သတင်း

ထားဝယ်ခရိုင်အတွင်း နေအိမ်ပေါ် လက်နက်ကြီးကျရောက်၍ အမျိုးသမီးတစ်ဦး သေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၇ ရက်။ ရေဘေးဒဏ် အပြင်းအထန် ခံထားရသည့် ထားဝယ်ခရိုင် သရက်ချောင်းမြို့နယ် ပြင်းဖြူကြီးကျေးရွာတွင် စစ်အုပ်စုတပ်က ပစ်ခတ်လိုက်သည့် လက်နက်ကြီးကျည် နေအိမ်ပေါ် ကျရောက်ပေါက်ကွဲခဲ့သဖြင့် အမျိုးသမီးတစ်ဦး သေဆုံးသွားခဲ့ကြောင်း ဒေသခံများက ပြောသည်။ လွန်ခဲ့သည့် အောက်တိုဘာလ ၅ ရက် မွန်းလွဲ ၃ နာရီခန့်က ပြင်းဖြူကြီးကျေးရွာတွင် တပ်စွဲထားသည့် စစ်အုပ်စု တပ်ကို ပြည်သူ့ကာကွယ်ရေးတပ်ဖွဲ့ (PDF) က လာရောက်ချောင်းမြောင်း ပစ်ခတ်ခဲ့ပြီးနောက် ပြန်လည်ဆုတ်ခွာ စဉ် စစ်အုပ်စုတပ်က လက်နက်ကြီးဖြင့် ရမ်းသန်းပစ်ခတ်ခဲ့ခြင်း ဖြစ်သည်။ ထိုသို့ ပစ်ခတ်မှုကြောင့် ဆုတ်ခွာရာ လမ်းကြောင်းအနီးရှိ နေအိမ်တစ်လုံးပေါ်သို့ လက်နက်ကြီးကျည် ကျရောက် ပေါက်ကွဲခဲ့ပြီး အိမ်အတွင်း ရှိနေသည့် အသက် ၄၅ နှစ်အရွယ် အမျိုးသမီးတစ်ဦး ပွဲချင်းပြီး သေဆုံးသွားခဲ့ရ သည်။ ဖြစ်စဉ်နှင့် ပတ်သက်၍ အသက် ၄၀ အရွယ် ဒေသခံ ရွာသားတစ်ဦးက “သေနတ်သံ အတွဲလိုက် ကြားရတယ်။ စစ်တပ်ကို လာချောင်းပစ်တာလို့ ပြောသံကြားရတယ်။ ထိခိုက်တဲ့အသံတော့ မကြားရပါဘူး။ ခဏအကြာမှာ စစ်တပ်က လက်နက်ကြီးနဲ့ ပြန်ပစ်သံ ကြားရတာပဲ။ အဲဒီမှာ အမျိုးသမီးတစ်ယောက် လက်နက်ကြီးအစ ထိ သွားတာ” ဟု ပြောသည်။ ပစ်ခတ်မှု ဖြစ်ပွားပြီးနောက် စစ်အုပ်စုတပ်ဖွဲ့ဝင်များက မြိတ်-ထားဝယ် သွား လမ်းမကြီးပေါ်တွင် လမ်းသွား လမ်းလာ မော်တော်ဆိုင်ကယ်များနှင့် မော်တော်ယာဉ်များကို တားဆီးစစ်ဆေးမှုများ ပြုလုပ်ခဲ့သည့်အပြင် ကျေးရွာအနီး တောအတွင်း စစ်ဘေးတိမ်းရှောင်နေသည့် တဲများကိုပါ လိုက်လံရှာဖွေ စစ်ဆေးခဲ့သည်ဟု ဒေသခံက ပြောသည်။ သရက်ချောင်းမြို့နယ်သည် စက်တင်ဘာလနှောင်းပိုင်းမှစ၍ ၂၄ နာရီအတွင်း မိုးရေချိန် ၁၃ လက်မကျော်အထိ စံချိန်တင် မိုးသည်းထန်စွာ ရွာသွန်းခဲ့မှုကြောင့် ထားဝယ်တစ်ခရိုင်လုံးတွင် ရေကြီးရေလျှံမှုနှင့် မြေပြိုမှု အန္တရာယ် များကို ဆိုးရွားစွာ ကြုံတွေ့နေရသည့် ဒေသတစ်ခုလည်း ဖြစ်သည်။ သရက်ချောင်းမြို့နယ်တွင် စက်တင်ဘာလ ၂၆ ရက် ညသန်းခေါင်ကျော်မှစ၍ ၂၄ နာရီအတွင်း မိုးရေချိန် ၁၃ လက်မကျော်အထိ စံချိန်တင် ရွာသွန်းခဲ့သဖြင့် မြို့နယ်တောင်ဘက်အစွန်ပိုင်းရှိ ကညင်ချောင်းနှင့် သင်ပုန်းချောင်း ကျေးရွာတို့တွင် နေအိမ် ၅၀ ခန့် မြေပိခဲ့ပြီး ကညင်ချောင်းရွာသား နှစ်ဦးအပါအဝင် လူ ၈ ဦးထက်မနည်း သေဆုံးကာ နေအိမ် ၁၆၆ ဆောင်ထက်မနည်း ထိခိုက်ပျက်စီးခဲ့ကြောင်း ဒေသခံအချို့နှင့် မေတ္တာရှင်ပရဟိတ အသင်းတာဝန်ရှိသူက ပြောသည်။ လက်ရှိတွင် မြိတ်-ထားဝယ် လမ်းပိုင်း၌ စစ်ရေးတင်းမာနေသဖြင့် အဝေးရောက် ရွာသားများ၏ လှူဒါန်းငွေဖြင့် သာ စားဝတ်နေရေး ဖြေရှင်းနေကြရပြီး၊ ကူညီကယ်ဆယ်ရေးအဖွဲ့များနှင့် အလှူရှင်များ အရောက်အပေါက် နည်းနေသဖြင့် မြေပိနေသည့် နေအိမ်များကို ပြန်လည်ဖော်ယူရန် ဘတ်ဟိုး၊ ကရိန်းများနှင့် စားနပ်ရိက္ခာ၊ ဆေးဝါး အကူအညီများ အရေးပေါ် လိုအပ်နေကြောင်း ဒေသခံများက ဆိုသည်။ #ထားဝယ်ခရိုင်

ထားဝယ်ခရိုင်အတွင်း နေအိမ်ပေါ် လက်နက်ကြီးကျရောက်၍ အမျိုးသမီးတစ်ဦး သေဆုံး

ထားဝယ်ခရိုင်အတွင်း နေအိမ်ပေါ် လက်နက်ကြီးကျရောက်၍ အမျိုးသမီးတစ်ဦး သေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၇ ရက်။ ရေဘေးဒဏ် အပြင…

