နိုင်ငံတကာသတင်း

ဟန်ဂေရီက ရုရှားသံတမန် ၁၀ ဦးကို ပြည်နှင်ဒဏ်ပေး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၀ ရက်။ ဟန်ဂေရီအစိုးရသည် သံတမန်ကျင့်ဝတ်နှင့် မညီသည့် လှုပ်ရှားမှုများ ပြုလုပ်ခဲ့သည်ဟုဆိုကာ နိုင်ငံအတွင်းရှိ ရုရှားသံတမန် ၁၀ ဦးအား ထွက်ခွာရန် အင်္ဂါနေ့တွင် မိန့်ထုတ်ခဲ့သည်။ ဟန်ဂေရီ ဒုတိယဝန်ကြီးချုပ်နှင့် နိုင်ငံခြားရေးဝန်ကြီး အနီတာ အိုဘန် (Anita Orban) က ယခုလုပ်ဆောင်ချက်သည် နိုင်ငံ၏ လုံခြုံရေးနှင့် အချုပ်အခြာအာဏာကို ကာကွယ်ခြင်းဖြစ်ပြီး ရုရှားနှင့် သံတမန်ဆက်ဆံရေး ဖြတ်တောက်ခြင်း မဟုတ်ကြောင်း ပြောကြားသည်။ အဆိုပါ ပြည်နှင်ဒဏ်ပေးမှုအပေါ် ရုရှားနိုင်ငံခြားရေးဝန်ကြီးဌာန ပြောရေးဆိုခွင့်ရှိသူ မာရီယာ ဇာခါရိုဗာ (Maria Zakharova) က ပြင်းထန်ပြီး နာကျင်စေမည့် တုံ့ပြန်မှုမျိုး ပြန်လည်လုပ်ဆောင်သွားမည်ဟု တာ့စ် (TASS) သတင်းဌာနသို့ ပြောကြားခဲ့သည်။ ၂၀၂၂ ခုနှစ် ယူကရိန်းကို ရုရှား ဝင်ရောက်တိုက်ခိုက်ပြီးနောက်ပိုင်း ဥရောပသမဂ္ဂ (EU) အဖွဲ့ဝင် အများစုက ရုရှားသံတမန်များကို ပြည်နှင်ဒဏ်ပေးခဲ့သော်လည်း ဟန်ဂေရီသည် မော်စကိုနှင့် နီးကပ်သည့် ဆက်ဆံရေးကို ထိန်းသိမ်းထားခဲ့ရာမှ ယခုကဲ့သို့ စစ်ရေးနှင့် သံတမန်ရေးရာ ရပ်တည်ချက် အပြောင်းအလဲ ပြုလုပ်လာခြင်းဖြစ်သည်။ ဥရောပသမဂ္ဂဘက်ကလည်း ဟန်ဂေရီ၏ တရားဝင် ဆုံးဖြတ်ချက်အပေါ် နီးကပ်စွာ ပူးပေါင်းဆောင်ရွက်သွားမည်ဟု ထောက်ခံထားသည်။ #ဟန်ဂေရီ

ဟန်ဂေရီက ရုရှားသံတမန် ၁၀ ဦးကို ပြည်နှင်ဒဏ်ပေး

ဟန်ဂေရီက ရုရှားသံတမန် ၁၀ ဦးကို ပြည်နှင်ဒဏ်ပေး သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၀ ရက်။ ဟန်ဂေရီအစိုးရသည် သံတမန်ကျင့်ဝတ်နှင့် မညီသ…

