သတင်း

ရခိုင်ပြည် သံတွဲတွင် စစ်တပ် ဗုံးကြဲမှုကြောင့် သားအဖ နှစ်ဦး သေဆုံး၊   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၁၇ ရက်။   ရခိုင်ပြည် သံတွဲတွင် စစ်တပ် ဗုံးကြဲမှုကြောင့် သားအဖ နှစ်ဦး နေရာတွင်ပွဲချင်းပြီး သေဆုံးပြီး အခြားသူ ၃ ဦး ဒဏ်ရာရသွားခဲ့သည်။   သံတွဲမြို့ပေါ်ရှိ အမှတ် (၈/က) ရပ်ကွက်ကို စစ်တပ်က ဂျက်တိုက် လေယာဉ်ဖြင့် ဗုံးကြဲတိုက်ခိုက်ခဲ့မှု ကြောင့် ဦးမင်းနောင် (၅၀ နှစ်) နှင့် သမီးဖြစ်သူ မချွန်းလဲ့ရွှေရည် (၁၄ နှစ်) တို့ သားအဖ နှစ်ဦး နေရာ၌ပင် ပွဲချင်း ပြီး သေဆုံးခဲ့သည်။   ဩဂုတ်လ ၁၆ ရက်နေ့၊ နံနက် ၆ နာရီ ၄၀ မိနစ်အချိန်ခန့်တွင် အမှတ် (၈/က) ရပ်ကွက်၊ ၂ လမ်းရှိ ယခင် ဖိုးဇီဝ ဆေးဆိုင်အနောက်ဘက်ကို စစ်တပ်က တိုက်ခိုက်ခဲ့ခြင်းဖြစ်ပြီး လူနေအိမ်နှင့် အဆောက်အအုံ စုစုပေါင်း ၇ လုံး ပျက်စီးခဲ့ရသည်။   အဆိုပါ လေကြောင်းတိုက်ခိုက်မှုကြောင့် အသက် ၄၅ နှစ်အရွယ် ဦးဇေယျာမင်းလွှင်၊ ၂ နှစ်အရွယ် မောင်ရွှေမိုး ယံဇော်နှင့် အသက် ၄၀ အရွယ် ဒေါ်ဌေးဌေးမော်တို့ ၃ ဦးမှာ ဗုံးစထိမှန်၍ ပြင်းထန်စွာ ဒဏ်ရာရရှိခဲ့ကြသည်။   သံတွဲမြို့ ဒေသခံတစ်ဦးက “ကျနော်တို့မြို့ကို ဗုံးဆက်တိုက်ကြဲနေသလို ကင်းဖောက်တာတွေလည်း နေ့တိုင်းရှိ နေပါတယ်။ ဇူလိုင်လ ၁၉ ရက်နေ့လောက်ပဲ ဒီလမှာလဲဆက်တိုက်ကြဲနေတာပါ။ သူတို့မြို့မှာနေတဲ့ ပြည်သူ တွေကို အငြိုးနဲ့သတ်နေသလို ခံစားရပါတယ်၊အခုဒေသခံတွေ ဆိုင်ရောင်းတာ ဈေးထွက်တာတွေအပြင် ငါးဖမ်း ဟင်းရှာ လယ်စိုက် တောင်ယာတွေကိုတောင်မသွားရဲ တော့ပါဘူး” ဟု ပြောသည်။   ထို့ပြင် ဩဂုတ်လ ၁၆ ရက်နေ့၊ နံနက် ၆ နာရီ ၄၉ မိနစ်အချိန်ခန့်တွင်လည်း သံတွဲမြို့နယ်၊ မောင်ရွှေလေးကျေးရွာ အနီးဝန်းကျင်ကို စစ်တပ်က ဂျက်တိုက်လေယာဉ်တစ်စီးဖြင့် ဗုံးကြဲတိုက်ခိုက်ခဲ့ရာ သန့်ရှင်းရေး ဝန်ထမ်း ၃ ဦး အသေးစား ဒဏ်ရာများ ရရှိခဲ့သည်။   သံတွဲခရိုင်အတွင်းသို့ ဇူလိုင်လ ၁၉ ရက်နေ့မှ ဩဂုတ်လ ၁၆ ရက်နေ့အထိ တစ်လခန့်အတွင်း စစ်တပ်က လေကြောင်းတိုက်ခိုက်မှု ၁၄ ကြိမ်ခန့် ပြုလုပ်ခဲ့ရာ စုစုပေါင်း ဒေသခံအရပ်သား ၃၄ ဦး သေဆုံးပြီး ၃၉ ဦး ထိခိုက်ဒဏ်ရာ ရရှိခဲ့ကာ နေအိမ်နှင့် အဆောက်အအုံ ၂၁ လုံး ပျက်စီးခဲ့သည်။   ဖြစ်စဉ်များအနက် ထိခိုက်ဆုံးရှုံးမှု အများဆုံးမှာ ဩဂုတ်လ ၁၀ ရက်နေ့ သံတွဲမြို့နယ်၊ ကျောက်ကြီးကျေးရွာ တိုက်ခိုက်မှုဖြစ်ပြီး အရပ်သား ၁၇ ဦး သေဆုံးကာ ၁၁ ဦး ဒဏ်ရာရရှိခဲ့သည်။   ထို့ပြင် ဩဂုတ်လ ၁၁ ရက်နေ့ ညပိုင်းက ဂွမြို့နယ်၊ ကျိန္တလီမြို့ တိုက်ခိုက်မှုတွင် ၈ ဦး သေဆုံးခဲ့သလို၊ ဩဂုတ်လ ၁၃ ရက်နေ့ကလည်း ဂွမြို့နယ်နှင့် ကျိန္တလီမြို့တို့ကို စစ်တပ်က လေကြောင်းမှ ဗုံးကြဲခဲ့သဖြင့် ကလေးငယ်များနှင့် မိသားစုလိုက် အပါအဝင် ပြည်သူ ၈ ဦး ထပ်မံ သေဆုံးခဲ့သည်။   ဇူလိုင်လ ၃၁ ရက်နေ့ ရွှေလှေကျေးရွာ တိုက်ခိုက်မှုတွင် မိသားစုဝင်များ အပါအဝင် ၄ ဦး သေဆုံးခဲ့သည့်အပြင် သံတွဲမြို့၊ အမှတ် (၇) နှင့် အမှတ် (၈) ရပ်ကွက်၊ ရောင်ခြည်ဦးရွာ၊ လင်းမူးတောင်ရွာ၊ ငပလီမြို့ ဂျိတ္တောရပ်ကွက် နှင့် လင်းသာရပ်ကွက် တိုက်ခိုက်မှုများတွင်လည်း စုစုပေါင်း ပြည်သူ ၅ ဦး သေဆုံးပြီး ၂၀ ခန့် ထိခိုက်ဒဏ်ရာ ရရှိခဲ့သည်။   #သံတွဲ

ရခိုင်ပြည် သံတွဲတွင် စစ်တပ် ဗုံးကြဲမှုကြောင့် သားအဖ နှစ်ဦး သေဆုံး၊ 

ရခိုင်ပြည် သံတွဲတွင် စစ်တပ် ဗုံးကြဲမှုကြောင့် သားအဖ နှစ်ဦး သေဆုံး၊  သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၁၇ ရက်။ ရခိုင်ပြည် သံတွဲတ…

