နိုင်ငံတကာသတင်း

တရုတ်နိုင်ငံသားများ ပြည်ပထွက်ခွာခွင့် စည်းမျဉ်းသစ် တင်းကျပ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၅ ရက်။ တရုတ်အစိုးရသည် အမျိုးသားလုံခြုံရေးနှင့် နည်းပညာ ထိန်းချုပ်မှုဆိုင်ရာ စည်းမျဉ်းသစ်များကို အကြောင်းပြ၍ နိုင်ငံသားများ ပြည်ပထွက်ခွာခွင့်ဆိုင်ရာ ကန့်သတ်ချက်များကို စက်တင်ဘာ ၁၅ ရက်တွင် စတင်ကျင့်သုံးလိုက်သည်။ စက်တင်ဘာ ၁၅ ရက်တွင် စတင်အသက်ဝင်သည့် စည်းမျဉ်းသစ်များအရ ပြည်ပ၌ ရောက်ရှိစဉ် တရုတ်နိုင်ငံ၏ အမျိုးသားလုံခြုံရေးနှင့် အကျိုးစီးပွားကို ထိခိုက်အောင် ပြုလုပ်ခဲ့သည်ဟု ယူဆရသူများကို ပြည်တွင်းသို့ ပြန်လည်ရောက်ရှိချိန်၌ ၃ နှစ်အထိ ပြည်ပထွက်ခွာခွင့် ပိတ်ပင်နိုင်မည်ဖြစ်သည်။ ထို့ပြင် နည်းပညာ တင်သွင်း/တင်ပို့မှုဆိုင်ရာ စည်းမျဉ်းများ ဖောက်ဖျက်သူများကိုလည်း ပြည်ပထွက်ခွာခွင့် တားမြစ်သွားမည်ဖြစ်သည်။ တရုတ်အာဏာပိုင်များဘက်ကမူ ယင်းစည်းမျဉ်းများသည် အချုပ်အခြာအာဏာနှင့် လုံခြုံရေးကို ကာကွယ်ရန်၊ ပြည်ပ၌ လိမ်လည်လှည့်ဖြားခံရမှုနှင့် တရားမဝင် လောင်းကစားပွဲများတွင် ပါဝင်ခြင်းမှ ကာကွယ်ရန်ဖြစ်ပြီး အများပြည်သူအပေါ် ထိခိုက်မှုမရှိဟု ထုတ်ပြန်ထားသည်။ သို့သော်လည်း ပြည်ပရောက် တရုတ်နိုင်ငံသားများ၏ ပြောဆိုလှုပ်ရှားမှုများကို ပိုမိုထိန်းချုပ်ရန်နှင့် အစိုးရကို ဝေဖန်သူများကို ဖိအားပေးရန် ဖန်တီးလိုက်သည့် နည်းလမ်းတစ်ခုဖြစ်ကြောင်း ကျွမ်းကျင်သူများနှင့် လူ့အခွင့်အရေး အဖွဲ့အစည်းများက ထောက်ပြကြသည်။ Safeguard Defenders အဖွဲ့၏ အချက်အလက်များအရ တရုတ်နိုင်ငံ၌ ပြည်ပထွက်ခွာခွင့် ပိတ်ပင်ခံရသည့် ဖြစ်စဉ်သည် ၂၀၁၆ ခုနှစ်တွင် ၈၉ ခုသာ ရှိခဲ့သော်လည်း လွန်ခဲ့သည့်နှစ်တွင် ၁ သိန်း ၈ သောင်းကျော်အထိ မြင့်တက်လာခဲ့ကြောင်း သိရသည်။

တရုတ်နိုင်ငံသားများ ပြည်ပထွက်ခွာခွင့် စည်းမျဉ်းသစ် တင်းကျပ်

တရုတ်နိုင်ငံသားများ ပြည်ပထွက်ခွာခွင့် စည်းမျဉ်းသစ် တင်းကျပ် သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၅ ရက်။ တရုတ်အစိုးရသည် အမျိုးသားလု…

