သတင်း

ငြိမ်းချမ်းရေး ဆွေးနွေးမှုများတွင် SCEF မူအတိုင်းသာ သွားမည်ဟုဆို သတင်းနှင့်မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၁ ရက်။ ဖက်ဒရယ် ဒီမိုကရေစီ ပြည်ထောင်စု ပေါ်ထွန်းရေး ဦးဆောင်ကောင်စီ (SCEF) တွင် ပါဝင်သည့် တိုင်းရင်းသား လက်နက်ကိုင် တော်လှန်ရေး အဖွဲ့အစည်းများသည် စစ်အုပ်စု၏ ငြိမ်းချမ်းရေး တွေ့ဆုံဆွေးနွေးရန် ချည်းကပ်မှု များကို လက်မခံဘဲ SCEF ၏ နိုင်ငံရေး ဦးတည်ချက်အတိုင်း ခိုင်ခိုင်မာမာ ဆက်လက် ရပ်တည်သွားမည် ဖြစ်ကြောင်း ပြောသည်။ SCEF အဖွဲ့ဝင်ဖြစ်သည့် ချင်းအမျိုးသားတပ်ဦး (CNF/CNA) ကို စစ်အုပ်စုက ကြားလူတစ်ဆင့် ငြိမ်းချမ်းရေး ဆွေးနွေးရန် ချည်းကပ်မှုများ ရှိခဲ့သော်လည်း အဆိုပါ ကမ်းလှမ်းမှုကို လက်မခံဘဲ ပယ်ချခဲ့ကြောင်း ဆိုသည်။ ချင်းပြည် ချင်းလဲန်းကောင်စီ/ ချင်းပြည်အစိုးရ နိုင်ငံခြားရေးဝန်ကြီးဌာန ဝန်ကြီး ဒေါက်တာ ရွှေခါးရ် က “အိုင်လ် ဇောအထိ လူလွတ်ပြီးတော့ Third Party သက်ဆိုင်ရာကနေတစ်ဆင့် ချည်းကပ်တာမျိုးတော့ ရှိတယ်။ အဲဒီ အချိန်တုန်းကတော့ ကံကောင်းစွာနဲ့ပဲ ဒီ CB နဲ့ CC နဲ့ အစည်းအဝေးလည်း ရှိနေတော့ အဲဒီမှာကတော့ ကျနော် တို့ ထုတ်ပြန်တာ တစ်ခုရှိတယ်။ ကျနော်တို့ CB နဲ့ CC ပူးပေါင်းဆောင်ရွက်မှု အရင်လုပ်ပြီးတော့မှပဲ ဒီကိစ္စတွေ ကိုတော့ ကျနော်တို့ Respond လုပ်ပါမယ်ဆိုပြီးတော့ သူတို့ တုန့်ပြန်တာ ကျနော် တို့ ကြားသိရတယ်” ဟု ပြောသည်။ ၎င်းက ဆက်လက်၍ “အခု မင်းအောင်လှိုင် ငြိမ်းချမ်းရေး ခေါ်နေတဲ့ဟာက ငြိမ်းချမ်းရေးမှ မဟုတ်တာ တကယ့် ငြိမ်းချမ်းရေး ခေါ်ချင်ရင်တော့ တကယ့် ငြိမ်းချမ်းရေးယူချင်ရင်တော့ ကျယ်ကျယ်ပြန့်ပြန့်နဲ့ Inclusive နဲ့ ခေါ်သင့်တာ EAOs ပဲ ခေါ်ပြီးတော့ ကျန်တဲ့ လူကို မခေါ်ဘူးဆိုတဲ့ ပုံစံမျိုးက မဖြစ်သင့်ဘူးလေ။ ဆိုတော့ အဲဒါကြောင့် SCEF ရဲ့ option ကိုပဲ ကျနော်တို့ဖက်ကတော့ ခိုင်ခိုင်မာမာ ရပ်တည်ပေးတယ်ဆိုတဲ့ ဟာကို ကျနော်တို့ ပြောချင်ပါတယ်” ဟု ဆက် ပြောသည်။ အဆိုပါ ပြောဆိုချက်ကို ဩဂုတ်လ ၂၈ ရက်နေ့က ပြုလုပ်ခဲ့သည့် ‘ချင်းပြည်သူတို့၏ ကိုယ်ပိုင်ပြဋ္ဌာန်းခွင့်ကို ကျင့်သုံးပြီး နှစ်နှစ်ခွဲကာလအတွင်း အုပ်ချုပ်ရေးဖော်ဆောင်မှု အစီရင်ခံစာ’ သတင်းရှင်းလင်းပွဲတွင် ဒေါက်တာ ရွှေခါးရ် က ထည့်သွင်း ပြောဆိုခဲ့ခြင်းဖြစ်သည်။ ထို့ပြင် SCEF အဖွဲ့ဝင် ကချင်လွတ်လပ်ရေးအဖွဲ့ (KIO/KIA) သို့လည်း စစ်အုပ်စုက စက်တင်ဘာလ ၄ ရက်နေ့ တွင် ငြိမ်းချမ်းရေး ဆွေးနွေးရန် ဖိတ်ကြားခဲ့သည်ဟူသော သတင်းများနှင့် ပတ်သက်၍ KIO/KIA သတင်းနှင့် ပြန်ကြားရေးတာဝန်ခံ ဗိုလ်မှူးကြီး နော်ဘူ က “ကျနော်ဖြေ ဖူးပါတယ်။ ကျနော်ခင်ဗျားကိုလည်း ဖြေဖူးပါ တယ်။ အခုထက်ထိလည်း ကျနော် မကြားသိရပါဘူး” ဟု ပြောသည်။ စစ်အုပ်စု၏ သွေးခွဲဆွေးနွေးမည့် နည်းဗျူဟာအတိုင်း တစ်ဖွဲ့ချင်းစီ တွေ့ဆုံဆွေးနွေးရန် ကမ်းလှမ်းလာပါက လက်ခံမည် မဟုတ်သော်လည်း ပဋိပက္ခတွင် ပါဝင်သက်ဆိုင်သူ အားလုံးပါဝင်သည့် တကယ့် နိုင်ငံရေးဆွေးနွေးပွဲ ဖြစ်ပါက ပူးပေါင်းပါဝင်ရန် အသင့်ရှိကြောင်း ဗိုလ်မှူးကြီးနော်ဘူ က သတင်းနှင့် မီဒီယာ ကွန်ရက် (NMG) သို့ အတည်ပြုခဲ့ဖူးသည်။ ဗိုလ်မှူးကြီးနော်ဘူက “ကျနော်တို့ KIO ရဲ့ ဆွေးနွေးရေးနဲ့ ပတ်သက်လို့ တကယ့် မြန်မာနိုင်ငံရဲ့ နိုင်ငံရေး အခြေ အနေတွေကို ပြောင်းလဲနိုင်တဲ့ ဆွေးနွေးပွဲ ဖြစ်မယ်ဆိုလို့ရှိရင်တော့ ကျနော်တို့ ပါဝင်ဖို့ အမြဲတမ်း အဆင်သင့် ဖြစ်ပါတယ်။ အားလုံးပါဝင်ပြီးမှ မြန်မာနိုင်ငံတစ်ခုလုံးရဲ့ နိုင်ငံရေး အခြေအနေ ရှင်းလင်းတဲ့ နိုင်ငံရေး ဆွေးနွေး ပွဲဆိုလို့ရှိရင် တော့ ကျနော်တို့ လက်ခံတယ်လို့ ပြောလိုတာပါ” ဟု ပြောသည်။ အလားတူ ကရင်နီအမျိုးသား တိုးတက်ရေးပါတီ (KNPP) အနေဖြင့်လည်း စစ်တပ်ကို နိုင်ငံရေးတွင် ပါဝင်ခွင့်ပြု ထားသည့် ၂၀၀၈ ဖွဲ့စည်းပုံအခြေခံဥပဒေနှင့် NCA ကို အခြေခံသည့် မည်သည့် တွေ့ဆုံဆွေးနွေးမှုကိုမျှ လက်ခံ မည်မဟုတ်ကြောင်း ထုတ်ဖော်ပြောဆိုထားပြီး ကရင်အမျိုးသား အစည်းအရုံး (KNU) ကလည်း စစ်အုပ်စု၏ ငြိမ်းချမ်းရေး ဖိတ်ခေါ်မှုများကို လက်ခံမည်မဟုတ်ကြောင်း တရားဝင် ထုတ်ပြန်ထားသည်။ ပြီးခဲ့သည့် မတ်လ ၃၀ ရက်နေ့တွင် NUG၊ CRPH နှင့် တော်လှန်ရေးအဖွဲ့အစည်းများဖြစ်ကြသည့် KIO/KIA၊ KNU၊ CNF/CNA၊ KNPP/KA တို့ ပူးပေါင်း၍ စစ်ရေး၊ နိုင်ငံရေး၊ ဖက်ဒရယ်ရေးနှင့် ဖွဲ့စည်းပုံဆိုင်ရာ ကိစ္စရပ်များ ကို ဦးဆောင်လမ်းညွှန်ရန် SCEF ကို ဖွဲ့စည်းခဲ့ခြင်း ဖြစ်သည်။ SCEF ၏ ဦးတည်ချက် ၆ ရပ်တွင် စစ်အာဏာသိမ်းမှုကို ဖယ်ရှားရန်၊ စစ်တပ်၏ နိုင်ငံရေးတွင် ပါဝင်နေမှုကို အပြီးတိုင် အဆုံးသတ်ရန်၊ လက်နက်ကိုင်တပ်များ အားလုံးကို ဒီမိုကရေစီနည်းကျ ရွေးကောက်ခံ အရပ်သား အစိုးရ အုပ်ချုပ်မှုအောက်တွင် ထားရှိရန်နှင့် ၂၀၀၈ ဖွဲ့စည်းပုံအခြေခံဥပဒေကို အပြီးတိုင် ဖျက်သိမ်းရန် စသည့် အချက်များ ပါဝင်သည်။ ထို့ပြင် ဖက်ဒရယ် ဒီမိုကရေစီ ဖွဲ့စည်းပုံအခြေခံဥပဒေသစ် ရေးဆွဲကာ ပြည်ထောင်စုသစ် တည်ဆောက်ရေးနှင့် အသွင်ကူးပြောင်းရေးကာလ တရားမျှတမှု ဖော်ဆောင်ရေး လုပ်ငန်းစဉ်များကိုလည်း ထည့်သွင်း ပြဋ္ဌာန်းထား သည်။ ဓါတ်ပုံ - SCEF (ပုံဟောင်း) #SCEF #KIA #KNU #KNPP #CNF

