သတင်း

ငွေလွှဲစည်းမျဉ်းနှင့် အခွန်ကိစ္စများကြောင့် ထိုင်းရောက် မြန်မာလုပ်သားများ အကျပ်တွေ့ သတင်းနှင့် မီဒီယာကွန်ရက်။ ၂၀၂၆ ခုနှစ်၊ အောက်တိုဘာလ ၁၅ ရက်။ ထိုင်းနိုင်ငံရောက် မြန်မာရွှေ့ပြောင်းလုပ်သားများအနေဖြင့် မည်သူမည်ဝါဖြစ်ကြောင်း သက်သေခံလက်မှတ် (CI) လျှောက်ထားရာတွင် ဝင်ငွေ၏ ၂၅ ရာခိုင်နှုန်းကို မိသားစုထံ လွှဲပြောင်းထားသည့် ၃ လစာ စလစ်ပြသမှသာ ထုတ်ပေးမည်ဟူသော စစ်အုပ်စု၏ တင်းကျပ်သည့် မူဝါဒကြောင့် အကျပ်အတည်း ဖြစ်နေကြသည်။ စစ်အုပ်စု၏ အလုပ်သမားဝန်ကြီးက CI သက်တမ်းတိုးခြင်းနှင့် လျှောက်ထားခြင်းများအတွက် မိသားစုထံ တစ်လလျှင် ဘတ် ၂,၀၀၀ နှုန်းဖြင့် ၃ လစာစုစုပေါင်း ဘတ် ၆,၀၀၀ နှင့် တစ်နှစ်စာ ဝင်ငွေခွန် ဘတ် ၁,၈၀၀ ခန့် ပေးဆောင်ရမည်ဟု ပြောဆိုထားသည်။ ထိုသို့ လုပ်ဆောင်ရာတွင် အလုပ်သမားများအနေဖြင့် လုပ်ခလစာ ၃ လစာ၏ ၂၅ ရာခိုင်နှုန်းကို မိသားစုထံ လွှဲပို့ထားကြောင်း အထောက်အထားပြသရန် တောင်းဆိုထားခြင်း ဖြစ်သည်။ သို့သော်လည်း ထိုင်းနိုင်ငံရောက် မြန်မာလုပ်သား အများစုမှာ ဘာသာစကားနှင့် လုပ်ငန်းခွင် အခက်အခဲများ ကြောင့် မြန်မာလုပ်ငန်းရှင်များထံတွင်သာ လုပ်ကိုင်နေကြရပြီး တစ်လလျှင် ဘတ် ၆,၀၀၀ မှ ၈,၀၀၀ ဝန်းကျင် သာ ရရှိကြသဖြင့် ရပ်တည်ရေးအတွက်ပင် မလောက်ငှဘဲ ဖြစ်နေကြကြောင်း ဆိုသည်။ ထိုင်းနိုင်ငံ တောင်ပိုင်း၊ ဖန်ငခရိုင်တွင် အခြေစိုက်သည့် ပညာရေးနှင့် ဖွံ့ဖြိုးရေး ဖောင်ဒေးရှင်း (FED) ၏ ညွှန် ကြားရေးမှူးချုပ် ဦးထူးချစ်က ယခုကဲ့သို့ လုပ်ငန်းစဉ်မှာ အရှုပ်အထွေးများစွာ ဖြစ်လာနိုင်သည်ဟု သုံးသပ် ပြောဆိုသည်။ “သူတို့ ထုတ်ပြန်တဲ့ မူဝါဒက လုံးဝမရှင်းလင်းဘူးပေါ့နော်။ အခက်အခဲ အများကြီး ရှိနိုင်တယ်။ တစ်ချိန်တည်း မှာပဲ ကျနော်တို့ပြန်ပြီးတော့ ငွေပြန်လွှဲတယ် ဆိုလို့ရှိရင် မြန်မာပြည်ထဲမှာ တချို့ ဒီမှာ ရွှေ့ပြောင်း လုပ်သား တိုင်းက မိသားစုတွေ မြန်မာပြည်ထဲမှာရှိတာ မဟုတ်ဘူး။ နောက်တစ်ခုက ကျနော်တို့ ရွှေ့ပြောင်းလုပ်သား အများစုက ဒီအစိုးရတွေ အဆုံးတရား မထိန်းချုပ်နိုင်တဲ့ နယ်မြေ တွေမှာလည်း အဓိကနေကြတဲ့ အလုပ်သမား တွေ ဖြစ်တယ်။ ဥပမာ မကွေး၊ စစ်ကိုင်း ကျနော်တို့ ကရင်နီတို့ ရခိုင်တို့ပေါ့နော်။ တချို့ ပြည်နယ်တွေကရော အဲ့ဒီလူတွေက ငွေပြန်ပို့ပြီးရင်တော့ သူတို့ ဘယ်လို သုံးကြမလဲ။ အခက်အခဲ အများကြီးပဲ” ဟု ၎င်းက ပြောသည်။ စစ်အုပ်စု၏ အဆိုပါ စည်းမျဉ်း သတ်မှတ်ချက်များသည် မြေပြင်တွင် စစ်မှုထမ်းဥပဒေကြောင့် ထွက်ပြေး လာ ရပြီး လစာဈေးနှိမ်ခံနေရသည့် အခြေခံ မြန်မာလုပ်သားများ၏ လက်ရှိ ရင်ဆိုင်နေရသော စီးပွားရေး အကျပ် အတည်းနှင့် လုံးဝ ကိုက်ညီမှု မရှိကြောင်းလည်း လုပ်သားများက ထောက်ပြကြသည်။ အလားတူ ချင်းမိုင်မြို့တွင် စားပွဲထိုး လုပ်ကိုင်နေသည့် မြန်မာလုပ်သားတစ်ဦးကလည်း “လစာကောင်းရင်တော့ သူတို့တောင်းတာတွေက ပေးနိုင်တာပေါ့ဗျာ။ ကျနော်တို့မှာ စစ်မှုထမ်းကြောင့် ပြေးလာရတယ်။ ဘာမှ အထောက်အထား မရှိဘူး။ အဲတော့ ဈေးနှိမ်ခံရတယ်။ ရတဲ့လစာ ဘတ် ၇,၀၀၀ ဆိုတာက တရားမဝင်ဘူး။ ပြောချင်တာက ရတော့တရားမဝင် လစာ။ ဆောင်ရတာက တရားဝင်အခွန်။ ဆောင်ပြီးရင် ဘာဝန်ဆောင်မှု ရသလဲဆို ဘာမှမရဘူး။ ကြားထဲ အိမ်ငှားရတာက ပါသေး” ဟု ပြောသည်။ ထိုင်းအစိုးရ၏ ထုတ်ပြန်ချက်အရ CI ထုတ်ပေးရေးစခန်း ၄ ခုကို စမုစခွန်၊ စမုပရာကန်၊ ဆူရတ်ဌာနီနှင့် ချင်းမိုင် ခရိုင်တို့တွင် လည်းကောင်း၊ ရွေ့လျားဝန်ဆောင်မှုယူနစ်ကို ချွန်ဘူရီခရိုင်တွင် လည်းကောင်း အောက်တိုဘာလ ၁၄ ရက်နေ့မှစ၍ ၂၀၂၇ ခုနှစ် ဇန်နဝါရီလ ၁၄ ရက်နေ့အထိ ဖွင့်လှစ်ပေးမည်ဖြစ်ပြီး လုပ်သားများအနေဖြင့် 7-Eleven ဆိုင်များတွင် စာအုပ်ဖိုး ဘတ် ၂,၆၆၀ ပေးသွင်းကာ လျှောက်ထားနိုင်ကြောင်း ကြေညာထားသည်။ သို့သော် ရွှေ့ပြောင်းလုပ်သားများအနေဖြင့် ထိုင်းအစိုးရထံတွင် ပန်းရောင်ကတ် လုပ်ကိုင်ထားပြီးဖြစ်သဖြင့် အခွန်နှစ်ထပ် ကျခံနေရသကဲ့သို့ ဖြစ်နေပြီး၊ ယခုကဲ့သို့ အခွန်တိုးမြှင့် ကောက်ခံခြင်းမှာ အလုပ်သမားများအကြား အပူပေါ်အပူဆင့်သည့် အခြေအနေကို ဖြစ်စေကြောင်း အလုပ်သမားရေး လှုပ်ရှားသူများက ထောက်ပြကြသည်။ ဦးထူးချစ်က “ကျနော်တို့ သုတေသန စာတမ်းတွေ လုပ်ပြီးတော့မှ ရွှေ့ပြောင်းလုပ်သားတွေဆီကနေ အခွန်ပဲ ကောက်မယ်။ ပိုက်ဆံ ပြန်ပို့ခိုင်းမယ်။ အဲလိုမလုပ်ဘဲနဲ့ ရွှေ့ပြောင်း အလုပ်သမားတွေကို ဘယ်လိုမျိုး အလုပ် သမား အခွင့်အရေး၊ ကျန်းမာရေး၊ ပညာရေးကိစ္စတွေ ဘယ်လိုမျိုး ဝန်ဆောင်မှု ပေးမလဲဆိုတာက ပိုပြီးတော့ အရေးကြီးပါတယ်။ အဲ့ဒါကို ရှင်းရှင်းလင်းလင်းနဲ့ အစိုးရရဲ့ တာဝန်ယူဖို့ တာဝန်ခံဖို့ကို အေးဆေး ရှင်းပြပြီး တော့မှပဲ ဒီလုပ်ငန်းတွေက အကောင်အထည်ဖော်လို့ ရနိုင်လိမ့်မယ်လို့ ကျနော့်အနေနဲ့ ပြောချင်ပါတယ်” ဟု ဆက်ပြောသည်။ လက်ရှိတွင် CI နှင့် ပတ်စ်ပို့ သက်တမ်းတိုးခြင်းဆိုင်ရာ အခက်အခဲများကြောင့် မြန်မာ ရွှေ့ပြောင်း လုပ်သားများ အကြား ပန်းရောင်ကတ် တစ်ခုတည်းဖြင့်သာ ဆက်လက် နေထိုင်သွားရန် ဆွေးနွေးပြောဆိုမှုများ ရှိနေပြီး အခွန်တိုးမြှင့် ကောက်ခံမှုများကြောင့် အကျပ်အတည်း ပိုမိုဆိုးရွားလာနေကြောင်း ဆိုသည်။ ဓါတ်ပုံ - Crd

