သတင်း

အရေးပေါ် ဆေးကုသခွင့် ကြန့်ကြာသဖြင့် ၈၈ မျိုးဆက် နိုင်ကျဉ်းတစ်ဦး သေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၇ ရက်။ မန္တလေးတိုင်း၊ မြင်းခြံမြို့ရှိ အကျဉ်းထောင်တွင် အရေးပေါ် ဆေးကုသခွင့်တောင်းဆိုမှုကို ထောင်အာဏာပိုင်များ ထံ အဆင့်ဆင့် တင်ပြနေရသဖြင့် အချိန်ကြန့်ကြာခဲ့ရာမှ နှလုံးရောဂါအခံရှိသည့် ၈၈ မျိုးဆက် နိုင်ငံရေးအကျဉ်း သားတစ်သီး ကျဆုံးသွားခဲ့သည်။ အရေးပေါ် ဆေးကုသခွင့် ကြန့်ကြာနေသဖြင့် ကျဆုံးသွညးသည့် နိုင်ငံရေး အကျဉ်းသားမှာ ဦးစိုးမိုးနိုင် (ခ) စိုးနိုင် (ခ) ဒိန်းဒေါင် ဖြစ်သည်ဟု မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် (PPNM) က ဆိုသည်။ နှလုံးသွေးကြောကျဉ်ရောဂါအခံ ရှိသူ ဦးစိုးမိုးနိုင်သည် စက်တင်ဘာလ ၁၅ ရက်နေ့၊ ည ၁၀ နာရီ အချိန်ခန့်တွင် ရုတ်တရက် အမောဖောက်လာသဖြင့် ဆေးကုသခွင့် တောင်းဆိုခဲ့သော်လည်း ထောင်အာဏာပိုင်များက အဆင့် ဆင့် စိစစ်တင်ပြနေ၍ ပြင်ပဆေးရုံသို့ အချိန်မီ ပို့ဆောင်နိုင်ခဲ့ခြင်း မရှိကြောင်း ဆိုသည်။ PPNM ပြောရေးဆိုခွင့်ရှိသူ မရောင်နီလင်းက “ဆေးကုသခွင့် မရတာတော့ မဟုတ်ဘူး၊ ဆေးကုသခွင့် ရတယ်။ အရင်ကတည်းကကိုက နှလုံးဆေး သောက်နေရတဲ့သူ ဖြစ်ပါတယ်။ ရုတ်တရက် ဒီနှလုံးဖောက်လာတဲ့ အချိန်မှာ ချက်ချင်းပေါ့နော် အပြင်ဆေးရုံကို ပို့ရမယ်ပေါ့လေ။ အဲဒီအချိန်မှာ ချက်ချင်းပို့တာမျိုး မရှိဘဲနဲ့ အချိန်ကြန့် ကြာ သွားတာကြောင့်မို့လို့ ဒီလိုမျိုးပေါ့နော် မသေဆုံးသင့်ဘဲနဲ့ သေဆုံးရတာ ဖြစ်ပါတယ်” ဟု ပြောသည်။ မြင်းခြံဆေးရုံ မှတ်တမ်းများအရ ၎င်းသည် စက်တင်ဘာလ ၁၅ ရက်နေ့၊ ည ၁၁ နာရီခွဲ အချိန်ခန့်တွင် ဆေးရုံ၌ ကျဆုံးခဲ့ရခြင်း ဖြစ်သည်။ အဆိုပါ ဖြစ်စဉ်နှင့် ပတ်သက်၍ မရောင်နီလင်းက “လုပ်ငန်းအဆင့်ဆင့်ကို ပြောရမယ်ဆိုရင် ထောင်တွင်း ဆေး ကုသမှုမှာ ဆိုရင်လည်း သက်ဆိုင်ရာ ဝန်ထမ်း၊ ဝန်ထမ်းကနေမှ အဆောင်မှူး၊ အဆောင်မှူးကနေမှ ထောင်ပိုင်ဆို ပြီး တင်ပြရတယ်။ ဒါဟာ ထောင်တွင်း ဆေးကုသမှုပဲ ရှိသေးတယ်။ ပြင်ပဆေးရုံကို တင်ပြရတယ် ဆိုရင်တော့ အဲဒီထက်ပိုတဲ့ အဆင့်ဆင့် ရှိလာလိမ့်မယ်။ ဒါကြောင့်မလို့ အရေးပေါ်လူနာတွေအတွက် တင်ပြရတဲ့ အချိန်ကြာ မြင့်မှုအပေါ်မှာ မူတည်ပြီးတော့ အသက်အန္တရာယ် စိုးရိမ်ရပါတယ်” ဟု ဆက်ပြောသည်။ ထို့သို့ သေဆုံးခဲ့ပြီးနောက် နောက်တစ်နေ့ စက်တင်ဘာ ၁၆ ရက် နံနက်ပိုင်းတွင် ထောင်အာဏာပိုင်များက မိသားစုထံ အကြောင်းကြားခဲ့သော်လည်း ရုပ်အလောင်းအား လိုက်ပါပို့ဆောင်ခွင့် မပြုဘဲ ထောင်လုပ်ထုံး လုပ်နည်းအရ ထိုနေ့ မွန်းလွဲ ၂ နာရီခွဲခန့်တွင် မြင်းခြံသုသာန်၌ မြေမြှုပ်သင်္ဂြိုဟ်ခဲ့ကြသည်။ ကျဆုံးသွားသူ ဦးစိုးမိုးနိုင်သည် ၈၈ မျိုးဆက် နိုင်ငံရေးအကျဉ်းသားတစ်ဦး ဖြစ်သည့်အပြင် ၂၀၀၇ ရွှေဝါရောင် အရေးအခင်းနှင့် ၂၀၂၁ အာဏာသိမ်းမှု ဆန့်ကျင်ရေးတို့တွင် လှုပ်ရှားခဲ့သူ ဖြစ်သည်။ ၎င်းကို ၂၀၂၁ ခုနှစ်၊ ဒီဇင်ဘာလ ၈ ရက်နေ့တွင် စစ်အုပ်စုတပ်က ဖမ်းဆီးခဲ့ပြီး အကြမ်းဖက်မှုတိုက်ဖျက်ရေး ဥပဒေပုဒ်မ ၅၂ - က၊ ပေါက်ကွဲစေတတ်သော ဝတ္ထုပစ္စည်းများ အက်ဥပဒေ ၁၉ - က တို့ဖြင့် ထောင်ဒဏ် ၂၄ နှစ် ချမှတ်ထားခြင်းဖြစ်သည်ဟု PPNM က ထုတ်ပြန်သည်။ ဓါတ်ပုံ - PPNM #မြင်းခြံမြို့

အရေးပေါ် ဆေးကုသခွင့် ကြန့်ကြာသဖြင့် ၈၈ မျိုးဆက် နိုင်ကျဉ်းတစ်ဦး သေဆုံး

အရေးပေါ် ဆေးကုသခွင့် ကြန့်ကြာသဖြင့် ၈၈ မျိုးဆက် နိုင်ကျဉ်းတစ်ဦး သေဆုံး သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၇ ရက်။ မန္တလေးတိုင်း၊ မ…

