သတင်း

ကျောက်တော်တွင် စစ်အုပ်စုက ဗုံးကြဲ၍ အရပ်သား ၃၃ ဦးထက်မနည်း သေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၈ ရက်။ အာရက္ခတပ်တော် (AA) ထိန်းချုပ်ထားသည့် ရခိုင်ပြည်၊ ကျောက်တော်မြို့ပေါ်ရှိ လူစည်ကားရာ အိန္ဒိယဈေးနှင့် ကစ္ဆပနဒီတံတား အနီးဝန်းကျင်တို့ကို စစ်အုပ်စုက ဂျက်တိုက်လေယာဉ်ဖြင့် လေကြောင်းမှ ဗုံးကြဲတိုက်ခိုက်ခဲ့ သဖြင့် အရပ်သားပြည်သူ ၃၃ ဦးထက်မနည်း အစုလိုက်အပြုံလိုက် သေဆုံးကာ ၃၆ ဦး ထိခိုက်ဒဏ်ရာ ရရှိခဲ့သည်။ စက်တင်ဘာလ ၂၈ ရက်၊ မွန်းလွဲ ၁၂ နာရီ ၁၀ မိနစ်နှင့် ၁၂ နာရီ ၁၄ မိနစ်တို့တွင် တိုက်ပွဲဖြစ်ပွားခြင်းမရှိဘဲ စစ်အုပ်စု၏ ဂျက်တိုက်လေယာဉ် ၁ စီးက မြို့ပေါ်ရှိ လူစည်ကားရာ နေရာများကို ပစ်မှတ်ထား၍ ဗုံးကြဲတိုက် ခိုက်ခဲ့ခြင်း ဖြစ်သည်ဟု အာရက္ခတပ်တော် (AA) နှင့် ဒေသခံ သတင်းရင်းမြစ်များက ပြောသည်။ အခင်းဖြစ်ပွားရာ မြေပြင်တွင် ကူညီပေးနေသည့် ကျောက်တော်ဒေသခံ သတင်းရင်းမြစ်တစ်ဦးက “ဈေးထဲကို လာကြဲတာပါ။ စုထားတဲ့ အလောင်းတင် ၃၂ လောင်းလောက် ရှိပြီ။ မီးလောင်နေတဲ့ နေရာတွေမှာရော၊ လမ်းမ ပေါ်မှာပါ ထပ်တွေ့နေရတုန်းဆိုတော့ သေဆုံးသူ အရေအတွက်က ၄၀ နီးပါးအထိ တိုးလာနိုင်တယ်။ ဈေးသည် တွေနဲ့ လမ်းသွားလမ်းလာတွေ တော်တော်များများ ပါသွားတာ” ဟု ပြောသည်။ လေကြောင်းမှ ဗုံးကြဲတိုက်ခိုက်ခံရမှုကြောင့် ကစ္ဆပနဒီတံတားပေါ်တွင် သွားလာနေသည့် ပြည်သူများ ထိခိုက် သေဆုံးခဲ့သည့်အပြင် တံတားအဆောက်အအုံလည်း ထိခိုက်ပျက်စီးခဲ့သည်။ ထို့ပြင် အိန္ဒိယဈေးကြီးအတွင်း ရပ်နားထားသည့် ပြည်သူများ၏ သုံးဘီးတုတ်တုတ်များ၊ ဆိုင်ကယ်များ၊ မော်တော်ယာဉ်များနှင့် ထော်လာဂျီများလည်း မီးလောင်ပျက်စီးခဲ့သည်။ ယခုဖြစ်စဉ်သည် မြောက်ဦး ပြည်သူ့ဆေးရုံကြီး လေကြောင်းတိုက်ခိုက်ခံရမှုဖြစ်စဉ် နောက်ပိုင်း ရခိုင်ဒေသ အတွင်း အရပ်သားပြည်သူများ အစုလိုက်အပြုံလိုက် သေဆုံးမှု အများဆုံးနှင့် အဆိုးရွားဆုံး ဖြစ်စဉ်တစ်ခု ဖြစ်လာခဲ့သည်။ အလားတူ ယနေ့ မွန်းလွဲ ၁၂ နာရီ ၃၅ မိနစ်ခန့်တွင်လည်း သံတွဲမြို့နယ်၊ ငပလီမြို့ရှိ ဂျိတ္တောနှင့် လင်းသာကျေးရွာ ဝန်းကျင်သို့ စစ်အုပ်စု၏ ဂျက်တိုက်လေယာဉ် ၁ စီးက ဗုံး ၂ လုံး လာရောက်ကြဲချတိုက်ခိုက်ခဲ့သည်။ သံတွဲဒေသခံတစ်ဦးက “ပထမတစ်လုံးက ၁၂ နာရီခွဲလောက်မှာ ပစ်သံကြားရတယ်။ နောက်မိနစ်ပိုင်းမှာပဲ နောက် တစ်လုံး ထပ်ကြဲတာ။ ဂျိတ္တောနဲ့ လင်းသာဘက်မှာ ဗုံးကျတာလို့ သိရပြီး ထိခိုက်ပျက်စီးမှု အခြေအနေ ကိုတော့ အသေးစိတ် စုံစမ်းနေတုန်းပဲ” ဟု ပြောသည်။ အာရက္ခတပ်တော် (AA) ၏ ထုတ်ပြန်ချက်အရ ပြီးခဲ့သည့် စက်တင်ဘာ ၁၇ ရက်မှ ၂၇ ရက်အထိ ၁၁ ရက် အတွင်း စစ်အုပ်စုတပ်က ရခိုင်ဒေသအတွင်း လေကြောင်းနှင့် လက်နက်ကြီးများဖြင့် တိုက်ခိုက်ခဲ့မှုကြောင့် အရပ်သားပြည်သူ ၂၂ ဦး သေဆုံး၊ ဒဏ်ရာရရှိခဲ့ပြီး လူနေအိမ် ၅၅ လုံး ပျက်စီးခဲ့သည်။ ယခု ကျောက်တော်နှင့် ငပလီ လေကြောင်းတိုက်ခိုက်ခံရမှုများနှင့် ပတ်သက်သည့် နောက်ဆက်တွဲ ထိခိုက် သေဆုံးမှု အသေးစိတ် အချက်အလက်များကို ဆက်လက် ထုတ်ပြန်ပေးသွားမည်ဟု AA ၏ သတင်းနှင့် ပြန်ကြားရေးဌာနက အသိပေးထားသည်။ #ကျောက်တော်

ကျောက်တော်တွင် စစ်အုပ်စုက ဗုံးကြဲ၍ အရပ်သား ၃၃ ဦးထက်မနည်း သေဆုံး

ကျောက်တော်တွင် စစ်အုပ်စုက ဗုံးကြဲ၍ အရပ်သား ၃၃ ဦးထက်မနည်း သေဆုံး သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၂၈ ရက်။ အာရက္ခတပ်တော် (AA) ထိန်…

