္ဏားကျွန်းနှင့် ရှေးဟောင်းယဉ်ကျေးမှုနယ်မြေ မြောက်ဦးမြို့တို့ပါ ဗုံးကြဲခံရပြီး အရပ်သားတစ်ဦး ဒဏ်ရာပြင်းထန်စွာ ရရှိခဲ့ကြောင်း ဒေသခံများက ပြောသည်။ စက်တင်ဘာလ ၁၈ ရက်နေ့၊ နံနက် ၁၁ နာရီကျော်တွင် သံတွဲမြို့နယ်၊ သစ်ငုတ္တိုကျေးရွာနှင့် ဆိုးပုံကျေးရွာ အနီး ဝန်းကျင်သို့ စစ်အုပ်စုတပ်က ဂျက်ဖိုက်တာဖြင့် ဗုံး ၁၀ လုံးထက်မနည်း ကြဲချတိုက်ခိုက်ခဲ့သဖြင့် ဘုန်းတော်ကြီး ကျောင်းအနောက်ဘက် လယ်ကွင်းပြင်နှင့် တောင်တန်းများတွင် ကျရောက်ပေါက်ကွဲခဲ့သည်။ သံတွဲဒေသခံတစ်ဦးက “ဒီနေ့ ဗုံးကြဲသွားတာက သံတွဲ-ဂွ ကားလမ်းမပေါ်က သစ်ငုတ္တိုရွာနားတင် ဗုံးတွေ လာ ကြဲသွားတာ။ ရွာဘုန်းကြီးကျောင်း နောက်ဘက် လယ်ကွင်းတွေနဲ့ ဆိုးပုံရွာဘက်က တောင်တန်းတွေပေါ်မှာ ပေါက်ကွဲသံတွေ အကျယ်ကြီး ကြားရတယ်။ ဂျက်ဖိုက်တာနဲ့ ဗုံး ၁၀ လုံးမက ကြဲသွားတာ။ ထိခိုက်မှု အခြေ အနေတော့ လောလောဆယ် စုံစမ်းနေတုန်းပဲ” ဟု ပြောသည်။ သံတွဲမြို့နယ်တွင် စစ်အုပ်စုတပ်က ပြီးခဲ့သည့် လများအတွင်းကပင် လေကြောင်းမှ ပစ်မှတ်ထား ဗုံးကြဲခဲ့သည့် အပြင် ယခုအခါ ကားလမ်းမ အနီးဝန်းကျင်ရှိ ကျေးရွာများအထိ တိုက်ခိုက်မှုကို တိုးမြှင့်လုပ်ဆောင်လာခြင်း ဖြစ် သည်။ ထို့ပြင် ရှေးဟောင်းယဉ်ကျေးမှုနယ်မြေ ဖြစ်သည့် မြောက်ဦးမြို့ပေါ်သို့လည်း စက်တင်ဘာလ ၁၇ ရက်နေ့၊ နေ့လည်ပိုင်းတွင် စစ်အုပ်စုတပ်က တိုက်လေယာဉ် ၃ စီးဖြင့် ပတ်လည်ဗုံးကြဲခဲ့သဖြင့် မြို့ခံများ ဘေးလွတ်ရာ ဗုံးခိုကျင်းများအတွင်း ပုန်းခိုခဲ့ကြရသည်။ မြောက်ဦးမြို့ခံတစ်ဦးက “မွန်းတည့်ခါနီးမှာ တိုက်လေယာဉ် ၃ စီးနီးပါး မြို့ပေါ်ကို ဝဲပြီး ဆက်တိုက် ဗုံးကြဲတာ။ ဗုံးသံတွေက ဆက်တိုက်ပဲ။ ၄ လုံးလောက် တခါတည်းကြဲသွားတာ။ ပြည်သူတွေလည်း ကြောက်လန့်ပြီး ဗုံးခိုကျင်းတွေထဲမှာ ပုန်းနေကြရတယ်။ အသံတွေ တိတ်သွားတော့မှ ပြန်ထွက်ပေါ့။ အခြေအနေကတော့ အမြဲသတိထားကြည့်ပြီး နေရတာ” ဟု ပြောသည်။ အလားတူ စက်တင်ဘာလ ၁၇ ရက် နံနက်ပိုင်းနှင့် ညပိုင်းတို့တွင် ပုဏ္ဏားကျွန်းမြို့နယ် ကွမ်းတောင်ကျေးရွာ၊ မင်းချောင်းတံတားအနီးနှင့် ဖက်ကျကျေးရွာတို့ကို စစ်အုပ်စုတပ်က ဂျက်ဖိုက်တာ၊ Y-12 လေယာဉ်များ အသုံးပြု၍ ၁၀ ကြိမ်ထက်မနည်း ဗုံးကြဲသည့်အပြင် စက်သေနတ်များဖြင့်ပါ ပစ်ခတ်ခဲ့သဖြင့် ဖက်ကျကျေးရွာမှ ရွာသားတစ်ဦး ဒဏ်ရာပြင်းထန်စွာ ရရှိခဲ့သည်။ ပုဏ္ဏားကျွန်း ဒေသခံတစ်ဦးက “စစ်တွေဘက်ကနေ စစ်ကြောင်းထိုးဖို့ ကြိုးစားပေမဲ့ AA က ထိရောက်စွာ ပိတ် ဆို့ထားတော့ စစ်အုပ်စုတပ်က ရှေ့မတိုးနိုင်ဘူး။ အဲဒါကြောင့် လေကြောင်းနဲ့ လက်နက်ကြီးကိုပဲ သုံးပြီး ရွာတွေ ကို ရမ်းသန်းပစ်နေတာ။ စက်တင်ဘာ ၁၇ ရက်ရော၊ ၁၆ ရက်နေ့ရော ကြဲတယ်။ ကွမ်းတောင်နဲ့ မင်းချောင်း တံတားဘက်ကို တစ်နေကုန် ဗုံးကြဲရုံမက စက်သေနတ်တွေနဲ့ပါ လှမ်းပစ်နေတာ။ ဖက်ကျရွာက ရွာသား တစ်ယောက် ဒဏ်ရာရသွားတယ်” ဟု ပြောသည်။ စစ်တွေ-ပုဏ္ဏားကျွန်း အစပ်တွင် စက်တင်ဘာလ ၄ ရက်နေ့မှစ၍ တိုက်ပွဲများ ပြင်းထန်နေပြီး စစ်အုပ်စုတပ်သည် ပုဏ္ဏားကျွန်းဘက်သို့ စစ်ကြောင်းထိုးရန် ကြိုးပမ်းသော်လည်း AA ၏ ပိတ်ဆို့ခုခံမှုကြောင့် ရှေ့ဆက်မတိုးနိုင်ဘဲ လေကြောင်းနှင့် လက်နက်ကြီးကိုသာ အဓိက အားပြု ပစ်ခတ်နေခြင်းဖြစ်သည်။ လက်ရှိတွင် အဆိုပါ လေကြောင်းတိုက်ခိုက်မှုများကြောင့် ထိခိုက်ပျက်စီးမှု အနောက်ဆက်တွဲ အခြေအနေ အသေးစိတ်ကို ဆက်လက် စုံစမ်းလျက်ရှိသည်။ #AA #Rakhine