  • September 17, 2026
ဘုန်းကြီးကျောင်း ရေသန့်စက်ဖွင့်ပွဲကို စစ်တပ် ဗုံးကြဲ၊ ဆရာတော် အပါအဝင် ၃ ဦး သေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၇ ရက်။ စစ်ကိုင်းတိုင်း၊ ရွှေဘိုမြို့နယ်အနောက်ခြမ်းရှိ နှမစားရစ်ကျေးရွာ ဘုန်းကြီးကျောင်းတွင် ကျေးရွာသူ ရွာသားများ အတွက် ရေသန့်စက်ဖွင့်ပွဲ အလှူပြုလုပ်နေစဉ် စစ်အုပ်စုတပ်က လေကြောင်းမှ ဗုံးကြဲတိုက်ခိုက်ခဲ့သဖြင့် ကျောင်း ထိုင်ဆရာတော် ပျံလွန်တော်မူပြီး ရွာခံ ၂ ဦး သေဆုံးကာ ၈ ဦး ဒဏ်ရာရရှိခဲ့သည်။ ပြီးခဲ့သည့် စက်တင်ဘာ ၁၆ ရက်နေ့၊ မွန်းလွဲ ၁၂ နာရီခွဲခန့်တွင် တစ်ရွာလုံး သုံးစွဲနိုင်ရန် ဆရာတော် ဦးစီး၍ ဆောက်လုပ်ထားသည့် ရေသန့်စက်ရုံ အလှူပွဲ ကျင်းပနေစဉ် မိတ္ထီလာလေတပ်မှ တက်လာသည့် ဂျက်ဖိုက်တာ ဖြင့် ဗုံး ၃ လုံး ကြဲချတိုက်ခိုက်ခဲ့ခြင်း ဖြစ်သည်။ လေကြောင်းမှ ဗုံးထိမှန်မှုကြောင့် သက်တော် ၄၃ နှစ်ရှိ ကျောင်းထိုင်ဆရာတော် ပျံလွန်တော်မူခဲ့ ရသလို အလှူပွဲသို့ ရောက်ရှိနေသည့် အသက် ၆၀ ကျော်အရွယ် ရပ်မိရပ်ဖ အမျိုးသား ၂ ဦးလည်း ပွဲချင်းပြီး သေဆုံးခဲ့ရ သည်။ “ရွာက လူတွေ ရေသန့်သန့် သောက်ရအောင် ဘုန်းဘုန်းကိုယ်တိုင် ဦးစီးပြီး ဆောက်ပေးထားတာပါ။ အဲဒါလေး ဖွင့်ပွဲလုပ်ပြီး လူတွေ စုနေကြတဲ့အချိန်မှာ လေယာဉ်နဲ့ တမင် လာကြဲတာ။ ဆရာတော်လည်း ပျံလွန်တော်မူသွား သလို အဘိုး နှစ်ယောက်လည်း ပွဲချင်းပြီး ဆုံးသွားရတယ်” ဟု ဒေသခံတစ်ဦးက ပြောသည်။ ထို့ပြင် ဗုံးထိမှန်၍ သေဆုံးသူများနှင့် ဒဏ်ရာရရှိသူများကို မြေပြင်ကယ်ဆယ်ရေး ဆောင်ရွက်နေချိန်တွင်လည်း ရွှေဘိုမြို့အခြေစိုက် ခလရ (၄၂) တပ်ရင်းက ၁၂၀ မမ လက်နက်ကြီးများဖြင့် ၃ ကြိမ်ထက်မနည်း ထပ်မံ ပစ်ခတ် တိုက်ခိုက်ခဲ့ကြောင်း ရွှေဘိုမြို့နယ် ပကဖ ပြန်ကြားရေးတာဝန်ခံက ပြောသည်။ အဆိုပါ နှမစားရစ်ကျေးရွာ ပတ်ဝန်းကျင်တွင် စစ်ရေးလှုပ်ရှားမှုနှင့် ထိတွေ့တိုက်ပွဲဖြစ်ပွားခြင်း မရှိဘဲ အရပ်သား ပြည်သူများ အေးချမ်းစွာ စုဝေးနေသည့် သာသနိက အဆောက်အအုံကို စစ်အုပ်စုတပ်က ပစ်မှတ်ထား၍ တမင်ရည်ရွယ် တိုက်ခိုက်ခဲ့ခြင်း ဖြစ်သည်ဟုလည်း ဆိုသည်။ လက်ရှိတွင် စစ်အုပ်စုတပ်သည် ရွှေဘိုနယ်အတွင်းရှိ ပျူစောထီးရွာများကို စစ်သင်တန်းပေး၊ လက်နက်တပ်ဆင် ပေးကာ ကျေးရွာများကို စီးနင်းလုယက်ခိုင်းနေသည်ဟုလည်း ဒေသခံ တော်လှန်ရေးအဖွဲ့များကပြောသည်။ ထို့ပြင် စစ်အုပ်စုသည် အရပ်သားပြည်သူများနှင့် စာသင်ကျောင်း၊ ဘုန်းကြီးကျောင်း၊ ဆေးရုံများကို အချိန်မရွေး ပစ်မှတ်ထား တိုက်ခိုက်နေသဖြင့် ပြည်သူများအနေဖြင့် လေကြောင်းနှင့် လက်နက်ကြီး အန္တရာယ်ကို သတိပြု ရန်၊ လေယာဉ်သံနှင့် ပစ်ခတ်သံကြားပါက လုံခြုံသည့်နေရာသို့ အမြန်ဆုံး ရွှေ့ပြောင်းရန်နှင့် မလိုအပ်ဘဲ လူစု လူဝေး ပြုလုပ်ခြင်း မပြုကြရန် ရွှေဘိုမြို့နယ် ပြည်သူ့ကာကွယ်ရေးအဖွဲ့ကလည်း သတိပေးထားသည်။ ဓါတ်ပုံ - (ပကဖ၊ ရွှေဘိုမြို့နယ်၊ NUG) #ရွှေဘိုမြို့နယ်

ဘုန်းကြီးကျောင်း ရေသန့်စက်ဖွင့်ပွဲကို စစ်တပ် ဗုံးကြဲ၊ ဆရာတော် အပါအဝင် ၃ ဦး သေဆုံး

ဘုန်းကြီးကျောင်း ရေသန့်စက်ဖွင့်ပွဲကို စစ်တပ် ဗုံးကြဲ၊ ဆရာတော် အပါအဝင် ၃ ဦး သေဆုံး သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၇ ရက်။ စစ်ကိ…

