သတင်း

NCA လမ်းကြောင်းမှ သွေဖည်သည့် လုပ်ငန်းစဉ်များကို လက်ခံမည်မဟုတ်ဟု စစ်ခေါင်းဆောင်ပြော သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၁၉ ရက်။ တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူစာချုပ် (NCA) လမ်းကြောင်းမှ သွေဖည်သည့် ငြိမ်းချမ်းရေး လုပ်ငန်းစဉ်များကို လက်ခံမည် မဟုတ်ကြောင်း စစ်အုပ်စုခေါင်းဆောင် ဦးမင်းအောင်လှိုင်က ပြောဆိုလိုက်သည်။ အောက်တိုဘာ ၁၅ ရက်နေ့က ပြုလုပ်သည့် NCA လက်မှတ်ရေးထိုးခြင်း ၁၁ နှစ်ပြည့် အခမ်းအနားသို့ ပေးပို့သည့် မိန့်ခွန်းအတွင်း စစ်အုပ်စုခေါင်းဆောင် မင်းအောင်လှိုင်က ထည့်သွင်းပြောဆိုခဲ့ခြင်း ဖြစ်သည်။ စစ်အုပ်စုခေါင်းဆောင် ဦးမင်းအောင်လှိုင်က “NCA ဟာ အပစ်အခတ်ရပ်စဲရေး သဘောတူစာချုပ်တစ်ခုသာ မဟုတ်ဘဲ လက်နက်ကိုင်ပဋိပက္ခတွေ အဆုံးသတ်ရေး၊ နိုင်ငံရေးဆွေးနွေးပွဲတွေ ကျင်းပရေးနဲ့ ဖက်ဒရယ် ပြည် ထောင်စု တည်ဆောက်ရေးအတွက် နိုင်ငံရေးနည်းလမ်းနဲ့ အဖြေရှာဖို့ ချမှတ်ထားတဲ့ လုပ်ငန်းမူဘောင်လည်း ဖြစ်ပါတယ်။ ဒါကြောင့် ရှိပြီးသား NCA သဘောတူညီချက်တွေကနေ သွေဖည်ခြင်းမရှိဘဲ NCA လမ်းကြောင်း ကို ဆက်လက်အကောင်အထည် ဖော်သွားကြဖို့ လိုအပ်ပါတယ်” ဟု ပြောသည်။ ၂၀၂၁ ခုနှစ် စစ်အာဏာသိမ်းပြီးနောက် ၂၀၀၈ ဖွဲ့စည်းပုံ အခြေခံဥပဒေနှင့် NCA စာချုပ်မှာ ပျက်ပြယ်သွားပြီ ဖြစ်ကြောင်း တိုင်းရင်းသား လက်နက်ကိုင် တော်လှန်ရေး အဖွဲ့အစည်းများနှင့် တော်လှန်ရေး အင်အားစုများက ကြေညာထားသော်လည်း စစ်အုပ်စုက ယင်းတို့ကို ဆက်လက် ကိုင်စွဲထားသည်။ စစ်အုပ်စုသည် NCA လက်မှတ်ရေးထိုးထားသည့် အဖွဲ့များ၊ လက်မှတ် မရေးထိုးရသေးသည့် အဖွဲ့များနှင့် တိုက်ပွဲဖြစ်ပွားနေသည့် အဖွဲ့များကိုပါ ငြိမ်းချမ်းရေး ဆွေးနွေးရန် ဖိတ်ခေါ်မှုများ ပြုလုပ်လျက် ရှိသည်။ ယင်းအခြေအနေနှင့် ပတ်သက်၍ BNI ဦးဆောင်ကော်မတီ အတွင်းရေးမှူး မတင်တင်ညိုက “၂၀၀၈ ဖွဲ့စည်းပုံ အခြေခံ ဥပဒေနဲ့ NCA လမ်းကြောင်းကို ကျမတို့ အဓိကတွေ့ရှိရမယ်။ ဆိုတော့ အဲဒီထဲမှာ ဆိုလို့ရှိရင် NCA လက်မှတ်မထိုးရသေးတဲ့ အဖွဲ့တွေအတွက်ကိုတော့ NCA Plus ဆိုတဲ့ ဒီချည်းကပ်မှုမျိုးကတော့ ရှိနေတယ်ပေါ့။ ဆိုတော့ ဒီနေရာမှာ ကျမတို့ ကြည့်လိုက်မယ်ဆိုရင် စစ်အုပ်စုရဲ့ ရပ်တည်ချက်ကို ကျမတို့ ကြည့်လို့ရ တယ်။ ဆိုတော့ ၂၀၀၈ ဖွဲ့စည်းပုံအောက်ကနေ စစ်တပ်ရဲ့ အလျော့ပေးမဲ့ အရိပ်အယောင်မျိုး ကျမတို့ မတွေ့ ရှိရ သေးဘူး။ အဲဒီ ၂၀၀၈ အောက်ကနေ စစ်တပ်ရဲ့ နိုင်ငံရေးအရ နောက်ပြီးတော့မှ လွှမ်းမိုးထိန်းချုပ်မှု အာဏာပေါ့။ ဒါတွေကို သေချာဆက်ပြီးတော့မှ ဆွဲမယ်ဆိုတဲ့ဟာမျိုးကိုလည်း ကျမတို့ ပိုပြီးတော့ တွေ့ရတာပေါ့” ဟု ထောက်ပြထားသည်။ ယခင်က NCA လက်မှတ်ရေးထိုးခဲ့ပြီး လက်ရှိတွင် တိုက်ပွဲများ ဖြစ်ပွားနေသည့် ကရင်အမျိုးသား အစည်းအရုံး (KNU)၊ ချင်းအမျိုးသား တပ်ဦး (CNF)၊ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး (ABSDF) တို့ကို တွေ့ဆုံဆွေးနွေး ကြရန်နှင့် ပြည်သူ့ ကာကွယ်ရေးတပ် (PDF) များကိုပါ ဥပဒေဘောင်အတွင်း ဝင်ရောက်လာရန် စစ်အုပ်စုခေါင်းဆောင်က NCA ၁၁ နှစ် ပြည့် မိန့်ခွန်းထဲတွင် ဖိတ်ခေါ်တောင်းဆိုထားသည်။ သို့သော်လည်း တန်းတူရေးနှင့် ကိုယ်ပိုင်ပြဋ္ဌာန်းခွင့် တောင်းဆိုမှုများတွင် ကန့်သတ်ချက်များ ရှိနေဆဲ ဖြစ်သည်။ စစ်အုပ်စုခေါင်းဆောင် ဦးမင်းအောင်လှိုင်က “ငြိမ်းချမ်းရေးနဲ့ ပတ်သက်ပြီး မိမိတို့ဖြစ်ချင်တာတွေကို တောင်း ဆိုနေမယ့်အစား ဖြစ်သင့်ဖြစ်ထိုက်တာနဲ့ ဖြစ်နိုင်တာတွေကို တွေ့ဆုံဆွေးနွေး အဖြေရှာပြီး ပူးပေါင်းဆောင်ရွက် ကြဖို့ တိုက်တွန်းလိုပါတယ်” ဟု ပြောသည်။ တစ်ဖက်တွင်လည်း တော်လှန်ရေး အင်အားစုများက နိုင်ငံရေးတွင် စစ်တပ် ပါဝင်ပတ်သက်မှု အဆုံးသတ်ရေးနှင့် ဖွဲ့စည်းပုံ အခြေခံဥပဒေသစ် ရေးဆွဲကာ ဖက်ဒရယ် ဒီမိုကရေစီ ပြည်ထောင်စုသစ် တည်ဆောက်ရန် ကြိုးပမ်းနေ ကြပြီး ၂၀၀၈ အခြေခံဥပဒေနှင့် NCA လမ်းကြောင်းမှ လာမည့် မည်သည့် ဆွေးနွေးမှုကိုမျှ လက်ခံမည် မဟုတ် ကြောင်း ပြောဆိုထားကြသည်။ ဓါတ်ပုံ - (စစ်အုပ်စုခေါင်းဆောင်က NCA ၁၁ နှစ်ပြည့် အခမ်းအနားတွင် မိန့်ခွန်းပြောနေစဉ်/ NCA – GOV) #NCA

NCA လမ်းကြောင်းမှ သွေဖည်သည့် လုပ်ငန်းစဉ်များကို လက်ခံမည်မဟုတ်ဟု စစ်ခေါင်းဆောင်ပြော

NCA လမ်းကြောင်းမှ သွေဖည်သည့် လုပ်ငန်းစဉ်များကို လက်ခံမည်မဟုတ်ဟု စစ်ခေါင်းဆောင်ပြော သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၁၉ ရက်။…

