သတင်း

မြစ်ဆုံစီမံကိန်းကို ပြည်သူ သဘောမတူက ပြည်သူ့သဘောထားအတိုင်း ရပ်တည်မည်ဟု KIO ပြော သတင်းနှင့် မီဒီယာ ကွန်ရက်။| ၂၀၂၆ ခုနှစ်၊ အောက်တိုဘာလ ၉ ရက် မြစ်ဆုံ ရေအားလျှပ်စစ် စီမံကိန်း အပါအဝင် လူထု ထောက်ခံမှု မရှိသည့် မည်သည့် စီမံကိန်းမျိုးကိုမဆို ပြည်သူ လူထု၏ သဘောထားအတိုင်းသာ ရပ်တည်သွားမည်ဟု ကချင်လွတ်လပ်ရေးအဖွဲ့ (KIO/KIA) က ပြောဆိုလိုက် သည်။ ကချင်ပြည်အတွက်သာမက မြန်မာတစ်နိုင်ငံလုံး၏ ဂေဟစနစ်၊ လူမှုစီးပွားဘဝနှင့် အမျိုးသား လုံခြုံရေးကိုပါ ထိခိုက်လာနိုင်သည့် ဧရာဝတီ မြစ်ဆုံ ရေအားလျှပ်စစ် စီမံကိန်းကို ပြန်လည်စတင်နိုင်ရန် စစ်အုပ်စုက စည်းရုံး လှုံ့ဆော်မှုများ အရှိန်မြှင့် ဆောင်ရွက်လာသည့်အပေါ် KIO/KIA က ထိုသို့ ပြောဆိုလိုက်ခြင်းဖြစ်သည်။ KIO/KIA ပြောရေးဆိုခွင့်ရှိသူ ဗိုလ်မှူးကြီးနော်ဘူက “မြစ်ဆုံ တရုတ်ရဲ့ မြစ်ဆုံစီမံကိန်းကို ကျနော်တို့ KIO က တော့ အဓိကကတော့ ပြည်သူလူထု ဖြစ်ပါတယ်။ ပြည်သူလူထု သဘောမတူတဲ့ဟာတွေဆိုရင်တော့ ကျနော်တို့ KIO ဘာမှ မလုပ်ပါဘူး။ ကျနော်တို့ KIO က ပြည်သူလူထုကိုယ်စား ဖြစ်နေပါတယ်” ဟု ပြောသည်။ KIO/KIA သည် ပြည်သူထံမှ ပေါက်ဖွားလာသည့် အဖွဲ့အစည်းဖြစ်သဖြင့် ပြည်သူများ၏ သဘောထားအတိုင်း သာ ဆက်လက် ရပ်တည်သွားမည်ဖြစ်ကြောင်း ဗိုလ်မှူးကြီးနော်ဘူက ဆက်ပြောသည်။ “ဒါကြောင့် KIO က ပြည်သူလူထု မထောက်ခံတဲ့ လုပ်ငန်းတွေ၊ သဘောမတူတဲ့ လုပ်ငန်းတွေကို ကျနော်တို့ မလုပ်ပါဘူး။ ဒါကြောင့် အခုလည်း ပြည်သူလူထုတွေ မထောက်ခံလို့ရှိရင်တော့ ကျနော်တို့လည်း ထောက်ခံမှာ မဟုတ်ဘူးနော်။” ပြီးခဲ့သည့် ဇွန်လအတွင်းက စစ်အုပ်စုခေါင်းဆောင် မင်းအောင်လှိုင်နှင့် ကချင်ပြည် ဝန်ကြီးချုပ် ဦးခက်ထိန်နန်တို့ အဖွဲ့ တရုတ်နိုင်ငံသို့ သွားရောက်ခဲ့ပြီးနောက် စစ်အုပ်စုက မြစ်ဆုံစီမံကိန်းကို ၈ နှစ်ခွဲအတွင်း အပြီး တည်ဆောက် ရန် တရုတ်နိုင်ငံနှင့် သဘောတူထားကြောင်း အကြောင်းပြကာ ဒေသခံ ပြည်သူများကို စည်းရုံးရေး လုပ်ဆောင် လာခြင်း ဖြစ်သည်။ ထိုသို့ စစ်အုပ်စု၏ စည်းရုံးလှုံ့ဆော်နေသည့် အခြေအနေများနှင့် ပတ်သက်၍ ကချင်လူ့အခွင့်အရေးအဖွဲ့ (KHRW) ပြောရေးဆိုခွင့်ရှိသူ ဂျေကော့က ယခုကဲ့သို့ ပြောသည်။ “မြစ်ဆုံရေကာတာ စီမံကိန်းကို အကောင်အထည်ဖော်ရန် ဆက်လက်ပြီးမှ ပြည်သူလူထုတွေကို စည်းရုံးလုပ် ဆောင်နေတာကို တွေ့ရတယ်။ သူတို့ အပြင်းအထန် ကြိုးစားနေတာတွေ့ရတယ်။ ဒီမြေပြင်မှာဆိုရင် ပြည်သူ လူထုတွေကို စည်းရုံးရေး အပြင်းအထန် လုပ်ဆောင်နေတာ တွေ့ရတယ်။ ပြီးတော့ ဒီ တရုတ်ရဲ့ ထောက်ခံမှု ရရှိရန်အတွက် ဆက်လက်ပြီးမှ သူတို့ လူထုစည်းရုံးတွေ တခြားနည်းလမ်းတွေပေါ့နော် သူတို့ လုပ်ဆောင်နေ တာကို တွေ့ရပါတယ်ဗျ။” အခြားတစ်ဖက်တွင်လည်း စစ်အုပ်စုတပ်က စီမံကိန်းများကို အထောက်အထား မခိုင်လုံဘဲ ဆန့်ကျင် ကန့်ကွက် ပါက ဖမ်းဆီး အရေးယူမည်ဟု ၂၀၂၅ ခုနှစ်၊ ဒီဇင်ဘာလ ၁၉ ရက်နေ့က အမိန့်ထုတ်ပြန်ကာ ထိန်းချုပ်ရန် ကြိုးပမ်းထားသည်။ ထိုသို့ စစ်အုပ်စုတပ်၏ ဖမ်းဆီးအရေးယူမည်ဆိုသည့် ခြိမ်းခြောက်မှုများ ရှိနေသော်လည်း မြစ်ဆုံ ရေအားလျှပ် စစ် စီမံကိန်း ရပ်တန့်သွားသည်အထိ ဆက်လက် ဆန့်ကျင် ကန့်ကွက်သွားမည်ဟု KHRW ပြောရေးဆိုခွင့်ရှိသူ ဂျေကော့က ပြောသည်။ ၎င်းက “မြစ်ဆုံရေကာတာ စီမံကိန်း အမြန်ဆုံး ရပ်တန့်ဖို့ ပြည်သူလူထုတွေနဲ့အတူ ဆက်လက်ပြီးမှ ပူးပေါင်း ပါဝင်ပြီးမှ လုပ်ဆောင်သွားဖို့ ရှိပါတယ်။ မြစ်ဆုံရေကာတာ စီမံကိန်းကို အမြန်ဆုံး ရပ်တန့်ဖို့ လိုအပ်ပါတယ်။ ဆက်လက်ပြီးမှ လုပ်ဆောင်နေရင်တော့ ပြည်သူလူထုတွေရဲ့ ကန့်ကွက်မှုတွေ ပိုပြီးမှ မြှင့်တက်လာမှာ ဖြစ်ပါ တယ်။ ပြီးတော့ နောက်တစ်ခုကတော့ နိုင်ငံရေး အရှုပ်အထွေးတွေ၊ နိုင်ငံရေး ပဋိပက္ခတွေ ပိုပြီးမှ များလာနိုင် ပါတယ်” ဟု ပြောသည်။ ထိုကဲ့သို့ ခြိမ်းခြောက်မှုများကြားမှပင် ဝိုင်းမော်ဒေသခံ ၁၀၀ နီးပါးသည် စက်တင်ဘာလ ၂၆ ရက် (ကမ္ဘာ့မြစ် ချောင်းများနေ့) က မေခနှင့် မလိခမြစ် ပေါင်းဆုံရာ မြစ်ဆုံအထက်၌ စုဝေးကာ ‘NO Myitsone Dam’၊ ‘ဧရာဝတီကို ကာကွယ်ကြစို့’ နှင့် ‘ပြည်သူ့အသံကို နားထောင်ပါ’ စသည့် စာသားများကို ကိုင်ဆောင်၍ မြစ်ဆုံ စီမံကိန်း ပြန်လည်စတင်ရေးကို ငြိမ်းချမ်းစွာ ဆန့်ကျင် ဆန္ဒထုတ်ဖော်ခဲ့ကြသည်။ လွန်ခဲ့သည့် ၁၅ နှစ်ကတည်းက ပြည်သူ့ ကန့်ကွက်မှုကြောင့် ရပ်နားထားရသည့် မြစ်ဆုံ ရေအားလျှပ်စစ် စီမံကိန်းတွင် ချီဖွေဆည်၊ လိုင်ဇာ (မလိယန်) ဆည်၊ အူဆောက်ဆည်၊ ခေါင်လန်ဖူးဆည်၊ ရီနန်ဆည်၊ ဖီဆော် ဆည်နှင့် ဧရာဝတီ မြစ်ဆုံဆည် အပါအဝင် ဆည် ၇ ခု ပါဝင်ပြီး၊ စစ်အုပ်စုက ပြန်လည် အသက်သွင်းရန် ကြိုး ပမ်းလာမှုကြောင့် ကချင်ပြည်အတွင်း လူထု ကန့်ကွက်ဆန့်ကျင်မှုနှင့် နိုင်ငံရေး ရိုက်ခတ်မှုများ ပိုမို ပြင်းထန်လာ နေသည်။ ဓါတ်ပုံ - (ပေးပို့ / ကမ္ဘာ့မြစ်ချောင်းများနေ့တွင် မြစ်ဆုံစီမံကိန်း ပြန်လည်စတင်ရေးကို ဝိုင်းမော်ဒေသခံများ ကန့်ကွက်ဆန္ဒထုတ်ဖော်ကြစဉ်။) #မြစ်ဆုံစီမံကိန်း

