အိန္ဒိယ-အမေရိကန် ကုန်သွယ်ရေးသဘောတူညီချက်ရတော့မည်ဟု US နိုင်ငံခြားရေး ဝန်ကြီးပြော
သတင်းနှင့် မီဒီယာ ကွန်ရက်။
၂၀၂၆ ခုနှစ်၊ အောက်တိုဘာလ ၂၀ ရက်။
အမေရိကန်ပြည်ထောင်စုနှင့် အိန္ဒိယနိုင်ငံတို့အကြား နှစ်နိုင်ငံ ကုန်သွယ်ရေး သဘောတူညီချက် အချောသတ်ရန် အလွန်နီးကပ်နေပြီဖြစ်ကြောင်း အမေရိကန် နိုင်ငံခြားရေးဝန်ကြီး Marco Rubio က ပြောကြားလိုက်သည်။
အာရှခရီးစဉ်အတွင်း ပြုလုပ်သည့် သတင်းစာရှင်းလင်းပွဲတွင် အမေရိကန် နိုင်ငံခြားရေးဝန်ကြီး Marco Rubio က ရုရှားထံမှ စွမ်းအင်ဝယ်ယူနေသည့် အိန္ဒိယနှင့် တရုတ်အပါအဝင် နိုင်ငံများအပေါ် ၁၀၀ ရာခိုင်နှုန်းအထိ အခွန်တိုးမြှင့် ကောက်ခံနိုင်သည့် ပိတ်ဆို့အရေးယူမှု ဥပဒေကြမ်းကို အမေရိကန် သမ္မတ ဒေါ်နယ်ထရမ့် အစိုးရအနေဖြင့် ရက်ပေါင်း ၆၀ ဆိုင်းငံ့ကာ အကဲဖြတ် ပြန်လည်သုံးသပ်နေကြောင်း ရှင်းပြခဲ့သည်။
အိန္ဒိယနိုင်ငံသည် စွမ်းအင်ရရှိနိုင်သည့် အခြားရင်းမြစ်များသို့ လျင်မြန်စွာ ပြောင်းလဲရန် ပထဝီဝင်အနေအထားအရ အခက်အခဲများရှိကြောင်း၊ စွမ်းအင်တင်သွင်းမှု လမ်းကြောင်းများကို လျှော့ချရန် ကြိုးပမ်းနေသော်လည်း ရုရှားထံမှ ရေနံအများအပြား ဝယ်ယူနေရဆဲဖြစ်သကဲ့သို့ အမေရိကန်၏ အရေးပါသော မဟာမိတ်လည်း ဖြစ်ကြောင်း Rubio က ထည့်သွင်းပြောဆိုခဲ့သည်။
ထို့ပြင် ကမ္ဘာ့စွမ်းအင်ဈေးကွက်နှင့် အမေရိကန် စီးပွားရေးအပေါ် ထိခိုက်မှုမရှိစေရန် အမေရိကန်အစိုးရအနေဖြင့် သေချာစွာ ချိန်ဆစဉ်းစားနေရကြောင်း ဖြည့်စွက်ပြောကြားခဲ့သည်။
တစ်ချိန်တည်းမှာပင် အိန္ဒိယ ကုန်သွယ်ရေးနှင့် စက်မှုဝန်ကြီး Piyush Goyal ကလည်း အမေရိကန်နှင့် နှစ်နိုင်ငံ ကုန်သွယ်ရေး သဘောတူညီချက်၏ ပထမပိုင်း (First Tranche) ကို အချောသတ်ပြီးသွားပြီဖြစ်ပြီး လက်ရှိတွင် ဥပဒေကြောင်းအရ မူကြမ်းရေးဆွဲသည့်အဆင့် (Legal Drafting Stage) သို့ ရောက်ရှိနေပြီဖြစ်ကြောင်း အတည်ပြုခဲ့သည်။
အမေရိကန် နိုင်ငံခြားရေးဝန်ကြီး Marco Rubio သည် အိန္ဒိယ နိုင်ငံခြားရေးဝန်ကြီးနှင့် တွေ့ဆုံရန် မွန်ဘိုင်းမြို့သို့ ဆက်လက်ထွက်ခွာမည်ဖြစ်သည်။
