သတင်း

ပုဏ္ဏားကျွန်း စစ်ဘေးရှောင်စခန်း ဗုံးကြဲခံရ၍ ၆ ဦး သေဆုံးပြီး ထိခိုက်ဒဏ်ရာရသူ များပြား သတင်းနှင့်မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၅ ရက်။ ရခိုင်ပြည်အတွင်း နယ်မြေအများစုကို လက်လွှတ်ထားရသည့် စစ်အုပ်စုတပ်သည် စစ်ရေးပစ်မှတ် မဟုတ်သည့် အရပ်သားများနှင့် စစ်ဘေးရှောင်စခန်းများကို ရက်ဆက် လေကြောင်းမှ ရည်ရွယ်ချက်ရှိရှိ ဗုံးကြဲတိုက်ခိုက် နေသဖြင့် ဒေသခံများ ထိခိုက်သေဆုံးမှု အရေအတွက် ပိုမိုမြင့်တက်လာနေသည်။ အောက်တိုဘာ ၄ ရက်နေ့၊ ညနေ ၅ နာရီကျော် အချိန်တွင် ပုဏ္ဏားကျွန်းမြို့နယ်၊ သရက်ချိုကျေးရွာနှင့် ယိုးငူကျေး ရွာကြားရှိ ယိုးငူ-ဗျာလ စစ်ဘေးရှောင်စခန်းကို စစ်အုပ်စုတပ်က ဂျက်တိုက်လေယာဉ် ၂ စီးဖြင့် ရှေ့ဆင့်နောက် ဆင့် ဗုံးကြဲတိုက်ခိုက်ခဲ့ခြင်းဖြစ်သည်။ မြေပြင်ဒေသခံတစ်ဦးက “တိုက်ပွဲဖြစ်တာလည်း မရှိဘဲနဲ့ လေယာဉ်နဲ့ နှစ်ခေါက် ဆက်တိုက် လာကြဲသွားတာပါ။ စစ်ဘေးဒုက္ခသည်တွေပဲ ရှိတဲ့နေရာကို တမင် ရည်ရွယ်ချက်ရှိရှိ လာပစ်တာဖြစ်လို့ နေရာမှာတင် ၆ ယောက် သေသွားတယ်။ ဒဏ်ရာရတဲ့အထဲမှာလည်း စိုးရိမ်ရတဲ့သူတွေ ပါနေတော့ သေဆုံးသူ ဒီထက် ပိုတိုးလာနိုင် တယ်” ဟု ပြောသည်။ အဆိုပါ လေကြောင်းတိုက်ခိုက်မှုကြောင့် စစ်ဘေးရှောင် ပြည်သူ ၆ ဦး နေရာ၌ပင် သေဆုံးခဲ့ပြီး ၁၁ ဦးထက် မနည်း ဒဏ်ရာရရှိခဲ့ကာ ၎င်းတို့အနက် ၅ ဦးမှာ စိုးရိမ်ရသည့် အခြေအနေတွင် ရှိနေသည်။ ထို့ပြင် ပြည်သူများ၏ နေအိမ်နှင့် ဈေးဆိုင်များစွာလည်း မီးလောင်ပြာကျ ပျက်စီးခဲ့ရသည်။ ပုဏ္ဏားကျွန်း စစ်ဘေးရှောင်စခန်း ဗုံးကြဲခံရမှုမတိုင်မီ တစ်ရက်အလို အောက်တိုဘာ ၃ ရက် နံနက် ၁ နာရီမှ ၂ နာရီအတွင်း၌လည်း ရသေ့တောင်မြို့ပေါ် ရပ်ကွက်များနှင့် ပြားချောင်းကြီး၊ ပြင်ခေါင်၊ အငူမော် စသည့် အနီးဝန်းကျင်ကျေးရွာများကို စစ်အုပ်စုတပ်က Y-12 လေယာဉ်ဖြင့် ဗုံး အလုံး ၂၀ ထက်မနည်း ဆက်တိုက် ကြဲချတိုက်ခိုက်ခဲ့သည်။ အဆိုပါ တိုက်ခိုက်မှုကြောင့် ရသေ့တောင်မြို့မှ အသက် ၁၈ နှစ်အောက် အမျိုးသမီးငယ် ၂ ဦးနှင့် အသက် ၇၀ အရွယ် အမျိုးသားကြီးတစ်ဦးတို့ သေဆုံးခဲ့ရပြီး ၁၂ ဦးထက်မနည်း ဒဏ်ရာရရှိခဲ့သည်။ ထို့ပြင် အငူမော်ကျေးရွာတွင်လည်း Y-12 လေယာဉ်၏ ဗုံးကြဲတိုက်ခိုက်မှုကြောင့် အမျိုးသမီးတစ်ဦးနှင့် အမျိုးသား ၂ ဦး ထိမှန်ဒဏ်ရာရရှိခဲ့ကြသည်။ ဗုံးများသည် ရသေ့တောင်မြို့ရှိ ကမ်းနားလမ်း၊ အရှေ့တောင်ရပ် ကွက်၊ တောင်ရင်းတန်းရပ်ကွက်၊ သင်္ဘောဆိပ်၊ စိုက်ပျိုးရေးရုံးနှင့် အထက (၂) ကျောင်းအနီးတို့သို့ ကျရောက် ပေါက်ကွဲခဲ့ပြီး လူနေအိမ်များစွာ ပျက်စီးခဲ့ရသည်။ စက်တင်ဘာ ၂၈ ရက်မှ အောက်တိုဘာ ၄ ရက်အထိ ၇ ရက်တာကာလအတွင်း ကျောက်တော်၊ ပုဏ္ဏားကျွန်းနှင့် ရသေ့တောင်မြို့နယ်တို့တွင် စစ်အုပ်စုတပ်၏ လေကြောင်းတိုက်ခိုက်မှုများကြောင့် အနည်းဆုံး အရပ်သား ပြည်သူ ၁၅၀ ထက်မနည်း သေဆုံး သို့မဟုတ် ဒဏ်ရာရရှိခဲ့သည်ဟု ဆိုသည်။ ဖြစ်စဉ်များနှင့် ပတ်သက်၍ ဖြူစင်ရင်ခွင်ဖောင်ဒေးရှင်းကလည်း စစ်အုပ်စုတပ်၏ အရပ်သားများအပေါ် ပစ်မှတ်ထား တိုက်ခိုက်မှုများကို ပြင်းထန်စွာ ပြစ်တင်ရှုတ်ချကြောင်း ထုတ်ပြန်ထားသည်။ “၂၀၂၆ ခုနှစ်၊ အောက်တိုဘာလ ၄ ရက်နေ့မှာ မြန်မာစစ်အုပ်စုက ပုဏ္ဏားကျွန်းမြို့နယ်၊ ယိုးငူကျေးရွာကို ဂျက်တိုက်လေယာဉ်တွေနဲ့ လေကြောင်းတိုက်ခိုက်မှု နှစ်ကြိမ် ပြုလုပ်ခဲ့ပါတယ်။ ပစ်မှတ်ထားခံရတဲ့ နေရာက စစ်ရေးလှုပ်ရှားမှုတွေနဲ့ လုံးဝသက်ဆိုင်ခြင်းမရှိဘဲ စစ်ဘေးရှောင် အရပ်သားတွေပဲ သီးသန့် နေထိုင်တဲ့ နေရာဖြစ်ပါတယ်” ဟု ဖြူစင်ရင်ခွင့် ဖောင်ဒေးရှင်း တာဝန်ရှိသူ တစ်ဦးက ပြောသည်။ အလားတူ ဒေသတွင်း အရပ်ဘက်အဖွဲ့အစည်းများနှင့် အာရက္ခတပ်တော် (AA) တို့ကလည်း စစ်အုပ်စုတပ်သည် စစ်ရေးပစ်မှတ် မဟုတ်သည့် အရပ်သားနေထိုင်ရာ နေရာများကို ရည်ရွယ်ချက်ရှိရှိ ဗုံးကြဲတိုက်ခိုက်နေပြီး စစ်ရာဇဝတ်မှုများ ကျူးလွန်နေသည်ဟု ထုတ်ပြန်ထားကြသည်။ စစ်အုပ်စုတပ်ဘက်ကမူ အဆိုပါ လေကြောင်းတိုက်ခိုက်မှု ထုတ်ပြန်ချက်များနှင့် ပတ်သက်၍ တစ်စုံတစ်ရာ ထုတ်ပြန်ပြောဆိုခြင်း မရှိသေးပေ။ ဓာတ်ပုံ - (ယိုးငူ-ဗျာလ စစ်ဘေးရှောင်စခန်းကို စစ်အုပ်စုတပ်က လေကြောင်းမှ ဗုံးကြဲတိုက်ခိုက်ခဲ့သဖြင့် မီးလောင်ပျက်စီးမှုများ / AA Info Desk)

ပုဏ္ဏားကျွန်း စစ်ဘေးရှောင်စခန်း ဗုံးကြဲခံရ၍ ၆ ဦး သေဆုံးပြီး ထိခိုက်ဒဏ်ရာရသူ များပြား