  • October 7, 2026
ရခိုင်-ဧရာဝတီအစပ် တိုက်ပွဲတွင် စစ်အုပ်စုတပ် အထိနာ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၆ ရက်။ ရခိုင်ပြည်နှင့် ဧရာဝတီတိုင်းအစပ် သာပေါင်းနှင့် လေးမျက်နှာမြို့နယ်တို့ရှိ ရခိုင်ရိုးမတောင်ခြေတွင် တိုက်ပွဲများ ပြန်လည်ပြင်းထန်နေပြီး စစ်အုပ်စုတပ်ဘက်မှ ထိခိုက်ကျဆုံးမှု များပြားနေကြောင်း ဒေသခံ စစ်ရေးသတင်း အရင်းအမြစ်များက ပြောသည်။ အဆိုပါ တိုက်ပွဲများအတွင်း စစ်အုပ်စုတပ်သည် ကျဆုံးသွားသည့် စစ်သားများ၏ ရုပ်အလောင်းများကို စစ်မြေ ပြင်၌ပင် စွန့်ပစ်ထားခဲ့ရသည်။ ထို့ပြင် သက်တမ်းပြည့်သွားသည့် စစ်မှုထမ်းတပ်သားများကိုလည်း အိမ်မပြန် ခိုင်းဘဲ ရှေ့တန်းတွင် ဆက်လက် တိုက်ခိုက်ခိုင်းနေသည်။ သေဆုံးသွားသည့် စစ်သားများ၏ မိသားစုဝင်များက ရုပ်အလောင်းကို ပြသပေးရန် နှင့် ပြန်လည်ထုတ်ယူနိုင် ရေးအတွက် အနောက်တောင်တိုင်းစစ်ဌာနချုပ် (နတခ) သို့ လိုက်လာကြသော်လည်း စစ်အုပ်စုဘက်မှ ပြသနိုင် ခြင်း မရှိခဲ့ကြောင်း နီးစပ်သူများက ဆိုသည်။ သာပေါင်းမြို့နယ်ရှိ ဆင်ကူးကျေးရွာအုပ်စု ဘုတ်ချောင်းရွာ ရိုးမလမ်းကြောင်းတွင် စစ်အုပ်စု စစ်ကြောင်းအချို့ ရှိနေသလို သဲဖြူကျေးရွာနှင့် လှေကြီးတက်ကျေးရွာ အနီးတစ်ဝိုက်တို့တွင်လည်း တိုက်ပွဲများ ဖြစ်ပွားလျက်ရှိ သည်။ ထို့ပြင် လေးမျက်နှာမြို့နယ်ရှိ ငဝန်ထိပ် အိုင်သဒ္ဒီရွာအနီး၊ ခုံကြီးကျေးရွာအုပ်စု တောင်ဘက်ကျေးရွာများနှင့် အမ်း-ဂွ-ကျောင်းတောင် လမ်းကြောင်းများတွင် တိုက်ပွဲများ ရှိနေပြီး ရိုးမစပ်ကျေးရွာများကို စစ်အုပ်စုတပ်က လက်နက်ကြီးများဖြင့် ပစ်ခတ်၍ စစ်ကြောင်းထိုးလျက် ရှိသည်။ သာပေါင်းဒေသခံ စစ်ရေးသတင်းအရင်းအမြစ် အမျိုးသားတစ်ဦးက “သာပေါင်းကြီး၊ သာပေါင်းလေးဘက် ရခိုင် ရိုးမတောင်ခြေမှာ တိုက်ပွဲပြန်ဖြစ်လာတာ။ စစ်တပ်က တော်တော် သတင်းဆိုးတယ်၊ စစ်မှုထမ်း သက် တမ်းပြည့် သွားတဲ့သူတွေ အိမ်ပြန်မသွားနိုင်တော့ လမ်းဘေးတွေမှာ စကားများနေ၊ စစ်တပ်အရာရှိတွေက ရခိုင်ရိုးမပေါ် ပြန်လွှတ်၊ အလောင်းတွေ မကောက်နိုင်၊ အေအေကတော့ ရွာတွေဘက်ကို အချိန်တစ်ခုပဲ ဆင်း လာတာ။ စနိုက်ဘာတွေနဲ့ ပစ်တာ၊ စစ်တပ်က သေမှာသိတော့ မတိုးချင်ဘူး။ ဗုံးကြဲတာရှိပေမဲ့ သိပ်မထိရောက် သလို ဖြစ်နေတယ်။ ဒေသခံတွေ စစ်ရှောင်တွေပဲ သေတာ၊ အေအေက ဘာမှမဖြစ်ဘူး” ဟု ပြောသည်။ စစ်အုပ်စုတပ်သည် သာပေါင်းမြို့နယ်၊ သစ်ဖြူကျေးရွာအနီးသို့ အောက်တိုဘာ ၁ ရက် ည ၉ နာရီဝန်းကျင်တွင် လေကြောင်းမှ ဗုံးကြဲတိုက်ခိုက်ခဲ့သဖြင့် ရခိုင်စစ်ဘေးရှောင် အမျိုးသမီးတစ်ဦး သေဆုံးကာ တစ်ဦး ဒဏ်ရာရရှိခဲ့ သည်။ လေးမျက်နှာ ဒေသခံ စစ်ရှောင်တစ်ဦးက “လေးမျက်နှာမှာ စစ်တပ်က ရိုးမအစပ်ကို စစ်ကြောင်းထိုးနေလို့ တိုက်ပွဲတွေ ရှိနေတယ်၊ ဘယ်သူမှ ရိုးမပေါ် မသွားရဲတော့ဘူး၊ စစ်ရှောင်ရွာတွေလည်း ပြန်နေဖို့လုပ်လိုက် တိုက် ပွဲဖြစ်လိုက်နဲ့ နေလို့ကို မရဘူး၊ အခုကြားတာ စစ်မှုထမ်းတပ်သားတွေ ပြဿနာမျိုးစုံရှိနေတယ်” ဟု ပြော သည်။ ပုသိမ်မြို့အခြေစိုက် စစ်အုပ်စု၏ အနောက်တောင်တိုင်းစစ်ဌာနချုပ် (နတခ) ကွပ်ကဲမှုအောက်ရှိ တပ်ရင်းများ သည် ရခိုင်နှင့် လေးမျက်နှာ၊ သာပေါင်း စစ်မျက်နှာပြင်များတွင် ဝင်ရောက်တိုက်ခိုက်နေသော်လည်း ရိုးမတောင် ခြေ အထိ စစ်ကြောင်းများ ရောက်ရှိရန် ခက်ခဲလျက်ရှိသည်။ ဓာတ်ပုံ - (ဧရာဝတီ-ရခိုင် နယ်စပ်တစ်နေရာတွင် တွေ့ရသည့် (AA) တပ်ဖွဲ့ဝင်များ။ / AA Info Desk - ပုံဟောင်း)

ရခိုင်-ဧရာဝတီအစပ် တိုက်ပွဲတွင် စစ်အုပ်စုတပ် အထိနာ

ရခိုင်-ဧရာဝတီအစပ် တိုက်ပွဲတွင် စစ်အုပ်စုတပ် အထိနာ သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၆ ရက်။ ရခိုင်ပြည်နှင့် ဧရာဝတီတိုင်းအစပ် သာပ…