  • October 19, 2026
စစ်တွေ ဒကစ အနီးသို့ AA ထိုးဖောက်ဝင်ရောက်လာပြီး တိုက်ပွဲများ ပြင်းထန်နေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၁၉ ရက်။ ရခိုင်ပြည်၊ စစ်တွေမြို့ရှိ စစ်အုပ်စု၏ တပ်နယ်မြေဖြစ်သော ဒေသကွပ်ကဲမှုစစ်ဌာနချုပ် (ဒကစ) အနီးသို့ အာရက္ခ တပ်တော် (AA) တပ်စခန်းအချို့ ထိုးဖောက်ဝင်ရောက်လာပြီး တိုက်ပွဲများ ဖြစ်ပွားလျက်ရှိကြောင်း ဒေသခံ စစ်ရေး သတင်းအရင်းအမြစ်များက ပြောသည်။ စစ်တွေမြို့နှင့် ၅ မိုင်၊ ၆ မိုင်ခန့်အကွာရှိ စစ်အုပ်စု ကာကင်းစခန်းအချို့ကို AA က အောက်တိုဘာလ တတိယပတ် အတွင်း ထိန်းချုပ်လိုက်ပြီးနောက် AA ၏ တန်ပြန်ထိုးစစ်ကြောင့် စစ်အုပ်စုတပ်သည် စခန်းများကို အပြင်းအထန် ခုခံကာကွယ်နေရသည်။ ဒေသခံ စစ်ရေးသတင်းအရင်းအမြစ် အမျိုးသားတစ်ဦးက “အမြင့်ကျွန်းမှာရှိတဲ့ တပ်မ ၁၀၁ ရဲ့ နည်းဗျူဟာ တစ်ခုကို AA က ပြင်းပြင်းထန်ထန် တိုက်နေတယ်။ ဝါဘိုကျေးရွာကို AA က ပြန်ပြီး ထိန်းချုပ်ထားနိုင်တဲ့ အနေအထားရှိတယ်။ ရေချမ်းပြင်က ခလရ ၂၇၀ အတွင်းထဲကိုတောင် လက်နက်ကြီးကျည်တွေ ကျရောက် ပေါက်ကွဲတဲ့ အနေအထား ရှိလာတယ်။ စစ်တပ် တပ်နယ်အနီးကို ဖောက်ဝင်လာတဲ့ အနေအထားပါ။ ရွှေမင်းဂံ ရေတပ်စခန်းနဲ့ စစ်တွေမြို့ကြားမှာ အင်အားတွေ ပို့ဆောင်ထားတယ်၊ ပြီးရင် စစ်တွေ၊ ပုဏ္ဏားကျွန်း၊ ပေါက် တော အစပ်မှာ တိုက်ပွဲရှိတယ်” ဟု ပြောသည်။ အာရက္ခတပ်တော် (AA) သည် အောက်တိုဘာ ၁၆ ရက်နေ့တွင် စစ်တွေမြို့နယ် မြောက်ဖျားပိုင်းရှိ အမြင့်ကျွန်းနှင့် ပါဒလိပ်အနီးရှိ စစ်အုပ်စု ကာကင်းအချို့ကို သိမ်းယူခဲ့ပြီး အမြင့်ကျွန်းနှင့် ရေချမ်းပြင်ဘက်ရှိ ကာကင်း ၅ ခုအထိ သိမ်းပိုက်ထားရာ ရေချမ်းပြင်အနီးတွင် လက်ရှိ တိုက်ပွဲများ ပြင်းထန်လျက်ရှိသည်။ လက်ရှိတွင် စစ်အုပ်စုသည် ခြေလျင်အင်အား ၁,၀၀၀ ကျော်ဖြင့် အမြင့်ကျွန်း၊ မင်းချောင်းတံတား၊ ပါဒလိပ်၊ ရေချမ်းပြင်နှင့် ဂန့်ဂေါ်ကျွန်းဘက်သို့ ထိုးစစ်ဆင်နေသဖြင့် AA နှင့် တိုက်ပွဲများ ပိုမို ပြင်းထန်နေခြင်း ဖြစ်သည်။ အခြားစစ်တွေဒေသခံ စစ်ရေးသတင်းအရင်းအမြစ်တစ်ဦးကလည်း “အခုရက်ပိုင်း ကြားရတာ စစ်တွေမြို့နယ်၊ ကျားမသောက်ကျေးရွာနားက စအရ ၉၀၈ စခန်းကို AA ဝိုင်းထားတယ်လို့ သိရတယ်။ အဲဒီနေရာဟာ စစ်တွေ မြို့နဲ့ ၅ မိုင်လောက်ပဲ ဝေးတော့တယ်။ စစ်တပ်ဟာ AA သိမ်းယူထားတဲ့ နယ်မြေတွေ ပြန်သိမ်းဖို့ ကြိုးစားရာ ကနေ မိမိခြေကုပ်နေရာတွေကိုပါ ပြန်ကာကွယ်နေရတဲ့ ပုံစံ ဖြစ်လာသလို AA ဘက်ကလည်း အကျအဆုံးတွေ ရှိတယ်လို့ ကြားရပါတယ်” ဟု ပြောသည်။ စစ်တွေမြို့နယ်၊ ကျားမသောက်ကျေးရွာအနီး တည်ရှိသော စစ်မြေပြင်အင်ဂျင်နီယာတပ်ရင်း (စအရ ၉၀၈) စခန်းသည် စစ်တွေမြို့နှင့် ၅ မိုင်ခန့်အကွာတွင် တည်ရှိပြီး မြို့လုံခြုံရေးအတွက် အရေးပါသောကြောင့် စစ်အုပ်စု က ခံစစ်ပြင်ဆင်ထားသည်မှာ ၂ နှစ်နီးပါး ကြာမြင့်ပြီဖြစ်သည်။ ထို့ပြင် စစ်တွေမြို့နယ်နှင့် ရသေ့တောင်မြို့နယ်အစပ် ရေချမ်းပြင်အနီးရှိ ကာကင်းစခန်းတစ်ခု၊ အောင်မင်္ဂလာ ကျေးရွာဘက်ရှိ ကင်းစခန်းများ၊ အသေးစားစခန်းများနှင့် ရှေ့ပြေးဘန်ကာများကိုလည်း AA က သိမ်းပိုက်ထား သည်။ လက်ရှိတွင် စစ်တွေမြို့နယ်အပါအဝင် ပုဏ္ဏားကျွန်းနယ်စပ်ရှိ ရွှေမင်းဂံရေတပ်စခန်း၊ ကံ့ကော်ကျွန်း၊ ဇော်မတက်၊ တောကန်နှင့် နာရီကန် ဝန်းကျင်တို့တွင်လည်း နှစ်ဖက်တိုက်ပွဲများ ဆက်လက် ပြင်းထန်လျက်ရှိသည်။ ဓါတ်ပုံ - (AA တပ်ဖွဲ့ဝင်အချို့ / Arakan Princess Media) #စစ်တွေ

စစ်တွေ ဒကစ အနီးသို့ AA ထိုးဖောက်ဝင်ရောက်လာပြီး တိုက်ပွဲများ ပြင်းထန်နေ

စစ်တွေ ဒကစ အနီးသို့ AA ထိုးဖောက်ဝင်ရောက်လာပြီး တိုက်ပွဲများ ပြင်းထန်နေ သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၁၉ ရက်။ ရခိုင်ပြည်၊ စစ…