မြစ်ဆုံစီမံကိန်းကို ပြည်သူ သဘောမတူက ပြည်သူ့သဘောထားအတိုင်း ရပ်တည်မည်ဟု KIO ပြော

မြစ်ဆုံစီမံကိန်းကို ပြည်သူ သဘောမတူက ပြည်သူ့သဘောထားအတိုင်း ရပ်တည်မည်ဟု KIO ပြော သတင်းနှင့် မီဒီယာ ကွန်ရက်။|၂၀၂၆ ခုနှစ်၊ အောက်တိုဘာလ ၉ ရက် မြစ်ဆုံ…

  • October 9, 2026
မကွေးတိုင်း မင်းတုန်းတွင် စစ်သုံ့ပန်းများရှိသည့် ရွာကို စစ်အုပ်စု ဗုံးကြဲ၍ ကလေးငယ်အပါအဝင် ၂ ဦး သေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၉ ရက်။ မကွေးတိုင်း၊ သရက်ခရိုင်၊ မင်းတုန်းမြို့နယ်နှင့် ကံမမြို့နယ်အစပ်ရှိ စစ်သုံ့ပန်းများ ထိန်းသိမ်းထားသည့် ချင်းနစ် ကျေးရွာကို စစ်အုပ်စုတပ်က ပါရာမော်တာဖြင့် ဗုံးကြဲတိုက်ခိုက်ခဲ့သဖြင့် ၁၂ နှစ်အရွယ် ကလေးငယ်တစ်ဦး အပါအဝင် အရပ်သား ၂ ဦး သေဆုံးခဲ့ကြောင်း ဒေသခံများက ပြောသည်။ အောက်တိုဘာလ ၈ ရက်နေ့၊ ညနေ ၆ နာရီခန့်တွင် စစ်အုပ်စုတပ်က လေကြောင်းမှ ပါရာမော်တာဖြင့် ဗုံးကြဲခဲ့ ခြင်းဖြစ်ပြီး၊ တိုက်ခိုက်မှုကြောင့် အသက် ၈၃ နှစ်အရွယ် အဖိုးအိုတစ်ဦး၊ အသက် ၁၂ နှစ်အရွယ် ကလေးတစ်ဦး နှင့် နွား ၇ ကောင် သေဆုံးခဲ့သည့်အပြင် ကျေးရွာ ဆေးပေးခန်းနှင့် ပြည်သူ့နေအိမ် အများအပြား ပျက်စီးသွားခဲ့ သည်။ အိမ်ခြေ ၁၀၀ ခန့်ရှိသည့် ချင်းနစ်ကျေးရွာသည် မင်းတုန်းမြို့နယ် နယ်ဆုံး၌ တည်ရှိပြီး ကံမမြို့နယ်နှင့် ကျေးရွာ ချင်းဆက် လမ်းပေါ်တွင် တည်ရှိသော တော်လှန်ရေးတပ်များ စိုးမိုးထားသည့် နယ်မြေဖြစ်သည်။ အသက် ၄၀ အရွယ် ဒေသခံ အမျိုးသမီးတစ်ဦးက “အဲဒီမှာ ဖမ်းမိထားတဲ့ အကောင်တွေ လာထားတယ်လို့ သတင်းသဲ့သဲ့ ကြားနေတာ ကြာပြီ။ ဘယ်နေရာလဲ၊ ဘယ်လောက်လဲတော့ မသိဘူး၊ မလေ့လာရဲဘူး” ဟု ပြော သည်။ ချင်းနစ်ကျေးရွာနှင့် ၂ မိုင်ခန့်အကွာ နယ်မြေချင်း ထိစပ်နေသည့် ကျောက်ပဒေါင်းကျေးရွာကိုလည်း အောက်တို ဘာလ ၄ ရက်နေ့၊ ညပိုင်းက စစ်အုပ်စုက ကာမီကာဇေဒရုန်းဖြင့် တိုက်ခိုက်ခဲ့သဖြင့် ခိုင်းနွားတစ်ကောင် သေဆုံးကာ အရပ်သား နေအိမ်မီးဖိုဆောင် ပျက်စီးခဲ့ရသည်။ ထို့ပြင် စက်တင်ဘာလလယ်မှ အောက်တိုဘာလ ၉ ရက်နေ့အထိ လူနေထူထပ်သည့် မဲဇလီကျေးရွာ မြောက် ခြမ်း၊ ကြပ်ကြီးကျေးရွာ၊ ဇွန်းကျဆင်လုပ်သားကျေးရွာနှင့် ကြို့ဝကျေးရွာတို့ကိုလည်း စစ်အုပ်စုက ဂျက်ဖိုက်တာ၊ ပါရာမော်တာများဖြင့် ဗုံးကြဲဖျက်ဆီးနေသဖြင့် ဒေသခံများ ဘေးလွှတ်ရာသို့ တိမ်းရှောင်ပြေးလွှားနေကြရသည်။ လက်ရှိတွင် သရက်ခရိုင် တပ်ရင်း (၄) ကလည်း ဒေသခံပြည်သူများ လေကြောင်းအန္တရာယ်ကို အထူးသတိပြု ကြရန် တိုက်တွန်း နှိုးဆော်ထားသည်။ ဓါတ်ပုံ - (Crd / ချင်းနစ်ကျေးရွာပုံ) #မင်းတုန်းမြို့နယ် #ကံမမြို့နယ်

မကွေးတိုင်း မင်းတုန်းတွင် စစ်သုံ့ပန်းများရှိသည့် ရွာကို စစ်အုပ်စု ဗုံးကြဲ၍ ကလေးငယ်အပါအဝင် ၂ ဦး သေဆုံး

မကွေးတိုင်း မင်းတုန်းတွင် စစ်သုံ့ပန်းများရှိသည့် ရွာကို စစ်အုပ်စု ဗုံးကြဲ၍ ကလေးငယ်အပါအဝင် ၂ ဦး သေဆုံး သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တ…

