သတင်း

တောင်ကြီးတွင် စည်ပင်ဝန်ထမ်းနှင့် ဈေးဝယ်သူ ထိုးကြိတ်ကြရာမှ သွေးထွက်သံယိုဖြစ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၄ ရက်။ ရှမ်းပြည်တောင်ပိုင်း၊ တောင်ကြီးမြို့၊ ဗိုလ်ချုပ်လမ်းမပေါ်ရှိ City Square အနီး ပျံကျဈေးတွင် စည်ပင်ဝန်ထမ်း နှင့် ဈေးဝယ်သူ အမျိုးသမီးတို့အကြား စကားများရန်ဖြစ်ရာမှ သွေးထွက်သံယိုဖြစ်သည့်အထိ အပြန်အလှန် ထိုးကြိတ် တိုက်ခိုက်မှု ဖြစ်ပွားခဲ့ကြသည်။ ဖြစ်စဉ်မှာ စက်တင်ဘာလ ၃ ရက် နံနက် ၇ နာရီခန့်တွင် ဒေါ်အိလှိုင် ဆိုသူသည် သူငယ်ချင်းဖြစ်သူနှင့်အတူ မဟာသုခလမ်းဘက်မှ ပျံကျဈေးအတွင်းသို့ ဆိုင်ကယ်ဖြင့် မောင်းဝင်စဉ် စိန်တောင်တန်း စားသောက်ဆိုင်ရှေ့၌ စည်ပင်ဝန်ထမ်း ဦးတင်ဝင်းအောင်က ဝင်ရောက်ခွင့် မပြုရာမှ စကားများရန်ဖြစ်မှု စတင်ခဲ့ခြင်း ဖြစ်သည်။ ဈေးသည်တစ်ဦးက “ကျမတို့လည်း မြင်နေတယ်။ ကောင်မလေးကလည်း အပြောရင့်တယ်။ စည်ပင်ကလည်း ပြေပြေလည်လည် မပြောတတ်ဘူး။ နှစ်ဖက်လုံးတင်းပြီး ဖြစ်ကြတာ။ ဒီကာလ လူတိုင်း စိတ်ဆတ်တော့ သတိထားပြောဆိုရမှာ။ ဒီလို ဖြစ်တော့ နှစ်ဖက်လုံးအတွက် မကောင်းဘူး” ဟု ပြောသည်။ ဒေါ်အိလှိုင်သည် ထွက်ခွာသွားပြီးနောက် တက်ခေတ်လမ်းဘက်မှ ပြန်လည်ဝင်ရောက်ရာတွင် ထပ်မံ တားဆီးခံ ရသဖြင့် အပြန်အလှန် ဆဲဆိုကြရာမှ ရန်ပွဲ စတင်ခဲ့သည်။ ရန်ပွဲအတွင်း ဒေါ်အိလှိုင်ဘက်မှ ဓားချွန်ဖြင့် တိုက်ခိုက်ခဲ့သဖြင့် ဦးတင်ဝင်းအောင်တွင် ပါး၊ မေးစေ့၊ လည်ပင်း၊ ရင်အုံနှင့် ဝမ်းဗိုက်တို့၌ ပြတ်ရှဒဏ်ရာများ ရရှိခဲ့ကြောင်း မျက်မြင်တွေ့ရှိသည့် ဈေးသည်များက ဆိုသည်။ ထို့နောက် ဦးတင်ဝင်းအောင်ကလည်း ပြန်လည် ထိုးကြိတ်ခဲ့သဖြင့် ဒေါ်အိလှိုင်တွင် ခေါင်း၊ ဝဲဘက်မျက်လုံး၊ ရင်ဘတ်နှင့် လက်မောင်းတို့၌ ဖူးယောင်ဒဏ်ရာများနှင့်အတူ နှုတ်ခမ်း၊ မေးစေ့တို့တွင် ပြတ်ရှဒဏ်ရာများ ရရှိခဲ့ သည်။ ပျံကျဈေးတွင် နေ့စဉ် ဈေးဝယ်သည့် အိမ်ရှင်မတစ်ဦးက “ဘယ်သူမှား မှန်လဲတော့ မသိဘူးပေါ့နော်။ စည်ပင် တွေ ကြိုက်သလို လုပ်နေတာကတော့ မြင်နေတွေ့နေတာပဲ။ မဝင်ရ လမ်းတွေ သူတို့ စိတ်ကြိုက်သတ်မှတ် တယ်။ ရပ်ကွက်လူတွေနဲ့ ဘာမှ ညှိနှိုင်းမှု မရှိဘူး။ ပိုက်ဆံပေးရင် ရောင်းရမယ်။ နောက်နေ့ ဖမ်းချင်ဖမ်းမယ်။ အပြောဆို ရင့်တယ်။ စည်ပင် အလုပ်ကျ မလုပ်ချင်ဘူး။ ဈေးသည်တွေ ဈေးဝယ်တွေလည်း ရိုင်းတာပါပဲ။ ထစ်ခနဲရှိဆို ဖအေ၊ နှမ ကိုင်တုတ်ဆဲကြတော့ သည်းမခံနိုင်ကြတော့တာ” ဟု ပြောသည်။ အဆိုပါ ဖြစ်စဉ်နှင့် ပတ်သက်၍ ဦးတင်ဝင်းအောင်က တောင်ကြီး မြို့မရဲစခန်းတွင် တိုင်ကြားခဲ့သဖြင့် ဒေါ်အိလှိုင် အား ဆဲဆိုမှု၊ ဝတ္တရားနှောက်ယှက်မှု၊ အနာတရဖြစ်စေမှု ရာဇသတ်ကြီးပုဒ်မ ၂၉၄/ ၃၅၃/ ၃၃၂ တို့ဖြင့် အမှုဖွင့်ထားသည်။ အလားတူ ဒေါ်အိလှိုင် ဘက်ကလည်း ပြန်လည် တိုင်တန်းခဲ့သည့်အတွက် ဦးတင်ဝင်းအောင်ကိုလည်း ရဲစခန်းက ဆဲဆိုမှု၊ နာကျင်စေမှု၊ ကာယိန္ဒြေပျက်စီးစေမှု ပုဒ်မ ၂၉၄/ ၃၂၃/ ၃၅၄ တို့ဖြင့် အမှုဖွင့်ထားသည်။ တောင်ကြီးမြို့တွင် ဈေးသည်နှင့် စည်ပင်ဝန်ထမ်းများအကြား မကြာခဏ စကားများလေ့ရှိသော်လည်း ယခုကဲ့ သို့ ဈေးဝယ်သူနှင့် စည်ပင်ဝန်ထမ်းတို့အကြား သွေးထွက်သံယိုဖြစ်သည်အထိ ခိုက်ရန်ဖြစ်ပွားမှုမှာ ပထမဆုံး အကြိမ် ဖြစ်ကြောင်း ဒေသခံများက ပြောသည်။ #တောင်ကြီးမြို့

တောင်ကြီးတွင် စည်ပင်ဝန်ထမ်းနှင့် ဈေးဝယ်သူ ထိုးကြိတ်ကြရာမှ သွေးထွက်သံယိုဖြစ်

တောင်ကြီးတွင် စည်ပင်ဝန်ထမ်းနှင့် ဈေးဝယ်သူ ထိုးကြိတ်ကြရာမှ သွေးထွက်သံယိုဖြစ် သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၄ ရက်။ ရှမ်းပြည်တော…

