စူပါ တိုင်ဖွန်း “ချမ်ပီ” ထိုင်ဝမ်သို့ ဝင်ရောက်၊ ၁ ဦး သေဆုံးပြီး ကျောင်းနှင့် ရုံးများ ပိတ်ထားရ
သတင်းနှင့် မီဒီယာ ကွန်ရက်။
|၂၀၂၆ ခုနှစ်၊ အောက်တိုဘာလ ၂၃ ရက်။
အားပြင်း တိုင်ဖွန်းမုန်တိုင်း “ချမ်ပီ” (Typhoon Champi) ထိုင်ဝမ်ကျွန်းသို့ ဦးတည် ဝင်ရောက်လာသောကြောင့် လူတစ်ဦး သေဆုံးကာ ၉၀ ကျော် ဒဏ်ရာရရှိခဲ့ပြီး ဒေသအများအပြားတွင် ရုံးလုပ်ငန်းများနှင့် စာသင်ကျောင်းများ ရပ်နားထားရသည်။
ထိုင်ဝမ်နှင့် ဂျပန် အဝင်အထွက် လေကြောင်းအများ အပြား ရပ်ဆိုင်းထားရပြီး ထောင်နှင့်ချီသော ခရီးသည်များ သောင်တင်နေကြသည်။
မုန်တိုင်း အန္တရာယ်ကြောင့် သောကြာနေ့တွင် ထိုင်ဝမ်၏ မြို့နယ်နှင့် ခရိုင် ၂၂ ခုအနက် ၂၁ ခုတွင် ရုံးလုပ်ငန်းများနှင့် စာသင်ကျောင်းများကို ပိတ်ထားရသည်။
ထို့ပြင် ကမ္ဘာ့အကြီးဆုံး စတော့ဈေးကွက် တစ်ခုဖြစ်သော ထိုင်ဝမ် စတော့အိတ်ချိန်းကိုလည်း ခေတ္တ ပိတ်သိမ်းထားသည်။
မုန်တိုင်း ရိုက်ခတ်မှုကြောင့် မြို့တော် ထိုင်ပေ အပါအဝင် ဒေသအချို့တွင် ၂၄ နာရီအတွင်း မိုးရေချိန် ၂၀၀ မီလီမီတာထက်မက ရွာသွန်းခဲ့သည်။
မြောက်ပိုင်းဒေသများတွင် လေတိုက်နှုန်း ဘူးဖောစကေး (Beaufort scale) အမြင့်ဆုံးအဆင့် ၁၂ အထိ ပြင်းထန်သော လေပြင်းများ တိုက်ခိုက်နိုင်သောကြောင့် ကမ်းခြေများနှင့် တောင်ပေါ်ဒေသများသို့ သွားရောက်ခြင်း မပြုကြရန် အာဏာပိုင်များက သတိပေးထားသည်။
မုန်တိုင်းကြောင့် ထိုင်ဝမ် ပြည်တွင်း လေကြောင်းလိုင်း ၂၆၂ လိုင်းနှင့် နိုင်ငံတကာ လေကြောင်းလိုင်း ၆၆၀ ကျော်ကို ဖျက်သိမ်းလိုက်သလို၊ ရထားလိုင်းများ၊ ကူးတို့သင်္ဘောများနှင့် အဝေးပြေးလမ်းမကြီး အချို့ကိုပါ ပိတ်ပင်ထားသည်။
အနီးအနားရှိ ဂျပန် လေဆိပ်များတွင်လည်း လေယာဉ်ခရီးစဉ် အများအပြားကို ဖျက်သိမ်းထားသဖြင့် ခရီးသည် ထောင်ပေါင်းများစွာ ပိတ်မိနေသည်။
မုန်တိုင်းကြောင့် ထိုင်ဝမ် အနောက်တောင်ဘက် လျူချူး (Liuqiu) ကျွန်းတွင် လူတစ်ဦး လှိုင်းဆွဲခေါ်ဆောင်ခံရပြီး သေဆုံးခဲ့ကာ ယာဉ်မတော်တဆမှုနှင့် ချော်လဲမှုများကြောင့် ဒဏ်ရာရရှိသူ ၉၄ ဦး ရှိကြောင်း ထုတ်ပြန်ထားသည်။
