April 2026 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Monthly Archive

Archive: April 2026

Apr 30

မြိတ်အကျဉ်းထောင်နှင့် ရဲဘက်စခန်းမှ လွတ်မြောက်သူများတွင် နိုင်ကျဉ်းပါဝင်မှု မရှိ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၃၀ ရက်။ မြိတ်အကျဉ်းထောင်နှင့် ရဲဘက်စခန်းများမှ အကျဉ်းသားစုစုပေါင်း ၂၈ ဦး လွတ်မြောက်သော်လည်း နိုင်ငံရေး အကျဉ်းသားများ မပါဝင်ဟု အကျဉ်းဦးစီးဌာနနှင့် နီးစပ်သူများက ပြောသည်။ စစ်အုပ်စုက ကဆုန်လပြည့်နေ့ အထိမ်းအမှတ် လွတ်ငြိမ်းချမ်းသာခွင့်ဖြင့် အကျဉ်းသားများကို ပြန်လွှတ်ပေးခဲ့ရာ မြိတ်အကျဉ်းထောင်နှင့် ရဲဘက်စခန်းများမှ စုစုပေါင်း ၂၈ ဦး လွတ်မြောက်လာသော်လည်း နိုင်ငံရေးအကျဉ်းသား များ တစ်ဦးမျှ ပါဝင်လာခြင်းမရှိကြောင်း အကျဉ်းသားမိသားစုဝင်များက ပြောသည်။ ယနေ့ ဧပြီလ ၃၀ ရက်တွင် ပြန်လွှတ်ပေးခဲ့သည့် မြိတ်အကျဉ်းထောင်မှ အကျဉ်းသား ၁၃ ဦးတွင် ခိုးဆိုး လုယက် မှုဖြင့် ပြစ်ဒဏ်ကျခံနေရသည့် လွတ်ရက်နီးသူ အကျဉ်းသား ၁၁ ဦးနှင့် အကျဉ်းသူ ၂ ဦးတို့သာ ပါဝင်ခဲ့သည်။ ထို့ပြင် ကျောက်ဖြူတောင် ကုန်ထုတ် ရဲဘက်စခန်းမှ ၁၂ ဦးနှင့် နတ်စင်ကုန်း ကုန်ထုတ်စခန်းမှ ၃ ဦးတို့လည်း လွတ်မြောက်လာခဲ့သည်။ နံနက်အစောပိုင်းကတည်းက ထောင်ရှေ့တွင် သားဖြစ်သူကို လာရောက်စောင့်ကြိုနေသည့် အသက် ၄၅ နှစ် အရွယ် မိခင်တစ်ဦးက “မနက်အစောကြီးကတည်းက ထောင်အရှေ့မှာ သွားစောင့်နေတာ၊ လွတ်ခါနီး အပြင် ဘုတ်ကျနေတဲ့သူတွေပဲ လွှတ်တာ၊ အိမ်က သားတော့ မပါဘူး” ဟု ပြောသည်။ စစ်တပ်သည် ယခုတစ်ကြိမ် လွတ်ငြိမ်းချမ်းသာခွင့်တွင် တစ်နိုင်ငံလုံးအတိုင်းအတာဖြင့် အကျဉ်းသား ၁,၅၀၈ ဦးနှင့် နိုင်ငံခြားသား ၁၁ ဦးတို့ကို လွှတ်ပေးခဲ့ကြောင်း ကြေညာထားသည်။ အဆိုပါ လွတ်ငြိမ်းခွင့်သည် ရာဇဝတ်ကျင့်ထုံးဥပဒေ ပုဒ်မ ၄၀၁၊ ပုဒ်မခွဲ (၁) အရ နောက်တစ်ကြိမ် ပြစ်မှုထပ်မံ ကျူးလွန်ပါက ယခုကျန်ရှိသည့် ပြစ်ဒဏ်များကိုပါ ဆက်လက်ကျခံရမည်ဟူသော ကန့်သတ်ချက်ဖြင့် လွှတ်ပေး ခြင်း ဖြစ်သည်။ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများ ကွန်ရက် (PPNM) ၏ ထုတ်ပြန်ချက်အရ ထားဝယ် အကျဉ်းထောင်မှ လည်း အသက်ကြီးပိုင်း အကျဉ်းသား ၁ ဦးသာ ပြန်လည်လွတ်မြောက်လာပြီး နိုင်ငံရေး အကျဉ်းသားများ ပါဝင်ခြင်းမရှိကြောင်း သိရသည်။ မြန်မာနှစ်ဆန်းတစ်ရက်နေ့နှင့် ယခု ကဆုန်လပြည့်နေ့ လွတ်ငြိမ်းချမ်းသာခွင့်တို့တွင် နိုင်ငံရေးအကျဉ်းသားများ ပါဝင်မှု အလွန်နည်းပါးနေသည့်အပေါ် ပြည်တွင်း၊ ပြည်ပ လူ့အခွင့်အရေး လှုပ်ရှားသူများက ဝေဖန်ပြောဆိုမှုများ ပြုလုပ်နေကြသည်။ ကျန်ရှိနေသော အကျဉ်းသားများအတွက် ကျခံရန်ကျန်ရှိသည့် ပြစ်ဒဏ်များအနက်မှ ၆ ပုံ ၁ ပုံကို လျှော့ပေါ့ပေး မည်ဟု စစ်အစိုးရက ထပ်မံကြေညာထားသော်လည်း နိုင်ငံရေးအကျဉ်းသားများ လွတ်မြောက်ရေးအတွက်မူ မျှော်လင့်ချက် နည်းပါးနေဆဲ ဖြစ်သည်။ #အကျဉ်းထောင် #လွတ်ငြိမ်းခွင့်

