July 2025 – Page 3 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Monthly Archive

Archive: July 2025

Jul 26

ထိုင်း-ကမ္ဘောဒီးယား တိုက်ပွဲ ဆက်ဖြစ်၊ ပဋိပက္ခ နယ်မြေ ကျယ်ပြန့်လာ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၂၆ ရက်။ ဇူလိုင် ၂၆ ရက် စနေနေ့တွင်လည်း ထိုင်းနှင့် ကမ္ဘောဒီးယား နှစ်နိုင်ငံစစ်တပ် အကြား တိုက်ခိုက်မှုများဆက်ဖြစ်နေသည်။ ထိုင်းက တစ်ချို့နေရာများကို နယ်မြေ ရှင်းလင်းရေးများ လုပ်ပြီး ရေတပ်သင်္ဘာများကိုလည်း ပဋိပက္ခ ဒေသတွင် ချထားလိုက်သည်။ ဇူလိုင်လ ၂၆ ရက်နေ့ (စနေနေ့ ) နံနက်တွင် ထိတွေ့မှု ဧရိယာသည် ၆ နေရာမှ ၁၂ နေရာ အထိ ကျယ်ပြန့်လာသည်ဟု ထိုင်းစစ်တပ်က ပြောသည်။ ပဋိပက္ခ နယ်မြေသည် လာအို နယ်စပ် ဘက်အထိ ကျယ်ပြန်လာသည်။ ထိုင်းဘက်က ပြောမည်ဆိုပါက Trat နှင့် Chanthaburi ခရိုင်များကို ပြန့်နှံ့လာသည်ဟု ဆိုသည်။ အဆိုပါဒေသများတွင် ထိုင်းက ရေတပ် သင်္ဘောကြီး တစ်စီးနှင့် သင်္ဘောငယ် ၄ စီးကို တာဝန်ချထားလိုက်သည်။ ယနေ့ နံနက် ၉ နာရီ ၂၀ တွင် ယခင်ရက်များက တိုက်ခိုက်မှုများ ဖြစ်နေခဲ့သော ကမ္ဘောဒီးယားများတပ်စွဲထားခဲ့သည့် Phu Makuea တောင်ထိပ်တွင် ထိုင်းအလံ ထောင်လိုက်ပြီး နယ်မြေ ရှင်းလင်းရေးများ လုပ်နေသည်ဟု ထိုင်း စစ်တပ်က ပြောသည်။ ထိုင်းစစ်တပ်က ကေဘယ်ကြိုးကားများ သံမဏိ တံတားများနှင့် ရေဒါတိုင်များကို ဖျက်စီးလိုက်သည်ဟု ကြေညာသည်။ Sa Kaeo ခရိုင်တွင်လည်း အငြင်းပွားနေသည့် နေရာ ၄ ခုမှ ကမ္ဘောဒီးယား စစ်သားများကို မောင်းထုတ်နိုင်ခဲ့သည်ဟု ထိုင်းစစ်တပ်က ပြောပါသည်။ မြတြိဂံ နယ်စပ်ဖြစ်သည့် ထိုင်း-လာအို-ကမ္ဘောဒီးယား နယ်စပ်တွင်လည်း ထိတွေ့မှု တစ်ချို့ ဖြစ်ခဲ့ပြီး လာအို နိုင်ငံထဲကို ကျည်ဆံများ ကျရောက်ခဲ့သည်။ ထိုကျည်ဆံများသည် ကမ္ဘောဒီးယား ကျည်ဆံများ ဖြစ်သည်ဟု ထိုင်းဘက်က ပြောဆိုထားပြီး ၎င်းတို့ အနေဖြင့် လာအိုဘက်ကို ကျည်ဆံမကျအောင် အထူးဂရုစိုက် လှုပ်ရှားနေသည်ဟု ပြောသည်။ ဇူလိုင်လ ၂၅ ရက်နေ့ (ယမန်နေ့) က ကုလသမဂ္ဂ လုံခြုံရေး ကောင်စီတွင် ထိုင်းနှင့် ကမ္ဘောဒီးယား နှစ်နိုင်ငံက အပြန်အလှန် စွပ်စွဲချက်များ လုပ်ခဲ့ပြီး နှစ်နိုင်ငံလုံးက ငြိမ်းချမ်းသည့်နည်းဖြင့် ဖြေရှင်းခြင်းကို လိုလားကြောင်း ပြသခဲ့သည်ဟု ကုလသမဂ္ဂက ပြောသည်။ ထိုင်းအစိုးရ ပြောရေး ဆိုခွင့်ရှိသူ Ms. Sasikarn Watthanachan က ၎င်း၏ Facebook စာမျက်နှာမှတစ်ဆင့် လူထုနှင့် မီဒီယာ များကို သတင်းအချက်အလက်များ ဖလှယ်ရာတွင် တာဝန်ခံမှု ရှိရှိဖြင့် ဖြန့်ဝေကြရန် တိုက်တွန်းထားသည်။ #ထိုင်း #ကမ္ဘောဒီးယား #တိုက်ခိုက်မှု #ထိုင်းအစိုးရ #နယ်မြေ