  • September 17, 2026
စစ်တပ်ဗုံးကြဲ၍ မိဘမဲ့ကျောင်းရှိ ကလေး ၁ ဦး သေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၇ ရက်။ ကရင်နီပြည်၊ ဒီးမော့ဆိုမြို့နယ် အနောက်ဘက်ခြမ်းရှိ မိဘမဲ့ကျောင်းကို စစ်အုပ်စုတပ်က တိုက်ပွဲဖြစ်ပွားခြင်းမရှိ ဘဲ အသေခံဒရုန်းဖြင့် ပစ်မှတ်ထား တိုက်ခိုက်ခဲ့တာကြောင့် ကစားနေသည့် အသက် ၉ နှစ်အရွယ် ကလေးငယ် တစ်ဦး သေဆုံးပြီး ၃ ဦး ဒဏ်ရာရရှိခဲ့သည်။ စက်တင်ဘာလ ၁၆ ရက်နေ့၊ ညနေပိုင်းတွင် စစ်အုပ်စုတပ်က ကင်းထောက်ဒရုန်းများ ဝဲပျံပြီးနောက် မိဘမဲ့ ကျောင်းအနီးသို့ အသေခံဒရုန်း ၂ စီးဖြင့် တိုက်ခိုက်ခဲ့ခြင်းဖြစ်သည်။ ပထမတစ်စီး ထိုးဆင်းချိန်တွင် လူထိခိုက်မှု မရှိခဲ့သော်လည်း ဒုတိယတစ်စီး ထိုးဆင်းချိန်၌ ဆော့ကစားနေသည့် ကလေးငယ်များကို တိုက်ရိုက် ထိမှန်သွားခြင်းဖြစ်သည်ဟု ဒေသခံများက ပြောသည်။ “ဒရုန်းတစ်စီး လာပြီးပြီဆိုတော့ ဆက်မလာလောက်တော့ဘူးအထင်နဲ့ အားလုံး ပေါ့ဆသွားချိန်မှာ ဒုတိယ တစ်စီးက ထပ်ထိုးဆင်းလာတာပါ။ ကစားနေတဲ့ ကလေး ဦးခေါင်းကို ဒရုန်းစ ထိမှန်ပြီး ပွဲချင်းပြီး ဆုံးသွားရ တာပါ” ဟု နီးစပ်သည့် စစ်ဘေးရှောင် ဒေသခံတစ်ဦးက ပြောသည်။ အဆိုပါ ဒရုန်းတိုက်ခိုက်မှုကြောင့် အသက် ၁၆ နှစ်အရွယ် ကလေးငယ်တစ်ဦးအပါအဝင် ဒဏ်ရာရရှိသူ ၃ ဦး အနက် ၂ ဦးမှာ စိုးရိမ်ရသည့် အခြေအနေတွင် ရှိနေသည်။ ဒါ့အပြင် အနီးအနားရှိ လူနေအိမ်အချို့နှင့် မော်တော် ယာဉ် ၂ စီးပါ ထိခိုက်ပျက်စီးခဲ့ရသည်။ စစ်ရေးသတင်းရင်းမြစ်တစ်ဦးက “စစ်ဘေးရှောင်နေရတာ ကြာလာတော့ စိတ်ထွက်ပေါက်အဖြစ် ကစားကြ၊ ပွဲလေးတွေ လုပ်ကြတာကို နားလည်ပေမဲ့ လက်နက်ကြီးနဲ့ ဒရုန်းတွေ ခဏခဏ ကျနေတဲ့အချိန်မှာတော့ လူစု လူဝေးပွဲတွေကို အထူးသတိထား ဆင်ခြင်ကြဖို့ လိုပါတယ်” ဟု ပြောသည်။ မိုးဗြဲဘက်မှ ဒီးမော့ဆိုသို့ စစ်ကြောင်းထိုးလာသည့် စစ်အုပ်စုတပ်သည် တော်လှန်ရေးတပ်ဖွဲ့များ၏ ခုခံမှုကြောင့် ရှေ့ဆက်မတိုးနိုင်ဘဲ တိုက်ပွဲမရှိသည့် အရပ်သားနေရာများ၊ မိဘမဲ့ကျောင်းများနှင့် စာသင်ကျောင်းများကို လေကြောင်းနှင့် ဒရုန်းများ သုံး၍ ပစ်မှတ်ထား တိုက်ခိုက်နေခြင်း ဖြစ်သည်။ စက်တင်ဘာလအတွင်း စစ်အုပ်စုတပ်၏ တိုက်ခိုက်မှုများကြောင့် ဒီးမော့ဆို၊ လွိုင်ကော်နှင့် မော်ချီးဒေသတို့တွင် အရပ်သား ၂၀ ထက်မနည်း ထိခိုက်သေဆုံးခဲ့ရပြီး၊ ဒီးမော့ဆိုအနောက်ခြမ်းရှိ စာသင်ကျောင်းအများစုကိုလည်း ယာယီ ပိတ်ထားရသည်။ ဓါတ်ပုံ - CJ #ဒီးမော့ဆိုမြို့နယ်

စစ်တပ်ဗုံးကြဲ၍ မိဘမဲ့ကျောင်းရှိ ကလေး ၁ ဦး သေဆုံး

စစ်တပ်ဗုံးကြဲ၍ မိဘမဲ့ကျောင်းရှိ ကလေး ၁ ဦး သေဆုံး သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၇ ရက်။ ကရင်နီပြည်၊ ဒီးမော့ဆိုမြို့နယ် အနောက်ဘ…

  • September 17, 2026
PDF-Zoland မှ စစ်သုံ့ပန်း ၈၀ ခန့် အစုလိုက် ထွက်ပြေးလွတ်မြောက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၆ ရက်။ ချင်းပြည်မြောက်ပိုင်း၊ တီးတိန်မြို့နယ်ရှိ PDF-Zoland ထိန်းသိမ်းရေးစခန်းတွင် ထိန်းသိမ်းထားသော ဗိုလ်မှူး၊ ဗိုလ်ကြီးများ အပါအဝင် စစ်သုံ့ပန်း ၈၀ ခန့် အချုပ်စောင့်များကို တိုက်ခိုက်ကာ အစုလိုက် ထွက်ပြေး လွတ်မြောက်သွားကြသည်။ ပြီးခဲ့သည့် စက်တင်ဘာလ ၁၃ ရက်နေ့ ညပိုင်းက ကနေဒီတောင်တိုက်ပွဲနှင့် ဒေသတွင်းတိုက်ပွဲများအတွင်း ဖမ်းဆီးရမိထားသည့် စစ်သုံ့ပန်းများသည် အချုပ်စောင့် ရဲဘော်များကို ရိုက်နှက်၍ လက်နက်နှင့် ကျည်ဆန်များ လုယူကာ ထွက်ပြေးခဲ့ကြခြင်းဖြစ်သည်။ ထို့နောက် စက်တင်ဘာလ ၁၅ ရက် နံနက်ပိုင်းတွင် ထွက်ပြေးလွတ်မြောက်သွားသည့် စစ်သုံ့ပန်းများအနက် အယောက် ၃၀ ထက်မနည်းသည် တီးတိန်မြို့အခြေစိုက် ခလရ (၂၆၉) စစ်အုပ်စုတပ်ထံ ပြန်လည်ရောက်ရှိသွား ကြောင်း ဒေသခံများနှင့် စစ်ရေးသတင်းရင်းမြစ်များက ပြောသည်။ “စက်တင်ဘာ ၁၅ ရက် မနက်ပိုင်းက ခလရ ၂၆၉ တပ်ကုန်းဘက်ကို မောင်းသွားတဲ့ စစ်ကားပေါ်မှာ စစ်ဝတ်စုံ ဝတ်ထားသူတွေအပြင် အရပ်ဝတ်နဲ့ စစ်သုံ့ပန်း ၃၀ ကျော် ၄၀ လောက် တင်လာတာကို မြင်လိုက်ရတယ်။ စစ်ကောင်စီတပ်ကလည်း သူတို့ သုံ့ပန်းတွေကို လာကြိုပြီး လမ်းဇန်ရွာမှာ အင်အား ၃၀ လောက်နဲ့ ဝင်တပ်စွဲ ထားတာ မျိုးတွေ ရှိပါတယ်” ဟု PDF-Zoland နှင့် နီးစပ်သည့် စစ်ရေးသတင်းရင်းမြစ်တစ်ဦးက ပြောသည်။ ထို့ပြင် စက်တင်ဘာလ ၁၄ ရက်နေ့ ညနေပိုင်းက ထွက်ပြေးနေသည့် စစ်သုံ့ပန်းများနှင့် ချင်းကာကွယ်ရေး တပ်ဖွဲ့ များအကြား ထိတွေ့မှုဖြစ်ပွားစဉ် ထွက်ပြေးစစ်သုံ့ပန်းများ၏ ပစ်ခတ်မှုကြောင့် လမ်းဇန်ကျေးရွာ နှစ်ခြင်းအသင်းတော်မှ ခရီးသွားနေသည့်ခရစ်ယာန် ဓမ္မအမှုတော်ဆောင် ဆရာတော်တစ်ဦး ကျည်ထိမှန် သေဆုံးခဲ့ပြီး၊ ၎င်း၏အစ်ကိုဖြစ်သူလည်း ဒဏ်ရာ ရရှိခဲ့သည်။ “စစ်သုံ့ပန်းတွေဟာ ရေချိုးဖို့ အကြောင်းပြပြီး အချုပ်စောင့်ကို ရိုက်နှက် လက်နက်လုယူ ပြေးကြတာပါ။ အချုပ် စောင့်ရဲဘော်တချို့ ဒဏ်ရာရသွားတယ်။ လမ်းမှာ သုံ့ပန်းတွေ ပစ်ခတ်တာကြောင့် ခရီးသွားနေတဲ့ အသင်းအုပ်ဆရာတော်တစ်ပါး ကျည်ထိသေဆုံးခဲ့ရတယ်” ဟု သတင်းရင်းမြစ်က ဆက်ပြောသည်။ လက်ရှိတွင် စစ်အုပ်စုတပ်က ထွက်ပြေးနေသည့် စစ်သုံ့ပန်းများ လွယ်ကူစွာ ထွက်ပြေးလွတ်မြောက်နိုင်ရေးနှင့် နယ်မြေရှင်းလင်းနိုင်ရန်အတွက် စက်တင်ဘာလ ၁၅ ရက်နေ့မှစ၍ စစ်ကိုင်းတိုင်း၊ ကလေးမြို့ဘက်မှ ချင်းပြည် မြောက်ပိုင်း၊ တီးတိန်မြို့သို့ တက်လာမည့် မော်တော်ယာဉ်များအားလုံးကို သွားလာခွင့် ပိတ်ပင်ထားကြောင်း မြေပြင်သတင်းရင်းမြစ်များက ပြောသည်။ အလားတူ ပြီးခဲ့သည့် ဩဂုတ်လဆန်းပိုင်းကလည်း PDF-Zoland ထိန်းသိမ်းရေးစခန်းမှ စစ်သုံ့ပန်း ၁၀ ဦးထက် မနည်း ထွက်ပြေးလွတ်မြောက်ခဲ့ဖူးပြီး၊ ၎င်းတို့ကို စစ်အုပ်စုက ကလေးမြို့ စစ်ဆေးရေးဂိတ်များတွင် ပြန်လည် တာဝန်ချထားသဖြင့် စစ်ရေးသတင်းအချက်အလက် ပေါက်ကြားမည်ကို တော်လှန်ရေးတပ်ဖွဲ့များနှင့် ဒေသခံ များက စိုးရိမ်နေကြသည်။ ဓါတ်ပုံ - စစ်အုပ်စုထံမှ သိမ်းဆည်းရမိခဲ့သော လက်နက်ခဲယမ်းများနှင့်အတူ တွေ့ရသည့် စစ်သုံ့ပန်းများ / PDF-Zoland) #PDF_Zoland #စစ်သုံ့ပန်း

