နိုင်ငံတကာသတင်း

ဂျာမနီလေဆိပ် ဒရုန်းဖြင့်တိုက်ခိုက်ခံရမှု ရုရှားကို စွပ်စွဲမည် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂ ရက်။ ပြီးခဲ့သည့်လက ဂျာမနီနိုင်ငံ လစ်ပ်ဇစ် (Leipzig) လေဆိပ်တွင် ဒရုန်းဖြင့် တိုက်ခိုက်ရန် ကြံစည်မှုသည် ရုရှား လက်ချက်ဖြစ်ကြောင်း မကြာမီ ဂျာမနီက စွပ်စွဲမည်ဟု သတင်းရင်းမြစ်များက ရိုက်တာ သတင်းဌာနကို ပြောသည်။ လစ်ပ်ဇစ် လေဆိပ်တွင် ယူကရိန်း ကုန်တင်လေယာဉ်ကို တိုက်ခိုက်ရန် ရည်ရွယ်ထားသည့် ပေါက်ကွဲစေတတ်သော ပစ္စည်းများနှင့် စနက်တံ တပ်ဆင်ထားသော ဒရုန်းတစ်စင်းကို လေဆိပ်ဝန်ထမ်းများက ရှာဖွေတွေ့ရှိခဲ့သည်။ အဆိုပါ လစ်ပ်ဇစ်လေဆိပ်သည် နေတိုး (NATO) အဖွဲ့၏ အရေးပါသော ထောက်ပံ့ရေးစခန်းတစ်ခုဖြစ်သည့်အပြင် ယူကရိန်း ကုန်တင်လေယာဉ်ကြီးများ ရပ်နားရာ နေရာလည်းဖြစ်သည်။ ထို့ပြင် ယင်းလုပ်ရပ်အတွက် ရုရှားအပေါ် ပိတ်ဆို့အရေးယူမှုအသစ်များ ချမှတ်ရန် ဂျာမနီနှင့် မဟာမိတ်နိုင်ငံများက ပြင်ဆင်နေကြောင်း သတင်းရင်းမြစ်များက ဆိုသည်။ သို့သော် ရုရှားသံရုံးဘက်ကမူ ဤစွပ်စွဲချက်များကို လုပ်ကြံဖန်တီးထားသော ရန်စမှုအဖြစ် အစောပိုင်းကတည်းက ပယ်ချထားသည်။ ဥရောပလွှတ်တော် ကာကွယ်ရေးကော်မတီ ဥက္ကဋ္ဌကလည်း ယင်းဖြစ်ရပ်ကို သွယ်ဝိုက်တိုက်ခိုက်မှုအဖြစ် မဟုတ်ဘဲ "အမှန်တကယ် တိုက်ခိုက်မှုစစ်စစ်" အဖြစ် ပွင့်ပွင့်လင်းလင်း သတ်မှတ်ရန် တိုက်တွန်းထားသည်။

ဂျာမနီလေဆိပ် ဒရုန်းဖြင့်တိုက်ခိုက်ခံရမှု ရုရှားကို စွပ်စွဲမည်

ဂျာမနီလေဆိပ် ဒရုန်းဖြင့်တိုက်ခိုက်ခံရမှု ရုရှားကို စွပ်စွဲမည် သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၂ ရက်။   ပြီးခဲ့သည့်လက ဂျာမန…