ပုဏ္ဏားကျွန်း စစ်ဘေးရှောင်စခန်း ဗုံးကြဲခံရ၍ ၆ ဦး သေဆုံးပြီး ထိခိုက်ဒဏ်ရာရသူ များပြား သတင်းနှင့်မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၅ ရက်။ ရခ…

  • October 5, 2026
ပန်းတောင်းမြို့နယ်အတွင်း ကျေးရွာအုပ်ချုပ်ရေးမှူးတစ်ဦး ပစ်ခတ်ခံရပြီး သေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၅ ရက်။ ပဲခူးတိုင်းအနောက်ခြမ်း၊ ပန်းတောင်းမြို့နယ်၊ တဲကုန်းကျေးရွာအုပ်စု ဥက္ကဋ္ဌ ဦးကျော်လင်းအောင်သည် အောက်တိုဘာလ ၂ ရက် ည ၁၀ နာရီခန့်တွင် ၎င်း၏နေအိမ်၌ ပစ်ခတ်ခံရသဖြင့် ပွဲချင်းပြီး သေဆုံးသွားကြောင်း ဒေသခံများက ပြောသည်။ အသက် ၅၅ နှစ်အရွယ် ကျေးရွာအုပ်ချုပ်ရေးမှူး ဦးကျော်လင်းအောင်မှာ သေနတ်ဒဏ်ရာ ၅ ချက်ထိမှန်ကာ ပွဲချင်းပြီး သေဆုံးခဲ့ခြင်းဖြစ်ပြီး၊ ၎င်း၏ဇနီး ဖြစ်သူမှာလည်း ခါးတွင် သေနတ်ကျည် ထိမှန်ဒဏ်ရာ ရရှိခဲ့သဖြင့် ပြည်သူ့ဆေးရုံကြီးသို့ ပို့ဆောင်ကုသပေးထားရသည်။ နယ်ခံ အသက် ၆၀ အရွယ် အမျိုးသားတစ်ဦးက “သူ့ကို ပြည်သူ့ကာကွယ်ရေးတပ်ဖွဲ့ (PDF) က သတိပေးနေ တာ ကျနော်တို့ သိရသလောက် ၂ ကြိမ်ရှိပြီ။ သူက ပြန်စိန်ခေါ်ပြီး မောက်မာနေတာ” ဟု ပြောသည်။ ဖြစ်စဉ်ဖြစ်ပွားပြီးနောက် သေဆုံးသူ၏ ရုပ်အလောင်းကို ရင်ခွဲစစ်ဆေးရန်အတွက် ဥသျှစ်ပင်ဆေးရုံသို့ ပို့ဆောင်ခဲ့ကြသည်။ အသက် ၄၀ အရွယ် ဒေသခံ ယာဉ်မောင်းတစ်ဦးက “ခါးမှန်တဲ့ သူ့အမျိုးသမီးကို ပြည်ဆေးရုံကြီးကို လွှဲတယ်။ သူ့အလောင်းကတော့ ဥသျှစ်ပင်ဆေးရုံကို ည ၁၂ နာရီလောက်ကတည်းက ပို့ထားရတယ်” ဟု ပြောသည်။ အဆိုပါ ပစ်ခတ်မှုဖြစ်ပွားသည့် တဲကုန်းကျေးရွာသည် ပုသိမ်-မုံရွာ လမ်းမပေါ်ရှိ ပေပင်ကျေးရွာနှင့် ကျီးပင် ကျေးရွာအကြားတွင် တည်ရှိပြီး စစ်အုပ်စုတပ်၏ ကျီးပင်စစ်ဆေးရေးဂိတ်နှင့် ၂ မိုင်ခွဲခန့်သာ ကွာဝေးသည်။ ကျီးပင်ကျေးရွာသည် ပန်းတောင်းမြို့နယ်၏ နယ်ဆုံးဖြစ်ပြီး ကံမမြို့နယ်နှင့် နယ်မြေချင်း ထိစပ်နေသည့် နေရာ လည်း ဖြစ်သည်။ အဆိုပါ ပစ်ခတ်ရှင်းလင်းမှုကို မည်သည့်အဖွဲ့က လုပ်ဆောင်ခဲ့သည် ဆိုသည်ကို လက်ရှိအချိန်အထိ ထုတ်ပြန် ကြေညာထားခြင်း မရှိသေးပေ။ ဓာတ်ပုံ - ပဲခူးတိုင်းအနောက်ခြမ်း ပန်းတောင်းမြို့နယ်အတွင်းရှိ ကျေးရွာလမ်းတစ်နေရာ။ (ပုံဟောင်း) (ဓာတ်ပုံ - သတင်းနှင့် မီဒီယာ ကွန်ရက်) #ပန်းတောင်းမြို့နယ်

ပန်းတောင်းမြို့နယ်အတွင်း ကျေးရွာအုပ်ချုပ်ရေးမှူးတစ်ဦး ပစ်ခတ်ခံရပြီး သေဆုံး

ပန်းတောင်းမြို့နယ်အတွင်း ကျေးရွာအုပ်ချုပ်ရေးမှူးတစ်ဦး ပစ်ခတ်ခံရပြီး သေဆုံး သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၅ ရက်။ ပဲခူးတိုင်း…

