သတင်း

ရခိုင်-ဧရာဝတီအစပ်တွင် တိုက်ပွဲပြင်းထန်ပြီး စစ်တပ်အလောင်းနှင့် လက်နက်များ AA သိမ်းဆည်းရမိ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၅ ရက်။   ရခိုင်-ဧရာဝတီနယ်စပ်၊ ရေကြည်နှင့် သာပေါင်းမြို့နယ်တို့တွင် အာရက္ခတပ်တော် (AA) နှင့် စစ်တပ်တို့အကြား တိုက်ပွဲများ ဆက်လက်ပြင်းထန်နေပြီး စစ်တပ်ဘက်မှ အကျအဆုံးများကာ အလောင်းများနှင့် လက်နက်ခဲယမ်း များကို AA က သိမ်းဆည်းရမိခဲ့သည်။   မြေပြင်၌ နှစ်ဖက်ထိတွေ့တိုက်ပွဲများ မဖြစ်ပွားသည့် ရက်များတွင်မူ စစ်တပ်ဘက်မှ လက်နက်ကြီးနှင့် ဒရုန်းဖြင့် ပစ်ခတ်တိုက်ခိုက်ခြင်း၊ လေကြောင်းမှ ဗုံးကြဲတိုက်ခိုက်ခြင်းတို့ကို နေ့စဉ်နီးပါး လုပ်ဆောင်လျက်ရှိသည်။   ရေကြည်ဒေသခံ စစ်ရေးသတင်းရင်းမြစ်တစ်ဦးက “အဓိကဖြစ်နေတာ ရေကြည်နဲ့ သာပေါင်းပါ၊ အဲ့ဒီနှစ်မြို့နယ် နဲ့ ထိစပ်တဲ့ ရခိုင်ရိုးမတောင်ခြေမှာ တိုက်ပွဲဆက်တိုက်ရှိလာတယ်။ သိရသလောက်က စစ်တပ်က ထိုးစစ်ဆင်ပြီး ရင် ပြန်ဆုတ်ရတာများတော့ အထိအခိုက်ရှိတယ်” ဟု ပြောသည်။   လက်ရှိ တိုက်ပွဲဖြစ်ပွားနေသော အဓိကနေရာများတွင် ဇူလိုင်လအတွင်း မိုးသည်းထန်စွာရွာသွန်းမှုနှင့် ရာသီဥတု အခြေအနေကြောင့် နှစ်ဖက်ထိုးစစ်နှင့် ခံစစ်အနိမ့်အမြင့်ရှိခဲ့သော်လည်း တိုက်ပွဲမရှိသောရက်ဟူ၍ မရှိသလောက် ဖြစ်ကာ တိုက်ပွဲကြီးနှင့် တိုက်ပွဲငယ်များမှာ နေ့စဉ်နီးပါး တစ်နေရာရာ၌ ဖြစ်ပွားနေဆဲဖြစ်ကြောင်း AA က ဩဂုတ်လ ၅ ရက်နေ့တွင် ထုတ်ပြန်ထားသည်။   ဒေသခံတစ်ဦးက “ဂွဘက်၊ သံတွဲဘက် ဗုံးသွားကြဲတဲ့ လေယာဉ်တွေဟာ ရေကြည် သာပေါင်း အစပ်မှာလည်း ကြဲတယ်။ ပြည်သူ့စစ်တွေ စစ်မှုထမ်းတွေအစ အကျအဆုံး များနေပါ တယ်။ သာပေါင်းလေးဘက်၊ ရေကြည် မြို့နယ်၊ ရုံးပင်လေးဘက်မှာ တိုက်ပွဲအဖြစ်များပြီး အင်္ဂပူနဲ့လေးမျက်နှာဘက် နည်းနည်းငြိမ်နေပါတယ်” ဟု ပြောသည်။   စစ်တပ်သည် ရခိုင်-ဧရာဝတီ အစပ်ကို ထိုးစစ်ဆင်၍ ထိုးဖောက်ရန် ကြိုးစားနေသည့်နေရာတိုင်းတွင် မြေပြင် တိုက်ပွဲများ ဆက်လက်ဖြစ်ပွားနေပြီး အထိအခိုက်အကျအဆုံးများကာ အသာစီးမရတော့သည့်အတွက် လေကြောင်းတိုက်ခိုက်မှုကိုသာ အရှိန်မြှင့်အားပြုနေသည်။   စစ်တပ်က AA တပ်စွဲထားရာနေရာများသို့ အင်အားအလုံးအရင်းဖြင့် ထိုးစစ်ဆင်လာသကဲ့သို့ AA ဘက်ကလည်း တန်ပြန်ထိုးစစ်ဆင် တိုက်ခိုက်မှုများကို လုပ်ဆောင်လျက်ရှိသည်။   စစ်တပ်၏ တပ်မ (၆၆) လက်အောက်ခံ ခလရ (၁)၊ ခလရ (၁၁) တပ်ရင်းများနှင့် AA တို့သည် ၂၀၂၆ ခုနှစ်၊ ဩဂုတ်လ ၂ ရက်နေ့က ဧရာဝတီတိုင်း၊ ရေကြည်မြို့နယ်၊ ရုံးပင်ကျေးရွာအနောက်မြောက်ဘက် ၃ ဒသမ ၇ ကီလိုမီတာနှင့် ၃ ဒသမ ၃ ကီလိုမီတာအကွာတို့တွင် နှစ်နာရီနီးပါးကြာ တိုက်ပွဲများ ရှေ့ဆင့်နောက်ဆင့် ဖြစ်ပွားခဲ့ သည်။   ထိုသို့ တိုက်ပွဲဖြစ်ပွားစဉ် စစ်တပ်က ဒရုန်းနှင့် မြေပြင်ပစ်ကူအများအပြားသုံးကာ ထိုးစစ်ဆင်ခဲ့သော်လည်း နှစ် နာရီကြာမြင့်ပြီးနောက် အထိအခိုက် အကျအဆုံးများနှင့်အတူ တပ်ဆုတ်သွားခဲ့ရကာ တိုက်ပွဲအတွင်း စစ်တပ် ဘက်က အလောင်းများနှင့် လက်နက်ခဲယမ်းအချို့ကို သိမ်းပိုက်ရရှိခဲ့ကြောင်း AA က ဆိုသည်။   ထို့ပြင် ညနေပိုင်းတွင်လည်း ဒုတိယအကြိမ် ထပ်မံတိုက်ပွဲဖြစ်ပွားခဲ့ရာ စစ်တပ်မှာ အထိအခိုက် အကျအဆုံးများ နှင့် အတူ ကစဉ့်ကလျား ဆုတ်ခွာထွက်ပြေးသွားခဲ့သဖြင့် အလောင်းအချို့နှင့် လက်နက်ခဲယမ်းများကို ထပ်မံ သိမ်းဆည်းရမိခဲ့သည်။     ထို့အတူ ဩဂုတ်လ ၁ ရက်နေ့ကလည်း ဧရာဝတီတိုင်း၊ သာပေါင်းမြို့နယ်၊ သာပေါင်းကလေးကျေးရွာ၏ အရှေ့ ဘက် ၁ ဒသမ ၀၆ ကီလိုမီတာအကွာတွင် နှစ်ဖက်တိုက်ပွဲ နှစ်နာရီနီးပါးကြာ အပြင်းအထန်ဖြစ်ပွားခဲ့ပြီး AA ဘက်က လက်နက်ခဲယမ်းအချို့ကို သိမ်းဆည်းရမိခဲ့သည်။ စစ်တပ်သည် မကွေးတိုင်း၊ ပဲခူးတိုင်း၊ ဧရာဝတီတိုင်း အပါအဝင် ချင်းပြည်နယ် (တောင်ပိုင်း) စသည့် အာရက္ခ ဒေသနှင့် နယ်မြေထိစပ်နေသည့်နေရာများကို တစ်ပြိုင်နက်တည်း ထိုးစစ်ဆင်တိုက်ခိုက်လျက်ရှိနေသည်။   #AA #စစ်တပ် #ရေကြည် #သာပေါင်း

ရခိုင်-ဧရာဝတီအစပ်တွင် တိုက်ပွဲပြင်းထန်ပြီး စစ်တပ်အလောင်းနှင့် လက်နက်များ AA သိမ်းဆည်းရမိ

ရခိုင်-ဧရာဝတီအစပ်တွင် တိုက်ပွဲပြင်းထန်ပြီး စစ်တပ်အလောင်းနှင့် လက်နက်များ AA သိမ်းဆည်းရမိ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၅ ရက်။ ရခ…