  • September 15, 2026
ဦးကျော်မိုးထွန်း ကုလသမဂ္ဂသံအမတ်ကြီး ရာထူး မတရား ရယူထားကြောင်း စစ်အုပ်စု စွပ်စွဲ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၄ ရက်။ လာမည့် နိုဝင်ဘာလတွင် ကျင်းပမည့် ကုလသမဂ္ဂ ကိုယ်စားလှယ် အထောက်အထား စိစစ်ရေး ကော်မတီက မြန်မာနိုင်ငံ ကိုယ်စားလှယ်နေရာအတွက် ဆုံးဖြတ်ရန် ပြင်ဆင်နေချိန်တွင် ကုလသမဂ္ဂဆိုင်ရာ မြန်မာသံအမတ်ကြီး ဦးကျော်မိုးထွန်းသည် အဆိုပါ ရာထူးအား တရားမဝင် ရယူထားခြင်းဖြစ်ကြောင်း စစ်ကောင်စီက စွပ်စွဲလိုက်သည်။ သံအမတ်ကြီး ဦးကျော်မိုးထွန်းသည် ၂၀၂၁ ခုနှစ် အာဏာသိမ်းမှုကို ဆန့်ကျင်ခဲ့ပြီးနောက် ရာထူးမှ ထုတ်ပယ်ခံထားရသူဖြစ်သလို အမျိုးသားညီညွတ်ရေးအစိုးရ (NUG) နှင့် ပူးပေါင်းဆောင်ရွက်နေသည့်အတွက် တရားမဝင်ကြောင်း စစ်ကောင်စီ နိုင်ငံခြားရေးဝန်ကြီးဌာနက ထုတ်ပြန်ခဲ့ခြင်းဖြစ်သည်။ လက်ရှိ ကုလသမဂ္ဂ ကိုယ်စားလှယ် အထောက်အထား စိစစ်ရေး ကော်မတီအသစ်တွင် အမေရိကန်၊ တရုတ်၊ ရုရှား၊ ဘာဟားမား၊ ဘယ်လ်ဂျီယံ၊ ဘီနင်၊ ဂျမေကာ၊ ယူဂန္ဓာနှင့် ဗာနူအာတူ နိုင်ငံများ ပါဝင်သည်။ ကော်မတီအတွင်း စစ်ကောင်စီအား စစ်လက်နက်နှင့် သံတမန်ရေးအရ အကာအကွယ်ပေးထားသည့် တရုတ်၊ ရုရှားတို့နှင့် စီးပွားရေးဆိုင်ရာ ပိတ်ဆို့မှုများ ချမှတ်ထားသည့် အမေရိကန်တို့အကြား သဘောထား အားပြိုင်မှုများ ရှိနေသည်။ စစ်တပ်က အာဏာသိမ်းခဲ့သည့် အချိန်မှစ၍ ကော်မတီအနေဖြင့် ဆုံးဖြတ်ချက်ကို နှစ်စဉ် ရွှေ့ဆိုင်းထားခဲ့သဖြင့် သံအမတ်ကြီး ဦးကျော်မိုးထွန်းသည် ကုလသမဂ္ဂတွင် မြန်မာနိုင်ငံကို ဆက်လက် ကိုယ်စားပြုခွင့် ရရှိနေခြင်း ဖြစ်သည်။ #ukyawmoetun #ဦးကျော်မိုးထွန်း

ဦးကျော်မိုးထွန်း ကုလသမဂ္ဂသံအမတ်ကြီး ရာထူး မတရား ရယူထားကြောင်း စစ်အုပ်စု စွပ်စွဲ

ဦးကျော်မိုးထွန်း ကုလသမဂ္ဂသံအမတ်ကြီး ရာထူး မတရား ရယူထားကြောင်း စစ်အုပ်စု စွပ်စွဲ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၄ ရက်။ လာမည့် …