ငွေလွှဲစည်းမျဉ်းနှင့် အခွန်ကိစ္စများကြောင့် ထိုင်းရောက် မြန်မာလုပ်သားများ အကျပ်တွေ့

ငွေလွှဲစည်းမျဉ်းနှင့် အခွန်ကိစ္စများကြောင့် ထိုင်းရောက် မြန်မာလုပ်သားများ အကျပ်တွေ့ သတင်းနှင့် မီဒီယာကွန်ရက်။၂၀၂၆ ခုနှစ်၊ အောက်တိုဘာလ ၁၅ ရက်။ ထိ…

  • October 15, 2026
မွန်ပြည်နယ် ဘီးလင်းကို စစ်အုပ်စု လေကြောင်းနှင့် လက်နက်ကြီးဖြင့် တိုက်ခိုက်၍ အရပ်သား ၅ ဦး သေဆုံး သတင်းနှင့် မီဒီယာကွန်ရက်။ ၂၀၂၆ ခုနှစ်၊ အောက်တိုဘာလ ၁၄ ရက်။ မွန်ပြည်၊ ဘီးလင်းမြို့နယ်ရှိ KNU တပ်မဟာ (၁) ထိန်းချုပ်နယ်မြေအတွင်း တိုက်ပွဲဖြစ်ပွားခြင်း မရှိဘဲ အလူးကြီး ကျေးရွာကို စစ်အုပ်စုက လေကြောင်းမှ ဗုံးကြဲခြင်းနှင့် လက်နက်ကြီးများဖြင့် ပစ်ခတ်တိုက်ခိုက်ခဲ့သဖြင့် အသက် ၆၀ ကျော် အရွယ်များ အပါအဝင် အရပ်သား ၅ ဦး သေဆုံးပြီး ၈ ဦး ထိခိုက်ဒဏ်ရာရရှိခဲ့ကြောင်း ဒေသခံများက ပြောသည်။ ယမန်နေ့ အောက်တိုဘာလ ၁၃ ရက် ည ၇ နာရီမှ ၈ နာရီဝန်းကျင်တွင် စစ်အုပ်စု၏ ဂျက်ဖိုက်တာ လေယာဉ် တစ်စီးက အလူးကြီးကျေးရွာအနီးသို့ ပထမအကြိမ် ဗုံးကြဲတိုက်ခိုက်ခဲ့ပြီးနောက် ဘီးလင်းအခြေစိုက် အမှတ် (၃) အမြောက်တပ်ရင်းနှင့် အမှတ် (၄၄) ခြေမြန်တပ်မဌာနချုပ်တို့က ကျေးရွာအတွင်းသို့ လက်နက်ကြီးများဖြင့် ဆက်တိုက် ပစ်ခတ်ခဲ့ခြင်း ဖြစ်သည်။ ဒေသခံ အမျိုးသားတစ်ဦးက “မနေ့ညက တိုက်ပွဲလည်း မရှိဘဲ ရွာထဲကို ဂျက်ဖိုက်တာနဲ့ လာကြဲတာ။ ပြီးတော့ တပ်မ ၄၄ နဲ့ အမြောက်တပ်ကနေ လက်နက်ကြီးတွေ ဆက်တိုက် ပစ်သွင်းတာ။ အသက် ၆၀ ကျော် အဖိုးအဖွား တွေရော၊ လူငယ်တွေရော လက်နက်ကြီးကျည် ထိမှန်ပြီး ပွဲချင်းပြီး သေကုန်ကြတာပါ” ဟု ပြောသည်။ လက်နက်ကြီး ကျရောက်ပေါက်ကွဲမှုကြောင့် အလူးကြီးကျေးရွာမှ အသက် ၆၀ ကျော်အရွယ် အမျိုးသား ၂ ဦးနှင့် အမျိုးသမီး ၁ ဦး၊ အသက် ၄၀ အရွယ် အမျိုးသား ၂ ဦးတို့ သေဆုံးခဲ့ရပြီး အသက် ၁၂ နှစ်အရွယ် ကလေးငယ် တစ်ဦး အပါအဝင် အရပ်သား ၈ ဦး ထိခိုက်ဒဏ်ရာရရှိကာ လူနေအိမ် ၁၀ လုံးခန့် ထိခိုက်ပျက်စီးခဲ့သည်။ လက်ရှိတွင် စစ်အုပ်စု၏ ရည်ရွယ်ချက်ရှိရှိ တိုက်ခိုက်မှုများကြောင့် ကရင်လူမျိုးအများစု နေထိုင်သည့် အလူးကြီးကျေးရွာ ဒေသခံအများစုသည် နေရပ်စွန့်ခွာ ထွက်ပြေးတိမ်းရှောင်နေရပြီး ဘေးလွတ်ရာတွင် အရေး ပေါ် အကူအညီများ လိုအပ်နေသည်။ ဘီးလင်းဒေသခံ အမျိုးသမီးတစ်ဦးကလည်း “ရွာမှာ ရွာသားတွေ ဘာမှ မလုပ်ဘဲ အိပ်ချိန်ကြီးမှာ ထပစ်တာဆို တော့ အကုန်လုံး ထိကြတာ။ အခု ရွာမှာ မနေရဲကြတော့ဘဲ တောထဲ၊ တောင်ထဲ ပြေးနေကြရတယ်။ စားစရာနဲ့ ဆေးဝါးတွေ အဓိက အရေးပေါ် လိုအပ်နေတယ်” ဟု ပြောသည်။ သထုံခရိုင် KNU နယ်မြေအတွင်း စစ်အုပ်စုတပ်သည် လေကြောင်း၊ ဒရုန်းနှင့် လက်နက်ကြီးများ အသုံးပြု၍ ကျေးရွာများကို နေ့စဉ်မပြတ် ပစ်ခတ်တိုက်ခိုက်လျက်ရှိသည်။ ပြီးခဲ့သည့် အောက်တိုဘာ ၁၂ ရက်ကလည်း ကျိုက်ထိုမြို့နယ်၊ ဇီးကုန်းကျေးရွာကို တပ်မ ၄၄ က ဒရုန်းဖြင့် ဗုံးကြဲ ခဲ့သဖြင့် အရပ်သား ၃ ဦး သေဆုံးခဲ့သလို၊ စက်တင်ဘာလအတွင်းကလည်း ဘီးလင်းမြို့နယ်၊ ကြသောင်းဆိပ် ကျေးရွာကို လေကြောင်းမှ ဗုံးကြဲခဲ့၍ စာသင်ကျောင်းဆောင်များနှင့် လူနေအိမ် ၄၀ ကျော် ထိခိုက်ပျက်စီးခဲ့ ကြောင်း ဒေသခံများက ပြောသည်။ ဓါတ်ပုံ - (စစ်အုပ်စု၏ လေကြောင်းဗုံးကြဲမှုကြောင့် ပျက်စီးသွားသော အလူးကြီးကျေးရွာအတွင်းမှ အခြေအနေ။ / Crd)

