သတင်း

ချောင်းဦးတွင် စစ်တပ် စီးနင်းပစ်ခတ်မှုကြောင့် အရပ်သားများ သေဆုံး၊ ရွာများကို မီးရှို့ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂ ရက်။ စစ်ကိုင်းတိုင်း၊ ချောင်းဦးမြို့နယ်အတွင်း စစ်အုပ်စုတပ်က စစ်ကြောင်းထိုး စီးနင်းပစ်ခတ်မှုများကြောင့် စက်တင်ဘာလ ၁ ရက်နေ့အထိ လေးရက်တာကာလအတွင်း အရပ်သား ၃ ဦး သေဆုံးကာ ၂၀ နီးပါး ဒဏ်ရာ ရရှိခဲ့ပြီး နေအိမ်များလည်း မီးရှို့ဖျက်ဆီးခံခဲ့ရသည်။ မုံရွာမြို့နယ်အတွင်း ဖြစ်ပွားခဲ့သည့် တိုက်ပွဲမှ ပြန်ဆုတ်လာသည့် အင်အား ၃၀၀ ကျော်ပါ စစ်တပ် စစ်ကြောင်း သည် စက်တင်ဘာလ ၁ ရက်နေ့၊ နံနက်ပိုင်းတွင် ခင်မွန်ကျေးရွာအတွင်းသို့ လက်နက်ကြီး၊ လက်နက်ငယ်များ ဖြင့် ပစ်ခတ်ဝင်ရောက်ခဲ့ရာ အသက် ၃၅ နှစ်အရွယ် အမျိုးသမီးတစ်ဦးနှင့် အသက် ၇၀ အရွယ် ဖခင်ဖြစ်သူတို့ နေရာတွင်ပင် သေဆုံးခဲ့ရသည်။ စစ်ကိုင်းတိုင်း ဒေသခံတစ်ဦးက "မုံရွာဘက်မှာ တိုက်ပွဲဖြစ်ပြီး ပြန်ဆုတ်လာတဲ့ စစ်တပ်က ရွာထဲကို ရုတ်တရက် လက်နက်ကြီးရော သေနတ်တွေပါ ပစ်ဝင်လာတာ။ သားအဖ နှစ်ယောက် လက်နက်ကြီးထိပြီး ပွဲချင်းပြီး ဆုံးသွားတာပါ” ဟု ပြောသည်။ အဆိုပါ စစ်အုပ်စုတပ် စစ်ကြောင်းသည် ဩဂုတ်လ ၃၀ ရက်နေ့ကလည်း ကျီကုန်းအရှေ့ရွာနှင့် အနောက်ရွာ အနီးသို့ ဒရုန်းဖြင့် ဗုံးသီးများ ကြဲချခဲ့ရာ အရပ်သား ၉ ဦး ဒဏ်ရာရရှိခဲ့ပြီး စစ်ကြောင်းနှင့် ထိတွေ့မိသည့် ဒေသခံ အမျိုးသားတစ်ဦးလည်း ပစ်သတ်ခံခဲ့ရသည်။ ထို့ပြင် ဩဂုတ်လ ၂၉ ရက်နေ့ စစ်ကြောင်းစတင်ထွက်ခွာစဉ်ကတည်းက ဒေသခံ ၅၀ ခန့်ကို စစ်အုပ်စုတပ်က ဖမ်းဆီးခေါ်ဆောင်သွားခဲ့ရာ လက်ရှိအချိန်ထိ ပြန်လည်လွတ်မြောက်လာခြင်း မရှိသေးပေ။ မုံရွာနှင့် ချောင်းဦးမြို့နယ်ကြားရှိ ရွှေဒါးကျကျေးရွာသို့ ဩဂုတ်လ ၃၀ ရက်နေ့တွင် စစ်အုပ်စုတပ် ရောက်ရှိ လာပြီးနောက် ဩဂုတ်လ ၃၁ ရက်နှင့် စက်တင်ဘာလ ၁ ရက်နေ့များ၌ ကျေးရွာအတွင်းရှိ နေအိမ်များကို မီးတင်ရှို့ခဲ့ရာ အနည်းဆုံး နေအိမ် ၁၀ လုံးထက်မနည်း မီးလောင်ပျက်စီးခဲ့သည်။ ဒေသခံ ကာကွယ်ရေးတပ်ဖွဲ့ဝင်တစ်ဦးက “ရွှေဒါးကျရွာထဲမှာ စစ်တပ်က တပ်စွဲထားတုန်းပဲဆိုတော့ ရွာထဲ ပြန်ဝင်လို့ မရသေးဘူး။ အိမ် ဘယ်နှစ်လုံးပါသွားလဲဆိုတာ အသေးစိတ် မသိရသေးပေမဲ့ ၁၀ လုံးထက်မနည်း မီးလောင်သွားတာတော့ သေချာတယ်။ တိုက်ပွဲသံတွေလည်း ဆက်ကြားနေရတယ်” ဟု ပြောသည်။ အဆိုပါ စစ်ကြောင်းထိုးစီးနင်းမှုသည် ပြီးခဲ့သည့် ဩဂုတ်လ ၂၅ ရက်နေ့က ချောင်းဦးမြို့နယ် ပြည်သူ့လုံခြုံရေး အဖွဲ့ (ပ.လ.ဖ) က စစ်တပ်သတင်းပေးဟု စွပ်စွဲချက်ဖြင့် ဖမ်းဆီးစစ်ဆေးစဉ် ရွှေဒါးကျရွာ ဆရာတော် ပျံလွန် တော်မူခဲ့သည့် ဖြစ်စဉ်အပြီးတွင် စစ်အုပ်စုတပ် ထောက်ခံသူများ၏ လှုံ့ဆော်မှုဖြင့် ဖြစ်ပေါ်လာခြင်း ဖြစ်သည်။ လက်ရှိတွင် မုံရွာနှင့် ချောင်းဦးမြို့နယ်အတွင်းရှိ ကျေးရွာ ၁၅ ရွာခန့်မှ ဒေသခံ ပြည်သူ ၈,၀၀၀ နီးပါး စစ်ဘေး လွတ်ရာသို့ ထွက်ပြေးတိမ်းရှောင်နေကြရသည်။ "ရွာ ၁၀ ရွာမကဘူး၊ လူ ရှစ်ထောင်လောက် နီးစပ်ရာ တောတောင်တွေထဲ ပြေးနေကြရတာ။ အဝေးကနေ ကိုယ့်ရွာတွေ မီးရှို့ခံရတာ မီးခိုးတွေ မြင်နေရပေမဲ့ ဘာမှသွားမလုပ်နိုင်ကြဘူး။ အရေးကြီးတာက လူတွေ လွတ်အောင် ပြေးနေရတာပါပဲ။ စစ်ရှောင်တွေအတွက် ဘာလိုလဲမေးရင် အကုန်လိုနေတော့ ချက်ချင်း ဘာ ပြောရမှန်းတောင် မသိဘူး။ ရှိတာလေးတွေ မျှပြီးစားကြ နေကြနဲ့ ဘေးကင်းဖို့ကပဲ အဓိကဖြစ်နေတယ်” ဟု စစ်ဘေးရှောင်များကို အကူအညီပေးနေသူ တစ်ဦးက ပြောသည်။ စစ်အုပ်စုတပ် စစ်ကြောင်းထိုးလာသည့် ဩဂုတ်လ ၂၉ ရက်နေ့မှစ၍ မုံရွာနှင့် ချောင်းဦးမြို့နယ်အတွင်း စစ်အုပ်စုတပ် အထိုင်ချရာ နေရာများတွင် ဒေသခံ ကာကွယ်ရေးတပ်ဖွဲ့များနှင့် ထိတွေ့တိုက်ပွဲများ နေ့စဉ် ဆက်လက်ဖြစ်ပွားလျက် ရှိသည်။ ဓါတ်ပုံ - (ပုံဟောင်း / ချောင်းဦးမြို့နယ်ထဲက ကျီးကုန်းရွာရှိ နေအိမ်များ မီးရှို့ခံရစဉ်) #ချောင်းဦးမြို့နယ် #စစ်ကိုင်းတိုင်း

