သတင်း

ဗန်းမော်၌ စစ်သင်္ဘောများ ထပ်မံတိုက်ခိုက်ခံရပြီး ၂ ရက်အတွင်း ၅ စီးထက်မနည်း နစ်မြုပ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၄ ရက်။ ကချင်ပြည်၊ ဗန်းမော်မြို့မှ ဧရာဝတီမြစ်အတိုင်း ပြန်လည်စုန်ဆင်းလာသည့် စစ်အုပ်စုတပ်၏ စစ်သင်္ဘော ရေ ယာဉ်စုကို ကချင်လွတ်လပ်ရေးတပ်မတော် (KIA) နှင့် ပူးပေါင်းတပ်များက ကြားဖြတ်တိုက်ခိုက်ခဲ့ရာ စက်တင် ဘာလ ၁၃ ရက်နှင့် ၁၄ ရက်အတွင်း စစ်သင်္ဘော ၅ စီးထက်မနည်း ထပ်မံ နစ်မြုပ် မီးလောင်ပျက်စီးသွားခဲ့သည်။ ပြီးခဲ့သည့် စက်တင်ဘာလ ၁၃ ရက်နေ့တွင် ဗန်းမော်မြို့မှ စုန်ဆင်းလာသည့် စစ်အုပ်စု စစ်သင်္ဘော ၆ စီးကို စင်းခန်း၊ ဇင်းဘုံ၊ စာဝတီနှင့် မြလယ်ကျေးရွာ ဝန်းကျင်တို့၌ KIA ပူးပေါင်းတပ်များက စောင့်ကြိုတိုက်ခိုက်ခဲ့ရာ သင်္ဘော ၄ စီး နစ်မြုပ်ပြီး ညနေပိုင်းအထိ ရေယာဉ်အချို့ မီးလောင်ခဲ့သည်။ ထို့ပြင် စက်တင်ဘာလ ၁၄ ရက် ယနေ့နံနက်ပိုင်းတွင်လည်း တိုက်ခိုက်ခံရ၍ စက်ပျက်မျောလာသည့် တခြား စစ်သင်္ဘော ၁ စီးပါ ထပ်မံ ထိမှန်နစ်မြုပ်သွားခဲ့ခြင်း ဖြစ်သည်။ ကချင်စစ်ရေး သတင်းရင်းမြစ်တစ်ဦးက “မနေ့က တိုက်ခိုက်ခံရလို့ စက်ပျက်ပြီး မျောလာတဲ့ သင်္ဘောတစ်စီး ဟာ ဒီနေ့ စက်တင်ဘာလ ၁၄ ရက် မနက်မှာ ထပ်မံ ထိမှန်ပြီး မီးလောင်သွားတယ်။ ပြီးတော့ ရေထဲကို နစ်ဝင်သွားတာ ဖြစ်ပါတယ်။ စင်းခန်းနားမှာလည်း တိုက်ပွဲက နေ့တိုင်းရှိတယ်” ဟု ပြောသည်။ စစ်အုပ်စုတပ်သည် မြို့သိမ်းတိုက်ပွဲများနှင့် ရင်ဆိုင်နေရသည့် ဗန်းမော်မြို့သို့ စစ်ကူ၊ လက်နက်ခဲယမ်းနှင့် ရိက္ခ ာများ ဖြည့်တင်းရန် မန္တလေး ဂေါဝိန်ဆိပ်ကမ်းမှတစ်ဆင့် ရေယာဉ်စုကို ဩဂုတ်လ နောက်ဆုံးပတ်တွင် ၁၅ စီး၊ စက်တင်ဘာလ ဒုတိယပတ်တွင် ၆ စီး စုစုပေါင်း ၂ ကြိမ် စေလွှတ်ခဲ့ခြင်းဖြစ်သည်။ အခြား စစ်ရေးသတင်းရင်းမြစ်တစ်ဦးကလည်း “ဗန်းမော်အောက် လက်ပံတန်းရွာအနီးမှာ တိုက်ခိုက်ခံရလို့ မီးလောင်နေတဲ့ စစ်တပ်သင်္ဘောရဲ့ ရုပ်သံမှတ်တမ်းတွေလည်း ရှိပါတယ်။ စစ်တပ်က အရပ်သား သင်္ဘောတွေ ကိုပါ ချောဆွဲပြီး စစ်ကူနဲ့ လက်နက်ခဲယမ်း ရိက္ခာတွေ သယ်ခိုင်းခဲ့တာမို့ ပျက်စီးသွားတဲ့ အထဲမှာ အရပ်သား ရေယာဉ်တချို့လည်း ပါဝင်နေပါတယ်” ဟု ပြောသည်။ သို့သော် ဩဂုတ်လ ၂၇ ရက်မှ စက်တင်ဘာလ ၁၄ ရက်နေ့အထိ ဗန်းမော်-ရွှေကူ မြစ်ကြောင်းတစ်လျှောက် KIA ပူးပေါင်းတပ်များ၏ ပိတ်ဆို့ ကြားဖြတ်တိုက်ခိုက်မှုများကြောင့် စစ်အုပ်စုတပ်၏ စစ်သင်္ဘော၊ တွန်းသင်္ဘောနှင့် သံခွန်သင်္ဘော စုစုပေါင်း ၂၀ စီးထက်မနည်း နစ်မြုပ်ပျက်စီးခဲ့သည်ဟု မြေပြင်သတင်းရင်းအချို့က ပြောသည်။ ထိုကဲ့သို့ ရေကြောင်း တိုက်ခိုက်ခံရမှုများအတွင်း စစ်အုပ်စုတပ်ဖွဲ့ဝင်များ သေဆုံး ထိခိုက်မှု များပြားခဲ့သည့် အပြင် ရေထဲသို့ ခုန်ချမျောပါသွားသူများ၊ လက်နက်ချ ဖမ်းဆီးခံရသူများလည်း ရှိခဲ့သည်။ KIO/KIA ၏ ထုတ်ပြန်ချက်အရ စက်တင်ဘာလ ၂ ရက်နေ့ ရေကြောင်းတိုက်ပွဲတစ်ခုတည်း၌ပင် စစ်အုပ်စုတပ် ဘက်မှ ဗိုလ်ကြီး ၂ ဦး အပါအဝင် တပ်ဖွဲ့ဝင် ၁၁၈ ဦးနှင့် မိသားစုဝင်၊ အရပ်သားများအပါအဝင် စုစုပေါင်း ၁၅၀ ကျော် လက်နက်ချခဲ့သည်။ မြစ်ကြောင်းအတွင်း ရေယာဉ်စုများ ဆက်တိုက် တိုက်ခိုက်ခံနေရသဖြင့် စစ်အုပ်စုတပ်က ရွှေကူ၊ စင်းခန်းနှင့် ဗန်းမော် မြစ်ကြောင်းတစ်လျှောက်ရှိ ကျေးရွာများကို လေကြောင်းမှ အဆက်မပြတ် ဗုံးကြဲတိုက်ခိုက်လျက်ရှိရာ စာဝတီနှင့် ကောင်းတုံကျေးရွာတို့တွင် လူနေအိမ်များ မီးလောင် ပျက်စီးခဲ့ရသည်။ လက်ရှိတွင် ဗန်းမော်မြို့နယ် စင်းခန်းဒေသနှင့် မြစ်ကြောင်း ဝန်းကျင်၌ KIA ပူးပေါင်းတပ်များနှင့် စစ်အုပ်စုတပ် တို့အကြား မြေပြင်တိုက်ပွဲများ ပြင်းထန်လျက်ရှိသည်။ ဓာတ်ပုံ - (ဗန်းမော်-ရွှေကူ မြစ်ကြောင်းအတွင်း တိုက်ခိုက်ခံရ၍ မီးလောင်နေသည့် စစ်အုပ်စုတပ်၏ စစ်သင်္ဘောတစ်စီး / Crd) #ဗန်းမော် #ကချင်ပြည်

ဗန်းမော်၌ စစ်သင်္ဘောများ ထပ်မံတိုက်ခိုက်ခံရပြီး ၂ ရက်အတွင်း ၅ စီးထက်မနည်း နစ်မြုပ်