ထိုင်း-ကမ္ဘောဒီးယား တိုက်ပွဲ ဆက်ဖြစ်၊ ပဋိပက္ခ နယ်မြေ ကျယ်ပြန့်လာ

Jul 25

ထိုင်း- ကမ္ဘောဒီးယားနယ်စပ် တိုက်ခိုက်မှုများ ဆက်လက်ဖြစ်ပွား (၁၀:၃၀ update) သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၂၅ ရက်။ ထိုင်း-ကမ္ဘောဒီးယား နယ်စပ်တွင် ဇူလိုင်လ ၂၅ ရက်နေ့ (ယနေ့) တွင် တိုက်ခိုက်မှုများ ဆက်လက် ဖြစ်ပွားနေသည်။ ဇူလိုင်လ ၂၅ ရက်နေ့ (ယနေ့နံနက်) တွင် ကမ္ဘောဒီးယား ၂၄ ဦး သေဆုံးသွားခဲ့သည်ဟု ထိုင်းသတင်းဌာနဖြစ်သည့် Khaosod သတင်းဌာနက ထိုင်း ထောက်လှမ်းရေးကို ကိုးကားပြီး ဖော်ပြသည်။ ထို့အပြင် ကမ္ဘောဒီးယား၏ ၁၀၀ မီလီမီတာ အမြောက် သုံးခုနှင့် တင့်ကား ၂ စီးကို လက်နက်ကြီးဖြင့် ပစ်ခတ် ဖျက်ဆီးနိုင်ခဲ့သည်ဟု ထိုင်း အမှတ် ၂ တပ်မတော်ကို ကိုးကား ဖော်ပြထားသည်။ ယနေ့ နံနက်စောစောတွင် Ta Muen Thom ဘုရားနားတွင် ကမ္ဘောဒီးယားက လူ ၉ ဦးသေဆုံးခဲ့ပြီး ထိုသူများမှာ ကမ္ဘောဒီးယား စစ်သား ၄ ဦး၊ အရပ်သား ၃ ဦးနှင့် ဘုန်းတော်ကြီး ၁ ပါး ပါဝင်သည်ဟု ထိုင်း အမှတ် ၂ တပ်မတော် လုံခြုံရေး တပ်ဖွဲ့များက ပြောသည်။ ဆက်သွယ်ရေးနှင့် လက်နက် သိုလှောင်ရုံ ရှိသည့် Khao Makuea တောင်ထိပ်ကို ထိုင်းဘက်က ဒရုန်းများနှင့် တိုက်ခိုက်ခဲ့ရာ ကမ္ဘောဒီးယား စစ်သား ၁၄ ဦး သေဆုံးခဲ့သည်ဟု ဆိုသည်။ ထို့အပြင် ကမ္ဘောဒီးယား တပ်မ ၈၊ တပ်မ ၉ နဲ့ တပ်မ ၄၂ ဌာနချုပ်စခန်းတွေကို လေယာဉ်များဖြင့်ဗုံးကြဲခဲ့သည်ဟု ဆိုသည်။ ထိုင်းဘက်က Satta Som ဆိုသည့် နေရာ၏ တဖက် နယ်စပ်အတွင်းဘက်ကို လက်နက်ကြီးနှင့် ပစ်ခတ်ခဲ့သည်ဟု ဆိုသည်။

ထိုင်း- ကမ္ဘောဒီးယားနယ်စပ် တိုက်ခိုက်မှုများ ဆက်လက်ဖြစ်ပွား (၁၀:၃၀ update)

Jul 25

ထိုင်း- ကမ္ဘောဒီးယား နယ်စပ် သောကြာမနက် အခြေအနေ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၂၅ ရက်။ ထိုင်းတပ်မတော် အမှတ် ၂ ဒေသက ပြည်သူတွေကို နယ်စပ် Sisaket (ศรีสะเกษ) ခရိုင်အတွင်းက နယ်စပ်များ အနီးကို မသွားကြရန် ဇူလိုင် ၂၅ ရက် (ယနေ့) နံနက် ၈ နာရီတွင် သတိပေးချက်ထုတ်ပြန်လိုက်သည်။ အမှတ် ၂ ထိုင်းတပ်မတော် ဒေသ၏ Facebook စာမျက်နှာတွင် ထိုင်း-ကမ္ဘောဒီးယား နယ်စပ်က ပြည်သူတွေကို လိပ်မူပြီး “သတိ။ နယ်စပ်တလျောက် နေရာအများအပြားတွင် ထိတွေ့မှုများ ဖြစ်နေသည်၊ ကျေးဇူးပြု၍ အဲဒီ နယ်စပ်ဒေသတွေကို ရှောင်ရှားကြပါ” ဆိုပြီး သတိပေးချက် ထုတ်ပြန်ထားသည်။ ထိုင်းဘုရင့်တပ်မတော် Update စာမျက်နှာတွင်လည်း တင်းမာမှုတွေ ရှိနေပြီး နံနက် စောစော ၄ နာရီခွဲတွင် သေနတ်သံများ ကြားနေရသည်ဟု ရေးသားထားသည်။ကမ္ဘောဒီးယားများက ချည်းကပ်လာနေသည်ဟု ရေးသားထားသည်။ ကြာသပတေးနေ့ ဇူလိုင်လ ၂၄ ရက်နေ့ (ယမန်နေ့) က နယ်စပ်တလျောက် နေရာ ၆ ခုတွင် ထိတွေ့မှုတွေ ဖြစ်ပွားခဲ့ပြီး အနည်းဆုံး လူ ၁၁ ယောက် သေဆုံးခဲ့သည်။ ကမ္ဘောဒီးယားဘက်က ထိုင်းဘက်ကို အတွဲလိုက် ဒုံးကျည်များနှင့် ပစ်ခတ်ခဲ့ပြီး ထိုင်းဘက်က F-16 လေယာဉ်များနှင့် ကမ္ဘောဒီးယား စစ်ဘက် ပစ်မှတ်များကို ပစ်ခတ်တိုက်ခိုက် ခဲ့ကြသည်။ ထိုင်း-ကမ္ဘောဒီးယား နယ်စပ် တစ်လျှောက်ကိုလည်း အသွားအလာ မရှိအောင် ထိုင်းဘက်က ပိတ်ထားလိုက်ပြီး နယ်စပ်တွင်ရှိသည့် သောင်းနှင့် ချီသည့် လူများကို ဘေးလွတ်ရာသို့ ရွေ့ပြောင်းထားသည်။ ကမ္ဘောဒီးယားဘက်က နယ်စပ် ပြဿနာကို ကုလသမဂ္ဂ လုံခြုံရေး ကောင်စီကို တင်ပြထားပြီး ထိုင်းဘက်က နှစ်နိုင်ငံ နယ်ခြား ကော်မတီတွင် ဆွေးနွေး ဖြေရှင်းရန်အဆိုပြုထားသည်။

