သတင်း

ART ဆေး ပြန်ရသော်လည်း ဆေးပြတ်မည်ကို မြစ်ကြီးနားနှင့် ဝိုင်းမော် လူနာများ စိုးရိမ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၂ ရက်။ ကချင်ပြည်၊ မြစ်ကြီးနားနှင့် ဝိုင်းမော်မြို့နယ်တို့တွင် သက်ဆိုင်ရာက ပြတ်လပ်နေသည့် HIV ရောဂါထိန်းချုပ် ဆေး (ART) များကို ပြန်လည်ထုတ်ပေးနေပြီ ဖြစ်သော်လည်း ဆေးဝါးရရှိမှု ပမာဏ အကန့်အသတ်ဖြင့်သာ ပေးနေသည့်အတွက် ပုံမှန်မှီဝဲနေရသူများအနေဖြင့် ဆေးဝါး ထပ်မံပြတ်လပ်သွားမည်ကို စိုးရိမ်လျက်ရှိကြသည်။ ပြီးခဲ့သည့် စက်တင်ဘာလဆန်းပိုင်းမှစ၍ သက်ဆိုင်ရာ ဆေးရုံများတွင် ART ဆေးဝါး ပြတ်လပ်မှုများ ကြုံတွေ့ ခဲ့ရပြီးနောက် စက်တင်ဘာလ ၂၁ ရက်နေ့မှ စတင်ကာ မြစ်ကြီးနား ပြည်သူ့ဆေးရုံကြီး ART ဌာန၌ တစ်ပတ်လျှင် ၃ ရက်၊ စာအုပ်ပြသ၍ တစ်ကြိမ်လျှင် ဆေးတစ်လစာစီ ပြန်လည်ထုတ်ပေးနေခြင်း ဖြစ်သည်။ အမည်မဖော်လိုသည့် စေတနာ့ဝန်ထမ်းတစ်ဦးက “မြစ်ကြီးနားကို ဆေးတွေပို့လိုက်တာက ၁၈ ရက်နေ့ကပါ။ ဆိုတော့ ၂၁ ရက်နေ့ကို အကုန်ပြန်ထုတ်ပေးနိုင်အောင် ပြင်ဆင်ထားတယ်။ အခုလည်း ထုတ်ပေးနေပါပြီ။ ဆေးလုံးဝပြတ်သွားတာမျိုး မဖြစ်အောင်တော့ ကြိုးစားနေကြပါတယ်။ တခြားတော့ ဘာမှ ပြောလို့မရဘူး” ဟု ပြောသည်။ ယခင်က ဆေးတစ်ကြိမ်ထုတ်လျှင် ၂ လမှ ၃ လစာအထိ ပုံမှန်ရရှိခဲ့သော်လည်း စစ်အုပ်စုတပ် အာဏာသိမ်းပြီး နောက်ပိုင်း အစိုးရဆေးရုံများက တာဝန်ယူ ထုတ်ပေးချိန်မှစ၍ ဆေးဝါးရရှိမှု နည်းပါးလာခဲ့ကြောင်း ဆေးလာ ရောက်ထုတ်ယူသူများက ဆိုသည်။ မြစ်ကြီးနားမြို့သို့ ဆေးလာရောက်ထုတ်ယူသည့် ဒေသခံတစ်ဦးက “အရင်ကဆိုရင် ဆေးရုံကို ၃ လမှ တစ်ခေါက် ပဲ သွားရတာ။ အခုကျတော့ ဆေးရုံက အခြေအနေကြည့်ပြီး တစ် ပတ်စာ၊ ဆယ့်ငါးရက်စာ၊ အခုဆိုရင် တစ်လ စာလောက်ပဲ အကန့်အသတ်နဲ့ ခွဲတမ်းချပေးတော့တာ။ နယ်ဘက် ကလာရတဲ့ သူတွေဆို လမ်းစရိတ်လည်း မလွယ်ဘူး။ စစ်ဆေးရေးဂိတ်တွေကို ခက်ခက်ခဲခဲ ဖြတ်သန်းပြီးမှ ဆေးလာထုတ်ရတာဆိုတော့ ဆေးရုံကို ခကြာခဏ မလာနိုင်ကြဘူး။ ဆေးပြန်ရပြီဆိုပေမဲ့ နောက်ပိုင်း ထပ်ပြတ်သွားမှာကို အရမ်းစိုးရိမ်ရတယ်” ဟု ပြောသည်။ အလားတူ မူးယစ်ပြန်လည်ထူထောင်ရေး သင်တန်းကျောင်းများတွင် ရှိနေသူများနှင့် လမ်းပန်းဆက်သွယ်ရေး ခက်ခဲသည့် ဝေးလံခေါင်ဖျား ဒေသမှ လူနာများမှာလည်း ဆေးဝါးခွဲတမ်း နည်းပါးခြင်းနှင့် လမ်းစရိတ် အခက်အခဲများကြောင့် ဆေးပုံမှန် ထုတ်ယူနိုင်ရေးအတွက် စိန်ခေါ်မှုများစွာ ကြုံတွေ့နေရသည်။ ART ဆေး (Anti-retroviral therapy) ဆိုသည်မှာ ခန္ဓာကိုယ်အတွင်းရှိ HIV ဗိုင်းရပ်စ်ပိုးများ ထပ်မံ မပွားလာ စေရန် ထိန်းချုပ်ပေးသည့် ဆေးဝါးဖြစ်ပြီး အစဉ်ဆက်မပြတ် သောက်သုံးမှသာ သက်တမ်းစေ့ နေထိုင်နိုင်သလို အခြားသူများထံ ကူးစက်မှုကိုလည်း လျှော့ချပေးနိုင်မည် ဖြစ်သည်။ ကမ္ဘာ့ကျန်းမာရေးအဖွဲ့ (WHO) ၏ HIV ကုသရေး လမ်းညွှန်ချက်များအရ ART ဆေးကို တစ်လအတွင်း ၃ ကြိမ်ထက်မက သောက်သုံးရန် ပျက်ကွက်ပါက ဆေးယဉ်ပါးမှု ဖြစ်လာနိုင်ပြီး ရောဂါပိုး ပိုမိုပြန့်ပွားလာကာ ကိုယ်ခံအားစနစ် ပျက်စီးပြီး AIDS ရောဂါအဆင့်သို့ ရောက်ရှိကာ အသက်အန္တရာယ် ပေါ်ပေါက်နိုင်ကြောင်း သတိပေးထားသည်။ ART ဆေး ပုံမှန်သောက်သုံးနေရသည့် လူနာတစ်ဦးက “ကျနော်တို့အတွက် ဒီဆေးက အသက်ပဲ။ တစ်ရက်မှ ပျက်လို့မရဘူး။ ဆေးမသောက်ရရင် ကိုယ်ခံအားတွေ ကျပြီး ရောဂါပိုးတွေ ပွားလာမှာလေ။ ဩဂုတ်လတုန်းက မြစ်ကြီးနား၊ မိုးညှင်း၊ ဖားကန့်နဲ့ ဝိုင်းမော်ဘက် တွေ ကို ၃ လစာအထိ နောက်ဆုံးထား ထုတ်ပေးခဲ့တာ။ စက်တင်ဘာလဆန်းမှာ လုံးဝ ဆေးထုတ်မပေးနိုင်တော့လို့ အားလုံး စိတ်ခြောက်ခြားခဲ့ရတယ်။ အခု တစ်လစာ ပြန်ပေးပေမဲ့ အခြေအနေက စိတ်မချရသေးပါဘူး” ဟု ပြောသည်။ လက်ရှိတွင် ကချင်ပြည်အတွင်း ART ဆေး ပုံမှန်မှီဝဲနေရသူ ဦးရေ ၂ သောင်း ၈ ထောင်နီးပါး ရှိနေပြီး ဒေသတွင်း တိုက်ပွဲများနှင့် လမ်းပန်းဆက်သွယ်ရေး အခက်အခဲများကြားမှ ဆေးဝါး ရေရှည် ပုံမှန်ရရှိနိုင်ရေးအတွက် စိုးရိမ်ပူပန်မှုများ မြင့်တက်လျက်ရှိသည်။ ဓာတ်ပုံ - Crd #ART #HIV

ART ဆေး ပြန်ရသော်လည်း ဆေးပြတ်မည်ကို မြစ်ကြီးနားနှင့် ဝိုင်းမော် လူနာများ စိုးရိမ်

ART ဆေး ပြန်ရသော်လည်း ဆေးပြတ်မည်ကို မြစ်ကြီးနားနှင့် ဝိုင်းမော် လူနာများ စိုးရိမ် သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၂၂ ရက်။ ကချင်…