မွန်ပြည်နယ် ဘီးလင်းကို စစ်အုပ်စု လေကြောင်းနှင့် လက်နက်ကြီးဖြင့် တိုက်ခိုက်၍ အရပ်သား ၅ ဦး သေဆုံး

မွန်ပြည်နယ် ဘီးလင်းကို စစ်အုပ်စု လေကြောင်းနှင့် လက်နက်ကြီးဖြင့် တိုက်ခိုက်၍ အရပ်သား ၅ ဦး သေဆုံး သတင်းနှင့် မီဒီယာကွန်ရက်။၂၀၂၆ ခုနှစ်၊ အောက်တိုဘာလ ၁…

  • October 14, 2026
လေယာဉ်ဗုံးလုပ် ကပစ ကုန်ကြမ်းများကို အရပ်ဘက်ယာဉ်များဖြင့် ပို့ဆောင်နေ သတင်းနှင့် မီဒီယာကွန်ရက်။ ၂၀၂၆ ခုနှစ်၊ အောက်တိုဘာလ ၁၄ ရက်။ စစ်အုပ်စုတပ်သည် လေယာဉ်ဗုံးထုတ်လုပ်ရာတွင် အသုံးပြုသည့် ကုန်ကြမ်းများနှင့် ယမ်းစပ်ပစ္စည်းများကို အရပ်ဘက် တွဲကားများ အသုံးပြု၍ ပဲခူးတိုင်း၊ မကွေးတိုင်းနှင့် စလင်း-ဆိပ်ဖြူ လမ်းပိုင်းတို့မှတစ်ဆင့် လျှို့ဝှက် သယ်ယူပို့ဆောင်လျက်ရှိကြောင်း ကပစ ဝန်ထမ်းအငြိမ်းစားများနှင့် မြေပြင်သတင်းရင်းမြစ်များက ပြောသည်။ ပဲခူးတိုင်း၊ ပန်းတောင်းမြို့နယ်၊ ညောင်ခြေထောက်ကျေးရွာရှိ အမှတ် (၆) ကာကွယ်ရေးပစ္စည်းစက်ရုံ (ကပစ ၆) ၌ လေယာဉ်ဗုံးအခွံပြုလုပ်ရန်အတွက် သံရည်ကျို၊ ကြေးရည်ကျိုစက်ရုံများဖြင့် နေ့ညမပြတ် ထုတ်လုပ်နေပြီး အဆိုပါ ဗုံးအခွံများကို ဆိပ်ဖြူမြို့နယ်ရှိ ကပစ ၂၁ သို့ အရပ်ဘက် တွဲကား ၇ စီးခန့်ဖြင့် တစ်လလျှင် ၂ ကြိမ် ပို့ဆောင်နေခြင်းဖြစ်သည်။ ကပစ အငြိမ်းစား အရာခံဝန်ထမ်းတစ်ဦးက “ကပစ ၆ မှာ လေယာဉ်ဗုံးအခွံတွေအတွက် နေ့ဆိုင်း၊ ညဆိုင်းတွေနဲ့ ထုတ်လုပ်ပေးနေတာပါ” ဟု ပြောပြသည်။ ရုရှား၊ တရုတ်နှင့် မြောက်ကိုရီးယားနိုင်ငံတို့မှ အရပ်ဘက် မြို့ပြဆောက်လုပ်ရေး ကုန်ကြမ်းအဖြစ် ခေါင်းစဉ် တပ်ကာ တင်သွင်းလာသည့် သံပိုက်လုံးများကို ရန်ကုန်ဆိပ်ကမ်းမှတစ်ဆင့် ဧရာဝတီမြစ်အတိုင်း ထုံးဘို ပျဉ်ကြီး ဆိပ်ကမ်းသို့ ရေလမ်းကြောင်းဖြင့် ပို့ဆောင်ပြီးနောက် ကပစ ၆ သို့ အရပ်ဘက် တွဲကားများဖြင့် သယ်ယူကာ စက်သုံးဆီဖြင့် ယာဉ်ငှားခ အစားထိုး ပေးချေနေသည်ဟု ဆိုသည်။ ကပစ စက်ရုံလုပ်သားတစ်ဦးကလည်း “ရုရှားကရောက်လာတဲ့ သံပိုက်တွေကို ကပစ ၆ မှာ ဖြတ်တောက်ပြီး ပုံစံထောင်းရတာပါ။ အရင် အကြီးစားစက်မှုလုပ်ငန်း စက်ရုံ ၅ ကို စစ်တပ်က သိမ်းထားတော့ တကစ ဆိုပြီး လည်ပတ်နေတာ။ အခြားထုတ်ကုန် မရှိတော့ အဲဒီက လုပ်သားတွေကို ကပစ ၆ မှာ ခေါ်ခိုင်းနေတာ နေ့မအား ညမအားဘဲ အရမ်းပင်ပန်းလှပြီ” ဟု ပြောသည်။ အဆိုပါ ကုန်ကြမ်းများနှင့် လေယာဉ်ဗုံးအခွံများ ပို့ဆောင်မှုကို ယခု အောက်တိုဘာလအတွင်း စစ်အုပ်စုက ပိုမိုတိုးမြှင့် သယ်ယူနေခြင်း ဖြစ်သည်။ ကုန်ကြမ်းနှင့် ဗုံးအခွံများ ပို့ဆောင်ရာတွင် စစ်တပ်မှ ဗိုလ်မှူး သို့မဟုတ် စီနီယာ ဗိုလ်ကြီးတစ်ဦးက အရပ် ဝတ်ဖြင့် ဦးဆောင်ကာ မကွေး၊ ပြည်၊ အောင်လံ စသည့် တပ်နယ်များမှ လမ်းကြောင်းတစ်လျှောက် လုံခြုံရေး ယူပေးကြသည်ဟုလည်း ဆိုသည်။ အထူးသဖြင့် တော်လှန်ရေးတပ်ဖွဲ့များ စိုးမိုးထားသည့် စလင်း-ဆိပ်ဖြူ လမ်းပိုင်းတွင် စစ်အုပ်စုက အရပ်ဘက် ယာဉ်များကို ကပစ ၂၁ ၏ လုံခြုံရေးယာဉ် ၆ စီးအပြင် တိုက်ခိုက်ရေး ရဟတ်ယာဉ် ၂ စီးဖြင့် အနီးကပ် ဝန်းရံ စောင့်ရှောက်၍ သယ်ယူနေကြသည်။ အဆိုပါ ကပစ ဝန်ထမ်းအငြိမ်းစားက “အခု ကပစ ၆ က အောက်တိုဘာ ၇ ရက်နေ့ကထွက်တာဆိုရင် ပန်းတောင်းနယ်ကို ပန်းတောင်းတပ်နယ်က၊ ပြည်ကို ပြည်ဒကစ၊ အောင်လံဆို အောင်လံတပ်နယ်က လမ်း တလျှောက် လုံခြုံရေးပေးရတယ်။ ဆိပ်ဖြူနယ် PDF ပြင်းထန်တဲ့နေရာကိုတော့ ရဟတ်ယာဉ် ၂ စီးနဲ့ ကာဗာယူတာ” ဟု ပြောသည်။ ပြီးခဲ့သည့် ၂၀၂၃ ခုနှစ်က သရက်မြို့နယ် ကပစ ၁၂ မှ ဆိတ်ဖြူ ကပစ သို့ ဒုံးသီးအပျက်များ အရည်ပြန်ကြိုရန် ပို့ဆောင်စဉ် တော်လှန်ရေးတပ်များ၏ ကြားဖြတ်တိုက်ခိုက်မှုကြောင့် ယာဉ်နှင့် လူပါ ပျက်စီးဆုံးရှုံးခဲ့ရဖူးသဖြင့် ကပစ ၁၂ စက်ရုံမှူး ဗိုလ်မှူးကြီးတစ်ဦး အရေးယူခံခဲ့ရသည့် ဖြစ်စဉ်လည်း ရှိခဲ့သည်။ #ကပစ