  • August 17, 2026
ထောင်တွင်း ကင်ဆာဖြစ်နေသည့် နိုင်ငံရေး အကျဉ်းသူ ၈ ဦး အသက်အန္တရာယ်ရှိနေ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၁၄ ရက်။   မြန်မာနိုင်ငံရှိ အကျဉ်းထောင်အသီးသီးတွင် ကင်ဆာရောဂါ ဖြစ်ပွားနေသည့် နိုင်ငံရေးအကျဉ်းသူ ၈ ဦးခန့်ရှိနေပြီး အချိန်မီ ဆေးဝါးကုသခွင့် မရရှိဘဲ အသက်အန္တရာယ် စိုးရိမ်ရသည့် အခြေအနေနှင့် ရင်ဆိုင်နေရကြောင်း နိုင်ငံရေးအကျဉ်းသူများအဖွဲ့ (WOPP) က ဩဂုတ်လ ၁၄ ရက်နေ့တွင် ထုတ်ပြန်လိုက်သည်။   စစ်တပ်က အာဏာသိမ်းပြီးနောက် မတရား ဖမ်းဆီးထိန်းသိမ်းခံထားရသည့် နိုင်ငံရေးအကျဉ်းသူများသည် အကျဉ်းထောင်အတွင်း အာဟာရ ပြည့်ဝစွာ မရရှိခြင်းနှင့် သန့်ရှင်းသပ်ရပ်သော ပတ်ဝန်းကျင် မရှိခြင်းတို့ကြောင့် ပါးစောင်၊ အစာအိမ်၊ သားအိမ်ခေါင်းနှင့် ရင်သား စသည့် ကင်ဆာရောဂါများကို ဆိုးရွားစွာ ခံစားနေကြရခြင်း ဖြစ်သည်။   WOPP ၏ သတင်းနှင့် ပြန်ကြားရေးတာဝန်ခံ မဆုမြတ်က “လတ်တလောမှာတော့ မြင်းခြံထောင်၊ မြစ်ကြီးနား ထောင်၊ အိုးဘိုထောင်၊ ညောင်ရွှေထောင်၊ အင်းစိန်ထောင်၊ ရွှေဘိုထောင်တွေမှာကတော့ ကင်ဆာရောဂါ ဖြစ်ပွား နေတဲ့ နိုင်ငံရေးအကျဉ်းသူတွေ ရှိတယ်လို့ သိရပါတယ်။ ကင်ဆာရောဂါဆိုတဲ့ အခြေအနေက ဆေးကုသခွင့် နှောင့်နှေးရင် ရောဂါပိုကျွမ်းလေဆိုတဲ့ အခြေအနေ ဖြစ်တယ်ပေါ့နော်။ အဲ့ဒီတော့ အချိန်နဲ့အမျှ နိုင်ငံရေး အကျဉ်းသူတွေက အသက်အန္တရာယ် ခြိမ်းခြောက်ခံနေရတယ်လို့ ပြောလို့ရပါတယ်” ဟု ပြောသည်။   ထို့ပြင် နိုင်ငံရေးအကျဉ်းသူများသည် အမျိုးသမီးဆိုင်ရာ ရောဂါဝေဒနာများကိုလည်း ဆိုးရွားစွာ ခံစားနေကြရ ကြောင်း WOPP က ဆိုသည်။ ပြီးခဲ့သည့် ဩဂုတ်လ ၁၃ ရက်နေ့ကလည်း စစ်ကိုင်းတိုင်း၊ ရွှေဘိုအကျဉ်းထောင်တွင် အစာအိမ်ကင်ဆာရောဂါ ခံစားနေရသည့် အသက် ၈၂ နှစ်အရွယ် နိုင်ငံရေးအကျဉ်းသူတစ်ဦး အချိန်မီ ဆေးကုသခွင့် မရရှိခဲ့သဖြင့် ကျဆုံး ခဲ့ရသည်။   အဆိုပါ နိုင်ငံရေးအကျဉ်းသူသည် ၂၀၂၃ ခုနှစ်တွင် ပုဒ်မ ၅၂ - က ဖြင့် ထောင်ဒဏ် ၇ နှစ် ချမှတ်ခံထားရသူ ဖြစ် ပြီး၊ ဖမ်းဆီးခံရစဉ်ကတည်းက ဗိုက်အောင့်သည့် ဝေဒနာ ခံစားနေရသဖြင့် ထောင်တွင်း၌ လုံလောက်သည့် ဆေးဝါးကုသခွင့်ရရှိရန် အကြိမ်ကြိမ် တောင်းဆိုခဲ့သော်လည်း ငြင်းပယ်ခံခဲ့ရကာ အချိန်မီ ဆေးကုသခွင့် မရရှိဘဲ ကျဆုံးသွားခဲ့ခြင်း ဖြစ်သည်။   အကျဉ်းထောင်များအတွင်း နိုင်ငံရေးအကျဉ်းသူများ အချိန်မီ ဆေးဝါးကုသခွင့် မရရှိသည့် အခြေအနေနှင့် ပတ်သက်၍ မဆုမြတ်က ယခုကဲ့သို့ ဆက်လက်ပြောဆိုသည်။   “ဆေးကုသခွင့် တောင်းခံတဲ့နေရာမှာ အကျဉ်းထောင် အာဏာပိုင်တွေက လုံခြုံရေးဆိုတဲ့ အကြောင်းပြချက်နဲ့ ပြင်ပ ဆေးရုံတွေကို လွှဲပြောင်းဖို့ အချိန်ဆွဲတာတွေ၊ အကျဉ်းထောင်တွေထဲမှာ ဆေးဝါးနဲ့ ဆရာဝန် လုံလောက်မှု မရှိဘဲနဲ့ အကျဉ်းထောင်ထဲမှာ ဆေးကုလို့ရတယ်ဆိုတဲ့ အခြေအနေမျိုးတွေနဲ့ ငြင်းဆိုတာတွေ၊ ပြီးတော့ ပြင်ပ ဆေးရုံကို ပို့ဆောင်ဖို့အတွက် အထက်အမိန့်ကို စောင့်ဆိုင်းရမယ်ဆိုပြီးတော့ အကန့်အသတ်မရှိ ရက်တွေ လ တွေနဲ့ ချီပြီးတော့ အချိန်ဆွဲထားတာပေါ့၊ အဲ့ဒီအကြောင်းပြချက်တွေ တွေ့ရပါတယ်။”   ထို့ကြောင့် အကျဉ်းထောင်များအတွင်း နိုင်ငံရေးအကျဉ်းသူများ လုံလောက်သည့် ဆေးဝါးကုသမှု ရရှိရေးနှင့် အခွင့်အရေးများ ပြန်လည်ရရှိရေးအတွက် နိုင်ငံတကာ အဖွဲ့အစည်းများအနေဖြင့် တာဝန်ရှိသူများကို ဖိအားပေး တိုက်တွန်းရန် လိုအပ်ကြောင်း WOPP က ထောက်ပြသည်။   မဆုမြတ်က “နိုင်ငံရေးအကျဉ်းသူတွေရဲ့ အသက်အန္တရာယ်ကို ထပ်မံပြီးတော့ ခြိမ်းခြောက်မှု မဖြစ်အောင် ပြင်ပ ဆေးရုံတွေကို လွှဲပြောင်း ကုသခွင့်ပေးဖို့၊ လုံလောက်တဲ့ ဆေးဝါးကုသခွင့် ပေးဖို့တွေ ဒါ့အပြင် နိုင်ငံတကာ အဖွဲ့ အစည်းတွေနဲ့ ICRC လိုမျိုး အကျဉ်းထောင်အတွင်း ဝင်ရောက်ခွင့်ရှိနေတဲ့ အဖွဲ့အစည်းတွေကလည်း အကျဉ်း ထောင် အာဏာပိုင်တွေ၊ တာဝန်ရှိသူတွေကို ဖိအားပေးပြီးတော့ တိုက်တွန်းနှိုးဆော်ပေးဖို့ လိုအပ်တယ်” ဟု ဆက်ပြောသည်။   ထို့ပြင် အကျဉ်းထောင်များအတွင်း သန့်ရှင်းသပ်ရပ်သည့် ပတ်ဝန်းကျင်၊ အာဟာရပြည့်ဝသည့် အစားအစာများ နှင့် သောက်သုံးရေများလည်း လိုအပ်လျက်ရှိသည်။   WOPP အနေဖြင့် မတရား ဖမ်းဆီးခံထားရသည့် နိုင်ငံရေးအကျဉ်းသူများ၏ လူ့အခွင့်အရေး ချိုးဖောက်ခံ နေရမှု များ၊ ရုပ်ပိုင်းစိတ်ပိုင်းဆိုင်ရာ ဖိနှိပ်ခံရမှုများနှင့် လုံလောက်သည့် ဆေးဝါးကုသခွင့်များ ရရှိနိုင်ရေးအတွက် စဉ်ဆက်မပြတ် စောင့်ကြည့်ပြီး၊ ခြွင်းချက်မရှိ ပြန်လည်လွတ်မြောက်လာသည်အထိ နိုင်ငံရေးအကျဉ်းသူများနှင့် အတူ ဆက်လက် ရပ်တည်သွားမည်ဖြစ်ကြောင်း ထုတ်ပြန်ထားသည်။   ဓါတ်ပုံ - ရွှေဘိုအကျဉ်းထောင် (ပုံဟောင်း - Crd)   #WOPP #နိုင်ငံရေးအကျဉ်းသူ

ထောင်တွင်း ကင်ဆာဖြစ်နေသည့် နိုင်ငံရေး အကျဉ်းသူ ၈ ဦး အသက်အန္တရာယ်ရှိနေ

ထောင်တွင်း ကင်ဆာဖြစ်နေသည့် နိုင်ငံရေး အကျဉ်းသူ ၈ ဦး အသက်အန္တရာယ်ရှိနေ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၁၄ ရက်။ မြန်မာနိုင်ငံရှိ အကျ…