  • September 23, 2026
ရခိုင်တွင် ငွေသားပြတ်လပ်မှုကြောင့် ငွေထုတ်ခ မြင့်တက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၂ ရက်။ ရခိုင်ပြည်အတွင်း အာရက္ခတပ်တော် (AA) ထိန်းချုပ်ထားသည့် မြို့နယ်အချို့၌ ဒေသတွင်း ငွေကြေးလည်ပတ် စီးဆင်းမှု နည်းပါးလာပြီး လက်ငင်းငွေသား ရရှိရန် ခက်ခဲနေသဖြင့် ငွေလွှဲ၊ ငွေထုတ် ဝန်ဆောင်ခများ မြင့်တက် လာနေသည်ဟု ဒေသခံများက ပြောသည်။ ပြည်ပနှင့် အခြားဒေသများမှ AA ထိန်းချုပ်နယ်မြေများသို့ ငွေလွှဲပို့ရာတွင် ယခင်က ငွေတစ်သိန်းလျှင် ဝန်ဆောင် ခ ၅,၀၀၀ ကျပ်ကျော်မှ ရာခိုင်နှုန်း အဆင့်ဆင့် တိုးမြင့်လာခဲ့ပြီး ယခု စက်တင်ဘာလ နောက်ဆုံးပတ်တွင် တစ်သိန်းလျှင် ၇,၀၀၀ ကျပ်အထိ ဝန်ဆောင်ခ ပေးနေရကြောင်း ဒေသခံများက ပြောသည်။ စစ်အုပ်စု၏ လေကြောင်းတိုက်ခိုက်မှုများ၊ လမ်းပန်းဆက်သွယ်ရေး အခက်အခဲများနှင့် သယ်ယူပို့ဆောင် ရေး ထိန်းချုပ်ခံထားရမှုများကြောင့် ဒေသတွင်း၌ စီးပွားရေး လုပ်ကိုင်ရခက်ခဲကာ ပြည်ပရောက် မိသားစုဝင်များ လှေခါးထစ်ပေးပို့သည့် ငွေကြေးကိုသာ အဓိက အားထားနေရသူများမှာ ငွေထုတ်ခ မြင့်တက်လာသည့်အတွက် ထပ်မံ အခက်တွေ့နေကြရသည်။ ရခိုင်ပြည်တောင်ပိုင်းတွင် နေထိုင်သည့် ဒေသခံ အမျိုးသမီးတစ်ဦးက “အခု ကျမတို့ဒေသမှာ စီးပွားရေးလည်း မကောင်းဘူး။ နေ့စဉ်လိုလို ဗုံးကြဲနေတာကြောင့် လုပ်စားလို့က ဘာမှမရဘူး။ ပင်လယ်ဆင်းတာ၊ လယ်စိုက်တာ လည်း မအောင်မြင်ဘူး။ အဲတော့ နိုင်ငံခြားမှာ အလုပ်လုပ်နေတဲ့ သားသမီးတွေ၊ တခြားနေရာမှာ လုပ်နေကြတဲ့ ဆွေမျိုးတွေ၊ လင်တွေ၊ မိသားစုတွေဆီက ငွေကို အားထားပြီး စားနေရတာ။ အဲ့အချိန်မှာ ငွေလွှဲခတွေက ဈေး တက်လာတယ်။ တစ်သိန်းကို ခုနစ်ထောင်လောက် ပေးနေရတယ်။ အဲ့ဒါ နေရာတိုင်းမှာမရ၊ ထုတ်မယ့် နေရာကို မိုင်ချီပြီး သွားထုတ်ရတာပါ။ တော်တော် ခက်ခဲပါတယ်” ဟု ပြောသည်။ ထို့ပြင် ၂၀၂၆ ခုနှစ် ဇွန်လ ၁၁ ရက်တွင် KBZ Bank ၏ စနစ်အဆင့်မြှင့်တင်မှု ပြုလုပ်ပြီးနောက် KPay နှင့် KBZ ဘဏ် ဒစ်ဂျစ်တယ် ဝန်ဆောင်မှု အကောင့်အချို့ ပိတ်ပင်ခံရခြင်း သို့မဟုတ် အသုံးပြုခွင့် ကန့်သတ်ခံရခြင်းတို့ ကြောင့် ငွေလွှဲဝန်ဆောင်မှု လုပ်ကိုင်သူများအနေဖြင့် လက်ငင်းငွေသား ထုတ်ပေးရာတွင် ပိုမို ကြန့်ကြာ ခက်ခဲ လာခြင်း ဖြစ်သည်။ ယခုကဲ့သို့ ငွေထုတ်ခများ ဆက်တိုက်မြင့်တက်ပြီး ငွေသားရှားပါးလာရသည့် အကြောင်းရင်းနှင့် ပတ်သက်၍ ဒေသတွင်း ငွေလွှဲဝန်ဆောင်မှု လုပ်ကိုင်သူတစ်ဦးက ယခုကဲ့သို့ ပြောသည်။ “လမ်းကြောင်းတွေ ပိတ်ထားတော့ ဒေသတစ်ခုနဲ့တစ်ခု ငွေသားသယ်ဖို့က တော်တော်ခက်တယ်။ အပြင်မှာ ငွေစက္ကူအသစ် လည်ပတ်မှု မရှိသလောက်ဖြစ်နေသလို တဖက်မှာလည်း ဘဏ် KPay အကောင့်တွေ မကြာ ခဏ အပိတ်ခံရတာ၊ ကန့်သတ်ခံရတာတွေ ရှိတယ်။ ငွေထုတ်ပေးမယ့်သူတွေဘက်မှာ လက်ငင်းငွေသားရဖို့ အရင်းအနှီးနဲ့ သွားရေးလာရေးစရိတ် ပိုများလာတဲ့အခါ ဝန်ဆောင်ခကို တိုးယူရတော့တာပါ။” အခြားတစ်ဖက်တွင်လည်း ငွေသား ရှားပါးမှုနှင့်အတူ လက်ရှိ လည်ပတ်နေသည့် ငွေစက္ကူများအနက် ဟောင်း နွမ်း စုတ်ပြဲနေသော ငွေစက္ကူများကို အချို့သော စျေးဆိုင်များက လက်ခံရန် ငြင်းဆန်ကြသဖြင့် လက်ထဲတွင် ငွေရှိနေသော်လည်း လိုအပ်သည့် ကုန်ပစ္စည်းများကို ချက်ချင်း ဝယ်ယူ၍ မရသည့် အခြေအနေများနှင့်လည်း ကြုံတွေ့နေရသည်။ လက်ရှိတွင် ပြည်ပရောက် မိသားစုဝင်များ၏ ထောက်ပံ့ငွေဖြင့် မိသားစု စားဝတ်နေရေး၊ ကလေးများ၏ ပညာ ရေးနှင့် ဆေးဝါးစရိတ်များအတွက် တိုက်ရိုက် သုံးစွဲနေရသည့် အိမ်ထောင်စုများမှာ အပိုကုန်ကျစရိတ်များ ပေးဆောင်နေရသဖြင့် ငွေသားစီးဆင်းမှု ပုံမှန်ဖြစ်ရေးနှင့် ဒစ်ဂျစ်တယ် ငွေကြေး ဝန်ဆောင်မှု အခက်အခဲများကို အမြန်ဆုံး ဖြေရှင်းပေးရန် လိုအပ်နေကြောင်း ဒေသခံများက ထောက်ပြထားကြသည်။ ဓာတ်ပုံ - (AFP / မြန်မာငွေစက္ကူ ရေတွက်နေသူတစ်ဦးအား ၂၀၂၁ ခုနှစ် ဧပြီလ ၁၉ ရက်နေ့က တွေ့ရစဉ်။) #AA #ရခိုင်ပြည်နယ်

ရခိုင်တွင် ငွေသားပြတ်လပ်မှုကြောင့် ငွေထုတ်ခ မြင့်တက်

ရခိုင်တွင် ငွေသားပြတ်လပ်မှုကြောင့် ငွေထုတ်ခ မြင့်တက် သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၂၂ ရက်။ ရခိုင်ပြည်အတွင်း အာရက္ခတပ်တော် (AA…

  • September 23, 2026
ဆော်ဒီအာရေဗျအား ဗြိတိန်က လေကြောင်းစစ်ရေးအကူအညီ ပေးမည် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၂ ရက်။ အီရန်ကျောထောက်နောက်ခံပြု ဟူသီသူပုန်များ၏ တိုက်ခိုက်မှုကို ရင်ဆိုင်နေရသည့် ဆော်ဒီအာရေဗျနိုင်ငံအား ကာကွယ်ရေးဆိုင်ရာ စစ်ရေးအကူအညီများ ပေးအပ်သွားမည်ဟု ဗြိတိန်ဝန်ကြီးချုပ် အန်ဒီ ဘန်းဟမ်း (Andy Burnham) က ပြောကြားခဲ့သည်။ အဆိုပါ စစ်ရေးအကူအညီမှာ သီတင်းပတ်အနည်းငယ်ခန့်သာ ကြာမြင့်မည့် ကာလတို ကူညီမှုဖြစ်သည်။ ဆိုက်ပရပ်စ်နိုင်ငံရှိ ဗြိတိန်လေတပ်စခန်းမှ Voyager အမျိုးအစား လေထဲတွင် ဆီဖြည့်ပေးနိုင်သည့် လေယာဉ်တစ်စင်း စေလွှတ်၍ ဆော်ဒီတိုက်လေယာဉ်များကို ကူညီပေးသွားမည်ဖြစ်သည်။ မကြာသေးမီရက်ပိုင်းက ယီမင်နိုင်ငံရှိ ဟူသီသူပုန်များသည် ဆော်ဒီမြို့တော် ရိယတ် (Riyadh) နှင့် ပင်လယ်နီကမ်းရိုးတန်းရှိ စွမ်းအင်ထုတ်လုပ်ရေးစခန်းများကို ဒရုန်းများ၊ ဗာလစ်စတစ်ဒုံးကျည်များဖြင့် ပစ်ခတ်တိုက်ခိုက်ခဲ့သည်။ ပင်လယ်နီ ရေကြောင်းလမ်းကြောင်းမှာ ကမ္ဘာ့စီးပွားရေးအတွက် အရေးပါသောကြောင့် ကုန်ဈေးနှုန်းကြီးမြင့်မှုနှင့် စီးပွားရေးထိခိုက်မှုများကို ကာကွယ်ရန် ဆော်ဒီ၏ အကူအညီတောင်းခံမှုကို လက်ခံခဲ့ခြင်းဖြစ်ကြောင်း ဗြိတိန်ဝန်ကြီးချုပ်က ဆိုသည်။ ဗြိတိန်အနေဖြင့် စစ်ရေးအကူအညီ ပမာဏအနည်းငယ်သာ ပေးအပ်ခြင်းဖြစ်သော်လည်း ၂၀၁၄ ခုနှစ်ကတည်းက စတင်ခဲ့သည့် ယီမင်စစ်ပွဲအတွင်း ဗြိတိန် ပိုမိုပါဝင်ပတ်သက်လာမည်ကို စိုးရိမ်မှုများလည်း ထွက်ပေါ်လျက်ရှိသည်။ #Andy_Burnham