  • September 14, 2026
အိုကီနာဝါတွင် ဗဟိုအစိုးရ ထောက်ခံသူ အနိုင်ရရှိသဖြင့် ဂျပန် စစ်အင်အား တိုးချဲ့ရေး လမ်းပွင့် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၄ ရက်။ ဂျပန်နိုင်ငံ အိုကီနာဝါ စီရင်စု အုပ်ချုပ်ရေးမှူး ရွေးကောက်ပွဲတွင် ဝန်ကြီးချုပ် စာနေး တာကာအိချိ အစိုးရ ထောက်ခံထားသူ အသက် ၄၂ နှစ်အရွယ် ဂဲန်တာ ကိုဂျာ (Genta Koja) က မဲဆန္ဒ ၅၉ ရာခိုင်နှုန်းဖြင့် အနိုင်ရရှိသွားခဲ့သည်။ ယခုရလဒ်သည် တိုကျိုဗဟိုအစိုးရ၏ စစ်ရေးပြင်ဆင်မှုများကို ၁၂ နှစ်ကြာ ဆန့်ကျင်လာခဲ့သည့် အုပ်ချုပ်ရေးမှူး ဒန်နီ တာမာကီ (Denny Tamaki) ၏ အုပ်ချုပ်မှုကို အဆုံးသတ်သွားစေခဲ့သည်။ အဆိုပါ နိုင်ပွဲကြောင့် အမေရိကန် မရိန်းတပ်စခန်း ရွှေ့ပြောင်းရေး အစီအစဉ်အပေါ် ဒေသခံများ၏ ကန့်ကွက်မှုကို အားနည်းသွားစေနိုင်သဖြင့် တပ်စခန်း ရွှေ့ပြောင်းရေးလုပ်ငန်းများကို ဆက်လက် ဆောင်ရွက်သွားမည်ဟု ဗဟိုအစိုးရက အတည်ပြုခဲ့သည်။ ထို့အပြင် အုပ်ချုပ်ရေးမှူးသစ် လက်ထက်တွင် အိုကီနာဝါကျွန်းပေါ်ရှိ အရပ်ဘက် လေဆိပ်များနှင့် ဆိပ်ကမ်းများအား စစ်ဘက်ဆိုင်ရာ အသုံးပြုခွင့် ပေးလာနိုင်ဖွယ်ရှိကြောင်းလည်း သုံးသပ်ရရှိသည်။ #Genta_Koja

အိုကီနာဝါတွင် ဗဟိုအစိုးရ ထောက်ခံသူ အနိုင်ရရှိသဖြင့် ဂျပန် စစ်အင်အား တိုးချဲ့ရေး လမ်းပွင့်

အိုကီနာဝါတွင် ဗဟိုအစိုးရ ထောက်ခံသူ အနိုင်ရရှိသဖြင့် ဂျပန် စစ်အင်အား တိုးချဲ့ရေး လမ်းပွင့် သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၄ ရက်။ …

