သတင်း

အင်းတော်၌ ကွင်းလမ်းသစ် ပြန်ဖွင့်ပေးရန် ယာဉ်မောင်းများ တောင်းဆို   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၂၁ ရက်။   မန္တလေး-မြစ်ကြီးနား ပြည်ထောင်စုလမ်းမကြီး၏ စစ်ကိုင်းတိုင်း၊ အင်းတော်မြို့နယ်အတွင်း သွားလာနေသည့် ကွင်းလမ်းအား ကျောက်ခင်းပြုပြင်ရန် ပိတ်ထားစဉ် အစားထိုး လမ်းသစ်မှ သွားလာခိုင်းသဖြင့် ယာဉ်မောင်း မျာနှင့် ကုန်သည်များ စုပေါင်းကာ လမ်းကြောင်း ပြန်လည်ဖွင့်လှစ်ပေးရန် ကာကွယ်ရေးတပ်ဖွဲ့များနှင့် သွားရောက်တွေ့ဆုံ ညှိနှိုင်းခဲ့ကြသည်။   ဖြစ်စဉ်မှာ မန္တလေးနှင့် မြစ်ကြီးနားအကြား ကုန်စည်နှင့် ခရီးသည် ပို့ဆောင်ပေးနေသည့် အင်းတော်မြို့နယ် ကွင်းလမ်းအတွင်းမှ လမ်းပိုင်းအချို့ကို ပိုမိုကောင်းမွန်စေရန် တော်လှန်ရေးအင်အားစုများက ကျောက်လမ်း ခင်းခြင်း လုပ်ငန်းများ စတင်ဆောင်ရွက်ခဲ့ခြင်းဖြစ်သည်။   ထို့ကြောင့် ရွာသာကျေးရွာမှ မင်းကုန်းကျေးရွာအဝင်အထိ သွားလာခွင့်ကို ကန့်သတ်လိုက်ပြီး အခြားကွင်းလမ်း တစ်ခုသို့ လွှဲပြောင်းမောင်းနှင်ရန် ညွှန်ကြားခဲ့ခြင်း ဖြစ်သည်။   သို့သော် လွှဲပြောင်းပေးသည့် ကွင်းလမ်းအသစ်မှာ မိုးရွာသွန်းမှုကြောင့် မြေပျော့ပြီး ရွှံ့ဗွက်များ ပြည့်နှက်နေကာ ယာဉ်များ နစ်မြုပ်သည့်အပြင် စေတနာ့ဝန်ထမ်း ယာဉ်မောင်းများ သွားလာရန် လုံးဝ မဖြစ်နိုင်သည့် အခြေ အနေနှင့် ကြုံတွေ့ခဲ့ရသည်။   ပုံမှန် သွားလာနေကျ အင်းတော်ကွင်းလမ်းပေါ်တွင်လည်း ကုန်တင်ယာဉ် အစီးရေများစွာ သီတင်းပတ် နှစ်ပတ် ကျော်ကြာ ပိတ်မိနေခဲ့သဖြင့် ယာဉ်မောင်းနှင့် ကုန်သည်များ စုပေါင်းကာ လမ်းပိုင်းတာဝန်ရှိသူ တော်လှန်ရေး တပ်ဖွဲ့များနှင့် ဩဂုတ်လ ၂၀ ရက်နေ့က သွားရောက်တွေ့ဆုံခဲ့ကြခြင်း ဖြစ်သည်။   “ကွင်းလမ်းကိုမဖွင့်ပေးတော့လို့ ပြီးတော့ နောက်ထပ်ကွင်းလမ်းသစ်ကို ထပ်သုံးခိုင်းလို့ ကားသမားတွေစုပြီး ဆန္ဒသွား ပြကြတာ။ ဆန္ဒပြတယ်ဆိုတာထက်တော့ ကားသမားတွေ အများကြီးစုပေါင်းပြီးတော့ သွားရောက် ညှိနှိုင်းကြတဲ့ သဘောပါပဲ” ဟု ယာဉ်မောင်းတစ်ဦးက ပြောသည်။   ညှိနှိုင်းမှုအတွင်း ယာဉ်မောင်းများဘက်က လက်ရှိကြုံတွေ့နေရသည့် လမ်းပန်းဆက်သွယ်ရေး ခက်ခဲမှုများနှင့် လမ်းကြောင်းသစ်၏ သွားလာရန် မဖြစ်နိုင်သည့် အခြေအနေများကို တင်ပြခဲ့ကြသည်။   တော်လှန်ရေးအဖွဲ့များဘက်ကလည်း စာထုတ်ပြန်ထားသော်လည်း လမ်းပိုင်းကျောက်ခင်းခြင်း လုပ်ငန်းပြီးစီး သည်နှင့် တစ်ပြိုင်နက် ၂ ရက်မှ ၃ ရက်အတွင်း မူလလမ်းကြောင်းအတိုင်း ပြန်လည်ဖြတ်သန်းခွင့်ပြုမည်ဟု နှုတ်အားဖြင့် ကတိပြု ညှိနှိုင်းပေးခဲ့ကြောင်း ဆိုသည်။   အခြား ယာဉ်မောင်းကလည်း “အဲ့လမ်းက ရွာသာရွာ မင်းကုန်း၊ ပိတ်ထားတာက ရွာသာရွာမှာပိတ်ထားတာပါ။ အဓိက က မင်းကုန်းတံတားက ပိတ်ထားတော့ ရွာသာရွာကနေ စပြီးသွားမရတော့တာ။ အဓိကတော့ မင်းကုန်း ရွာပါပဲ။ ကာကွယ်ရေးတပ်တွေနဲ့ ညှိပြီးတော့ အဆင်ပြေသွားပြီ ပြောတယ်” ဟု ပြောသည်။   ဧရာဝတီမြစ် အရှေ့ဘက်ခြမ်း လမ်းကြောင်းဖြစ်သော မန္တလေး-မတ္တရာ-ထီးချိုင့်-ကသာ လမ်းပိုင်းမှာ လွန်ခဲ့ သည့် မေလဆန်းပိုင်းက ပြန်လည်ပွင့်လှစ်ခဲ့သော်လည်း နယ်မြေ မတည်ငြိမ်မှုနှင့် စစ်အုပ်စုတပ်၏ တိုက်ပွဲ များကြောင့် ပြန်လည်ပိတ်ဆို့သွားခဲ့သည်။     ထို့ကြောင့် ကုန်စည်ပို့ဆောင်သူများမှာ အနောက်ဘက်ခြမ်း လမ်းကြောင်းဖြစ်သည့် မန္တလေး-ရွှေဘို-မြစ်ကြီးနား လမ်းပိုင်းကို အဓိကအားထား ပြောင်းလဲအသုံးပြုနေရခြင်း ဖြစ်သည်။   လက်ရှိတွင် အင်းတော်မြို့နယ်အတွင်း တိုက်ပွဲများနှင့် လုံခြုံရေးအခြေအနေများကြောင့် လမ်းမကြီးကို တိုက် ရိုက်မသုံးနိုင်ဘဲ ဘေးကွင်းလမ်းများမှတစ်ဆင့် ခက်ခဲစွာ ဖြတ်သန်းနေရပြီး မိုးရာသီကာလ ဖြစ်၍ လမ်းကြောင်း ကြန့်ကြာမှုများနှင့် လမ်းပိုင်းပိတ်ဆို့မှုများကို ကုန်သည်နှင့် ယာဉ်မောင်းများ ရင်ဆိုင်နေကြရသည်။   #အင်းတော်ကွင်းသစ်လမ်း

အင်းတော်၌ ကွင်းလမ်းသစ်ပြန်ဖွင့်ပေးရန် ယာဉ်မောင်းများ တောင်းဆို 

အင်းတော်၌ ကွင်းလမ်းသစ်ပြန်ဖွင့်ပေးရန် ယာဉ်မောင်းများ တောင်းဆို  သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၂၁ ရက်။ မန္တလေး-မြစ်ကြီးနား ပ…