  • August 14, 2026
မြစ်ဆုံစီမံကိန်း ပြန်စရန် စစ်အုပ်စုက လူထုစည်းရုံးမှုများ အရှိန်မြှင့်လုပ်ဆောင်နေဟု KHRW ပြော   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၁၄ ရက်။ တစ်နိုင်ငံလုံး၏ ဂေဟစနစ်၊ လူမှုဘဝနှင့် အမျိုးသားလုံခြုံရေးကို ထိခိုက်လာနိုင်သည့် ဧရာဝတီမြစ်ဆုံ ရေအား လျှပ်စစ်စီမံကိန်းကို ပြန်လည်စတင်နိုင်ရန်အတွက် စစ်အုပ်စုက လူထုစည်းရုံးလှုံ့ဆော်မှုများကို အရှိန်အဟုန်မြှင့် ပြုလုပ်လာနေကြောင်း ကချင်လူ့အခွင့်အရေး စောင့်ကြည့်ရေးအဖွဲ့ (KHRW) က ပြောဆိုသည်။   ပြီးခဲ့သည့် ဇွန်လအတွင်းက စစ်အုပ်စုခေါင်းဆောင် ဦမင်းအောင်လှိုင်နှင့် စစ်အုပ်စု၏ ကချင်ပြည်နယ် ဝန်ကြီးချုပ် ဦးခက်ထိန် နန်တို့ အဖွဲ့ တရုတ်နိုင်ငံသို့ သွားရောက်ခဲ့ပြီးနောက် စီမံကိန်း ပြန်လည်အကောင်အထည် ဖော်နိုင်ရေးအတွက် ပြည်သူလူထုအား စည်းရုံးမှုများကို ကြိုးပမ်းလာခြင်း ဖြစ်သည်။   KHRW ပြောရေးဆိုခွင့်ရှိသူ ဂျေကော့က “စစ်တပ်ကတော့ မြစ်ဆုံရေကာတာ စီမံကိန်း ဖော်ဆောင်ဖို့ရန်အတွက် လူထုစည်းရုံးရေး လုပ်ဆောင်နေတာကတော့ ကြာပါပြီ။ ဒီတရုတ်ပြည်ကနေ ပြန်လာတဲ့အချိန်မှာ မြစ်ဆုံ ရေကာတာ စီမံကိန်းကို အကောင်အထည်ဖော်ရန် ဆက်လက် ပြီးမှ ပြည်သူလူထုတွေကို စည်းရုံး လုပ်ဆောင် နေတာကို တွေ့ရတယ်။ ဒီမြေပြင်မှာဆိုရင် ပြည်သူလူထုတွေကို စည်းရုံးရေး အပြင်းအထန် လုပ်ဆောင်နေတာ တွေ့ရတယ်။ ပြီးတော့ ဒီ တရုတ်ရဲ့ ထောက်ခံမှု ရရှိရန်အတွက် ဆက်လက်ပြီးမှ သူတို့ လူထုစည်းရုံးတွေ တခြား နည်းလမ်းတွေပေါ့နော် သူတို့ လုပ်ဆောင်နေတာကို တွေ့ရပါ တယ်ဗျ” ဟု ပြောသည်။   အဆိုပါ မြစ်ဆုံစီမံကိန်းသည် ဧရာဝတီမြစ်ကို မှီခိုနေရသည့် ပြည်သူများ၏ ရှင်သန်ရပ်တည်ရေး၊ အမျိုးသား လုံခြုံရေးနှင့် တစ်နိုင်ငံလုံး၏ အကျိုးစီးပွားကို တိုက်ရိုက်ထိခိုက်လာနိုင်သောကြောင့် စစ်အုပ်စု၏ စည်းရုံး လှုံ့ဆော်မှုများတွင် ပါဝင်ခြင်းမရှိကြရန် KHRW က ပြည်သူလူထုအား တောင်းဆိုထားသည်။   ထို့ပြင် မြစ်ဆုံရေအားလျှပ်စစ်စီမံကိန်းကြောင့် ကချင်လူမျိုးများ၏ ဘိုးဘွားအစဉ်အဆက် ထိန်းသိမ်းလာခဲ့ကြ သည့် ဒေသဆိုင်ရာ အမွေအနှစ်များ ပျက်စီးမည့်အပြင် ဂေဟစနစ်နှင့် မြစ်အောက်ပိုင်း စိုက်ပျိုးရေးအပေါ် ပြင်ဆင်ရခက်သည့် သက်ရောက်မှုများ ရှိလာနိုင်ကြောင်း သဘာဝပတ်ဝန်းကျင်အရေး လှုပ်ရှားသူများကလည်း ထောက်ပြထား ကြသည်။   လက်ရှိတွင် စစ်အုပ်စုသည် မြစ်ဆုံစီမံကိန်း အကောင်အထည်ဖော်ရေး ကော်မတီကို အဖွဲ့ဝင် ၁၀ ဦးဖြင့် ဖွဲ့စည်း ထားပြီး လူထုစည်းရုံးရေး လုပ်ငန်းများကို အဓိကထား ဆောင်ရွက်လျက်ရှိသည်။   အဆိုပါ ကော်မတီသည် ပြီးခဲ့သည့် ဇူလိုင်လအတွင်းက မြစ်ကြီးနားမြို့ပေါ်ရှိ ဒူကထောင်နှင့် ပလန အစရှိသည့် ရပ်ကွက်များတွင် လူထုစည်းရုံးလှုံ့ဆော်မှုများကို ၅ ကြိမ်ထက်မနည်း ပြုလုပ်ခဲ့ကြောင်း နီးစပ်သူများက ပြောသည်။   ထို့ပြင် ကချင်ပြည်အတွင်း၌ လူထုစည်းရုံးလှုံ့ဆော်မှုများကို အကြိမ် ၅၀ ထက်မနည်း ဆက်လက်ပြုလုပ်သွားရန် စစ်အုပ်စုက ပြင်ဆင်ထားသည်ဟု KHRW က ဆိုသည်။   ဂျေကော့က “ဒီလိုမျိုးအချိန်မှာ သူတို့က ၅၀ ကြိမ်ထက်မနည်းပေါ့နော် ပြန်ပြီးမှ လုပ်ဆောင်ဖို့ သူတို့ရှိတယ်ဆို တာကို ကျနော်တို့ သိရတယ်။ ဒီ မြစ်ဆုံရေကာတာ စီမံကိန်းကို ဖော်ဆောင်ဖို့ရန်အတွက် လူထုစည်းရုံးရေး လုပ် ဆောင်ဖို့ တားဂတ်ထားတာက ဒီမြစ်ကြီးနားမှာရှိတဲ့ ရပ်ကွက်တိုင်းပေါ့နော်။ ပြီးတော့ ဒီဝိုင်းမော်ဖက်မှာပေါ့ နော် သူတို့ ဒီဖက်မှာ လုပ်ဆောင်ဖို့ လုပ်ဆောင်လာဖို့ ကျနော်တို့ သိရပါတယ်ခင်ဗျာ” ဟု ဆက်ပြောသည်။   စစ်အုပ်စုက ပြန်လည်စတင်ရန် ပြင်ဆင်နေသည့် ဧရာဝတီမြစ်ဆုံ မြစ်ညာမြစ်ဝှမ်း ရေအားလျှပ်စစ်စီမံကိန်းတွင် စီမံကိန်းကြီး ၇ ခု ပါဝင်ပြီး ယင်းတို့မှာ ချီဖွေဆည်၊ လိုင်ဇာ (မလိယန်) ဆည်၊ အူဆောက်ဆည်၊ ခေါင်လန်ဖူး ဆည်၊ ရီနန်ဆည်၊ ဖီဆော်ဆည်နှင့် ဧရာဝတီမြစ်ဆုံဆည်တို့ ဖြစ်ကြသည်။   #မြစ်ဆုံရေအားလျှပ်စစ်စီမံကိန်း #ဧရာဝတီမြစ်

မြစ်ဆုံစီမံကိန်း ပြန်စရန် စစ်အုပ်စုက လူထုစည်းရုံးမှုများ အရှိန်မြှင့်လုပ်ဆောင်နေဟု KHRW ပြော

မြစ်ဆုံစီမံကိန်း ပြန်စရန် စစ်အုပ်စုက လူထုစည်းရုံးမှုများ အရှိန်မြှင့်လုပ်ဆောင်နေဟု KHRW ပြော သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၁၄ ရက်။ …