  • September 2, 2026
ဂါဇာစီးနင်းမှုအတွင်း ဟားမတ်စ်ခေါင်းဆောင်တစ်ဦး ဖမ်းဆီးခံရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂ ရက်။ အစ္စရေး အထူးတပ်ဖွဲ့နှင့် ရှင်းဘက် (Shin Bet) ထောက်လှမ်းရေးအဖွဲ့တို့ ပူးပေါင်း၍ ဂါဇာမြို့တွင် စီးနင်းတိုက်ခိုက်မှုတစ်ရပ် ပြုလုပ်ခဲ့ပြီး ဟားမတ်စ်အဖွဲ့၏ ပြည်တွင်းလုံခြုံရေး အကြီးအကဲတစ်ဦးကို အရှင်ဖမ်းဆီးရမိခဲ့ကြောင်း အစ္စရေးစစ်တပ်က ထုတ်ပြန်သည်။ ဖမ်းဆီးခံရသူ မိုအင်အယ်လ် အာရာဘီးဒ် (Moin Al-Arabeed) သည် ၂၀၂၃ ခုနှစ်၊ အောက်တိုဘာလ ၇ ရက်နေ့ တိုက်ခိုက်မှုအတွင်းက အစ္စရေး ဓားစာခံများကို ဝှက်ထားခြင်းနှင့် ရွှေ့ပြောင်းခြင်းများ ပြုလုပ်ခဲ့သူဖြစ်ကြောင်း အစ္စရေးဝန်ကြီးချုပ် နေတန်ယာဟုက စွပ်စွဲပြောဆိုထားသည်။ အဆိုပါ စီးနင်းမှု ပြုလုပ်နေစဉ် မြေပြင်ရှိ အစ္စရေးတပ်ဖွဲ့များကို အကာအကွယ်ပေးရန်အတွက် လေကြောင်းမှနေ၍ ဒုံးကျည် အနည်းဆုံး (၁၂) စင်းဖြင့် ပစ်ခတ်ခဲ့သည်။ ယင်းလေကြောင်းပစ်ခတ်မှုများကြောင့် ဖမ်းဆီးခံရသူ၏ ဇနီးသည် အပါအဝင် ပါလက်စတိုင်း (၄) ဦး သေဆုံးခဲ့ပြီး ၎င်းတို့အနက် ကလေးငယ် (၂) ဦးလည်း ပါဝင်သည်။ ထို့ပြင် ဂါဇာကမ်းမြောင်၏ အခြားနေရာများတွင်လည်း အစ္စရေး၏ ပစ်ခတ်မှုကြောင့် နောက်ထပ် (၂) ဦး သေဆုံးခဲ့သဖြင့် အင်္ဂါနေ့ တစ်ရက်တည်းတွင်ပင် သေဆုံးသူ စုစုပေါင်း (၆) ဦးအထိ ရှိခဲ့သည်။ ၂၀၂၅ ခုနှစ် အောက်တိုဘာလမှစတင်၍ အမေရိကန်၏ ကြားဝင်စေ့စပ်မှုဖြင့် အပစ်အခတ် ရပ်စဲထားသော်လည်း အစ္စရေးဘက်က တိုက်ခိုက်မှုအချို့ကို ဆက်လက်လုပ်ဆောင်နေဆဲဖြစ်သည်။ ယင်းလုပ်ရပ်သည် အပစ်အခတ်ရပ်စဲရေး သဘောတူညီချက်ကို ချိုးဖောက်ခြင်းဖြစ်သည်ဟု ဟားမတ်စ်အဖွဲ့က ပြင်းပြင်းထန်ထန် ရှုတ်ချထားသည်။

ဂါဇာစီးနင်းမှုအတွင်း ဟားမတ်စ်ခေါင်းဆောင်တစ်ဦး ဖမ်းဆီးခံရ

ဂါဇာစီးနင်းမှုအတွင်း ဟားမတ်စ်ခေါင်းဆောင်တစ်ဦး ဖမ်းဆီးခံရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၂ ရက်။ အစ္စရေး အထူးတပ်ဖွဲ့နှင့် ရှင်းဘ…

  • September 2, 2026
ဇနီးဖြစ်သူအား အခြား ယောက်ျားများနှင့်အတူ လိင်ပိုင်းဆိုင်ရာစော်ကားမှုဖြင့် ဗြိတိန်အမျိုးသား တရားရင်ဆိုင်နေရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂ ရက်။ အင်္ဂလန်မြောက်ပိုင်းမှ အသက် (၆၀) အရွယ် အမျိုးသားတစ်ဦးသည် ၎င်း၏ ဇနီးဖြစ်သူအား နှစ်ပေါင်း ၂၀ ကျော်ကြာ မူးယစ်ဆေးတိုက်ကျွေးကာ အခြားအမျိုးသားများ၏ အကူအညီဖြင့် လိင်ပိုင်းဆိုင်ရာ စော်ကားခဲ့မှုကြောင့် တရားရင်ဆိုင်နေရကြောင်း CNN နှင့် Yahoo News သတင်းဌာနများတွင် ဖော်ပြထားသည်။ အဆိုပါ အမျိုးသားအား အမှုပေါင်း (၄၈) မှုဖြင့် တရားစွဲဆိုထားပြီး ၎င်းက မုဒိမ်းမှု အပါအဝင် အမှု (၁၅) မှုကို ဝန်ခံထားသော်လည်း ကျန်ရှိနေသည့် အမှု (၃၃) မှုကိုမူ ငြင်းဆိုထားသည်။ ယင်းအမှုတွင် ခင်ပွန်းဖြစ်သူအပြင် အသက် (၂၈) နှစ်မှ (၇၃) နှစ်အရွယ်ကြားရှိ အခြားအမျိုးသား (၁၂) ဦးလည်း ပူးပေါင်းပါဝင်နေကြောင်း သိရသည်။ ခင်ပွန်းဖြစ်သူသည် အဆိုပါ အမျိုးသားများကို နေအိမ်သို့ ဖိတ်ခေါ်ကာ ဇနီးဖြစ်သူအား စော်ကားစေခဲ့ခြင်းဖြစ်သည်ဟု တရားလိုရှေ့နေများက ထွက်ဆိုထားသည်။ သို့သော် ယင်းအမျိုးသား (၁၂) ဦးကမူ စွဲချက်များကို ငြင်းဆိုထားကြသည်။ ယခုအမှုကို မန်ချက်စတာမြို့ရှိ တရားရုံးတွင် (၁၂) ပတ်ကြာ ကြားနာစစ်ဆေးသွားမည်ဖြစ်သည်။ ဇနီးဖြစ်သူ၏ ဂုဏ်သိက္ခာနှင့် ပုဂ္ဂိုလ်ရေးဆိုင်ရာ လုံခြုံမှုအတွက် ခင်ပွန်းဖြစ်သူ၏ အမည်နာမကို ရဲတပ်ဖွဲ့က ထုတ်ပြန်ထားခြင်း မရှိပေ။ ယင်းအမှုနှင့် ဆက်စပ်နေသည့် နောက်ထပ် အမျိုးသားတစ်ဦးကမူ ပြစ်မှုကျူးလွန်ကြောင်း သီးခြားဝန်ခံထားပြီး ပြစ်ဒဏ်ချမှတ်ခံရရန် စောင့်ဆိုင်းလျက်ရှိသည်။

