သတင်း

မောတောင် နယ်စပ်ဂိတ်အနီး စစ်တပ်က ဗုံးကြဲတိုက်ခိုက်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဧပြီလ ၂၉ ရက်။   မြန်မာ-ထိုင်းနယ်စပ်၊ တနင်္သာရီမြို့နယ်ရှိ တော်လှန်ရေးပူးပေါင်းတပ်များ သိမ်းပိုက်ထားသည့် မောတောင်မြို့ကို စစ်တပ်က ပေါင် ၃၀၀ ဗုံးများအသုံးပြုကာ လေကြောင်းမှ ဆက်တိုက်ဗုံးကြဲတိုက်ခိုက်ခဲ့သဖြင့် အရပ်သား ဇနီးမောင်နှံနှစ်ဦး ဗုံးစထိမှန်ကာ သေဆုံးသွားသည်။   ပြီးခဲ့သည့် ဧပြီလ ၂၇ ရက်နေ့က စစ်တပ်သည် ဂျက်ဖိုက်တာများဖြင့် မောတောင်မြို့ပေါ်နှင့် အနီးနားရှိ ကျေးရွာ များသို့ ခြောက်ကြိမ်ထက်မနည်း လာရောက်ဗုံးကြဲခဲ့ခြင်းဖြစ်သည်။   အဆိုပါ တိုက်ခိုက်မှုအတွင်း အမှတ် (၆) ရွာမှ အမှတ် (၃) ရွာသို့ ဈေးဝယ်ထွက်လာသည့် အသက် ၅၀ ကျော် အရွယ် ဦးမြင့်စိုးနှင့် ဇနီးဖြစ်သူ ဒေါ်လှဝင်းတို့သည် ဆီအုန်းကုမ္ပဏီဝန်းကျင်တွင် ဗုံးထိမှန်ကာ သေဆုံးခဲ့ခြင်း ဖြစ်သည်။   ဒေသခံတစ်ဦးက “သူတို့လင်မယားက ဈေးဝယ်ထွက်လာတာဗျ။ ဗုံးကျတဲ့အချိန်မှာ ဆီအုန်းကုမ္ပဏီနား ရောက် နေတာ။ အဲ့ဒီမှာတင် ပွဲချင်းပြီး ဆုံးသွားကြတာပဲ” ဟု ပြောသည်။   ကရင်အမျိုးသားအစည်းအရုံး (KNU) ၏ ဧပြီလ ၂၈ ရက်နေ့ ထုတ်ပြန်ချက်အရ စစ်တပ်သည် ပေါင် ၃၀၀ ဗုံး ၁၂ လုံးထက်မနည်း အသုံးပြုကာ လူနေရပ်ကွက်များကို ရည်ရွယ်ချက်ရှိရှိ ပစ်မှတ်ထားတိုက်ခိုက်ခဲ့ခြင်းဖြစ်ပြီး၊ ပြည်ဖြိုးထွန်းကုမ္ပဏီ ဆီအုန်းစိုက်ပျိုးရေးစီမံကိန်းရှိ အလုပ်သမားတန်းလျားများနှင့် လူနေအိမ်အချို့လည်း ထိခိုက်ပျက်စီးသွားသည်ဟု သိရသည်။   ဧပြီလ ၂၆ ရက်နေ့ကလည်း မောတောင်မြို့ အမှတ် (၁) နှင့် အမှတ် (၉) ရွာများကို ပေါင် ၂၅၀ ဗုံးများဖြင့် ကြဲချခဲ့ သဖြင့် နေအိမ်အချို့ ပျက်စီးခဲ့သေးသည်။   မြေပြင်ရှိ တော်လှန်ရေးတပ်ဖွဲ့ဝင်တစ်ဦးက “စစ်တပ်က ဒီမြို့ကို ပြန်ရဖို့ အသည်းအသန် ကြိုးစားနေတာ။ မြေ ပြင်ကနေ စစ်ကြောင်းထိုးလို့မရတော့ လေယာဉ်ကိုပဲ အားကိုးနေရတာ။ နေ့တိုင်းလိုလိုလည်း လေယာဉ်က ဝဲနေတာပဲ။ ရွာသားတွေအနေနဲ့ အသွားအလာ သတိထားကြဖို့လိုတယ်ဗျ။ လေကြောင်းအန္တရာယ်ကို အမြဲ နားစွင့်ထားကြဖို့ပဲ ပြောချင်ပါတယ်” ဟု ပြောသည်။   မောတောင်မြို့သည် ထိုင်း-မြန်မာ နယ်စပ်ကုန်သွယ်ရေးအတွက် အလွန်အရေးပါသော မြို့တစ်မြို့ဖြစ်ပြီး ၁၉၉၀ ခုနှစ်တွင် စစ်တပ်က သိမ်းယူခဲ့ခြင်းဖြစ်သည်။   သို့သော် ၃၅ နှစ်အကြာ ၂၀၂၅ ခုနှစ်၊ နိုဝင်ဘာလတွင် တော်လှန်ရေးပူးပေါင်းတပ်များက ပြန်လည်သိမ်းပိုက်နိုင်ခဲ့ သည်။   စစ်တပ်သည် မြို့ကိုပြန်လည်ထိန်းချုပ်ရန် ငါးလကြာသည်အထိ စစ်ကြောင်းထိုးနေသော်လည်း တော်လှန်ရေး အင်အားစုများ၏ ပိတ်ဆို့ဖြတ်တောက်မှုကြောင့် မြို့အနားပင် မကပ်နိုင်ဘဲ လေကြောင်းကိုသာ အဓိက အသုံးပြု တိုက်ခိုက်နေရခြင်းဖြစ်သည်။   KNU အနေဖြင့် နိုင်ငံတကာ အသိုင်းအဝိုင်းနှင့် အာဆီယံနိုင်ငံများ အနေဖြင့် စိုးရိမ်ပူပန်မှုကို ထုတ်ဖော် ပြသခြင်း ထက် လက်တွေ့ကျသည့် အရေးယူဆောင်ရွက်မှုများ ပြုလုပ်ကာ စစ်တပ်၏ လေကြောင်းတိုက်ခိုက်မှုများကို ရပ်တန့်စေရန် တားဆီးပေးဖို့ ထုတ်ပြန်တိုက်တွန်းထားသည်။   #မောတောင်နယ်စပ်ကုန်သွယ်ရေး #မောတောင်မြို့ #လေကြောင်းတိုက်ခိုက်

မောတောင် နယ်စပ်ဂိတ်အနီး စစ်တပ်က ဗုံးကြဲတိုက်ခိုက်

မောတောင် နယ်စပ်ဂိတ်အနီး စစ်တပ်က ဗုံးကြဲတိုက်ခိုက် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၂၉ ရက်။  မြန်မာ-ထိုင်းနယ်စပ်၊ တနင်္သာရီမြို့…