  • August 14, 2026
ရခိုင်တောင်ပိုင်း စစ်အုပ်စု လေကြောင်းမှ ဗုံးကြဲမှုကြောင့် မိသားစုဝင်များအပါအဝင် ၈ ဦး သေဆုံး   သတင်းနှင့်မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၁၄ ရက်။   တိုက်ပွဲဖြစ်ပွားခြင်း မရှိသည့် ရခိုင်ပြည် ဂွမြို့နယ်နှင့် ကျိန္တလီမြို့တို့အား စစ်တပ်က ညအချိန်တွင် ဂျက်ဖိုက်တာ ဖြင့် ဗုံးကြဲတိုက်ခိုက်ခဲ့သဖြင့် ကလေးငယ်များ အပါအဝင် အပြစ်မဲ့ အရပ်သားပြည်သူ ၈ ဦး အစုလိုက်အပြုံ လိုက် သေဆုံးခဲ့သည်။   ပြီးခဲ့သည့် ဩဂုတ်လ ၁၃ ရက် ည ၁၁ နာရီခွဲခန့်တွင် ကျိန္တလီမြို့၊ အမှတ် (၁) ရပ်ကွက်၊ မေတ္တာပေါင်းကူးလမ်း ပေါ်ရှိ လူနေရပ်ကွက်အတွင်းသို့ စစ်အုပ်စု၏ လေတပ်မှ ဂျက်တိုက်လေယာဉ်တစ်စီးက ဗုံးသီး ၂ လုံး ကြဲချခဲ့ ခြင်း ဖြစ်သည်ဟု အာရက္ခတပ်တော် (AA) က ဩဂုတ်လ ၁၄ ရက်နေ့တွင် ထုတ်ပြန်ထားသည်။   ထိုသို့ ဗုံးကြဲတိုက်ခိုက်မှုကြောင့် နေအိမ်အတွင်း အိပ်မောကျနေသည့် ဒေါ်ခင်မိုးရွှေ (၆၀ နှစ်)၊ ဒေါ်ခင်စန္ဒာထွန်း (၄၅ နှစ်)၊ ဦးထွန်းလင်း (၄၆ နှစ်)၊ မဖြိုးဖြိုးကျော် (၃၆ နှစ်)၊ မောင်မင်းဝေခန့် (၃၅ နှစ်)၊ မဝင်းအိကျော် (၂၆ နှစ်)၊ မောင်ဉာဏ်လင်းသန့် (၁၂ နှစ်) နှင့် မောင်နေလင်းသန့် (၇ နှစ်) တို့မှာ နေရာတွင်ပင် သေဆုံးသွားခဲ့ကြရသည်။   ရခိုင်က ပရဟိတသမား တစ်ဦးက “မြေပြင်မှာ မယှဉ်နိုင်တိုင်း လေကြောင်းကနေ ဒီလိုပဲ အကြမ်းဖက်နေတာ။ အခုဆိုရင် ဒေသခံတွေ မအိပ်ရဲတော့ဘူး။ ညအချိန် လေယာဉ်သံကြားတာနဲ့ ဘယ်ပြေးရမှန်းမသိအောင် လေ ကြောင်းရန်ကို အမြဲ ကြောက်လန့်နေရတယ်။ အခုဆိုရင် လေယာဉ်ဗုံးကြဲတဲ့ သတင်းတွေက ဆက်တိုက် ဖြစ်နေ တော့ အဲ့ဒီအသံကို မကြားချင်တော့တာ” ဟု ဖြည့်စွက်ပြောဆိုသည်။   အဆိုပါ လေကြောင်း တိုက်ခိုက်မှုကြောင့် အရပ်သား နေအိမ် ၅ လုံးနှင့် သုံးဘီးဆိုင်ကယ် ၁ စီး ပျက်စီးသွားခဲ့ပြီး အခြား ထိခိုက်ဒဏ်ရာရရှိသူများနှင့် အပျက်အစီး စာရင်းများကိုလည်း ထပ်မံစုံစမ်းလျက်ရှိသည်။   ထို့ပြင် ဩဂုတ်လ ၁၃ ရက်နေ့၊ ည ၁၀ နာရီ ၅၅ မိနစ်အချိန်ခန့်ကလည်း ဂွမြို့နယ်၊ ကိုင်းခုံကျေးရွာသို့ စစ်တပ်က ဂျက်တိုက် လေယာဉ်တစ်စီးဖြင့် ဗုံးကြဲချခဲ့သေးသော်လည်း အရပ်သား ထိခိုက်ဒဏ်ရာရရှိမှုနှင့် နေအိမ် ပျက်စီးမှု မရှိခဲ့ပေ။   လက်ရှိတွင် အာရက္ခတပ်တော် (AA) နှင့် စစ်တပ်တို့အကြား မြေပြင်တိုက်ပွဲများ ဆက်လက်ပြင်းထန်နေပြီး တိုက်ပွဲတိုင်းတွင် အထိနာနေသည့် စစ်တပ်သည် ရှုံးမဲမဲ၍ အရပ်သားပြည်သူများ နေထိုင်ရာ ဒေသများကို နေ့ည မရွေး လေကြောင်းမှ ပစ်မှတ်ထား တိုက်ခိုက်လာနေသည်။   ရခိုင်စာရေးဆရာ ကိုဝေဟင်အောင်က “ရွေးတု အစိုးရဟာ ရခိုင်ပြည်ထဲက သံတွဲမြို့နယ်၊ ဂွမြို့နယ်တို့ကို အဓိက ပြန်သိမ်းယူနိုင်ဖို့ နည်းလမ်း ပေါင်းစုံနဲ့ ကြိုး စားနေတယ်။ အောက်တန်းကျတဲ့ နည်း လမ်း ပေါင်းစုံ သုံး နေတယ်။ ဒီအထဲမှာ အယုတ်ညံ့ဆုံးနည်းက ပြည်သူ တွေ နေတဲ့ နေရာကို ရည်ရွယ်ချက်ရှိရှိ လေ ယာဥ်နဲ့ ဗုံးကြဲ သတ်ဖြတ်တာဖြစ်တယ်” ဟု ၎င်း၏ လူမှုကွန်ရက် စာမျက်တွင် ရေးထားသည်။   စစ်တပ်၏ ယခုကဲ့သို့ စစ်ရာဇဝတ်မှုမြောက်သည့် လေကြောင်းတိုက်ခိုက်မှုများ ပိုမိုဆက်တိုက် ပြုလုပ်လာ နေသည့်အတွက် အာရက္ခဒေသတစ်ခုလုံးရှိ ပြည်သူများအနေဖြင့် လေကြောင်းအန္တရာယ်ကို သတိထားကြရန် သက်ဆိုင်ရာ အာရက္ခတပ်တော် (AA) က အသိပေး နှိုးဆော်ထားသည်။   #AA #ဂွမြို့နယ် #ကျိန္တလီမြို့

ရခိုင်တောင်ပိုင်း စစ်အုပ်စု လေကြောင်းမှ ဗုံးကြဲမှုကြောင့် မိသားစုဝင်များအပါအဝင် ၈ ဦး သေဆုံး

ရခိုင်တောင်ပိုင်း စစ်အုပ်စု လေကြောင်းမှ ဗုံးကြဲမှုကြောင့် မိသားစုဝင်များအပါအဝင် ၈ ဦး သေဆုံး သတင်းနှင့်မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၁၄ ရက်။ …

  • August 14, 2026
ဧရာဝတီတိုင်းအတွင်း တိုက်ပွဲများတွင် စစ်တပ်အထိနာ၊ အလောင်းနှင့် လက်နက်များ AA သိမ်းဆည်းရမိ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၁၄ ရက်။   ဧရာဝတီတိုင်းအတွင်း စစ်ကြောင်းထိုး ထိုးစစ်ဆင်လာသည့် စစ်အုပ်စုတပ်နှင့် အာရက္ခတပ်တော် (AA) တို့ အကြား ရေကြည်မြို့နယ်နှင့် သာပေါင်းမြို့နယ်တို့၌ တစ်ရက်တည်းတွင် ၅ နေရာထက်မက တိုက်ပွဲများ အပြင်း အထန် ဖြစ်ပွားခဲ့ပြီး စစ်တပ်ဘက်မှ အလောင်းများနှင့် လက်နက်ခဲယမ်းအချို့ သိမ်းဆည်းရမိခဲ့သည်။   ရေကြည်မြို့နယ် ပွိုင့် (၁၀၁) အနီးဝန်းကျင်နှင့် သာပေါင်းမြို့နယ် သာပေါင်းကလေးကျေးရွာ အနီးဝန်းကျင်ရှိ AA စစ်ကြောင်းများရှိရာ နေရာများသို့ စစ်အုပ်စုတပ်က အင်အားအလုံးအရင်းဖြင့် ထိုးစစ်ဆင်လာခဲ့ခြင်းဖြစ်ပြီး ဩဂုတ်လ ၁၂ ရက်နေ့ တစ်ရက်တည်း၌ပင် တစ်နေ့လုံးနီးပါး တိုက်ပွဲများ ဆက်တိုက် ဖြစ်ပွားခဲ့ခြင်းဖြစ်သည်။   ရေကြည်မြို့နယ်မှ ဒေသခံ သတင်းရင်းမြစ် အမျိုးသားတစ်ဦးက “တိုက်ပွဲဖြစ်နေတဲ့ အသံတွေကိုတော့ ဆက် တိုက် ကြားနေရတယ်။ ကျနော်တို့လည်း သာပေါင်းနဲ့ ရေကြည် အစပ်နယ်မြေတွေကို သွားဖို့လာဖို့ လုံးဝ မလွယ်တော့ဘူး။ ဂိတ်တွေမှာ စစ်ဆေးတာတွေ အင်မတန် တင်းကျပ်ထားတယ်။ စစ်တပ်ကလည်း လေယာဉ်နဲ့ ဗုံးလာကြဲတာတွေ ရှိတော့ ရွာသားအများစုက ဘေးလွတ်ရာကို ကြိုရှောင်နေကြရတယ်” ဟု ပြောသည်။   ဩဂုတ်လ ၁၂ ရက်နေ့၊ နံနက် ၆ နာရီ ၅၃ မိနစ်မှ ၉ နာရီ ၅၃ မိနစ်အထိ သာပေါင်းမြို့နယ်ဘက်မှ စစ်ကြောင်းထိုး လာသည့် စစ်အုပ်စုတပ်မ (၆၆) လက်အောက်ခံ ခလရ (၁၀၁) တပ်ရင်းနှင့် AA တို့သည် သာပေါင်းကလေး ကျေးရွာ၏ အရှေ့ဘက် မီတာ ၁,၀၀၀ ခန့်အကွာတွင် ၃ နာရီကြာ ထိတွေ့တိုက်ပွဲ ဖြစ်ပွားခဲ့သည်။       သာပေါင်း ဒေသခံတစ်ဦးက “အခုဖြစ်နေတာက ဂွကို စစ်ကြောင်းထပ်ထိုးတာ မတန့်ဘဲ ဆက်တိုက် နေတာ စစ်တပ်က။ တိုက်ပွဲက ရပ်လိုက် တိုက်လိုက်ပါပဲ ဘောမိချောင်း၊ ဝါးယားရွာနဲ့ ကဇင်း တောရွာဘက်မှာ ဖြစ်နေ တာ။ အဲဒီနေရာတွေက ရခိုင်ပြည်နယ် ဂွမြို့နယ်အထိ တောက်လျှောက် စပ်နေတာ” ဟု ပြောသည်။   စစ်အုပ်စုတပ်သည် လေကြောင်း၊ ဒရုန်းနှင့် မြေပြင် လက်နက်ကြီး ပစ်ကူများကို အများအပြား အသုံးပြု၍ အပြင်းအထန် ထိုးစစ်ဆင်ခဲ့သော်လည်း AA ဘက်က ခုခံစစ်နှင့် တန်ပြန်ထိုးစစ်တို့ဖြင့် တိုက်ခိုက်ခဲ့သဖြင့် စစ်အုပ်စုတပ်ဘက်မှ ထိခိုက်အကျအဆုံး များစွာဖြင့် တပ်လန်ကာ ဆုတ်ခွာသွားခဲ့ရသည်။   ထို့နောက် AA က နယ်မြေရှင်းလင်းရေး ဆောင်ရွက်စဉ် စစ်အုပ်စုတပ်ဖွဲ့ဝင်များ၏ ရုပ်အလောင်းအချို့နှင့် လက်နက်ခဲယမ်းများကို သိမ်းဆည်းရမိခဲ့သည်ဟု ဩဂုတ်လ ၁၄ ရက်နေ့တွင် AA က သတင်းထုတ်ပြန်သည်။