  • October 9, 2026
စစ်တွေ အနီးက ငပြီကျွန်းသို့ စစ်အုပ်စု ကမ်းတက်ရန် ကြိုးပမ်းစဉ် ရေယာဉ်များ လက်နက်ကြီးထိမှန်၍ နောက်ဆုတ်ရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၉ ရက်။ ရခိုင်ပြည်၊ စစ်တွေမြို့နှင့် ပေါက်တောမြို့နယ်အကြား အာရက္ခတပ်တော် (AA) ထိန်းချုပ်ထားသည့် ငပြီကျွန်းကို စစ်အုပ်စုက ကြည်း၊ ရေ၊ လေ ပစ်ကူများ အသုံးပြု၍ ကမ်းတက်ရန် ကြိုးပမ်းစဉ် နှစ်ကြားတိုက်ပွဲ အပြင်းအထန် ဖြစ်ပွားနေပြီး စစ်အုပ်စု ရေယာဉ်အချို့ လက်နက်ကြီး ထိမှန်ခဲ့ကြောင်း ဒေသခံ စစ်ရေးသတင်း အရင်းအမြစ်များ က ပြောသည်။ စစ်တွေမြို့ အရှေ့ဘက် ကုလားတန်မြစ်အတွင်းရှိ ငပြီကျွန်းကို အောက်တိုဘာလ ၇ ရက်နှင့် ၈ ရက်နေ့များတွင် စစ်အုပ်စုက ကမ်းတက်နိုင်ရန် ကြိုးစားခဲ့ခြင်းဖြစ်ပြီး၊ အောက်တိုဘာလ ၉ ရက် နံနက်ပိုင်းအထိ တိုက်ပွဲများ ပြင်းထန်လျက်ရှိသည်။ အဆိုပါ တိုက်ပွဲအတွင်း ကမ်းတက်ရန် ကြိုးစားနေသည့် ရေယာဉ်အုပ်စုကို AA က လက်နက်ကြီးဖြင့် ပြန်လည် ပစ်ခတ်ခဲ့သဖြင့် စစ်ရေယာဉ် ၂ စင်း ထိမှန်ကာ မီးခိုးများ ထွက်သွားပြီးနောက် နောက်ဆုတ်သွားခဲ့ရသည်။ စစ်တွေဒေသခံ စစ်ရေးသတင်းအရင်းအမြစ် အမျိုးသားတစ်ဦးက “အောက်တိုဘာ ၇ ရက် ညဘက်မှာ ကုလား တန်မြစ်ထဲက ငပြီကျွန်းကို ကမ်းတက်ဖို့ စစ်တပ် ရေယာဉ် ၉ စင်း ပြင်ဆင်လာခဲ့တာလို့ သိရတယ်။ တပ်စိပ် ၂ ခုလောက်က ကမ်းကို မရမကတက်တာ AA လက်ထဲ ရောက်သွားတယ်။ အခု ၃၀ ကျော်လောက် သေတယ်လို့ သိရတယ်။ စစ်နေဗီ အနည်းဆုံး ၂ စင်းလောက်ကို AA က လက်နက်ကြီးနဲ့ ပစ်ခတ်လို့ မီးခိုးတွေ ထွက်နေတယ်။ စစ်တွေမြို့ပေါ်ကပါ အသံတွေ ကြားရတယ်။ ဒီနေ့ အောက်တိုဘာ ၉ ရက် မနက် ၆ နာရီလောက်ကစလို့ Y-12 တွေနဲ့ ငပြီကျွန်းကို စစ်တပ် ဗုံးကြဲနေတယ်” ဟု ပြောသည်။ ကမ်းတက်ရန် ကြိုးပမ်းမှု ပျက်ပြားသွားပြီးနောက် စစ်အုပ်စုသည် ငပြီကျွန်းပေါ်သို့ စစ်တွေမြို့ရှိ ရွှေမင်းဂံ ရေတပ်စခန်းမှ အမြောက်များဖြင့် ပစ်ခတ်မှုများ လုပ်ဆောင်သည့်အပြင် Y-12 လေယာဉ်များဖြင့် ဗုံးအလုံးရေ ၅၀ ထက်မနည်း အပြင်းအထန် ကြဲချလျက်ရှိသည်။ အခြား ဒေသခံ အမျိုးသားတစ်ဦးကလည်း “နေဗီတွေ လက်နက်ကြီး ကျည်ထိမှန်သွားတဲ့အတွက် စစ်တပ် ရေ ယာဉ်တွေ နောက်ဆုတ်သွားခဲ့ရပြီးနောက် ငပြီကျွန်းပေါ်ကို စစ်တပ်က ဗုံးအလုံးရေ ၅၀ ထက်မနည်း ကြဲချနေ တယ်။ ငပြီကျွန်းကို ကြည်း၊ ရေ၊ လေ ပစ်ကူတွေ အသုံးပြုပြီး အောက်တိုဘာ ၇ ရက်၊ ၈ ရက်တွေမှာ ကမ်း တက်ဖို့ ကြိုးစားခဲ့တာပါ။ စစ်တွေမြို့ပေါ်မှာ စစ်ရေးပြင်ဆင်တာတွေ၊ အင်အားဖြည့်တာတွေ ရှိနေပါတယ်” ဟု အတည်ပြု ပြောသည်။ စစ်တွေမြို့နယ် ပါဒလိတ်တပ်ရင်းအနီး၊ အမြင့်ကျွန်းနှင့် ရွှေမင်းဂံ ရေတပ်စခန်း ဝန်းကျင်တို့တွင် အာရက္ခတပ် တော် (AA) ၏ ဝန်းရံ ထိုးစစ်ဆင်မှုကို ရင်ဆိုင်နေရသည့် စစ်အုပ်စုတပ်သည် ရွှေမင်းဂံ ရေတပ်စခန်း မကျဆုံး ရေးအတွက် ငပြီကျွန်းကို ကမ်းတက် ကာကွယ်ရန် ကြိုးပမ်းခဲ့ခြင်းဖြစ်သည်။ သို့သော်လည်း အောက်တိုဘာလ ၇ ရက်နှင့် ၈ ရက် ကမ်းတက် တိုက်ပွဲများအတွင်း စစ်အုပ်စုတပ်ဖွဲ့ဝင် ၄၀ ထက်မနည်း သေဆုံးခဲ့သလို၊ ကမ်းပေါ် ရောက်ရှိလာသည့် စစ်အုပ်စုတပ်ဖွဲ့ဝင်များကိုလည်း AA က လိုက်လံ ရှင်းလင်းခဲ့သဖြင့် စစ်သင်္ဘောများ ကမ်းမကပ်ရဲတော့ဘဲ အဝေးမှသာ လက်နက်ကြီးဖြင့် လှမ်းပစ်နေရသည်။ စစ်အုပ်စုတပ်သည် '၄၉၂၆ စစ်ဆင်ရေး' အမည်ဖြင့် စစ်တွေနှင့် ကျောက်ဖြူဘက်သို့ ထိုးစစ်ဆင်ခဲ့သော်လည်း ၁ လကျော်အတွင်း စစ်တွေတွင် စခန်း ၉ ခုအပါအဝင် စခန်း ၁၁ ခုထက်မနည်း လက်လွှတ်ခဲ့ရပြီး ခုခံစစ်မှသည် အာရက္ခတပ်တော် (AA) ၏ တန်ပြန်ထိုးစစ်ကို အပြင်းအထန် ရင်ဆိုင်နေရခြင်း ဖြစ်သည်။ လက်ရှိတွင် AA သည် ကျားမသောက်တပ်ရင်း၊ တောကန်၊ နာရီကန်နှင့် ကံ့ကော်ကျွန်း ဝန်းကျင်တို့အပြင် စစ်တွေမြို့ အနောက်ဘက်ရှိ ရေချမ်းပြင်နှင့် ကြွီတဲအနီးတို့တွင်ပါ စစ်မျက်နှာသစ်များ ဖွင့်လှစ်၍ စစ်တွေမြို့ ပေါ်ရှိ စစ်အုပ်စုတပ်များကို ပိတ်ဆို့ ထိုးစစ်ဆင်နေသဖြင့် တိုက်ပွဲများ ပိုမို ပြင်းထန်လာနေသည်။ ဓာတ်ပုံ - (AA Info Desk - ပုံဟောင်း / မင်းပြားမြို့နယ်တွင် စစ်အုပ်စု ဇက်ရေယာဉ်တစ်စင်းကို AA က သိမ်း ပိုက်ထားစဉ်။) #ငပြီကျွန်း

စစ်တွေ အနီးက ငပြီကျွန်းသို့ စစ်အုပ်စု ကမ်းတက်ရန် ကြိုးပမ်းစဉ် ရေယာဉ်များ လက်နက်ကြီးထိမှန်၍ နောက်ဆုတ်ရ

စစ်တွေ အနီးက ငပြီကျွန်းသို့ စစ်အုပ်စု ကမ်းတက်ရန် ကြိုးပမ်းစဉ် ရေယာဉ်များ လက်နက်ကြီးထိမှန်၍ နောက်ဆုတ်ရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တ…