ဇနီးဖြစ်သူအား အခြား ယောက်ျားများနှင့်အတူ လိင်ပိုင်းဆိုင်ရာစော်ကားမှုဖြင့် ဗြိတိန်အမျိုးသား တရားရင်ဆိုင်နေရ

ဇနီးဖြစ်သူအား အခြား ယောက်ျားများနှင့်အတူ လိင်ပိုင်းဆိုင်ရာစော်ကားမှုဖြင့် ဗြိတိန်အမျိုးသား တရားရင်ဆိုင်နေရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စ…

  • September 2, 2026
ဂျပန်က ဒုံးကျည်သစ်များအတွက်အပါအဝင် ကာကွယ်ရေးဘတ်ဂျက် ဒေါ်လာ ၅၅.၆ ဘီလီယံတောင်း သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂ ရက်။ ဂျပန် ကာကွယ်ရေးဝန်ကြီးဌာနသည် လာမည့် ဘဏ္ဍာရေးနှစ်အတွက် စံချိန်တင် ကာကွယ်ရေး ဘတ်ဂျက် ပမာဏ ယန်း ၈.၈၉ တရီလီယံ (အမေရိကန်ဒေါ်လာ ၅၅.၆ ဘီလီယံ) တောင်းခံလိုက်သည်။ ယင်းဘတ်ဂျက်တွင် ပိုမိုဝေးလံသော အကွာအဝေးကို ပစ်နိုင်သည့် Northrop Grumman ကုမ္ပဏီထုတ် AGM-88G (AARGM-ER) ရေဒါဖျက် လမ်းညွှန်ဒုံးကျည်များကို ပထမဆုံးအကြိမ် ဝယ်ယူရန် တောင်းခံချက်လည်း ပါဝင်သည်။ ယင်းတို့တွင် စုန်ခရီးဝေးပစ် တန်ဖိုးနည်း ဒုံးကျည်များ၊ ရေငုပ်သင်္ဘောမှ ပစ်ခတ်နိုင်သည့် လမ်းညွှန်ဒုံးကျည်များ (ယန်း ၁၆.၃ ဘီလီယံ) နှင့် လူမဲ့ရေအောက်ယာဉ် (UUV) များတွင် တပ်ဆင်မည့် ဒုံးကျည်ပစ်ခတ်မှု မော်ဂျူးများ ဖွံ့ဖြိုးတိုးတက်ရေးတို့ ပါဝင်သည်။ စုန်ခရီးဝေးပစ် ဒုံးကျည် (Stand-off Missile) ဆိုသည်မှာ ရန်သူ၏ လေကြောင်းရန် ကာကွယ်ရေးစနစ်များ လက်လှမ်းမမီနိုင်သော လုံခြုံသည့် အကွာအဝေးမှနေ၍ ပစ်မှတ်ကို လှမ်း၍တိုက်ခိုက်နိုင်သော ဒုံးကျည်အမျိုးအစား ဖြစ်သည်။ လက်ရှိ အသံထက်မြန်သော ASM-3 ဝေဟင်မှ ရေပြင်ပစ် ဒုံးကျည်များကို ရန်သူ၏ အစောပိုင်းသတိပေး လေယာဉ်များနှင့် ဆီဖြည့်လေယာဉ်များကို ပစ်ခတ်နိုင်သည့် ဝေဟင်မှ ဝေဟင်ပစ် ခရီးဝေးဒုံးကျည်များအဖြစ် အဆင့်မြှင့်တင်ရန်လည်း စီစဉ်နေသည်။ ဂျပန် ရေကြောင်းကာကွယ်ရေးတပ်ဖွဲ့အတွက် General Atomics MQ-9B SeaGuardian ဒရုန်း ၁၇ စင်း ဝယ်ယူရန် ယန်း ၂၉၂.၂ ဘီလီယံနှင့် လေကြောင်း ကာကွယ် တားဆီးရေးဒရုန်းများ (Interceptor drones) ဝယ်ယူရန် ယန်း ၇.၆ ဘီလီယံ တောင်းခံထားသည်။ AI နည်းပညာ အသုံးပြုမှု: စစ်ဘက်ဆိုင်ရာ အမိန့်ပေးနှင့် ကွပ်ကဲမှုစနစ်များတွင် အချက်အလက်များကို လျင်မြန်စွာ ဆန်းစစ်နိုင်ရန် AI နည်းပညာကို အသုံးပြုမည်ဖြစ်ပြီး ရန်သူ၏ နှောင့်ယှက်မှုကို ခံနိုင်ရည်ရှိသည့် တိုင်းပြည်တွင်းသုံး Cloud စနစ်ဖြင့် ချိတ်ဆက်ဆောင်ရွက်မည်ဖြစ်သည်။ ထို့အပြင် F-35 တိုက်လေယာဉ်များ၊ KC-46 ဆီဖြည့်လေယာဉ်များ၊ C-2 သယ်ယူပို့ဆောင်ရေး လေယာဉ်များ၊ P-1 ရေငုပ်သင်္ဘောဖျက် လေယာဉ်များနှင့် Mogami-class ဖရီးဂိတ် စစ်သင်္ဘောများ ထပ်မံဝယ်ယူရန်လည်း ပါဝင်သည်။ သို့သော်လည်း တရားဝင် အမျိုးသားလုံခြုံရေး စာရွက်စာတမ်းများ ထွက်ရှိမလာသေးသည့်အတွက် အရေအတွက်နှင့် ကုန်ကျစရိတ် အသေးစိတ်ကို ထည့်သွင်းထုတ်ပြန်ခြင်း မရှိသေးပေ။ #Northrop_Grumman #Japanmilitary