ဗန်းမော်၌ စစ်သင်္ဘောများ ထပ်မံတိုက်ခိုက်ခံရပြီး ၂ ရက်အတွင်း ၅ စီးထက်မနည်း နစ်မြုပ် သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၄ ရက်။ ကချင…

  • September 14, 2026
ရခိုင်၌ စစ်တပ်၏ လေကြောင်းတိုက်ခိုက်မှုကြောင့် ၅ ရက်အတွင်း အရပ်သား ၇ ဦး သေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၄ ရက်။ ရခိုင်ပြည်အတွင်း စစ်ရေးပစ်မှတ် မဟုတ်သည့် အရပ်သားပြည်သူများ နေထိုင်ရာ မြို့၊ ကျေးရွာများနှင့် သမိုင်း ဝင် ဘုန်းကြီးကျောင်းများကို စစ်အုပ်စုတပ်က လေကြောင်းမှ ဗုံးကြဲတိုက်ခိုက်ခဲ့ရာ ၅ ရက်အတွင်း အပြစ်မဲ့ အရပ်သား ၇ ဦး သေဆုံးသွားကြောင်း အာရက္ခတပ်တော် (AA) က စက်တင်ဘာလ ၁၄ ရက်နေ့တွင် သတင်း ထုတ်ပြန်သည်။ စစ်အုပ်စုတပ်သည် စက်တင်ဘာလ ၁၀ ရက်မှ ၁၃ ရက်အထိ ဂျက်တိုက်လေယာဉ်များနှင့် အသေခံဒရုန်းများ (Suicide Drones) အသုံးပြုကာ ဆက်တိုက် ဗုံးကြဲတိုက်ခိုက်ခဲ့ခြင်းဖြစ်သည်။ အဆိုပါ တိုက်ခိုက်မှုများကြောင့် အရပ်သားပြည်သူများ သေဆုံး၊ ဒဏ်ရာရရှိခဲ့သည့်အပြင် နေအိမ်၊ ဈေးဆိုင်များ နှင့် ဘာသာရေး အဆောက်အအုံများပါ ပျက်စီးဆုံးရှုံးခဲ့ရသည်။ ရခိုင်ပြည်မြောက်ပိုင်း ဒေသခံတစ်ဦးက “ရခိုင်ပြည်ကို မြောက်ပိုင်း၊ တောင်ပိုင်းအပြင် ပလက်ဝကိုပါ ဗုံးကြဲနေ တာပါ။ ပြည်သူတွေ ဘယ်လိုနေရမလဲ ဗုံးခိုကျင်းထဲက မထွက်ရပါဘူး။ ဘုရားပုထိုးတွေ ပျက်စီးတယ်။ စား ဝတ်နေရေး အဆင်မပြေဖြစ်တယ်။ ဆေးကုသတာမှာ ဆေးဝါးလိုအပ်ချက်တွေရှိတယ်။ ဒီလိုအခက်အခဲတွေ ကြားမှာ ရခိုင်လူထု အသက်ရှင်ဖို့ပါ ခက်ခဲလာတယ်၊ မိသားစုတွေ တကွဲတပြားနဲ့ ဒုက္ခတွေလည်း များပါတယ်” ဟု ပြောသည်။ စက်တင်ဘာလ ၁၃ ရက်နေ့ မွန်းလွဲ ၁၂ နာရီ ၅၆ မိနစ်ခန့်တွင် ပုဏ္ဏားကျွန်းမြို့၊ သမိုင်းဝင် ဦးရာဇ်တော်ဘုရား တည်ရှိရာ တောင်ခြေရင်း ကြိုးတံတားအနီး ဝန်းကျင်ကို စစ်အုပ်စုတပ်က ဂျက်တိုက်လေယာဉ်ဖြင့် ၃ ကြိမ်တိုင် ဗုံးကြဲခဲ့သည့်အပြင် စက်သေနတ်ဖြင့်ပါ ပစ်ခတ်တိုက်ခိုက်ခဲ့သည်။ အဆိုပါ ဖြစ်စဉ်ကြောင့် ပုဏ္ဏားကျွန်းမြို့နယ် စေတီရင်းကျေးရွာမှ ဒေါ်စိုးစိုး မှာ မျက်နှာတွင် ဗုံးစထိမှန်ကာ သေဆုံးခဲ့ပြီး မဖြူဖွေး (၉ နှစ်) နှင့် ဒေါ်ကျော့စိန် (၇၁ နှစ်) တို့ ထိခိုက်ဒဏ်ရာ ရရှိခဲ့သည်။ ထို့ပြင် ပုဏ္ဏားကျွန်းမြို့သို့ အလည်ရောက်ရှိနေသည့် ရသေ့တောင်မြို့မှ ဦးမိုးမိုး နှင့် ဦးအောင်ဝင်းမောင်တို့လည်း ဒဏ်ရာရရှိခဲ့ကာ ဦးမိုးမိုးမှာ ပြင်းထန်ဒဏ်ရာဖြင့် သေဆုံးသွားခဲ့သည်။ ပြီးခဲ့သည့် စက်တင်ဘာလ ၄ ရက်နေ့ကလည်း ပုဏ္ဏားကျွန်းမြို့နယ်ရှိ သမိုင်းဝင် ဂူဝဘုရားကို စစ်အုပ်စုတပ်က လေကြောင်းမှ ဗုံးကြဲခဲ့သဖြင့် ဘုရားဆင်းတုတော်များ ပျက်စီးခဲ့ရသေးသည်။ စက်တင်ဘာလ ၁၁ ရက်နေ့ ညသန်းခေါင် ၁၂ နာရီ ၃၆ မိနစ်ခန့်တွင် ပုဏ္ဏားကျွန်းမြို့နယ် ကျောက်ဆိပ်ကျေးရွာ ဘုန်းကြီးကျောင်းကို စစ်အုပ်စုတပ်က အသေခံဒရုန်းဖြင့် ဗုံးခွဲတိုက်ခိုက်ခဲ့ရာ စစ်ဘေးရှောင် သားအမိနှစ်ဦး ဖြစ်သည့် ဒေါ်လှသန်းယဉ်နှင့် သမီးဖြစ်သူ ဦးသန်းခင်တို့ ဗုံးစထိမှန်ခဲ့ပြီး ဒေါ်လှသန်းယဉ်မှာ ဒဏ်ရာပြင်းထန် သဖြင့် ဆေးကုသမှု ခံယူနေစဉ် သေဆုံးသွားခဲ့သည်။ ထို့ပြင် စက်တင်ဘာလ ၁၁ ရက်နေ့ ညနေ ၄ နာရီခန့်တွင် တောင်ကုတ်မြို့နယ် ရွာသစ်ကေကျေးရွာကို လေယာဉ် ၂ စီးဖြင့် ဗုံးကြဲခဲ့ရာ ဦးတင်မောင် (၅၉ နှစ်) မှာ ဦးခေါင်းကို ဗုံးစထိမှန်၍ နေရာတွင်ပင် ပွဲချင်းပြီး သေဆုံးခဲ့ပြီး ဦးမြင့်ရွှေ (၆၇ နှစ်) ဒဏ်ရာရရှိကာ နေအိမ် ၂ လုံးလည်း ပျက်စီးသွားသည်။ စက်တင်ဘာလ ၁၀ ရက်နေ့ ည ၉ နာရီ ၄၅ မိနစ်ခန့်ကလည်း ဂွမြို့နယ်၊ ကျိန္တလီမြို့ အမှတ် (၁) နှင့် (၂) ရပ်ကွက်သို့ ဂျက်တိုက်လေယာဉ်ဖြင့် ဗုံးသီး ၂ လုံး ကြဲချခဲ့သဖြင့် အမှတ် (၁) ရပ်ကွက်မှ ဦးကျော်ခင် (၈၅ နှစ်) မှာ နေရာတွင် ပွဲချင်းပြီး သေဆုံးခဲ့ကာ အမှတ် (၂) ရပ်ကွက်မှ ဦးချစ်ဆန်းမောင် (၅၅ နှစ်) ဒဏ်ရာရရှိခဲ့ပြီး နေအိမ် ၉ လုံး ပျက်စီးခဲ့ရသည်။ စက်တင်ဘာလ ၁၂ ရက်နေ့ ညနေ ၄ နာရီ ၁၅ မိနစ်ခန့်တွင်လည်း ချင်းပြည် (ရခိုင်ဒေသစပ်) ဆမီးမြို့နယ်၊ ဘွေလီ ကျေးရွာအနီးကို ဂျက်တိုက်လေယာဉ်ဖြင့် ဗုံးကြဲခဲ့သဖြင့် အရပ်သားများ၏ နေအိမ်၊ ဈေးဆိုင်များနှင့် မော်တော် ယာဉ် ၁ စီး ထိခိုက်ပျက်စီးခဲ့ရသည်။ စစ်အုပ်စုတပ်သည် အာရက္ခဒေသအတွင်း စစ်ရေးပစ်မှတ် မဟုတ်သော အပြစ်မဲ့ အရပ်သားပြည်သူများ နေထိုင် ရာ နေရာများကို နေ့စဉ်နှင့်အမျှ ဗုံးကြဲတိုက်ခိုက်နေသဖြင့် အရပ်သား ထိခိုက်သေဆုံးမှုနှင့် အဆောက်အအုံ ပျက်စီးဆုံးရှုံးမှုများ မြင့်တက်လျက်ရှိသည်။ ဓာတ်ပုံ - (လေကြောင်းဗုံးကြဲမှုကြောင့် ထိခိုက်ပျက်စီးမှုများ / AA) #AA #ရခိုင်