  • October 19, 2026
စစ်အုပ်စုနှင့် တော်လှန်ရေး အဖွဲ့များ၏ အနာဂတ် လမ်းကြောင်းများ ဆုံနိုင်ရန်ခက်ခဲနေဟု BNI ထောက်ပြ (NCA/2008 Constitution Vs Bottom Up Federalism) သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၁၉ ရက်။ တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူစာချုပ် NCA နှင့် ၂၀၀၈ ဖွဲ့စည်းပုံအခြေခံဥပဒေကို အခြေခံသည့် စစ်အုပ်စု၏ ငြိမ်းချမ်းရေး လုပ်ငန်းစဉ်များနှင့် တော်လှန်ရေး အစုအဖွဲ့များ၏ ဖက်ဒရယ် ပြည်ထောင်စုသစ် တည်ဆောက်ရေး လုပ်ငန်းစဉ်များသည် မျဉ်းပြိုင် နှစ်ခုကဲ့သို့ ဖြစ်နေပြီး ဆုံမှတ်တစ်ခုသို့ ရောက်ရှိရန် ဖြစ်နိုင်ချေ နည်းပါးနေကြောင်း နိုင်ငံတကာ မြန်မာ့သတင်းအဖွဲ့ (BNI) က ပြောဆိုလိုက်သည်။ အောက်တိုဘာ ၁၄ ရက်တွင် ကျင်းပသည့် ‘မြန်မာ့ငြိမ်းချမ်းရေး လုပ်ငန်းစဉ်ကို ပုံဖော်ခြင်း ရည်ညွှန်း အကိုးအကား (၂၀၂၅-၂၀၂၆)’ စာအုပ် မိတ်ဆက်ပွဲ အခမ်းအနား၌ BNI က ထိုသို့ သုံးသပ်ပြောဆိုခဲ့ခြင်း ဖြစ်သည်။ BNI ဦးဆောင်ကော်မတီ အတွင်းရေးမှူး မတင်တင်ညိုက “အာဏာသိမ်း စစ်အုပ်စုဖက်ကနေပြီးတော့မှ ကျမတို့ ဒီ ၂၀၀၈ ဖွဲ့စည်းပုံ အောက်ကနေပြီးတော့ NCA လမ်းကြောင်းနဲ့ မူလရှိပြီးတဲ့ အစီအစဉ်တွေအတိုင်း ပြုပြင် ပြောင်းလဲရေးဆီကို ဦးတည်ထားတာမျိုးရှိတယ်။ တော်လှန်ရေးဖက်တွေကတော့ ဒီနိုင်ငံရေး စနစ်တစ်ရပ်လုံး ပေါ့နော်။ ပြုပြင်ပြောင်းလဲရေး ဒီ နိုင်ငံရေး အတွင်းမှာ စစ်တပ်ရဲ့ အခန်းကဏ္ဍလုံးဝ အဆုံးသတ်ရေးနဲ့ အရပ် သားအစိုးရ အုပ်ချုပ်မှု အပြည့်အဝ ထားရှိရေး ကို ချီတက်နေတယ်ဆိုတာကိုလည်း ကျမတို့ တွေ့ရှိရပါတယ်။ ဟု ပြောသည်။ မတင်တင်ညိုက ဆက်ပြီး “ဒါကြောင့်မို့လို့ ဒီလမ်းကြောင်း ၂ ခုက မျဉ်းပြိုင်လိုမျိုး ဖြစ်နေပြီးတော့မှ ဆုံနိုင်ဖို့က တော့ တော်တော်လေး ခက်ခဲနေတဲ့ အနေအထား မျိုးဖြစ်တယ်ပေါ့နော်။ ဒါ စစ်အုပ်စုဖက်က သွားနေတဲ့ လမ်းကြောင်းနဲ့ ကျမတို့ တော်လှန်ရေး ဖက်က သွားနေ တဲ့ လမ်းကြောင်းပေါ့” ဟု ပြောသည်။ စစ်အုပ်စုသည် ၂၀၀၈ ဖွဲ့စည်းပုံ အခြေခံဥပဒေနှင့် NCA လမ်းကြောင်းကို အခြေခံကာ NCA လက်မှတ်ထိုးထား သည့် တိုင်းရင်းသား လက်နက်ကိုင် အဖွဲ့အစည်းအချို့၊ လက်မှတ်မထိုးရသေးသည့် တရုတ်-မြန်မာနယ်စပ်ရှိ အဖွဲ့အစည်းအချို့တို့နှင့် တွေ့ဆုံဆွေးနွေးမှုများ ပြုလုပ်လျက် ရှိသည်။ အခြားတစ်ဖက်တွင်မူ တော်လှန်ရေး အစုအဖွဲ့များက နိုင်ငံရေးတွင် စစ်တပ် ပါဝင်ပတ်သက်မှုကို အပြီးသတ် အဆုံးသတ်ရေး၊ တန်းတူရေး၊ ကိုယ်ပိုင်ပြဋ္ဌာန်းခွင့်နှင့် ကိုယ့်ကြမ္မာကိုယ် ဖန်တီးနိုင်မည့် ဖက်ဒရယ် ဒီမိုကရေစီ ပြည်ထောင်စုသစ် တည်ဆောက်ရေးကို ဦးတည် ကြိုးပမ်းနေကြခြင်း ဖြစ်သည်။ BNI (Myanmar Peace Monitor - MPM) ၏ တာဝန်ခံ ကိုနှင်းကိုဦးကလည်း “သူက ၂၀၀၈ ဖွဲ့စည်း ပုံ အခြေခံဥပဒေ နောက် NCA ပေါ့နော် ဒီဟာတွေကို ဆက်ပြီးတော့ ဆွဲကိုင်ထားတယ်။ နောက်သူရဲ့ အာဏာ တည်မြဲရေး အတွက် သူရဲ့ လုပ်ဆောင်ချက်တွေကတော့ ဖုံးအုပ်ထားလို့ မရတဲ့ အခြေအနေမျိုး ဖြစ်နေတယ် ပေါ့နော်။ တော်လှန်ရေး အင်အားစုတွေဖက်ကိုကြည့်မယ်ဆိုရင်လည်း ကျနော်တို့ ဒီ အနာဂတ်နိုင်ငံရေးမှာ စစ်တပ်ရဲ့ စစ်တပ်ရဲ့ ပါဝင်နေမှု အဆုံးသတ်ရေးပေါ့နော်။ ဒီဟာက ကျနော်တို့ ဘုံသဘော တူညီချက် ၆ ရပ်ထဲမှာ အဓိက ကျတဲ့ အချက်ဖြစ်သလို တစ်ဖက်က အာဏာသိမ်းစစ်တပ်နဲ့ တွေ့ဆုံဆွေးနွေးရေး ဆိုတဲ့ ကိစ္စရပ်မှာ လည်း ဒီအချက်က အများကြီးမူတည်နေတဲ့ အနေအထားမျိုး ရှိတယ်ပေါ့နော်” ဟု ထောက်ပြထားသည်။ တော်လှန်ရေး အင်အားစုများက စစ်တပ်၏ နိုင်ငံရေးဆိုင်ရာ ပါဝင်မှုကို အဆုံးသတ်ရန် လုပ်ဆောင်နေသော် လည်း စစ်အုပ်စုသည် ၂၀၀၈ ဖွဲ့စည်းပုံ အောက်မှနေ၍ နိုင်ငံရေးအရ လွှမ်းမိုးထိန်းချုပ်မှု အာဏာကို ဆက်လက် ဆုပ်ကိုင်ထားပြီး အလျော့ပေးမည့် အရိပ်အယောင် မတွေ့ရကြောင်း BNI က ဆိုသည်။ ထိုအခြေအနေနှင့် ပတ်သက်၍ မတင်တင်ညိုက “ဒီလိုမဆုံနိုင်သေးတဲ့ လမ်းကြောင်း ၂ ခုက ဘယ်လမ်းကြောင်း ကတော့ လိုရာခရီးကို ပိုမိုနီးစပ်မလဲ ဆိုတာကတော့ ကျမတို့ ဒီ သက်ဆိုင်တဲ့ နိုင်ငံရေး သက်ဆိုင်သူတွေရဲ့ နိုင်ငံ ရေး စိတ်ဆန္ဒနဲ့ ဖက်ဒရယ် အာဏာခွဲဝေမှုဆိုင်ရာ ညှိနှိုင်း ဖော်ဆောင်နိုင်စွမ်းပေါ်မှာသာ ပိုပြီးတော့မှ မူတည် နိုင်လိမ့်မယ်လို့ ကျမတို့ သုံးသပ်ထားပါတယ်ပေါ့ လေနော်” ဟု ဆက် ပြောသည်။ စစ်အုပ်စုက ၂၀၀၈ ဖွဲ့စည်းပုံနှင့် NCA လမ်းကြောင်းမှတစ်ဆင့် ဆွေးနွေးနေမှုများသည် နိုင်ငံတကာတွင် တရား ဝင်မှု ရရှိရန် လုပ်ဆောင်ခြင်းသာ ဖြစ်သည်ဟု တော်လှန်ရေး အင်အားစုများက ရှုမြင်ကြသည်။ လက်ရှိတွင် တောင်တန်းနှင့် မြေပြန့် ဒေသအလိုက် ဖက်ဒရယ် အမြုတေများနှင့် ဖက်ဒရယ် အစိုးရများ ဖြစ်ထွန်း လာရေးအတွက် တော်လှန်ရေး အင်အားစုများက ကြိုးပမ်းလျက် ရှိသည်။ အဆိုပါ လမ်းကြောင်းနှစ်ခု မဆုံနိုင်သေးသည့် ကြားကာလအတွင်း စစ်ရေးပဋိပက္ခ ဒေသများရှိ ပြည်သူများမှာ စစ်အုပ်စုတပ်၏ လေကြောင်းနှင့် ဒရုန်း တိုက်ခိုက်မှု၊ လက်နက်ကြီး ပစ်ခတ်မှု၊ နေအိမ်များ မီးရှို့ဖျက်ဆီးခံရမှုနှင့် ဖမ်းဆီးနှိပ်စက် သတ်ဖြတ်ခံရမှု စသည့် လူ့အခွင့်အရေး ချိုးဖောက်မှုများကို ဆက်လက် ကြုံတွေ့ခံစားနေကြရ သည်။ ဓါတ်ပုံ - (နေပြည်တော်တွင် ကျင်းပပြုလုပ်ခဲ့သည့် (NCA) ၁၁ နှစ်ပြည့် အခမ်းအနား မြင်ကွင်း။ / Tai Freedom) #NCA #2008Constitution #Bottom Up Federalism