  • August 21, 2026
မောင်တော၌ စစ်ကျန်ဗုံးသီး ပေါက်ကွဲ၍ ကလေးငယ် ၁၀ ဦး ဒဏ်ရာရ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၂၀ ရက်။   ရခိုင်ပြည်၊ မောင်တောမြို့နယ်၊ အင်းဒင်ကျေးရွာတွင် စစ်ကျန် ဗုံးသီး ပေါက်ကွဲမှု ဖြစ်ပွားခဲ့ရာ ကစားနေသည့် ကလေးငယ် ၁၀ ဦး ဒဏ်ရာရရှိခဲ့ကြောင်း ဒေသခံများက ပြောသည်။   ဩဂုတ်လ ၂၀ ရက်နေ့၊ နံနက် ၁၁ နာရီ ၂၀ မိနစ်ခန့်က ဗုံးသီးပေါက်ကွဲမှုအတွင်း ဒဏ်ရာရရှိသွားသည့် ကလေး ငယ်များမှာ မောင်မင်းမြတ်သာကီ၊ မမိုးရွှေပန်း၊ မစိန်ရတီဦး၊ မမိုးနွယ်ဦးနှင့် မောင်မိုးအောင်ဌေးတို့အပြင် ပဲရုံ ကျေးရွာမှ မောင်ခိုင်သူရိန်ထွန်း၊ မောင်ပြည့်ဆန်းကျော်စွာ၊ မောင်အောင် ဟိန်းထက်၊ မောင်အောင်ငြိမ်းထက် နှင့် မောင်မြတ်လင်းအောင်တို့ ဖြစ်ကြသည်။   အသက် ၅ နှစ်မှ ၁၀ နှစ်ဝန်းကျင် အရွယ်များဖြစ်ကြသည့် အဆိုပါ ကလေးငယ်များသည် ကျေးရွာအတွင်း ကစားနေကျ ခြံဝင်းအတွင်း ဆော့ကစားနေကြစဉ် မည်သည့်နေရာမှ ရောက်ရှိလာမှန်း မသိသည့် စစ်ကျန် ဗုံးသီးတစ်လုံးကို ထုခွဲဆော့ကစားရာမှ ပေါက်ကွဲမှု ဖြစ်ပွားခဲ့ခြင်းဖြစ်သည်။   အာရက္ခတပ်တော် (AA) နှင့် နီးစပ်သူတစ်ဦးက “ရခိုင်မှာ စစ်တပ် လက်ထက်က ကျန်ခဲ့တဲ့ ဗုံးသီးတွေ အများကြီး ကျန်တာရှိတယ်။ အေအေက ရှင်းပေမယ့် မနိုင်သေးဘူး။ ကလေးတွေရော လူကြီးတွေရော ဗုံးသီးမြင်ရင် တစ်ခုခုလုပ်ချင်ကြတယ်၊ အသိပညာပေးတာတွေလည်း လုပ်ပါတယ်” ဟု ပြောသည်။   ပေါက်ကွဲမှုကြောင့် ဒဏ်ရာရရှိသည့် ကလေးငယ် ၁၀ ဦးအနက် ၆ ဦးမှာ ဒဏ်ရာပြင်းထန်သဖြင့် အရေးပေါ် ဆေးကုသမှု ခံယူနေရပြီး ဆေးဝါးကုသစရိတ်အတွက် ငွေကြေးအကူအညီများ လိုအပ်နေကြသည်။   အင်းဒင်ကျေးရွာသည် ယခင် မောင်တောတိုက်ပွဲများအတွင်းက စစ်တပ် တပ်စွဲနားခိုခဲ့သည့် နေရာတစ်ခု ဖြစ်ပြီး ပြီးခဲ့သည့်နှစ်ကလည်း အဆိုပါရွာမှ အမျိုးသမီးတစ်ဦး ထင်းခုတ်သွားစဉ် မြေမြှုပ်မိုင်း နင်းမိ၍ ခြေနှစ် ဖက်လုံး ဆုံးရှုံးခဲ့ရသည့် ဖြစ်စဉ်ရှိခဲ့သည်။   မောင်တောမြို့နယ် အပါအဝင် အာရက္ခဒေသတစ်ခုလုံး၌ စစ်တပ် တပ်စွဲခဲ့သည့်နေရာများနှင့် တိုက်ပွဲ ဖြစ်ပွားခဲ့သည့် နယ်မြေများတွင် အာရက္ခတပ်တော် (AA) က မိုင်းရှင်းလင်းရေးများကို အရှိန်အဟုန်မြှင့် ပြုလုပ် ဆောင်လျက်ရှိသည်။   အာရက္ခတပ်တော် (AA) သည် ၂၀၂၅ ခုနှစ်အတွင်း မောင်တောမြို့ လသာ၊ ရွှေဇား၊ ရွှေဇား(ဂုံးနား)၊ အီတာလျာ၊ ကမ်းပိုင်းနား၊ ကပ်ဘေး၊ စေတီပြင် စသည့် ရပ်ကျေးများတွင် မိုင်းရှင်းလင်းရေး ပြုလုပ်ခဲ့သလို နခခ (၅) တစ်ခုတည်း၌ပင် ရက်ပေါင်း ၁၁၅ ရက်အတွင်း မြေမြှုပ်မိုင်း ၃,၀၀၀ ခန့်ကို ရှာဖွေဖယ်ရှားခဲ့သည်။   ထို့ပြင် ၂၀၂၆ ခုနှစ် ဇန်နဝါရီလအတွင်းကလည်း မောင်တောမြို့ အမှတ် (၇၆၆) တပ်ရင်းဟောင်းနေရာနှင့် ကားလမ်းမများအနီးမှ M-14 မြေမြှုပ်မိုင်း ၇၈ လုံးကို ဖယ်ရှားရှင်းလင်းထားကြောင်း (AA) က ထုတ်ပြန်ထား သည်။   #မောင်တော #စစ်လက်ကျန်ဗုံးသီး

မောင်တော၌ စစ်ကျန်ဗုံးသီး ပေါက်ကွဲ၍ ကလေးငယ် ၁၀ ဦး ဒဏ်ရာရ

မောင်တော၌ စစ်ကျန်ဗုံးသီး ပေါက်ကွဲ၍ ကလေးငယ် ၁၀ ဦး ဒဏ်ရာရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၂၀ ရက်။ ရခိုင်ပြည်၊ မောင်တောမြို့နယ်၊ အင်း…

