ပလက်ဝ – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Tag Archive

Tag: ပလက်ဝ

AA ထိန်းချုပ်ရာ ပလက်ဝ၌ စစ်အုပ်စု လေကြောင်းမှ ဗုံးကြဲမှုကြောင့် ကလေးများအပါ ၅ ဦး သေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၂၄ ရက် ချင်းပြည်၊ ပလက်ဝမြို့နယ်၊ စိမ်းညင်းဝကျေးရွာကို စစ်အုပ်စုတပ်က ဂျက်ဖိုက်တာ ၂ စီးဖြင့် လေကြောင်းမှ ဗုံးကြဲတိုက်ခိုက်ခဲ့သဖြင့် ကလေးငယ်များ အပါအဝင် ဒေသခံ ၅ ဦး သေဆုံးပြီး ၁၇ ဦး ဒဏ်ရာရရှိခဲ့ကြောင်း ဒေသတွင်း စစ်ရေးသတင်း ရင်းမြစ်များက ပြောသည်။ ယနေ့ ဩဂုတ်လ ၂၄ ရက် နံနက်ပိုင်းတွင် စစ်အုပ်စုတပ်က စိမ်းညင်းဝကျေးရွာသို့ ဂျက်ဖိုက်တာ ၂ စီးဖြင့် နေ့လယ် ၁၁ နာရီ ၉ မိနစ်၊ ၁၁ နာရီ ၁၂ မိနစ်နှင့် ၁၁ နာရီ ၁၆ မိနစ်တို့တွင် ၃ ကြိမ်တိုင်တိုင် ဗုံးများ ကြဲချ တိုက် ခိုက်ခဲ့ခြင်း ဖြစ်သည်။ ရခိုင်ဒေသခံ ကုန်သည် အမျိုးသမီးတစ်ဦးက “ဂျက်ဖိုက်တာ ၂ စီးနဲ ပေါင် ၅၀၀ ဗုံးနှစ်လုံး၊ ပေါင် ၃၀၀ ဗုံး တစ်လုံးနဲ့ ရော့ကတ်သီး ၈ လုံးတို့နဲ့ ကြဲချတိုက်ခိုက်ခဲ့တာပါ၊ ဓမ္မာရုံအဆောင်မှာ ၁ လုံး၊ ရွာအလယ်မှာ ၃ လုံးနဲ့ ရွာအဆုံးမှာ ၁ လုံး ကျရောက်ပေါက်ကွဲခဲ့တာ လူတွေအစုလိုက်သေပြီး ဒဏ်ရာတွေလည်းရခဲ့ကြပါတယ်” ဟု ပြောသည်။ စစ်အုပ်စုတပ် ကြဲချခဲ့သည့် ဗုံးများသည် ကျေးရွာ ဘုန်းတော်ကြီးကျောင်း၊ ဓမ္မာရုံအဆောင်အပါအဝင် ကျေးရွာအလယ်နှင့် ကျေးရွာအနောက်ပိုင်းတို့သို့ ကျရောက် ပေါက်ကွဲခဲ့သည်။ အဆိုပါ ဗုံးကြဲတိုက်ခိုက်မှုကြောင့် အသက် ၇၁ နှစ်အရွယ် ဒေါ်သန္တာဖြူ၊ အသက် ၁၀ နှစ်အရွယ် မောင်မြတ် ကျော်နိုင်၊ အသက် ၄၆ နှစ်အရွယ် ဒေါ်ခိုင်ခိုင်စိုး၊ အသက် ၃၆ နှစ်အရွယ် ဒေါ်မသန်းဝင်းနှင့် အသက် ၁ နှစ်အရွယ် မောင်ထက်မြတ်ကျော်တို့ နေရာတွင်ပင် ပွဲချင်းပြီး သေဆုံးခဲ့ရသည်။ ထို့ပြင် အသက် ၇ နှစ်မှ ၁၃ နှစ်အရွယ် ကလေးငယ် ၈ ဦး အပါအဝင် ဒေသခံ ၁၇ ဦး ဒဏ်ရာရရှိခဲ့သဖြင့် ဘေး လွတ်ရာသို့ ပြောင်းရွှေ့ကာ အရေးပေါ် ဆေးကုသမှု ပေးနေရသည်။ လေကြောင်းမှ တိုက်ခိုက်မှုကြောင့် လူနေအိမ် ၁၉ လုံးအပြင် ဘုန်းတော်ကြီးကျောင်း၊ ဓမ္မာရုံအဆောင်နှင့် ဆွမ်း စားဆောင်တို့ ပျက်စီးသွားခဲ့ပြီး ဆုံးရှုံးမှုတန်ဖိုး ငွေကျပ် သိန်း ၉၀၀ ကျော်အထိ ရှိသည်ဟု ဒေသခံများ ပြောသည်။ ပြီးခဲ့သည့် ဩဂုတ်လ ၁၁ ရက်နေ့ကလည်း ပလက်ဝမြို့ကို စစ်အုပ်စုတပ်က ဂျက်ဖိုက်တာဖြင့် ဗုံးကြဲခဲ့သဖြင့် ဆယ်ကျော်သက် မိန်းကလေးနှစ်ဦး ဒဏ်ရာရရှိခဲ့ပြီး ဩဂုတ်လ ၁၂ ရက်နေ့၊ ညပိုင်းတွင်လည်း ဆမီးမြို့ကို လေကြောင်းမှ ဗုံးကြဲခဲ့သဖြင့် ဆယ်ကျော်သက် မိန်းကလေးတစ်ဦး သေဆုံးကာ ၉ ဦး ဒဏ်ရာရရှိခဲ့သည်။ ဓာတ်ပုံ - (Paletwa Times / Crd) #ပလက်ဝ