ငြိမ်းချမ်းရေး ဆွေးနွေးမှုများတွင် SCEF မူအတိုင်းသာ သွားမည်ဟုဆို

ငြိမ်းချမ်းရေး ဆွေးနွေးမှုများတွင် SCEF မူအတိုင်းသာ သွားမည်ဟုဆို သတင်းနှင့်မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၁ ရက်။ ဖက်ဒရယ် ဒီမိုကရေစီ ပြည်…

  • September 11, 2026
မောတောင်နယ်စပ်ဂိတ် ပြန်ဖွင့်ပါကလည်း လုံခြုံရေးပြဿနာများအတွက် ကုန်သည်များ စိုးရိမ် သတင်းနှင့် မီဒီယာ ကွန်ရက်။ ၂၀၂၆ ခုနှစ် စက်တင်ဘာလ ၁၀ ရက်။ မြန်မာ-ထိုင်း နယ်စပ်ရှိ မောတောင်နယ်စပ်ဂိတ် ပြန်လည်ဖွင့်လှစ်နိုင်ရေးအတွက် မြိတ်ခရိုင် အုပ်ချုပ်ရေးမှူးနှင့် ထိုင်းနိုင်ငံ ပရာကျွတ်ခီရီခန်ခရိုင် ခရိုင်ဝန်တို့ စက်တင်ဘာလ ၉ ရက် နံနက်ပိုင်းက မြိတ်မြို့ရှိ Grand Jade Hotel ၌ တွေ့ဆုံဆွေးနွေးခဲ့ကြကြောင်း စစ်အုပ်စုက ထုတ်ပြန်သည်။ အဆိုပါ တွေ့ဆုံမှုတွင် မြိတ်ခရိုင်နှင့် ပရာကျွတ်ခီရီခန်ခရိုင်အကြား ကုန်သွယ်ရေးကဏ္ဍ ဖွံ့ဖြိုးတိုးတက်ရေး အတွက် ရေထွက်ပစ္စည်းများ ကူးသန်းရောင်းဝယ်ရေး၊ လူသုံးကုန်ပစ္စည်း ကုန်သွယ်မှုဆိုင်ရာ ကိစ္စရပ်များနှင့် မောတောင်ဂိတ်အား အမြဲတမ်း နယ်စပ်ဂိတ်အဖြစ် အဆင့်မြှင့်တင် ဖွင့်လှစ်ရေးတို့ကို နှစ်ဘက် အပြန်အလှန် ဆွေးနွေးခဲ့ကြခြင်း ဖြစ်သည်။ သို့သော်လည်း မြိတ်-မောတောင် လမ်းကြောင်းတစ်လျှောက်တွင် တိုက်ပွဲများ မကြာခဏ ဖြစ်ပွားနေသဖြင့် ဂိတ်ပြန်ဖွင့်ပါကလည်း အခက်အခဲများစွာ ရှိလာနိုင်သည်ဟု မောတောင်မြို့ခံတစ်ဦးက ဆိုသည်။ “မြိတ် - မောတောင်လမ်းပိုင်းက အေးချမ်းနေတာလည်း မဟုတ်ဘူး။ လမ်းတစ်လျှောက်လုံးမှာ တိုက်ပွဲတွေက မကြာခဏလိုလို ဖြစ်နေတာ။ ဖွင့်ဖြစ်တယ်ဆိုရင်လည်း လမ်းတွေမှာ ဂိတ်တွေ အထပ်ထပ်ချရမယ်၊ အဲဒီဂိတ် တွေက ငွေကြေးကောက်ကြဦးမှာ သေချာတယ်။ ဂိတ်ကြေး ပေးရတာနဲ့တင် ကုန်သည်တွေ အမြတ်ကျန်မှာ မဟုတ်ဘူး” ဟု ပြောသည်။ မောတောင်နယ်စပ်ဂိတ်ကို မကြာခဏဆိုသလို ပြန်ဖွင့်မည်ဟု ပြောဆိုကြသော်လည်း လက်ရှိအချိန်အထိ ယာယီ ကုန်သွယ်ရေးအဖြစ် ခဏသာ ဖွင့်လှစ်နိုင်ခဲ့ပြီး တရားဝင် ပုံမှန်ဖွင့်လှစ်နိုင်ခြင်း မရှိသေးပေ။ မောတောင် နယ်စပ်မြို့ကို လွန်ခဲ့သည့် ၂၀၂၆ ခုနှစ် မေလအတွင်းက စစ်အုပ်စုတပ်က ပြန်လည်ထိန်းချုပ်ခဲ့ခြင်း ဖြစ်သည်။ မောတောင်နယ်စပ်ဂိတ်သည် မြိတ်မြို့ဘက်မှ ရေထွက်ကုန်များနှင့် တနင်္သာရီမြို့နယ်မှ ခြံထွက်သီးနှံ များကို ထိုင်းနိုင်ငံ ပရာကျွတ်မြို့ဘက်သို့ တင်ပို့ရာတွင် အနီးဆုံး လမ်းကြောင်းဖြစ်သော်လည်း စစ်အာဏာသိမ်းပြီး နောက်ပိုင်း ကုန်သွယ်မှု သိသိသာသာ လော့နည်းသွားခဲ့သည်။ ထိုင်း-မြန်မာ နယ်စပ်တစ်လျှောက်တွင် မောတောင်အပြင် မြဝတီ၊ တာချီလိတ်၊ ကော့သောင်း၊ ထီးခီး၊ မယ်စဲ့ စသည့် ကုန်သွယ်ရေးစခန်းများ ရှိသော်လည်း တိုက်ပွဲများကြောင့် လမ်းပိုင်း ပိတ်ဆို့မှုများ ရှိနေသည်။ အဓိက နယ်စပ်ကုန်သွယ်ရေးစခန်း ဖြစ်သည့် မြဝတီ ပုံမှန်မဖွင့်နိုင်သည့် အခြေအနေတွင် တာချီလိတ်လမ်းနှင့် ရနောင်း-ကော့သောင်း ပင်လယ်ရေကြောင်းလမ်းများကို အစားထိုး အသုံးပြုနေရသည်ဟု ဘုရင့်နောင် အခြေ စိုက် ရေထွက်ကုန်ပစ္စည်း ရောင်းဝယ်ရေး လုပ်ငန်းရှင်တစ်ဦးက ရှင်းပြသည်။ #မောတောင်နယ်စပ်

မောတောင်နယ်စပ်ဂိတ် ပြန်ဖွင့်ပါကလည်း လုံခြုံရေးပြဿနာများအတွက် ကုန်သည်များ စိုးရိမ်

မောတောင်နယ်စပ်ဂိတ် ပြန်ဖွင့်ပါကလည်း လုံခြုံရေးပြဿနာများအတွက် ကုန်သည်များ စိုးရိမ် သတင်းနှင့် မီဒီယာ ကွန်ရက်။ ၂၀၂၆ ခုနှစ် စက်တင်ဘာလ ၁၀ ရက်။ မြန်မ…