 အလားတူ ရေကြည်မြို့နယ်ဘက်မှ စစ်ကြောင်းထိုးလာသည့် တပ်မ (၆၆) လက်အောက်ခံ ခလရ (၁) နှင့် (၁၁) တပ်ရင်းများကိုလည်း AA က ပွိုင့် (၁၀၁) ကုန်း တောင်ဘက်နှင့် အနောက်တောင်ဘက်တို့တွင် နာရီပေါင်းများစွာ ပိတ်ဆို့ တိုက်ခိုက်ခဲ့သည်။   ထို့ပြင် ယင်းတိုက်ပွဲများ ဖြစ်ပွားရာ အနီးဝန်းကျင် မလှမ်းမကမ်း နေရာ ၂ ခု၌လည်း စစ်အုပ်စုတပ်က ထပ်မံ ထိုးစစ်ဆင်လာသဖြင့် တိုက်ပွဲများ ဆက်လက် ဖြစ်ပွားခဲ့သည်။   စစ်အုပ်စုတပ်သည် ဂျက်ဖိုက်တာ၊ Y-12 လေယာဉ်၊ ဒရုန်းနှင့် မြေပြင် လက်နက်ကြီး ပစ်ကူများစွာ အသုံးပြုကာ စစ်ကြောင်းများ ခွဲ၍ အင်အားအလုံးအရင်းဖြင့် ထိုးစစ်ဆင်ခဲ့ခြင်း ဖြစ်သော်လည်း ယခုတိုက်ပွဲများအတွင်း စစ်တပ်ဘက်မှ အလောင်းနှင့် လက်နက်ခဲယမ်းအချို့ကို AA က ထပ်မံသိမ်းဆည်းရမိခဲ့သည်။     စစ်အုပ်စုတပ်သည် ရခိုင်ပြည်အတွင်းသို့ ထိုးဖောက်ဝင်ရောက်နိုင်ရန် အတွက် ရခိုင်ပြည်နှင့် နယ်မြေချင်း ထိစပ် နေသည့် တိုင်း ၃ တိုင်းနှင့် ပြည်နယ် ၁ ခုတို့မှ တစ်ဆင့် ပုံစံမျိုးစုံ၊ နည်းလမ်းမျိုးစုံဖြင့် ကြိုးပမ်းနေသည်မှာ ၂ နှစ် နီးပါး ရှိလာပြီဖြစ်သည်။   ထိုသို့ ထိုးဖောက်ရန် အားထုတ်နေသည့် နေရာများအနက် ရခိုင် - ဧရာဝတီ နယ်စပ်အစပ် ဒေသများ၌ ယခု ရက် ပိုင်းအတွင်း နှစ်ဖက်တိုက်ပွဲများ ပိုမိုပြင်းထန်လာနေသည်။   ဓါတ်ပုံ - အာရက္ခတပ်တော် (AA)   #AA #ဧရာဝတီတိုင်းတိုက်ပွဲ

ဧရာဝတီတိုင်းအတွင်း တိုက်ပွဲများတွင် စစ်တပ်အထိနာ၊ အလောင်းနှင့် လက်နက်များ AA သိမ်းဆည်းရမိ

ဧရာဝတီတိုင်းအတွင်း တိုက်ပွဲများတွင် စစ်တပ်အထိနာ၊ အလောင်းနှင့် လက်နက်များ AA သိမ်းဆည်းရမိ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၁၄ ရက်။ ဧ…

  • August 14, 2026
စစ်တွေနှင့် မိုင်အနည်းငယ်အကွာ စစ်တပ် တပ်ရင်းကို AA လက်နက်ကြီးဖြင့် ပစ်ခတ်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၁၄ ရက်။   ရခိုင်ပြည်၊ စစ်တွေမြို့နှင့် မိုင်အနည်းငယ်ခန့်သာ ကွာဝေးသည့် စစ်တပ်၏ ကျားမသောက်တပ်ရင်းကို ယခုရက်ပိုင်းအတွင်း အာရက္ခတပ်တော် (AA) က လက်နက်ကြီးများဖြင့် ပစ်ခတ်တိုက်ခိုက်ခဲ့ပြီး ထိုးစစ်အရှိန် အဟုန်မြှင့်လာကြောင်း ဒေသတွင်း စစ်ရေးသတင်းရင်းမြစ်များက ပြောသည်။   စစ်တွေမြို့နယ်အတွင်း တည်ရှိသည့် ကျားမသောက် အခြေစိုက် စအရ (၉၀၈) စစ်မြေပြင် အင်ဂျင်နီယာ တပ်ရင်းသည် စစ်တွေမြို့နှင့် ၄ မိုင်ခန့်သာ ကွာဝေးပြီး ပုဏ္ဏားကျွန်းမြို့နယ်နှင့် စစ်တွေမြို့နယ် အစပ်ရှိ ကုလား တန်မြစ်နှင့် ချောင်းလက်တက်များအနီး ကျားမသောက်ကျေးရွာ ဝန်းကျင်တွင် တည်ရှိသည်။   အဆိုပါ ကျားမသောက်တပ်ရင်းကို ဩဂုတ်လ ၁၀ ရက်နှင့် ၁၁ ရက်နေ့တို့တွင် AA က လက်နက်ကြီးများဖြင့် ပစ်ခတ်ခဲ့သဖြင့် စစ်အုပ်စုတပ်ဘက်မှ ထိခိုက်သေဆုံးမှုအချို့ ရှိခဲ့သည်။   စစ်တွေဒေသခံ စစ်ရေးသတင်းရင်းမြစ် အမျိုးသားတစ်ဦးက “ကျားမသောက်တပ်ရင်းထဲကို လက်နက်ကြီး ကျလို့ စစ်တပ်က အသေအပျောက်တွေ ရှိတယ်လို့ကြားတယ်၊ AA က လက်ရှိထိုးစစ်က တော်တော် ရောက် လာတာပါ။ ပါဒလိတ်အမြောက်တပ်၊ အမှတ် (၁၂) ရဲတပ်ရင်း၊ ရွှေမင်းဂံရေတပ်စခန်း အနီးမှာ အခု စစ်တပ်နဲ့ AA စစ်ရေးတင်းမာနေတယ်၊ AA က ဆုတ်တက်လုပ်နေတာလို့ သိရတယ်” ဟု ပြောသည်။   ကျားမသောက်တပ်ရင်းသည် စစ်တွေဒေသကွပ်ကဲမှုစစ်ဌာနချုပ် (ဒကစ) အတွက် မြို့ပြင်ပတ်လည် ခံစစ် စည်း တွင် အရေးပါသော တပ်ရင်းတစ်ခုဖြစ်ပြီး ပါဒလိတ်အမြောက်တပ်၊ အမှတ် (၁၂) ရဲတပ်ရင်းနှင့် ရွှေမင်းဂံရေတပ် စခန်းတို့နှင့် မလှမ်းမကမ်းတွင် တည်ရှိနေခြင်း ဖြစ်သည်။   စစ်တွေမြို့နယ်ရှိ အမြင့်ကျွန်း၊ မင်းချောင်း၊ ပါဒလိတ်၊ နာရီကန်၊ ကျားမသောက်၊ ရေချမ်းပြင်နှင့် ကံ့ကော်ကျွန်း စသည့် နေရာများတွင် စစ်အုပ်စုတပ်က တပ်ဖြန့်ထားသော်လည်း အဆိုပါနေရာများသို့ AA ဘက်မှ ချဉ်းကပ် စစ်ဆင်လျက်ရှိသည်။   စစ်တွေဒေသခံ အမျိုးသမီးတစ်ဦးကလည်း “အခုရက်ပိုင်း ပစ်ခတ်သံတွေ မြို့ထဲအထိ ကြားရပြီး စစ်တပ်ကား တွေ လုံခြုံရေးအရ ညဘက်တွေ သွားလာနေပါတယ်။ ကမ်းနားမှာ ဒေသခံတွေ မထိုင်ရဲပါဘူး၊ အိမ်ထဲက အိမ်ပြင် မထွက်ရဲကြဘူး” ဟု ပြောသည်။   ကျားမသောက်တပ်ရင်းသို့ လက်နက်ကြီးကျည် ကျရောက်ပေါက်ကွဲခဲ့ပြီးနောက် စစ်အုပ်စုတပ်သည် ဆတ်ရိုးကျ တံတား ပတ်ဝန်းကျင်တွင် ဘန်ကာများ ထပ်မံဆောက်လုပ်နေပြီး ကမ်းနားလမ်း ခြံစည်းရိုးကိုလည်း မိဇံရပ်ကွက် ဘီလူးမတံတားအထိ ကာရံမှုများ ပြုလုပ်လာသည်။   စစ်တွေမြို့နယ်အတွင်း AA နှင့် စစ်အုပ်စုတပ်တို့အကြား ယခုသီတင်းပတ်အတွင်း စစ်ရေးတင်းမာမှုများ ပိုမိုမြင့် တက်လာနေကာ မြို့အတွင်းနှင့် မြို့အနီးဝန်းကျင်ရှိ အရေးပါသည့် နေရာများတွင် စစ်အုပ်စုတပ်က အင်အားဖြန့် ကျက် ချထားလျက်ရှိသည်။   ထို့ပြင် စစ်တွေမြို့၏ ပွိုင့်ကမ်းခြေနှင့် ကမ်းနားလမ်းတစ်လျှောက်တွင်လည်း ခံစစ်ပြင်ဆင်မှုများ ပြုလုပ်နေပြီး ဘီလူးမတံတား၌ တပ်ဖြန့်ထားသည့်အပြင် လက်နက်၊ ခဲယမ်းအပါအဝင် စစ်ကူအင်အားများကိုလည်း ရေတပ် သင်္ဘောများဖြင့် မကြာခဏ လာရောက်ဖြည့်တင်းနေသည်။     လက်ရှိတွင် အာရက္ခတပ်တော် AA သည် ချင်းပြည်၊ ပလက်ဝမြို့ အပါအဝင် ရခိုင်ပြည်ရှိ မြို့နယ်ပေါင်း ၁၄ ခုကို ထိန်းချုပ်ထားနိုင် ဆဲဖြစ်ပြီး စစ်တွေမြို့ ဝန်းကျင်ကိုလည်း ဝိုင်းဝန်းပိတ်ဆို့ထားသည်။   ဓါတ်ပုံ - အာရက္ခတပ်တော် (AA)   #စစ်တွေ #ကျားမသောက်တပ်ရင်း #AA