AA ထိန်းချုပ်ရာ ပလက်ဝ၌ စစ်အုပ်စု လေကြောင်းမှ ဗုံးကြဲမှုကြောင့် ကလေးများအပါ ၅ ဦး သေဆုံး

ပလက်ဝမြို့ပေါ်ကို စစ်တပ် ဗုံးကြဲ၍ ခူမီးအမျိုးသမီးငယ်နှစ်ဦး ဒဏ်ရာရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၁၁ ရက်။ ချင်းပြည်၊ ပလက်ဝမြို့ပေါ်သို့ စစ်တပ်က ဂျက်ဖိုက်တာဖြင့် ဗုံးကြဲတိုက်ခိုက်ခဲ့သဖြင့် အပြစ်မဲ့ ဆယ်ကျော်သက် အရွယ် ခူမီးအမျိုးသမီးငယ်နှစ်ဦး ဗုံးစထိမှန်ကာ ဒဏ်ရာရရှိသွားခဲ့သည်။ ဩဂုတ်လ ၁၁ ရက် နံနက် ၇ နာရီခွဲခန့်တွင် ပလက်ဝမြို့အဝင် ဆိုင်းဘုတ်အနီးသို့ စစ်တပ်၏ ဂျက်ဖိုက် တာ တစ်စီး ရောက်ရှိလာပြီး ဗုံးနှစ်လုံး လာရောက်ကြဲချခဲ့ခြင်း ဖြစ်ကြောင်း အာရက္ခတပ်တော် AA က ထုတ်ပြန် သည်။ အဆိုပါ လေကြောင်းတိုက်ခိုက်မှုကြောင့် မြို့အဝင်ဝအနီးရှိ ဦးသောကြာ၏ နေအိမ်အား ဗုံးစများ ထိမှန်ခဲ့ပြီး ၎င်း၏သမီးဖြစ်သူ အသက် ၁၉ နှစ်အရွယ် မထွေးစိန် နှင့် ရေတံခွန်ကျေးရွာမှ ပလက်ဝမြို့တွင် Grade-6 ပညာလာရောက်သင်ကြားနေသည့် အသက် ၁၃ နှစ်အရွယ် မသန္တာထိုက်တို့ နှစ်ဦး စလုံး၏ ညာဘက်ခြေထောက် များ၌ ဗုံးစထိမှန် ဒဏ်ရာရရှိခဲ့သည်။ “မနက်ခင်းကြီး လေယာဉ်သံ ကြားလိုက်ရပြီး မကြာဘူး၊ မြို့အဝင်ဘက်မှာ ဗုံးကျပေါက်ကွဲသံ အကျယ်ကြီး ကြားလိုက်ရတာ။ အိမ်နားတင် လာကျတော့ အိမ်လည်း ထိသလို အိမ်မှာရှိနေတဲ့ ကလေးမလေးနှစ်ဦးလုံး ခြေထောက်တွေမှာ ဗုံးစထိမှန်သွားတယ်။ အခုတော့ ဒဏ်ရာရထားတဲ့သူတွေကို ဆေးကုသပေးနေရတယ်” ဟု ပလက်ဝမြို့ခံ အမျိုးသမီးတစ်ဦးက ပြောသည်။ ဒဏ်ရာရရှိသွားသည့် အမျိုးသမီးငယ်နှစ်ဦးမှာ ခူမီးတိုင်းရင်းသူများ ဖြစ်ကြပြီး လက်ရှိတွင် နီးစပ်ရာ၌ ဆေးကု သမှု ခံယူနေကြရသည်။ စစ်တပ်သည် စစ်ဘက်နှင့် မသက်ဆိုင်သည့် အရပ်သားပြည်သူများ နေထိုင်ရာ နေရာများကို နေ့စဉ်နှင့်အမျှ ပစ်မှတ်ထား ဗုံးကြဲတိုက်ခိုက်နေသဖြင့် လေကြောင်းနှင့် ရေကြောင်း အန္တရာယ်များကို ယခင်ထက် ပိုမိုဂရုစိုက် ကြရန် အာရက္ခတပ်တော် (AA) က အသိပေး တိုက်တွန်းထားသည်။ ပလက်ဝမြို့နယ်အတွင်း၌ ပြီးခဲ့သည့် မတ်လ ၂၉ ရက်ကလည်း စစ်တပ်က ကြောင်ချောင်းကျေးရွာကို ဂျက်ဖိုက် တာနှစ်စီးဖြင့် ဗုံးကြဲတိုက်ခိုက်ခဲ့သဖြင့် အပြစ်မဲ့ အရပ်သား ခုနစ်ဦး သေဆုံးကာ လေးဦး ဒဏ်ရာရရှိခဲ့ဖူးသည်။ ထို့ပြင် စစ်တပ်သည် ဩဂုတ်လ ၃ ရက်၊ ၄ ရက်၊ ၈ ရက်နှင့် ၁၀ ရက်နေ့တို့တွင်လည်း သံတွဲ၊ မြောက်ဦးနှင့် အမ်း စသည့် မြို့နယ်များရှိ အရပ်သားနေရာများကို နေ့ညမရွေး လေကြောင်းမှ ဆက်တိုက် ဗုံးကြဲတိုက်ခိုက်ခဲ့သဖြင့် အပြစ်မဲ့ပြည်သူများ သေဆုံးထိခိုက်မှု များပြားခဲ့သည့်အပြင် နေအိမ်များနှင့် တိရစ္ဆာန်များစွာ သေကျေပျက်စီး ဆုံးရှုံးခဲ့ရသည်။ ဓာတ်ပုံ - AA Info Desk #ပလက်ဝ