  • September 11, 2026
စစ်တွေ-ပုဏ္ဏားကျွန်း တိုက်ပွဲနောက်ပိုင်း စစ်အုပ်စု လေကြောင်းတိုက်ခိုက်မှုများ ပြုလုပ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၁ ရက်။ ရခိုင်ပြည်၊ စစ်တွေ-ပုဏ္ဏားကျွန်း အစပ်တိုက်ပွဲများတွင် အထိနာ၍ ပြန်ဆုတ်နေရသည့် စစ်အုပ်စုတပ်သည် တိုက်ပွဲဖြစ်ပွားရာနှင့် ၁၀ မိုင်ကျော် ကွာဝေးသည့် ပုဏ္ဏားကျွန်းမြို့နယ် ကျောက်ဆိပ်ကျေးရွာရှိ စစ်ဘေးရှောင် စခန်းကို တိုက်ခိုက်ခဲ့ရာ အရပ်သားထိခိုက်သေဆုံးမှုများ ရှိခဲ့သည်။ စက်တင်ဘာလ ၁၁ ရက်နေ့၊ နံနက်ပိုင်း၌ စစ်အုပ်စုတပ်က ကျောက်ဆိပ်ကျေးရွာရှိ စစ်ဘေးရှောင်စခန်းကို FPV ဒရုန်းဖြင့် ဗုံးကြဲခဲ့ရာ အသက် ၆၃ နှစ်အရွယ် စစ်ရှောင်အမျိုးသမီးတစ်ဦး သေဆုံးသွားခဲ့သည်။ စက်တင်ဘာလ ၄ ရက်ကတည်းက စစ်တွေမြို့ဘက်မှ ပုဏ္ဏားကျွန်းဘက်သို့ ထိုးစစ်ဆင်လာသည့် စစ်အုပ်စုတပ် သည် အာရက္ခတပ်တော် (AA) ၏ ခုခံမှုကြောင့် အကျအဆုံးများကာ ပြန်လည်ဆုတ်ခွာနေရချိန်တွင် အပြစ်မဲ့ အရပ်သားပြည်သူများရှိရာ ဒေသများကို အခုလို ပစ်မှတ်ထား တိုက်ခိုက်လာခြင်းဖြစ်သည်။ ကျောက်ဆိပ်ရွာ ဒေသခံအမျိုးသားတစ်ဦးက “သူတို့ မြေပြင်တိုက်ပွဲမှာ အထိနာပြီး ပြန်ဆုတ်သွားရတဲ့ အချိန် ကျမှ စစ်ရေးနဲ့ ဘာမှမဆိုင်တဲ့ စစ်ရှောင်တွေရှိတဲ့ ရွာကို ဒရုန်းနဲ့ လာကြဲတာပါ။ တိုက်ပွဲဖြစ်တဲ့နေရာနဲ့လည်း ၁၀ မိုင်ကျော်ဝေးတယ်။ ဒါဟာ အပြစ်မဲ့ပြည်သူတွေကို ဗြောင်ကျကျ ပစ်မှတ်ထား တိုက်ခိုက်တာ” ဟု ပြောသည်။ ထို့ပြင် စက်တင်ဘာလ ၁၀ ရက် ည ၉ နာရီ ၄၀ မိနစ်ခန့်ကလည်း ဂွမြို့နယ်၊ ကျိန္တလီမြို့ကို စစ်အုပ်စုတပ်က ဂျက် ဖိုက်တာ တိုက်လေယာဉ်ဖြင့် ဗုံးကြဲတိုက်ခိုက်ခဲ့သဖြင့် ဒေသခံ အရပ်သားများ ထိခိုက်သေဆုံးမှုများ ရှိနေသည်။ သို့သော် ဒေသအတွင်း ဖုန်းနှင့် အင်တာနက်လိုင်းများ ပြတ်တောက်နေသဖြင့် အသေးစိတ် ထိခိုက်ပျက်စီးမှု စာရင်းကို အတည်ပြုနိုင်ရန် အခက်အခဲ ဖြစ်ပေါ်နေသည်။ စစ်အုပ်စုတပ်သည် စက်တင်ဘာလ ၇ ရက်နေ့ကလည်း သံတွဲမြို့နှင့် ကျောက်ကြီးကျေးရွာ စာသင်ကျောင်းအနီး ကို ဂျက်ဖိုက်တာဖြင့် နှစ်ကြိမ်တိုင်တိုင် ဗုံးကြဲခဲ့သဖြင့် အမျိုးသမီးတစ်ဦး သေဆုံးကာ ၃ ဦး ဒဏ်ရာရရှိပြီး နေအိမ်အဆောက်အအုံများ ပျက်စီးခဲ့ရကြောင်း AA ၏ ထုတ်ပြန်ချက်တွင် ဖော်ပြထားသည်။ စစ်ရေးသတင်းရင်းမြစ်တစ်ခုက “စစ်အုပ်စုက ရခိုင်တောင်ပိုင်းနဲ့ မြောက်ပိုင်းမှာ စစ်ကြောင်းထိုးဖို့ ကြိုးစားပေ မဲ့ မြေပြင်မှာ လုံးဝ မတိုးနိုင်ဘဲ အထိနာနေတာပါ။ ဒါကြောင့် မြို့နယ်အသီးသီး က စာသင်ကျောင်းတွေ၊ စစ်ရှောင်စခန်းတွေနဲ့ လူနေကျေးရွာတွေကို လေကြောင်း၊ ဒရုန်းတွေနဲ့ တောက်လျှောက် ပစ်မှတ်ထား တိုက် ခိုက်ပြီး ထိတ်လန့်အောင် လုပ်နေတာ ဖြစ်တယ်” ဟု ပြောသည်။ လက်ရှိတွင် ရခိုင်ပြည်အတွင်း ဂွ၊ သံတွဲ၊ ပုဏ္ဏားကျွန်းနှင့် စစ်တွေ အစပ်နယ်မြေများ၌ စစ်အုပ်စု၏ လေကြောင်း တိုက်ခိုက်မှုနှင့် လက်နက်ကြီး ပစ်ခတ်မှုများကြောင့် အရပ်သား ထိခိုက်သေဆုံးမှုများ တစ်နေ့ထက်တစ်နေ့ မြင့်တက်လာနေသည်ဟု ဒေသခံများနှင့် ဒေသတွင်းရှိ လူမှုကယ်ဆယ်ရေးအဖွဲ့ဝင်များက ပြောသည်။ #စစ်တွေ #ပုဏ္ဏားကျွန်း

စစ်တွေ-ပုဏ္ဏားကျွန်း တိုက်ပွဲနောက်ပိုင်း စစ်အုပ်စု လေကြောင်းတိုက်ခိုက်မှုများ ပြုလုပ်

စစ်တွေ-ပုဏ္ဏားကျွန်း တိုက်ပွဲနောက်ပိုင်း စစ်အုပ်စု လေကြောင်းတိုက်ခိုက်မှုများ ပြုလုပ် သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၁ ရက်။ ရ…