PDF-Zoland မှ စစ်သုံ့ပန်း ၈၀ ခန့် အစုလိုက် ထွက်ပြေးလွတ်မြောက်

PDF-Zoland မှ စစ်သုံ့ပန်း ၈၀ ခန့် အစုလိုက် ထွက်ပြေးလွတ်မြောက် သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၆ ရက်။ ချင်းပြည်မြောက်ပိုင်း၊ တီ…

  • September 16, 2026
ဆန်တက်လာသည့် စစ်သင်္ဘော (၁) စီး ထပ်မံ နစ်မြုပ်၊ လေယာဉ်တစ်စီး ပျက်ကျနိုင်ဖွယ်ရှိ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၆ ရက်။ ကချင်ပြည်၊ ဧရာဝတီမြစ်ကြောင်းအတိုင်း ဆန်တက်လာသည့် စစ်အုပ်စုတပ်၏ စစ်ရေယာဉ်များကို ကချင်လွတ် လပ်ရေးတပ်မတော် (KIA) နှင့် ပူးပေါင်းတပ်ဖွဲ့များက စောင့်ကြို တိုက်ခိုက်ခဲ့ရာ စစ်သင်္ဘော (၁) စီး ထပ်မံ နစ်မြုပ်သွားခဲ့ပြီး ကျန်ရှိသည့် သင်္ဘောများလည်း ရှေ့ဆက်မတိုးနိုင်ဘဲ ပြန်လည်ဆုတ်ခွာသွားရသည်။ စက်တင်ဘာလ ၁၆ ရက်နေ့ (ယနေ့) နံနက်ပိုင်းတွင် ရွှေကူမြို့ဘက်မှ ဗန်းမော်မြို့ဘက်သို့ ဆန်တက်လာသည့် စစ်အုပ်စု စစ်သင်္ဘော (၃) စီးကို KIA ဦးဆောင်သည့် တော်လှန်ရေး ပူးပေါင်းတပ်များက ရွှေကူနှင့် ဗန်းမော် အကြား ရေနီကျေးရွာနှင့် နမ့်ခုပ်ရွာအနီးတွင် စောင့်ကြိုတိုက်ခိုက်ခဲ့ခြင်းဖြစ်သည်။ ထိုတိုက်ခိုက်မှုကြောင့် စစ်သင်္ဘော (၁) စီးမှာ ထိမှန်ကာ ဧရာဝတီမြစ်အတွင်း ထပ်မံ နစ်မြုပ်သွားခဲ့ပြီး ကျန်ရှိ သည့် စစ်သင်္ဘော (၂) စီးမှာ ရွှေကူဘက်သို့ ပြန်လည်ဆုတ်ခွာသွားခဲ့ရခြင်း ဖြစ်သည်ဟု မြေပြင် သတင်း ရင်းမြစ်က ပြောသည်။ ထို့ပြင် ဗန်းမော်ဘက်မှ စုန်ဆင်းလာသည့် စစ်သင်္ဘောများကိုလည်း စင်းခန်းတံတားအနီးတွင် တော်လှန်ရေး တပ်ဖွဲ့များက ဆက်လက်စောင့်ကြို တိုက်ခိုက်နေသဖြင့် မြစ်ကြောင်းတစ်လျှောက် တိုက်ပွဲများ ပြင်းထန်နေ သည်။ မြေပြင်တွင် လှုပ်ရှားနေသည့် တော်လှန်ရေး တပ်ဖွဲ့ဝင်တစ်ဦးက “မနက်က ရွှေကူဘက်က တက်လာတဲ့ သင်္ဘော ၃ စီးကို နမ့်ခုပ်ဘက်မှာ ပစ်လိုက်တာပါ။ စစ်သင်္ဘော တစ်စီးက တော့ ထပ်ပြီး ချက်ချင်းကို မြုပ်သွားတယ်။ စစ်အုပ်စုတပ်ဖွဲ့ဝင်တွေ မြစ်ထဲမျောနေတာ မြင်ရတယ်။ ကျန်တဲ့ နှစ်စီးကတော့ ရှေ့မတိုးရဲတော့ဘဲ ရွှေကူ ဘက်ကို ပြန်လှည့်သွားရတာ” ဟု ပြောသည်။ ရေကြောင်းတိုက်ပွဲများအတွင်း စစ်အုပ်စုဘက်က အထိနာနေသဖြင့် သင်္ဘောလမ်းကြောင်း လုံခြုံရေးနှင့် ပစ်ကူ ပေးနိုင်ရန် တရုတ်နိုင်ငံထုတ် Y-12 အမျိုးအစား လေယာဉ်ဖြင့် ဗုံးလာရောက်ကြဲချစဉ် KIA ပူးပေါင်းတပ်ဖွဲ့ များက စက်သေနတ်ကြီးများဖြင့် ပြန်လည်ပစ်ခတ်ရာ လေယာဉ်မှာ မီးခိုးအူကာ တောင်ပေါ်ဘက်သို့ ပျက်ကျ သွားခဲ့ကြောင်းဆိုသည်။ “Y-12 လေယာဉ်က ဗုံးလာကြဲတာကို ရဲဘော်တွေက စက်သေနတ်ကြီးနဲ့ ပြန်ဆော်လိုက်တာ ထိသွားတယ်။ လေယာဉ် စောင်းသွားပြီး မီးခိုးတွေ ထွက်လာတာ တွေ့တယ်။ တောင်ပေါ်ဘက်ကို ကျသွားတယ်လို့ ပြောလို့ရတယ်။ လက်ရှိမှာတော့ သွားရောက်စစ်ဆေးနေတုန်းပဲ။ အခြေအနေအတိအကျတော့ မသိရသေးဘူး” ဟု ကချင်စစ်ရေး သတင်းရင်းမြစ်တစ်ဦးက ပြောဆိုသည်။ ဧရာဝတီမြစ်ကြောင်းအတိုင်း ဆန်တက်လာသည့် စစ်အုပ်စု၏ စစ်ရေယာဉ်များကို KIA နှင့် ပြည်သူ့ကာကွယ်ရေး တပ် (PDF) ပူးပေါင်းတပ်များက ဆက်လက်ပိတ်ဆို့ တိုက်ခိုက်နေခြင်း ဖြစ်သည်။ မန္တလေး-ဗန်းမော် မြစ်ကြောင်းခရီးစဉ်အတွင်း စစ်အုပ်စု၏ စစ်သင်္ဘော၊ တိုက်ခိုက်ရေး ရေယာဉ်နှင့် စက်လှေ စုစုပေါင်း (၁၇) စီးထက်မနည်း ဖျက်ဆီးထားနိုင်ခဲ့ပြီဟုလည်း KIO/KIA နှင့် တော်လှန်ရေးတပ်ဖွဲ့များဘက်က အတည်ပြု ပြောဆိုထားသည်။ #KIA