ချောင်းဦးတွင် စစ်တပ် စီးနင်းပစ်ခတ်မှုကြောင့် အရပ်သားများ သေဆုံး၊ ရွာများကို မီးရှို့

ချောင်းဦးတွင် စစ်တပ် စီးနင်းပစ်ခတ်မှုကြောင့် အရပ်သားများ သေဆုံး၊ ရွာများကို မီးရှို့ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၂ ရက်။ စစ်…

  • September 3, 2026
ရွှေကူတွင် စစ်တပ် စခန်းတစ်ခုကို KIA သိမ်းပိုက်ပြီးနောက် စစ်ရေး ဆက်လက်တင်းမာ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂ ရက်။ ဧရာဝတီမြစ်ကြောင်းအတိုင်း ဆန်တက်လာသည့် စစ်သင်္ဘောအုပ်စု လုံခြုံရေးအတွက် ခြေကုပ်ယူထားသော ကချင်ပြည်၊ ရွှေကူမြို့နယ်၊ ဇင်းဘုံကျေးရွာအနီးရှိ စစ်အုပ်စုတပ်၏ စခန်းကုန်းတစ်ခုကို KIA နှင့် KPDF ပူးပေါင်း တပ်များက တိုက်ခိုက်သိမ်းပိုက်ပြီးနောက် ယနေ့ချိန်ထိ နှစ်ဖက်ကြား စစ်ရေးဆက်လက်တင်းမာနေသည်။ အဆိုပါ ဇင်းဘုံကျေးရွာ အနီးရှိ စစ်အုပ်စုတပ်၏ စခန်းကုန်းကို ကချင်လွတ်လပ်ရေးတပ်မတော် KIA နှင့် KPDF ပူးပေါင်းတပ်တို့က ဩဂုတ်လ ၃၀ ရက်နေ့တွင် တိုက်ခိုက်သိမ်းပိုက်လိုက်ခြင်း ဖြစ်သည်။ အဆိုပါ စခန်းကုန်းသည် မန္တလေး ဂေါဝိန်ဆိပ်ကမ်းမှ ဗန်းမော်သို့ ဆန်တက်မည့် စစ်တပ် ရေယာဉ် ၁၅ စီး လမ်းကြောင်းလုံခြုံရေးအတွက် ဒုတိယမြစ်ကျဉ်းမရောက်မီ ယာယီတပ်စွဲထားသည့် အရေးပါသော စခန်းတစ်ခု ဖြစ်သည်။ မြေပြင်ရှိ တော်လှန်ရေးတပ်ဖွဲ့ဝင်တစ်ဦးက “ဒီဇင်းဘုံရွာဆိုတာ ဒုတိယမြစ်ကျဉ်း မရောက်ခင် စစ်ကောင်စီ အတွက် လုံခြုံရေးအရ အရမ်းအရေးကြီးတဲ့ ခြေကုပ်စခန်းတစ်ခု ဖြစ်ပါတယ်။ သူတို့ဘက်က အထိအခိုက် အရမ်းများသွားတာကြောင့် ဒဏ်ရာရသူတွေကို ရဟတ်ယာဉ်နဲ့ပါ လာရောက်သယ်ထုတ်သွားရတယ်” ဟု ပြော သည်။ တိုက်ပွဲအတွင်း စစ်အုပ်စုတပ်ဘက်မှ တပ်ရင်းမှူးတစ်ဦး အပါအဝင် သေဆုံးမှုနှင့် ထိခိုက်ဒဏ်ရာရရှိမှု များပြား ခဲ့သလို ဧရာဝတီမြစ်ကြောင်းအတိုင်း ပါလာသည့် စစ်အုပ်စုတပ်၏ တွန်းသင်္ဘောတစ်စီးကိုလည်း တော်လှန်ရေး ပူးပေါင်းတပ်များက ကြားဖြတ်တိုက်ခိုက် သိမ်းပိုက်ခဲ့သည်။ စခန်းကုန်း လက်လွှတ်လိုက်ရပြီးနောက် စစ်အုပ်စုတပ်က အင်အား ၂၀၀ ခန့်ပါ စစ်ကြောင်း လေးကြောင်းဖြင့် ပြန်လည်ထိုးစစ်ဆင်လာရာ ရွှေကူ-စင်းခန်း ကားလမ်းမနှင့် တော်လှန်တောင်၊ ဇင်းဘုံတောင်တကြောတို့တွင် ထိတွေ့တိုက်ပွဲများ ဆက်လက် ဖြစ်ပွားနေသည်။ ဒေသခံ ရွှေကူကာကွယ်ရေးတပ်ဖွဲ့ဝင်တစ်ဦးကလည်း “ဩဂုတ် ၂၅ ရက်လောက်ကတည်းက စစ်တပ်က ဇင်းဘုံ ဘက်ကို မော်တော်တွေနဲ့ တက်လာပြီး အင်အားဖြန့်တာ။ တော်လှန်ရေးတပ်တွေက ၃၀ ရက်နေ့မှာ အကုန်ပြန် တိုက်ထုတ်လိုက်တော့ နယ်မြေကို ပြန်ထိန်းထားနိုင်ပါပြီ။ ဒါပေမဲ့ စစ်တပ်က နေ့တိုင်း လက်နက်ကြီးတွေရော လေကြောင်းကနေ ကလပ်စတာဗုံးတွေနဲ့ပါ ရမ်းပြီး ဆက်တိုက်ကြဲနေတာ” ဟု ပြောသည်။ စစ်အုပ်စုတပ်၏ လေကြောင်းမှ ကလပ်စတာဗုံးများ အသုံးပြု၍ ဗုံးကြဲမှုနှင့် လက်နက်ကြီး ပစ်ခတ်မှုများကြောင့် မြစ်ကမ်းဘေးရှိ ကျေးရွာများမှ အရပ်သား ပြည်သူအချို့ သေဆုံးဒဏ်ရာရရှိခဲ့ပြီး ပြည်သူ့နေအိမ်များလည်း ပျက်စီးခဲ့ရသည်။ “သင်္ဘောတွေက ရွှေကူဆိပ်ကမ်းမှာ သောင်တင်နေတုန်းပဲ။ စင်းခန်းဘက်ကို ဆက်တက်လို့မရတော့ ရွာတွေ ဘက်ကို လက်နက်ကြီးတွေနဲ့ ရမ်းပစ်တာ။ ရွာသားတွေလည်း တိုက်ပွဲသံကြားရင် ဘေးလွတ်ရာ ပြေးနေကြ ရတယ်” ဟု ရွှေကူမြို့နယ်မှ ဒေသခံအမျိုးသားတစ်ဦးက ဆိုသည်။ လက်ရှိတွင် ဗန်းမော်မြို့သို့ စစ်ကူနှင့် ရိက္ခာများ ဖြည့်တင်းရန် ဆန်တက်လာသည့် စစ်အုပ်စုတပ်၏ စစ်ရေယာဉ် ၁၅ စီးသည် ရွှေကူမြို့ရှိ သင်္ဘောဆိပ်များ၌ ရပ်နားထားရဆဲ ဖြစ်သည်။ KIA နှင့် ပူးပေါင်းတပ်များက စင်းခန်း-ဇင်းဘုံ လမ်းကြောင်းကို အပြင်းအထန် ပိတ်ဆို့ထားသဖြင့် ဒေသတွင်း စစ်ရေးမှာ ဆက်လက် တင်းမာနေဆဲ ဖြစ်သည်။ ဓါတ်ပုံ - (၂၀၂၆ ခုနှစ်၊ ဩဂုတ်လကုန်ပိုင်းတွင် စစ်အုပ်စုတပ်သင်္ဘော ပစ်ခတ်ခံရပုံ / CJ) #ရွှေကူ #AA