  • September 28, 2026
နာမကျန်းအကျဉ်းသား ၈၀ ခန့် ပြင်ပဆေးရုံကုသခွင့် ပိတ်ပင်ခံရ သတင်းနှင့်မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၈ ရက်။ စစ်ကိုင်းတိုင်း၊ ကလေးအကျဉ်းထောင်တွင် နိုင်ငံရေးအကျဉ်းသား ၅၀ အပါအဝင် အရေးပေါ် ပြင်ပဆေးရုံကုသမှု လိုအပ်နေသည့် အကျဉ်းသား ၈၀ ခန့်သည် ဆေးကုသခွင့် ငြင်းပယ်ခံထားရပြီး အသက်အန္တရာယ်စိုးရိမ်ရသည့် အခြေအနေနှင့် ရင်ဆိုင်နေကြရသည်ဟု မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် (PPNM) က ထုတ်ပြန်သည်။ PPNM ၏ ထုတ်ပြန်ချက်အရ ပြီးခဲ့သည့် ဇူလိုင်လ အတွင်း ကလေးမြို့ပြည်သူ့ဆေးရုံကြီးမှ အထူးကုဆရာဝန်များ ထောင်အတွင်းလာရောက်စစ်ဆေးစဉ် အဆိုပါ အကျဉ်းသား ၈၀ ခန့်မှာ ပြင်ပဆေးရုံသို့တက်ရောက်၍ အရေးပေါ်ကုသမှုခံယူရန် လိုအပ်ကြောင်း အတည်ပြုခဲ့ ခြင်း ဖြစ်သည်။ သို့သော်လည်း လက်ရှိအချိန်အထိ ၉ ဦးသာ ပြင်ပဆေးရုံတက်ခွင့်ရရှိခဲ့ပြီး ၎င်းတို့အနက် နိုင်ငံရေးအကျဉ်းသား ၄ ဦးသာ ပါဝင်သည်ဟု ဆိုသည်။ PPNM ပြောရေးဆိုခွင့်ရှိသူ မရောင်နီလင်းက “ဒီကလေးအကျဉ်းထောင်မှာက လက်ရှိအချိန်အထိ အရေးပေါ် ပေါ့နော် ကျန်းမာရေးကုသမှု ပြီးမှ ဆေးရုံကို ပို့ဖို့အတွက် လိုအပ်နေတဲ့သူတွေက အကျဉ်းသား ၈၀ လောက်ကို ရှိနေပါသေးတယ်။ ဒါကလည်း ပြည်သူ့ဆေးရုံကြီးကပေါ့နော။ အထူးကုဆရာဝန်တွေ ကိုယ်တိုင်ပေါ့နော်။ အတည်ပြုသွားခဲ့တာမျိုး ဖြစ်ပါတယ်။ ဒါကြောင့်မို့လို့ ဒီအထဲထဲမှာရှိကြတဲ့ ကလေးအကျဉ်းထောင်တွေမှာ ရှိကြတဲ့ အကျဉ်းသားတွေ အပါအဝင် ဒီနိုင်ငံရေးအကျဉ်းသားတွေရောပေါ့နော်။ ဆိုးရွားတဲ့ အသက်အန္တရာယ် ကို ရင်ဆိုင်နေရတယ်လို့ ပြောချင်ပါတယ်” ဟု ပြောသည်။ နာမကျန်းအကျဉ်းသားများ ပြင်ပဆေးရုံတက်ရောက်ခွင့်ရရှိရန် ထောင်ပိုင်၊ ဒု-ထောင်ပိုင်နှင့် ထောင်ဆေးရုံအုပ် စသည့် အဆင့်ဆင့်သော အာဏာပိုင်များကို ငွေကျပ် ၁၀ သိန်းမှ ၁၅ သိန်းအထိ လာဘ်ငွေပေးဆောင်နေရ ကြောင်း PPNM က ဆိုသည်။ ငွေကြေးတတ်နိုင်သည့် မူးယစ်ဆေးဝါးမှုဖြင့် ကျခံနေရသူအချို့မှာ ရောဂါမရှိဘဲ လာဘ်ငွေပေး၍ ပြင်ပဆေးရုံ တွင် သွားရောက်နေထိုင်ခွင့်ရရှိနေသော်လည်း ငွေကြေးမတတ်နိုင်သည့် နိုင်ငံရေးအကျဉ်းသားများမှာမူ ဆေး ကုသခွင့်မရဘဲ နှစ်နှင့်ချီ၍ စောင့်ဆိုင်းနေကြရသည်။ မရောင်နီလင်းက ဆက်လက်၍ “ဒီလိုမျိုး ဆေးဝါးစောင့်ရှောက်မှု မလုံလောက်တာဟာ ဆေးရုံ ထောင်ဆေးရုံ ကနေမှတစ်ဆင့် ပြင်ပဆေးရုံကို ပေါ့နော်။ ကုသခွင့်မပေးတာတွေက ဒီလိုမျိုးတွေကြောင့် သေဆုံးတယ်ဆိုလို့ ရှိရင်တော့ အဆင့်ဆင့်အတိုင်းပေါ့နော် တာဝန်ယူ တာဝန်ခံရမှာ ဖြစ်ပါတယ်။ ထောင်ဝန်ထမ်းတွေကမှ စလို့ သက်ဆိုင်ရာ ညွှန်မှူးတွေအထိ ဒီလိုကျဆုံးမှုတွေမှာ တာဝန်အပြည့်ရှိပါတယ်။ ဒီလိုမျိုးလေ ကျန်းမာရေးအရ ပြင်ပဆေးရုံကို သွားချင်တယ်။ သို့မဟုတ် ထောင်ဆေးရုံတက်ချင်တယ်ဆိုလို့ရှိရင် ဘယ်လောက်ကနေ ဘယ်လောက်ပေးရမယ်ဆိုတဲ့ သတ်မှတ်ချက်တွေ ရှိနေပါတယ်” ဟု ပြောသည်။ ကလေးထောင်အတွင်း ဆေးဝါးနှင့် ကုသရေးအထောက်အကူပြုပစ္စည်းများ ကင်းမဲ့နေပြီး အကျဉ်းသား ၁,၀၀၀ ခန့်အတွက် တစ်လလျှင် ဆေးဝါးဘတ်ဂျက် ကျပ် ၁၀ သိန်းခန့်သာ ခွဲဝေထားသဖြင့် ပါရာစီတမောကဲ့သို့ အခြေခံဆေးဝါးများသာရှိပြီး အောက်ဆီဂျင်နှင့် အခြားအထောက်အကူပြုပစ္စည်းများ လုံးဝမရှိသလောက် နည်းပါးနေသည်။ နှလုံးရောဂါ၊ သွေးအန်ရောဂါ၊ သွေးတိုးနှင့် ဆီးချိုရောဂါ ခံစားနေရသူများ၏ ဆေးကုသစရိတ်နှင့် ဆေးဝါး ဝယ်ယူစရိတ်များကို မိသားစုများကသာ စိုက်ထုတ်ပေးနေရသည်။ ထို့ပြင် နယ်ဝေးမှ ပြောင်းရွှေ့လာရသည့် နိုင်ငံရေးအကျဉ်းသားအချို့မှာ မိသားစုနှင့် အဆက်အသွယ်ပြတ် တောက် နေသဖြင့် ပြင်ပဆေးရုံတက်ရောက်ခွင့်ရရှိလျှင်ပင် စားသောက်စရိတ်နှင့် ဆေးဝါးစရိတ်များအတွက် ပိုမိုကြီးမားသည့် အခက်အခဲများနှင့် ရင်ဆိုင်နေရကြောင်း PPNM က ဆိုသည်။ #PPNM #ကလေးအကျဉ်းထောင်

နာမကျန်းအကျဉ်းသား ၈၀ ခန့် ပြင်ပဆေးရုံကုသခွင့် ပိတ်ပင်ခံရ

နာမကျန်းအကျဉ်းသား ၈၀ ခန့် ပြင်ပဆေးရုံကုသခွင့် ပိတ်ပင်ခံရ သတင်းနှင့်မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၂၈ ရက်။ စစ်ကိုင်းတိုင်း၊ ကလေးအကျဉ်းထောင…