  • August 5, 2026
ထိုင်းရောက်မြန်မာလုပ်သားများ ဝင်ငွေနည်းပါးသော်လည်း ၃ နှစ်စာအခွန် ပေးဆောင်နေရ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၄ ရက်။   ထိုင်းနိုင်ငံရောက် မြန်မာရွှေ့ပြောင်းလုပ်သားများသည် နိုင်ငံကူးလက်မှတ် (Passport) သက်တမ်းတိုးရန်အတွက် ၃ နှစ်စာ အခွန်ပေးဆောင်နေရပြီး လုပ်ခလစာ နည်းပါးသည့်ကြားမှ ယခုကဲ့သို့ ကုန်ကျစရိတ်များ မြင့်မားလာ ခြင်းကြောင့် အခက်အခဲများနှင့် ရင်ဆိုင်နေကြရသည်။   အခွန်နှုန်းထားမှာ တစ်လ လုပ်ခလစာ ဘတ် ၇,၅၀၀ ပေါ်မူတည်၍ တစ်လလျှင် အခွန်ဘတ် ၁၅၀ နှုန်းဖြင့် ၃ နှစ်စာအခွန်အတွက် အနည်းဆုံး ဘတ် ၅,၀၀၀ ဝန်းကျင်ခန့် ကုန်ကျနေသည်။   ယခင်နှစ်များက ပြည်တွင်း၌ နိုင်ငံကူးလက်မှတ် သက်တမ်းတိုးသူများသာ ပေးဆောင်ကြရသော်လည်း ၂၀၂၆ ခုနှစ် ဇူလိုင်လနှောင်းပိုင်းမှစ၍ ထိုင်းနိုင်ငံရှိ မြန်မာသံရုံးအထိ အဆိုပါဥပဒေမှာ အသက်ဝင်လာခြင်း ဖြစ်သည်။   နိုင်ငံကူးလက်မှတ် သက်တမ်းတိုးမည့်သူများ အနေဖြင့် ၂၀၂၃ ခုနှစ်မှစ၍ ၎င်းတို့ရောက်ရှိနေသည့်လအထိ အခွန်ပေးဆောင်ကြရကာ အနည်းဆုံး ၃ နှစ်စာခန့် ရှိသည်။   အကျိုးဆောင်တစ်ဦးက “အရင်ကတော့ ပြည်တွင်းမှာ ပြန်တိုးတဲ့လူတွေကို OWIC ကတ် ထုတ်ပေးတယ်။ နေပြည်တော်ကပေါ့နော်။ အဲတာရမှ ထွက်လာလို့ရတာ။ အခုက အဲဒီ OWIC ကို ဒီမှာ ထုတ်ပေးလိုက်တာ။ မကြာသေးဘူး။ အရင်လတွေကမှ စပြောင်းလာတာ။ စာအုပ်တိုးတဲ့လူတိုင်း ပေးရတယ်” ဟု ပြောသည်။     ထို့ပြင် နိုင်ငံကူးလက်မှတ် သက်တမ်းတိုးသည့်ရက်တွင်လည်း လက်ကျန်ရက်များကိုပါ တွက်ချက်ကာ ကြိုတင် အခွန်ဆောင်ခိုင်းပြီး ကြိုဆောင်ခအနေဖြင့် ဘတ် ၁,၀၀၀ ကောက်ခံကြောင်း ယခုရက်ပိုင်းအတွင်း သံရုံး၌ သက်တမ်းတိုးခဲ့သူတစ်ဦးက ဆိုသည်။   “စာအုပ်က ၆ လ သက်တမ်း အနည်းဆုံး ကျန်ရမယ်ဆိုတော့ ကျနော်တို့က ကြိုတိုးရတာကိုး။ ဆိုတော့ ကျနော် တိုးတဲ့အချိန်က ၆ လစာကျန်သေးတယ်။ အဲဒါပြီးမှ သက်တမ်းကုန်မှာ။ အဲလို ကြိုတိုးတဲ့အတွက်ကို သူတို့က ဘတ် တစ်ထောင် ကောက်တာ။”   သက်တမ်းတိုးသူများသည် စာအုပ်လဲခ ၁၀,၅၀၀ ဘတ်နှင့် ၃ နှစ်စာအခွန် ဘတ် ၅,၀၀၀ ဝန်းကျင်အပါအဝင် စုစုပေါင်း ဘတ် ၁၆,၀၀၀ ဝန်းကျင်အထိ ကုန်ကျနေပြီး ထိုစရိတ်မှာ ထိုင်းရောက် အခြေခံလုပ်သားတစ်ဦး၏ လစာထက်ပင် မြင့်မားနေသည်။   ယခင်က စာအုပ်သက်တမ်း တိုးရာတွင် ပွဲစားအပ်မှသာ ဘတ် ၁၂,၀၀၀ ဝန်းကျင်ခန့် ကုန်ကျလေ့ရှိသော်လည်း လက်ရှိတွင် ဘတ် ၁၈,၀၀၀ မှ ၂၀,၀၀၀ ဝန်းကျင်အထိ ဈေးပေါက်နေသဖြင့် ကိုယ်တိုင်သွားရောက် သက်တမ်း တိုးကြသူများ ပိုမိုများပြားလာကြောင်း အကျိုးဆောင်အချို့က ပြောဆိုကြသည်။   ထို့ပြင် လာမည့်နှစ်တွင် ထိုင်း-မြန်မာ သွားလာခွင့်လက်မှတ် (CI) ကိုပါ ထုတ်ပေးခွင့်ပိတ်သိမ်းမည်ဖြစ်ပြီး နိုင်ငံကူးလက်မှတ် စာအုပ်အနီရောင်ကိုသာ မဖြစ်မနေ လုပ်ဆောင်ရမည်ဟူသော သတင်းများ ပျံ့နှံ့နေသဖြင့် ရွှေ့ပြောင်းလုပ်သားများ အနေဖြင့် ပိုမိုစိုးရိမ်ပူပန်နေကြရသည်။   OWIC ကတ်ဖြင့် ပြည်ပရောက် အလုပ်သမားများထံ အခွန်ကောက်ခံသည့်စနစ်ကို ၁၉၉၉ ခုနှစ် ပြည်ပ အလုပ် အကိုင် ဥပဒေအရ ပြဋ္ဌာန်းခဲ့ခြင်းဖြစ်ပြီး ၂၀၂၃ ခုနှစ်တွင် ပြည်တွင်း ပတ်စ်ပိုစ့်ရုံးများ၌ စတင်ကျင့်သုံးခဲ့ခြင်း ဖြစ်သည်။   ယခုအခါ အဆိုပါဥပဒေမှာ ထိုင်းနိုင်ငံရှိ မြန်မာသံရုံးများတွင်ပါ အသက်ဝင်လာခြင်းကြောင့် ရွှေ့ပြောင်းလုပ်သား များမှာ နိုင်ငံကူးလက်မှတ် သက်တမ်းတိုးနိုင်ရန်အတွက် အလုပ်ချိန်ပိုလုပ်ကာ ရုန်းကန်နေကြရသည်။   #migrantworker #ရွှေ့ပြောင်းအလုပ်သမား

ထိုင်းရောက်မြန်မာလုပ်သားများ ဝင်ငွေနည်းပါးသော်လည်း ၃ နှစ်စာအခွန် ပေးဆောင်နေရ

ထိုင်းရောက်မြန်မာလုပ်သားများ ဝင်ငွေနည်းပါးသော်လည်း ၃ နှစ်စာအခွန် ပေးဆောင်နေရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၄ ရက်။ ထိုင်းနိုင်ငံရ…