မြိတ်အကျဉ်းထောင်နှင့် ရဲဘက်စခန်းမှ လွတ်မြောက်သူများတွင် နိုင်ကျဉ်းပါဝင်မှု မရှိ

Apr 30

တနင်္သာရီမြို့နယ်အတွင်း လေယာဉ်ကွင်းဆောက်ရန် လူထု မြေများ သိမ်းယူ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၃၀ ရက်။ တနင်္သာရီတွင် ရဟတ်ယာဉ်ကွင်းဆောက်ရန် ရွာသား ၁၅ ဦးပိုင် မြေနှင့်အိမ်များကို စစ်တပ်က အဓမ္မသိမ်းယူနေ သည်ဟု ဒေသခံများက ပြောသည်။ မြိတ်ခရိုင်၊ တနင်္သာရီမြို့နယ်၊ ညောင်ပင်ကွင်းကျေးရွာရှိ အမှတ် (၅၆၁) ခြေမြန်တပ်ရင်းအရှေ့ဘက်တွင် ရဟတ် ယာဉ်ကွင်း တည်ဆောက်ရန်အတွက်ဟုဆိုကာ ဒေသခံရွာသား ၁၅ ဦး ပိုင်ဆိုင်သည့် လယ်ယာမြေများ၊ ခြံများနှင့် နေအိမ်များကို စစ်ကတပ်က အဓမ္မသိမ်းယူလျက်ရှိကြောင်း ဒေသခံများက ပြောသည်။ ပြီးခဲ့သည့် ဧပြီလ ၂၈ ရက်နေ့မှစတင်ကာ စစ်တပ်သည် ကြိုတင်အကြောင်းကြားခြင်းမျိုး မရှိဘဲ ညောင်ပင်ကွင်း ရွာသားများ၏ မြေနေရာများကို သိမ်းယူခဲ့ပြီး မြေတူးစက်များဖြင့် နေအိမ်များကို ဖြိုဖျက်ကာ မြေညှိခြင်း လုပ်ငန်းများ လုပ်ဆောင်နေခြင်း ဖြစ်သည်။ အဆိုပါ ဖြစ်စဉ်နှင့်ပတ်သက်၍ အသက် ၅၀ ခန့်အရွယ် ရွာသားတစ်ဦးက “လမ်းကို ပေး မသွားခိုင်းတော့ဘဲ ပိတ် ပစ်ထားတယ်၊ ဘက်ဟိုးတွေနဲ့ အိမ် ၂ ဆောင်ကို ဖျက်တယ်၊ မြေကြီးတွေလည်း အကုန်လုံး တူးဆွပစ်နေတယ်။ မြင်ရတာ စိတ်မကောင်းတောင် မကောင်းဘူး။ အိမ်ရှင် မြေရှင်တွေ ငိုတဲ့သူတွေ ငိုကုန်တယ်” ဟု ပြောသည်။ အဆိုပါ ရဟတ်ယာဉ်ကွင်းကို အနံ ၁၅၀ ပေနှင့် အလျား ၃,၀၀၀ ပေအထိ ကျယ်ဝန်းစွာ ဖော်ဆောင်သွားရန် စီစဉ်နေခြင်းဖြစ်ကြောင်း ရွာသားများက ဆိုသည်။ လက်ရှိတွင် တနင်္သာရီမြို့နယ်အတွင်းရှိ ဘန်လောကျေးရွာနှင့် ၆ မိုင်ကျေးရွာတို့တွင် စစ်တပ်နှင့် ပြည်သူ့ ကာကွယ်ရေး ပူးပေါင်းတပ်ဖွဲ့များအကြား တိုက်ပွဲများ ပြင်းထန်လျက်ရှိသည်။ ထို့ပြင် ဧပြီလ ၂၈ ရက်နေ့၊ ညပိုင်းကလည်း အမှတ် (၅၆၁) ခြေမြန်တပ်ရင်းမှ သကျက်ကျေးရွာဘက်သို့ လက်နက်ကြီး ၉ လုံးခန့် ပစ်ခတ်ခဲ့သဖြင့် နယ်မြေအတွင်း စစ်ရေးတင်းမာနေဆဲ ဖြစ်သည်။ #တနင်္သာရီ #လေယာဉ်ကွင်း #လူ့အခွင့်အရေးချိုးဖောက်မှု

တနင်္သာရီမြို့နယ်အတွင်း လေယာဉ်ကွင်းဆောက်ရန် လူထု မြေများ သိမ်းယူ

Apr 30

၁၂ နှစ်အရွယ် လေးတန်းကျောင်းသား ဓါးဒဏ်ရာအများအပြားဖြင့် သေဆုံး သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဧပြီလ ၃၀ ရက်။ ထားဝယ်ခရိုင်၊ ရေဖြူမြို့နယ်၊ ကလိန်အောင်မြို့အနီးရှိ ကျေးရွာတစ်ရွာတွင် ငါးရှာသွားသည့် အသက် ၁၂ နှစ် အရွယ် စတုတ္ထတန်းကျောင်းသား တစ်ဦးမှာ ဓားဒဏ်ရာအများအပြားဖြင့် အသတ်ခံထားရ သည့် ဖြစ်စဉ်တစ်ခု ဖြစ်ပွားခဲ့သည်။ ဖြစ်စဉ်မှာ မိကျောင်းလှောင်းရွာသစ်တွင် နေထိုင်သည့် မောင်ကျော်လင်းထွေး (၁၂ နှစ်) သည် ဧပြီလ ၂၈ ရက်နေ့၊ ညနေပိုင်းက နေအိမ်အနီးရှိ ချောင်းစပ်သို့ ငါးရှာရန် ထွက်ခွာသွားခဲ့သည်။ သို့သော် ညနေ ၆ နာရီခန့်အထိ ပြန်လည်ရောက်ရှိမလာသဖြင့် မိဘများနှင့် ရွာသားများက ဝိုင်းဝန်းရှာဖွေကြရာ တွင် ချောင်းစပ်၌ပင် ထိုးသွင်းဓားဒဏ်ရာများစွာဖြင့် သေဆုံးနေသည့် ကလေးငယ်၏ ရုပ်အလောင်းကို တွေ့ရှိခဲ့ရခြင်း ဖြစ်သည်။ အသက် ၄၅ နှစ်အရွယ် ရွာသားတစ်ဦးက “ကလေးရဲ့ ဝမ်းဗိုက်၊ လည်ပင်း၊ ကျောပြင်နဲ့ လက်တို့မှာ ဓားနဲ့ ထိုး သွင်းထားတဲ့ ဒဏ်ရာတွေ မနည်းဘူး၊ အချက် ၂၀ ဝန်းကျင်လောက်တောင် တွေ့ရတယ်။ စတုတ္ထတန်း ကျောင်း သား လူအေးလေးတစ်ယောက်ပါ၊ မိဘတွေကလည်း ချို့တဲ့တယ်၊ သနားစရာပါ။ ဘယ်သူက ဘယ်အငြိုးနဲ့ ဒီလောက်တောင် ရက်ရက်စက်စက် လုပ်တာလဲ ပြောမတတ်တော့ဘူး” ဟု ပြောသည်။ သေဆုံးသူ ကလေးငယ်၏ ရုပ်အလောင်းကို ကလိန်အောင်ဆေးရုံသို့ ပို့ဆောင်ကာ ရင်ခွဲစစ်ဆေးမှုများ ပြုလုပ်ခဲ့ပြီးနောက် ဧပြီလ ၂၉ ရက် နံနက်ပိုင်းတွင် နေအိမ်သို့ ပြန်လည်ယူဆောင်လာခဲ့ကြသည်။ လူသတ်မှု ဖြစ်ပွားပြီးနောက် ကလိန်အောင်မြို့မရဲစခန်းမှ တာဝန်ရှိသူများက အခင်းဖြစ်ပွားရာသို့ လာရောက် စစ်ဆေးမှုများ ပြုလုပ်ခဲ့ကာ အမှုဖွင့်လှစ်ပြီး ပြစ်မှုကျူးလွန်သူကို ဖော်ထုတ်နိုင်ရန် ကြိုးပမ်းလျက်ရှိသည်။ ဒေသခံများကမူ အပြစ်မဲ့ ကလေးငယ်တစ်ဦးအပေါ် ယခုကဲ့သို့ အဆင်အခြင်မဲ့ လုပ်ရပ်မျိုး ကျူးလွန်ခဲ့သူကို ထိရောက်စွာ အရေးယူပေးရန် လိုလားနေကြသည်။ မိကျောင်းလှောင်းရွာသစ်သည် ကရင်၊ ထားဝယ်၊ မွန်နှင့် ဗမာ တိုင်းရင်းသားများ စုပေါင်းနေထိုင်သည့် ကျေးရွာ တစ်ရွာဖြစ်ပြီး ရေး-ထားဝယ် ကားလမ်းမကြီးဘေးတွင် တည်ရှိသော ကျေးရွာတစ်ရွာ ဖြစ်သည်။ #မိကျောင်းလှောင်းရွာသစ် #ထားဝယ်ခရိုင် #ရေဖြူမြို့နယ် #ကလိန်အောင်ကျေးရွာ