ဆော်ဒီအာရေဗျအား ဗြိတိန်က လေကြောင်းစစ်ရေးအကူအညီ ပေးမည်

ဆော်ဒီအာရေဗျအား ဗြိတိန်က လေကြောင်းစစ်ရေးအကူအညီ ပေးမည် သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၂၂ ရက်။ အီရန်ကျောထောက်နောက်ခံပြု ဟူသီသူပ…

  • September 22, 2026
မကွေးတိုင်း ဆောမြို့နယ် တိုက်ပွဲများအတွင်း စစ်အုပ်စုအထိနာပြီး ဒဏ်ရာရသူများ သယ်ထုတ်နေရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၂ ရက်။ မကွေးတိုင်း၊ ဆောမြို့နယ်နှင့် ချင်းပြည်တောင်ပိုင်း ကန်ပက်လက်မြို့နယ်တို့တွင် စစ်အုပ်စုတပ်က စစ်ကြောင်း ထိုး အင်အားဖြည့်တင်းနေသဖြင့် စစ်ရေးတင်းမာလျက်ရှိပြီး တိုက်ပွဲများအတွင်း အထိနာခဲ့သည့် ဒဏ်ရာရ စစ်သားများနှင့် ပျူစောထီးများကို ပေါက်မြို့နယ်နှင့် လောင်းရှည်မြို့တို့သို့ ပြန်လည် ပို့ဆောင်နေရကြောင်း ဒေသတွင်း စစ်ရေးသတင်းအရင်းအမြစ်များက ပြောသည်။ တိုက်ပွဲများအတွင်း ခြေပြတ်၊ လက်ပြတ် ဒဏ်ရာ အပြင်းအထန် ရရှိထားသည့် စစ်သားများနှင့် ပျူစောထီးများ ကို လောင်းရှည်မြို့ အမှတ် (၂၅) ကာကွယ်ရေးပစ္စည်းစက်ရုံ (ကပစ-၂၅) မှတစ်ဆင့် စလင်းလမ်းအတိုင်း စစ်ကားများ၊ အရပ်သားများထံမှ ချောဆွဲထားသော ယာဉ်များဖြင့် တင်ဆောင်ကာ ကပစ (၂၅)-ကျွန်းတော-ကံပြား-စလင်း လမ်းအတိုင်း ပြန်လည်ဆုတ်ခွာ သယ်ထုတ်နေခြင်းဖြစ်သည်။ ဒေသတွင်း စစ်ရေးသတင်းအရင်းအမြစ် အမျိုးသားတစ်ဦးက “မကွေးတိုင်း ဆောမြို့နယ်က တိုက်ပွဲတွေ၊ ရခိုင်အစပ်၊ ချင်းအစပ် တိုက်ပွဲတွေမှာ ဒဏ်ရာရ စစ်သားတွေများတယ်။ အဲ့ဒါကို ဆေးကုဖို့ ပြန်သယ်လာ တာပါ” ဟု ပြောသည်။ ပြီးခဲ့သည့် ဩဂုတ်လကတည်းက ပေါက်မြို့နယ်အခြေစိုက် ကပစ (၂၄) ၌ စုဖွဲ့ကာ ကျောက်ထုတိုက်နယ်၊ ကြီးရွာဘက်သို့ စစ်ကူအင်အားအဖြစ် စေလွှတ်ခံခဲ့ရသည့် ပျူစောထီးအပါအဝင် စစ်အုပ်စုတပ်ဖွဲ့ဝင်များသည် တိုက်ပွဲများအတွင်း ဒဏ်ရာအပြင်းအထန် ရရှိခဲ့ကြခြင်းဖြစ်သည်။ အဆိုပါ ဒဏ်ရာရသူ အများစုကို လေကြောင်းဖြင့် ရှေ့ဦးစွာ သယ်ထုတ်သွားခဲ့သော်လည်း ကျောက်ထုမြို့ အမှတ် (၃၆၈) အမြောက်တပ်တွင် ဆေးကုသမှုခံယူနေသည့် ဒဏ်ရာရ ပျူစောထီးများကိုမူ ကပစ (၂၄) ဆေးရုံသို့ ပို့ဆောင်နိုင်ရေးအတွက် ကုန်းလမ်းစစ်ကြောင်းဖြင့် ပြန်လည်ရွှေ့ပြောင်းပေးနေရသည်။ ဒေသခံတစ်ဦးက “စစ်တပ်က ဆော-လောင်းရှည်လမ်းကို ခြေကုပ်ယူထားပြီး ကျောက်ထု-ပေါက်လမ်းပိုင်းက တပြင်းကျေးရွာမှာလည်း အထိုင်ချတပ်စွဲနိုင်ဖို့ ကြိုးစားနေတယ်။ လောင်းရှည်ကနေ ဆောမြို့ကို အင်အား ဖြည့်တာ၊ တပ်ချိန်းတာ ပုံစံအမျိုးမျိုးလုပ်ဖို့ဆိုရင် လောင်းရှည်-ဆောလမ်းပိုင်းက အရေးကြီးတော့ မင်းလယ်၊ သီးကုန်းနဲ့ တောင်ဘို့ကြီးရွာတွေမှာ စစ်တပ်က တပ်စွဲထားတယ်။ နောက်တစ်ခုက ပြီးခဲ့တဲ့လက အင်အား ဖြည့် တဲ့ စစ်ကြောင်းတွေ အကျအဆုံး ဒဏ်ရာရတာများနေတယ်” ဟု ပြောသည်။ ဆောမြို့နယ်၏ အဓိကလမ်းပိုင်းများနှင့် ချင်းပြည်တောင်ပိုင်း မင်းတပ်၊ ကန်ပက်လက်မြို့များကို ထိန်းချုပ်ရန် စစ်အုပ်စုတပ်က လွန်ခဲ့သည့် ၅ လအတွင်း ဆောမြို့နယ်သို့ အင်အား ၄,၀၀၀ ဝန်းကျင် ပို့ဆောင်ခဲ့သည်။ ထို့ပြင် မကွေးမြို့မှ စစ်ကား အစီးရေ ၁၈၀ ဝန်းကျင်ဖြင့် အင်အား ၁,၀၀၀ ခန့် ပါဝင်သည့် စစ်ကြောင်း တစ်ကြောင်းသည် ဆောမြို့နယ်၊ လောင်းရှည်မြို့ရှိ ကပစ (၂၅) သို့ ရောက်ရှိနေကြောင်း ဆောမြို့နယ် ပြည်သူ့ ကာကွယ်ရေးအဖွဲ့ (ပကဖ) က စက်တင်ဘာလ ၂၁ ရက်နေ့တွင် ထုတ်ပြန်ထားသည်။ အဆိုပါ စစ်ကြောင်းတွင် ရှမ်းပြည် အခြေစိုက်တပ်များ၊ မတ္တရာမြို့နယ် အရှေ့ခြမ်းမှ စစ်စခန်းအချို့ ပြန်လည် ရုတ်သိမ်းကာ ပြန်လည်စုဖွဲ့ထားသည့် တပ်မ (၈၈) လက်အောက်ခံ တပ်ဖွဲ့ဝင်များ ပါဝင်ကြောင်း မြေပြင်ရှိ စစ်ရေးသတင်းရင်းမြစ်က ပြောသည်။ ဓါတ်ပုံ - Crd #ဆောမြို့နယ်

မကွေးတိုင်း ဆောမြို့နယ် တိုက်ပွဲများအတွင်း စစ်အုပ်စုအထိနာပြီး ဒဏ်ရာရသူများ သယ်ထုတ်နေရ

မကွေးတိုင်း ဆောမြို့နယ် တိုက်ပွဲများအတွင်း စစ်အုပ်စုအထိနာပြီး ဒဏ်ရာရသူများ သယ်ထုတ်နေရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၂၂ ရက်။ မ…