  • August 4, 2026
ICRC နှင့် တွေ့ဆုံမှုအပေါ် သားဖြစ်သူ ကင်မ်အဲရစ် ကြိုဆိုပြီး ချက်ချင်းလွှတ်ပေးရန် တောင်းဆို သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၃ ရက်။ အပြည်ပြည်ဆိုင်ရာ ကြက်ခြေနီကော်မတီ (ICRC) ၏ ကိုယ်စားလှယ်တစ်ဦးသည် ဩဂုတ်လ ၃ ရက်နေ့တွင် နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ထံ သွားရောက်တွေ့ဆုံခဲ့ကြောင်း ICRC က ထုတ်ပြန် လိုက်သည်။ အဆိုပါ တွေ့ဆုံမှုအပေါ် ဒေါ်အောင်ဆန်းစုကြည်၏ သားဖြစ်သူ ကင်မ်အဲရစ်က ကြိုဆိုလိုက်ပြီး နိုင်ငံရေး အကျဉ်းသားအားလုံးကို လွှတ်ပေးရန် တောင်းဆိုလိုက်သည်။ ကင်မ်အဲရစ်က “ဒီနေ့ဟာ မျှော်လင့်ချက်ကို ယူဆောင်လာပါတယ်။ အပြည် ပြည်ဆိုင်ရာ ကြက်ခြေနီကော်မတီ (ICRC) မှ ကျနော့်မေမေ ဒေါ်အောင်ဆန်းစုကြည်နဲ့ တွေ့ဆုံခဲ့တယ်ဆိုတဲ့ သတင်းတွေကို ကျနော် ကြိုဆိုပါ တယ်။ ဒီသတင်းကို အတည်ပြုနိုင်မယ်ဆိုရင်တော့ ဒါဟာ ငါးနှစ်ကျော်အတွင်း မေမေနဲ့ ပတ်သက်တဲ့ အပြု သဘောဆောင်တဲ့ ပထမဆုံးတိုးတက်မှု ဖြစ်ပါလိမ့်မယ်” ဟု ၎င်း၏ လူမှုကွန်ရက်စာမျက်နှာတွင် ရေးသားထား သည်။ အဆိုပါ သွားရောက်တွေ့ဆုံမှုကို လွတ်လပ်ခွင့် ထိန်းချုပ်ခံထားရသူများထံ သွားရောက်ကြည့်ရှုသည့် ICRC ၏ လုပ်ထုံးလုပ်နည်း စံနှုန်းများနှင့်အညီ ဆောင်ရွက်ခဲ့ခြင်းဖြစ်ပြီး ဒေါ်အောင်ဆန်းစုကြည်နှင့် သီးသန့်တွေ့ဆုံ ဆွေးနွေးခွင့် ရရှိခဲ့ကြောင်း ICRC က ထုတ်ပြန်ထားသည်။ ထိုကဲ့သို့ တွေ့ဆုံခြင်းအားဖြင့် အကျဉ်းကျခံထားရသူများနှင့် ၎င်းတို့၏ မိသားစုဝင်များအကြား အပြန်အလှန် သတင်းအချက်အလက် ဖလှယ်နိုင်ခွင့်ကို ရရှိစေကြောင်းလည်း ပါရှိသည်။ ICRC က သတင်းမထုတ်ပြန်မီ ဒေါ်အောင်ဆန်းစုကြည်ကို ၎င်းတို့၏ မြန်မာနိုင်ငံဆိုင်ရာ ဌာနေကိုယ်စားလှယ် Mr. Arnaude de Baqque က ယနေ့ နံနက်ပိုင်းတွင် လာရောက်တွေ့ဆုံခဲ့ကြောင်း စစ်အုပ်စုက ဓာတ်ပုံများနှင့် တကွ ဦးစွာ ထုတ်ပြန်ခဲ့သည်။ သို့သော် စစ်အုပ်စု၏ ထုတ်ပြန်ချက်အပေါ် လူမှုကွန်ရက်တွင် ဝေဖန်မှုများနှင့် သံသယများ မြင့်တက်နေချိန်၌ ICRC ကပါ ထပ်ဆင့် သတင်းထုတ်ပြန်ခဲ့ခြင်း ဖြစ်သည်။ ၂၀၂၁ ခုနှစ် ဖေဖော်ဝါရီလ ၁ ရက်နေ့ စစ်အာဏာသိမ်းချိန်က စတင်ကာ လူထုခေါင်းဆောင် ဒေါ်အောင်ဆန်းစုကြည်ကို စစ်တပ်က မတရားဖမ်းဆီးထိန်းသိမ်းခဲ့ရာ ယခုအခါ ရက်ပေါင်း ၂,၀၀၀ ကျော် ကြာမြင့်လာပြီ ဖြစ်သည်။ စစ်တပ်က ရက်ပေါင်း ၂,၀၀၀ ကျော် ကြာသည့်တိုင် မိသားစုဝင်များနှင့်သာမက ပြင်ပကမ္ဘာနှင့်ပါ တွေ့ဆုံ ဆက်သွယ်ခွင့် မပေးဘဲ ဖုံးကွယ်ထားခဲ့ကြောင်း သားဖြစ်သူ ကင်မ်အဲရစ်က ပြောဆိုထားသည်။ ယခု ICRC နှင့် တွေ့ဆုံခွင့်ရသည်အထိ ဖိအားပေးဆောင်ရွက်ခဲ့သူများ အားလုံးကိုလည်း ၎င်းက ကျေးဇူးတင်ကြောင်း ပြောဆို ထားသည်။ သို့သော် ဒေါ်အောင်ဆန်းစုကြည် အသက်ရှင်ကြောင်း အထောက်အထားသည် နောက်ဆုံးမဟုတ်ကြောင်းနှင့် ရှေ့ဆက်ရမည့် လုပ်ငန်းစဉ်များ ရှိသေးကြောင်း ကင်မ်အဲရစ်က ထောက်ပြထားသည်။ “ဒါဟာ အရေးပါတဲ့ပထမခြေလှမ်းဖြစ်ပါတယ်။ ဒါပေမဲ့ နောက်ဆုံးခြေလှမ်းမဖြစ်စေရပါဘူး။ ဒီအခြေ အနေကနေ လူသားချင်းစာနာမှုဆိုင်ရာ တိုးတက်မှုတွေ ဆက်လက်ဖြစ်ပေါ်လာဖို့ ကျနော် မျှော်လင့်ပါတယ်” ဟု ၎င်းက ပြောသည်။ ဆက်လက်၍လည်း ကင်မ်အဲရစ်က “အဲဒီထဲမှာ မေမေနဲ့ တိုက်ရိုက်စကားပြောခွင့်ရရှိရေး၊ မိသားစုနဲ့ တွေ့ဆုံ ခွင့်ရရှိရေး၊ မေမေ့ရဲ့ ကျန်းမာရေးအခြေအနေကို ယုံကြည်စိတ်ချရပြီး လွတ်လပ်စွာ အတည်ပြုနိုင်တဲ့ သတင်း အချက်အလက် ရရှိရေးနဲ့ နိုင်ငံရေး အကျဉ်းသားအားလုံးနဲ့အတူ မေမေ့ကို ချက်ချင်းနဲ့ ခြွင်းချက်မရှိ လွှတ်ပေး ရေးတို့ ပါဝင်ပါတယ်” ဟု ပြောသည်။ ဒေါ်အောင်ဆန်းစုကြည်နှင့် တွေ့ဆုံခွင့်ကို တရုတ်နှင့် အာဆီယံ သံတမန်များက တောင်းဆိုခဲ့သော်လည်း စစ်အုပ်စုက ငြင်းပယ်ခဲ့ပြီး ယခုနောက်ဆုံးတွင်မှ ICRC နှင့် တွေ့ဆုံမှုကို ထုတ်ပြန်ခဲ့ခြင်း ဖြစ်သည်။ #ICRC #ကင်မ်အဲရစ် #ဒေါ်အောင်ဆန်းစုကြည်

ICRC နှင့် တွေ့ဆုံမှုအပေါ် သားဖြစ်သူ ကင်မ်အဲရစ် ကြိုဆိုပြီး ချက်ချင်းလွှတ်ပေးရန် တောင်းဆို

ICRC နှင့် တွေ့ဆုံမှုအပေါ် သားဖြစ်သူ ကင်မ်အဲရစ် ကြိုဆိုပြီး ချက်ချင်းလွှတ်ပေးရန် တောင်းဆို သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၃ ရက်။ …