စစ်အုပ်စုနှင့် တော်လှန်ရေး အဖွဲ့များ၏ အနာဂတ် လမ်းကြောင်းများ ဆုံနိုင်ရန်ခက်ခဲနေဟု BNI ထောက်ပြ NCA/2008 Constitution Vs Bottom Up Federalism)

စစ်အုပ်စုနှင့် တော်လှန်ရေး အဖွဲ့များ၏ အနာဂတ် လမ်းကြောင်းများ ဆုံနိုင်ရန်ခက်ခဲနေဟု BNI ထောက်ပြ NCA/2008 Constitution Vs Bottom Up Federalism) သတင်းန…

  • October 19, 2026
စစ်တွေအနီး ဗျူဟာမြောက် ငပြီကျွန်းကို ထိန်းချုပ်ရန် စစ်တပ်နှင့် AA တို့ အပြိုင်အဆိုင် ကြိုးပမ်းနေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၁၉ ရက်။ ရခိုင်ပြည်၊ စစ်တွေမြို့နယ်နှင့် ပေါက်တောမြို့နယ် အကြားရှိ ဗျူဟာမြောက် ငပြီကျွန်းကို စစ်အုပ်စုနှင့် အာရက္ခတပ်တော် (AA) တို့အပြိုင်အဆိုင် ထိန်းချုပ်ရန် ကြိုးပမ်းနေကြသဖြင့် တိုက်ပွဲများ အပြင်းအထန် ဖြစ်ပွားလျက်ရှိကြောင်း စစ်ရေးသတင်းအရင်းအမြစ်များက ပြောသည်။ စစ်တွေ မြို့အနီး ကုလားတန် မြစ်ဝရှိ ငပြီကျွန်းသို့ စစ်အုပ်စု၏ ခမရ (၃၅၄) နှင့် အမှတ် (၃၇၃) အမြောက်တပ်ရင်း (အမတ-၃၇၃) တို့မှ အင်အား ၂၀၀ နီးပါးသည် စစ်ရေယာဉ်၊ ကမ်းထိုးရေယာဉ်နှင့် အမြန်ရေယာဉ် (Speedboat) များကို အသုံးပြု၍ ထိုးစစ်ဆင် တပ်စွဲထားသကဲ့သို့ AA ဘက်ကလည်း ပေါက်တောဘက်မှ အင်အားဖြည့်တင်းကာ ပြန်လည်ခုခံလျက်ရှိသည်။ စစ်ရေးသတင်းအရင်းအမြစ် တစ်ဦးက “ကုလားတန်မြစ်ဝမှာရှိတဲ့ ငပြီကျွန်း အနေအထားကတော့ AA က ပြန်ပြီး တိုက်စစ်ဆင်နေရတဲ့ အနေအထားပါ။ ခမရ ၃၅၄ နဲ့ အမတ ၃၇၃ က စစ်ကြောင်း အင်အား ၂၀၀ နီးပါးနဲ့ ငပြီကျွန်းမှာ တပ်စွဲပြီး တိုက်နေတာ။ အကျအဆုံးကတော့ နှစ်ဘက်လုံး ရှိတယ်။ လက်ရှိ အောက်တိုဘာ ၁၈၊ ၁၉ ရက်အထိ တိုက်ပွဲ ပြင်းထန်နေပါတယ်။ ပစ်ခတ်သံတွေလည်း ကြားနေရတယ်၊ စစ်သင်္ဘောတွေ ထိတယ်၊ AA ဘက်ကလည်း ကျတာရှိတယ်။ ကမ်းတက်တာ ၅ ကြိမ်ရှိတော့ ကျွန်းပေါ်မှာ စစ်တပ်အင်အား များတယ်” ဟု ပြောသည်။ စစ်တွေမြို့အခြေစိုက် ခမရ (၃၅၄) နှင့် အမတ (၃၇၃) တို့သည် ရခိုင်တစ်ပြင်လုံးရှိ AA ထိန်းချုပ်ရာ မြို့များမှ စွန့်ခွာလာသည့် စစ်အုပ်စုအင်အားများကို စုစည်းကာ ငပြီကျွန်းပေါ်သို့ ကမ်းတက်ခိုင်းနေခြင်း ဖြစ်သည်။ အောက်တိုဘာလ ၁၇ ရက်နှင့် ၁၈ ရက်တို့တွင် စစ်အုပ်စုက ၅ ကြိမ်မြောက် ကမ်းတက်ခြင်း ပြုလုပ်ကာ ငပြီကျွန်းကို ထိန်းချုပ်ရန် ကြိုးပမ်းလာသဖြင့် တိုက်ပွဲများ ပြန်လည်ပြင်းထန်လာခြင်း ဖြစ်ကြောင်း ဒေသခံများ က ပြောသည်။ စစ်အုပ်စုသည် ဒီရေအတက်အကျပေါ် မူတည်၍ ကမ်းတက်ရသဖြင့် ရေကြောင်းကျွမ်းကျင်သည့် AA ၏ ခုခံမှုကြောင့် အကျအဆုံးအချို့ ရှိခဲ့သော်လည်း နောက်ပိုင်းတွင် လေကြောင်း ပစ်ကူကို အပြင်းအထန် အသုံးပြု ၍ ကမ်းတက်လာခြင်း ဖြစ်သည်။ စစ်တွေမြို့မှ ဒေသခံ အမျိုးသမီးတစ်ဦးကလည်း “စစ်တွေ တပ်ရင်းတွေထဲမှာတော့ ငပြီကျွန်းနဲ့ ပတ်သက်ပြီး တချို့က သိမ်းထားပြီလို့ ပြောနေကြသလို အကျအဆုံး များတယ်လို့လည်း ပြောကြတယ်။ ဒါပေမဲ့ အခုနောက် ပိုင်း AA က ပြန်ထိုးစစ်လုပ်ရတယ် ကြားတယ်၊ စစ်သားမိသားစုတွေ မြို့ထဲမှာ ပြောနေတာကတော့ မြန်မြန် ရမှဖြစ်မယ်။ မဟုတ်ရင် အသေအပျောက် များမယ်ဆိုပြီး ပြောကြတာရှိတယ်။ စစ်သားတချို့ ပျောက်နေ တယ်၊ AA ဘက်ကို ပြောင်းသွားတယ်လို့လည်း သိရတယ်။ အခုက နှစ်ဘက်လုံးက ငပြီကျွန်းကိစ္စ တရားဝင် ထုတ်ပြောတာ မရှိပေမဲ့ တိုက်ပွဲကတော့ နေ့တိုင်း ရှိနေတယ်” ဟု ပြောသည်။ လက်ရှိ ကျွန်းပေါ်တိုက်ပွဲများတွင် AA က ဒရုန်းများ၊ လက်နက်ကြီး၊ လက်နက်ငယ်များဖြင့် တန်ပြန်တိုက်ခိုက်ခဲ့ သဖြင့် စစ်အုပ်စု တပ်စိတ် ၃ ခုခန့် ကျဆုံးခဲ့သကဲ့သို့ AA ဘက်မှလည်း တပ်မှူးအဆင့်အထိ သေဆုံးမှုများ ရှိနေ သည်။ စစ်အုပ်စုသည် အောက်တိုဘာလ ၇ ရက်နေ့ကတည်းက လေကြောင်း၊ ရေကြောင်းနှင့် လက်နက်ကြီး ပစ်ကူများ သုံး၍ ငပြီကျွန်းကို ကမ်းတက်စစ်ဆင်ရေး စတင်ခဲ့ခြင်းဖြစ်ပြီး တစ်ပတ်ခန့်အကြာတွင် နောက်ဆုတ်သွားခဲ့ သော် လည်း ယခု အောက်တိုဘာလ တတိယပတ်အတွင်း အင်အားအများအပြားဖြင့် ထပ်မံကမ်းတက်လာသဖြင့် တိုက်ပွဲများ ပိုမို ပြင်းထန်လာခြင်း ဖြစ်သည်။ ဓါတ်ပုံ - မင်းပြားတွင် စစ်သင်္ဘော တိုက်ခိုက်သိမ်းပိုက်မှုနှင့်အတူ အောင်ပွဲခံနေသည့် AA တပ်ဖွဲ့ဝင်များ။ (၂၀၂၄၊ ဖေဖော်ဝါရီ ၁၃) ပုံဟောင်း / AA #ငပြီကျွန်း