ပလက်ဝမြို့ပေါ်ကို စစ်တပ် ဗုံးကြဲ၍ ခူမီးအမျိုးသမီးငယ်နှစ်ဦး ဒဏ်ရာရ

ပလက်ဝတွင် လူငယ်များ မြို့ပြင်ထွက်ခွာခွင့် CDF ကန့်သတ် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၂၂ ရက်။ ချင်းပြည်၊ ပလက်ဝမြို့နယ် အတွင်းရှိ အရွယ်ရောက်ပြီးသူ လူငယ်များအနေဖြင့် မြို့နယ်ပြင်ပသို့ ထွက်ခွာခြင်း မပြုရန် ချင်းလဲန်းကာကွယ်ရေးတပ်ဖွဲ့ (CDF-Paletwa) က ခရီးသွားလာခွင့် ကန့်သတ်မိန့် ထုတ်ပြန်လိုက်သည်။ ဒီဇင်ဘာလ ၂၀ ရက်နေ့စွဲဖြင့် ထုတ်ပြန်လိုက်သော အဆိုပါညွှန်ကြားချက်တွင် ဒေသတွင်းရှိ လူငယ်များအနေဖြင့် CDF-ပလက်ဝတွင် ပူးပေါင်းပါဝင်ပြီး ဒေသကာကွယ်ရေးတာဝန် ထမ်းဆောင်ရန်မှာ "သမိုင်းပေးတာဝန်" ဖြစ်သည်ဟု ဖော်ပြထားသည်။ ကျန်းမာရေးနှင့် ပညာရေးဆိုင်ရာ အရေးပေါ်ကိစ္စရပ်များမှလွဲ၍ အခြားကိစ္စများအတွက် လူငယ်များ မြို့နယ် ပြင်ပသို့ ထွက်ခွာခွင့်ကို ပိတ်ပင်ထားခြင်းဖြစ်သည်။ လက်ရှိတွင် ပလက်ဝမြို့နယ်ကို အာရက္ခတပ်တော် (AA) က အလုံးစုံသိမ်းပိုက် ထိန်းချုပ်ထားသဖြင့် စစ်ကော်မရှင်၏ စစ်မှုထမ်းဥပဒေဒဏ်မှ ကင်းလွတ်နေသော်လည်း၊ ဒေသခံကာကွယ်ရေးတပ်ဖွဲ့များ၏ အင်အားစုဆောင်းမှုနှင့် ကန့်သတ်ချက်များကြောင့် လူငယ်များမှာ အကြပ်ရိုက်နေကြသည်။ ပလက်ဝမြို့မှ ရန်ကုန်ကို ရောက်နေသာ လူငယ်တစ်ဦးက “ဖြစ်သင့်တာကတော့ စစ်မှုထမ်းတယ်ဆိုတာက လူငယ်တွေအနေနဲ့ သူတို့ရဲ့ ဆန္ဒအလျောက် ထမ်းတာမျိုးကပဲ ကောင်းတယ်။ မဟုတ်ရင် အတင်းအကျပ် စစ်မှုထမ်းခိုင်းတယ် ဆိုတာမျိုး ဖြစ်သွားမှာနော်” ဟု ပြောသည်။ အဆိုပါ ပိတ်ပင်ကန့်သတ်မှုသည် မြေပြင်တွင် ထိရောက်မှုအားနည်းနေပြီး၊ ဖမ်းဆီးထိန်းသိမ်းခံရမည့် အန္တရာယ် ကြားမှပင် အခြားဒေသများသို့ နည်းလမ်းမျိုးစုံဖြင့် ခိုးထွက်နေကြသူများ ရှိနေကြောင်း ဒေသခံ သတင်း ရင်းမြစ်များက ပြောသည်။ အဆိုပါ လူငယ်က “အခုက ကျနော်တို့ ပြည်သူတွေက စစ်တပ်ရဲ့ စစ်မှုထမ်း ဥပဒေကို ကြောက်ရတယ်။ ကိုယ့် ဒေသမှာ ရှိတဲ့ တော်လှန်ရေး အဖွဲ့တွေကိုလည်း ကြောက်ရတယ်။ ပလက်ဝမှာ ကျန်ခဲ့တဲ့ သူငယ်ချင်းတွေဆိုရင် လမ်းကြောင်း အမျိုးမျိုးကနေ ခိုးထွက်ဖို့ ကြိုးစားနေကြတယ်” ဟု ဆက်ပြောသည်။ ပလက်ဝမြို့နယ်သည် စစ်ရေးအရရော၊ ပထဝီဝင် အနေအထားအရပါ အချက်အချာကျသဖြင့် တော်လှန်ရေး အင်အားစုများအကြား နယ်မြေစိုးမိုးရေးနှင့် အင်အားတည်ဆောက်ရေး အတွက် ယခုကဲ့သို့ တင်းကြပ်မှုများ ပြုလုပ်လာခြင်းဖြစ်သည်ဟု နိုင်ငံရေးလေ့လာသူများအချို့က သုံးသပ်ကြသည်။ သို့သော်လည်း တစ်ဖက်တွင် လူငယ်များ၏ လွတ်လပ်စွာ သွားလာခွင့်နှင့် အနာဂတ် ရွေးချယ်ခွင့်များအပေါ် ကန့်သတ်ချက်ဖြစ်နေသဖြင့် ဒေသခံမိဘပြည်သူများအကြား ဝေဖန်စိုးရိမ်မှုများလည်း ရှိနေသည်။