  • October 5, 2026
ကချင်နှင့် ရှမ်း-ကချင်အစပ် မြို့နယ် ၆ ခုတွင် KIA နှင့် စစ်အုပ်စုတပ်တို့ တိုက်ပွဲများ ဆက်လက်ပြင်းထန် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၁ ရက်။ ကချင်ပြည်အတွင်းရှိ မြို့နယ် ၅ ခုနှင့် ရှမ်း-ကချင် အစပ်ဒေသများတွင် ကချင်လွတ်လပ်ရေးတပ်မတော် (KIA) ပူးပေါင်းတပ်များနှင့် စစ်အုပ်စုတပ်တို့အကြား စစ်ရေးတင်းမာနေပြီး တိုက်ပွဲများ ဆက်လက်ပြင်းထန်လျက် ရှိသည်။ ကချင်ပြည် ဗန်းမော်၊ ဖားကန့်၊ မိုးညှင်း၊ ခေါင်လန်ဖူး၊ ဝိုင်းမော် မြို့နယ်များနှင့် ရှမ်း-ကချင် အစပ်ရှိ မိုးမိတ်မြို့နယ် အတွင်း၌ စစ်ရေးတင်းမာလျက်ရှိပြီး တိုက်ပွဲများ ဆက်လက်ဖြစ်ပွားနေကြောင်း ကချင်လွတ်လပ်ရေးအဖွဲ့ (KIO/KIA) က ပြောသည်။ လက်ရှိ တိုက်ပွဲဖြစ်ပွားနေသည့် အခြေအနေနှင့် ပတ်သက်၍ KIO/KIA သတင်းနှင့် ပြန်ကြားရေးတာဝန်ခံ ဗိုလ်မှူးကြီး နော်ဘူက ယခုကဲ့သို့ ပြောသည်။ ဗိုလ်မှူးကြီးနော်ဘူက “ကချင်ပြည်နယ်မှာကတော့ တိုက်ပွဲကတော့ ဗန်းမော်မြို့ဝန်းကျင်မှာ နေ့တိုင်းလို တိုက် ပွဲရှိပါတယ်။ နောက် ရှမ်းမြောက် အစပ်ဖြစ်နေတဲ့ မဘိမ်း မိုးမိတ်ဘက်မှာလည်း တိုက်ပွဲတွေရှိပါတယ်။ နောက် ခေါင်လန်ဖူးဘက်မှာလည်း တိုက်ပွဲကတော့ ကြိုကြား ကြိုကြားဖြစ်နေပါတယ်။ နောက် အင်းတော်ကြီး အဲဒီ ဖက်မှာလည်း တိုက်ပွဲတွေရှိပါတယ်။ တခြားနေရာမှာကတော့ တိုက်ပွဲတွေ အဲလောက်အထိ မရှိပါဘူး။ တင်းမာ မှုတွေကတော့ ဝိုင်းမော်ဘက်မှာ ရှိပြီးမှ ဖားကန့်မှာလည်း လက်နက်ကြီးနဲ့ ဒရုန်းတွေနဲ့ အပြန်အလှန် ပစ်ခတ် တာတွေတော့ ရှိပါတယ်” ဟု ပြောသည်။ စစ်အုပ်စုတပ်သည် သင်္ဘောများဖြင့် ဗန်းမော်မြို့သို့ စစ်အင်အား ဖြည့်တင်းခဲ့ပြီးနောက် ဆုံးရှုံးထားသည့် ရပ်ကွက်များကို ပြန်လည်ရယူရန် စစ်ကြောင်းထိုး ဝင်ရောက်လာခြင်း၊ ဒရုန်းနှင့် လေကြောင်းတိုက်ခိုက်မှုများ ပြုလုပ်နေခြင်းတို့ကြောင့် ဗန်းမော်မြို့နယ်အတွင်း၌ တိုက်ပွဲများ နေ့စဉ် ဖြစ်ပွားနေခြင်းဖြစ်သည်။ ထို့အတူ ရှမ်း-ကချင်အစပ် မိုးမိတ်မြို့နယ်အတွင်း၌လည်း တိုက်ပွဲများ ပြင်းထန်နေပြီး စက်တင်ဘာလ ၂၈ ရက် နေ့တွင် မိုးမိတ်မြို့နယ် ညောင်နီကျေးရွာအနီးရှိ စစ်အုပ်စုတပ်၏ ရွှေမြင်တင်ဘုရား ဗျူဟာကုန်းစခန်းကို တိုက်ခိုက်သိမ်းပိုက်နိုင်ခဲ့ကြောင်း ဗိုလ်မှူးကြီး နော်ဘူက ပြောသည်။ အလားတူ မိုးညှင်းမြို့နယ် အင်းတော်ကြီးဒေသ ဟဲပါးကျေးရွာရှိ ရှမ်းနီနဂါးတပ်မတော် (SNA) စခန်းတစ်ခုကို လည်း KIA နှင့် ပူးပေါင်းတပ်များက တိုက်ခိုက်သိမ်းပိုက်ခဲ့သည်။ ဖားကန့်နှင့် ဝိုင်းမော်မြို့နယ်များ၌ လက်နက်ကြီးနှင့် ဒရုန်းဖြင့် အပြန်အလှန် ပစ်ခတ်မှုများ ဆက်လက်ရှိနေ သကဲ့သို့ ခေါင်လန်ဖူးမြို့နယ်အတွင်း၌လည်း တိုက်ပွဲများ ကြိုကြားကြိုကြား ဖြစ်ပွားလျက်ရှိသည်။ တစ်ဖက်တွင်လည်း ကချင်ပြည်တိုက်ပွဲများ၌ အထိနာနေသည့် စစ်အုပ်စုတပ်သည် ပုံမှန် စစ်အင်အား ဖြည့်တင်း နိုင်ခြင်း မရှိတော့ဘဲ ဒေသတွင်းမှ လူငယ်များကို ဖမ်းဆီးကာ ပြည်သူ့စစ်အဖြစ် အတင်းအဓမ္မ စုဆောင်းခြင်း၊ ပေါ်တာထမ်းခိုင်းခြင်းများကို ပြုလုပ်လျက်ရှိကြောင်း ဒေသခံများနှင့် KIO/KIA တို့က ပြောပြ ထုတ်ပြန်သည်။ ပြည်သူ့စစ် စုဆောင်းနေသည့် အခြေအနေနှင့် ပတ်သက်၍ ဗိုလ်မှူးကြီး နော်ဘူက “ဖားကန့်မှာကတော့ သူတို့က အဲဒီ ပြည်သူ့စစ်အဖွဲ့ တပ်ဖွဲ့မယ်ဆိုပြီးမှ သတင်းတွေထွက်နေပါတယ်။ အဲဒီ အကောင်အထည်ဖော်တာတော့ မတွေ့ရသေးဘူး။ နောက် ခေါင်လန်ဖူး မြေပြင်မှာကတော့ သူတို့ ပြည်သူ့စစ်တွေ တော်တော်များများ ရှိတယ်။ ပူတာအိုတို့ မချမ်းဘောတို့မှာကတော့ ပြည်သူ့စစ် စုဆောင်းရေးတွေ လုပ်တယ်။ နောက် သူတို့ရဲ့ ပစ္စည်းတွေကို ထမ်းပေးဖို့ ချောဆွဲတာပေါ့ ရွာသားတွေကို ချောဆွဲတာတွေ ရှိပါတယ်။ ကျန်တဲ့ နေရာမှာကတော့ အသစ်ဝင် လာတာတော့ မတွေ့ရသေးဘူး” ဟု ပြောသည်။ စစ်အုပ်စုတပ်သည် ကချင်ပြည်အတွင်း ဆုံးရှုံးထားသည့် နယ်မြေများကို ပြန်လည်ရယူရန် ထိုးစစ်ဆင် တိုက်ခိုက်လျက်ရှိရာ စစ်ရေးပဋိပက္ခ ဒေသများရှိ အရပ်သား ပြည်သူများမှာ ဖမ်းဆီးစစ်ဆေးခံရခြင်း၊ လက်နက်ကြီး၊ လေကြောင်းနှင့် ဒရုန်း ပစ်ခတ်မှုများကြောင့် သေဆုံးရခြင်းနှင့် နေအိမ်များ မီးရှို့ဖျက်ဆီးခံရခြင်း စသည့် ဒဏ်များကို ခံစားနေကြရကြောင်း စစ်ဘေးရှောင် ပြည်သူများနှင့် လူ့အခွင့်အရေး လှုပ်ရှားသူများက ပြောဆိုသည်။ ဓါတ်ပုံ - (AFP / ပုံဟောင်း)

ကချင်နှင့် ရှမ်း-ကချင်အစပ် မြို့နယ် ၆ ခုတွင် KIA နှင့် စစ်အုပ်စုတပ်တို့ တိုက်ပွဲများ ဆက်လက်ပြင်းထန်

ကချင်နှင့် ရှမ်း-ကချင်အစပ် မြို့နယ် ၆ ခုတွင် KIA နှင့် စစ်အုပ်စုတပ်တို့ တိုက်ပွဲများ ဆက်လက်ပြင်းထန် သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တို…

  • October 1, 2026
အထိနာလာသော စစ်တပ်က စစ်တွေ-ပုဏ္ဏားကျွန်း စစ်မျက်နှာတွင် လေကြောင်းနှင့် လက်နက်ကြီး အားပြုလာ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၁ ရက်။ ရခိုင်ပြည်၊ စစ်တွေ-ပုဏ္ဏားကျွန်း စစ်မျက်နှာတွင် အာရက္ခတပ်တော် (AA) ၏ တန်ပြန်ထိုးစစ်ကြောင့် မြေပြင်၌ အထိနာနေသည့် စစ်အုပ်စုသည် စစ်တွေမြို့အနီးဝန်းကျင်ရှိ ကျေးရွာများကို လေကြောင်းနှင့် လက်နက်ကြီး များ အသုံးပြုကာ ဆက်တိုက် တိုက်ခိုက်လာနေကြောင်း ဒေသခံ စစ်ရေးသတင်းရင်းမြစ်များက ပြောသည်။ စက်တင်ဘာလ ၄ ရက်နေ့မှစတင်၍ စစ်အုပ်စုတပ်သည် ပုဏ္ဏားကျွန်းမြို့နယ်အတွင်းသို့ အင်အား ၁,၀၀၀ ကျော် ဖြင့် စစ်ကြောင်းများခွဲကာ ထိုးစစ်ဆင်ခဲ့သော်လည်း AA ဘက်က ဝါဘိုနှင့် စပါးထားကျေးရွာများကို ပြန်လည် ခြေကုပ်ယူနိုင်ခဲ့သည့်အပြင် စစ်တွေဒေသကွပ်ကဲမှုစစ်ဌာနချုပ် (ဒကစ) လက်အောက်ခံ ကံကော်ကျွန်းအထိ ဆက်လက် ထိုးစစ်ဆင်လာသဖြင့် စစ်အုပ်စုတပ် စစ်ကြောင်းများ အထိနာကာ ဆုတ်ခွာခဲ့ရခြင်း ဖြစ်သည်။ ဒေသခံ စစ်ရေးသတင်းရင်းမြစ် အမျိုးသားတစ်ဦးက “စစ်တွေ-ပုဏ္ဏားကျွန်း နယ်စပ်မှာ စစ်တပ်ရဲ့ စစ်ကြောင်း တွေ အကျအဆုံးများတယ်။ ပြန်ဆုတ်နိုင်ခဲ့တာရှိသလို တချို့က နေရာတွေမှာ ပိတ်မိပြီး စစ်တွေဘက် ပြန် မဆုတ်နိုင်တာတွေရှိတယ်။ AA က နယ်စပ်ကပိတ်ပြီး စစ်ဆိုင်ထားတော့ ပိတ်မိတဲ့ စစ်သားတွေ ပြန်ထွက်လို့ မရဘူး။ အခု စစ်တပ်က လေကြောင်းကိုပဲ အားပြုနေရတယ်” ဟု ပြောဆိုသည်။ မြေပြင်တွင် အကျအဆုံးများနေသည့် စစ်အုပ်စုတပ်သည် စက်တင်ဘာလ ၃၀ ရက်နေ့၊ ည ၉ နာရီခန့်က ပုဏ္ဏားကျွန်းမြို့အနီး စစ်ဘေးရှောင်များ ခိုလှုံနေသည့် ကျောက်ဆိပ်ကျေးရွာကို လေကြောင်းမှ ဗုံးကြဲခဲ့သဖြင့် ပုဏ္ဏားကျွန်းမြို့ပေါ်မှ စစ်ဘေးရှောင်လာသူ အသက် ၄ နှစ်အရွယ် မောင်နေကျော်လင်းနှင့် ကျောက်ဆိပ်ရွာသူ အသက် ၂၆ နှစ်အရွယ် မခင်ခင်သန်းတို့ ဒဏ်ရာရရှိခဲ့သည်။ အခြား ဒေသခံ စစ်ရေးသတင်းရင်းမြစ် အမျိုးသားတစ်ဦးကလည်း “စစ်တွေ-ပုဏ္ဏားကျွန်း နယ်စပ်မှာ စစ် ကြောင်းထိုးတာတွေက အကျအဆုံးတွေနဲ့ ရင်ဆိုင်ရတော့ လေကြောင်းနဲ့ လက်နက်ကြီးပစ်တာတွေ လုပ်ဆောင် နေပါတယ်။ ပုဏ္ဏားကျွန်းမြို့ပေါ် အထိ ဗုံးကြဲတာ ၂ ယောက် ဒဏ်ရာရတယ်။ စစ်တွေ-ပုဏ္ဏားကျွန်း-ရသေ့ တောင် လမ်းပေါ်က တံဘက်လှမ်းရွာကိုလည်း လက်နက်ကြီးတွေနဲ့ လှမ်းပစ်နေပါတယ်။ ဒေသခံတွေကတော့ တိမ်းရှောင်ပေမဲ့ တချို့က ပြေးဖို့နေရာမရှိသလို ဖြစ်နေတယ်” ဟု ပြောသည်။ စစ်အုပ်စုတပ်သည် စက်တင်ဘာလ ၂၈ ရက်က စစ်တွေ-ပုဏ္ဏားကျွန်း နယ်စပ်တောင်တန်းများကို ကင်းထောက် လေယာဉ်များဖြင့် ပျံသန်းထောက်လှမ်းကာ ဒရုန်းဖြင့် ပစ်ခတ်မှုများ ပြုလုပ်ခဲ့ပြီး စက်တင်ဘာလ ၂၉ ရက်နှင့် ၃၀ ရက်တို့တွင်လည်း ကံကော်ကျွန်း၊ ဝါဘို၊ စပါးထားနှင့် တံဘက်လှမ်းကျေးရွာများအတွင်းသို့ လက်နက်ကြီးများ ဆက်တိုက် ပစ်ခတ်ခဲ့သည်။ ထို့ပြင် စက်တင်ဘာလ ၂၃ ရက်ကလည်း ပုဏ္ဏားကျွန်းမြို့နယ် ဖက်ကျကျေးရွာကို စစ်အုပ်စုတပ်က Y-12 လေယာဉ်တစ်စီး၊ ဂျက်တိုက်လေယာဉ်နှစ်စီးတို့ဖြင့် နာရီဝက်ခန့် ဗုံးကြဲခဲ့၍ အရပ်သား ၂ ဦး သေဆုံးကာ နေအိမ် ၂၅ လုံး ပျက်စီးခဲ့သည့်အပြင် စက်တင်ဘာလ ၂၀ ရက်ကလည်း ကုလားချောင်းကျေးရွာကို ဂျက်တိုက်လေယာဉ် ဖြင့် ဗုံးကြဲခဲ့သဖြင့် အရပ်သား ၁ ဦး သေဆုံးခဲ့ရသည်။ လက်ရှိတွင် စစ်တွေ-ပုဏ္ဏားကျွန်း နယ်စပ်ရှိ ကြက်တောရာ၊ ပါဒလိပ်၊ မံစီ၊ အမ်ဘာရီနှင့် ကျောက်တန်းကျေးရွာ တို့၌ စစ်အုပ်စုတပ်၏ စစ်ရေးလှုပ်ရှားမှုများ ရှိနေပြီး စစ်တွေ-ပုဏ္ဏားကျွန်း-ရသေ့တောင် လမ်းမကြီး အနီးဝန်း ကျင်သို့ ထပ်မံစစ်ကြောင်းထိုးရန် ပြင်ဆင်လျက်ရှိသည်။ ဓါတ်ပုံ - (စက်တင်ဘာ ၁၃ ရက်နေ့က ပုဏ္ဏားကျွန်းမြို့၊ ဦးရာဇ်တော်ဘုရား တောင်ခြေ ကြိုးတံတားအနီး စစ်အုပ်စုတပ်၏ လေကြောင်းမှ ဗုံးကြဲတိုက်ခိုက်ခံရမှု မြင်ကွင်း။ / AA Info Desk) #စစ်တွေ #ပုဏ္ဏာကျွန်း