  • September 22, 2026
ရခိုင်တွင် စစ်တပ်၏ လေကြောင်းတိုက်ခိုက်မှုများကြောင့် အရပ်သား သေဆုံးထိခိုက်မှု မြင့်တက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၂ ရက်။ စစ်တွေ-ပုဏ္ဏားကျွန်း စစ်မြေပြင်တွင် အထိနာပြီး စစ်ရေးရှုံးနိမ့်နေသည့် စစ်တပ်သည် ရခိုင်ပြည်အနှံ့ရှိ စစ်ရေး နှင့် မသက်ဆိုင်သော အရပ်သားကျေးရွာများကို ပစ်မှတ်ထား၍ နေ့စဉ်ရက်ဆက် လေကြောင်းမှ ဗုံးကြဲတိုက်ခိုက် နေသဖြင့် အရပ်သား သေဆုံးထိခိုက်မှုများနှင့် ပျက်စီးဆုံးရှုံးမှုများ မြင့်တက်လျက်ရှိသည်။ စက်တင်ဘာလ ၂၁ ရက်နေ့တစ်ရက်တည်း၌ပင် စစ်အုပ်စုတပ်သည် ဂွ၊ ပေါက်တော (ဝီရဌာနီ)၊ မင်းပြား (အဉ္ဇနပူရ) စသည့် မြို့နယ်များကို ဂျက်ဖိုက်တာများဖြင့် ဆက်တိုက် ဗုံးကြဲတိုက်ခိုက်ခဲ့ရာ အမျိုးသမီးတစ်ဦး သေဆုံးပြီး ကလေးငယ်တစ်ဦး အပါအဝင် ပြည်သူ ၃ ဦး ဒဏ်ရာရရှိခဲ့သည်။ ဖြစ်စဉ်များအနက် ပေါက်တောမြို့နယ်၊ တောင်ဖူးကျေးရွာကို စက်တင်ဘာ ၂၁ ရက် နံနက်စောစော ၁၂ နာရီ ၂၅ မိနစ်မှစ၍ စစ်အုပ်စုတပ်က လေကြောင်းမှ တိုက်ခိုက်မှု ၇ ကြိမ်ပြုလုပ်ကာ ဗုံး ၁၀ လုံးထက်မနည်း ကြဲချခဲ့ သည်။ ထိုသို့ တိုက်ခိုက်မှုကြောင့် တောင်ဖူးကူးတို့ဆိပ်အနီး ဗုံးကျရောက်ပေါက်ကွဲခဲ့ပြီး ပုဏ္ဏားကျွန်းမြို့နယ်၊ ကျွဲထိုးပြင် ကျေးရွာမှ တောင်ဖူးကျေးရွာသို့ အလည်ရောက်ရှိနေသူ အသက် ၃၂ နှစ်အရွယ် ဒေါ်ဝင်းမြတ်အေးမှာ ဦးခေါင်း တွင် ပြင်းထန်ဒဏ်ရာရရှိကာ ဆေးကုသမှုခံယူရန် ပို့ဆောင်စဉ် လမ်း၌ ကွယ်လွန်သွားခဲ့သည်။ ထို့ပြင် တောင်းဖူးရွာမှ အသက် ၄၃ နှစ်အရွယ် ဒေါ်အေးခင်သိန်းမှာလည်း ညာဘက်ပခုံးနှင့် ညှပ်ရိုးတို့တွင် ဗုံးစထိမှန် ဒဏ်ရာရရှိခဲ့သည်။ အဆိုပါ လေကြောင်းတိုက်ခိုက်မှုကြောင့် တောင်ဖူးကျေးရွာရှိ ဘုန်းတော်ကြီးကျောင်း ၂ ကျောင်း၊ စာသင် ကျောင်း ၁ ကျောင်းနှင့် တောင်ဖူးဘုရားကြီးတို့မှာလည်း လုံးဝနီးပါး ပျက်စီးသွားခဲ့ရသည်။ ပေါက်တောဒေသခံတစ်ဦးက “ဒီဘက်မှာတော့ လေကြောင်းဗုံးကြဲမှုတွေက ဆက်တိုက်ဆိုသလိုကို ရှိနေတာ။ စစ်တွေတိုက်ပွဲမှာ စစ်တပ်က အထိနာနေတော့ အနီးနားက ရွာတွေကို လိုက်ပြီး ဗုံးကြဲနေတာဖြစ်တယ်။ ဒါ ကြောင့် အခုအချိန်မှာ စစ်တွေနဲ့ နီးတဲ့နေရာတွေဟာ လေကြောင်းအန္တရာယ် အရမ်းများလို့ အထူးသတိထား နေရတယ်” ဟု ပြောသည်။ အလားတူ ရခိုင်ပြည်တောင်ပိုင်း ဂွမြို့နယ်၊ ဆပ်သွားကျေးရွာသို့လည်း စက်တင်ဘာ ၂၁ ရက် နံနက် ၁၁ နာရီ ၂၀ မိနစ်ခန့်တွင် စစ်အုပ်စုတပ်၏ ဂျက်ဖိုက်တာတစ်စီးက ပေါင် ၃၀၀ ဗုံး ၂ လုံး ကြဲချတိုက်ခိုက်ခဲ့သည်။ ထိုတိုက်ခိုက်မှုကြောင့် ကျေးရွာအတွင်း ဗုံးကျရောက်ပေါက်ကွဲကာ (၈) တန်းကျောင်းသား မောင်ဇွဲထက်အောင် (၁၄ နှစ်) နှင့် ဦးနေလင်းအောင် (၄၄ နှစ်) တို့ ထိခိုက်ဒဏ်ရာရရှိခဲ့ပြီး နီးစပ်ရာ ဆေးရုံဆေးခန်းများ၌ ဆေးကုသမှု ခံယူနေရသည်။ ထို့ပြင် လူနေအိမ် ၁ ဆောင်၊ ဆိုင်ခန်း ၃ ခန်း ပျက်စီးခဲ့ရပြီး ဒေသခံများ၏ ဆိတ် ၂ ကောင်လည်း သေဆုံးခဲ့ရသည်။ ထို့ပြင် အာရက္ခတပ်တော် (AA) ထိန်းချုပ်ထားသည့် မင်းပြားမြို့နယ်၊ သစ်ပုတ်တောင်ကျေးရွာ အရှေ့ဘက် တောင်တန်းကိုလည်း စက်တင်ဘာ ၂၁ ရက် မွန်းလွဲ ၁၂ နာရီ ၄၀ မိနစ်တွင် ဂျက်ဖိုက်တာတစ်စီးဖြင့် ဗုံး ၂ လုံး ကြဲချခဲ့သဖြင့် ကျေးရွာအတွင်း ဗုံးစများ ကျရောက်ခဲ့သည်။ မင်းပြားဒေသခံ အမျိုးသမီးတစ်ဦးက “ဂျက်ဖိုက်တာတစ်စီးနဲ့ ဗုံး ၂ လုံး လာကြဲတာပါ။ ရွာအရှေ့ဘက် တောင် တန်းတွေကို ပစ်မှတ်ထားတာဆိုပေမဲ့ လေယာဉ်က ရွာပေါ်မှာ အကြာကြီး ဝဲပျံနေခဲ့တာ။ ရွာထဲကိုလည်း ဗုံးစတွေ လာကျတယ်။ လေယာဉ်ကလည်း လာတော့ အကုန်လုံး မနေရဲကြတော့ဘဲ ဘေးလွတ်ရာကို ထွက်ပြေးနေရတယ်” ဟု ပြောသည်။ ထို့ပြင် မွန်းလွဲ ၁ နာရီဝန်းကျင်တွင် မြေပုံမြို့နယ်ပေါ်၌ ဂျက်ဖိုက်တာတစ်စီး ဝဲပျံခဲ့သဖြင့် မြို့ခံများ စိုးရိမ်ထိတ် လန့်ခဲ့ရသကဲ့သို့ စက်တင်ဘာလ ၂၀ ရက်နေ့ ကလည်း ရသေ့တောင်မြို့နယ် မိုးစဲကျွန်းဒေသ ဇီးကိုင်းရွာသို့ စစ်အုပ်စုတပ်က လက်နက်ကြီး ပစ်ခတ်ခဲ့သဖြင့် ဒေသခံ အမျိုးသမီး ၂ ဦး သေဆုံးခဲ့ရသေးသည်။ စစ်အုပ်စုတပ်သည် ပြီးခဲ့သည့် ရက်ပိုင်းကစ၍ “၄၉၂၆ စစ်ဆင်ရေး” အမည်ဖြင့် ပုဏ္ဏားကျွန်းမြို့နယ်ကို စစ်တွေမြို့မှနေ၍ ကြည်း၊ ရေ၊ လေ အင်အားအမြောက်အမြားသုံးကာ ထိုးစစ်ဆင်ခဲ့သော်လည်း တပ်ဦးကျိုးကာ အထိနာဆုတ်ခွာခဲ့ရသည်။ အဆိုပါ တိုက်ပွဲအတွင်း စစ်အုပ်စုတပ်၏ ရုပ်အလောင်းများ၊ စစ်သုံ့ပန်းများနှင့် လက်နက်ခဲယမ်း အများအပြားကို အာရက္ခတပ်တော်က သိမ်းပိုက်ရရှိခဲ့သည်။ မြေပြင်စစ်ရေးတွင် အရေးနိမ့်နေသည့် စစ်အုပ်စုတပ်၏ အခြေအနေနှင့် ပတ်သက်၍ ရခိုင်ဒေသခံတစ်ဦးက “ဒီလထဲ စစ်တွေတိုက်ပွဲမှာ စစ်တပ်က အရမ်းအထိနာနေတာ။ အဲ့လိုအထိနာပြီး တပ်ဆုတ်ခဲ့ရတော့ စစ်ရေးနဲ့ လုံးဝမသက်ဆိုင်တဲ့ ရွာတွေကို ရည်ရွယ်ချက်ရှိရှိ နေ့တိုင်း မနားတမ်း လိုက်ဗုံးကြဲနေတာပါ” ဟု ပြောသည်။ လက်ရှိတွင် စစ်အုပ်စုတပ်သည် ပုဏ္ဏားကျွန်း၊ မြောက်ဦး၊ ကျောက်တော်၊ ရသေ့တောင်၊ ပေါက်တော (ဝီရဌာနီ)၊ မင်းပြား (အဉ္ဇနပူရ)၊ သံတွဲနှင့် ကျောက်ဖြူ စသည့် မြို့နယ်များရှိ လူနေရပ်ကွက်များနှင့် ကျေးရွာများကို လေကြောင်း၊ ရေကြောင်းနှင့် လက်နက်ကြီးများဖြင့် နေ့စဉ်ရက်ဆက် ရည်ရွယ်ချက်ရှိရှိ ပစ်ခတ်တိုက်ခိုက်လျက် ရှိသည်။ ဓါတ်ပုံ - Crd #စစ်တွေ