ပလက်ဝတွင် လူငယ်များ မြို့ပြင်ထွက်ခွာခွင့် CDF ကန့်သတ်

ပလက်ဝ သည် ချင်းပြည်နယ်၏ အစိတ်အပိုင်းဖြစ်ကြောင်း ချင်းညီနောင်အဖွဲ့ဝင်များက လက်ခံထားသည်ဟု ပြော သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၃၀ ရက်။ ပလက်ဝမြို့နယ်မှာ ချင်းပြည်ထဲက မြို့နယ်၊ ချင်းပြည်၏ အစိတ်အပိုင်း ဖြစ်သည်ဟု ချင်းညီနောင် အဖွဲ့ဝင် အားလုံးက လက်ခံထားသည်ဟု ပြောဆိုလိုက်သည်။ အာရက္ခတပ်တော် ULA/AA က သိမ်းပိုက်ထိန်းချုပ်ထားသော ပလက်ဝမြို့နယ်မှာ ချင်းပြည်၏ အစိတ်အပိုင်း ဖြစ်ကြောင်း အားလုံးက တညီတညွတ်ထဲ လက်ခံထားသည်ဟု ချင်းညီနောင်အဖွဲ့ - CB က ပြောရေးဆိုခွင့်ရှိသူ များ ပြောသည်။ ချင်းညီနောင်အဖွဲ့ ပြောရေးဆိုခွင့်ရှိသူ ဆလိုင်းယောမာန် “ပလက်ဝသည် ချင်းပြည်ဆိုတာကို ချင်းညီနောင်အဖွဲ့ အားလုံးက တညီတညွတ်တည်း ယုံကြည်လက်ခံကြတယ် ဆိုတာ ပြောလိုပါတယ်။ ဒါက ညီနောင်တင်မက တစ်နိုင်ငံလုံးကသိကြပါတယ်” ဟု ပြောသည်။ ဆလိုင်းယောမန်က သတင်းစာရှင်းလင်းပွဲ၌ မီဒီယာများ၏ မေးမြန်းမှုအပေါ် ဇွန်လ ၁၈ ရက်က ဖြေဆိုခဲ့ခြင်း ဖြစ်သည်။ ပလက်ဝမြို့နယ်ကို အာရက္ခတပ်တော် ULA/AA က ရခိုင်ပြည်၏ ခရိုင်တစ်ခုအဖြစ် သတ်မှတ်လိုက်ကြောင်း သတင်းများ ထွက်ပေါ်နေခြင်း ဖြစ်သည်။ ထို့အပြင် ရခိုင်ပြည် အခြေစိုက် မီဒီယာတစ်ခုတွင် ပလက်ဝကို ရခိုင်ပြည်၏ အမှတ် (၈) ခရိုင်အဖြစ် သတ်မှတ်လိုက်ကြောင်း ဇွန်လ ၁၂ ရက်နေ့က သတင်းဖော်ပြခဲ့ပြီးနောက် ချင်းအဖွဲ့အစည်းများနှင့် ချင်းလူထုအကြား ဝေဖန်ပြောဆိုမှုများ မြင့်တက်လာခဲ့သည်။ ပလက်ဝခရိုင်ကို ရခိုင်ပြည်အတွင်း ထည့်သွင်းဖွဲ့စည်းမှုနှင့် ပတ်သက်၍ ULA/AA ကတော့ တရားဝင် ထုတ်ပြန် လာခြင်းမျိုး မရှိသေးပေ။ အလားတူ AA စစ်ဦးစီးချုပ် ဗိုလ်ချုပ်ထွန်းမြတ်နိုင် ကိုယ်တိုင်ကလည်း