  • September 11, 2026
တံတားဦးလေဆိပ် တိုက်ခိုက်ခံရပြီးနောက် တိုက်ပွဲများပြင်းထန်ကာ လေကြောင်းလိုင်းများ ရပ်ဆိုင်း သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၁ ရက်။ မန္တလေးမြို့၊ တံတားဦး လေတပ်စခန်းအတွင်း ရပ်နားထားသည့် စစ်အုပ်စု၏ တိုက်လေယာဉ်များကို တော် လှန်ရေးတပ်ဖွဲ့များက Suicide ဒရုန်းများဖြင့် ဝင်ရောက်တိုက်ခိုက်ခဲ့ပြီးနောက် အဆိုပါ ဒေသဝန်းကျင်တွင် စစ် အုပ်စုတပ်၏ စစ်ကြောင်းထိုးမှုများ ရှိလာသကဲ့သို့ မန္တလေး အပြည်ပြည်ဆိုင်ရာ လေဆိပ်ကိုလည်း ယာယီ ပိတ် သိမ်းလိုက်သည်။ စက်တင်ဘာလ ၁၀ ရက်နေ့တွင် ပြည်သူ့ကာကွယ်ရေးတပ်မတော် (PDF) အမည်ဖြင့် တော်လှန်ရေးတပ်ဖွဲ့များ၏ FPV Suicide ဒရုန်းများဖြင့် တိုက်ခိုက်မှုကြောင့် တိုက်လေယာဉ် ၄ စင်း ထိခိုက်ခဲ့ပြီး ၂ စင်း ပေါက်ကွဲသွားသည် ဟု စစ်ရေးသတင်းရင်းမြစ်များက ဆိုသည်။ ယခုဖြစ်စဉ်သည် မြန်မာနိုင်ငံတွင် ပထမဆုံးအကြိမ် လေတပ်စခန်းအတွင်း ရပ်ထားသည့် တိုက်လေယာဉ်များကို ဒရုန်းဖြင့် အောင်မြင်စွာ တိုက်ခိုက်နိုင်ခဲ့သည့် စစ်ဆင်ရေးလည်း ဖြစ်သည်။ အဆိုပါ တိုက်ခိုက်မှုဖြစ်ပွားပြီးနောက် စစ်အုပ်စုတပ်က တံတားဦးနှင့် နွားထိုးကြီးမြို့နယ်အတွင်းရှိ ကျေးရွာများ သို့ စစ်ကြောင်းထိုးလာသဖြင့် မြို့သာလမ်းပေါ်ရှိ သစ်တောဖျားနှင့် နွားခြံကြီးကျေးရွာတို့တွင် စစ်အုပ်စုတပ်နှင့် တော်လှန်ရေးတပ်ဖွဲ့များအကြား တိုက်ပွဲများ ပြင်းထန်နေသည်။ ဒေသခံ စစ်ရေးသတင်းရင်းမြစ်တစ်ဦးက “လေတပ်ထဲက တိုက်လေယာဉ်တွေ ဒရုန်းနဲ့ တိုက်ခိုက်ခံရပြီးတဲ့ နောက် စစ်အုပ်စုက လေဆိပ်ပတ်ဝန်းကျင်နဲ့ အနီးအနားရွာတွေကို စစ်ကြောင်းတွေ ချက်ချင်းဖြန့်ပြီး ထိုးလာ တာပါ။ မြို့သာလမ်းပေါ်မှာတော့ နှစ်ဘက် ထိတွေ့တိုက်ပွဲတွေ အပြင်းအထန် ဖြစ်နေတယ်” ဟု ပြောသည်။ အခြားတစ်ဖက်တွင်လည်း လုံခြုံရေးအရ မန္တလေး အပြည်ပြည်ဆိုင်ရာ လေဆိပ်ကို စက်တင်ဘာ ၁၂ ရက်အထိ ဝင်ထွက်ခွင့် ပိတ်ထားသကဲ့သို့ MAI လေကြောင်းလိုင်းအပါအဝင် ခရီးသည်တင် လေကြောင်းလိုင်းများသည် မန္တလေးမှ ထွက်ခွာမည့် ပြည်တွင်း/ပြည်ပ ခရီးစဉ်အားလုံးကို ယာယီရပ်ဆိုင်းလိုက်သည်။ မန္တလေးမြို့ရှိ ခရီးသွားအေဂျင်စီ တာဝန်ရှိသူတစ်ဦးက “လေဆိပ်ပိတ်လိုက်ရတော့ စက်တင်ဘာ ၁၀ ရက်နေ့ ကတည်းက ပျံသန်းမယ့် ခရီးစဉ်တွေ အကုန်ဖျက်လိုက်ရတယ်။ အရေးကြီး စီးပွားရေးနဲ့ ကျန်းမာရေး ခရီးစဉ် သွားမယ့်သူတွေ တော်တော်လေး အခက်တွေ့ကြရတယ်။ ပြင်ဦးလွင် အနီးစခန်းဘက် ပြောင်းပြေးဆွဲဖို့နဲ့ လက်မှတ်ခ ပြန်အမ်းပေးဖို့တော့ လေကြောင်းလိုင်းတွေက စီစဉ်ပေးနေပါတယ်” ဟု ပြောသည်။ လေကြောင်းလိုင်းများက မန္တလေးမှ ပျံသန်းမည့် ပြည်တွင်းခရီးစဉ်များကို ပြင်ဦးလွင် အနီးစခန်း လေဆိပ်သို့ ပြောင်းလဲပြေးဆွဲပေးမည် ဖြစ်ပြီး ခရီးသည်များအနေဖြင့် လက်မှတ်ခ အပြည့်အဝ ပြန်လည်ထုတ်ယူခြင်း သို့မဟုတ် ခရီးစဉ် အခမဲ့ ပြောင်းလဲခြင်းများ ပြုလုပ်နိုင်ကြောင်း ခရီးသွားလုပ်ငန်း အေဂျင်စီအချို့က ထုတ်ပြန် ထားသည်။ လေဆိပ်နှင့် နီးစပ်သည့် ဒေသခံတစ်ဦးကလည်း “လေဆိပ်ကို ပိတ်လိုက်တာဟာ ခရီးသည်တွေ ဆိုက်ရောက်လို့ ထိခိုက်တာမျိုးမဟုတ်ဘဲ လုံခြုံရေးစိုးရိမ်လို့ ကြိုတင်ပိတ်လိုက်တာပါ။ လက်ရှိမှာတော့ လေဆိပ်တစ်ခုလုံးကို စစ်အုပ်စုက လုံခြုံရေး တင်းကျပ်ထားတယ်” ဟု ပြောသည်။ တံတားဦး အပြည်ပြည်ဆိုင်ရာ လေဆိပ်သည် အာဏာသိမ်းပြီးနောက်ပိုင်း စစ်အုပ်စု၏ ဂျက်ဖိုက်တာများနှင့် Y-12 လေယာဉ်များ အဓိက အသုံးပြုနေရာစခန်းဖြစ်ပြီး အဆိုပါ တိုက်ခိုက်မှုကြောင့် လေကြောင်းလိုင်းများ ဖျက် ဆီးခဲ့ရသဖြင့် ခရီးသည်များ လုပ်ငန်းပိုင်းဆိုင်ရာ ထိခိုက်နစ်နာမှုများ ရှိခဲ့သည်။ စစ်အုပ်စုဘက်ကမူ ဒရုန်းများကို လေကြောင်းရန် ကာကွယ်ရေးစနစ်ဖြင့် ဟန့်တားနိုင်ခဲ့သဖြင့် ထိခိုက်မှုမရှိဟု ငြင်းဆိုထားသော်လည်း ထွက်ပေါ်လာသည့် ရုပ်သံမှတ်တမ်းများတွင် လေယာဉ်ရုံအတွင်းရှိ တိုက်လေယာဉ်ကို ဒရုန်းဖြင့် တိုက်ခိုက်ခဲ့သည်ကို တွေ့ရသည်။ #တံတားဦးလေဆိပ်

တံတားဦးလေဆိပ် တိုက်ခိုက်ခံရပြီးနောက် တိုက်ပွဲများပြင်းထန်ကာ လေကြောင်းလိုင်းများ ရပ်ဆိုင်း

တံတားဦးလေဆိပ် တိုက်ခိုက်ခံရပြီးနောက် တိုက်ပွဲများပြင်းထန်ကာ လေကြောင်းလိုင်းများ ရပ်ဆိုင်း သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၁ ရက်။ …