စစ်တွေနှင့် မိုင်အနည်းငယ်အကွာ စစ်တပ် တပ်ရင်းကို AA လက်နက်ကြီးဖြင့် ပစ်ခတ်

စစ်တွေနှင့် မိုင်အနည်းငယ်အကွာ စစ်တပ် တပ်ရင်းကို AA လက်နက်ကြီးဖြင့် ပစ်ခတ် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၁၄ ရက်။ ရခိုင်ပြည်၊ စစ်တ…

  • August 14, 2026
ရှမ်းမြောက် မဘိမ်းတွင် စစ်တပ်က ဗုံးကြဲသဖြင့် အရပ်သား ၄ ဦး သေဆုံး   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၁၄ ရက်။   ရှမ်းပြည်မြောက်ပိုင်း၊ မဘိမ်းမြို့နယ်အတွင်း စစ်တပ်၏ လေကြောင်း တိုက်ခိုက်မှုများကြောင့် ၁၂ ရက် အတွင်း အရပ်သား ၄ ဦး သေဆုံးပြီး ၈ ဦး ထိခိုက်ဒဏ်ရာ ရရှိခဲ့ကြောင်း ရှမ်းလူ့အခွင့်အရေး မဏ္ဍိုင် (SHRF) က ပြောသည်။   စစ်တပ်သည် အဆိုပါ လေကြောင်းတိုက်ခိုက်မှုများကို ဇူလိုင်လ ၂၈ ရက်နေ့မှ ဩဂုတ်လ ၈ ရက်နေ့ အတွင်း ပြုလုပ်ခဲ့ခြင်းဖြစ်ပြီး ဒေသခံပြည်သူများ ရေဘေးဒဏ် ကြုံတွေ့နေရချိန်တွင် ဗုံးကြဲတိုက်ခိုက်ခဲ့ခြင်း ဖြစ်သည်ဟု ဆိုသည်။   SHRF ပြောရေးဆိုခွင့်ရှိသူ ယိင်းလျန်းဟန်က “လေကြောင်းတိုက်ခိုက်မှုကတော့ ဆက်တိုက်လုပ်နေတာပေါ့ နော်။ ဆက်တိုက်လုပ်နေတာကျတော့ နှစ်ပတ် သုံးပတ်လောက်ရှိပြီရှင့်။ ကျမတို့ ဒီရဲ့ ဇူလိုင်လ နောက်ဆုံးပတ် ထဲကနေ အခုအချိန်အထိပဲ ဆက်တိုက်လုပ်တယ်။ တစ်ခါတစ်လေလည်း အရပ်သားတွေ ထိခိုက်တာရှိမယ်။ တစ်ခါတစ်လေလည်း အရပ်သားတွေ ထိခိုက်တာ မရှိဘူး။ လေကြောင်းတိုက်ခိုက်မှုကတော့ မဘိမ်းနေရာ အနှံ့မှာ ဆက်တိုက်လုပ်နေတယ်ရှင့်။ သေဆုံးတာကတော့ ၄ ဦးနဲ့ ကျမတို့ ဒဏ်ရာရတာကတော့ ၈ ဦးပါရှင့်” ဟု ပြောသည်။   ထို့ပြင် စစ်တပ်၏ လေကြောင်းတိုက်ခိုက်မှုကြောင့် အရပ်သား နေအိမ် အလုံး ၂၀ ခန့် ထိမှန် ပျက်စီးခဲ့ ကြောင်း SHRF က ဆိုသည်။     စစ်တပ်သည် ဩဂုတ်လ ၆ ရက်နေ့ ည ၁၁ နာရီခန့်တွင် မဘိမ်းမြို့၊ ရပ်ကွက် (၃) ရှိ မဘိမ်းဆေးရုံကြီးကို လေကြောင်းမှ ဗုံးကြဲခဲ့သဖြင့် ဆေးရုံ အဆောက်အအုံ ၃ လုံး ထိမှန် ပျက်စီးခဲ့သည်။   ဩဂုတ်လ ၃ ရက်နေ့ ည ၁၁ နာရီဝန်းကျင်တွင်လည်း မဘိမ်းမြို့၊ ရပ်ကွက် (၂) အတွင်းသို့ ဂျက်ဖိုက်တာဖြင့် ဗုံးကြဲတိုက်ခိုက်ခဲ့ရာ လူနေအိမ် ၃ လုံးထက်မနည်း ပျက်စီးခဲ့ပြီး အမျိုးသား ၁ ဦး သေဆုံးခဲ့သည်။   အလားတူ ဇူလိုင်လ ၃၀ ရက်နေ့ ညနေ ၄ နာရီခန့်တွင် မဘိမ်းမြို့နယ် ဘဟဲကျေးရွာနှင့် ရပ်ကွက် (၃) တို့အား ဗုံးကြဲတိုက်ခိုက်ခဲ့သဖြင့် အရပ်သား ၄ ဦး ဒဏ်ရာရရှိခဲ့သည့်အပြင် လူနေအိမ် ၅ လုံးခန့် ထိမှန် ပျက်စီးခဲ့သည်။   ဇူလိုင်လ ၂၈ ရက်နေ့ နံနက် ၁၁ နာရီခန့်ကလည်း မဘိမ်းမြို့၊ ရပ်ကွက် (၂) နှင့် ရပ်ကွက် (၃) တို့ကို စစ်အုပ်စု တပ်က Y-12 အမျိုးအစား လေယာဉ်ဖြင့် ဗုံးကြဲတိုက်ခိုက်ခဲ့ရာ အရပ်သား ၃ ဦး သေဆုံးပြီး ၄ ဦး ဒဏ်ရာရရှိခဲ့ ကာ နေအိမ် ၁၀ လုံးထက်မနည်း ထိခိုက်ပျက်စီးခဲ့သည်။   အဆိုပါ လေကြောင်းတိုက်ခိုက်မှုများ ဖြစ်ပွားခဲ့သည့် ကာလအတွင်း မဘိမ်းမြို့နယ်အတွင်းရှိ ရွှေလီမြစ်နှင့် နမ့်ပေါ်ချောင်းရေတို့ အရှိန်အဟုန်ဖြင့် မြင့်တက်နေချိန်လည်း ဖြစ်သည်။   “တရုတ်ပြည်ဘက်ကနေမှ ကျမတို့ ရွှေလီမြစ် အထက်ပိုင်းက ဒီရဲ့ ဆည်တွေက ရေဖွင့်ချတယ်လို့ သတင်းထွက် လာတယ်။ ထွက်လာတဲ့ နောက်ပိုင်းမှာ ကျမတို့ ဒီရဲ့ မူဆယ်-နမ့်ခမ်းမှာ ရေစတက်တယ်။ အဲဒီ မူဆယ်-နမ့်ခမ်း ထဲကနေ အခု မဘိမ်း အဝန်းအဝိုင်းထဲ ရောက်လာတာပေါ့နော်။ အခုဒီလို ရွှေလီမြစ် ရေကြီးနေတဲ့ဟာကျတော့ ရေကြီးမှုကြောင့် ထိခိုက်နစ်နာတဲ့ လူဦးရေတော့ ကျမတို့လည်း မြေပြင်မှာ ဆင်းပြီး အသေးစိတ် မကောက်နိုင် လို့ ကျမတို့ မသိရဘူးပေါ့နော်။ ဒါပေမဲ့ လူဦးရေတော့ ထောင်ချီတယ်ပေါ့နော်။ လူဦးရေ ထောင်ချီတယ်။ ကျေးရွာလည်း လေး ငါးရွာ မကဘူးပေါ့နော် မြုပ်တာက၊ ဒီမြို့ပေါ် ရပ်ကွက်တွေလည်း ထိတယ်ဆိုတော့လေ” ဟု ယိင်းလျန်းဟန်က ဆက်ပြောသည်။   စစ်တပ်က လေကြောင်းမှ ဆက်တိုက် တိုက်ခိုက်နေသည့် မဘိမ်းမြို့နယ်သည် ကချင်လွတ်လပ်ရေး တပ်မတော် (KIA) ထိန်းချုပ်ထားသည့် နယ်မြေဖြစ်ပြီး လက်ရှိတွင် နှစ်ဖက် စစ်ရေးတင်းမာနေကာ တိုက်ပွဲ များလည်း ဖြစ်ပွားလျက်ရှိသည်။   လက်ရှိတွင် ဒေသခံ ပြည်သူများသည် ရေဘေးဒဏ်ကြောင့် စားဝတ်နေရေးနှင့် နေထိုင်ရေး အခက်အခဲများစွာ ကြုံတွေ့နေရသည့်အပြင် စစ်အုပ်စုတပ်၏ လေကြောင်းတိုက်ခိုက်မှု အန္တရာယ်ကိုပါ စိုးရိမ်ပူပန်စွာ နေ့စဉ် ရင်ဆိုင်နေကြရသည်။   ဓါတ်ပုံ - SHRF   #မဘိမ်းမြို့