၁၂ နှစ်အရွယ် လေးတန်းကျောင်းသား ဓါးဒဏ်ရာအများအပြားဖြင့် သေဆုံး

Apr 30

မိုးကုတ်တွင် စစ်တပ်က စစ်ကား ၃၀ ခန့်ဖြင့် စစ်အင်အားဖြည့်တင်း သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၃၀ ရက်။ မန္တလေးတိုင်း၊ မိုးကုတ်မြို့အတွင်းသို့ စစ်တပ်က လူအင်အားနှင့် လက်နက်ခဲယမ်းများ အပြည့်တင်ဆောင်လာ သည့် စစ်ကားအစီးရေ ၃၀ နီးပါးဖြင့် စစ်အင်အားများ ဖြည့်တင်းနေကြောင်း မြို့ခံများနှင့် စစ်ရေး သတင်း ရင်းမြစ်များက ပြောသည်။ ဧပြီလ ၂၉ ရက်နေ့၊ ညနေပိုင်းတွင် ပြင်ဦးလွင်ဘက်မှတစ်ဆင့် စစ်ယူနီဖောင်းအပြည့်အစုံ ဝတ်ဆင်ထားသည့် စစ်သားများ တင်ဆောင်လာသည့် စစ်ကားအစီးရေ ၂၀ ကျော်မှာ မိုးကုတ်မြို့အတွင်းသို့ ရောက်ရှိလာခြင်း ဖြစ်သည်ဟု ဆိုသည်။ မိုးကုတ်မြို့ စစ်ရေးသတင်းရင်းမြစ်နှင့် နီးစပ်သူတစ်ဦးက “စစ်ကားက ၂၀ ကျော်တယ်ပေါ့နော်။ တချို့ပြောက အစီးရေ ၂၅ စီး၊ ၂၃ စီး အဲ့လိုပြောကြတယ်ဗျ။ အဲ့ဒီစစ်ကားတွေ ထပ်ရောက်လာတာ။ ကားတိုင်းမှာလည်း စစ်သားတွေ ပါလာတယ်။ ပြီးခဲယမ်းသယ်တဲ့ကားတွေပေါ့၊ ပြောရမယ်ဆိုရင် စစ်မိုးကာကြီးတွေ အလုံပိတ် ထားတဲ့ ကားကြီးတွေလည်း ရောက်ထားတယ်ဆိုတော့ မိုးကုတ်တစ်ဝိုက် နယ်မြေရှင်းလင်းဖို့ ဒါမှမဟုတ် အနီးနားက မိုးမိတ်နဲ့ မဘိမ်းဘက်ကို စစ်ကြောင်းထိုးဖို့ ပြင်နေတာလို့ ခန့်မှန်းရတယ်” ဟု ပြောသည်။ ထို့အပြင် လက်နက်ခဲယမ်းများ တင်ဆောင်လာသည့် စစ်ကား အများအပြား ရောက်ရှိနေသည်ဟု မြို့ခံအချို့က ဆိုသည်။ လက်ရှိတွင် မိုးကုတ်မြို့လယ်ကောင်၌ စစ်တပ် လက်အောက်ခံ တပ်သားများက သွားလာလှုပ်ရှားနေကြသဖြင့် မြို့ခံများအကြား စိုးရိမ်မှုများ မြင့်တက်လျက်ရှိသည်။ မြို့ခံတစ်ဦးက “မြို့ထဲမှာ စစ်ကား ၁၀ စီးလောက် လက်နက်တွေနဲ့ သွားနေတာ တွေ့ခဲ့ရတယ်။ ပြင်ဦးလွင် လမ်းဘက်ကနေ ဝင်လာတာဗျ။ စစ်ကားတွေ ရောက်လာပြီးမှ ပေါ်တာဆွဲတာတွေ၊ စစ်သားစုဆောင်းတာတွေ လုပ်လာမှာစိုးလို့ အခုဆို လူတွေက သတိနဲ့ သွားလာနေကြရတယ်။ နောက်ပြီး သူတို့က မထင်ရင်မထင်သလို လူတွေကို ဖမ်းတာဆီးတာ၊ ခေါ်စစ်တာတွေလုပ်တတ်တယ်ဗျာ။ အထူးသဖြင့် ယောက်ကျားလေးတွေကိုပေါ့။ ဖုန်းပဲတောင်းစစ်သလိုလို ဘာလိုလိုနဲ့ ဖမ်းသွားတတ်တယ်။ အဲ့တော့ သတိထားရတာပေါ့ဗျာနော်” ဟု ပြောသည်။ မိုးကုတ်မြို့သည် ၁၀၂၇ စစ်ဆင်ရေး ဒုတိယပိုင်းအတွင်း တော်လှန်ရေးပူးပေါင်းတပ်များက တိုက်ခိုက်သိမ်းပိုက်ခဲ့ သော်လည်း ၂၀၂၅ ခုနှစ်၊ နိုဝင်ဘာလတွင် စစ်တပ်ထံ ပြန်လည်လွှဲပြောင်းပေးခဲ့ရသည့် မြို့ဖြစ်သည်။ လက်ရှိတွင် စစ်တပ်က စည်ပင်၊ လဝက နှင့် စီးပွားရေးဘဏ်တို့ကို ဖွင့်လှစ်ကာ အုပ်ချုပ်ရေးယန္တရားကို ပြန်လည် လည်ပတ်ရန် ကြိုးပမ်းနေသော်လည်း မြို့ပြင်ပတ်ဝန်းကျင်တွင် တော်လှန်ရေးတပ်များ လှုပ်ရှားနေဆဲ ဖြစ်သည်။ ထို့အပြင် ပြီးခဲ့သည့် မတ်လအတွင်းကလည်း မိုးကုတ်မြို့ အရှေ့ပိုင်းနှင့် အနောက်ပိုင်းရှိ ဘော်ဗဒါန်းနှင့် ကျောက်ဆင်ကျေးရွာများဘက်တွင် တိုက်ပွဲများ ပြင်းထန်ခဲ့ပြီး စစ်တပ်ဘက်မှ ထိခိုက်သေဆုံးမှု များပြားခဲ့ သည်။ အဆိုပါ တိုက်ပွဲများကြောင့် စစ်တပ်က စစ်ကူများ ဆက်တိုက် ပို့ဆောင်နေခြင်းဖြစ်ပြီး ရှေ့တန်းစစ်မျက်နှာများ တွင်လည်း တိုက်ပွဲများ ပိုမိုပြင်းထန်လာနိုင်သည်ဟု ဒေသခံများက ပြောသည်။ ဓာတ်ပုံ-ပုံဟောင်း #မိုးကုတ်တိုက်ပွဲ #မိုးကုတ်မြို့