  • September 4, 2026
မကွေးတိုင်း ဆောမြို့နယ် အတွင်း စစ်အုပ်စုတပ်က ဒေသခံ ၂၀ ကျော်ကို ဖမ်းဆီးထား သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၃ ရက်။ မကွေးတိုင်း၊ ယောဒေသ ဆောမြို့နယ်၊ သီးကုန်းကျေးရွာအတွင်းသို့ စစ်အုပ်စုတပ် စစ်ကြောင်း ရုတ်တရက် ဝင်ရောက်တပ်စွဲကာ ဖမ်းဆီးထားသည့် ဒေသခံ အရပ်သား ၂၀ ကျော်ကို လက်ရှိအချိန်အထိ လူသားဒိုင်းနှင့် ဓားစာခံအဖြစ် ဆက်လက် ထိန်းသိမ်းထားကြောင်း ဒေသတွင်း စစ်ရေးသတင်းရင်းမြစ်များက ပြောသည်။ အဆိုပါ အင်အား ၁၂၀ ခန့်ပါ စစ်ကြောင်းသည် ဩဂုတ်လ ၃၀ ရက် နံနက်ပိုင်းတွင် မင်းလယ်ကျေးရွာ ဘက်မှ သီးကုန်းရွာအတွင်းသို့ တိတ်တဆိတ် ရုတ်တရက် ဝင်ရောက်လာခြင်းဖြစ်ပြီး လမ်းခရီးတွင် တွေ့ရှိသည့် ဒေသခံများကို ဆက်တိုက် ဖမ်းဆီးခဲ့ခြင်း ဖြစ်သည်။ အရပ်သားများကို စက်တင်ဘာလ ၃ ရက်နေ့အထိ ၅ ရက်ကြာသည့် တိုင် ပြန်မလွတ်သေးဘဲ လူသားဒိုင်းနှင့် ဓားစာခံအဖြစ် ဆက်လက် ထိန်းသိမ်းထားကြောင်း ဒေသတွင်း စစ်ရေး သတင်းရင်းမြစ်များက ပြောသည်။ ယောဒေသ စစ်ရေးသတင်းရင်းမြစ်တစ်ဦးက “စစ်ကြောင်းက မင်းလယ်ရွာဘက်က တိတ်တဆိတ် ရုတ်တရက် ဝင်ရောက်လာပြီး လမ်းခရီးမှာ တွေ့တဲ့ အရပ်သားတွေကို ဆက်တိုက် ဖမ်းသွားတာ။ အခု ၂ ယောက်ပဲ ပြန်လွတ် သေးတယ်။ အများစုက မလွတ်ဘူး။ သူတို့အတွက် ထမင်းချက်ခိုင်းတာနဲ့ ခိုင်းတာတွေ လုပ်ပေးနေရတယ်။ ရွာအနီးဝန်းကျင်မှာလည်း တပ်ဖြန့်ထားတယ်” ဟု ပြောသည်။ ဖမ်းဆီးခံထားရသူများအနက် ၂ ဦးသာ ပြန်လည် လွတ်မြောက်လာသေးပြီး ကျန်သူများကို စက်တင်ဘာလ ၃ ရက်နေ့အထိ ရွာအတွင်း တပ်စွဲထားရင်း ဓားစာခံအဖြစ် ခိုင်းစေထားခြင်း ဖြစ်သည်။ ထို့ပြင် စစ်အုပ်စုသည် ဆောမြို့ပေါ်တွင် သွားလာလှုပ်ရှားမှုများ ပြုလုပ်လျက်ရှိပြီး မြို့တောင်ဘက်ရှိ ရင်းခေါ် ကျေးရွာနှင့် မင်းလယ်ကျေးရွာတို့သို့ တပ်ဖွဲ့ဝင်များ ထပ်မံ စေလွှတ်ထားသည်ဟု ဆိုသည်။ အဆိုပါ ရင်းခေါ်ကျေးရွာ၌ စစ်အုပ်စု၏ ဒရုန်းတပ်ဖွဲ့ တပ်စွဲထားခြင်းဖြစ်ပြီး ထိုမှတစ်ဆင့် သီးကုန်းကျေးရွာ ဘက်သို့ ခရီးဆက်လာခြင်း ဖြစ်သည်။ စစ်အုပ်စုတပ်အနေဖြင့် ယခုကဲ့သို့ အင်အားဖြည့်တင်း စေလွှတ်နေခြင်းမှာ ဆော-ရင်းခေါ်-မင်းလယ်-သီးကုန်း လမ်းပိုင်းကို အပြည့်အဝ ထိန်းချုပ်နိုင်ရေး ဆောင်ရွက်နေခြင်းဖြစ်ပြီး သီးကုန်းကျေးရွာတွင် ရောက်ရှိနေသည့် စစ်ကြောင်းသည် ထိုရွာ၌ အထိုင်ချ တပ်စွဲမည့် အခြေအနေရှိကြောင်း ဒေသခံများက သုံးသပ်ပြောဆိုနေကြ သည်။ လက်ရှိတွင် ဆော-သီးကုန်း-လောင်းရှည် လမ်းပိုင်း၌ စစ်အုပ်စုတပ်နှင့် ပြည်သူ့တော်လှန်ရေးတပ်ဖွဲ့များကြား စစ်ရေး တင်းမာလျက်ရှိသောကြောင့် ဒေသခံ ပြည်သူများအနေဖြင့် အသွားအလာ အနေအထိုင်များကို အထူး သတိထားကြရန် တော်လှန်ရေးအဖွဲ့များက ကြိုတင် သတိပေးထားသည်။ #ဆောမြို့နယ်

မကွေးတိုင်း ဆောမြို့နယ် အတွင်း စစ်အုပ်စုတပ်က ဒေသခံ ၂၀ ကျော်ကို ဖမ်းဆီးထား

မကွေးတိုင်း ဆောမြို့နယ် အတွင်း စစ်အုပ်စုတပ်က ဒေသခံ ၂၀ ကျော်ကို ဖမ်းဆီးထား သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၃ ရက်။ မကွေးတိုင်း၊ ယ…