ရွှေကူတွင် စစ်တပ် စခန်းတစ်ခုကို KIA သိမ်းပိုက်ပြီးနောက် စစ်ရေး ဆက်လက်တင်းမာ

ရွှေကူတွင် စစ်တပ် စခန်းတစ်ခုကို KIA သိမ်းပိုက်ပြီးနောက် စစ်ရေး ဆက်လက်တင်းမာ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၂ ရက်။ ဧရာဝတီမြစ်ကြ…

  • September 3, 2026
တနင်္သာရီတွင် စစ်တပ်က လေကြောင်းမှ ဗုံးကြဲအပြီး ရွာသားနှစ်ဦးကို ဖမ်းဆီးသွား သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁ ရက်။ တနင်္သာရီတိုင်း၊ မြိတ်ခရိုင်၊ တနင်္သာရီမြို့နယ်၊ ရေခမ်းချောင်းကျေးရွာအတွင်းသို့ စစ်ကြောင်းထိုးလာသည့် စစ်အုပ်စုတပ်က ဒေသခံ ရွာသားနှစ်ဦးကို ဖမ်းဆီး၍ ဇဝဲကျေးရွာအခြေစိုက် ခမရ (၅၅၆) တပ်ရင်းသို့ ခေါ်ဆောင် သွားကြောင်း ဒေသခံများက ပြောသည်။ ပြီးခဲ့သည့် ဩဂုတ်လ ၃၁ ရက်နေ့ ညနေ ၄ နာရီခန့်တွင် ဇဝဲကျေးရွာဘက်မှ ရေခမ်းချောင်းကျေးရွာသို့ စစ်ကြောင်း ပြန်ထိုးလာသည့် အမှတ် (၅၅၆) ခြေမြန်တပ်ရင်းမှ အဆိုပါ ရွာသားနှစ်ဦးကို ဖမ်းဆီးသွားခဲ့ခြင်း ဖြစ်သည်။ ဖမ်းဆီးခံရသူများမှာ အသက် ၂၀ အရွယ်နှင့် အသက် ၅၀ အရွယ် အမျိုးသားနှစ်ဦး ဖြစ်သည်။ အင်အား ၁၀၀ ခန့်ပါဝင်သည့် အဆိုပါ စစ်အုပ်စု စစ်ကြောင်းသည် ဩဂုတ်လ ၂၈ ရက်နေ့က တုံးဗျောကျေးရွာမှ တစ်ဆင့် တောလမ်းအတိုင်း ရေခမ်းချောင်းကျေးရွာသို့ စစ်ကြောင်းစတင်ထိုးလာခဲ့ပြီး၊ ဩဂုတ်လ ၂၉ ရက်နေ့ တွင် ဇဝဲကျေးရွာဘက်သို့ ပြန်သွားဟန်ပြကာ ရွာအတွင်းသို့ ပြန်လည်ဝင်ရောက်လာခဲ့ခြင်း ဖြစ်သည်။ အသက် ၄၀ ခန့်အရွယ် ဒေသခံ ရွာသားတစ်ဦးက "သူတို့ ထွက်သွားပြီအထင်နဲ့ ရွာထဲဝင်တဲ့အချိန်မှာ ပြန်လှည့် ဝင်လာတာနဲ့ တိုးမိပြီး အဖမ်းခံလိုက်ရတာ" ဟု ပြောသည်။ လက်ရှိတွင် ဖမ်းဆီးခံထားရသူများနှင့် တွေ့ဆုံခွင့် မရရှိသေးသဖြင့် မိသားစုဝင်များအနေဖြင့် ၎င်းတို့၏ လုံခြုံရေးအတွက် စိုးရိမ်ပူပင်နေကြရသည်။ အဆိုပါ ဖမ်းဆီးမှု မဖြစ်ပွားမီ ဩဂုတ်လ ၃၁ ရက် မွန်းတည့် ၁၂ နာရီခန့်တွင်လည်း စစ်အုပ်စု က ရေခမ်း ချောင်းကျေးရွာ ဝန်းကျင်ကို ဂျက်တိုက်လေယာဉ်ဖြင့် ဗုံးကြဲတိုက်ခိုက်ခဲ့သေးသော်လည်း လူထု ထိခိုက်ဒဏ်ရာ ရရှိမှု မရှိခဲ့ကြောင်း ရွာသားများက ပြောသည်။ ရေခမ်းချောင်းကျေးရွာသည် ဇဝဲ-တကူ သွားလာသည့် လမ်းပိုင်းပေါ်တွင် တည်ရှိပြီး အိမ်ခြေ ၃၀ ခန့်သာရှိသည့် ကျေးရွာငယ်တစ်ခု ဖြစ်သည်။ #တနင်္သာရီ

တနင်္သာရီတွင် စစ်တပ်က လေကြောင်းမှ ဗုံးကြဲအပြီး ရွာသားနှစ်ဦးကို ဖမ်းဆီးသွား

တနင်္သာရီတွင် စစ်တပ်က လေကြောင်းမှ ဗုံးကြဲအပြီး ရွာသားနှစ်ဦးကို ဖမ်းဆီးသွား သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁ ရက်။ တနင်္သာရီတိုင…