  • September 28, 2026
အင်းလေးတွင် မိုးသက်လေပြင်းကြောင့် အိမ်ခြေ ၃၀ ကျော် ပျက်စီး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၈ ရက်။ ရှမ်းပြည်တောင်ပိုင်း၊ ညောင်ရွှေမြို့နယ် အင်းလေးဒေသတွင် မိုးသက်လေပြင်း တိုက်ခိုက်မှုကြောင့် အိမ်ခြေ ၃၀ ကျော် ထိခိုက်ပျက်စီးခဲ့ကြောင်း ဒေသခံများက ပြောသည်။ စက်တင်ဘာလ ၂၇ ရက်နေ့၊ ညနေ ၃ နာရီခန့်တွင် အင်းလေးဒေသ၊ ငါးဖယ်ချောင်းကျေးရွာအုပ်စု၊ ပျားပင်တောင် ကျေးရွာသို့ မိုးသက်လေပြင်း ရုတ်တရက် ကျရောက်ခဲ့ခြင်းဖြစ်ပြီး သစ်နှင့် ဝါးတို့ဖြင့် ဆောက်လုပ်ထားသည့် သွပ်မိုး၊ သက်ကယ်မိုး လူနေအိမ်များ အမိုး၊ အကာနှင့် အိမ်တွင်းပစ္စည်းများ လွင့်စင်ပျက်စီးခဲ့ရသည်။ ဒေသခံ အမျိုးသားတစ်ဦးက “လေက တော်တော်ပြင်းတယ်။ တအိမ်လုံး ဟိုဖက်ဒီဖက် ယိမ်းထိုးနေတာ ကျနော် ဆို ပြိုမလားတောင် ထင်နေတာ။ နောက်အကုန်ငြိမ်သွားတော့မှ တစ်ရွာလုံး ဖုန်းဆက်လိုဆက်၊ စာပို့ကြနဲ့ နည်း နည်း စိတ်အေးသွားရတာ။ ပြိုတာတော့ ရှိတယ်။ ဝါးအိမ်တွေပေါ့” ဟု ပြောသည်။ ဖြစ်စဉ်အတွင်း လူထိခိုက်ဒဏ်ရာရရှိမှု မရှိသော်လည်း စက်တင်ဘာလ ၂၈ ရက် နံနက်ပိုင်းတွင် စစ်အုပ်စု၏ လက်အောက်ခံ ဌာနဆိုင်ရာ ဝန်ထမ်းများက ပျက်စီးဆုံးရှုံးမှု စာရင်းများ လာရောက်ကောက်ယူသွားခဲ့ပြီး လတ်တလောအတွက် ကူညီထောက်ပံ့မှုများ အရေးပေါ် လိုအပ်နေသည်။ ဒေသတွင်း ကူညီကယ်ဆယ်ရေး ဆောင်ရွက်ပေးနေသူတစ်ဦးက “အထက်ကတော့ ကြာဦးမှာပါ။ ကျနော်တို့ ငလျင်တုန်းက အိမ်တွေတောင် ရွာတိုင်း ဆောက်လို့ မပြီးသေးဘူး။ အခုလောလောဆယ်ကတော့ ဝါးအိမ်နဲ့ နေတဲ့လူပေါ့နော်။ ယာယီသဘော လိုတာပေါ့။ ရွာကဝိုင်းဝန်းပြီးတော့ ဘယ်လိုစီစဉ်ကြမလဲတော့ မသိဘူး။ အလှူရှင်တွေတော့ လိုတာပေါ့။ မနေ့ကမှဖြစ်တာဆိုတော့ သတင်းလည်း မတက်သေးတော့လေ” ဟု ပြော သည်။ ငါးဖယ်ချောင်းကျေးရွာအုပ်စုသည် ၂၀၂၅ ခုနှစ်ကလည်း ငလျင်ဒဏ်သင့်ခဲ့သည့် ဒေသဖြစ်ပြီး ထိုစဉ်က ပျက်စီး သွားသည့် လူနေအိမ်များကိုပင် အကုန်အစင် ပြန်လည်မဆောက်လုပ်နိုင်သေးမီ ယခုကဲ့သို့ လေဘေးဒဏ် ထပ်မံ ကြုံတွေ့ရခြင်း ဖြစ်သည်။ အင်းလေးဒေသသည် စစ်ဘေးဒဏ် မကြုံတွေ့ရသော်လည်း ၂၀၂၄ ခုနှစ်တွင် ရေဘေး၊ ၂၀၂၅ ခုနှစ်တွင် ငလျင် ဘေးနှင့် ယခု ၂၀၂၆ ခုနှစ်တွင် သဘာဝဘေးအန္တရာယ်များ ဆက်တိုက် ကြုံတွေ့နေရသဖြင့် ဒေသခံများအနေဖြင့် စိုးရိမ်ပူပန်လျက်ရှိသည်။ အလားတူ အခြားကျေးရွာများတွင်လည်း မိုးသက်လေပြင်းကြောင့် ပျက်စီးမှုများ ရှိနေပြီး ထိခိုက်မှု အခြေအနေ အသေးစိတ်ကို သတင်းနှင့် မီဒီယာ ကွန်ရက် (NMG) က ဆက်လက် စုံစမ်းလျက်ရှိသည်။ #အင်းလေး

အင်းလေးတွင် မိုးသက်လေပြင်းကြောင့် အိမ်ခြေ ၃၀ ကျော် ပျက်စီး

အင်းလေးတွင် မိုးသက်လေပြင်းကြောင့် အိမ်ခြေ ၃၀ ကျော် ပျက်စီး သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၂၈ ရက်။ ရှမ်းပြည်တောင်ပိုင်း၊ ညောင်ရ…