  • April 29, 2026
KNU ပူးပေါင်းတပ်များ ဝေါလေဗျူဟာကုန်းကို ထိုးစစ်ဆင်နေပြီး တိုက်ပွဲ ပြင်းထန်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဧပြီလ ၂၉ ရက်။   မြန်မာ-ထိုင်းနယ်စပ်၊ မြဝတီမြို့တောင်ဘက်ရှိ စစ်တပ်၏ ‘ဝေါလေဗျူဟာကုန်း’ ကို ကရင်အမျိုးသား လွတ်မြောက်ရေးတပ်မတော် (KNLA) နှင့် တော်လှန်ရေးပူးပေါင်းတပ်ဖွဲ့များက အပြီးသတ်သိမ်းပိုက်နိုင်ရန် အရှိန်အဟုန်မြှင့် ထိုးစစ်ဆင်လျက်ရှိရာ တိုက်ပွဲများ ဆက်လက်ပြင်းထန်နေသည်။   ပြီးခဲ့သည့် ဧပြီလတတိယပတ်မှ စတင်ကာ တော်လှန်ရေးပူးပေါင်းတပ်များက ဝေါလေဗျူဟာစခန်းကို အလုံး အရင်းဖြင့် ဝင်ရောက်တိုက်ခိုက်ခဲ့ခြင်းဖြစ်ပြီး၊ လက်ရှိတွင် စစ်တပ်၏ ရှေ့တန်းကာကင်းစခန်းအချို့ကို ထပ်မံ သိမ်းပိုက်ထားနိုင်ပြီဖြစ်သည်။   စစ်တပ်ဘက်ကမူ ၎င်းတို့၏ ဗျူဟာစခန်း လက်မလွှတ်ရရေးအတွက် တစ်ရက်တည်းတွင်ပင် လေကြောင်းမှ ဗုံးအကြိမ် ၂၀ နီးပါး ကြဲချကာ ခုခံနေရသည်။   ထိုသို့ တိုက်ပွဲများပြင်းထန်နေစဉ်အတွင်း ဧပြီလ ၂၇ ရက်နေ့က စစ်တပ်ဘက်မှ ဂျက်ဖိုက်တာများဖြင့် မီးလောင် ဗုံးများ အသုံးပြုကာ တိုက်ခိုက်ခဲ့သဖြင့် ဝေါလေနှင့် ထီးသဲလယ်ကျေးရွာရှိ လူနေအိမ် ၃၀ ခန့် မီးလောင်ပျက်စီး သွားသည်ဟု တော်လှန်ရေး တပ်ဖွဲ့ဝင်တစ်ဦးက ပြောသည်။   မြေပြင်ရှိ တော်လှန်ရေးတပ်ဖွဲ့ဝင်တစ်ဦးက “၂၇ ရက်နေ့ နေ့လယ် ၁ နာရီလောက်မှာ ဗုံးလာကြဲတယ်။ ဂျက် ဖိုက်တာနဲ့ မီးလောင်ဗုံးတွေ အပါအဝင် ဗုံးအလုံးရေ တော်တော်များများ လာကြဲသွားတာပါ။ အဲ့ဒီတိုက်ခိုက်မှု ကြောင့် ဝေါလေနဲ့ ထီးသဲလယ်ရွာက အိမ်ပေါ့နော် ၃၀ လောက် မီးလောင်ပြာကျသွားခဲ့ရတယ်။ ကံကောင်းတာ က ဒေသခံတွေက တိုက်ပွဲအခြေအနေကြောင့် ကြိုတင်ရှောင်တိမ်းနေကြလို့ လူထိခိုက်မှုတော့ မရှိခဲ့ဘူး” ဟု ပြောသည်။   တိုက်ပွဲများကြောင့် ဝေါလေဒေသခံ အရပ်သား ၁၂ ဦးထက်မနည်း ထိခိုက်ဒဏ်ရာရရှိခဲ့ပြီး ဒေသခံများမှာလည်း ဘေးလွတ်ရာသို့ ထွက်ပြေးတိမ်းရှောင်နေကြရသည်။   ဝေါလေဒေသခံတစ်ဦးက “လေယာဉ်ကတော့ တောက်လျှောက်ဝဲပြီး ဗုံးကြဲနေတာပဲ။ စခန်းထဲက စစ်သားတွေ လည်း အပြင်ကို ထွက်ပြေးနေကြတယ်လို့ ကြားတယ်။ ရွာထဲမှာလည်း လက်နက်ကြီးကျည်တွေကျတော့ လူတွေက ထိုင်းဘက်ကမ်းကို ကူးဖို့ အထုပ်အပိုးတွေနဲ့ ပြင်နေကြရပြီ” ဟု ပြောသည်။   တစ်ဖက်တွင်လည်း စစ်တပ်သည် နယ်စပ်ကုန်သွယ်ရေး တံတားကို ဧပြီလ ၂၈ ရက်နေ့တွင် ပြန်ဖွင့်ရန် ထိုင်းအာဏာပိုင်များထံ စာပို့ အကြောင်းကြားထားကြောင်း ထိုင်းသတင်းအချို့က ဖော်ပြသည်။   မြဝတီတဖက်ခြမ်း မဲဆောက်မြို့မှ ဒေသခံတစ်ဦးက “ချစ်ကြည်ရေး တံတားဖွင့်ဖို့ မြန်မာအာဏာပိုင်တွေ Tak (တက်ခ်ခရိုင်) အာဏာပိုင်တွေကို စာပို့တယ်လို့ ကြားတယ်။ ဧပြီ ၂၈ ရက်မှာ ဖွင့်ဖို့ ဖွင့်လို့အဆင်ပြေပြီ ဆိုတဲ့အကြောင်းပေါ့ဗျာ။ ဒါက တကယ်တော့ ဘယ်လိုမှ မဖြစ်နိုင်တဲ့ကိစ္စ။ တိုက်ပွဲက နေ့တိုင်းလိုလို ဖြစ်နေတာလေ။ မြန်မာဘက်က သူတို့ဖြစ်ချင်တာကို ပြောနေတာမျိုးဗျ” ဟု ပြောသည်။   သို့သော်လည်း မြေပြင်တွင် စစ်တပ်ကပစ်ခတ်သည့် လက်နက်ကြီးကျည်များမှာ ထိုင်းနိုင်ငံဘက်ခြမ်းသို့ အကြိမ်ကြိမ်ကျရောက်နေသဖြင့် ထိုင်းအာဏာပိုင်များက နယ်စပ်လုံခြုံရေးကို အရေးပေါ်တပ်လှန့် သတိပေးထားသည်။   ဝေါလေဗျူဟာကုန်းသည် မြဝတီတောင်ဘက်ခြမ်းတွင် စစ်တပ်၏ နောက်ဆုံး အမာခံစခန်းဖြစ်သဖြင့် အဆိုပါ စခန်းသာ ကျဆုံးသွားပါက နယ်စပ်တစ်လျှောက် စစ်တပ် ကင်းစင်နယ်မြေ ဖြစ်လာမည်ဖြစ်သည်။   ဝေါလေဗျူဟာ ကုန်းသည် ထိုင်း-မြန်မာနယ်စပ်အား စောင့်ကြည့်စိုးမိုးနိုင်သည့် အမြင့်ပိုင်းနေရာတွင် ရှိခြင်းကြောင့် နယ်စပ်ဖြတ်ကျော်မှုများနှင့် ကုန်သွယ်ရေးလမ်းကြောင်းများကို ထိန်းချုပ်ထားနိုင်သည့် ဗျူဟာမြောက်ကုန်းတစ်ခု ဖြစ်သည်။   မြဝတီ - ဝေါလေ လမ်းပိုင်းကို စိုးမိုးထားနိုင်သည့် အတွက် ဤဒေသတွင်ရှိ စစ်ရေးလှုပ်ရှားမှုတွေအတွက် အချက်အခြာကျသည်။   ထို့ကြောင့် စစ်တပ်အနေဖြင့် လေကြောင်းတိုက်ခိုက်မှုများကို အရှိန်မြှင့်လုပ်ဆောင်နေသလို၊ ထိုင်းနိုင်ငံဘက်မှ တစ်ဆင့် စစ်ကူပို့ဆောင်နိုင်ရေး ကြိုးပမ်းနေသည်ဟူသော သတင်းများလည်း ထွက်ပေါ်နေသည်။   #ဝေါလေဗျူဟာကုန်း #KNLA #KNU #PDF #KNDO #ဝေါလေတိုက်ပွဲ

