အဆင့် ၅ စူပါတိုင်ဖုန်း မုန်တိုင်း ချန်ပီ ဂျပန်နိုင်ငံ အိုကီနာဝါသို့ ဦးတည် ရွေ့လျားနေ

သတင်းနှင့် မီဒီယာ ကွန်ရက်။
၂၀၂၆ ခုနှစ်၊ အောက်တိုဘာလ ၂၀ ရက်။

ပစိဖိတ်သမုဒ္ဒရာ အနောက်ပိုင်းတွင် ဖြစ်ပေါ်ခဲ့သည့် တိုင်ဖုန်းမုန်တိုင်း Champi (ချန်ပီ) သည် အလွန်အားကောင်းသည့် အဆင့် (၅) စူပါတိုင်ဖုန်းမုန်တိုင်းအဖြစ်သို့ ရောက်ရှိလာကြောင်း မိုးလေဝသဌာနများက ထုတ်ပြန်ထားသည်။

အဆိုပါ မုန်တိုင်းကြောင့် အမေရိကန်ပိုင် ဂူအမ်ကျွန်းတွင် ပျက်စီးမှုများ ဖြစ်ပေါ်ခဲ့ပြီး လာမည့် ကြာသပတေးနေ့တွင် ဂျပန်နိုင်ငံ အိုကီနာဝါပြည်နယ် တောင်ဘက်သို့ ချဉ်းကပ်လာနိုင်ကြောင်း ဂျပန် မိုးလေဝသအေဂျင်စီက သတိပေးထားသည်။

အမေရိကန် အမျိုးသား မိုးလေဝသဌာနနှင့် ဂျပန် မိုးလေဝသအေဂျင်စီတို့၏ ထုတ်ပြန်ချက်များအရ တိုင်ဖုန်း ချန်ပီ သည် ဖိလစ်ပိုင်ပင်လယ်ပြင်အတွင်းသို့ ရောက်ရှိနေပြီး အများဆုံး လေတိုက်နှုန်းမှာ တစ်နာရီလျှင် မိုင် ၁၆၀ (၂၅၈ ကီလိုမီတာ) အထိ ရှိနေသည်။

ဂျပန်မိုးလေဝသဌာနက မုန်တိုင်း၏ ဗဟိုလေပြင်း တိုက်ခိုက်နိုင်စွမ်းကို တစ်နာရီလျှင် ၂၅၂ ကီလိုမီတာအထိ ရှိနိုင်သော “အလွန်အားကောင်းသည့် တိုင်ဖုန်းမုန်တိုင်း” အဖြစ် သတ်မှတ်ထားသည်။

မုန်တိုင်းသည် အနောက်-အနောက်မြောက်ဘက်သို့ တစ်နာရီလျှင် ၂၀ ကီလိုမီတာ နှုန်းဖြင့် ရွေ့လျားနေပြီး ထိုင်ဝမ်ကျွန်းဘေးမှ ဖြတ်သန်းကာ လာမည့် ကြာသပတေးနေ့တွင် ဂျပန်နိုင်ငံ အိုကီနာဝါပြည်နယ် တောင်ဘက်ပိုင်းသို့ ဦးတည်ချဉ်းကပ်မည်ဟု ခန့်မှန်းရသည်။