  • September 28, 2026
ပွင့်လင်းကာလတွင် တိုက်ပွဲများ ပိုပြင်းထန်လာနိုင်ကြောင်း AA သတိပေး သတင်းနှင့် မီဒီယာ ကွန်ရက် ၂၀၂၆ ခုနှစ်၊ စက်တင်ဘာလ ၂၈ ရက်။ ရှေ့လာမည့် ပွင့်လင်းကာလ မိုးအကုန်ဆောင်းအစတွင် စစ်အုပ်စုတပ်က အင်အားသုံး၍ ကြည်း၊ ရေ၊ လေ ထိုးစစ်ကြီးများ ပြုလုပ်လာနိုင်သဖြင့် ရခိုင်ဒေသနှင့် နယ်စပ်စစ်မျက်နှာပြင်များ၌ တိုက်ပွဲများ ပိုမိုပြင်းထန် လာနိုင်ကြောင်း အာရက္ခတပ်တော် (AA) ဒုစစ်ဦးစီးချုပ် ဒေါက်တာညိုထွန်းအောင်က သတိပေး ပြောဆိုလိုက်သည်။ ရက္ခိုင်အမျိုးသားအဖွဲ့ချုပ် (ULA/AA) က ပထမဦးဆုံးအကြိမ် ထုတ်ဝေသည့် ပါတီစာဆောင်၏ အယ်ဒီတာ့ အာဘော်မှတစ်ဆင့် စက်တင်ဘာလ ၂၇ ရက်တွင် ဒေါက်တာညိုထွန်းအောင်က လက်ရှိစစ်ရေး အခြေအနေများ ကို အသိပေးပြောဆိုလိုက်ခြင်း ဖြစ်သည်။ စစ်တွေနှင့် ကျောက်ဖြူ စစ်မျက်နှာပြင်များအပြင် နယ်စပ်ဒေသများဖြစ်သည့် အာရက္ခ-မကွေး၊ အာရက္ခ-ပဲခူး၊ အာရက္ခ-ဧရာဝတီတိုင်း အစပ်များနှင့် ချင်းပြည်နယ်-ပလက်ဝနယ်စပ်၊ အာရက္ခကမ်းရိုးတန်းတစ်လျှောက်တို့တွင် စစ်အုပ်စုတပ်က အင်အားဖြည့်တင်းလျက်ရှိသည်ဟု ဆိုသည်။ ဒေါက်တာညိုထွန်းအောင်က “စစ်တွေ၊ ကျောက်ဖြူ စစ်မျက်နှာပြင်၊ အာရက္ခ-မကွေးအစပ်၊ အာရက္ခ-ပဲခူး အစပ်၊ အာရက္ခ-ဧရာဝတီတိုင်းအစပ်တို့ အပြင် ချင်းပြည်-ပလက်ဝ-အာရက္ခအစပ်နဲ့ အာရက္ခကမ်းရိုးတန်းဖက် ကပါ လက်ရှိအသုံးပြုနေတဲ့ စစ်အင်အားထက် နှစ်ဆ၊ သုံးဆတိုးပြီး ကြည်း၊ ရေ၊ လေ ထိုးစစ်ကြီးကို တပြိုင် နက်တည်းလုပ်လာနေလို့ စစ်ရိပ်စစ်သန်းတွေကို တွေ့နေရပြီး မိုးအကုန် ဆောင်းအစကာလ တိုက်ပွဲတွေပိုပြီး ပြင်းထန်လာနိုင်တဲ့ အနေအထားကိုလည်း တွေ့နေရတယ်” ဟု ပြောသည်။ ထို့ပြင် ရခိုင်ဒေသအတွင်း တိုက်ပွဲများ မပြီးဆုံးသေးဘဲ တိုက်ပွဲများ ဆက်လက်တိုက်ခိုက်နေရသည့် နယ်မြေ ရှင်းလင်းရေးနှင့် စစ်ရေးတာဝန်များ ရှိနေသကဲ့သို့ တစ်ဖက်တွင်လည်း အာရက္ခတိုင်းပြည် တည်ဆောက်ရေး လုပ်ငန်းများကို အာရက္ခပြည်သူ့အစိုးရအနေဖြင့် တစ်ပြိုင်နက်တည်း အကောင်အထည်ဖော် ဆောင်ရွက်နေ ကြောင်းလည်း ထည့်သွင်းပြောဆိုထားသည်။ ဒေသတွင်းတွင် တိုက်ပွဲများနေ့စဉ်ဖြစ်ပွားနေပြီး စစ်ရေးအခြေအနေ ပြင်းထန်နေသော်လည်း ဒေသဖွံ့ဖြိုးရေးနှင့် အုပ်ချုပ်ရေးယန္တရားဆိုင်ရာ ဌာနများအား ဖွဲ့စည်းပုံနှင့်အညီ တိုးချဲ့ပြင်ဆင်ခြင်းများကို ဆောင်ရွက်လျက်ရှိ ကြောင်း ဆိုသည်။ အာရက္ခပြည်သူတစ်ရပ်လုံး မျှော်လင့်နေသည့် အမျိုးသားအောင်ပွဲရက်မြတ်သည် လက်တစ်ကမ်းအလိုသို့ ရောက်ရှိနေပြီဖြစ်ပြီး တော်လှန်ရေး၏ သဘောသဘာဝအတိုင်း ခက်ခဲကြမ်းတမ်းသော ကာလတစ်ခုကို မလွဲ မသွေ ရင်ဆိုင်ဖြတ်သန်းနေရကြောင်းလည်း ဒေါက်တာညိုထွန်းအောင်က ဆိုသည်။ လက်ရှိတွင် ရခိုင်ပြည်အတွင်းရှိ စစ်တွေနှင့် ကျောက်ဖြူမြို့နယ်များ အပါအဝင် မကွေး၊ ပဲခူး၊ ဧရာဝတီတိုင်း နယ်စပ်အစပ်များနှင့် ချင်းပြည် ပလက်ဝဒေသတို့တွင် စစ်အုပ်စုတပ်နှင့် အာရက္ခတပ်တော် (AA) တို့အကြား တိုက်ပွဲများ ဆက်လက်ပြင်းထန်နေပြီး စစ်အုပ်စုတပ်က လေကြောင်းမှ ဆက်တိုက် ဗုံးကြဲတိုက်ခိုက်မှုများ ပြုလုပ်လျက်ရှိသည်။ #AA #ရခိုင်တိုက်ပွဲ

ပွင့်လင်းကာလတွင် တိုက်ပွဲများ ပိုပြင်းထန်လာနိုင်ကြောင်း AA သတိပေး

ပွင့်လင်းကာလတွင် တိုက်ပွဲများ ပိုပြင်းထန်လာနိုင်ကြောင်း AA သတိပေး သတင်းနှင့် မီဒီယာ ကွန်ရက်၂၀၂၆ ခုနှစ်၊ စက်တင်ဘာလ ၂၈ ရက်။ ရှေ့လာမည့် ပွင့်လင်းကာ…