ပလက်ဝမြို့နယ်သည် ချင်းပြည်ထဲက ဖြစ်ကြောင်း မီဒီယာနှင့် တွေ့ဆုံမေးမြန်းချိန်က ဖြေကြားထားပြီး ဖြစ်သည်ဟု ဆလိုင်းယောမာန်က ပြောသည်။ အာရက္ခတပ်တော် ULA/AA က အိမ်နီးချင်းကောင်း ထက်ပိုသည့် ရဲဘော်ရဲဘက်များ ဖြစ်သည်ဟု ဆလိုင်း ယောမာန်က ဆိုသည်။ တော်လှန်ရေးကာလတွင် နိုင်ငံရေး အမြတ်ထုတ်ချင်သော သဘောနှင့် လူမျိုးရေးမုန်းတီးရေး ပြောဆိုမှုများ ရှိနေသော ကြောင့် အားလုံး သတိထားကြဖို့ လိုသည်ဟုလည်း ဆလိုင်းယောမာန်က သတိပေးပြောဆိုထားသည်။ လက်ရှိ အခြေအနေအရ စစ်ကောင်စီကို တိုက်ခိုက်ရေးကသာ အဓိက အလေးထား ဆောင်ရွက်ရမည့် အချိန် ဖြစ်သည်ဟု ဆလိုင်းယောမာန်က ဆက်ပြောသည်။ “ကျနော်တို့ ဒီအခြေအနေဟာ စစ်ကောင်စီ ပြုတ်ကျရေးကို အလေးထားရမယ့် အချိန် ဆိုတာကို အားလုံး ပြန် အမှတ်ရဖို့လိုတယ်။ စစ်ကောင်စီ ပြုတ်ကျမသွားဘူးဆိုရင် မည်သည့် ထိန်းချုပ်နယ်မြေမဆို အလဟသတ်ပဲ။” ချင်းလက်နက်ကိုင် တော်လှန်ရေး အဖွဲ့အစည်းတစ်ခု ဖြစ်သည့် ချင်းအမျိုးသားတပ်ဦး CNF/CNA ပြောရေး ဆိုခွင့်ရှိသူ ဆလိုင်းထက်နီကလည်း AA ၏ ပလက်ဝဒေသအပေါ် ထိန်းချုပ်မှုကို ဒေသတည်ငြိမ်ရေးအတွက် ယာယီတာဝန်ယူမှု အဖြစ် လက်ခံသည်ဟု ဆိုသည်။ အဆိုပါ အချက်မှာ ပလက်ဝဒေသ၏ အချုပ်အခြာ အာဏာပိုင်ဆိုင်မှုကို အဆုံးအဖြတ်ပေးခြင်း မဟုတ်ဘူးဟု မီဒီယာများအား မကြာခဏ ပြောဆိုလေ့ရှိသည်။ ပလက်ဝမြို့နယ်က ရခိုင်ပြည်နှင့် နယ်မြေထိစပ်နေပြီး အိန္ဒိယ-မြန်မာ ကုလားတန်မြစ်ကြောင်း ဘက်စုံ သယ်ယူ ပို့ဆောင်ရေး စီမံကိန်းလမ်းကြောင်းပေါ်တွင် ရှိခြင်း ဖြစ်သည်။ အာရက္ခတပ်တော် AA က ၂၀၂၄ ခုနှစ်၊ ဇန္နဝါရီလ ၁၄ ရက်နေ့တွင် ပလက်ဝမြို့နယ်ကို စစ်ကောင်စီလက်ကနေ တိုက်ခိုက် သိမ်းပိုက်ခဲ့ပြီးနောက် အုပ်ချုပ်ရေးနှင့် တရားစီရင်ရေး ကိစ္စရပ်များကို ဆောင်ရွက်နေခြင်း ဖြစ်သည်။