  • September 4, 2026
မွန်၊ ကရင်နှင့် တနင်္သာရီတွင် စစ်ဘေးရှောင် ၁၆ သိန်းကျော်လာ၊ ကူညီရေးအဖွဲ့များ အခက်ကြုံနေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၃ ရက်။ မွန်ပြည်၊ ကရင်ပြည်နှင့် တနင်္သာရီတိုင်းတို့တွင် စစ်အုပ်စုတပ်၏ စစ်ကြောင်းထိုးမှုနှင့် လေကြောင်း တိုက်ခိုက် မှုများကြောင့် နေရပ်စွန့်ခွာ ထွက်ပြေးရသည့် စစ်ဘေးရှောင် ဦးရေ ၁၆ သိန်းကျော်အထိ အဆမတန် တိုးလာနေ ပြီး အခြေခံ စားနပ်ရိက္ခာ၊ ဆေးဝါးနှင့် မိုးကာများ အရေးပေါ် လိုအပ်နေကြောင်း ဒေသခံ ကူညီကယ်ဆယ်ရေး အဖွဲ့များက ပြောသည်။ ဒေသတွင်း တိုက်ပွဲများအပြင် စစ်အုပ်စုတပ်၏ လက်နက်ကြီး ပစ်ခတ်မှု၊ ဒရုန်းနှင့် လေကြောင်း တိုက်ခိုက်မှုများ ကြောင့် ဒေသခံများသည် ဘေးလွတ်ရာ တောတောင်များနှင့် ရာဘာခြံများအတွင်းသို့ လအတော်ကြာ ထွက်ပြေး တိမ်းရှောင်နေကြရခြင်း ဖြစ်သည်။ မွန်ပြည် လူ့အခွင့်အရေး ဖောင်ဒေးရှင်း (HURFOM) ပရိုဂရမ် ဒါရိုက်တာ နိုင်အဲမွန်က “ဩဂုတ် ဒေတာအရ မွန်မှာ စုစုပေါင်း ၂၉၉,၇၂၉ ကျော်၊ ကရင်မှာ ၇၉၉,၇၀၀ ကျော်နဲ့ တနင်္သာရီမှာ ၅၁၆,၂၄၀ ကျော် ဆိုတော့ နေရပ်ရင်းက စွန့်ခွာ ထွက်ပြေးနေရတဲ့ အခြေအနေရှိတယ်နော်။ တစ်ပတ်ထဲမှာပဲ ကရင်မှာ ၂,၅၀၀၊ မွန်မှာ ၁,၂၀၀ နဲ့ တနင်္သာ ရီမှာ ၂,၁၀၀ တိုးလာတာကို အတည်ပြုနိုင်ခဲ့တာဖြစ်ပြီး မြေပြင်မှာ ဒီထက်ပိုများနိုင်ပါတယ်” ဟု ပြောသည်။ ထိုအရေအတွက်သည် မွန်ပြည်လူ့အခွင့်အရေး ဖောင်ဒေးရှင်း HURFOM က လက်လှမ်းမှီးသလောက် ကောက် ယူထားသည့် အရေအတွက်များသာဖြစ်ပြီး မြေပြင်တွင် ယခုအရေအတွက်ထက် ပိုများနိုင်သည်ဟု ဆိုသည်။ လက်ရှိတွင် စစ်ဘေးရှောင်များမှာ စားနပ်ရိက္ခာအပြင် မိုးကာ၊ သန့်ရှင်းသည့် သောက်သုံးရေနှင့် တစ်ကိုယ်ရည် သန့်ရှင်းရေး ပစ္စည်းများ လိုအပ်နေသည့်အပြင် စခန်းများ၌ ငှက်ဖျားနှင့် တုပ်ကွေးရောဂါများ ကူးစက်ဖြစ်ပွားနေ သဖြင့် ဆေးဝါးနှင့် ခြင်ထောင်များ အရေးပေါ် လိုအပ်လျက်ရှိသည်။ တနင်္သာရီတိုင်းမှ ကူညီကယ်ဆယ်ရေး ဆောင်ရွက်နေသူတစ်ဦးက “မြို့နယ်တိုင်းလိုလိုမှာ စစ်ဘေးရှောင်တွေ ရှိနေတယ်။ ဆေးလိုမယ်။ တာလပတ်၊ မိုးကာ၊ ရိက္ခာတွေ လိုတာပေါ့။ အခုက ငှက်ဖျားပေါတယ်။ ငှက်ဖျား တော်တော် ထိတယ်။ ဟိုတလောမှာတောင် ငှက်ဖျားကြောင့် ၂ ယောက်၊ ၃ ယောက် သေတယ်” ဟု ပြောသည်။ ထို့ပြင် တောတောင်နှင့် ရာဘာခြံများအတွင်း လပေါင်းများစွာ ခိုလှုံနေကြရသည့် စစ်ဘေးရှောင် မိသားစုများ တွင် ကလေးသူငယ်များ၏ ပညာရေးနှင့် ကျန်းမာရေးအတွက် အထူး စိုးရိမ်စရာ ဖြစ်နေသည်။ မိုးရာသီ ကာလဖြစ်သည့်အတွက် ယာယီတဲ shelter မလုံလောက်မှုကြောင့် တုပ်ကွေးနှင့် ဝမ်းပျက်ဝမ်းလျှော ရောဂါများ ကူးစက်ဖြစ်ပွားနေသည့်အပြင် ကလေးငယ်များအတွက် အာဟာရပြည့်ဝသည့် စားနပ်ရိက္ခာများနှင့် အခြေခံ ပညာသင်ကြားနိုင်ရေးအတွက်ပါ အခက်အခဲပေါင်းများစွာ ကြုံတွေ့နေကြရသည်။ တစ်ဖက်တွင်လည်း စစ်အုပ်စုတပ်၏ စစ်ကြောင်းထိုးမှုများအတွင်း ကျေးရွာများအနီး မြေမြှုပ်မိုင်းများ ထောင်ထားခဲ့ခြင်းနှင့် ဆက်သွယ်ရေး လိုင်းများ ဖြတ်တောက်ထားခြင်းတို့ကြောင့် ကူညီရေးအဖွဲ့များအနေဖြင့် စစ်ဘေးရှောင်များထံ အချိန်မီ သတင်းအချက်အလက် ပေးပို့နိုင်ရေးနှင့် ရိက္ခာဝေငှနိုင်ရေးအတွက် ကြီးမားသည့် စိန်ခေါ်မှုများနှင့် ရင်ဆိုင်နေရသည်။ ကူညီရေးအဖွဲ့များအနေဖြင့် စစ်ဘေးရှောင်များထံ သွားရောက် ကူညီရာ၌ စစ်အုပ်စုတပ်၏ လမ်းပိတ်ဆို့မှုများ၊ စစ်ဆေးရေးဂိတ်များ၊ လေကြောင်းနှောင့်ယှက်မှုများနှင့် ဆက်သွယ်ရေး ပြတ်တောက်မှုများကြောင့် အကူအညီ များ ပေးပို့ရန် ခက်ခဲနေကြသည်။ ထိုအခြေအနေနှင့် ပတ်သက်၍ HURFOM မှ နိုင်အဲမွန်က “အဓိက အခက်အခဲက သွားရေးလာရေး အခက်အခဲ တွေ ရှိတယ်။ လမ်းပိတ်တာတို့၊ Check point တိုးတာတို့ပေါ့နော်။ လက်နက်ကြီးနဲ့ ရမ်းသမ်းပစ်တဲ့ကိစ္စ၊ နောက်တစ်ခါ ဒရုန်းတို့ လန်းမိုင်းစစ်ကြောင်းတွေ၊ ဆက်သွယ်ရေး ပြတ်တောက်တာတွေကြောင့် relief team တွေ သွားရေးလာရေး ခက်လာတာတွေ ရှိတယ်။ ညဘက်ပဲ သွားရတာတွေရှိတယ်။ တစ်ဖက်မှာလည်း Funding တွေ လျှော့လာတယ်။ အကူအညီတွေက ကစဉ့်ကလျား ဖြစ်နေရတယ်” ဟု ဆက်ပြောသည်။ စစ်အုပ်စုတပ်သည် ၎င်းတို့ ဆုံးရှုံးလိုက်ရသည့် နယ်မြေများ၊ နယ်စပ်ကုန်သွယ်ရေးနှင့် မဟာဗျူဟာကျသည့် နေရာများကို ပြန်လည်ရယူရန် မြေပြင် ထိုးစစ်များအပြင် လေကြောင်းမှပါ အပြင်းအထန် တိုက်ခိုက်နေသဖြင့် ဒေသခံများ၏ လူသားချင်းစာနာမှု အကူအညီ လိုအပ်ချက်များမှာ ပိုမို ကြီးမားလာလျက်ရှိသည်။ (ဓာတ်ပုံ - ဒေါနတနင်္သာရီ - စစ်ဘေးရှောင်များ အထောက်အကူပြုရေးအဖွဲ့) #IDPs #စစ်ဘေးရှောင်

မွန်၊ ကရင်နှင့် တနင်္သာရီတွင် စစ်ဘေးရှောင် ၁၆ သိန်းကျော်လာ၊ ကူညီရေးအဖွဲ့များ အခက်ကြုံနေ

မွန်၊ ကရင်နှင့် တနင်္သာရီတွင် စစ်ဘေးရှောင် ၁၆ သိန်းကျော်လာ၊ ကူညီရေးအဖွဲ့များ အခက်ကြုံနေ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၃ ရက်။ …