  • September 28, 2026
ရခိုင် မင်းပြားကို စစ်အုပ်စု လေကြောင်းမှ ဗုံးကြဲ၊ ပြည်သူ ၈ ဦး ဒဏ်ရာရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၈ ရက်။ ရခိုင်ပြည်၊ အဉ္ဇနပူရ (မင်းပြား) မြို့နယ်ရှိ ကျေးရွာတစ်ရွာကို စက်တင်ဘာလ ၂၈ ရက် နံနက်ပိုင်းတွင် စစ်အုပ်စုတပ်က ဗုံးကြဲတိုက်ခိုက်ခဲ့သဖြင့် ကလေးငယ်တစ်ဦး အပါအဝင် ဒေသခံ ၈ ဦး ထိခိုက်ဒဏ်ရာရ ရှိခဲ့သည်။ စက်တင်ဘာလ ၂၈ ရက် နံနက် ၇ နာရီခန့်တွင် စစ်အုပ်စု၏ မကွေးလေတပ်မှ Y-12 စစ်ထောက်ပို့လေယာဉ်ဖြင့် စွန်ရဲရွာအတွင်းသို့ ဒရော့ဗုံး (Drop Bomb) ၃ လုံး ကြဲချခဲ့ခြင်းဖြစ်သည်။ အဆိုပါ ဗုံးကြဲတိုက်ခိုက်မှုကြောင့် အသက် ၁၃ နှစ်မှ ၇၀ နှစ်အရွယ်အတွင်းရှိ ဒေသခံအမျိုးသား၊ အမျိုးသမီး ၈ ဦး ထိခိုက်ဒဏ်ရာရရှိခဲ့ပြီး၊ ထိုအထဲမှ အမျိုးသမီးတစ်ဦးမှာ လည်ပင်းတွင် ဗုံးစထိမှန်ကာ အသက် ၁၆ နှစ်အရွယ် လူငယ်တစ်ဦးမှာလည်း ခြေသလုံးတွင် ပြင်းထန်ဒဏ်ရာများ ရရှိခဲ့ကြသည်။ ရခိုင်မြောက်ပိုင်း ဒေသခံအမျိုးသားတစ်ဦးက “စက်တင်ဘာ ၂၇ ရက်နေ့ကလည်း မင်းပြားကို ဗုံးကြဲတယ်။ အခု ၂၈ ရက်နေ့ မနက်ပိုင်းလည်း ကြဲတယ်။ လက်ရှိကတော့ ဒဏ်ရာရရှိသွားသူတွေကို ဆေးကုသဖို့ ပို့ထားတယ်။ လေကြောင်းအန္တရာယ်က ကျွန်တော်တို့ဆီမှာ ကြီးမားလာပါတယ်။ တပ်တော်ရဲ့ လေကြောင်းအန္တရာယ် အသိပေးချက်တွေ လိုအပ်သလို ပြည်သူကလည်း လိုက်နာဖို့ လိုပါတယ်” ဟု ပြောသည်။ စက်တင်ဘာလ ၁၇ ရက်မှ ၂၇ ရက်အထိ ၁၀ ရက်အတွင်း စစ်အုပ်စုတပ်သည် အမ်း၊ မင်းပြား၊ ဂွ၊ ကျောက်တော်၊ ပုဏ္ဏားကျွန်း၊ ပေါက်တော၊ ရသေ့တောင်၊ သံတွဲနှင့် မြောက်ဦး စသည့် မြို့နယ် ၉ ခုကို လေကြောင်းမှ ရက်ဆက် ဗုံးကြဲတိုက်ခိုက်ခဲ့ရာ အရပ်သား ၆ ဦး သေဆုံးပြီး ၁၆ ဦး ဒဏ်ရာရရှိခဲ့ကြောင်း ဒေသတွင်း သတင်းအရင်း အမြစ်များနှင့် အာရက္ခတပ်တော် (AA) က ပြောဆို ထုတ်ပြန်သည်။ တောင်ကုတ်ဒေသခံ ပရဟိတသမား အမျိုးသားတစ်ဦးက “သံတွဲ၊ ဂွမြို့တွေကို စစ်တပ်က ပြန်ယူဖို့ လုပ်နေတာ၊ စစ်ကြောင်းတွေ ဧရာဝတီတိုင်း နယ်စပ်တစ်လျှောက် ထိုးနေတာ တိုက်ပွဲတွေ ဆက်တိုက်ဖြစ်နေတယ်။ မြေပြင် က မရတော့ လေကြောင်း၊ ရေကြောင်းတွေကပါ ပြည်သူကို ဗုံးကြဲတာတွေ လုပ်တယ်။ အဲလိုပဲ ရခိုင်မြောက် ပိုင်း ကျောက်တော်၊ ပုဏ္ဏားကျွန်း၊ ရသေ့တောင် အဲဒီနေရာတွေကိုလည်း ဆက်တိုက်ကြဲနေတာ။ ကျနော်တို့ ပရဟိတသမားတွေ ချိတ်ဆက်ဆောင်ရွက်တာတွေ ရှိသလို တပ်တော်ကလည်း ဗုံးခိုကျင်းတွေမှာနေဖို့ သတိပေး တာတွေ လုပ်နေပါတယ်။ ဆေးဝါးကုသမှုပိုင်းကတော့ လိုအပ်ချက်တွေ ရှိနေပါတယ်။ ဆေးရုံ၊ ဆေးခန်းတွေ ကိုလည်း ဗုံးကြဲတော့ ကုသရေးတွေ ခက်ခဲပါတယ်” ဟု ပြောသည်။ စစ်အုပ်စုတပ်သည် မြေပြင်တွင် စစ်ရေးအရ အရှုံးနှင့် ရင်ဆိုင်နေရသဖြင့် အရပ်သားများ နေထိုင်ရာ ကျေးရွာ များ၊ စာသင်ကျောင်း၊ ဘာသာရေး အဆောက်အအုံနှင့် ဆေးရုံများပါမကျန် လေကြောင်းမှ နေ့ရောညပါ ဗုံးကြဲ တိုက်ခိုက်နေကြောင်း စက်တင်ဘာ ၂၇ ရက်စွဲဖြင့် AA က ထုတ်ပြန်ထားသည်။ စစ်အုပ်စု၏ လေကြောင်းနှင့် လက်နက်ကြီး အန္တရာယ်များမှ ကင်းဝေးစေရန်အတွက် ဒေသခံပြည်သူများ အနေဖြင့် လေကြောင်းသတိပေးချက်များကို အထူးဂရုစိုက်ရန်၊ လူစုလူဝေးပြုလုပ်ခြင်းမှ ရှောင်ကြဉ်ရန်နှင့် မိသားစုအလိုက် ဗုံးခိုကျင်းများ စနစ်တကျ တူးဖော်နေထိုင်ကြရန် AA က အသိပေးနှိုးဆော်ထားသည်။ လက်ရှိတွင် လေကြောင်းတိုက်ခိုက်မှုကြောင့် ထိခိုက်ဒဏ်ရာရရှိခဲ့သူများကို ဒေသတွင်း ပရဟိတအဖွဲ့များနှင့် ဆေးဝါးကုသရေးအဖွဲ့များက ကူညီစောင့်ရှောက်ပေးလျက်ရှိသော်လည်း စစ်အုပ်စု၏ လမ်းပန်းဆက်သွယ်ရေး ပိတ်ဆို့ထားမှုနှင့် ဆေးရုံ၊ ဆေးခန်းများပါမကျန် ပစ်မှတ်ထား ဗုံးကြဲခံနေရမှုတို့ကြောင့် အရေးပေါ်ဆေးဝါးနှင့် ကူညီကယ်ဆယ်ရေး ပစ္စည်းများ ပြတ်လပ်မှုနှင့် ရင်ဆိုင်နေကြရသည်။ #မင်းပြား

ရခိုင် မင်းပြားကို စစ်အုပ်စု လေကြောင်းမှ ဗုံးကြဲ၊ ပြည်သူ ၈ ဦး ဒဏ်ရာရ

ရခိုင် မင်းပြားကို စစ်အုပ်စု လေကြောင်းမှ ဗုံးကြဲ၊ ပြည်သူ ၈ ဦး ဒဏ်ရာရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၂၈ ရက်။ ရခိုင်ပြည်၊ အဉ္ဇနပ…