  • October 6, 2026
တော်လှန်ရေးနယ်မြေ ကံမကို စစ်အုပ်စု ကာမီကာဇေဒရုန်းဖြင့် တိုက်ခိုက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၆ ရက်။ မကွေးတိုင်း၊ သရက်ခရိုင်၊ ကံမမြို့နယ်နှင့် မင်းတုန်းမြို့နယ်အစပ် တော်လှန်ရေးတပ်များ စိုးမိုးထားသည့် ကျောက်ပဒေါင်းကျေးရွာကို စစ်အုပ်စုတပ်က ကာမီကာဇေ (Kamikaze) အသေခံ ဒရုန်းနှစ်စီးဖြင့် လာရောက် တိုက်ခိုက် ခဲ့ကြောင်း ဒေသခံများက ပြောသည်။ ကျောက်ပဒေါင်းကျေးရွာသည် ကံမမြို့၏ အနောက်ဘက် မင်းတုန်းမြို့နယ်သို့ ဆက်သွယ်ထားသည့် ကျေးရွာ ချင်းဆက် လမ်းပေါ်တွင် တည်ရှိပြီး မင်းတုန်းချောင်းဘေးရှိ အဆိုပါ နယ်မြေများကို တော်လှန်ရေး တပ်ဖွဲ့များက နယ်မြေစိုးမိုးထားသည့် ဒေသဖြစ်သည်။ အဆိုပါ ကျောက်ပဒေါင်းကျေးရွာကို စစ်အုပ်စုတပ်က အောက်တိုဘာ ၄ ရက် ည ၉ နာရီအချိန်ခန့်တွင် ကာမီကာဇေ (Kamikaze) ဒရုန်းနှစ်စီးဖြင့် တိုက်ခိုက်ခဲ့ခြင်း ဖြစ်သည်။ မင်းတုန်းမြို့နှင့် ကံမမြို့တို့သည် စစ်အုပ်စုတပ်၏ အထိုင်တပ်မရှိသော မြို့များဖြစ်ပြီး အနီးဆုံး တည်ရှိသည့် စစ်အုပ်စုတပ်စခန်းများမှာ သရက်မြို့ရှိ ခလရ (၄၄) နှင့် ကပစ (၁၂) တို့ ဖြစ်ကြသည်။ အသက် ၄၅ နှစ်အရွယ် တောင်သူတစ်ဦးက “ဟိုဘက်ကမ်းမှာ ဆင်ကော်ရဲစခန်း ရှိတယ်၊ သူ့မြောက်ဘက်မှာ ကပစ (၁၂) ရှိတယ်၊ အဲဒီက လွှတ်တာဖြစ်ဖို့ များတယ်၊ ရေနံ့သာကတော့ မဟုတ်ဘူး” ဟု စစ်အုပ်စု၏ ဒရုန်းလွှတ်တင်သည့် တပ်စခန်း တည်နေရာနှင့် ပတ်သက်၍ ခန့်မှန်း ပြောဆိုသည်။ အဆိုပါ ဒရုန်းနှစ်စီးဖြင့် တိုက်ခိုက်မှုကြောင့် ဒရုန်းတစ်စီးမှာ ရွာလမ်းမပေါ်သို့ ကျရောက်ခဲ့ပြီး အရပ်သား နေအိမ် တစ်အိမ်၏ မီးဖိုဆောင် ထိခိုက်ပျက်စီးခဲ့သည့်အပြင် တောင်သူများ၏ ကာလပေါက်ဈေး ကျပ်သိန်း ၂၀ ခန့်တန် ခိုင်းနွားတစ်ကောင် ဗုံးစထိမှန်ကာ ပြင်းထန်ဒဏ်ရာ ရရှိခဲ့သည်။ အသက် ၄၀ အရွယ် ဒေသခံတစ်ဦးက “လမ်းခြေရင်းဘက်က အိမ်မီးဖိုဆောင် ထိသွားတာ၊ လူတွေ မထိခိုက် ဘူး။ နွားကတော့ အခြေအနေ မကောင်းလို့ ပေါ်လိုက်ပြီ ပြောတာပဲ” ဟု ပြောသည်။ တော်လှန်ရေးတပ်များ နယ်မြေစိုးမိုးထားသည့် အဆိုပါ ကံမ-မင်းတုန်း နယ်စပ် ကျေးရွာများကို စစ်အုပ်စုတပ်က အနီးနားရှိ ကပစ နှင့် ရဲစခန်းများမှတစ်ဆင့် ဒရုန်းများ သုံး၍ ခြိမ်းခြောက် တိုက်ခိုက်မှုများ ပြုလုပ်လာနေခြင်း ဖြစ်ကြောင်း ဒေသခံများက ပြောသည်။

တော်လှန်ရေးနယ်မြေ ကံမကို စစ်အုပ်စု ကာမီကာဇေဒရုန်းဖြင့် တိုက်ခိုက်

တော်လှန်ရေးနယ်မြေ ကံမကို စစ်အုပ်စု ကာမီကာဇေဒရုန်းဖြင့် တိုက်ခိုက် သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၆ ရက်။ မကွေးတိုင်း၊ သရက်ခရ…

  • October 6, 2026
ကျောက်ဖြူ တောင်မော်ဦး ရေတပ်စခန်းအနီး တိုက်ပွဲပြင်းထန်နေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၆ ရက်။ ရခိုင်ပြည်၊ ကျောက်ဖြူမြို့နယ် အဝတောင်-စနဲ လမ်းပိုင်းတွင် စစ်အုပ်စုတပ်နှင့် အာရက္ခတပ်တော် (AA) တို့ တိုက်ပွဲပြင်းထန်နေပြီး တောင်မော်ဦး ရေတပ်စခန်းအနီးသို့ အေအေ၏ ထိုးစစ် ရောက်ရှိလာကြောင်း ဒေသခံ စစ်ရေးသတင်း အရင်းအမြစ်များက ပြောသည်။ စက်တင်ဘာလ ၂၈ ရက်နေ့တွင် အဆိုပါ လမ်းပိုင်း၌ စစ်အုပ်စုတပ်က စစ်ကြောင်းများခွဲ၍ စတင်ထိုးစစ်ဆင်ခဲ့ ရာမှ အေအေက တန်ပြန်ထိုးစစ်ဆင် တိုက်ခိုက်ခဲ့ခြင်းဖြစ်သည်။ အောက်တိုဘာလ ၂ ရက်နေ့မှ ၅ ရက်နေ့အထိ တောင်မော်ဦး ရေတပ်စခန်း၏ ကာကင်းများကို အေအေက ထိုးစစ်ဆင် တိုက်ခိုက်ခဲ့သည့်အပြင် ရေတပ်စခန်းအတွင်းသို့ပါ လက်နက်ကြီးနှင့် ဒရုန်းများဖြင့် ပစ်ခတ် တိုက်ခိုက်မှုများ ရှိခဲ့သည်။ ဒေသခံ စစ်ရေးသတင်းအရင်းအမြစ် အမျိုးသားတစ်ဦးက “လက်ရှိကျနော်တို့ကြားတာက တောင်မော်ဦး ရေတပ်ထဲကို အေအေ လက်နက်ကြီး တချို့ကျလို့ တပ်အရာရှိတွေရဲ့ မိသားစုတွေ ပြောင်းရွှေ့နေတယ်လို့ ကြားတယ်။ စနဲဘက်က ကျောက်ဖြူဘက်လာရင် အဝတောင်ပြီးရင် တောင်မော်ဦး ဧရိယာပဲလေ၊ စနဲကို အပြတ်ထိန်းဖို့ စစ်တပ်ကလုပ်တာ ထိုးစစ်ကိုအေအေက ခုခံရနင်းပြန်တိုက်လာတာ တောင်မော်ဦးအနားအထိ ရောက်လာတာ” ဟု ပြောသည်။ တောင်မော်ဦး ရေတပ်စခန်းသည် သံဇစ်မြစ်ဘေး၊ စနဲနှင့် အဝတောင်အကြား ကမ်းခြေအနီး ကုန်းလမ်းမပေါ် တွင် တည်ရှိပြီး၊ လက်ရှိ တိုက်ပွဲများ ပြင်းထန်နေသဖြင့် စစ်အုပ်စုတပ် ရေတပ်စခန်းအတွင်းရှိ လက်ကျန် တပ် မိသားစုများကို ဓညဝတီ ရေတပ်ဌာနချုပ်သို့ အရေးပေါ် ရွှေ့ပြောင်းပေးနေရသည်။ ပြီးခဲ့သည့် ဇူလိုင် ၂၈ ရက်မှ ဩဂုတ် ၄ ရက်အတွင်း တောင်မော်ဦး တိုက်ပွဲများ ပြင်းထန်ခဲ့စဉ်ကလည်း စစ် အုပ်စုတပ် မိသားစုများအား ကျောက်ဖြူမြို့ပေါ်ရှိ တပ်ရင်းများနှင့် ဓညဝတီ ရေတပ်ဌာနချုပ်သို့ ရွှေ့ပြောင်း ပေးခဲ့ရဖူးသည်။ ဒေသခံ ပရဟိတ အမျိုးသားတစ်ဦးက “စနဲလမ်းကြောင်း၊ မျှောချောင်းနဲ့ ပတ်ဝန်းကျင်ဒေသတွေကို လက်ရှိ ဒရုန်းဗုံးတွေကြဲတာတွေရှိတယ်။ ဒီလမ်းက တောင်မော်ဦးနဲ့အရမ်းနီးပါတယ်။ စစ်တပ်က အခု တောင်မော်ဦး ဘက်ပြန်ဆုတ်နေတာပါ၊ သူတို့အကျအဆုံးတော့ရှိတယ်၊ သတင်းသိပ်မထွက်ဘူး၊ စနဲလမ်းပိုင်းက အရေးပါ တော့ စစ်တပ်က လိုချင်နေတာပါ၊ ဒေသခံတွေတော့ ရှောင်နေကြတယ်” ဟု ပြောသည်။ စနဲ လမ်းပိုင်းသည် စစ်ရေးအရ အရေးပါသဖြင့် စစ်အုပ်စုတပ်က ထိန်းချုပ်ရန် ကြိုးပမ်းနေခြင်းဖြစ်ပြီး တိုက်ပွဲ များနှင့် လေကြောင်း/ဒရုန်း တိုက်ခိုက်မှုများကြောင့် ဒေသခံများ ဘေးလွတ်ရာသို့ စစ်ဘေးရှောင်နေကြရသည်။ ဓာတ်ပုံ - (၂၀၂၄ ခုနှစ်အတွင်း အာရက္ခတပ်တော် (AA) က တိုက်ခိုက်သိမ်းပိုက်ခဲ့သည့် စစ်အုပ်စုတပ်၏ စစ်သင်္ဘော ၂ စီးကို တွေ့ရစဉ်။ / AA Info Desk)