ဆန်တက်လာသည့် စစ်သင်္ဘော (၁) စီး ထပ်မံ နစ်မြုပ်၊ လေယာဉ်တစ်စီး ပျက်ကျနိုင်ဖွယ်ရှိ

ဆန်တက်လာသည့် စစ်သင်္ဘော (၁) စီး ထပ်မံ နစ်မြုပ်၊ လေယာဉ်တစ်စီး ပျက်ကျနိုင်ဖွယ်ရှိ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၆ ရက်။ ကချင်ပြ…

  • September 16, 2026
အကျဉ်းထောင် ၁၃ ခု၌ နိုင်ကျဉ်းများ မတရား ငွေကြေးခေါင်းပုံဖြတ်ခံနေရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၅ ရက်။ နိုင်ငံတဝှမ်းရှိ အကျဉ်းထောင် ၁၃ ခုတွင် နိုင်ငံရေးအကျဉ်းသားများထံ မိသားစုဝင်များက ပေးပို့သည့် တရားဝင် ဈေးဘား သွင်းငွေများနှင့် ထောင်ဝင်စာပါဆယ်များအပေါ် ထောင်အာဏာပိုင်နှင့် ဝန်ထမ်းများက နည်းလမ်းမျိုးစုံ ဖြင့် ငွေကြေးခေါင်းပုံဖြတ် ကောက်ခံနေကြကြောင်း မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် (PPNM) က သတင်းထုတ်ပြန်လိုက်သည်။ အဆိုပါ ဖြစ်စဉ်များမှာ ၂၀၂၆ ခုနှစ်၊ မေလမှ ဩဂုတ်လကုန်အထိ ၄ လအတွင်း ဖြစ်ပွားခဲ့သည့် ခေါင်းပုံဖြတ်မှု များကို PPNM က မှတ်တမ်းတင် ဖော်ပြထားခြင်း ဖြစ်သည်။ ထောင်အာဏာပိုင်များသည် တရားဝင်ဈေးဘားသို့ ပေးသွင်းသည့် ငွေပမာဏအပေါ် မူတည်၍ ၂ ရာခိုင်နှုန်းမှ ၂၀ ရာခိုင်နှုန်းအထိ ဖြတ်ယူနေကြပြီး မန္တလေးတိုင်း၊ အိုးဘိုအကျဉ်းထောင်နှင့် မိတ္ထီလာအကျဉ်းထောင်တို့တွင် အဆိုးရွားဆုံး ကြုံတွေ့နေရကြောင်း PPNM က ဆိုသည်။ PPNM ပြောရေးဆိုခွင့်ရှိသူ မရောင်နီလင်းက “ထုတ်ပြန်ချက်ထဲမှာ အကျဉ်းထောင် (၁၃) ခုမှာရှိတဲ့ ထောင် တွေရဲ့ပေါ့နော်။ အဓိက တာဝန်ယူရမယ့် ထောင်ပိုင်တွေရဲ့ အမည်တွေကိုလည်း ထုတ်ပြန်ထားပါတယ်။ အကျဉ်း ထောင် (၁၃) ခုမှာ တရားဝင် ဈေးဘားကနေမှ အသွင်းယူတဲ့အခါမှာ အကျဉ်းထောင် ဝန်ထမ်းတွေ၊ အာဏာပိုင် တွေက ငွေပမာဏပေါ်မှာ မူတည်ပြီးတော့ (၂) ရာခိုင်နှုန်းကနေ (၂၀) ရာခိုင်နှုန်းအထိ ဖြတ်တောက်ယူနေကြတာ ဖြစ်ပါတယ်။ ဒါဟာ ဒီ အကျဉ်းထောင်ထဲမှာ ရှိတဲ့ အကျဉ်းသားတွေ၊ နိုင်ငံရေး အကျဉ်းသားတွေအပေါ်မှာ မတရား ငွေကြေး ခေါင်းပုံဖြတ်မှုလို့ ပြောလို့ရပါတယ်” ဟု ပြောသည်။ ထို့ပြင် အိုးဘိုနှင့် မိတ္ထီလာ အကျဉ်းထောင်အပါအဝင် တောင်ငူ၊ ကျိုက်မရော၊ ဒိုက်ဦး၊ ပြည်၊ မြင်းခြံ၊ ရွှေဘိုနှင့် ပေါင်းတည် အကျဉ်းထောင်များတွင်လည်း ထောင်ဝင်စာပါဆယ် ပေးပို့ရာ၌ သတ်မှတ်ပါဆယ်အိတ်များကို ၁,၅၀၀ ကျပ်မှ ၂,၀၀၀ ကျပ်အထိ မဖြစ်မနေ ဝယ်ယူခိုင်းနေပြီး မိသားစုဝင် မဟုတ်သူများ ပေးပို့ပါကလည်း အပိုထပ်ဆောင်းငွေများ ကောက်ခံနေကြောင်း ဆိုသည်။ မရောင်နီလင်းက “ဆေးဝါး ပေးပို့မှုတွေမှာဆိုရင် ကန့်သတ်ခံရတာတွေ ရှိတယ်။ မပို့ရဘူး ဆိုပြီးတော့ ပိတ်ပင် ခံထားရတာတွေလည်း ရှိတယ်။ အထဲထဲကို ပို့လို့ရပြီ ဆိုရင်လည်း ဥပမာ ဆေး ၁၀ ကတ်ဆိုရင် ၇ ကတ်လောက် ပဲ ရောက်တာမျိုး၊ ၅ ကတ်ဆိုရင် ၃ ကတ်၊ ၄ ကတ် အဲ့လောက်ပဲ ရောက်တာမျိုးပေါ့နော်၊ ဖြတ်တောက်ခံရတာ တွေလည်း ရှိပါတယ်” ဟု ပြောသည်။ ဆေးဝါးပေးပို့မှုတွင်လည်း အိုးဘိုအကျဉ်းထောင်၌ ကြန့်ကြာမှု အဆိုးရွားဆုံး ဖြစ်နေပြီး ဒိုက်ဦး၊ မိတ္ထီလာနှင့် မြစ်ကြီးနား အကျဉ်းထောင်များတွင် ဆေးသွင်းခွင့် ပိတ်ပင်ခံရခြင်း၊ ဆေးအပြည့်အစုံ မရောက်ရှိခြင်း စသည့် ပြဿနာများနှင့် ကြုံတွေ့နေရသည်။ “ဒါကြောင့်မို့လို့ PPNM က ဒီ အကျဉ်းထောင် ၁၃ ခုမှာရှိတဲ့ တာဝန်ရှိသူတွေကို နိုင်ငံရေး အကျဉ်းသားတွေနဲ့ မိသားစုဝင်တွေအပေါ်မှာ အဲဒီ မတရား ခေါင်းပုံဖြတ်နေတာတွေနဲ့ ပတ်သက်ပြီးတော့မှ ကျနော်တို့ PPNM အနေနဲ့ ပြင်းထန်စွာ ထောက်ပြကန့်ကွက်လိုက်တာ ဖြစ်ပါတယ်။ အဲ ထပ်ပြီးတော့ပေါ့လေ၊ ကျန်ရှိနေသေးတဲ့ အခြား အကျဉ်းထောင်တွေကိုလည်း ဆက်လက်စောင့်ကြည့်ပြီးတော့မှ မှတ်တမ်းယူနေမှာပဲ ဖြစ်ပါတယ်” ဟု မရောင်နီလင်းက ဆက်ပြောသည်။ ထုတ်ပြန်ချက်တွင် ပါဝင်သည့် အကျဉ်းထောင် ၁၃ ခုမှာ အိုးဘို၊ မိတ္ထီလာ၊ တောင်ငူ၊ ကျိုက်မရော၊ ဒိုက်ဦး၊ မြင်းခြံ၊ ပြည်၊ ဟင်္သာတ၊ မြစ်ကြီးနား၊ မြိတ်၊ မကွေး၊ ရွှေဘိုနှင့် ပေါင်းတည်တို့ ဖြစ်သည်။ ပြီးခဲ့သည့် ဇူလိုင်လ ၂၃ ရက်ကလည်း တောင်ငူအကျဉ်းထောင်မှ သာယာဝတီအကျဉ်းထောင်သို့ ပြောင်းရွှေ့လာ သည့် နိုင်ငံရေးအကျဉ်းသားများကို အဓမ္မငွေကြေး ကောက်ခံခဲ့ပြီး မပေးဆောင်နိုင်သူများကို မိလ္လာရေ သယ်ခိုင်း ခြင်း၊ အိမ်သာဆေးခိုင်းခြင်းနှင့် တောင်ယာခိုင်းစေခြင်း စသည့် နည်းလမ်းများဖြင့် ဖိအားပေး ခိုင်းစေခဲ့သည်ဟု ဆိုသည်။ #PPNM

