ဂရိ၊ ဘယ်လ်ဂျီယံ၊ စပိန်နှင့် ခရိုအေးရှားတွင် တောမီးများ စံချိန်တင် လောင်ကျွမ်း
သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၁၇ ရက်။
ဥရောပတိုက်တွင် အပူလှိုင်း ရိုက်ခတ်မှုနှင့်အတူ နိုင်ငံအများအပြား၌ တောမီးများ ဆိုးရွားစွာ လောင်ကျွမ်းလျက်ရှိသည်။
ဂရိနိုင်ငံတွင် တောမီး ၂ ခု ပြိုင်တူလောင်ကျွမ်းမှုကြောင့် လူ ၂ ဦး သေဆုံးပြီး အနည်းဆုံး ၁၀ ဦး ဒဏ်ရာရရှိခဲ့သည်။
မီးလောင်မှုကြောင့် လူပေါင်း ၅၀၀ နီးပါးကို ရေကြောင်းလိုင်းမှတစ်ဆင့် အရေးပေါ် ရွှေ့ပြောင်းပေးခဲ့ရကာ မီးသတ်တပ်ဖွဲ့ဝင် ၂၀၀ ခန့်က စစ်သင်္ဘောများ၊ မီးသတ်လေယာဉ်များ အသုံးပြု၍ ငြှိမ်းသတ်လျက်ရှိသည်။
ထို့အပြင် ဘယ်လ်ဂျီယံနိုင်ငံ အရှေ့ပိုင်း သဘာဝဘေးမဲ့တော၌ လောင်ကျွမ်းနေသည့် တောမီးသည် ဧရိယာ ဟက်တာ ၃,၀၀၀ ကျော်အထိ ကူးစက်ခဲ့ပြီး နိုင်ငံသမိုင်းတွင် အကြီးမားဆုံး စံချိန်တင် တောမီးဖြစ်လာခဲ့သည်။
အဆိုပါ မီးဘေးသည် ဂျာမနီနယ်စပ်ဘက်သို့ ဦးတည်ရွေ့လျားနေသဖြင့် နယ်စပ်အနီးနေ ပြည်သူများကို ဘေးလွတ်ရာ ရွှေ့ပြောင်းကြရန် နှိုးဆော်ထားရပြီး ဥရောပသမဂ္ဂ (EU) က အရေးပေါ် မီးသတ်ဟယ်လီကော်ပတာနှင့် လေယာဉ်များ ကူညီစေလွှတ်ထားသည်။
စပိန်နိုင်ငံ အာရာဂွန်ဒေသနှင့် ခရိုအေးရှား ကမ်းရိုးတန်းဒေသတို့တွင်လည်း တောမီးများ ဆိုးရွားစွာ လောင်ကျွမ်းလျက်ရှိသည်။