  • September 14, 2026
ဆော်ဒီ ရေနံပိုက်လိုင်း ဒရုန်းဖြင့် တိုက်ခိုက်ခံရ၍ ရေနံစိမ်းဈေးနှုန်းများ မြင့်တက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၄ ရက်။ အီရတ်နိုင်ငံဘက်မှ ပစ်ခတ်လိုက်သည့် ဒရုန်းတိုက်ခိုက်မှုများကြောင့် ဟော်မုဇ် ရေလက်ကြားကို ရှောင်ကွင်း သွယ်တန်းထားသည့် ဆော်ဒီအာရေဗျနိုင်ငံ၏ အရှေ့-အနောက် ရေနံပိုက်လိုင်း ပျက်စီးသွားခဲ့ပြီးနောက် ကမ္ဘာ့ရေနံစိမ်းဈေးနှုန်းများ ပြန်လည်မြင့်တက်လာခဲ့သည်။ ဆော်ဒီအစိုးရက ကြိုတင်ကာကွယ်သည့်အနေဖြင့် အဆိုပါ ရေနံပိုက်လိုင်းအား ယာယီပိတ်သိမ်းလိုက်ကြောင်း ထုတ်ပြန်ခဲ့သည်။ ထိုတိုက်ခိုက်မှုကြောင့် တနင်္ဂနွေနေ့တွင် ကမ္ဘာ့ရေနံစိမ်းဈေးနှုန်းများ ၃ ရာခိုင်နှုန်းနီးပါး ရုတ်တရက် မြင့်တက်သွားခဲ့သည်။ အမေရိကန် WTI ရေနံစိမ်း ကြိုရောင်းဈေးမှာ တစ်ဘီပါလျှင် ၁၀၂ ဒသမ ၈၇ ဒေါ်လာအထိ လည်းကောင်း၊ နိုင်ငံတကာ စံချိန်စံညွှန်းဖြစ်သည့် ဘရန့် (Brent) ရေနံစိမ်းဈေးမှာ တစ်ဘီပါလျှင် ၁၀၇ ဒသမ ၈၇ ဒေါ်လာအထိ လည်းကောင်း ရောက်ရှိသွားခဲ့သည်။ ပိုက်လိုင်း ပျက်စီးမှု ပမာဏနှင့် မည်သည့်အချိန်တွင် ပြန်လည်ဖွင့်လှစ်နိုင်မည် ဆိုသည်ကို ဆော်ဒီအစိုးရဘက်မှ သတင်းထုတ်ပြန်ခြင်း မရှိသေးပေ။ အဆိုပါ ရေနံပိုက်လိုင်းသည် ပါရှန်းပင်လယ်ကွေ့ ရေနံထွက်ရာဒေသများမှ ပင်လယ်နီကမ်းခြေ ပို့ကုန်ဆိပ်ကမ်းများအထိ သွယ်တန်းထားပြီး တစ်ရက်လျှင် ရေနံဘီပါ ၇ သန်းအထိ သယ်ယူပို့ဆောင်ပေးနိုင်သည့် ပိုက်လိုင်းဖြစ်သည်။ အီရန်စစ်ပွဲကြောင့် ဖြစ်ပေါ်လာသည့် ကမ္ဘာ့ရေနံထောက်ပံ့မှု အကျပ်အတည်းတွင် ဟော်မုဇ် ရေလက်ကြားအား ဖြတ်သန်းရန် မလိုဘဲ သယ်ယူနိုင်ရန် ဆော်ဒီအာရေဗျက ထိုပိုက်လိုင်းကို အဓိက အားထားခဲ့ရခြင်း ဖြစ်သည်။ #Brent

ဆော်ဒီ ရေနံပိုက်လိုင်း ဒရုန်းဖြင့် တိုက်ခိုက်ခံရ၍ ရေနံစိမ်းဈေးနှုန်းများ မြင့်တက်

ဆော်ဒီ ရေနံပိုက်လိုင်း ဒရုန်းဖြင့် တိုက်ခိုက်ခံရ၍ ရေနံစိမ်းဈေးနှုန်းများ မြင့်တက် သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၄ ရက်။ အီရတ်…

  • September 14, 2026
#Trump

မဲနိုင်လျှင် လူတစ်ဦးကို ဒေါ်လာ ၅၀၀၀ ပေးမည်ဟု ထရန့်ကြေညာ

မဲနိုင်လျှင် လူတစ်ဦးကို ဒေါ်လာ ၅၀၀၀ ပေးမည်ဟု ထရန့်ကြေညာ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၁ ရက်။ လာမည့် နိုဝင်ဘာ ကြားဖြတ်ရွေးကော…