အကျဉ်းထောင် ၁၃ ခု၌ နိုင်ကျဉ်းများ မတရား ငွေကြေးခေါင်းပုံဖြတ်ခံနေရ

အကျဉ်းထောင် ၁၃ ခု၌ နိုင်ကျဉ်းများ မတရား ငွေကြေးခေါင်းပုံဖြတ်ခံနေရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၅ ရက်။ နိုင်ငံတဝှမ်းရှိ အကျဉ…

  • September 15, 2026
ကရင်နီပြည် ဒီးမော့ဆို၌ တိုက်ပွဲမရှိဘဲ စစ်တပ်က ဒရုန်းနှင့် လေကြောင်းမှ ဗုံးကြဲ၍ စစ်ရှောင်တစ်ဦး သေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၅ ရက်။ ကရင်နီပြည်၊ ဒီးမော့ဆိုမြို့နယ် အနောက်ခြမ်းတွင် တိုက်ပွဲဖြစ်ပွားခြင်း မရှိဘဲ စစ်တပ်က ဒရုန်းနှင့် လက်နက် ကြီးများဖြင့် ပစ်ခတ်တိုက်ခိုက်ခဲ့သဖြင့် တောင်ယာသို့ သွားရောက်သည့် စစ်ဘေးရှောင် အမျိုးသားတစ်ဦး သေဆုံးသွားကြောင်း ဒေသတွင်း စစ်ဘေးရှောင်အရေး ကူညီဆောင်ရွက်သူများက ပြောသည်။ ဒီးမော့ဆိုမြို့နယ် အနောက်ခြမ်း၊ နန်းမယ်ခုံမြို့အနီးရှိ သာယပ်ကျေးရွာကို စက်တင်ဘာ ၁၄ ရက် မွန်းလွဲ ၂ နာရီ ခန့်တွင် စစ်တပ်က ဒရုန်းဗုံးသီး ၂ လုံးနှင့် ၁၂၀ မမ လက်နက်ကြီးများဖြင့် ပစ်ခတ်ခဲ့ရာ တောင်ယာလုပ်ကိုင်နေသူ အသက် ၅၀ ဝန်းကျင်အရွယ် အမျိုးသားတစ်ဦး၏ ဦးခေါင်းတိုက်ရိုက် ထိမှန်ကာ ပွဲချင်းပြီး သေဆုံးခဲ့ခြင်း ဖြစ် သည်။ နီးစပ်သူ စစ်ဘေးရှောင်တစ်ဦးက“ကားလမ်းမကြီး တည့်တည့်ကျတာ။ ဘယ်လိုထိလဲတော့ မသိဘူး။ အဲဒီချိန် သူက တောင်ယာ သွားလိုက်ပြီ။ ထိပြီဆိုတော့မှ သိတာ။ သွားကြည့်တော့ အသက်မမီတော့ဘူး” ဟု ပြောသည်။ အလားတူ စက်တင်ဘာ ၁၅ ရက်နေ့ (ယနေ့) နံနက် ၉ နာရီခွဲခန့်တွင်လည်း ဒီးမော့ဆိုမြို့နယ် အနောက်ဘက် ခြမ်း ပဆေးလာကျေးရွာဘက်ကို နမ့်စန်နှင့် နေပြည်တော် လေတပ်စခန်းတို့မှ ပျံတက်လာသည့် ဂျက်ဖိုက်တာ ၂ စီးဖြင့် ဗုံးကြဲတိုက်ခိုက်ခဲ့သည့်အပြင် လက်နက်ကြီးများဖြင့်ပါ ထပ်မံပစ်ခတ်ခဲ့သည်။ ဒီးမော့ဆို အနောက်ဘက်ခြမ်းမှ ဒေသခံတစ်ဦးက “နေ့တိုင်းနီးပါး ပစ်တယ်။ ဒီးမော့ဆို အနောက်ခြမ်းရော၊ မိုးဗြဲ လွယ်ရင်းမင်္ဂလာဘက်ရော ပစ်တယ်။ တိုက်လေယာဉ်ထက်စာရင် ဒရုန်းက ရုတ်တရက် လာ လာပြီးချ တော့ အရမ်းသတိထားရတယ်” ဟု ပြောသည်။ လက်ရှိတွင် စစ်တပ်သည် မိုးဗြဲ - နန်းမယ်ခုံ - ဒီးမော့ဆို လမ်းမကြီးကို ပြန်လည်ထိန်းချုပ်နိုင်ရေး အပြင်းအထန် စစ်ကြောင်းထိုးနေသော်လည်း တော်လှန်ရေးတပ်ဖွဲ့များ၏ ခုခံမှုကြောင့် မြေပြင်စစ်ဆင်ရေးများတွင် အရေးနိမ့် နေသဖြင့် စစ်ဘေးရှောင်များ စုဝေးနေထိုင်ရာ ဒေသများကို ပစ်မှတ်ထား တိုက်ခိုက်နေခြင်းဖြစ်ကြောင်း စစ်ရေးသတင်းရင်းမြစ်များက သုံးသပ်ကြသည်။ ပြီးခဲ့သည့် ဩဂုတ်လအတွင်းကလည်း ဒီးမော့ဆို အနောက်ခြမ်းကို စစ်တပ်က ဗုံးကြဲတိုက်ခိုက်ခဲ့သဖြင့် စာသင် ကျောင်း အပါအဝင် လူနေအိမ် ၁၀ လုံးကျော် ပျက်စီးခဲ့ပြီး စစ်ဘေးရှောင်တစ်ဦး သေဆုံးကာ ၃ ဦး ဒဏ်ရာရရှိခဲ့ သည်။ စက်တင်ဘာလဆန်းပိုင်းအတွင်း စစ်တပ်၏ လေကြောင်းနှင့် လက်နက်ကြီး တိုက်ခိုက်မှုများကြောင့် ဒီးမော့ဆို၊ လွိုင်ကော်နှင့် မော်ချီးဒေသတို့တွင် ကလေးငယ်များ အပါအဝင် အရပ်သား ၂၀ ကျော် ထိခိုက်သေဆုံးထားသည်။ ထို့ကြောင့် စစ်ဘေးရှောင် ကလေးငယ်များ၏ စာသင်ကျောင်းများကို ခေတ္တပိတ်ထားရန်နှင့် ဒေသခံပြည်သူများ အနေဖြင့် ဗုံးခိုကျင်းများအတွင်း ဂရုစိုက်နေထိုင်ကြရန် စစ်ရှောင်အရေး ကူညီဆောင်ရွက်သူများက တိုက်တွန်း ထားသည်။ #ဒီးမော့ဆို