  • September 10, 2026
ရုရှား ပင်လယ်နက် ရေတပ်စခန်းကို ယူကရိန်း တိုက်ခိုက်၊ စစ်သင်္ဘောနှင့် စစ်လက်နက်များ ပျက်စီး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၀ ရက်။ ရုရှား၏ နိုဗိုရော့စစ်စခ် (Novorossiysk) ရေတပ်စခန်းကို ယူကရိန်း စစ်ဘက်ဆိုင်ရာ ထောက်လှမ်းရေးနှင့် ပူးပေါင်းတပ်ဖွဲ့များက စက်တင်ဘာ ၈ ရက်နှင့် ၉ ရက် ညပိုင်းတွင် ဝင်ရောက်တိုက်ခိုက်ခဲ့ရာ ရုရှား၏ ဒုံးကျည်တင် စစ်သင်္ဘော အက်ဒ်မိုင်ရယ် အက်ဆင် (Admiral Essen) ထိမှန်ပြီး မီးလောင်ကျွမ်းခဲ့သည်။ ယူကရိန် ဒရုန်းများသည် နိုဗိုရော့စစ်စခ် မြို့ပေါ်နှင့် ဆိပ်ကမ်းရှိ လောင်စာဆီ ဂိုဒေါင်များကိုပါ ပစ်မှတ်ထား တိုက်ခိုက်ခဲ့သဖြင့် အဆောက်အအုံအချို့ ပျက်စီးခဲ့ပြီး လူ ၄ ဦး သေဆုံးကာ ၂၉ ဦး ဒဏ်ရာရရှိခဲ့ကြောင်း ရုရှား ဒေသဆိုင်ရာ အာဏာပိုင်များက ထုတ်ပြန်သည်။ အဆိုပါ စစ်ဆင်ရေးအတွင်း ဆိပ်ကမ်းရှိ ရုရှား ဒုံးကျည်တင် လှေအချို့၊ Su-33 တိုက်လေယာဉ်တစ်စီး၊ Mi-8 ဟယ်လီကော်ပတာတစ်စီးနှင့် လေကြောင်းရန် ကာကွယ်ရေး ရေဒါစနစ်နှစ်ခုကိုပါ ဖျက်ဆီးနိုင်ခဲ့ကြောင်း ယူကရိန်းဘက်က ပြောကြားထားသည်။ #Novorossiysk

ရုရှား ပင်လယ်နက် ရေတပ်စခန်းကို ယူကရိန်း တိုက်ခိုက်၊ စစ်သင်္ဘောနှင့် စစ်လက်နက်များ ပျက်စီး

ရုရှား ပင်လယ်နက် ရေတပ်စခန်းကို ယူကရိန်း တိုက်ခိုက်၊ စစ်သင်္ဘောနှင့် စစ်လက်နက်များ ပျက်စီး သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၀ ရက်။ …

  • September 10, 2026
တရုတ် ဟာဝေးကုမ္ပဏီကို ရာဇဝတ်အဖွဲ့အစည်းအဖြစ် အမေရိကန် တရားစွဲဆို သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၀ ရက်။ တရုတ်နည်းပညာ ကုမ္ပဏီကြီးဖြစ်သည့် ဟာဝေး (Huawei) သည် ကမ္ဘာ့ဆက်သွယ်ရေးကဏ္ဍတွင် ထိပ်တန်းရောက်ရှိရေးအတွက် လွန်ခဲ့သည့် နှစ်ပေါင်း ၂၀ အတွင်း အမေရိကန် ကုမ္ပဏီများထံမှ နည်းပညာနှင့် လျှို့ဝှက်ချက်များကို မသမာသည့်နည်းဖြင့် ခိုးယူခဲ့ကြောင်း အမေရိကန် တရားရေးဌာန ရှေ့နေက နယူးယောက်မြို့ တရားရုံးတွင် စတင် စွပ်စွဲပြောဆိုလိုက်သည်။ ထို့ပြင် အီရန်နိုင်ငံတွင်း စီးပွားရေးလုပ်ဆောင်မှုကို ဖုံးကွယ်ရန် အမေရိကန် ဘဏ်စနစ်ကို အလွဲသုံးစားလုပ်ခဲ့ကြောင်းပါ စွပ်စွဲထားသည်။ ဟာဝေးဘက်မှ ရှေ့နေများက ယင်းစွပ်စွဲချက်များကို ငြင်းဆိုခဲ့ကြသည်။ သာမန် ဝန်ထမ်းအချို့၏ လွဲမှားသည့် ပြုလုပ်မှု အသေးအဖွဲများကို အစိုးရဘက်က ရာဇဝတ်မှုအဖြစ် ပုံဖော်နေခြင်းဖြစ်ကြောင်းနှင့် ဟာဝေး၏ အောင်မြင်မှုမှာ နည်းပညာသစ်များ ကြိုးစားဖန်တီးမှုကြောင့်သာ ဖြစ်ကြောင်း တုံ့ပြန်ချေပခဲ့သည်။ ၂၀၁၈ ခုနှစ်ကတည်းက စတင်ခဲ့သည့် အဆိုပါ အမှုစစ်ဆေးရေး လုပ်ငန်းစဉ်သည် ၃ လခန့် ကြာမြင့်နိုင်ကြောင်း ကျွမ်းကျင်သူများက ပြောသည်။ #Huawei