  • September 11, 2026
လေးမျက်နှာ၌ ငဝန်တာဘောင် ပြန်ကျိုးသဖြင့် မြို့ပေါ်သို့ ရေများ ပြန်လည်ဝင်ရောက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၀ ရက်။ ဧရာဝတီတိုင်း၊ လေးမျက်နှာမြို့နယ်တွင် ငဝန်တာကျိုးပေါက်မှုကို တစ်လကျော်ကြာ ပြုပြင်ပြီးနောက် ရေဝင်မှု ထိန်းချုပ်နိုင်ပြီဟု စစ်အုပ်စုက ထုတ်ပြန်ကြေညာခဲ့သော်လည်း ကြေညာပြီး နောက်တစ်ရက်၌ပင် တာဘောင် ထပ်မံကျိုးပေါက်ကာ မြို့ပေါ်ရပ်ကွက်များအတွင်းသို့ ရေများ ပြန်လည်ဝင်ရောက်နေကြောင်း ဒေသခံများနှင့် ကူညီကယ်ဆယ်ရေး အဖွဲ့များက ပြောသည်။ ပြီးခဲ့သည့် ဇူလိုင်လ ၃၀ ရက်ကတည်းက စတင်ကျိုးပေါက်ခဲ့သည့် ငဝန်တာဘောင် ရေဝင်လမ်းကြောင်းကို ပြန်လည်ပိတ်ဆို့နိုင်ပြီဟု စစ်အုပ်စု၏ ဧရာဝတီတိုင်း အစိုးရအဖွဲ့နှင့် စစ်အုပ်စုက စက်တင်ဘာလ ၈ ရက်နေ့တွင် ကြေညာခဲ့ သည်။ သို့သော်လည်း စက်တင်ဘာလ ၉ ရက်နေ့၊ ည ၉ နာရီအချိန်ခန့်တွင် ပြုပြင်ထားသည့် အတွင်းပိုင်း သံတိုင်များ မြစ်ရေစီးအားကြောင့် ကွေးဝင်ပျက်စီးကာ ပေ ၂၀ အကျယ်ခန့် ထပ်မံကျိုးပေါက်ခဲ့ခြင်း ဖြစ်သည်။ တာဘောင် ပြန်ကျိုးသည့် ဖြစ်စဉ်နှင့် ပတ်သက်၍ သတင်းရင်းမြစ်တစ်ဦးက “တာဘောင် ပိတ်တာပြီးလို့ ပြုပြင် တဲ့ အဖွဲ့တွေတောင် ဆင်းမသွားရသေးဘူး၊ မြစ်ရေစီးအားက ပြင်းလွန်းတော့ ရေတားဖို့ စိုက်ထားတဲ့ သံဘောင် တွေ ကွေးထွက်သွားပြီး ပေ ၂၀ လောက် အပေါက်ကြီး ပြန်ဖြစ်သွားတာ” ဟု ပြောသည်။ တာဘောင် ပြန်လည်ကျိုးပေါက်သွားသည့်အတွက် ရေဝင်ပေါက်များ ပိုမိုကျယ်ပြန့်လာပြီး ရေအနက် တစ်ပေ ကျော်အထိ ချက်ချင်း တက်လာကာ ပြီးခဲ့သည့်ရက်ပိုင်းက ရေပြန်ကျသွားသည့် အိုင်သပြုလမ်းဆုံ လမ်းမကြီး အထိ ရေများ ပြန်လည်ကျော်လွန် ဝင်ရောက်လာနေသည်။ ထိုသို့ ရေများ ထပ်မံဝင်ရောက်လာမှုကြောင့် ရေကျချိန်၌ မိမိတို့နေအိမ်များသို့ ပြန်လည်နေထိုင်ကြသည့် အနိမ့် ပိုင်း ရပ်ကွက်သူ ရပ်ကွက်သားများအနေဖြင့် စက်တင်ဘာ ၉ ရက်နေ့ ညပိုင်းမှစ၍ ဘေးလွတ်ရာသို့ အရေးပေါ် ပြန်လည်ပြောင်းရွှေ့နေကြရသည်။ အမည်မဖော်လိုသည့် ကယ်ဆယ်ရေးအဖွဲ့ဝင်တစ်ဦးက “တာဘောင်ကို အပြီးထိန်းချုပ်နိုင်ပြီလို့ ကြေညာတာ ရယ်၊ လက်တွေ့မှာလည်း ရေတားနိုင်တာကို မြင်ရတော့ လူတွေက ရေကျတာနဲ့ အိမ်ပြန်သန့်ရှင်းရေးလုပ် အိမ်ပြန်နေကြမယ်ပေါ့ အဲ့လိုနဲ့ ပြန်ကြတာ။ အခုကျတော့ ရေက ရုတ်တရက် ပြန်တက်လာတော့ ဘာမှ မပြင် ဆင်ရသေးဘဲ ထပ်ပြောင်းရတာပေါ့” ဟု ပြောသည်။ လက်ရှိတွင် ရေဝင်စီးအား တဖြည်းဖြည်း သန်မာလာနေပြီး ရေဘေးသင့်ပြည်သူများကို ကူညီပေးနိုင်ရန် လူမှုကူညီရေး အသင်းအဖွဲ့အချို့က ညတွင်းချင်း လာရောက်စောင့်ဆိုင်း ကူညီပေးနေကြရသည်။ မြေပြင်တွင် ကူညီကယ်ဆယ်ရေး ဆောင်ရွက်နေသူတစ်ဦးကလည်း “အဓိက ကတော့ ရေဝင်ပေါက် ထပ် မကျယ်သွားဖို့ပဲ၊ ရေပေါက်သာ ပိုကျယ်သွားရင် ရေတက်နှုန်းက အများကြီး ပိုမြန်လာမှာ။ လက်ရှိ ရေဝင်နေ တဲ့ အရှိန်နဲ့ ဆိုရင်တော့ အချိန်မီ ပြန်ပိတ်ဖို့က လုံးဝ မလွယ်သေးဘူး” ဟု ပြောသည်။ ငဝန်မြစ်ရေတားဆီးရန် အတွင်းတာဘောင်နှင့် အပြင်တာဘောင် နှစ်ထပ်ပိတ်ဆို့ရေး ဆောင်ရွက်နေခြင်းဖြစ်ပြီး တစ်လနှင့် ၄ ရက်ကျော်ကြာ ပြုပြင်ခဲ့ရသည့် အတွင်းတာဘောင်မှာ မကြာသေးမီကမှ ပြီးစီးခဲ့သော်လည်း ရေစီးအားကြောင့် ချက်ချင်းဆိုသလို ပြန်လည်ပျက်စီးသွားခဲ့ခြင်းဖြစ်သည်။ အဆိုပါ ငဝန်တာကျိုးပေါက်မှုကြောင့် လေးမျက်နှာမြို့နယ် အပါအဝင် ဧရာဝတီတိုင်းအတွင်းရှိ မြို့နယ် ၆ မြို့နယ် မှ ကျေးရွာပေါင်း ရာချီနှင့် ပြည်သူ သိန်းချီ ရေဘေးသင့်ခဲ့ရပြီး လက်ရှိ ထပ်မံကျိုးပေါက်သည့် အခြေအနေနှင့် ပတ်သက်၍ စစ်အုပ်စုဘက်က တစ်စုံတစ်ရာ သတင်းထုတ်ပြန်ထားခြင်း မရှိသေးပေ။ #ငဝန်တာကျိုး

လေးမျက်နှာ၌ ငဝန်တာဘောင် ပြန်ကျိုးသဖြင့် မြို့ပေါ်သို့ ရေများ ပြန်လည်ဝင်ရောက်

လေးမျက်နှာ၌ ငဝန်တာဘောင် ပြန်ကျိုးသဖြင့် မြို့ပေါ်သို့ ရေများ ပြန်လည်ဝင်ရောက် သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၀ ရက်။ ဧရာဝတီတိုင…