ကရင်နီပြည် ဒီးမော့ဆို၌ တိုက်ပွဲမရှိဘဲ စစ်တပ်က ဒရုန်းနှင့် လေကြောင်းမှ ဗုံးကြဲ၍ စစ်ရှောင်တစ်ဦး သေဆုံး

ကရင်နီပြည် ဒီးမော့ဆို၌ တိုက်ပွဲမရှိဘဲ စစ်တပ်က ဒရုန်းနှင့် လေကြောင်းမှ ဗုံးကြဲ၍ စစ်ရှောင်တစ်ဦး သေဆုံး သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘ…

  • September 15, 2026
ညောင်ဦး၌ စစ်အုပ်စုတပ်က ဒရုန်းဖြင့် ဗုံးကြဲ၍ မိသားစုဝင် သားအမိ ၃ ဦး အပါအဝင် ၄ ဦး သေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၅ ရက်။ မန္တလေးတိုင်း၊ ညောင်ဦးမြို့နယ်တွင် တိုက်ပွဲဖြစ်ပွားခြင်း မရှိဘဲ စစ်ကြောင်းထိုးလာသည့် စစ်အုပ်စုတပ်က ဒရုန်းဖြင့် လိုက်လံဗုံးကြဲခဲ့သဖြင့် သားအမိ ၃ ဦး အပါအဝင် အရပ်သား ၄ ဦး သေဆုံးပြီး အမျိုးသားတစ်ဦး ဒဏ်ရာရရှိခဲ့ကြောင်း မီးလောင်ဖျားမြောက်ရွာခံများက ပြောသည်။ ဖြစ်စဉ်မှာ စဉ့်ကူရွာဘက်မှ အင်အား ၂၀၀ ကျော်ပါ စစ်အုပ်စုတပ်စစ်ကြောင်းသည် ပြည်တော်သာကျေးရွာတွင် ညအိပ်ရပ်နားပြီးနောက် အရှေ့ဘက်နှင့် အနောက်ဘက်သို့ စစ်ကြောင်း ၂ ကြောင်းခွဲ၍ စက်တင်ဘာ ၁၃ ရက်တွင် မြောက်ဘက်သို့ စစ်ကြောင်းထိုးလာခြင်း ဖြစ်သည်။ စစ်ကြောင်းထိုးလာစဉ် မွန်းလွဲ ၁၂ နာရီခွဲခန့်တွင် လက်နက်ကြီးများဖြင့် အရပ်သားများနေထိုင်ရာ ကျေးရွာများကို ရည်ရွယ်ချက်ရှိရှိ ပစ်ခတ်ခဲ့သည့်အပြင် ဒရုန်းဖြင့်ပါ ဗုံးကြဲခဲ့ခြင်း ဖြစ်သည်။ စစ်ကြောင်းဝင်လာသည့် သတင်းကြောင့် မီးလောင်ဖျားမြောက်ရွာခံများ ဧရာဝတီမြစ်ကမ်းဘက်သို့ ထွက်ပြေး တိမ်းရှောင်စဉ် စစ်အုပ်စုတပ်က နောက်မှ ဒရုန်းဖြင့် လိုက်လံဗုံးကြဲခဲ့သဖြင့် ဈေးသည် ဒေါ်စန်းနွဲ့နှင့် သူမ၏ ၁၄ နှစ်နှင့် ၁၆ နှစ်အရွယ် သမီး ၂ ဦး မိသားစု ၃ ဦးအပါအဝင် မီးလောင်ဖျားရွာမှ ၁၄ နှစ်အရွယ် မိန်းကလေး ၁ ဦးပါ နေရာတွင် ပွဲချင်းပြီး သေဆုံးခဲ့ရသည်။ အသက် ၄၀ ကျော် အရွယ် မီးလောင်ဖျားရွာခံ အမျိုးသားတစ်ဦးက “စစ်ကြောင်းလာတယ်ဆိုတော့ ကျွန်းဘက် ကို စစ်ရှောင်ပြေးကြတာ။ အဲဒါကို ဒရုန်းနဲ့ လိုက်ကြဲတာ။ အရပ်သား တွေမှန်း သိသိနဲ့၊ ကလေးမလေး ၃ ယောက်ကတော့ နေရာမှာတင် သေတာ။ မစန်းနွဲ့ကတော့ ညနေကျမှ ဆုံးသွားတာ” ဟု ပြောသည်။ အဆိုပါ ဒရုန်းဗုံးကြဲမှုအတွင်း သားအဖ ၂ ဦးလည်း ဗုံးစထိမှန်ခဲ့ရာ ဖခင်ဖြစ်သူ ဦးစန်းလင်းမှာ ဒဏ်ရာအနည်း ငယ် ရရှိခဲ့ပြီး သမီးဖြစ်သူမှာမူ စင်းလုံးချော ထိမှန်ကာ သေဆုံးသွားခဲ့ခြင်း ဖြစ်သည်။ မီးလောင်ဖျားမြောက်ရွာမှ အသက် ၅၀ ကျော်အရွယ် အမျိုးသားတစ်ဦးကလည်း “သေသွားတာ မိန်းကလေး တွေ ချည်းပဲ။ အပျိုပေါက် အရွယ်လေးတွေ၊ အရွယ်ကောင်း ကျောင်းသူအရွယ်တွေ၊ နေမယ်ဆို သက်တမ်းစေ့ နေလို့ ရတဲ့ အရွယ်တွေ” ဟု ပြောသည်။ အဆိုပါ စစ်အုပ်စုတပ် စစ်ကြောင်းသည် မီးလောင်ဖျားတောင်ရွာ၊ မီးလောင်ဖျားမြောက်ကျေးရွာ၊ ရွာသစ်ကျေး ရွာနှင့် ကြအိုကျွန်းကျေးရွာများသို့ စစ်ကြောင်းထိုး ဝင်ရောက်ခဲ့ပြီး ကြအိုကျွန်းကျေးရွာတွင် ညအိပ်ရပ်နားခဲ့ ကြောင်း ဒေသခံများက ပြောသည်။ ထို့နောက် စက်တင်ဘာ ၁၄ ရက် နံနက်ပိုင်းတွင် ကြအိုကျွန်းကျေးရွာ ဘုန်းကြီးကျောင်း၌ ရပ်နားထားသည့် ရွာခံ တစ်ဦး၏ ဖောကားကို ယူဆောင်ကာ ပါလာသည့် စစ်ကားတစ်စီး၊ တင့်ကားတစ်စီးတို့ဖြင့် စစ်ကြောင်း ဆက်ထိုး လာပြီး ကျောက်ပြင်ကန်ကျေးရွာတွင် စခန်းချကာ လက်နက်ကြီးများဖြင့် ရမ်းသန်းပစ်ခတ်လျက်ရှိကြောင်း ဒေသခံများက ဆိုသည်။ ဓါတ်ပုံ - (ညောင်ဦးမြို့နယ်တွင် ပြီးခဲ့သည့် ဇူလိုင် ၁၃ ရက်က စစ်အုပ်စုတပ် စစ်ကြောင်းဝင်ရောက် မီးရှို့မှု ကြောင့် နေအိမ် ၂၀၀ ခန့် မီးလောင်ပျက်စီးခဲ့စဉ်။ / ပုံဟောင်း) #ညောင်ဦး