တရုတ် ဟာဝေးကုမ္ပဏီကို ရာဇဝတ်အဖွဲ့အစည်းအဖြစ် အမေရိကန် တရားစွဲဆို

တရုတ် ဟာဝေးကုမ္ပဏီကို ရာဇဝတ်အဖွဲ့အစည်းအဖြစ် အမေရိကန် တရားစွဲဆို သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၀ ရက်။ တရုတ်နည်းပညာ ကုမ္ပဏီကြီ…

  • September 10, 2026
နော်ဝေဘုရင် ဈာပန ကျင်းပ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၀ ရက်။ အသက် ၈၉ နှစ်အရွယ်တွင် ကွယ်လွန်သွားသည့် နော်ဝေနိုင်ငံ၏ ဘုရင်ကြီး ပဉ္စမမြောက် ဟာရယ်ဒ် (King Harald V) ၏ နိုင်ငံတော်အဆင့် ဈာပနအခမ်းအနားကို စက်တင်ဘာ ၉ ရက်နေ့က အော့စလိုမြို့ရှိ ကာသီဒရယ် ကျောင်းတော်ကြီးတွင် ကျင်းပခဲ့သည်။ အခမ်းအနားသို့ ဗြိတိန် အိမ်ရှေ့စံ မင်းသား ဝီလျံ၊ ယူကရိန်း သမ္မတ ဇယ်လင်းစကီး အပါအဝင် ဥရောပ ဒေသတွင်း မင်းညီမင်းသားများနှင့် နိုင်ငံတကာ ခေါင်းဆောင်များစွာ တက်ရောက်ခဲ့ကြသည်။ နန်းသက် ၃၀ ကျော်ကာလအတွင်း တန်းတူညီမျှမှုကို အလေးထားသဖြင့် ပြည်သူများ၏ ချစ်ခင်မှုကို ရရှိခဲ့သည့် ဘုရင်ကြီးအား ဂါရဝပြုရန် လမ်းတလျှောက်တွင် ပြည်သူ ထောင်ပေါင်းများစွာ စောင့်ဆိုင်း နှုတ်ဆက်ခဲ့ကြသည်။ ဘုရင်ကြီး ကွယ်လွန်ပြီးနောက် သားဖြစ်သူ အဌမမြောက် မင်းသား ဟားကွန် (Haakon VIII) က နော်ဝေနိုင်ငံ၏ ဘုရင်အဖြစ် ဆက်ခံခဲ့ပြီး ဈာပနအပြီးတွင် ၁၃ ရက်ကြာ နိုင်ငံတော် ဝမ်းနည်းခြင်း ကာလကို အဆုံးသတ်ခဲ့သည်။ #KingHaraldV

နော်ဝေဘုရင် ဈာပန ကျင်းပ

နော်ဝေဘုရင် ဈာပန ကျင်းပ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၀ ရက်။ အသက် ၈၉ နှစ်အရွယ်တွင် ကွယ်လွန်သွားသည့် နော်ဝေနိုင်ငံ၏ ဘုရင်ကြီး…