ထိုင်း-ကမ္ဘောဒီးယား နယ်စပ် သောကြာမနက် အခြေအနေ

Jul 24

တောင်ကြီး-လွိုင်ကော်လမ်းတွင် ကရင်နီ မှတ်ပုံတင် ကိုင်ဆောင်သူများကို ဖမ်းမိန့်ထုတ်ထား သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၂၄ ရက်။ ကရင်နီမှတ်ပုံတင် (ကယားပြည်နယ် မှတ်ပုံတင် ၂/ ) ကိုင်ဆောင်သူများကို စစ်ဆေးရေး ဂိတ်များ၌ ဖမ်းမိန့် ထုတ်ထားသည် အုပ်ချုပ်ရေးပိုင်းနှင့် နီးစပ်သူများက ပြောသည်။ ရှမ်းပြည်တောင်ပိုင်း၊ တောင်ကြီး - လွိုင်ကော် လမ်းမကြီး တစ်လျှောက်နှင့် ကရင်နီပြည်ရှိ စစ်ကောင်စီ လက် အောက်ခံ စစ်ဆေးရေး ဂိတ်များတွင် ကရင်နီ မှတ်ပုံတင် ကိုင်ဆောင်ထားသူများကို ဖမ်းမိန့် ထုတ်ထားသည် ဟု ထွေအုပ်နှင့် နီးစပ်သူများက ပြောသည်။ ပုဒ်မ ၅၀ - ည ဖြင့် ဖမ်းမိန့် ထုတ်ထားသည့် ကရင်နီ မှတ်ပုံတင် ကိုင်ဆောင်သူ အယောက် ၆၀၀ ကျော် အား တောင်ကြီး - လွိုင်ကော် လမ်းမကြီး တစ်လျှောက်ရှိ စစ်ဆေးရေးဂိတ်ပေါင်း ၂၀ ကျော်နှင့် ကရင်နီပြည် တွင်းရှိ ဒီးမော့ဆို - မော်ချီး - ထူးချောင်းလမ်း၊ လွိုင်ကော် - မော်ချီးလမ်း စသည့် ဂိတ်များတွင် စစ်ဆေး ဖမ်းဆီး ခဲ့ခြင်းဖြစ်သည်ဟု ဆိုသည်။ ကရင်နီပြည်အတွင်း တော်လှန်ရေးတပ်ဖွဲ့များနှင့် CDM ထောက်ပံ့ရေး လုပ်ဆောင်နေသူ တစ်ဦးက “သူတို့ ထုတ် ထားတဲ့ ဥပဒေပုဒ်မနဲ့ ညှိလို့ ခေါ်စစ်တယ် ပြောတာပဲ။ တချို့ကတော့ ဘာမှန်းမသိ ပါသွားတယ်။ ကိုယ့်ရဲ့ K-Pay နဲ့ ဘယ်သူက ပိုက်ဆံပို့ထားလဲ ဘယ်သူမှ မသိနိုင်ဘူးလေ။ တချို့လည်း ငွေခဏ လွှဲပေးပါဦးလို့ အကူအညီ တောင်းတာတွေက ခဏခဏကြုံရတယ်။ အခု သူတို့ လုပ်တာနဲ့ ဘယ်သူမှ မသွားရဲတော့ဘူး” ဟု ပြောသည်။ လက်ရှိ တော်လှန်ရေး၌ ပါဝင်လှုပ်ရှားနေသူများနှင့် ယခင် ထောက်ပံ့ရေးနှင့် ပို့ဆောင်ရေး လုပ်ဆောင်ခဲ့ဖူးသူများ အား တက်ပလက် (Tablet) ဖြင့် စစ်ဆေးနေခြင်း ဖြစ်ပြီး အများစုမှာ KBZ Pay ငွေလွှဲမှုများဖြင့် ဖမ်းဆီးခံနေကြ ရသည်ဟု ဆိုသည်။ ယခု ဇူလိုင်လ တတိယပတ်အတွင်း ဘော်လခဲမြို့နယ်၊ မော်ချီးမြို့မှ ဒီးမော့ဆိုမြို့နယ်သို့ နေရပ်ပြန်လာသည့် စစ်ဘေးရှောင် အယောက် ၃၀ ကျော်အား စစ်ဆေးမည်ဟု ဆိုကာ လွိုင်ကော်မြို့ရှိ ဒေသကွပ်ကဲမှု စစ်ဌာချုပ် (ဒကစ) သို့ ဖမ်းဆီး ခေါ်ဆောင်သွားပြီး ဇူလိုင်လ ၂၃ ရက်နေ့ အထိ အဆက်အသွယ် မရသေးဘူးဟု ဆိုသည်။ မော်ချီးမြို့ရှိ ဖမ်းဆီးခံရသူများနှင့် နီးစပ်သူ တစ်ဦးက “မော်ချီးမှာ လေကြောင်းကြဲလို့ အိမ်ပြန်ကြတာပါ။ အကုန် လုံး ခဲလုပ်သားတွေပါ။ ဆက်နေတော့လည်း လေယာဉ်ကြောင့် သေမယ်။ ရှောင်ရင်လည်း ဖမ်းတယ်ဆို တော့ အားလုံး ဘယ်မှမသွားရဲအောင် ဖြစ်နေပါတယ်” ဟု ပြောသည်။ ယခု ဖမ်းဆီးနေမှုများမှာ တော်လှန်ရေး၌ လှုပ်ရှားသူများသာ အကြုံးဝင်သည်ဟု ဆိုသော်လည်း ပုဒ်မ ၅၀ - ည အရ စားသောက်ကုန် သယ်ဆောင်သူများကိုပါ စစ်ဆေးနေသဖြင့် ဒေသတွင်း လုပ်ငန်းရှင်အချို့လည်း စိုးရိမ်နေ ကြသည်။ စစ်ကောင်စီက ရွေးကောက်ပွဲ အမြန်ဆုံး ကျင်းပနိုင်ရေးအတွက် ထိုးစစ်များ အကြီးအကျယ် လုပ်နေသည့်အပြင် စစ်ဘေးရှောင် စခန်းများရှိ လွိုင်ကော်၊ ဖယ်ခုံ၊ မိုးဗြဲ ဒေသခံများအား ဖိအားပေး နေရပ်ပြန်ခိုင်းနေပြီး မပြန်ပါက ဗုံးကြဲမည်ဟုလည်း လူမှုကွန်ရက် စာမျာက်နှာများ၌ ၎င်းတို့ကို ထောက်ခံသည့် အုပ်စုများက ခြိမ်းခြောက် နေကြ သည်။

တောင်ကြီး-လွိုင်ကော်လမ်းတွင် ကရင်နီ မှတ်ပုံတင် ကိုင်ဆောင်သူများကို ဖမ်းမိန့်ထုတ်ထား