ညောင်ဦး၌ စစ်အုပ်စုတပ်က ဒရုန်းဖြင့် ဗုံးကြဲ၍ မိသားစုဝင် သားအမိ ၃ ဦး အပါအဝင် ၄ ဦး သေဆုံး

ညောင်ဦး၌ စစ်အုပ်စုတပ်က ဒရုန်းဖြင့် ဗုံးကြဲ၍ မိသားစုဝင် သားအမိ ၃ ဦး အပါအဝင် ၄ ဦး သေဆုံး သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၅ ရက်။ …

  • September 15, 2026
မကွေးတိုင်း ရခိုင်ရိုးမအစပ်၌ စစ်အုပ်စုတပ် လေကြောင်းမှ ဗုံးကြဲ၍ အရပ်သားများ သေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၅ ရက်။ မကွေးတိုင်း၊ မင်းတုန်းမြို့နယ်၊ ရခိုင်ရိုးမတောင်ခြေရင်းရှိ ဇွန်းကျကျေးရွာကို စစ်အုပ်စုတပ်က စက်တပ်လေထီး (Paramotor) များဖြင့် ဗုံးကြဲတိုက်ခိုက်ခဲ့သဖြင့် ကလေးငယ်များနှင့် သက်ကြီးရွယ်အို အပါအဝင် ဒေသခံ ပြည်သူ ၆ ဦး သေဆုံးပြီး ၅ ဦး ဒဏ်ရာရရှိခဲ့သည်။ ဖြစ်စဉ်မှာ စက်တင်ဘာ ၁၃ ရက်နေ့ မွန်းလွဲ ၄ နာရီ ၄၀ မိနစ်ခန့်တွင် သရက်မြို့နယ်၊ ကပစ (၁၂) မှ တက်လာ သည့် စစ်တပ်၏ စက်တပ်လေထီး ၃ စီးသည် စစ်ရေးပစ်မှတ် မဟုတ်သည့် ဇွန်းကျကျေးရွာအတွင်းသို့ ဗုံး ၈ လုံး ကြဲချတိုက်ခိုက်ခဲ့ခြင်း ဖြစ်သည်ဟု သရက်ခရိုင် အမှတ် (၄) ပြည်သူ့ကာကွယ်ရေးတပ်ရင်းက ထုတ်ပြန်သည်။ မင်းတုန်းဒေသခံ စစ်ရှောင်အမျိုးသမီးတစ်ဦးက “ဇွန်းကျကျေးရွာက ရခိုင်ရိုးမတောင်ခြေရင်းမှာ ရှိတာပါ။ တောင်ယာလုပ်သူတွေ၊ မျှစ်ရှာ ဝါးရှာထွက်တဲ့သူတွေနဲ့ ရခိုင်ဘက်က စစ်ရှောင်တချို့ နေတာ။ အခု အဲဒီနေရာ တွေကနေ ရခိုင်ရိုးမကိုကျော်ဖို့ စစ်ကြောင်းတွေရှိနေတာ၊ မြေပြင်အခြေအနေ မကောင်းလို့ လေကြောင်း ပစ်ကူနဲ့ စစ်ကြောင်းတက်တာ။ ဇွန်းကျကျေးရွာအုပ်စု စခန်းကြီးရွာ၊ ကြို့ပင်ရွာ၊ သရက်ချဉ်ရွာ၊ ဒေါင်းဝါရွာ တွေမှာ စစ်ရေးတင်းမာနေတယ်” ဟု ပြောသည်။ အဆိုပါ ဗုံးကြဲတိုက်ခိုက်မှုကြောင့် ဇွန်းကျကျေးရွာတွင် နေထိုင်သည့် အသက် ၇၀ အရွယ် ဒေါ်ပစာ၊ အသက် ၁၇ နှစ် အရွယ် မခင်ဝေဇင်မိုး၊ အသက် ၂၅ နှစ်အရွယ် မနွယ်နွယ်ဝင်းတို့အပြင် အသက် ၁၁ နှစ်အရွယ် မထက်သဇင် လှိုင်၊ အသက် ၁၀ နှစ်အရွယ် မငုဝါလှိုင်နှင့် အသက် ၁၅ နှစ်အရွယ် မောင်ကောင်းထက်ကျော် စသည့် အသက် ၁၈ နှစ်အောက် ကလေးငယ် ၄ ဦး အပါအဝင် စုစုပေါင်း ၆ ဦး ပွဲချင်းပြီး သေဆုံးခဲ့သည်။ ထို့ပြင် အသက် ၂၃ နှစ်အရွယ် ဒေါ်မာလာ၊ အသက် ၁၃ နှစ်အရွယ် မောင်မင်းထက်ဦး၊ အသက် ၁၀ နှစ်အရွယ် မောင်ချစ်မဝ၊ အသက် ၁၄ နှစ်အရွယ် မမြမှူးမေ နှင့် အသက် ၁၆ နှစ်အရွယ် မသင်းသင်းလှိုင်တို့ ၅ ဦးလည်း ဗုံးစထိမှန်ကာ ဒဏ်ရာများ ရရှိခဲ့သည်။ ဇွန်းကျကျေးရွာသည် မင်းတုန်းမြို့နယ်၏ အနောက်ဘက် အစွန်ဆုံး၊ ရခိုင်ရိုးမ တောင်တန်းကြီး၏ တောင်ခြေ တွင် တည်ရှိပြီး ရခိုင်ပြည် မင်းပြား၊ အမ်းနှင့် မြေပုံမြို့နယ်တို့နှင့် နယ်နိမိတ်ချင်း ထိစပ်နေသည့် နယ်စပ်တောင် ကြား လမ်းကြောင်းပေါ်ရှိ ကျေးရွာတစ်ရွာ ဖြစ်သည်။ လက်ရှိတွင် မင်းတုန်းမြို့နယ်နှင့် ရခိုင်ရိုးမအစပ်ကို အင်အား ၁,၀၀၀ ကျော်ပါသည့် စစ်အုပ်စု စစ်ကြောင်းများက နယ်မြေစိုးမိုးရန် ကြိုးပမ်းနေ၍ တိုက်ပွဲများ ပြင်းထန်နေကြောင်း မြေပြင်သတင်းရင်းမြစ်များက ပြောသည်။ စစ်အုပ်စုတပ်သည် မင်းတုန်းမြို့နယ်အတွင်း တိုက်ပွဲဖြစ်ပွားခြင်း မရှိဘဲ အရပ်သား ပြည်သူများနေထိုင်ရာ ကျေးရွာများကို လေကြောင်းနှင့် လက်နက်ကြီးများဖြင့် ရည်ရွယ်ချက်ရှိရှိ စစ်ရာဇဝတ်မှုများ ကျူးလွန်နေသဖြင့် ဒေသခံများအနေဖြင့် စစ်ရေးသတိ အပြည့်ဖြင့် နေထိုင်ကြရန် သရက်ခရိုင် အမှတ် (၄) တပ်ရင်းက အသိပေး နှိုးဆော်ထားသည်။ ဓါတ်ပုံ - Crd #မင်းတုန်း

မကွေးတိုင်း ရခိုင်ရိုးမအစပ်၌ စစ်အုပ်စုတပ် လေကြောင်းမှ ဗုံးကြဲ၍ အရပ်သားများ သေဆုံး

မကွေးတိုင်း ရခိုင်ရိုးမအစပ်၌ စစ်အုပ်စုတပ် လေကြောင်းမှ ဗုံးကြဲ၍ အရပ်သားများ သေဆုံး သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၅ ရက်။ မကွေး…

  • September 15, 2026
×Close