  • September 10, 2026
မိုးသည်းထန်စွာ ရွာသွန်းမှုကြောင့် ဂျပန် ဖူဂျီတောင်တက်လမ်း မြေပြို၊ လမ်းများ ပိတ်ထားရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၀ ရက်။ ဂျပန်နိုင်ငံ အလယ်ပိုင်းတွင် မိုးသည်းထန်စွာ ရွာသွန်းခဲ့မှုကြောင့် စက်တင်ဘာ ၉ ရက်နေ့က ဖူဂျီတောင်တက်လမ်း အဓိက စတင်ရာနေရာတစ်ခု၌ မြေပြိုမှု ဖြစ်ပွားခဲ့ပြီး ယာဉ် ၃ စီး ပိတ်မိသွားခဲ့သော်လည်း လူ ထိခိုက်ဒဏ်ရာရရှိမှု မရှိခဲ့ပေ။ အဓိက လမ်းမကြီးတစ်ခုဖြစ်သည့် Fuji Subaru Line ကို အရေးပေါ် ပိတ်ထားခဲ့ရသည် တောင်ပေါ်တွင် သတိလစ်နေသည့် တောင်တက်သမား ၂ ဦးကိုလည်း ရဲတပ်ဖွဲ့က တွေ့ရှိခဲ့သည်။ အခြားဒေသများတွင်လည်း မိုးသည်းထန်စွာ ရွာသွန်းမှုကြောင့် ရှီဇူအိုကာ ခရိုင်၌ မြေပြိုမှုဖြစ်ပွားကာ လူတစ်ဦး သေဆုံးခဲ့ပြီး၊ အိုင်ချီနှင့် ဂိဖူ ခရိုင်တို့တွင် လူ ၄၁ ဦး ဒဏ်ရာရရှိခဲ့သည်။ ဂျပန် မိုးလေဝသ အေဂျင်စီက မိုးဆက်လက် ရွာသွန်းနိုင်ကြောင်း သတိပေးထားသည်။ အာရှအားကစားပွဲ ကျင်းပနေသည့် နဂိုယာမြို့တွင် ရေကြီးရေလျှံမှုများ ရှိသော်လည်း အားကစားသမားများအပေါ် သက်ရောက်မှု မရှိကြောင်း ဒေသတွင်း သတင်းများတွင် ဖော်ပြထားသည်။ #Japanflood

မိုးသည်းထန်စွာ ရွာသွန်းမှုကြောင့် ဂျပန် ဖူဂျီတောင်တက်လမ်း မြေပြို၊ လမ်းများ ပိတ်ထားရ

မိုးသည်းထန်စွာ ရွာသွန်းမှုကြောင့် ဂျပန် ဖူဂျီတောင်တက်လမ်း မြေပြို၊ လမ်းများ ပိတ်ထားရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၀ ရက်။ ဂျ…