  • September 11, 2026
မြောက်ကိုရီးယားက ယူရေနီယမ် သန့်စင်သည့် အဆောက်အအုံသစ် ဆောက်လုပ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၁ ရက်။ မြောက်ကိုရီးယားနိုင်ငံသည် ယူရေနီယမ် သန့်စင်သည့် နှစ်ထပ် အဆောက်အအုံသစ်တစ်ခုကို တည်ဆောက်ခဲ့ကြောင်း အပြည်ပြည်ဆိုင်ရာ အနုမြူစွမ်းအင် အေဂျင်စီ (IAEA) က ထုတ်ပြန်သည်။ အဆိုပါ အဆောက်အအုံတွင် ယူရေနီယမ် သန့်စင်သည့် ဗဟိုအားခွဲစက် (Centrifuge) အစုအဝေး ၂၈ ခုအထိ တပ်ဆင်နိုင်သဖြင့် ကုလသမဂ္ဂ လုံခြုံရေးကောင်စီ ဆုံးဖြတ်ချက်များကို ပွင့်လင်းစွာ ချိုးဖောက်နေခြင်းဖြစ်ကြောင်း IAEA က ပြောကြားသည်။ စစ်ဆေးရေးမှူးများသည် ၂၀၀၉ ခုနှစ်ကတည်းက မြောက်ကိုရီးယားမှ နှင်ထုတ်ခံခဲ့ရသဖြင့် ဂြိုဟ်တုဓာတ်ပုံများမှတစ်ဆင့် စောင့်ကြည့်နေရခြင်း ဖြစ်သည်။ မြောက်ကိုရီးယား ခေါင်းဆောင် ကင်ဂျုံအန်းသည် အဆိုပါ စက်ရုံသစ်သို့ ပြီးခဲ့သည့် ဇွန်လက သွားရောက်ကြည့်ရှုခဲ့ပြီး ထုတ်လုပ်မှု စွမ်းရည် တိုးတက်လာမှုကို ချီးကျူးခဲ့သည်။ မြောက်ကိုရီးယားသည် ၂၀၂၂ ခုနှစ်တွင် မိမိကိုယ်ကို နျူကလီးယား ပိုင်ဆိုင်သည့် နိုင်ငံအဖြစ် ကြေညာခဲ့ပြီး နျူကလီးယား လက်နက်များကို စွန့်လွှတ်မည် မဟုတ်ကြောင်း ရပ်တည်ထားသည်။ #ယူရေနီယမ်

မြောက်ကိုရီးယားက ယူရေနီယမ် သန့်စင်သည့် အဆောက်အအုံသစ် ဆောက်လုပ်

မြောက်ကိုရီးယားက ယူရေနီယမ် သန့်စင်သည့် အဆောက်အအုံသစ် ဆောက်လုပ် သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၁ ရက်။ မြောက်ကိုရီးယားနိုင်ငံသည…

  • September 11, 2026
ယူကရိန်းကို ကနေဒါ ဒေါ်လာ ၃၅၀ သန်းတန် လေကြောင်းကာကွယ်ရေးစနစ် ကူညီမည် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၁ ရက်။ ယူကရိန်းနိုင်ငံအတွက် ဒေါ်လာ ၃၅၀ သန်းတန် လေကြောင်းကာကွယ်ရေး လက်နက်စနစ်များ ထောက်ပံ့ပေးရန် ကနေဒါနိုင်ငံက သဘောတူလိုက်သည်။ ကနေဒါ ဝန်ကြီးချုပ် မာခ် ကာနေ (Mark Carney) နှင့် ယူကရိန်း သမ္မတ ဗိုလိုဒီမီးယား ဇယ်လန်းစကီး တို့သည် စက်တင်ဘာ ၁၀ ရက်နေ့က ကနေဒါနိုင်ငံ၌ တွေ့ဆုံစဉ် ယင်းသို့ သဘောတူညီခဲ့ကြခြင်း ဖြစ်သည်။ ရုရှား၏ လေကြောင်း တိုက်ခိုက်မှုများကို ကာကွယ်ရန် ယူကရိန်းအနေဖြင့် အမေရိကန်လုပ် Patriot ဒုံးကျည်စနစ်များ အရေးပေါ် လိုအပ်နေပြီး ယခု အကူအညီကို အမေရိကန်၏ တတိယနိုင်ငံများမှတစ်ဆင့် လက်နက် ဝယ်ယူထောက်ပံ့ခွင့်ပြုသည့် အစီအစဉ်အတိုင်း ဆောင်ရွက်သွားမည် ဖြစ်သည်။ ထို့ပြင် လာမည့် ၂ နှစ်အတွင်း ဒရုန်း သန်းပေါင်းများစွာ ထုတ်လုပ်သွားမည်ဖြစ်ပြီး သုံးပုံတစ်ပုံကို ယူကရိန်းသို့ ပေးပို့မည်ဟု ကနေဒါ ဝန်ကြီးချုပ်က ပြောကြားခဲ့သည်။ ကနေဒါသည် ၂၀၂၂ စစ်ပွဲ စတင်ချိန်မှစ၍ ယူကရိန်းသို့ စစ်ရေးအကူအညီ ကနေဒါဒေါ်လာ ၈ ဒသမ ၅ ဘီလီယံ အပါအဝင် စုစုပေါင်း ဒေါ်လာ ၂၅ ဒသမ ၅ ဘီလီယံကျော် ထောက်ပံ့ပေးထားပြီးဖြစ်သည်။ #Mark_Carney

