မြောက်ကိုရီးယားကပဲ့ထိန်းဒုံးနှင့် အခြား ဒုံးကျည်များ အတွဲလိုက်ပစ်ခတ်
သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၂၇ ရက်။
မြောက်ကိုရီးယားနိုင်ငံသည် ပြီးခဲ့သည့် ယမန်နေ့ အင်္ဂါနေ့က ၎င်း၏ အနောက်ဘက်ကမ်းရိုးတန်းအနီး ဂျောင်ဂျူမြို့မှနေ၍ ပင်လယ်ပြင်သို့ အနီးကပ်ပစ် ပဲ့ထိန်းဒုံးကျည် (Ballistic Missile) တစ်စင်း အပါအဝင် အခြားလက်နက်မျိုးစုံကို တစ်ပြိုင်နက်တည်း ပစ်ခတ်ခဲ့ကြောင်း တောင်ကိုရီးယား စစ်ဦးစီးချုပ်ရုံးက သတင်းထုတ်ပြန်ခဲ့သည်။
ယခုပစ်ခတ်မှုသည် ကီလိုမီတာ ၈၀ ခန့် ပျံသန်းသွားခဲ့ပြီး၊ အမေရိကန်နှင့် တောင်ကိုရီးယားတို့၏ လေကြောင်းရန်ကာကွယ်ရေးစနစ်များကို ရှောင်ကွင်းနိုင်စွမ်း ရှိ၊ မရှိ စမ်းသပ်ရန်အတွက် အတွဲလိုက်ပစ် ဒုံးကျည်စနစ် (Multiple Rocket Launch Systems) များအပါအဝင် လက်နက်အမျိုးအစား စုံလင်စွာ အသုံးပြုခဲ့ခြင်းဖြစ်ကြောင်း စစ်ရေးမီဒီယာများက သုံးသပ်ထားကြသည်။
ယခုပစ်ခတ်မှုသည် ပြီးခဲ့သည့်အပတ်က ပေကျင်းမြို့ ထိပ်သီးဆွေးနွေးပွဲအတွင်း ရုရှားသမ္မတ ဗလာဒီမီယာ ပူတင်နှင့် တရုတ်သမ္မတ ရှီကျင့်ဖျင်တို့က မြောက်ကိုရီးယားအပေါ် အနောက်အုပ်စု၏ ဖိအားပေးမှုများကို ဆန့်ကျင်ကြောင်း ပူးတွဲထုတ်ဖော်ပြောကြားခဲ့ပြီး ရက်ပိုင်းအကြာတွင် ပေါ်ပေါက်လာခြင်းဖြစ်သည်။
တစ်ဖက်တွင်လည်း တောင်ကိုရီးယားသမ္မတ လီဂျေမြောင်က ပုံမှန်အစိုးရအဖွဲ့အစည်းအဝေး၌ မိန့်ခွန်းပြောကြားရာတွင် တောင်ကိုရီးယားအနေဖြင့် မိမိတို့လုံခြုံရေးကို မိမိတို့ကိုယ်တိုင် တာဝန်ယူစောင့်ရှောက်မည့် ပြတ်သားမှုကို ပြသရန်လိုအပ်ကြောင်း ထည့်သွင်းပြောကြားခဲ့သည်။
ထို့ပြင် စစ်ရေးစွမ်းရည်မြှင့်တင်ရန်အတွက် ဉာဏ်ရည်တု (AI) နည်းပညာ၊ ဒရုန်းစွမ်းရည်များအပြင် နျူကလီးယားစွမ်းအင်သုံး ရေငုပ်သင်္ဘော ပိုင်ဆိုင်နိုင်ရေး ကိစ္စရပ်များကိုပါ အလေးပေး တိုက်တွန်းသွားခဲ့သည်။