  • September 10, 2026
ထိုင်း မူကြိုကျောင်းအတွင်း အမျိုးသမီးတစ်ဦးကို ယောက်ျားဖြစ်သူ ရဲအရာရှိက သေနတ်ဖြင့် ပစ်သတ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာ ၉ ရက်။ ထိုင်းနိုင်ငံ၊ ပတ္တယားကမ်းခြေအနီး ချွန်ဘူရီခရိုင်၊ ဘန်းလမုန်းမြို့နယ်ရှိ မူကြိုကျောင်း တစ်ကျောင်းအတွင်း စက်တင်ဘာလ ၉ ရက် ဒီနေ့နံနက်ပိုင်းက အမျိုးသမီးတစ်ဦး သေနတ်ဖြင့် ပစ်ခတ်ခံရပြီး သေဆုံးသွားခဲ့သည်။ သံသယရှိသူမှာ သေဆုံးသူ၏ ခင်ပွန်းဖြစ်သူ ဒုတိယရဲအုပ်တစ်ဦး ဖြစ်သည်။ အခင်းဖြစ်ပွားချိန်တွင် မူကြိုကျောင်းအတွင်းရှိ ကလေးငယ်များကို ဘေးလွတ်ရာသို့ အချိန်မီ ရွှေ့ပြောင်းပေးနိုင်ခဲ့သဖြင့် ထိခိုက်ဒဏ်ရာရရှိမှု မရှိခဲ့ပေ။ ဖြစ်စဉ်အပြီးတွင် မိဘများ ရောက်ရှိလာကာ ကလေးများကို ပြန်လည်ခေါ်ဆောင်သွားခဲ့ကြသည်။ သေဆုံးသူမှာ အသက် ၄၈ နှစ်အရွယ် မစ္စ ဖိုင်လင်း (Phailin) ဆိုသူ ဖြစ်ပြီး နံနက် ၁၁ နာရီဝန်းကျင်တွင် မူကြိုကျောင်း၏ ပထမထပ် ထမင်းစားဆောင်အတွင်း သေနတ်ဒဏ်ရာတစ်ချက်ဖြင့် သေဆုံးနေသည်ကို တွေ့ရှိခဲ့ရခြင်း ဖြစ်သည်။ အခင်းဖြစ်နေရာအနီးမှ ၉ မမ ကျည်ခွံတစ်ခုကိုလည်း သက်သေခံအဖြစ် သိမ်းဆည်းရမိခဲ့သည်။ မျက်မြင်သက်သေများ၏ ပြောကြားချက်အရ သံသယရှိသူသည် သေဆုံးသူနှင့် စကားပြောဆိုပြီးနောက် သေနတ်ဖြင့် ပစ်ခတ်ကာ မော်တော်ဆိုင်ကယ်ဖြင့် ပြန်လည်မောင်းနှင် ထွက်ပြေးသွားခဲ့ခြင်း ဖြစ်သည်။ ရဲတပ်ဖွဲ့က အမှုမှန်ပေါ်ပေါက်ရေးအတွက် ဆက်လက်စုံစမ်းစစ်ဆေးလျက် ရှိသည်။ #ချွန်ဘူရီခရိုင် #ဘန်းလမုန်းမြို့နယ်

ထိုင်း မူကြိုကျောင်းအတွင်း အမျိုးသမီးတစ်ဦးကို ယောက်ျားဖြစ်သူ ရဲအရာရှိက သေနတ်ဖြင့် ပစ်သတ်

ထိုင်း မူကြိုကျောင်းအတွင်း အမျိုးသမီးတစ်ဦးကို ယောက်ျားဖြစ်သူ ရဲအရာရှိက သေနတ်ဖြင့် ပစ်သတ် သတင်းနှင့် မီဒီယာ ကွန်ရက်။၂၀၂၆ ခုနှစ်၊  စက်တင်ဘာ ၉ ရက…