မိုးကုတ်တွင် စစ်တပ်က စစ်ကား ၃၀ ခန့်ဖြင့် စစ်အင်အားဖြည့်တင်း

Apr 30

ဖားဆောင်းလမ်းပိုင်းများ ၂ လကြာအထိ စစ်တပ် မဖွင့်နိုင်သေး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၃၀ ရက်။ ကရင်နီပြည်၊ ဖားဆောင်းမြို့ကို ပြန်လည်ထိန်းချုပ်နိုင်ပြီဖြစ်၍ လမ်းပိုင်းများအားလုံး မကြာမီပြန်ဖွင့်မည်ဟု စစ်တပ်က ကြေညာခဲ့သော်လည်း နှစ်လကျော်ကြာမြင့်လာသည့် တိုင်အောင် ဖွင့်လှစ်နိုင်ခြင်း မရှိသေးဘဲ တိုက်ပွဲ များ ဆက်လက်ပြင်းထန်နေကြောင်း စစ်ရေးသတင်းရင်းမြစ်များက ပြောသည်။ စစ်တပ်သည် ၂၀၂၆ ခုနှစ်ဆန်းပိုင်းတွင် ဖားဆောင်းမြို့ထဲသို့ ပြန်လည်ဝင်ရောက်နိုင်ခဲ့ပြီးနောက်၊ လွိုင်ကော်-ဖားဆောင်း လမ်းတစ်ခုလုံးကို ပြန်လည်ဖွင့်လှစ်တော့မည်ဟု ဖေဖော်ဝါရီလ ၁၅ ရက်နေ့တွင် ထုတ်ပြန်ခဲ့သည်။ သို့သော် ကရင်နီတော်လှန်ရေး ပူးပေါင်းတပ်ဖွဲ့များ၏ ကြားဖြတ်တိုက်ခိုက်မှုများကြောင့် လက်ရှိအချိန်ထိ ထိုလမ်းပိုင်းအား ဖွင့်လှစ်ရန် ခက်ခဲနေဆဲဖြစ်သည်။ ကရင်နီအမျိုးသားများကာကွယ်ရေးတပ် (KNDF) မှ စစ်ရေးသတင်းရင်းမြစ်တစ်ဦးက “စခ(စစ်တပ်) ဘက် ကတော့ လမ်းပြန်ဖွင့်ဖို့ ကြိုးစားနေတာတွေရှိတယ်၊ ဒါပေမဲ့ ကျနော်တို့ဘက်ကတော့ ပြန်လည်ထိန်းချုပ်ဖို့ အလူးအလဲ ကြိုးစားနေကြတော့ လမ်းဖွင့်ဖို့ ခက်ခဲလိမ့်မယ်” ဟု ပြောသည်။ ဖေဖော်ဝါရီလလယ်မှ ဧပြီလ ၂၉ ရက်နေ့ အတွင်း ဖရူဆို–ဘောလခဲ-ဖားဆောင်း လမ်းပိုင်းရှိ စစ်တပ်ယာဉ်တန်း များကို KNDF နှင့် ပူးပေါင်းတပ်ဖွဲ့များက အနည်းဆုံး (၁၀) ကြိမ်ထက်မနည်း ကြားဖြတ်တိုက်ခိုက်ခဲ့သည်။ ဧပြီလ ၂၆ ရက်ကလည်း ဒီးမော့ဆို - ဖရူဆို လမ်းပိုင်းဖြစ်သည့် ဖရူဆိုမြို့နယ်၊ ဒေါညေးခူကျေးရွာဘက်မှ ထိုးစစ်ဆင်လာသည့် စစ်တပ် စစ်ကြောင်း သည် တော်လှန်ရေးတပ်ဖွဲ့များ၏ ခုခံမှုကြောင့် နောက်တစ်နေ့တွင် ပြန်လည်ဆုတ်ခွာသွားခဲ့ရသည်။ လက်ရှိဖြစ်ပေါ်နေသည့် တိုက်ပွဲများနှင့် လမ်းပိုင်းများ ပိတ်ထားရမှုကြောင့်လည်း ဒေသခံပြည်သူများမှာ ကျန်းမာရေးနှင့် ကုန်စည်စီးဆင်းမှုအတွက် အခက်အခဲများနှင့် ကြုံတွေ့နေရသည်။ မြေပြင်အခြေအနေသိသူတစ်ဦးက “လမ်းပိတ်သွားတော့ အထူးသဖြင့် အရှေ့ခြမ်းကလူတွေက အနောက်ခြမ်း ကို ကူးလို့မရတော့ဘူး။ ကုန်ပစ္စည်းတွေအစ ကျန်းမာရေးကိစ္စအဆုံး အနောက်ခြမ်းမှာပဲ ပိုစုံတော့ အဲ့ဒီ အခက် အခဲ ရှိသွားတယ်။ အရမ်းအရေး ပေါ်ဆိုရင်တော့ ရဲဘော်တွေက လမ်းရှင်းပြီး လူထုကို ပို့ပေးတယ်၊ ဒါပေမဲ့ အန္တရာယ်အရမ်းများတယ်” ဟု ပြောသည်။ ၎င်းက ဆက်လက်၍ "ဗမာစစ်တပ်က တောင်ပေါ်မှာဆိုတော့ လှမ်းမြင်ရတော့ ၉၇ တွေနဲ့ လှမ်းလှမ်းထုတာ။ အရပ်သားတွေကလည်း တောင်းဆိုတော့ ရှေ့ကင်းက ရဲဘော်တွေက လမ်းရှင်းပြီး ကာပေးပြီး ကူးကြတာ မျိုးပေါ့။ ဒါမယ့် အန္တရာယ်အရမ်းများတယ်။ ထိကြတယ် ရဲဘော်တွေ။ အခုတော့ မဖြစ်မနေမှ ကူးပေးတော့ တာမျိုးပေါ့နော်” ဟု ဆက်ပြောသည်။ ၉၇ ဆိုသည်မှာ ၉၇ အမျိုးအစား အမြှောက် လက်နက်ကြီးကို ဆိုလိုသည်။ လက်ရှိတွင် ပြည်ထောင်စု လမ်းမကြီးတစ်လျှောက်ရှိ ကျေးရွာများစွာမှ ပြည်သူများမှာ ရွာလုံးကျွတ် စစ်ဘေး ရှောင်နေရဆဲဖြစ်ပြီး ကုန်သွယ်ရေးနှင့် ခရီးသွားလာမှုများလည်း ရပ်တန့်နေသည်။ ထို့အပြင် စစ်တပ်သည် ဖားဆောင်းမှ တစ်ဆင့် ခဲသတ္တုထွက်ရှိရာ မော်ချီးဒေသသို့ ဆက်လက် စစ်ကြောင်း ထိုးရန် ပြင်ဆင်နေသဖြင့် ပြည်သူများအနေဖြင့် စစ်ရေးအသိ သတိဖြင့် နေထိုင်ကြရန် တော်လှန်ရေးတပ်ဖွဲ့များ က သတိပေးနှိုးဆော်ထားသည်။ #ဖားဆောင်းတိုက်ပွဲ #ကရင်နီပြည်တိုက်ပွဲ #KNDF #KA #PDF