ကျောက်ဖြူ တောင်မော်ဦး ရေတပ်စခန်းအနီး တိုက်ပွဲပြင်းထန်နေ

ကျောက်ဖြူ တောင်မော်ဦး ရေတပ်စခန်းအနီး တိုက်ပွဲပြင်းထန်နေ သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၆ ရက်။ ရခိုင်ပြည်၊ ကျောက်ဖြူမြို့နယ် …

  • October 6, 2026
စစ်ကိုင်းတိုင်း ကျွန်းလှမြို့နယ်ရှိ ရွှေမျှောဖောင်များ ဗုံးကြဲခံရ၍ သေဆုံးသူ ၁၀ ဦးထက်မနည်း ရှိလာ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၆ ရက်။ စစ်ကိုင်းတိုင်း၊ ကျွန်းလှမြို့နယ်ရှိ သဖန်းဆိပ်ဆည်အတွင်း စစ်ဘေးရှောင်များ လုပ်ကိုင်နေသည့် ရွှေမျှောဖောင် များကို စစ်အုပ်စုတပ်က လေကြောင်းမှ ဗုံးကြဲ တိုက်ခိုက်ခဲ့သဖြင့် လက်ရှိအချိန်အထိ သေဆုံးသူ ၁၀ ဦး ထက် မနည်း ရှိလာပြီဟု မြေပြင်ဒေသခံများက ပြောသည်။ အဆိုပါ လေကြောင်းတိုက်ခိုက်မှုကို အောက်တိုဘာလ ၅ ရက်နေ့၊ မွန်းလွဲ ၂ နာရီဝန်းကျင်တွင် စတင်ခဲ့ပြီး ဟုမ္မလင်းဘက်မှ ဂျက်တိုက်လေယာဉ် ၂ စီးဖြင့် လာရောက်တိုက်ခိုက်ခဲ့ကာ ညနေပိုင်းတွင်လည်း ထပ်မံ တိုက်ခိုက်ခဲ့သဖြင့် တစ်ရက်အတွင်း လေးကြိမ်ခန့် ဗုံးကြဲခံခဲ့ရခြင်း ဖြစ်သည်။ တိုက်ခိုက်မှုအတွင်း ရွှေမျှောဖောင်များ မီးလောင်ပျက်စီးခဲ့သလို ရွှေမျှောလုပ်သားများ ထိခိုက်သေဆုံးခဲ့ပြီး ဒဏ်ရာရသူများထဲမှလည်း နောက်ပိုင်းတွင် ထပ်မံသေဆုံးသူများ ရှိနေကြောင်း သိရသည်။ မြေပြင်ဒေသခံတစ်ဦးက “အခုလက်ရှိအချိန်ထိတော့ သေဆုံးသူဟာ ၁၀ ဦးထက်မနည်း သေဆုံးသွားပြီလို့ သိရတယ်။ ဒဏ်ရာရတဲ့သူတွေထဲကကို နောက်ထပ် ထပ်ပြီးတော့ သေဆုံးနေတာ။ ဖောင်တွေပေါ်မှာလည်း အလောင်းတွေ မရသေးတာတွေ ရှိသေးတယ်လို့ သိရတယ်” ဟု ပြောသည်။ အောက်တိုဘာ ၆ ရက်နေ့၊ နံနက်ပိုင်းအထိ ရရှိထားသည့် အချက်အလက်များအရ လေကြောင်းတိုက်ခိုက်မှု ကြောင့် တန်ဖိုး ကျပ်သိန်း ၂,၀၀၀ ဝန်းကျင်ရှိ ရွှေမျှောဖောင် ၉ ဖောင်ခန့် မီးလောင်ပျက်စီးခဲ့ရသည်။ “ရွှေမျှောဖောင်က ၉ ဖောင်လောက် ပျက်စီးသွားတယ်လို့ သိရတယ်။ မီးလောင်ပြီး ပျက်စီးသွားတာပေါ့ဗျာ။ ရွှေမျှောဖောင်ရဲ့ တန်ကြေးက သိန်း ၂,၀၀၀ ဝန်းကျင်လောက် တန်ဖိုးရှိတယ်ဗျ” ဟု အထက်ပါ ဒေသခံက ဆက်ပြောသည်။ သဖန်းဆိပ်ဆည်အတွင်း ရွှေမျှောလုပ်ကိုင်နေသူများထဲတွင် ကောလင်း၊ ကျွန်းလှနှင့် ကန့်ဘလူဒေသများမှ စစ်ဘေးရှောင်များ အများအပြား ပါဝင်နေပြီး စားဝတ်နေရေးအတွက် လာရောက်လုပ်ကိုင်နေကြခြင်း ဖြစ်သည်။ အခြား ဒေသခံတစ်ဦးကလည်း “ရွှေဖောင်လုပ်သားတွေပါဗျာ။ စစ်ရှောင်တွေက များတာပေါ့ဗျာ။ ဒီနား ကော လင်း၊ ကျွန်းလှ၊ ကန့်ဘလူ အဲ့ဒေသကလူတွေ များတာပေါ့။ အရှင်းဆုံးပြောရင် လုပ်စားစရာမရှိတော့ ရှိတဲ့ဟာ လုပ်စားကြတာပေါ့” ဟု ပြောသည်။ သဖန်းဆိပ်ဆည်အတွင်း ရွှေမျှောလုပ်ငန်းနေရာများကို စစ်အုပ်စုတပ်က လေကြောင်းမှ တိုက်ခိုက်မှုမှာ ယခုနှစ် အတွင်း အကြိမ်ကြိမ် ဖြစ်ပွားခဲ့ပြီး ၂၀၂၆ ခုနှစ် ဇန်နဝါရီ၊ ဖေဖော်ဝါရီနှင့် မတ်လ ၁၅ ရက်တို့တွင်လည်း တိုက် လေယာဉ်များဖြင့် ဆက်တိုက် တိုက်ခိုက်ခဲ့သဖြင့် လူ ၈ ဦးထက်မနည်း ထိခိုက်ဒဏ်ရာရရှိခဲ့ဖူးသည်။ လက်ရှိ လေကြောင်းတိုက်ခိုက်မှုကြောင့် သေဆုံး၊ ဒဏ်ရာရသူ အရေအတွက်နှင့် ပျက်စီးဆုံးရှုံးမှု အတိအကျကို သီးခြား အတည်ပြုနိုင်ရန် ကြိုးပမ်းနေဆဲဖြစ်ပြီး အလောင်းအချို့ကိုလည်း ဆက်လက် ရှာဖွေလျက်ရှိသည်။ ဓာတ်ပုံ - ပေးပို့

စစ်ကိုင်းတိုင်း ကျွန်းလှမြို့နယ်ရှိ ရွှေမျှောဖောင်များ ဗုံးကြဲခံရ၍ သေဆုံးသူ ၁၀ ဦးထက်မနည်း ရှိလာ

စစ်ကိုင်းတိုင်း ကျွန်းလှမြို့နယ်ရှိ ရွှေမျှောဖောင်များ ဗုံးကြဲခံရ၍ သေဆုံးသူ ၁၀ ဦးထက်မနည်း ရှိလာ သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ …

  • October 6, 2026
ချင်းတောင်ပိုင်း တိုက်ပွဲတွင် စစ်အုပ်စုတပ် အထိနာ၍ တပ်စုတစ်စု အရှင်ဖမ်းမိ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၆ ရက်။ ချင်းပြည်တောင်ပိုင်း၊ ကန်ပက်လက်မြို့နယ်၊ မဆာတွီကျေးရွာအနီး တိုက်ပွဲတွင် စစ်အုပ်စုတပ်ဘက်မှ ၃၀ ကျော် သေဆုံးခဲ့ပြီး လက်နက်ခဲယမ်းများ အပါအဝင် တပ်စုတစ်စုလုံးကို တော်လှန်ရေး ပူးပေါင်းတပ်ဖွဲ့များက အရှင် ဖမ်းဆီးရမိကြောင်း ဒေသခံ တော်လှန်ရေးတပ်ဖွဲ့များက ပြောသည်။ ယောဒေသ ဆောမြို့နယ်၊ လောင်းရှည်မြို့မှတစ်ဆင့် ကျင်ဒွေးမြို့ကို ပြန်လည်ထိန်းချုပ်ရန် စစ်ကြောင်းထိုးလာ သည့် တပ်မ (၇၇) လက်အောက်ခံ ပူးပေါင်းစစ်ကြောင်းကို စက်တင်ဘာ ၂၄ ရက်မှ စတင်ကာ အာရက္ခတပ်တော် (AA)၊ ချင်းပြည်သူ့တပ်မတော် (CPA) နှင့် ယောကာကွယ်ရေးတပ်တော် (YDF) ပြည်သူ့တော်လှန်ရေး ပူးပေါင်း တပ်များက မဆာတွီကျေးရွာ ပတ်ဝန်းကျင်၌ ကြားဖြတ် ရက်ရှည် တိုက်ခိုက်ခဲ့ခြင်း ဖြစ်သည်။ ယောဒေသ ဆောမြို့နယ် ဒေသခံ တော်လှန်ရေးသမားတစ်ဦးက “အင်အား ၂၀ ကျော်ပါတဲ့ တပ်စု ၁ စုလုံးကို လက်နက်တွေနဲ့အတူ အရှင်ဖမ်းဆီးရမိခဲ့တယ်ဆိုတာ သိထားတယ်။ လောင်းရှည်မြို့ကတဆင့် ကျင်ဒွေးမြို့ကို စစ်ကြောင်းထိုးတက်လာတာ။ တိုက်ပွဲက အမြဲကဖြစ်ပြီး မဆာတွီကျေးရွာ ဝန်းမှာဖြစ်နေတာပါ။ စစ်သားတွေ ဖမ်းမိထားတယ်။ အေအေနဲ့ ပူးပေါင်းတပ်တွေ တိုက်တာ၊ အဲ့ဒီရက်ပိုင်း လေယာဉ်နဲ့ တောက်လျှောက် ဗုံးကြဲခဲ့ တယ်” ဟု ပြောသည်။ အဆိုပါ တိုက်ပွဲများအတွင်း စစ်အုပ်စုတပ်ဘက်မှ ထိခိုက်သေဆုံးသူ ၅၀ ဦးထက်မနည်း ရှိခဲ့ပြီး စက်တင်ဘာ ၂၅ ရက်မှ ၂၈ ရက်နေ့အထိ လေကြောင်းမှ ဗုံးကြဲ ပစ်ကူပေးခဲ့သဖြင့် ဒေသခံအချို့ စစ်ဘေးတိမ်းရှောင်ခဲ့ရသည်။ စစ်သုံ့ပန်းအဖြစ် ဖမ်းဆီးခံရသည့် တပ်ဖွဲ့မှာ ပဲခူးမြို့အခြေစိုက် တပ်မ (၇၇) လက်အောက်ခံ တပ်ရင်းတစ်ခုမှ တပ်ကြပ်ကြီး ရဲဝင်းထွန်း ဦးဆောင်သည့် အင်အား ၂၀ ကျော်ပါ တပ်စုဖြစ်ကြောင်း ဒေသတွင်း သတင်းအချို့က ဆိုသော်လည်း သတင်းနှင့် မီဒီယာ ကွန်ရက်အနေဖြင့် သီးခြား အတည်မပြုနိုင်သေးပေ။ ယောဒေသခံ ကျန်းမာရေးဝန်ထမ်း အမျိုးသားတစ်ဦးက “လက်ရှိအထိ ယောဒေသက မတည်ငြိမ်ပါဘူး။ တိုက်ပွဲ တွေရှိပါတယ်။ မဆာတွီရွာ အနီးအနားကို တော်လှန်ရေးတပ်တွေ အခုစိုးမိုးထားတယ်။ မဆာတွီ-ဆွဲလွဲကျင်း- လောင်းရှည် လမ်းပိုင်းအတိုင်း စစ်တပ်နောက်ဆုတ်သွားတယ်။ အကျအဆုံးတော့ များတယ်။ ချင်းပြည်နယ် တောင်ပိုင်း ကန်ပက်လက်မြို့နယ်က ကျင်ဒွေးမြို့ကို စစ်ကြောင်း ထိုးပြီးထိန်းဖို့လုပ်တာပါ၊ ဒီဘက်တော် လှန်ရေး အဖွဲ့တွေကလည်း ပြင်ဆင်ထားပါတယ်” ဟု ပြောသည်။ စစ်အုပ်စုတပ်သည် ကျင်ဒွေးမြို့ကို ပြန်လည်ထိန်းချုပ်နိုင်ရန် ဆောမြို့နယ်နှင့် လောင်းရှည်မြို့တို့တွင် ခြေကုပ်ယူ ကာ အင်အား ၅၀၀ ကျော်ဖြင့် စစ်ကြောင်း ၃ ကြောင်းခွဲ၍ မဆာတွီရွာမှတစ်ဆင့် ထိုးစစ်ဆင်နေခြင်း ဖြစ်သည်။ လက်ရှိတွင် မဆာတွီကျေးရွာ အနီးအနားကို တော်လှန်ရေးတပ်များက စိုးမိုးထားပြီး စစ်အုပ်စုတပ် စစ်ကြောင်း များသည် မဆာတွီ၊ ဆွဲလွဲကျင်း၊ အင်ဘူး၊ ပါးချောင်း၊ ပိန်းချောင်း၊ ယမ်းနှင့် ကြိမ်ကြီး ကျေးရွာများတွင် ဆက် လက် ရှိနေကြသဖြင့် စစ်ရေး တင်းမာလျက် ရှိသည်။

ချင်းတောင်ပိုင်း တိုက်ပွဲတွင် စစ်အုပ်စုတပ် အထိနာ၍ တပ်စုတစ်စု အရှင်ဖမ်းမိ

ချင်းတောင်ပိုင်း တိုက်ပွဲတွင် စစ်အုပ်စုတပ် အထိနာ၍ တပ်စုတစ်စု အရှင်ဖမ်းမိ သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၆ ရက်။ ချင်းပြည်တောင…