  • October 9, 2026
မလေးရှားကုမ္ပဏီအချို့ မြန်မာစစ်အုပ်စုတပ်ထံ လေယာဉ်အပိုပစ္စည်းများ ရောင်းချနေဟု JFM ထုတ်ပြန် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၈ ရက်။ မြန်မာစစ်အုပ်စုက အရပ်သား ပြည်သူများအပေါ် လေကြောင်းမှ အကြမ်းဖက် ဗုံးကြဲ တိုက်ခိုက်မှုများကို အရှိန်မြှင့် ဆောင်ရွက်နေချိန်တွင် မလေးရှား အစိုးရနှင့် ဆက်နွှယ်နေသည့် ကုမ္ပဏီအချို့ အပါအဝင် မလေးရှား စီးပွားရေး လုပ်ငန်းများသည် မြန်မာစစ်အုပ်စုတပ်ထံ စစ်ဘက်ဆိုင်ရာ ပစ္စည်းများနှင့် လေယာဉ် အပိုပစ္စည်းများ ရောင်းချ ထောက်ပံ့ပေးနေကြောင်း Justice For Myanmar (JFM) က ထုတ်ဖော် ပြောဆိုလိုက်သည်။ မလေးရှား အစိုးရက စစ်အုပ်စု ခေါင်းဆောင် ဦးမင်းအောင်လှိုင်အား တရားဝင် ခရီးစဉ်အဖြစ် လာရောက်ရန် ဖိတ်ခေါ် လက်ခံ ကြိုဆိုရန် ပြင်ဆင်နေချိန်တွင် အဆိုပါ ပူးပေါင်း ကြံရာပါ ပတ်သက်မှုများ ဖော်ထုတ်လိုက် ခြင်းလည်း ဖြစ်သည်။ အဆိုပါ ထုတ်ပြန်ချက်ကို JFM က အောက်တိုဘာ ၇ ရက်နေ့တွင် ထုတ်ပြန်လိုက်သည်။ စစ်အုပ်စုတပ်၏ လေကြောင်း တိုက်ခိုက်မှုများကို နေ့စဉ်နှင့်အမျှ ရင်ဆိုင်နေရသည့် လူ့အခွင့်ရေး တက်ကြွ လှုပ်ရှားနေသူ ကချင်လူငယ်တစ်ဦးကလည်း မလေးရှား အပါအဝင် ပြည်ပကုမ္ပဏီများ၏ ထောက်ပံ့မှု ကြောင့် စစ်အုပ်စု၏ လေကြောင်း အန္တရာယ် ပိုမို ကြီးမားလာရကြောင်း ပြောသည်။ “ဘယ်လိုပဲ ထုတ်ပြန်ချက်တွေ ထုတ်ပြီး တောင်းဆိုနေပါစေ ဘယ်နိုင်ငံကမှ ကျနော်တို့ လူထုတွေ အသက် ဆုံးရှုံးနေရတာတွေကို မစာနာဘူးလို့ပဲ ခံစားရတယ်။ အခု မလေးရှားကလည်း မင်းအောင်လှိုင်ကို တရားဝင် ပုံစံမျိုး လက်ခံလိုက်တယ်။ လူထုကို နေ့တိုင်းသတ်နေတဲ့ ရာဇဝတ်ကောင်ကို သူတို့က ဝိုင်းပြီး အသိအမှတ်ပြု နေတာ။ သူ့ရဲ့ ခရီးစဉ်မတိုင်ခင်လေးမှာ ရခိုင်၊ ချင်း၊ တနင်္သာရီ၊ ကရင် အကုန်ပါပဲ လေကြောင်းကနေ ဗုံးကြဲနေ တာ။ ကျနော်တို့ ကချင်ဆိုလည်း ဒီတိုင်းပဲလေ။ လူထုက နေ့တိုင်း သေနေရတာ။ တရုတ်၊ ထိုင်း၊ မလေး၊ အိန္ဒိယ ဒီနိုင်ငံတွေက အခုလို ဆက်ဆံနေတာတွေ့တော့ အရမ်းအံ့ဩတယ်” ဟု ပြောသည်။ ပေါက်ကြားလာသည့် လျှို့ဝှက် စာရွက်စာတမ်းများနှင့် ကုန်သွယ်ရေး အချက်အလက်များအရ FJ Global၊ Asia AeroTechnic (AAT) နှင့် Skyways Technics Asia ဆိုသည့် မလေးရှား ကုမ္ပဏီ ၃ ခုသည် ၂၀၂၃ ခုနှစ်မှ ၂၀၂၆ ခုနှစ်အတွင်း မြန်မာစစ်အုပ်စုတပ်၊ ၎င်း၏ ကြားခံ လက်နက်ပွဲစားများနှင့် စီးပွားရေး ပူးပေါင်း လုပ်ဆောင်ခဲ့ကြပ ြီး တိုက်ခိုက်ရေး ဂျက်လေယာဉ်များ၊ ဒရုန်းများနှင့် ရဟတ်ယာဉ်များအတွက် အပိုပစ္စည်းများ ရောင်းချပေး ခြင်းနှင့် ပြုပြင်ထိန်းသိမ်းရေး ဝန်ဆောင်မှုများကို ထောက်ပံ့ပေးခဲ့ကြသည်ဟု ဆိုသည်။ အထူးသဖြင့် မလေးရှား ဝန်ကြီးချုပ်ရုံး လက်အောက်ခံ အဖွဲ့အစည်းက ရာနှုန်းပြည့် ပိုင်ဆိုင်သော ငွေကြေး ထောက်ပံ့မှု ရရှိထားသည့် FJ Global ကုမ္ပဏီသည် စစ်အုပ်စုတပ်၏ K-8W တိုက်ခိုက်ရေး ဂျက်လေယာဉ်၊ Orlan-10E ဒရုန်း၊ Ka-28၊ Mi-17 နှင့် Mi-2 ရဟတ်ယာဉ်များအတွက် စက်ပစ္စည်း အစိတ်အပိုင်းများ ဝယ်ယူရန် နိုင်ငံတကာ ပေးသွင်းသူများထံ ဈေးနှုန်း တောင်းခံလွှာများ အကြိမ်ကြိမ် ပေးပို့ခဲ့ကြောင်း JFM က ဖော်ထုတ် ထားသည်။ ထို့ပြင် မလေးရှား အစိုးရ အေဂျင်စီတစ်ခုက ရာနှုန်းပြည့် ပိုင်ဆိုင်သည့် AAT ကုမ္ပဏီထံသို့လည်း ၂၀၂၆ ခုနှစ် ဖေဖော်ဝါရီလအတွင်း မြန်မာစစ်အုပ်စုတပ် အင်ဂျင်နီယာများ သွားရောက်ကာ စစ်တပ်ပိုင် Airbus A319 လေယာဉ် ပြုပြင်ရေးအတွက် သွားရောက် ဆွေးနွေးခဲ့ကြသည်။ ရခိုင်ဒေသက လူမှုကယ်ဆယ်ရေး လုပ်နေသူ လူငယ်တစ်ဦးကလည်း “ကျနော်တို့ ဒေသမှာ မြေပြင်မှာ မြို့တွေ၊ ရွာတွေကို လေယာဉ် နဲ့ နေ့တိုင်း ဗုံးကြဲနေတာ။ ကလေးရော၊ လူကြီးရော သေနေကြရတယ်။ အခုဆိုရင် ရခိုင်ကို စစ်အုပ်စုက ဗုံးကြဲရတာ ပိုရဲလာတာပေါ့။ ပြည်သူတွေကို သတ်ဖို့ ပြည်သူတွေကို သေစေချင်လို့ ဒီလို မစာမနာလုပ်နေတာ။ ဒီအောက်တိုဘာလထဲမှာဆိုရင် လေယာဉ်လာမကြဲတဲ့နေ့ကို မရှိဘူး။ ဒါတွေကို ချက်ချင်း တားဆီးပေးစေချင်ပါတယ်” ဟု ပြောသည်။ တစ်ဖက်တွင်လည်း မလေးရှား အစိုးရသည် လာမည့် နိုဝင်ဘာလဆန်းတွင် ကျင်းပမည့် ၄၉ ကြိမ်မြောက် အာဆီယံ ထောက်လှမ်းရေး အသိုက်အဝန်း ညီလာခံသို့ စစ်အုပ်စု သတင်းရဲတပ်ဖွဲ့ ညွှန်ကြားရေးမှူး ဦးဆောင်သည့် ကိုယ်စားလှယ်အဖွဲ့ကို လေယာဉ်လက်မှတ်နှင့် တည်းခိုစရိတ် ကျခံကာ ဖိတ်ကြားထားသည်။ မလေးရှား အစိုးရ၏ လုပ်ရပ်များနှင့် ပတ်သက်၍ Justice For Myanmar ၏ ပြောရေးဆိုခွင့်ရှိသူ မရတနာမောင်က “အစုလိုက်အပြုံလိုက် ရက်စက်ကြမ်းကြုတ်မှုတွေ ကျူးလွန်နေတဲ့ စစ်တပ်ကို မိမိနိုင်ငံ ကုမ္ပဏီတွေက ထောက်ပံ့ပေးနေတာတွေကို တားဆီးဖို့ ဘာမှ မလုပ်ဆောင်ဘဲ၊ စစ်ရာဇဝတ်ကောင် မင်းအောင် လှိုင်ကို မဟုတ်မမှန်တဲ့ တရားဝင်မှု ပေးအပ်ပြီး လူတွေကို သူ့ရဲ့ ရာဇဝတ်စစ်အုပ်စုလက်ထဲ ပြန်လွှဲအပ်နေတဲ့ မလေးရှားနိုင်ငံရဲ့ လုပ်ရပ်တွေကို ကျမတို့ ရှုတ်ချပါတယ်” ဟု ပြောသည်။ ထို့ကြောင့် မလေးရှား အစိုးရအနေဖြင့် စစ်အုပ်စုထံ စစ်ဘက်သုံး ပစ္စည်းများနှင့် ဝန်ဆောင်မှုများ ပေးအပ်နေ သည့် မလေးရှား ကုမ္ပဏီများကို ချက်ချင်း စုံစမ်း စစ်ဆေးပိတ်ပင်ရန်နှင့် စစ်အုပ်စုအား မှားယွင်းသော တရားဝင် မှု ပေးနေခြင်းများကို ရပ်တန့်ရန် JFM က တောင်းဆိုထားသည်။ အလားတူ ဩစတြေးလျ၊ ကနေဒါ၊ အီးယူ၊ ယူကေနှင့် အမေရိကန် ပြည်ထောင်စုတို့ အနေဖြင့်လည်း မြန်မာ စစ်အုပ်စုတပ်ထံ ပစ္စည်း ထောက်ပံ့ပေးသွင်းနေသည့် ကြားခံပွဲစား ကုမ္ပဏီများကို အမြန်ဆုံး ဒဏ်ခတ် ပိတ်ဆို့ အရေးယူပေးရန် Justice For Myanmar က တိုက်တွန်းထားသည်။ ဓာတ်ပုံ - ( စစ်အုပ်စုတပ် လေကြောင်းမှ ဗုံးကြဲမှုကြောင့် မီးလောင် ပျက်စီးသွားသည့် ပုဏ္ဏားကျွန်းမြို့နယ် ဗျာလ စစ်ဘေးရှောင်စခန်းကို တွေ့ရစဉ်။ / Crd - AA Info Desk)

မလေးရှားကုမ္ပဏီအချို့ မြန်မာစစ်အုပ်စုတပ်ထံ လေယာဉ်အပိုပစ္စည်းများ ရောင်းချနေဟု JFM ထုတ်ပြန်

မလေးရှားကုမ္ပဏီအချို့ မြန်မာစစ်အုပ်စုတပ်ထံ လေယာဉ်အပိုပစ္စည်းများ ရောင်းချနေဟု JFM ထုတ်ပြန် သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၈ ရက်…