လေယာဉ်ဗုံးလုပ် ကပစ ကုန်ကြမ်းများကို အရပ်ဘက်ယာဉ်များဖြင့် ပို့ဆောင်နေ

လေယာဉ်ဗုံးလုပ် ကပစ ကုန်ကြမ်းများကို အရပ်ဘက်ယာဉ်များဖြင့် ပို့ဆောင်နေ သတင်းနှင့် မီဒီယာကွန်ရက်။၂၀၂၆ ခုနှစ်၊ အောက်တိုဘာလ ၁၄ ရက်။ စစ်အုပ်စုတပ်သည် လ…

  • October 14, 2026
ယူကရိန်းအတွက် ဗြိတိန် ပေါင် ၄၅ သန်းတန် ဒုံးကျည်များ ပံ့ပိုးမည် သတင်းနှင့် မီဒီယာ ကွန်ရက်။ ၂၀၂၆ ခုနှစ် အောက်တိုဘာလ ၁၄ ရက်။ ယူကရိန်းသမ္မတ ဗိုလိုဒီမာ ဇယ်လန်းစကီးသည် ဗြိတိန်နိုင်ငံ ဝန်ကြီးချုပ် အန်ဒီ ဘန်းဟမ် (Andy Burnham) နှင့် တွေ့ဆုံဆွေးနွေးရန် လန်ဒန်မြို့သို့ ရောက်ရှိနေသည်။ ဗြိတိန်အစိုးရက ယူကရိန်းနိုင်ငံအတွက် ပေါင် ၄၅ သန်း တန်ဖိုးရှိ လေကြောင်းရန်ကာကွယ်ရေး ဒုံးကျည်အသစ်များကို ပံ့ပိုးကူညီသွားမည်ဟု အတည်ပြုခဲ့သည်။ ယင်းအနက် ပေါင် ၁၀ သန်းတန်ဖိုးရှိ လက်နက်များကို အရေးပေါ် လိုအပ်ချက်အရ အမြန်ဆုံး ပို့ဆောင်ပေးသွားမည်ဖြစ်သည်။ အမေရိကန်သမ္မတ ဒေါ်နယ်ထမ့်ပ်က သမ္မတ ဇယ်လန်းစကီးအား ရာထူးမှ ဖယ်ရှားသင့်ကြောင်း ပြောဆိုခဲ့ပြီးနောက် အဆိုပါ ခရီးစဉ် ထွက်ပေါ်လာခြင်းဖြစ်သည်။ သို့သော်လည်း ဗြိတိန်ဝန်ကြီးချုပ်က ယူကရိန်းနိုင်ငံအတွက် လိုအပ်သည့် ကူညီထောက်ပံ့မှုများကို ဆက်လက် ပံ့ပိုးသွားမည်ဟု ခိုင်မာစွာ ကတိပြုခဲ့သည်။

ယူကရိန်းအတွက် ဗြိတိန် ပေါင် ၄၅ သန်းတန် ဒုံးကျည်များ ပံ့ပိုးမည်

ယူကရိန်းအတွက် ဗြိတိန် ပေါင် ၄၅ သန်းတန် ဒုံးကျည်များ ပံ့ပိုးမည် သတင်းနှင့် မီဒီယာ ကွန်ရက်။၂၀၂၆ ခုနှစ် အောက်တိုဘာလ ၁၄ ရက်။ ယူကရိန်းသမ္မတ ဗိုလိုဒီ…

  • October 14, 2026
ဘန်ကောက်တွင် မြန်မာကလေးငယ်များကို အဓမ္မခိုင်းစေပြီး ရောင်းစားသည့် လူကုန်ကူးဂိုဏ်း ဖမ်းဆီးခံရ သတင်းနှင့် မီဒီယာကွန်ရက်။ ၂၀၂၆ ခုနှစ်၊ အောက်တိုဘာလ ၁၄ ရက်။ ထိုင်းနိုင်ငံ၊ ဘန်ကောက်မြို့ရှိ လူနေအိမ်များကို ထိုင်းအထူးအဖွဲ့ (DOPA) နှင့် ရဲတပ်ဖွဲ့တို့က ဝင်ရောက်စီးနင်းခဲ့ရာ အသက် ၁၂ နှစ်အရွယ် မိန်းကလေးငယ်တစ်ဦးကို မိခင်ဖြစ်သူက ဘတ် ၃ သောင်းဖြင့် ရောင်းချထားမှုအပါအဝင် အဓမ္မခိုင်းစေခံနေရသည့် မြန်မာကလေးငယ်များနှင့် အမျိုးသမီးများကို ကယ်ထုတ်နိုင်ခဲ့ပြီး လူကုန်ကူးသူများကို ဖမ်းဆီးလိုက်ကြောင်း ထိုင်းသတင်းများအရ သိရသည်။ အောက်တိုဘာလ ၁၃ ရက်နေ့တွင် DOPA-S.W.A.T အထူးအဖွဲ့သည် ဘန်ကောက်မြို့၊ Ramkhamhaeng လမ်း ရှိ နေအိမ်များကို ဝင်ရောက်ရှာဖွေခဲ့ခြင်း ဖြစ်သည်။ စီးနင်းမှုအတွင်း အိမ်တစ်လုံးမှ လူကုန်ကူးမှု၊ အဓမ္မခိုင်းစေမှု တို့ဖြင့် မြန်မာသံသယရှိသူ ၂ ဦးကို ဖမ်းဆီးခဲ့ပြီး မြန်မာနိုင်ငံသား လူကုန်ကူးခံရသူ စုစုပေါင်း ၆ ဦးကို ကယ်တင် နိုင်ခဲ့သည်။ ထိုင်းသတင်းများ၏ ဖော်ပြချက်အရ အဆိုပါ ဂိုဏ်းသည် ထိုင်း-မြန်မာနယ်စပ် တာ့ခ်ခရိုင်နှင့် မဲဆောက်မြို့ဘက် မှတဆင့် ကလေးငယ်များကို ခေါ်ဆောင်လာခဲ့ကြခြင်းဖြစ်သည်။ လူကုန်ကူးသူများသည် ကလေးများအား အိမ်ဖော်အလုပ်ပေးမည်၊ ကျောင်းထားပေးမည်နှင့် တရားဝင် စိစစ်ရေး ကတ်ပြားရရှိအောင် လုပ်ဆောင်ပေးမည်ဟု လိမ်လည်လှည့်ဖြားကာ ခေါ်ဆောင်လာခဲ့ပြီးနောက် ညဉ့်နက်သည် အထိ လူစည်ကားရာ နေရာများတွင် ပန်းနှင့် အဖျော်ယမကာများ အတင်းအကျပ် လှည့်လည်ရောင်းခိုင်းခဲ့ကြ သည်။ ထို့ပြင် DOPA အဖွဲ့၏ စစ်ဆေးချက်အရ Ramkhamhaeng ၁၂၀ လမ်းရှိ အိမ်တစ်လုံးတွင်မူ အသက် ၁၂ နှစ် အရွယ် မြန်မာမိန်းကလေးငယ်တစ်ဦးကို အိမ်ပိုင်ရှင်က ၎င်း၏ မိခင်ထံမှ ဘတ် ၃၀,၀၀၀ ဖြင့် ဝယ်ယူကာ အိမ် အလုပ်များ ခိုင်းစေရန် ခေါ်ဆောင်လာခဲ့ခြင်းဖြစ်ကြောင်း ဝန်ခံခဲ့သည်။ ထိုင်းသတင်းရင်းမြစ်များနှင့် DOPA အဖွဲ့၏ ထုတ်ပြန်ချက်များအရ လူကုန်ကူးခံရသည့် ကလေးများသည် ပစ္စည်းများ ကုန်အောင် မရောင်းနိုင်ပါက ဇွန်းပူဖြင့် တို့ခြင်းစသည့် ရုပ်ပိုင်းဆိုင်ရာ ညှင်းပန်းနှိပ်စက်မှုများနှင့် ရင်ဆိုင်ခဲ့ရသည်။ ထွက်မပြေးနိုင်ရန်အတွက် ၎င်းတို့၏ သက်သေခံ စာရွက်စာတမ်းများကို သိမ်းဆည်းခံထားရပြီး ရောင်းရငွေများ ကိုလည်း လူကုန်ကူးသူများ၏ ဘဏ်အကောင့်သို့ လွှဲပြောင်းပေးခဲ့ရသည်။ လက်ရှိတွင် ထိုင်းအာဏာပိုင်များက ဖမ်းဆီးရမိထားသူများကို လူကုန်ကူးမှုနှင့် ကလေးသူငယ် ကာကွယ်စောင့်ရှောက်ရေး ဥပဒေတို့ဖြင့် စွဲချက်တင် အရေးယူထားသည်။ ကယ်ထုတ်ခဲ့သည့် မြန်မာကလေးငယ်များကိုမူ ရုပ်ပိုင်းဆိုင်ရာနှင့် စိတ်ပိုင်းဆိုင်ရာ ပြန်လည်ထူထောင်ရေးများ ဆောင်ရွက်ပေးနိုင်ရန် စောင့်ရှောက်ရေးစင်တာသို့ ပို့ဆောင်ထားသည်ဟု သတင်းများတွင် ဖော်ပြသည်။ ဓါတ်ပုံ - The Nation