  • September 2, 2026
ရခိုင်-မကွေးအစပ် ရခိုင်ရိုးမတွင် စစ်တပ်နှင့် AA တို့ တိုက်ပွဲပြင်းထန်၊ လေကြောင်းမှပါ ဗုံးကြဲနေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂ ရက်။ ရခိုင်ပြည်၊ အမ်းမြို့နယ်နှင့် မကွေးတိုင်းဒေသကြီး၊ မင်းတုန်းမြို့နယ်အစပ် ရခိုင်ရိုးမပေါ်ရှိ သဖန်းရောင်ကျေး ရွာနှင့် တလိုင်းတောင်ကျေးရွာ အနီးဝန်းကျင်တွင် စစ်အုပ်စုတပ်နှင့် အာရက္ခတပ်တော် (AA) တို့အကြား တိုက်ပွဲ များ ပြင်းထန်လျက်ရှိပြီး စစ်တပ်ဘက်မှ လေကြောင်းပစ်ကူများ ပေးနေကြောင်း ဒေသတွင်း စစ်ရေးသတင်း ရင်းမြစ်များက ပြောသည်။ မကွေးတိုင်း၊ မင်းတုန်းမြို့နယ်အတွင်း ရခိုင်ရိုးမခြေရင်း၌ တည်ရှိသည့် သဖန်းရောင်ကျေးရွာတွင် စစ်အုပ်စုတပ် က အထိုင်ချ၍ ရိုးမပေါ်သို့ စစ်ကြောင်းထိုးလျက်ရှိရာ AA ထိန်းချုပ်ထားသော တလိုင်းတောင်ကျေးရွာ မရောက် မီတွင် နှစ်ဖက် ထိတွေ့တိုက်ပွဲများ စတင်ဖြစ်ပွားခဲ့ခြင်း ဖြစ်သည်။ ဒေသတွင်း စစ်ရေးသတင်းရင်းမြစ်တစ်ဦးက “သရက်ခရိုင်ကို စစ်အင်အားတွေ ဖြည့်ထားတာ။ တလိုင်းရွာ မရောက်ခင် AA တပ်တွေနဲ့ စဖြစ်တာ။ တိုက်ပွဲဖြစ်နေတာ ၄ ရက်လောက်ရှိပြီ” ဟု ပြောသည်။ လက်လွှတ်လိုက်ရသည့် အမ်းမြို့နယ်အတွင်း စစ်အုပ်စုတပ်သည် မကွေးတိုင်း မင်းတုန်းဘက်မှတစ်ဆင့် ရိုးမလမ်းအတိုင်း အင်အားအမြောက်အမြားဖြင့် ထိုးစစ်ဆင်ကာ ဆုံးရှုံးသွားသော နယ်မြေများနှင့် စစ်ရေးဗျူဟာ မြောက် စခန်းများကို ပြန်လည်ရယူနိုင်ရန် မင်းတုန်း-အမ်း လမ်းကြောင်းအတိုင်း ထိုးစစ်ဆင်လျက်ရှိသည်။ တစ်ဖက်တွင်လည်း မင်းတုန်းဘက်မှ တက်လာမည့် စစ်အုပ်စု စစ်ကြောင်းများ အမ်းမြို့နယ်အတွင်းသို့ ပြန်လည် ဝင်ရောက်မလာနိုင်စေရေးနှင့် လက်ရှိ စိုးမိုးထားပြီးဖြစ်သည့် ရခိုင်ဒေသ စစ်ရေးအသာစီးရမှုကို ဆက်လက်ထိန်း ချုပ်ထားနိုင်ရန် အတွက် အဆိုပါ ရိုးမဝင်ပေါက် လမ်းကြောင်းကို AA က စိုးမိုးပိတ်ဆို့ ဖြတ်တိုက်နေခြင်း ဖြစ် သည်။ တိုက်ပွဲဖြစ်ပွားစဉ် AA ဘက်က စနိုက်ပါများဖြင့် ဖြတ်တိုက်သဖြင့် စစ်အုပ်စုတပ်ဘက်မှ အထိနာနေပြီး လေ ကြောင်းမှ တစ်ဆင့် ဗုံးကြဲ ပစ်ကူပေးနေရကြောင်း မြေပြင်စစ်ရေးသတင်းရင်းမြစ်က ပြောသည်။ မင်းတုန်းမြို့နယ် စစ်ရေးသတင်းရင်းမြစ် ဒေသခံတစ်ဦးက “နေပြည်တော်ဘက်အထိ သရက်ခရိုင်ကို စစ်အင် အားတွေ ဖြည့်ထားတာက လေးရာလောက် ရိုးမပေါ် တက်သွားပြီ။ သဖန်းရောင်ရွာမှာ စစ်တပ်အထိုင်ချပြီး ရိုးပေါ် တက်တော့ တလိုင်းရွာမရောက်ခင် AA တပ်စိတ်တွေနဲ့ စဖြစ်တာ။ AA က စနိုက်ပါအားနဲ့ဆိုတော့ စစ်တပ်က လေကြောင်းကူတယ်။ နှစ်ဖက်လုံး အကျအဆုံးရှိတယ်လို့ ကြားတယ်။ အခု ပေါ်တာဆွဲသွားတဲ့ ဒေသခံတွေ တောင် ထိတယ်တဲ့” ဟု ပြောသည်။ စစ်ရေးအရ အရေးပါသည့် အဆိုပါ အမ်း-မင်းတုန်း ရိုးတောင်ကျော်လမ်းပိုင်းတွင် စစ်အုပ်စုတပ်က လေကြောင်း မှ ဗုံးကြဲတိုက်ခိုက်မှုများ ဆက်လက်ပြုလုပ်နေသဖြင့် AA ဘက်မှ ခရီးသွားပြည်သူများ မကွေးဘက်သို့ ဆင်း လာခြင်း မပြုရန် သတိပေးထားသလို မင်းတုန်းဘက်အခြမ်းတွင်လည်း စစ်အုပ်စုတပ်က လမ်းပိုင်းကို ပိတ်ဆို့ ထားသည်။ အဆိုပါ ရိုးတောင်ကျော်လမ်းပိုင်းရှိ တလိုင်းတောင်ကျေးရွာကို စစ်အုပ်စုတပ်က ပြီးခဲ့သည့် ဩဂုတ်လအတွင်း ကလည်း လေကြောင်းမှ ဗုံးကြဲတိုက်ခိုက်ခဲ့သေးသည်။ ဓာတ်ပုံ - (တလိုင်းတောင်ကျေးရွာ ဩဂုတ်လ (၈) ရက်က လေကြောင်းမှ တိုက်ခိုက်ခံထားရသည့်ပုံ / AA)

ရခိုင်-မကွေးအစပ် ရခိုင်ရိုးမတွင် စစ်တပ်နှင့် AA တို့ တိုက်ပွဲပြင်းထန်၊ လေကြောင်းမှပါ ဗုံးကြဲနေ

ရခိုင်-မကွေးအစပ် ရခိုင်ရိုးမတွင် စစ်တပ်နှင့် AA တို့ တိုက်ပွဲပြင်းထန်၊ လေကြောင်းမှပါ ဗုံးကြဲနေ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၂ ရ…