အထိနာလာသော စစ်တပ်က စစ်တွေ-ပုဏ္ဏားကျွန်း စစ်မျက်နှာတွင် လေကြောင်းနှင့် လက်နက်ကြီး အားပြုလာ

အထိနာလာသော စစ်တပ်က စစ်တွေ-ပုဏ္ဏားကျွန်း စစ်မျက်နှာတွင် လေကြောင်းနှင့် လက်နက်ကြီး အားပြုလာ သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၁ ရက်။…

  • October 1, 2026
စခန်းသိမ်းတိုက်ပွဲ အပြီး မိုးမိတ်တွင် စစ်ရေးတင်းမာနေ၍ ဒေသခံများ စိုးရိမ်နေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၃၀ ရက်။ ရှမ်းပြည်မြောက်ပိုင်း၊ မိုးမိတ်မြို့အနီးတွင် စစ်အုပ်စုတပ်၏ စခန်းတစ်ခုကို တော်လှန်ရေး ပူးပေါင်းတပ်များက တိုက်ခိုက်သိမ်းပိုက်လိုက်ပြီးနောက် စက်တင်ဘာလ ၃၀ ရက်အထိ စစ်ရေး ဆက်လက်တင်းမာနေသဖြင့် မြို့ခံနှင့် ကျေးရွာနေ ပြည်သူများ စိုးရိမ်ထိတ်လန့်ကာ ဘေးလွတ်ရာသို့ ထွက်ပြေးတိမ်းရှောင်နေကြရသည်။ စက်တင်ဘာလ ၂၈ ရက်နေ့ နံနက်ပိုင်းမှစ၍ မိုးမိတ်မြို့နှင့် ၃ မိုင်ခန့်အကွာရှိ ညောင်နီကျေးရွာအထက် ရွှေမြင် တင် စေတီကုန်းပေါ်တွင် တပ်စွဲထားသည့် စစ်အုပ်စုတပ် ဗျူဟာစခန်းကို ကချင်လွတ်လပ်ရေးတပ်မတော် (KIA) နှင့် PDF ပူးပေါင်းတပ်များက တိုက်ခိုက်သိမ်းပိုက်ခဲ့သည်။ အဆိုပါ တိုက်ပွဲအတွင်း စစ်အုပ်စုတပ်ဖွဲ့ဝင် အလောင်းအချို့၊ လက်နက်ခဲယမ်းများနှင့် တပ်ဖွဲ့ဝင် ၅ ဦးထက် မနည်း ဖမ်းဆီးရမိခဲ့ကြောင်း မြေပြင်သတင်းရင်းမြစ်များက ပြောသည်။ စခန်းလက်လွှတ်လိုက်ရပြီးနောက် စစ်အုပ်စုတပ်က Y-12 လေယာဉ်၊ ဂျက်ဖိုက်တာများနှင့် တိုက်ခိုက်ရေး ရဟတ်ယာဉ်များ အသုံးပြုကာ ညောင်နီနှင့် မိုးမိတ်မြို့ပြင် အနီးဝန်းကျင်သို့ မပြတ် ဗုံးကြဲတိုက်ခိုက်လျက်ရှိရာ စက်တင်ဘာလ ၃၀ ရက်အထိ စစ်ရေးတင်းမာမှု ဆက်လက်ရှိနေသည်။ “အခုက လူထုကတော့ စစ်ရှောင်ပေါ့ဗျာနော်။ တစ်ညလုံး ပစ်နေကြတာကိုး။ ၂၉ ရက်နေ့ မနက်ပိုင်းမှာလည်း Y-12 ရော ဂျက်ဖိုက်တာရော လာပြီး ဗုံးကြဲနေ တော့ ညောင်နီ နားကရော ရွှေမြင်တင် ဘုရားကုန်းဘက်က ရော လူတွေ အကုန်လုံးနီးပါး ဘေးလွတ်ရာကို ပြေးနေကြရပြီ” ဟု မိုးမိတ်မြို့ခံ အမျိုးသားတစ်ဦးက ပြော သည်။ ထို့ပြင် စစ်အုပ်စုတပ်က မန္တလေးတိုင်း မိုးကုတ်မြို့ဘက်မှစ၍ စစ်အင်အား ဖြည့်တင်းမှုများ ပြုလုပ်နေသလို စက်တင်ဘာလ ၂၈ ရက်နေ့ ညနေပိုင်းမှစ၍ မိုးမိတ်-မိုးကုတ် လမ်းပိုင်းကိုလည်း သွားလာခွင့် လုံးဝပိတ်ဆို့ထား သဖြင့် ဒေသခံများမှာ ကျန်းမာရေးနှင့် လူမှုရေးကိစ္စများအတွက် သွားလာရန် အခက်အခဲနှင့် ကြုံတွေ့နေရသည်။ တော်လှန်ရေးတပ်ဖွဲ့နှင့် နီးစပ်သည့် မြေပြင် စစ်ရေးအခြေအနေကို သိရှိသူ ဒေသခံတစ်ဦးက “တော်လှန်ရေး တပ်ဖွဲ့တွေဘက်က စကစ စခန်းအရင်သိမ်းလိုက်တယ်။ အဲ့မှာ စတာပဲ။ နဂိုကတည်းကတော့ အမြဲအသင့်အနေ ထားပဲ။ အခုဆိုရင် တိုက်ပွဲက မိုးမိတ်မြို့အဝင် ရွှေဇာလီတံတားနားထိတောင် ရောက်နေပြီ။ စစ်အုပ်စုဘက်က အထိနာတော့ မိုးကုတ်ဘက်ကနေ ခြေလျင်စစ်ကြောင်းတွေနဲ့ပါ အင်အား ထိပ်ဖြည့်တယ်လို့လည်း ကြားတယ်။ မြို့ပေါ်အထိ တိုက်ပွဲကူးလာမှာကို အကုန်လုံး စိုးရိမ်နေကြတာ။ လမ်းပိုင်းတချို့လည်း စစ်တပ်က ပိတ်ထား တယ်လို့ ကြားထားတယ်” ဟု ပြောသည်။ မိုးမိတ်မြို့နှင့် မဘိမ်းမြို့နယ်အစပ် မြစ်ဆုံကျေးရွာဘက်တွင်လည်း လေကြောင်းမှ ဗုံးကြဲမှုများ ရှိနေပြီး စစ်အုပ်စုတပ်သည် မိုးမိတ်မှ မြစ်ဆုံနှင့် မဘိမ်းဘက်သို့ ထိန်းချုပ်နိုင်ရန် ကြိုးပမ်းနေသကဲ့သို့ တော်လှန်ရေး ပူးပေါင်းတပ်များကလည်း ရွှေလီမြစ်ဝှမ်း အထက်ဘက်သို့ စစ်အုပ်စု စစ်ကြောင်းမထိုးနိုင်စေရန် မြို့ပြင်မှ ပိတ်ဆို့တိုက်ခိုက်နေ၍ တိုက်ပွဲများ မနီးမဝေးသို့ ကူးစက်လာမည်ကို ဒေသခံများက စိုးရိမ်နေကြသည်။ မိုးမိတ်မြို့သည် 1027 စစ်ဆင်ရေးအတွင်း တအာင်းအမျိုးသားလွှတ်မြောက်ရေးတပ်မတော် (TNLA) က သိမ်းပိုက်ခဲ့သော်လည်း ၂၀၂၅ ခုနှစ် အောက်တိုဘာလတွင် စစ်အုပ်စုထံ ပြန်လည်လွှဲပြောင်းပေးခဲ့ရသည့် မြို့ဖြစ် သည်။ ထို့နောက် မြို့တွင်း၌ စစ်အုပ်စုတပ်က တပ်စွဲထားပြီး မြို့ပြင်ကျေးရွာများတွင် ကချင်လွတ်လပ်ရေး တပ်မတော် KIA၊ PDF နှင့် ရှမ်းပြည်တိုးတက်ရေးပါတီ (SSPP/SSA) စသည့် တပ်ပေါင်းစုများ အင်အားဖြည့်ထားသဖြင့် စစ်ရေး အမြဲမပြတ် တင်းမာနေသည့် ဒေသတစ်ခု ဖြစ်သည်။ ဓါတ်ပုံ - (ပုံဟောင်း / မိုးမိတ်မြို့အဝင်၌ PDF ရဲဘော်များအား တွေ့ရစဉ် - MDY PDF) #မိုးမိတ်