  • October 6, 2026
ပန်ဝါဒေသရှိ ယမ်းသိုလှောင်ရုံ ပေါက်ကွဲ၍ လူ ၇ ဦး သေဆုံးပြီး စာသင်ကျောင်းနှင့် နေအိမ်များ ပျက်စီး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၅ ရက်။ ကချင်လွတ်လပ်ရေးအဖွဲ့ (KIO/KIA) ထိန်းချုပ်ရာ ကချင်ပြည်၊ ချီဖွေမြို့နယ်၊ ပန်ဝါဒေသရှိ တရုတ်ကုမ္ပဏီပိုင် ယမ်းသိုလှောင်ရုံ ပေါက်ကွဲမှုဖြစ်ပွားခဲ့သဖြင့် တရုတ်လုပ်ငန်းရှင်တစ်ဦး အပါအဝင် လူ ၇ ဦး သေဆုံးပြီး ၁၁ ဦး ထိခိုက်ဒဏ်ရာ ရရှိခဲ့ကြောင်း ဒေသခံများက ပြောသည်။ ပန်ဝါဒေသ၊ လဂွေကျေးရွာ အလယ်တန်းစာသင်ကျောင်းအနီးရှိ လမ်းဖောက်လုပ်ရေး တရုတ်ကုမ္ပဏီ၏ ယမ်းဂို ဒေါင်မှာ အောက်တိုဘာလ ၂ ရက် နေ့လယ်ပိုင်းက ပေါက်ကွဲမှု ဖြစ်ခဲ့ပြီး ပေါက်ကွဲမှုပမာဏ ပြင်းထန်လွန်းသဖြင့် အနီးဝန်းကျင်ရှိ စာသင်ကျောင်းဆောင်များနှင့် ဒေသခံများ၏ လူနေအိမ်များပါ ပျက်စီးခဲ့ရသည်။ ပေါက်ကွဲမှုဖြစ်ပွားသည့်အချိန်သည် စာသင်ကျောင်း ပိတ်ချိန်ဖြစ်သောကြောင့် ကျောင်းသူ၊ ကျောင်းသားများ ထိခိုက်ဒဏ်ရာရရှိမှု မရှိခဲ့သော်လည်း ယင်းပေါက်ကွဲမှုကြောင့် တရုတ်လုပ်ငန်းရှင်တစ်ဦး၊ ကချင်လွတ်လပ်ရေး အဖွဲ့ (KIO) ပညာရေးဝန်ထမ်းများနှင့် ရွာခံများအပါအဝင် ၇ ဦး ပွဲချင်းပြီး သေဆုံးခဲ့ရသည်။ ဒဏ်ရာရရှိသူ ၁၁ ဦးအနက် ၅ ဦးမှာ ဒဏ်ရာပြင်းထန်သဖြင့် တရုတ်နိုင်ငံဘက်သို့ အရေးပေါ် ဆေးကုသမှုခံယူရန် ပို့ဆောင်ထားရသည်ဟု ဒေသခံများက ဆိုသည်။ လဂွေကျေးရွာ ဒေသခံအမျိုးသားတစ်ဦးက “ကလေးတွေ ထိခိုက်တာမျိုးမရှိလို့ တော်သေးတယ်။ မဟုတ်ရင် အစုလိုက်အပြုံလိုက် ထိမှန်မှာ။ ဒီယမ်းဂိုဒေါင်ကို ရွာနဲ့နီးတဲ့နေရာမှာ မထားဖို့ KIO ဘက်က မနှစ်ကတည်းက သတိပေးထားတာ ရှိတယ်။ ကုမ္ပဏီဘက်က မဖယ်ဘဲ ဆက်ထားရာကနေ အခုလို သေဆုံးတာတွေ ဖြစ်ခဲ့ရတာ ပါ။ ရွာနားမှာ ယမ်းဂိုဒေါင်တွေ မထားဖို့ ပိုပြီး တင်းတင်းကျပ်ကျပ် လုပ်ခိုင်းစေချင်တယ်” ဟု ပြောသည်။ တိုင်းရင်းသားလက်နက်ကိုင်အဖွဲ့များ ထိန်းချုပ်ထားသည့် နယ်မြေများအတွင်းရှိ ယမ်းသိုလှောင်ရုံ ပေါက်ကွဲမှု ဖြစ်စဉ်များ မကြာခဏ ဖြစ်ပွားလျက်ရှိပြီး ဒေသခံပြည်သူများ၏ အသက်အန္တရာယ်အတွက် စိုးရိမ်စရာ အခြေ အနေ ဖြစ်နေသည်။ နယ်မြေအတွင်း စစ်ရေးအခြေအနေများနှင့် ပတ်သက်၍ အမည်မဖော်လိုသည့် ဒေသခံတစ်ဦးက “ဒေသတွင်း တိုင်းရင်းသား လက်နက်ကိုင်တပ်တွေ စိုးမိုးထားတဲ့ မြို့နယ်တွေမှာ စစ်တပ်က လေကြောင်းကနေ ပစ်မှတ်ထား ဗုံးကြဲတာတွေလည်း ဆက်တိုက်လုပ်တော့ အဲ့ဒါတွေကိုလည်း အမြဲသတိထားရတယ်။ လက်နက်ကြီး၊ ဒရုန်း ဒါတွေကိုလည်း အမြဲသတိထားနေရတယ်။ နောက်ပြီးအခုလို ယမ်းသိုလှောင်ရုံတွေနဲ့ ပတ်သက်ပြီး စိုးရိမ်ရ တယ်။ ဒီကျနော်တို့ တရုတ်နယ်စပ်က တိုင်းရင်းသားလက်နက်ကိုင်တွေ ရှိတဲ့နေရာတွေအားလုံးမှာ အဲ့ဒီကိစ္စတွေ ရှိတယ်ဗျ” ဟု ပြောသည်။ ပြီးခဲ့သည့် စက်တင်ဘာလ ၈ ရက်နေ့ကလည်း မြန်မာအမျိုးသား ဒီမိုကရက်တစ် မဟာမိတ်တပ်မတော် (MNDAA) ထိန်းချုပ်ရာ သိန္နီမြို့နယ်၊ ဟွေတောင်ကျေးရွာအုပ်စု၊ မန်မိုင်ရွာ အထက်ကုန်းပေါ်ရှိ MNDAA ရုံးဝန်းအတွင်းရှိ ယမ်းသိုလှောင်ရုံ ပေါက်ကွဲမှုဖြစ်ပွားခဲ့သဖြင့် လူ ၁၅ ဦးထက်မနည်း ထိခိုက်သေဆုံးခဲ့သည်။ ထို့ပြင် ယခုနှစ်သည့် မေလ ၃၁ ရက်နေ့ကလည်း တအာင်းအမျိုးသား လွတ်မြောက်ရေးတပ်မတော် (TNLA) ထိန်းချုပ်ထားသည့် နမ့်ခမ်းမြို့နယ်၊ ကောင်းတပ်ကျေးရွာရှိ ယမ်းသိုလှောင်ရုံ ပေါက်ကွဲခဲ့၍ ဒေသခံ ၅၀ ကျော် သေဆုံးကာ ၇၀ ကျော် ဒဏ်ရာရရှိခဲ့သည့် ဖြစ်စဉ်များလည်း ဖြစ်ပွားခဲ့ဖူးသည်။ ယခု လဂွေကျေးရွာ ပေါက်ကွဲမှုဖြစ်စဉ်နှင့် ပတ်သက်၍ ပေါက်ကွဲရသည့် အကြောင်းရင်းမှန်ကို သက်ဆိုင်ရာ တာဝန်ရှိသူများက ဆက်လက် စုံစမ်းစစ်ဆေးလျက်ရှိသည်ဟု ဆိုသည်။ ဓာတ်ပုံ - (ပန်ဝါဒေသ လဂွေကျေးရွာ၌ ယမ်းသိုလှောင်ရုံ ပေါက်ကွဲမှုကြောင့် ပျက်စီးမှုများ။ / Crd)

ပန်ဝါဒေသရှိ ယမ်းသိုလှောင်ရုံ ပေါက်ကွဲ၍ လူ ၇ ဦး သေဆုံးပြီး စာသင်ကျောင်းနှင့် နေအိမ်များ ပျက်စီး

ပန်ဝါဒေသရှိ ယမ်းသိုလှောင်ရုံ ပေါက်ကွဲ၍ လူ ၇ ဦး သေဆုံးပြီး စာသင်ကျောင်းနှင့် နေအိမ်များ ပျက်စီး သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၅…