Jul 24

TikTok တွင် ဝါဒဖြန့် လှုံ့ဆော်မှုဖြင့် အမျိုးသမီး တစ်ဦး ဖမ်းဆီးခံရ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၂၄ ရက်။ မွန်ပြည်နယ်၊ ရေးမြို့နယ်တွင် TikTok လူမှုကွန်ရက် စာမျက်နှာပေါ်၌ လှုံ့ဆော်ဝါဒဖြန့်သည်ဟု ဆိုကာ ရေးမြို့ခံ အမျိုးသမီးတစ်ဦးကို စစ်ကောင်စီတပ်က ဖမ်းဆီးသွားသည်ဟု မွန်ပြည် လူ့အခွင့်အရေး ဖောင်ဒေးရှင်း (HURFOM) အဖွဲ့ တာဝန်ရှိသူက ပြောသည်။ ရေးမြို့နယ်၊ ရန်ကြီးအောင်ရပ်ကွက်နေ မယမင်း (ခ) လင်း ဆိုသည့် အမျိုးသမီးကို စစ်ကောင်စီတပ်က သူမ၏ Tiktok အကောင့်ဖြစ်သည့် ‘yaminlove’ မှတစ်ဆင့် အမျိုးသားညီညွတ်ရေးအစိုးရ (NUG) နှင့် ပြည်ထောင်စု လွှတ်တော် ကိုယ်စားပြု ကော်မတီ (CRPH) တို့အတွက် လှုံဆော်ဝါဒဖြန့်သည်ဟု ဆိုကာ ဇူလိုင်လ ၂၁ ရက်နေ့၊ ညနေ ၃ နာရီအချိန်ခန့်တွင် ဖမ်းဆီးသွားခြင်း ဖြစ်သည်။ မွန်ပြည် လူ့အခွင့်အရေး ဖောင်ဒေးရှင်း (HURFOM) အဖွဲ့ ဒါရိုက်တာ နိုင်အဲမွန်က “မယမင်းကိစ္စကတော့ စစ်ကောင်စီက လွတ်လပ်စွာ ပြောဆိုရေးသား ထုတ်ဖော်ခွင့်ကို တင်းကျပ်စွာ ပိတ်ပင်ထားတာတော့ ကြာပြီ။ အမြဲတမ်းပဲ မွန်ပြည်နယ်ထဲမှာဆို သေချာစောင့်ကြည့် လေ့လာတယ်။ အုပ်စုတွေ ဖွဲ့ထားပြီးတော့မှ သူတို့ သေ ချာစိစစ်တယ်ပေါ့နော်။ အဲ့လို သေချာစိစစ်တာကြောင့်ပဲ အခုလို ကိုယ့်နိုင်ငံရေးအရ ယုံကြည်ရာ ဒါမှမဟုတ် လူမျိုးရေးအရ ပေါ့နော် ကိုယ်ယုံကြည်ရာ ထုတ်ဖော်ပြောဆိုတဲ့ အချိန်မှာ ချက်ချင်း အရေးယူဆောင်ရွက်တဲ့ ကိစ္စ ပိုများလာတယ်“ ဟု ပြောသည်။ ဖမ်းဆီးခံရသည့် မယမင်း (ခ) လင်း ကို လက်ရှိ ရေးမြို့မရဲစခန်းတွင် ဖမ်းဆီးချုပ်နှောင်ထားပြီး နိုင်ငံတော် အကြည်ညို ပျက်စေမှု ရာဇသတ်ကြီး ပုဒ်မ ၅၀၅-က ဖြင့် အမှုဖွင့် အရေးယူထားကြောင်း ဒေသခံ သတင်း အရင်းအမြစ်ထံမှ သိရသည်ဟု HURFOM က ဆိုသည်။ မွန်ပြည်တွင် စစ်တပ်က အာဏာသိမ်းသည့် အချိန်မှစတင်၍ ယနေ့အထိ လူမှုကွန်ရက် စာမျက်နှာများတွင် လှုံဆော်ဝါဒဖြန့်သည်ဟုဆိုကာ အရပ်သား ၃၅ ဦးကို ဖမ်းဆီးခဲ့သည်ဟု နိုင်အဲမွန်က ဆက်ပြောသည်။ “ဒီမွန်ပြည်နယ်မှာ ဒီနှစ်အတွင်းမှာပဲ ဆိုလို့ရှိရင် ၄ ယောက်ရှိတယ်။ ဒီဖြစ်ရပ်တွေက တစ်နှစ် ထက်တစ်နှစ် တိုး တိုးလာတယ်။ ၂၀၂၁ ခုနှစ်ကနေ အခု ၂၀၂၅ ဇူလိုင် လလောက်အထိမှာ ဖြစ်ခဲ့တဲ့ ဖြစ်ရပ်က ၃၅ ခုလောက်ရှိပြီ။ ဒါမွန်ပြည်နယ်ထဲမှာနော်။ ဆိုတော့ ဖြစ်စဉ်တိုင်းက ကြီးလေးတဲ့ ပုဒ်မတွေ တပ်ပြီးတော့ ၄ နှစ်ကနေပြီးတော့ ၁၂ နှစ်လောက်ထိ ထောင်ဒဏ်ချတဲ့ ကိစ္စတွေရှိလာတယ်။ အဲ့တော့ စိုးရိမ်ရတယ်။” လူ့အခွင့်အရေး တစ်ရပ်ဖြစ်သည့် လွတ်လပ်စွာ ထုတ်ဖော်ပြောဆိုခွင့်ကို စစ်ကောင်စီတပ်က အာဏာသိမ်းချိန်မှ စ၍ ချိုးဖောက်မှာ ပိုဆိုးဝါးလာခဲ့ပြီး အရပ်သား ပြည်သူများအား ဖမ်းဆီး အရေးယူမှုများ လုပ်ဆောင်နေသည့် အပေါ် နိုင်ငံတကာ အသိုင်းအဝန်းကို နိုင်အဲမွန်က ယခုကဲ့သို့ ပြောသည်။ “ဒီမြန်မာနိုင်ငံမှာ ဖြစ်နေတဲ့ လူ့အခွင့်အရေး ချိုးဖောက်မှုတွေထဲမှာ အခုလိုမျိုး လွတ်လပ်စွာထုတ်ဖော် ပြောဆို ရေးသားခွင့်တွေ နိုင်ငံရေးအရ ရပ်တည်ခွင့် အပါအဝင် မတရားသဖြင့် စစ်မှုထမ်းနေတဲ့ ကိစ္စတွေ နောက်တစ်ခု က လူသားဒိုင်းတွေ အသုံးပြုလာတဲ့ကိစ္စတွေ ကတကယ့်ကြီးလေးတဲ့ လူ့အခွင့်အရေး ချိုးဖောက်မှုတွေ ဖြစ် တယ်ဆိုတဲ့ ကိစ္စကိုပြောချင်တယ်။ သူတို့ချိုးဖောက်မှုတွေက အစီအစဉ်တကျ ဖြစ်တယ် ဆိုတာကို နိုင်ငံ တကာက သိဖို့လိုတယ်။” မွန်ပြည် လူ့အခွင့်အရေး ဖောင်ဒေးရှင်း အနေဖြင့် တတ်နိုင်သည့်ဘက်မှ ဖမ်းဆီးခံရသူ၏ မိသားစုများအတွက် ဥပဒေရေး အရ အကာအကွယ် ပေးနိုင်မည့် အစီအမံများ လုပ်ဆောင်ပေးနေသည်ဟု ဆိုသည်။ ထို့အပြင် နိုင်ငံတကာသိအောင် ထုတ်ပြန်မှုများအပြင် သတင်းများ ရေးသားခြင်းအားဖြင့် ထုတ်ဖော် ပြောဆို ခြင်းနှင့် ထပ်တိုး ဖမ်းဆီးခံရမှုများ မဖြစ်အောင်လည်း ၎င်းတို့၏ ကွန်ရက်မှ တစ်ဆင့် ဆောင်ရန် ရှောင်ရန် နည်း လမ်းများနှင့် ကာကွယ် တားဆီးနိုင်ရေး လုပ်ဆောင်ပေးခြင်းတို့ကို တတ်နိုင်သည့် အဝန်းအဝိုင်းမှ လုပ်ပေးလျက် ရှိသည်ဟု ဆိုသည်။