ဘန်ကောက်တွင် မြန်မာကလေးငယ်များကို အဓမ္မခိုင်းစေပြီး ရောင်းစားသည့် လူကုန်ကူးဂိုဏ်း ဖမ်းဆီးခံရ

ဘန်ကောက်တွင် မြန်မာကလေးငယ်များကို အဓမ္မခိုင်းစေပြီး ရောင်းစားသည့် လူကုန်ကူးဂိုဏ်း ဖမ်းဆီးခံရ သတင်းနှင့် မီဒီယာကွန်ရက်။၂၀၂၆ ခုနှစ်၊ အောက်တိုဘာလ ၁၄ ရ…

  • October 14, 2026
ကိုးကန့် ‘ဝေ’ မိသားစုခေါင်းဆောင် ဝေစန်း အပါအဝင် ၃ ဦးကို တရုတ်တရားရုံး သေဒဏ်ချမှတ် သတင်းနှင့် မီဒီယာကွန်ရက်။ ၂၀၂၆ ခုနှစ်၊ အောက်တိုဘာလ ၁၄ ရက်။ မြန်မာစစ်အုပ်စု၏ သစ္စာခံဖြစ်သော ကိုးကန့် ပြည်သူ့စစ်ခေါင်းဆောင် ဝေစန်း အပါအဝင် “ဝေ” မိသားစုဝင် ၃ ဦးကို ကျားဖြန့် အွန်လိုင်းငွေလိမ်လည်မှုနှင့် လူသတ်မှုများဖြင့် တရုတ်နိုင်ငံ တရားရုံးက သေဒဏ် အမိန့်ချမှတ် လိုက်ကြောင်း တရုတ်သတင်းဌာနများတွင် ဖော်ပြသည်။ တရုတ်နိုင်ငံ ဖူကျန့်ပြည်နယ် ခွမ်ကျိုးမြို့နှင့် နန်အန်းမြို့ ပြည်သူ့တရားရုံးတို့က အောက်တိုဘာလ ၁၃ ရက်နေ့ တွင် ပထမအကြိမ် စီရင်ချက် ချမှတ်ခဲ့ခြင်းဖြစ်ပြီး၊ သေဒဏ်ချမှတ်ခံရသူများမှာ ဝေစန်း (ခေါ်) ဝေဟွိုင်ရန်၊ ချန်တာဝေနှင့် လျောင်ကျင်းဖန်းတို့ ဖြစ်ကြသည်။ ထို့ပြင် တရားခံ ၃ ဦးကို ထောင်ဒဏ် တစ်သက်တစ်ကျွန်း ချမှတ်ခဲ့ပြီး ကျန်တရားခံ ၅၅ ဦးကိုလည်း ထောင်ဒဏ် ၃ နှစ်ကျော်မှ ၂၄ နှစ်အထိ အသီးသီး ချမှတ်ခဲ့သည်။ စစ်အုပ်စုလက်အောက်ခံ ကိုးကန့် ပြည်သူ့စစ်ခေါင်းဆောင် ဝေစန်းသည် ပြည်ထောင်စုကြံ့ခိုင်ရေးနှင့် ဖွံ့ဖြိုးရေး ပါတီ၏ ကိုးကန့်ဒေသ၊ ကုန်းကြမ်းမြို့နယ် ပြည်သူ့လွှတ်တော် ကိုယ်စားလှယ်တစ်ဦးလည်း ဖြစ်သည်။ တရားရုံး၏ စစ်ဆေးတွေ့ရှိချက်အရ ၎င်းတို့ ဦးဆောင်သော “ဝေ” မိသားစု ရာဇဝတ်ဂိုဏ်းသည် ၂၀၁၉ ခုနှစ် ကတည်းက လောက်ကိုင်မြို့တွင် ကျားဖြန့် အွန်လိုင်းငွေလိမ်လည်မှု၊ လောင်းကစား၊ ငွေညှစ်မှု၊ ပြည့်တန်ဆာ လုပ်ငန်းနှင့် မူးယစ်ဆေးဝါး ရောင်းဝယ်မှုများကို ကျူးလွန်ခဲ့ကြပြီး၊ တရုတ်ယွမ် ၁၂.၂ ဘီလီယံကျော် လိမ်လည် ခဲ့ကာ တရုတ်နိုင်ငံသားများကိုပါ သတ်ဖြတ်ခဲ့ကြကြောင်း ဖော်ပြထားသည်။ အထူးသဖြင့် “ဝေ” မိသားစုဝင် ချန်တာဝေက ၎င်းထိန်းချုပ်ထားသည့် လက်နက်ကိုင်အင်အားကို အသုံးပြုကာ သတ်ဖြတ်မှုများ ပြုလုပ်ခဲ့ရာ တရုတ်နိုင်ငံသားများ သေဆုံးခဲ့ရခြင်း ဖြစ်သည်ဟု တရုတ်က စွပ်စွဲသည်။ တရုတ်အစိုးရ၏ ဝရမ်းထုတ် ဖိအားပေးမှုများကြောင့် စစ်အုပ်စုက ၎င်းတို့၏ သစ္စာခံဖြစ်သူ ဝေစန်းအပါအဝင် ကိုးကန့် ခေါင်းဆောင်ပိုင်းများကို နေပြည်တော်မှတစ်ဆင့် တရုတ်လက်ထဲသို့ လွှဲပြောင်း အပ်နှံခဲ့ရခြင်း ဖြစ် သည်။ ကိုးကန့်ဒေသအတွင်း အွန်လိုင်းငွေလိမ်လည်မှု လုပ်ငန်းများနှင့် ဆက်နွှယ်သည့် ရာဇဝတ်ဂိုဏ်းများကို တရုတ် နိုင်ငံက စဉ်ဆက်မပြတ် အရေးယူလျက်ရှိရာ လွန်ခဲ့သည့် ဇန်နဝါရီလတုန်းကလည်း ကိုးကန့် “မြီ” မိသားစုဝင် ၁၁ ဦးကို တရုတ်တရားရုံးက သေဒဏ်ပေး ကွပ်မျက်ခဲ့ပြီး ဖြစ်သည်။ အလားတူ ပြီးခဲ့သည့် ၂၀၂၅ ခုနှစ် ဖေဖော်ဝါရီလကလည်း ကိုးကန့်ဒေသအခြေစိုက် “မင်” မိသားစုနှင့် ဆက်နွှယ် သူ ၂၃ ဦးကို ကျားဖြန့်နှင့် လူသတ်မှုများဖြင့် တရုတ်နိုင်ငံ၊ ဝင်ကျိုးမြို့တရားရုံးတွင် ရုံးတင် စစ်ဆေးခဲ့ဖူးသည်။ #Scammer