  • September 4, 2026
စစ်တွေနှင့် ပတ်ပတ်လည် ဒေသများကို စစ်တပ် လေကြောင်းမှ မိနစ် ၃၀ အတွင်း အကြိမ် ၃၀ ဗုံးကြဲ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၃ ရက်။ ရခိုင်ပြည်အတွင်း စစ်ရေးအရ အထိနာနေသည့် စစ်အုပ်စုတပ်သည် ပုဏ္ဏားကျွန်း၊ စစ်တွေနှင့် ရသေ့တောင် မြို့နယ်တို့ရှိ ကျေးရွာများကို စက်တင်ဘာလ ၃ ရက် မွန်းလွဲပိုင်းတွင် ဂျက်ဖိုက်တာ ၄ စီးဖြင့် မိနစ် ၃၀ အတွင်း အကြိမ်ရေ ၃၀ ခန့် လှည့်ပတ် ဗုံးကြဲတိုက်ခိုက်ခဲ့ကြောင်း အာရက္ခတပ်တော် (AA) နှင့် ဒေသခံများက ပြောသည်။ လေကြောင်းမှ ဗုံးကြဲတိုက်ခိုက်ခံရသည့် နေရာများမှာ ပုဏ္ဏားကျွန်း-စစ်တွေ နယ်စပ်ရှိ ကွမ်းတောင်၊ ကုန်းတန်း ကြိမ်ချောင်း၊ မက္ကလာကျ၊ ညိုရောင်၊ မင်းလှ၊ ပဒေသာ ကျေးရွာများနှင့် ရသေ့တောင်မြို့နယ်၊ မိုးစဲကျွန်းရှိ ကြက်ရိုးဆိပ်၊ ညောင်ပင်ကြီး စသည့် ကျေးရွာများ ဖြစ်ကြသည်။ ပုဏ္ဏားကျွန်းမြို့နယ်မှ စစ်ဘေးရှောင် ဒေသခံတစ်ဦးက “ဂျက်ဖိုက်တာတွေ ရောက်လာပြီး မွန်းလွဲ ၁ နာရီခွဲ လောက်ကတည်းက တဆက်တည်းကို ဗုံးကြဲတော့တာ။ ပေါက်ကွဲသံတွေက ဆက်တိုက်ကြားနေရတယ်။ ကွမ်း တောင်နဲ့ ပဒေသာဘက်မှာ လယ်ထဲ ဆင်းနေကြတဲ့ ရွာသားတွေလည်း ပါသွားမလားဆိုပြီး အတော်လေး စိုးရိမ် နေရတယ်။ အားလုံးလည်း ဗုံးခိုကျင်းတွေထဲမှာ ပုန်းနေကြရတာ” ဟု ပြောသည်။ ထို့အပြင် ပေါက်တောမြို့နယ်မှ မြစ်အရှေ့ဘက်ကမ်း ဒေသခံတစ်ဦးကလည်း “တိုက်လေယာဉ် ပျံနေတာရော၊ ဗုံးသံတွေပါ ပုဏ္ဏားကျွန်းဘက်ကနေ ဆက်တိုက် ကြားနေရတာ။ အရင်ကထက် ဗုံးကြဲသံတွေ ပိုပြင်းတယ်။ မြို့ နဲ့ နီးတဲ့ရွာတွေကိုပါ ပစ်မှတ်ထား လာကြဲတာဆိုတော့ ဘယ်သူမှ အပြင်မထွက်ရဲကြတော့ဘူး။ ဗုံးခိုကျင်းထဲ အကုန်ဝင်နေရတာ” ဟု ပြောသည်။ ထိုသို့ လေကြောင်းမှ ပြင်းပြင်းထန်ထန် တိုက်ခိုက်သည့်အပြင် စစ်အုပ်စုတပ်သည် ယနေ့ နံနက် ၁၁ နာရီခန့်မှ စ၍ ရခိုင်တောင်ပိုင်း ပင်လယ်ပြင်တွင် တပ်စွဲထားသည့် စစ်သင်္ဘောများပေါ်မှတစ်ဆင့် ဂွမြို့နယ်၊ ကျိန္တလီမြို့နှင့် သံတွဲမြို့နယ် ဂျိတ္တော အနီးပတ်ဝန်းကျင်ရှိ ကျေးရွာများကိုလည်း ရေကြောင်းမှပါ အဆက်မပြတ် ပစ်ခတ် တိုက်ခိုက်ခဲ့သေးသည်။ အဆိုပါ လေကြောင်းနှင့် ရေကြောင်း တိုက်ခိုက်မှုများကြောင့် ထိခိုက်သေဆုံးမှု အခြေအနေကို မသိရသေးဘဲ စစ်အုပ်စုတပ်၏ လက်နက်ကြီး၊ လေကြောင်းနှင့် ရေကြောင်း အန္တရာယ်များကို ပြည်သူများအနေဖြင့် အထူး သတိထားကြရန် အာရက္ခတပ်တော် (AA) က သတိပေး ထုတ်ပြန်ထားသည်။ လက်ရှိတွင် အာရက္ခတပ်တော် (AA) သည် စစ်တွေမြို့နယ် ပတ်လည်ရှိ ရသေ့တောင်၊ ပုဏ္ဏားကျွန်း၊ ပေါက်တော မြို့နယ်များကို သိမ်းပိုက် ထိန်းချုပ်ထားပြီး စစ်တွေမြို့ပေါ်ရှိ စစ်အုပ်စု စခန်းများကို ဝန်းရံ ပိတ်ဆို့ထားသည်။ စစ်အုပ်စုတပ်ကမူ ဆုံးရှုံးသွားသည့် နယ်မြေများကို တန်ပြန်ထိုးစစ်ဆင်ရန်အတွက် ပဲခူး၊ မကွေးနှင့် ဧရာဝတီ တိုင်းတို့မှတစ်ဆင့် စစ်ကြောင်းထိုးရန် ပြင်ဆင်နေသည့်အပြင် လေကြောင်း တိုက်ခိုက်မှုများကိုလည်း ဆက် တိုက် ပြုလုပ်လျက်ရှိသည်။ ဓါတ်ပုံ - (ပုံဟောင်း / Crd) #စစ်တွေ

စစ်တွေနှင့် ပတ်ပတ်လည် ဒေသများကို စစ်တပ် လေကြောင်းမှ မိနစ် ၃၀ အတွင်း အကြိမ် ၃၀ ဗုံးကြဲ

စစ်တွေနှင့် ပတ်ပတ်လည် ဒေသများကို စစ်တပ် လေကြောင်းမှ မိနစ် ၃၀ အတွင်း အကြိမ် ၃၀ ဗုံးကြဲ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၃ ရက်။ ရခ…