  • August 20, 2026
စစ်ကိုင်းတိုင်း ကနီ၌ စစ်တပ် စစ်ကြောင်းထိုး၍ ပြည်သူ ၁၀,၀၀၀ ခန့် စစ်ရှောင်နေရ၊ ဒေသခံအချို့ ဖမ်းခံရ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၂၀ ရက်။   စစ်ကိုင်းတိုင်း၊ ကနီမြို့နယ် တောင်ခြမ်းနှင့် ချင်းတွင်းမြစ်ရိုးတစ်လျှောက်ကို စစ်အုပ်စုတပ်က အင်အား ရာနှင့် ချီ၍ ရေကြောင်းအပြင် မြေပြင်ကနေပါ စစ်ကြောင်းထိုးနေသောကြောင့် ကျေးရွာ ၁၀ ရွာခန့်မှ ဒေသခံ ပြည်သူ ၁၀,၀၀၀ ခန့် နေရပ်စွန့်ခွာ ထွက်ပြေးနေကြရသည်။   မုံရွာ-ကနီ-ယာကြီး-ကလေးဝ လမ်းပိုင်းကို ထိန်းချုပ်နိုင်ရေးအတွက် မုံရွာ အနောက်မြောက်တိုင်းစစ်ဌာနချုပ် (နမခ) မှ ထွက်ခွာလာသည့် စစ်တပ်သည် ဩဂုတ်လ ၁၆ ရက်နေ့တွင် ကနီနယ် ချောင်းမကျေးရွာသို့ ရောက်ရှိလာပြီးနောက် အဖွဲ့များခွဲကာ ရွာစဉ်ပတ်မွှေ၍ ဖောက်ထွင်း လုယက်မှုများ ပြုလုပ်လျက်ရှိသည်။   ဩဂုတ်လ ၁၈ ရက်နေ့၊ နံနက်ပိုင်းတွင် စစ်တပ်က မင်းမကျေးရွာကို ရုတ်တရက် ဝင်ရောက်စီးနင်းကာ ရွာခံ အမျိုးသား ၆ ဦးကို ဖမ်းဆီးခေါ်ဆောင်သွားခဲ့သည့်အပြင် မုဋ္ဌောကျေးရွာရှိ စစ်ဘေးရှောင် ပြည်သူများကို လည်း ပိတ်ဆို့ဖမ်းဆီးထားသည်။   ဖြစ်စဉ်နှင့် ပတ်သက်၍ မြေပြင် စစ်ရှောင် အကူအညီပေးနေသည့် ဒေသခံတစ်ဦးက “နမခဘက်က စစ်သင်္ဘော တွေ ချင်းတွင်းမြစ်အတိုင်း စုန်ဆင်းလာတာရော မြေပြင်ကနေ စစ်ကြောင်းပါ အပြိုင်ထိုးလာတာကြောင့် ဒေသ ခံတွေ ဘုန်းကြီးကျောင်းမှာ သွားပုန်းနေရင်း ကြားညှပ် ပိတ်မိသွားကြတာ။ မင်းမရွာက ဖမ်းခံရတဲ့ အမျိုးသား ၆ ယောက်အပါအဝင် မုဋ္ဌောရွာဘက်မှာ မိသွားတဲ့ စစ်ရှောင်တွေကို စစ်အုပ်စုတပ်က အခုထိ ပြန်မလွှတ်သေး ဘူး” ဟု ပြောသည်။     ထို့ပြင် စစ်တပ်သည် စစ်သင်္ဘောနှင့် ထောက်ပို့ ရေယာဉ် အစီး ၃၀ ကျော်ဖြင့် မြစ်ကြောင်းအတိုင်း စုန်ဆင်းစဉ် ဂျိုင်ရိုကော်ပတာ၊ စက်တပ်လေထီး၊ ဒရုန်းနှင့် တိုက်လေယာဉ်များကို အသုံးပြုကာ မြစ်ရိုးတစ် လျှောက်ရှိ ကျေးရွာများကို ဗုံးကြဲခဲ့သည်။   ယင်းမာပင်မြို့နယ် အောင်ဇေယျမြို့သစ်နှင့် ဆားလင်းကြီးမြို့နယ် ဝမ်ပေါင်ကြေးနီ စီမံကိန်းတို့ဘက်မှလည်း မြို့ရွာများအတွင်းသို့ လက်နက်ကြီးများဖြင့် ပစ်ခတ်ခဲ့သည်။   စစ်အုပ်စုတပ်က ချောင်းမ၊ သင့်ဝင်၊ မင်းမ၊ သမင်ခြံ၊ မုဋ္ဌော၊ အောင်မင်္ဂလာ အပါအဝင် ရွာပေါင်း ၁၀ ရွာ ထက်မနည်းကို ရုတ်တရက် ဝင်ရောက်စီးနင်းခဲ့သဖြင့် ဒေသခံများမှာ အဝတ်တစ်ထည် ကိုယ်တစ်ခုဖြင့် ထွက် ပြေးခဲ့ကြရသည်။   စစ်ရှောင်များကို အကူအညီပေးနေသူက “စစ်ကြောင်းက ရုတ်တရက် ရွာထဲ ဝင်လာတာဆိုတော့ ဘာပစ္စည်းမှ လည်း မသိမ်းနိုင်ဘူး။ တစ်ဖက်ကလည်း မြစ်ထဲက စစ်သင်္ဘောတွေက လက်နက်ကြီးနဲ့ လှမ်းပစ်နေတော့ နှစ်ဖက်ညှပ်ခံထားရသလိုဖြစ်သွားတာ” ဟု ပြောသည်။   ဩဂုတ်လ ၁၉ ရက်နေ့၊ နံနက်ပိုင်းတွင်လည်း စစ်တပ်က ကနီမြို့နယ် အနောက်မြောက်ခြမ်းကို ဂျိုင်ရို ကော်ပတာ ၃ စီးဖြင့် လေကြောင်းတိုက်ခိုက်မှုများ ပြုလုပ်ခဲ့ပြီး ထိခိုက်သေဆုံးမှုကို စုံစမ်းနေဆဲဖြစ်သည်။   စစ်တပ်၏ လအတော်ကြာ စစ်ကြောင်းထိုး တပ်စွဲမှုများကြောင့် ဒေသခံ ပြည်သူများမှာ စားဝတ်နေရေးနှင့် သားသမီးများ၏ ပညာရေးအတွက် အကျပ်အတည်းများနှင့် ရင်ဆိုင်နေရသည်။   စစ်ရှောင်အရေး ကူညီပေးနေသူ အမျိုးသမီးတစ်ဦးကလည်း “စစ်တပ်က ကျမတို့ ရွာတွေမှာ စခန်းချနေတာ လေးလနီးပါး ရှိနေပြီဆိုတော့ မိသားစုတွေလည်း အလုပ်မလုပ်ရဘူးလေ။ ကလေးတွေ စာသင်ဖို့လည်း လုံးဝ မလွယ်တော့ဘူး။ စစ်ရှောင်ရက် ကြာလာတော့ တခြားရွာတွေမှာ ခဏခိုလှုံရတာလည်း အဆင်မပြေမှုတွေ ရှိလာတယ်။ ရွာကို ပြန်ရင်လည်း စစ်တပ်နဲ့ ပူးပေါင်းတယ်လို့ ထင်ခံရမှာ ပူနေရတယ်” ဟု ပြောသည်။   လက်ရှိတွင် ကနီမြို့နယ်အတွင်းရှိ မုံရွာ-ယာကြီး-ကလေးဝ လမ်းပိုင်းနှင့် ချင်းတွင်းမြစ်ရိုး တစ်လျှောက်၌ စစ်တပ်က စစ်ကြောင်း ဆက်လက်ထိုးနေသဖြင့် စစ်ဘေးရှောင် ဦးရေ ပိုမို တိုးလာနိုင်ကြောင်း အကူအညီပေးနေသူများက ပြောသည်။   ဓါတ်ပုံ - (ပေးပို့ / Crd)   #ကနီစစ်ရှောင် #စစ်ကိုင်းတိုင်း

စစ်ကိုင်းတိုင်း ကနီ၌ စစ်တပ် စစ်ကြောင်းထိုး၍ ပြည်သူ ၁၀,၀၀၀ ခန့် စစ်ရှောင်နေရ၊ ဒေသခံအချို့ ဖမ်းခံရ

စစ်ကိုင်းတိုင်း ကနီ၌ စစ်တပ် စစ်ကြောင်းထိုး၍ ပြည်သူ ၁၀,၀၀၀ ခန့် စစ်ရှောင်နေရ၊ ဒေသခံအချို့ ဖမ်းခံရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၂၀ ရ…