ရခိုင်၌ စစ်တပ်၏ လေကြောင်းတိုက်ခိုက်မှုကြောင့် ၅ ရက်အတွင်း အရပ်သား ၇ ဦး သေဆုံး

ရခိုင်၌ စစ်တပ်၏ လေကြောင်းတိုက်ခိုက်မှုကြောင့် ၅ ရက်အတွင်း အရပ်သား ၇ ဦး သေဆုံး သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၄ ရက်။ ရခိုင်ပြည…

  • September 14, 2026
ရခိုင်တောင်ပိုင်း စစ်ဘေးရှောင်များအတွက် အခြေခံ စားနပ်ရိက္ခာ အရေးပေါ် လိုအပ်နေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၄ ရက်။ ရခိုင်ပြည် တောင်ပိုင်း၊ ကျောက်ဖြူခရိုင်အတွင်းက စစ်ဘေးရှောင် ပြည်သူများအတွက် အခြေခံ စားနပ်ရိက္ခာနှင့် အသုံးအဆောင်များ အရေးပေါ် အကူအညီ လိုအပ်နေကြောင်း ‘ဇင်ချောင်း လူငယ်ပရဟိတအသင်း’ တာဝန်ရှိသူက ပြောသည်။ ကျောက်ဖြူမြို့နယ်နှင့် ရမ်းဗြဲမြို့နယ်တို့တွင် စုစုပေါင်း စစ်ဘေးရှောင် ဦးရေ ၃ သောင်းကျော် ရောက်ရှိ ခိုလှုံ လျက်ရှိရာ ၎င်းတို့အနက် အရေးပေါ် ကူညီစောင့်ရှောက်ရန် လိုအပ်နေသည့် စစ်ဘေးရှောင် ဦးရေ ၅,၁၀၀ အတွက် အခြေခံ စားနပ်ရိက္ခာများ ပိုမို အခက်အခဲ ဖြစ်ပေါ်နေခြင်းဖြစ်သည်။ ဇင်ချောင်း လူငယ်ပရဟိတအသင်း တာဝန်ရှိသူတစ်ဦးက “လိုအပ်တာက အစုံပါ ဒါပေမဲ့ စားနပ်ရိက္ခာက နေ့ တိုင်းစားနေရတာ ဆိုတော့လေ လိုအပ်တာက ဆေးဝါး၊ အသုံးအဆောင်၊ စားနပ်ရိက္ခာ အစုံပါ။ ပညာရေး အတွက် ကျောင်းသုံးပစ္စည်း စစ်ရှောင်က တခြားမြို့နယ်ထဲမှာလည်း ရှိပါတယ်။ ကျောက်ဖြူထဲ သုံးသောင်း ကျော်ပါ” ဟု ပြောသည်။ အဆိုပါ စစ်ဘေးရှောင် ဦးရေ ၅,၁၀၀ အတွက် ၁ လစာ ဆန်တောင်းရေ ၁၀,၂၀၀ အရေးပေါ် လိုအပ်လျက်ရှိရာ ဒေသတွင်း လက်ရှိ ပေါက်ဈေး ဆန် ၁ တောင်းလျှင် ငွေကျပ် ၁၆,၀၀၀ နှုန်းဖြင့် တွက်ချက်ပါက ၁ လစာ ဆန်ဖိုး ကုန်ကျစရိတ်မှာ ငွေကျပ် ၁,၆၃၂ သိန်း (ကျပ် ၁၆၃,၂၀၀,၀၀၀) အထိ ရှိနေသည်။ လက်ရှိတွင် ကျောက်ဖြူ-စနဲ-ရမ်းဗြဲ လမ်းပိုင်း၌ စစ်အုပ်စုတပ်နှင့် အာရက္ခတပ်တော် (AA) တို့အကြား တိုက်ပွဲ များ ဆက်လက်ဖြစ်ပွားနေပြီး လမ်းပန်းဆက်သွယ်ရေး ခက်ခဲခြင်းကြောင့် ရိက္ခာများ ပြတ်တောက်လျက်ရှိ သည်။ တိုက်ပွဲများနှင့် လေကြောင်းမှ ဗုံးကြဲတိုက်ခိုက်မှု အန္တရာယ်များကြောင့် ကျောက်ဖြူခရိုင်ရှိ ကျေးရွာများမှ စွန့်ခွာ ကာ နီးစပ်ရာ ဘုန်းတော်ကြီးကျောင်းများ၊ တောတောင်များနှင့် ယာယီစစ်ဘေးရှောင် စခန်းများတွင် ခိုလှုံနေကြ ရခြင်း ဖြစ်သည်။ ကုန်းလမ်း၊ ရေလမ်း သွားလာခွင့်များနှင့် ကုန်စည်ကူးသန်းမှုများ ပိတ်ဆို့ခံထားရသဖြင့် ဆန်၊ ဆီ အပါအဝင် အခြေခံ စားသောက်ကုန်များ ဈေးနှုန်း အဆမတန် မြင့်တက်နေပြီး စားနပ်ရိက္ခာ ပြတ်လပ်မှုနှင့် ရင်ဆိုင်နေရ သည်။ ထို့ပြင် ဆေးဝါးများ တင်သွင်းရန် ခက်ခဲခြင်းနှင့် ကျန်းမာရေးဝန်ထမ်း နည်းပါးခြင်းတို့ကြောင့် ကလေးသူငယ် များ၊ သက်ကြီးရွယ်အိုများနှင့် မီးဖွားခါနီး မိခင်များ ကျန်းမာရေးစောင့်ရှောက်မှု လုံလောက်စွာ မရရှိဘဲ အခက် အခဲ ဖြစ်နေကြရသည်။ ဒေသတွင်း လူမှုကူညီရေး အသင်းအဖွဲ့များက တတ်နိုင်သမျှ ကူညီထောက်ပံ့ပေးနေသော်လည်း လမ်းကြောင်း ပိတ်ဆို့မှုများနှင့် ကန့်သတ်ချက်များကြောင့် ထောက်ပံ့မှုမှာ လိုအပ်ချက်ထက် များစွာ လျော့နည်းနေသဖြင့် အမျိုးသားရေး စာနာထောက်ထားမှုဖြင့် ဝိုင်းဝန်း လှူဒါန်းပေးကြရန် ဇင်ချောင်း လူငယ်ပရဟိတအသင်းက မေတ္တာရပ်ခံ တောင်းဆိုထားသည်။ ဓာတ်ပုံ - (ကျောက်ဖြူခရိုင်အတွင်းက စစ်ဘေးရှောင် ပြည်သူအချို့ / ဇင်ချောင်း လူငယ်ပရဟိတအသင်း) #ကျောက်ဖြူခရိုင်