  • September 28, 2026
NUG အထူးတိုင်းစစ်ဌာနချုပ် လေကြောင်းမှ ဗုံးကြဲခံရပြီး CDM အရာရှိနှင့် ရဲဘော်အချို့ ကျဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၅ ရက်။ ပဲခူးတိုင်း ရွှေကျင်မြို့နယ်နှင့် မွန်ပြည်၊ ကျိုက်ထိုမြို့နယ်အစပ်ရှိ အမျိုးသားညီညွတ်ရေးအစိုးရ (NUG) ကာကွယ် ရေးဝန်ကြီးဌာန၊ အထူးတိုင်းစစ်ဌာနချုပ် အခြေစိုက်နေရာကို စစ်အုပ်စုတပ်က လေကြောင်းမှ ဗုံးကြဲတိုက်ခိုက်ခဲ့ သဖြင့် CDM လေတပ်အရာရှိတစ်ဦးနှင့် ပြည်သူ့ကာကွယ်ရေးတပ်ဖွဲ့ (PDF) ရဲဘော်များ ကျဆုံးကာ ကွပ်ကဲရေး မှူး အပါအဝင် ထိပ်ပိုင်းခေါင်းဆောင်အချို့ ဒဏ်ရာရရှိခဲ့ကြသည်။ စက်တင်ဘာလ ၂၄ ရက်နေ့၊ နံနက် ၁၁ နာရီခန့်တွင် စစ်ဘက်ဆိုင်ရာ သင်တန်းတစ်ခု ပြုလုပ်နေသည့် NUG အထူးတိုင်းစစ်ဌာန၏ စခန်းနေရာကို စစ်အုပ်စုတပ်က တိုက်လေယာဉ်များအပြင် Y-12 ထောက်ပံ့ရေး လေယာဉ်များပါ အသုံးပြု၍ ဗုံး ၆ လုံးထက်မနည်း ကြဲချတိုက်ခိုက်ခဲ့ခြင်းဖြစ်သည်။ မြေပြင် စစ်ရေးသတင်းရင်းမြစ်တစ်ဦးက “လေယာဉ်နဲ့ ဗုံး ကြဲပြီးတာနဲ့ သိမ်ဇရပ် အမှတ် (၃၁၀) အမြောက် တပ်ရင်းကပါ လက်နက်ကြီးတွေနဲ့ ဆက်တိုက် ပစ်ခတ်ခဲ့တာပါ။ လေကြောင်းနဲ့ လက်နက်ကြီး တိုက်ခိုက်မှုတွေ ကြောင့် CDM လေတပ်တပ်ကြပ်ကြီး နေဝင်းအောင်အပါအဝင် ရဲဘော်တွေ ကျဆုံးခဲ့ရတာပါ။ ကျနော်တို့ရတဲ့ အချက်အလက်ကတော့ ၄ ယောက်လို့တော့ ရထားတယ်။ အသေးစိတ်ဆက်မသိရသေးဘူး” ဟု ပြောသည်။ လေကြောင်းတိုက်ခိုက်မှုကြောင့် အကြမ်းမဖက် အာဏာဖီဆန်ရေးလှုပ်ရှားမှု (CDM) တွင် ပါဝင်လာသည့် လေတပ်တပ်ကြပ်ကြီး နေဝင်းအောင်နှင့် PDF ရဲဘော်အနည်းဆုံး ၄ ဦးခန့် ကျဆုံးခဲ့ပြီး အထူးတိုင်းစစ်ဌာန ကွပ်ကဲရေးမှူး ကိုအောင်စံရှားအပါအဝင် ၄ ဦးခန့် ဒဏ်ရာရရှိခဲ့သည်။ သို့သော် မြေပြင်စစ်ကြောင်းများ အနီးဝန်းကျင်သို့ ထိုးစစ်ဆင်လာနေသဖြင့် သေဆုံး/ဒဏ်ရာရ စာရင်း အတိအကျကို အတည်မပြုနိုင်သေးဘဲ ကျဆုံးသူ အရေအတွက် ပိုမိုမြင့်တက်လာနိုင်ကြောင်း နယ်မြေခံများက ဆိုသည်။ အဆိုပါ စစ်ရေးသတင်းရင်းမြစ်က “တိုက်ခိုက်မှုအပြီးမှာလည်း အနားက တပ်ရင်းတွေကနေ လက်နက်ကြီးနဲ့ တောက်လျှောက် ပစ်နေသလို မြေပြင်စစ်ကြောင်း ၂ ကြောင်းပါ ထိုးလာတယ်။ ဒဏ်ရာရသူတွေကို ဆေးကုသ ပေးဖို့အတွက် မြေပြင်မှာ အခက်အခဲအများကြီး ကြုံနေရတုန်းပဲ” ဟု ပြောသည်။ အဆိုပါ NUG အထူးတိုင်းစစ်ဌာနသည် ပဲခူးတိုင်း၊ မွန်ပြည်နှင့် ကရင်ပြည် နယ်စပ် စစ်တောင်းမြစ်ဝှမ်းဒေသ များတွင် အဓိက စစ်ရေးလှုပ်ရှားနေသည့် တပ်ဖွဲ့ဖြစ်သည်။ ယခုဖြစ်စဉ်နှင့် ပတ်သက်၍ NUG ကာကွယ်ရေးဝန်ကြီးဌာနဘက်မှ တစ်စုံတစ်ရာ တရားဝင် ထုတ်ပြန်ထားခြင်း မရှိသေးသော်လည်း တော်လှန်ရေး အင်အားစုများနှင့် နီးစပ်သူများကမူ လူမှုကွန်ရက်ပေါ်တွင် ကျဆုံးသွားသည့် ရဲဘော်များအတွက် ဝမ်းနည်းကြောင်း စာလွှာများ ရေးသားဖော်ပြနေကြသည်။ ဓာတ်ပုံ- (အထူးတိုင်းစစ်ဌာန / ယခုနှစ်အတွင်း အထူးတိုင်းစစ်ဌာန အစည်းအဝေးတစ်ခုတွင် တွေ့ရသည့် တပ်မှူးများ။) #အထူးတိုင်းစစ်ဌာန

NUG အထူးတိုင်းစစ်ဌာနချုပ် လေကြောင်းမှ ဗုံးကြဲခံရပြီး CDM အရာရှိနှင့် ရဲဘော်အချို့ ကျဆုံး

NUG အထူးတိုင်းစစ်ဌာနချုပ် လေကြောင်းမှ ဗုံးကြဲခံရပြီး CDM အရာရှိနှင့် ရဲဘော်အချို့ ကျဆုံး သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၂၅ ရက်။ …

  • September 25, 2026
ကချင်တွင် စစ်အုပ်စု ဗုံးကြဲ၊ လိုင်ဇာတွင် လေယာဉ်များ ပျံဝဲ၍ တရုတ် သတိပေး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၅ ရက်။ ကချင်-တရုတ်နယ်စပ်ရှိ ကချင်လွတ်လပ်ရေးအဖွဲ့ KIO ဌာနချုပ် လိုင်ဇာမြို့ အပါအဝင် ဖားကန့်နှင့် ဆယ်ဇင်း ဒေသများကို စစ်အုပ်စုတပ်က လေကြောင်းမှ ဆက်တိုက် ကင်းထောက်ခြင်းနှင့် ဗုံးကြဲတိုက်ခိုက်ခြင်းများ ပြုလုပ်ခဲ့ကြောင်း ဒေသခံများက ပြောသည်။ စက်တင်ဘာလ ၂၄ ရက်နေ့ မွန်းလွဲ ၃ နာရီခွဲခန့်တွင် ဖားကန့်မြို့နယ်၊ KIA တပ်မဟာ (၉)၊ တပ်ရင်း (၆) နေရာများ နှင့် ကချင်-စစ်ကိုင်းအစပ် ဟုမ္မလင်းနှင့် ဆယ်ဇင်းကျေးရွာအနီးရှိ KIA တပ်ရင်း (၃၁) နေရာတို့ကို စစ်အုပ်စုတပ် က ဂျက်ဖိုက်တာ ၂ စီးနှင့် Y-12 လေယာဉ် ၁ စီးတို့ဖြင့် ဗုံးအလုံး ၃၀ နီးပါး ကြဲချခဲ့သည်။ ဖားကန့် ဒေသခံ အမျိုးသားတစ်ဦးက “မွန်းလွဲပိုင်းမှာ ဖိုက်တာ ၂ စီးနဲ့ Y-12 လေယာဉ်တွေ လာပြီး ဗုံးအလုံး ၃၀ ကျော်မက ကြဲသွားတာ။ တပ်မကုန်းဘက်ကလည်း လက်နက်ကြီးတွေနဲ့ ပစ်တာတွေ ရှိတယ်။ ၂၃ ရက်နေ့ ည ကတည်းကနေ အသံတွေ ပြန်ကြားနေရပြီ။ ဒီမှာက အချင်းချင်းလည်း သတိထားကြဖို့ သတိပေးထားပြီးသား ဗျ။ ဗန်းမော်ဘက်မှာ စစ်သင်္ဘောတွေ တိုက်ခိုက်ခံထားရတော့ ဒီဘက်ပိုင်းတွေ လေကြောင်းရန် သတိထားဖို့ ဆိုတာမျိုးတွေ ပြောထားပါတယ်” ဟု ပြောသည်။ ထို့ပြင် စက်တင်ဘာလ ၂၄ ရက် မွန်းလွဲ ၁ နာရီဝန်းကျင်ကလည်း KIO ဌာနချုပ် လိုင်ဇာမြို့ အနောက်ဘက်ခြမ်း နှင့် တရုတ်-မြန်မာ နယ်စပ်တစ်လျှောက်သို့ စစ်အုပ်စု၏ Y-12 နှင့် ဂျက်ဖိုက်တာ လေယာဉ်များ မိနစ် ၂၀ နီးပါး ပျံဝဲကင်းထောက်ခဲ့သဖြင့် တရုတ်နိုင်ငံဘက်မှ လေကြောင်းအချက်ပြ မီးကျည်များ ပစ်လွှတ်ကာ သတိပေး ပေါက်ကွဲသံများ ထွက်ပေါ်ခဲ့သည်။ လိုင်ဇာမြို့ခံ အမျိုးသားတစ်ဦးက “လိုင်ဇာမှာ လေယာဉ်တွေ လာပျံဝဲတာ နှစ်ရက်ဆက်တိုက် ရှိပြီ။ တရုတ်ဘက် ကလည်း လေကြောင်း သတိပေး မီးကျည်တွေ ပစ်လွှတ်တာမျိုး လုပ်တယ်။ မြို့ထဲမှာတော့ ကြိုတင်ကာကွယ် တဲ့ အနေနဲ့ ကျောင်းတွေ ယာယီပိတ်ထားရတယ်။ ဒီလိုင်ဇာရော၊ နောက်ပြီး မိုင်ဂျာယန်မှာရော ကျောင်းတွေ တော့ ပိတ်ထားပါတယ်” ဟု ပြောသည်။ ပြီးခဲ့သည့် ဩဂုတ်လ ၂၁ ရက်မှ စက်တင်ဘာလ ဒုတိယပတ်အထိ မန္တလေးမှ ဗန်းမော်ဘက်သို့ ဧရာဝတီ မြစ်ကြောင်းအတိုင်း ဆန်တက်လာသည့် စစ်အုပ်စု၏ စစ်ရေယာဉ် ၂၀ ဝန်းကျင်ကို KIA နှင့် ပူးပေါင်းတပ်ဖွဲ့များ က ကြားဖြတ်တိုက်ခိုက်ခဲ့ရာ စစ်အုပ်စုဘက်မှ အထိနာခဲ့ပြီးနောက် လေကြောင်းတိုက်ခိုက်မှုများကို ပိုမိုပြုလုပ် လာခြင်း ဖြစ်သည်။ KIO သတင်းနှင့် ပြန်ကြားရေးတာဝန်ခံ ဗိုလ်မှူးကြီး နော်ဘူက စစ်အုပ်စုသည် ဗန်းမော်အပါအဝင် နယ်မြေ အသီးသီးတွင် စစ်ရေးအရ ဖိအားများလာသဖြင့် လေကြောင်းနှင့် ဒရုန်းများကို အသုံးပြု၍ အရပ်သား ပစ်မှတ် များကို ပြန်လည်တိုက်ခိုက်လာနိုင်ကြောင်း ပြောဆိုထားသည်။ လက်ရှိတွင် KIO/KIA ဗဟိုက လိုင်ဇာ၊ မိုင်ဂျာယန်၊ လွယ်ဂျယ်နှင့် ကန်ပိုက်တည် စသည့် မြို့များနှင့် ကျေးရွာများ ရှိ ပြည်သူများအား လေကြောင်းရန်အတွက် ကတုတ်ကျင်းများ တူးထားကြရန်၊ လူစုလူဝေး မလုပ်ကြရန်နှင့် လေကြောင်းအန္တရာယ်ကို အထူးသတိပြုကြရန် အသိပေး ထုတ်ပြန်ထားပြီး စာသင်ကျောင်းများကိုလည်း ယာယီပိတ်ထားကြောင်း ဒေသခံပြည်သူများက ပြောသည်။ #လိုင်ဇာမြို့

