ကုလသမဂ္ဂ အထွေထွေညီလာခံ စတင်
သတင်းနှင့် မီဒီယာ ကွန်ရက်။
၂၀၂၆ ခုနှစ်၊ စက်တင်ဘာလ ၂၂ ရက်။
အမေရိကန်ပြည်ထောင်စု၊ နယူးယောက်မြို့ရှိ ကုလသမဂ္ဂဌာနချုပ်၌ အဖွဲ့ဝင် ၁၉၃ နိုင်ငံ ပါဝင်သည့် ကုလသမဂ္ဂ အထွေထွေညီလာခံကြီး စတင်ကျင်းပနေပြီဖြစ်သည်။
ယခုနှစ် ညီလာခံတွင် မြန်မာ၊ ဂါဇာ၊ ယူကရိန်း၊ အီရန်၊ ဆူဒန်နှင့် ကွန်ဂိုနိုင်ငံတို့၌ ဖြစ်ပွားနေသည့် စစ်ပွဲများကို အဆုံးသတ်နိုင်ရေး၊ ထိန်းချုပ်ရခက်ခဲလာသည့် အတုပြုလုပ်ထားသော ဉာဏ်ရည်တု (AI) နည်းပညာဆိုင်ရာ စိန်ခေါ်မှုများ၊ ရာသီဥတုပြောင်းလဲမှုနှင့် ကုန်ဈေးနှုန်းကြီးမြင့်မှုဆိုင်ရာ အကျပ်အတည်းများကို ကမ္ဘာ့ခေါင်းဆောင်များ အဓိကထား ဆွေးနွေးကြမည်ဖြစ်သည်။
ညီလာခံကို ကုလသမဂ္ဂ အတွင်းရေးမှူးချုပ် အန်တိုနီယို ဂူတာရက်စ် (António Guterres) ၏ မိန့်ခွန်းဖြင့် စတင်မည်ဖြစ်ပြီး၊ အမေရိကန်သမ္မတ ဒေါ်နယ်ထရမ့်၊ ပြင်သစ်သမ္မတ အီမန်နူအယ် မက်ခရွန်၊ ယူကရိန်းသမ္မတ ဇယ်လန်စကီးနှင့် အီရန်သမ္မတ ပက်ဇက်ရှ်ကီယန် တို့အပါအဝင် ကမ္ဘာ့နိုင်ငံပေါင်း ၁၃၀ ကျော်မှ ခေါင်းဆောင်များ မိန့်ခွန်းပြောကြားကြမည်ဖြစ်သည်။
ဒါ့အပြင် သက်တမ်း ၈၁ နှစ်ရှိပြီဖြစ်သည့် ကုလသမဂ္ဂအဖွဲ့ကြီးနှင့် ဗီတိုအာဏာပိုင် လုံခြုံရေးကောင်စီကို ခေတ်စနစ်နှင့်အညီ ပြုပြင်ပြောင်းလဲရေး၊ ယခုနှစ်ကုန်တွင် သက်တမ်းကုန်ဆုံးတော့မည့် အတွင်းရေးမှူးချုပ် ဂူတာရက်စ်၏နေရာ၌ ဆက်ခံမည့် ခေါင်းဆောင်သစ် ရွေးချယ်ရေး ကိစ္စများကိုလည်း သီးခြား ဆွေးနွေးသွားကြမည်ဖြစ်သည်။
ညီလာခံမတိုင်မီ မြန်မာနိုင်ငံ၏ အခြေအနေကို နိုင်ငံတကာရာဇဝတ်ခုံရုံး (ICC) သို့ လွှဲပြောင်းရန် ကုလသမဂ္ဂ လူ့အခွင့်အရေးကောင်စီက တောင်းဆိုထားပြီး၊ ကုလသမဂ္ဂဆိုင်ရာ မြန်မာသံအမတ်ကြီး ကိုယ်စားပြုမှုကိစ္စကိုလည်း အရည်အသွေးစစ်ဆေးရေးကော်မတီ (Credentials Committee) က စိစစ်ရန်ရှိနေသည်။