စခန်းသိမ်းတိုက်ပွဲ အပြီး မိုးမိတ်တွင် စစ်ရေးတင်းမာနေ၍ ဒေသခံများ စိုးရိမ်နေ

စခန်းသိမ်းတိုက်ပွဲ အပြီး မိုးမိတ်တွင် စစ်ရေးတင်းမာနေ၍ ဒေသခံများ စိုးရိမ်နေ သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၁ ရက်။ ရှမ်းပြည်မြ…

  • October 1, 2026
ရခိုင်က မြို့နယ် ၃ ခုကို စစ်အုပ်စုတပ် လေကြောင်းမှကြဲ၊ အရပ်သား ၁ ဦး သေ၊ ၈ ဦး ဒဏ်ရာရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၁ ရက်။ ရခိုင်ပြည် စစ်တွေမြို့အနီး တိုက်ပွဲများတွင် အကျအဆုံးများနေသည့် စစ်အုပ်စုတပ်သည် အာရက္ခ တပ်တော် (AA) ထိန်းချုပ်ထားသည့် စစ်တွေမြို့ အနီးဝန်းကျင် မြို့နယ် ၃ ခုကို လေကြောင်းမှ ဆက်တိုက် ဗုံးကြဲတိုက်ခိုက်ခဲ့သဖြင့် ၄ နှစ်အရွယ် ကလေးငယ်တစ်ဦး အပါအဝင် အရပ်သား ၈ ဦး ထိခိုက်ဒဏ်ရာရရှိခဲ့ပြီး အမျိုးသားတစ်ဦး သေဆုံးသွားခဲ့သည်။ လူပေါင်း ၅၀ ဦးထက်မနည်း သေဆုံးခဲ့ရသည့် ကျောက်တော်မြို့ အိန္ဒိယဈေး လေကြောင်းဗုံးကြဲခံရမှု ဖြစ်ပွားပြီး ရက်ပိုင်းအကြာမှာပင် စစ်အုပ်စုတပ်သည် ပုဏ္ဏားကျွန်း၊ ရသေ့တောင်နှင့် ပေါက်တော (ဝီရဋ္ဌာနီ) မြို့နယ်များ အတွင်းရှိ အရပ်သားကျေးရွာများကို ဂျက်ဖိုက်တာများဖြင့် ရမ်းသန်း ဗုံးကြဲတိုက်ခိုက်ခဲ့ခြင်းဖြစ်သည်။ စက်တင်ဘာလ ၃၀ ရက်နေ့ ည ၉ နာရီကျော်တွင် ပုဏ္ဏားကျွန်းမြို့အနီး စစ်ဘေးရှောင်များ ခိုလှုံနေသည့် ကျောက်ဆိပ်ကျေးရွာကို ဂျက်ဖိုက်တာဖြင့် ဗုံးကြဲခဲ့သဖြင့် ပုဏ္ဏားကျွန်းမြို့ပေါ်မှ စစ်ဘေးရှောင်လာသည့် အသက် ၄ နှစ်အရွယ် မောင်နေကျော်လင်း၏ ဘယ်ဘက်ခြေထောက် ထိမှန်ခဲ့ပြီး အသက် ၂၆ နှစ်အရွယ် အမျိုးသမီး တစ်ဦးလည်း ခန္ဓာကိုယ်အနှံ့ ပြင်းထန်စွာ ဒဏ်ရာရရှိခဲ့သည်။ ပုဏ္ဏားကျွန်း ဒေသခံတစ်ဦးက “စစ်တွေဘက်မှာ မြေပြင်တိုက်ပွဲဖြစ်ပြီး စစ်အုပ်စုတပ် အကျအဆုံးများသွားရင် ဒီဘက်ကို လေယာဉ်နဲ့ တန်းလာကြဲတော့တာပဲ။ စစ်ဘေးရှောင်တွေ ဒုက္ခရောက်နေတာကို ကြည့်မရလို့ တမင် ရမ်းသန်းပစ်တာ။ တစ်ညလုံး ပုဏ္ဏားကျွန်း ပတ်ဝန်းကျင်မှာ လေယာဉ်သံ လက်နက်ကြီးသံတွေ ဆူညံပြီး ဗုံးတွေ ဆက်တိုက် ကြဲနေတာပါ” ဟု ပြောသည်။ အလားတူ ရသေ့တောင်မြို့နယ် မူစဲကျွန်းဒေသ ကူတောင်ကျေးရွာကိုလည်း ည ၁၀ နာရီခန့်တွင် စစ်အုပ်စုတပ်က ပေါက်ကွဲအားပြင်း ဗုံး နှစ်လုံး ကြဲချခဲ့ရာ နေအိမ်အတွင်း ရှိနေသည့် လင်မယား နှစ်ဦး ထိမှန်ခဲ့သည်။ ထိုတိုက်ခိုက်မှုကြောင့် အသက် ၅၁ နှစ်အရွယ် ဦးအောင်ထွန်းသိန်း သေဆုံးခဲ့ပြီး ဇနီးဖြစ်သူ ထိမှန် ဒဏ်ရာရခဲ့ သည့်အပြင် အနီးအနားရှိ နေအိမ်များပါ ပျက်စီးသွားခဲ့သည်။ ရသေ့တောင် ဒေသခံတစ်ဦးက “နေအိမ်ပေါ် တည့်တည့်ကျသွားတော့ လင်မယား နှစ်ဦးလုံး ဗုံးစထိမှန်တာ။ ယောက်ျားဖြစ်သူကတော့ သေသွားတယ်။ သူ့မိန်းမ ဒေါ်ဝင်းနုကတော့ ဒဏ်ရာရသွားတယ်။ အနားက အိမ်တွေပါ ပျက်စီးသွားတော့ အခု ရွာသားတွေ စစ်ဘေး ထပ်ရှောင်နေကြရတယ်” ဟု ပြောသည်။ ထို့ပြင် ပေါက်တောမြို့နယ်ကိုလည်း ညသန်းခေါင် ၁၂ နာရီကျော်တွင် လေယာဉ်ဖြင့် ဗုံးများ ဆက်တိုက် ကြဲချခဲ့ သဖြင့် အရပ်သား ၅ ဦး ဒဏ်ရာရရှိခဲ့သည်။ ကုလသမဂ္ဂ၏ မြန်မာနိုင်ငံဆိုင်ရာ လွတ်လပ်သော စုံစမ်းစစ်ဆေးရေးယန္တရား (IIMM) က စက်တင်ဘာလ ၃၀ ရက်နေ့တွင် ထုတ်ပြန်ရာ၌ စစ်အုပ်စုတပ်သည် ဈေးကဲ့သို့သော အများပြည်သူဆိုင်ရာ အခြေခံအဆောက်အအုံ များကို ပစ်မှတ်ထား တိုက်ခိုက်နေပြီး၊ အရပ်သားများအပေါ် ပစ်မှတ်မခွဲခြားဘဲ လေကြောင်းမှ တိုက်ခိုက်ခြင်း သည် လူသားမျိုးနွယ်အပေါ် ကျူးလွန်သည့် စစ်ရာဇဝတ်မှုဖြစ်ကြောင်း ထောက်ပြထားသည်။ လက်ရှိတွင် စစ်တွေမြို့ပေါ်အထိ ပစ်ခတ်သံများ ကြားနေရပြီး စစ်အုပ်စုတပ်သည် မြေပြင်တိုက်ပွဲများတွင် အကျ အဆုံးများပြားလာသည့် အခါ AA ထိန်းချုပ်ထားသည့် အနီးဝန်းကျင် အရပ်သားကျေးရွာများကို လေကြောင်းမှ ပစ်မှတ်ထား တိုက်ခိုက်လျက်ရှိသည်။ #စစ်တွေမြို့