KNU ပူးပေါင်းတပ်များ ဝေါလေဗျူဟာကုန်းကို ထိုးစစ်ဆင်နေပြီး တိုက်ပွဲ ပြင်းထန်

KNU ပူးပေါင်းတပ်များ ဝေါလေဗျူဟာကုန်းကို ထိုးစစ်ဆင်နေပြီး တိုက်ပွဲ ပြင်းထန် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၂၉ ရက်။  မြန်မာ-ထို…

  • April 29, 2026
ရေဖြူမြို့နယ်အတွင်း ရော်ဘာခြံလုပ်သားတစ်ဦး မိုင်းနင်းမိ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဧပြီလ ၂၉ ရက်။   ထားဝယ်ခရိုင်၊ ရေဖြူမြို့နယ်၊ ကလိန်အောင်မြို့အနီးရှိ ရာဖူးကျေးရွာတွင် ရော်ဘာခြံလုပ်သားတစ်ဦး မိုင်းနင်း မိပြီး ပြင်းထန်ဒဏ်ရာများ ရရှိခဲ့သည့်အတွက် ခြေထောက်တစ်ဖက် ဖြတ်ပစ်ရမည့် အခြေအနေနှင့် ရင်ဆိုင်နေရ ကြောင်း ဒေသခံများက ပြောသည်။   ဧပြီလ ၂၈ ရက် နံနက်ပိုင်းက ရာဖူးရွာဟောင်းဘက်ရှိ ကားလမ်းဘေးမှ ခြံအတွင်းသို့ အသက် ၃၀ ခန့်အရွယ် ခြံလုပ်သားတစ်ဦး အလုပ်လုပ်ရန် သွားလာနေစဉ် မြေမြှုပ်မိုင်း နင်းမိခဲ့ခြင်း ဖြစ်သည်။   အဆိုပါ ပေါက်ကွဲမှုကြောင့် ၎င်းမှာ ပြင်းထန် ဒဏ်ရာများရရှိခဲ့ပြီး လက်ရှိတွင် ရေးမြို့ဆေးရုံသို့ ပို့ဆောင်ကာ အရေးပေါ် ဆေးကုသမှု ခံယူနေရသည်။   ဖြစ်စဉ်နှင့် ပတ်သက်၍ အသက် ၅၀ ခန့်အရွယ် ရွာသားတစ်ဦးက “မိုင်းနင်းမိတဲ့သူမှာ အပြင်းအထန် ဒဏ်ရာရ ရှိခဲ့တာ၊ ခြေထောက်တစ်ဖက်ကတော့ ဖြတ်ပစ်ရမဲ့ အခြေအနေထိ ရှိနေတယ်” ဟု ပြောသည်။   ရာဖူးကျေးရွာဝန်းကျင်တွင် ယခုဧပြီလအတွင်း၌ပင် မိုင်းပေါက်ကွဲမှုများ ဆက်တိုက် ဖြစ်ပွားနေသဖြင့် ဒေသခံ များမှာ ဥယျာဉ်ခြံလုပ်ငန်းခွင်သို့ သွားရောက်ရန် စိုးရိမ်ထိတ်လန့်နေကြသည်။       ဧပြီလ ၁၁ ရက်နေ့ကလည်း ရာဖူးကျေးရွာရှိ ရော်ဘာခြံတစ်ခုအတွင်း ရေပိုက်လိုင်း ပြုပြင်ရန်သွားသည့် အလုပ် သမား မိသားစုတစ်စု မိုင်းနင်းမိခဲ့ပြီး ကလေးငယ်များ အပါအဝင် မိသားစုဝင် ၅ ဦးစလုံး ဒဏ်ရာ ရရှိခဲ့သည့် ဖြစ်စဉ် ဖြစ်ပွားခဲ့သေးသည်။   ထို့ပြင် ဧပြီလဆန်းပိုင်းကလည်း ရာဖူးကျေးရွာအနီးရှိ သာယာမွန်ကျေးရွာမှ ဇနီးမောင်နှံနှစ်ဦး ခြံအတွင်းသို့ ဆိုင်ကယ်ဖြင့် သွားလာစဉ် မိုင်းနင်းမိခဲ့ရာ လူထိခိုက်မှု မရှိခဲ့သော်လည်း ဆိုင်ကယ် ပျက်စီးသွားခဲ့ကြောင်း သိရသည်။   ထားဝယ်ခရိုင်အတွင်း ဧပြီလတစ်လတည်းမှာပင် မိုင်းပေါက်ကွဲမှု သုံးကြိမ်အထိ ရှိလာခဲ့ပြီး အဆိုပါ ဖြစ်စဉ်များ အတွင်း ကလေးငယ်တစ်ဦး သေဆုံးကာ၊ ခြေတစ်ဖက် ဆုံးရှုံးရသူတစ်ဦး အပါအဝင် စုစုပေါင်း ၈ ဦးအထိ ထိခိုက်ဒဏ်ရာ ရရှိခဲ့ပြီ ဖြစ်သည်။   ထိုသို့ စိုက်ပျိုးရေးခြံများအတွင်း မိုင်းအန္တရာယ် များပြားလာခြင်းက ၎င်းတို့၏ အသက်မွေးဝမ်းကျောင်း လုပ်ငန်း များအပေါ် ကြီးမားသည့် ခြိမ်းခြောက်မှုတစ်ခု ဖြစ်နေကြောင်း ဒေသခံများက ပြောသည်။   #ရေဖြူမြို့နယ် #တနင်္သာရီတိုင်း #ထားဝယ်

