နိုင်ငံတကာသတင်း

ဂျာမနီ ကောင်စစ်ဝန်ရုံးကို ရုရှား မောင်းထုတ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၈ ရက်။ ရုရှားနိုင်ငံ၊ စိန့်ပီတာစဘတ်မြို့တွင် တည်ရှိသည့် ဂျာမန် ကောင်စစ်ဝန်ချုပ်ရုံးကို လာမည့် စက်တင်ဘာလ ၁၈ ရက်နေ့ထက် နောက်မကျစေဘဲ ပိတ်သိမ်းရန် ရုရှားနိုင်ငံခြားရေးဝန်ကြီးဌာနက အမိန့်ထုတ်ပြန်လိုက်သည်။ ထို့ပြင် ရုရှားနိုင်ငံအတွင်း စိုက်ထူထားသည့် ဂျာမန်ဘာသာစကားနှင့် ယဉ်ကျေးမှု ပြန့်ပွားရေး အဖွဲ့အစည်း၏ ဗဟိုဌာနခွဲ အားလုံးကိုလည်း ပိတ်သိမ်းရန်နှင့် ဝန်ထမ်းများအနေဖြင့် စက်တင်ဘာလ ၁၃ ရက်နေ့ နောက်ဆုံးထား၍ နိုင်ငံအတွင်းမှ ထွက်ခွာသွားရန် ရုရှားဘက်က သတိပေးထားသည်။ ယခု လုပ်ဆောင်ချက်သည် ဘုန်းမြို့ရှိ ရုရှားကောင်စစ်ဝန်ရုံးနှင့် ဘာလင်မြို့ရှိ ရုရှားယဉ်ကျေးမှုဗဟိုဌာနတို့ကို ပိတ်သိမ်းရန် ဂျာမနီဘက်က အစောပိုင်းတွင် ဆုံးဖြတ်ခဲ့မှုအပေါ် ရုရှားက တုံ့ပြန်ဆောင်ရွက်ခြင်းဖြစ်သည်။ ဂျာမနီနိုင်ငံ၊ လိုက်ပ်ဇစ် (Leipzig) လေဆိပ်တွင် ပြုလုပ်ခဲ့သည့် ဒရုန်းတိုက်ခိုက်မှု ကြိုးပမ်းမှုနောက်ကွယ်၌ ရုရှားနိုင်ငံ ပါဝင်နေသည်ဟု ဂျာမနီဘက်က စွပ်စွဲခဲ့ပြီးနောက်ပိုင်း နှစ်နိုင်ငံအကြား ပဋိပက္ခများ စတင်ခဲ့ခြင်းဖြစ်သည်။ ယင်းလေဆိပ်သည် ယူကရိန်းနိုင်ငံသို့ အကူအညီများ ပေးပို့ရာတွင် အဓိက အသုံးပြုနေသည့် အရေးပါသော လေကြောင်းကွန်လိုင်းတစ်ခု ဖြစ်သည်။ ဥရောပသမဂ္ဂ (EU) ကလည်း အဆိုပါဖြစ်စဉ်သည် ရုရှားက နောက်ကွယ်မှ ကူညီပေးခဲ့သည့် အကြမ်းဖက်မှုဖြစ်ကြောင်း မှတ်ချက်ပြုထားသည်။ သ သို့သော် ရုရှားနိုင်ငံခြားရေးဝန်ကြီးကမူ ဂျာမနီ၏ စွပ်စွဲချက်များကို ငြင်းဆိုလိုက်ပြီး ယင်းစွပ်စွဲချက်များသည် စစ်ပွဲတစ်ခု စတင်ရန် ပြင်ဆင်ခြင်းဖြစ်ကြောင်း တုံ့ပြန်ပြောကြားခဲ့သည်။ #ဂျာမနီ

ဂျာမနီ ကောင်စစ်ဝန်ရုံးကို ရုရှား မောင်းထုတ်

ဂျာမနီ ကောင်စစ်ဝန်ရုံးကို ရုရှား မောင်းထုတ် သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၈ ရက်။ ရုရှားနိုင်ငံ၊ စိန့်ပီတာစဘတ်မြို့တွင် တည်ရှိ…