  • October 5, 2026
ကရင်နီတွင် နေ့စဉ်ရက်ဆက် လေကြောင်းတိုက်ခိုက်ခံနေရ၊ ထိခိုက်သေဆုံးမှုများရှိနေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၅ ရက်။ ကရင်နီပြည်အတွင်းရှိ ဒီးမော့ဆို၊ ဖရူဆိုနှင့် နန်းမယ်ခုံ မြို့နယ်တို့တွင် စစ်အုပ်စုက တိုက်ယာဉ်များနှင့် အသေခံဒရုန်းများကို အသုံးပြု၍ လူနေရပ်ကွက်များနှင့် စိုက်ပျိုးရေး လယ်ကွင်းများကိုပါ နေ့စဉ်ရက်ဆက် လေကြောင်းမှ ဗုံးကြဲတိုက်ခိုက်နေသဖြင့် ရဲဘော်တစ်ဦး သေဆုံးကာ ဒေသခံ ပြည်သူများ ထိခိုက်ဒဏ်ရာရရှိနေ သည်။ အောက်တိုဘာလဆန်း ၁ ရက်နေ့မှ ၄ ရက်နေ့အထိ ကရင်နီပြည်အတွင်း အရှိန်အဟုန်မြှင့် ပြုလုပ်လာသည့် စစ်အုပ်စု၏ လေကြောင်းတိုက်ခိုက်မှုများကြောင့် စာသင်ကျောင်းများ ပိတ်ထားရသည့်အပြင် အဆောက် အအုံများ၊ တဲအိမ်များနှင့် မော်တော်ယာဉ်အချို့ ထိမှန်ပျက်စီးခဲ့ရသည်။ အောက်တိုဘာ ၄ ရက်နေ့ မွန်းလွဲပိုင်းတွင် ဒီးမော့ဆိုမြို့နယ် အနောက်ဘက်ခြမ်းရှိ စစ်ဘေးရှောင်များ ရှိရာနေရာ များသို့ စစ်အုပ်စုတပ်က ဂျက်ဖိုက်တာဖြင့် ၄ ကြိမ်ထက်မနည်း လာရောက်ဗုံးကြဲခဲ့ရာ ကယန်းအမျိုးသား တပ်မတော် (KNA) မှ ရဲဘော်တစ်ဦး ထိခိုက်ကျဆုံးခဲ့ပြီး ကားနှစ်စီးနှင့် အဆောက်အအုံအချို့ ထိမှန်ပျက်စီးခဲ့ကာ ဒေသခံအချို့ ထိခိုက်ဒဏ်ရာ ရရှိခဲ့သည်။ ဒီးမော့ဆိုအနောက်ဘက်ခြမ်းမှ စစ်ဘေးရှောင်ဒေသခံတစ်ဦးက “မနေ့က နေ့လယ်ပိုင်းကတည်းက လေယာဉ်သံ တွေ ဆက်တိုက်ကြားနေရတာ။ ညနေပိုင်းအထိ ၄ ကြိမ်ထက်မနည်း ဗုံးကြဲသွားတယ်။ ကျနော်တို့ အရပ်သား ပြည်သူတွေနဲ့ စစ်ရှောင်တွေ အများစုရှိတဲ့နေရာတွေကိုပဲ ပစ်မှတ်ထားပြီး တမင်လာကြဲနေတာပါ။ အခုဆို ဘယ်အချိန် လေယာဉ်လာမလဲဆိုပြီး ကြောက်လန့်နေရတယ်” ဟု ပြောသည်။ ထို့ပြင် အောက်တိုဘာ ၃ ရက်နေ့ကလည်း နန်းမယ်ခုံမြို့နယ်တွင် လယ်ကွင်းအတွင်း သွားရောက်ကြည့်ရှုပြီး ပြန်လာသည့် တောင်သူတစ်ဦးကို စစ်အုပ်စုတပ်က အသေခံဒရုန်းဖြင့် တိုက်ခိုက်ခဲ့သဖြင့် ထိမှန်ဒဏ်ရာများ ရရှိခဲ့သည်။ အလားတူ ဖရူဆိုမြို့နယ် အနောက်ဘက်ခြမ်းကိုလည်း အောက်တိုဘာ ၁ ရက် ညသန်းခေါင်ယံအချိန်နှင့် အောက်တိုဘာ ၂ ရက် နေ့ခင်းပိုင်းတို့တွင် စစ်အုပ်စုတပ်က ဂျက်ဖိုက်တာနှင့် အသေခံဒရုန်းများ အသုံးပြု၍ နှစ်ရက်ဆက်တိုက် ဗုံးကြဲခဲ့သဖြင့် စာသင်ကျောင်းများ ပိတ်ထားလိုက်ရပြီး ဒေသခံများ၏ တဲအိမ်အချို့ ထိမှန်ပျက်စီးခဲ့သည်။ ဒေသတွင်း သတင်းရင်းမြစ်တစ်ခုဖြစ်သည့် ကန္တာရဝတီတိုင်း(မ်) သတင်းဌာနနှင့် အရပ်ဘက်အဖွဲ့အစည်းများ၏ ထုတ်ပြန်ချက်များအရ ပြီးခဲ့သည့် စက်တင်ဘာလအတွင်းကလည်း စစ်အုပ်စုတပ်၏ လေကြောင်းနှင့် ဒရုန်းတိုက် ခိုက်မှုများကြောင့် ကရင်နီပြည်တွင် ကလေးငယ် ၅ ဦးအပါအဝင် အရပ်သား ၁၅ ဦး သေဆုံးခဲ့ပြီး ၃၀ ကျော် ထိခိုက်ဒဏ်ရာရရှိခဲ့ကြောင်း သိရသည်။ မြေပြင်တွင် စစ်ရှောင်များကို အကူအညီပေးနေသူ တစ်ဦးက “စစ်အုပ်စုတပ်ဟာ မိုးဗြဲဘက်ကနေ ဒီးမော့ဆို ဘက်ကို စစ်ကြောင်းထိုးဖို့ ကြိုးစားနေပေမဲ့ တော်လှန်ရေးတပ်တွေရဲ့ ခုခံမှုကြောင့် ရှေ့မတိုးနိုင်ဘဲ ဖြစ်နေ တယ်။ ဒါကြောင့် ရှမ်း-ကရင်နီနယ်စပ်အပါအဝင် ဒီးမော့ဆိုနဲ့ လွိုင်ကော်မြို့နယ်ဘက်က အရပ်သားတွေရှိတဲ့ နေရာတွေကို ဒရုန်းတွေ၊ လက်နက်ကြီးတွေနဲ့ ရည်ရွယ်ချက်ရှိရှိ နေ့စဉ်ရက်ဆက် ပစ်ခတ်တိုက်ခိုက်နေတာ ဖြစ်တယ်” ဟု ပြောသည်။ စစ်အာဏာသိမ်းသည့် ၂၀၂၁ ခုနှစ်မှ ၂၀၂၆ ခုနှစ် စက်တင်ဘာလအထိ ကရင်နီနှင့် ကယန်းဒေသအတွင်း စစ်အုပ်စုတပ်၏ အကြမ်းဖက်တိုက်ခိုက်မှုများကြောင့် သေဆုံးခဲ့ရသည့် အပြစ်မဲ့ အရပ်သားပြည်သူ ၉၀၀ ကျော်အထိ ရှိလာပြီ ဖြစ်သည်။ စစ်အုပ်စုတပ်သည် လွိုင်ကော်မြို့တွင် တိုင်းစစ်ဌာနချုပ် ပြန်လည်ရွှေ့ပြောင်းပြီးသည့် နောက်ပိုင်း ကရင်နီပြည် အတွင်း လေကြောင်းနှင့် လက်နက်ကြီး အလွန်အကျွံ အသုံးပြုကာ ပိုမိုဖိအားပေး စစ်ဆင်ရေးများ လုပ်ဆောင် လာနေကြောင်း သုံးသပ်မှုများလည်း ထွက်ပေါ်လျက်ရှိသည်။ ဓာတ်ပုံ - (ဘောလခဲမြို့နယ်ထဲက လေကြောင်းတိုက်ခိုက်ခံရမှုကြောင့် ပျက်စီးဆုံးရှုံးမှုများ / ပုံဟောင်း - Crd)

ကရင်နီတွင် နေ့စဉ်ရက်ဆက် လေကြောင်းတိုက်ခိုက်ခံနေရ၊ ထိခိုက်သေဆုံးမှုများရှိနေ

ကရင်နီတွင် နေ့စဉ်ရက်ဆက် လေကြောင်းတိုက်ခိုက်ခံနေရ၊ ထိခိုက်သေဆုံးမှုများရှိနေ သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၅ ရက်။ ကရင်နီပြည်…