ရေဖြူမြို့နယ်အတွင်း ရော်ဘာခြံလုပ်သားတစ်ဦး မိုင်းနင်းမိ

ရေဖြူမြို့နယ်အတွင်း ရော်ဘာခြံလုပ်သားတစ်ဦး မိုင်းနင်းမိ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၂၉ ရက်။  ထားဝယ်ခရိုင်၊ ရေဖြူမြို့နယ်၊ က…

  • April 29, 2026
အာရပ်စော်ဘွားများပြည်ထောင်စု (UAE) အိုပက် (OPEC) အဖွဲ့မှ နှုတ်ထွက်မည်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဧပြီလ ၂၉ ရက်။   ရေနံတင်ပို့သည့်နိုင်ငံများအဖွဲ့ (OPEC) တွင် နှစ်ပေါင်း ၆၀ ကြာ အဖွဲ့ဝင်အဖြစ် ရပ်တည်ခဲ့သည့် အာရပ်စော်ဘွားများပြည်ထောင်စု (UAE) သည် အဖွဲ့မှ နှုတ်ထွက်တော့မည်ဖြစ်ကြောင်း ဧပြီလ ၂၈ ရက်နေ့တွင် တရားဝင် ထုတ်ပြန်ခဲ့သည်။   ယင်းဆုံးဖြတ်ချက်သည် ၂၀၂၆ ခုနှစ်၊ မေလ ၁ ရက်နေ့တွင် စတင်သက်ဝင်မည် ဖြစ်သည်။   UAE သည် ၎င်းတို့၏ ရေနံထုတ်လုပ်မှု စွမ်းရည်ကို တိုးမြှင့်လိုသော်လည်း OPEC ၏ ထုတ်လုပ်မှု ကန့်သတ်ချက် (Quotas) မူဝါဒများကြောင့် အဟန့်အတား ဖြစ်နေခြင်းဖြစ်သည်။   ထို့အပြင် UAE သည် ရေနံအပြင် အဆင့်မြင့်နည်းပညာ (AI) နှင့် ခရီးသွားလုပ်ငန်းများသို့ စီးပွားရေးပုံစံ ပြောင်းလဲရန် ကြိုးပမ်းနေသည့်အတွက် ရေနံမှ ရနိုင်သမျှ အကျိုးအမြတ်ကို အပြည့်အဝရယူထားလိုသည့် သဘောထားရှိနေသည်။   OPEC ၏ တတိယအကြီးဆုံး ထုတ်လုပ်သူ UAE နှုတ်ထွက်သွားခြင်းကြောင့် အဖွဲ့၏ ဈေးကွက်ထိန်းချုပ်နိုင်စွမ်း အားနည်းသွားနိုင်သည်။   လက်တလောတွင် UAE က ရေနံတိုးမြှင့်ထုတ်လုပ်လာပါက ရေနံဈေးနှုန်း ကျဆင်းနိုင်သော်လည်း၊ လက်ရှိ အီရန်-အစ္စရေး-အမေရိကန် တင်းမာမှုများကြောင့် ဟော်မုဇ်ရေလက်ကြားတွင် ပိတ်ဆို့မှုများရှိနေပါက ဈေးနှုန်းဆက်လက်မြင့်တက်နေနိုင်သေးသည်။   အိန္ဒိယနှင့် တရုတ်ကဲ့သို့ ရေနံတင်သွင်းသည့် နိုင်ငံများအတွက် ရေရှည်တွင် ဈေးနှုန်းသက်သာလာနိုင်သည့် အခွင့်အလမ်းရှိသော်လည်း၊ တစ်ဖက်တွင်မူ OPEC အဖွဲ့အတွင်း စည်းလုံးမှုပျက်ပြားခြင်းကြောင့် ရေနံဈေးကွက် မတည်မငြိမ်ဖြစ်ပြီး အတက်အကျ အရမ်းမြန်လာနိုင်မည်ဖြစ်ကြောင်း ပညာရှင်များက သုံးသပ်ထားသည်။   #UAE #OPEC

အာရပ်စော်ဘွားများပြည်ထောင်စု (UAE) အိုပက် (OPEC) အဖွဲ့မှ နှုတ်ထွက်မည်

အာရပ်စော်ဘွားများပြည်ထောင်စု (UAE) အိုပက် (OPEC) အဖွဲ့မှ နှုတ်ထွက်မည် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၂၉ ရက်။  ရေနံတင်ပို့သည့်…

  • April 29, 2026
တရုတ်၏ ဒုတိယအကြီးဆုံး ချစ်ပ်ကုမ္ပဏီ Hua Hong အား အမေရိကန်က ပိတ်ဆို့   သတင်းနှင့် မီဒိယာ ကွန်ရက်။
၂၀၂၆ ခုနှစ်၊ ဧပြီလ ၂၉ ရက်။   တရုတ်နိုင်ငံ၏ ဉာဏ်ရည်တု (AI) နည်းပညာ တိုးတက်လာမှုကို ဟန့်တားရန်အတွက် အမေရိကန် ကူးသန်းရောင်းဝယ်ရေးဝန်ကြီးဌာနသည် တရုတ်၏ ဒုတိယအကြီးဆုံး ချစ်ပ်ထုတ်လုပ်ရေးကုမ္ပဏီဖြစ်သော Hua Hong ဆီသို့ စက်ပစ္စည်းများ တင်ပို့ခြင်းမပြုရန် အမေရိကန်ကုမ္ပဏီများကို ပြီးခဲ့သည့်အပတ်က ညွှန်ကြားခဲ့သည်။   Hua Hong လက်အောက်ခံ Huali Microelectronics သည် အဆင့်မြင့် ၇ နာနိုမီတာ (7-nm) ချစ်ပ်ပြားများ ထုတ်လုပ်ရန် ပြင်ဆင်နေသည့်အပေါ် အမေရိကန်က အမျိုးသားလုံခြုံရေးအရ စိုးရိမ်ခြင်းဖြစ်သည်။   အမေရိကန်၏ ပိတ်ဆို့မှုခံထားရသော Huawei ကုမ္ပဏီသည် ၎င်းတို့၏ AI ချစ်ပ်များ ထုတ်လုပ်ရန် Hua Hong နှင့် ပူးပေါင်းနေသည်ဟု ယူဆချက်များကြောင့် ယခုကဲ့သို့ အရေးယူခဲ့ခြင်းဖြစ်သည်။   ယခုပိတ်ဆို့မှုအရ Lam Research, Applied Materials နှင့် KLA စသည့် အမေရိကန်၏ ထိပ်တန်းနည်းပညာကုမ္ပဏီကြီးများသည် ဒေါ်လာဘီလီယံနှင့်ချီသော အရောင်းအဝယ်များ ဆုံးရှုံးမှု ရှိမည်ဖြစ်သည်။   သို့သော်လည်း အမေရိကန်အစိုးရအနေဖြင့် တရုတ်၏ အဆင့်မြင့်နည်းပညာကဏ္ဍသို့ စက်ပစ္စည်းစီးဆင်းမှုကို အလျင်အမြန် ထိန်းချုပ်ရန် ဆုံးဖြတ်ခဲ့ခြင်းဖြစ်သည်။   #HuaHong #HualiMicroelectronics