  • September 9, 2026
ကမ္ဘာ့ လစာအမြင့်ဆုံး စင်ကာပူ ဝန်ကြီးချုပ် လစာတိုးရမည် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာ ၉ ရက်။ ကမ္ဘာပေါ်တွင် တရားဝင် လစာ အများဆုံးရရှိသည့် နိုင်ငံ့ခေါင်းဆောင် ဖြစ်သူ စင်ကာပူ ဝန်ကြီးချုပ် အပါအဝင် အစိုးရအဖွဲ့ ဝန်ကြီးများ၏ လစာများကို တိုးမြှင့်သွားမည် ဖြစ်ကြောင်း စင်ကာပူ အစိုးရက ထုတ်ပြန်လိုက်သည်။ စင်ကာပူ ဝန်ကြီးချုပ်၏ နှစ်စဉ်လစာသည် ယခင် စင်ကာပူဒေါ်လာ ၂.၂ သန်းမှ စင်ကာပူဒေါ်လာ ၃.၆ သန်းအထိ တိုးမြင့်ရရှိတော့မည် ဖြစ်သည်။ ပြင်ပ ပေါက်ဈေးအရ မြန်မာကျပ်ငွေဖြင့် တွက်ချက်ပါက ကျပ် ၇.၇ ဘီလီယံနီးပါးမှ ကျပ် ၁၂ ဘီလီယံကျော်အထိ ရှိမည် ဖြစ်သည်။ အဆိုပါ လစာတိုးမြှင့်မှုအရ ရရှိလာမည့် ပိုလျှံငွေများကို လာမည့် ၅ နှစ်အတွင်း လှူဒါန်းသွားမည်ဟု ဝန်ကြီးချုပ်က ပြောကြားခဲ့သည်။ အစိုးရအဖွဲ့အတွင်း အရည်အချင်းရှိသူများကို ဆွဲဆောင်နိုင်ရန်နှင့် အဂတိလိုက်စားမှုကို တားဆီးကာကွယ်ရန်အတွက် အဆိုပါ လစာတိုးမြှင့်မှု ပြုလုပ်ရခြင်းဖြစ်ကြောင်း အစိုးရဘက်က ထုချေထားသည်။ စင်ကာပူ ဝန်ကြီးချုပ်၏ လစာသည် အမေရိကန်သမ္မတ၊ ဗြိတိန်ဝန်ကြီးချုပ်တို့၏ လစာထက် အဆပေါင်းများစွာ ပိုမိုများပြားလျက်ရှိသည်။ သို့သော်လည်း ကုန်ဈေးနှုန်းကြီးမြင့်မှုနှင့် အလုပ်အကိုင် လုံခြုံမှုဆိုင်ရာ စိုးရိမ်နေရသည့် စင်ကာပူ ပြည်သူများအကြား အဆိုပါ လစာတိုးမြှင့်မှုအပေါ် ဝေဖန်မှုများ ထွက်ပေါ်လျက်ရှိသည်။ စင်ကာပူနိုင်ငံသား တစ်ဦး၏ ပျမ်းမျှ နှစ်စဉ်ဝင်ငွေမှာ စင်ကာပူဒေါ်လာ ၇ သောင်းနီးပါးသာ ရှိသဖြင့် ဝန်ကြီးများ၏ လစာပမာဏမှာ သာမန်ပြည်သူများထက် အဆမတန် များပြားလွန်းနေသည်ဟု ဝေဖန်ထောက်ပြမှုများ ရှိနေသည်။ #စင်္ကာပူ

ကမ္ဘာ့ လစာအမြင့်ဆုံး စင်ကာပူ ဝန်ကြီးချုပ် လစာတိုးရမည်

ကမ္ဘာ့ လစာအမြင့်ဆုံး စင်ကာပူ ဝန်ကြီးချုပ် လစာတိုးရမည် သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာ ၉ ရက်။ ကမ္ဘာပေါ်တွင် တရားဝင် လစာ အများဆုံး…