ရခိုင်တွင် စစ်တပ်၏ လေကြောင်းတိုက်ခိုက်မှုများကြောင့် အရပ်သား သေဆုံးထိခိုက်မှု မြင့်တက်

ရခိုင်တွင် စစ်တပ်၏ လေကြောင်းတိုက်ခိုက်မှုများကြောင့် အရပ်သား သေဆုံးထိခိုက်မှု မြင့်တက် သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၂၂ ရက်။ …

  • September 22, 2026
စစ်တွေမှ လှမ်းပစ်သည့် လက်နက်ကြီးကြောင့် ရသေ့တောင်မှ သားအမိနှစ်ဦး သေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၁ ရက်။ ရခိုင်ပြည်၊ ရသေ့တောင်မြို့နယ်ရှိ ကျေးရွာများအတွင်းသို့ စစ်တွေမြို့ရှိ တပ်ရင်းများမှ စစ်အုပ်စုတပ်က လက်နက်ကြီးများဖြင့် လှမ်းပစ်ခတ်မှုကြောင့် ဒေသခံ သားအမိနှစ်ဦး ထိမှန်သေဆုံးခဲ့သည်။ စက်တင်ဘာလ ၂၀ ရက်နေ့ နံနက်ပိုင်းတွင် စစ်တွေဘက်မှ ပစ်ခတ်လိုက်သည့် လက်နက်ကြီးကျည်သည် ဇီးကိုင်းကျေးရွာအတွင်းသို့ ကျရောက်ပေါက်ကွဲခဲ့ခြင်းဖြစ်သည်။ အဆိုပါ ပေါက်ကွဲမှုကြောင့် မိခင်ဖြစ်သူ ဒေါ်အေးနုဖြူ (၇၂ နှစ်) မှာ ဘယ်ဘက်ရင်အုံအထက် ညှပ်ရိုးသို့ အစထိမှန်ခဲ့ပြီး သမီးဖြစ်သူ ဒေါ်မရွှေတင် (၄၂ နှစ်) မှာ ဦးခေါင်းသို့ အစထိမှန်ကာ နှစ်ဦးစလုံး နေရာတွင်ပင် သေဆုံးခဲ့ရသည်။ ဒေသခံ အမျိုးသမီးတစ်ဦးက “စစ်ပွဲဖြစ်ရင် ကျွန်မတို့ အမျိုးသမီးတွေက ဟိုလူ့ငှဲ့ရ ဒီလူ့စိတ်မချရနဲ့ တော်တော် ခက်ခဲပါတယ်။ အခု ရသေ့တောင်နယ်က ကျေးရွာတွေကို စစ်တွေက တပ်ရင်းတွေက လက်နက်ကြီးတွေနဲ့ ပစ် နေတာ သုံးလေးရက်ရှိပြီ။ လေယာဉ်တွေလည်း ဝဲပျံနေတယ်၊ ညနေပိုင်းက ဗုံးကြဲသွားသေးတယ်” ဟု ပြော သည်။ စက်တင်ဘာလ ၂၀ ရက်နေ့ ညနေ ၄ နာရီခွဲကျော်တွင်လည်း စစ်အုပ်စုတပ်သည် ရသေ့တောင်မြို့နယ်အတွင်းသို့ လေကြောင်းမှ ဗုံးကြဲတိုက်ခိုက်ခဲ့ရာ နယ်စပ်တောင်တန်းများနှင့် ကျေးရွာအချို့အနီး ကျရောက်ခဲ့ကြောင်း ဒေသခံ များက ပြောသည်။ စစ်အုပ်စုတပ်သည် စက်တင်ဘာလ ၄ ရက်နေ့မှစ၍ အင်အားဖြည့်တင်းကာ ထိုးစစ်ဆင်နေသည့် ပုဏ္ဏားကျွန်းမြို့ နယ်နှင့် ရသေ့တောင်မြို့နယ်တို့မှာ အလွန်နီးကပ်စွာ တည်ရှိပြီး စစ်တွေမြို့ရှိ တပ်ရင်းများ၏ လက်နက်ကြီး ပစ်ခတ်နိုင်သည့် အကွာအဝေးအတွင်း တည်ရှိနေသည်။ ထို့ကြောင့် စစ်အုပ်စုတပ်သည် စစ်ရေးနှင့် မသက်ဆိုင်သည့် အရပ်သား ပြည်သူများ နေထိုင်ရာ ကျေးရွာများ အတွင်းသို့ လေကြောင်းမှ ဗုံးကြဲခြင်းနှင့် လက်နက်ကြီးများဖြင့် လှမ်းပစ်ခြင်းများကို ဆက်တိုက် ပြုလုပ်လျက် ရှိသည်။ “အခုရက်ပိုင်း စစ်တွေနဲ့ ပုဏ္ဏားကျွန်း အစပ်မှာ တိုက်ပွဲတွေ အရမ်းပြင်းထန်နေတယ်။ စစ်မြေပြင်မှာ အထိနာ နေတဲ့ စစ်တပ်က ပုဏ္ဏားကျွန်း၊ ရသေ့တောင်နဲ့ ပေါက်တော ဘက်တွေကို လေကြောင်းရော၊ စစ်တွေက တပ်ရင်းတွေက လက်နက်ကြီးတွေရော၊ နေဗီ (ရေတပ်) ကပါ ဆက်တိုက် ရမ်းသန်းပစ်နေတာ။ စက်တင်ဘာ ၂၀ ရက် မနက်ပိုင်းကဆိုရင် စစ်တွေကနေ ပစ်လိုက်တဲ့ လက်နက်ကြီးကျည်တွေ ဇီးကိုင်းရွာထဲ ကျရောက် ပေါက်ကွဲပြီး သားအမိနှစ်ဦးစလုံး ပွဲချင်းပြီး သေဆုံးသွားတာပါ” ဟု ဒေသခံအမျိုးသားတစ်ဦးက ပြောသည်။ ပြီးခဲ့သည့် စက်တင်ဘာလ ၁၇ ရက်နေ့ကလည်း စစ်အုပ်စုတပ်သည် ပုဏ္ဏားကျွန်းမြို့နယ်၊ ဖက်ကျကျေးရွာကို လေကြောင်းမှ မီးလောင်ဗုံး ကြဲချခဲ့သဖြင့် ပြည်သူ့နေအိမ်တစ်ဆောင် မီးလောင်ပြာကျခဲ့ကာ ဒေသခံ အမျိုးသားတစ်ဦး ပြင်းထန်ဒဏ်ရာ ရရှိခဲ့သည်။ ထို့ပြင် စက်တင်ဘာလ ၁၇ ရက်နေ့ နံနက်ပိုင်း၌ ပုဏ္ဏားကျွန်းမြို့နယ်၊ ကွမ်းတောင်ကျေးရွာနှင့် မင်းချောင်းတံတား ဝန်းကျင်သို့ စစ်တိုက်လေယာဉ်များဖြင့် တစ်နေ့လုံးနီးပါး လေကြောင်းမှ ဗုံးကြဲတိုက်ခိုက်ခဲ့သည်။ (ဓာတ်ပုံ - စစ်တွေမြို့ရှိ စစ်အုပ်စု တပ်ရင်းများမှ လှမ်းပစ်လိုက်သည့် လက်နက်ကြီးကျည် ကျရောက်မှုကြောင့် ပျက်စီးသွားသော ဇီးကိုင်းကျေးရွာအနီးဝန်းကျင်။ Crd - NMG) #ရသေ့တောင်မြို့နယ်