ရခိုင်တွင် AA ထိန်းချုပ်ထားသော မြို့နယ် သုံးခုကို စစ်တပ် လေကြောင်းမှ ဗုံးကြဲ၊ အရပ်သားတစ်ဦး ဒဏ်ရာရ

ရခိုင်တွင် AA ထိန်းချုပ်ထားသော မြို့နယ် သုံးခုကို စစ်တပ် လေကြောင်းမှ ဗုံးကြဲ၊ အရပ်သားတစ်ဦး ဒဏ်ရာရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ …

  • September 18, 2026
ညောင်ဦးမြို့နယ် အတွင်း ကျေးရွာတစ်ရွာကို စစ်တပ် ၃ ကြိမ်မြောက် မီးရှို့၊ နေအိမ် ၂၀၀ ကျော်ပြာကျ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၈ ရက်။ မန္တလေးတိုင်း၊ ညောင်ဦးမြို့နယ်အတွင်း ရွာစဉ်ပတ်၍ စစ်ကြောင်းထိုးလာသည့် စစ်အုပ်စုတပ်က ကျောက်ပြင် ကန်ကျေးရွာကို အကြောင်းမဲ့ မီးရှို့ဖျက်ဆီးခဲ့သဖြင့် နေအိမ် ၂၀၀ ကျော် မီးလောင်ဆုံးရှုံးခဲ့ကြောင်း ဒေသခံများက ပြောသည်။ ကြအိုကျေးရွာဘက်မှ ဖောကားတစ်စီး၊ စစ်ကားတစ်စီးနှင့် တင့်ကားတစ်စီးတို့ဖြင့် အင်အား ၁၀၀ ကျော်ပါ စစ်တပ် စစ်ကြောင်း ကျောက်ပြင်ကန်ကျေးရွာသို့ စက်တင်ဘာလ ၁၄ ရက် နံနက် ၈ နာရီခန့်တွင် ဝင်ရောက်လာ သဖြင့် ရွာခံပြည်သူများ ဘေးလွတ်ရာသို့ ထွက်ပြေးတိမ်းရှောင်ခဲ့ကြရသည်။ ထို့နောက် အင်အား ၂၀၀ ခန့်အထိ တိုးမြှင့်ရောက်ရှိလာသည့် အဆိုပါ စစ်ကြောင်းသည် မောင်းပြန်သေနတ်များ ဖြင့် အကြောင်းမဲ့ အလုအယက် ပစ်ခတ်ကာ နေအိမ်များကို မီးစတင်ရှို့ခဲ့ခြင်း ဖြစ်သည်။ မြောင်ရွာမှ အသက် ၅၀ ခန့်ရှိ အမျိုးသားတစ်ဦးက “ဘာအကြောင်းမှမရှိပဲနဲ့ ရှို့ချင်လို့ကို ရှို့တာလို့ပြောရမှာပဲ။ မီးတောက်တွေ မီးလုံးတွေ တွေ့နေရတယ်။ သေနတ်သံတွေလည်း ကြားနေရတော့ တိုက်ပွဲဖြစ်နေတယ်လို့ ထင် တာ မဟုတ်ဘူး။ သူတို့ဟာသူတို့ ပစ်နေကြတာ” ဟု ပြောသည်။ ကျောက်ပြင်ကန်ကျေးရွာမှ စစ်ဘေးရှောင် ပြည်သူများသည် ယာတောကြီး၊ ပျဉ်းချောင်း၊ သဖျင်းကန်၊ မကျီး တန်း၊ ကျောက်ကန်၊ ကန်နီပေါက်၊ ရွာလေးနှင့် ပျော်ဘွယ် ကျေးရွာများသို့ ပတ်ချာလှည့် စစ်ဘေးရှောင်ခဲ့ကြရပြီး ညနေ ၃ နာရီကျော်တွင် ရွာဘက်မှ မီးခိုးလုံးများနှင့်အတူ သေနတ်သံများကို အဆက်မပြတ် ကြားခဲ့ရကြောင်း ဆိုသည်။ အသက် ၅၀ ကျော် အမျိုးသမီးတစ်ဦးကလည်း “တနေကုန်ကို သူတို့မင်း သူတို့ချင်း စိတ်တိုင်းကျ လုပ်ချင် တိုင်းကို လုပ်သွားကြတာ။ စောင်တွေ မွေ့ယာတွေ ခေါင်းအုံးတွေနဲ့ မီးမွှေးပြီး အိမ်ကို မီးရှို့သွားကြတာ တော် တော် လူစိတ်မရှိတဲ့ဟာတွေ” ဟု ပြောသည်။ စက်တင်ဘာလ ၁၅ ရက်နေ့၊ နံနက်ပိုင်း ၁၁ နာရီ အချိန်ခန့်တွင် စစ်အုပ်စုတပ် စစ်ကြောင်း ပြန်လည် ထွက်ခွာ သွားသဖြင့် ရွာသားအချို့ ပြန်လည်ဝင်ရောက်ရန် ကြိုးပမ်းခဲ့သော်လည်း မီးလောင်နံ့ အနံ့ဆိုးများကြောင့် ရွာပြင် သို့ ပြန်ထွက်ခဲ့ကြရသည်။ ထို့နောက် စက်တင်ဘာလ ၁၆ ရက်နေ့တွင် ကျေးရွာအတွင်းသို့ သေချာစွာ ပြန်လည်ဝင်ရောက် စစ်ဆေးနိုင်ခဲ့ပြီး နေအိမ် ၂၀၀ ကျော် မီးလောင်ပြာကျခဲ့ကြောင်း အတည်ပြုနိုင်ခဲ့ခြင်း ဖြစ်သည်။ အိမ်ခြေ ၄၀၀ ခန့်ရှိသည့် ကျောက်ပြင်ကန်ကျေးရွာသည် စစ်အုပ်စုတပ်၏ မီးရှို့ဖျက်ဆီးမှုကို ၃ ကြိမ်မြောက် ခံခဲ့ရခြင်းဖြစ်ပြီး လက်ရှိတွင် ရွာတစ်ရွာလုံး၌ နေအိမ် ၁၀၀ ခန့်ပင် ကျန်ရှိတော့မည် မဟုတ်ကြောင်း ရွာသား များက ပြောသည်။ #ညောင်ဦးမြို့နယ်

ညောင်ဦးမြို့နယ် အတွင်း ကျေးရွာတစ်ရွာကို စစ်တပ် ၃ ကြိမ်မြောက် မီးရှို့၊ နေအိမ် ၂၀၀ ကျော်ပြာကျ

ညောင်ဦးမြို့နယ် အတွင်း ကျေးရွာတစ်ရွာကို စစ်တပ် ၃ ကြိမ်မြောက် မီးရှို့၊ နေအိမ် ၂၀၀ ကျော်ပြာကျ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၈ ရက…

  • September 18, 2026
×Close