  • September 8, 2026
ရုပ်ရှင် လုပ်ငန်း ကျဆုံးမသွားစေရန် ပြင်သစ်နှင့် တောင်ကိုရီးယား ပူးပေါင်းကြိုးပမ်းမည် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၈ ရက်။ ပြင်သစ်နှင့် တောင်ကိုရီးယားနိုင်ငံတို့သည် ကမ္ဘာ့ရုပ်ရှင်နှင့် ရုပ်သံဖျော်ဖြေရေးကဏ္ဍ မြှင့်တင်ရန်အတွက် ယူရို ၁ ဘီလီယံ ပူးတွဲရင်းနှီးမြှုပ်နှံမည့် ၅ နှစ်တာ စီမံကိန်းကြီးကို ပူးတွဲ ထုတ်ပြန်လိုက်သည်။ ပြင်သစ်သမ္မတ အီမန်နူအဲလ် မက်ခရွန် နှင့် တောင်ကိုရီးယားသမ္မတ လီဂျေမြောင်း တို့သည် ပြင်သစ်နိုင်ငံတောင်ပိုင်းတွင် ကျင်းပခဲ့သည့် လူမီယာ (Lumière) ထိပ်သီးအစည်းအဝေး၌ ယခုကဲ့သို့ ကြေညာခဲ့ကြခြင်းဖြစ်သည်။ နှစ်နိုင်ငံလုံးက ယူရို သန်း ၅၀၀ စီ အချိုးကျ ထည့်ဝင်ကာ ၂၀၂၇ မှ ၂၀၃၁ အထိ ရန်ပုံငွေများ စတင်မတည်ပေးသွားမည်ဖြစ်သည်။ အဆိုပါ ရန်ပုံငွေများကို နိုင်ငံတကာ ရုပ်ရှင်ကုမ္ပဏီများ၊ နည်းပညာ သုတေသန လုပ်ငန်းများနှင့် ရုပ်ရှင်ပူးတွဲ ထုတ်လုပ်မှုများတွင် ထောက်ပံ့ပေးသွားမည်ဖြစ်သည်။ တောင်ကိုရီးယားသမ္မတ လီဂျေမြောင်း ကလည်း တောင်ကိုရီးယားအနေဖြင့် ယခင် အောင်မြင်ခဲ့သည့် အတွေ့အကြုံများကို အခြေခံ၍ ဘာသာစကား အတားအဆီးများကို ကျော်လွန်နိုင်မည့် ကမ္ဘာ့အဆင့်မီ ရုပ်ရှင်များကို ပိုမို ဦးဆောင်ထုတ်လုပ်သွားမည်ဟု ပြောကြားခဲ့သည်။ ယင်းမှာ စကားပြောကို အဓိက မထားဘဲ အမူအရာနှင့် ရုပ်ပုံများဖြင့် ဖော်ပြသည့် ရုပ်ရှင်ဇာတ်လမ်းများကို ထုတ်လုပ်သွားမည်ဟု ဆိုလိုခြင်းဖြစ်သည်။ ထို့ပြင် ပြင်သစ်သမ္မတ မက်ခရွန် က ဖန်တီးထားသည့် ဉာဏ်ရည်တု (AI) နည်းပညာများနှင့် ပတ်သက်၍ သတိပေးခဲ့သည်။ AI ကို အသုံးပြု၍ စာရေးဆရာများ၊ ရုပ်ရှင်ဖန်တီးရှင်များနှင့် အသံသရုပ်ဆောင်များ၏ နေရာတွင် အစားထိုးခြင်းသည် ကြီးမားသည့် အမှားအယွင်း ဖြစ်လာနိုင်ကြောင်းနှင့် မူပိုင်ခွင့်ဆိုင်ရာ ဥပဒေများကို ပိုမို တင်းကျပ်ရန် တောင်းဆိုခဲ့သည်။ ယင်းထိပ်သီးအစည်းအဝေးသို့ Netflix နှင့် NBCUniversal တို့ကဲ့သို့ ကမ္ဘာ့ရုပ်ရှင်လုပ်ငန်း ထိပ်သီးခေါင်းဆောင်များအပြင်၊ ဟောလိဝုဒ် မင်းသားကြီး ဂျော့ချ် ကလူနီ (George Clooney) အပါအဝင် နိုင်ငံပေါင်း ၅၅ နိုင်ငံမှ အနုပညာရှင်နှင့် စတူဒီယို အကြီးအကဲ ၂၀၀ ကျော် တက်ရောက်ခဲ့ကြသည်။ #Lumière

ရုပ်ရှင် လုပ်ငန်း ကျဆုံးမသွားစေရန် ပြင်သစ်နှင့် တောင်ကိုရီးယား ပူးပေါင်းကြိုးပမ်းမည်

ရုပ်ရှင် လုပ်ငန်း ကျဆုံးမသွားစေရန် ပြင်သစ်နှင့် တောင်ကိုရီးယား ပူးပေါင်းကြိုးပမ်းမည် သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၈ ရက်။ ပြင…