  • October 5, 2026
မြိုင်မြို့နယ်တွင် သတ်ဖြတ်ခံထားရသည့် အရပ်သား ၁၂ ဦး၏ အရိုးစုများ တွေ့ရှိ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၅ ရက်။ မကွေးတိုင်း၊ မြိုင်မြို့နယ်၊ ဝက်ပုတ်ကျေးရွာအနီးတွင် ကြိုးတုတ် မျက်နှာစည်းလျက် သတ်ဖြတ်ထားပြီး အစုလိုက်အပြုံလိုက် မြှုပ်နှံခြင်းခံထားရသည့် အပြစ်မဲ့ အရပ်သား ၁၂ ဦး၏ ရုပ်အလောင်းများကို ပြန်လည်တွေ့ ရှိခဲ့ကြောင်း အညာမြေ အရပ်ဘက်လူမှုအဖွဲ့အစည်း-မြိုင်နှင့် ဒေသတွင်း တော်လှန်ရေးအဖွဲ့များက ပြောသည်။ အဆိုပါ အရပ်သား ၁၂ ဦး၏ ရုပ်အလောင်းများကို မြေကျင်း ၂ ခုအတွင်း အစုလိုက်အပြုံလိုက် ဖြစ်သလို မြှုပ်နှံထားသည့်နေရာမှ တူးဖော်တွေ့ရှိခဲ့ခြင်းဖြစ်သည်။ သေဆုံးသူများသည် ၂၀၂၃ ခုနှစ် ဇွန်လအတွင်းက စစ်အုပ်စုတပ် စစ်ကြောင်း၏ ဖမ်းဆီးခြင်းခံခဲ့ရသည့် ဂွေးကုန်း ကျေးရွာမှ ၉ ဦး၊ မကျီးကုန်းကျေးရွာမှ ၁ ဦး၊ သံချောင်းကျေးရွာမှ ၁ ဦးနှင့် မကျည်းကန်ကျေးရွာမှ ၁ ဦးတို့ ဖြစ် ကြသည်။ ထိုသို့ အစုလိုက်အပြုံလိုက် မြှုပ်နှံထားသည့် နေရာကို ၂၀၂၆ ခုနှစ်၊ အောက်တိုဘာ ၄ ရက်တွင် တောအတွင်း မှိုရှာဖွေသူ ဒေသခံတစ်ဦးက စတင်တွေ့ရှိခဲ့ခြင်းဖြစ်ပြီး၊ ဒေသခံ တာဝန်ရှိသူများ သွားရောက်တူးဖော် စစ်ဆေး ရာမှ ကြိုးတုတ်ထားသည့် အရိုးစုများကို တွေ့ရှိခဲ့ရခြင်း ဖြစ်သည်။ အညာမြေ အရပ်ဘက်လူမှုအဖွဲ့အစည်း-မြိုင် တာဝန်ရှိသူတစ်ဦးက “အစုအပြုံလိုက် ဖြစ်သလိုမြှုပ်နှံထားတဲ့ နေရာကို မှိုရှာသွားတဲ့ ရွာသားတစ်ဦးက တွေ့ရှိခဲ့တာပါ။ တာဝန်ရှိသူတွေက လိုက်သွားပြီး တူးဖော်ရာကနေ တွေ့ရတာပါ။ ကျောင်းသား တစ်ယောက်ပါတယ်။ အလောင်းတွေကို ကြိုးတုတ်ထားတယ်။ စစ်ကြောင်းက အနီးအနားရွာတွေက ဒေသခံတွေကို ဖမ်းသွားပြီးပစ်သတ်လိုက်တာ” ဟု ပြောသည်။ ရုပ်အလောင်းများနှင့်အတူ ပြန်လည်တွေ့ရှိခဲ့သည့် မှတ်ပုံတင်၊ ကျောင်းသားကတ်၊ မွေးစာရင်းနှင့် အခြား စာရွက်စာတမ်းများအရ ၎င်းတို့သည် ယခင်က စစ်ကြောင်း၏ ဖမ်းဆီးထိန်းသိမ်းခြင်းခံခဲ့ရသည့် ဂွေးကုန်းနှင့် အနီးဝန်းကျင်ကျေးရွာများမှ ဒေသခံများဖြစ်ကြောင်း ဖော်ထုတ်အတည်ပြုနိုင်ခဲ့သည်ဟု အညာမြေ အရပ်ဘက် လူမှုအဖွဲ့အစည်း-မြိုင်က ဆိုသည်။ အဆိုပါ အရပ်သားများကို ဖမ်းဆီးသတ်ဖြတ်မှုတွင် ဝက်ပုတ်ကျေးရွာ ပျူစောထီးခေါင်းဆောင် ဦးဝင်းငွေနှင့် စစ်အုပ်စုတပ်ဘက်မှ ဗိုလ်ဘိုဖြူ ဆိုသူတို့ ပါဝင်ခဲ့ကြောင်း အညာမြေ အရပ်ဘက်လူမှုအဖွဲ့အစည်း-မြိုင်က ထုတ်ပြန်ထားသော်လည်း သတင်းနှင့် မီဒီယာ ကွန်ရက်အနေဖြင့် သီးခြားအတည်မပြုနိုင်သေးပေ။ အညာဒေသ မြိုင်မြို့နယ်တွင်ရှိသော တော်လှန်ရေးတပ်ဖွဲ့ဝင်တစ်ဦးက “ဝက်ပုတ်အပါအဝင် တချို့နေရာ တွေမှာလည်း စစ်တပ်က သတ်ဖြတ်ထားတာတွေ ရှိနိုင်တယ်။ တချို့ဆို ဖမ်းသွားပြီး ထောင်ကျနေတယ်လို့ပဲ သိထားတာ။ အမှန်တော် သတ်ပြီးဘယ်မှာ မြှုပ်ထားတယ်၊ ဘယ်မှာ သတ်တယ်ဆိုတာ မသိကြဘူး။ တော်တော် ရင်နာဖို့ ကောင်းပါတယ်။ အခုကိစ္စမှာလည်း မျက်နှာစည်း ရက်စက်စွာ သတ်ဖြတ်ပြီး အစုလိုက် အပြုံလိုက် ဖြစ်သလိုမြှုပ်နှံထားခဲ့တာလို့ အတည်ပြုနိုင်တယ်” ဟု ပြောသည်။ အဆိုပါ ဝက်ပုတ် ပျူစောထီးရွာကို တော်လှန်ရေးအင်အားစုများက ၂၀၂၄ ခုနှစ်အတွင်း ဝင်ရောက် ထိန်းချုပ်နိုင် ခဲ့ပြီးနောက် နယ်မြေရှင်းလင်းရေး ပြုလုပ်စဉ်ကလည်း အစုလိုက်အပြုံလိုက် သတ်ဖြတ်ခံထားရသည့် နေရာ တစ်ခုကို ရှာဖွေတွေ့ရှိခဲ့သေးသည်။ ယခု ပြန်လည်တွေ့ရှိခဲ့သည့် ဖြစ်စဉ်နှင့် ပတ်သက်၍ အညာမြေ အရပ်ဘက်လူမှုအဖွဲ့အစည်း-မြိုင်က တူးဖော်ရရှိ သည့် ရုပ်အရိုးစုများ၊ သက်သေခံ စာရွက်စာတမ်း ဓာတ်ပုံမှတ်တမ်းများနှင့်တကွ သတင်းထုတ်ပြန်ထားသည်။ ဓာတ်ပုံ - (ဝက်ပုတ်ကျေးရွာအနီး၌ တူးဖော်တွေ့ရှိရသည့် အစုလိုက်အပြုံလိုက် သတ်ဖြတ်မြှုပ်နှံခံထားရသော အရပ်သား ၁၂ ဦး၏ အရိုးစုများနှင့် သက်သေခံပစ္စည်းအချို့။ / အညာမြေ အရပ်ဘက်လူမှုအဖွဲ့အစည်း-မြိုင်)

မြိုင်မြို့နယ်တွင် သတ်ဖြတ်ခံထားရသည့် အရပ်သား ၁၂ ဦး၏ အရိုးစုများ တွေ့ရှိ

မြိုင်မြို့နယ်တွင် သတ်ဖြတ်ခံထားရသည့် အရပ်သား ၁၂ ဦး၏ အရိုးစုများ တွေ့ရှိ သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၅ ရက်။ မကွေးတိုင်း၊ မ…

  • October 5, 2026
×Close