ရခိုင်တောင်ပိုင်း စစ်ဘေးရှောင်များအတွက် အခြေခံ စားနပ်ရိက္ခာ အရေးပေါ် လိုအပ်နေ

ရခိုင်တောင်ပိုင်း စစ်ဘေးရှောင်များအတွက် အခြေခံ စားနပ်ရိက္ခာ အရေးပေါ် လိုအပ်နေ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၄ ရက်။ ရခိုင်ပြည…

  • September 14, 2026
စစ်ကိုင်းတိုင်း အင်းတော်အနီး ဂိတ်သစ်ဖွင့်၍ လမ်းကြေးကောက်ခံသဖြင့် ယာဉ်မောင်းများ အခက်ကြုံနေရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၄ ရက်။ မြစ်ကြီးနား-မန္တလေး လမ်းပိုင်း၊ ကွင်းလမ်းတစ်နေရာတွင် ကချင်လွတ်လပ်ရေး တပ်မတော် (KIA) နှင့် KPDF ပူးပေါင်းအဖွဲ့တို့က ဂိတ်အသစ်ဖွင့်လှစ်ပြီး လမ်းကြေး ကောက်ခံနေသဖြင့် ဂိတ်ကြေး အများအပြား ပေးဆောင် နေရကြောင်း ဒေသတွင်း ယာဉ်မောင်းအချို့က ပြောသည်။ စစ်ကိုင်းတိုင်း၊ အင်းတော်မြို့နယ်၊ မဲဇာကျေးရွာအနီးရှိ ကျောက်တန်း ကွင်းလမ်းပိုင်းမှ ဖြတ်သန်းသွားလာနေ သည့် ယာဉ်များကို စက်တင်ဘာလ ၁၄ ရက်နေ့မှစ၍ ဂိတ်ကြေး စတင်ကောက်ခံနေခြင်း ဖြစ်သည်။ ဒေသတွင်း ယာဉ်မောင်းတစ်ဦးက “ကားတိုင်း ပေးရတယ်။ ကိုယ်ပိုင်ကားလည်း မရဘူးဗျာ။ တောင်းတာတော့ ကုန်ပေါ်မူတည်တယ်။ တစ်ခါနဲ့ တစ်ခါ မတူဘူးပေါ့နော်။ အိမ်စီးကားကတော့ တိတိကျကျ သတ်မှတ်ထား တယ်။ ကျန်တာက အခြေအနေအရပဲ။ ကွင်းလမ်းက ခက်ခက်ခဲခဲ သွားနေရတဲ့ ကားသမားတွေ သူတို့မို့ တောင်း ရက်တာ” ဟု ပြောသည်။ ဂိတ်ကြေး ကောက်ခံရာတွင် ကုန်ကားနှင့် တွဲကားများအနေဖြင့် ကုန်ပစ္စည်း မပါပါက ငွေကျပ် ၂ သိန်း၊ ကုန်ပါ ပါက ပစ္စည်းအမျိုးအစားပေါ် မူတည်၍ အများဆုံး ငွေကျပ် ၇ သိန်းအထိ ပေးဆောင်ရပြီး ခရီးသည်တင်ကား ငွေကျပ် ၁ သိန်းနှင့် အိမ်စီးကား ငွေကျပ် ၁ သောင်းနှုန်းဖြင့် အသီးသီး ကောက်ခံနေကြသည်ဟု ဆိုသည်။ မြစ်ကြီးနား-မန္တလေး လမ်းပိုင်းမှာ ရာနှုန်းပြည့် သွားလာခွင့် မရသေးသဖြင့် ယာဉ်များမှာ ကွင်းလမ်းမှ ခက်ခက် ခဲခဲ ဖြတ်သန်းကာ ဇက်ဆိပ်မှတစ်ဆင့် ကမ်းကူးနေရချိန် ယခုကဲ့သို့ ဂိတ်အသစ် တိုးလာသဖြင့် ကုန်ကျစရိတ်များ ပိုမိုများပြားလာသည်။ မန္တလေး-မြစ်ကြီးနား လမ်းပိုင်းတစ်လျှောက်တွင် စစ်အုပ်စုတပ်နှင့် တော်လှန်ရေးတပ်ဖွဲ့များ၏ စစ်ဆေးရေးဂိတ် အများအပြား ရှိနေပြီး အိမ်စီးကားများအနေဖြင့် ငွေကျပ် သိန်းဆယ်ချီ၊ ကုန်ကားများအနေဖြင့် ငွေကျပ် သိန်းရာ ချီအထိ ပေးဆောင်နေရကြောင်းလည်း ဆိုကြသည်။ အဆိုပါ လမ်းပိုင်းတွင် သွားလာခဲ့ဖူးသူ ခရီးသည်တစ်ဦးက “ကုန်ကားတွေဆို ကူးလို့မရဘူး။ ကြာပြီ။ လချီပြီ လမ်းမှာ အိပ်နေရတာ။ လမ်းပေါ်မှာ ဝယ်စား၊ ဝယ်သောက်ကြတာလည်း မနည်းဘူး။ ကုန်တယ်။ ဈေးကြီး တယ်လေ။ ဖြတ်မရတဲ့ကြားထဲ လမ်းကြေးပါ ပေးနေရတာ” ဟု ပြောသည်။ မန္တလေး-မြစ်ကြီးနား လမ်းပိုင်း နေရာအများစုကို စစ်အုပ်စုက ထိန်းချုပ်ထားသော်လည်း အချို့နေရာများတွင် နှစ်ဖက်တပ်များ နေရာယူထားသဖြင့် မြေပြင်အခြေအနေ တင်းမာနေဆဲဖြစ်သည်။ ထို့ကြောင့် ယာဉ်များမှာ ကွင်းလမ်းများမှ သွားလာနေရပြီး ကမ်းမကူးနိုင်သေးသည့် ကုန်တင်ယာဉ်များမှာ လမ်း တွင် ပိတ်မိနေသည်မှာ ၅ ပတ်ထက်မနည်း ကြာမြင့်နေပြီဖြစ်သည်။ ယာဉ်မောင်းများအနေဖြင့် လမ်းကြေး ပေးဆောင်ရသည့် အခက်အခဲများအပြင် မိုးရာသီ လမ်းပျက်စီးမှုကြောင့် အချို့လမ်းပိုင်းများ၌ ဆင်များဖြင့် ကားများကို ဆွဲယူနေရသဖြင့် သေရေးရှင်ရေး ကိစ္စမှလွဲ၍ ခရီးသွားလာခြင်း မပြုကြရန် သတိပေးထားသည်။ ဓာတ်ပုံ - (မန္တလေး-မြစ်ကြီးနား လမ်းပိုင်း တစ်နေရာ၌ တွေ့ရသည့် မော်တော်ယာဉ်များ / Crd) #စစ်ကိုင်းတိုင်း

စစ်ကိုင်းတိုင်း အင်းတော်အနီး ဂိတ်သစ်ဖွင့်၍ လမ်းကြေးကောက်ခံသဖြင့် ယာဉ်မောင်းများ အခက်ကြုံနေရ

စစ်ကိုင်းတိုင်း အင်းတော်အနီး ဂိတ်သစ်ဖွင့်၍ လမ်းကြေးကောက်ခံသဖြင့် ယာဉ်မောင်းများ အခက်ကြုံနေရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၄ ရက်…