  • September 8, 2026
မက္ကစီကိုတွင် မီးရှုးမီးပန်းများကြောင့် လူ ၁၀ ဦးသေ၊ ၆၀ ကျော် ဒဏ်ရာရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၈ ရက်။ မက္ကဆီကိုနိုင်ငံ အလယ်ပိုင်း၌ ကျင်းပသည့် ဘာသာရေးပွဲတော်တစ်ခုအတွင်း မီးရှူးမီးပန်းများ ပြင်းထန်စွာ ပေါက်ကွဲခဲ့မှုကြောင့် အနည်းဆုံး လူ ၁၀ ဦး သေဆုံးပြီး ၆၄ ဦး ဒဏ်ရာရရှိသွားကြောင်း သက်ဆိုင်ရာ တာဝန်ရှိသူများက ထုတ်ပြန်လိုက်သည်။ အဆိုပါ ပေါက်ကွဲမှုသည် မက္ကဆီကိုစီးတီးမြို့အနီးရှိ ဘုရားကျောင်းတစ်ခုဘေးတွင် စနေနေ့ညက ဖြစ်ပွားခဲ့ခြင်းဖြစ်သည်။ ရာနှင့်ချီသည့် ဒေသခံများ မီးရှူးမီးပန်း ပစ်ဖောက်သည်ကို ကြည့်ရှုရန် စုဝေးနေချိန်တွင် ပေါက်ကွဲမှုဖြစ်ပွားခဲ့ပြီး အုတ်တံတိုင်းတစ်ခုပါ ပြိုကျခဲ့သည်။ ဒဏ်ရာရရှိသူများထဲတွင် ဒေသခံ ခရစ်ယာန်ဘုန်းတော်ကြီး ၂ ဦးလည်း ပါဝင်ကြောင်း သိရသည်။ လူမှုကွန်ရက်တွင် ပျံ့နှံ့နေသည့် ဗီဒီယိုဖိုင်များတွင် ပေါက်ကွဲမှုအပြီး မီးခိုးများနှင့် အပျက်အစီးများကြား ပိတ်မိနေသူများကို ကယ်ဆယ်ရေးသမားများနှင့် လွတ်မြောက်လာသူများက လိုက်လံရှာဖွေနေကြသည်။ လက်ရှိတွင် ပေါက်ကွဲရသည့် အကြောင်းရင်းကို မက္ကဆီကိုပြည်နယ် ရှေ့နေချုပ်ရုံးက စုံစမ်းစစ်ဆေးလျက် ရှိသည်။ #မက္ကဆီကို

မက္ကစီကိုတွင် မီးရှုးမီးပန်းများကြောင့် လူ ၁၀ ဦးသေ၊ ၆၀ ကျော် ဒဏ်ရာရ

မက္ကစီကိုတွင် မီးရှုးမီးပန်းများကြောင့် လူ ၁၀ ဦးသေ၊ ၆၀ ကျော် ဒဏ်ရာရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၈ ရက်။ မက္ကဆီကိုနိုင်ငံ အလယ…