ဖားဆောင်းလမ်းပိုင်းများ ၂ လကြာအထိ စစ်တပ် မဖွင့်နိုင်သေး

Apr 30

KNU နယ်မြေအတွင်း ဧက ၄ သိန်းကျယ်သော သဘာဝ နယ်မြေ ဖော်ထုတ်ကြေညာ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၃၀ ရက်။ KNU တပ်မဟာ ၄ နယ်မြေတွင် ဒေသခံများက ဌာနေတိုင်းရင်းသား လူမျိုးစု ထိန်းသိမ်းနယ်မြေ ဟုခေါ်သည့် ဧက ၄ သိန်းခန့်ရှိသော သဘာဝ နယ်မြေတစ်ခုကို ဖော်ထုတ်လိုက်သည်၊ ။ KNU ကရင့်အမျိုးသား အစည်းအရုံး မြိတ်-ထားဝယ်ခရိုင်အတွင်း သရက်ချောင်းမြို့နယ်အတွင်းမှ ဌာနေတိုင်းရင်းသားများ၏ ထုံးတမ်းစဉ်လာနှင့် သဘာဝပတ်ဝန်းကျင်ကို ကာကွယ်ရန်အတွက် ‘ပေါခလိုး ဌာနေတိုင်းရင်းသား လူမျိုးစုတို့ ထိန်းသိမ်းနယ်မြေ’ ကို တရားဝင် အတည်ပြု သတ်မှတ်လိုက်ကြောင်း ပေါခလိုးဌာနေလူမျိုးစုများက ထုတ်ပြန်လိုက်သည်။ အဆိုပါ ထိန်းသိမ်းနယ်မြေသည် ကရင်အမျိုးသားအစည်းအရုံး (KNU) တပ်မဟာ ၄၊ မြိတ်-ထားဝယ်ခရိုင်၊ သရက်ချောင်း (ကစယ်ဒို) မြို့နယ်တွင် တည်ရှိပြီး ၂၀၂၆ ခုနှစ် ဧပြီလ ၂၂ ရက်နေ့တွင် အတည်ပြုခဲ့ခြင်းဖြစ်သည်။ စုစုပေါင်း ဧက ၃၅၈,၄၉၃ (၁.၄၅၁ စတုရန်းကီလိုမီတာခန့်) ကျယ်ဝန်းကာ ကျေးရွာပေါင်း ၂၄ ရွာမှ လူဦးရေ ၁၁,၅၀၀ ကျော်၏ လူနေမှုဘဝနှင့် ယဉ်ကျေးမှုများကို လွှမ်းခြုံထားသည်။ နယ်မြေဖော်ဆောင်ရသည့် ရည်ရွယ်ချက်နှင့်ပတ်သက်၍ KNU တပ်မဟာ ၄ အတွင်းရေးမှူး ပဒိုစောအယ်နားက “အဓိက ဖော်ပြချင်တာက ကျနော်တို့ ဘိုးဘေးမိဘတွေရဲ့ နယ်မြေဒေသတွေကို အတင်းအဓမ္မလာရောက် လုယူ တာကို ရပ်တန့်ရမယ်။ သယံဇာတ ခိုးယူမှုတွေကို ရပ်တန့်ရမယ်။ ကျနော်တို့ ဘိုးဘေးမိဘတွေ ထိန်းသိမ်းခဲ့ကြ တဲ့ ရိုးရာယဉ်ကျေးမှု ဓလေ့ထုံးတမ်းတွေကို နိုင်ငံတကာနဲ့ ငွေကြေးချမ်းသာသူတွေ၊ တိုင်းပြည်ကို အုပ်ချုပ်သူ တွေက လက်ခံအသိအမှတ်ပြုရမယ်” ဟု ပြောသည်။ ယခုနယ်မြေ သတ်မှတ်နိုင်ခြင်းသည် ကုလသမဂ္ဂ၏ ၂၀၃၀ အရောက်တွင် ကမ္ဘာ့မြေမျက်နှာပြင်၏ ၃၀ ရာခိုင်နှုန်း ကို သဘာဝနယ်မြေအဖြစ် ထိန်းသိမ်းရမည်ဆိုသည့် ပန်းတိုင်ကို များစွာအထောက်အကူပြုနိုင်ကြောင်း ကရင် သဘာဝ ပတ်ဝန်းကျင်နဲ့ လူမှုရေးဆိုင်ရာ လှုပ်ရှားမှုကွန်ယက် (KESAN) မှ ဒါရိုက်တာ စောပေါလ်စိန်ထွား က ပြောသည်။ စောပေါလ်စိန်ထွားက “ကျနော်တို့ ထိန်းသိမ်းကာကွယ်မယ်လို့ သတ်မှတ်ထားတဲ့ အကျယ်အဝန်းက ဧက လေးသိန်းနီးနီးလောက် ရှိတယ်။ ဒီအကျယ်အဝန်းဟာ ကမ္ဘာ့ကုသလမဂ္ဂက ချမှတ်ထားတဲ့ ကမ္ဘာမြေကို ကာကွယ်စောင့်ရှောက်ဖို့နဲ့ စိမ်းလန်းစိုပြည်တဲ့ သစ်တောကြီးတွေ ၃၀ ရာခိုင်နှုန်း ရှိရမယ်ဆိုတာကို အများကြီး အထောက်အပံ့ ဖြစ်စေတယ်။ ဒါက လူသားတွေအတွက် သတင်းကောင်းဖြစ်သလို တိရစ္ဆာန်တွေအတွက်လည်း ဖြစ်တယ်” ဟု ပြောသည်။ ပေါခလိုးဒေသသည် ဆယ်စုနှစ်များစွာ မြေယာသိမ်းပိုက်မှုနှင့် စစ်ရေးလှုပ်ရှားမှုဒဏ်များကို ခံစားခဲ့ရပြီး ၂၀၁၅ ခုနှစ် NCA လက်မှတ်ရေးထိုးပြီးနောက်ပိုင်း အလုံးအရင်းနှင့် ဝင်ရောက်လာသည့် ပျက်စီးမှုများသော စီမံကိန်း များကို တုံ့ပြန်ရန် ယခုကဲ့သို့ ကြေညာခဲ့ခြင်း ဖြစ်သည်။ ကိုယ်ပိုင်ပြဌာန်းခွင့်နှင့် ပတ်သက်၍ ပဒိုစောအယ်နားက “ဒီဒေသဟာ ကျနော်တို့ တိုင်းပြည်ဖြစ်တယ်။ ဒီဒေသ ဟာ ကျနော်တို့ အိပ်ရာ ဖြစ်တယ်။ ကျနော်တို့ ဇာတိချက်ကြွေတဲ့နေရာ ဖြစ်တယ်။ ဆိုတော့ ကျနော်တို့ဟာ ကိုယ့်ကြမ္မာကိုယ် ဖန်တီးခွင့်အတိုင်း ဒီဒေသကို ကျနော်တို့ အုပ်ချုပ်သွားမှာ ဖြစ်တယ်။ ဘိုးဘေးဘီဘင် အဆက် ဆက်က ထိန်းသိမ်းလာခဲ့တဲ့ ဒီဒေသကို ကျနော်တို့ ဆက်ပြီး ထိန်းသိမ်းပြီး အုပ်ချုပ် သွားမှာ ဖြစ်တယ်လို့ ပြောချင်တယ်” ဟု ဆက်ပြောသည်။ ပေါခလိုးဒေသသည် သက်ရှိ နယ်မြေတစ်ခုဖြစ်ပြီး ဒေသခံ ဌာနေလူမျိုးစုများမှ မျိုးဆက် အဆက်ဆက် စီမံ အုပ်ချုပ်လာသည့် နယ်မြေဒေသဖြစ်သည်ဟု ပေါခလိုး ဌာနေတိုင်းရင်းသားလူမျိုးစုများ ဆိုသည်။ ပေါခလိုးဌာနေ တိုင်းရင်းသား လူမျိုးစုတို့ ထိန်းသိမ်းနယ်မြေသည် ပြင်ပမှ ဝင်ရောက်စွတ်ဖက်မှုများကို လက်ခံ မည် မဟုတ်ဘဲ ကိုယ်ပိုင်ပြဌာန်းခွင့်နှင့် အုပ်ချုပ်ရေးစနစ်ကို အခြေခံထားသည်ဟု ပဒိုစောအယ်နားက ပြော သည်။ ယခု ပေါခလိုးနယ်မြေသည် KNU နယ်မြေအတွင်း တတိယမြောက် အတည်ပြုသည့် ဌာနေထိန်းသိမ်းနယ်မြေ ဖြစ်သည်။ ယခင်က ၂၀၁၉ ခုနှစ်တွင် တပ်မဟာ ၅ ၌ သံလွင်ငြိမ်းချမ်းရေးဥယျာဉ်နှင့် ၂၀၂၄ ခုနှစ်တွင် တပ်မဟာ ၂ ၌ သောသီတောအူ ဥယျာဉ်တို့ကို အတည်ပြုခဲ့ပြီးဖြစ်သည်။ ကော်သူးလေ ဗဟိုသစ်တောဌာနမှူး ပဒိုမန်းဘထွန်းကလည်း အခြားနယ်မြေများတွင်လည်း ဆက်လက် အကောင်အထည်ဖော်သွားရန် ရှိကြောင်း အသိပေးပြောဆိုထားသည်။ #ပေါခလိုးဌာနေတိုင်းရင်းသားလူမျိုးစုထိန်းသိမ်းနယ်မြေ #ပေါခလိုးဒေသ #သရက်ချောင်းမြို့နယ် #ကစယ်ဒိုမြို့နယ် #KNU

