နိုင်ငံတကာသတင်း

ပင်လယ်ကွေ့ အကျပ်အတည်း လျော့ကျလာသဖြင့် ရေနံစိမ်းဈေးကျ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၇ ရက်။ ဆော်ဒီအာရေးဘီးယားနိုင်ငံက အိုမန်နိုင်ငံ၏ ဆိပ်ကမ်းမှတစ်ဆင့် အာရှနိုင်ငံများသို့ ရေနံစိမ်းများ ပိုမိုတင်ပို့ရန် စီစဉ်နေကြောင်း သတင်းများ ထွက်ပေါ်လာပြီးနောက် ကမ္ဘာ့ရေနံစိမ်း ဈေးနှုန်းများ အနည်းငယ် ပြန်လည်ကျဆင်းသွားခဲ့သည်။ စက်တင်ဘာ ၁၇ ရက် နံနက်ပိုင်း ဈေးကွက်ဖွင့်ချိန်၌ ဘရန့် (Brent) ရေနံစိမ်း တစ်ပါရီ ပေါက်ဈေးသည် ၁ ဒေါ်လာ ၂၄ ဆင့် (၁ ဒသမ ၂ ရာခိုင်နှုန်း) ကျဆင်းခဲ့ပြီး ၁၀၄ ဒေါ်လာ ၅၉ ဆင့်သို့ ရောက်ရှိခဲ့သည်။ ဆော်ဒီအာရေးဘီးယား၏ အရှေ့-အနောက် ရေနံပိုက်လိုင်း ပန့်စက်ရုံများ တိုက်ခိုက်ခံရပြီးနောက် ပင်လယ်နီ ထွက်ပေါက်မှ ရေနံတင်ပို့မှုများ ခေတ္တရပ်ဆိုင်းသွားခဲ့သည်။ သို့သော်လည်း ယခုအခါ အိုမန်နိုင်ငံ စိုဟာ (Sohar) ဆိပ်ကမ်းအနီး၌ သင်္ဘောတစ်စင်းမှ တစ်စင်းသို့ ရေနံစိမ်း ပြောင်းရွှေ့တင်ဆောင်သည့် စနစ်ဖြင့် အာရှ ရေနံချက်စက်ရုံများသို့ တိုးမြှင့် တင်ပို့ပေးရန် ကမ်းလှမ်းထားခြင်း ဖြစ်သည်။ ဒါ့အပြင် လာမည့်သတင်းပတ်အတွင်း ကျင်းပမည်ဖြစ်သော အမေရိကန်-တရုတ် ထိပ်သီးဆွေးနွေးပွဲ မတိုင်မီ တင်းမာမှုများ လျော့ပါးလာနိုင်သည့် မျှော်လင့်ချက်များလည်း ရှိနေသည်။ အမေရိကန် စွမ်းအင်သတင်းအချက်အလက် အေဂျင်စီ (EIA) ၏ ရေနံစိမ်းလက်ကျန် လျှော့ပါးမှု နည်းပါးခဲ့သည့် အချက်အလက်များကလည်း ရေနံဈေး မြင့်တက်မှုကို ထိန်းချုပ်ပေးလျက် ရှိသည်။ #Brent

ပင်လယ်ကွေ့ အကျပ်အတည်း လျော့ကျလာသဖြင့် ရေနံစိမ်းဈေးကျ

ပင်လယ်ကွေ့ အကျပ်အတည်း လျော့ကျလာသဖြင့် ရေနံစိမ်းဈေးကျ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၇ ရက်။ ဆော်ဒီအာရေးဘီးယားနိုင်ငံက အိုမန်နိ…