  • September 8, 2026
အမေရိကန်၊ တောင်ကိုရီးယားနှင့် ဂျပန် ပူးတွဲ စစ်လေ့ကျင့်ချိန်တွင် မြောက်ကိုရီးယားက ဒုတိယ ဖျက်သင်္ဘော တပ်တော်ဝင် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၇ ရက်။ အမေရိကန်၊ တောင်ကိုရီးယားနှင့် ဂျပန်တို့ ပူးတွဲစစ်ရေးလေ့ကျင့်မှု ပြုလုပ်နေချိန်တွင် မြောက်ကိုရီးယားခေါင်းဆောင် ကင်ဂျုံအန်းက ၎င်း၏ ဒုတိယမြောက် ဖျက်သင်္ဘော (Naval Destroyer) အား တပ်တော်ဝင်အခမ်းအနား ပြုလုပ်ခဲ့သည်ဟု AP သတင်း တပုဒ်တွင် ဖော်ပြထားသည်။ မြောက်ကိုရီးယား ခေါင်းဆောင်က ပိုမိုခိုင်မာသည့် နျူကလီးယား ဟန့်တားရေးစွမ်းရည်ကို တည်ဆောက်သွားမည်ဟုလည်း ပြောကြားလိုက်သည်။ စက်တင်ဘာ ၆ ရက် တနင်္ဂနွေနေ့က ဝွန်ဆန် (Wonsan) ဆိပ်ကမ်းမြို့၌ ပြုလုပ်ခဲ့သည့် "ကန်ဂွန်" (Kang Kon) ဟု အမည်ပေးထားသော တန်ချိန် ၅,၀၀၀ ရှိ စစ်သင်္ဘော တပ်တော်ဝင်အခမ်းအနားသို့ ကင်ဂျုံအန်းနှင့်အတူ ၎င်း၏ သမီးဖြစ်သူတို့ တက်ရောက်ခဲ့ကြသည်။ အဆိုပါ စစ်သင်္ဘောသည် သမားရိုးကျ လေကြောင်းကာကွယ်ရေးနှင့် ပစ်ခတ်မှုများအပြင် နျူကလီးယားထိပ်ဖူး တပ်ဆင်နိုင်သည့် ခရုဇ်ဒုံးကျည်များကိုပါ ပစ်ခတ်နိုင်သည့် နည်းပညာများ ပါဝင်သည်။ ရုရှားနိုင်ငံ၏ အကူအညီဖြင့် တည်ဆောက်ခဲ့ခြင်းဖြစ်ကြောင်း ကျွမ်းကျင်သူများက သုံးသပ်ထားကြသည်။ အခမ်းအနားတွင် ကင်ဂျုံအန်းက ရေတပ်၏ နျူကလီးယား တပ်ဆင်နိုင်မှုစွမ်းရည် တိုးတက်လာခြင်းသည် ရန်သူများအတွက် စိုးရိမ်မှုများကို ပိုမိုကြီးထွားလာစေမည်ဖြစ်ပြီး ရေကြောင်းကာကွယ်ရေးနှင့် နျူကလီးယား ဟန့်တားရေးစနစ်များကို ပိုမိုတိုးမြှင့်သွားမည်ဟု ပြောကြားခဲ့သည်။ ထို့ပြင် လာမည့် ၈ လအတွင်း နောက်ထပ် ထူးခြားသည့် ရေတပ်ဆိုင်ရာ တိုးတက်မှုတစ်ခုကို ထုတ်ဖော်ပြသသွားမည်ဟုဆိုရာ နျူကလီးယားစွမ်းအင်သုံး ရုပ်သိမ်းရေး ရေငုပ်သင်္ဘော စီမံကိန်းဖြစ်နိုင်ကြောင်း လေ့လာသူများက ခန့်မှန်းနေကြသည်။ အခြားတစ်ဖက်တွင်လည်း အမေရိကန်၊ တောင်ကိုရီးယားနှင့် ဂျပန်တို့သည် တောင်ကိုရီးယားနိုင်ငံ ဂျေဂျူကျွန်းအနီး ရေပြင်တွင် ၅ ရက်ကြာ ပြုလုပ်မည့် "Freedom Edge" ပူးတွဲစစ်ရေးလေ့ကျင့်မှုကို စက်တင်ဘာ ၇ ရက် တနင်္လာနေ့တွင် စတင်ခဲ့သည်။ တောင်ကိုရီးယားနိုင်ငံ ဂျေဂျူကျွန်း (Jeju Island) ၏ အရှေ့ဘက်နှင့် တောင်ဘက်ရှိ နိုင်ငံတကာရေပြင်တွင် အမေရိကန်၊ တောင်ကိုရီးယားနှင့် ဂျပန်တို့ ပါဝင်သည့် နှစ်စဉ်ကျင်းပမြဲ "Freedom Edge" Multi-domain စစ်ရေးလေ့ကျင့်မှုကို စတင်လိုက်ပြီဖြစ်ကြောင်း တောင်ကိုရီးယား ပူးတွဲစစ်ဦးစီးချုပ်ရုံးကို ကိုးကား၍ Korea Herald သတင်းတွင် ဖော်ပြထားသည်။ ယခုစစ်ရေးလေ့ကျင့်မှုတွင် သုံးနိုင်ငံမှ ရေတပ်နှင့် လေတပ်အင်အားစု အများအပြား ပါဝင်မည်ဖြစ်ပြီး ရေကြောင်း၊ လေကြောင်းနှင့် ဆိုက်ဘာလုံခြုံရေး နယ်ပယ်များကိုပါ လွှမ်းခြုံလေ့ကျင့်သွားမည်ဖြစ်သည်။ ထို့ပြင် သုံးနိုင်ငံပူးတွဲ၍ စစ်ရေးလေ့ကျင့်မှု ထိန်းချုပ်ရေးအဖွဲ့ (Exercise Control Group) တစ်ခုကိုလည်း ပူးတွဲမောင်းနှင် ဆောင်ရွက်သွားမည်ဖြစ်သည်။ တောင်ကိုရီးယား ပူးတွဲစစ်ဦးစီးချုပ်ရုံးက Freedom Edge လေ့ကျင့်မှုသည် ကာကွယ်ရေးအသွင်ပြုလုပ်သည့် စစ်ရေးလေ့ကျင့်မှုဖြစ်ပြီး မြောက်ကိုရီးယား၏ နျူကလီးယားနှင့် ဒုံးကျည်ခြိမ်းခြောက်မှုများကို တုံ့ပြန်ရန်၊ ဟန့်တားနိုင်စွမ်း တိုးမြှင့်ရန်နှင့် ဒေသတွင်း တည်ငြိမ်အေးချမ်းမှုကို ထိန်းသိမ်းရန် ရည်ရွယ်ခြင်းဖြစ်ကြောင်း ပြောကြားခဲ့သည်။ အဆိုပါ စစ်ရေးလေ့ကျင့်မှုသည် မြောက်ကိုရီးယား၏ နျူကလီးယား ခြိမ်းခြောက်မှုများကို တုံ့ပြန်ရန်နှင့် ဒေသတွင်း လုံခြုံရေးအတွက် ကာကွယ်ရေးအသွင် ပြုလုပ်ခြင်းဖြစ်ကြောင်း တောင်ကိုရီးယား စစ်ဘက်က ထုတ်ပြန်ထားသည်။ #KangKon #NavalDestroyer

အမေရိကန်၊ တောင်ကိုရီးယားနှင့် ဂျပန် ပူးတွဲ စစ်လေ့ကျင့်ချိန်တွင် မြောက်ကိုရီးယားက ဒုတိယ ဖျက်သင်္ဘော တပ်တော်ဝင်

အမေရိကန်၊ တောင်ကိုရီးယားနှင့် ဂျပန် ပူးတွဲ စစ်လေ့ကျင့်ချိန်တွင် မြောက်ကိုရီးယားက ဒုတိယ ဖျက်သင်္ဘော တပ်တော်ဝင် သတင်းနှင့် မီဒီယာ ကွန်ရက်။၂၀၂၆ ခုနှစ်…