တရုတ်၏ ဒုတိယအကြီးဆုံး ချစ်ပ်ကုမ္ပဏီ Hua Hong အား အမေရိကန်က ပိတ်ဆို့

တရုတ်၏ ဒုတိယအကြီးဆုံး ချစ်ပ်ကုမ္ပဏီ Hua Hong အား အမေရိကန်က ပိတ်ဆို့ သတင်းနှင့် မီဒိယာ ကွန်ရက်။၂၀၂၆ ခုနှစ်၊ ဧပြီလ ၂၉ ရက်။  တရုတ်နိုင်ငံ၏ ဉာဏ…

  • April 29, 2026
ဦးမင်းအောင်လှိုင် သမ္မတဖြစ်လာပြီးနောက် EU က မြန်မာအပေါ် ပိတ်ဆို့မှု သက်တမ်းတိုး   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဧပြီလ ၂၉ ရက်။   မြန်မာနိုင်ငံ၏ လက်ရှိအခြေအနေများကြောင့် ဥရောပသမဂ္ဂ (EU) က ချမှတ်ထားသည့် ကန့်သတ်ပိတ်ဆို့မှုများကို ဧပြီလ ၂၇ ရက်နေ့တွင် နောက်ထပ် (၁၂) လ သက်တမ်းတိုးမြှင့်လိုက်ကြောင်း ကြေညာသည်။   ယင်းအရေးယူမှုများသည် ၂၀၂၇ ခုနှစ်၊ ဧပြီလ ၃၀ ရက်နေ့အထိ အာဏာသက်ရောက်မည်ဖြစ်ကြောင်း ထည့်သွင်း ဖော်ပြထားသည်။   အီးယူ၏ နှစ်ပတ်လည် ပြန်လည်သုံးသပ်ချက်အရ မြန်မာနိုင်ငံတွင် ဒီမိုကရေစီယန္တရားကို ထိခိုက်စေသည့် လုပ်ရပ်များနှင့် ဆိုးရွားသော လူ့အခွင့်အရေး ချိုးဖောက်မှုများ ဆက်လက်ဖြစ်ပေါ်နေခြင်းကြောင့် ယခုကဲ့သို့ သက်တမ်းတိုးရန် ဆုံးဖြတ်ခဲ့ခြင်းဖြစ်သည်။   လက်ရှိတွင် ဗိုလ်ချုပ်ကြီးများနှင့် ဗိုလ်ချုပ်ကြီးဟောင်းများ အပါအဝင် လူပုဂ္ဂိုလ် (၁၀၅) ဦးနှင့် အဖွဲ့အစည်း (၂၂) ခုကို ပိတ်ဆို့ အရေးယူမှု စာရင်းသွင်းထားသည်။   အဆိုပါပုဂ္ဂိုလ်များနှင့် အဖွဲ့အစည်းများ၏ အီးယူအတွင်းရှိ ပိုင်ဆိုင်မှုများကို ထိန်းချုပ်ဖြတ်တောက်ထားပြီး၊ ၎င်းတို့အား တိုက်ရိုက်ဖြစ်စေ၊ သွယ်ဝိုက်၍ဖြစ်စေ ငွေကြေးထောက်ပံ့ခွင့်ကို တားမြစ်ထားသည်။   ထို့ပြင် ဥရောပသမဂ္ဂအဖွဲ့ဝင်နိုင်ငံများသို့ ခရီးသွားလာခွင့်ကိုလည်း ပိတ်ပင်ထားသည်။   ပြည်သူလူထုကို ဖိနှိပ်ရာတွင် အသုံးပြုနိုင်သည့် ဆက်သွယ်ရေး စောင့်ကြည့်ရေးကိရိယာများ၊ အရပ်ဘက်-စစ်ဘက် နှစ်မျိုးသုံး ပစ္စည်းများ တင်ပို့ခွင့်ကို ပိတ်ပင်ထားသည်။ စစ်ဘက်ဆိုင်ရာ သင်တန်းပေးခြင်းနှင့် ပူးပေါင်းဆောင်ရွက်မှုများ အားလုံးကိုလည်း ရပ်ဆိုင်းထားသည်။   အီးယူသည် ၂၀၂၁ ခုနှစ် အာဏာသိမ်းမှုကို ပြင်းထန်စွာ ရှုတ်ချထားပြီး စစ်ကောင်စီအား တရားဝင်မှုပေးစေမည့် အကူအညီများနှင့် တိုက်ရိုက်ဘဏ္ဍာရေး ထောက်ပံ့မှုများကိုလည်း ဆက်လက်ဆိုင်းငံ့ထားမည်ဖြစ်သည်။   #ပိတ်ဆို့အရေးယူမှု #EU

ဦးမင်းအောင်လှိုင် သမ္မတဖြစ်လာပြီးနောက် EU က မြန်မာအပေါ် ပိတ်ဆို့မှု သက်တမ်းတိုး

ဦးမင်းအောင်လှိုင် သမ္မတဖြစ်လာပြီးနောက် EU က မြန်မာအပေါ် ပိတ်ဆို့မှု သက်တမ်းတိုး သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၂၉ ရက်။  မြန်မ…