ရှမ်းမြောက် မဘိမ်းတွင် စစ်တပ်က ဗုံးကြဲသဖြင့် အရပ်သား ၄ ဦး သေဆုံး

ရှမ်းမြောက် မဘိမ်းတွင် စစ်တပ်က ဗုံးကြဲသဖြင့် အရပ်သား ၄ ဦး သေဆုံး သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၁၄ ရက်။ ရှမ်းပြည်မြောက်ပိုင်း၊ မဘ…

  • August 14, 2026
ရခိုင်တောင်စွန်း ဂွမြို့နယ်ကို စစ်တပ် ဗုံးကြဲ၊ သံတွဲ ကျောက်ကြီးရွာ တိုက်ခိုက်ခံရမှု သေဆုံးသူ ၁၆ ဦးထိ ရှိလာ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၁၄ ရက်။   ရခိုင်ပြည်၊ ဂွမြို့နယ်ကို စစ်အုပ်စုတပ်က ညအချိန် လေကြောင်းမှ ဗုံးကြဲတိုက်ခိုက်ခဲ့သလို သံတွဲမြို့နယ် ကျောက်ကြီးကျေးရွာ တိုက်ခိုက်ခံရမှုတွင်လည်း သေဆုံးသူ ၁၆ ဦးအထိ မြင့်တက်လာကြောင်း အာရက္ခတပ် တော် (AA) က ဩဂုတ်လ ၁၃ ရက်နေ့ ညနေပိုင်းတွင် ထုတ်ပြန်လိုက်သည်။   ဂွမြို့နယ်၊ ကိုင်းခုံကျေးရွာကို ဩဂုတ်လ ၁၂ ရက်နေ့၊ ည ၉ နာရီခန့်တွင် စစ်အုပ်စုတပ်က ဂျက်တိုက်လေယာဉ် တစ်စီးဖြင့် ၄ လုံး ဗုံးကြဲတိုက်ခိုက်ခဲ့ခြင်း ဖြစ်သည်။   ဂွဒေသခံ ပရဟိတသမားတစ်ဦးက “ဂွဒေသခံတွေ ထိခိုက်တာမရှိပါဘူး၊ အိမ်တွေတော့ ပျက်စီးပါတယ်။ အခု မြို့ထဲက ရှောင်နေကြတယ်၊ ပြည်သူတွေ ဗုံးခိုကျင်းထဲမှာ နေတာများတယ်” ဟု ပြောသည်။   အဆိုပါ လေကြောင်းတိုက်ခိုက်မှုကြောင့် အရပ်သားပြည်သူ ထိခိုက်ဒဏ်ရာရရှိမှု မရှိခဲ့သော်လည်း ပြည်သူလူထု ၏ လူနေအိမ် ၇ လုံး ထိခိုက်ပျက်စီးခဲ့သည်။   ထို့ပြင် ဩဂုတ်လ ၁၀ ရက်နေ့ မွန်းလွဲ ၁ နာရီကျော်ခန့်က သံတွဲမြို့နယ်၊ ကျောက်ကြီးကျေးရွာအား စစ်အုပ်စု တပ်က လေကြောင်းမှ ဗုံးကြဲတိုက်ခိုက်ခဲ့သည့် ဖြစ်စဉ်တွင် သေဆုံးသူ အရပ်သား ၁၆ ဦးအထိ ရှိလာခဲ့ပြီး ဒဏ်ရာရရှိသူ ၁၈ ဦးအထိ တိုးလာသည်။     သံတွဲ၌ စစ်ရှောင်များကို အကူအညီပေးနေသူ အမျိုးသားတစ်ဦး “ကိုယ်တို့ ရခိုင်ကို လေယာဉ်နဲ့ ဗုံးကြဲနေတာ က နေ့တိုင်းပဲ၊ နေ့စဉ်ရက်ဆက် လေကြောင်းတိုက်ခိုက်မှုတွေက ရှိနေတာမျိုးဗျ။ မြန်မာစစ်တပ်က သူတို့ စစ် မနိုင်ရင် ပြောရမယ်ဆိုရင် အေအေကို မနိုင်တော့ လူထုကို တန်ပြန်လုပ်တာပေါ့ဗျာ။ တမင်ကိုမှ လူထုအပေါ်မှာ ရက်စက်တာ၊ မင်းတို့ ရခိုင်တွေကို ငါ့တို့ သတ်ပြမယ်ဆိုတာမျိုး အေအေကို လုပ်ပြတာမျိုးပေါ့ဗျာနော်။ ဒီလို စကားမျိုး ကျနော်က မပြောချင်ဘူး၊ မသုံးချင်ပါဘူးဗျာ။ ဒါပေမယ့် စစ်တပ်က တကယ်ကို ရက်စက်ကြမ်း ကြုတ်တာဗျ” ဟု ပြောသည်။   တစ်ဆက်တည်းမှာပင် ဩဂုတ်လ ၁၂ ရက်နေ့ ည ၁၁ နာရီခွဲ အချိန်ခန့်တွင်လည်း ရခိုင်ဒေသနှင့် နယ်မြေချင်း ထိစပ်နေသော ချင်းပြည်၊ ဆမီးမြို့ရှိ အရပ်သားများ နေထိုင်ရာ ရပ်ကွက်များကိုလည်း စစ်အုပ်စုတပ်က ဂျက်ဖိုက်တာများဖြင့် ဗုံးကြဲတိုက်ခိုက်ခဲ့သည်။   အဆိုပါ ဗုံးကြဲတိုက်ခိုက်မှုအတွင်း ဆမီးမြို့၊ ရပ်ကွက် (၂) ရှိ အရပ်သား ဦးနိုင်တင်း၏ နေအိမ်ကို ဗုံးသီး တိုက်ရိုက်ထိမှန်ခဲ့ပြီး ဦးနိုင်တင်း၏ သမီးဖြစ်သူ အသက် ၁၆ နှစ်အရွယ် မမထွီးမေ (မထွေးမေ) မှာ နေရာ၌ပင် ပွဲချင်းပြီး သေဆုံးခဲ့သည်။   ထို့ပြင် ဦးနိုင်တင်းနှင့် ဇနီးဖြစ်သူ ဒေါ်ပြောင်နွဲ အပါအဝင် အသက် ၁၂ နှစ်ခန့်အရွယ်ရှိ ၎င်းတို့၏ သား ၃ ဦး ဖြစ်ကြသည့် မောင်ခိုင်လင်းအောင်၊ မောင်ထွန်းလင်းနိုင် နှင့် မောင်စိုးမိုးအောင်တို့ ထိခိုက်ဒဏ်ရာများ ရရှိခဲ့ကြ သည်။   အဆိုပါ ဆမီးမြို့အဝင်ဝ အနီးဝန်းကျင်မှ နောက်ထပ် အရပ်သား ၄ ဦးမှာလည်း ဗုံးစများ ထိမှန်၍ ဒဏ်ရာ အသီးသီး ရရှိခဲ့ကြသည်။   ဓါတ်ပုံ - အာရက္ခတပ်တော် (AA)   #ဂွမြို့နယ် #သံတွဲမြို့နယ် #ကျောက်ကြီးရွာ

ရခိုင်တောင်စွန်း ဂွမြို့နယ်ကို စစ်တပ် ဗုံးကြဲ၊ သံတွဲ ကျောက်ကြီးရွာ တိုက်ခိုက်ခံရမှု သေဆုံးသူ ၁၆ ဦးထိ ရှိလာ

ရခိုင်တောင်စွန်း ဂွမြို့နယ်ကို စစ်တပ် ဗုံးကြဲ၊ သံတွဲ ကျောက်ကြီးရွာ တိုက်ခိုက်ခံရမှု သေဆုံးသူ ၁၆ ဦးထိ ရှိလာ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩ…