  • September 14, 2026
ရခိုင်ပြည် ပုဏ္ဏားကျွန်း သမိုင်းဝင်စေတီအနီး စစ်အုပ်စု ဗုံးကြဲ၍ အရပ်သား ၂ ဦး သေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၄ ရက်။ ရခိုင်ပြည်၊ ပုဏ္ဏားကျွန်းမြို့ရှိ သမိုင်းဝင် ဦးရာဇ်တောင်စေတီတော်အနီးသို့ စစ်အုပ်စုက လေကြောင်းမှ ဗုံး ၂ လုံး ကြဲချတိုက်ခိုက်ခဲ့သဖြင့် အပြစ်မဲ့ အရပ်သားပြည်သူ ဦး ရေ ၂ ဦး သေဆုံးပြီး ၃ ဦး ထိခိုက်ဒဏ်ရာ ရရှိခဲ့သည်ဟု ဒေသခံများက ပြောသည်။ စက်တင်ဘာလ ၁၃ ရက်နေ့၊ မွန်းတည့် ၁၂ နာရီခန့်တွင် စစ်အုပ်စုက ကြဲချခဲ့သည့် ဗုံးသီးများသည် စေတီရင်း ကျေးရွာဘက်ကမ်းရှိ ဦးရာဇ်တောင်တံတား ချောင်းကမ်းစပ်နှင့် ချောင်းအတွင်းသို့ ကျရောက်ပေါက်ကွဲခဲ့ခြင်း ဖြစ်ပြီး သမိုင်းဝင် ဦးရာဇ်တောင် စေတီတော်ကြီးကိုမူ ထိမှန်ပျက်စီးခဲ့ခြင်း မရှိပေ။ ဒေသခံ ပရဟိတသမားတစ်ဦးက “ဦးရာဇ်တောင်တံတား ချောင်းကမ်းစပ်အနား ဗုံးကျတာလို့ သိရပါတယ်။ အစကတော့ စေတီတော်ထိတယ်လို့ ကြားပေမယ့် နောက်တော့မထိဘူးလို့ သိရတယ်။ စေတီရင်းကျေးရွာ အမျိုးသမီး တစ်ယောက်နဲ့ ရသေ့တောင်က အမျိုးသား တစ်ယောက်သေတယ်။ ပုဏ္ဏားကျွန်းကို စစ်တပ်က ပြန်လိုချင်နေတော့ ဗုံးကြဲတာတွေလည်း လုပ်နေပါတယ်။ မြေပြင်မှာလည်း တိုက်ပွဲ ရက်ဆက်ရှိနေတယ်” ဟု ပြောသည်။ အဆိုပါ လေကြောင်းတိုက်ခိုက်မှုကြောင့် ပုဏ္ဏားကျွန်းမြို့နယ်၊ စေတီရင်းကျေးရွာမှ အသက် ၃၇ နှစ်အရွယ် ဒေါ်စိုးစိုး နှင့် ရသေ့တောင်မြို့နယ်၊ လေးကန်ကျေးရွာမှ ဦးစိုးစိုး တို့မှာ ဗုံးစထိမှန်ကာ နေရာတွင်ပင် သေဆုံးခဲ့ကြ သည်။ ထို့ပြင် စေတီရင်းကျေးရွာမှ အသက် ၇၁ နှစ်အရွယ် ဒေါ်ဦးကျော့စိန်၊ အသက် ၉ နှစ်အရွယ် မဖြူထွေးနှင့် ရသေ့ တောင်မြို့၊ အရှေ့မြောက်ရပ်ကွက်မှ ဦးအောင်ဝင်းမောင် တို့တွင်လည်း ဗုံးစထိမှန်၍ ဒဏ်ရာများ ရရှိခဲ့ကြသည်။ ထိုနေ့ ည ၁၂ နာရီကျော်တွင်လည်း ပုဏ္ဏားကျွန်း-ကျောက်တော် မြို့နယ်အစပ် နေရာအချို့ကို စစ်အုပ်စုက လေကြောင်းမှ ထပ်မံ ဗုံးကြဲခဲ့သဖြင့် ဒေသခံအချို့မှာ ဘေးလွတ်ရာသို့ တိမ်းရှောင်ခဲ့ကြရသည်။ ပြီးခဲ့သည့် စက်တင်ဘာလ ၄ ရက် ည ၁၀ နာရီဝန်းကျင်ကလည်း ပုဏ္ဏားကျွန်းမြို့နယ်ရှိ သမိုင်းဝင် ဂူဝဘုရားကို စစ်အုပ်စုက ဗုံးကြဲတိုက်ခိုက်ခဲ့သဖြင့် ဘုရားဝင်းအတွင်းရှိ အဆောက်အအုံများ၊ ဂူဝဘုရားပေါ်ရှိ ရဟန္တာ ၅၀၀ ရုပ်ဆင်းတုတော်များနှင့် ရှေးဟောင်းလက်ရာအချို့ ထိခိုက်ပျက်စီးခဲ့သေးသည်။ လက်ရှိတွင် စစ်အုပ်စုတပ်နှင့် အာရက္ခတပ်တော် (AA) တို့အကြား စစ်တွေ-ပုဏ္ဏားကျွန်း နယ်စပ်တစ်လျှောက် တွင် တိုက်ပွဲများ ပြင်းထန်စွာ ဖြစ်ပွားလျက်ရှိပြီး စစ်အုပ်စုဘက်မှ အကျအဆုံး များပြားနေချိန်၌ အရပ်သား ပြည်သူများ နေထိုင်ရာ ဒေသများကိုပါ လေကြောင်းမှ အဆက်မပြတ် ဗုံးကြဲတိုက်ခိုက်လျက်ရှိသည်။ ဓာတ်ပုံ - (ပုဏ္ဏားကျွန်းမြို့နယ်ရှိ သမိုင်းဝင် ဦးရာဇ်တောင်စေတီတော် မြင်ကွင်း / Crd) #ပုဏ္ဏားကျွန်းမြို့နယ်

ရခိုင်ပြည် ပုဏ္ဏားကျွန်း သမိုင်းဝင်စေတီအနီး စစ်အုပ်စု ဗုံးကြဲ၍ အရပ်သား ၂ ဦး သေဆုံး

ရခိုင်ပြည် ပုဏ္ဏားကျွန်း သမိုင်းဝင်စေတီအနီး စစ်အုပ်စု ဗုံးကြဲ၍ အရပ်သား ၂ ဦး သေဆုံး သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၄ ရက်။ ရခို…