  • September 2, 2026
မော်ချီး ခဲလုပ်ကွက်ကို စစ်အုပ်စု ဗုံးကြဲ၍ ကလေးများအပါအဝင် ၆ ဦး သေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂ ရက်။ ကရင်နီပြည်၊ ဖားဆောင်းမြို့နယ်၊ မော်ချီးဒေသ၌ မည်သည့်တိုက်ပွဲမှ ဖြစ်ပွားခြင်းမရှိဘဲ စစ်အုပ်စုတပ်က အရပ် သားများ နေထိုင်ရာ ရပ်ကွက်အတွင်းသို့ လေကြောင်းမှ ဗုံးကြဲတိုက်ခိုက်ခဲ့သဖြင့် ကလေးငယ်များ အပါအဝင် အပြစ်မဲ့ အရပ်သား ၆ ဦး ပွဲချင်းပြီး သေဆုံးကာ ၉ ဦး ထိခိုက်ဒဏ်ရာ ရရှိခဲ့ကြောင်း ဒေသခံများက ပြောသည်။ ပြီးခဲ့သည့် စက်တင်ဘာလ ၁ ရက်နေ့ ညနေ ၄ နာရီဝန်းကျင်တွင် မော်ချီး ခဲတူးဖော်ရေး လုပ်ကွက်အနီးရှိ ကျောက်ကြားရပ်ကွက် အတွင်းသို့ စစ်အုပ်စုတပ်က ဂျက်ဖိုက်တာ နှစ်စီးဖြင့် ဗုံးကြဲချသွားခဲ့ခြင်း ဖြစ်သည်။ လေကြောင်းမှ ရုတ်တရက် ဗုံးကြဲခံရမှုကြောင့် အရပ်သား နေအိမ်များ စိစိညှက်ညှက် ပျက်စီးခဲ့ရသည့်အပြင် အပြစ်မဲ့ ကလေးငယ်များနှင့် လူငယ်အချို့မှာ ပွဲချင်းပြီး သေဆုံးခဲ့ရသည်။ မော်ချီးဒေသခံ အမျိုးသားတစ်ဦးက “ဒီမှာ ဘာတိုက်ပွဲမှလည်း မရှိပါဘူး။ ညနေပိုင်း လူတွေ အိမ်မှာရှိနေချိန်မှာ ဂျက်ဖိုက်တာ နှစ်စီးနဲ့ ရုတ်တရက်လာပြီး ဗုံးတွေ ကြဲချသွားတာပါ။ လာတာတော့ နှစ်စီး၊ ရာသီဥတုကလည်း မိုးတွေ အုံ့နေတော့ ကြဲသွားတာပဲ သိလိုက်တယ်။ ကလေးတွေနဲ့ လူတွေ နေရာမှာတင် သေကုန်တာ။ အိမ်တွေ လည်း စိစိညှက်ညှက်ကို ပျက်စီးသွားတယ်” ဟု ပြောသည်။ ယခုဖြစ်စဉ်နှင့် ပတ်သက်၍ စစ်အုပ်စုတပ်၏ လုပ်ရပ်သည် ပြည်သူများကို အကြောက်တရားဖြင့် စစ်ရာဇဝတ်မှု ကျူးလွန်ခြင်းဖြစ်ကြောင်း မြေပြင်ရှိ အကူအညီပေးနေသူ ကရင်နီငယ်တစ်ဦးက ပြောသည်။ “စစ်အုပ်စုတပ်ဟာ သူတို့ အုပ်ချုပ်ရေး လက်လှမ်းမမီတော့တဲ့ ဒေသတွေက ပြည်သူတွေကို ပစ်မှတ်ထားပြီး အကြောက်တရားနဲ့ ဖိနှိပ်ဖို့ တမင် ရည်ရွယ်ချက်ရှိရှိ သတ်ဖြတ်နေတာဖြစ်ပါတယ်။ တိုက်ပွဲမရှိဘဲ အရပ်သား တွေကို ဒီလို ပစ်မှတ်ထား တိုက်ခိုက်တာဟာ ပြောင်ပြောင်တင်းတင်း စစ်ရာဇဝတ်မှု ကျူးလွန်တာပဲ ဖြစ်ပါ တယ်” ဟု ၎င်းက ပြောသည်။ မော်ချီးဒေသသည် တိုက်ပွဲ ဖြစ်ပွားခြင်းမရှိသော်လည်း စစ်အုပ်စုတပ်က မကြာခဏဆိုသလို လေကြောင်းမှ ဗုံးကြဲလေ့ရှိပြီး၊ ပြီးခဲ့သည့် ၂၀၂၅ ခုနှစ် ဩဂုတ်လတုန်းကလည်း မော်ချီးဒေသ လိုခါးလိုကျေးရွာ ကို လေကြောင်းမှ ဗုံးကြဲတိုက်ခိုက်ခဲ့သဖြင့် ပြည်သူ ၃၂ ဦးအထိ သေဆုံးခဲ့သည့် ဖြစ်စဉ်များ ရှိခဲ့ဖူးသည်။ မော်ချီးဒေသအပါအဝင် ကရင်နီပြည်အတွင်းရှိ စစ်အုပ်စုတပ် လက်လွှတ်လိုက်ရသည့် မြို့နယ်များနှင့် လက်နက် ကိုင် တော်လှန်ရေးအဖွဲ့များ စိုးမိုးထားသည့် ဒေသများတွင် လက်နက်ကြီး ပစ်ခတ်မှုနှင့် လေကြောင်းမှ ဗုံးကြဲမှု များ မကြာခဏ ပြုလုပ်လေ့ရှိသဖြင့် ဒေသခံ ပြည်သူများမှာ လုံခြုံရေးအတွက် စိုးရိမ်ထိတ်လန့်နေကြရှိသည်။ #မော်ချီး Photo:Crd

မော်ချီး ခဲလုပ်ကွက်ကို စစ်အုပ်စု ဗုံးကြဲ၍ ကလေးများအပါအဝင် ၆ ဦး သေဆုံး

မော်ချီး ခဲလုပ်ကွက်ကို စစ်အုပ်စု ဗုံးကြဲ၍ ကလေးများအပါအဝင် ၆ ဦး သေဆုံး သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၂ ရက်။ ကရင်နီပြည်၊ ဖားဆော…

  • September 2, 2026
ကလေး - တမူး လမ်းပိုင်းကို စစ်အုပ်စု ပြန်ဖွင့် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁ ရက်။ စစ်ကိုင်းတိုင်းအတွင်းရှိ မြန်မာ - အိန္ဒိယ နယ်စပ်ကုန်သွယ်ရေး လမ်းမကြီးဖြစ်သည့် ကလေး - တမူး အာရှလမ်း မကြီးကို စစ်အုပ်စုတပ်က ၄ နှစ်နီးပါးအကြာ ပိတ်ထားခဲ့ရာမှ စက်တင်ဘာလ ၁ ရက်နေ့တွင် ပြန်လည်ဖွင့်လှစ် လိုက်ကြောင်း ဒေသတွင်း ယာဉ်မောင်းများက ပြောသည်။ ယခင်က ချင်းပြည်သို့ စစ်အုပ်စုတပ်ဘက်မှ ရိက္ခာနှင့် စစ်လက်နက် ထောက်ပံ့ရန်အတွက် လေကြောင်းကိုသာ အဓိက အားကိုးခဲ့ရသော်လည်း ယခုအခါ လမ်းပိုင်း ပြန်ဖွင့်လိုက်ခြင်းကြောင့် သံချပ်ကာကားများနှင့် စစ်ကား ကြီးများ အသုံးပြု၍ ကုန်းလမ်းမှ လွယ်ကူစွာ ထိုးစစ်ဆင်လာနိုင်သည့် စစ်ရေးစိန်ခေါ်မှုများ ရှိနေသည်။ ဒေသတွင်း စစ်ရေးသတင်းမြစ်တစ်ဦးက “အရင်ပတ်တွေကတော့ တံတားက ပြင်နေသေးတယ်။ အခုက တံတားအားလုံးက ပြင်ပြီးပြီ။ ခမ်းပါတ်တို့၊ တွီဗန်တို့ အားလုံးဘာမှ မကျန်တော့ဘူး။ အကုန်သွားလို့ရနေပြီ။ ဒီကောင်တွေက တိုက်ရိုက်ဝင်ဆောင်ဖို့အတွက်က ဘာမှမခက်တော့ဘူးလေ။ တော်လှန်ရေးနယ်မြေကိုလည်း ခါးလည်က ဖြတ်ပြီးသားပဲ” ဟု ပြောသည်။ စစ်အာဏာမသိမ်းမီက တမူးနယ်စပ် ကုန်သွယ်ရေးစခန်းများမှတစ်ဆင့် အိန္ဒိယ - မြန်မာ ကုန်သွယ်မှုတန်ဖိုးမှာ တစ်နှစ်လျှင် အမေရိကန်ဒေါ်လာ သန်း ၁၀၀ မှ သန်း ၁၅၀ ကြား ရှိခဲ့သည်။ ထို့ပြင် အိန္ဒိယနိုင်ငံ၊ မိုးရေးမြို့မှ မြန်မာနိုင်ငံအလယ်ပိုင်းကို ဖြတ်၍ ထိုင်းနိုင်ငံ၊ မဲဆောက်မြို့အထိ ဖောက်လုပ် မည့် သုံးနိုင်ငံ အဝေးပြေးလမ်း စီမံကိန်းကိုလည်း စစ်ခေါင်းဆောင် မင်းအောင်လှိုင်၏ အိန္ဒိယခရီးစဉ်အတွင်း ပြန်လည်အကောင်အထည်ဖော်ရန် ဆွေးနွေးခဲ့သည်။ လမ်းပိုင်း မဖွင့်မီ ဩဂုတ်လ ၃၁ ရက် နံနက်ပိုင်းကတည်းက စစ်အုပ်စုက စမ်းသပ်သွားလာခွင့်ပြုခဲ့သော် လည်း လမ်းတစ်လျှောက် စစ်ဆေးရေးဂိတ်များတွင် ဂိတ်ကြေးများ သိန်းဂဏန်းအထိ ပေးဆောင်နေရသည်ဟု ယာဉ်မောင်းများက ဆိုသည်။ ယာဉ်မောင်းတစ်ဦးက “သွားနေကြတာပဲ။ တချို့ကြလည်း အစမ်းမောင်းတာပေါ့။ လမ်းကတော့ အများကြီး လွယ်သွားပြီ။ မလွယ်တာက လမ်းကြေးတွေ။ တစ်လျှောက်လုံး ပေးရတယ်။ ဂိတ်တွေ ဂိတ်တွေဆိုတာ နည်း တာ မဟုတ်ဘူး။ အရေးကြီးတာ မရှိရင်တော့ မသွားတာ ကောင်းပါတယ်” ဟု ပြောသည်။ လမ်းတစ်လျှောက် စစ်အုပ်စု၏ စစ်ဆေးမှုများ တင်းကျပ်လျက်ရှိပြီး ခရီးသွားပြည်သူများအနေဖြင့် နိုင်ငံသားစိစစ်ရေးကတ်နှင့် ခရီးသွားထောက်ခံစာများ ယူဆောင်ရန် လိုအပ်သည်။ လက်ရှိတွင် ကလေး - တမူးလမ်းပိုင်းကို ဖွင့်လှစ်ထားသော်လည်း တင်းကျပ်သည့် စစ်ဆေးမှုများကြောင့် အိန္ဒိယ နိုင်ငံဘက်မှ ဆေးနှင့် ဆက်စပ်ပစ္စည်းများ ဝင်ရောက်ရန် ခက်ခဲနေဆဲဖြစ်ပြီး အမှန်တကယ် ဝင်ရောက်လာသည့် အချိန်တွင်လည်း ဈေးကွက်အတွင်း ကုန်ဈေးနှုန်းများ မြင့်တက်လာနိုင်ကြောင်း စီးပွားရေးလုပ်ငန်းရှင်များက သုံးသပ်ထားသည်။ ဓါတ်ပုံ - (ပုံဟောင်း / Crd) #ကလေး #တမူး