  • April 29, 2026
စက်သုံးဆီရှားပါးမှုကြောင့် ကမ်းနီး ငါးဖမ်းလုပ်ငန်းများ ရပ်လုနီးဖြစ်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဧပြီလ ၂၈ ရက်။   စက်သုံးဆီရှားပါးမှုကြောင့် တနင်္သာရီတိုင်း အတွင်း ကမ်းနီး ငါးဖမ်းလုပ်ငန်းများ ရပ်နားရမည့် အခြေအနေနှင့် ရင်ဆိုင်နေရသည်ဟု ဒေသတွင်း လေ့လာစောင့်ကြည့်နေသည့် FE5 Tanintharyi အဖွဲ့က ပြောသည်။     မြန်မာနိုင်ငံတောင်ပိုင်း၊ တနင်္သာရီတိုင်းအတွင်း စက်သုံးဆီဈေးနှုန်းများ အဆမတန်မြင့်တက်လာမှုနှင့် ကန့်သတ် ချက်များကြောင့် ဒေသ၏ အဓိကစီးပွားရေးဖြစ်သော ကမ်းနီးငါးဖမ်းလုပ်ငန်းများ အခက်ကြုံနေရခြင်း ဖြစ်သည်။   တနင်္သာရီတိုင်း အတွင်းရှိ မြို့နယ် ၁၀ မြို့နယ်အနက် ထားဝယ်နှင့် တနင်္သာရီမြို့နယ်တို့မှအပ ကျန်ရှိသည့် ငါးဖမ်းလုပ်ငန်းကို အဓိက လုပ်ကိုင်ကြသည့် မြို့နယ် ၈ မြို့နယ်တွင် စက်သုံးဆီ ရှားပါးမှုနှင့် ဈေးနှုန်းမြင့်တက်မှု ဒဏ်ကို ပိုမိုရင်ဆိုင်နေရသည်။   လက်ရှိတွင် ရေလုပ်သားအများစုမှာ ပင်လယ်ပြင်သို့ ငါးဖမ်းထွက်ရန် အဆင်မပြေတော့သဖြင့် လုပ်ငန်းများကို ယာယီရပ်နားကာ နီးစပ်ရာ ကျပန်းအလုပ်များကိုသာ လုပ်ကိုင်နေကြရသည်။   FE5 Tanintharyi ၏ အယ်ဒီတာတစ်ဦးက “အခုကြုံတွေ့နေရတာက ကမ်းနီး ရေလုပ်ငန်းတွေ ဖြစ်တယ်ပေါ့ နော်။ တနင်္သာရီတိုင်းမှာ ၁၀ မြို့နယ် ရှိတဲ့အထဲမှာ ထားဝယ်နဲ့ တနင်္သာရီမြို့နယ်ကတော့ ပင်လယ်ငါးဖမ်း လုပ် ငန်းက နည်းတော့ အဲ့ဒီ မြို့နယ် ၂ ခုက လွဲရင် ကျန်တဲ့ ၈ မြို့နယ်ကတော့ အဲ့ဒီအခက်အခဲတွေ ရင်ဆိုင်နေရတဲ့ အနေအထား ရှိတယ်ပေါ့နော်။ အများစု ကတော့ ယာယီ ရပ်နားထားကြတဲ့ အနေအထား ရှိတယ်ပေါ့လေ။ မိသားစုဝင်ငွေ ရဖို့အတွက်က နီးစပ်ရာ အလုပ်တွေ ရွာထဲမှာရှိတဲ့ အလုပ်တွေကို လုပ်ကိုင် စားသောက်နေကြတဲ့ အနေအထား ရှိတယ်ပေါ့နော်” ဟု ပြောသည်။   ကမ်းဝေးငါးဖမ်း လုပ်ငန်းများမှာမူ ဧပြီလ ၁ ရက်နေ့မှ ဇွန်လ ၃၀ ရက်နေ့အထိ ငါးသားပေါက်ရာသီအဖြစ် သတ် မှတ်ကာ ၃ လကြာ ပိတ်ထားလေ့ရှိသဖြင့် လက်ရှိတွင် ပုံမှန်အတိုင်း ရပ်နားထားသော်လည်း၊ နေ့စဉ်ဝမ်းရေး အတွက် အားကိုးနေရသည့် ကမ်းနီးလှေငယ်များမှာမူ စက်သုံးဆီဈေးနှုန်းကြောင့် အကျပ် ဆိုက်နေခြင်း ဖြစ်သည်။   တနင်္သာရီတိုင်းအတွင်း စက်သုံးဆီဈေးနှုန်းသည် ယခင်က တစ်ပီပါလျှင် ကျပ် ၇ သိန်းဝန်းကျင်သာ ရှိခဲ့သော် လည်း လက်ရှိတွင် ၁၄ သိန်းမှ သိန်း ၂၀ ကျော်အထိ မြင့်တက်သွားခဲ့သည်။   ထိုသို့ ဈေးနှုန်းမြင့်တက်ရခြင်းမှာ လက်ရှိအသွင်ပြောင်း စစ်အစိုးရ၏ စက်သုံးဆီဆိုင်များအပေါ် တင်းကျပ်သည့် မူဝါဒများနှင့် သယ်ယူပို့ဆောင်ရေး ကန့်သတ်ချက်များကြောင့် ဖြစ်သည်ဟု ဒေသခံများက ဆိုသည်။ FE5 Tanintharyi ၏ အယ်ဒီတာက “လက်ရှိ အသွင်ပြောင်း စစ်အစိုးရကနေပြီးတော့ စစ်သုံးဆီနဲ့ ပတ်သက် တဲ့ မူဝါဒကို သူတို့က တင်းကြပ်တယ်။ စက်သုံးဆီရောင်းနေတဲ့ အရောင်းဆိုင်တွေမှာလည်း သူတို့ ဘယ်လောက်ပဲ ရောင်းပါ ဆိုတာမျိုးနဲ့ စက်သုံးဆီက လိုတဲ့နေရာ ပို့လို့မရတဲ့ အနေအထား ဖြစ်လာတယ်ပေါ့နော်။ စက်သုံးဆီ ဂယက် မဖြစ်ခင်တုန်းကဆိုရင် စက်သုံးဆီ တစ်ပီပါကို ၇ သိန်းဝန်ကျင်ပဲ ရှိရာကနေ အခုလက်ရှိမှာ ၁၄ သိန်း၊ အမြင့်ဆုံး အနေအထားမှာဆိုရင် သိန်း ၂၀ ကျော် အထိ ရှိသွားတယ်ပေါ့နော်” ဟု ဆက်လက် ရှင်းပြသည်။   ထို့ပြင် ရေလုပ်သားများ အနေဖြင့် စက်သုံးဆီကို သင့်တင့်သည့်ဈေးနှုန်းဖြင့် အလွယ်တကူ ဝယ်ယူခွင့်ရရှိရန်နှင့် ဖမ်းဆီးရမိသော ငါးများကိုလည်း ထိုက်တန်သည့် ဈေးကောင်းရရှိရန် မျှော်လင့်နေကြသော်လည်း လက်ရှိတွင် လုပ်ငန်းရှင်အများစုမှာ အခြေအနေကို စောင့်ကြည့်နေကြရဆဲ ဖြစ်သည်ဟု ဒေသခံများက ပြောသည်။   ဒေသခံသတင်းရင်းမြစ်က “ဒီစက်သုံးဆီကို လောလော လတ်လတ် ဝယ်ခွင့်ရဖို့ရယ် တင့်သင့်မျှတတဲ့ ဈေးနှုန်း ဖြစ်အောင်ရယ် နောက်ပြီး တော့ ဖမ်းဆီးရမိတဲ့ ငါးတွေကို ဈေးကောင်းကောင်းနဲ့ ပြန်ရောင်းခွင့်ရဖို့ မျှော်လင့်တာပေါ့လေနော်။ ဆိုတော့ လက်ရှိ အခင်းအကျင်း ကတော့ စက်သုံးဆီဂယက်ကြောင့် ကမ်းနီးငါးဖမ်း လုပ်ငန်းရှင် အများစုကတော့ စောင့်ကြည့်နေကြဆဲ အခြေအနေ ဖြစ်တယ်ပေါ့နော်” ဟု ၎င်းက ပြောသည်။   ရေရှည်တွင် စက်သုံးဆီ အခက်အခဲ ဆက်လက်ဖြစ်ပေါ်နေပါက တနင်္သာရီတိုင်း၏ အဓိက မှီခိုအားထားရာ ဖြစ်သော ငါးဖမ်းလုပ်ငန်းကြီး တစ်ခုလုံး ရပ်ဆိုင်းသွားနိုင်သည်ဟု ဒေသခံများက ပြောသည်။   လက်ရှိတွင် စက်သုံးဆီရှားပါးမှု ဂယက်ကြောင့် ရေလုပ်ငန်းသာမက ဥယျာဉ်ခြံလုပ်ငန်းနှင့် စိုက်ပျိုးရေးလုပ်ငန်း များပါ ထိခိုက်နေပြီး၊ ဒေသတွင်း တိုက်ပွဲများနှင့် ပဋိပက္ခများကြောင့် ဝင်ငွေကျဆင်းနေသည့်ကြားမှ ကုန်ဈေး နှုန်း ကြီးမြင့်မှု ဒဏ်ကိုပါ ထပ်ဆင့်ရင်ဆိုင်နေကြရသည်။   #ကမ်းနီးငါးဖမ်းလုပ်ငန်း #စက်သုံးဆီစျေးနှုန်းမြင့်တက် #ပင်လယ်ငါးဖမ်းလုပ်ငန်း #ရေလုပ်သား