  • October 8, 2026
စစ်ကိုင်း အထက်ပိုင်း တိုက်ပွဲများ ပြင်းထန်နေပြီး စစ်အုပ်စု လေကြောင်းမှ စစ်ကူပေး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၈ ရက်။ စစ်ကိုင်းတိုင်း၊ အင်းတော်မြို့နယ်ထဲက အင်းတော် - မဲဇာ လမ်းပိုင်းရှိ ကျေးရွာများအနီးတွင် တော်လှန်ရေး ပူးပေါင်းတပ်များနှင့် ယနေ့ (အောက်တိုဘာ ၈ ရက်) တွင် တိုက်ပွဲများ အပြင်းအထန် ဖြစ်ပွားလျက်ရှိသည်။ စစ်ကိုင်းတိုင်းနှင့် ကချင်ပြည် အစပ်ရှိ မန္တလေး - ရွှေဘို - မြစ်ကြီးနား လမ်းမကြီးကို အပြည့်အဝ ထိန်းချုပ်နိုင် ရေးအတွက် စစ်အုပ်စုတပ်က အင်းတော်မြို့နယ် တောင်ဘက်ခြမ်းသို့ အင်အားအလုံးအရင်းဖြင့် စစ်ကြောင်းထိုး လှုပ်ရှားလာသဖြင့် အဆိုပါလမ်းပိုင်းတွင် တိုက်ပွဲများ ပြင်းထန်နေခြင်း ဖြစ်သည်။ စစ်အုပ်စုတပ်မ (၃၃) အပါအဝင် အင်အား ရာနှင့်ချီပါဝင်သည့် စစ်ကြောင်းသည် အောက်တိုဘာ ၁ ရက်မှစ၍ ထီးချိုင့် - ကသာ လမ်းကြောင်းအတိုင်း ထွက်ခွာလာပြီးနောက် အင်းတော်မြို့နယ် တောင်ဘက်ခြမ်းရှိ သက္ကယ်ကျင်း၊ မိုးယူ၊ နတ်မဟုတ်နှင့် ဆည်းရွာတို့တွင် တပ်စွဲခဲ့ကာ အောက်တိုဘာလ ၇ ရက်နှင့် ၈ ရက်တို့တွင် သံဘိုနှင့် နောင်မိုးကျေးရွာများဘက်သို့ ဆက်လက် စစ်ကြောင်းထိုးလာခြင်း ဖြစ်သည်။ အဆိုပါ အင်းတော် - မဲဇာ လမ်းပိုင်းတွင် စစ်အုပ်စုတပ်၏ စစ်ကြောင်းထိုးမှု ကြောင့် အောက်တိုဘာလ ၇ ရက် နေ့မှစ၍ တော်လှန်ရေး ပူးပေါင်းတပ်များနှင့် ထိတွေ့တိုက်ပွဲများ အပြင်းအထန် ဖြစ်ပွားနေခြင်း ဖြစ်သည်။ မြေပြင် စစ်ရေးသတင်းရင်းမြစ်တစ်ဦးက “သူတို့က မန္တလေး-မြစ်ကြီးနား လမ်းပိုင်းကို သာလွန်အင်အားနဲ့ ပြန် စိုးမိုးဖို့ တောင်ဘက်ခြမ်းရွာတွေကို စစ်ကြောင်းထိုးလာတာပါ။ အခုက ထီးချိုင့် - ကျောင်းကုန်းတလျှောက် ရအောင် ပြန်ယူမယ်ပေါ့ အဲ့လိုမျိုးနဲ့ စစ်ကြောင်းထိုးလာတာ စခ (စစ်တပ်) တွေက။ သံဘိုနဲ့ နောင်မိုးရွာဘက်ကို ဦးတည်လာတော့ မဲဇာဘက် မရောက်ခင်မှာ ထိတွေ့တိုက်ပွဲတွေ ပြင်းထန်နေတာ ဖြစ်ပါတယ်” ဟု ပြောသည်။ အောက်တိုဘာလ ၈ ရက်နေ့၊ နံနက်ပိုင်း တိုက်ပွဲအတွင်း စစ်အုပ်စုတပ်ဘက်မှ ဂျက်တိုက်လေယာဉ် ၂ စီးဖြင့် လေကြောင်း ပစ်ကူပေးခဲ့ပြီး ဗုံးကြဲတိုက်ခိုက်ခြင်းနှင့် စက်လက်နက်များဖြင့် ပစ်ခတ်ခြင်းများ ပြုလုပ်ခဲ့သဖြင့် နှစ်ဖက် ထိခိုက်ဒဏ်ရာရရှိမှုများ ရှိခဲ့သော်လည်း အသေးစိတ် စာရင်းကိုမူ သီးခြား အတည်မပြုနိုင်သေးပေ။ အင်းတော်မြို့နယ်ကို တော်လှန်ရေး ပူးပေါင်းတပ်များက ၂၀၂၅ ခုနှစ် ဧပြီလမှစ၍ ၁ နှစ်နီးပါး ထိန်းချုပ်ထား ခဲ့သော်လည်း စစ်အုပ်စုတပ်က ၂၀၂၆ ခုနှစ် ဧပြီလကုန်ပိုင်းတွင် မြို့ပေါ်နှင့် မြောက်ဘက်ခြမ်း နဘား - မော်လူး လမ်းပိုင်းကို ပြန်လည် ထိန်းချုပ်သွားခဲ့သည်။ သို့သော်လည်း မြို့ပတ်ဝန်းကျင် ကျေးရွာအများစုတွင် တော်လှန်ရေးတပ်များက ဆက်လက် ထိန်းချုပ်လှုပ်ရှား နေသဖြင့် စစ်အုပ်စုတပ်က မြို့နယ်တစ်ခုလုံး စိုးမိုးနိုင်ရန် တန်ပြန်ထိုးစစ်များ ဆက်တိုက် ပြုလုပ်နေခြင်း ဖြစ်သည်။ အလားတူ အင်းတော်ကြီးဒေသတွင်လည်း စစ်အုပ်စုတပ်နှင့် ၎င်းတို့လက်အောက်ခံ ရှမ်းနီအမျိုးသားများ တပ်မ တော် (SNA) ပူးပေါင်းတပ်များသည် KIA/PDF ထိန်းချုပ်နယ်မြေများသို့ ဒရုန်းများဖြင့် ဆက်တိုက် တိုက်ခိုက် လျက်ရှိသည်။ ပြီးခဲ့သည့် အောက်တိုဘာလ ၅ ရက်နေ့၊ မွန်းလွဲပိုင်းက မိုးညှင်းမြို့နယ် အင်းတော်ကြီးဒေသ ချောင်းဝကျေးရွာရှိ ကချင်နှစ်ခြင်းခရစ်ယာန် ဘုရားကျောင်းကို စစ်အုပ်စုနှင့် SNA ပူးပေါင်းတပ်က အသေခံဒရုန်း (Kamikaze Drone) ဖြင့် တိုက်ခိုက်ခဲ့သဖြင့် ဘုရားကျောင်း အဆောက်အအုံ ထိခိုက်ပျက်စီးခဲ့သည်။ အင်းတော်ကြီး ဒေသခံတစ်ဦးက “ဘုရားကျောင်းမှာ မူကြိုကလေးတွေ စာသင်တာရှိပေမဲ့ ဒရုန်းနဲ့ တိုက်ခိုက်ခံ ရတဲ့နေ့က ဆုတောင်းပွဲရှိလို့ ကျောင်းပိတ်ထားလို့ တော်တော့တာ။ လူတော့ ထိခိုက်မှု မရှိခဲ့ပါဘူး” ဟု ပြော သည်။ လက်ရှိတွင် အင်းတော်ကြီးဒေသရှိ စစ်အုပ်စုတပ်နှင့် SNA ပူးပေါင်းတပ်သည် ဘာသာရေး အဆောက်အအုံများ နှင့် ဆေးရုံများကိုပါ ပစ်မှတ်ထား တိုက်ခိုက်မှုများ ပြုလုပ်နေသဖြင့် ဒေသတွင်း စစ်ရေးအခြေအနေမှာ ဆက် လက် တင်းမာလျက်ရှိသည်။ ဓါတ်ပုံ - (အင်းတော်မြို့ကို ပြန်လည်ထိန်းချုပ်ပြီးနောက် စစ်သားများကို တွေ့ရစဉ်။ / ပုံဟောင်း - Crd)

စစ်ကိုင်း အထက်ပိုင်း တိုက်ပွဲများ ပြင်းထန်နေပြီး စစ်အုပ်စု လေကြောင်းမှ စစ်ကူပေး

စစ်ကိုင်း အထက်ပိုင်း တိုက်ပွဲများ ပြင်းထန်နေပြီး စစ်အုပ်စု လေကြောင်းမှ စစ်ကူပေး သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၈ ရက်။ စစ်ကို…