  • August 20, 2026
နတ်ရေကန်သို့ စစ်ကူလာသည့် စစ်တပ်ကို AA ကြားဖြတ်တိုက်ခိုက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၂၀ ရက်။ မကွေးတိုင်းဒေသကြီး၊ ငဖဲမြို့နယ်၊ ဂုတ်ကြီးကျေးရွာဘက်မှ နတ်ရေကန် စခန်းကုန်းသို့ စစ်ကြောင်းထိုးလာသည့် စစ်တပ်၏ ယာယီစခန်းများကို အာရက္ခတပ်တော် (AA) က ကြားဖြတ်တိုက်ခိုက်ခဲ့ကြောင်း ဒေသတွင်း စစ်ရေး သတင်းရင်းမြစ်များက ပြောသည်။ ရခိုင်ပြည်နှင့် မကွေးတိုင်းကို ဆက်သွယ်ထားသည့် စစ်ရေးအရ အရေးပါသော အမ်း-ပဒါန်း လမ်းမပေါ်ရှိ နတ်ရေကန် ဗျူဟာကုန်းစခန်းအနီး၌ တပ်စွဲထားသော စစ်တပ်၏ ယာယီစခန်းများကို ဩဂုတ်လ ၁၇ ရက်၊ ၁၈ ရက်နှင့် ၁၉ ရက်တို့တွင် အာရက္ခတပ်တော် (AA) က ကြားဖြတ် ဝင်ရောက်တိုက်ခိုက်ခဲ့ခြင်း ဖြစ်သည်။ ငဖဲမြို့နယ်မှ စစ်ရေးသတင်းရင်းမြစ် အမျိုးသားတစ်ဦးက “အမ်း-ပဒါန်း လမ်းမပေါ်ကို ဂုတ်ကြီးဖက်က တက် လာတဲ့ စစ်တပ်စစ်ကြောင်းက အင်းအား နှစ်ရာကျော်ဟာ ယာယီစခန်းလေးတွေ ငါးခု လောက်ရှိတယ်။ အဲ့စခန်းတွေထဲက ၃ ခုလောက်ကို အေအေက ဖြတ်တိုက်ပြီး ပြန် ပြန်ဆုတ်တယ်။ စစ်တပ် အကျအဆုံးများ တယ်” ဟု ပြောသည်။ အင်အား ၂၀၀ ကျော်ပါဝင်သည့် စစ်တပ် စစ်ကြောင်းသည် AA ၏ ကြားဖြတ်တိုက်ခိုက်မှုကြောင့် ယာယီ စခန်းများ ပြိုပျက်သွားပြီး မစခ ၉၀၅ ဆုံကုန်း အမြောက်တပ်သို့ ပြန်လည် ဆုတ်ခွာသွားခဲ့ရသည်။ ထို့နောက် နတ်ရေကန်စခန်းသို့ အင်အား၊ လက်နက်ခဲယမ်းနှင့် စားနပ်ရိက္ခာများ ပို့ဆောင်နိုင်ရန် ထပ်မံပြင်ဆင် လျက် ရှိကြောင်းဆိုသည်။ အဆိုပါ စစ်ရေးသတင်းရင်းမြစ်က “စစ်တပ်က ဒီစစ်ကြောင်းတွေက နတ်ရေကို အဆက်အသွယ် ချိတ်မိအောင် တက်လာတာ။ အေအေက နတ် ရေကန်ကို ဝန်ပြီးပိတ်ဆို့ထားတော့ အဆက်အသွယ်ရဖို့ တက်လာတာ။ အေအေ ကလည်း လုံးဝ အချိတ်အဆက် ခွင့်မပေးဘူး။ စစ်တပ်က တော်တော်များများ ပြန်ဆုတ် သွားတယ်။ ကျန်သေး တဲ့ စစ်သားတွေလည်း ဖရိုဖရဲပဲ။ ဒီလိုဖြစ်နေတာတော့ တော်တော်ကြာနေပြီ” ဟု ပြောသည်။ အာရက္ခတပ်တော် (AA) သည် စစ် တပ်၏ ယာယီခြေကုတ်စခန်းများကို ဒရုန်း၊ လက်နက်ကြီး၊ စနိုက်ဘာ တို့ဖြင့် တိုက်ခိုက်ခဲ့သည့်အပြင် မြေပြင်တပ်ဖွဲ့များကပါ အနီးကပ် ဝင်ရောက်တိုက်ခိုက်ခဲ့သဖြင့် လက်နက်ခဲယမ်း အချို့ သိမ်းဆည်းရမိခဲ့သည်။ အာရက္ခတပ်တော် (AA) နှင့် တော်လှန်ရေး ပူးပေါင်းတပ်ဖွဲ့များသည် နတ်ရေကန် ဗျူဟာကုန်း၏ ကာကင်းစခန်း များကို တစ်ခုပြီးတစ်ခု သိမ်းပိုက်ထားပြီး ဗျူဟာကုန်းတစ်ခုလုံးကို ပိတ်ဆို့ဝိုင်းရံထားသည်။ စစ်အုပ်စုတပ်က ပိတ်ဆို့ခံထားရသည့် နတ်ရေကန်တောင်သို့ လေကြောင်းစစ်ကူများဖြင့် အင်အားဖြည့်တင်းကာ ထိုးစစ်ဆင်ရန် ကြိုးပမ်းနေသော်လည်း အကျအဆုံးများစွာဖြင့် ပြန်လည်ဆုတ်ခွာနေရပြီး AA ဘက်က နတ်ရေ ကန် တောင်ကြောတစ်လျှောက်ရှိ စစ်အုပ်စု၏ ယာယီခြေကုတ်စခန်းများကို ဆက်လက်ထိုးစစ်ဆင် တိုက်ခိုက် လျက်ရှိသည်။ #နတ်ရေကန်တိုက်ပွဲ

နတ်ရေကန်သို့ စစ်ကူလာသည့် စစ်တပ်ကို AA ကြားဖြတ်တိုက်ခိုက်

နတ်ရေကန်သို့ စစ်ကူလာသည့် စစ်တပ်ကို AA ကြားဖြတ်တိုက်ခိုက် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၂၀ ရက်။ မကွေးတိုင်းဒေသကြီး၊ ငဖဲမြို့နယ်၊ …

  • August 20, 2026
တနင်္သာရီ လောင်းလုံးတွင် စစ်တပ်က ရမ်းသမ်းပစ်ခတ်၍ သားအဖ ၂ ဦး သေဆုံး   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၁၉ ရက်။   တနင်္သာရီတိုင်း၊ ထားဝယ်ခရိုင်၊ လောင်းလုံးမြို့နယ်တွင် ထိတွေ့တိုက်ပွဲဖြစ်ပွားခြင်း မရှိဘဲ စစ်တပ်က လက်နက်ကြီးဖြင့် ရမ်းသမ်းပစ်ခတ်ခဲ့သဖြင့် ကျောက်ဆင်ကျေးရွာရှိ သားအဖနှစ်ဦး နေရာတွင်ပင် ပွဲချင်းပြီး သေဆုံးခဲ့ပြီး မိသားစုဝင် အမျိုးသမီး ၂ ဦး ဒဏ်ရာရရှိခဲ့ကြောင်း ဒေသခံများက ပြောသည်။   ယမန်နေ့ (ဩဂုတ်လ ၁၈ ရက်) နံနက် ၁၁ နာရီဝန်းကျင်တွင် လောင်းလုံးမြို့နယ်အခြေစိုက် စစ်အုပ်စု၏ ခလရ (၁၀၄) တပ်ရင်းက အနီးနားရှိ ကျေးရွာများဘက်သို့ လက်နက်ကြီးဖြင့် အကြောင်းမဲ့ ရမ်းကားပစ်ခတ်ခဲ့ခြင်းဖြစ် သည်။   ထိုသို့ ပစ်ခတ်မှုကြောင့် ကျည်နှစ်လုံးမှာ ကျောက်ဆင်ကျေးရွာ အရှေ့ပိုင်းရှိ လူနေအိမ်များအနီး ကျရောက် ပေါက်ကွဲခဲ့သည်။   အဆိုပါ ပေါက်ကွဲမှုကြောင့် နေအိမ်ဝင်းအတွင်း အလုပ်လုပ်နေသည့် အသက် ၅၀ ကျော်အရွယ် ဦးသန်းအောင် နှင့် သားဖြစ်သူ ကိုပြည့်အောင်တို့မှာ ဒဏ်ရာအပြင်းအထန် ရရှိကာ နေရာတွင်ပင် သေဆုံးသွားခဲ့ရသလို ဇနီးဖြစ်သူနှင့် တူမဖြစ်သူတို့လည်း ထိခိုက်ဒဏ်ရာများ ရရှိခဲ့ကြသည်။   ဒေသခံတစ်ဦးက “စစ်တပ်က ဘာတိုက်ပွဲမှမရှိဘဲ ခလရ (၁၀၄) ဘက်ကနေ လက်နက်ကြီးနဲ့ အကြောင်းမဲ့ ရမ်း ပစ်တာပါ။ အိမ်နောက်ဖေးမှာ အလုပ်လုပ်နေကြတဲ့ သားအဖနှစ်ယောက် ကျည်စထိပြီး နေရာမှာတင် ဆုံးသွား တယ်။ အနီးနားက အိမ်တွေလည်း ပျက်စီးသွားသလို အမျိုးသမီး နှစ်ယောက်လည်း ဒဏ်ရာရခဲ့တယ်” ဟု ပြောသည်။   အဆိုပါ လက်နက်ကြီးကျရောက် ပေါက်ကွဲမှုအတွင်း အမျိုးသမီးတစ်ဦး၏ နားရွက်တွင် ကျည်စထိမှန် ဒဏ်ရာ ရရှိခဲ့ပြီး နေအိမ်အချို့လည်း ထိခိုက်ပျက်စီးခဲ့သည်။   ဒဏ်ရာအပြင်းအထန်ဖြင့် သေဆုံးသွားခဲ့သည့် သားအဖနှစ်ဦးကိုမူ ဩဂုတ်လ ၁၉ ရက်နေ့၊ မွန်းလွဲပိုင်းတွင် ကျောက်ဆင်ကျေးရွာ သုသာန်၌ သင်္ဂြိုဟ်လိုက်ပြီဖြစ်သည်။   ဒေသခံများ၏ ပြောပြချက်အရ အခင်းဖြစ်ပွားသည့် အနီးဝန်းကျင်တွင် မည်သည့် ထိတွေ့တိုက်ပွဲမျှ မရှိသလို စစ်ကြောင်းထိုးလာခြင်းလည်း မရှိဘဲ စစ်အုပ်စုတပ်က ကျေးရွာများအတွင်းသို့ ရည်ရွယ်ချက်ရှိရှိ ရမ်းသမ်း ပစ်ခတ်ခဲ့ခြင်းဖြစ်သည်ဟု ဆိုသည်။   လောင်းလုံးဒေသခံ အမျိုးသမီးတစ်ဦးက “အလုပ်လုပ်နေကြတုန်း ရုတ်တရက်ကြီး ပစ်ထည့်လိုက်တာ။ ဘာ တိုက်ပွဲမှလည်း ဖြစ်တာမဟုတ်ဘူး။ သူတို့ထိုးချင်တဲ့အချိန် ထိုး၊ ပစ်ချင်တဲ့အချိန် ရမ်းပစ်နေတာဆိုတော့ နောက်လည်း ထပ်ပစ်မှာကို ရွာကလူတွေ အကုန်ကြောက်နေရတယ်” ဟု ပြောသည်။   လောင်းလုံးမြို့နယ်အတွင်း ပြီးခဲ့သည့် မေလနှောင်းပိုင်းမှစ၍ စစ်အုပ်စုတပ်နှင့် တော်လှန်ရေးတပ်ဖွဲ့များအကြား စစ်ရေးတင်းမာမှုများ စတင်မြင့်တက်ခဲ့ပြီး စစ်အုပ်စုတပ်က ကျေးရွာများအတွင်းသို့ စစ်ကြောင်းထိုးဝင် ရောက်ခြင်းနှင့် လက်နက်ကြီးများဖြင့် အကြောင်းမဲ့ ဆက်တိုက်ပစ်ခတ်ခြင်းတို့ကို လုပ်ဆောင်လျက်ရှိသည်။   လက်ရှိတွင် တိုက်ပွဲဖြစ်ပွားခြင်းမရှိဘဲ လက်နက်ကြီးများ ရမ်းသမ်းပစ်ခတ်နေမှုကြောင့် ကျောက်ဆင်ကျေးရွာ အပါအဝင် အနီးဝန်းကျင်ရှိ ဒေသခံပြည်သူများမှာ လုံခြုံရေးအခြေအနေအတွက် စိုးရိမ်နေကြသည်။   (ဓာတ်ပုံ - ပေးပို့ / Crd)   #လောင်းလုံး

