ပြင်သစ် သွေးဘဏ်များ၏ အအေးပေးစနစ်များ ဆိုက်ဘာတိုက်ခိုက်ခံရ
သတင်းနှင့် မီဒီယာ ကွန်ရက်။
၂၀၂၆ ခုနှစ်၊ နိုဝင်ဘာလ ၅ ရက်။
ဥရောပနိုင်ငံများရှိ စူပါမားကတ်ကြီးများ၏ ရေခဲသေတ္တာ အအေးပေးစနစ်များကို ဆိုက်ဘာတိုက်ခိုက်မှု ပြုလုပ်သည့် တစ်ချိန်တည်းမှာပင် ပြင်သစ်နိုင်ငံရှိ သွေးလှူဘဏ်များ၏ အအေးပေးစနစ်များကိုလည်း ဟက်ကာများက ဆိုက်ဘာတိုက်ခိုက်ခဲ့ကြောင်း နိုင်ငံတကာသတင်းများတွင် ဖော်ပြထားသည်။
အင်တာနက်နှင့် ချိတ်ဆက်ထားသည့် အအေးပေး စနစ်များကို အင်တာနက်မှ တဆင့် ချိုးဖောက်ဝင်ရောက် တိုက်ခိုက်ခြင်း ဖြစ်သည်။
ပြီးခဲ့သည့် တနင်္ဂနွေနှင့် တနင်္လာနေ့အကူး ညပိုင်းတွင် ပြင်သစ် အမျိုးသားသွေးဌာန (EFS) ၏ ဒေသဆိုင်ရာ သွေးဘဏ် ၃ ခု၌ သွေးသိုလှောင်ရာ အအေးခန်းများ၏ စောင့်ကြည့်ထိန်းချုပ်မှုစနစ်များ ဆိုက်ဘာတိုက်ခိုက်ခံခဲ့ရခြင်းဖြစ်သည်။
သို့သော်လည်း တာဝန်ကျ ဝန်ထမ်းများက အချိန်မီ သတိပေးချက် ရရှိခဲ့ပြီး သွေးများကို အင်တာနက် ချိတ်ဆက်မထားသည့် အခြား အအေးခန်းများဆီသို့ ချက်ချင်း ရွှေ့ပြောင်းနိုင်ခဲ့သဖြင့် သွေးများ ပျက်စီးဆုံးရှုံးမှု မရှိခဲ့ကြောင်း ပြင်သစ် ကျန်းမာရေးဝန်ကြီးဌာနက အတည်ပြုခဲ့သည်။
အဆိုပါ တိုက်ခိုက်မှုသည် ဆွီဒင်နှင့် ဘယ်လ်ဂျီယံနိုင်ငံ အပါအဝင် ဥရောပ ၈ နိုင်ငံရှိ စူပါမားကတ်ကြီးများ၏ ရေခဲသေတ္တာနှင့် အအေးခန်းစနစ်များ တိုက်ခိုက်ခံရသည့် ဖြစ်စဉ်နှင့် တစ်ချိန်တည်း လုနီးပါး ဖြစ်ပွားခဲ့ခြင်းဖြစ်သည်။
အချို့ စူပါမားကတ်များတွင် ရေခဲသေတ္တာများ အပူချိန် ရုတ်တရက် မြင့်တက်သွားခဲ့သဖြင့် သိုလှောင်ထားသည့် အစားအသောက် အမြောက်အမြားကို စွန့်ပစ်ခဲ့ရသည်။
လတ်တလောတွင် အဆိုပါ အအေးခန်းစနစ်များသို့ အဝေးမှ ထိန်းချုပ်ဝင်ရောက်ခွင့် (Remote Access) များကို ပိတ်ပင်ထားပြီး အခြေအနေကို ထိန်းချုပ်ထားနိုင်ပြီဖြစ်သလို ဟက်ကာများ မည်သို့ တိုက်ခိုက်ခဲ့သည်ကိုလည်း သက်ဆိုင်ရာက စုံစမ်းစစ်ဆေးလျက်ရှိသည်။