ရခိုင်က မြို့နယ် ၃ ခုကို စစ်အုပ်စုတပ် လေကြောင်းမှကြဲ၊ အရပ်သား ၁ ဦး သေ၊ ၈ ဦး ဒဏ်

ရခိုင်က မြို့နယ် ၃ ခုကို စစ်အုပ်စုတပ် လေကြောင်းမှကြဲ၊ အရပ်သား ၁ ဦး သေ၊ ၈ ဦး ဒဏ်ရာရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၁ ရက်။ ရခိ…

  • October 1, 2026
ထားဝယ်တွင် ရေကြီးမြေပြိုမှုအကြား စစ်အုပ်စုတပ် လေကြောင်းဗုံးကြဲ၍ စစ်ကြောင်းပါထိုးနေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၁ ရက်။ တနင်္သာရီတိုင်း၊ ထားဝယ်ခရိုင်အတွင်း မိုးဆက်တိုက်ရွာသွန်းပြီး ရေကြီးမြေပြိုမှုများကြောင့် ပြည်သူ ၃၀ ကျော် သေဆုံးကာ အရေးပေါ် ကူညီကယ်ဆယ်ရေးများ လိုအပ်နေချိန်တွင် စစ်အုပ်စုတပ်က မကူညီသည့်အပြင် လေ ကြောင်းမှ ဗုံးကြဲတိုက်ခိုက်ခြင်းနှင့် မြေပြင်စစ်ကြောင်းထိုးမှုများကို ဆက်တိုက် ပြုလုပ်လျက်ရှိသည်။ စက်တင်ဘာလ ၃၀ ရက်နေ့ ညနေ ၃ နာရီခန့်တွင် ထားဝယ်အရှေ့တောဒေသ ပကာရီကျေးရွာအုပ်စု ရေဝိုင်း ကျေးရွာနှင့် နဘုလယ်ဒေသဘက်သို့ စစ်အုပ်စုတပ်က ဂျက်ဖိုက်တာဖြင့် ဗုံးကြဲတိုက်ခိုက်ခဲ့သည့်အပြင် ဒေသ အတွင်း ဖုန်းလိုင်းများကိုလည်း ကြိုတင်ဖြတ်တောက်ထားခဲ့ကြောင်း ဒေသခံများနှင့် တော်လှန်ရေးတပ်ဖွဲ့ တာ ဝန်ရှိသူများက ပြောသည်။ ထားဝယ်အရှေ့တောဒေသတွင် စစ်ရေးလှုပ်ရှားနေသည့် တော်လှန်ရေးတပ်ဖွဲ့ တာဝန်ရှိသူတစ်ဦးက “ဒီမှာက ရေတွေကကြီး၊ မြေတွေကပြိုနဲ့ အားလုံးက ဒုက္ခရောက်နေကြတာပါ။ ဘာတိုက်ပွဲမှ မရှိဘဲကို လာကြဲသွားတာ။ ဒီဗုံးကြဲမှုထဲမှာ လူအထိအခိုက်တော့ မရှိဘူးဆိုပေမယ့် လူတွေကတော့ စိုးရိမ်ထိတ်လန့်ရတာပေါ့။ ရွာဝန်းကျင် ကိုပဲ ကြဲချသွားတာပါ” ဟု ပြောသည်။ လက်ရှိတွင် ထိုင်းနိုင်ငံဘက်မှ လေဖိအားနည်းရပ်ဝန်း အရှိန်ကြောင့် စက်တင်ဘာလ ၂၆ ရက်မှစ၍ ထားဝယ်၊ လောင်းလုံး၊ သရက်ချောင်း၊ ရေဖြူနှင့် မြိတ်မြို့နယ်တို့၌ ရေကြီးမြေပြိုမှုများ ကြုံတွေ့နေရခြင်းဖြစ်သည်။ ထားဝယ်အမျိုးသားအဖွဲ့ချုပ်၏ ထုတ်ပြန်ချက်အရ ထားဝယ်ဒေသတစ်ခုလုံး၌ တောင်ပြိုမှုနှင့် ရေကြီးမှုများ ကြောင့် စုစုပေါင်း ၃၂ ဦး သေဆုံးကြောင်း အတည်ပြုထားနိုင်ပြီး ပျောက်ဆုံးနေသူ ဆယ်ဂဏန်းအထိ ရှိနေကာ နေအိမ်နှင့် အဆောက်အအုံ ၃၀၀ ဝန်းကျင် ပျက်စီးသွားခဲ့သည်။ အဆိုးဝါးဆုံး ရေဘေးကြုံတွေ့နေရသည့် လောင်းလုံးမြို့နယ် ကျောက်ဆင်ကျေးရွာဘက်သို့ စက်တင်ဘာလ ၂၈ ရက်က အင်အား ၁၀၀ ခန့်ပါ စစ်အုပ်စုတပ် စစ်ကြောင်းသည် သဘာဝဘေး ကူညီပေးမည်ဟု အကြောင်းပြကာ ဝင်ရောက်လာခဲ့သော်လည်း ရေဘေးသင့်ကျေးရွာများသို့ မသွားဘဲ ရွာအတွင်း အထိုင်ချ တပ်စွဲထားကြောင်း ဆိုသည်။ “ဖုန်းလိုင်းတွေ ဖြတ်ထားတော့ ရေဘေးသင့်နေတဲ့ ရွာက ဆွေမျိုးတွေကို စိတ်ပူနေရတာ။ အခု ကယ်ဆယ်ရေး လာမယ်ဆိုတဲ့ စစ်အုပ်စုတပ်ကလည်း ရွာထဲမှာပဲ တပ်စွဲပြီး ပေါ်တာဆွဲ ဖမ်းမှာစိုးလို့ လူငယ်တွေ ပုန်းပြေးနေရ တယ်” ဟု ထားဝယ်မြို့ခံတစ်ဦးက ပြောသည်။ စက်တင်ဘာလ ၂၈ ရက်ကလည်း ထားဝယ်မြို့ပေါ် ကြက်စားပြင်ရပ်ကွက်၌ လူငယ်တစ်ဦးကို စစ်အုပ်စုတပ်က ပေါ်တာဆွဲ ဖမ်းဆီးသွားခဲ့သည့်အပြင် ရေဖြူမြို့နယ် သစ်တိုထောင့်ကျေးရွာနှင့် ထားဝယ်အထူးစီးပွားရေးဇုန် အနီးတို့တွင်လည်း စစ်ကြောင်းများ ဝင်ရောက်လာသဖြင့် တော်လှန်ရေးတပ်ဖွဲ့များနှင့် ထိတွေ့တိုက်ပွဲများ ဆက် တိုက် ဖြစ်ပွားလျက်ရှိသည်။ လက်ရှိတွင် ထားဝယ်ဘက်မှ စီးဆင်းလာသော ရေများကြောင့် တနင်္သာရီမြစ်ရေသည် စိုးရိမ်ရေမှတ်ထက် ၂ ပေ ကျော်အထိ မြင့်တက်လာပြီး အနီးဝန်းကျင် ကျေးရွာ ၂၀၀ အထက် ရေကြီးနစ်မြုပ်မှုများ ကြုံတွေ့နေရသဖြင့် စစ်ဘေးနှင့် သဘာဝဘေး နှစ်ထပ်ကွမ်း ရင်ဆိုင်နေရသော ဒေသခံများအတွက် အရေးပေါ် အကူအညီများ လိုအပ်လျက်ရှိသည်။ #တနင်္သာရီတိုင်း # ထားဝယ်ခရိုင်