  • August 3, 2026
ကချင်ပြည် ဒေသ သုံးခုတွင် တိုက်ပွဲများပြင်းထန်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၃ ရက်။   ကချင်ပြည်အတွင်းက ဗန်းမော်၊ ရွှေကူနှင့် ခေါင်လန်ဖူးဒေသများတွင် တိုက်ပွဲများ အပြင်းအထန် ဖြစ်ပွားနေပြီး ဒေသခံပြည်သူများမှာ အသက်ဘေး လွတ်ရာသို့ ထွက်ပြေးတိမ်းရှောင်နေကြရသည်။   ဗန်းမော်မြို့နှင့် မိုင်အနည်းငယ်သာ ကွာဝေးသော နမ့်ဖားရွာနားတွင် ဇူလိုင်လ ၃၀ ရက်နေ့၊ နံနက်ပိုင်းကစတင်၍ နှစ်ဖက်တိုက်ပွဲများ အပြင်းအထန် ဖြစ်ပွားခဲ့ခြင်းဖြစ်သည်။   စစ်တပ်ဘက်က ကချင်လွတ်လပ်ရေးတပ်မတော် (KIA) ထိန်းချုပ်ထားသည့် ဒေသများကို ပြန်လည်သိမ်းပိုက်ရန် စစ်အင်အားဖြည့်တင်းခြင်း၊ စစ်ကြောင်းထိုးခြင်းနှင့် လက်နက်ခဲယမ်းများ ပို့ဆောင်ခြင်းတို့ကို ဆက်တိုက်ပြုလုပ် လာခြင်းကြောင့် ယခုကဲ့သို့ တိုက်ပွဲများ ဆက်လက်ဖြစ်ပွားနေခြင်းဖြစ်ကြောင်း မြေပြင်သတင်းရင်းမြစ်များနှင့် KIO/KIA ၏ သတင်းထုတ်ပြန်ချက်များအရ သိရသည်။   တိုက်ပွဲများ ပြင်းထန်နေသလို ရွှေကူ-ဗန်းမော် ကားလမ်းပိုင်းပေါ်ရှိ နမ့်ဖားကျေးရွာ ချောင်းကူးတံတားဟောင်း နှင့် တံတားသစ် နှစ်စင်းစလုံးကိုလည်း ဇူလိုင်လ ၂၆ ရက်နေ့က စစ်တပ်က ဒရုန်းဖြင့် ဗုံးကြဲဖျက်ဆီးခဲ့သည်။   ထိုကဲ့သို့ တံတားများ ဖျက်ဆီးခံရခြင်းကြောင့် လက်ရှိတွင် လူနှင့်ဆိုင်ကယ်များသာ သတိထားသွားလာနေ ကြရပြီး ကုန်တင်ယာဉ်ကြီးများ ဖြတ်သန်းရန်အတွက် အခက်အခဲများနှင့် ရင်ဆိုင်နေကြရကြောင်း ဒေသခံများ က ပြောသည်။   ဒေသခံ အမျိုးသားတစ်ဦးက “တိုက်ပွဲကလည်း နေ့တိုင်းလိုလို ဖြစ်နေတယ်လို့ ပြောလို့ရတယ်ဗျ။ လက်နက် ကြီး၊ ဒရုန်း၊ လေကြောင်း အကုန်လုံးကို သုံးနေတော့တာပဲ။ တံတားတွေ ဖျက်ဆီးခံရတာကြောင့် လက်ရှိမှာ လူနဲ့ဆိုင်ကယ် တွေသာ သတိထားသွား လာနေရပြီး ကုန်တင်ယာဉ်ကြီးတွေ ဖြတ်သန်းဖို့ရာမှာတော့ အခက်အခဲ တွေနဲ့ ရင်ဆိုင် နေကြရပါတယ်” ဟု ပြောသည်။   အလားတူ ရွှေကူမြို့နယ် ငါးဘတ်ကြီးကျေးရွာအနီးတွင်လည်း တိုက်ပွဲများ ပြင်းထန်နေပြီး စစ်တပ်က လေကြောင်းမှ ဗုံးကြဲခြင်းနှင့် လက်နက်ကြီးများဖြင့် ရမ်းသမ်းပစ်ခတ်ခြင်းတို့ကြောင့် ဇူလိုင်လအတွင်း အသက် ၁၂ နှစ်အရွယ် ကလေးငယ်တစ်ဦး အပါအဝင် အရပ်သားနှစ်ဦး လက်နက်ကြီးကျည် ထိမှန်သေဆုံးခဲ့ရသည်။   ဧရာဝတီမြစ်ကမ်းဘေးရှိ အဆိုပါကျေးရွာဘက်သို့ စစ်တပ်က ပစ်မှတ်ထားကာ နေ့စဥ်နီးပါး တိုက်ခိုက်လျက်ရှိ ကြောင်း ဒေသခံများက ပြောသည်။   တော်လှန်ရေးတပ်ဖွဲ့ဝင်တစ်ဦးက “ဧရာဝတီမြစ်ကမ်းဘေးမှာ ရှိတဲ့ ငါးဘတ်ကြီးရွာကို စစ်တပ်က ပစ်မှတ်ထား ပြီး လေကြောင်း ကနေ ဗုံးကြဲတာနဲ့ လက်နက်ကြီးနဲ့ ပစ်ခတ်တာတွေ နေ့စဥ်လိုလို လုပ်နေပါတယ်” ဟု ပြော သည်။   ရွှေကူမြို့နယ်အတွင်း ဇွန်လ ၁၁ ရက်က စတင်ကာ ယနေ့အချိန်ထိ ဖြစ်ပွားခဲ့သည့် တိုက်ပွဲများအတွင်း လက်နက်ကြီးထိမှန်ခြင်းနှင့် စစ်တပ်၏ ဖမ်းဆီးသတ်ဖြတ်မှုများကြောင့် သေဆုံးခဲ့ရသည့် အရပ်သား ၁၅ ဦးခန့် ရှိလာပြီဖြစ်သည်။   ထို့ပြင် မြို့ထဲတွင် တပ်စွဲထားသည့် စစ်တပ်က နေရောညပါ လက်နက်ကြီးများဖြင့် ပစ်ခတ်နေခြင်းကြောင့် မြို့ခံ များမှာ ဘေးလွတ်ရာသို့ ကြိုတင်တိမ်းရှောင်နေကြရသော်လည်း စစ်တပ်က မြို့ကိုပိတ်ဆို့ထားကာ အရပ်သား များကို ထွက်ခွင့်မပေးဘဲ ပိတ်ပင်ထားသည်။   ဗန်းမော်နှင့် ရွှေကူအပြင် ခေါင်လန်ဖူးဒေသဘက်တွင်လည်း စစ်တပ်နှင့် ကချင်လွတ်လပ်ရေး တပ်မတော် KIA ပူးပေါင်းတပ်ဖွဲ့တို့ကြား တိုက်ပွဲများ နေ့တိုင်းဆိုသလို ဖြစ်ပွားနေပြီး ဒေသခံများမှာ ပူတာအိုဘက်သို့ တိမ်းရှောင်နေကြရသည်။   ထို့အတူ ကချင်-စစ်ကိုင်းအစပ် အင်းတော်ဒေသနှင့် စစ်ကိုင်းတိုင်း၊ ဟုမ္မလင်းမြို့နယ်အတွင်း၌လည်း KIA ပူးပေါင်းတပ်နှင့် ရှမ်းနီတပ်မတော် (SNA) တို့အကြား တိုက်ပွဲများ ပြင်းထန်နေသဖြင့် ဒေသခံ ရာနှင့်ချီကာ စစ်ဘေးရှောင်နေကြရဆဲ ဖြစ်သည်။   ဓါတ်ပုံ - RSM   #ကချင်တိုက်ပွဲ #ရွှေကူ #SNA #KIA #KPDF #ခေါင်လန်ဖူး #ဗန်းမော်

ကချင်ပြည် ဒေသ သုံးခုတွင် တိုက်ပွဲများပြင်းထန် 

ကချင်ပြည် ဒေသ သုံးခုတွင် တိုက်ပွဲများပြင်းထန် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၃ ရက်။ ကချင်ပြည်အတွင်းက ဗန်းမော်၊ ရွှေကူနှင့် ခေါင်လ…