တနင်္သာရီ လောင်းလုံးတွင် စစ်တပ်က ရမ်းသမ်းပစ်ခတ်၍ သားအဖ ၂ ဦး သေဆုံး

တနင်္သာရီ လောင်းလုံးတွင် စစ်တပ်က ရမ်းသမ်းပစ်ခတ်၍ သားအဖ ၂ ဦး သေဆုံး သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၁၉ ရက်။ တနင်္သာရီတိုင်း၊ ထားဝယ်…

  • August 19, 2026
ဘန်ကောက် မြန်မာသံရုံးက PV ပတ်စပို့ သက်တမ်းတိုးခြင်း ရုတ်တရက် ရပ်ဆိုင်း   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၁၉ ရက်။   ထိုင်းနိုင်ငံ၊ ဘန်ကောက်မြို့ရှိ မြန်မာသံရုံးက အလည်အပတ် နိုင်ငံကူးလက်မှတ် (PV) ကိုင်ဆောင်ထားသူများ အား စာအုပ်အသစ် လဲလှယ်ပေးခြင်းနှင့် သက်တမ်းတိုးပေးခြင်းများကို ဩဂုတ်လ ၁၉ ရက်နေ့မှစ၍ ကြိုတင် အသိပေးခြင်း မရှိဘဲ ရုတ်တရက် ရပ်ဆိုင်းလိုက်သဖြင့် ထိုင်းရောက် မြန်မာများနှင့် ကျောင်းသားများအကြား စိုးရိမ်ပူပန်မှုများ မြင့်တက်လျက်ရှိသည်။   ယခင်က သံရုံး၌ တိုက်ရိုက် သက်တမ်းတိုးခွင့် ရရှိခဲ့သော်လည်း ယခုအခါ PV ပတ်စပို့ ကိုင်ဆောင်ထားသူများ အနေဖြင့် စာအုပ်အသစ် လဲလှယ်လိုလျှင်ဖြစ်စေ၊ အလုပ်လုပ်ခွင့် ပတ်စပို့ (PJ) သို့မဟုတ် ကျောင်းသား ပတ်စပို့ (PE) အပါအဝင် အခြား ပတ်စပို့အမျိုးအစားများသို့ ပြောင်းလဲလိုလျှင်ဖြစ်စေ နေပြည်တော်ရှိ စစ်အုပ်စုထံသို့ လျှောက်လွှာစာ အရင်တင်ပြရမည် ဖြစ်သည်။   နေပြည်တော်ဘက်မှ စိစစ်ပြီး ခွင့်ပြုမိန့် ပြန်လည်ကျလာမှသာ သံရုံး၌ ဆက်လက်ဆောင်ရွက်ခွင့် ရရှိမည်ဖြစ်ပြီး ယနေ့ သံရုံးသို့ သွားရောက်လျှောက်ထားသူများကိုမူ ၂ လကြာမှ ပြန်လည်လာရောက် စုံစမ်းရန် သံရုံးဘက်က ဘောက်ချာတွင် မှတ်ချက်ရေးပေးလိုက်ကြောင်း ဆိုသည်။   ထိုင်းရောက် မြန်မာအမျိုးသားတစ်ဦးက "ဒီနေ့ သံရုံးမှာ စာအုပ်လဲဖို့ ကျနော့်သူငယ်ချင်း သွားတော့ အရင်လို မလုပ်ပေးတော့ဘူးတဲ့ဗျ။ လျှောက်လွှာဖောင် ဖြည့်ခိုင်းပြီး နေပြည်တော်ဆီ စာတင်ထားမယ်၊ ၂ လကြာမှ ပြန်လာစုံစမ်းပါဆိုပြီး ဘောက်ချာမှာ စာရေးပေးလိုက်တယ်ဗျ။ ပြန်ကျမကျလည်း မသေချာတော့ ဘာဆက် လုပ်ရမှန်း မသိဘဲ ဖြစ်နေတာ။ အခုတော့ တကယ် ဒုက္ခရောက်ကုန်ကြရတာပေါ့” ဟု ပြောသည်။   ထို့ပြင် ပတ်စပို့ ဝန်ဆောင်မှုပေးနေသူများ၏ ပြောပြချက်အရ PJ ကိုင်ဆောင်ထားသူများသည် PJ အတိုင်း၊ PE ကိုင်ဆောင်ထားသူများသည် PE အတိုင်း စာအုပ်အသစ် လဲလှယ်ခွင့် ရှိနေသေးသော်လည်း PV မှ အခြား ပတ်စပို့အမျိုးအစားသို့ ပြောင်းလဲခြင်းနှင့် သက်တမ်းတိုးခြင်းများကိုမူ တင်းကျပ်လိုက်ခြင်းဖြစ်သည်ဟု ဆို သည်။   “ဒီလုပ်ထုံးလုပ်နည်း အပြောင်းအလဲက ရုတ်တရက်ကြီး ဖြစ်လာတာပါ။ သံရုံးကလည်း တရားဝင် စာထုတ်တာ မျိုး မရှိသေးတော့ အားလုံးက စောင့်ကြည့်နေရတုန်းပဲ။ PV နဲ့ လာပြီး Non-B အလုပ်ဗီဇာ ဒါမှမဟုတ် Non-ED ကျောင်းသားဗီဇာ ပြောင်းထားတဲ့သူတွေအတွက်တော့ အချိန်အများကြီး ကြာသွားနိုင်သလို အခက်အခဲတွေ နဲ့ ရင်ဆိုင်ရဖို့ ရှိနေပါတယ်” ဟု ဘန်ကောက်မြို့ရှိ ပတ်စပို့ အကျိုးဆောင်တစ်ဦးက ပြောသည်။   အဆိုပါ စည်းကမ်းချက်များ တင်းကျပ်မှုသည် စစ်အုပ်စုခေါင်းဆောင် ဦးမင်းအောင်လှိုင် ဘန်ကောက်မြို့ မြန်မာသံရုံးသို့ လာရောက်ခဲ့ပြီးနောက်ပိုင်း ယခုကဲ့သို့ အပြောင်းအလဲ ဖြစ်လာခဲ့ခြင်း ဖြစ်သည်။   ယခုကဲ့သို့ စစ်အုပ်စုက ကြိုတင်အသိပေးခြင်း မရှိဘဲ မူဝါဒများ ရုတ်တရက် ပြောင်းလဲလိုက်ခြင်းကြောင့် PV ပတ်စပို့ဖြင့် ထိုင်းနိုင်ငံအတွင်း ဝင်ရောက်လာကာ ဗီဇာအမျိုးအစား ပြောင်းလဲ၍ တရားဝင် နေထိုင် အလုပ် လုပ်ကိုင်နေကြသည့် မြန်မာရွှေ့ပြောင်းလုပ်သားများ၊ ကျောင်းသားများနှင့် စာရွက်စာတမ်း သက်တမ်း ကုန်ခါနီး သူများမှာ ရှေ့ဆက် နေထိုင်ရေးအတွက် စိုးရိမ်နေကြသည်။   ဓါတ်ပုံ - (Crd)   #ပတ်စပို့ #ဘန်ကောက် #မြန်မာသံရုံး