ဂျပန်က ဒုံးကျည်သစ်များအတွက်အပါအဝင် ကာကွယ်ရေးဘတ်ဂျက် ဒေါ်လာ ၅၅.၆ ဘီလီယံတောင်း

ဂျပန်က ဒုံးကျည်သစ်များအတွက်အပါအဝင် ကာကွယ်ရေးဘတ်ဂျက် ဒေါ်လာ ၅၅.၆ ဘီလီယံတောင်း သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၂ ရက်။ ဂျပန် ကာကွယ…

  • September 2, 2026
ပစိဖိတ်ကျွန်းစု နိုင်ငံများ ဖိုရမ်တွင် ထိုင်ဝမ်ပါဝင်မှု တရုတ် အပြင်းအထန် ကန့်ကွက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂ ရက်။ ပစိဖိတ်ကျွန်းစုနိုင်ငံများ ဖိုရမ် (Pacific Islands Forum) တွင် ထိုင်ဝမ်ပါဝင်နေမှုအပေါ် တရုတ်နိုင်ငံက ပြင်းပြင်းထန်ထန် ကန့်ကွက်လိုက်ပြီးနောက် သံတမန်ရေးရာ တင်းမာမှုများ မြင့်တက်လာနေသည်။ ထိုင်ဝမ်သည် အဆိုပါထိပ်သီးအစည်းအဝေးသို့ တက်ရောက်ရန် အရည်အချင်းမပြည့်မီကြောင်းနှင့် ထိုင်ဝမ်နိုင်ငံခြားရေးဝန်ကြီး လင်ကျားလုံ (Lin Chia-lung) ၏ တက်ရောက်မှုသည် အာရုံစိုက်ခံရရန် ကြိုးပမ်းသည့် ခွဲထွက်ရေးလှုပ်ရှားမှုဖြစ်ကြောင်း တရုတ်နိုင်ငံခြားရေးဝန်ကြီးဌာနက ဝေဖန်ခဲ့သည်။ ယခုနှစ်ဖိုရမ်ကို အိမ်ရှင်အဖြစ် လက်ခံကျင်းပသည့် ပလောင်းနိုင်ငံသည် ထိုင်ဝမ်နှင့် သံတမန်ဆက်ဆံရေး ရှိနေဆဲဖြစ်သော ကျွန်းစုနိုင်ငံအနည်းငယ်ထဲမှ တစ်ခုဖြစ်ပြီး ထိုင်ဝမ်နိုင်ငံခြားရေးဝန်ကြီးကို ဘေးထွက်အစည်းအဝေးများအတွက် ဖိတ်ကြားခဲ့သည်။ ဖိုရမ်သို့ မည်သူတက်ရောက်မည်ကို ပစိဖိတ်အုပ်စုကသာ ကိုယ်တိုင်ဆုံးဖြတ်မည်ဖြစ်ကြောင်းနှင့် ပြင်ပနိုင်ငံများ၏ ညွှန်ကြားမှုကို ခံယူမည်မဟုတ်ကြောင်း ဩစတြေးလျဝန်ကြီးချုပ်နှင့် နယူးဇီလန် နိုင်ငံခြားရေးဝန်ကြီးတို့က တုံ့ပြန်ခဲ့သည်။ ဤ အစည်းအဝေးကို ဖီဂျီ၊ ဗာနုအာတူ၊ ဆာမိုအာ၊ ဆော်လမွန်ကျွန်းစုနှင့် ကီရီဘာတီ နိုင်ငံတို့မှ ဝန်ကြီးချုပ်များနှင့် သမ္မတများ ကိုယ်တိုင်တက်ရောက်ခြင်းမရှိဘဲ အဆင့်နိမ့်ဝန်ကြီးများကိုသာ စေလွှတ်ခဲ့သည်။ ဤကိစ္စ၏နောက်ကွယ်တွင် နိုင်ငံခြားစွက်ဖက်မှုများ (အထူးသဖြင့် တရုတ်) ရှိနိုင်ကြောင်း နယူးဇီလန် နိုင်ငံခြားရေးဝန်ကြီးက သံသယရှိခဲ့သည်။ ပစိဖိတ်ဒေသတွင် လွှမ်းမိုးမှုဆက်လက်ထိန်းသိမ်းထားရန် ရည်ရွယ်၍ ကွတ်ကျွန်းစု (Cook Islands) ရှိ ဒုတိယကမ္ဘာစစ်လက်ထက် ဆိပ်ကမ်းတစ်ခုကို အဆင့်မြှင့်တင်ရန် အမေရိကန်နှင့် နယူးဇီလန်တို့က ပူးပေါင်းရန်ပုံငွေ ထည့်ဝင်မည်ဟု အစည်းအဝေးအတွင်း ကြေညာခဲ့သည်။ #PacificIslandsForum