စက်သုံးဆီရှားပါးမှုကြောင့် ကမ်းနီး ငါးဖမ်းလုပ်ငန်းများ ရပ်လုနီးဖြစ်

စက်သုံးဆီရှားပါးမှုကြောင့် ကမ်းနီး ငါးဖမ်းလုပ်ငန်းများ ရပ်လုနီးဖြစ် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၂၈ ရက်။  စက်သုံးဆီရှားပါးမ…

  • April 28, 2026
စစ်တပ်စစ်ကြောင်းများ အင်းတော်သို့ ထိုးစစ်ဆင်၊ မြို့ခံများ ရှောင်တိမ်းနေရ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဧပြီလ ၂၈ ရက်။   အင်းတော်မြို့ကို ဦးတည်သည့် စစ်တပ်စစ်ကြောင်း နဘားလမ်းဆုံအနီးသို့ ရောက်ရှိလာ၊ မြို့ခံများ ဘေး လွတ်ရာသို့ တိမ်းရှောင်နေကြရသည်။   အမျိုးသားညီညွတ်ရေး အစိုးရ (NUG) နှင့် တော်လှန်ရေး အင်အားစုများ သိမ်းပိုက်ထားသည့် စစ်ကိုင်းတိုင်း၊ အင်းတော်မြို့ကို ပြန်လည်ထိန်းချုပ်ရန် စစ်တပ်၏ စစ်ကော်မရှင်တပ်ဖွဲ့များက အင်အားအလုံးအရင်းဖြင့် ထိုးစစ် ဆင်လာရာ လက်ရှိတွင် အင်းတော်မြို့နှင့် အလွန်နီးကပ်သည့် နဘားလမ်းဆုံအနီးသို့ ရောက်ရှိလာခြင်း ဖြစ် သည်။   ကသာမြို့ဘက်မှ ထွက်ခွာလာသည့် အဆိုပါ စစ်ကော်မရှင်စစ်ကြောင်းကို ကသာ-နဘား-အင်းတော် လမ်းပိုင်း တစ်လျှောက်တွင် တော်လှန်ရေးအင်အားစုများက ကြားဖြတ်တိုက်ခိုက်ခဲ့သဖြင့် ယမန်နေ့အထိ တိုက်ပွဲများ ပြင်း ထန်စွာ ဖြစ်ပွားခဲ့သည်။   သို့သော်လည်း ယနေ့ ဧပြီလ ၂၈ ရက် နံနက်ပိုင်းတွင် စစ်တပ် စစ်ကြောင်းသည် နဘားလမ်းဆုံနှင့် ၅ မိုင်ခန့်သာ ကွာဝေးတော့သည့် နတ်ပေါက်ဆင်စခန်းသို့ ရောက်ရှိလာခြင်း ဖြစ်သည်။   စစ်ကိုင်းနှင့် ကချင်အစပ်မှ ကာကွယ်ရေးတပ်ဖွဲ့ဝင်တစ်ဦးက “စစ်ကြောင်းက နဘားလမ်းဆုံရောက်တော့မှာ။ ဆင်စခန်းရောက်နေပြီ။ ဆင်စခန်းဆိုတာက နဘားလမ်းဆုံနဲ့ ၅ မိုင်လောက်ပဲ။ အရပ်သားတွေလည်း ထွက်နေ ရတာ အမှန်ပါပဲ။ အင်အားကလည်း သူတို့က တော်တော်များတယ်ပြောတယ်” ဟု မြေပြင်အခြေအနေကို ပြော သည်။   အင်းတော်မြို့နှင့် နဘားလမ်းဆုံသည် ဆိုင်ကယ်ဖြင့် သွားလာပါက ၁၃ မိနစ်ခန့်သာ ဝေးကွာသည့် အကွာအဝေး ဖြစ်သဖြင့် စစ်တပ်စစ်ကြောင်းသည် မြို့နှင့် အလွန်နီးကပ်နေပြီဖြစ်ကာ မြို့ခံများသည်လည်း ပြီးခဲ့သည့် ရက်ပိုင်း မှစတင်၍ ဘေးလွတ်ရာ တောတောင်များနှင့် ကျေးရွာများသို့ ကြိုတင်ရွှေ့ပြောင်း တိမ်းရှောင်နေကြရသည်။   ယခု စစ်ကြောင်းသည် တကောင်းနှင့် ထီးချိုင့်မြို့တို့ကို သိမ်းပိုက်ခဲ့သည့် စစ်တပ်လက်အောက်ခံ တပ်ဖွဲ့များဖြစ် ပြီး စစ်ကိုင်းတိုင်း မြောက်ပိုင်းနှင့် ကချင်ပြည်အစပ်ရှိ လမ်းကြောင်းများကို ပြန်လည်စိုးမိုးရန် ကြိုးပမ်းလာခြင်း ဖြစ်ကြောင်း သုံးသပ်ပြောဆိုမှုများ ရှိနေသည်။   နောက်ထပ် ကာကွယ်ရေးတပ်ဖွဲ့ဝင်တစ်ဦးကလည်း “သူတို့ဘက်က ကသာနဲ့ အင်းတော်တို့ကိုသာ စိုးမိုးသွားနိုင် ပြီ ဆိုရင်တော့ အစစအရာရာ ခက်ခဲသွားမယ့် အလားအလာတွေ ရှိနေပါတယ်။ ကသာမြို့အထွက် ကသာနဲ့ အင်းတော်ကြားမှာ တိုက်ပွဲတွေ ဖြစ်နေတာဟုတ်တယ်။ စစ်ကောင်စီတွေရော ကျဆုံးမှုတွေ ရှိတယ်လို့ သိရ တယ်။ သူတို့ဘက်က အင်းတော်မြို့ကို သိမ်းပိုက်ဖို့ ကြုံးဝါးထားတာလည်းရှိတယ်။ အဲ့အတိုင်းပဲ စစ်ရေး လှုပ် ရှားလာတယ်။ အဲ့တော့ တိုက်ပွဲဖြစ်တယ်” ဟု ပြောသည်။   အင်းတော်မြို့သည် ပြီးခဲ့သည့် ၂၀၂၅ ခုနှစ်၊ ဧပြီလတွင် တော်လှန်ရေးအင်အားစုများ လက်အောက်သို့ ကျရောက် ခဲ့ခြင်းဖြစ်ပြီး၊ ယခုအခါ တစ်နှစ်အတိအကြာတွင် စစ်တပ်က မြို့ကို ပြန်လည်ရရှိရန် အပြင်းအထန် ကြိုးပမ်းလာ ခြင်း ဖြစ်သည်။   စစ်ရေးနှင့် နိုင်ငံရေး လေ့လာသူများ၏ အဆိုအရ စစ်တပ်သည် ဧရာဝတီ မြစ်ကြောင်းကို အသုံးပြု၍ နှစ်စဉ် စစ်အင်အား ဖြည့်တင်းလေ့ရှိရာ၊ ယခုနှစ် မိုးတွင်းကာလ မရောက်မီတွင် မြစ်ကြောင်းနှင့် ကုန်းလမ်း ဆက်သွယ် ရေး အချက်အချာကျသည့် နယ်မြေများကို အမိအရ ပြန်လည်ထိန်းချုပ်ရန် ထိုးစစ်ဆင်လာခြင်းဖြစ်သည်။   #အင်းတော်မြို့ #ကသာ #ထီးချိုင့်