ဘန်ကောက် မြန်မာသံရုံးက PV ပတ်စပို့ သက်တမ်းတိုးခြင်း ရုတ်တရက် ရပ်ဆိုင်း

ဘန်ကောက် မြန်မာသံရုံးက PV ပတ်စပို့ သက်တမ်းတိုးခြင်း ရုတ်တရက် ရပ်ဆိုင်း သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၁၉ ရက်။ ထိုင်းနိုင်ငံ၊ ဘန်က…

  • August 19, 2026
မောင်တော နယ်စပ်နှင့် မြို့တွင်း၌ AA လုံခြုံရေး တင်းကျပ်စွာ တိုးမြှင့်ထား   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၁၉ ရက်။   ရခိုင်-ဘင်္ဂလားဒေ့ရှ် နယ်စပ် မောင်တောခရိုင်အတွင်း အကြမ်းဖက် လက်နက်ကိုင်အဖွဲ့များ၏ နယ်စပ်ဖြတ် ကျော် လှုပ်ရှားမှုများ စိပ်လာခြင်းကြောင့် အာရက္ခတပ်တော် (AA) က မြို့ပေါ်နှင့် နယ်စပ်တစ်လျှောက်တွင် လုံခြုံရေး တင်းကျပ်စွာ တိုးမြှင့်၍ နေ့ညမပြတ် ကင်းလှည့်စောင့်ကြည့်မှုများ ပြုလုပ်နေကြောင်း ဒေသခံများက ပြောသည်။   ဘင်္ဂလားဒေ့ရှ်နိုင်ငံဘက်ခြမ်းတွင် အခြေကုပ်ယူထားသည့် Arakan Rohingya Salvation Army (ARSA)၊ Rohingya Solidarity Organization (RSO) နှင့် Arakan Rohingya Army (ARA )စသည့် မူဆလင် လက်နက် ကိုင် အဖွဲ့များသည် ယခုလပိုင်းအတွင်း နယ်စပ်ဖြတ်ကျော်၍ တောတောင်ထူထပ်သော တောင်ပြို၊ မီးတိုက်နှင့် ဝေလာတောင်ဘက်ခြမ်းတို့တွင် လှုပ်ရှားမှုများ ခပ်စိပ်စိပ် ပြုလုပ်လာနေသည့်အတွက် ယခုကဲ့သို့ လုံခြုံရေး တိုးမြှင့် တပ်စွဲထားခြင်း ဖြစ်သည်။   မောင်တော ဒေသခံ အမျိုးသားတစ်ဦးက “နယ်စပ် ခြံစည်းရိုး ခတ်မယ်ဆိုတဲ့ သတင်းတွေရော၊ စစ်တပ်က ဒုက္ခ သည်တွေကို ပြန်လက်ခံမယ်ဆိုတဲ့ သတင်းတွေ ထွက်လာပြီးနောက်ပိုင်း ARSA တို့ RSO တို့ဘက်က လှုပ်ရှား မှုတွေ ခပ်စိပ်စိပ် တွေ့လာရတာပါ။ ဘင်္ဂလားဒေ့ရှ်ဘက်က ဒုက္ခသည်စခန်းတွေထဲမှာလည်း သူတို့အဖွဲ့တွေ စစ်သားစုဆောင်းတာနဲ့ သတ်ဖြတ်တာတွေ ခပ်စိပ်စိပ် ကြားနေရတော့ ဒေသခံတွေက စိုးရိမ်နေကြတာ။ အခု တော့ အေအေဘက်က နယ်စပ် ခြံစည်းရိုးတစ်လျှောက်မှာရော မြို့ထဲမှာပါ လုံခြုံရေး တင်းကျပ်ပြီး နေ့ည ကင်းလှည့်နေတာ တွေ့ရတယ်” ဟု ပြောသည်။   လက်ရှိတွင် အာရက္ခတပ်တော် (AA) သည် မောင်တောမြို့ပေါ်ရှိ အဓိက လမ်းဆုံလမ်းခွများ၊ လမ်းမကြီးများ၊ ကျေးရွာများနှင့် လူအသွားအလာ များပြားသည့် နေရာများတွင် လုံခြုံရေးတပ်ဖွဲ့ဝင် အများအပြား ချထားပြီး စစ်ဆေးမှုများကို ယခင်ကထက် ပိုမို တင်းကျပ်ထားသည်။   ထို့ပြင် နယ်စပ်ဖြတ်ကျော် ဝင်ရောက်လာနိုင်သည့် အကြမ်းဖက်အန္တရာယ်မှ ပြည်သူများ၏ လုံခြုံရေးကို ကာကွယ်နိုင်ရန်အတွက် အာရက္ခပြည်သူ့တော်လှန်ရေးအစိုးရ၊ မောင်တောခရိုင် အုပ်ချုပ်ရေးဌာနက ဩဂုတ်လ ၉ ရက်နေ့မှစ၍ ညမထွက်ရအမိန့် ထုတ်ပြန်ထားပြီး ဖြစ်သည်။   အဆိုပါအမိန့်အား ပြန်လည်မရုပ်သိမ်းမီအထိ အတည်ပြု ဆောင်ရွက်သွားမည်ဟု ဆိုသည်။   မောင်တောနယ်စပ်အနီးမှ ဒေသခံတစ်ဦးက “မြို့ပေါ်မှာ ညမထွက်ရအမိန့် ထုတ်ထားသလို ညဘက်ဆိုလည်း ကင်းလှည့်တာတွေ ပိုစိပ်လာတယ်။ နယ်စပ်ဘက်က ရွာတွေဆီ မသင်္ကာသူတွေ၊ အကြမ်းဖက်အဖွဲ့တွေ ခိုးဝင် လာမှာစိုးလို့ စစ်ဆေးတာတွေ ပိုလုပ်နေတာပါ။ မြေပြင်မှာတော့ အခြေအနေက တင်းမာနေဆဲပဲ” ဟု ပြောသည်။   မောင်တောခရိုင်သည် ဘင်္ဂလားဒေ့ရှ်နိုင်ငံနှင့် ထိစပ်နေသည့် နယ်စပ်ဒေသဖြစ်သဖြင့် အကြမ်းဖက်အဖွဲ့များ၏ နယ်စပ်ဖြတ်ကျော် ဝင်ရောက်မှုနှင့် မလိုလားအပ်သည့် ပဋိပက္ခများ မဖြစ်ပွားစေရန် AA ဘက်က နယ်စပ် ကျေးရွာများနှင့် မြို့ပေါ်ရပ်ကွက်များအထိ လုံခြုံရေး တပ်ဖွဲ့များ ထပ်မံဖြည့်တင်းကာ စောင့်ကြပ်ကြည့်ရှုလျက် ရှိသည်။   ဓါတ်ပုံ - (ပေးပို့ - Crd)   #မောင်တော #AA