KNU နယ်မြေအတွင်း ဧက ၄ သိန်းကျယ်သော သဘာဝ နယ်မြေ ဖော်ထုတ်ကြေညာ

Apr 30

ကမ္ဘာ့ သတင်း လွတ်လပ်ခွင့် ၂၅ နှစ်အတွင်း အနိမ့်ဆုံးကို ကျဆင်း သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဧပြီလ ၃၀ ရက်။ နယ်စည်းမခြားသတင်းထောက်များအဖွဲ့ (RSF) ရဲ့ ၂၀၂၆ ခုနှစ် ကမ္ဘာ့သတင်းလွတ်လပ်ခွင့်အညွှန်းကိန်း (World Press Freedom Index) အရ ကမ္ဘာတစ်ဝန်းက သတင်းလွတ်လပ်ခွင့်ဟာ ၂၅ နှစ်အတွင်း အနိမ့်ဆုံးအဆင့်ကို ကျဆင်းသွားတယ်လို့ ဖော်ပြထားပါတယ်။ ကမ္ဘာ့နိုင်ငံပေါင်း ၁၈၀ ထဲက ထက်ဝက်ကျော်ဟာ သတင်းလွတ်လပ်ခွင့် “ခက်ခဲ” (Difficult) ဒါမှမဟုတ် “အလွန်ဆိုးရွား” (Very Serious) တဲ့ အခြေအနေကို ရောက်ရှိနေပါတယ်။ နိုင်ငံပေါင်း ၁၁၀ မှာ သတင်းသမားတွေကို နည်းမျိုးစုံနဲ့ ရာဇဝတ်သားလို ဖမ်းဆီးအရေးယူတာတွေ ရှိနေပါတယ်။ ဂါဇာကမ်းမြောင်ဒေသမှာ ၂၀၂၃ အောက်တိုဘာကစပြီး သတင်းထောက်ပေါင်း ၂၂၀ ကျော် သတ်ဖြတ်ခံခဲ့ရတာကြောင့် အစ္စရေးစစ်တပ်ဟာ သတင်းသမားတွေကို အသေအပျောက်အများဆုံးဖြစ်စေတဲ့ လက်သည်လို့ ဖော်ပြထားပါတယ်။ သတင်းလွတ်လပ်ခွင့်ရှိတဲ့ နိုင်ငံတွေထဲမှာ နော်ဝေ၊ နယ်သာလန်နဲ့ အက်စ်တိုးနီးယားတို့က ထိပ်ဆုံးမှာ ရှိနေပါတယ်။ အမေရိကန်ပြည်ထောင်စုဟာ သမ္မတ ဒေါ်နယ်ထရန့် လက်ထက်မှာ သတင်းမီဒီယာတွေအပေါ် တိုက်ခိုက်မှုတွေကြောင့် အဆင့် ၆၄ (Problematic အဆင့်) ကို ၇ ဆင့် လျောကျသွားပါတယ်။ ရုရှား (၁၇၂) နဲ့ အီရန် (၁၇၇) တို့ဟာ သတင်းသမားတွေအတွက် အန္တရာယ်အရှိဆုံး နိုင်ငံ ၁၀ ခုစာရင်းမှာ ပါဝင်နေပါတယ်။ RSF ရဲ့ နောက်ဆုံးထုတ်ပြန်ချက်တွေနဲ့ လက်ရှိအခြေအနေအရ မြန်မာနိုင်ငံဟာ “အလွန်ဆိုးရွား” (Very Serious) တဲ့ အနီရောင်အဆင့် နယ်ပယ်ထဲမှာ ရှိနေဆဲဖြစ်ပါတယ်။ အညွန်းကိန်းအရ နိင်ငံပေါင်း ၁၇၉ နိုင်ငံမှာ နံပါတ် ၁၆၆ မှာ ရှိနေပါတယ်။ မြန်မာနိုင်ငံဟာ ကမ္ဘာ့သတင်းလွတ်လပ်ခွင့် အဆိုးဆုံးနိုင်ငံတွေထဲမှာ အမြဲတမ်း ပါဝင်နေပြီး ရုရှား၊ အီရန်၊ မြောက်ကိုရီးယားတို့နဲ့အတူ ဇယားရဲ့ အောက်ခြေနားမှာ ရှိနေပါတယ်။ ၂၀၂၁ ခုနှစ်နောက်ပိုင်း သတင်းသမားတွေကို ဖမ်းဆီးထောင်ချတာ၊ သတင်းဌာနလိုင်စင်တွေ ပိတ်သိမ်းတာနဲ့ သတင်းထောက်တွေ စစ်ပွဲအတွင်း သေဆုံးတာတွေကြောင့် မြန်မာနိုင်ငံဟာ သတင်းသမားတွေအတွက် ဒုတိယမြောက် အကျဉ်းထောင်သဖွယ် ဖြစ်နေတယ်လို့ RSF က အမြဲတမ်း ထောက်ပြလေ့ရှိပါတယ်။ #WorldPressFreedomIndex #နယ်စည်းမခြားသတင်းထောက်များအဖွဲ့RSF