စစ်တွေမှ လှမ်းပစ်သည့် လက်နက်ကြီးကြောင့် ရသေ့တောင်မှ သားအမိနှစ်ဦး သေဆုံး

စစ်တွေမှ လှမ်းပစ်သည့် လက်နက်ကြီးကြောင့် ရသေ့တောင်မှ သားအမိနှစ်ဦး သေဆုံး သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၂၁ ရက်။ ရခိုင်ပြည်၊ ရသေ…

  • September 21, 2026
ဒီမိုကရေစီနှင့် ဖက်ဒရယ်စနစ် တပြိုင်တည်း ဖော်ဆောင်ရန် တော်လှန်ရေးခေါင်းဆောင်များ တိုက်တွန်း သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၁ ရက်။ ဒီမိုကရေစီနှင့် ဖက်ဒရယ်စနစ်ကို တစ်ပြိုင်နက်တည်း အကောင်အထည်ဖော်မှသာ ရေရှည်ငြိမ်းချမ်းသည့် ပြည်ထောင်စုသစ်ကို တည်ဆောက်နိုင်မည်ဟု တော်လှန်ရေးခေါင်းဆောင်များက တိုက်တွန်းပြောဆိုလိုက်သည်။ ပြည်ထောင်စုလွှတ်တော် ကိုယ်စားပြုကော်မတီ (CRPH) က ကြီးမှူးကျင်းပသည့် စက်တင်ဘာလ ၁၅ ရက်နေ့ တွင် ကျရောက်သော နိုင်ငံတကာ ဒီမိုကရေစီနေ့ အခမ်းအနားသို့ ပေးပို့သည့် သဝဏ်လွှာနှင့် မိန့်ခွန်းများ၌ ဖက်ဒရယ်ဒီမိုကရေစီ ပြည်ထောင်စု ပေါ်ထွန်းရေး ဦးဆောင်ကောင်စီ (SCEF) နှင့် အမျိုးသားညီညွတ်ရေးအစိုးရ (NUG) တို့မှ ခေါင်းဆောင်များက ထိုသို့ ထည့်သွင်းပြောဆိုခဲ့ကြခြင်းဖြစ်သည်။ SCEF အလှည့်ကျသဘာပတိ ခူဦးရယ် က “ဖက်ဒရယ်စနစ် မပါဝင်သော ဒီမိုကရေစီသည် မြန်မာနိုင်ငံအတွက် ရေရှည်တည်တံ့သော ငြိမ်းချမ်းရေးကို ဆောင်ကြဉ်းပေးနိုင်မည် မဟုတ်သကဲ့သို့ ဒီမိုကရေစီစံနှုန်းများ ကင်းမဲ့ သည့် ဖက်ဒရယ်စနစ်သည်လည်း စစ်မှန်သော လွတ်လပ်မှုကို ပေးနိုင်မည် မဟုတ်ပါ။ ထို့ကြောင့် SCEF အနေ ဖြင့် တိုင်းရင်းသားအဖွဲ့အစည်းများ၊ ဒီမိုကရေစီအင်အားစုများနှင့် ပူးပေါင်း၍ စစ်မှန်သော ဖက်ဒရယ် ဒီမိုက ရေစီ ပြည်ထောင်စုကြီး ပေါ်ထွန်းလာရေးအတွက် ခိုင်မာသော မူဝါဒလမ်းကြောင်းများဖြင့် အစွမ်းကုန် စုစည်း ဆောင်ရွက်လျက်ရှိနေသည်ကို တိုင်းရင်းသားပြည်သူလူထုနှင့် နိုင်ငံတကာအသိုက်အဝန်းကို ယနေ့တွင် ထပ်လောင်း အသိပေးအပ်ပါသည်” ဟု ပြောသည်။ လက်ရှိ စစ်အုပ်စုက ဖန်တီးထားသော ရွေးတုလွှတ်တော်နှင့် အစိုးရအမည်ခံ အဖွဲ့အစည်းသည် တိုင်းပြည်ကို ဆက်လက်ထိန်းချုပ်ထားနိုင်ရန်နှင့် စစ်အုပ်ချုပ်ရေးကို တရားဝင်မှု ရစေရန် စီစဉ်ထားသော လှည့်ကွက်တစ်ခု သာ ဖြစ်ပြီး ဒီမိုကရေစီ လမ်းကြောင်းနှင့် ငြိမ်းချမ်းရေး လမ်းကြောင်းကို ဦးတည်နေခြင်း မဟုတ်ကြောင်းလည်း ခူဦးရယ်က ထောက်ပြထားသည်။ ထို့အတူ NUG ယာယီသမ္မတ ဒူဝါလရှီးလ ကလည်း နွေဦးတော်လှန်ရေးသည် ဒီမိုကရေစီစနစ် တစ်ခုတည်းတွင် လမ်းမဆုံးဘဲ ဖက်ဒရယ် ပြည်ထောင်စု တည်ဆောက်နိုင်သည့်အထိ မျဉ်းပြိုင် ဖော်ထုတ်သွားရမည်ဟု တိုက်တွန်းထားသည်။ NUG ယာယီသမ္မတ ဒူဝါလရှီးလ က “ကျနော်တို့ နိုင်ငံဟာ လူမျိုးစု အမှတ်သရုပ်ပေါင်းစုံ များပြားစုံလင်တဲ့ တိုင်းပြည်တစ်ခုလည်း ဖြစ်ပါတယ်။ ဒါ့ကြောင့် ဒီမိုကရေစီစနစ် တစ်ခုတည်းနဲ့ မပြည့်စုံနိုင်တဲ့ အနေအထားမှာ ရှိပါတယ်။ ဖက်ဒရယ်စနစ်ကိုပါ ထည့်သွင်း တည်ဆောက်ဖို့ လုပ်ကြရတယ်လို့ ကျနော် ယုံကြည်ပါတယ်။ ဒီနေ့ ကျနော်တို့ အားလုံး ဖြတ်သန်းချီတက်နေတဲ့ ‘နွေဦးတော်လှန်ရေး’ ဟာ၊ ‘ဖက်ဒရယ်ဒီမိုကရေစီစနစ်’ နဲ့ တိုင်း သစ်ပြည်သစ် တည်ထောင်ဖို့အတွက် ကြိုးစားနေကြတဲ့ ရုန်းကန်မှုကြီးပဲ ဖြစ်ပါတယ်။ တိုင်းရင်းသား ပြည်သူ တစ်ရပ်လုံးဟာ ဒီမိုကရေစီစနစ်ကို လိုလားသလို၊ ဖက်ဒရယ်စနစ်ကို တောင့်တမျှော်လင့်နေကြပါတယ်။ ကျနော်တို့ အနေနဲ့ ဒီမိုကရေစီလှုပ်ရှားမှုမှာတင် လမ်းမဆုံးစေဘဲနဲ့ ဖက်ဒရယ်လှုပ်ရှားမှုတွေကိုပါ မျဉ်းပြိုင် သဖွယ် တွန်းတင်ဖော်ထုတ်ကြဖို့ လိုပါတယ်” ဟု ပြောသည်။ ဆက်လက်၍ အားလုံး၏ ဘုံရည်မှန်းချက် ဖြစ်သော ဖက်ဒရယ်ဒီမိုကရေစီ ပြည်ထောင်စုသစ် ထူထောင်နိုင်ရန် အတွက် တပ်ပေါင်းစုံ သဏ္ဍာန်ဆောင်သည့် SCEF ကို ဖွဲ့စည်းကာ စစ်အာဏာရှင်စနစ် အမြစ်ပြတ်ရေး လုပ်ဆောင်နေပြီဟု ယာယီသမ္မတက ဖြည့်စွက်ပြောဆိုသည်။ ၎င်းက “အခုဆိုရင် ကျနော်တို့ နွေဦးတော်လှန်ရေးအင်အားစုအားလုံးဟာ SCEF လို့ ခေါ်တဲ့ ‘တပ်ပေါင်းစုံ သဏ္ဍာန်’ တော်လှန်ရေးတပ်ဦးတစ်ခုကို အတူတကွ ဖော်ဆောင်နေကြပါတယ်။ ဒါဟာ ဘာအတွက်လဲ ဆိုရင်၊ ဖက်ဒရယ် ဒီမိုကရေစီနိုင်ငံသစ် ထူထောင်ရေးအတွက်ပဲ ဖြစ်ပါတယ်။ ဖက်ဒရယ်ဒီမိုကရေစီ နိုင်ငံသစ်ထူထောင် ဖို့ အတွက် စစ်အာဏာရှင်စနစ်ကို အမြစ်ကနေ လှန်ထုတ်တိုက်ဖျက်ပစ်ဖို့ လိုပါတယ်။ ကျနော်တို့အနေနဲ့ တစ် ဖက်မှာ တော်လှန်ရေးတာဝန်တွေကို လုပ်ဆောင်နေသလို၊ တစ်ဖက်မှာလည်း တည်ဆောက်ရေး တာဝန်တွေကို ထမ်းရွက်နေပါတယ်။ ဒါဟာ အမာနဲ့ အနုလို သဘောတရားမျိုး ရှိပါတယ်” ဟု ပြောဆိုသည်။ ထို့ပြင် NUG ပြည်ထောင်စုဝန်ကြီးချုပ် မန်းဝင်းခိုင်သန်း ကလည်း အခမ်းအနား အဖွင့်မိန့်ခွန်းတွင် စစ်အာဏာ ရှင် စနစ်ဆိုးကို အမြစ်ဖြတ်နိုင်ရန် ဘုံရည်မှန်းချက်နှင့် တာဝန်ယူမှုများအပေါ် အခြေခံသည့် စည်းလုံးညီညွတ်မှု ကို တည်ဆောက်ရမည်ဟု ပြောသည်။ NUG ပြည်ထောင်စုဝန်ကြီးချုပ် မန်းဝင်းခိုင်သန်း က “ကျနော်တို့အားလုံးဟာ ဘုံရန်သူဖြစ်တဲ့ စစ်အာဏာရှင် စနစ်ကို တိုက်ဖျက်နေကြတာ ဖြစ်တဲ့အတွက် တစ်သံတည်း၊ တစ်မိန့်တည်းနဲ့ စနစ်တကျ စုစည်းညီညွတ်စွာ ချီတက်နိုင်မှသာ ကျနော်တို့ လိုလားတဲ့ ပန်းတိုင်ကို ပိုမိုမြန်ဆန်စွာ ရောက်ရှိနိုင်မှာ ဖြစ်ပါတယ်” ဟု ပြောသည်။ လက်ရှိ နွေဦးတော်လှန်ရေးသည် လူမျိုးရေး၊ ဘာသာရေး ခွဲခြားမှုမရှိဘဲ အားလုံးတန်းတူ ပါဝင်ခွင့်ရှိသည့် ဖက်ဒရယ်ဒီမိုကရေစီ ပြည်ထောင်စု တည်ဆောက်ရေး လမ်းကြောင်းပေါ်တွင် တိုင်းရင်းသား တော်လှန်ရေး အင်အားစုများနှင့် နွေဦးတော်လှန်ရေး အင်အားစုများအကြား ပိုမိုခိုင်မာသည့် နိုင်ငံရေး သဘောတူညီချက်များ ရရှိကာ ဆက်လက် ချီတက်လျက်ရှိသည်ဟု ဆိုကြသည်။ ဓာတ်ပုံ - (NMG / ပုံဟောင်း) #Federal