  • September 17, 2026
ကနေဒါကို EU ၏ ပထမဆုံး ပူးတွဲအဖွဲ့ဝင်အဖြစ် ဖိတ်ခေါ်မှုအပေါ် အမေရိကန် သမ္မတ သတိပေး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၇ ရက်။ ဥရောပသမဂ္ဂ (EU) ၏ ပထမဆုံး "ပူးတွဲအဖွဲ့ဝင်" (Associate Member) အဖြစ် ကနေဒါနိုင်ငံအား လက်ခံရန် ဥရောပကော်မရှင် ဥက္ကဋ္ဌ အာဆူလာ ဗွန်ဒါလိုင်ယန် (Ursula von der Leyen) က ဖိတ်ခေါ်လိုက်သည်။ သို့သော်လည်း အဆိုပါ အရေးယူဆောင်ရွက်ချက်သည် ရန်လိုသည့် အပြုအမူ ဖြစ်နိုင်ကြောင်း အမေရိကန် သမ္မတ ဒေါ်နယ်ထရမ့်က တုံ့ပြန် သတိပေးလိုက်သည်။ အမေရိကန် သမ္မတ ဒေါ်နယ်ထရမ့်က အကယ်၍ ဥရောပသမဂ္ဂ၏ မူလရည်ရွယ်ချက်မှာ သဘောထား မှန်ကန်မှု မရှိပါက ဥရောပ သမဂ္ဂအပေါ် ပြင်းထန်သည့် ပို့ကုန်အခွန်များ တိုးမြှင့် စည်းကြပ်ခြင်း သို့မဟုတ် ကုန်သွယ်ရေး ပိတ်ပင်ခြင်းများ ပြုလုပ်သွားမည်ဟု သတိပေးခဲ့သည်။ ဥရောပပါလီမန် မိန့်ခွန်းအတွင်း အာဆူလာ ဗွန်ဒါလိုင်ယန်က ယင်းသို့ အဆိုပြုခဲ့ခြင်းဖြစ်ပြီး၊ အခမ်းအနားသို့ တက်ရောက်နေသည့် ကနေဒါ ဝန်ကြီးချုပ် မာခ် ကာနီ (Mark Carney) ကလည်း ပိုမိုခိုင်မာသည့် မဟာမိတ်အဖြစ် ပူးပေါင်းဆောင်ရွက်ရေး ကမ်းလှမ်းချက်ကို ကြိုဆိုခဲ့သည်။ ယခု ကမ်းလှမ်းမှုသည် အမေရိကန် သမ္မတ ဒေါ်နယ်ထရမ့် အုပ်ချုပ်ရေးအဖွဲ့ အပါအဝင် တရုတ်နိုင်ငံတို့နှင့် ကုန်သွယ်ရေးဆိုင်ရာ တင်းမာမှုများ ရင်ဆိုင်နေရချိန်၌ ထွက်ပေါ်လာခြင်း ဖြစ်သည်။ အမေရိကန်နှင့် ကုန်သွယ်ရေး ဆွေးနွေးပွဲများ ပျက်ပြားသွားခဲ့ပြီးနောက် ကနေဒါနိုင်ငံသည် လာမည့် ၁၀ နှစ်အတွင်း အမေရိကန် မဟုတ်သော အခြားနိုင်ငံများနှင့် ကုန်သွယ်မှုကို နှစ်ဆတိုးမြှင့်ရန် ကြိုးပမ်းလျက် ရှိသည်။ #Canada #EU

ကနေဒါကို EU ၏ ပထမဆုံး ပူးတွဲအဖွဲ့ဝင်အဖြစ် ဖိတ်ခေါ်မှုအပေါ် အမေရိကန် သမ္မတ သတိပေး

ကနေဒါကို EU ၏ ပထမဆုံး ပူးတွဲအဖွဲ့ဝင်အဖြစ် ဖိတ်ခေါ်မှုအပေါ် အမေရိကန် သမ္မတ သတိပေး သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၇ ရက်။ ဥရောပသ…