စစ်တွေအနီး ဗျူဟာမြောက် ငပြီကျွန်းကို ထိန်းချုပ်ရန် စစ်တပ်နှင့် AA တို့ အပြိုင်အဆိုင် ကြိုးပမ်းနေ

စစ်တွေအနီး ဗျူဟာမြောက် ငပြီကျွန်းကို ထိန်းချုပ်ရန် စစ်တပ်နှင့် AA တို့ အပြိုင်အဆိုင် ကြိုးပမ်းနေ သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ…

  • October 19, 2026
မိုးကုတ်တွင် လီဆူပြည်သူ့စစ်ဖွဲ့ရန် စစ်အုပ်စုနှင့် TNLA တပ်ဖွဲ့ဝင်ဟောင်း ဦးဂူဆီးတို့ အတင်းအဓမ္မ လူစုနေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၁၉ ရက်။ မန္တလေးတိုင်း၊ မိုးကုတ်မြို့နယ်တွင် TNLA ၏ တပ်ဖွဲ့ဝင်ဟောင်း ဦးဂူဆီးဆိုသူ ဦးဆောင်သည့် တပ်ဖွဲ့ဝင်များ စစ်အုပ်စုထံ ပူးပေါင်းသွားပြီးနောက် မိုးကုတ်နှင့် မိုးမိတ်မြို့နယ်တို့တွင် လီဆူပြည်သူ့စစ် တပ်ဖွဲ့သစ် ဖွဲ့စည်းရန် အတွက် တပ်သားဟောင်းများနှင့် မိသားစုဝင်များကို အတင်းအဓမ္မ လိုက်လံဖမ်းဆီးနေကြောင်း ဒေသခံများက ပြောသည်။ တအာင်းတပ် TNLA တပ်မဟာ (၃) လက်အောက်ခံတပ်မှ တပ်ဖွဲ့ဝင်ဟောင်း လီဆူတိုင်းရင်းသား ဦးဂူဆီး ဦး ဆောင်သည့် တပ်ဖွဲ့ဝင်များသည် အောက်တိုဘာလ ၁၁ ရက်နေ့၊ ညနေပိုင်းက ကျောက်မဲမြို့အခြေစိုက် စစ်အုပ်စု တပ်ထံ ပူးပေါင်းသွားခဲ့ခြင်း ဖြစ်သည်။ ဦးဂူဆီသည် ရဲတပ်ဖွဲ့ဝင်ဟောင်းတစ်ဦး ဖြစ်ပြီး ၁၀၂၇ စစ်ဆင်ရေးတွင် TNLA တပ်ဖွဲ့နှင့် ပူးပေါင်းခဲ့ခြင်း ဖြစ်သည်။ အဆိုပါ အလင်းဝင်အဖွဲ့ကို စစ်အုပ်စုက အောက်တိုဘာလ ၁၄ ရက်နေ့၊ နံနက်ပိုင်းတွင် မိုးကုတ်မြို့ ဗျူဟာကုန်း၌ ကြိုဆိုပွဲ ပြုလုပ်ခဲ့ပြီးနောက် အလယ်ပိုင်းတိုင်းစစ်ဌာနချုပ် (လပခ) ၌ ထပ်မံ၍ အထူးဂုဏ်ပြုပွဲ ကျင်းပခဲ့ကြောင်း ဒေသခံများက ပြောသည်။ ထို့နောက် အောက်တိုဘာ ၁၄ ရက် ညနေပိုင်းတွင် မိုးကုတ်မြို့သို့ ပြန်လည်ရောက်ရှိလာပြီး စစ်အုပ်စု၏ စစ်ဘက် ရေးရာလုံခြုံရေးတပ်ဖွဲ့ (စရဖ) များနှင့် ပူးပေါင်းကာ လီဆူပြည်သူ့စစ်တပ်ဖွဲ့ ဖွဲ့စည်းနိုင်ရန် မိုးကုတ်နှင့် မိုးမိတ် မြို့နယ်အတွင်းရှိ TNLA တပ်တွင် တာဝန်ထမ်းဆောင်ခဲ့သည့် လီဆူတပ်သားဟောင်းများကို လိုက်လံဖမ်းဆီးမှု များ ပြုလုပ်နေခြင်း ဖြစ်သည်။ မိုးကုတ်ဒေသခံတစ်ဦးက “TNLA က တရားဝင် နားခွင့်ပေးထားတဲ့ တပ်သားဟောင်းတွေကို ပြည်သူ့စစ်ထဲ ထည့်ဖို့ လိုက်ဖမ်းနေတာပါ။ တပ်သားဟောင်းကို မတွေ့ရင် မိဘနဲ့ သားသမီးတွေကို ပြန်ပေးဆွဲ သဘောမျိုး အစားထိုး ဖမ်းဆီးသွားတာတွေ ရှိတယ်” ဟု ပြောသည်။ လက်ရှိတွင် မိုးမိတ်မြို့နယ် ဘော်ဒေနှင့် အောင်မြင်ကျေးရွာတို့မှ TNLA တပ်သားဟောင်း ၁၅ ဦးခန့်နှင့် မိသားစု ဝင် အစားထိုး ဖမ်းဆီးခံရသူ ၃၆ ဦးခန့်၊ စုစုပေါင်း ၅၁ ဦးကို မိုးကုတ်မြို့ရှိ ယာယီပြည်သူ့စစ်စခန်း၌ ခေါ်ဆောင် ထိန်းချုပ်ထားကြောင်း နီးစပ်သူတစ်ဦးက ပြောသည်။ အခြားမိုးကုတ်မြို့ခံတစ်ဦးက “အခုက ဘယ်လောက်တောင်ဆိုရင် အရင်က TNLA လက်အောက်မှာ လုပ်ခဲ့ပြီးမှ အခုက အိမ်မှာ မရှိကြဘူး၊ အဝေးတစ်နေရာမှာ စီးပွားရေးသွားလုပ်နေတယ်ဆိုရင် အဖေအမေကို ဆွဲသွား တယ်။ ရှင်းရှင်းပြောရရင် ပြန်ပေးဆွဲသဘောမျိုးကို လုပ်နေတာ။ မိုးမိတ်ဆိုရင်လည်း လီဆူလူမျိုးဆိုရင် တစ်အိမ်တစ်ဦး မလုပ်မနေရ အဲ့လိုမျိုးလာနေပြီ။ တို့လီဆူလူမျိုးတွေ မိုးကုတ်ကပဲဖြစ်ဖြစ် မိုးမိတ်ကပဲ ဖြစ် ဖြစ် အားလုံး ဒုက္ခရောက်လာနေပြီ။ အားလုံးသတိနဲ့ နေရနေရတယ်” ဟု ပြောသည်။ ၁၀၂၇ စစ်ဆင်ရေးကာလအတွင်း PSLF/TNLA နှင့် ပူးပေါင်းခဲ့သည့် ဦးဂူဆီး ဦးဆောင်သော လီဆူတပ်ဖွဲ့ဝင် ၅၀ ကျော်သည် ကတိသစ္စာကို ဖောက်ဖျက်၍ စစ်အုပ်စုထံ ဘက်ပြောင်း ပူးပေါင်းသွားသဖြင့် TNLA နှင့် သက်ဆိုင် ခြင်း မရှိတော့ကြောင်း PSLF/TNLA က အောက်တိုဘာလ ၁၉ ရက်နေ့တွင် သတင်းထုတ်ပြန်သည်။ အကယ်၍ ၎င်းတပ်ဖွဲ့က မိဘပြည်သူများအပေါ် ဖိနှိပ်စော်ကားပါက ပြည်သူ့ဘက်မှ ရပ်တည်၍ အရေးယူ ဆောင်ရွက်သွား မည်ဟုလည်း TNLA ထုတ်ပြန်ချက်တွင် ဖော်ပြထားသည်။ မိုးမိတ်ဒေသတွင် အခြေပြုသည့် ဂူဆီး ဦးဆောင်သောအဖွဲ့ကို TNLA ဗဟိုက နမ့်ဆန်သို့ တပ်ရွှေ့ပြောင်းရန် အမိန့်ပေးခဲ့သော်လည်း နားထောင်ခြင်းမရှိဘဲ ကျောက်မဲမြို့အခြေစိုက် စစ်အုပ်စုထံ တပ်ဖွဲ့ဝင် ၅၁ ဦးနှင့် လက် နက် ၄၉ လက်ဖြင့် သွားရောက် လက်နက်ချ ပူးပေါင်းခဲ့ခြင်းဖြစ်ကြောင်း စစ်ရေးသတင်းအရင်းအမြစ်များက ပြောသည်။ စစ်အုပ်စုနှင့် ပူးပေါင်းသွားသူ ဦးဂူဆီးမှာ မိုးကုတ်မြို့ ပိတ်ဆွယ်နယ်မြေ (၂) မှ ရဲတပ်သားဟောင်းတစ်ဦးသည်ဟု ဒေသခံများက ပြောသည်။ ၎င်းသည် ရဲတပ်ဖွဲ့မှ ထွက်ပြီးနောက် မိုးကုတ်မြို့ ဗျူဟာမှူးနှင့် ပူးပေါင်းကာ ဒေသခံများ၏ ကျောက်လုပ်ကွက် များကို အတင်းအဓမ္မ သိမ်းယူခြင်း၊ ၂၀၂၁ အာဏာသိမ်းပြီးနောက် စစ်အုပ်စုနှင့် ပူးပေါင်း၍ တော်လှန်ရေး အဖွဲ့ဝင်များကို ဖမ်းဆီးရမိအောင် ဒုက္ခပေးခြင်းများ ပြုလုပ်ခဲ့သူ ဖြစ်ကြောင်း ဒေသခံများက ဆိုသည်။ နောက်ပိုင်းတွင် တအာင်းအမျိုးသားလွတ်မြောက်ရေး တပ်မတော် (TNLA) ၏ ကျောထောက်နောက်ခံဖြင့် လီဆူတပ်ဖွဲ့ကို ဖွဲ့စည်းခွင့်ရရှိခဲ့သော်လည်း အခွင့်အရေးယူ၍ ကိုယ်ကျိုးရှာမှုများကြောင့် တပ်မဟာ (၃) မှ မိုင်းလုံနယ်သို့ ပြောင်းရွှေ့ခံရပြီးနောက် စစ်အုပ်စုထံ အလင်းဝင်သွားခြင်း ဖြစ်သည်။ လက်ရှိတွင် စစ်အုပ်စုနှင့် ဦးဂူဆီး ဦးဆောင်သည့် လီဆူပြည်သူ့စစ်အဖွဲ့သည် လီဆူတိုင်းရင်းသားများကို အသုံး ပြု၍ မိုးကုတ်နှင့် မိုးမိတ်နယ်မြေအတွင်း စီမံကိန်းများ ချမှတ် လုပ်ဆောင်ရန် ပြင်ဆင်နေသဖြင့် TNLA လီဆူ တပ်သားဟောင်းများ အနေဖြင့် အထူးသတိရှိစွာ နေထိုင်ကြရန် ဒေသခံများက တိုက်တွန်းထားသည်။ ဓါတ်ပုံ - (မိုးကုတ်မြို့တွင်း ဝင်လာသည့် TNLA တပ်ဖွဲ့ဝင်များကို မြို့ခံများနှင့်အတူ တွေ့ရစဉ်-ပုံဟောင်း / Mai A Hein) #မိုးကုတ် #ဦးဂူဆီး