ကိုးကန့် ‘ဝေ’ မိသားစုခေါင်းဆောင် ဝေစန်း အပါအဝင် ၃ ဦးကို တရုတ်တရားရုံး သေဒဏ်ချမှတ်

ကိုးကန့် ‘ဝေ’ မိသားစုခေါင်းဆောင် ဝေစန်း အပါအဝင် ၃ ဦးကို တရုတ်တရားရုံး သေဒဏ်ချမှတ် သတင်းနှင့် မီဒီယာကွန်ရက်။၂၀၂၆ ခုနှစ်၊ အောက်တိုဘာလ ၁၄ ရက်။ မြန်…

  • October 14, 2026
စစ်တွေမြို့ဝင်ပေါက် ကာကင်းစခန်းများကို AA သိမ်းပိုက်၊ တိုက်ပွဲများ ဆက်လက်ပြင်းထန် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၁၄ ရက်။ ရခိုင်ပြည်၊ စစ်တွေမြို့အဝင် ဝန်းကျင်တွင် အာက္ခတပ်တော် (AA) နှင့် စစ်အုပ်စုတပ်တို့အကြား တိုက်ပွဲများ အပြင်းအထန် ဖြစ်ပွားနေပြီး၊ မြို့ဝင်ပေါက်ရှိ ကာကင်းစခန်းများနှင့် အမြင့်ကျွန်းဘက်မှ စခန်းများကို AA က ထိုးစစ်ဆင် သိမ်းပိုက်လိုက်ကြောင်း ဒေသခံ မြေပြင်သတင်းရင်းမြစ်များက ပြောသည်။ စစ်အုပ်စုတပ်သည် ပုဏ္ဏားကျွန်းဘက်သို့ စစ်ကြောင်း ၃ ကြောင်းဖြင့် ထိုးစစ်ဆင်ရန် ကြိုးပမ်းခဲ့သော်လည်း AA ၏ တန်ပြန်ထိုးစစ်ကြောင့် တပ်နောက်ပြန်ဆုတ်ခဲ့ရသည်။ ထို့နောက် အောက်တိုဘာလ ဒုတိယပတ်အတွင်း AA က စစ်တွေမြို့ဝင်ပေါက် အမြင့်ကျွန်းနှင့် ပါဒလိတ်အနီးရှိ စစ်အုပ်စု၏ ကာကင်းစခန်းများကို ထိုးစစ်ဆင် တိုက်ခိုက်ခဲ့ရာ အောက်တိုဘာလ ၁၀ ရက်နှင့် ၁၁ ရက်တို့တွင် စခန်း ၂ ခုကို သိမ်းပိုက်ရရှိခဲ့သည်။ စစ်ရေးအခြေအနေ သိရှိသူ မြေပြင်သတင်းရင်းမြစ် တစ်ဦးက “AA ဘက်က မင်းချောင်းတံတားကို ဖြတ်ကျော် ပြီး အမြင့်ကျွန်းရွာကို ဝန်းရံ ပိတ်ဆို့ထားတာပါ။ ဝိုင်းထားတာပေါ့နော်။ ဒီရွာပတ်ပတ်လည်မှာ အထိုင်ချထား တဲ့ စစ်တပ်စခန်း ၂ ခုကို သိမ်းပိုက်လိုက်နိုင်သလို၊ အမြင့်ကျွန်းကနေ ဒီဘက် ပါဒလိတ်ဆီ သွားတဲ့ လမ်းကြောင်း ပေါ်က စစ်တပ် ကာကင်းစခန်းတွေကိုလည်း AA ဘက်က ဆက်တိုက် ထိုးစစ်ဆင် ရယူထားပြီလို့ ပြောလို့ရ တယ်” ဟု ပြောသည်။ လက်ရှိတွင် အမြင့်ကျွန်းကျေးရွာအတွင်းရှိ ရဲစခန်းနှင့် ဘုန်းကြီးကျောင်းတို့၌ စစ်အုပ်စုတပ်ဖွဲ့ဝင်များ ကျန်ရှိနေ သေးပြီး၊ ပါဒလိတ်တပ်ရင်းဘက်မှလည်း လက်နက်ကြီးများဖြင့် ဆက်တိုက် ပစ်ကူပေးနေကြောင်း ဆိုသည်။ ထို့ပြင် AA သည် ဝါဘိုကျွန်းနှင့် ကံ့ကော်ကျွန်းအနီးအထိ ဝန်းရံပိတ်ဆို့ ထိုးစစ်ဆင်နေသလို စစ်တွေ ဒကစ အနီးဝန်းကျင်ကိုလည်း စတင်တိုက်ခိုက်နေပြီဖြစ်သည်။ တစ်ဖက်တွင်လည်း စစ်တွေ၊ ပုဏ္ဏားကျွန်းနှင့် ပေါက်တောမြို့နယ်အစပ်၊ ရွှေမင်းဂံ ရေတပ်စခန်းအနီးရှိ ငပြီကျွန်း ပေါ်သို့ စစ်အုပ်စုက ရေတပ်စစ်သင်္ဘောများ၊ အမြန်ရေယာဉ်များဖြင့် အင်အားအလုံးအရင်း သုံးကာ အသေခံ ကမ်းတက်ထိုးစစ်ဆင်နေသဖြင့် အောက်တိုဘာလ ၁၃ ရက်နေ့အထိ တိုက်ပွဲများ အပြင်းအထန် ဖြစ်ပွားနေဆဲဖြစ်သည်။ ငပြီကျွန်း စစ်မျက်နှာတွင် စစ်သားအလောင်း ၄၀ ခန့် ရရှိထားပြီး သုံ့ပန်းတချို့ကိုလည်း ဖမ်းဆီးရမိထားကြောင်း မြေပြင်သတင်းရင်းမြစ်များက ဆိုသည်။ ပေါက်တောဒေသခံတစ်ဦးက “ငပြီကျွန်း ဘက်မှာတော့ စစ်အုပ်စုက ကမ်းလုံးဝ မတက်နိုင်တာမျိုးလည်း မဟုတ်သလို ကျွန်းတစ်ခုလုံးကို ထိန်းချုပ်လိုက်နိုင်တာလည်း မဟုတ်ဘူး။ စစ်တွေဘက်ကနေ ရေတပ်နဲ့ လေ ကြောင်းပစ်ကူတွေ တောက်လျှောက် ပေးနေတယ်။ ဒါကြောင့် ဒီဘက်ကမ်းခြေတစ်လျှောက်မှာတော့ နှစ်ဖက် အပြန်အလှန် အပြင်းအထန် တိုက်ပွဲဖြစ်နေကြတုန်းပဲ” ဟု ပြောသည်။ မြေပြင်တွင် စစ်ရေးရှုံးနိမ့်မှုများနှင့် ရင်ဆိုင်နေရသော စစ်အုပ်စုတပ်သည် စစ်တွေမြို့ပေါ်မှနေ၍ လက်နက်ကြီး များ ပစ်ခတ်ခြင်းနှင့် လေကြောင်းမှ နေ့စဉ် ဗုံးကြဲတိုက်ခိုက်ခြင်းများကို လုပ်ဆောင်နေသည်။ ယခုကဲ့သို့ စစ်တွေမြို့ဝင်ပေါက် ကာကင်းစခန်းများနှင့် ငပြီကျွန်း စစ်မျက်နှာများတွင် တိုက်ပွဲများ ဆက်လက် ပြင်းထန်နေခြင်းကြောင့် စစ်အုပ်စုတပ်သည် စစ်ရေးအရ အထိနာကာ မြို့တွင်းမှနေ၍ လက်နက်ကြီးများနှင့် လေကြောင်း တိုက်ခိုက်မှုများကို ပိုမိုလုပ်ဆောင်လာနေပြီး အရပ်သား ထိခိုက်မှု အခြေအနေများကိုပါ ဆက် လက် စောင့်ကြည့်နေရဆဲ ဖြစ်သည်။ #စစ်တွေမြို့