ပစိဖိတ်ကျွန်းစု နိုင်ငံများ ဖိုရမ်တွင် ထိုင်ဝမ်ပါဝင်မှု တရုတ် အပြင်းအထန် ကန့်ကွက်

ပစိဖိတ်ကျွန်းစု နိုင်ငံများ ဖိုရမ်တွင် ထိုင်ဝမ်ပါဝင်မှု တရုတ် အပြင်းအထန် ကန့်ကွက် သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၂ ရက်။ ပစိဖိတ…

  • September 2, 2026
ရုရှား၊ တရုတ်၊ အိန္ဒိယ၊ အီရန်နှင့် ပါကစ္စတန် ခေါင်းဆောင်များ ပါဝင်သော ထိပ်သီး အစည်းအဝေး ကျင်းပ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁ ရက်။ အမေရိကန်ပြည်ထောင်စု ဦးဆောင်သည့် အနောက်အုပ်စု၏ ဩဇာလွှမ်းမိုးမှုကို တန်ပြန်ရန် ရည်ရွယ်ကျင်းပသည့် ရှန်ဟိုင်း ပူးပေါင်းဆောင်ရွက်ရေးအဖွဲ့ (SCO) ထိပ်သီးအစည်းအဝေးကို ကာဂျစ်စတန်နိုင်ငံ၌ စတင်ကျင်းပလျက်ရှိသည်။ အဆိုပါ အစည်းအဝေးသို့ တရုတ်ပြည်သူ့သမ္မတနိုင်ငံ သမ္မတ ရှီကျင့်ဖင်၊ ရုရှားဖက်ဒရေးရှင်းနိုင်ငံ သမ္မတ ဗလာဒီမီယာ ပူတင်နှင့် အိန္ဒိယနိုင်ငံ ဝန်ကြီးချုပ် နာရင်ဒရာ မိုဒီတို့ အပါအဝင် အဖွဲ့ဝင် ၁၀ နိုင်ငံမှ နိုင်ငံတော်အကြီးအကဲများ တက်ရောက်လျက်ရှိသည်။ ထိပ်သီးအစည်းအဝေး ပြင်ပ၌ ရုရှားသမ္မတ ပူတင်သည် တရုတ်နှင့် အိန္ဒိယ ခေါင်းဆောင်တို့နှင့် သီးခြားစီ တွေ့ဆုံဆွေးနွေးခဲ့သည်။ အိန္ဒိယဝန်ကြီးချုပ် မိုဒီက ယူကရိန်းပဋိပက္ခကို အမြန်ဆုံး အဆုံးသတ်၍ ငြိမ်းချမ်းရေးလမ်းကြောင်းသို့ ဦးတည်ဆောင်ရွက်ရန် လိုအပ်ကြောင်း ရုရှားသမ္မတ ပူတင်ကို တိုက်တွန်းပြောကြားခဲ့သည်။ ၂၀၀၁ ခုနှစ်တွင် အဖွဲ့ဝင် ၆ နိုင်ငံဖြင့် စတင်ဖွဲ့စည်းခဲ့သည့် ရှန်ဟိုင်းပူးပေါင်းဆောင်ရွက်ရေးအဖွဲ့ (SCO) သည် လက်ရှိတွင် ရုရှား၊ တရုတ်၊ အိန္ဒိယ၊ အီရန်နှင့် ပါကစ္စတန်တို့ အပါအဝင် အဖွဲ့ဝင် ၁၀ နိုင်ငံအထိ တိုးချဲ့ဖွဲ့စည်းလာနိုင်ခဲ့သည်။ ရုရှားနှင့် တရုတ်နိုင်ငံတို့သည် အဆိုပါအဖွဲ့ကို အနောက်အုပ်စု၏ G7 အဖွဲ့နေရာတွင် အစားထိုးမည့် ကမ္ဘာ့ဩဇာချိန်ခွင်လျှာသစ်တစ်ခုအဖြစ် ပုံဖော်ရန် ရည်ရွယ်ထားသည်။ သို့သော်လည်း အဖွဲ့ဝင်နိုင်ငံများအကြား စီးပွားရေးဆိုင်ရာနှင့် နယ်မြေပိုင်ဆိုင်မှု အငြင်းပွားမှုများ ရှိနေခြင်းကြောင့် စစ်ရေးနှင့် နိုင်ငံရေးဆိုင်ရာ မဟာမိတ်အဖွဲ့အဖြစ် အပြည့်အဝ ပူးပေါင်းဆောင်ရွက်ရန် စိန်ခေါ်မှုများ ရှိနေဆဲဖြစ်သည်။ #SCO

