စစ်ကောင်စီ ပိတ်ဆို့မှုကြောင့် တနင်္သာရီဒေသခံ ထောင်ချီပိတ်မိနေ
သတင်းနှင့် မီဒီယာ ကွန်ရက်။
၂၀၂၄ ခုနှစ် နိုဝင်ဘာလ ၂၆ ရက်။
တနင်္သာရီတိုင်း ဒေသကြီး၊ လောင်းလုံးမြို့နယ်တွင် စစ်ကောင်စီတပ်၏ ပိတ်ဆို့မှုကြောင့် ဒေသခံ ပြည်သူ ထောင်နှင့်ချီ ပိတ်မိနေပြီး အကူအညီများလည်း လိုအပ်နေသည်ဟု မွန်ပြည် လူသားချင်းစာနာမှု ကွန်ယက်အဖွဲ့ (MSHN) က ပြောသည်။
စစ်ကောင်စီတပ်မှ လုံးခြုံရေး အကြောင်းပြကာ စစ်ဆေးမှုများနှင့် ပိတ်ဆို့မှုများကြောင့် လောင်းလုံးမြို့နယ်ထဲက ပုညစ်၊ ဝေဒီ၊ ကထောင်နီ၊ ကညုံ၊ ကဒက်ငယ် စသည့် ကျေးရွာများရှိ ဒေသခံပြည်သူများ ပိတ်မိနေပြီး အကူ အညီများ လိုအပ်နေခြင်း ဖြစ်သည်။
ထိုကျေးရွာများရှိ စစ်ဘေးရှောင် ၅၀၀၀ ခန့်မှာ အရေးပေါ် အကူအညီများ လိုအပ်နေသည်ဟု မွန်ပြည် လူသားချင်း စာနာမှု ကွန်ယက်အဖွဲ့ (MSHN) ပြောရေးဆိုခွင့်ရှိသူ နိုင်မရော့မွန်က ပြောသည်။
“သူတို့ ဘုန်းကြီး ကျောင်းတို့၊ Public အဆောက်အအုံတွေမှာ စစ်ဖြစ်ဖို့ ဝေးတဲ့နေရာတွေမှာ အသီးသီး သူတို့နေ တာ ရှိတယ်။ နောက်တစ်ချို့ရွာတွေကြတော့ သူတို့ရွာမှာ တိုက်ပွဲ ဖြစ်ပွားခြင်းတော့ မရှိဘူး။ ဒါပေမဲ့ လမ်း ကြောင်း ပိတ်ဆို့မှုကြောင့် ကုန်စီးဆင်းမှု လျော့နည်းတဲ့အခါကြ သူတို့ စားနပ်ရိက္ခာ ဝယ်ယူလို့ မရတဲ့ အနေ အထားမျိုး ရှိတယ်ပေါ့နော်။”
စက်တင်ဘာလ နောက်ဆုံးပတ်မှ စတင်၍ လောင်းလုံးမြို့နယ်ထဲကို စစ်ကောင်စီတပ်က စစ်ကြောင်းထိုးခြင်း၊ အင်အား ဖြည့်တင်းခြင်းများကို အရှိန်မြှင့် လုပ်ဆောင်လာသည့် အချိန်မှစ၍ ဒေသခံများ ပိတ်ဆို့ခံနေရသည် ဟု နိုင်မရော့မွန် က ပြောသည်။
စစ်ကောင်စီသည် ၎င်းတို့ စစ်ကြောင်းထိုးလာသည့် လမ်းကြောင်း တစ်လျှောက်ရှိ ရွာများမှ ပြည်သူများအား လူသားဒိုင်းကာ အဖြစ် ဖမ်းဆီး ခေါ်ဆောင်သွားသည့်အပြင် ဖြတ်သန်းသွားလာသည့် ယာဉ်များကိုလည်း စစ်ဆေးမှုများကို တင်းကြပ်စွာ လုပ်ဆောင်နေသည်မှာ ယနေ့အချိန်ထိ ဖြစ်သည်ဟု MSHN က ပြောသည်။
လောင်းလုံမြို့နယ်အတွင်း စစ်ကောင်စီတပ်၏ လူ့အခွင့်အရေး ချိုးဖောက်နေသည့် အခြေအနေများနှင့် ပတ်သက် ၍ MSHN ပြောရေးဆိုခွင့်ရှိသူ နိုင်မရော့မွန်က ယခုကဲ့သို့ ပြောသည်။
“လူ့အခွင့်အရေး အနေနဲ့ ကြည့်မယ်ဆိုရင် သူတို့ စစ်ကြောင်းထိုးလာတဲ့ တစ်လျှောက်လုံးမှာ သူတို့ ကြုံတဲ့ရွာ မှန်သမျှ ညှင်းပန်းနှိပ်စက်မှုတွေ လုပ်တယ်။ လူသားဒိုင်း အဖြစ် ခေါ်တယ်။ ပေါ်တာ ဆွဲတယ်။ တစ်ခါတလေ လမ်းမှာ ပစ်သတ်သွားတဲ့ အနေအထား မျိုးရှိတယ် ပေါ့နော။ တစ်ချို့ သတ်ဖြတ်ပြီးတော့ အလောင်းကို ရွာ ဘေးမှာ ပစ်ထားတဲ့ အနေအထားတွေ အများကြီး ရှိခဲ့တယ်ပေါ့နော်။”
လောင်းလုံမြို့နယ်ထဲတွင် စစ်ရေး ပဋိပက္ခများကြောင့် ထွက်ပြေးတိမ်းရှောင်နေရသည့် ဒေသခံပြည်သူ သုံး သောင်းရှိသည်ဟု မွန်ပြည် လူသားချင်း စာနာမှု ကွန်ယက်အဖွဲ့ (MSHN) က ပြောသည်။
မွန်ပြည် လူသားချင်း စာနာမှု ကွန်ယက်အဖွဲ့ (MSHN) အနေဖြင့် မွန်ပြည်နယ်၊ ကရင်ပြည်နယ်နှင့် တနင်္သာရီတိုင်း ဒေသကြီး အတွင်းရှိ မြို့နယ် ၉ မြို့နယ်တွင် လူသားချင်းစာနာထောက်ထားမှု အကူအညီများ ရရှိရန်အတွက် လက်လှမ်းမီသမျှ သတင်းအချက်အလက်များ စုဆောင်ပြီး လှုပ်ရှားဆောင်ရွက်နေသည့်အပြင် ကျန်ရှိသေးသည့် မြို့နယ်များအတွင်း ဆက်လက်တိုးချဲ့ လုပ်ဆောင်သွားရန်ရှိသည်ဟု နိုင်မရော့မွန်က ဆိုသည်။