  • September 4, 2026
စစ်သင်္ဘောများကို တိုက်ခိုက်ပြီး စစ်သုံ့ပန်း ၁၀၀ ကျော် KIA ဖမ်းဆီး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၃ ရက်။ မန္တလေးမှ ဗန်းမော်သို့ ဧရာဝတီမြစ်ကြောင်းအတိုင်း ဆန်တက်လာသည့် စစ်အုပ်စုတပ် စစ်သင်္ဘောများကို ကချင်လွတ်လပ်ရေး တပ်မတော် KIA နှင့် ပူးပေါင်းတပ်များက ကြားဖြတ်တိုက်ခိုက်ခဲ့ရာ စစ်သင်္ဘောအချို့ နစ်မြုပ်၊ မီးလောင်ပျက်စီးခဲ့ပြီး စစ်သုံ့ပန်း ၁၀၀ ကျော်ကို လက်နက်နှင့်တကွ ဖမ်းဆီးရမိခဲ့သည်။ အဆိုပါ ရေယာဉ်အုပ်စုသည် မန္တလေး ဂေါဝိန်ဆိပ်ကမ်းမှ ဩဂုတ်လ ၂၁ ရက်တွင် ထွက်ခွာလာပြီး ရွှေကူမြို့နယ် ဇင်းဘုံကျေးရွာနှင့် ဗန်းမော်မြို့နယ် စင်းခန်းတံတားအကြား စက်တင်ဘာလ ၂ ရက်၌ ဆန်တက်စဉ် တိုက်ခိုက်ခံ ခဲ့ရခြင်း ဖြစ်သည်။ တိုက်ပွဲအတွင်း စစ်သင်္ဘော ၁ စီး ရေထဲမြုပ်ကာ ၁ စီး မီးလောင်ပျက်စီးခဲ့ပြီး စင်းခန်းတံတားအောက်တွင် အခြား ၁ စီး ထပ်မံ တိုက်ခိုက်ခံခဲ့ရသည်။ ထို့ပြင် ကမ်းစပ်သို့ ကပ်လာသည့် စစ်သင်္ဘော ၂ စီးမှာ အလံဖြူထောင်၍ လက်နက်ချခဲ့သလို လုံခြုံရေးယူပေး သည့် စပိဘုတ် ၂ စီးကိုလည်း ပူးပေါင်းတပ်များက လိုက်လံပစ်ခတ် တိုက်ခိုက်ခဲ့ကြောင်း KIO သတင်းပြန်ကြား ရေးဌာနက ဖော်ပြသည်။ မြေပြင်တွင် ပါဝင်နေသည့် တော်လှန်ရေး ရဲဘော်တစ်ဦးက “ရေထဲမှာ စစ်သားတွေ ရေစီးနဲ့ မျောလာတော့ ကမ်းကို ရအောင်ကူးခဲ့ဖို့ အော်ပြောရတယ်။ မကူးတတ်လို့ ရေအောက် မြုပ်သွားသူတွေလည်း မနည်းလောက် ဘူး” ဟု ပြောသည်။ ဖမ်းဆီးရမိသည့် စစ်သုံ့ပန်း ၁၀၀ ကျော်တွင် စစ်အုပ်စုတပ်ဖွဲ့ဝင်များအပြင် ဗန်းမော်၌ အုပ်ချုပ်ရေးယန္တရား ပြန်လည် လည်ပတ်ရန် လိုက်ပါလာသည့် ဌာနဆိုင်ရာ ဝန်ထမ်းများ၊ ရဲတပ်ဖွဲ့ဝင်များနှင့် တပ်မိသားစုဝင်များ၊ ကလေးသူငယ်များလည်း ပါဝင်သည်။ အဆိုပါ လက်နက်ချသူများကို လေကြောင်းအန္တရာယ်မှ ကင်းဝေးစေရန် KIA ပူးပေါင်းတပ်များက ဘေးကင်းရာ သို့ ရွှေ့ပြောင်း ထိန်းသိမ်းပေးထားသည်။ မြေပြင်တွင် တိုက်ပွဲဝင်နေသည့် ရွှေကူနယ်မြေခံ တော်လှန်ရေး ရဲဘော်တစ်ဦးက “လက်နက်ချလာတဲ့ စစ်သား တွေရော၊ သူတို့နဲ့အတူ ပါလာတဲ့ ဝန်ထမ်းတွေနဲ့ မိသားစုဝင်တွေပါ ပါတာပါ။ အရာရှိတွေလည်းပါတယ်။ စစ် ဆေးနေတုန်းပဲ။ အကုန်လုံးကို ဘေးကင်းနိုင်မယ့် နေရာကို အရင်ရွှေ့ရတာပေါ့။ လေယာဉ်က နေ့တိုင်းလာ ချနေတော့ မလွယ်ဘူး ထိကုန်မှာစိုးရတယ်။ ဖမ်းမိထားတဲ့ စစ်သုံ့ပန်းတွေကို KIA ရဲ့ စစ်ရုံးချုပ်ကနေ တိုက် ရိုက်ကွပ်ကဲပြီး လုံခြုံတဲ့နေရာမှာ ထိန်းသိမ်း စစ်ဆေးသွားမှာပါ” ဟု ပြောသည်။ စစ်အုပ်စုတပ်သည် သင်္ဘောလမ်းကြောင်း ပွင့်ရေးနှင့် စင်းခန်းတံတားကို ထိန်းချုပ်နိုင်ရေးအတွက် ဒုတိယမြစ် ကျဉ်း အရှေ့ဘက်နှင့် အနောက်ဘက် မြစ်ကမ်းဘေးတလျှောက်ကို လေကြောင်းမှ ဗုံး ၂၈ ကြိမ်ထက်မနည်း ကြဲချခဲ့သလို စက်တင်ဘာလ ၃ ရက်တွင်လည်း ဇင်းဘုံကျေးရွာဘက်သို့ မြေပြင်ထိုးစစ်များ ဆက်လက် ပြုလုပ်နေသဖြင့် တိုက်ပွဲများ ဆက်လက် ပြင်းထန်လျက်ရှိသည်။ စစ်အုပ်စုတပ် ထောက်ခံသည့် တယ်လီဂရမ်ချန်နယ်များ၌မူ ဖမ်းဆီးခံရသူများသည် စစ်တပ်ဖွဲ့ဝင်များ မဟုတ်ဘဲ ရွှေမျောလုပ်ငန်းမှ အရပ်သားများသာ ဖြစ်ကြောင်း ပြန်လည် ဝါဒဖြန့် ဖုံးကွယ်ပြောဆိုလျက်ရှိသည်။ KIA ၏ စစ်ရေးသတင်းများအရ ၂၀၂၅ ခုနှစ်တွင် ဗန်းမော်စစ်မျက်နှာသို့ စစ်ကူ ရိက္ခာပို့သည့် စစ်အုပ်စုတပ်၏ စစ်သင်္ဘော ၅ စီးကို ဖျက်ဆီးနိုင်ခဲ့သော်လည်း ယခု ၂၀၂၆ ခုနှစ်တွင်မူ စစ်အုပ်စုတပ် စစ်သင်္ဘော ၉ စီးအထိ ပစ်ခတ်ဖျက်ဆီးနိုင်ခဲ့ကြောင်း သိရသည်။ #KIA #စစ်သုံ့ပန်း

စစ်သင်္ဘောများကို တိုက်ခိုက်ပြီး စစ်သုံ့ပန်း ၁၀၀ ကျော် KIA ဖမ်းဆီး

စစ်သင်္ဘောများကို တိုက်ခိုက်ပြီး စစ်သုံ့ပန်း ၁၀၀ ကျော် KIA ဖမ်းဆီး သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၃ ရက်။ မန္တလေးမှ ဗန်းမော်သို…