ကလေး – တမူး လမ်းပိုင်းကို စစ်အုပ်စု ပြန်ဖွင့်

ကလေး - တမူး လမ်းပိုင်းကို စစ်အုပ်စု ပြန်ဖွင့် သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁ ရက်။ စစ်ကိုင်းတိုင်းအတွင်းရှိ မြန်မာ - အိန္ဒိယ …

  • September 1, 2026
အင်းလေးဒေသသို့ စစ်အုပ်စု စစ်ကြောင်းထိုးဝင်ရောက် ဒေသခံများ စိုးရိမ်နေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁ ရက်။ ရှမ်းပြည်တောင်ပိုင်း၊ ညောင်ရွှေမြို့နယ်၊ အင်းလေးဒေသသို့ စစ်အုပ်စုတပ်နှင့် လက်အောက်ခံ ရဲ၊ ပျူစောထီး၊ ပအိုဝ်းပြည်သူ့စစ် (PNA) ပူးပေါင်းတပ်ဖွဲ့ အင်အား ၁၃၀ ကျော်ဖြင့် စစ်ကြောင်းထိုး ဝင်ရောက်လာ၍ ဒေသခံ များအကြား စိုးရိမ်မှုများ မြင့်တက်လျက်ရှိသည်။ အဆိုပါ ပူးပေါင်းစစ်ကြောင်းသည် ဩဂုတ်လ ၂၇ ရက်မှ ၂၉ ရက်နေ့အထိ ကျေးရွာများအတွင်း လှည့်လည် စစ်ဆေး ရှာဖွေခဲ့ပြီး လက်ရှိတွင် ကျားတွန်ကျေးရွာ၌ တပ်စွဲထားသဖြင့် ဒေသခံများ ပူပန်နေကြရခြင်း ဖြစ် သည်။ ဟဲယာရွာမတွင် နေထိုင်သည့် အမျိုးသားတစ်ဦးက “သူတို့ ရွာကို လာတဲ့ရက်က သေနတ် ဖောက်တယ်။ မိုးပေါ် ထောင်ပြီး ဖောက်တာ။ ခြောက်တာပေါ့။ ပြီးတော့ စစ်မှုထမ်းရှိတယ် အိမ်တွေ လိုက်စစ်တယ်။ ကျောင်းတက် နေတယ်ဆိုရင် ဘယ်နှစ်ပြီးမလဲ သေချာမေးတယ်။ စာရင်းကောက်တယ်။ နောက်တော့ သူတို့ ကျားတွန်ဖက် တက်သွားတယ်” ဟု ပြောသည်။ ကနဦးတွင် အဆိုပါ ပူးပေါင်းစစ်ကြောင်းသည် ဩဂုတ်လ ၂၇ ရက်နေ့၌ သပြေပင်ကျေးရွာသို့ စစ်ကြောင်းထိုး ဝင်ရောက်ကာ ကျေးရွာအုပ်ချုပ်ရေးမှူးနှင့် သံသယရှိသူများကို ခေါ်ယူစစ်ဆေးခဲ့သည်။ ထို့နောက် ဩဂုတ်လ ၂၈ ရက်နေ့တွင် အသက် ၄၀ အရွယ်ရှိ ရွာခံ ဦးထွန်းဦးကို PDF နှင့် ဆက်စပ်သည်ဟု ဆို ကာ တောင်ကြီးမြို့ရှိ ရပခ စစ်ကြောရေးစခန်းသို့ ဖမ်းဆီးခေါ်ဆောင်သွားခဲ့သည်။ ဩဂုတ်လ ၂၉ ရက်နေ့တွင်မူ စစ်ကြောင်းသည် အင်းလေးကန်ပတ်လမ်း (အနောက်ဘက်ကမ်းလမ်း) အတိုင်း အင်းတိန်ဘက်သို့ ဦးတည်စစ်ချီခဲ့ပြီး အင်းတိန်ကျေးရွာအုပ်စု၊ တောင်ခြေကျေးရွာ ဘုန်းကြီးကျောင်း၌ တပ်စွဲ ခဲ့သည်။ အင်းတိန်အုပ်စုအတွင်း စစ်မှုထမ်း အကျုံးဝင်သည့် အမျိုးသားတစ်ဦးက “PDF ၃၀ ရောက်နေလို့ ပြောပြီး လိုက်ရှာနေကြတယ်။ ရွာတိုင်းဝင်ထွက်ပြီး အဲဒါရှာနေကြတယ်။ စစ်မှုထမ်းတွေ လိုက်စစ်တယ်။ အဓိက စစ်မှု ထမ်းမပါတဲ့လူတွေကို ခြောက်ချင်လို့ လာတယ်လို့ ထင်တယ်” ဟု ပြောသည်။ စစ်ကြောင်းသည် အင်းလေးကန်ပတ်လမ်းအတိုင်း အရှေ့ဘက်ကမ်းသို့ ဆက်လက်ရွှေ့လျားမည်ဟု ပျူစောထီး များနှင့် နီးစပ်သူများထံမှ သိရသဖြင့် အရှေ့ဘက်ကမ်းရှိ ဒေသခံများလည်း အထူးစိုးရိမ်နေကြသည်။ လွန်ခဲ့သည့် ဩဂုတ်လ ၂၅ ရက်နေ့ကလည်း တောင်ခြေကျေးရွာအုပ်စု၊ ကြံ့ပုံ့ငယ်ရွာမှ အသက် ၂၀ ဝန်းကျင် အရွယ် မောင်ပြည့်စုံကို PDF နှင့် ဆက်စပ်သည်ဟု စွပ်စွဲကာ ဖမ်းဆီးခဲ့ပြီး ယနေ့အထိ မိသားစုနှင့် အဆက် အသွယ် ပြတ်တောက်နေသည်။ စစ်အုပ်စုတပ်သည် အင်းလေးကန်အတွင်း PDF များ လက်နက်ချပွဲ ပြုလုပ်ရန် ပြင်ဆင်နေပြီး ပျူစောထီး ခေါင်းဆောင်နှစ်ဦးကို တစ်ဦးလျှင် ကျပ်သိန်းတစ်ထောင်စီ ချီးမြှင့်မည်ဟု ကြေညာထားသည်။ ဓါတ်ပုံ - (ပုံဟောင်း / Crd) #အင်းလေး #ညောင်ရွှေမြို့နယ်