TikTok တွင် ဝါဒဖြန့် လှုံ့ဆော်မှုဖြင့် အမျိုးသမီး တစ်ဦး ဖမ်းဆီးခံရ

Jul 24

ဓနု ဒေသတွင် ငှက်ဖျားဆေး လိုအပ် သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၂၄ ရက်။ ရှမ်းပြည်တောင်ပိုင်း၊ ဓနုကိုယ်ပိုင် အုပ်ချုပ်ခွင့်ရဒေသဖြစ်သည့် ရွာငံမြို့နယ်ထဲက မင်းပလောင်ကျေးရွာက စစ်ဘေးရှောင်များ ငှက်ဖျားရောဂါ ဖြစ်နေပြီး ဆေးဝါးများ အကူအညီ လိုအပ်နေကြသည်။ ဇွန်လဆန်းပိုင်း ကတည်းက စတင်ဖြစ်ပွားခဲ့သော ငှက်ဖျားရောဂါမှာ လက်ရှိအချိန်ထိ ဆိုးဝါးစွာ ဆက်လက် ဖြစ်ပွားနေသည်ဟု ဓနုပြည်နယ် အမျိုးသား ကာကွယ်ရေးတပ်တော် (DSNDA) မှ သတင်းနှင့် ပြန်ကြားရေး တာဝန်ခံ ကိုကျားပျံက ပြောသည်။ “ငှက်ဖျားကတော့ တော်တော်ဆိုးတယ်။ အဲ့မှာဆိုရင် ငှက်ဖျား မဖြစ်ဖူးတဲ့သူ မရှိသလောက်အောင် မကျန်တော့ အောင်ပေါ့နော်၊ အကုန်လုံးက ဖြစ်ဖူးသွားတဲ့ အနေအထားမျိုးထိ ဖြစ်နေတာ ဒီပြည်သူတွေ အပါပေါ့နော်၊ ကျနော်တို့ ဒီလက်ရှိ ကူညီဆောင်ရွက်နေတဲ့ ကျနော်တို့ အဖွဲ့သားတွေရော၊ ကျနော်တို့ ကိုယ်တိုင် အပါပေါ့နော်၊ ကျနော်တို့လည်း အဲ့လိုမျိုး သတိလစ်သွားလောက်တဲ့ အထိ ဖြစ်တာပေါ့နော်။ လုံးဝ ဆိုးဆိုးဝါးဝါးကြီး၊ လုံးဝ သတိလစ်တဲ့ အခြေအနေမျိုးထိကို ဖြစ်သွားတာ။” မိုးဦးရာသီမှ စတင်၍ ဖြစ်ပွားခဲ့သော ငှက်ဖျားရောဂါသည် စစ်ဘေးရှောင်ပြည်သူ အယောက် ၂၀၀ နီးပါးအထိ ကူးစက်ခံစားခဲ့ရပြီး လက်ရှိတွင် ငှက်ဖျား မဖြစ်ဖူးသူ မရှိသလောက် ဖြစ်နေကြောင်း ကိုကျားပျံက ဆိုသည်။ ငှက်ဖျားရောဂါကြောင့် အသက်ဆုံးရှုံးရသူများ မရှိသေးသော်လည်း ဆေးဝါး အလုံလောက် မရှိသောကြောင့် လက်ရှိအချိန်ထိ ဆက်လက် ကူးစက်မှုများ ရှိနေသည်ဟု ဆိုသည်။ လက်ရှိတွင် အဓိက စိန်ခေါ်မှုမှာ ဆေးဝါးပြတ်လပ်မှု ဖြစ်ပြီး ရရှိထားသည့် ဆေးဝါး အနည်းငယ်ဖြင့် လူနာ ဦးရေ များပြားမှုကို မျှဝေသုံးစွဲနေရသောကြောင့် ရောဂါကုသမှုကို ရက်ပြည့်အောင် မဆောင်ရွက်နိုင်ဘဲ ဖြစ်နေသည်ဟု ကိုကျားပျံက ဆက်ပြောသည်။ “ငှက်ဖျားဆေးကို ကျနော်တို့ သုံးရက်တိုက်ရမယ့် အနေအထားမျိုးမှာ အများကြီးဖြစ်တဲ့ အချိန်နဲ့ တိုးပြီးဆိုလို့ ရှိရင် ကျနော်တို့က သူတို့ကို သုံးရက်လုံး ရက်ပတ်လည်အောင် မတိုက်နိုင်တဲ့ အခါမှာ တစ်ရက်တိုက်ရတယ်၊ နှစ်ရက်တိုက်ရတယ်။ အဲ့အချိန်မှာ ကျနော်တို့က ငှက်ဖျားကို အမြစ်ပြတ်အောင် မဖြတ်ပေးနိုင်ဘူး ဖြစ်နေ တယ်။ အဲ့ဒါကြောင့်။” ငှက်ဖျားရောဂါ အပြင် မသန့်ရှင်းသော ချောင်းရေများကို သောက်သုံးနေရခြင်းနှင့် တောတွင်း နေထိုင်မှု ပုံစံတို့ ကြောင့်လည်း ယားနာကဲ့သို့သော အရေပြားရောဂါများနှင့်လည်း စစ်ဘေးရှောင်များ ရင်ဆိုင်နေရသည်။ အရပ်ဘက် အဖွဲ့အစည်းများက ဆေးဝါးနှင့် ကုသမှုများအတွက် တတ်နိုင်သလောက် ကူညီဆောင်ရွက်ပေးနေ သော်လည်း လိုအပ်ချက်မှာ ကြီးမားနေဆဲဖြစ်ပြီး ဆေးဝါးဝယ်ယူရန် ငွေကြေးများ အရေးတကြီး လိုအပ်နေ သည်ဟု အကူအညီပေးနေသူများက ဆိုသည်။ ထို့အပြင် စစ်ဘေးရှောင်များအတွက် ခြင်ထောင်နှင့် စားနပ်ရိက္ခာများ အပါအဝင် အခြားသော အကူအညီများစွာ လည်း လိုအပ်နေသည်ဟု ဆိုသည်။ မင်းပလောင်ကျေးရွာသည် ၂၀၂၄ ခုနှစ်၊ ဒီဇင်ဘာလ ၂၂ ရက်နေ့တွင် စစ်ကောင်စီတပ်၏ ရွာလုံးကျွတ် မီးရှို့ ဖျက်ဆီးခြင်းကို ခံခဲ့ရပြီး အိမ်ခြေ ၁၇၉ အိမ်အနက် ၁၆၈ အိမ် မီးလောင်ပျက်စီးခဲ့ခြင်း ဖြစ်သည်။ ထိုအချိန်မှ စတင်၍ မင်းပလောင် ဒေသခံရွာသားများသည် နီးစပ်ရာ တောတောင်များ အတွင်းသို့ ပြောင်းရွှေ့ ခိုလှုံခဲ့ကြရသည်။ မိုးရာသီတွင် လမ်းပန်းဆက်သွယ်ရေး အလွန်ခက်ခဲသည့် ဒေသတစ်ခုဖြစ်သောကြောင့် ပြင်ပအလှူရှင်များ၏ အကူအညီများ ရောက်ရှိရန် ခက်ခဲနေသည်ဟု အကူအညီပေးနေသူများက ပြောသည်။

