ကချင်မြောက်ဖျားက ခေါင်လန်ဖူးတွင် တိုက်ပွဲမရှိဘဲ ဒရုန်းဖြင့် ပစ်ခတ်မှုကြောင့် သားအဖနှစ်ဦး သေဆုံး
သတင်းနှင့် မီဒီယာ ကွန်ရက်
၂၀၂၆ ခုနှစ်၊ ဇူလိုင်လ ၁၈ ရက်။
ကချင်ပြည်၊ မြောက်ဖျားပိုင်းရှိ ခေါင်လန်ဖူးမြို့နယ်ထဲက တိုက်ပွဲဖြစ်ပွားခြင်းမရှိသည့် ကျေးရွာအား စစ်တပ်နှင့် ဌာနေပြည်သူ့စစ် ပူးပေါင်းအဖွဲ့က ဒရုန်းများဖြင့် ရမ်းသမ်းပစ်ခတ်ခဲ့သဖြင့် ကလေးငယ်တစ်ဦးအပါအဝင် အရပ်သား နှစ်ဦး သေဆုံးခဲ့ရသည်။
အဆိုပါဖြစ်စဉ်မှာ ဇူလိုင်လ ၁၂ ရက်နေ့က ဖြစ်ပွားခဲ့ခြင်းဖြစ်ပြီး စစ်တပ်နှင့် ပူးပေါင်းအဖွဲ့တို့က ငွါးဂျားလာ၊ မခေါင်ထနှင့် မီကူဆာကျေးရွာများကို အဆင့်မြင့်နည်းပညာသုံး တာဝေးပစ် အသေခံဒရုန်းများဖြင့် ရမ်းသမ်း ပစ်ခတ်ခဲ့ခြင်းဖြစ်သည်။
တိုက်ပွဲဖြစ်ပွားရာနေရာနှင့် များစွာဝေးကွာသော မီကူဆာကျေးရွာရှိ နေအိမ်တစ်လုံးပေါ်သို့ ဒရုန်းကျရောက် ပေါက်ကွဲခဲ့သဖြင့် အိမ်ထဲတွင်ရှိနေသည့် သားအဖနှစ်ဦးမှာ ပွဲချင်းပြီး သေဆုံးခဲ့ရသည်။
ဒေသတွင်း တော်လှန်ရေးအင်အားစုများ၏ ပြောဆိုချက်အရ စစ်တပ်သည် ၎င်းတို့လှုပ်ရှားသည့် နယ်မြေများရှိ အရပ်သားကျေးရွာများကို ပစ်မှတ်ထားကာ ဒရုန်းများဖြင့် တိုက်ခိုက်လာခြင်းဖြစ်သည်။
“စစ်တပ်ဟာ သူတို့ လှုပ်ရှားတဲ့ နယ်မြေတွေထဲက အရပ်သားရွာတွေကို ပစ်မှတ်ထားပြီး အခုလို ဒရုန်းတွေနဲ့ တိုက်ခိုက်လာတာ” ဟု ဒေသတွင်း တော်လှန်ရေးတပ်ဖွဲ့ဝင်တစ်ဦးက ဆိုသည်။
လက်ရှိတွင် ခေါင်လန်ဖူးမြို့နယ်အတွင်း နှစ်ဖက်တပ်ဖွဲ့များအကြား စစ်ရေးတင်းမာလျက်ရှိသည်။ ပြီးခဲ့သည့် ဇူလိုင်လ ၁၀ ရက်နေ့ကလည်း မြန်မာ-တရုတ်နယ်စပ်၊ နယ်မြတ်မှတ်တိုင် (၃၀) အနီးတွင် တိုက်ပွဲဖြစ်ပွားခဲ့ပြီး ပြည်သူ့စစ်စခန်းတစ်ခုနှင့် လက်နက်ခဲယမ်းများကို တော်လှန်ရေး ပူးပေါင်းတပ်ဖွဲ့က သိမ်းဆည်းရမိခဲ့သည်။
လက်ရှိအချိန်ထိ ဆက်သွယ်ရေး လမ်းကြောင်းများ အခက်အခဲရှိနေသေးသဖြင့် သေဆုံးသွားခဲ့ရသည့် သားအဖ နှစ်ဦး၏ အသေးစိတ် အချက်အလက်များကို သီးခြားအတည်ပြုနိုင်ခြင်း မရှိသေးပေ။
ခေါင်လန်ဖူးမြို့နယ်အပြင် ကချင်ပြည်အတွင်းရှိ အခြားသော မြို့နယ်နှစ်ခုတွင်လည်း စစ်ရေးတင်းမာမှုများ ဆက်လက်ဖြစ်ပေါ်လျက်ရှိသည်။
ရွှေကူမြို့နယ်တွင် ဇူလိုင်လ ၁၃ ရက်နေ့က စစ်တပ်နှင့် ကချင်လွတ်လပ်ရေးတပ်မတော် (KIA) ပူးပေါင်းတပ်တို့ အကြား တိုက်ပွဲပြင်းထန်ခဲ့သည်။ စစ်တပ်သည် ရွှေကူ – ဗန်းမော်နှင့် ရွှေကူ – ငအိုးလမ်းပိုင်းများကို ထိုးစစ် ဆင်ခဲ့သော်လည်း KIA ၏ တန်ပြန်တိုက်ခိုက်မှုကြောင့် တပ်ဆုတ်ပေးလိုက်ရပြီးနောက် မန်နားလေးနှင့် ခတ်ခုံ ကျေးရွာကြားတွင် ကျန်ရှိနေသည့် စစ်ကြောင်းတစ်ခုက ထိုးစစ်ကို ဆက်လက်လုပ်ဆောင်နေဆဲ ဖြစ်သည်။
အလားတူ ဖားကန့်မြို့နယ်တွင်လည်း ဇူလိုင်လ ၁၄ ရက်နေ့၌ KIA တပ်မဟာ (၆) နယ်မြေကို စစ်တပ်က လေကြောင်းမှ သုံးကြိမ်တိုင်တိုင် ဗုံးကြဲတိုက်ခိုက်ခဲ့သည်။ လူထိခိုက်မှု မရှိသော်လည်း နေအိမ်တစ်လုံး ပျက်စီးခဲ့ ရသည်။
ဧပြီလနှောင်းပိုင်းမှစ၍ စစ်တပ်က စစ်အင်အားနှင့် လက်နက်ရိက္ခာများကို ဆက်တိုက်ဖြည့်တင်းလာခြင်းနှင့်အတူ ကချင်ပြည်အတွင်းရှိ မြို့နယ်အသီးသီးတွင် တိုက်ပွဲများနှင့် လေကြောင်းတိုက်ခိုက်မှုများမှာ နေ့စဉ်ရက်ဆက် ဆိုသလို ဖြစ်ပွားလျက်ရှိကြောင်း ဒေသတွင်း သတင်းရင်းမြစ်များက ဆိုသည်။