ယူကရိန်းကို ကနေဒါ ဒေါ်လာ ၃၅၀ သန်းတန် လေကြောင်းကာကွယ်ရေးစနစ် ကူညီမည်

ယူကရိန်းကို ကနေဒါ ဒေါ်လာ ၃၅၀ သန်းတန် လေကြောင်းကာကွယ်ရေးစနစ် ကူညီမည် သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၁ ရက်။ ယူကရိန်းနိုင်ငံအတွက…

  • September 11, 2026
နယူးဒေလီမှာ အိန္ဒိယ၊ ရုရှား၊ တရုတ်၊ အီရန် ခေါင်းဆောင်များ တွေ့ဆုံမည် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၁ ရက်။ အိန္ဒိယနိုင်ငံ၊ နယူးဒေလီမြို့တွင် ၂ ရက်ကြာ ကျင်းပမည့် BRICS ထိပ်သီးအစည်းအဝေးကို တက်ရောက်ရန် ရုရှားသမ္မတ ဗလာဒီမီယာ ပူတင်နှင့် အီရန်သမ္မတ မာဆော့ ပီဇက်ရှကီယန် တို့ ရောက်ရှိလာကြပြီဟု BBC သတင်းတပုဒ်တွင် ဖော်ပြသည်။ စနေနေ့တွင် တရုတ်သမ္မတ ရှီကျင့်ဖင်လည်း ၇ နှစ်အတွင်း ပထမဆုံးအကြိမ်အဖြစ် အိန္ဒိယနိုင်ငံကို ရောက်ရှိလာမှာ ဖြစ်ပါတယ်။ ယခုနှစ် အစည်းအဝေးမှာ ယူကရိန်းနဲ့ အရှေ့အလယ်ပိုင်း စစ်ပွဲများအပြင် ကမ္ဘာ့စီးပွားရေး စိန်ခေါ်မှုတွေကို အဓိက ဆွေးနွေးကြမည် ဖြစ်သည်။ အိမ်ရှင် အိန္ဒိယ ဝန်ကြီးချုပ် နာရင်ဒရာ မိုဒီသည် ရုရှား၊ အီရန် သမ္မတတို့အပြင် တရုတ်သမ္မတ ရှီကျင့်ဖင်နှင့်လည်း သီးခြား တွေ့ဆုံဆွေးနွေးရန် ရှိနေသည်။ လွန်ခဲ့သည့် ၆ နှစ်က ဟိမဝန္တာ နယ်စပ် ပဋိပက္ခကြောင့် တင်းမာခဲ့သော အိန္ဒိယ-တရုတ် ဆက်ဆံရေးသည် ယခု ခရီးစဉ်မှတစ်ဆင့် ပြန်လည် ပြေလည်လာရန် မျှော်လင့်နေကြသော်လည်း မယုံသင်္ကာမှုများနှင့် ကုန်သွယ်ရေး လိုငွေပြမှုများ ဆက်လက် တည်ရှိနေဆဲ ဖြစ်သည်။ ၂၀၀၉ ခုနှစ်တွင် စတင်ဖွဲ့စည်းခဲ့သည့် BRICS အဖွဲ့သည် ပြီးခဲ့သည့်နှစ်က အီရန်၊ ဆော်ဒီအာရေးဗီးယားနှင့် ယူအေအီး တို့ကို အဖွဲ့ဝင်အဖြစ် တိုးချဲ့ခဲ့သဖြင့် ယခုအခါ အဖွဲ့ဝင် ၁၁ နိုင်ငံ ထိ ရှိလာခဲ့သည်။ သို့သော် အရှေ့အလယ်ပိုင်း ပဋိပက္ခအပေါ် သဘောထား အမြင် ကွဲလွဲမှုများ ရှိနေသဖြင့် အဖွဲ့၏ စည်းလုံးညီညွတ်မှုအတွက် စိန်ခေါ်မှုများ ရင်ဆိုင်နေရကြောင်း နိုင်ငံရေး လေ့လာသူများက သုံးသပ်ကြသည်။ အိမ်ရှင် အိန္ဒိယသည် အမေရိကန်၊ အီရန်၊ အစ္စရေးတို့နှင့် ဆက်ဆံရေးကို မျှခြေရှိအောင် ထိန်းသိမ်းထားသကဲ့သို့ စွမ်းအင် အဓိက ဝယ်ယူနေသည့် ရုရှားနိုင်ငံနှင့်လည်း မဟာဗျူဟာမြောက် ဆက်ဆံရေးကို ဆက်လက် ခိုင်မာအောင် တည်ဆောက်ထားသည်။ #BRICS

