ဝက်လက် ပြည်သူ့ ကာကွယ်ရေးက စစ်ကောင်စီ တပ်စွဲထားသည့် နေရာအား ဒရုန်းဖြင့် ဗုံးချ တိုက်ခိုက်
သတင်းနှင့် မီဒီယာ ကွန်ရက်။
၂၀၂၂ ခုနှစ်၊ ဩဂုတ်လ ၁၇ ရက်။
မန္တလေးတိုင်း၊ စဥ့်ကူးမြို့နယ်ထဲက ရွာသာယာကျေးရွာတွင် တပ်စွဲထားသည့် စစ်ကောင်စီတပ်ဖွဲ့ဝင်များ ကို ဒရုန်းဖြင့် ဗုံးကြဲတိုက်ခိုက်ခဲ့သည်ဟု မြို့နယ် ပြည်သူ့ကာကွယ်ရေးတပ်ဖွဲ့ထံမှ သိရသည်။
သြဂုတ်လ ၁၅ ရက်နေ့၊ မွန်းလွှဲ ၂ နာရီခွဲအချိန်ခန့်က ဒရုန်းဖြင့် ဗုံးချ တိုက်ခိုက်ခဲ့ခြင်း ဖြစ်သည်ဟု ဝက်လက် မြို့နယ် ပြည်သူ့ကာကွယ်ရေးတပ်ဖွဲ့ တာဝန်ရှိသူက ပြောသည်။
“သူတို့ရွာက ပျူရွာပါ၊ အနီးအနား ရွာကလူတွေကို သင်တန်းပေးတယ်။ ပြီးတော့ တခြားရွာက စက်လှေတွေ သိမ်းပြီး ပိုက်ဆံတောင်းတယ်။ အိမ်တွေဖြိုဖျက်တယ်” ဟု ပြည်သူ့ကာကွယ်ရေးအဖွဲ့က ဗိုလ်ကျားကြီး က ပြောသည်။
ဒရုန်းဖြင့် ဗုံးကြဲတိုက်ခိုက်မှုတွင် ထိခိုက်သေဆုံးမှု အခြေအနေများကို အတိအကျ မသိရသေး ဘူးဟု ဆိုသည်။
ရွာသာယာကျေးရွာတွင် စစ်ကောင်စီတပ်ဖွဲ့ဝင်များက တပ်စွဲထားပြီး ရွာသူရွာသားများကလည်း ပျူစောထီး သင်တန်းဆင်းများ ဖြစ်ကြသည်ဟု ဗိုလ်ကျားကြီးကပြောသည်။
စစ်ကောင်စီတပ်ဖွဲ့ဝင်များ တပ်စွဲထားသည့် နေရာကို ဒရုန်းဖြင့် ဗုံးကြဲခံရပြီးနောက် ကြက်တူရွေးကျေးရွာ က စစ်ကောင်စီတပ်သားများကလည်း လက်နက်ကြီးဖြင့် ငါးချက်ခန့် ပြန်လည် ပစ်ခတ်ခဲ့သည်ဟု သိရသည်။
သြဂုတ်လ ၁၅ ရက်နေ့၊ နံနက်ပိုင်းတွင်လည်း ဝက်လက်မြို့နယ် ပြည်သူ့ကာကွယ်ရေးတပ်ဖွဲ့၊ ဗိုလ်ကျားကြီး အဖွဲ့နှင့် စစ်ကောင်စီတပ်တို့အကြား အပြန်အလှန်ပစ်ခတ်မှုများ ဖြစ်ပွားခဲ့ကြပြီး ထိခိုက်ဒဏ်ရာရသူ မရှိဘူးဟု ဗိုလ်ကျားကြီး က ပြောသည်။
ရွာသာယာကျေးရွာတွင် တပ်စွဲထားသည့် စစ်ကောင်စီတပ်ဖွဲ့ဝင်များ ဗုံးကြဲတိုက်ခိုက်မှုကို Bo Tiger ဗိုလ်ကျား ကြီးအဖွဲ့၊ တောကြီးမြွေပွေးအဖွဲ့၊ GZ နှင့် Banger အဖွဲ့ လေးဖွဲ့က ပူးပေါင်းတိုက်ခိုက်ခဲ့ကြခြင်း ဖြစ်သည်ဟု ဗိုလ်ကျားကြီးက ဆိုသည်။