ရုရှား၊ တရုတ်၊ အိန္ဒိယ၊ အီရန်နှင့် ပါကစ္စတန် ခေါင်းဆောင်များ ပါဝင်သော ထိပ်သီး အစည်းအဝေး ကျင်းပ  

ရုရှား၊ တရုတ်၊ အိန္ဒိယ၊ အီရန်နှင့် ပါကစ္စတန် ခေါင်းဆောင်များ ပါဝင်သော ထိပ်သီး အစည်းအဝေး ကျင်းပ   သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁…

  • September 1, 2026
တောင်ကိုရီးယား Unification Church ဘာသာရေးအဖွဲ့ခေါင်းဆောင် ထောင်ဒဏ် ၂ နှစ် ကျခံရ သတင်းနှင့် မီဒီယာ ကွန်ရက် ၂၀၂၆ ခုနှစ်၊ စက်တင်ဘာလ ၁ ရက်။ တောင်ကိုရီးယားနိုင်ငံရှိ Unification Church (ပေါင်းစည်းရေး အသင်းတော်) ဘာသာရေးအဖွဲ့ ခေါင်းဆောင် အသက် ၈၃ နှစ်အရွယ် ဟန်ဟက်ဂျာ (Han Hak-ja) ကို တရားရုံးက ထောင်ဒဏ် ၂ နှစ် ချမှတ်ခဲ့သည်။ ၎င်းသည် နိုင်ငံရေးတွင် အဓမ္မဩဇာလွှမ်းမိုးရန် ကြိုးပမ်းမှုနှင့် လာဘ်ပေးလာဘ်ယူမှုများ ကျူးလွန်ခဲ့ကြောင်း ဆိုးလ်ဗဟိုခရိုင် တရားရုံးက မနေ့က အမိန့်ချမှတ်ခဲ့ခြင်းဖြစ်သည်။ ဟန်ဟက်ဂျာသည် ၂၀၂၂ ခုနှစ် သမ္မတရွေးကောက်ပွဲမတိုင်မီ လွှတ်တော်အမတ်တစ်ဦးထံ ဝမ်သန်း ၁၀၀ ပေးအပ်ခဲ့မှုအတွက် ထောင်ဒဏ် ၁ နှစ်၊ ချမှတ်ခဲ့သည်။ ထို့ပြင် သမ္မတဟောင်း ယွန်ဆော့ယို၏ ဇနီးအား Chanel လက်ကိုင်အိတ်နှင့် စိန်ဆွဲကြိုးတို့ လာဘ်ထိုးခဲ့မှုအတွက် နောက်ထပ် ထောင်ဒဏ် ၁ နှစ်၊ စုစုပေါင်း ထောင်ဒဏ် ၂ နှစ် ချမှတ်ခံခဲ့ရခြင်းဖြစ်သည်။ အဆိုပါ အမှုကို စစ်အုပ်ချုပ်ရေး ကြေညာခဲ့သည့် သမ္မတဟောင်း ရာထူးမှ ဖယ်ရှားခံရအပြီးတွင် အထူးစုံစမ်းစစ်ဆေးရေးအဖွဲ့က ဖော်ထုတ်ခဲ့ခြင်းဖြစ်သည်။ ဘာသာရေးအဖွဲ့၏ ငွေကြေးအင်အားကို အသုံးပြု၍ နိုင်ငံရေး အခွင့်အရေးရယူရန် ဆောင်ရွက်ခဲ့ခြင်းဖြစ်ကြောင်း တရားရုံးက ပြောကြားသည်။ အသင်းတော်ခေါင်းဆောင်ကမူ စွပ်စွဲချက် ပြစ်မှုများကို ငြင်းဆိုထားပြီး အယူခံဝင်သွားမည်ဖြစ်ကြောင်း ထုတ်ပြန်ထားသည်။ #UnificationChurch #Han_Hak_ja

တောင်ကိုရီးယား Unification Church ဘာသာရေးအဖွဲ့ခေါင်းဆောင် ထောင်ဒဏ် ၂ နှစ် ကျခံရ

တောင်ကိုရီးယား Unification Church ဘာသာရေးအဖွဲ့ခေါင်းဆောင် ထောင်ဒဏ် ၂ နှစ် ကျခံရ သတင်းနှင့် မီဒီယာ ကွန်ရက်၂၀၂၆ ခုနှစ်၊ စက်တင်ဘာလ ၁ ရက်။ တောင်ကိုရ…