  • August 3, 2026
ဒိုက်ဦးထောင်တွင် တိုက်ပိတ်ခံထားရသော နိုင်ငံရေးအကျဉ်းသူများ အသက်အန္တရာယ် စိုးရိမ်နေရ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၃ ရက်။   ပဲခူးတိုင်း၊ ဒိုက်ဦးအကျဉ်းထောင်အတွင်း အမျိုးသမီးနိုင်ငံရေးအကျဉ်းသူ ၂၇ ဦးမှာ သီးခြားတိုက်ပိတ်ခံထားရပြီး ၅ ဦးမှာ မတရားအမှုဆင်ခံရ ကာ ပြစ်ဒဏ် တိုးမြှင့်ခံထားရကြောင်း PPNM ၏ ဦးဆောင်ကော်မတီဝင် မရောင်နီလင်းက ပြောသည်။   “လက်ရှိမှာ အမျိုးသမီးနိုင်ငံရေးအကျဉ်းသူ ၂၇ ဦးဟာ သီးခြား တိုက်ပိတ်ခံထားရတာ ဖြစ်ပြီးတော့ ၅ ဦးက တော့ မတရားအမှုဆင်ခံထားရပြီး ပြစ်ဒဏ် တိုးမြှင့်ခံထားရပါတယ်။ ဘာအမှုတွေနဲ့ စွဲထားပြီးတော့မှ ဘယ် နှစ်နှစ်ဆိုတာကိုတော့ ကျနော်တို့ အတိအကျ မသိရသေးပါဘူး။”   အဆိုပါ တိုက်ပိတ်ခံထားရသည့် နိုင်ငံရေးအကျဉ်းသူများမှာ ပြင်းထန်သည့် စိတ်ကျရောဂါများနှင့် စိတ်ပိုင်းဆိုင် ရာ ဒဏ်ရာများကို ခံစားနေကြရသည်ဟု ဆိုသည်။   ဒိုက်ဦး အကျဉ်းထောင်တွင် နိုင်ငံရေးအကျဉ်းသူများအပေါ် ထောင်အာဏာပိုင်များက ဖိနှိပ်ညှဉ်း ပန်းမှုများ ဆက်တိုက်ပြုလုပ်နေပြီး လက်ရှိတွင် အခြေအနေများ ပိုမိုဆိုးရွားလာနေကြောင်း မြန်မာနိုင်ငံလုံး ဆိုင်ရာ နိုင်ငံရေးအကျဉ်းသားများကွန်ရက် (PPNM) က ထုတ်ပြန်လိုက်သည်။   ဒိုက်ဦးအကျဉ်းထောင်၌ နိုင်ငံရေးအကျဉ်းသူများအား အလုပ်ကြမ်း အတင်းအကျပ်ခိုင်းစေခြင်း၊ အခွင့်အရေး တောင်းဆိုသူများကို သီးခြားတိုက်ပိတ်ခြင်း၊ ရိုက်နှက်ညှဉ်းပန်းခြင်း၊ ထောင်ဝင်စာနှင့် ပြင်ပဆက်သွယ်ခွင့် ဖြတ်တောက်ခြင်း၊ ဆေးကုသခွင့်မပေးခြင်းနှင့် မတရားအမှုဆင်ကာ ပြစ်ဒဏ်တိုးမြှင့်ခြင်းတို့ကို စနစ်တကျ ကျူးလွန်လျက်ရှိသည်ဟု PPNM က ဇူလိုင်လ ၂၉ ရက်နေ့တွင် ထုတ်ပြန်ထားသည်။   လက်ရှိတိုက်ပိတ်ရာတွင် နိုင်ငံရေးအကျဉ်းသူများကို နှစ်ပတ်ကြာ ရေမချိုးခိုင်းခြင်း၊ တစ်နေ့လျှင် ရေတစ်လီတာဘူး တစ်ဘူးသာပေးပြီး ဆန်ပြုတ်တစ်မျိုးတည်းကိုသာ တိုက်ကျွေးသည်ဟု ထုတ်ပြန်ချက်ထဲတွင် ဖော်ပြထားသည်။   ထို့ပြင် ပြစ်ဒဏ်ကာလ စေ့ရောက်သော်လည်း အဆောင်သို့ ပြန်မပို့ဘဲ တိုက်အတွင်း ဆက်လက်ချုပ်နှောင်ထား ကာ ထောင်ဝင်စာ ကန့်သတ်ခြင်း၊ ဆေးကုသခွင့်ငြင်းပယ်ခြင်းနှင့် တိုက်အတွင်း ဝင်ရောက်ရိုက်နှက် ခြိမ်းခြောက် ခြင်းများကို နေ့စဉ်ပြုလုပ်လျက်ရှိကြောင်း ဆိုသည်။   အကျဉ်းထောင်များအတွင်း ထိုကဲ့သို့ ဖိနှိပ်ချုပ်ချယ်မှုများနှင့် ညှဉ်းပန်းနှိပ်စက်မှုများသည် အသက်အန္တရာယ်ပါ ထိခိုက်လာနိုင်သည့်အထိ ကြောက်စရာကောင်းသော အခြေအနေတွင်ရှိကြောင်း နိုင်ငံရေးအကျဉ်းသူများအဖွဲ့ (WOPP) ၏ သတင်းနှင့် ပြန်ကြားရေးတာဝန်ခံ မဆုမြတ်က ပြောဆိုသည်။   “ဒီစစ်အုပ်စုက တရားဝင်မှု ရရှိဖို့အတွက်နဲ့ အတုအယောင် ရွေးကောက်ပွဲလုပ်ပြီးတော့ ပုံမှန်အစိုးရတစ်ရပ် အဖြစ်နဲ့ ဟန်ပြဖို့ ကြိုးစားနေတယ်။ ဒါပေမဲ့ လက်ရှိ အကျဉ်းထောင်တွေအတွင်းမှာ နိုင်ငံရေးအကျဉ်းသူတွေ အတွက်က ဆေးကုသခွင့် လုံလုံလောက်လောက် မရတဲ့အပြင် အချိန်မရွေး တိုက်ပိတ်တာတွေ အမျိုးမျိုးသော ဖိနှိပ် ချုပ်ချယ်မှုတွေကို ပြုလုပ်နေတာသည် ရုပ်ပိုင်းဆိုင်ရာ စိတ်ပိုင်းဆိုင်ရာ ညှင်းပန်းနှိပ်စက်မှုတွေက အသက် အန္တရာယ်ပါ ထိခိုက်လာနိုင်တဲ့အထိ ကြောက်စရာကောင်းတဲ့ အခြေအနေမှာရှိတယ်လို့ ပြောလို့ရပါတယ်။”   ထို့ပြင် နိုင်ငံရေးအကျဉ်းသူ ကိုယ်ဝန်ဆောင်များကိုလည်း ပြင်ပဆေးရုံတက်ခွင့်မပေးသည့်အတွက် ကျန်းမာရေး စောင့်ရှောက်မှုနှင့် အာဟာရ မရရှိခြင်းကြောင့် မိခင်တစ်ဦး ကလေးဆုံးရှုံးခဲ့ရပြီး မွေးကင်းစ ကလေးငယ်တစ်ဦး မှာလည်း ၂၄ နာရီအတွင်း သေဆုံးခဲ့ရသည်။   အထက်ပါ လူ့အခွင့်အရေး ချိုးဖောက်မှုများကို ဦးစီးအရာရှိ ဒေါ်ဇင်မာကြည်အောင်၊ ဒုဦးစီး ဒေါ်စန်းနွယ်ဦး၊ အရာရှိ သဇင်မြင့်၊ အရာရှိ သက်သက်ဇင်နှင့် အရာရှိ သန္တာစိုးတို့က ဦးစီးကျူးလွန်လျက်ရှိသည်ဟု PPNM က စွပ်စွဲထားသည်။   အကျဉ်းထောင်အတွင်းသို့ လွတ်လပ်သော အဖွဲ့အစည်းများ ဝင်ရောက်စစ်ဆေးခွင့်ရရှိရေးနှင့် နိုင်ငံရေးအကျဉ်း သူများ လိုအပ်သည့် အာဟာရနှင့် ဆေးဝါးစောင့်ရှောက်မှုများ လုံလောက်စွာ ရရှိရေးအတွက် နိုင်ငံတကာ အဖွဲ့အစည်းများက ဝိုင်းဝန်းဖိအားပေးကြရန် မဆုမြတ်က ဆက်ပြောသည်။   “အကျဉ်းထောင်တွေအတွင်းကို ICRC အပါအဝင် လွတ်လပ်တဲ့ အဖွဲ့အစည်းတွေကို ဝင်ရောက် စစ်ဆေးခွင့် ဒါ့အပြင် နိုင်ငံရေးအကျဉ်းသူတွေရဲ့ လိုအပ်တဲ့ အာဟာရ၊ ဆေးဝါးစောင့်ရှောက်မှုတွေ လုံလောက်စွာ ရရှိဖို့၊ ပြစ်မှု ကျူးလွန်တဲ့သူဖြစ်တဲ့ ဒိုက်ဦးအမျိုးသမီးဆောင် ဦးစီးအရာရှိ ဒေါ်ဇင်မာကြည်အောင် အပါအဝင် ကျူး လွန်တဲ့ အကျဉ်းထောင်ဝန်ထမ်းတွေကို ထိရောက်စွာ အပြစ်ပေး အရေးယူဖို့နဲ့ နိုင်ငံရေးအကျဉ်းသူတွေ အပါအဝင် မတရားဖမ်းဆီးခံထားရတဲ့သူ အားလုံးကို ခြွင်းချက်မရှိ အမြန်ဆုံး လွှတ်ပေးဖို့အတွက် နိုင်ငံတကာ အဖွဲ့အစည်းတွေ၊ လူ့အခွင့်အရေး ဆောင်ရွက်နေတဲ့ အဖွဲ့အစည်းတွေ အနေနဲ့ ဖိအားပေးကြဖို့ တောင်းဆိုချင်ပါ တယ်။”   PPNM အနေဖြင့် အမျိုးသမီး နိုင်ငံရေး အကျဉ်းသူများ၏ အသက်အန္တရာယ်၊ စိတ်ပိုင်းနှင့် ရုပ်ပိုင်းဆိုင်ရာ လုံခြုံရေး အတွက် ကျူးလွန်သူများအား ထိရောက်စွာ အရေးယူနိုင်ရေးနှင့် အကျဉ်းသူများ၏ ရပိုင်ခွင့်၊ လူ့အခွင့်အရေးများ အမြန်ဆုံး ရရှိရေးအတွက် ဆက်လက်တောင်းဆိုသွားမည်ဟု ဆိုသည်။   #ဒိုက်ဦးထောင် #မရောင်နီလင်း #PPNM #WOPP #မဆုမြတ် #နိုင်ငံရေးအကျဉ်းသူ