  • September 14, 2026
မကွေးတိုင်း ရခိုင်ရိုးမတောင်ခြေရှိ ဆင်လုပ်သားများနေသည့် ရွာကို စစ်အုပ်စု ပါရာမော်တာဖြင့် ဗုံးကြဲ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၄ ရက်။ မကွေးတိုင်း၊ သရက်ခရိုင်၊ မင်းတုန်းမြို့နယ်ရှိ ရခိုင်ရိုးမ တောင်ခြေအနီး ဆင်လုပ်သားများ နေထိုင်သည့် ဇွန်းကျ ကျေးရွာကို ပြည်သူ့ကာကွယ်ရေးတပ်ဖွဲ့ (PDF) များ ခိုအောင်းနေသည်ဟု ဆိုကာ စစ်အုပ်စုက စက်တင်ဘာလ ၁၃ ရက်နေ့ ညနေပိုင်းတွင် ပါရာမော်တာ ၃ စီးဖြင့် ဗုံးကြဲတိုက်ခိုက်ခဲ့ကြောင်း မြို့ခံများက ပြောသည်။ အဆိုပါ ဇွန်းကျကျေးရွာသည် ရွှေတောင်မောင်နှမဟု ခေါ်ဆိုသည့် ရွှေတောင်ကြီး၊ ရွှေတောင်လေး၏ အရှေ့ ဘက် တောင်ခြေအနီးတွင် တည်ရှိပြီး အိမ်ခြေ ၂၅ အိမ်ခန့်သာရှိကာ မှန်ကျေးရွာအုပ်စုအတွင်း ပါဝင်သည့် ရိုးမတောင်ခြေ ရွာတစ်ရွာဖြစ်သည်။ အသက် ၄၀ အရွယ် မဲဇလီကျေးရွာသားတစ်ဦးက “အဲ့ရွာက ဆင်လုပ်သားတွေ သီးသန့်နေတဲ့ ရွာပါ။ NLD ခေတ်မှာ ပြည်ထဲရေး အမည်ပေါက်ခဲ့တယ်။ ရိုးအခြေရွာပေါ့ မှန်ကျေးရွာအုပ်စုထဲ ပါတယ်။ ဖုန်းလိုင်း ရတစတ်ချက် မရတစ်ချက်ဆိုတော့ ဘာတွေထိခိုက်လဲ ဆိုတာ စုံစမ်းနေတုန်း” ဟု ပြောသည်။ မင်းတုန်းမြို့နယ် အနောက်ခြမ်း ရခိုင်ရိုးမပေါ်ရှိ ကျော်ဖြတ်လမ်းများတွင် နေ့စဉ် တိုက်ပွဲများ ပြင်းထန်လျက် ရှိပြီး စစ်အုပ်စုတပ်ဘက်မှ အထိအခိုက် အကျအဆုံး များပြားပါက ရိုးမတောင်ခြေရှိ ကျေးရွာများကို PDF များ ရှိသည်ဟု စွပ်စွဲကာ လေကြောင်းမှ ဗုံးကြဲလေ့ရှိကြောင်း ဒေသခံများက ဆိုသည်။ တိုက်ပွဲပြင်းထန်ပြီး စစ်တပ်ဘက်က အထိအခိုက် အကျအဆုံးများပါက ရိုးမတောင်ခြေရှိ ကျေးရွာများကို PDF များရှိသည်ဟုဆိုကာ ဗုံးကြဲလေ့ရှိကြောင်း မင်းတုန်းမြို့မှ အသက် ၆၀ အရွယ် အမျိုးသားတစ်ဦးက ပြောသည်။ ထို့ပြင် ပြီးခဲ့သည့် စက်တင်ဘာလ ၆ ရက်နေ့ကလည်း ပုသိမ်-မုံရွာ လမ်းပေါ်ရှိ မဲဇလီနှင့် သရက်အုပ်ကျေးရွာ ဘက်သို့ ဗုံးကြဲခဲ့သဖြင့် စစ်ဘေးရှောင် အမျိုးသမီးတစ်ဦး သေဆုံးခဲ့ဖူးကြောင်း ထပ်မံ ပြောကြားသည်။ တစ်ဖက်တွင်လည်း မင်းတုန်းမြို့ပေါ်၌ စစ်အုပ်စုက စစ်မှုထမ်းရန် ပေါ်တာဆွဲ ဖမ်းဆီးမှုများ တင်းကျပ်စွာ ပြုလုပ် နေသဖြင့် လူငယ်အများအပြား ကျေးရွာများဘက်သို့ တိမ်းရှောင်နေကြရသည်။ ပြည်-မင်းတုန်း လိုင်းယာဉ်မောင်းတစ်ဦးက “မင်းတုန်းမြို့ပေါ် ကွက်ကွက်လေးပဲ သူတို့ စိုးမိုးတာ။ အနီးက ရွာတွေက တော်လှန်ရေးဘက်က စိုးမိုးတာ။ မြို့ပေါ်မှာ အောင်စစ်ခိုင် ကားစပယ်ရာ အဆွဲခံရတော့ ကြောက်ပြီး ရွာကအမျိုးတွေဆီ ပြေးကုန်ကြပြီ” ဟု ပြောသည်။ လက်ရှိတွင် မြေပဲ၊ ကုလားပဲ၊ စတော်ပဲနှင့် နေကြာ စသည့် ဆောင်းသီးနှံများ စိုက်ပျိုးရန် တောင်သူများ စိုက်ပျိုး ရေးအတွက် ထွန်ယက်နေချိန်ဖြစ်သော်လည်း စစ်အုပ်စု၏ ပေါ်တာဆွဲမှုနှင့် လေကြောင်းမှ ဗုံးကြဲ တိုက်ခိုက်မှုများ ကြောင့် တောင်ယာ သွားလာရေး အခက်အခဲများနှင့် ကြုံတွေ့နေရသဖြင့် ဒေသခံ တောင်သူများ စိုးရိမ်ပူပန် လျက်ရှိသည်။ ဓာတ်ပုံ - Crd #မကွေးတိုင်း

မကွေးတိုင်း ရခိုင်ရိုးမတောင်ခြေရှိ ဆင်လုပ်သားများနေသည့် ရွာကို စစ်အုပ်စု ပါရာမော်တာဖြင့် ဗုံးကြဲ

မကွေးတိုင်း ရခိုင်ရိုးမတောင်ခြေရှိ ဆင်လုပ်သားများနေသည့် ရွာကို စစ်အုပ်စု ပါရာမော်တာဖြင့် ဗုံးကြဲ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁…

  • September 14, 2026
စစ်တွေ-ပုဏ္ဏားကျွန်း နယ်စပ်တိုက်ပွဲတွင် စစ်အုပ်စု စစ်ကြောင်းမှူးများအပါအဝင် အထိနာ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၂ ရက်။ ရခိုင်ပြည်၊ စစ်တွေမြို့နယ်နှင့် ပုဏ္ဏားကျွန်းမြို့နယ် အစပ်တွင် တိုက်ပွဲများ ပြင်းထန်စွာ ဖြစ်ပွားနေပြီး စစ်အုပ်စု ဘက်မှ စစ်ကြောင်းမှူးများ အပါအဝင် ထိခိုက်သေဆုံးမှု များပြားနေကြောင်း ဒေသခံများနှင့် စစ်ရေး သတင်း ရင်းမြစ်များက ပြောသည်။ စစ်တွေမြို့ရှိ စစ်အုပ်စုတပ်များသည် မင်းချောင်းတံတားဘက်မှတစ်ဆင့် ပုဏ္ဏားကျွန်းမြို့နယ်စပ်ရှိ ကျေးရွာများ သို့ စစ်ကြောင်း လေးကြောင်းခွဲ၍ ထိုးစစ်ဆင်လာသဖြင့် ကွမ်းတောင်ကျေးရွာအနီး၊ ဝါဘိုကျေးရွာ၊ မင်းလှနှင့် မြစ်နားကျေးရွာ ပတ်ဝန်းကျင်တို့တွင် ထိတွေ့တိုက်ပွဲများ အပြင်းအထန် ဖြစ်ပွားနေခြင်းဖြစ်သည်။ စက်တင်ဘာလ ၄ ရက်နေ့မှ ၁၁ ရက်နေ့အထိ ယနေ့ထိ ဆက်တိုက် တိုက်ပွဲများ ပြင်းထန်နေခြင်း ဖြစ်သည်။ ဒေသခံ စစ်ရေးသတင်းအရင်းအမြစ်တစ်ဦးက “ရက်ဆက်ဖြစ်နေတာပါ။ အရင်က မင်းကျောင်းတံတားဝန်း ကျင်ရယ် ကွမ်းတောင်ရယ်မှာပဲစဖြစ်တာပါ။ အခုကတော့ ဝါဘိုမှာပါ ပြန်ဖြစ်လာတယ်။ စစ်တပ်စစ်ကြောင်း က ဖြန့်ထိုးလာတာပါ ဒါ့ကြောင့်ဖြစ်နေတာ။ စစ်တပ်ဘက်က စစ်ကြောင်းမှူးကျ တယ်လို့ကြားတယ်။ ၅၀ ကျော်သေပြီလို့လည်း ကြားတယ်” ဟု ပြောသည်။ စစ်အုပ်စုသည် အင်အား ၁,၀၀၀ ဝန်းကျင်ဖြင့် စစ်ကြောင်း ၅ ကြောင်းခွဲကာ ပုဏ္ဏားကျွန်းမြို့နယ် ရဲယိုးပြင်၊ ခမောင်းတော၊ အောင်ဇေယျနှင့် အောင်မြေကုန်းကျေးရွာများဘက်သို့ပါ ထိုးစစ်ဆင်နေခြင်းဖြစ်သည်။ မြေပြင်စစ်ကြောင်းများအပြင် ရေတပ် ပစ်ကူ၊ လေကြောင်း တိုက်ခိုက်မှု၊ လက်နက်ကြီးနှင့် ဒရုန်းများကိုပါ အလွန်အကျွံ အသုံးပြုလျက်ရှိသည်။ အဆိုပါ တိုက်ပွဲများအတွင်း စစ်အုပ်စုဘက်မှ တပ်ရင်းမှူးနှင့် စစ်ကြောင်းမှူးများ အပါအဝင် ၁၀၀ ကျော် သေဆုံးထိခိုက်မှု ရှိနေကြောင်း ဒေသတွင်း သတင်းများတွင် ဖော်ပြကြသော်လည်း အဆိုပါ သေဆုံးဦးရေ ကိန်းဂဏန်းအား သတင်းနှင့် မီဒီယာ ကွန်ရက်အနေဖြင့် သီးခြား အတည်မပြုနိုင်သေးပေ။ အလားတူ အာရက္ခတပ်တော်ဘက်တွေလည်း ထိခိုက်ကျဆုံးမှုများ ရှိနေသည်ဟု ဆိုသည်။ “အေအေလည်း ကျတယ်လို့သိရတယ်၊ ပုဏ္ဏားကျွန်းကို စစ်တပ်ပြန်ယူဖို့လုပ်ပေမယ့် အခုအထိတော့ အခြေ အနေ မကောင်းပါဘူး။ စစ်တွေက တပ်မိသားစုတချို့ မျက်နှာမကောင်းဘူး” ဟု ပုဏ္ဏားကျွန်း စစ်ရေး သတင်း ရင်းမြစ်က ပြောသည်။ စက်တင်ဘာလ ၄ ရက်နေ့မှ ၁၁ ရက်နေ့အထိ ဖြစ်ပွားသည့် တိုက်ပွဲများတွင် စစ်တွေမြို့နယ် ဝါဘိုကျေးရွာနှင့် ကွမ်းတောင်ကျေးရွာဘက်သို့ ဦးတည်သည့် စစ်အုပ်စု စစ်ကြောင်းများ အဓိက ထိခိုက် အကျအဆုံးများခဲ့ခြင်း ဖြစ်သည်။ အဆိုပွဲ တိုက်ပွဲများအတွင်း အာရက္ခတပ်တော် (AA) ဘက်က စစ်အုပ်စုတပ်၏ ရုပ်အလောင်းများနှင့် လက်နက်ခဲ ယမ်းများကို သိမ်းဆည်းရမိထားသည်။ ထို့ပြင် အဆိုပါ ထိုးစစ်တွင် စစ်အုပ်စု၏ တပ်မ ၁၀၁ လက်အောက်ခံ ပခုက္ကူအခြေစိုက် ခလရ ၂၅၉ နှင့် တပ်မ ၂၂ လက်အောက်ခံ ကျိုက်မရောအခြေစိုက် ခမရ ၂၀၈ တပ်ရင်းများ ပါဝင်နေကြောင်း စစ်ရေးကျွမ်းကျင်သူများက ထောက်ပြကြသည်။ လက်ရှိတွင် စစ်တွေ-ပုဏ္ဏားကျွန်း နယ်စပ်တစ်လျှောက် စစ်အုပ်စု၏ ထိုးစစ်များ ဆက်လက်ရှိနေသော်လည်း အာရက္ခတပ်တော် (AA) က တန်ပြန်ထိုးစစ်များဖြင့် ပြန်လည် တိုက်ခိုက်လျက်ရှိသည်။ ဓာတ်ပုံ - သိမ်းဆည်းရမိထားသည့် လက်နက်ခဲယမ်းများ / Crd #စစ်တွေ #ပုဏ္ဏားကျွန်း