မိုးကုတ်တွင် လီဆူပြည်သူ့စစ်ဖွဲ့ရန် စစ်အုပ်စုနှင့် TNLA တပ်ဖွဲ့ဝင်ဟောင်း ဦးဂူဆီးတို့ အတင်းအဓမ္မ လူစုနေ

မိုးကုတ်တွင် လီဆူပြည်သူ့စစ်ဖွဲ့ရန် စစ်အုပ်စုနှင့် TNLA တပ်ဖွဲ့ဝင်ဟောင်း ဦးဂူဆီးတို့ အတင်းအဓမ္မ လူစုနေ သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တ…

  • October 19, 2026
စစ်ကိုင်း အထက်ပိုင်း ဝန်းသိုတွင် တိုက်ပွဲပြင်းထန်ပြီး ရဲဘော် ၃ ဦးကျဆုံး၊ ဒေသခံ သောင်းနှင့်ချီ တိမ်းရှောင်ရ သတင်းနှင့် မီဒီယာကွန်ရက်။ ၂၀၂၆ ခုနှစ်၊ အောက်တိုဘာလ ၁၅ ရက်။ စစ်ကိုင်းတိုင်း၊ ဝန်းသိုမြို့နယ်အတွင်းသို့ စစ်အုပ်စုတပ်က မြေပြင် စစ်ကြောင်းထိုးဝင်ရောက်လာသည့်အပြင် လေကြောင်းမှပါ ဆက်တိုက် ဗုံးကြဲတိုက်ခိုက်နေသဖြင့် တိုက်ပွဲများ ပြင်းထန်နေပြီး တော်လှန်ရေးရဲဘော် ၃ ဦး ကျဆုံးကာ ၂ ဦး ဒဏ်ရာရရှိခဲ့ကြောင်း ဒေသခံများက ပြောသည်။ အင်းတော်မြို့နယ်၊ မဲဇာကျေးရွာဘက်မှ ထွက်ခွာလာသည့် စစ်အုပ်စု စစ်ကြောင်းသည် အောက်တိုဘာလ ၁၂ ရက်နေ့မှစ၍ ဝန်းသိုမြို့နယ်အတွင်းသို့ ဝင်ရောက်လာပြီး ပါအော၊ တပ်လွင်၊ ကျောက်တောနှင့် ဆင်ကုန်း ကျေးရွာများဘက်တွင် တိုက်ပွဲများ ဖြစ်ပွားနေခြင်း ဖြစ်သည်။ အဆိုပါ တိုက်ပွဲဖြစ်ပွားရာ နေရာများသည် ယခင်က စစ်အုပ်စုတပ်နှင့် ရဲစခန်းများ အခြေစိုက်ခဲ့ရာမှ လွန်ခဲ့သည့် ၃ နှစ်ခန့်ကတည်းက တော်လှန်ရေးအင်အားစုများ ထိန်းချုပ်ထားသည့် အရေးပါသော နန့်ခမ်းနှင့် ဂျိုးတောင် ဒေသတို့နှင့် ၁၀ မိုင်ဝန်းကျင်သာ ကွာဝေးတော့သည်။ ထိုစစ်ကြောင်း နန့်ခမ်းဘက်သို့ မတိုးလာနိုင်ရေး ကာကွယ်နေသည့် တော်လှန်ရေးရဲဘော် ၂ ဦးသည် ရှေ့တန်း သို့ စားနပ်ရိက္ခာ သွားရောက်ပို့ဆောင်စဉ် ကျဆုံးခဲ့ပြီး ဒရုန်းဖြင့် တိုက်ခိုက်ခံရမှုကြောင့် ရဲဘော် ၁ ဦး ထပ်မံကျ ဆုံးကာ ၂ ဦး ဒဏ်ရာရရှိခဲ့သည်။ ထို့ပြင် စစ်အုပ်စုတပ်က Y-12 လေယာဉ်နှင့် ဂျက်ဖိုက်တာများ အသုံးပြု၍ တိုက်ပွဲဧရိယာနှင့် ထန်းတပင် ကျေးရွာတို့ကို ဗုံးအလုံးပေါင်း ၃၀ ထက်မနည်း ကြဲချခဲ့ကြောင်း သိရသည်။ ဒေသခံတစ်ဦးက “ရဲဘော်နှစ်ယောက် ထမင်းသွားပို့တာ ရဲဘော်နှစ်ယောက် ကျဆုံးတယ်တဲ့။ မနေ့ညကတော့ ဒရုန်းတွေနဲ့ချတာ။ ရဲဘော် တစ်ယောက်တော့ ကျသွားတယ်။ ပြီးတော့ ၃ ယောက်တော့ ဒဏ်ရာရတယ်။ ဒီနေ့ မနက်လည်း Y 12 နဲ့ ဗုံးအလုံး ၃၀ လောက်ကြဲသွားတယ်။ တိုက်ပွဲဧရိယာကိုပေါ့” ဟု ပြောသည်။ ယခုအခါ မဲဇာနှင့် နန့်ခမ်းကြားရှိ ကျေးရွာများအပါအဝင် ဂျိုးတောင်၊ နန့်ခမ်းနှင့် အနီးဝန်းကျင် ကျေးရွာကြီးများ မှ ဒေသခံများသည် ဘေးလွတ်ရာသို့ ထွက်ပြေးတိမ်းရှောင်နေကြရသည်။ အဆိုပါ ထွက်ပြေးတိမ်းရှောင်နေရသည့် အခြေအနေနှင့် ပတ်သက်၍ အခြားဒေသခံတစ်ဦးက “လူဦးရေကတော့ သောင်းဂဏန်းနဲ့အထက်မှာရှိမှာ။ အဲ့ဒီက မဲဇာဘက်ကနေ တစ်လျှောက်လုံး ပြေးရတာပေါ့လေ။ ဂျိုးတောင် နဲ့ နမ်းခမ်းက ရွာကြီးတာကို” ဟု ပြောသည်။ လက်ရှိတွင် ဝန်းသိုမြို့အခြေစိုက် စစ်အုပ်စုတပ်၏ ခမရ (၁၁၁) နှင့် ခမရ (၁၂၀) တပ်ရင်းနှစ်ခုကလည်း စစ်ရေး ပြင်ဆင်မှုများ ပြုလုပ်နေပြီး မြေပြင်စစ်ကြောင်းများ အန္တရာယ်နှင့် လေကြောင်းတိုက်ခိုက်မှုများကို အထူးသတိ ပြုကြရန် ကောလင်းခရိုင် အမှတ် (၄) တပ်ရင်းက အနီးဝန်းကျင်ရှိ ကောလင်း၊ ဗန်းမောက်နှင့် ဝန်းသိုမြို့နယ် အတွင်းမှ ဒေသခံများကို သတိပေး ထုတ်ပြန်ထားသည်။ #ဝန်းသို