  • October 8, 2026
ဖားကန့် စုပေါင်းရုံးရှိ စစ်အုပ်စုခန့် အုပ်ချုပ်ရေးမှူးများ အစည်းအဝေး အသေခံဒရုန်းဖြင့် တိုက်ခိုက်ခံရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၇ ရက်။ ကချင်ပြည်၊ ဖားကန့်မြို့နယ် မှော်ဝမ်းရပ်ကွက်ရှိ စုပေါင်းရုံး၌ စစ်အုပ်စုတပ် ဖားကန့် ဒုတပ်မမှူးနှင့် စစ်အုပ်စုခန့် အုပ်ချုပ်ရေးမှူးများ အစည်းအဝေး ပြုလုပ်နေစဉ် တော်လှန်ရေး ပူးပေါင်းတပ်များက အောက်တိုဘာလ ၇ ရက် မွန်းလွဲ ၁ နာရီခန့်တွင် အသေခံဒရုန်း (Kamikaze Drone) ဖြင့် ကြားဖြတ် တိုက်ခိုက်ခဲ့သည်။ စစ်အုပ်စုတပ် ဒုတပ်မမှူး၊ ရဲမှူးနှင့် စစ်အုပ်စုခန့် ရပ်ကွက်ကျေးရွာ အုပ်ချုပ်ရေးမှူးများသည် ဖားကန့်-ကာမိုင်း လမ်းပိုင်း ပြုပြင်ရေးအတွက် လုပ်ငန်းရှင်များနှင့် အစည်းအဝေး ပြုလုပ်မည်ဆိုသည့် သတင်းကို ကြိုတင် ရရှိထားသဖြင့် တိုက်ခိုက်ခဲ့ခြင်းဖြစ်ကြောင်း တော်လှန်ရေး တပ်ဖွဲ့ဝင်တစ်ဦးက ပြောသည်။ တိုက်ခိုက်မှုဖြစ်စဉ်နှင့် ပတ်သက်၍ မြေပြင်တော်လှန်ရေး တပ်ဖွဲ့ဝင်တစ်ဦးက “သူတို့ စုပေါင်းရုံးမှာ အစည်း အဝေး လုပ်နေတယ်ဆိုတဲ့ သတင်းကို အတိအကျ ကြိုရတာနဲ့ အသေခံဒရုန်းသုံးပြီး ဝင်တိုက်ခဲ့တာ။ စစ်အုပ်စု ဘက်က ထိခိုက်သေဆုံးတာနဲ့ ဒဏ်ရာရတာတွေ ရှိပေမဲ့ အသေးစိတ်ကိုတော့ ဆက်လက် စုံစမ်းနေတုန်းပဲ” ဟု ပြောသည်။ ဒရုန်းဖြင့် တိုက်ခိုက်ခံရပြီးနောက် စုပေါင်းရုံး အနီးပတ်ဝန်းကျင်တွင် သေနတ်သံများ ထွက်ပေါ်လာခဲ့ပြီး စစ်အုပ်စုတပ်က စုပေါင်းရုံးအနီး လမ်းများကို ပိတ်ဆို့ကာ တားဆီးစစ်ဆေးမှုများ ပြုလုပ်ခဲ့ကြောင်း ဒေသခံ အချို့က ပြောသည်။ ဖားကန့်မြို့ခံ အမျိုးသားတစ်ဦးက “တိုက်ခိုက်ခံရပြီးတော့ ပေါက်ကွဲသံရော သေနတ်သံတွေပါ ထွက်လာတယ်။ အဲဒါပြီးတာနဲ့ စစ်တပ်က စုပေါင်းရုံးပတ်ဝန်းကျင် လမ်းတွေကို ချက်ချင်း ပိတ်လိုက်တာပဲ။ လမ်းသွားလမ်းလာ တွေကိုလည်း တော်တော်လေး တင်းတင်းကြပ်ကြပ် စစ်ဆေးနေတယ်” ဟု မြေပြင်အခြေအနေကို ပြောသည်။ ဖားကန့်မြို့နယ်အတွင်း တိုက်ပွဲများ ငြိမ်သက်နေရာမှ စက်တင်ဘာလ ဒုတိယပတ်မှစတင်၍ စစ်အုပ်စုတပ်က ပြည်သူ့ စစ်အဖွဲ့များ ဖွဲ့စည်းကာ စစ်ရေးလှုပ်ရှားမှုများ ပြန်လည် ခပ်စိပ်စိပ် ပြုလုပ်လာသဖြင့် လမ်းကြိုလမ်း ကြား စစ်ဆေးရေး တင်းကြပ်လာသည့်အပြင် လက်နက်ကြီး၊ လက်နက်ငယ်များဖြင့် မကြာခဏ ခြိမ်းခြောက် ပစ်ခတ်မှုများရှိနေကြောင်း ဒေသခံများက ပြောသည်။ အောက်တိုဘာလ ၄ ရက်နေ့ကလည်း ကုဋေနှင့် မှော်ဆီစာ ကျောက်ဝိုင်းဘက်သို့ စစ်အုပ်စုတပ်က စစ်ကြောင်း ထိုးလာသဖြင့် အပြန်အလှန် ပစ်ခတ်မှုများ ဖြစ်ပွားခဲ့ရာ ကျောက်ဝိုင်းအနီး အိမ်ငှားနေထိုင်သည့် အမျိုးသားနှစ်ဦး ကျည်ထိမှန်ခဲ့ပြီး တစ်ဦး သေဆုံးသွားခဲ့သည်။ ထို့ပြင် လုံးခင်းကျေးရွာထဲသို့ စစ်အုပ်စုတပ် ပစ်ခတ်သည့် လက်နက်ကြီး ကျရောက်သဖြင့် ဒေသခံ သုံးဦး ထိခိုက်ဒဏ်ရာ ရရှိခဲ့သေးသည်။ အလားတူ အောက်တိုဘာလ ၅ ရက်နေ့ နံနက်ပိုင်းကလည်း ဖားကန့်မြို့အဝင် ယမ်းချက်စက်ရုံမှ ထွက်လာသည့် စစ်အုပ်စု စစ်ကြောင်းက ဒရုန်းများဖြင့် ပစ်ခတ်တိုက်ခိုက်မှုများ ပြုလုပ်ခဲ့ကြောင်း မြို့ခံအချို့က ပြောသည်။ ဓါတ်ပုံ - Crd #ဖားကန့်

ဖားကန့် စုပေါင်းရုံးရှိ စစ်အုပ်စုခန့် အုပ်ချုပ်ရေးမှူးများ အစည်းအဝေး အသေခံဒရုန်းဖြင့် တိုက်ခိုက်ခံရ

ဖားကန့် စုပေါင်းရုံးရှိ စစ်အုပ်စုခန့် အုပ်ချုပ်ရေးမှူးများ အစည်းအဝေး အသေခံဒရုန်းဖြင့် တိုက်ခိုက်ခံရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တို…