ဒီမိုကရေစီနှင့် ဖက်ဒရယ်စနစ် တပြိုင်တည်း ဖော်ဆောင်ရန် တော်လှန်ရေးခေါင်းဆောင်များ တိုက်တွန်း

ဒီမိုကရေစီနှင့် ဖက်ဒရယ်စနစ် တပြိုင်တည်း ဖော်ဆောင်ရန် တော်လှန်ရေးခေါင်းဆောင်များ တိုက်တွန်း သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၂၁ ရက်။…

  • September 21, 2026
စစ်တွေ-ပုဏ္ဏားကျွန်းအစပ် တိုက်ပွဲတွင် စစ်တပ်ဘက်မှ တပ်သားများနှင့် လက်နက်များ ဆုံးရှုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၀ ရက်။ ရခိုင်ပြည်ကို ပြန်လည်သိမ်းပိုက်ရန် ထိုးစစ်ဆင်နေသည့် စစ်အုပ်စုတပ်သည် စစ်တွေ-ပုဏ္ဏားကျွန်းမြို့နယ်အစပ် တိုက်ပွဲများအတွင်း အကျအဆုံးများပြားနေသည့်အပြင် တပ်သားများနှင့် လက်နက်ခဲယမ်းများပါ ဆုံးရှုံးနေရ သည်။ ပြီးခဲ့သည့် စက်တင်ဘာလ ၁၆ ရက်နေ့က ကွမ်းတောင်နှင့် အမြင့်ကျွန်းကျေးရွာကြား ဖြစ်ပွားခဲ့သည့် တိုက်ပွဲ အတွင်း ပခုက္ကူအခြေစိုက် အမှတ် (၁၀၁) တပ်မဌာနချုပ်လက်အောက်ခံ၊ ခလရ (၂၅၂) တပ်ရင်းမှ တပ်သား အောင်ပြည့်စုံနှင့် တပ်သား မိုင်ကယ်တို့အပါအဝင် စစ်သား ၄ ဦးထက်မနည်း စစ်သုံ့ပန်း အဖြစ် ဖမ်းဆီးခံခဲ့ရသည်။ အလားတူ ဒရုန်းအပါအဝင် လက်နက်ခဲယမ်းများကိုပါ အာရက္ခတပ်တော် (AA) က သိမ်းဆည်းရရှိခဲ့သည်။ ဖမ်းဆီးခံခဲ့ရသူ တပ်သား အောင်ပြည့်စုံ က “အင်အားများတယ်ဆိုပြီး တပ်စိတ်မှူးက ပြေးတယ်။ ကျနော်တို့ကို ထားခဲ့တယ်။ ကျနော်တို့ ဖမ်းခံလိုက်ရတယ်။ သစ္စာလည်းမရှိဘူး၊ ကိုယ်ချင်းစာစိတ်လည်းမရှိဘူး၊ သားသမီး စိတ်ဓာတ်လည်းမရှိဘူး” ဟု ထွက်ဆိုထားသည်။ စစ်အုပ်စုတပ်သည် ရခိုင်ပြည်ကို ပြန်လည်သိမ်းပိုက်နိုင်ရေးအတွက် စက်တင်ဘာလ ၄ ရက်နေ့မှစ၍ စစ်ကြောင်းများခွဲကာ စစ်အင်အား ၁,၀၀၀ ကျော်ဖြင့် '၄၉၂၆ စစ်ဆင်ရေး' (ရန်နိုင်အောင်စစ်ဆင်ရေး) ကို စတင် ခဲ့ခြင်း ဖြစ်သည်။ သို့သော်လည်း တိုက်ပွဲများအတွင်း အရှုံးများနှင့် ရင်ဆိုင်နေရပြီး စစ်ကြောင်းပါ တပ်သားများမှာ တိုက်ပွဲဧရိယာ အတွင်း အကျအဆုံး များပြားလျက်ရှိသည်။ ထိုကဲ့သို့ ထိုးစစ်များ စစ်ရေးအရ အဆင်မပြေဖြစ်နေ၍ စစ်အုပ်စုတပ်သည် အရပ်သား ပြည်သူများနေထိုင်ရာ ကျေးရွာများသို့ လေကြောင်းဗုံးကြဲမှုနှင့် လက်နက်ကြီး ပစ်ခတ်မှုများကို ဆက်တိုက် ပြုလုပ်လျက်ရှိသည်။ စက်တင်ဘာလ ၁၇ ရက်နေ့ နံနက်ပိုင်းကလည်း ပုဏ္ဏားကျွန်းမြို့နယ်၊ ကွမ်းတောင်ကျေးရွာနှင့် မင်းချောင်း တံတား အနီးဝန်းကျင်သို့ စစ်တိုက်လေယာဉ်များဖြင့် တစ်နေ့လုံးနီးပါး လေကြောင်းမှ တိုက်ခိုက်ခဲ့သည်။ ဒေသခံ စစ်ရေးသတင်းအရင်းအမြစ် အမျိုးသားတစ်ဦးက “စစ်တွေနဲ့ ပုဏ္ဏားကျွန်း အစပ်က ရွာတွေကိုစစ်တပ် က လေယာဉ်တွေရော၊ ဒရုန်းတွေပါ သုံးပြီး အုပ်စုလိုက် ဗုံးကြဲနေတာ။ တိုက်ပွဲက ၂ ပတ်ကျော် ပြင်းထန်လာ တာပါ” ဟု ပြောသည်။ လက်ရှိတွင် စစ်တွေ-ပုဏ္ဏားကျွန်း အစပ်၌ တိုက်ပွဲများ ပြင်းထန်နေဆဲဖြစ်ပြီး လေကြောင်းနှင့် လက်နက်ကြီး တိုက်ခိုက်မှုများကြောင့် ပုဏ္ဏားကျွန်းမြို့နယ်အတွင်းရှိ ကွမ်းတောင်၊ စပါးထား၊ ဖက်ကျနှင့် ဒီပါရုံ အပါအဝင် ကျေးရွာ ၂၀ ကျော်မှ ဒေသခံများသည် ဘေးလွတ်ရာသို့ တိမ်းရှောင်နေကြရသည်။ ထို့ပြင် စစ်အုပ်စုတပ်သည် ကျောက်ဖြူ၊ စစ်တွေ၊ သံတွဲနှင့် ဂွမြို့နယ်တို့ရှိ AA ထိန်းချုပ်နယ်မြေများကို ပြန်လည် ရယူရန် ထိုးစစ်ဆင်နေသည့်အပြင် ရခိုင်ရိုးမအရှေ့ဘက်ခြမ်းရှိ မကွေး၊ ပဲခူး၊ ဧရာဝတီတိုင်း ဒေသကြီးများနှင့် ချင်းပြည်၊ မင်းတပ်မြို့နယ်တို့မှတစ်ဆင့် ရခိုင်ဘက်သို့ ထိုးဖောက်ဝင်ရောက်နိုင်ရန်လည်း ကြိုးပမ်းလျက် ရှိသည်။ ဓါတ်ပုံ - (စစ်တွေ-ပုဏ္ဏားကျွန်းအစပ် တိုက်ပွဲအတွင်း သိမ်းဆည်းရမိသော လက်နက်ခဲယမ်းများနှင့် စစ်သုံ့ပန်း များ။ / AA Info Desk) #စစ်တွေ