  • September 3, 2026
ရခိုင်ပြည် တောင်ဘက်ပိုင်းတွင် စစ်အုပ်စုတပ်က ရေကြောင်းမှ ပစ်ခတ်၍ ကမ်းကပ်ရန် ကြိုးပမ်း သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၃ ရက်။ ရခိုင်ပြည်၊ ဂွမြို့နယ်နှင့် သံတွဲမြို့နယ်တို့၏ ကမ်းခြေတစ်လျှောက်တွင် စစ်အုပ်စုတပ်က စစ်ရေယာဉ်များဖြင့် ပင်လယ်ပြင်မှ ပစ်ခတ်မှုများ ပြုလုပ်ကာ ကမ်းကပ်ရန် ကြိုးပမ်းလျက်ရှိကြောင်း ဒေသခံ စစ်ရေး သတင်းရင်း မြစ်များက ပြောသည်။ စက်တင်ဘာလ ၃ ရက်နေ့၊ နံနက် ၁၁ နာရီခန့်မှ စတင်၍ စစ်တပ်၏ စစ်သင်္ဘောများသည် ရေကြောင်းမှတစ်ဆင့် ဂွမြို့နယ် ကျိန္တလီနှင့် သံတွဲမြို့နယ် ဂျိတ္တော အနီးပတ်ဝန်းကျင် နေရာများကို ပစ်ခတ်တိုက် ခိုက်နေခြင်း ဖြစ်သည်။ သံတွဲဒေသခံ ပရဟိတ လုပ်ဆောင်သူ အမျိုးသားတစ်ဦးက “ဒီနေ့ ၁၁ နာရီလောက်ကတည်းက သံတွဲနဲ့ ဂွ ဘက် ကို နေဗီက လှမ်းပစ်နေတာပါ။ ပြီးခဲ့တဲ့ ရက်ပိုင်းက သံတွဲနဲ့ ဂွ ပင်လယ်ပြင်မှာ ရွှေသောင်ယံဘက်က နေဗီတွေ ရောက်တာ ၆ စီးလောက်ရှိတယ်။ တပ်တော်ကလည်း ကမ်းခြေရွာတွေကို အချိန်ပိုင်းပဲ ဝင်ခွင့်ပြုထားတာ” ဟု ပြောသည်။ နေဗီဆိုသည်မှာ ရေတပ်ကို ခေါ်ခြင်း ဖြစ်သည်။ ဧရာဝတီတိုင်း၊ ရွှေသောင်ယံဘက်တွင် တပ်မ (၁၀၁) စစ်ကြောင်းက ဂွမြို့နယ်အတွင်းသို့ ဝင်ရောက်နိုင်ရန် ကြိုးပမ်းနေသကဲ့သို့ ဩဂုတ်လ ၂၆ ရက်နှင့် ၂၇ ရက်များတွင် ရွှေသောင်ယံမြို့ကို ဖြတ်သန်း၍ ရခိုင် - ဧရာဝတီ ကမ်းခြေပတ် ပင်လယ်ပြင်လမ်းကြောင်းအတိုင်း လာရောက်သည့် စစ်အုပ်စုတပ် ရေယာဉ်များသည် လက်ရှိတွင် ဂွနှင့် သံတွဲ ကမ်းခြေအနီးသို့ ရောက်ရှိလာခြင်းဖြစ်သည်။ သံတွဲဒေသခံက “လက်ရှိ သံတွဲနဲ့ ဂွကို စစ်တပ်ကမ်းကပ်ဖို့ လုပ်လာတာပါ။ ဒီနေ့ အထိအခိုက် မသိရသေးဘူး။ သံတွဲ ဂျိတ္တော ကမ်းခြေ ထိတယ်။ မေရိုးဘက်မှာ စစ်သင်္ဘော တော်တော် ကမ်းနဲ့ နီးလာတယ်” ဟု ပြောသည်။ ဧရာဝတီတိုင်း၊ ပုသိမ်ခရိုင်အတွင်းရှိ ချောင်းသာကမ်းခြေ မြောက်ဘက်မှ ရွှေသောင်ယံ၊ ဘောမိနှင့် မကျည်းစင် ကျေးရွာများသည် ရခိုင်ပြည်နယ်၊ ဂွမြို့နယ်ရှိ ဂွအငူ၊ ကြွေချိုင်နှင့် ဂွမြို့တို့သို့ ကုန်းလမ်း၊ ရေလမ်း နှစ်မျိုးစလုံး ဖြင့် တစ်ဆက်တည်း ဆက်သွယ်ထားသည့် ဒေသများဖြစ်သည်။ အဆိုပါ ဘောမိနှင့် မကျည်းစင် ကျေးရွာများကို အာရက္ခတပ်တော် (AA) က စိုးမိုးထိန်းချုပ်ထားသဖြင့် စစ်အုပ်စု တပ်သည် ပင်လယ်ပြင် ရေကြောင်းလမ်းမှတစ်ဆင့် ရခိုင်တောင်ပိုင်းသို့ အင်အားဖြည့်တင်းလာခြင်း ဖြစ်သည်။ လက်ရှိတွင် ရခိုင်တောင်ပိုင်း ပင်လယ်ပြင်၌ စစ်အုပ်စုတပ်၏ စစ်သင်္ဘော ၂၀ ကျော် တပ်စွဲထားပြီး သံတွဲမြို့ မောင်ရွှေလေးရွာအနီး၊ ဂွမြို့ ကမ်းခြေများနှင့် ကျိန္တလီ ကမ်းခြေအနီးတို့တွင် စစ်ရေယာဉ်များ ချထားကာ ကမ်းခြေတစ်လျှောက်ရှိ ကျေးရွာများကို ဒရုန်းများ၊ ကင်းထောက် လေယာဉ်များဖြင့် စောင့်ကြည့်လျက်ရှိသည်။ အာရက္ခတပ်တော် (AA) က ဂွနှင့် သံတွဲမြို့နယ်တို့တွင် ရေကြောင်းဘေးအန္တရာယ်ကို အထူးသတိပြုကြရန် အသိပေးထားပြီး ကမ်းခြေကျေးရွာများသို့ အသွားအလာ ကန့်သတ်ခြင်းနှင့် လူမစုကြရန် နှိုးဆော်ထားသည်။ ထို့ပြင် စစ်ရေး အခြေအနေများကြောင့် ဂွ၊ သံတွဲနှင့် တောင်ကုတ်မြို့နယ်များ၌ ည ၁၁ နာရီမှ နံနက် ၅ နာရီအထိ သွားလာလှုပ်ရှားမှု မပြုလုပ်ကြရန် ဒေသန္တရအမိန့် ထုတ်ပြန်ထားသည်။ စစ်အုပ်စုတပ်၏ မြေပြင်စစ်ကြောင်းများသည် ဂွမြို့နယ်အတွင်းသို့ ဝင်ရောက်နိုင်ရန် ကုန်းလမ်း၊ ရေလမ်း နည်းမျိုးစုံဖြင့် ကြိုးပမ်းလျက်ရှိပြီး လက်ရှိတွင် ပုသိမ် - ရွှေသောင်ယံ လမ်းပိုင်း၊ ကမ်းခြေပတ်လမ်းနှင့် ရေပြင် ချောင်းလက်တက်များ၌ စစ်အင်အား ဖြည့်တင်းပြင်ဆင်နေသည့်အပြင် ပြည်မြို့နှင့် ရန်ကုန်မြို့တို့မှ စစ်ကားများ လည်း ထပ်မံ ရောက်ရှိနေသည်။ ဓါတ်ပုံ - ULA/AA #ဂွမြို့ #သံတွဲမြို့

ရခိုင်ပြည် တောင်ဘက်ပိုင်းတွင် စစ်အုပ်စုတပ်က ရေကြောင်းမှ ပစ်ခတ်၍ ကမ်းကပ်ရန် ကြိုးပမ်း

ရခိုင်ပြည် တောင်ဘက်ပိုင်းတွင် စစ်အုပ်စုတပ်က ရေကြောင်းမှ ပစ်ခတ်၍ ကမ်းကပ်ရန် ကြိုးပမ်း သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၃ ရက်။ ရခိ…

  • September 3, 2026
စစ်သင်္ဘောနှင့် ရေယာဉ် ၇ စီး ဗန်းမော်သို့ ရောက်ရှိ

စစ်သင်္ဘောနှင့် ရေယာဉ် ၇ စီး ဗန်းမော်သို့ ရောက်ရှိ

စစ်သင်္ဘောနှင့် ရေယာဉ် ၇ စီး ဗန်းမော်သို့ ရောက်ရှိ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၃ ရက်။ မန္တလေးမြို့ ဂေါဝိန်ဆိပ်ကမ်းမှ ဧရာဝတီ…