ကချင်တွင် စစ်အုပ်စု ဗုံးကြဲ၊ လိုင်ဇာတွင် လေယာဉ်များ ပျံဝဲ၍ တရုတ် သတိပေး

ကချင်တွင် စစ်အုပ်စု ဗုံးကြဲ၊ လိုင်ဇာတွင် လေယာဉ်များ ပျံဝဲ၍ တရုတ် သတိပေး သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၂၅ ရက်။ ကချင်-တရုတ်နယ်စ…

  • September 25, 2026
စစ်ကိုင်းတွင် စစ်အုပ်စု ဗုံးကြဲ၍ ထိခိုက်သေဆုံးမှုရှိ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၅ ရက်။ စစ်ကိုင်းတိုင်းအတွင်း စစ်ဘေးရှောင်များ နေထိုင်ရာ ကျေးရွာများနှင့် ကုန်သွယ်ရေး လမ်းကြောင်းများကို စစ်အုပ်စုတပ်က လေကြောင်းမှ ရက်ဆက် ဗုံးကြဲတိုက်ခိုက်နေ၍ ကလေးငယ်များနှင့် သီလရှင် ၁ ပါး အပါအဝင် အရပ်သား ထိခိုက်သေဆုံးမှု မြင့်တက်နေသည်။ စက်တင်ဘာလ ၂၄ ရက်နေ့၊ ညနေ ၅ နာရီ ၂၀ မိနစ်ခန့်တွင် ကောလင်းမြို့နယ်၊ ကုက္ကိုလ်ကုန်းကျေးရွာရှိ စစ်ဘေး ရှောင်များ ရှိရာနေရာကို စစ်အုပ်စုက တံတားဦးလေတပ်မှ ဂျက်ဖိုက်တာဖြင့် ဗုံး နှစ်ကြိမ် ကြဲချခဲ့ရာ အမျိုးသား ၃ ဦး သေဆုံးပြီး ၈ ဦး ဒဏ်ရာရရှိခဲ့ကာ နေအိမ် ၁၀ လုံးခန့် ပျက်စီးခဲ့သည်။ ကောလင်း ဒေသခံတစ်ဦးက “ဖိုက်တာနဲ့ ပေါင် ၃၀၀၊ ပေါင် ၅၀၀ ဗုံးတွေ ကြဲသွားတာ။ ညနေပိုင်းမှာ ဗုံးကြဲခံရ တော့ ပြည်သူတွေ အကုန် ထိတ်လန့်ပြီး ရွာထဲမှာ မနေရဲကြတော့ဘဲ အမှောင်ထဲမှာတင် နီးစပ်ရာ တောတောင် တွေဆီ တိမ်းရှောင်ခဲ့ကြရတယ်” ဟု ပြောသည်။ ထို့ပြင် စက်တင်ဘာလ ၂၃ ရက်နေ့ကလည်း အင်းတော်မြို့နယ်၊ မန္တလေး-မြစ်ကြီးနား ကားလမ်းပိုင်းရှိ ဆီကား တန်းနှင့် ဆီဆိုင်များကို စစ်အုပ်စုက Y-12 လေယာဉ်ဖြင့် ဗုံး ၁၈ လုံး ကြဲချခဲ့ရာ ယာဉ်မောင်းနှင့် ယာဉ်နောက် လိုက် တစ်ဦး သေဆုံးပြီး ကုန်သည် ၈ ဦးခန့် ဒဏ်ရာရရှိခဲ့သည်။ ထိုနေ့ ညနေပိုင်းတွင် တံခွန်တိုင်ရွာသစ်နှင့် ကသာမြို့နယ် ညောင်ခြေထောက် ဘုန်းကြီးကျောင်းတို့အား ဆက် တိုက် ဗုံးကြဲခဲ့သဖြင့် သီလရှင် ၁ ပါး ပွဲချင်းပြီး ပျံလွန်တော်မူသွားသည်။ အင်းတော် ဒေသခံတစ်ဦးက “တိုက်ပွဲဖြစ်တာလည်း မရှိဘူး၊ တော်လှန်ရေးတပ်တွေ မရှိဘဲနဲ့ စစ်အုပ်စုက ဆီဆိုင်တွေနဲ့ ကားလမ်းမကို ရည်ရွယ်ချက်ရှိရှိ ဗုံးကြဲသွားတာ။ ဆီကားတချို့ မီးလောင် ပျက်စီးခဲ့ရသလို ဒဏ်ရာရသူတွေထဲမှာလည်း စိုးရိမ်ရတဲ့သူတွေ အများကြီး ပါနေတယ်” ဟု ပြောသည်။ အလားတူ ဟုမ္မလင်းမြို့နယ်တွင် ပြည်သူ့ကာကွယ်ရေး ပူးပေါင်းတပ်များနှင့် စစ်တပ်လက်အောက်ခံ ရှမ်းနီ အမျိုးသားများတပ်မတော် (SNA) တို့ စစ်ရေးတင်းမာနေပြီးနောက် တော်လှန်ရေးတပ်များ ထိန်းချုပ်ထားသည့် ရွှေပြည်အေးမြို့ကို စစ်အုပ်စုက Gyrocopter ၂ စီးဖြင့် ဗုံး ၄ လုံး ကြဲချခဲ့သည်။ စစ်အုပ်စုတပ်သည် ကချင်ပြည်၊ ရွှေကူမြို့နယ်နှင့် ရှမ်းမြောက် မဘိမ်းမြို့နယ်တို့တွင် စစ်ရေးအထိနာချိန်တိုင်း အရပ်သား ပစ်မှတ်များကို ဦးတည်၍ လေကြောင်းဆိုင်ရာ စစ်ရာဇဝတ်မှုများ ဆက်တိုက် ကျူးလွန်နေခြင်း ဖြစ်သည်။ အင်းတော်မြို့နယ် ပြည်သူ့ကာကွယ်ရေးအဖွဲ့က စစ်အုပ်စု၏ အရပ်သားများအပေါ် ဦးတည်တိုက်ခိုက်မှုကို ပြင်း ထန်စွာ ပြန်လည်တိုက်ခိုက်သွားမည်ဟု စက်တင်ဘာလ ၂၅ ရက်နေ့တွင် သတင်းထုတ်ပြန်ထားပြီး၊ စစ်ကိုင်း တိုင်းအတွင်းရှိ တော်လှန်ရေး အင်အားစုများကလည်း ပြည်သူများအနေဖြင့် လေကြောင်းအန္တရာယ်ကို အထူးသတိပြုကြရန် အသိပေး နှိုးဆော်ထားသည်။ #စစ်ကိုင်းတိုင်း