  • September 10, 2026
ဗန်းမော်စစ်ကူ စစ်သင်္ဘောများ ဆက်တိုက် တိုက်ခိုက်ခံရပြီး မီးလောင်ပျက်စီးမှုများပြား သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၀ ရက်။ ကချင်ပြည်၊ ဗန်းမော် စစ်မြေပြင်သို့ စစ်အင်အားနှင့် ရိက္ခာ ဖြည့်တင်းရန် ကြိုးပမ်းလာသည့် စစ်အုပ်စု၏ ရေယာဉ်များကို ကချင်လွတ်လပ်ရေးတပ်မတော် (KIA) နှင့် ပူးပေါင်းတပ်များက ဆက်တိုက်ပစ်ခတ် တိုက်ခိုက် ခဲ့ရာ စစ်အုပ်စုတပ်၏ သင်္ဘောအများအပြား မီးလောင်ပျက်စီးခဲ့ကြောင်း KIO/KIA နှင့် မြေပြင် သတင်းရင်းမြစ် များ က ပြောသည်။ KIO/KIA ပြန်ကြားရေးတာဝန်ခံ ဗိုလ်မှူးကြီးနော်ဘူက “အခု ၂ သုတ်ရှိပါပြီတက်တာ။ ပထမအသုတ် ၁၄ စီးလို့ ပြောတာပေါ့နော်။ ခြောက်စီး ခုနှစ်စီးကတော့ ဗန်းမော်ဖက်မှာ ပြန်ဝင်တာ။ ကျန်တဲ့ဟာကတော့ လမ်းမှာ ပျောက် သွားတာ KIA နဲ့ ပူးပေါင်းတပ်တွေရဲ့ တိုက်ခိုက်ခံပြီးမှ မီးလောင်တာတွေ ရေနစ်သွားတာတွေ ရှိပါတယ်” ဟု စက်တင်ဘာလ ၁၀ ရက်နေ့တွင် ပြောသည်။ မန္တလေးဘက်မှ ရွှေကူဘက်သို့ ဆန်တက်လာသည့် သင်္ဘောများနှင့် ဗန်းမော်ဘက်မှ ပြန်လည်စုန်ဆင်းလာသည့် သင်္ဘောများကို ရွှေကူမြို့နယ်၊ စင်းခန်း-ဇင်းဘုံ ကျေးရွာ ဝန်းကျင်နှင့် စင်းခန်းတံတား အနီးတို့တွင် KIA ပူးပေါင်း တပ်များက ဒရုန်းများ၊ လက်နက်ကြီးများဖြင့် ပစ်ခတ်တိုက်ခိုက်ခဲ့ခြင်း ဖြစ်သည်။ “နောက်ဒုတိယအသုတ်ကတော့ သုံးစီးလို့ ပြောတယ်။ ငါးစီးလို့လည်း ပြောတယ်။ ဒါပေမယ့် အတိအကျတော့ မသိဘူး။ အဲဒါကတော့ ရွှေကူရောက်တယ်။ ရွှေကူမှာ ပစ္စည်းတင်တဲ့ သင်္ဘောတစ်စီးကို ပစ်ခတ်ခံလို့ မီးလောင် သွားတယ်။ အဲဒါကို သွားကယ်ဖို့ မနေ့က ဗန်းမော်ဖက်မှာ ရောက်လာတဲ့ သင်္ဘောတွေ ပြန်ပြီးမှ ဆင်းတယ်။ စုန်ဆင်းပြီးမှ သွားကြိုဖို့ သွားကယ်ဖို့ ၄ စီးရှိပါတယ်။ အဲဒါကို မနေ့က လမ်းမှာ တိုက်ခိုက်ပြီးမှ မီးလောင်တာ တွေ ရေထဲမှာ မြုပ်သွားတာတွေ ဆိုတော့ ၄ စီးက မနေ့က ပျောက်သွားတာ ဖြစ်ပါတယ်။ အခြေအနေက အဲလိုပါခင်ဗျာ” ဟု ဗိုလ်မှူးကြီးနော်ဘူက ဆက်ပြောသည်။ ထို့ပြင် မန္တလေးမြို့ ဂေါဝိန်ဆိပ်ကမ်းနှင့် ပေပင်ဆိပ်ကမ်းတို့မှ စက်တင်ဘာလ ၄ ရက်တွင် ထွက်ခွာလာသည့် ဒုတိယအကြိမ် ရေကြောင်းစစ်ကြောင်းထဲမှ ရေယာဉ် ၉ စီးအနက်မှ အချို့မှာလည်း မြစ်အထက်ဘက်သို့ ဆက်လက်ဆန်တက်ရန် ကြိုးပမ်းစဉ် တိုက်ခိုက်ခံခဲ့ရခြင်းဖြစ်သည်။ အဆိုပါ ရေကြောင်းစစ်ကြောင်း ရွှေကူသို့ ရောက်ရှိလာသည့် အခြေအနေနှင့် ပတ်သက်၍ ဒေသတွင်း သတင်း ရင်းမြစ်တစ်ဦးက ယခုကဲ့သို့ ပြောသည်။ “စက်တင်ဘာ ၈ ရက်က ရွှေကူကို စစ်သင်္ဘောနဲ့ တွဲတွန်း ရေယာဉ် အပါအဝင် စုစုပေါင်း ၉ စီး ရောက်လာတာ ပါ။ စက်တင်ဘာ ၉ ရက် နေ့လည်ပိုင်းမှာ မြစ်အထက်ဘက်ကို နည်းနည်း ဆန်တက်ဖို့ ကြိုးစားတုန်း ပစ်ခတ်ခံရ ပြီး မီးလောင်သွားတာ” ဟု ပြောသည်။ ဩဂုတ်လကုန်ပိုင်းမှ စက်တင်ဘာလ ၉ ရက်နေ့အထိ သတင်းပတ် နှစ်ပတ်အတွင်း ဗန်းမော်ဘက်သို့ စစ်အင်အားနှင့် ရိက္ခာဖြည့်တင်းရန် လာရောက်သည့် စစ်အုပ်စု၏ တိုက်ခိုက်ရေးနှင့် ကုန်တင်သင်္ဘော ၁၄ စီး ထက်မနည်း ထိခိုက်ပျက်စီးခဲ့သည့်အပြင် စစ်အုပ်စု တပ်ဖွဲ့ဝင်နှင့် မိသားစုဝင် ၁၅၀ နီးပါးကိုလည်း စစ်သုံ့ပန်း အဖြစ် KIA က ဖမ်းဆီးရမိထားသည်။ ဒေသခံတစ်ဦးကလည်း “စက်တင်ဘာ ၈ ရက်နဲ့ ၉ ရက်မှာတင် စုန်ဆင်းလာတဲ့ သင်္ဘောတွေရော၊ ဆန်တက်ဖို့ လုပ်နေတဲ့ သင်္ဘောတွေပါ ဆက်တိုက် တိုက်ခံရတာပါ။ တချို့သင်္ဘောတွေဆို ရေထဲမြုပ်သွားသလို၊ တချို့လည်း မီးတွေလောင်ပြီး မျောသွားတာတွေ ရှိတယ်ဗျ” ဟု ပြောသည်။ စစ်အုပ်စုတပ်သည် ဩဂုတ်လ ၂၁ ရက်က ပထမအကြိမ် စေလွှတ်ခဲ့သည့် ရေယာဉ် ၁၅ စီးပါ ရေယာဉ်တန်း စစ်ကြောင်းတွင်လည်း KIA ၏ တိုက်ခိုက်မှုကြောင့် အများအပြား ပျက်စီးခဲ့ပြီး ရေယာဉ် ၇ စီးခန့်သာ ဗန်းမော်သို့ ရောက်ရှိနိုင်ခဲ့ခြင်း ဖြစ်သည်။ ဧရာဝတီမြစ်ကြောင်းအတွင်း ရွှေကူနှင့် ဗန်းမော်ကြား စစ်အုပ်စုတပ် သင်္ဘောများ ဆက်တိုက် တိုက်ခိုက်ခံရပြီး မီးလောင်ပျက်စီးခဲ့သည့် ဖြစ်စဉ်များနှင့် ပတ်သက်၍ စစ်အုပ်စုဘက်က စက်တင်ဘာလ ၁၀ ရက်နေ့အထိ သတင်းတစ်စုံတစ်ရာ ထုတ်ပြန်ခြင်း မရှိသေးပေ။ ဓါတ်ပုံ - CJ #ဗန်းမော်

ဗန်းမော်စစ်ကူ စစ်သင်္ဘောများ ဆက်တိုက် တိုက်ခိုက်ခံရပြီး မီးလောင်ပျက်စီးမှုများပြား

ဗန်းမော်စစ်ကူ စစ်သင်္ဘောများ ဆက်တိုက် တိုက်ခိုက်ခံရပြီး မီးလောင်ပျက်စီးမှုများပြား သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၀ ရက်။ ကချင…