  • September 9, 2026
ရုရှားနှင့် မြောက်ကိုရီးယားကို ဆက်သွယ်သည့် ပထမဆုံး တံတား စတင်ဖွင့်လှစ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာ ၉ ရက်။ ရုရှားနိုင်ငံနှင့် မြောက်ကိုရီးယားနိုင်ငံတို့အကြား ပထမဆုံးအကြိမ်အဖြစ် နှစ်နိုင်ငံကို တိုက်ရိုက်ဆက်သွယ်ထားသည့် ကုန်းလမ်းတံတားကို စတင်ဖွင့်လှစ်လိုက်ပြီဖြစ်သည်။ အဆိုပါ ကုန်းလမ်းတံတား ပွင့်လှစ်လိုက်ခြင်းကြောင့် နှစ်နိုင်ငံ ကုန်စည်နှင့် ခရီးသည် ပို့ဆောင်ရေး ကဏ္ဍများ ပိုမိုလွယ်ကူ လျင်မြန်လာမည်ဖြစ်ကြောင်း သတင်းများတွင် ဖော်ပြထားသည်။ မြောက်ကိုရီးယား အစိုးရ သတင်းများ၏ ဖော်ပြချက်အရ အဆိုပါ တံတားကို ဝန်ထမ်း အကူးအပြောင်း၊ ခရီးသွားလုပ်ငန်းနှင့် ကုန်သွယ်ရေးတို့အတွက် အသုံးပြုမည်ဟု ဆိုသည်။ သို့သော်လည်း ယူကရိန်း ထောက်လှမ်းရေး အဖွဲ့များ၏ သုံးသပ်ချက်အရ အဆိုပါ တံတားသည် ယူကရိန်းစစ်ပွဲတွင် ရုရှားအား ကူညီရန်အတွက် လျှို့ဝှက် စစ်ရေးထောက်ပံ့ရေး လမ်းကြောင်းအဖြစ် အဓိက အသုံးပြုဖွယ်ရှိကြောင်း သတိပေးထားသည်။ ရုရှား သတင်းဌာန TASS ၏ ဖော်ပြချက်အရ အဆိုပါ တံတားပေါ်မှတစ်ဆင့် တစ်ရက်လျှင် မော်တော်ယာဉ် အစီးရေ ၃၀၀ နှင့် လူဦးရေ ၂,၃၀၀ ကျော် ဖြတ်သန်းသွားလာနိုင်မည် ဖြစ်သည်။ စတင်ဖွင့်လှစ်ချိန်တွင် ကုန်စည်ပို့ဆောင်ရေးအတွက် အဓိကထား အသုံးပြုမည်ဖြစ်ပြီး ယခုနှစ်နှောင်းပိုင်းတွင် ခရီးသည်ပို့ဆောင်ရေးအတွက်ပါ တိုးချဲ့ဖွင့်လှစ်ရန် လျာထားကြောင်း သိရသည်။ မြောက်ကိုရီးယားဘက်မှ ရုရှားသို့ လက်နက်များ၊ စစ်ရေး အကူအညီများနှင့် အလုပ်သမားများ ပိုမိုစေလွှတ်နိုင်သကဲ့သို့ ရုရှားဘက်မှ နည်းပညာနှင့် ရင်းမြစ်များ ပြန်လည်စီးဝင်ရေးအတွက်လည်း အားကောင်းသည့် လမ်းကြောင်းတစ်ခု ဖြစ်လာမည်ဟု လေ့လာစောင့်ကြည့်သူများက သုံးသပ်ထားကြသည်။ #TASS #ရုရှား #မြောကိုရီးယား

ရုရှားနှင့် မြောက်ကိုရီးယားကို ဆက်သွယ်သည့် ပထမဆုံး တံတား စတင်ဖွင့်လှစ်

ရုရှားနှင့် မြောက်ကိုရီးယားကို ဆက်သွယ်သည့် ပထမဆုံး တံတား စတင်ဖွင့်လှစ် သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာ ၉ ရက်။ ရုရှားနိုင်ငံနှင့်…