စစ်ကိုင်းတွင် စစ်အုပ်စု ဗုံးကြဲ၍ ထိခိုက်သေဆုံးမှုရှိ

စစ်ကိုင်းတွင် စစ်အုပ်စု ဗုံးကြဲ၍ ထိခိုက်သေဆုံးမှုရှိ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၂၅ ရက်။ စစ်ကိုင်းတိုင်းအတွင်း စစ်ဘေးရှောင်…

  • September 25, 2026
ကျောက်တော်ကို စစ်အုပ်စုမှ ဗုံးကြဲသဖြင့် ကလေးငယ်များအပါအဝင် ၇ ဦး ဒဏ်ရာရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၅ ရက်။ ရခိုင်ပြည်၊ ကျောက်တော်မြို့ကို စစ်အုပ်စုက Y-12 လေယာဉ်ဖြင့် ဗုံးကြဲတိုက်ခိုက်ခဲ့သဖြင့် အသက် ၁ နှစ်အရွယ် ကလေးငယ် အပါအဝင် ဒေသခံ အရပ်သား ၇ ဦး ထိခိုက်ဒဏ်ရာရရှိခဲ့ကြောင်း ဒေသတွင်း သတင်းအရင်းအမြစ်များက ပြောသည်။ စက်တင်ဘာလ ၂၅ ရက်နေ့၊ နံနက်အစောပိုင်း ၂ နာရီကျော်အချိန်တွင် စစ်အုပ်စုက Y-12 လေယာဉ်ဖြင့် ကျောက် တော်မြို့ အတွင်းရှိ ပြည်တော်သာ ရပ်ကွက် (၇ လမ်း)၊ ပိုက်သည်ကျေးရွာနှင့် နိဒင်ကျေးရွာတို့သို့ ဒရော့ဗုံး (Drop Bomb) အလုံး ၃၀ နီးပါး ကြဲချတိုက်ခိုက်ခဲ့ခြင်း ဖြစ်သည်။ ဒေသခံ ပရဟိတ လုပ်အားပေး အမျိုးသားတစ်ဦးက “အသက်တစ်နှစ်အရွယ် မူဆလင်ကလေးငယ် တစ်ယောက် လည်း ဒဏ်ရာရတယ်။ ညလူအိပ်ချိန်ဆိုတော့ ရှောင်ချိန် မရလိုက်ပါဘူး။ ဒဏ်ရာရသူတွေကို ကုသပေးနေပါ တယ်။ ကျောက်တော် အပါအဝင် တစ်ပြည်လုံးကို စစ်တပ်က ရက်ရက်စက်စက် လုပ်နေတာပါ၊ သတိထားကြ ရမှာပါ။ ကျောက်တော်ဘက်မှာတော့ AA က လေကြောင်း အသိပေးတာတွေလည်း ရှိပါတယ်” ဟု ပြောသည်။ လေကြောင်းမှ ဗုံးကြဲတိုက်ခိုက်မှုကြောင့် ပြည်တော်သာရပ်ကွက်မှ အသက် ၅၅ နှစ်အရွယ် ဦးစိန်သန်းနှင့် အသက် ၅၄ နှစ်အရွယ် ဒေါ်ရွှေရီ၊ ပိုက်သည်ကျေးရွာမှ အသက် ၃၅ နှစ်အရွယ် ဦးအဘူကလစ်၊ နိဒင်ကျေးရွာမှ အသက် ၁ နှစ်အရွယ် ဘီဘီဆာနေးယား၊ အသက် ၈ နှစ်အရွယ် ဘီဘီဆာခါရာ၊ အသက် ၁၈ နှစ်အရွယ် ဆော် လိမ်း၊ အသက် ၃၇ နှစ်အရွယ် ရိုဟီမာကာတူနှင့် အသက် ၄၃ နှစ်အရွယ် ဂျာဘဲရိတို့ စုစုပေါင်း ၇ ဦး ထိခိုက် ဒဏ်ရာ ရရှိခဲ့ကြသည်။ ဒဏ်ရာရရှိသူများအနက် အသက် ၅၄ နှစ်အရွယ် ဒေါ်ရွှေရီမှာ ဘယ်ဘက်ဝမ်းဗိုက် ဗုံးစထိမှန်ကာ ပြင်းထန် ဒဏ်ရာ ရရှိထားပြီး အသက် ၁ နှစ်အရွယ် ကလေးငယ် ဘီဘီဆာနေးယားမှာ နဖူးတွင်လည်းကောင်း၊ ၈ နှစ် အရွယ် ဘီဘီဆာခါရာမှာ ညာဘက်ခြေထောက်တွင်လည်းကောင်း အသီးသီး ဒဏ်ရာရရှိခဲ့ကြကာ နေအိမ် အချို့လည်း ထိမှန်ပျက်စီးခဲ့သည်။ အလားတူ စက်တင်ဘာလ ၂၄ ရက်နေ့၊ ညနေ ၅ နာရီကျော်ကလည်း စစ်တပ်က ရသေ့တောင်မြို့နယ်၊ ဇီးကိုင်းကျေးရွာကို လေကြောင်းမှ ဗုံးကြဲတိုက်ခိုက်ခဲ့သည်။ စစ်အုပ်စုသည် စက်တင်ဘာလ ၄ ရက်နေ့မှစတင်၍ ပုဏ္ဏားကျွန်းမြို့နယ်အတွင်းသို့ စစ်အင်အား ၁,၀၀၀ ကျော်ဖြင့် စစ်ကြောင်းများခွဲ၍ စစ်ကြောင်းထိုးနေပြီး အရပ်သားများနေထိုင်ရာ ကျေးရွာများသို့ လေကြောင်း တိုက်ခိုက်မှုများနှင့် လက်နက်ကြီးများဖြင့် ပစ်ခတ်မှုများကို ဆက်တိုက် ပြုလုပ်လျက်ရှိသည်။ #ကျောက်တော်မြို့

ကျောက်တော်ကို စစ်အုပ်စုမှ ဗုံးကြဲသဖြင့် ကလေးငယ်များအပါအဝင် ၇ ဦး ဒဏ်ရာရ

ကျောက်တော်ကို စစ်အုပ်စုမှ ဗုံးကြဲသဖြင့် ကလေးငယ်များအပါအဝင် ၇ ဦး ဒဏ်ရာရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၂၅ ရက်။ ရခိုင်ပြည်၊ ကျော…

  • September 25, 2026
×Close