စစ်တွေ-ပုဏ္ဏားကျွန်း နယ်စပ်တိုက်ပွဲတွင် စစ်အုပ်စု စစ်ကြောင်းမှူးများအပါအဝင် အထိနာ

စစ်တွေ-ပုဏ္ဏားကျွန်း နယ်စပ်တိုက်ပွဲတွင် စစ်အုပ်စု စစ်ကြောင်းမှူးများအပါအဝင် အထိနာ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၂ ရက်။ ရခိုင…

  • September 12, 2026
တောင်ကုတ်၊ ဂွနှင့် ပုဏ္ဏားကျွန်းကို စစ်အုပ်စု လေကြောင်းမှ ဗုံးကြဲ၍ သက်ကြီးပိုင်း ၃ ဦး သေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၂ ရက်။ ရခိုင်ပြည်အတွင်းရှိ တောင်ကုတ်၊ ဂွနှင့် ပုဏ္ဏားကျွန်း မြို့နယ် ၃ ခုကို စစ်အုပ်စုက စက်တင်ဘာလ ၁၀ ရက်နှင့် ၁၁ ရက်နေ့တို့တွင် လေကြောင်းနှင့် ဒရုန်းများဖြင့် ၂ ရက်ဆက်တိုက် ဗုံးကြဲတိုက်ခိုက်ခဲ့သဖြင့် သက်ကြီးပိုင်း အရွယ် အမျိုးသား ၂ ဦးနှင့် အမျိုးသမီး ၁ ဦး သေဆုံးခဲ့ကြောင်း ဒေသခံများက ပြောသည်။ စစ်အုပ်စုသည် ရခိုင်မြောက်ပိုင်းရှိ ပုဏ္ဏားကျွန်းမြို့နယ်ကို စက်တင်ဘာလ ၁၀ ရက်နေ့၌ လည်းကောင်း၊ ရခိုင် တောင်ပိုင်း ဂွမြို့နယ်၊ ကျိန္တလီမြို့ကို စက်တင်ဘာလ ၁၀ ရက်နေ့၌ လည်းကောင်း၊ တောင်ကုတ်မြို့နယ်ကို စက် တင်ဘာလ ၁၁ ရက်နေ့၌ လည်းကောင်း အသီးသီး လေကြောင်းမှ တိုက်ခိုက်ခဲ့ခြင်းဖြစ်သည်။ ဂွဒေသခံ စစ်ရေးသတင်းအရင်းအမြစ်တစ်ဦးက “သံတွဲ၊ ဂွကတော့ တိုက်နေတယ် ဗုံးလည်း ကြဲနေတယ်။ တောင်ကုတ်ကို ကင်းထောက်လေယာဉ် လာပြီး သတိထားဖို့ အချင်းချင်းအသိပေးကြပေမယ့် တချို့နယ်ဘက် တွေက သက်ကြီးရွယ်အိုတွေက မရှောင်နိုင်တာရှိပါတယ်။ အခုသံတွဲ၊ တောင်ကုတ်၊ ဂွက လူတွေ ဗုံးခိုကျင်းထဲပဲ နေကြတာများတယ်” ဟု ပြောသည်။ တောင်ကုတ်မြို့နယ်၊ ရွာသစ်ကေကျေးရွာမှ ဦးတင်မောင် (၆၀ နှစ်)၊ ဂွမြို့နယ်၊ ကျိန္တလီမြို့၊ အမှတ် (၁) ရပ်ကွက်မှ ဦးဦးကျော်ခိုင် (၈၁ နှစ်) နှင့် ပုဏ္ဏားကျွန်းမြို့နယ်၊ ကျောက်ဆိပ်ကျေးရွာတွင် စစ်ဘေးရှောင်နေသည့် ဒေါ်လှသန်းရီ (၆၇ နှစ်) တို့မှာ လေကြောင်းမှ ဗုံးကြဲခံရ၍ သေဆုံးသွားခဲ့ကြသည်။ ဂွဒေသခံစတစ်ဦးက “ပင်လယ်မှာလည်း နေဗီတွေရှိနေပါတယ်။ တပ်တော်ကလည်း လေကြောင်း ရေကြောင်း သတိတွေပေးနေတယ်။ အလုပ်ကို ကောင်းကောင်း လုပ်မစားရပါဘူး။ ပင်လယ်လည်း မထွက်ရတော့ ကျပ် တည်းကြပါတယ်” ဟု ပြောသည်။ စက်တင်ဘာလ ၁၁ ရက်နေ့၊ ညနေ ၄ နာရီကျော်တွင် စစ်အုပ်စုသည် ဂျက်တိုက်လေယာဉ် ၂ စီးဖြင့် တောင်ကုတ် မြို့နယ်၊ ရွာသစ်ကေကျေးရွာနှင့် ဝဲကြီးရွာသစ်ကျေးရွာကြားသို့ ဗုံးကြဲခဲ့သဖြင့် အသက် ၇၃ နှစ်အရွယ် ဦးမင်းဆွေ ဒဏ်ရာရရှိကာ နေအိမ်အချို့ ထိခိုက်ပျက်စီးပြီး နွားတစ်ကောင် သေဆုံးခဲ့သည်။ အလားတူ ကျိန္တလီမြို့ကိုလည်း စက်တင်ဘာလ ၁၀ ရက်နေ့ ည ၉ နာရီ ၄၁ မိနစ်တွင် တစ်ကြိမ်၊ ည ၉ နာရီ ၄၆ မိနစ်တွင် တစ်ကြိမ် လေကြောင်းမှ ၂ ကြိမ်တိုင်တိုင် ဗုံးကြဲခဲ့ရာ အမှတ် (၂) ရပ်ကွက်မှ ဦးချစ်စန်းမောင် (ခ) ချစ်ပု (၄၉ နှစ်) ၏ ဘယ်ဘက် တင်ပါးနှင့် ခြေထောက်တို့တွင် ဗုံးစ ထိမှန်ဒဏ်ရာ ရရှိခဲ့သည်။ ထို့ပြင် စက်တင်ဘာလ ၁၁ ရက် ည ၁၂ နာရီခွဲတွင်လည်း ပုဏ္ဏားကျွန်းမြို့နယ်၊ ကျောက်ဆိပ်ကျေးရွာကို စစ်အုပ်စုက အသေခံဒရုန်းဖြင့် ပစ်ခတ်တိုက်ခိုက်ခဲ့သည်။ ဓာတ်ပုံ - Arakan Princess Media / (ပုံစာ - လေကြောင်းမှ ဗုံးကြဲတိုက်ခိုက်ခံရမှုကြောင့် ထိမှန်ဒဏ်ရာ ရသူများကို တွေ့ရစဉ်။) #တောင်ကုတ် #ဂွ #ပုဏ္ဏားကျွန်း