ဓနု ဒေသတွင် ငှက်ဖျားဆေး လိုအပ်

Jul 24

သရက်ချောင်းမြို့နယ်အတွင်း လက်နက်ကြီးကြောင့် ၂ ဦးသေ၊ ၅ ဦး ဒဏ်ရာရ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၂၄ ရက်။ ထားဝယ်ခရိုင် အရှေ့တောဒေသ၊ သရက်ချောင်းမြို့နယ်ထဲက ဟိန္ဒူးချောင်းကျေးရွာအနီးတွင် စစ်ကောင်စီ ဗျူဟာကုန်းက ပစ်ခတ်လိုက်သည့် လက်နက်ကြီးကျည်ကြောင့် နှစ်ဦးသေဆုံးပြီး ၅ ဦးဒဏ်ရာ ရရှိခဲ့သည်။ လက်နက်ကြီးကျည်စထိမှန်ပြီး သေဆုံးသွားသူမှာ ကားသမားနှင့် ခရီးသည် အမျိုးသမီးတစ်ဦးတို့ ဖြစ်ကြသည် ဟု ကရင်အမျိုးသားအစည်းအရုံး KNU က ထုတ်ပြန်ထားသည်။ KNU မြိတ် - ထားဝယ်ခရိုင် အတွင်းရေးမှူး ပဒိုစောအယ်နား က “ကမ်းနားမှာ လှေနဲ့ကူးဖို့ လုပ်နေတဲ့အချိန် စစ်ကောင်စီ စခန်းရှိနေတဲ့ မေတ္တာ ဗျူဟာကုန်းကနေ လက်နက်ကြီးနဲ့ ပစ်လိုက်ရာမှာ ထိသွားတာပါ” ဟု ပြော သည်။ လက်နက်ကြီး ကျည်စထိမှန်၍ ကားသမားတစ်ဦး သေဆုံးကာ ခရီးသည် ငါးဦး ဒဏ်ရာရသွားခဲ့သည်ဟု ရွာသား များကပြောသည်။ စစ်ကောင်စီ၏ မေတ္တာစခန်းမှ လက်နက်ကြီး ပစ်ခတ်မှုကြောင့် သေဆုံးသွားသူ ယာဉ်မောင်မှာ အသက် ၃၉ နှစ် အရွယ် ဦးရန်နိုင်ဆိုသူ ဖြစ်ပြီး ခရီးသည် အမျိုးသမီးငယ်မှာမူ မည်သူမည်ဝါဖြစ်ကြောင် မသိရသေးဘူးဟု KNU က ဆိုသည်။ ပကာရီ - ထီးခီးကားလိုင်း ပြေးဆွဲနေသည့် ခရီးသည်တင်ကားမှာ ဇူလိုင်လ ၂၁ ရက်နေ့ နံနက်ပိုင်းက လက်နက် ကြီးဖြင့် ပစ်ခတ်ခံရခြင်း ဖြစ်သည်။ ကားပေါ်တွင် လိုက်ပါလာသူများမှာ မေတ္တာမြို့တွင် နေထိုင်ကြသူများ ဖြစ်ကြပြီး ထားဝယ်မြို့ဘက်သို့ လာစဥ် ဟိန္ဒူးချောင်းကျေးရွာ တံတားတွင် ရေကြီးနေသဖြင့် လှေဖြင့်ကူးရန် လုပ်နေသည့် အချိန်၌ ပစ်ခတ်ခံရခြင်း ဖြစ် ကြောင်း KNU မြိတ် - ထားဝယ်ခရိုင် အတွင်းရေးမှူး ပဒိုစောအယ်နား က ဆိုသည်။ စစ်ကောင်စီဘက်က လက်နက်ကြီး မပစ်ခတ်မီ ဟိန္ဒူးချောင်းကျေးရွာအနီးရှိ ကရင်အမျိုးသား လွတ်မြောက်ရေး တပ်မတော် (KNLA) ဂိတ်အနီးတွင် စစ်ကောင်စီနှင့် KNLA တို့ ထိတွေ့ပစ်ခတ်မှု ရှိခဲ့ကြောင်း ဆိုသည်။ ထိခိုက်သေဆုံးမှုများ ဖြစ်ခဲ့ပြီးနောက် ကျန်ခရီးသည်များကို စစ်ကောင်စီတပ်ဖွဲ့မှ စစ်ဆေးရန်ဟု ဆိုကာ ခေါ် ဆောင်သွားခဲ့ပြီး ဇူလိုင်လ ၂၁ ရက်နေ့၊ ညနေပိုင်းတွင် ပြန်လည်လွှတ်ပေးခဲ့သည်ဟု ကားသမားတစ်ဦးက ဆို သည်။ ဖမ်းဆီးခေါ်ဆောင်သွားသည့် ခရီးသည်များ၏ ငွေနှင့် ပစ္စည်းများကိုမူ စစ်ကောင်စီ တပ်ဖွဲ့ဝင်များက ယူသွားခဲ့ သည်ဟု နီးစပ်သူများက ပြောသည်။ ပြီးခဲ့သည့် ဇူလိုင်လ ၈ ရက်နေ့ကလည်း စစ်ကောင်စီတပ်က လက်နက်ကြီးဖြင့် ပစ်ခတ်မှုကြောင့် ထားဝယ်ခရိုင်၊ ကလိန်အောင်မြို့အနီး ကော့လှိုင်ကျေးရွာမှ ဥယျာဉ်ခြံ တစ်ခုထဲတွင် ကလေးငယ်များ အပါအဝင် မိသားစုဝင် လေးဦး သေဆုံးပြီး တစ်ဦးမှာ လက်တစ်ဖက် ဆုံးရှုံးခဲ့ရသေးသည်။