ဒိုက်ဦးထောင်တွင် တိုက်ပိတ်ခံထားရသော နိုင်ငံရေးအကျဉ်းသူများ အသက်အန္တရာယ် စိုးရိမ်နေရ

ဒိုက်ဦးထောင်တွင် တိုက်ပိတ်ခံထားရသော နိုင်ငံရေးအကျဉ်းသူများ အသက်အန္တရာယ် စိုးရိမ်နေရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၃ ရက်။ ပဲခူးတိ…

  • August 3, 2026
သံတွဲ ဗုံးကြဲမှုတွင် ကလေးငယ်အပါအဝင် ၄ ဦးသေဆုံး   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၃ ရက်။   ရခိုင်ပြည်၊ သံတွဲမြို့နယ်အတွင်းသို့ စစ်တပ်က ဂျက်ဖိုက်တာများဖြင့် နေ့စဉ်နှင့်အမျှ ရည်ရွယ်ချက်ရှိရှိ လေကြောင်းမှ ဗုံးကြဲတိုက်ခိုက်လျက်ရှိရာ ဇူလိုင်လကုန်ပိုင်းက ဖြစ်ပွားခဲ့သော တိုက်ခိုက်မှုတစ်ခုအတွင်း မိသားစုဝင်များ အပါအဝင် အပြစ်မဲ့ပြည်သူ ၄ ဦး သေဆုံးခဲ့ရသည်။   ဇူလိုင်လ ၃၁ ရက်နေ့၊ မွန်းလွဲ ၃ နာရီခန့်က သံတွဲမြို့နယ်၊ ရွှေလှေကျေးရွာအတွင်းသို့ စစ်တပ်၏ ဂျက်ဖိုက်တာ နှစ်စီးက ရှေ့ဆင့်နောက်ဆင့် ဗုံးသီး ၃ လုံးအထိ ပစ်ချတိုက်ခိုက်ခဲ့ခြင်းဖြစ်သည်။   ဒေသခံတစ်ဦးက “စစ်တပ်က ဂျက်ဖိုက်တာနဲ့ နှစ်ကြိမ်တိုင်တိုင် လာပြီး ဗုံး ၃ လုံး ကြဲချသွားတယ်။ လင်းသီနဲ့ ရွှေလှေရွာကြားထဲ ဗုံး ၂ လုံးကျသလို ဦးမျိုးဇော်ဝင်းရဲ့ ကုန်စုံဆိုင်ပေါ်ကိုလည်း ပေါင် ၅၀၀ ဗုံး တစ်လုံး ကျ ရောက်ပေါက်ကွဲခဲ့တာပါ။ အဲဒီလိုဆိုင်ပေါ် တိုက်ရိုက်ကျတာကြောင့် ဆိုင်ရှင်လင်မယား နှစ်ယောက်၊ အလုပ် သမားတစ်ယောက်နဲ့ ဒေသခံတစ်ဦး၊ စုစုပေါင်း ၄ ယောက် သေဆုံးသွားတယ်။ ဆိုင်နဲ့ လူနေအိမ်တွေလည်း ပျက်စီးကုန်ပါတယ်” ဟု ဖြစ်စဉ်ကို ရှင်းပြသည်။   အဆိုပါ ဗုံးသီးများသည် ရွှေလှေကျေးရွာရှိ ဒေသခံ ဦးမျိုးဇော်ဝင်း၏ ဈေးဆိုင်အနီးသို့ ကျရောက် ပေါက်ကွဲခဲ့ ခြင်းကြောင့် ဆိုင်ရှင်လင်မယားဖြစ်ကြသည့် ဦးမျိုးဇော်ဝင်းနှင့် ဒေါ်မေမြတ်လွင်အပြင် ဆိုင်အရောင်းဝန်ထမ်း မဆွေဇင်အေးတို့မှာပါ နေရာတွင်ပင် ပွဲချင်းပြီး သေဆုံးခဲ့ရသည်။       ထို့ပြင် ဆိုင်ပိုင်ရှင်လင်မယား၏ တစ်နှစ်နှင့် လေးလအရွယ် သားဖြစ်သူ မောင်ဉာဏ်လင်းအောင်မှာလည်း ပြင်းထန်သည့် ဗုံးစထိမှန်ဒဏ်ရာများဖြင့် ဆေးရုံသို့ အရေးပေါ်ပို့ဆောင်စဉ် လမ်းခုလတ်၌ပင် အသက်ဆုံးပါး သွားခဲ့ရသည်။   အခြား ဒေသခံတစ်ဦးကလည်း “လေကြောင်းကနေ ဗုံးကြဲတိုက်ခိုက်တာကြောင့် တစ်မိသားစုလုံးနီးပါး ဆုံးရှုံးခဲ့ ရတဲ့အပြင် အပြစ်မဲ့ပြည်သူတွေပါ ထိခိုက်သေဆုံးခဲ့ရတာဟာ ရစရာမရှိအောင် ရက်စက်ကြမ်းကြုတ်တဲ့ လုပ် ရပ်တစ်ခု ဖြစ်ပါတယ်” ဟု ပြောသည်။   အဆိုပါ လေကြောင်းတိုက်ခိုက်မှုအတွင်း ဈေးဆိုင်အနီးဝန်းကျင်မှ အပြစ်မဲ့ပြည်သူ နှစ်ဦးလည်း ထိခိုက်ဒဏ်ရာ များ ရရှိခဲ့ကြပြီး ကျေးရွာအတွင်းရှိ လူနေအိမ်များ၊ ဈေးဆိုင်များနှင့် ကား၊ ဆိုင်ကယ်အချို့မှာလည်း မီးလောင် ပျက်စီးခြင်းနှင့် ပြိုကျပျက်စီးခြင်းများ ရှိခဲ့သည်။   ရွှေလှေကျေးရွာ ဗုံးကြဲခံရမှုမတိုင်မီ ရက်ပိုင်းကလည်း သံတွဲမြို့နယ်အတွင်း စစ်တပ်က လေကြောင်းရန်ကို ပိုမိုမြှင့်တင် လုပ်ဆောင်လာခဲ့သည်။   ဇူလိုင်လ ၂၇ ရက်နေ့ ည ၁၀ နာရီခွဲအချိန်ခန့်က သံတွဲမြို့နယ်၊ လင်းမူတောင်ကျေးရွာအနီးရှိ ယခင် ကျောက်ခွဲ စက်ရုံဟောင်း တည်ရှိရာနေရာကိုလည်း စစ်တပ်က ဂျက်ဖိုက်တာတစ်စီးဖြင့် ထပ်မံလာရောက် ဗုံးကြဲတိုက်ခိုက် ခဲ့သေးသည်။   စစ်ရေးအရ ရှုံးနိမ့်လာချိန်နှင့် တော်လှန်ရေးလက်နက်ကိုင်တပ်များကို ဖိအားပေးလိုသည့်အခါတိုင်း စစ်တပ် အနေဖြင့် တိုက်ပွဲနှင့်သက်ဆိုင်ခြင်းမရှိသော အရပ်သားပြည်သူများ နေထိုင်ရာ ကျေးရွာများနှင့် မြို့ပြဒေသ များကို လေကြောင်းဖြင့် ပစ်မှတ်ထားတိုက်ခိုက်လေ့ရှိသည်ဟု ဒေသတွင်း သတင်းရင်းမြစ်များက ဆိုသည်။     လက်ရှိတွင် သံတွဲမြို့နယ်အတွင်း စစ်တပ်၏ ဂျက်ဖိုက်တာများဖြင့် နေ့စဉ် လှည့်လည်ပျံသန်း ဗုံးကြဲနေမှုများ ကြောင့် ဒေသခံပြည်သူများမှာ နေ့စဉ်နှင့်အမျှ အသက်အန္တရာယ်အတွက် စိုးရိမ်ထိတ်လန့်စွာဖြင့် တိမ်းရှောင်နေ ကြရသည်။   #သံတွဲ #လေကြောင်းတိုက်ခိုက် #စစ်တပ်