  • September 3, 2026
ကျောက်တော်၌ ၁၄ နှစ်အရွယ် မိန်းကလေးအား အဓမ္မပြုကျင့်သူကို အေအေ ဖမ်းဆီး၍ တရားစွဲဆို သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂ ရက်။ ရခိုင်ပြည်၊ ကျောက်တော်မြို့နယ်တွင် အသက် ၁၄ နှစ်အရွယ် မိန်းကလေးတစ်ဦးအား အဓမ္မပြုကျင့်ပြီး ၂ လ ကျော်ကြာ ထွက်ပြေးလွတ်မြောက်နေသည့် တရားခံကို တရားဥပဒေစိုးမိုးရေးနှင့် ပြည်သူ့လုံခြုံရေးဌာန (DLEPS) က ဖမ်းဆီးရမိခဲ့ပြီး မြောက်ဦးခရိုင် တရားရုံးသို့ တရားစွဲဆို တင်ပို့လိုက်ပြီဖြစ်သည်။ အဆိုပါ ဖြစ်စဉ်မှာ ဧပြီလ ၇ ရက်နေ့က ကျောက်တော်မြို့နယ်၊ ရမ်းချောင်းတောအတွင်းရှိ ဥယျာဉ်ခြံ၌ ဖြစ်ပွားခဲ့ ခြင်းဖြစ်ပြီး ထွက်ပြေးလွတ်မြောက်နေသူ ခြံပိုင်ရှင် အသက် ၅၅ နှစ်အရွယ် ဦးမောင်အေးလှ အား အာရက္ခတပ် တော် (AA) နှင့် DLEPS တပ်ဖွဲ့များက ဇူလိုင်လ ၃၀ ရက်နေ့တွင် ဖမ်းဆီးခဲ့ကာ ဩဂုတ်လ ၂၈ ရက်နေ့၌ တရားစွဲ ဆိုခဲ့ခြင်း ဖြစ်သည်။ အေအေနှင့် နီးစပ်သူတစ်ဦးက “မြောက်ဦးခရိုင် တရားရုံးမှာ တရားစွဲဆိုလိုက်တာလို့သိရတယ်၊ လူပြောများနေ တယ်။ မီဒီယာတွေမှာလည်း တွေ့ရတော့ တော်တော် သတိထားကိုင်တွယ်လို့ နည်းနည်းကြာတာလို့ ဆိုကြ တယ်။ အခုကတော့ ရခိုင်ကသက်ငယ် မုဒိမ်းမှုတွေကို အထူးတရားရုံးက ကိုင်တွယ်မယ်လို့သိရပါတယ်” ဟု ပြောသည်။ ဖြစ်စဉ်မှာ ကျောက်တလုံးကျေးရွာမှ နစ်နာသူ မိသားစုသည် ဇီးချောင်းဆည် မြောက်ဘက်ရှိ သိန်းတန်ကျေးရွာ နေ ဦးမောင်အေးလှ ပိုင်ဆိုင်သည့် ဥယျာဉ်ခြံ၌ မိသားစုလိုက် သွားရောက် လုပ်ကိုင်ခဲ့ကြခြင်းဖြစ်သည်။ ဧပြီလ ၅ ရက်နေ့တွင် ခြံတဲ၌ မီးမရှိသဖြင့် ဆိုလာပြားသွားယူရန် ခြံပိုင်ရှင် ဦးမောင်အေးလှနှင့်အတူ အသက် ၁၄ နှစ် အရွယ် သမီးဖြစ်သူ လိုက်ပါသွားခဲ့သည်။ ဧပြီလ ၆ ရက် မွန်းလွဲပိုင်းတွင် ဇီးချောင်းဆည်မှ ရမ်းချောင်းတောအတွင်း တောလမ်းအတိုင်း ပြန်လာစဉ် ညနေပိုင်း၌ မှောင်လာသဖြင့် မြောင်တစ်ခုတွင် ယာယီတဲထိုး၍ အိပ်စက်ခဲ့ကြရာ ထိုည၌ ဦးမောင်အေးလှက အသက် ၁၄ နှစ်အရွယ် မိန်းကလေးအား အဓမ္မပြုကျင့်ခဲ့သည့်အပြင် သဘာဝနှင့် ဆန့်ကျင်သော လိင်ပိုင်းဆိုင်ရာ ကျူးလွန်မှုများကိုပါ ထပ်မံပြုလုပ်ခဲ့သည်။ ထို့ပြင် အဆိုပါ တရားခံသည် နစ်နာသူ၏ အသက် ၈ နှစ်အရွယ် ညီမဖြစ်သူကိုလည်း မက်လုံးပေး၍ လိင်ပိုင်း ဆိုင်ရာ အလွဲသုံးစား ပြုလုပ်ခဲ့ကြောင်း စုံစမ်းသိရှိရသည်။ နစ်နာသူ မိသားစုသည် မေလ ၁၅ ရက်နေ့တွင် မိခင်ဖြစ်သူနှင့်အတူ DLEPS စခန်း၌ တိုင်တန်းခဲ့သဖြင့် ရာဇသတ် ကြီး ပုဒ်မ ၃၇၆ (မုဒိမ်းမှု)၊ ပုဒ်မ ၃၇၇ (သဘာဝနှင့်ဆန့်ကျင်သော လိင်ဆက်ဆံမှု)၊ အမှုအမှတ် (ပ) ၆/၂၀၂၆ ဖြင့် အမှုဖွင့်လှစ်ခဲ့သည်။ အမှုဖွင့်ပြီးနောက် တရားခံ ဦးမောင်အေးလှသည် ထွက်ပြေးတိမ်းရှောင်နေခဲ့ရာမှ ဇူလိုင်လ ၃၀ ရက်နေ့တွင် သိန်းတန်ကျေးရွာရှိ ၎င်း၏ နေအိမ်၌ သွားရောက်ဖမ်းဆီးခဲ့ခြင်း ဖြစ်သည်။ စစ်ဆေးမေးမြန်းမှုများအရ တရားခံ မောင်အေးလှက ပြစ်မှုကျူးလွန်ကြောင်း ဝန်ခံထွက်ဆိုခဲ့ပြီး တရားရုံးတွင် ဖြောင့်ချက်ပေးခဲ့သည်။ တရားဥပဒေစိုးမိုးရေးနှင့် ပြည်သူ့လုံခြုံရေးဌာန (DLEPS) အနေဖြင့် သက်သေခံ ပစ္စည်းများနှင့် အခင်းဖြစ်ရပ် မှတ်တမ်းများကို စနစ်တကျ သိမ်းဆည်း၍ မြောက်ဦးခရိုင်တရားရုံးသို့ တရားစွဲဆို တင်ပို့ခဲ့ရာ တရားရုံးက ရာဇဝတ်ကြီးမှုအမှတ်ဖြင့် လက်ခံစစ်ဆေးလျက် ရှိသည်။ လက်ရှိတွင် DLEPS ဌာနအနေဖြင့် ပြည်နယ်အတွင်း ပြစ်မှုကျူးလွန်ပြီး ထွက်ပြေးလွတ်မြောက်နေသည့် တရားခံပြေးများကို ဖမ်းဆီးရမိရေး ဆက်လက်ဆောင်ရွက်လျက်ရှိကြောင်း အာရက္ခမှုခင်းနှင့် ဆက်စပ်သတင်း များ ထုတ်ပြန်ရေးအဖွဲ့၏ ထုတ်ပြန်ချက်တွင် ဖော်ပြထားသည်။ ဓါတ်ပုံ - DLEPS ဌာန #ကျောက်တော်မြို့နယ် #မုဒိမ်းမှု