  • October 7, 2026
ချင်းတောင်ပိုင်း မင်းတပ်နှင့် ကန်ပက်လက်တွင် စစ်အုပ်စု လေကြောင်းမှ ရက်ဆက် ဗုံးကြဲပစ်ကူ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၇ ရက်။ ချင်းပြည်တောင်ပိုင်း မင်းတပ်နှင့် ကန်ပက်လက် မြို့နယ်တို့တွင် တော်လှန်ရေး ပူးပေါင်းတပ်ဖွဲ့များနှင့် တိုက်ပွဲ များ ပြင်းထန်နေပြီး၊ စစ်အုပ်စုတပ်က တံတားဦးနှင့် မကွေး လေတပ်စခန်းများမှ တိုက်လေယာဉ်များဖြင့် လေကြောင်းမှ ရက်ဆက် ဗုံးကြဲ ပစ်ကူပေးလျက်ရှိကြောင်း ဒေသခံများနှင့် စစ်ရေး သတင်းရင်းမြစ်များက ပြောသည်။ ကန်ပက်လက်မြို့နယ်၊ မဆာတွီကျေးရွာအနီးတွင် တပ်စွဲထားသည့် စစ်အုပ်စုတပ်ကို တော်လှန်ရေး ပူးပေါင်းတပ် များက ဝိုင်းဝန်းပိတ်ဆို့ ထိတွေ့တိုက်ပွဲဖြစ်ပွားစဉ် အောက်တိုဘာလ ၅ ရက် မွန်းလွဲ ၁ နာရီဝန်းကျင်က တံတားဦး လေတပ်စခန်းမှ တက်လာသည့် ဂျက်ဖိုက်တာ ၂ စီးနှင့် Y-12 လေယာဉ် ၁ စီးတို့ဖြင့် မဆာတွီကျေးရွာအနီးနှင့် တိုက်ပွဲဖြစ်ပွားရာ နေရာများကို ရက်ဆက် ဗုံးကြဲတိုက်ခိုက်ခဲ့ခြင်းဖြစ်သည်။ မကွေးတိုင်း၊ ဆောမြို့နယ်၊ လောင်းရှည်မြို့မှတစ်ဆင့် ကျင်ဒွေးမြို့ကို ပြန်လည်ထိန်းချုပ်ရန် ထိုးစစ်ဆင်လာ သည့် စစ်အုပ်စု ပူးပေါင်းစစ်ကြောင်းသည် စက်တင်ဘာလ ၂၉ ရက်တွင် မဆာတွီကျေးရွာသို့ ရောက်ရှိတပ်စွဲ ပြီးနောက် လေကြောင်းတိုက်ခိုက်မှုများ ဆက်တိုက် ပြုလုပ်ခဲ့သဖြင့် ကျေးရွာအတွင်းရှိ ဘာသာရေး အဆောက် အအုံများနှင့် လူနေအိမ်များ ထိခိုက်ပျက်စီးခဲ့ရသည်။ ဆောမြို့နယ် ဒေသခံ တော်လှန်ရေးတပ်ဖွဲ့ဝင်တစ်ဦးက “စစ်ကြောင်း ရွာထဲ ဝင်လာကတည်းက လေယာဉ်နဲ့ နေ့တိုင်းလိုလို ဗုံးကြဲတာ။ ဘုရား ကျောင်းနဲ့ အိမ်တွေ လည်း ထိကုန်တယ်။ ရွာသားတွေလည်း ဘေးလွတ်ရာ ပြေးနေရလို့ ထိခိုက်မှု အသေးစိတ် တော့ အတည်ပြုပြောနိုင်ဖို့ ခက်တယ်။ အတည်မပြုနိုင်သေးဘူး။ စစ်ရေး အခြေအနေကလည်း အခုထိ တိုက်ပွဲတွေက ဖြစ်နေတုန်းပဲ” ဟု ပြောသည်။ ထို့ပြင် မင်းတပ်မြို့ပေါ်တွင်လည်း မေလကုန်ပိုင်းမှစ၍ စစ်အုပ်စုတပ်က ပြန်လည်ထိုးစစ်ဆင်လာရာမှ လပေါင်း ၄ လကျော်အထိ တိုက်ပွဲများ ပြင်းထန်နေဆဲဖြစ်ပြီး အောက်တိုဘာလ ၃ ရက် မွန်းလွဲ ၂ နာရီဝန်းကျင်တွင် မကွေး လေတပ်စခန်းမှ ထွက်ခွာလာသည့် ဂျက်ဖိုက်တာ ၂ စီးဖြင့် မင်းတပ်မြို့ပေါ်ရှိ နှစ်နေရာကို ၂ ကြိမ်ထက်မနည်း ထပ်မံ ဗုံးကြဲတိုက်ခိုက်ခဲ့သည်။ မင်းတပ်မြို့နယ်အတွင်း လေကြောင်းတိုက်ခိုက်မှု အခြေအနေနှင့် ပတ်သက်၍ “အောက်တိုဘာ ၃ ရက်နေ့ မွန်း လွဲ ၁ နာရီခွဲကျော်လောက်မှာ မကွေးလေတပ်က တက်လာတဲ့ ဂျက်ဖိုက်တာ ၂ စီးနဲ့ မင်းတပ်မြို့ပေါ် နှစ်နေရာကို ဗုံး ၄ လုံး ကြဲသွားတာ။ အဲဒီ လေကြောင်းတိုက်ခိုက်မှု ကြောင့် လူနေအိမ်တချို့ ပျက်စီးသွားပြီး အသက် ၉၀ ဝန်းကျင်ရှိတဲ့ အဖိုးတစ်ဦး သေဆုံးသွားတယ်။ ဒါတင်မကဘူး မနေ့က မွန်းလွဲ ၂ နာရီလောက်မှာလည်း ရှမ်းတဲ လေတပ်က တက်လာတဲ့ ဂျက်ဖိုက်တာတစ်စီးနဲ့ မင်းတပ်မြို့အနီးကို ထပ်ပြီး ဗုံးကြဲသွားတာ ရှိတယ်” ဟု မင်းတပ်မြို့ခံတစ်ဦးက ပြောသည်။ ကန်ပက်လက်မြို့နယ်၊ မဆာတွီကျေးရွာအနီး တိုက်ပွဲတွင် စစ်အုပ်စုတပ်ဘက်မှ ထိခိုက်သေဆုံးသူ ၅၀ ထက် မနည်း ရှိခဲ့သည့်အပြင် တပ်မ (၇၇) လက်အောက်ခံ တပ်ရိုက်အင်အား ၂၀ ကျော်ပါ တပ်စုတစ်စုကို တော်လှန် ရေး ပူးပေါင်းတပ်များက အရှင်ဖမ်းဆီးရမိခဲ့ကြောင်း ဒေသတွင်း သတင်းအချို့က ဆိုသော်လည်း သတင်းနှင့် မီဒီယာ ကွန်ရက်အနေဖြင့် သီးခြား အတည်မပြုနိုင်သေးပေ။ လက်ရှိတွင် ကျင်ဒွေးမြို့ကို ပြန်လည်ထိန်းချုပ်ရန် ဆောနှင့် လောင်းရှည်တို့၌ အင်အား ၅၀၀ ကျော်ဖြင့် စစ်ကြောင်း ၃ ကြောင်းခွဲ ထိုးစစ်ဆင်နေသည့် စစ်အုပ်စုတပ်များသည် မဆာတွီ၊ ဆွဲလွဲကျင်း၊ အင်ဘူး၊ ပါးချောင်း၊ ပိန်းချောင်း၊ ယမ်းနှင့် ကြိမ်ကြီး ကျေးရွာများတွင် တပ်စွဲထားပြီး၊ တော်လှန်ရေး ပူးပေါင်းတပ်များက ဝိုင်းဝန်းပိတ်ဆို့ထားသဖြင့် ချင်းပြည်တောင်ပိုင်းတွင် စစ်ရေး အရှိန် ဆက်လက် တင်းမာလျက် ရှိသည်။ ဓါတ်ပုံ - (မင်းတပ်မြို့နယ်အတွင်း အောက်တိုဘာ ၃ရက်နေ့က လေကြောင်းတိုက်ခိုက်ခံရမှုမြင်ကွင်း / Ĥkl Mindat)

ချင်းတောင်ပိုင်း မင်းတပ်နှင့် ကန်ပက်လက်တွင် စစ်အုပ်စု လေကြောင်းမှ ရက်ဆက် ဗုံးကြဲပစ်ကူ

ချင်းတောင်ပိုင်း မင်းတပ်နှင့် ကန်ပက်လက်တွင် စစ်အုပ်စု လေကြောင်းမှ ရက်ဆက် ဗုံးကြဲပစ်ကူ သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၇ ရက်။ …

  • October 7, 2026
ကချင်ပြည်နယ် ရွှေကူ-ငအိုး လမ်းမကြီးသုံးသူကို ဒလန် အဖြစ် သတ်မှတ်မည်ဟု KIO/KIA သတိပေး သတင်းနှင့် မီဒီယာ ကွန်ရက်။ ၂၀၂၆ ခုနှစ် အောက်တိုဘာလ ၇ ရက်။ ကချင်ပြည်၊ ရွှေကူခရိုင်အတွင်းရှိ စစ်ရေးအရ အရေးပါသည့် ရွှေကူ-ငအိုး လမ်းမကြီးကို သွားလာခွင့် ပိတ်ပင် လိုက်ပြီး ယင်းလမ်းပိုင်းကို ဆက်လက်အသုံးပြုပါက စစ်အုပ်စု၏ ဒလန်အဖြစ် သတ်မှတ်သွားမည်ဟု ကချင် လွတ်လပ်ရေးတပ်မတော် (KIO/KIA) က ထပ်မံသတိပေး ထုတ်ပြန်လိုက်သည်။ ယခုသတိပေးချက်ကို KIO/KIA အမှတ် (၁၁) တပ်မဟာ၊ အမှတ် (၁၂) တပ်ရင်းက အောက်တိုဘာလ ၅ ရက်စွဲ ဖြင့် ထုတ်ပြန်ခဲ့ခြင်းဖြစ်သည်။ ရွှေကူခရိုင်အတွင်း နေထိုင်ကြသည့် ပြည်သူများအနေဖြင့် ပိတ်ပင်ထားသော ရွှေကူ-ငအိုး လမ်းမကြီးကို အသုံး မပြုကြရန်နှင့် ရွှေကူနှင့် ငအိုးဘက်သို့ သွားလာပါက KIO/KIA ဘက်က သတ်မှတ်ပေးထားသည့် အခြားလမ်း ကြောင်းများကိုသာ အသုံးပြုကြရန် ဖော်ပြထားသည်။ ထုတ်ပြန်ချက်၏ ပတ်သက်၍ ရွှေကူ မြေပြင်ကာကွယ်ရေး တပ်ဖွဲ့ဝင်တစ်ဦးက “ထုတ်ပြန်ချက်အရတော့ ဒီလမ်းကို KIO/KIA က တရားဝင် ပိတ်ထားတာပဲ။ အဲဒီတော့ ဒီနေရာမှာ သွားလာတယ်ဆိုရင် အချိန်မရွေး ရန်သူ့နယ်မြေ ဖြစ်တဲ့အတွက်ကြောင့် အချိန်မရွေး ထိတွေ့တိုက်ပွဲလည်း ဖြစ်နိုင်သလို ရန်သူ့မိတ်ဆွေ ကွဲကွဲ ပြားပြား သိအောင်လို့ ထုတ်ပြန်တဲ့ သဘောဖြစ်ပါတယ်” ဟု ပြောသည်။ ထို့ပြင် ပိတ်ပင်ထားသည့် လမ်းပိုင်းကို ဆက်လက်အသုံးပြု သွားလာပါက စစ်အုပ်စု၏ သတင်းပေး၊ သတင်းယူ သူ ဒလန်အဖြစ် သတ်မှတ်သွားမည်ဖြစ်ပြီး ယင်းသို့ သွားလာမှုကြောင့် နောက်ဆက်တွဲ ဖြစ်လာသည့် ပြဿနာ များကို KIO/KIA ဘက်က လုံးဝတာဝန်ယူ ဖြေရှင်းပေးမည် မဟုတ်ဟုလည်း သတိပေးထားသည်။ စစ်အုပ်စုတပ်က ထိန်းချုပ်ထားသည့် ရွှေကူ-ငအိုး လမ်းမကြီးသည် ငအိုးမှတစ်ဆင့် ရွှေကူ၊ ထိုမှတစ်ဆင့် ဗန်းမော်ဘက်သို့ ဆက်သွားနိုင်သည့် အဓိက လမ်းကြောင်းဖြစ်သောကြောင့် နှစ်ဖက်တပ်များအတွက် စစ်ရေး အရ ဗျူဟာမြောက်သည့် လမ်းကြောင်းတစ်ခု ဖြစ်သည်။ အခြား ကာကွယ်ရေးတပ်ဖွဲ့ဝင်ကလည်း “ဒီလမ်းပိုင်းကလည်း စစ်ကောင်စီက စိုးမိုးထားတာ။ လမ်းပိုင်းရော နယ်မြေပါ စိုးမိုးဖို့အတွက် နှစ်ဖက်တပ်တွေက ကြိုးစားနေကြတာပါ။ ဒီလမ်းက ငအိုး-ရွှေကူ-ဗန်းမော် ဆိုတော့ နှစ်ဖက်လုံးအတွက် အရေးကြီးတယ်။ ဒါကြောင့်လည်း ဇွန်ကတည်းကနေ တိုက်ပွဲတွေက ဖြစ်နေတာ” ဟု ဆက်ပြောသည်။ ပြီးခဲ့သည့် ဇွန်လအစပိုင်းမှစ၍ စစ်အုပ်စုတပ်က ထီးချိုင့်-ငအိုးဘက်မှ စစ်ကြောင်း ၃ ကြောင်းခွဲကာ အင်အား အများအပြားဖြင့် ရွှေကူဘက်သို့ ထိုးစစ်ဆင်လာသဖြင့် ရွှေကူ-ငအိုး လမ်းကြောင်းတစ်လျှောက် နှစ်ဖက် တပ်များအကြား တိုက်ပွဲများ နေ့စဉ်နီးပါး ပြင်းထန်စွာ ဖြစ်ပွားခဲ့သည်။ KIO/KIA တပ်ရင်း ၁၂ သည် ပြီးခဲ့သည့် ၂၀၂၄ ခုနှစ်၊ ဇွန်လ ၈ ရက်နေ့ကလည်း ရွှေကူမြို့အဝင် လမ်းမကြီးနှင့် ငအိုး-ရွှေကူ လမ်းမကြီးတို့ကို ရက်အကန့်အသတ်မရှိ ပိတ်ပင်ခဲ့သည့်အပြင် ရွှေကူမြို့အတွင်းရှိ ပြည်သူများကို မြို့မှ ထွက်ခွာကြရန် ပထမအကြိမ် သတိပေး ထုတ်ပြန်ခဲ့ဖူးသည်။ လက်ရှိရက်ပိုင်းအတွင်း အဆိုပါ လမ်းပိုင်းတွင် တိုက်ပွဲ ဖြစ်ပွားသည့် အခြေအနေ မတွေ့ရသေးသော်လည်း စစ်အုပ်စုတပ်၏ မြေပြင်ထိုးစစ်နှင့် လေကြောင်းတိုက်ခိုက်မှုများ ဆက်လက်ရှိနေသဖြင့် မကြာမီ တိုက်ပွဲများ ပြန်လည်ပြင်းထန်လာနိုင်သည့် စစ်ရေးအခြေအနေကြောင့် ယခုကဲ့သို့ ဒုတိယအကြိမ် ထပ်မံထုတ်ပြန်လာခြင်း ဖြစ်သည်။ ဓါတ်ပုံ - Reuters #KIO #KIA #Kachinstate