  • August 14, 2026
ဧရာဝတီတိုင်းအတွင်း AA နှင့် တိုက်ပွဲများ ပြန်ဖြစ်ပြီး စစ်တပ် အထိနာ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၁၄ ရက်။   ဧရာဝတီတိုင်းအတွင်းရှိ သာပေါင်းနှင့် ရေကြည်မြို့နယ် အစပ်ဒေသများတွင် အာရက္ခတပ်တော် (AA) နှင့် စစ်အုပ်စုတပ်တို့အကြား တိုက်ပွဲများ ဆက်လက် ပြင်းထန်နေပြီး စစ်တပ်ဘက်မှ အထိနာနေသဖြင့် ဒဏ်ရာ ရရှိသူအချို့ကို ကားများဖြင့် သယ်ယူနေရကြောင်း ဒေသတွင်း သတင်းရင်းမြစ်များက ပြောသည်။   ဩဂုတ်လ ၁၀ ရက်နေ့မှ ၁၂ ရက်နေ့အထိ သာပေါင်းမြို့နယ် သဲဖြူကျေးရွာနှင့် ရေကြည်မြို့နယ် ကမ္ဘားကြီး ကျေးရွာ အနောက်ဘက်ရှိ ကြောင်လျှာကျေးရွာ၊ ရွာသစ်ကလေးကျေးရွာတို့တွင် တိုက်ပွဲအချို့ ဖြစ်ပွားခဲ့ပြီး သဲဖြူနှင့် ဘောမိချောင်း ဒေသဘက်၌ တိုက်ပွဲများ အရှိန်ဟုန်မက ပိုမိုပြင်းထန်နေခြင်း ဖြစ်သည်။   ထို့ပြင် သာပေါင်းမြို့နယ် ရခိုင်ရိုးမအစပ် ဘောမိချောင်းဒေသရှိ ဝါးယားကျေးရွာနှင့် ကဇင်းတောကျေးရွာ ဘက်တွင်လည်း တိုက်ပွဲများ ဖြစ်ပွားနေပြီး စစ်အုပ်စုတပ်ဘက်မှ လက်နက်ကြီး ပစ်ခတ်သံများကို ပတ်ဝန်း ကျင်ကျေးရွာများမှ ဆက်တိုက် ကြားနေရသည်။   သာပေါင်းဒေသခံ စစ်ရေးသတင်းရင်းမြစ်တစ်ဦးက “အခုဖြစ်နေတာက ဘောမိချောင်း၊ ဝါးယားရွာနဲ့ ကဇင်း တောရွာဘက်မှာ ဖြစ်နေတာ။ အဲဒီနေရာတွေက ရခိုင်နယ်စပ် ရွှေသောင်ယံ မကျည်းဇင်ကနေ ရခိုင်ပြည်နယ် ဂွမြို့နယ်အထိ တောက်လျှောက် စပ်နေတာ။ တိုက်ပွဲက ရပ်လိုက် တိုက်လိုက်ပါပဲ” ဟု ပြောသည်။   ဧရာဝတီတိုင်းအတွင်းရှိ သဲဖြူ၊ ကင်ပွန်းချဉ်၊ ဝါးယားနှင့် ကဇင်းတော ကျေးရွာများသည် ရခိုင်ရိုးမအစပ် ဘောမိချောင်းတစ်လျှောက်ရှိ ဂွမြို့နယ်နှင့် နယ်နိမိတ်ချင်း ထိစပ်နေသည့် နေရာများဖြစ်ပြီး စစ်အုပ်စုတပ်က အင်အားသုံး စစ်ကြောင်းထိုးလာသဖြင့် AA တပ်ဖွဲ့များနှင့် တိုက်ပွဲဖြစ်ပွားရခြင်း ဖြစ်သည်။   “အမှန်တော့ ဂွကို စစ်ကြောင်းထပ်ထိုးတာ မတန့်ဘဲ ဆက်တိုက် နေတာ စစ်တပ်က။ ဩဂုတ် ၁၁ ရက် ညပိုင်း ကနေ အခု ၁၂ ရက်အထိ တိုက်ပွဲက ရပ်လိုက် တိုက်လိုက်ပါပဲ” ဟု အဆိုပါ သတင်းရင်းမြစ်က ဆက် ပြော သည်။   တိုက်ပွဲဖြစ်ပွားနေသည့် ကဇင်းတောကျေးရွာသည် ကြက်သွန်ကွင်း-သဲဖြူ လမ်းဆုံမှ ၇ မိုင်ခန့် ကွာဝေးပြီး ဝါးယားကျေးရွာနှင့် ၁၁ မိုင်ခွဲခန့်သာ ကွာဝေးသည်။ ဗျူဟာမှူးအဆင့် အုပ်ချုပ်နေသည့် သဲဖြူနှင့် ကင်ပွန်းချဉ် ကုန်းတို့မှ စစ်အုပ်စုတပ်က လက်နက်ကြီးများဖြင့် ဆက်တိုက် ပစ်ကူပေးလျက် ရှိသည်။   လက်ရှိတွင် စစ်အုပ်စုတပ်ဘက်မှ အင်အားအမြောက်အမြား အသုံးပြု၍ စစ်ကြောင်းထိုး နယ်မြေထိန်းချုပ်ရန် ကြိုးပမ်းနေသလို AA ဘက်ကလည်း ရိုးမတောင်ခြေ နယ်မြေများအတွင်း ပြောက်ကျားစစ်ဆင်ရေး စနစ်ဖြင့် ပြန်လည်ခုခံ တိုက်ခိုက်လျက်ရှိသည်။   ဒေသခံ စစ်ရေးလေ့လာသူတစ်ဦးက “ဘာပဲဖြစ်ဖြစ် AA ဘက်ကတော့ ထပ်တိုးလာတာမျိုး သိပ်မရှိဘူး။ စစ်တပ်က စစ်ကြောင်းထိုးရင် ဖြတ်တိုက်တယ်။ ဆုတ်ရင် လိုက်တိုက်ရင်း စခန်းတွေရတယ်။ အခုလည်း ကျွန်တော်တို့ ကြားရသလောက် စစ်တပ်က အကျအဆုံးများပြီး ဆုတ်လာတော့ AA က နောက်ကကပ်ပြီး လိုက်လာတာ။ သဲဖြူရွာ အနီးတစ်ဝိုက်တောင် ရောက်ခဲ့တယ်လို့ သိရတယ်” ဟု ပြောသည်။   တိုက်ပွဲများအတွင်း စစ်အုပ်စုတပ်ဘက်မှ လက်နက်ကြီးများကို အလွန်အကျွံ အသုံးပြု ပစ်ခတ်နေသဖြင့် တိုက်ပွဲနယ်မြေနှင့် နီးစပ်သည့် ကျေးရွာများမှ ဒေသခံပြည်သူ အများအပြားမှာ လုံခြုံရာ ဘေးလွတ်ရာနေရာ များသို့ တိမ်းရှောင်နေကြရသည်။   လက်ရှိအခြေအနေတွင် သာပေါင်းနှင့် ရေကြည်မြို့နယ် နယ်စပ်တောင်တန်း ဒေသများ၌ နှစ်ဖက်စစ်ရေး ဆက် လက် တင်းမာနေဆဲဖြစ်ပြီး ဒေသတွင်း သွားလာရေး လမ်းကြောင်းများကိုလည်း စစ်အုပ်စုတပ်က စစ်ဆေးမှုများ တင်းကျပ်ထားသည်။   စစ်အုပ်စုတပ်သည် သာပေါင်းနှင့် ရေကြည်မြို့နယ်များမှတစ်ဆင့် ရခိုင်ပြည်၊ ဂွမြို့နယ်အစပ်သို့ စစ်အင်အား ဖြန့်ကျက်နိုင်ရန်အတွက် အင်အား ၅၀၀ မှ ၇၀၀ အထိ ပေးပို့ဖြည့်တင်းကာ ထိုးစစ်ဆင်နေခြင်း ဖြစ်သည်။   အဆိုပါဒေသတွင် AA က စစ်အုပ်စုတပ်၏ ပွိုင့်စခန်းကုန်းများနှင့် ကာကင်းစခန်းများကို သိမ်းယူခဲ့ပြီး ရေကြည် မြို့နယ် ရုံးပင်ကျေးရွာနှင့် သာပေါင်းမြို့နယ် သာပေါင်းလေးကျေးရွာတို့တွင် တိုက်ပွဲများ ဖော်ဆောင်ခဲ့ရာ စစ် အုပ်စု တပ်ဖွဲ့ဝင်များ ကစဉ့်ကလျား ထွက်ပြေးခဲ့ရပြီး စစ်အုပ်စုတပ်ဖွဲ့ဝင်များ၏ ရုပ်အလောင်းများနှင့် လက်နက် ခဲယမ်းများကို AA ဘက်မှ သိမ်းဆည်းရမိခဲ့သည်။   ဓါတ်ပုံ - MOI   #ဧရာဝတီတိုင်းတိုက်ပွဲ #AA

ဧရာဝတီတိုင်းအတွင်း AA နှင့် တိုက်ပွဲများ ပြန်ဖြစ်ပြီး စစ်တပ် အထိနာ

ဧရာဝတီတိုင်းအတွင်း AA နှင့် တိုက်ပွဲများ ပြန်ဖြစ်ပြီး စစ်တပ် အထိနာ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၁၄ ရက်။ ဧရာဝတီတိုင်းအတွင်းရှိ သ…

  • August 14, 2026
×Close