  • September 17, 2026
မူးယစ်ဆေးဝါး တိုက်ဖျက်ရန် ပျက်ကွက်သည့် နိုင်ငံစာရင်းတွင် မြန်မာအား အမေရိကန် ထည့်သွင်း သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၇ ရက်။ အမေရိကန် အိမ်ဖြူတော်က ထုတ်ပြန်သည့် နှစ်စဉ် မူးယစ်ဆေးဝါး ထိန်းချုပ်ရေးဆိုင်ရာ အစီရင်ခံစာ၌ မြန်မာနိုင်ငံသည် နိုင်ငံတကာ မူးယစ်ဆေးဝါး တိုက်ဖျက်ရေး သဘောတူညီချက်များကို လိုက်နာရန်နှင့် အမေရိကန်နှင့် ပူးပေါင်းဆောင်ရွက်ရန် ထိရောက်စွာ ကြိုးပမ်းမှု မရှိဘဲ ပျက်ကွက်ခဲ့သည့် နိုင်ငံများစာရင်းတွင် ထည့်သွင်းဖော်ပြထားသည်။ အဆိုပါ အစီရင်ခံစာတွင် မြန်မာနိုင်ငံသည် အာရှဒေသအတွင်း စိတ်ကြွရူးသွပ်ဆေးပြား (Methamphetamine) အများဆုံး ထုတ်လုပ်ဖြန့်ဖြူးသည့် အဓိက ရင်းမြစ်ဖြစ်ကြောင်း ထောက်ပြထားသည်။ တားမြစ်ဆေးဝါး မှောင်ခိုကူးသူများကို အရေးယူဆောင်ရွက်သည့် မြန်မာအစိုးရ၏ ကြိုးပမ်းချက်များမှာ မမှန်မကန်ဘဲ အားနည်းနေသေးကြောင်း သုံးသပ်ထားသည်။ သို့သော် မြန်မာနိုင်ငံ၏ မူးယစ်ဆေးဝါး တိုက်ဖျက်ရေး ဆောင်ရွက်ချက်အများစုကို အလွန်အမင်း အနုတ်သဘောဆောင်သည်ဟု သတ်မှတ်ထားသော်လည်း၊ အစိုးရ၏ အတိုင်းအတာတစ်ခုအထိ ကြိုးပမ်းမှုကြောင့် ဘိန်းစိုက်ပျိုးမှုမှာ ယခင် အမြင့်ဆုံးအဆင့်ထက် ၈၀ ရာခိုင်နှုန်းကျော်အထိ လျှော့ချနိုင်ခဲ့ကြောင်း အစီရင်ခံစာ၌ အသိအမှတ်ပြု ဖော်ပြထားသည်။ အမေရိကန် ကွန်ဂရက်၏ ဥပဒေအရ ပြုစုရသည့် ယင်းအစီရင်ခံစာတွင် ကမ္ဘာပေါ်၌ မူးယစ်ဆေးဝါး အဓိက ထုတ်လုပ်သည့် သို့မဟုတ် ဖြတ်သန်းသယ်ဆောင်သည့် နိုင်ငံ ၂၀ ကို အမည်ပျက်စာရင်း သတ်မှတ်ထားပြီး မြန်မာနိုင်ငံသည် ပူးပေါင်းဆောင်ရွက်ရန် သိသိသာသာ ပျက်ကွက်ခဲ့သည့် နိုင်ငံအဖြစ် ဖော်ပြခံခဲ့ရခြင်းဖြစ်သည်။ အမေရိကန် ဥပဒေအရ မူးယစ်တိုက်ဖျက်ရေး ပျက်ကွက်သည်ဟု သတ်မှတ်ခံရသည့် နိုင်ငံများသည် အမေရိကန်ထံမှ ကူညီထောက်ပံ့ငွေများ ဖြတ်တောက်ခံရမည့် အန္တရာယ်နှင့် ရင်ဆိုင်ရလေ့ရှိသည်။ သို့သော် အမေရိကန် သမ္မတအနေဖြင့် အမျိုးသား အကျိုးစီးပွား လိုအပ်ချက်ပေါ် မူတည်၍ အဆိုပါ အကူအညီ ပိတ်ဆို့မှု ပြစ်ဒဏ်များကို ကင်းလွှတ်ခွင့်ပြုနိုင်သည့် အာဏာရှိသည်။ #မူးယစ်ဆေးဝါးတိုက်ဖျက်ရေး #Methamphetamine

မူးယစ်ဆေးဝါး တိုက်ဖျက်ရန် ပျက်ကွက်သည့် နိုင်ငံစာရင်းတွင် မြန်မာအား အမေရိကန် ထည့်သွင်း

မူးယစ်ဆေးဝါး တိုက်ဖျက်ရန် ပျက်ကွက်သည့် နိုင်ငံစာရင်းတွင် မြန်မာအား အမေရိကန် ထည့်သွင်း သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၇ ရက်။ အ…