မောင်တော နယ်စပ်နှင့် မြို့တွင်း၌ AA လုံခြုံရေး တင်းကျပ်စွာ တိုးမြှင့်ထား

မောင်တော နယ်စပ်နှင့် မြို့တွင်း၌ AA လုံခြုံရေး တင်းကျပ်စွာ တိုးမြှင့်ထား သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၁၉ ရက်။ ရခိုင်-ဘင်္ဂလားဒေ…

  • August 19, 2026
ပင်လည်ဘူးတွင် စစ်တပ်က ရက်ဆက် ဗုံးကြဲ၍ ကလေးငယ်အပါအဝင် ၉ ဦးထက်မနည်း သေဆုံး   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၁၉ ရက်။   စစ်ကိုင်းတိုင်းနှင့် ကချင်ပြည်အစပ်၊ NUG အမှတ် (၁) စစ်ဒေသ ထိန်းချုပ်ထားသည့် ပင်လည်ဘူးမြို့နယ်အတွင်း ရှိ ကျေးရွာများနှင့် ရွှေလုပ်ကွက်များကို စစ်အုပ်စုတပ်က နေ့စဉ်ရက်ဆက် လေကြောင်းမှ ဗုံးကြဲတိုက်ခိုက်ခဲ့ရာ ကလေးငယ်တစ်ဦး အပါအဝင် အရပ်သား ၉ ဦးထက်မနည်း သေဆုံးခဲ့ရသည်။   ဩဂုတ်လ ၁၅ ရက်နေ့မှ ၁၈ ရက်အထိ ဆက်တိုက် လေကြောင်းမှ ဗုံးကြဲတိုက်ခိုက်ခဲ့သဖြင့် ၁ နှစ်အရွယ် ကလေးငယ်တစ်ဦး အပါအဝင် အရပ်သား ၉ ဦးထက်မနည်း သေဆုံးကာ ၁၁ ဦး ဒဏ်ရာရပြီး ၈ ဦး ပျောက်ဆုံး နေကြောင်း ဒေသခံများနှင့် ကာကွယ်ရေးတပ်ဖွဲ့ သတင်းရင်းမြစ်များက ပြောသည်။   ဩဂုတ်လ ၁၈ ရက် မွန်းလွဲပိုင်းက ဟုမ္မလင်းလေတပ်မှ တက်လာသည့် ဂျက်တိုက်လေယာဉ်များဖြင့် ပင်လည် ဘူးမြို့နယ် မြောက်ခြမ်း၊ မိုင်းတုံသာကြီးကျေးရွာအနီးရှိ ရွှေတူးဖော်ရေး လုပ်ကွက်ကို ဗုံးကြဲချခဲ့ရာ အနည်းဆုံး အရပ်သား ၅ ဦး သေဆုံးပြီး ၈ ဦး ပျောက်ဆုံးနေသည်။   ဒေသခံ ကူညီကယ်ဆယ်ရေး လုပ်ဆောင်ပေးနေသူ တစ်ဦးက “ရွှေလုပ်ကွက်ထဲ ဗုံးကျတာဆိုတော့ အလုပ်လုပ် နေသူတွေ ထိကုန်တာပါ။ အလောင်းတချို့က အစပျောက် နေသလို အသားစတွေပဲ ကျန်ခဲ့တာတွေလည်း ရှိ တယ်။ အခုလောလောဆယ် အလောင်း ၄ လောင်း ၅ လောင်း ရထားပြီ။ ပျောက်နေတဲ့သူတွေလည်း ရှိတာမို့လို့ သေဆုံးစာရင်း ထိခိုက်စာရင်းက ဒီထက်မက တိုးလာနိုင်ပါတယ်” ဟု ပြောသည်။   ထို့ပြင် ဩဂုတ်လ ၁၈ ရက်နေ့ နံနက် ၁၀ နာရီ ၅၀ မိနစ်ကလည်း ပင်လည်ဘူးမြို့နယ်အတွင်း တနေရာသို့ ဂျက် တိုက်လေယာဉ်များဖြင့် ဗုံး ၁၁ လုံး ကြဲချခဲ့သေးသည်။   အလားတူ ဩဂုတ်လ ၁၆ ရက် မွန်းလွဲပိုင်းကလည်း ကင်းပန်းကျေးရွာကို တိုက်လေယာဉ် ၄ စီးဖြင့် ၁၀ လုံးထက် မနည်း ဗုံးကြဲတိုက်ခိုက်ခဲ့ပြီး စက်သေနတ်များဖြင့်ပါ ထပ်မံပစ်ခတ်ခဲ့သဖြင့် ၁ နှစ်အရွယ် ကလေးငယ်တစ်ဦး အပါအဝင် အမျိုးသမီး ၃ ဦးနှင့် အမျိုးသား ၁ ဦး သေဆုံးခဲ့ရပြီး၊ ကျေးရွာအတွင်းရှိ စာသင်ကျောင်း၊ ဆေးခန်းနှင့် နေအိမ် ၁၅ လုံးခန့် မီးလောင် ပျက်စီးခဲ့ရသည်။   ဩဂုတ်လ ၁၇ ရက်နေ့တွင်လည်း မြေသာရွာ၊ မံစီလေးရွာနှင့် မြစေတီရွာဘက်သို့ လေကြောင်းမှ ထပ်မံ ဗုံးကြဲခဲ့ သဖြင့် ဆေးရုံနှင့် လူနေအိမ် ၁၃ လုံး ပျက်စီးခဲ့ကြောင်း ဒေသခံများက ဆိုသည်။   “ရွာထဲမှာ ဘာတိုက်ပွဲမှလည်း ဖြစ်တာမရှိဘဲ လေယာဉ်နဲ့ ပတ်ကြဲသွားတာပါ။ ဗုံးကြဲတုန်းက ပွဲချင်းပြီး သေတာ က တစ်ဦးတည်း ရှိပေမဲ့ ဒဏ်ရာပြင်းပြင်းထန်ထန် ရသွားကြတဲ့သူတွေက ဆေးကုရင်း ထပ်ဆုံးသွားကြတာ ဖြစ်ပါတယ်” ဟု ပင်လည်ဘူး ဒေသခံတစ်ဦးက ပြောသည်။   ယခုကဲ့သို့ ရက်ဆက် လေကြောင်းတိုက်ခိုက်မှုများ ပြုလုပ်နေခြင်းသည် အနီးအနားရှိ ဝန်းသိုမြို့ဘက်တွင် စစ်အုပ်စုတပ်၊ ရဲနှင့် ပျူစောထီး အင်အား ၅၀၀ ခန့် စုဝေးနေပြီး ပင်လည်ဘူးဘက်သို့ စစ်ကြောင်းထိုးရန် လမ်းကြောင်းရှင်းသည့်အနေဖြင့် ဗုံးကြဲခြင်းဖြစ်နိုင်ကြောင်း ကာကွယ်ရေးတပ်ဖွဲ့ဝင်များက သုံးသပ်ကြသည်။   တစ်ဖက်တွင်လည်း BNRA အဖွဲ့မှ တပ်မှူးနှစ်ဦးဖြစ်သည့် သခင်ဒေါင်းညိုနှင့် တကိုယ်တော်သုဘရာဇာတို့သည် ပင်လည်ဘူးမြို့နယ်အတွင်း ဆေးကုသမှု ခံယူနေစဉ် ထွက်ပြေးလွတ်မြောက်သွားခဲ့ပြီး စစ်အုပ်စုတပ်ထံ သတင်း ပို့လိုက်ခြင်းကြောင့် ယခုကဲ့သို့ လေကြောင်းတိုက်ခိုက်မှုများ ခပ်စိပ်စိပ် ဖြစ်ပွားလာရခြင်း ဖြစ်နိုင်ကြောင်း သတင်းရင်းမြစ်အချို့က ပြောသည်။   သို့သော်လည်း အဆိုပါ ဖြစ်စဉ်နှင့် ဆက်စပ်မှု ရှိမရှိကိုမူ သီးခြား အတည်ပြုနိုင်ခြင်း မရှိသေးပေ။   ကောလင်း၊ ဝန်းသို၊ ဗန်းမောက်၊ ဖောင်းပြင်မြို့များနှင့် ဆက်စပ်နေသည့် မဟာဗျူဟာကျသော ပင်လည်ဘူးမြို့ကို ၂၀၂၄ ခုနှစ် အောက်တိုဘာလ ၈ ရက်နေ့တွင် တော်လှန်ရေး ပူးပေါင်းတပ်များက သိမ်းပိုက်ထားခြင်း ဖြစ်ပြီး လက်ရှိတွင် လေကြောင်းအန္တရာယ်ကြောင့် ဒေသခံများအနေဖြင့် လူစုလူဝေး မလုပ်ကြရန်နှင့် အထူးသတိထား စုဝေးကြရန် ဒေသတွင်း သတင်းအချက်အလက် ထုတ်ပြန်ရေးအဖွဲ့များက သတိပေးထားသည်။   ဓါတ်ပုံ - (ပေးပို့ - CJ)   #ပင်လည်ဘူး