  • September 7, 2026
ဩစတြီးယား၌ ၁၄ နှစ်အောက် ကျောင်းသူများ ခေါင်းစွပ်ဝတ်ဆင်မှု ပိတ်ပင်သည် ဥပဒေပြဌာန်း သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၇ ရက်။ ဩစတြီးယားနိုင်ငံ၌ စာသင်နှစ်သစ် စတင်ချိန်တွင် အသက် ၁၄ နှစ်အောက် ကျောင်းသူများ မွတ်စလင် အမျိုးသမီးသုံး ခေါင်းစွပ်အဝတ်အစား (Hijab) ဝတ်ဆင်ခွင့် ပိတ်ပင်သည့် ဥပဒေ စတင်သက်ရောက်လာသည်။ အဆိုပါဥပဒေသည် အမျိုးသမီးငယ်များ၏ အခွင့်အရေးနှင့် တန်းတူညီမျှမှုကို ကာကွယ်ရန် ရည်ရွယ်ခြင်းဖြစ်ကြောင်း အစိုးရက ထုတ်ပြန်ထားသည်။ သို့သော်လည်း ဩစတြီးယား မွတ်စလင် အဖွဲ့အစည်း (IGGÖ) က ဤဥပဒေသည် ဘာသာရေး လွတ်လပ်ခွင့်ကို ထိပါးခြင်းဖြစ်သည်ဟုဆိုကာ ဖွဲ့စည်းပုံအခြေခံဥပဒေခုံရုံးအထိ အယူခံဝင်သွားမည်ဟု ထုတ်ပြန်ခဲ့သည်။ ဥပဒေအရ စည်းကမ်းဖောက်ဖျက်ပါက ဆရာ၊ ဆရာမများက သတိပေးရမည်ဖြစ်ပြီး လိုက်နာမှုမရှိပါက အုပ်ထိန်းသူများကို ယူရို ၈၀၀ (ကျပ် သိန်း ၅၀ ခန့်) အထိ ဒဏ်ရိုက်သွားမည်ဖြစ်သည်။ သို့သော် ကျောင်းဆရာ၊ ဆရာမအချို့နှင့် အတိုက်အခံ ပါတီများကမူ အဆိုပါဥပဒေသည် ဆရာများအပေါ် ဝန်ထုပ်ဝန်ပိုးဖြစ်စေပြီး ပဋိပက္ခများကို ပိုမိုကြီးထွားစေနိုင်ကြောင်း ဝေဖန်ထားကြသည်။ #Hijab #ဩစတြီးယား

ဩစတြီးယား၌ ၁၄ နှစ်အောက် ကျောင်းသူများ ခေါင်းစွပ်ဝတ်ဆင်မှု ပိတ်ပင်သည် ဥပဒေပြဌာန်း

ဩစတြီးယား၌ ၁၄ နှစ်အောက် ကျောင်းသူများ ခေါင်းစွပ်ဝတ်ဆင်မှု ပိတ်ပင်သည် ဥပဒေပြဌာန်း သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၇ ရက်။ ဩစတြီးယ…

  • September 7, 2026
မီးတောင်ပေါက်ကွဲမှုကြောင့် ဂျာကာတာ လေကြောင်းလိုင်းများ ရပ်ဆိုင်း သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၇ ရက်။ အင်ဒိုနီးရှားနိုင်ငံ အနက် ကရာကာတောင်း (Anak Krakatau) မီးတောင် ပြင်းထန်စွာ ပေါက်ကွဲမှုမှ ထွက်ပေါ်လာသည့် မီးတောင်ပြာများ၏ အန္တရာယ်ကြောင့် ဒေသတွင်း လေကြောင်းခရီးစဉ် အများအပြား ရပ်ဆိုင်းခဲ့ရသည်။ အဆိုပါ မီးတောင်သည် သောကြာနေ့ညပိုင်းမှစ၍ ၂၅ နာရီနီးပါး ဆက်တိုက် ပေါက်ကွဲခဲ့ရာ မီးတောင်ပြာများသည် အမြင့်ပေ ၂၀,၀၀၀ မှ ၅၀,၀၀၀ အထိ မြင့်တက်ခဲ့ပြီး မြို့တော် ဂျာကာတာနှင့် အိန္ဒိယသမုဒ္ဒရာအထိ ပျံ့နှံ့သွားခဲ့သည်။ အဆိုပါ မီးတောင်ပြာ အန္တရာယ်ကြောင့် အရှေ့တောင်အာရှတွင် ဒုတိယမြောက် ခရီးသည် အများဆုံးဖြစ်သည့် ဂျာကာတာမြို့ ဆူကာနို-ဟတ်တာ အပြည်ပြည်ဆိုင်ရာ လေဆိပ်ကို ယာယီပိတ်သိမ်းခဲ့ရသည်။ အင်ဒိုနီးရှား လေဆိပ်များတွင် စုစုပေါင်း ခရီးစဉ် ၃၇၃ ခုထက်မနည်း ထိခိုက်ခဲ့သည်။ ယင်းအနက် ဆူကာနို-ဟတ်တာ လေဆိပ်တစ်ခုတည်း၌ ခရီးစဉ် ၁၆၇ ခု ဖျက်သိမ်းခဲ့ရကာ Singapore Airlines နှင့် Scoot အပါအဝင် အပြည်ပြည်ဆိုင်ရာ လေကြောင်းလိုင်းများ၏ စင်ကာပူ-ဂျာကာတာ ခရီးစဉ်များလည်း တနင်္လာနေ့အထိ ဆက်လက်ရပ်ဆိုင်းထားခဲ့ရသည်။ #AnakKrakatau