  • September 1, 2026
နာမည်ကျော် ဘောလုံးသမား လီယွန်နယ် မက်ဆီ နိုင်ငံတကာ ဘောလုံးပွဲစဉ်များမှ အနားယူ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁ ရက်။ အာဂျင်တီးနား ဘောလုံးသမား လီယွန်နယ် မက်ဆီသည် လက်ရွေးစင် အသင်းမှ အနားယူပြီ ဖြစ်ကြောင်း တရားဝင် ကြေညာခဲ့သည်။ မက်ဆီသည် ၂၀၂၆ ကမ္ဘာ့ဖလား ဗိုလ်လုပွဲတွင် စပိန်အသင်းကို ရှုံးနိမ့်ခဲ့ပြီးနောက် အဆိုပါ ဆုံးဖြတ်ချက်ကို ချမှတ်ခဲ့ခြင်းဖြစ်သည်။ ၎င်းသည် လက်ရွေးစင်အသင်းတွင် ၂၁ နှစ်တာကာလအတွင်း ပွဲပေါင်း ၂၀၇ ပွဲ ကစားခဲ့ပြီး ၁၂၅ ဂိုး သွင်းယူခဲ့သည်။ ယခု ဆုံးဖြတ်ချက်သည် စိတ်မကောင်းဖွယ်ဖြစ်သော်လည်း အနားယူရမည့်အချိန် ရောက်ရှိပြီဖြစ်ကြောင်း အသက် ၃၉ နှစ်အရွယ် မက်ဆီက ပြောကြားခဲ့သည်။ ၎င်းသည် အသက် ၁၃ နှစ်အရွယ်တွင် မိသားစု အခက်အခဲများကြောင့် စပိန်နိုင်ငံ၊ ဘာစီလိုနာသို့ ပြောင်းရွှေ့ခဲ့ရပြီး စပိန်လက်ရွေးစင်အသင်းတွင် ပါဝင်ကစားရန် ကမ်းလှမ်းမှုများ ရှိခဲ့သော်လည်း မိခင်နိုင်ငံဖြစ်သည့် အာဂျင်တီးနားကိုသာ ရွေးချယ်ခဲ့သည်။ အစောပိုင်းကာလများတွင် ဗိုလ်လုပွဲများ၌ ဆက်တိုက် ရှုံးနိမ့်ခဲ့ခြင်းကြောင့် ဝေဖန်မှုများ ရင်ဆိုင်ခဲ့ရပြီး ၂၀၁၆ ခုနှစ်တွင် အနားယူရန် ဆုံးဖြတ်ခဲ့ဖူးသည်။ သို့သော်လည်း ပြန်လည်စတင်မှုနှင့်အတူ ၂၀၂၁ ကိုပါအမေရိကဖလား၊ ၂၀၂၂ ကမ္ဘာ့ဖလားနှင့် ၂၀၂၄ ကိုပါအမေရိကဖလားတို့ကို ဆက်တိုက် ဆွတ်ခူးပေးနိုင်ခဲ့ကာ အာဂျင်တီးနားနိုင်ငံ၏ အထင်ကရ ကစားသမားနှင့် ကမ္ဘာ့အကောင်းဆုံး ဘောလုံးသမားအဖြစ် သမိုင်းမှတ်တမ်းတင်နိုင်ခဲ့သည်။ မက်ဆီသည် ကမ္ဘာ့ဖလား ပြိုင်ပွဲ ၆ ကြိမ်အထိ ပါဝင်ကစားခဲ့သည့် ဂန္ထဝင်ကစားသမားဖြစ်ပြီး အာဂျင်တီးနား လက်ရွေးစင်အသင်းမှ အနားယူလိုက်သော်လည်း အမေရိကန် မေဂျာလိဂ်ကလပ် အင်တာမိုင်ယာမီအသင်းတွင် ဆက်လက်ကစားသွားမည် ဖြစ်သည်။ #Lionelmessi

နာမည်ကျော် ဘောလုံးသမား လီယွန်နယ် မက်ဆီ နိုင်ငံတကာ ဘောလုံးပွဲစဉ်များမှ အနားယူ

နာမည်ကျော် ဘောလုံးသမား လီယွန်နယ် မက်ဆီ နိုင်ငံတကာ ဘောလုံးပွဲစဉ်များမှ အနားယူ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁ ရက်။ အာဂျင်တီးနာ…