ပလက်ဝ သည် ချင်းပြည်နယ်၏ အစိတ်အပိုင်းဖြစ်ကြောင်း ချင်းညီနောင်အဖွဲ့ဝင်များက လက်ခံထားသည်ဟု ပြော

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

ရက်သတ္တပတ် အတန်ကြာတွင် အီရန်နှင့် အမေရိကန် အကြား ပစ်ခတ်မှု ပြန်ဖြစ် — August 31, 2026 3:40 pm
နီပေါ ရေကြီးမှုကြောင့် လိုဏ်ခေါင်းအတွင်း လူရာပေါင်းများစွာ ပိတ်မိနေဆဲဖြစ် အတည်ပြု သေဆုံးသူ ၉၀၀ ကျော်ပြီ — August 31, 2026 3:29 pm
EU နှင့် မပူးပေါင်းရန် အိုက်စလန် လူထု ဆန္ဒပြု — August 31, 2026 3:27 pm

Recent Posts

ချင်းတောင်ပိုင်း မင်းတပ်တွင် စစ်အုပ်စုက လေကြောင်းမှ ဗုံးကြဲ၍ ကလေးများအပါ ၈ ဦး သေဆုံး
ရခိုင်-မကွေး အစပ် မင်းတုန်းတွင် ထွန်စက်များ ချောဆွဲခံရမှုကြောင့် တောင်သူများ စိုးရိမ်ထိတ်လန့်
ရခိုင်မြောက်ပိုင်း မောင်တောနယ်စပ်တွင် ကင်းလှည့်နေသည့် AA နှင့် ARSA, RSO ပူးပေါင်းအဖွဲ့ တိုက်ပွဲဖြစ်
ရက်သတ္တပတ် အတန်ကြာတွင် အီရန်နှင့် အမေရိကန် အကြား ပစ်ခတ်မှု ပြန်ဖြစ်
နီပေါ ရေကြီးမှုကြောင့် လိုဏ်ခေါင်းအတွင်း လူရာပေါင်းများစွာ ပိတ်မိနေဆဲဖြစ် အတည်ပြု သေဆုံးသူ ၉၀၀ ကျော်ပြီ

Archives

Archives

×Close