စစ်တွေမြို့ဝင်ပေါက် ကာကင်းစခန်းများကို AA သိမ်းပိုက်၊ တိုက်ပွဲများ ဆက်လက်ပြင်းထန်

စစ်တွေမြို့ဝင်ပေါက် ကာကင်းစခန်းများကို AA သိမ်းပိုက်၊ တိုက်ပွဲများ ဆက်လက်ပြင်းထန် သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၁၄ ရက်။ ရခ…

  • October 14, 2026
မကွေးတိုင်း မင်းတုန်းတွင် ဆုတ်ပြေးရသော စစ်တပ်က လေကြောင်းမှ ဗုံးကြဲသဖြင့် အရပ်သား ၃ ဦး သေဆုံး သတင်းနှင့် မီဒီယာကွန်ရက်။ ၂၀၂၆ ခုနှစ်၊ အောက်တိုဘာလ ၁၄ ရက်။ မကွေးတိုင်းနှင့် ရခိုင်ပြည် အစပ်ဖြစ်သော မင်းတုန်းမြို့နယ် တလိုင်းတောင် လမ်းပိုင်း၌ ဖြစ်ပွားသော တိုက်ပွဲများ အတွင်း စစ်အုပ်စုတပ်ဘက်မှ အထိနာကာ စစ်သုံ့ပန်းများ ဖမ်းဆီးခံရပြီးနောက် ကျေးရွာများကို လေကြောင်းမှ ဗုံးကြဲတိုက်ခိုက်ခဲ့သဖြင့် ကလေးငယ် တစ်ဦးအပါအဝင် အရပ်သား ၃ ဦး သေဆုံးခဲ့သည်။ အောက်တိုဘာလ ၈ ရက်နေ့မှစ၍ ဖြစ်ပွားခဲ့သော တိုက်ပွဲများအတွင်း စစ်ကြောင်းထိုးလာသည့် စစ်အုပ်စုတပ်ကို အာရက္ခတပ်တော် (AA) ပူးပေါင်းတပ်က ကြားဖြတ် တိုက်ခိုက်ခဲ့ရာ စစ်အုပ်စုဘက်မှ အကျအဆုံး များပြားခဲ့ သည့်အပြင် အောက်တိုဘာလ ၁၃ ရက်နေ့အထိ စစ်သုံ့ပန်း ၁၂ ဦးထက်မနည်း အရှင်ဖမ်းဆီးရမိခဲ့သည်။ ဖမ်းဆီးရမိသူ အများစုမှာ စိတ်ကြွဆေးပြား အလွန်အကျွံ သုံးစွဲခိုင်းပြီး ရှေ့ဆုံးမှ တက်ခိုင်းခံရသည့် ပြည်သူ့ စစ်များ ဖြစ်ကြသည်ဟု မြေပြင်သတင်းရင်းမြစ်က ပြောသည်။ ထိုသို့ မြေပြင်တွင် အထိနာ၍ ဆုတ်ပြေးရသည့် စစ်အုပ်စုတပ်သည် ရခိုင်ရိုးမအစပ်ရှိ ကျေးရွာများကို လေကြောင်းမှ ရည်ရွယ်ချက်ရှိရှိ ပစ်မှတ်ထား ဗုံးကြဲတိုက်ခိုက်မှုများ ပြုလုပ်လာခဲ့သည်။ အောက်တိုဘာလ ၁၂ ရက်နေ့တွင် မင်းတုန်းမြို့နယ်၊ မဲဇလီကျေးရွာသို့ စက်တပ်လေထီး (ပါရာမော်တာ) ဖြင့် ဗုံးသီး ၈ လုံး ကြဲချခဲ့သဖြင့် အသက် ၄၀ အရွယ် မဲဇလီကျေးရွာသား ကိုစည်သူ သေဆုံးခဲ့သည်။ အလားတူ အောက်တိုဘာလ ၈ ရက်နေ့ကလည်း ချင်းနစ်ကျေးရွာသို့ ဗုံးသီး ၉ လုံး ကြဲချကာ လက်နက်ငယ် များဖြင့် ပစ်ခတ်ခဲ့သဖြင့် အသက် ၈၃ နှစ်အရွယ် ဦးထွန်းတင်နှင့် အသက် ၁၂ နှစ်အရွယ် မောင်ဝေယံဦးတို့ နေရာ၌ပင် သေဆုံးခဲ့ရပြီး အခြား ဒေသခံ ၃ ဦး ဒဏ်ရာရရှိခဲ့သည်။ မင်းတုန်းဒေသခံ စစ်ရေးသတင်းအရင်းအမြစ် အမျိုးသားတစ်ဦးက “လက်ရှိ တလိုင်းတောင်-မင်းတုန်းလမ်း ပိုင်းမှာ တိုက်ပွဲတွေရှိတော့ မဲဇလီကျေးရွာအပါအဝင် ချင်းနစ်ကျေးရွာကိုပါ စစ်တပ်က ဗုံးကြဲလို့ သေဆုံးတာ တွေ ရှိတယ်။ တချို့ရွာတွေက တော်လှန်ရေးတပ်တွေ မရှိလဲ စစ်တပ်ကဗုံးကြဲနေတယ်၊ ဒေသခံတွေအများစုက ရှောင်နေတယ်၊ ဒါပေမယ့်တချို့က စားဝတ်နေရေးအရမရှောင်နိုင်တာတွေရှိတယ်၊ ဒီအခြေအနေမှာ ဒေသခံ ရွာသားတွေ၊ စစ်ရှောင်တွေထိတော့တာပဲ” ဟု ပြောသည်။ ထို့ပြင် မကွေးတိုင်း၊ မြိုင်မြို့နယ်နှင့် ပေါက်မြို့နယ်အစပ် တဲကြီးရွာတွင် အထိုင်ချထားသည့် စစ်အုပ်စုတပ်ကို လည်း တော်လှန်ရေး ပူးပေါင်းတပ်များက ဝိုင်းဝန်း ပိတ်ဆို့ထားရာ အောက်တိုဘာလ ၁၂ ရက်နေ့ တိုက်ပွဲအတွင်း စစ်ကြောင်းမှူး အပါအဝင် စစ်အုပ်စုဘက်မှ ထိခိုက်သေဆုံးမှု များပြားခဲ့ကြောင်း ဆိုသည်။ မင်းတုန်းဒေသခံ စီးပွားရေးလုပ်ငန်းရှင်တစ်ဦးကလည်း “မင်းတုန်းနဲ့ ရခိုင်ဘက်ကို စီးပွားကုန်သွယ်တာရော အေအေက တချို့နေရာတွေ စိုးမိုးလာတာတွေကြောင့် စစ်တပ်က စစ်ကြောင်းတွေထိုး ဗုံးတွေကြဲလုပ်နေတာပါ၊ လောလောဆယ် စီးပွားကုန်သွယ်ရေးကတော့ ပျက်စီးသွားပြီး စစ်ရှောင်နဲ့ ဒေသခံတွေ တော်တော် ခက်ခဲနေ တယ်။ မင်းတုန်းမှာ စစ်တပ်က မတရားဖမ်းတာတွေလည်း ရှိတယ်။ ကုန်သည်တွေကို စုံစမ်း စစ်ဆေးတယ်၊ ရခိုင်ဘက်ကဆို မလွယ်ဘူး” ဟု ပြောသည်။ ရခိုင်ပြည်ဘက်သို့ ထိုးစစ်ဆင်ရန် ကြိုးပမ်းနေသည့် စစ်အုပ်စုသည် စက်တင်ဘာလဆန်းပိုင်းမှစ၍ မင်းတုန်းမြို့ နယ်အတွင်းရှိ စခန်း ၁၄ ခုထက်မနည်း လက်လွှတ်ထားရပြီး စစ်ရေးအရ အထိနာနေချိန်တွင် အရပ်သားများ နေထိုင်ရာ ကျေးရွာများကို အကဲဆတ်စွာ ပစ်မှတ်ထား တိုက်ခိုက်နေခြင်းဖြစ်သည်။ ဓါတ်ပုံ - Crd #မင်းတုန်းမြို့နယ်