စစ်တွေ-ပုဏ္ဏားကျွန်းအစပ် တိုက်ပွဲတွင် စစ်တပ်ဘက်မှ တပ်သားများနှင့် လက်နက်များ ဆုံးရှုံး

စစ်တွေ-ပုဏ္ဏားကျွန်းအစပ် တိုက်ပွဲတွင် စစ်တပ်ဘက်မှ တပ်သားများနှင့် လက်နက်များ ဆုံးရှုံး သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၂၀ ရက်။ …

  • September 21, 2026
ချင်းတော်လှန်ရေး အစိုးရက အခြေခံကျောင်း ၃၇၀ ကျော်နှင့် တက္ကသိုလ်၊ ဆေးကျောင်းများပါ တိုးချဲ့ဖွင့်လှစ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၁ ရက်။ ချင်းလဲန်းကောင်စီ/ ချင်းပြည်အစိုးရသည် စစ်ရေးပဋိပက္ခများ ကြားထဲမှပင် ဒေသတွင်း ပညာရေးနှင့် ကျန်းမာရေးကဏ္ဍများကို အရှိန်အဟုန်မြှင့် တိုးချဲ့ဆောင်ရွက်လျက်ရှိသည်။ အခြေခံပညာကျောင်းများနှင့် တက္ကသိုလ်များကို ကိုယ်တိုင်ဖွင့်လှစ်ထားရုံမက အိမ်နီးချင်းနိုင်ငံများတွင် အဆင့် မြင့်ပညာ ဆက်လက်သင်ကြားနိုင်ရန်ပါ သက်ဆိုင်ရာ အာဏာပိုင်များ၊ တက္ကသိုလ်များနှင့် ညှိနှိုင်းနေ ကြောင်း ချင်းပြည်အစိုးရ၏ ၂ နှစ်ခွဲကာလ အုပ်ချုပ်ရေးဖော်ဆောင်မှု အစီရင်ခံစာတွင် ဖော်ပြထားသည်။ အဆိုပါ လုပ်ငန်းစဉ်များနှင့် ပတ်သက်၍ ကျန်းမာရေးဝန်ကြီး ဒေါက်တာ ရှာရွန်ပါရ် က ယခုကဲ့သို့ ပြောသည်။ ၎င်းက “ကျမတို့ ဒီလို ခက်ခဲနေတဲ့ ကာလအတွင်းမှာပင်လျှင် အခြေခံ ကျောင်းပေါင်း ၃၇၃ ကျောင်း ဖွင့်လှစ်နိုင် ခဲ့တယ်။ အခုလည်း လက်ရှိ ဖွင့်လှစ်နေပါတယ်။ ပြီးတော့ ကျောင်းသား ကျောင်းသူ အနေနဲ့ကတော့ သုံးသောင်းခွဲကျော် ရှိပါတယ်။ ပြီးတော့ ဆရာ/မ တွေ ၃၀၀၀ ကျော်နဲ့ ဒီကျောင်းများကို သင်ကြားရေး လုပ် ငန်းဆောင်ရွက်နေတာ ဖြစ်တယ်။ အခု လက်ရှိမှာ ကျမတို့က chin national university ဆိုပြီးတော့ အဆင့် မြင့် ပညာအတွက်လည်း စပြီးတော့ သင်ကြားရေးတွေ စနေပါပြီ။ ၂၀၂၅ ကနေ စပါတယ်။ အခုဆိုရင် အဓိက မေဂျာ ၄ ခုနဲ့ စပြီးတော့ သင်ကြားနေပြီ ဖြစ်ပါတယ်လို့” ဟု ပြောသည်။ ၂၀၂၄ ခုနှစ်မှ စတင်၍ ချင်းပြည်အနှံ့ ကျေးရွာပေါင်း ၆၆၁ ရွာတွင် အခြေခံပညာကျောင်းပေါင်း ၃၇၃ ကျောင်း၌ ကျောင်းသား၊ ကျောင်းသူ ၃၅,၀၀၀ ကျော်ကို ဆရာ/ဆရာမ ၃,၀၀၀ ကျော်ဖြင့် ပုံမှန်ဖွင့်လှစ် သင်ကြားပေးနေ ခြင်း ဖြစ်သည်ဟု ဆိုသည်။ ထို့ပြင် မြို့နယ်နှင့် ဒေသ ၅ ခုတွင် တက္ကသိုလ်အကြိုသင်တန်းကျောင်းများအပြင် ချင်းအမျိုးသားတက္ကသိုလ် (CNU) ၌လည်း ပညာရေး၊ ဥပဒေ၊ နည်းပညာနှင့် အသက်မွေးဝမ်းကျောင်း ဌာန ၃ ခုဖွင့်လှစ်၍ ကျောင်းသား ၄၀၀ ကျော်ကို သင်ကြားပေးလျက်ရှိသည်။ တစ်ဖက်တွင်လည်း ကျန်းမာရေးဝန်ထမ်းများနှင့် လူငယ်များ အဆင့်မြင့်ပညာရေး သင်ယူနိုင်ရန် အမျိုးသား ညီညွတ်ရေးအစိုးရ (NUG) နှင့် ပူးပေါင်းကာ ဆေးကျောင်းနှင့် သူနာပြုကျောင်းများကိုပါ ဖွင့်လှစ်ထားရှိသည်။ ဒေါက်တာ ရှာရွန်ပါရ် က “ဒီ NUG နဲ့ ပေါင်းပြီး ကျမတို့ medical school nursing school တွေ ကျမတို့ ဆောင်ရွက်နေတာ ဖြစ်ပါတယ်။ ကျမတို့ ကျန်းမာရေးစနစ်တည်ထောင်ဖို့ဆိုရင် အဓိက အရေးကြီးဆုံးက လူ တွေပဲ ဖြစ်တယ်။ အဲဒါကြောင့် ကျမတို့က ကျန်းမာရေး လူ့စွမ်းအားအရင်းအမြစ်ကိုလည်း အဓိကထားပြီး တော့ မွေးထုတ်တယ်။ သူတို့ရဲ့ အရည်အချင်းတွေ တိုးတက်အောင် ကျမတို့ ဆောင်ရွက်နေတာ ဖြစ်ပါတယ်။ အခုဆိုရင် ကျမတို့ nursing and midwifery school ၂၀၂၄ ကနေစထည့်တာ second Batch ဖြစ်သွားပါပြီ အခုဆိုရင် ၁၁၂ ယောက်ပေါ့နော်။ သင်ကြားနေပါတယ်။ ပြီးတော့ medical school ကို ကျမတို့ မနှစ်ကတည်း က စပြီးတော့ ပြင်ဆင်နေတာ ဒီနှစ်မှာ ကျမတို့စပြီးတော့ First Batch ဖွင့်နိုင်ပါပြီ။ ၃၇ ယောက် စာသင်ကြား နေပါတယ် ဆိုတာလေးကို တင်ပြချင်ပါတယ်” ဟု ဆက် ပြောသည်။ ချင်းပြည်အစိုးရ ပညာရေးဝန်ကြီးဌာနအနေဖြင့် (Chinland) ဖက်ဒရယ် ဒီမိုကရေစီ ပညာရေးမူဝါဒနှင့် ပညာရေး မဟာဗျူဟာ လုပ်ငန်းစဉ် (၂၀၂၅-၂၀၃၀) တို့ကို ရေးဆွဲထားပြီးဖြစ်ကြောင်း ဖော်ပြထားသည်။ ရှေ့ဆက်၍ အဆင့်မြင့်ပညာရေး မူဝါဒ ရေးဆွဲရေး၊ နိုင်ငံတကာ အဖွဲ့အစည်းများနှင့် ချိတ်ဆက်ရေး၊ ဆရာ/မများ အရည်အသွေး မြှင့်တင်ရေးနှင့် ပညာသင်ဆုများ တိုးချဲ့ပေးနိုင်ရေးတို့ကို ဦးစားပေး ဆောင် ရွက်သွားမည်ဖြစ်၍ ပြည်တွင်း/ပြည်ပရှိ ချင်းလူမျိုးများနှင့် နိုင်ငံတကာ အဖွဲ့အစည်းများအနေဖြင့် ဘက်ပေါင်းစုံမှ ပါဝင်ကူညီကြရန် ဖိတ်ခေါ်ထားသည်။ ဓါတ်ပုံ - ပုံဟောင်း #Chinlandcouncil

ချင်းတော်လှန်ရေး အစိုးရက အခြေခံကျောင်း ၃၇၀ ကျော်နှင့် တက္ကသိုလ်၊ ဆေးကျောင်းများပါ တိုးချဲ့ဖွင့်လှစ်

ချင်းတော်လှန်ရေး အစိုးရက အခြေခံကျောင်း ၃၇၀ ကျော်နှင့် တက္ကသိုလ်၊ ဆေးကျောင်းများပါ တိုးချဲ့ဖွင့်လှစ် သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာ…

  • September 21, 2026
×Close