မီးတောင်ပေါက်ကွဲမှုကြောင့် ဂျာကာတာ လေကြောင်းလိုင်းများ ရပ်ဆိုင်း

မီးတောင်ပေါက်ကွဲမှုကြောင့် ဂျာကာတာ လေကြောင်းလိုင်းများ ရပ်ဆိုင်း သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၇ ရက်။ အင်ဒိုနီးရှားနိုင်ငံ အန…

  • September 7, 2026
ဖိလစ်ပိုင် ဒုတိယသမ္မတ ဆာရာ ဒူတာတေးကို ဖမ်းဝရမ်းထုတ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၇ ရက်။ သမ္မတနှင့် ဇနီးဖြစ်သူအား လုပ်ကြံရန် ခြိမ်းခြောက်ခဲ့မှုဖြင့် ဖိလစ်ပိုင် ဒုတိယသမ္မတ ဆာရာ ဒူတာတေး (Sara Duterte) ကို အာဏာပိုင်များက ဖမ်းဝရမ်းထုတ်ပြန်လိုက်သည်။ ဒုတိယ သမ္မတ ဆာရာက ၂၀၂၄ ခုနှစ် သတင်းစာရှင်းလင်းပွဲတစ်ခုတွင် မိမိသာ လုပ်ကြံခံရပါက သမ္မတ မားကို့စ် ဂျူနီယာ (Ferdinand Marcos Jr.)၊ သမ္မတကတော်နှင့် လွှတ်တော်ဥက္ကဋ္ဌတို့အား ပြန်လည်လုပ်ကြံရန် ကြေးစားလူသတ်သမားကို ငွေကြေးပေးငှားရမ်း ထားကြောင်း ပြောဆိုခဲ့သည်။ အဆိုပါ ပြောဆိုမှုနှင့် ပတ်သက်ပြီး မေလက လွှတ်တော်၌ စွပ်စွဲပြစ်တင်မှု ပြုလုပ်ခဲ့ပြီးနောက် စက်ဆွန်မြို့နယ် တရားရုံးက ယခုကဲ့သို့ ဖမ်းဝရမ်းထုတ်ပြန်ခဲ့ခြင်း ဖြစ်သည်။ ဒုတိယသမ္မတ၏ ရှေ့နေဖြစ်သူက တရားဥပဒေအတိုင်း ရင်ဆိုင်သွားမည်ဖြစ်ကြောင်းနှင့် အာမခံလျှောက်ထားမည်ဟု ပြောကြားသည်။ ဒု-သမ္မတ ဆာရာ ဒူတာတေးသည် အပြည်ပြည်ဆိုင်ရာ ရာဇဝတ်တရားရုံး (ICC) ၏ ဖမ်းဆီးထိန်းသိမ်းခြင်းခံထားရသူ သမ္မတဟောင်း ရိုဒရီဂို ဒူတာတေး၏ သမီးဖြစ်သည်။ အဆိုပါအမှုတွင် ပြစ်ဒဏ်ကျခံရပါက ၂၀၂၈ ခုနှစ် သမ္မတရွေးကောက်ပွဲ ဝင်ရောက်ယှဉ်ပြိုင်ခွင့်အပါအဝင် နိုင်ငံရေးရာထူး ယူခွင့်များ အပြီးပိုင် ပိတ်ပင်ခံရမည်ဖြစ်သည်။ #ဆာရာဒူတာတေး #SaraDuterte

ဖိလစ်ပိုင် ဒုတိယသမ္မတ ဆာရာ ဒူတာတေးကို ဖမ်းဝရမ်းထုတ်

ဖိလစ်ပိုင် ဒုတိယသမ္မတ ဆာရာ ဒူတာတေးကို ဖမ်းဝရမ်းထုတ် သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၇ ရက်။ သမ္မတနှင့် ဇနီးဖြစ်သူအား လုပ်ကြံရန် …