  • September 9, 2026
မြန်မာ့အရေး ICC သို့ လွှဲပြောင်းရန် ကုလသမဂ္ဂ လူ့အခွင့်အရေး မဟာမင်းကြီး တိုက်တွန်း သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၉ ရက်။ မြန်မာနိုင်ငံ၏ အခြေအနေများကို အပြည်ပြည်ဆိုင်ရာ ရာဇဝတ်တရားရုံး (ICC) သို့ လွှဲပြောင်းပေးရန် ကုလသမဂ္ဂ လူ့အခွင့်အရေးဆိုင်ရာ မဟာမင်းကြီး ဗိုလ်ခါ တာ့ခ် (Volker Turk) က ကုလသမဂ္ဂ အဖွဲ့ဝင်နိုင်ငံများအား တနင်္လာနေ့တွင် တိုက်တွန်းတောင်းဆိုလိုက်သည်။ နှစ်ပေါင်းများစွာ လုပ်ဆောင်ခဲ့သည့် သံတမန်ရေး ကြိုးပမ်းမှုများသည် အကြမ်းဖက် ကျူးလွန်မှုများကို တားဆီးနိုင်ခြင်း မရှိသည့်အပြင်၊ ရိုဟင်ဂျာများ အပါအဝင် အရပ်သားများအပေါ် ကျူးလွန်ခဲ့သည့် ရာဇဝတ်မှုများအတွက်လည်း အပြစ်ပေး အရေးယူနိုင်ခဲ့ခြင်း မရှိကြောင်း ဂျနီဗာမြို့တွင် ကျင်းပသည့် (၆၃) ကြိမ်မြောက် ကုလသမဂ္ဂ လူ့အခွင့်အရေး ကောင်စီ အစည်းအဝေးတွင် မဟာမင်းကြီးက ပြောကြားခဲ့သည်။ မြန်မာနိုင်ငံတွင် လေကြောင်းတိုက်ခိုက်မှုများကြောင့် အရပ်သား သေဆုံးမှု အများဆုံး ဖြစ်ပွားနေပြီး အတည်ပြုနိုင်သည့် အရပ်သား သေဆုံးသူ ၁,၂၀၀ ကျော်နှင့် သတင်းရင်းမြစ်များ၏ ဖော်ပြချက်အရ ၃,၀၀၀ ကျော်အထိ ရှိနိုင်သည်ဟု ဆိုသည်။ ထို့ကြောင့် အပြည်ပြည်ဆိုင်ရာ ဥပဒေ ချိုးဖောက်မှုများကို အားပေးရာရောက်နေသည့် လက်နက်၊ ခဲယမ်း၊ လေယာဉ်ဆီနှင့် စစ်ဘက်သုံး ပစ္စည်းများ မြန်မာနိုင်ငံသို့ တင်ပို့နေခြင်းကို တားဆီးပေးကြရန်လည်း မဟာမင်းကြီးက တောင်းဆိုထားသည်။ ထို့အပြင် ရခိုင်ပြည်နယ်အတွင်းရှိ ရိုဟင်ဂျာများသည် မတရားဖမ်းဆီးမှု၊ ညှဉ်းပန်းနှိပ်စက်မှု၊ လိင်ပိုင်းဆိုင်ရာ အကြမ်းဖက်မှုနှင့် အဓမ္မ လုပ်အားပေး ခိုင်းစေမှု အစရှိသည့် စနစ်တကျ ကျူးလွန်သည့် လူ့အခွင့်အရေး ချိုးဖောက်မှုများနှင့် ရင်ဆိုင်နေရကြောင်း ထောက်ပြခဲ့သည်။ လက်ရှိ လုံခြုံရေး မရှိသေးသည့် အခြေအနေတွင် ဒုက္ခသည်များကို ပြန်လည် စေလွှတ်ခြင်းသည် နိုင်ငံတကာ၏ ဘေးအန္တရာယ်ရှိရာသို့ ပြန်မပို့ရေး မူဝါဒ (non-refoulement principle) ကို အကြီးအကျယ် ချိုးဖောက်ရာ ရောက်နိုင်ကြောင်းလည်း သတိပေးခဲ့သည်။ #ICC #မြန်မာ့အရေး #Volker_Turk

မြန်မာ့အရေး ICC သို့ လွှဲပြောင်းရန် ကုလသမဂ္ဂ လူ့အခွင့်အရေး မဟာမင်းကြီး တိုက်တွန်း

မြန်မာ့အရေး ICC သို့ လွှဲပြောင်းရန် ကုလသမဂ္ဂ လူ့အခွင့်အရေး မဟာမင်းကြီး တိုက်တွန်း သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၉ ရက်။ မြန်မာ…

  • September 9, 2026
×Close