သံတွဲ ဗုံးကြဲမှုတွင် ကလေးငယ်အပါအဝင် ၄ ဦးသေဆုံး

သံတွဲ ဗုံးကြဲမှုတွင် ကလေးငယ်အပါအဝင် ၄ ဦးသေဆုံး သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၃ ရက်။ ရခိုင်ပြည်၊ သံတွဲမြို့နယ်အတွင်းသို့ စစ်တပ်က …

  • August 3, 2026
မှော်ဘီတွင် စစ်တပ်တိုက်လေယာဉ် ပျက်ကျ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၃ ရက်။   ရန်ကုန်တိုင်းဒေသကြီး၊ မှော်ဘီမြို့နယ်၊ ညောင်နှစ်ပင်ကျေးရွာအနီးတွင် ယနေ့ (ဩဂုတ်လ ၃ ရက်) နံနက်ပိုင်းက စစ်တပ်၏ တိုက်ခိုက်ရေးလေယာဉ်တစ်စီး ငှက်နှင့် တိုက်မိခဲ့ပြီး ပျက်ကျခဲ့သည်။   ထိုဖြစ်စဉ်နောက်ပိုင်းတွင် ဒေသတွင်း လုံခြုံရေးများကို စစ်တပ်က တင်းကျပ်စွာ ချမှတ်ထားသည်ဟု ဒေသခံများက ပြောသည်။   တပ်မတော် (လေ) မှ တိုက်ခိုက်ရေးလေယာဉ်တစ်စီးသည် လေ့ကျင့်ပျံသန်းရေး ဆောင်ရွက်စဥ် ယနေ့နံနက် ၅ နာရီ ၁၆ မိနစ်ခန့်တွင် ရန်ကုန်တိုင်းဒေသကြီး၊ မှော်ဘီမြို့၏ အရှေ့တောင်ဘက် မီတာ ၈,၅၀၀ ခန့်အကွာ ညောင်နှစ်ပင်ကျေးရွာအနီးသို့ ရောက်ရှိစဥ် ငှက်တစ်ကောင်နှင့် တိုက်မိသည့် ဖြစ်စဉ် (Bird Strike) ဖြစ်ပွားခဲ့ခြင်း ဖြစ်သည်။   ထိုကဲ့သို့ ငှက်ဝင်ရောက်တိုက်မိခြင်းကြောင့် လေယာဉ်၏ အင်ဂျင်ခန်းအတွင်းသို့ ငှက်ပါသွားကာ အင်ဂျင် မီးလောင်မှု ဖြစ်ပွားခဲ့ရာ လေယာဉ်မှူးအနေဖြင့် လေယာဉ်၏ အနေအထားကို လူနေအိမ်မရှိသည့် အရပ်မျက်နှာ ဘက်သို့ လှည့်၍ အရေးပေါ်လေယာဉ်ပေါ်မှ ခုန်ထွက်သည့်စနစ် (Ejection System) ကို အသုံးပြုကာ ခုန်ထွက်လွတ်မြောက်ခဲ့ခြင်း ဖြစ်သည်။   သို့သော် ယင်းကဲ့သို့ လေယာဉ်ပျက်ကျပြီးနောက်ပိုင်း ဖြစ်စဉ်ဖြစ်ပွားရာ နေရာတစ်ဝိုက်နှင့် အနီးအနား လမ်း ကြောင်းများတွင် လုံခြုံရေးတပ်ဖွဲ့ဝင်များက အမြန်ဆုံး ဝင်ရောက်ကာ လိုအပ်သည့် လုံခြုံရေးလုပ်ငန်းများကို အထူးတင်းကျပ်စွာ ချမှတ်ဆောင်ရွက်လျက်ရှိနေသည်။   မှော်ဘီမြို့နယ်တွင် နေထိုင်သည့် ဆိုင်ကယ်ကယ်ရီသမားတစ်ဦးက “မနက်လင်းကတည်းက ဂိတ်မှာပြော နေကြတာ၊ စစ်တပ်က ကားတွေ ညောင်နှစ်ပင်ဘက်အများကြီး သွားကြတယ်။ လေယာဉ်ပျက်ကျတဲ့ အနား လူတွေကပ်လို့မရဘူး၊ လုံခြုံရေးယူထားတယ်။ လေယာဉ်မှူး စစ်ဆေးရုံခေါ်သွားတယ်လို့ သိရတယ်။ လေယာဉ် ပျက်ကျတဲ့အခြေအနေ ဓာတ်ပုံမရိုက်ရဘူး” ဟု ပြောသည်။   လက်ရှိတွင် လေယာဉ်ပျက်ကျခဲ့သည့် ညောင်နှစ်ပင်ကျေးရွာ အနီးဝန်းကျင်သို့ သွားလာခွင့်များကို တင်းကျပ် ကန့်သတ်ထားပြီး လုံခြုံရေးတပ်ဖွဲ့ဝင်များက ပျက်စီးသွားသည့် လေယာဉ်အစိတ်အပိုင်းများနှင့် ဆက်စပ်ပစ္စည်း များကို ရှာဖွေသိမ်းဆည်းခြင်းများ လုပ်ဆောင်နေကြသည်။   အဆိုပါဖြစ်စဉ်တွင် လေယာဉ်ပေါ်တွင် လိုက်ပါလာသည့် အမှုထမ်းများ ထိခိုက်ဒဏ်ရာရရှိမှု မရှိကြောင်း စစ်တပ် က သတင်းထုတ်ပြန်ထားသော်လည်း လေယာဉ်ပျက်ကျသည့် တည်နေရာတစ်ဝိုက်တွင်မူ လုံခြုံရေးအင်အား အမြောက်အမြားဖြင့် တင်းကျပ်စွာ ဆက်လက် ထိန်းသိမ်းထားဆဲ ဖြစ်သည်။   #စစ်တပ် #တိုက်လေယာဉ် #မှော်ဘီ

မှော်ဘီတွင် စစ်တပ်တိုက်လေယာဉ် ပျက်ကျ

မှော်ဘီတွင် စစ်တပ်တိုက်လေယာဉ် ပျက်ကျ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၃ ရက်။ ရန်ကုန်တိုင်းဒေသကြီး၊ မှော်ဘီမြို့နယ်၊ ညောင်နှစ်ပင်ကျေ…