ကချင်ပြည်နယ် ရွှေကူ-ငအိုး လမ်းမကြီးသုံးသူကို ဒလန် အဖြစ် သတ်မှတ်မည်ဟု KIO/KIA သတိပေး

ကချင်ပြည်နယ် ရွှေကူ-ငအိုး လမ်းမကြီးသုံးသူကို ဒလန် အဖြစ် သတ်မှတ်မည်ဟု KIO/KIA သတိပေး သတင်းနှင့် မီဒီယာ ကွန်ရက်။ ၂၀၂၆ ခုနှစ် အောက်တိုဘာလ ၇ ရက်။ ကခ…

  • October 7, 2026
မကွေးတိုင်း ကံမတွင် မြေနုကျွန်း ကမ်းပါးကျွံကျ၍ ဒေသခံ ၁၀၀ ကျော် အရေးပေါ် ရွှေ့ပြောင်းရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၇ ရက်။ မကွေးတိုင်း၊ သရက်ခရိုင် ကံမမြို့နယ် အမှတ် (၂) ရပ်ကွက်ရှိ မြေနုကျွန်းတွင် ကမ်းပါးပြို၍ မြေအောက်သို့ ကျွံကျမှု ဖြစ်ပွားခဲ့သဖြင့် ဘေးအန္တရာယ် စိုးရိမ်ရသည့် အိမ်ခြေ ၃၆ လုံးမှ ဒေသခံ ၁၀၀ ကျော်ကို ဘေးလွတ်ရာ သို့ အရေးပေါ် ရွှေ့ပြောင်းပေးခဲ့ရကြောင်း ဒေသခံများက ပြောသည်။ မိုးသည်းထန်စွာ ရွာသွန်းမှုကြောင့် စီးဆင်းလာသည့် တောင်ကျရေ၊ ချောင်းရေများ၏ ရေစီးအားသည် ဧရာဝတီ မြစ်ရေနှင့် ထိပ်တိုက်တွေ့ဆုံကာ ဝဲကတော့ဖြစ်ပေါ်ပြီး မြေအောက်သို့ ရေများ ဝင်ရောက်လှိုက်စားရာမှ အောက်တိုဘာလ ၅ ရက်နေ့၊ ည ၉ နာရီ မိနစ် ၅၀ ဝန်းကျင်တွင် မြေကျွံကျ၍ မြစ်ကမ်းပါး ပြိုကျခဲ့ခြင်း ဖြစ် သည်။ ဖြစ်စဉ်နှင့် ပတ်သက်၍ အသက် ၆၀ အရွယ် ဒေသခံ အမျိုးသားတစ်ဦးက “မိုးများတော့ ချောင်းရေတွေက မြစ်ထဲ ဝါးလုံးထိုး ဆင်းတယ်။ ကျောက်မော်ဦး ရေဝဲနဲ့ ဆုံပြီး မြေအောက်က ရေဝင် ပြိုကျတာ။ ကမ်းပါး လည်း ပြိုတာပေါ့” ဟု ပြောသည်။ ကမ်းပါးပြိုကျမှုကြောင့် စိုးရိမ်ရသည့် အိမ်ခြေ ၃၆ လုံးမှ လူဦးရေ ၁၀၀ ကျော်ကို ကံမမြို့နယ် မီးသတ်စခန်းမှ တပ်ဖွဲ့ဝင်များနှင့် လူမှုကူညီရေးအသင်းများက မြို့နယ် သာသနာ့ဗိမာန်သို့ အရေးပေါ် ကူညီရွှေ့ပြောင်း နေရာချ ထားပေးခဲ့ရသည်။ ယခု ပြိုကျသည့် မြေနုကျွန်းမှာ အမှတ် (၂) ရပ်ကွက်၏ အစိတ်အပိုင်း ရပ်ကွက်ငယ်တစ်ခုဖြစ်ပြီး၊ ဒေသခံများ သည် စာသင်ကျောင်းနှင့် သာမန် ရေကြီးရေလျှံမှုများတွင် မြို့ပေါ်သို့ ရွှေ့ပြောင်းနေထိုင်ရန် မလိုဘဲ အစဉ် အဆက် နေထိုင်လာကြသူများ ဖြစ်ကြောင်း ဆိုသည်။ ကူညီကယ်ဆယ်ရေးတွင် ပါဝင်သူ အသက် ၄၀ အရွယ် ဒေသခံတစ်ဦးကလည်း “ရွှေစည်းခုံဘုရားရဲ့ အရှေ့ဘက် မြေနုကျွန်းပေါ်မှာ နေကြတာ။ သာမန် ရေကြီးရုံနဲ့ မရွှေ့ရဘူး။ အခုက အောက်က လှိုက်စားပြီး ကျွံကျလို့ အရေးပေါ် ရွှေ့ရတာ” ဟု ပြောသည်။ မကွေးတိုင်းအတွင်းရှိ ဧရာဝတီမြစ်ကမ်းဘေး ကျေးရွာများသည် မိုးရာသီနှင့် မြစ်ရေကျချိန်များတွင် မြစ်ကမ်းပါး ပြိုကျမှုများကို နှစ်စဉ် ကြုံတွေ့နေရခြင်း ဖြစ်သည်။ ယခု ၂၀၂၆ ခုနှစ်အတွင်း ဧရာဝတီမြစ်ရေ သုံးကြိမ်ထက်မနည်း စိုးရိမ်ရေမှတ် အထက် မြင့်တက်ခဲ့မှုကြောင့် ကံမမြို့နယ်အပြင် ပခုက္ကူ၊ ရေစကြို၊ ချောက်၊ ဆိပ်ဖြူ၊ ရေနံချောင်း၊ မကွေး၊ မင်းဘူးနှင့် အောင်လံမြို့နယ်တို့၌ လည်း မြစ်ကမ်းပါး ပြိုကျမှုများ ဖြစ်ပွားလျက်ရှိကြောင်း ဘေးအန္တရာယ်ဆိုင်ရာ စီမံခန့်ခွဲမှု ဦးစီးဌာနက ထုတ်ပြန် သည်။ ဓါတ်ပုံ - Crd #ကံမမြို့နယ်

မကွေးတိုင်း ကံမတွင် မြေနုကျွန်း ကမ်းပါးကျွံကျ၍ ဒေသခံ ၁၀၀ ကျော် အရေးပေါ် ရွှေ့ပြောင်းရ

မကွေးတိုင်း ကံမတွင် မြေနုကျွန်း ကမ်းပါးကျွံကျ၍ ဒေသခံ ၁၀၀ ကျော် အရေးပေါ် ရွှေ့ပြောင်းရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၇ ရက်။ …

  • October 7, 2026
×Close