နယူးဒေလီမှာ အိန္ဒိယ၊ ရုရှား၊ တရုတ်၊ အီရန် ခေါင်းဆောင်များ တွေ့ဆုံမည်

နယူးဒေလီမှာ အိန္ဒိယ၊ ရုရှား၊ တရုတ်၊ အီရန် ခေါင်းဆောင်များ တွေ့ဆုံမည် သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၁ ရက်။ အိန္ဒိယနိုင်ငံ၊ နယ…

  • September 11, 2026
ထိုင်းကျောင်းထိုင် ကိုယ်တော်ထံမှ ဘတ် ၂၁၄ သန်း ဖိုး ငွေကြေးပစ္စည်းများ သိမ်းဆည်း သတင်းနှင့် မီဒီယာကွန်ရက်။ ၂၀၂၆ ခုနှစ်၊ စက်တင်ဘာလ ၁၁ ရက်။ ငွေအလွဲသုံးမှု ငွေကြေးခဝါချမှုတွေနဲ့ မနေ့က ဖမ်းဆီးခဲ့တဲ့ ထိုင်း ကျောင်းထိုင် ဆရာတော် ထံမှ ဘတ် သန်း ၂၁၄ သန်း တန်ဖိုး ပစ္စည်းဥစ္စာများကို အာဏာပိုင်များ သိမ်းဆည်းခဲ့သည်။ ထိုင်းနိုင်ငံ၊ အယုဒ္ဓယမြို့ရှိ နာမည်ကျော် ဝပ်ဖူထိုင်းစဝမ် (Wat Phutthaisawan) ကျောင်းတိုက်၏ ကျောင်းထိုင်ဆရာတော်ဟောင်း "ဆာမီချိုတီ" (အာတီချိုတီ သမ္မဝါရော) နှင့် ၎င်းနှင့် နီးစပ်သည့် ဒါယိကာမ "မအေး" တို့အား ကျောင်းတော်ရန်ပုံငွေ ဘတ် ၉၂ သန်းကျော် အလွဲသုံးစားလုပ်မှုဖြင့် ရဲတပ်ဖွဲ့က အာမခံပေးရန် ကန့်ကွက်ပြီး စက်တင်ဘာလ ၁၁ ရက်နေ့က တရားရုံးသို့ ရမန်ယူ ထိန်းသိမ်းရန် ပို့ဆောင်လိုက်သည်။ ရာဇဝတ်မှုနှိမ်နင်းရေးရဲတပ်ဖွဲ့ ၏ ထုတ်ပြန်ချက်အရ ကျောင်းတိုက်အတွင်းရှိ ဆရာတော်၏ ကျောင်းဆောင်အတွင်း ဝှက်သိမ်းထားသော ဘတ် ၂၁၅ သန်းကျော် တန်ဖိုးရှိ ပိုင်ဆိုင်မှုများကို သိမ်းဆည်းရမိခဲ့သည်။ ထိုသိမ်းဆည်း ပစ္စည်းများတွင် ထိုင်းဘတ်ငွေနှင့် နိုင်ငံခြားငွေသား ဘတ် ၁၄၄ သန်း၊ ရွှေချောင်းနှင့် ရွှေထည် အလေးချိန် ဘတ် ၁,၀၆၆ အက္ခရာ (၁၀ ပိဿာခန့်) နှင့် ရှေးဟောင်းအဆောင်လက်ဖွဲ့များနှင့် မြေကွက်ပိုင်ဆိုင်ခွင့် စာချုပ်များ ပါဝင်သည်။ ၎င်းတို့သည် အလှူရှင်များကို ကျောင်းတိုက်အမည်ဖြင့် ပြေစာထုတ်ပေးခဲ့သော်လည်း ရရှိလာသည့် ဘတ် ၉၂ သန်း စာရင်းကို ကျောင်းတိုက်၏ တရားဝင်ဘဏ်အကောင့်သို့ ထည့်သွင်းခြင်းမရှိဘဲ ဆရာတော်ဟောင်း၏ ကိုယ်ပိုင်အကောင့်အတွင်းသို့ လွှဲပြောင်းထည့်သွင်းခဲ့ခြင်းဖြစ်သည်။ ယင်းနောက် ရဲတပ်ဖွဲ့သည် ခရိုင် ၄ ခုရှိ နေရာ ၆ ခုကို ဝင်ရောက်စီးနင်း ရှာဖွေခဲ့ပြီး ယခုကဲ့သို့ သက်သေပစ္စည်းများကို သိမ်းဆည်းရမိခဲ့ခြင်းဖြစ်သည်။ ငွေကြေးအလွဲသုံးစားမှုအပြင် ဆာမီချိုတီနှင့် ဒါယိကာမ မအေးတို့၏ ကာမဆက်ဆံနေသည့် ဗီဒီယိုဖိုင်များပါ ထွက်ပေါ်လာခဲ့သဖြင့် ရဟန်းသံဃာ့ဝိနည်း သိက္ခာပုဒ်များပါ ပြင်းထန်စွာ ဖောက်ဖျက်ခဲ့ကြောင်း ရဲတပ်ဖွဲ့က ပြောကြားခဲ့သည်။ တရားရုံးသို့ ပို့ဆောင်ရာတွင် သတင်းထောက်များ၏ မေးမြန်းမှုများကို သံသယ တရားခံ နှစ်ဦးစလုံးက တစ်စုံတစ်ရာ ပြန်လည်ဖြေကြားခြင်းမရှိဘဲ ခေါင်းငိုက်စိုက်ချကာ ရဲကားပေါ်သို့ ချက်ချင်း တက်ရောက်သွားခဲ့ကြသည်။ ရဲတပ်ဖွဲ့က ပျက်စီးဆုံးရှုံးမှု ပမာဏ အလွန်ကြီးမားခြင်း၊ သက်သေပစ္စည်းများကို ဖျက်ဆီးနိုင်ခြင်းနှင့် ထွက်ပြေးတိမ်းရှောင်နိုင်ခြေ ရှိခြင်းတို့ကြောင့် အာမခံပေးရန် ပြင်းထန်စွာ ကန့်ကွက်ထားသည်။ လက်ရှိတွင် အမျိုးသားအဂတိလိုက်စားမှု တိုက်ဖျက်ရေးကော်မရှင် (NACC) နှင့် အမျိုးသားသာသနာရေးရုံးတို့ ပူးပေါင်း၍ ပါဝင်ပတ်သက်သူများကို ပိုမိုစုံစမ်းဖော်ထုတ်ကာ သိမ်းဆည်းရမိသည့် ဘဏ်ငွေနှင့် ပစ္စည်းများကို ကျောင်းတိုက်ထံ ပြန်လည်လွှဲပြောင်းပေးအပ်သွားမည်ဟု ဆိုသည်။ #Wat_Phutthaisawan

ထိုင်းကျောင်းထိုင် ကိုယ်တော်ထံမှ ဘတ် ၂၁၄ သန်း ဖိုး ငွေကြေးပစ္စည်းများ သိမ်းဆည်း

ထိုင်းကျောင်းထိုင် ကိုယ်တော်ထံမှ ဘတ် ၂၁၄ သန်း ဖိုး ငွေကြေးပစ္စည်းများ သိမ်းဆည်း သတင်းနှင့် မီဒီယာကွန်ရက်။၂၀၂၆ ခုနှစ်၊ စက်တင်ဘာလ ၁၁ ရက်။ ငွေအလွဲသ…

  • September 11, 2026
×Close