စစ်ကိုင်း အထက်ပိုင်း ဝန်းသိုတွင် တိုက်ပွဲပြင်းထန်ပြီး ရဲဘော် ၃ ဦးကျဆုံး၊ ဒေသခံ သောင်းနှင့်ချီ တိမ်းရှောင်ရ

စစ်ကိုင်း အထက်ပိုင်း ဝန်းသိုတွင် တိုက်ပွဲပြင်းထန်ပြီး ရဲဘော် ၃ ဦးကျဆုံး၊ ဒေသခံ သောင်းနှင့်ချီ တိမ်းရှောင်ရ သတင်းနှင့် မီဒီယာကွန်ရက်။၂၀၂၆ ခုနှစ်၊ အေ…

  • October 15, 2026
ဂွမြို့သို့ စစ်ကြောင်းထိုးရန် စစ်အုပ်စု ကြိုးစား၍ ဧရာဝတီ-ရခိုင် ဆက်သွယ်ရာ လမ်းပိုင်းတွင် တိုက်ပွဲပြန်ဖြစ် သတင်းနှင့် မီဒီယာကွန်ရက်။ ၂၀၂၆ ခုနှစ်၊ အောက်တိုဘာလ ၁၅ ရက်။ ဧရာဝတီတိုင်းမှတစ်ဆင့် ရခိုင်ပြည်၊ ဂွမြို့သို့ စစ်ကြောင်းထိုးရန် စစ်အုပ်စုတပ်က ထပ်မံကြိုးစားလာသော ကြောင့် သာပေါင်း-မကျည်းဇင် လမ်းပိုင်းတွင် နှစ်ဖက်ကြား တိုက်ပွဲများ ပြန်လည်ပြင်းထန်နေကြောင်း ဒေသခံ စစ်ရေး သတင်းအရင်းအမြစ်များက ပြောသည်။ စစ်အုပ်စုတပ်သည် ဧရာဝတီနှင့် ရခိုင် ဆက်သွယ်ထားသည့် သာပေါင်း-မကျည်းဇင် လမ်းကြောင်းအတိုင်း အောက်တိုဘာလ ပထမအပတ်မှစ၍ စစ်ကြောင်းထိုးလာသဖြင့် AA ပူးပေါင်းတပ်နှင့် အောက်တိုဘာ ၈ ရက်မှ ၁၄ ရက်နေ့အထိ ထိတွေ့တိုက်ပွဲများ ဆက်လက် ဖြစ်ပွားခဲ့ခြင်း ဖြစ်သည်။ လက်ရှိတွင် သာပေါင်းမြို့နယ်၊ ဘောမိကျေးရွာ၌ ခြေကုပ်ယူထားသည့် စစ်အုပ်စုတပ် တပ်မ (၆၆) လက်အောက် ခံတပ်များက ရခိုင်ရိုးမအစပ်သို့ စစ်ကြောင်းထိုးလျက်ရှိပြီး ဘောမိ၊ ဂျိုင်လယ်နှင့် မကျည်းဇင်ကျေးရွာ ဝန်းကျင် တို့တွင် တိုက်ပွဲများ အနီးကပ် ဖြစ်ပွားလျက်ရှိသည်။ ဧရာဝတီ စစ်ရေးသတင်းအရင်းအမြစ် အမျိုးသားတစ်ဦးက “သာပေါင်း-မကျည်းဇင် လမ်းကြောင်းအတိုင်း စစ်တပ် စစ်ကြောင်းနေတာ ဒီလမှာပို မြင့်လာတယ်။ ဘောမိ၊ ဂျိုင်လယ်နဲ့ မကျည်းဇင်ကျေးရွာ ဝန်းကျင်တွေ မှာ ထိတွေ့တိုက်ပွဲတွေဖြစ်နေတယ်။ အခုကြားတာက ကြည်း၊ ရေ၊ လေ ပူးပေါင်းကမ်းတက် စစ်ဆင်ရေး လုပ်မယ် ကြားတယ်။ ရွှေသောင်ယံဒေသဘက်မှာ တပ်မ (၆၆) ရဲ့ နည်းဗျူဟာတပ် တစ်ခု တပ်စွဲထားတယ်” ဟု ပြောသည်။ စစ်အုပ်စုတပ်သည် အင်အား ၁,၀၀၀ ကျော်အသုံးပြု၍ မကျည်းဇင်ကျေးရွာဘက်သို့ စစ်ကြောင်းထိုးလာပြီး ဂွမြို့နယ် အတွင်းရှိ ကျောက်ချွန်ကျေးရွာသို့ ဝင်ရောက်နိုင်ရန် လေကြောင်း၊ ရေကြောင်း ပစ်အားများကို အသုံး ပြုကာ ချဉ်းကပ်တိုက်ခိုက်နေပြီး ရခိုင်တောင်ပိုင်းတစ်ခုလုံးကိုလည်း ပိတ်ဆို့ထားသည်။ ဒေသခံ စစ်ရေးသတင်းအရင်းအမြစ် နောက်ထပ်တစ်ဦးက “အထိက ကျောက်ချွန်ဘက်ကို ရေကြောင်းက တက် ပြီး ကြက်သွန်ကွင်းကနေ စစ်ကူ၊ ခဲယမ်း အသယ်အပို့ရှိနေတယ်။ သာပေါင်း- မကျည်းဇင်လမ်းနဲ့ ရိုးနားမှာ တိုက်ပွဲရှိလာတော့ ရေကြောင်းပါ ကုန်းကြောင်းပါ တက်လာတာပါ။ အခုလေယာဉ်တွေ ကင်းထောက်နေတယ်” ဟု ပြောသည်။ လက်ရှိတွင် စစ်အုပ်စုတပ်သည် ရခိုင်ရိုးမကို ကျော်လွန်၍ ရခိုင်တောင်ပိုင်းသို့ ခြေမချနိုင်သေးဘဲ ဧရာဝတီတိုင်း ရိုးမတောင်ခြေ၌ တိုက်ပွဲများ ဆက်လက်ဖြစ်ပွားနေကာ စစ်အုပ်စုတပ်ဘက်မှ အကျအဆုံး ပိုမိုများပြားလျက်ရှိ သည်။ ဓါတ်ပုံ - AA Info Desk

ဂွမြို့သို့ စစ်ကြောင်းထိုးရန် စစ်အုပ်စု ကြိုးစား၍ ဧရာဝတီ-ရခိုင် ဆက်သွယ်ရာ လမ်းပိုင်းတွင် တိုက်ပွဲပြန်ဖြစ်

ဂွမြို့သို့ စစ်ကြောင်းထိုးရန် စစ်အုပ်စု ကြိုးစား၍ ဧရာဝတီ-ရခိုင် ဆက်သွယ်ရာ လမ်းပိုင်းတွင် တိုက်ပွဲပြန်ဖြစ် သတင်းနှင့် မီဒီယာကွန်ရက်။၂၀၂၆ ခုနှစ်၊ အော…

  • October 15, 2026
စစ်တွေဝန်းကျင် တိုက်ပွဲများကြောင့် စစ်အုပ်စု စစ်ဆေးရေး တင်းကျပ်ပြီး မြို့ခံများ စိုးရိမ်ပူပန်နေ

စစ်တွေဝန်းကျင် တိုက်ပွဲများကြောင့် စစ်အုပ်စု စစ်ဆေးရေး တင်းကျပ်ပြီး မြို့ခံများ စိုးရိမ်ပူပန်နေ