အင်းလေးဒေသသို့ စစ်အုပ်စု စစ်ကြောင်းထိုးဝင်ရောက် ဒေသခံများ စိုးရိမ်နေ

အင်းလေးဒေသသို့ စစ်အုပ်စု စစ်ကြောင်းထိုးဝင်ရောက် ဒေသခံများ စိုးရိမ်နေ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁ ရက်။ ရှမ်းပြည်တောင်ပိုင်…

  • September 1, 2026
မွန်ပြည်နယ် ကျိုက်မရော၌ အတ္ထရံမြစ်ရေ လျှံ၍ လူ ၃ သောင်းကျော် ရေဘေးသင့် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁ ရက်။ မွန်ပြည်၊ ကျိုက်မရောမြို့နယ်အတွင်း မိုးအဆက်မပြတ် ရွာသွန်းပြီး အတ္ထရံမြစ်ရေ ဆက်တိုက်မြင့်တက်လာမှု ကြောင့် ရပ်ကွက်နှင့် ကျေးရွာပေါင်း ၄၀ အထိ ရေကြီးနစ်မြုပ်နေကာ အိမ်ထောင်စု ၇,၀၀၀ ခန့်မှ လူဦးရေ ၃၂,၀၀၀ ကျော် ရေဘေးသင့်နေကြောင်း ဒေသခံများနှင့် လူမှုကယ်ဆယ်ရေးအဖွဲ့များက ပြောသည်။ ဩဂုတ်လ ၂၄ ရက်နေ့မှစ၍ အတ္ထရံမြစ်ရေ မြင့်တက်လာခြင်းကြောင့် ကျိုက်မရောမြို့ပေါ်ရှိ ရှင်စောပုနှင့် ရန်မျိုးအောင် ရပ်ကွက်များအပြင် ချောင်းနှစ်ခွ၊ ငပြေမ၊ ဦးလေး၊ ရေပူ၊ မယ်ကရို၊ နိတုံ၊ ဘိန်းဗျော၊ ဖနုံ၊ လမုခို၊ ကွမ်းငန်၊ အတ္တရံ၊ လှာကဇိုင်း၊ ဖာသိမ်၊ ကလိုင်းကနိုင် နှင့် ရေပူကော့စပ် အစရှိသည့် အတ္ထရံမြစ်ကမ်းဘေး ကျေးရွာများတွင် ရေကြီးရေလျှံမှု ရေရှည်ဖြစ်ပွားနေခြင်းဖြစ်သည်။ ရေကြီးနစ်မြုပ်မှု တစ်ပတ်ထက်မက ကြာမြင့်လာသည့်အပြင် လက်ရှိတွင် အတ္ထရံမြစ်ရေသည် ကျိုက်မရောမြို့ ၏ စိုးရိမ်ရေအမှတ် ၅၀၀ စင်တီမီတာထက် ကျော်လွန်ကာ ၅၃၈ စင်တီမီတာအထိ ရောက်ရှိနေသဖြင့် ရေကျ သွားခြင်းမရှိဘဲ ရေဘေးသင့်သူ အရေအတွက် ထပ်မံတိုးလာနိုင်သည့် အခြေအနေဖြစ်နေသည်။ ထို့ပြင် ဩဂုတ်လ ၂၄ ရက်နေ့ကလည်း ကျိုက်မရောမြို့ ကျောက်တောင်တောရကျောင်းမှ သက်တော် ၆၈ နှစ် အရွယ် ရဟန်းတစ်ပါး ရေနစ်၍ ပျံလွန်တော်မူခဲ့သည့် ဖြစ်စဉ်လည်း ရှိခဲ့သည်။ ကျိုက်မရော ဒေသခံတစ်ဦးက “မွန်ပြည်နယ်ရဲ့ တခြားမြို့နယ်အများစုမှာတော့ ရေတွေ ပြန်ကျသွားပြီ။ ဒါပေ မဲ့ ကျိုက်မရောမှာတော့ ရေပြန်မကျဘဲ နေ့တိုင်း ရေတိုးလာနေတယ်။ တစ်ပတ်ကျော် ရေမြုပ်နေတာဆိုတော့ သောက်သုံးရေနဲ့ အစားအသောက်၊ ဆေးဝါးတွေ တော်တော်လေး လိုအပ်နေပါပြီ” ဟု ပြောသည်။ လက်ရှိတွင် ရေဘေးသင့်သူအချို့ကို ကျိုက်မရောမြို့ပေါ်တွင် ယာယီဖွင့်လှစ်ထားသည့် ကယ်ဆယ်ရေးစခန်းနှစ်ခု အပါအဝင် ချောင်းနှစ်ခွ၊ ဦးလေး၊ အတ္ထရံ၊ ရေပူကော့စပ်၊ လှာကဇိုင်း၊ ငပြေမ ကျေးရွာများရှိ ဘုန်းတော်ကြီး ကျောင်းများနှင့် နေအိမ်အချို့တို့တွင် ယာယီပြောင်းရွှေ့ နေရာချထားပေးရသည်။ ရေကြီးနစ်မြုပ်မှု အခြေအနေကြောင့် ကျိုက်မရောမြို့နယ်အတွင်းရှိ မြို့ပေါ် စာသင်ကျောင်းများနှင့် ကျေးရွာများ ရှိ စာသင်ကျောင်းပေါင်း ၄၀ နီးပါးကို ယာယီပိတ်ထားရသည်။ လူမှုကယ်ဆယ်ရေးအဖွဲ့ တာဝန်ရှိသူတစ်ဦးက “ကယ်ဆယ်ရေးအဖွဲ့တွေနဲ့ အလှူရှင်တွေက ထမင်းထုပ်နဲ့ သောက်သုံးရေ လာလှူကြတာတော့ ရှိပါတယ်။ ဒါပေမဲ့ ဝေးလံပြီး လမ်းပန်းဆက်သွယ်ရေး ခက်ခဲတဲ့ ရွာတချို့ ဆီကိုတော့ အလှူရှင်တွေ မရောက်နိုင်ကြသေးပါဘူး” ဟု ပြောသည်။ မွန်ပြည်အတွင်း မိုးသည်းထန်စွာ ရွာသွန်းမှုကြောင့် မော်လမြိုင်၊ ဘီးလင်း၊ သံဖြူဇရပ်၊ ကျိုက်ထို၊ ချောင်းဆုံ၊ မုဒုံ၊ ရေး နှင့် ကျိုက်မရော မြို့နယ်များတွင် ရေကြီးရေလျှံမှုများ ဖြစ်ပွားခဲ့သော်လည်း အတ္ထရံမြစ်ရေ အဆက်မပြတ် မြင့်တက်နေသည့် ကျိုက်မရောမြို့နယ်တွင်မူ ရေဘေးဒဏ်ကို အဆိုးရွားဆုံး ဆက်လက်ရင်ဆိုင်နေရဆဲ ဖြစ် သည်။ #ကျိုက်မရော #အတ္ထရံမြစ်ရေ

မွန်ပြည်နယ် ကျိုက်မရော၌ အတ္ထရံမြစ်ရေ လျှံ၍ လူ ၃ သောင်းကျော် ရေဘေးသင့်

မွန်ပြည်နယ် ကျိုက်မရော၌ အတ္ထရံမြစ်ရေ လျှံ၍ လူ ၃ သောင်းကျော် ရေဘေးသင့် သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁ ရက်။ မွန်ပြည်၊ ကျိုက်မရ…