ပင်လည်ဘူးတွင် စစ်တပ်က ရက်ဆက် ဗုံးကြဲ၍ ကလေးငယ်အပါအဝင် ၉ ဦးထက်မနည်း သေဆုံး

ပင်လည်ဘူးတွင် စစ်တပ်က ရက်ဆက် ဗုံးကြဲ၍ ကလေးငယ်အပါအဝင် ၉ ဦးထက်မနည်း သေဆုံး သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၁၉ ရက်။ စစ်ကိုင်းတိုင်းနှ…

  • August 19, 2026
ဝမ်းပျက်ဝမ်းလျှောရောဂါကြောင့် လူသေဆုံးမှု ရှိနေစဉ် စစ်တပ်က စစ်တွေကို လမ်းပိတ်ထား   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၁၉ ရက်။   စစ်တပ် ထိန်းချုပ်ထားသည့် ရခိုင်ပြည်၊ စစ်တွေမြို့နှင့် အနီးအနားရှိ မွတ်ဆလင် ကျေးရွာများ၊ ဒုက္ခသည် စခန်းများတွင် ဝမ်းပျက်ဝမ်းလျှောရောဂါ ပြင်းထန်စွာ ဖြစ်ပွားနေပြီး အနည်းဆုံး မွတ်ဆလင် ၁၂ ဦး သေဆုံးခဲ့ ကြောင်း ဒေသခံများက ပြောသည်။   ဝမ်းလျှောရောဂါ စစ်တွေမြို့သို့ ကူးစက်လာမည်ကို ကာကွယ်သည့် အနေဖြင့် စစ်တပ်က လမ်းများ ပိတ်ဆို့ထားသဖြင့် လူနာများမှာ စစ်တွေတွင် ဆေးကုခွင့်မရပဲ ဆေးမီးတိုဖြင့်သာ ကုသနေရသည်။   စစ်တွေမြို့ပြင်ရှိ သဲချောင်း၊ အုန်းတောချေ၊ အုန်းတောကြီး၊ ဒါးပိုင်၊ သက်က္ကပြင်နှင့် ပလ္လင်ပြင် ကျေးရွာ အပါ အဝင် မွတ်ဆလင်ကျေးရွာ ၁၀ ရွာထက်မနည်း၌ လွန်ခဲ့သည့် ဇူလိုင်လကုန်ပိုင်းမှ စတင်ကာ ဝမ်းပျက်ဝမ်းလျှော ရောဂါ ဖြစ်ပွားနေခြင်း ဖြစ်သည်။   အဆိုပါ ကျေးရွာများတွင် ဝမ်းရောဂါ ကူးစက်မှု အရှိန်မြင့်တက်လာချိန်၌ စစ်တပ်က မွတ်ဆလင်ကျေးရွာ များသို့ သွားသည့် ဘုမေလမ်း၊ သံတော်လီကျေးရွာ သွားလမ်းနှင့် အခြား လမ်းအသီးသီးကို ပိတ်ဆို့၍ Lockdown ချထားသည်။   ဒေသခံ မွတ်ဆလင် အမျိုးသားတစ်ဦးက “စစ်တွေမြို့အထွက်က မွတ်ဆလင်ရွာတွေမှာဖြစ်နေတာပါ။ မြို့ထဲ စစ်တပ်က အဝင်မခံတော့ ကုသတာမှာ အဆင်မပြေဘူး။ ဆရာဝန်တွေ၊ ဆေးတွေ အခက်အခဲ ဖြစ်နေတာပါ။ သဲချောင်း၊ ဒါးပိုင်၊ သက်က္ကပြင် အဲ့ဒီရွာတွေမှာ သေဆုံးနေတာပါ။ အချင်းချင်း ဆေးမီးတိုနဲ့ ကုနေရတာပါ” ဟု ပြောသည်။   ဝမ်းရောဂါ ဖြစ်ပွားနေသည့် မွတ်ဆလင်များသည် ငွေကြေး အခက်အခဲများရှိနေသည့်အပြင် စစ်အုပ်စုတပ်က လုံခြုံရေး တင်းကျပ်ကာ သွားလာခွင့် ပိတ်ပင်ထားသဖြင့် စစ်တွေ ပြည်သူ့ဆေးရုံကြီးနှင့် ပုဂ္ဂလိက ဆေးရုံ၊ ဆေးခန်းများသို့ သွားရောက် ဆေးကုသခွင့် မရကြပေ။   အထူးသဖြင့် ဒုက္ခသည်စခန်းများအတွင်း၌ သောက်သုံးရေနှင့် ကျန်းမာရေး စောင့်ရှောက်မှု ပြည့်ဝစွာ မရရှိ သဖြင့် ဝမ်းရောဂါကြောင့် ကလေးငယ်များ သေဆုံးမှုပါ ရှိလာနေခြင်း ဖြစ်သည်။   စစ်တွေ ဒေသခံ ရခိုင်အမျိုးသမီးတစ်ဦးကလည်း “မွတ်ဆလင်တွေ မြို့ထဲအဝင်မခံတာ ကြားရတယ်။ ကျန်းမာ ရေး စောင့်ရှောက်မှုကလည်း မရတော့ အချင်းချင်း ဖြစ်သလို ကုနေတာ သေတာတွေရှိတယ်။ မထိန်းနိုင်ရင် တော့ အသေအပျောက် များလာမယ်။ စားဖို့သောက်ဖို့တောင် အနိုင်နိုင် ငွေကြေးအခက်အခဲတွေ အများကြီး ရှိနေတာ” ဟု ပြောသည်။   ဝမ်းပျက်ဝမ်းလျှောရောဂါသည် မသန့်ရှင်းသော အစားအစာနှင့် သောက်သုံးရေတို့မှတစ်ဆင့် ကူးစက်နိုင်ပြီး ကိုယ်ခံအားနည်းသူများနှင့် ကလေးငယ်များအတွက် အသက်အန္တရာယ် အလွန်စိုးရိမ်ရကြောင်း ကျန်းမာရေး အသိုင်းအဝိုင်းက သတိပေးထားသည်။   ဓါတ်ပုံ - RFA (စစ်တွေမြို့နယ်၊ သဲချောင်း ရိုဟင်ဂျာ ဒုက္ခသည်စခန်းတွင် ခိုလှုံနေကြသူများ - ပုံဟောင်း)   #စစ်တွေ

ဝမ်းပျက်ဝမ်းလျှောရောဂါကြောင့် လူသေဆုံးမှု ရှိနေစဉ် စစ်တပ်က စစ်တွေကို လမ်းပိတ်ထား 

ဝမ်းပျက်ဝမ်းလျှောရောဂါကြောင့် လူသေဆုံးမှု ရှိနေစဉ် စစ်တပ်က စစ်တွေကို လမ်းပိတ်ထား  သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၁၉ ရက်။ စစ်…

  • August 19, 2026
×Close