  • August 3, 2026
ဒေါ်အောင်ဆန်းစုကြည်နှင့် ICRC ကိုယ်စားလှယ် တွေ့ဆုံဟု စစ်တပ်ထုတ်ပြန်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၃ ရက်။   နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို အပြည်ပြည်ဆိုင်ရာ ကြက်ခြေနီကော်မတီ (ICRC) ၏ မြန်မာနိုင်ငံဆိုင်ရာ ဌာနေကိုယ်စားလှယ် Mr. Arnaude de Baqque က ယနေ့ (ဩဂုတ်လ ၃ ရက်) နံနက်ပိုင်းတွင် လာရောက်တွေ့ဆုံခဲ့ကြောင်း စစ်အုပ်စုဘက်က ဓာတ်ပုံများနှင့်တကွ ထုတ်ပြန်လိုက်သည်။   အဆိုပါ တွေ့ဆုံမှုနှင့် ပတ်သက်၍ စစ်အုပ်စု၏ ပြောရေးဆိုခွင့်ရှိသူ ဒေါက်တာခိုင်ခိုင်စိုး၏ ဖေ့ဘွတ်စာမျက်နှာ ဖြစ်သော Myanmar Presidential Spokesperson တွင် သတင်းထုတ်ပြန်ထားခြင်း ဖြစ်သည်။   “ဒေါ်အောင်ဆန်းစုကြည်ကို အပြည်ပြည်ဆိုင်ရာ ကြက်ခြေနီကော်မတီ (ICRC) မှ မြန်မာ နိုင်ငံဆိုင်ရာ ဌာ‌နေ ကိုယ်စားလှယ်ဖြစ်သူ Mr. Arnaude de Baqque က ယနေ့ နံနက်ပိုင်းတွင် လာရောက် တွေ့ဆုံခဲ့ပါသည်” ဟု Myanmar Presidential Spokesperson ၏ လူမှုကွန်ရက် စာမျက်နှာတွင် မြန်မာ၊ အင်္ဂလိပ် နှစ်ဘာသာဖြင့် ရေးသားထားသည်။   သို့သော်လည်း ထိုကဲ့သို့ တွေ့ဆုံခဲ့ကြသည်ဟု စစ်တပ်ဘက်က ထုတ်ပြန်ထားသော်လည်း အပြည်ပြည်ဆိုင်ရာ ကြက်ခြေနီကော်မတီ (ICRC) ဘက်မှမူ ယခုတွေ့ဆုံမှုနှင့် ပတ်သက်ပြီး တစ်စုံတစ်ရာ တရားဝင် ထုတ်ပြန်ထား ခြင်းမျိုး မရှိသေးပေ။   Myanmar Presidential Spokesperson ၏ လူမှုကွန်ရက် စာမျက်နှာတွင် ထုတ်ပြန်လာသည့် ဓာတ်ပုံလေးပုံ အနက် မွေးနေ့ကိတ်ပါရှိသည့်ပုံတွင် ဖော်ပြထားသော မွေးနေ့ရက်စွဲမှာ ‘၁၉’ လား၊ ‘၂၉’ လားဆိုသည်မှာ မသဲကွဲ ဘဲ ဝေဖန်မှုများ ထွက်ပေါ်နေလျက် ရှိသည်။   အလားတူ စစ်တပ်ဘက်က ထုတ်ပြန်လာသည့် ဓါတ်ပုံ လေးပုံ အနက် မွေးနေ့ကိတ်ခွဲနေသည့် ပုံပါ ဒေါ်အောင်ဆန်းစုကြည် ဝတ်ဆင်ထားသည့် “အင်္ကျီ” မှာ အခြား တွေ့ဆုံသည့် ပုံများတွင် ဝတ်ဆင်ထားသော အင်္ကျီနှင့် ကွဲပြား ခြားနားနေသည်ကိုလည်း တွေ့ရသည်။   ထို့ပြင် မည်သည့်နေရာတွင် ပြုလုပ်ခဲ့သည်၊ မည်သည့်အကြောင်းအရာများကို ဆွေးနွေးခဲ့ကြသည်နှင့် တွေ့ဆုံချိန် မည်မျှကြာမြင့်ခဲ့သည် စသည့် အသေးစိတ်အချက်အလက်များကိုလည်း စစ်တပ်ဘက်က ဆက်လက် ဖုံးကွယ် ထားဆဲ ဖြစ်သည်။   ၂၀၂၁ ခုနှစ် ဖေဖော်ဝါရီလ ၁ ရက်နေ့ စစ်အာဏာသိမ်းချိန်ကစတင်ကာ လူထုခေါင်းဆောင် ဒေါ်အောင်ဆန်းစု ကြည်ကို စစ်တပ်က မတရားဖမ်းဆီးထိန်းသိမ်းခဲ့ရာ ယခုအခါ ရက်ပေါင်း ၂,၀၀၀ ကျော် ကြာမြင့်လာပြီ ဖြစ် သည်။   စစ်တပ်က ၂၀၂၁ ခုနှစ်၊ ဖေဖော်ဝါရီလ ၁ ရက်နေ့ စစ်အာဏာသိမ်းချိန်မှ စတင်ပြီး လူထုခေါင်းဆောင်၊ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို မတရားဖမ်းဆီးကာ ရက်ပေါင်း ၂,၀၀၀ ကျော် ကြာသည့်တိုင် မိသားစုဝင်များနှင့်သာမက ပြင်ပကမ္ဘာနှင့်ပါ တွေ့ဆုံဆက်သွယ်ခွင့် မပေးဘဲ ဖုံးကွယ်ထားတယ် ဟု သားဖြစ်သူ ကင်မ်အဲရစ် (Kim Aris) က ပြောဆိုထားသည်။   သားဖြစ်သူ ကင်မ်အဲရစ် (Kim Aris) “မေမေ့ကို ရက်ပေါင်း ၂၀၀၀ ကျော် မိသားစုနဲ့ကော ကမ္ဘာကြီးနဲ့ပါ ပေး မတွေ့ဘဲ ဖုံးကွယ်ထားပါတယ်။ မေမေ ဘယ်မှာရှိလဲဆိုတာ ကျနော် မသိရသေးပါဘူး။ မေမေ့ရဲ့အခြေအနေကို မသိရသေးပါဘူး။ အသက် ၈၁ နှစ်အရွယ် နိုဘယ်ငြိမ်းချမ်းရေးဆုရှင်ကို စစ်အာဏာရှင်တွေ ဘာကြောင့် ဖွက် ထားရတာလဲ။ သားတစ် ယောက်က သူ့မိခင်နဲ့ ဘာလို့ စကားမပြောခွင့်မရတာလဲ။ သက်ရှိထင်ရှား ရှိနေသေး တယ်ဆိုတာကို လွတ်လပ်စွာအတည်ပြုထားတဲ့ အထောက်အထားတစ်ခုတောင်မှ မရရှိသေးတာလဲ” ဟု ပြော သည်။   ထို့ပြင် မိခင်ဖြစ်သူ အသက်ရှင်နေဆဲဖြစ်ကြောင်း ယုံကြည်စိတ်ချရပြီး လွတ်လပ်စွာ အတည်ပြုနိုင်သည့် သက် သေ အထောက်အထား တစ်စုံတစ်ရာကို ယနေ့အချိန်အထိ မရရှိသေးကြောင်းကိုလည်း သားဖြစ်သူ ကင်မ်အဲရစ် က လူမှုကွန်ရက်မှတစ်ဆင့် ဇူလိုင်လ ၂၉ ရက်နေ့တွင် ပြောဆိုထာသည်။   လက်ရှိတွင် ဒေါ်အောင်ဆန်းစုကြည်သည် စစ်တပ်က ပုဒ်မမျိုးစုံ တပ်ဆင်ကာ မတရားအမှုဆင် အပြစ်ပေးထား ခြင်းကြောင့် ထောင်ဒဏ်နှစ်ရှည်များစွာ ချမှတ်ခံထားရဆဲဖြစ်ပြီး ပြင်ပကမ္ဘာနှင့် အဆက်အသွယ် ပြတ်တောက် နေချိန် ယခုကဲ့သို့ စစ်တပ်ဘက်က ICRC ဌာနေကိုယ်စားလှယ်နှင့် တွေ့ဆုံမှုအား ထုတ်ပြန်လာခြင်း ဖြစ်သည်။   #ဒေါ်အောင်ဆန်းစုကြည် #ICRC  

ဒေါ်အောင်ဆန်းစုကြည်နှင့် ICRC ကိုယ်စားလှယ် တွေ့ဆုံဟု စစ်တပ်ထုတ်ပြန်

ဒေါ်အောင်ဆန်းစုကြည်နှင့် ICRC ကိုယ်စားလှယ် တွေ့ဆုံဟု စစ်တပ်ထုတ်ပြန် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၃ ရက်။ နိုင်ငံတော်၏ အတိုင်ပင်ခ…

  • August 3, 2026

စစ်မှုထမ်းကြောက်၍ အလုပ်ခွင်များတွင် အမျိုးသမီးများ အစားထိုးဝင်ရောက်လုပ်ကိုင်နေ

စစ်မှုထမ်းကြောက်၍ အလုပ်ခွင်များတွင် အမျိုးသမီးများ အစားထိုးဝင်ရောက်လုပ်ကိုင်နေ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇူလိုင်လ ၃၁ ရက်။ ပဲခူးတိုင…

  • July 31, 2026
×Close