ကမ္ဘာ့ သတင်း လွတ်လပ်ခွင့် ၂၅ နှစ်အတွင်း အနိမ့်ဆုံးကို ကျဆင်း

Apr 30

EU စက်မှု စည်းမျဉ်းသစ်အပေါ် တရုတ် လက်မခံနိုင် သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဧပြီလ ၃၀ ရက်။ ဥရောပသမဂ္ဂ (EU) က ချမှတ်ရန် ပြင်ဆင်နေသည့် "Buy European" စက်မှုအက်ဥပဒေနှင့် ဆိုက်ဘာလုံခြုံရေး စည်းမျဉ်းအသစ်များသည် ခွဲခြားဆက်ဆံမှုရှိနေကြောင်း တရုတ်နိုင်ငံက စွပ်စွဲလိုက်ပြီး လိုအပ်ပါက လက်တုံ့ပြန်ဆောင်ရွက်သွားမည်ဟု သတိပေးလိုက်သည်။ EU အနေဖြင့် ဆိုက်ဘာလုံခြုံရေးအရ "အန္တရာယ်ရှိသော ပစ္စည်း ပေးသွင်းသူများ" ဟု သတ်မှတ်ကာ တရုတ်နည်းပညာကုမ္ပဏီ (ဥပမာ- Huawei) များကို ဖယ်ထုတ်ရန် ကြိုးပမ်းနေခြင်းကို တရုတ်ဘက်က ကန့်ကွက်နေခြင်းဖြစ်သည်။ ဥရောပထုတ်ကုန်များကို ဦးစားပေးဝယ်ယူမည့် "Industrial Accelerator Act" သည် ကမ္ဘာ့ကုန်သွယ်ရေးအဖွဲ့ (WTO) ၏ စည်းမျဉ်းများကို ချိုးဖောက်နေပြီး ဥရောပ၏ စံနှုန်းသစ်များသည် တရုတ်-ဥရောပ ကုန်သွယ်ရေးကို အဟန့်အတားဖြစ်စေကြောင်း တရုတ်စီးပွားရေးဝန်ကြီးဌာနက ထုတ်ပြန်ခဲ့သည်။ ဆိုက်ဘာလုံခြုံရေးဆိုင်ရာ ကန့်သတ်ချက်များနှင့် နည်းပညာလွှဲပြောင်းမှုဆိုင်ရာ စည်းကမ်းချက်များကို ပယ်ဖျက်ပေးရန် တရုတ်သံတမန်များက EU အဖွဲ့ဝင်နိုင်ငံများသို့ ဖိအားပေးစာများ ပေးပို့ထားသည်။ #BuyEuropean #စက်မှုအက်ဥပဒေ #ဆိုက်ဘာလုံခြုံရေးစည်းမျဉ်းအသစ် #EU #အီးယူ

EU စက်မှု စည်းမျဉ်းသစ်အပေါ် တရုတ် လက်မခံနိုင်

Apr 30

အိမ်ဖြူ ညစာစားပွဲ သေနတ်သမားအား သမ္မတအား လုပ်ကြံမှုဖြင့် တရားစွဲ သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဧပြီလ ၃၀ ရက်။ အိမ်ဖြူတော်သတင်းထောက်များအသင်း ညစာစားပွဲ (WHCD) တွင် သမ္မတထရမ့်အား လုပ်ကြံရန် ကြိုးပမ်းခဲ့သည့် တရားခံ Cole Thomas Allen အား ဖမ်းဆီးထိန်းသိမ်းထားရန် ဖက်ဒရယ်အစိုးရရှေ့နေများက ဗုဒ္ဓဟူးနေ့တွင် တရားရုံး၌ လျှောက်ထားခဲ့သည်။ အသက် ၃၁ နှစ်အရွယ်ရှိ တရားခံသည် ကယ်လီဖိုးနီးယားမှ ဝါရှင်တန်သို့ ရထားဖြင့် လာရောက်ခဲ့သည်။ သူသည် သေနတ်၊ ဓားနှင့် ခဲယမ်းအမြောက်အမြားဖြင့် လုပ်ကြံရန် တစ်လနီးပါး ကြိုတင်စီစဉ်ခဲ့ကြောင်း အချက်အလက်များက ပြသနေသည်။ သူသည် တည်းခိုမည့် ဟိုတယ်ကို ဧပြီလဆန်းကတည်းက ငှားရမ်းထားခဲ့ခြင်း ဖြစ်သည်။ တရားခံသည် လုံခြုံရေးစစ်ဆေးရေးဂိတ်ကို ကျော်ဖြတ်ကာ သမ္မတရှိရာ ခန်းမလှေကားဘက်သို့ သေနတ်ဖြင့် တစ်ချက်ပစ်ခတ်ခဲ့သော်လည်း လုံခြုံရေးအဖွဲ့ (Secret Service) က အချိန်မီ ဟန့်တားဖမ်းဆီးနိုင်ခဲ့သည်။ အစိုးရရှေ့နေများက ယင်းလုပ်ရပ်ကို "ပြင်းထန်သော နိုင်ငံရေးအကြမ်းဖက်မှု" အဖြစ် သတ်မှတ်ခဲ့သည်။ တရားခံ၏ ရှေ့နေများကမူ ထောင်တွင်း၌ ဥပဒေကြောင်းအရ တွေ့ဆုံခွင့်များ ကန့်သတ်ခံထားရသည့်အပေါ် ကန့်ကွက်ထားသည်။ #ColeThomasAllen

အိမ်ဖြူ ညစာစားပွဲ သေနတ်သမားအား သမ္မတအား လုပ်ကြံမှုဖြင့် တရားစွဲ

1 2 3 … 17 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

အမေရိကန်တွင် ပညာသင်ကြားနိုင်မည့် Hubert Humphrey Fellowship အစီအစဉ်မှ လျှောက်လွှာခေါ်
ဟားခါး-ထန်တလန် လမ်းပိုင်းကို စစ်တပ် ပြန်ထိန်းချုပ်ပြီး CDF-Zophei ဌာနချုပ်ကို ဗုံးကြဲ
အမေရိကန်က အီရန်ကို ဒုတိယမြောက်ညအဖြစ် ဆက်တိုက်ဗုံးကြဲ၊ ရေနံဈေးနှုန်းများ မြင့်တက်
ပါကစ္စတန်က အာဖဂန်ကို လေကြောင်း တိုက်ခိုက်မှု ပြန်လုပ်
ထိုင်းအစိုးရနှင့် FBI ပူးပေါင်းဆောင်ရွက်မှု တိုးမြှင့်

Archives

Archives

×Close