မကွေးတိုင်း မင်းတုန်းတွင် ဆုတ်ပြေးရသော စစ်တပ်က လေကြောင်းမှ ဗုံးကြဲသဖြင့် အရပ်သား ၃ ဦး သေဆုံး

မကွေးတိုင်း မင်းတုန်းတွင် ဆုတ်ပြေးရသော စစ်တပ်က လေကြောင်းမှ ဗုံးကြဲသဖြင့် အရပ်သား ၃ ဦး သေဆုံး သတင်းနှင့် မီဒီယာကွန်ရက်။၂၀၂၆ ခုနှစ်၊ အောက်တိုဘာလ ၁၄ ရ…

  • October 14, 2026
ကချင်ပြည် ဗန်းမော်တွင် KBC ဘုရားကျောင်းကို စစ်အုပ်စု မီးရှို့၊ တိုက်ပွဲများ ဆက်လက်ပြင်းထန် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၁၄ ရက်။ ကချင်ပြည်၊ ဗန်းမော်မြို့ပေါ်ရှိ KBC ခရစ်ယာန်ဘုရားကျောင်းနှင့် ပြည်သူ့နေအိမ်များကို စစ်အုပ်စုတပ်က မီးရှို့ဖျက်ဆီးခဲ့ပြီး ကချင်လွတ်လပ်ရေးတပ်မတော် (KIA) နှင့် တိုက်ပွဲများ ဆက်လက် ပြင်းထန်နေသည်။ ဗန်းမော်ရှိ (၃) မိုင်ရွာအတွင်း တပ်စွဲထားသော စစ်အုပ်စု တပ်မ ၃၃ နှင့် တပ်မ ၈၈ လက်အောက် ခံ တပ်ဖွဲ့ဝင်များသည် အောက်တိုဘာလ ၁၂ ရက်၊ မွန်းလွဲ ၃ နာရီခွဲခန့်တွင် ကချင်နှစ်ခြင်းခရစ်ယာန်အဖွဲ့ချုပ် (KBC) ဘုရားကျောင်းနှင့် ပြည်သူ့နေအိမ်များကို မီးရှို့ဖျက်ဆီးခဲ့ခြင်းဖြစ်သည်။ မြေပြင်သတင်းရင်းမြစ် တာဝန်ရှိသူတစ်ဦးက “ဗန်းမော် ၃ မိုင်ရွာထဲက KBC ဘုရားကျောင်းနဲ့ ပြည်သူတွေရဲ့ အိမ်တွေကို စစ်တပ်က တမင်မီးရှို့ဖျက်ဆီးသွားတာပါ။ အိမ်ခြေ ဘယ်လောက်အထိ မီးလောင်ပြာကျသွား တယ်ဆိုတာကိုတော့ သေချာမသိဘူး။ စစ်တပ်က ရှိနေသေးတာရောကြောင့် အတိအကျ စိစစ်လို့ မရသေးပါ ဘူး” ဟု ပြောသည်။ ထို့ပြင် မန္တလေးဘက်မှ လက်နက်ခဲယမ်းများ တင်ဆောင်လာသည့် စစ်အုပ်စု၏ စစ်ယာဉ်တန်း အစီး ၁၃၀ အနက် ၇၈ စီးခန့်သည် အောက်တိုဘာလ ၁၂ ရက်၊ ညနေပိုင်းတွင် မြစ်ကြီးနားမြို့အတွင်းသို့ ဝင်ရောက်လာပြီး အင်အားနှင့် လက်နက်ခဲယမ်းများ ဆက်တိုက် ဖြည့်တင်းလျက်ရှိသည်။ တစ်ဖက်တွင်လည်း ရွှေကူဒေသနှင့် ရှမ်းပြည်မြောက်ပိုင်း မိုးမိတ်-မဘိမ်း လမ်းပိုင်းတို့၌ စစ်အုပ်စုက အင်အား အများအပြားဖြင့် စစ်ကြောင်းထိုးလာသဖြင့် တိုက်ပွဲများ ဆက်တိုက် ပြင်းထန်နေပြီး၊ KIA ပူးပေါင်းတပ်များက စစ်အုပ်စုထံမှ လက်နက်ခဲယမ်းအချို့ သိမ်းဆည်းရမိခဲ့သည်။ စစ်အုပ်စု၏ လေကြောင်း၊ လက်နက်ကြီး ပစ်ကူများနှင့် ထိုးစစ်များကြောင့် KIA ဘက်က ရွှေကူ-ငါးအိုး လမ်းမ ကြီးကို ပိတ်ထားရပြီး ပြည်သူများအနေဖြင့် KIO/KIA က သတ်မှတ်ပေးထားသည့် ဘေးကင်းသော လမ်းကြောင်းအတိုင်းသာ သတိပြု သွားလာကြရန် သတိပေး နှိုးဆော်ထားသည်။ အလားတူ စစ်အုပ်စုသည် ကချင်ပြည်သာမက ချင်းပြည်တွင်လည်း ဘာသာရေး အဆောက်အအုံများကို ပစ်မှတ် ထား ဗုံးကြဲမှုများ ဆက်တိုက် ပြုလုပ်နေသည်။ ပြီးခဲ့သည့် အောက်တိုဘာလ ၉ ရက်၊ မွန်းလွှဲ ၂ နာရီခွဲခန့်က မင်းတပ်မြို့ပေါ်ရှိ ခရစ်ယာန် ဘုရားကျောင်းဝင်း အတွင်းသို့ စစ်အုပ်စု တိုက်လေယာဉ်က ပေါင် ၅၀၀ ဗုံးတစ်လုံး ကြဲချဖျက်ဆီးခဲ့သည်။ စစ်အာဏာသိမ်းပြီးနောက်ပိုင်း ချင်းပြည်၊ ကချင်ပြည်၊ ကရင်နီနှင့် ကရင်ပြည်တို့အပါအဝင် နိုင်ငံတစ်ဝန်းရှိ ခရစ်ယာန် ဘာသာရေး အဆောက်အအုံများ စဉ်ဆက်မပြတ် ပစ်မှတ်ထား တိုက်ခိုက်ခံနေရသည့် စစ်အုပ်စု၏ လုပ်ရပ်များကို ‘စစ်ရာဇဝတ်မှုနှင့် လူသားမျိုးနွယ်အပေါ် ကျူးလွန်သည့် ရာဇဝတ်မှု’ အဖြစ် သတ်မှတ်ပေးရန် မြန်မာ့သုတေသနအဖွဲ့ (Burma Research Institute - BRI) က အမေရိကန် အစိုးရအဖွဲ့ထံ အောက်တိုဘာလ ၁၂ ရက်နေ့တွင် တိုက်တွန်း တောင်းဆိုထားသည်။ ဓာတ်ပုံ - (စစ်အုပ်စုတပ်၏ မီးရှို့ဖျက်ဆီးမှုကြောင့် ပျက်စီးခဲ့ရသည့် ဗန်းမော်ရှိ KBC ဘုရားကျောင်း။ / EEDY) #ဗန်းမော်မြို့ #KBCဘုရားကျောင်း

ကချင်ပြည် ဗန်းမော်တွင် KBC ဘုရားကျောင်းကို စစ်အုပ်စု မီးရှို့၊ တိုက်ပွဲများ ဆက်လက်ပြင်းထန်

ကချင်ပြည် ဗန်းမော်တွင် KBC ဘုရားကျောင်းကို စစ်အုပ်စု မီးရှို့၊ တိုက်ပွဲများ ဆက်လက်ပြင်းထန် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၁၄ ရ…

  • October 14, 2026
×Close