  • September 10, 2026
ပဲခူး-ရခိုင်အစပ် ပန်းတောင်း၌ တိုက်ပွဲများ ၄ ရက်ဆက် ပြန်လည်ပြင်းထန်လာ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၀ ရက်။ ပဲခူးတိုင်း၊ ပန်းတောင်းမြို့နယ်၊ ရိုးတောင်ကျော်လမ်းရှိ ညောင်ကျိုးနှင့် ပွိုင့် ၆၆၆ ကုန်း အနီးဝန်းကျင်၌ အာရက္ခ တပ်တော် (AA) နှင့် စစ်အုပ်စုတပ်တို့ကြား တိုက်ပွဲများ ၄ ရက်ဆက်တိုက် ပြင်းထန်လာကြောင်း မြေပြင် စစ်ရေး သတင်းအရင်းအမြစ်များက ပြောသည်။ ပဲခူး-ရခိုင်အစပ် ပန်းတောင်းမြို့နယ်၊ ရိုးတောင်ကျော်လမ်း ညောင်ကျိုးကျေးရွာ ဝန်းကျင်တွင် စစ်အုပ်စုတပ် စစ်ကြောင်းနှင့် AA တို့သည် စက်တင်ဘာလ ၇ ရက်မှ ၁၀ ရက်နေ့အထိ တိုက်ပွဲများ ပြန်လည်ဖြစ်ပွားလာခြင်း ဖြစ်သည်။ စစ်အုပ်စုတပ်သည် အင်အားဖြည့်တင်းမှုများ ပြုလုပ်ပြီးနောက် ကာကွယ်ရေးပစ္စည်းစက်ရုံ ကပစ (၁၆) နှင့် ညောင်ကျိုး ပတ်ဝန်းကျင်သို့ စစ်ကြောင်းထိုး လှုပ်ရှားလာသဖြင့် ဩဂုတ်လ ၂၂ ရက်မှ ၂၄ ရက်နေ့အထိ တိုက်ပွဲ များ ဆက်တိုက်ဖြစ်ပွားခဲ့ပြီးနောက် ခေတ္တငြိမ်သက်နေရာမှ ယခုစက်တင်ဘာလဆန်းတွင် တိုက်ပွဲများ ပြန်လည် စတင်လာခဲ့ခြင်း ဖြစ်သည်။ ပဲခူးတိုင်းဒေသခံ စစ်ရေးသတင်းအရင်းအမြစ် အမျိုးသားတစ်ဦးက “ပြန်ဖြစ်လာတာ ဒီရက်ထဲ တိုက်ပွဲ မပြင်း ထန်ပေမယ့် ပစ်ခတ်သံတွေ ဆက်တိုက်ပဲ ကြားရတယ်။ ကပစ (၁၆) မသုန်ရွာဝန်းကျင်နဲ့ ညောင်ကျိုးပတ် ဝန်းက ရခိုင်ရိုးမတောင်ခြေနဲ့ ၅ မိုင်လောက်အကွာမှာ ဖြစ်နေတာပါ” ဟု ပြောသည်။ အဆိုပါဒေသတွင် စစ်အုပ်စုတပ်က ဒရုန်းများနှင့် ပါရာမိုတာများ အသုံးပြု၍ ပစ်ကူပေးကာ မြေပြင်မှ ထိုးစစ် ဆင်လာခြင်းကြောင့် တိုက်ပွဲများ ပိုမိုပြင်းထန်လာနေသည်။ လက်ရှိအခြေအနေအရ စစ်အုပ်စုတပ် စစ်ကြောင်း သည် ပွိုင့် ၆၆၆ ကုန်းအထိ ရောက်ရှိလာခြင်း မရှိသေးဘဲ လမ်းကြောင်းတစ်လျှောက်၌ တိုက်ပွဲများ ဆက်လက် ဖြစ်ပွားလျက်ရှိကာ ရိုးတောင်ကျော်လမ်းနှင့် အနီးဝန်းကျင်ဒေသများတွင် စစ်ရေးတင်းမာလျက်ရှိသည်။ ထို့ပြင် ရိုးတောင်ကျော်လမ်း ညောင်ကျိုးရွာ ဝန်းကျင်၊ ပန်းကန်ကွဲရွာ၊ မသုန်ရွာ ဝန်းကျင်နှင့် လေလာတောင် ဝန်းကျင်တို့၌ စစ်ရေးတင်းမာနေသည့်အပြင် ဥသျှစ်ပင်တပ်နယ် ကပစ (၁၆) အနီးရှိ ကာကင်းစခန်းများနှင့် ကျေးရွာဝန်းကျင်များတွင်လည်း နှစ်ဘက်စစ်ရေး လှုပ်ရှားမှုများ ရှိနေသည်။ မြေပြင် စစ်ရေးသတင်းရင်းမြစ်က “သူတို့ စစ်တပ်နဲ့ နီးစပ်သူတွေ ပြောပြတာက ပွိုင့် ၆၆၆ ကုန်း အနီးပတ်ဝန်း ကျင်မှာ ချနေတာလို့ ပြောတယ်။ စစ်တပ်က ပြီးခဲ့တဲ့လက တက်တဲ့ စစ်ကြောင်းတွေလည်း ထိခိုက်တာရှိတယ်။ အခုစစ်ကြောင်းတွေ ရိုးနားမှာပဲ ရှိတယ်” ဟု ပြောသည်။ ညောင်ကျိုးကျေးရွာအနီး ရိုးမအခြေ သူရဲတန်းကြီး ကြိုးဝိုင်းအတွင်း တိုက်ပွဲအချို့ ရှိလာရာမှ မသုန်ကျေးရွာအနီး ရှိ စစ်အုပ်စုတပ်၏ ကျွဲကန် အထက်တောင်ညိုကြီးစခန်း အနီးအထိ AA နှင့် ပူးပေါင်းတပ်များက ထိုးဖောက် ဝင်ရောက် တိုက်ခိုက်လာခြင်းဖြစ်ပြီး လက်ရှိတွင် တိုက်ပွဲများ ဆက်လက်ဖြစ်ပွားနေသည်။ ညောင်ကျိုးနှင့် ကပစ (၁၆) မသုန်ဒေသတို့သည် ရခိုင်ရိုးမ တောင်တန်းပေါ်နှင့် တောင်ခြေတွင် တည်ရှိသည့် ကြားစခန်းများနှင့် ကျေးရွာများဖြစ်သဖြင့် ရခိုင်ရိုးမနှင့် တစ်ဆက်တည်း တည်ရှိနေသည်။ လက်ရှိတွင် မသုန်ကျေးရွာအခြေစိုက် ကပစ (၁၆) နှင့် ကျောက်ဖူးကျေးရွာအခြေစိုက် ကပစ (၉) တို့မှ လက်နက် ကြီးများဖြင့် အဆက်မပြတ် ပစ်ကူပေးနေရသည့်အပြင် လေကြောင်းမှပါ စစ်ကူပေးလျက်ရှိသည်။ အဆိုပါ တိုက်ပွဲများနှင့် AA အပါအဝင် တော်လှန်ရေးတပ်များ၏ ထိုးဖောက်ဝင်ရောက်မှုများကြောင့် ပဲခူးတိုင်း အနောက်ခြမ်း၊ ပန်းတောင်းမြို့နယ်အတွင်းရှိ စစ်အုပ်စုတပ်၏ လက်နက်နှင့် ခဲယမ်းထုတ်လုပ်ရေး ကပစ စက်ရုံ များအတွက် အမိုးနီးယား အက်ဆစ်များ သယ်ဆောင်သည့် ယာဉ်တန်းများသည် ပုံမှန်အသုံးပြုနေကျ ရန်ကုန်-ပြည် လမ်းကြောင်းကို မသုံးရဲတော့ဘဲ ပုသိမ်-မုံရွာ လမ်းကြောင်းအတိုင်း ဧရာဝတီတိုင်းအတွင်းမှ ကွေ့ပတ် မောင်းနှင်နေကြရသည်။ ပုံစာ - ပန်းတောင်း-တောင်ကုတ်လမ်း နယ်ခြားဆိုင်းဘုတ်အား တွေ့ရစဉ် / (ဓါတ်ပုံ - RFA - ပုံဟောင်း) #ပန်းတောင်းမြို့နယ်

ပဲခူး-ရခိုင်အစပ် ပန်းတောင်း၌ တိုက်ပွဲများ ၄ ရက်ဆက် ပြန်လည်ပြင်းထန်လာ

ပဲခူး-ရခိုင်အစပ် ပန်းတောင်း၌ တိုက်ပွဲများ ၄ ရက်ဆက် ပြန်လည်ပြင်းထန်လာ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၀ ရက်။ ပဲခူးတိုင်း၊ ပန်းတ…