တောင်ကုတ်၊ ဂွနှင့် ပုဏ္ဏားကျွန်းကို စစ်အုပ်စု လေကြောင်းမှ ဗုံးကြဲ၍ သက်ကြီးပိုင်း ၃ ဦး သေဆုံး

တောင်ကုတ်၊ ဂွနှင့် ပုဏ္ဏားကျွန်းကို စစ်အုပ်စု လေကြောင်းမှ ဗုံးကြဲ၍ သက်ကြီးပိုင်း ၃ ဦး သေဆုံး သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၂ ရက…

  • September 12, 2026
ကျောက်မဲတွင် ရွှေဆိုင် ဓါးပြတိုက်ခံရပြီး လူ ၂ ဦး သေနတ်ထိမှန် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၂ ရက်။ ရှမ်းပြည်မြောက်ပိုင်း၊ ကျောက်မဲမြို့၊ ဈေးကြီးတောင်ဘက် တိုက်တန်းရှိ “ရွှေမိုး” ရတနာရွှေဆိုင် စက်တင်ဘာလ ၁၂ ရက်နေ့၊ နံနက်ပိုင်းတွင် ဓါးပြတိုက်ခံရပြီး ဆိုင်ရှင် အပါအဝင် လူ ၂ ဦး သေနတ်ထိမှန် ဒဏ်ရာရရှိခဲ့ကြောင်း ဈေးသည်များက ပြောသည်။ ဆိုင်ရှင်ဖြစ်သူသည် ယနေ့၊ နံနက် ၈ နာရီခန့်တွင် ဆိုင်ဖွင့်ရန် လာရောက်စဉ် ကြိုတင်စောင့်ဆိုင်းနေသည့် အမည် မသိ လက်နက်ကိုင် ၃ ဦးက ပစ္စတိုသေနတ်ဖြင့် ခြိမ်းခြောက် လုယက်သွားခြင်း ဖြစ်သည်။ အဆိုပါဖြစ်စဉ်တွင် ဆိုင်ရှင်က ပြန်လည်ခုခံသဖြင့် ဓါးပြများက ပစ်ခတ်ခဲ့ရာ ဆိုင်ရှင်၏ လက်မောင်း၌ သေနတ် ဒဏ်ရာ ရရှိခဲ့သည်။ ထို့နောက် ဆိုင်ရှင်၏ အကူအညီတောင်း အော်ဟစ်သံကြောင့် လိုက်လံတားဆီးသည့် စည်ပင်ဝန်ထမ်း တစ်ဦးကို လည်း ဓါးပြများက ထပ်မံပစ်ခတ်ခဲ့သဖြင့် ၎င်း၏ ခြေထောက်တွင် သေနတ်ကျည် ထိမှန်သွားခဲ့သည်။ နီးစပ်သည့် ဈေးသည် အမျိုးသမီးတစ်ဦးက “အိုး အကုန်ပါသွားတာ အထုပ်လိုက်။ ဆိုင်မခင်းရသေးလို့ အကုန် လုံး အထုပ်လိုက်ပါသွားတာ။ ကျောက်မဲမှာက ဓါးပြတိုက်တာ မဆန်းတော့ဘူး။ အခုလည်း မိမမိ မသေချာဘူး” ဟု ပြောသည်။ ဓါးပြလုယက်သူများသည် ဆိုင်မခင်းရသေးသည့် ရွှေထည်ပစ္စည်းများ အားလုံးကို ယူဆောင်သွားခဲ့ကြပြီး ကာလ ပေါက်ဈေးအရ ကျပ်သိန်းပေါင်းများစွာ တန်ဖိုးရှိကြောင်း နီးစပ်သူများက ပြောသည်။ ထို့ပြင် ဖြစ်စဉ်အတွင်း အကူအညီပေးနေသည့် အမျိုးသမီးတစ်ဦးက “ပစ္စတိုနဲ့ ကောင်လေး ၃ ယောက်လာတာ။ အရပ်ဝတ်နဲ့ပဲ။ KBZ နဲ့ မျက်စောင်းထိုးလေးပဲဆိုတော့ CCTV ကနေ စုံစမ်းနေတုန်းပါ။ CCTV ရှိသမျှ လိုက်နေ ပါတယ်” ဟု ပြောသည်။ သေနတ်ထိမှန် ဒဏ်ရာရရှိသူ ၂ ဦးကို ကျောက်မဲဆေးရုံကြီးသို့ ပို့ဆောင်ကုသပေးထားပြီး ဒဏ်ရာပြင်းထန်သော် လည်း အသက်အန္တရာယ် မစိုးရိမ်ရကြောင်း ဆိုသည်။ ကျောက်မဲမြို့တွင် ၂၀၂၁ ခုနှစ် စက်တင်ဘာလက ကမ္ဘောဇဘဏ် ဓါးပြတိုက်ခံရသည့် ဖြစ်စဉ် အပါအဝင် စစ်အာဏာသိမ်းပြီးနောက်ပိုင်း ပျမ်းမျှတစ်နှစ်လျှင် ဓါးပြမှု ၄ ကြိမ်ခန့် ဖြစ်ပွားနေကြောင်း ဒေသခံများက ပြောသည်။ ကျောက်မဲမြို့ကို ၁၀၂၇ စစ်ဆင်ရေး ဒုတိယပိုင်းအတွင်း တအာင်းအမျိုးသား လွတ်မြောက်ရေး တပ်မတော် (TNLA) က တိုက်ခိုက်သိမ်းပိုက်ခဲ့သော်လည်း ၂၀၂၅ ခုနှစ် အောက်တိုဘာလတွင် စစ်အုပ်စုက ပြန်လည် ထိန်းချုပ်ထားသည့် မြို့ဖြစ်သည်။ ဓာတ်ပုံ - ပေးပို့ (CJ) #ကျောက်မဲမြို့

ကျောက်မဲတွင် ရွှေဆိုင် ဓါးပြတိုက်ခံရပြီး လူ ၂ ဦး သေနတ်ထိမှန်

ကျောက်မဲတွင် ရွှေဆိုင် ဓါးပြတိုက်ခံရပြီး လူ ၂ ဦး သေနတ်ထိမှန် သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၂ ရက်။ ရှမ်းပြည်မြောက်ပိုင်း၊ ကျေ…

  • September 12, 2026
×Close