  • September 1, 2026
ထိုင်းတွင် ပြည်နှင်ဒဏ်ပေးခြင်းဆိုင်ရာ နည်းဥပဒေ စတင်ကျင့်သုံးမည် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁ ရက်။ ထိုင်းနိုင်ငံအတွင်း ဥပဒေချိုးဖောက်သည့် နိုင်ငံခြားသားများကို ပြည်နှင်ဒဏ်ပေးမည့် လုပ်ထုံးလုပ်နည်းများ ပါဝင်သော ဝန်ကြီးချုပ်ရုံး နည်းဥပဒေသည် လွန်ခဲ့သည့် သောကြာနေ့မှစ၍ တရားဝင် စတင်အသက်ဝင်ခဲ့ပြီဖြစ်သည်။ အဆိုပါ နည်းဥပဒေအရ ပြည်သူ့အေးချမ်းသာယာရေးကို ခြိမ်းခြောက်သူများ၊ တရားမဝင် ဝင်ရောက်နေထိုင်သူများ၊ တရားမဝင် အလုပ်လုပ်ကိုင်သူများ၊ စာရွက်စာတမ်း အတုပြုလုပ်သူများနှင့် ထောင်ဒဏ် ၅ နှစ်နှင့်အထက် ကျခံရမည့် ပြစ်မှုကျူးလွန်ထားသည့် နိုင်ငံခြားသားများကို ပြည်နှင်ဒဏ်ပေးသွားမည်ဖြစ်သည်။ ထို့ပြင် ပြစ်ဒဏ်ကျခံနေရသည့် နိုင်ငံခြားသား အကျဉ်းသားများကို လွတ်ရက်မစေ့မီ အနည်းဆုံး ရက်ပေါင်း ၅၀ ကြိုတင်၍ ပြည်ထဲရေးဝန်ကြီးဌာနသို့ အကြောင်းကြားရမည်ဖြစ်သည်။ အဆိုပါ ပုဂ္ဂိုလ်များကို ထိုင်းနိုင်ငံအတွင်းသို့ ပြန်လည်ဝင်ရောက်ခွင့် ပိတ်ပင်သည့် အမိန့်ကိုပါ တစ်ပါတည်း ထုတ်ပြန်သွားမည်ဖြစ်သည်။ မိခင်နိုင်ငံသို့ ပြန်လည်ပို့ဆောင်ပါက ညှင်းပန်းနှိပ်စက်ခံရနိုင်ခြေ သို့မဟုတ် လူ့အခွင့်အရေး ချိုးဖောက်ခံရနိုင်သည့် အန္တရာယ်ရှိသူများအတွက်မူ အဆိုပါ နည်းဥပဒေတွင် အထူးလုပ်ထုံးလုပ်နည်းများ ထည့်သွင်းပြဋ္ဌာန်းထားသည်။ မိခင်နိုင်ငံမဟုတ်ဘဲ လူသားချင်းစာနာထောက်ထားမှုဆိုင်ရာ ကာကွယ်စောင့်ရှောက်မှု ပေးနိုင်မည့် တတိယနိုင်ငံ သို့မဟုတ် နိုင်ငံတကာအဖွဲ့အစည်းများက လွှဲပြောင်းလက်ခံရန် တောင်းဆိုလာပါက အဆိုပါ နိုင်ငံ သို့မဟုတ် အဖွဲ့အစည်းထံသို့ ပြည်နှင်ဒဏ်ဖြင့် လွှဲပြောင်းပေးပို့နိုင်သည်။ အဆိုပါ လွှဲပြောင်းပေးပို့မှုတွင် အောက်ပါ စည်းကမ်းချက်များကို လိုက်နာရမည်ဖြစ်သည်- ၁။ ပြည်နှင်ဒဏ်ခံရသူ ကိုယ်တိုင်က တတိယနိုင်ငံသို့ သွားရောက်ရန် စာဖြင့် ရေးသားထားသည့် သဘောတူညီချက် ပေးအပ်ရမည်။ ၂။ ကုန်ကျစရိတ် အားလုံးကို တောင်းဆိုသည့် တတိယနိုင်ငံ သို့မဟုတ် အဖွဲ့အစည်းက ကျခံရမည်။ ၃။ တောင်းဆိုမှု ပြုလုပ်ပြီး ရက်ပေါင်း ၃၀ အတွင်း အပြီးဆောင်ရွက်ရမည်ဖြစ်ပြီး လိုအပ်ပါက ရက်ပေါင်း ၃၀ စီ နှစ်ကြိမ်အထိ သက်တမ်းတိုးနိုင်သည်။ ယခင်က ထိုင်းနိုင်ငံတွင် ယခင်က ပြည်နှင်ဒဏ်ပေးခြင်း ဥပဒေရှိသော်လည်း နည်းဥပဒေ ရှင်းလင်းမှု မရှိသဖြင့် ယခု နည်းဥပဒေကို ပြဌာန်း သက်ဝင်စေခြင်း ဖြစ်သည်။ #ပြည်နှင်ဒဏ်ပေးခြင်းဆိုင်ရာနည်းဥပဒေ

ထိုင်းတွင် ပြည်နှင်ဒဏ်ပေးခြင်းဆိုင်ရာ နည်းဥပဒေ စတင်ကျင့်သုံးမည်

ထိုင်းတွင် ပြည်နှင်ဒဏ်ပေးခြင်းဆိုင်ရာ နည်းဥပဒေ စတင်ကျင့်သုံးမည် သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁ ရက်။ ထိုင်းနိုင်ငံအတွင်း ဥပဒေ…

  • September 1, 2026
×Close