  • September 7, 2026
ဗီယက်နမ်နှင့် မြန်မာ စစ်အုပ်စုတို့ ကာကွယ်ရေးနှင့် စီးပွားရေး ပူးပေါင်းဆောင်ရွက်ရန် သဘောတူ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၇ ရက်။ စစ်အုပ်စုခေါင်းဆောင် ဦးမင်းအောင်လှိုင်၏ ဗီယက်နမ်ခရီးစဉ်အတွင်း နှစ်နိုင်ငံအကြား လုံခြုံရေး၊ ကာကွယ်ရေး၊ စီးပွားရေး၊ နည်းပညာနှင့် သံတမန်ရေးရာ ပူးပေါင်းဆောင်ရွက်မှုများ တိုးမြှင့်ရန် သဘောတူညီခဲ့ကြောင်း ထိုင်းအခြေစိုက် The Nation သတင်းစာက ဖော်ပြသည်။ စက်တင်ဘာ ၅ ရက်က ဟာနွိုင်မြို့၌ ပြုလုပ်သည့် ထိပ်သီးတွေ့ဆုံပွဲတွင် ကာကွယ်ရေးနှင့် လုံခြုံရေးကဏ္ဍကို အဓိကမဏ္ဍိုင်အဖြစ် ထားရှိရန်သဘောတူညီခဲ့သည်။ ထို့အပြင် တစ်နိုင်ငံ၏ ပိုင်နက်ကို အသုံးပြု၍ အခြားတစ်နိုင်ငံအား ဆန့်ကျင်လှုပ်ရှားမှုများ ပြုလုပ်ခွင့်မ ပြုရန် ပြန်လည်ကတိပြုခဲ့ကြသည်။ အဆိုပါတွေ့ဆုံပွဲ၌ နည်းပညာ၊ တယ်လီဖုန်းဆက်သွယ်ရေး၊ အဆင့်မြင့်စိုက်ပျိုးရေးနှင့် စွမ်းအင်ကဏ္ဍတို့တွင် ပူးပေါင်းဆောင်ရွက်ရန် သဘောတူခဲ့ကြသည်။ ၏စစ်ကောင်စီခေါင်းဆောင်သည် Viettel တယ်လီကွန်းကုမ္ပဏီနှင့် VinFast လျှပ်စစ်ကားစက်ရုံတို့သို့ သွားရောက်လေ့လာခဲ့သည်။ ဗီယက်နမ်ဘက်က အမျိုးသားဖွံ့ဖြိုးတိုးတက်ရေး အတွေ့အကြုံများကို မျှဝေပေးရန် အသင့်ရှိကြောင်း ပြောကြားခဲ့သည်။ #Viettel #mytel

ဗီယက်နမ်နှင့် မြန်မာ စစ်အုပ်စုတို့ ကာကွယ်ရေးနှင့် စီးပွားရေး ပူးပေါင်းဆောင်ရွက်ရန် သဘောတူ

ဗီယက်နမ်နှင့် မြန်မာ စစ်အုပ်စုတို့ ကာကွယ်ရေးနှင့် စီးပွားရေး ပူးပေါင်းဆောင်ရွက်ရန် သဘောတူ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၇ ရက်။ …