  • September 10, 2026
စစ်ဘေးရှောင် ၁ သိန်း ၈ သောင်းကျော်အတွက် ချင်းပြည်တွင် အရေးပေါ် အကူအညီ လိုအပ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၀ ရက်။ ချင်းပြည်အတွင်း စစ်ရေးပဋိပက္ခများကြောင့် ထွက်ပြေးတိမ်းရှောင်နေရသည့် စစ်ဘေးရှောင် ဦးရေမှာ ၁ သိန်း ၈ သောင်းဝန်းကျင်အထိ ရှိနေပြီး ထိုစစ်ရှောင်များအတွက် အခြေခံ စားနပ်ရိက္ခာ၊ ဆေးဝါးနှင့် အမိုးအကာများ အရေးပေါ် လိုအပ်နေကြသည်။ အဆိုပါ စစ်ဘေးရှောင်များသည် ချင်းပြည်နယ်အတွင်း စစ်ရေးပဋိပက္ခ စတင်ခဲ့သည့် ၂၀၂၁ ခုနှစ်မှစ၍ လက်ရှိ အချိန်အထိ ထွက်ပြေးတိမ်းရှောင်နေကြရသူများဖြစ်ပြီး အဖက်ဖက်မှ အကူအညီများ လိုအပ်နေဆဲဖြစ်ကြောင်း ချင်းလဲန်းကောင်စီ/ ချင်းပြည်အစိုးရ လူမှုဖွံ့ဖြိုးရေးဝန်ကြီးဌာန ဝန်ကြီး ဆလိုင်းဇထောင်း က ပြောသည်။ ဆလိုင်းဇထောင်း က “ပထမ စားဝတ် နေရေး လိုအပ်ချက်ရှိတယ်။ ဒုတိယလိုအပ်ချက်က ဘာလဲဆိုတော့ မိုးကာတွေ အခု ကျန်းမာရေး ဝန်ကြီးကို လည်း သူတို့တောင်းထားတာ ရှိတယ်။ သူတို့က မိုးကာနဲ့ ခြင်ထောင် ကျန်းမာရေး လိုအပ်ချက်အတွက် စောင့် ရှောက်မှု ပြီးလို့ရှိရင် အရေးပေါ် ဒီ ကျန်းမာရေး ဆေးတွေ ဘာတွေ လိုအပ်တာပေါ့နော်။ ကျနော်တို့လည်း အတတ်နိုင်ဆုံး ရှောက်စောင့် ကူညီထားပါတယ်။ သို့ပေမဲ့ ဒီဟာက ကျနော်တို့ လုံလောက်မှု မရှိပါဘူး” ဟု ပြောသည်။ ချင်းပြည်အတွင်းရှိ ဒေသခံများသည် စစ်ရေးပဋိပက္ခများကြောင့် အိန္ဒိယ-မြန်မာ နယ်စပ်ဘက်သို့လည်းကောင်း၊ မကွေးတိုင်းနှင့် စစ်ကိုင်းတိုင်းဘက်သို့လည်းကောင်း ထွက်ပြေးတိမ်းရှောင်ခဲ့ကြရသကဲ့သို့ အချို့မှာလည်း ချင်းပြည်နယ်အတွင်းရှိ တောတောင်များနှင့် နီးစပ်ရာ ကျေးရွာများသို့ ထွက်ပြေးတိမ်းရှောင်ခဲ့ကြရသည်။ ထိုစစ်ဘေးရှောင် ၁ သိန်း ၈ သောင်းဝန်းကျင်အနက် ပြည်တွင်းနေရပ်စွန့်ခွာသူ (IDP) ၄ သောင်းကျော်ကို ချင်းလဲန်းကောင်စီ/ ချင်းပြည်အစိုးရအနေဖြင့် တိုက်ရိုက်ချိတ်ဆက်၍ အကူအညီများ ပေးအပ်နိုင်သော်လည်း စစ်ဘေးရှောင် အားလုံးအတွက်မူ အကူအညီများ ထပ်မံလိုအပ်နေသေးကြောင်း ဆိုသည်။ ချင်းလဲန်းကောင်စီ/ ချင်းပြည်အစိုးရမှ လုပ်ဆောင်နေသည့် လူသားချင်းစာနာထောက်ထားမှု အကူအညီပေးရေး များနှင့် ပတ်သက်၍ ကျန်းမာရေးဝန်ကြီးဌာန ဝန်ကြီး ဒေါက်တာရှာရွန်ပါရ်က ယခုကဲ့သို့ ပြောသည်။ “Man made disasters တွေသာ မကဘူးပေါ့နော် Natural disasters သဘာဝဘေးအန္တရာယ် တွေကိုလည်း တုန့်ပြန်ဆောင်ရွက်နေတဲ့ အခု ဒီကာလမှာ ဆိုရင် လေကြောင်းတိုက်ခိုက်မှုကြောင့် ကျမတို့ ပျက်စီးသွားတဲ့ အိမ် တွေ မိသားစုတွေကိုလည်း ဆက်ပြီးတော့ ထောက်ပံ့နေပါတယ်။ ပြီးတော့ စစ်ရှောင်တွေကိုလည်း ထောက်ပံ့ နေတာ ရှိတယ်။ ပြီးတော့ မုန်တိုင်းတွေ ရေကြီးတာတွေကြောင့် ကျမတို့ ကြုံနေရတဲ့ အခက်အခဲတွေကိုလည်း ဒီဝန်ကြီးဌာနကနေပဲ ဖြေရှင်းပေးနေပါတယ်။ အခု ၂၀၂၁ ကနေပြီးတော့ အခုအထိဆိုရင် စစ်ရှောင်တွေက ကျမတို့ နှစ်သိန်းနီးပါးရှိနေပါပြီ။” စစ်ဘေးရှောင် အကူအညီပေးရေး လုပ်ငန်းများကို ဆောင်ရွက်ရာတွင် ချင်းလဲန်းကောင်စီ/ ချင်းပြည်အစိုးရ အနေဖြင့် အမျိုးသားညီညွတ်ရေးအစိုးရ (NUG) နှင့် ချိတ်ဆက်၍ လုပ်ဆောင်နိုင်ခဲ့ကြောင်း ပြောသည်။ အခြားတစ်ဖက်တွင်လည်း စစ်ဘေးလွတ်ရာ နေရာအသီးသီးသို့ ထွက်ပြေးတိမ်းရှောင်နေရသည့် စစ်ဘေးရှောင် များအနေဖြင့် နေရပ်ရင်းသို့ ပြန်လာပါက ချင်းလဲန်းကောင်စီ/ ချင်းပြည်အစိုးရက အကူအညီပေးသွားမည် ဖြစ်သော်လည်း လက်ရှိ နယ်မြေလုံခြုံရေး အခြေအနေများကြောင့် နေရပ်ပြန်ရန် ခက်ခဲနေဆဲဖြစ်ကြောင်း ဝန်ကြီး ဆလိုင်းဇထောင်း က ဆက်ပြောသည်။ “နည်းနည်း ပြန်ဝင်ဖို့ ရှိပေမယ့် အဲဒါလေးတွေ မဝင်နိုင်တာ အကြောင်းအမျိုးမျိုးပေါ့နော်။ ဒါတွေလည်း ရှိပါ တယ်။ တစ်ချို့က မီဇိုရမ်မှာ စစ်ရှောင်တွေကတော့ အားလုံးသိတဲ့အတိုင်း ချက်ချင်း ပြန်လာလို့ရှိရင်လည်း တော်တော်လေး ခက်ခဲတယ်။ စားဝတ်နေရေးအတွက်လည်း တော်တော်ခက်ခဲတယ်။ ကျနော်တို့ ချင်းပြည်က သိတဲ့အတိုင်းပေါ့နော်။ လမ်းပန်း ဆက်သွယ်ရေး ရာသီဥတု ပြီးလို့ရှိရင် ငွေရေးကြေးရေးအခက်အခဲကြောင့် ပြန်လာဖို့ကတော့ နည်းနည်း ခက်ခဲပါတယ်။” စစ်အာဏာသိမ်းပြီးနောက် ချင်းပြည်အတွင်းရှိ နယ်စပ်ဒေသများနှင့် မြို့အများအပြားကို ချင်းတော်လှန်ရေး အဖွဲ့အစည်းများက တိုက်ခိုက်သိမ်းပိုက်နိုင်ခဲ့ပြီး စာသင်ကျောင်း၊ ဆေးရုံနှင့် အုပ်ချုပ်ရေး ယန္တရားများကို အကောင်အထည်ဖော် လုပ်ဆောင်လာခဲ့ကြသည်။ လက်ရှိတွင် စစ်အုပ်စုတပ်က ၎င်းတို့ ဆုံးရှုံးသွားသည့် နယ်မြေများနှင့် စစ်ရေးဗျူဟာအရ အရေးပါသည့် ဒေသ များကို ပြန်လည်ရရှိရန် လေကြောင်းတိုက်ခိုက်မှု၊ လက်နက်ကြီး ပစ်ခတ်မှုများအပြင် မြေပြင်ထိုးစစ်များကို အရှိန်မြှင့် ဆောင်ရွက်လာသောကြောင့် ချင်းပြည်နယ်အတွင်း တိုက်ပွဲများ ပြင်းထန်လျက်ရှိသည်။ အဆိုပါ တိုက်ပွဲများကြောင့် ဒေသအသီးသီးသို့ ထွက်ပြေးတိမ်းရှောင်နေရသည့် ချင်းပြည်မှ စစ်ဘေးရှောင်များ သည် နေရပ်ရင်းသို့ ပြန်လည်နေထိုင်ရန် ခက်ခဲနေသည့်အပြင် နေထိုင်စားသောက်ရေး၊ ပညာရေးနှင့် ကျန်းမာရေးအတွက် ကူညီထောက်ပံ့မှုများ အရေးပေါ် လိုအပ်နေဆဲ ဖြစ်သည်။ ပုံစာ – ချင်းပြည်၊ အိန္ဒိယနယ်စပ်အနီးရှိ စစ်ဘေးရှောင်စခန်းတစ်ခုကို တွေ့ရစဉ်။ / (Photo: Chinland Council) #ChinlandCouncil #IDPs

စစ်ဘေးရှောင် ၁ သိန်း ၈ သောင်းကျော်အတွက် ချင်းပြည်တွင် အရေးပေါ် အကူအညီ လိုအပ်

စစ်ဘေးရှောင် ၁ သိန်း ၈ သောင်းကျော်အတွက် ချင်းပြည်တွင် အရေးပေါ် အကူအညီ လိုအပ် သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၀ ရက်။ ချင်းပြည်…

  • September 10, 2026
#ဆရာတော်ဦးဥတ္တမ

တိုက်ပွဲများနှင့် ဗုံးကြဲမှုများကြားမှ ၈၇ နှစ်မြောက် အရှင်ဥတ္တမနေ့ ဂါရဝပြုကျင်းပ

တိုက်ပွဲများနှင့် ဗုံးကြဲမှုများကြားမှ ၈၇ နှစ်မြောက် အရှင်ဥတ္တမနေ့ ဂါရဝပြုကျင်းပ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၀ ရက်။ ရခိုင်…

  • September 10, 2026
×Close