အစာရှောင်ခြင်း က ဦးနှောက်စွမ်းဆောင်ရည်ကို မထိခိုက်ကြောင်းသုတေသနတွေ့ရှိ
သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၂၇ ရက်။
ခန္ဓာကိုယ် အလေးချိန်လျှော့ချဖို့အတွက် အစာရှောင်ခြင်း (Fasting) ပြုလုပ်ရာမှာ အစာရေစာ ပြတ်လတ်မှုကြောင့် ဦးနှောက်စွမ်းဆောင်ရည်နဲ့ စဉ်းစားတွေးခေါ်မှုကို ထိခိုက်စေနိုင်တယ်လို့ လူအများစုက ယူဆထားကြပါတယ်။
မကြာသေးမီက ထွက်ပေါ်လာတဲ့ အကြီးစား သုတေသနသုံးသပ်ချက်အသစ် (Massive Study Review) အရ ထိုယူဆချက်ဟာ အမြဲတမ်းမမှန်ကန်ကြောင်း ဖော်ထုတ်နိုင်ခဲ့ပါတယ်။
သြစတြီးယားနိုင်ငံ ပါရီလော့ဒရွန် တက္ကသိုလ် (Paris Lodron University) မှ စိတ်ပညာရှင် ခရစ္စတော့ဖ် ဘန်ဘာ့ဂ် (Christoph Bamberg) နှင့် နယူးဇီလန်နိုင်ငံ အော့ကလန် တက္ကသိုလ် (University of Auckland) မှ သိပ္ပံပညာရှင် ဒေးဗစ် မိုရိုး (David Moreau) တို့ဟာ အချက်အလက်ပေါင်းများစွာကို စိစစ်ခဲ့ကြပါတယ်။
၎င်းတို့ဟာ လူပေါင်း ၃,၄၈၄ ဦး ပါဝင်ခဲ့တဲ့ သိပ္ပံနည်းကျ ဆောင်းပါး ၆၃ စောင် (သုတေသန လေ့လာမှု ၇၁ ခု) ကို စုစည်းပြီး ဘေးဆီးယန်း စာရင်းအင်းနည်းလမ်း (Bayesian Statistics) ဖြင့် သေချာစွာ ပြန်လည်သုံးသပ်ခဲ့ကြတာ ဖြစ်ပါတယ်။
ပျမ်းမျှ ၁၂ နာရီဝန်းကျင် ကာလတို အစာရှောင်သူများနှင့် ပုံမှန်အာဟာရ မှီဝဲသူများအကြား မှတ်ဉာဏ်စွမ်းရည် (Memory Recall)၊ ဆုံးဖြတ်ချက်ချနိုင်မှု (Decision-making) နှင့် တုံ့ပြန်မှုမြန်ဆန်တိကျမှု (Response Speed and Accuracy) စတဲ့ အထွေထွေ ဦးနှောက်စွမ်းဆောင်ရည်ပိုင်းမှာ သိသာထင်ရှားတဲ့ ကွာခြားမှု မရှိကြောင်း တွေ့ရှိရပါတယ်။
အစာရှောင်ထားသူများသည် အစားအစာပုံရိပ်များ သို့မဟုတ် အစားအစာနှင့် ပတ်သက်သော စာလုံးများကို ကြည့်ရှုစစ်ဆေးရသည့် စမ်းသပ်မှုများတွင်သာ ရမှတ်အနည်းငယ် လျော့နည်းတတ်ပြီး၊ ပုံမှန်ကြားနေအကြောင်းအရာများကို စမ်းသပ်ရာတွင်မူ ဦးနှောက်စွမ်းရည် ကျဆင်းခြင်း မရှိဘူးလို့ဆိုပါတယ်။
ဆိုလိုတာက ဆာလောင်မှုဟာ အစားအစာနှင့် ဆက်စပ်သောအရာများပေါ်တွင်သာ အာရုံပြန့်လွင့်စေပြီး အထွေထွေ အလုပ်လုပ်နိုင်စွမ်းကို မထိခိုက်စေပါ။
အစာရှောင်ချိန် ၁၂ နာရီထက် ကျော်လွန်သွားပါက ဦးနှောက်စွမ်းဆောင်ရည် အနည်းငယ် ကျဆင်းလာတတ်သလို၊ အစာရှောင်သူများသည် ညနေပိုင်း သို့မဟုတ် နေ့နှောင်းပိုင်း စမ်းသပ်မှုများတွင် ပိုမိုအမှားများတတ်ကြောင်း တွေ့ရပါတယ်။
အထူးသဖြင့် ကလေးငယ်များနှင့် ဆယ်ကျော်သက်လူငယ်များတွင် အစာရှောင်ခြင်းကြောင့် ဦးနှောက်စွမ်းရည် သိသိသာသာ လျော့ကျနိုင်သဖြင့် ၎င်းတို့အတွက် ပုံမှန်သုံးနပ် စားသုံးရန် လိုအပ်ဆဲ ဖြစ်ပါတယ်။
ဒါကြောင့် ကျန်းမာသန်စွမ်းသော လူကြီးများအနေဖြင့် အချိန်ပိုင်း အစာရှောင်ခြင်း (Intermittent Fasting – IF) ကဲ့သို့သော စနစ်များကို ပြုလုပ်ရာတွင် မိမိတို့၏ ဦးနှောက်စွမ်းရည် သို့မဟုတ် အလုပ်လုပ်နိုင်စွမ်း ဝေဝါးသွားမည်ကို စိုးရိမ်ရန်မလိုကြောင်း သုတေသီများက အာမခံထားပါတယ်။
အစာရှောင်ခြင်းဟာ ခန္ဓာကိုယ်တွင်း ရောင်ရမ်းမှုတွေကို လျော့ကျစေပြီး နှလုံးသွေးကြောဆိုင်ရာ ကျန်းမာရေးကို ကောင်းမွန်စေနိုင်တဲ့ အကျိုးကျေးဇူးတွေ ရှိပေမယ့်လည်း လူတစ်ဦးချင်းစီ၏ ခန္ဓာကိုယ်အခြေအနေပေါ် မူတည်၍ ကွာခြားနိုင်တယ်လို့ ဆိုပါတယ်။
ဒါကြောင့် ကျွမ်းကျင်ကျန်းမာရေးပညာရှင်များနှင့် တိုင်ပင်ပြီးမှသာ မိမိနှင့် ကိုက်ညီမည့် နည်းလမ်းကို ရွေးချယ်အသုံးပြုသင့်တယ်လို့ သုတေသန တွေ့ရှိချက်မှာ ဖော်ပြထားပါတယ်။