  • September 7, 2026
တရုတ်-နီပေါ ရေဘေးတွင် တရုတ်၏ သတင်းအချက်အလက် ထိန်းချုပ်မှုအပေါ် ဝေဖန်မှုများ ရှိနေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၅ ရက်။ တရုတ်-နီပေါ နယ်စပ်ဒေသတွင် လူပေါင်း ရာနှင့်ချီ သေဆုံးခဲ့သည့် ရေကြီးရေလျှံမှုတွင် တရုတ်နိုင်ငံဘက်ခြမ်းမှ ထိခိုက်ခံစားရသူများနှင့် ပတ်သက်သည့် သတင်းအချက်အလက်များကို တရုတ်အစိုးရက တင်းကျပ်စွာ ထိန်းချုပ်ထားဆဲ ဖြစ်သည်ဟု AP သတင်း တပုဒ်တွင် ဖော်ပြထားသည်။ နှစ်နိုင်ငံပေါင်းစပ် စာရင်းများအရ သေဆုံးသူ ၁,၀၀၀ ကျော်နှင့် ပျောက်ဆုံးသူ ၄,၅၀၀ ထက်မနည်း ရှိနေသည့် အဆိုပါ ဘေးအန္တရာယ်တွင် တရုတ်အစိုးရသည် သဘာဝဘေးဖြစ်စဉ်များနှင့် ပတ်သက်၍ သတင်းအချက်အလက် စီးဆင်းမှုကို စိစစ်ကန့်သတ်လေ့ရှိသည့် အလေ့အထကို ထပ်မံပြသလိုက်ခြင်းလည်း ဖြစ်သည်ဟု AP သတင်းက ဆိုသည်။ တရုတ်အစိုးရသည် သေဆုံး၊ ပျောက်ဆုံးစာရင်းများကို ရက်ပေါင်းများစွာ အကြာမှတစ်ကြိမ် သတင်းထုတ်ပြန်လေ့ရှိသည်။ ရေဘေးသင့် ဒေသများသို့ သွားရောက်သတင်းယူခွင့်ကိုလည်း ထိပ်တန်း အစိုးရပိုင် မီဒီယာများ ဖြစ်သော ဆင်ဟွာနှင့် CCTV တို့ကိုသာ ခွင့်ပြုထားသည်။ ထို့ပြင် အဆိုပါ ထိပ်တန်း မီဒီယာများသည် ပျောက်ဆုံးနေသူများ သို့မဟုတ် ၎င်းတို့၏ ကျန်ရစ်သူ မိသားစုများ၏ အမည်နှင့် မျက်နှာများကို ဖော်ပြခြင်း မရှိဘဲ အကူအညီပေးရေးနှင့် ကယ်ဆယ်ရေးလုပ်ငန်းစဉ် အခြေအနေများကိုသာ အဓိကထား ထုတ်လွှင့်နေကြသည်။ အခြားတစ်ဖက်တွင်မူ အစိုးရ၏ တရားဝင် ထုတ်ပြန်ချက်များအပေါ် မေးခွန်းထုတ်သည့် လူမှုကွန်ရက် ပို့စ်များရေးသားခဲ့သူ အနည်းဆုံး ၁၀ ဦးထက်မနည်းကို တရုတ်နိုင်ငံတစ်ဝှမ်းတွင် ဖမ်းဆီးထိန်းသိမ်းခြင်း သို့မဟုတ် ဒဏ်ငွေရိုက်ခြင်းများ ပြုလုပ်ခဲ့ကြောင်း သတင်းများ ထွက်ပေါ်ခဲ့သည်။ ယင်းအခြေအနေသည် နီပေါနိုင်ငံဘက်ခြမ်းနှင့် များစွာ ကွဲပြားခြားနားနေသည်။ နီပေါအစိုးရသည် သေဆုံး/ပျောက်ဆုံးသူ စာရင်းများကို ပုံမှန် အသိပေးထုတ်ပြန်လျက်ရှိပြီး၊ သတင်းထောက်များနှင့် လူမှုကွန်ရက် အသုံးပြုသူများအား ကယ်ဆယ်ရေး လုပ်ငန်းစဉ်များကို လွတ်လပ်စွာ ရိုက်ကူးဖော်ပြခွင့် ပေးထားသည်။ တိဘက်ဒေသအတွင်း သေဆုံးသူ ၂၁ ဦးနှင့် ပျောက်ဆုံးသူ ၅၄၁ ဦး (နိုင်ငံခြားသား ၂၆၁ ဦး အပါအဝင်) ရှိကြောင်း အနီးစပ်ဆုံး တနင်္ဂနွေနေ့က ထုတ်ပြန်ခဲ့ပြီးနောက် တရုတ်အစိုးရသည် သေဆုံးသူ စာရင်းကို ဗုဒ္ဓဟူးနေ့အထိ ထပ်မံပြင်ဆင်ခြင်း မရှိခဲ့ပေ။ နောက်ဆုံး ရရှိသော သောကြာနေ့ညပိုင်း ထုတ်ပြန်ချက်တွင်မူ သေဆုံးသူ ၃၁ ဦးအထိ မြင့်တက်လာပြီး ၅၃၁ ဦး ပျောက်ဆုံးနေဆဲဖြစ်ကြောင်း ဖော်ပြထားသည်။ နီပေါအစိုးရသည် ကယ်ဆယ်ရရှိသူများ၏ အမည်စာရင်း ပါဝင်သော ဝဘ်ဆိုက်တစ်ခုကို ထူထောင်ပေးထားပြီး ကယ်ဆယ်ရေးလုပ်ငန်းစဉ်များကို အချိန်နှင့်အမျှ ထုတ်ပြန်ပေးနေသည်။ နီပေါနှင့် နိုင်ငံခြားသတင်းထောက်များအား ရေဘေးသင့်ဒေသများ၊ ကယ်ဆယ်ရေး စခန်းများနှင့် အစုလိုက်သဂြိုဟ်သည့် နေရာများသို့ သွားရောက်သတင်းယူခွင့် ပြုထားသည်။ သို့သော် တရုတ်ဘက်ခြမ်းတွင်မူ ဆင်ဟွာ (Xinhua) နှင့် CCTV အစိုးရပိုင် မီဒီယာနှစ်ခုမှ သတင်းထောက် အနည်းငယ်မှလွဲ၍ ကျန်သူများအား ဝင်ရောက်ခွင့် ပိတ်ပင်ထားသည်။ Associated Press (AP) သတင်းဌာနက သွားရောက်သတင်းယူခွင့် တောင်းခံခဲ့သော်လည်း ခွင့်ပြုမိန့် မရရှိခဲ့ဟု ဆိုသည်။ အထူးသဖြင့် တိဘက်ဒေသသည် သတင်းအချက်အလက် အဆက်အသွယ်နှင့် ခရီးသွားလာခွင့်များကို တင်းကျပ်စွာ ထိန်းချုပ်ထားလေ့ရှိသည့် ဒေသတစ်ခု ဖြစ်သည်။ ဂြိုဟ်တုနှင့် ဒရုန်းများသုံး၍ ကယ်ဆယ်ရေးဆောင်ရွက်မှုများ၊ ရဲတပ်ဖွဲ့၏ ကူညီပေးမှုများကိုသာ CCTV က အဓိကပုံဖော် ထုတ်လွှင့်နေသည်။ အချို့သော တရုတ်သတင်းထောက်များသည် သေဆုံးသူများ၏ မိသားစုဝင်များကို တွေ့ဆုံမေးမြန်းခြင်း မပြုရန်နှင့် ဆင်းဟွာသတင်းဌာနမှ အချက်အလက်များကိုသာ အသုံးပြုရန် ညွှန်ကြားခံထားရ သည်ဟု လူ့အခွင့်အရေး စောင့်ကြည့်လေ့လာရေးအဖွဲ့ (HRW) က ပြောသည်။ #နီပေါ

တရုတ်-နီပေါ ရေဘေးတွင် တရုတ်၏ သတင်းအချက်အလက် ထိန်းချုပ်မှုအပေါ် ဝေဖန်မှုများ ရှိနေ

တရုတ်-နီပေါ ရေဘေးတွင် တရုတ်၏ သတင်းအချက်အလက် ထိန်းချုပ်မှုအပေါ် ဝေဖန်မှုများ ရှိနေ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၅ ရက်။ တရုတ်-…

  • September 5, 2026
×Close