ယူကရိန်းကို အဖွဲ့ဝင်အဖြစ်လက်ခံရန် EU ဆွေးနွေးမည်၊ မျက်နှာချင်းဆိုင်တွေ့ရန် ရုရှားကို ယူကရိန်း သမ္မတ စာပို့
သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇွန်လ ၅ ရက်။
ယူကရိန်းနိုင်ငံအား ဥရောပသမဂ္ဂ (EU) အဖွဲ့ဝင်အဖြစ် အသိအမှတ်ပြုရေး ဆွေးနွေးမှုများတွင် ပထမဆုံး အကြောင်းအရာကဏ္ဍ (Cluster) ကို စတင်ဆွေးနွေးရန် အီးယူအဖွဲ့ဝင် ၂၇ နိုင်ငံစလုံးက သဘောတူညီခဲ့ကြကြောင်း ယူကရိန်းဝန်ကြီးချုပ် ယူလီယာ ဆဗီရီဒန်ကိုက ပြောကြားခဲ့သည်။
အလားတူ ဥရောပသမဂ္ဂ၏ အလှည့်ကျဥက္ကဋ္ဌတာဝန်ယူထားသည့် ဆိုက်ပရပ်စ်နိုင်ငံကလည်း တရားဥပဒေစိုးမိုးရေးနှင့် ဒီမိုကရေစီစံနှုန်းများ ပါဝင်သော ပထမဆုံးဆွေးနွေးပွဲအခန်းကဏ္ဍများကို တရားဝင်စတင်နိုင်ရန် ပြင်ဆင်နေပြီဟု ထုတ်ပြန်ထားသည်။
ယူကရိန်း၏ အီးယူဝင်ခွင့်ကို အစဉ်တစိုက် ကန့်ကွက်လာခဲ့သည့် ဟန်ဂေရီနိုင်ငံသည် ယူကရိန်းနိုင်ငံအတွင်းရှိ ဟန်ဂေရီလူနည်းစုများ၏ အခွင့်အရေးဆိုင်ရာ အငြင်းပွားမှုကို နှစ်ဦးနှစ်ဖက် သဘောတူညီမှု ရရှိခဲ့ပြီးနောက်တွင် အီးယူအဖွဲ့ဝင်နိုင်ငံအားလုံးက အဆိုပါ ပထမဆင့်ဆွေးနွေးပွဲအတွက် ယခုကဲ့သို့ မီးစိမ်းပြ ခွင့်ပြုလိုက်ကြခြင်း ဖြစ်သည်။
တချိန်တည်းမှာပင် ကိဗ်နှင့် မော်စကိုအကြား လေးနှစ်ကျော်ကြာ မြင့်တက်နေသည့် ရေရှည်စစ်ပွဲကို အဆုံးသတ်နိုင်ရေးအတွက် ယူကရိန်းသမ္မတ ဗိုလိုဒီမာ ဇလန်းစကီးက ရုရှားသမ္မတ ဗလာဒီမာ ပူတင်ထံ မျက်နှာချင်းဆိုင် တွေ့ဆုံဆွေးနွေးရန် အိတ်ဖွင့်ပေးစာတစ်စောင် ပေးပို့ကာ တိုက်ရိုက်ကမ်းလှမ်းခဲ့သည်။
ငြိမ်းချမ်းရေးသည် ယူကရိန်းနှင့် ရုရှားအကြား တိုက်ရိုက်ထိတွေ့ဆက်ဆံမှုမှသာ ဖော်ဆောင်နိုင်မည်ဖြစ်ကြောင်း၊ ဆွေးနွေးပွဲကာလအတွင်း အပစ်အခတ်ပြည့်အဝရပ်စဲထားရန်နှင့် အဆိုပါဆွေးနွေးပွဲကို ဆွတ်ဇာလန် သို့မဟုတ် တူရကီနိုင်ငံတို့တွင် ပြုလုပ်ရန် ယူကရိန်းသမ္မတက အဆိုပြုထားသည်။
အဆိုပါ ကမ်းလှမ်းချက်အပေါ် အမေရိကန်သမ္မတ ဒေါ်နယ်ထရမ့်က ခေါင်းဆောင်နှစ်ဦး တွေ့ဆုံဆွေးနွေးခြင်းကို ကြိုဆိုကြောင်းနှင့် နှစ်ဖက်စလုံးအနေဖြင့် အတိုင်းအတာတစ်ခုအထိ အလျှော့အတင်းလုပ်ကြရန် လိုအပ်မည်ဖြစ်ကြောင်း မှတ်ချက်ပြုခဲ့သည်။
ကရင်မလင်နန်းတော်ကလည်း အဆိုပါစာအား လက်ခံရရှိထားကြောင်း အတည်ပြုသော်လည်း၊ ရုရှားအစိုးရ၏ ရပ်တည်ချက်အရ ယူကရိန်းအနေဖြင့် ဒိုးနက်စ်၊ လူဟန့်စ်၊ ခါဆန်နှင့် ဇာပိုရီရှား စသည့် ဒေသ ၄ ခုမှ တပ်ဆုတ်ပေးရန်နှင့် နေတိုး (NATO) အဖွဲ့ဝင်ဖြစ်ရေး ကြိုးပမ်းမှုကို စွန့်လွှတ်ရမည်ဟူသော အချက်များကို ဆက်လက် တင်းခံထားဆဲ ဖြစ်သည်။
တစ်ဖက်တွင်မူ ယူကရိန်းနိုင်ငံခြားရေးဝန်ကြီးက ဤအိတ်ဖွင့်ပေးစာသည် စစ်ပွဲအဆုံးသတ်ရန် အလေးအနက်ထားသည့် ကမ်းလှမ်းမှုဖြစ်ပြီး ရုရှားဘက်က အဓိပ္ပာယ်ရှိသော တုံ့ပြန်မှုကို မျှော်လင့်ကြောင်း ထုတ်ဖော်ပြောကြားထားသည်။