စစ်တပ်စစ်ကြောင်းများ အင်းတော်သို့ ထိုးစစ်ဆင်၊ မြို့ခံများ ရှောင်တိမ်းနေရ

စစ်တပ်စစ်ကြောင်းများ အင်းတော်သို့ ထိုးစစ်ဆင်၊ မြို့ခံများ ရှောင်တိမ်းနေရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၂၈ ရက်။  အင်းတော်မြို…

  • April 28, 2026
ထိုင်းပြန် သီရိလင်္ကာသံဃာတော် ၂၂ ပါးထံမှ ဆေးခြောက် အမြောက်အမြား ဖမ်းဆီးရမိ   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ ဧပြီလ ၂၈ ရက်။   ထိုင်းနိုင်ငံမှ ဘုရားဖူးခရီးစဉ်အပြီး ပြန်လည်ရောက်ရှိလာသည့် သီရိလင်္ကာသံဃာတော် ၂၂ ပါးကို ကိုလံဘိုလေဆိပ်၌ အပြင်းစားဆေးခြောက် (Kush) အလေးချိန် ၁၁၀ ကီလိုဂရမ် မှောင်ခိုသယ်ဆောင်မှုဖြင့် ဖမ်းဆီးထိန်းသိမ်းလိုက်သည်။   ဖမ်းဆီးရမိသည့် မူးယစ်ဆေးဝါးများမှာ အမေရိကန်ဒေါ်လာ ၃.၅ သန်းကျော် တန်ဖိုးရှိပြီး ၎င်းမှာ ကိုလံဘိုလေဆိပ်၏ သမိုင်းတစ်လျှောက် တစ်ကြိမ်တည်းနှင့် အများဆုံး ဖမ်းဆီးရမိသည့် အမှုဖြစ်သည်။   သံဃာတော်များမှာ စီးပွားရေးလုပ်ငန်းရှင်တစ်ဦး၏ လှည့်ဖြားစေခိုင်းမှုကို ခံရခြင်းဖြစ်သည်ဟု ယူဆရသည်။   သံဃာတော်များ ကို စီးပွားရေး လုပ်ငန်းရှင် တစ်ဦးက ထိုင်းနိုင်ငံသို့ အခမဲ့/အလှူ ခရီးစဉ် အဖြစ် တကာခံခဲ့ခြင်း ဖြစ်သည်။   သံဃာများမှာ ၎င်းတို့ထံတွင် ပါလာသည့် ပစ္စည်းများမှာ ကျောင်းသုံး ပစ္စည်းကရိယာများ ဖြစ်ပြီး အလှူပေးလိုက်သည့် ပစ္စည်းများအဖြစ် သိထားခဲ့ကြသည်။   သို့သော်လည်း ၎င်းတို့၏ လက်ကိုင်ဖုန်းများအတွင်း၌ ဝိနည်းနှင့်မညီသည့် ဓာတ်ပုံများ တွေ့ရှိရခြင်းကြောင့် ဝေဖန်မှုများ ထွက်ပေါ်လျက်ရှိသည်။   လက်ရှိတွင် ခရီးစဉ်စီစဉ်ပေးခဲ့သည့် ဦးဇင်းတစ်ပါးကိုပါ ထပ်မံဖမ်းဆီးထားပြီး တရားရုံးက သံဃာတော်များအား (၇) ရက်ကြာ ချုပ်မိန့်ပေးကာ စုံစမ်းစစ်ဆေးမှုများ ဆက်လက်လုပ်ဆောင်လျက်ရှိသည်။   #ဆေးခြောက် #သိရိလင်္ကာသံဃာတော်

ထိုင်းပြန် သီရိလင်္ကာသံဃာတော် ၂၂ ပါးထံမှ ဆေးခြောက် အမြောက်အမြား ဖမ်းဆီးရမိ 

ထိုင်းပြန် သီရိလင်္ကာသံဃာတော် ၂၂ ပါးထံမှ ဆေးခြောက် အမြောက်အမြား ဖမ်းဆီးရမိ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၂၈ ရက်။  ထိုင်းနိုင…

  • April 28, 2026
×Close