  • September 1, 2026
ရခိုင်တောင်ပိုင်း မြို့သုံးမြို့သို့ စစ်တပ်က အင်အားဖြည့်တင်း၍ ချဉ်းကပ်လာ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁ ရက်။ ရခိုင်ပြည် တောင်ပိုင်းရှိ တောင်ကုတ်၊ သံတွဲနှင့် ဂွ မြို့နယ် သုံးခုသို့ စစ်တပ်က နယ်စပ်တိုင်းဒေသကြီးများမှ တစ်ဆင့် အင်အားအများအပြား ဖြည့်တင်းကာ မြေပြင်၊ ရေကြောင်းနှင့် လေကြောင်းတို့ဖြင့် စစ်ရေးလှုပ်ရှား ချဉ်းကပ်လာနေကြောင်း ဒေသခံ စစ်ရေးသတင်းအရင်းအမြစ်များက ပြောသည်။ စစ်တပ်သည် မကွေး၊ ပဲခူးနှင့် ဧရာဝတီ တိုင်းဒေသကြီးတို့မှတစ်ဆင့် ရခိုင်ရိုးမကို ဖြတ်ကျော်၍ ရခိုင် တောင်ပိုင်းမြို့နယ်များကို မြေပြင်ထိုးစစ်များ၊ လေကြောင်းတိုက်ခိုက်မှုများနှင့် ရေကြောင်းလှုပ်ရှားမှုများကို ပူးတွဲပြုလုပ်ကာ ပြန်လည်ဝင်ရောက်နိုင်ရေး ကြိုးပမ်းလာခြင်းဖြစ်သည်။ လက်ရှိတွင် ရခိုင်-မကွေးနယ်စပ် မင်းတုန်းမြို့နယ်ဘက်မှ စစ်တပ် အင်အား ၈၀၀ ကျော်သည် ရခိုင်ရိုးမသို့ စစ်ကြောင်းထိုးနေသည့်အပြင် ပဲခူးတိုင်း ပဒါန်းလမ်းကြောင်းမှလည်း အင်အား ၄၀၀ ကျော်ဖြင့် စစ်ကြောင်းထိုးလျက်ရှိသည်။ ထို့ပြင် ဧရာဝတီတိုင်း ရေကြည်မြို့ဘက်မှလည်း အင်အား ၆၀၀ ကျော်ဖြင့် ဂွရိုးမပေါ်သို့ ရှေ့ပြေးတပ်စခန်းများ ခိုးဝင်ရောက်ရှိနေကာ ပုသိမ်နှင့် ဝါးခယ်မမြို့များမှတစ်ဆင့် ရေလမ်းအတိုင်း သံတွဲနှင့် ဂွ ပင်လယ်ပြင်သို့ စစ်ရေ ယာဉ် (နေဗီ) ၁၃ စီးအထိ အားဖြည့်ထားသည်။ တောင်ကုတ်မြို့မှ စစ်ရေးသတင်းအရင်းအမြစ်တစ်ဦးက “အေအေက ညမထွက်ရအမိန့်ထုတ်တာ အကြောင်း ရှိတယ်။ အခု နေဗီရော ကင်းထောက်လေယာဉ်တွေရော အများကြီးပဲ သံတွဲနဲ့ ဂွဘက် တက်လာတာ။ တောင် ကုတ်ရိုးပေါ်လမ်းတွေ မလုံခြုံတာတွေ သတိထားနေရတယ်။ အခု ရခိုင်တောင်ပိုင်း မြို့တွေကို ပြန်ယူတော့မယ်၊ ရတော့မယ်ဆိုပြီး စစ်တပ်လော်ဘီတွေ ပေါ်တင်ပြောနေတယ်။ ညဘက် သတိထားနေရပါတယ်” ဟု ပြော သည်။ အဆိုပါ လက်နက်နှင့် အင်အား ဖြည့်တင်းမှုများကြောင့် စစ်အုပ်စုတပ်၏ လေကြောင်းမှ ဗုံးကြဲမှုနှင့် လက်နက် ကြီး ပစ်ကူများ ကျေးရွာများအတွင်း ကျရောက်မည်ကို ဒေသခံပြည်သူများ စိုးရိမ်ပူပန်နေကြပြီး တောင်တန်း များသို့ သွားရောက်ကာ ငါးရှာ၊ ဖားရှာနှင့် တောင်ယာလုပ်ကိုင်သည့် အလုပ်များကို ရပ်တန့်ထားကြရသည်။ ထို့ပြင် ရခိုင်တောင်ပိုင်း မြို့နယ်များ၌ စားနပ်ရိက္ခာနှင့် ဆေးဝါး ပြတ်လပ်မည်ကို ဒေသခံများ အထူးစိုးရိမ်နေကြ သည်။ မကွေး၊ ပဲခူး၊ ဧရာဝတီတို့မှ ရခိုင်ဘက်သို့ ကုန်စည်စီးဆင်းသည့် လမ်းကြောင်းများ ထိန်းချုပ်ပိတ်ဆို့ခံထားရ သဖြင့် ဆန်၊ ဆီ နှင့် ဆေးဝါးအပါအဝင် အခြေခံစားသောက်ကုန်များ စျေးနှုန်းအဆမတန် မြင့်တက်လာနေသည်။ ဒေသခံ အမျိုးသမီးတစ်ဦးက “စစ်တပ်က ရခိုင်တောင်ပိုင်းကို စစ်ကြောင်းထိုးနေတာ၊ ဗုံးကြဲနေတာတွေက စိုးရိမ်ရတာပေါ့။ အရင်ကဆို တချို့လမ်းတွေက မှောင်ခို ဆီတွေ၊ ဆန်တွေအပြင် တခြားကုန်တွေ ဝင်လာသေး တယ်။ အခုက ညမထွက်ရတော့ ဘာမှအဆင်မပြေဘူး။ ပဲခူးနဲ့ မကွေးအပြင် ဧရာဝတီကပါ အခု စစ်ကြောင်း တွေ ရှိနေတယ်” ဟု ပြောသည်။ စစ်အုပ်စုတပ်သည် သံတွဲမြို့ မောင်ရွှေလေးရွာအနီး ပင်လယ်ပြင်၊ ဂွမြို့ ကမ်းခြေများနှင့် ကျိန္တလီ ကမ်းခြေအနီး တို့တွင် စစ်ရေယာဉ်များ ချထားပြီး ကမ်းခြေတစ်လျှောက်ရှိ ကျေးရွာများကို ဒရုန်းများ၊ ကင်းထောက်လေယာဉ် များဖြင့် စောင့်ကြည့်လျက်ရှိသည်။ ဧရာဝတီတိုင်း ရွှေသောင်ယံဘက်တွင် တပ်မ (၁၀၁) စစ်ကြောင်းသည် ရခိုင် ဂွမြို့နယ်ဘက်သို့ ဝင်ရောက်ရန် ကြိုးပမ်းနေကြောင်းလည်း ဆိုသည်။ စစ်ရေးအခြေအနေများကြောင့် အာရက္ခတပ်တော် (AA) က ဂွ၊ သံတွဲနှင့် တောင်ကုတ်မြို့နယ်များတွင် ည ၁၁ နာရီမှ နံနက် ၅ နာရီအထိ သွားလာလှုပ်ရှားမှု မပြုလုပ်ကြရန် ဒေသန္တရအမိန့် ထုတ်ပြန်ထားသည်။ ဓါတ်ပုံ - (ပုံဟောင်း / Crd) #တောင်ကုတ် #သံတွဲ #ဂွ

ရခိုင်တောင်ပိုင်း မြို့သုံးမြို့သို့ စစ်တပ်က အင်အားဖြည့်တင်း၍ ချဉ်းကပ်လာ

ရခိုင်တောင်ပိုင်း မြို့သုံးမြို့သို့ စစ်တပ်က အင်အားဖြည့်တင်း၍ ချဉ်းကပ်လာ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁ ရက်။ ရခိုင်ပြည် တောင…

  • September 1, 2026
×Close