သရက်ချောင်းမြို့နယ်အတွင်း လက်နက်ကြီးကြောင့် ၂ ဦးသေ၊ ၅ ဦး ဒဏ်ရာရ

Jul 24

လောင်းလုံးမြို့နယ်အတွင်း လက်နက်ကြီးကြောင့် တစ်ဦးသေ၊ တစ်ဦး ဒဏ်ရာရ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၂၄ ရက်။ ထားဝယ်ခရိုင်၊ လောင်းလုံးမြို့နယ်ထဲက နေအိမ်တစ်လုံးအပေါ်သို့ လက်နက်ကြီးကျည် ကျရောက်ပေါက်ကွဲမှု ကြောင့် တစ်ဦးသေဆုံးပြီး တစ်ဦး ဒဏ်ရာ ရရှိခဲ့သည်။ သေဆုံးသူမှာ ဖခင်ဖြစ်ပြီး သမီးဖြစ်သူက ဒဏ်ရာ ရသွားခဲ့သည်။ လောင်းလုံးမြို့နယ်၊ သဗျာကျေးရွာအုပ်စု၊ ပန်းတောပြင်ကျေးရွာရှိ နေအိမ်တစ်ဆောင်ပေါ်သို့ စစ်ကောင်စီတပ်မှ ပစ်ခတ်လိုက်သည့် လက်နက်ကြီးကျည် ကျရောက်ပေါက်ကွဲခဲ့ခြင်းဖြစ်သည် ဟု ရွာသားများက ပြောသည်။ ဇူလိုင်လ ၂၂ ရက်နေ့၊ နံနက်ပိုင်း ၁၁ နာရီခွဲအချိန်ခန့်က ထားဝယ်မြို့ပေါ်ရှိ နတလရုံးနှင့် အကောက်အခွန်ရုံးတို့၌ တပ်စွဲထားသည့် စစ်ကောင်စီတပ်မှ လောင်းလုံးမြို့ဘက်သို့ ပစ်ခတ်ခဲ့ခြင်းဖြစ်သည်။ လက်နက်ကြီး ကျည်စ ထိမှန်၍ အသက် ၆၀ အရွယ် ဖခင်ဖြစ်သူ ဦးဉာဏ်စော ဆိုသူသေဆုံးခဲ့ပြီး အသက် ၃၅ နှစ်အရွယ် သမီးဖြစ်သူ မမေယု ထိခိုက်ဒဏ်ရာရရှိခဲ့သည်။ အသက် ၄၅ နှစ်အရွယ် ရွာသားတစ်ဦးက “အဖေလုပ်တဲ့သူ ထိုင်နေတဲ့နေရာ တည့်တည့်ကို ကျတာ၊ ခန္ဓာကိုယ် အောက်ပိုင်း တစ်ခုလုံးကြေမွသွားတယ်။ ကူကြပါ ကယ်ကြပါ အော်ရင်းနဲ့ ဆုံးသွားတာ၊ သမီးလုပ်တဲ့ သူမှာ ကတော့ လည်ပင်းကို အစစင်သွားတယ်” ဟု ပြောသည်။ စစ်ကောင်စီတပ်မှ တိုက်ပွဲဖြစ်ပွားခြင်း မရှိဘဲ အရပ်သားများ နေထိုင်သည့် ကျေးရွာထဲကို လက်နက်ကြီးများဖြင့် အကြောင်းမဲ့ ပစ်ခတ်ခဲ့ခြင်းဖြစ်သည်။ စစ်ကောင်စီတပ်ဖွဲ့မှ လောင်းလုံးမြို့နယ်ဘက်သို့ လက်နက်ကြီး လေးလုံး ပစ်ခတ်ခဲ့ခြင်းဖြစ်ပြီး ယခု လက်နက် ကြီးကျရောက်သည့် နေအိမ်၏ အပေါ်ပိုင်းမှာ လုံးဝပျက်စီးသွားသည်။ ထို့အပြင် အနီးပတ်ဝန်းကျင်ရှိ နေအိမ်အချို့လည်း လက်နက်ကြီးကျည်စ ထိမှန်ခဲ့သေးကြောင်း ရွာသားများက ဆိုသည်။