စစ်တွေဝန်းကျင် တိုက်ပွဲများကြောင့် စစ်အုပ်စု စစ်ဆေးရေး တင်းကျပ်ပြီး မြို့ခံများ စိုးရိမ်ပူပန်နေ သတင်းနှင့် မီဒီယာကွန်ရက်။၂၀၂၆ ခုနှစ်၊ အောက်တိုဘာလ ၁…

  • October 15, 2026
မွန်တွင် စစ်တပ်က အရပ်ဝတ်ဖြင့် စစ်ဆေးဖမ်းဆီးငွေညှစ်နေသဖြင့် ဒေသခံများ စိုးရိမ် သတင်းနှင့် မီဒီယာကွန်ရက်။ ၂၀၂၆ ခုနှစ်၊ အောက်တိုဘာလ ၁၅ ရက်။ မွန်ပြည်အတွင်းရှိ မြို့နယ် ၁၀ ခုတွင် စစ်အုပ်စုတပ်က အရပ်ဝတ်များဖြင့် အသွင်ယူကာ လိုင်စင်မဲ့ယာဉ်များကို နေ့စဉ်ရက်ဆက် ဖမ်းဆီးစစ်ဆေးနေပြီး ဒေသခံများနှင့် ခြံလုပ်သားများကို ပစ်မှတ်ထား ဖမ်းဆီး ငွေညှစ်မှုများ ပြုလုပ်နေသဖြင့် စိုးရိမ်ပူပန်မှုများ မြင့်တက်နေကြောင်း ဒေသခံများနှင့် လူ့အခွင့်အရေး အဖွဲ့အစည်းများက ပြောသည်။ စစ်အုပ်စုတပ်သည် မြို့ဝင်မြို့ထွက်များ၊ လမ်းဆုံလမ်းခွများနှင့် ကျေးရွာချင်းဆက် လမ်းများတွင် စစ်ဆေးရေး အရှိန်မြှင့်ဆောင်ရွက်နေပြီး ယာဉ်များကို စစ်ဆေးသည့်အပြင် လူပါ ပစ်မှတ်ထား ဖမ်းဆီးကာ မိသားစုများထံမှ ခြိမ်းခြောက် ငွေတောင်းခံခြင်းများ ပြုလုပ်လျက် ရှိသည်။ မွန်ပြည် လူ့အခွင့်အရေး ဖောင်ဒေးရှင်း ပရိုဂရမ်ဒါရိုက်တာ နိုင်အဲမွန်က “ယာဉ်တွေကို စစ်ဆေးရင်း လူငယ်တွေ ကိုပါ ဖမ်းပြီး စစ်မှုထမ်းအတွက် quota (သတ်မှတ်ချက်) တွေ ပြည့်အောင် လုပ်မယ့်သဘောတော့ တွေ့ရတယ်။ ဒါပေမဲ့ ဒီဖြစ် စဉ်တွေထဲက ဖမ်းဆီးခံရသူအားလုံးကို စစ်မှုထမ်းဖို့ ပို့လိုက်ပြီဆိုတာလည်း မဟုတ်ပြန်ဘူး။ ငွေညှစ်ပြီး ပြန် ရွေးခိုင်းတဲ့အဆင့်မှာပဲ ပြီးကြတာ များတယ်။ ငွေမရှိရင်တော့ သေချာပေါက် စစ်လေ့ကျင့်ရေးစခန်းထဲ ရောက် ကြမယ်လို့တော့ ပြောလို့ရတယ်” ဟု ပြောသည်။ ပြီးခဲ့သည့် စက်တင်ဘာလ ၂၄ ရက်နေ့က သံဖြူဇရပ်မြို့နယ်ရှိ ရာဘာခြံမှ ပြန်လာသည့် ခြံလုပ်သားများကို အသင့်စောင့်ဆိုင်းနေသည့် စစ်အုပ်စုတပ်က ဖမ်းဆီးခဲ့ပြီး လိုင်စင်မဲ့ယာဉ် အကြောင်းပြကာ ငွေညှစ်ခဲ့သလို၊ စက်တင်ဘာလ ၂၇ ရက်နေ့တွင်လည်း မုဒုံမြို့နယ်၊ ကမာဝက်ကျေးရွာမှ ဝက်တဲကျေးရွာသို့ ဆိုင်ကယ်ဖြင့် သွားသည့် ဒေသခံတစ်ဦးနှင့် ခြံလုပ်သားတစ်ဦးတို့အား ဖမ်းဆီးစစ်ဆေး၍ ကျပ်သိန်း ၃၀၀ ငွေညှစ်ခဲ့သည်။ ထို့ပြင် စက်တင်ဘာ ၃၀ ရက်ကလည်း ရေးမြို့ရှိ မြို့ဝင်/ထွက် နေရာများနှင့် လူစည်ကားသည့် နေရာများတွင် လိုင်စင်မဲ့ယာဉ်များကို ဖမ်းဆီးစစ်ဆေးခဲ့ပြီး ယာဉ်နှင့်တကွ လူကိုပါ ဖမ်းဆီးခေါ်ဆောင်သွားခဲ့ကြောင်း ဆိုသည်။ သံဖြူဇရပ်မြို့နယ်မှ ရာဘာခြံလုပ်သား တစ်ဦးက “မွန်နဲ့ အောက်မြန်မာနိုင်ငံဒေသတွေမှာ ဆိုင်ကယ်က နေ့စဉ် အလုပ်သွားဖို့၊ ခြံထဲဝင်ဖို့နဲ့ ပစ္စည်းသယ်ဖို့ အဓိကအားထားရတဲ့ ယာဉ်ဖြစ်ပါတယ်။ ပြောရမယ်ဆိုရင် ရာဘာခြံ လုပ်ငန်းတွေ လုပ်ရမယ့်အချိန်မှာ ဖမ်းဆီးခံရနိုင်တဲ့ အန္တရာယ်ကြောင့် အလုပ်သွားဖို့ ခက်ခဲလာပါတယ်။ အလုပ် ပျက်ရင် နေ့စားလုပ်သားတွေနဲ့ သူတို့မိသားစုတွေရဲ့ ဝင်ငွေ၊ စားဝတ်နေရေးကို တိုက်ရိုက်ထိခိုက်နိုင်တယ် တခြားကိစ္စ ကျန်းမာ ပညာ လူမှုကိစ္စတွေရဲ့ ခက်ခဲမှုတွေ အများကြီး ပိုလာတယ်။ နေ့နေ့ညည ကြောက်လန့် နေရတယ်” ဟု ပြောသည်။ စစ်အုပ်စု၏ စစ်မှုထမ်း အပတ်စဉ် ၁ မှ အပတ်စဉ် ၆ အထိ (စစ်မှုထမ်း ပုဒ်မ အဓိပ္ပာယ်ဖွင့်ဆိုချက်များအရ) မွန်ပြည်အတွင်း၌ တစ်လလျှင် ပျမ်းမျှ လူဦးရေ ၂၀၀ နှုန်းဖြင့် စုဆောင်းခဲ့ရာ စုစုပေါင်း လူဦးရေ ၆,၀၀၀ ကျော် အထိ ရှိလာပြီဖြစ်ကြောင်း လွတ်လပ်သော သတင်းမီဒီယာများ ဖော်ပြသည်။ ယခုအခါ အရပ်ဝတ်ဖြင့် အသွင်ယူကာ မည်သည့်အချိန်၊ မည်သည့်နေရာတွင် ဖမ်းဆီးခံရမည်ကို လူငယ်များ အကြား စိုးရိမ်နေကြရသကဲ့သို့ ဖမ်းဆီးခံရသူများအား စစ်မှုထမ်း လေ့ကျင့်ရေး သင်တန်းကျောင်းများသို့ ပို့ဆောင်မည်ကိုလည်း အုပ်ထိန်းသူများက အထူးစိုးရိမ် ပူပန်နေကြရသည်။ ဓါတ်ပုံ - Crd

မွန်တွင် စစ်တပ်က အရပ်ဝတ်ဖြင့် စစ်ဆေးဖမ်းဆီးငွေညှစ်နေသဖြင့် ဒေသခံများ စိုးရိမ်

မွန်တွင် စစ်တပ်က အရပ်ဝတ်ဖြင့် စစ်ဆေးဖမ်းဆီးငွေညှစ်နေသဖြင့် ဒေသခံများ စိုးရိမ် သတင်းနှင့် မီဒီယာကွန်ရက်။၂၀၂၆ ခုနှစ်၊ အောက်တိုဘာလ ၁၅ ရက်။ မွန်ပြည်…

  • October 15, 2026
×Close