ထားဝယ်တွင် ရေကြီးမြေပြိုမှုအကြား စစ်အုပ်စုတပ် လေကြောင်းဗုံးကြဲ၍ စစ်ကြောင်းပါထိုးနေ

ထားဝယ်တွင် ရေကြီးမြေပြိုမှုအကြား စစ်အုပ်စုတပ် လေကြောင်းဗုံးကြဲ၍ စစ်ကြောင်းပါထိုးနေ သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၁ ရက်။ တနင…

  • October 1, 2026
စစ်ကြောင်းထိုးလာ၍ ကန်ပက်လက်တွင် အရပ်သား ၁,၀၀၀ ကျော် စစ်ဘေးရှောင်နေရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၃၀ ရက်။ ချင်းပြည်တောင်ပိုင်း၊ ကန်ပက်လက်မြို့နယ်၊ လောင်းရှည်-ကျင်ဒွေး လမ်းပိုင်းရှိ ကျေးရွာများအတွင်းသို့ စစ်အုပ်စုတပ် စစ်ကြောင်း ထိုးဝင်ရောက်လာသောကြောင့် မဆာတွီကျေးရွာ အပါအဝင် အနီးဝန်းကျင်ရှိ ကျေးရွာ ၇ ရွာမှ ဒေသခံပြည်သူ ၁,၀၀၀ ကျော် စစ်ဘေးလွတ်ရာသို့ တိမ်းရှောင်နေကြရသည်။ အဆိုပါ စစ်ကြောင်းမှာ အင်အား ၅၀၀ ကျော်ပါဝင်ပြီး တပ်မ ၇၇ ဗျူဟာမှူး ကိုယ်တိုင် ဦးစီးကာ ယောဒေသနယ် အနောက်တောင်ပိုင်းမှ ချင်းပြည်နယ်တောင်ပိုင်း ထိစပ်နယ်မြေများသို့ ထိုးစစ်ဆင်လာခြင်းဖြစ်သည်။ စက်တင်ဘာလ ၂၈ ရက်နေ့ မွန်းလွဲပိုင်းတွင် ကန်ပက်လက်မြို့နယ်အတွင်း အင်အား ၂၀၀ ကျော် ဝင်ရောက်လာ ပြီး မဆာတွီကျေးရွာတွင် တပ်စွဲထားကြောင်း ဒေသခံက ပြောသည်။ စစ်ကြောင်း ထိုးစစ်ဆင်မှု အခြေအနေနှင့် ပတ်သက်၍ ဒေသခံ တော်လှန်ရေး သတင်းအရင်းအမြစ် တစ်ဦးက “စစ်အုပ်စုတပ်က အင်အားတချို့ကို လောင်းရှည်မြို့နယ် ဆွဲလွဲကျင်းရွာ လမ်းဘက်မှာ ချန်ထားခဲ့တယ်။ အင် ဘူး၊ ဆွဲလွဲကျင်း၊ မဆာတွီ စတဲ့ ကျေးရွာတွေက ဒေသခံတွေ ထွက်ပြေးနေရပြီ။ စစ်ကြောင်းက လူတချို့ကို လည်း ဖမ်းဆီးထားတာမျိုးတွေ ရှိတယ်” ဟု ပြောသည်။ ထို့ပြင် စစ်အုပ်စုတပ်သည် ကျင်ဒွေးမြို့ဘက်မှ ဆင်းလာသည့် ဆိုင်ကယ် ၂ စီးနှင့် ပြည်သူ ၄ ဦးကို အင်ဘူး ကျေးရွာတွင် ဖမ်းဆီးထိန်းသိမ်းခဲ့ပြီး စစ်ကြောင်းနှင့်အတူ ခေါ်ဆောင်သွားသည့်အပြင် နောက်ထပ် ဒေသခံ ပြည်သူ အချို့ကိုလည်း ဆက်လက် ဖမ်းဆီးထားကြောင်း အဆိုပါ စစ်ရေးသတင်းရင်းမြစ်က ပြောသည်။ မြေပြင်စစ်ကြောင်း ထိုးလာမှုနှင့်အတူ စစ်အုပ်စုတပ်သည် ကန်ပက်လက်မြို့နယ်၊ အမှတ် (၆) ရှိ မဆာတွီကျေး ရွာသို့ လေကြောင်းမှပါ ၃ ရက်ဆက်တိုက် ဗုံးကြဲတိုက်ခိုက်ခဲ့ကြောင်း ဒေသတွင်းသတင်းဌာန အချို့က ဖော်ပြထားသည်။ စက်တင်ဘာလ ၂၆ ရက် မွန်းလွဲ ၁၂ နာရီဝန်းကျင်၊ စက်တင်ဘာလ ၂၇ ရက် မွန်းလွဲ ၁ နာရီဝန်းကျင်နှင့် စက်တင် ဘာလ ၂၈ ရက် ညနေ ၆ နာရီဝန်းကျင်တို့တွင် မကွေးလေတပ်မှ တက်လာသည့် ဖိုက်တာဂျက် ၁ စီးဖြင့် ကျေးရွာ အတွင်းသို့ ဆက်တိုက် ဗုံးကြဲခဲ့ခြင်းဖြစ်သည်။ ထိုသို့ လေကြောင်းမှ အကြိမ်ကြိမ် ဗုံးကြဲတိုက်ခိုက်ခံရမှုကြောင့် မဆာတွီကျေးရွာအတွင်း ထိခိုက်ပျက်စီးမှု အခြေအနေများကို အသေးစိတ် မသိရသေးသော်လည်း ကျေးရွာနေ ပြည်သူများမှာ ဆက်လက်နေထိုင်ရန် မဖြစ်နိုင်တော့ဘဲ ဘေးလွတ်ရာသို့ အလုံးအရင်းဖြင့် ထွက်ပြေးတိမ်းရှောင်နေကြရသည်။ လက်ရှိတွင် မဆာတွီကျေးရွာ အပါအဝင် အနီးဝန်းကျင်ရှိ အင်ဘူး၊ ဆွဲလွဲကျင်း၊ မကွေ့၊ ဆွေလွဲ၊ ပါးအောင်းနှင့် တဲဇင်း ကျေးရွာတို့မှ ဒေသခံ ၁,၀၀၀ ကျော် စစ်ဘေးလွတ်ရာသို့ တိမ်းရှောင်နေကြရပြီး စစ်အုပ်စုတပ်ဘက်မှ လေကြောင်း တိုက်ခိုက်မှုအချို့ပါ ပြုလုပ်လျက်ရှိသည်။ အဆိုပါ တပ်မ ၇၇ စစ်ကြောင်းသည် စက်တင်ဘာလ ၂၄ ရက်က အင်ဘူးကျေးရွာသို့ ရောက်ရှိနေသည့် အင်အား ၁၀၀ ကျော်ပါ စစ်ကြောင်းနှင့် စက်တင်ဘာလ ၂၆ ရက်နေ့တွင် ဆွဲလွဲကျင်းကျေးရွာဘက်သို့ ဝင်ရောက်လာသည့် အင်အား ၄၀၀ ပါ စစ်ကြောင်းတို့ ပူးပေါင်းထားခြင်း ဖြစ်ပြီး လက်ရှိတွင် အင်ဘူး၊ ဆွဲလွဲကျင်းနှင့် မဆာတွီ ကျေးရွာ ထိစပ်နယ်မြေများတွင် ဖြန့်ကျက် နေရာယူထားသည်။ ထိုစစ်ကြောင်းသည် မကင်းမီ ရက်ပိုင်းကလည်း ယောဒေသ ဆောမြို့နယ်၊ တောင်ဘို့ကြီးကျေးရွာအတွင်းသို့ ဝင်ရောက်ကာ လူနေအိမ်များကို မီးရှို့ဖျက်ဆီးခဲ့သဖြင့် ပြည်သူလူနေအိမ် ၁၀ လုံးထက်မနည်း မီးလောင်ကျွမ်း ပျက်စီးခဲ့ကြောင်း ဒေသခံများက ပြောသည်။ ဓာတ်ပုံ - (ပေးပို့ / စက်တင်ဘာလ ၂၆ ရက်က စစ်အုပ်စုတပ်၏ လေကြောင်းမှ ဗုံးကြဲတိုက်ခိုက်မှုကြောင့် မဆာတွီကျေးရွာအတွင်းက အပျက်အစီးများ) #ကန်ပက်လက်

စစ်​ကြောင်းထိုးလာ၍ ကန်ပက်လက်တွင် အရပ်သား ၁,၀၀၀ ကျော် စစ်ဘေးရှောင်နေရ

စစ်​ကြောင်းထိုးလာ၍ ကန်ပက်လက်တွင် အရပ်သား ၁,၀၀၀ ကျော် စစ်ဘေးရှောင်နေရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၃၀ ရက်။ ချင်းပြည်တောင်ပိုင…