ကျောက်တော်၌ ၁၄ နှစ်အရွယ် မိန်းကလေးအား အဓမ္မပြုကျင့်သူကို အေအေ ဖမ်းဆီး၍ တရားစွဲဆို

ကျောက်တော်၌ ၁၄ နှစ်အရွယ် မိန်းကလေးအား အဓမ္မပြုကျင့်သူကို အေအေ ဖမ်းဆီး၍ တရားစွဲဆို သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၂ ရက်။ ရခိုင်…

  • September 3, 2026
ဧရာဝတီတိုင်း ငါးသိုင်းချောင်းတွင် ရေဘေးအလှူသွားလှေမှောက်၍ ၃ ဦး သေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂ ရက်။ ဧရာဝတီတိုင်းအတွင်း ရေကြီးရေလျှံမှုများ ဆက်လက်ပြင်းထန်နေချိန် ငါးသိုင်းချောင်း-အိုင်သပြု လမ်းပိုင်း၌ ရေဘေးအလှူသွားသည့် လှေတစ်စီး တိမ်းမှောက်ခဲ့ရာ ပျောက်ဆုံးနေသူ အမျိုးသား ၃ ဦး၏ ရုပ်အလောင်း များကို စက်တင်ဘာလ ၁ ရက်နေ့တွင် ပြန်လည်တွေ့ရှိခဲ့သည်။ ထို့ကြောင့် ငါးသိုင်းချောင်းမြို့နယ်သည် တိုင်းအတွင်း ရေဘေးကြောင့် လူသေဆုံးမှု အများဆုံးဒေသ ဖြစ်လာခဲ့ သည်။ ကျက်ကွင်းကျေးရွာမှ အဆိုပါ အမျိုးသား ၃ ဦးသည် ဩဂုတ်လ ၃၀ ရက်နေ့၊ ညပိုင်းက ရေမြုပ်နေသည့် လမ်းပိုင်းအတိုင်း လှေဖြင့် ထွက်ခွာသွားရာမှ ဩဂုတ်လ ၃၁ ရက်နေ့၊ နံနက်ပိုင်းတွင် လှေမျော ပါတိမ်းမှောက်ခဲ့ခြင်း ဖြစ်သည်။ ကယ်ဆယ်ရေးအဖွဲ့များ၏ ရှာဖွေမှုကြောင့် ဩဂုတ်လ ၃၁ ရက်တွင် ၁ ဦးနှင့် စက်တင်ဘာလ ၁ ရက်နေ့၊ နံနက်ပိုင်းတွင် ကျန် ၂ ဦး၏ ရုပ်အလောင်းများကို ပြန်လည်ဆွဲထုတ်နိုင်ခဲ့သည်။ ဒေသခံ ရေဘေးကူညီရေး လုပ်ဆောင်နေသူတစ်ဦးက “လမ်းက ရေမြုပ်နေတော့ ကားရော ဆိုင်ကယ်ပါ သွား လို့မရဘူး။ ဝါးဖောင်တွေ၊ စက်လှေတွေနဲ့ပဲ သွားနေကြရတာ။ ရေစီးကလည်း သေမတတ် သန်တော့ လှေ မှောက်ရင် လွတ်ဖို့ မလွယ်ဘူး။ ဩဂုတ် ၃၁ ရက်က ၁ ဦး၊ ဒီနေ့မှ ကျန် ၂ ဦးရဲ့ အလောင်းကို ရှာတွေ့တာပါ" ဟု ပြောသည်။ ငါးသိုင်းချောင်းမြို့တွင် ဩဂုတ်လ ၁၈ ရက်နှင့် ၁၉ ရက်တို့၌ ရေနစ်သေဆုံးသူ ၂ ဦး ရှိခဲ့သည့်အပြင် ဩဂုတ်လ ၂၇ ရက် ညပိုင်းကလည်း ရွာသစ်ကုန်းတံတားအနီး လှေတစ်စီး တိမ်းမှောက်ခဲ့၍ အမျိုးသား ၁ ဦး သေဆုံးခဲ့သေး သည်။ ထို့ကြောင့် လက်ရှိတွင် ငါးသိုင်းချောင်းမြို့နယ်၌ ရေဘေးကြောင့် သေဆုံးသူ ၆ ဦးအထိ မြင့်တက်လာခဲ့သည်။ ပြီးခဲ့သည့် ဇူလိုင်လ ၃၀ ရက်နေ့က လေးမျက်နှာမြို့နယ်ရှိ ငဝန်မြစ်ရေကာတာ ကျိုးကျခဲ့ပြီးနောက် လေးမျက်နှာ၊ ဟင်္သာတ၊ ရေကြည်၊ ကျုံပျော်၊ ငါးသိုင်းချောင်း၊ ကျောင်းကုန်း၊ ပန်းတနော်နှင့် အသုတ်မြို့နယ်တို့တွင် ရေကြီး ရေလျှံမှုများ စက်တင်ဘာလ ၂ ရက်နေ့အထိ ဖြစ်ပွားနေခြင်းဖြစ်သည်။ စက်တင်ဘာလ ၁ ရက်နေ့အထိ စာရင်းများအရ ရေကြည်၊ လေးမျက်နှာ၊ ဟင်္သာတနှင့် ငါးသိုင်းချောင်း မြို့နယ် များအတွင်း ရေဘေးကြောင့် သေဆုံးသူ ၁၅ ဦးထက်မနည်း ရှိလာပြီး ၅ ဦးထက်မနည်း ပျောက်ဆုံးနေဆဲ ဖြစ်သော်လည်း စစ်အုပ်စုတပ်ဘက်မှ တရားဝင် သတင်းထုတ်ပြန်ခြင်း မရှိသေးပေ။ ဒေသခံတစ်ဦးက “အခုထိ မိုးက သည်းတုန်း၊ ရေက တက်တုန်းပဲ။ အိမ်တွေရော စိုက်ခင်းတွေရော ရေမြုပ် နေတာ ရက်တော်တော်ကြာနေပြီ။ တစ်လလောက်တောင် ရှိလာတော့မယ်။ အကူအညီတွေလည်း အများကြီး လိုနေသလို ရေကြောင်းသွားလာရေးကလည်း သတိထားနေရတယ်” ဟု ပြောသည်။ လက်ရှိတွင် အနောက်တောင်မုတ်သုံလေ အားကောင်းနေခြင်းနှင့် လေဖိအားနည်းရပ်ဝန်း အရှိန်ကြောင့် စက်တင်ဘာလဆန်းပိုင်းတွင် မိုးဆက်လက်ကြီးနိုင်သဖြင့် ရေဘေးအန္တရာယ်ကို အထူးသတိပြုကြရန် အမျိုးသား ညီညွတ်ရေးအစိုးရ (NUG)၊ လူမှုရေးရာ၊ အလုပ်သမားနှင့် လူသားချင်းစာနာထောက်ထားရေး ဝန်ကြီးဌာန (MoSLHA) က နှိုးဆော်ထုတ်ပြန်ထားသည်။ ဓါတ်ပုံ - (မြန်မာနိုင်ငံ လူမှုကယ်ရေးအဖွဲ့ - မန္တလေး / ရေနစ်သေဆုံးသူများ၏ ရုပ်အလောင်း) #ငါးသိုင်းချောင်း

ဧရာဝတီတိုင်း ငါးသိုင်းချောင်းတွင် ရေဘေးအလှူသွားလှေမှောက်၍ ၃ ဦး သေဆုံး

ဧရာဝတီတိုင်း ငါးသိုင်းချောင်းတွင် ရေဘေးအလှူသွားလှေမှောက်၍ ၃ ဦး သေဆုံး သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၂ ရက်။ ဧရာဝတီတိုင်းအတွင်း…

  • September 3, 2026
×Close