လောင်းလုံးမြို့နယ်အတွင်း လက်နက်ကြီးကြောင့် တစ်ဦးသေ၊ တစ်ဦး ဒဏ်ရာရ

Jul 23

ကော်သူးလေ ပြည်သူများအား KNU က မုန်တိုင်း သတိပေးချက် ထုတ်ပြန် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၂၃ ရက်။ ကော်သူးလေတွင် နေထိုင်ကြသည့် ပြည်သူများအနေဖြင့် မုန်တိုင်းရန် ကာကွယ်ရေးအတွက် ကြိုတင်ပြင်ဆင်မှု များကို လုပ်ဆောင်ထားရန် ကရင်အမျိုးသား အစည်းအရုံး KNU က ဇူလိုင်လ ၂၃ ရက်နေ့တွင် ထုတ်ပြန်ပြောဆို လိုက်သည်။ မုန်တိုင်းရန် ကာကွယ်ရန် ကြိုတင်ပြင်ဆင် ထားရမည့် အရာများနှင့် ပတ်သက်၍ KNU က“ပြည်သူများအားလုံး ကို ဤမုန်တိုင်းတိုက်ခိုက်မှုဖြစ်နိုင်ခြေနှင့် ပတ်သက်၍ ချက်ချင်းသတိမူ၍ ဆောင်ရွက်ရန် တောင်းဆိုအပ်ပါ သည်။ ရေသန့်၊ အစားအစာခြောက်၊ ဆေးဝါးများ၊ ဓာတ်မီး များ၊ဘက်ထရီ များနှင့် အရေးကြီးဒာရွက်စာတမ်း များကို ရေစိုခံအိတ်များတွင် သိမ်းဆည်းထားသည့် အရေးပေါ်ကိရိယာ အစုံကို ပြင်ဆင်ထားရန် တိုက်တွန်း အပ်ပါသည်။ သင့်မိသားစုနှင့်အတူ ရွှေ့ပြောင်းရေးလမ်း ကြောင်းကို စီစဉ်ထားကာ အမြန်ပြောင်းရွှေ့ရန် လိုအပ်ပါက အနီးဆုံးဘေးကင်းလုံခြုံသော နေရာသို့ ပြောင်း ရွှေ့ ပါ။ သင်းမွေးမြူထားသော တိရစ္ဆာန်များနှင့် အဖိုးတန် ပစ္စည်းများကို ပိုမိုလုံခြုံသောနေရာများသို့ ရွှေ့ပြောင်း ခြင်းဖြင့် ကာကွယ်ပါ။” ဟု ပြောသည်။ ထို့အပြင် ဒေသတွင်း ရေဒီယိုများ၊ သို့မဟုတ် ယုံကြည်ရသော သတင်းရင်းမြစ်များကို နားဆင်ခြင်းဖြင့် အချက်အလက် များကို ရယူရန်နှင့် အိမ်နီးချင်းများ အထူးသဖြင့် သက်ကြီးရွယ်အိုများ၊ မသန်စွမ်းများနှင့် ကလေးသူငယ် များရှိသော မိသားစုများကို ဂရုစိုက်၍ တစ်ဦးနှင့် တစ်ဦး ဘေးကင်းလုံခြုံအောင်နေဖို့ အသိပေးကြရန်လည်း KNU က တိုက်တွန်းသည်။ ဝီဖာဆိုင်ကလုန်းမုန်တိုင်း(Cyclone Wipha) သည် ကော်သူလေးအပါအဝင် မြန်မာနိုင်ငံ အရှေ့တောင်ဘက်သို့ ဇူလိုင်လ ၂၃ ရက်နှင့် ၂၄ ရက်နေ့တို့တွင် ဝင်ရောက်တိုက်ခိုက် လာနိုင်သည့်အပြင် ပိုမိုအားကောင်းပြီး ရပ်ရွာများအတွက် အလွန်အန္တရာယ်များနိုင်သည်ဟု KNU က ဆိုသည်။ ဝီဖာဆိုင်းကလုန်းမုန်တိုင်းကြောင့် အလွန်ပြင်းထန်သော မိုးရွာခြင်း၊ လေပြင်းတိုက်ခြင်းနှင့် ရေလွှမ်းမိုးခြင်းများ ကို ဖြစ်စေနိုင်ပြီး မြေနိမ့်ပိုင်ဒေသများ၊ မြစ်များအနီးရှိ နေရာများနှင့် တောင်ကုန်းများတွင် ရုတ်တရတ်ရေကြီး ခြင်းနှင့် မြေပြိုခြင်းများ၊ ကြုံတွေ့ရနိုင်သည်ဟု ဆိုသည်။။ ထို့အပြင် လေပြင်းတိုက်ခတ်မှုများကြောင့် နေအိမ်များ၊ ဓာတ်အားလိုင်းများ၊ သစ်ပင်များနှင့် လယ်ယာများ ပျက်စီးနိုင်ပြီး ဘေးကင်းရေး၊ အစားအသောက်ထောက်ပံ့မှုနှင့် သယ်ယူပို့ဆောင်ရေးတို့ကို အကြီးအကျယ် ထိခိုက်စေနိုင်သည်ဟု KNU က ပြောသည်။ ထိုအခြေအနေများကြောင့် သတိပေးထုတ်ပြန်ချက်များကို အလေးထားရန်နှင့် ဘေးအန္တရာယ် ကာကွယ်ရေး အတွက် ယခုကတည်းက စတင်လုပ်ဆောင်ခြင်းဖြင့် အသက်များကို ကယ်တင်ကြရန် တိုက်တွန်းသည်ဟု KNU က ဆိုသည်။

ကော်သူးလေ ပြည်သူများအား KNU က မုန်တိုင်း သတိပေးချက် ထုတ်ပြန်

« Prev 1 2 3 4 5 … 10 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

အမေရိကန် နိုင်ငံရောက် နိုင်ငံခြား သားများ ငွေလွှဲမှုကို အခွန် ၂၅ % ထိတိုးမြှင့်ရန် ပြင်ဆင်နေ
အိန္ဒိယ ဖွား သားအမိ အင်္ဂလန်တွင် တပြိုင်တည်း မြို့တော်ဝန်များ ဖြစ်
စစ်ပွဲတွင် ပတ်သက်နေသည့် ဆော်ဒီတွင် ဘုရားဖူး ၁.၅ သန်းကျော် ဟာဂျီဝတ်ပြုပွဲ ဆင်နွှဲ
ကုလသမဂ္ဂ နျူလက်နက် မပြန့်ပွားရေး ညီလာခံ သဘောတူညီချက်မရပဲ အဆုံးသတ်
Meta, Tiktok နှင့် Google နည်းပညာ ကုမ္ပဏီများ ငွေလိမ် ကြော်ငြာများ မဖယ်ရှားဟု EU ကို တိုင်ကြား

Archives

Archives

×Close