  • September 30, 2026
မိုးမိတ်၊ ဗန်းမော်နှင့် မိုးညှင်းရှိ စစ်တပ်စခန်းများကို KIA ပူးပေါင်းတပ်များ တိုက်ခိုက်သိမ်းပိုက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၃၀ ရက်။ ရှမ်းပြည်မြောက်ပိုင်း မိုးမိတ်မြို့အနီးရှိ စစ်အုပ်စုတပ်၏ ဗျူဟာကျအရေးပါသည့် ရွှေမင်းတင်စေတီကုန်း စခန်း အပါအဝင် ကချင်ပြည် မိုးညှင်းမြို့နယ်ရှိ တပ်စခန်းတစ်ခုကို ကချင်လွတ်လပ်ရေးတပ်မတော် (KIA) ပူးပေါင်း တပ်တို့က တိုက်ခိုက်သိမ်းပိုက်လိုက်သည်။ KIA ပူးပေါင်းတပ်များသည် ကချင်ပြည်၊ ဗန်းမော်၊ ရွှေကူနှင့် မိုးညှင်းမြို့နယ်တို့တွင် ထိုးစစ်များ ဆက်တိုက်ဖော် ဆောင်နေစဉ် စက်တင်ဘာလကုန်ပိုင်း၌ ရှမ်းပြည်မြောက်ပိုင်း မိုးမိတ်ဒေသအထိ စစ်ရှိန်မြှင့်တင် တိုက်ခိုက်လာ ခြင်း ဖြစ်သည်။ စက်တင်ဘာလ ၂၈ ရက် နံနက် ၇ နာရီခွဲခန့်တွင် မိုးမိတ်မြို့အနီးရှိ အရေးပါသော ရွှေမင်းတင်စေတီကုန်း စခန်းကို KIA ပူးပေါင်းတပ်က တိုက်ခိုက်သိမ်းပိုက်ခဲ့ပြီး လက်နက်ခဲယမ်းအများအပြား သိမ်းဆည်းရရှိခဲ့ကြောင်း စစ်ရေး သတင်းရင်းမြစ်များက ဆိုသည်။ အဆိုပါ စခန်းသိမ်းတိုက်ပွဲနှင့် ပတ်သက်၍ ကချင်စစ်ရေးသတင်းရင်းမြစ်တစ်ဦးက “မိုးမိတ်က အရေးကြီးတဲ့ ဗျူဟာကျတဲ့ စခန်းကုန်းဖြစ်တဲ့ ရွှေမင်းတင်စေတီကုန်းမှာ စစ်အုပ်စုတပ်တွေ နေရာယူထားတာကို ကျနော်တို့ ဒီမနက်မှာ သိမ်းလိုက်တာပါ။ လက်နက်ခဲယမ်းတွေတော့ အများကြီးရရှိခဲ့ပါတယ်” ဟု ပြောသည်။ အဆိုပါ တိုက်ပွဲဖြစ်ပွားမှုအခြေအနေနှင့် ပတ်သက်၍ မိုးမိတ်ဒေသခံတစ်ဦးကလည်း “မနက်ပိုင်း လက်နက်ကြီး သံတွေ ကြားရပြီးနောက် လက်နက်ငယ်သံတွေနဲ့ တိုက်ပွဲစဖြစ်တာပါ။ ၁၁ နာရီခွဲလောက်ကျတော့ စစ်အုပ်စု တပ်က ရဟတ်ယာဉ်နဲ့ လာရောက်ကင်းထောက် ပစ်ခတ်ခဲ့သလို ညနေစောင်းအထိ တိုက်လေယာဉ်၊ ရဟတ် ယာဉ်၊ ဒရုန်းနဲ့ လက်နက်ကြီးတွေသုံးပြီး ပြင်းပြင်းထန်ထန် ပြန်လည်တုံ့ပြန်ခဲ့တယ်” ဟု ပြောသည်။ မိုးမိတ်မြို့နယ် ညောင်နီကျေးရွာအနီး မိုးမိတ်-မန်တုံ လမ်းပိုင်းတွင် ပြီးခဲ့သည့် ဩဂုတ်လကတည်းက စစ်အုပ်စု တပ် စစ်ကြောင်းထိုးမှုကြောင့် ထိတွေ့တိုက်ပွဲများ ဖြစ်ပွားခဲ့ပြီး လမ်းပိုင်းအား ယာယီပိတ်ပင်ခဲ့ရသည်။ မိုးမိတ်မြို့သည် ယခင်က တအာင်း အမျိုးသားလွတ်မြောက်ရေး တပ်မတော် (TNLA) ထိန်းချုပ်ခဲ့ဖူးပြီး ၂၀၂၅ ခုနှစ်ကုန်ပိုင်းတွင် စစ်အုပ်စုတပ်ထံ ပြန်လည်လွှဲပြောင်းပေးခဲ့သည့် မြို့ဖြစ်သော်လည်း KIA ပူးပေါင်းတပ်များက ဒေသတွင်း စစ်ရေးလှုပ်ရှားမှုများကို ဆက်လက်ဖော်ဆောင်နေခြင်းဖြစ်သည်။ အလားတူ စက်တင်ဘာလ ၂၈ ရက် နံနက်ပိုင်းတွင်လည်း ကချင်ပြည်၊ မိုးညှင်းမြို့နယ်၊ နမ့်မွန်းကျေးရွာအနီးရှိ စစ်အုပ်စုတပ်နှင့် ရှမ်းနီအမျိုးသားများ တပ်မတော် (SNA) ပူးပေါင်းတပ်စခန်းတစ်ခုကို KIA ပူးပေါင်းတပ်က ထပ်မံတိုက်ခိုက်သိမ်းပိုက်ခဲ့သည်။ အဆိုပါစခန်းသည် ယခင်က KIA တပ်စခန်းတစ်ခုဖြစ်ပြီး ပြန်လည်သိမ်းပိုက်နိုင်ခဲ့ခြင်းဖြစ်ကာ SNA ဘက်မှ အထိနာခဲ့သည်ဟု စစ်မြေပြင်နှင့် နီးစပ်သည့် သတင်းရင်းမြစ်များက ဆိုသည်။ ထိုတိုက်ပွဲအခြေအနေနှင့် ပတ်သက်၍ စစ်မြေပြင် သတင်းရင်းမြစ်တစ်ဦးက “SNA ဘက်ကတော့ တော်တော် အထိနာသွားပါတယ်။ စစ်အုပ်စုတပ်ဘက်ကလည်း လေကြောင်းကနေ ဗုံးအများကြီး လာကြဲသွားခဲ့တယ်။ အဲဒီစခန်းမှာ ဘုရားကျောင်းအတွင်း စစ်သင်တန်းဆင်းခဲ့တဲ့ SNA တပ်ဖွဲ့ဝင်တွေ ပါဝင်တိုက်ခိုက်ခဲ့ကြတာ ဖြစ်ပါတယ်” ဟု ပြောသည်။ အဆိုပါ နမ့်မွန်းကျေးရွာရှိ ကချင်နှစ်ခြင်းခရစ်ယာန် ဘုရားကျောင်းဝင်းအတွင်း SNA တပ်က စစ်သင်တန်းဆင်းပွဲ ကျင်းပခဲ့သည့်နေရာ ဖြစ်သည်။ အလားတူ ကချင်ပြည်၊ ဗန်းမော်မြို့နယ် နမ့်ဖားကျေးရွာတွင် တပ်စွဲထားသည့် စစ်အုပ်စုတပ်စခန်းကိုလည်း စက် တင်ဘာလ ၂၆ ရက်တွင် KIA ပူးပေါင်းတပ်များက သိမ်းပိုက်နိုင်ခဲ့ပြီး စက်တင်ဘာလ ၂၇ ရက်တွင် ဗန်းမော်မြို့ ပေါ်၌ တိုက်ပွဲများ ဆက်လက်ပြင်းထန်နေသည်။ KIA ပူးပေါင်းတပ်များသည် ဗန်းမော်မြို့သိမ်းစစ်ဆင်ရေးကို ၂၀၂၄ ခုနှစ် ဒီဇင်ဘာလမှ စတင်ကာ ဖော်ဆောင်ခဲ့ ခြင်းဖြစ်ပြီး စစ်အုပ်စုတပ်၏ သံချပ်ကာတပ်ရင်း၊ တင့်ကားတပ်ရင်း အပါအဝင် တပ်စခန်းအများအပြားကို သိမ်း ပိုက်ထိန်းချုပ်ထားကာ လေကြောင်းနှင့် လက်နက်ကြီး ပစ်ခတ်မှုများအကြား စစ်ရေးအရ အသာစီးရ ယူထား ကြောင်း မြေပြင်သတင်းရင်းမြစ်အချို့က အတည်ပြုပြောသည်။ #KIA #ဗန်းမော် #မိုးမိတ် #မိုးညှင်း

မိုးမိတ်၊ ဗန်းမော်နှင့် မိုးညှင်းရှိ စစ်တပ်စခန်းများကို KIA ပူးပေါင်းတပ်များ တိုက်ခိုက်သိမ်းပိုက်

မိုးမိတ်၊ ဗန်းမော်နှင့် မိုးညှင်းရှိ စစ်တပ်စခန်းများကို KIA ပူးပေါင်းတပ်များ တိုက်ခိုက်သိမ်းပိုက် သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ …

  • September 30, 2026
×Close