  • September 17, 2026
ရှမ်း-ကရင်နီအစပ်တွင် စစ်အုပ်စု လေကြောင်းမှ ဆက်တိုက်ဗုံးကြဲ၍ ပြည်သူများ စိုးရိမ်ထိတ်လန့်နေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၆ ရက်။ ရှမ်း-ကရင်နီနယ်စပ် မိုးဗြဲ-နန်းမယ်ခုံ-ဒီးမော့ဆို လမ်းကြောင်းတစ်လျှောက် စစ်အုပ်စုတပ်က စစ်ကြောင်းထိုး လာပြီးနောက် အရပ်သားများနေထိုင်ရာ ကျေးရွာများအထိ လေကြောင်းနှင့် ဒရုန်းများအသုံးပြုကာ ဆက်တိုက် ဗုံးကြဲ တိုက်ခိုက်နေသဖြင့် ဒေသခံပြည်သူများနှင့် စစ်ဘေးရှောင်များမှာ လုံခြုံရေးအတွက် စိုးရိမ်နေကြသည်။ ထိုသို့ လေကြောင်းရန် စိုးရိမ်ရသည့် အခြေအနေများကြောင့် ဒီးမော့ဆိုမြို့နယ် အနောက်ဘက်ခြမ်းရှိ စာသင် ကျောင်းများကို အရေးပေါ် ပိတ်ထားလိုက်ရသည်။ စက်တင်ဘာလ ၁၅ ရက်နေ့ နံနက် ၉ နာရီခွဲဝန်းကျင်တွင်လည်း ဒီးမော့ဆိုမြို့နယ် ပဆေးလာကျေးရွာဘက်သို့ တိုက်ပွဲဖြစ်ပွားခြင်းမရှိဘဲ စစ်အုပ်စုတပ်က ဂျက်ဖိုက်တာ (၂) စီးဖြင့် ဗုံး (၈) လုံးခန့် ကြဲချခဲ့သလို၊ ခလရ (၁၀၂) တပ်ရင်းကလည်း လက်နက်ကြီးများဖြင့် (၅) ကြိမ်ထက်မနည်း ပစ်ခတ်တိုက်ခိုက်ခဲ့သည်။ ထိုသို့ ရုတ်တရက် လေကြောင်းမှ ဝင်ရောက်တိုက်ခိုက်မှုကြောင့် စာမေးပွဲဖြေဆိုနေသည့် စစ်ဘေးရှောင် ကလေး ငယ်များနှင့် ဆရာ၊ ဆရာမများမှာ ဗုံးခိုကျင်းများထဲသို့ ဝင်ရောက်ပုန်းအောင်းခဲ့ကြရသည်။ “လေယာဉ်လာတဲ့အချိန်က ကျောင်းချိန်ဆိုတော့ အသံကြားတာနဲ့ ချက်ချင်း ကလေးတွေကို ဗုံးခိုကျင်းထဲ အရင် ပြေးခိုင်းရတယ်။ ပြီးမှ ခဏပြန်စောင့်ကြ။ လေယာဉ်ကလည်း ပျံတာ အရမ်းနိမ့်နိမ့်လေးပေါ့နော် အရမ်းနီး နီးကပ် ကပ်လေး ပျံတော့ အားလုံး အရမ်းကြောက်ကြတာ။ လေယာဉ်သံ ငြိမ်သွားတာနဲ့ ကလေးတွေ ပြန်ခိုင်း ပြီး ကျောင်းပိတ်ထားလိုက်ရတယ်” ဟု ဒီးမော့ဆို အနောက်ခြမ်းမှ ကျောင်းဆရာမတစ်ဦးက ပြောသည်။ လတ်တလောတွင် စစ်အုပ်စုတပ်သည် မိုးဗြဲမှတစ်ဆင့် နန်းမယ်ခုံမြို့ဘက်သို့ စစ်ကြောင်းထိုးလာနေပြီး ရှေ့ဆက် မတိုးနိုင်သည့်အဆုံး တိုက်ပွဲနှင့်မသက်ဆိုင်သည့် အရပ်သားပစ်မှတ်များကို ရည်ရွယ်ချက်ရှိရှိ တိုက်ခိုက်နေ ကြောင်း ဒေသခံများက ဆိုသည်။ ပြီးခဲ့သည့် စက်တင်ဘာလ ၁၄ ရက်နေ့ ညနေပိုင်းကလည်း နန်းမယ်ခုံမြို့နယ်အတွင်းရှိ ကျေးရွာတစ်ရွာကို အသေခံဒရုန်းဖြင့် တိုက်ခိုက်ခဲ့ရာ အရပ်သားထိခိုက်သေဆုံးမှု ရှိခဲ့သည်။ “ဒီရက်ပိုင်း လေကြောင်းရော၊ ဒရုန်းပါ တော်တော်စိပ်လာတယ်။ အမြဲတမ်းသတိထားနေရတယ်။ ကလေးတွေ အတွက်လည်း စိုးရိမ်ရသလို လူကြီးတွေလည်း တောင်ယာတို့လည်း သွားလို့မရဘူး။ ဘာမှ လုပ်ကိုင် စား သောက်လို့ရမဘူး။ နေ့ရော ညရော အမြဲသတိနဲ့ပဲနေနေရတယ်” ဟု စစ်ရှောင်တစ်ဦးက ပြောသည်။ ဒီးမော့ဆို အနောက်ဘက်ခြမ်းတွင် စစ်အုပ်စုတပ်၏ လက်နက်ကြီးနှင့် လေကြောင်းရန်ကြောင့် ကျောင်းများ မည်သည့်အချိန်တွင် ပြန်လည်ဖွင့်လှစ်နိုင်မည်ကို အတိအကျ မသိရသေးဘဲ စစ်ဘေးရှောင် ပြည်သူများအနေဖြင့် ဗုံးခိုကျင်းများ၌သာ သတိထားနေထိုင်ကြရန် ကူညီရေးအဖွဲ့များက တိုက်တွန်းထားသည်။ ယခု စက်တင်ဘာလအတွင်း စစ်အုပ်စုတပ်၏ လေကြောင်း၊ ဒရုန်းနှင့် လက်နက်ကြီး ပစ်ခတ်မှုများကြောင့် ဒီးမော့ဆို၊ လွိုင်ကော်နှင့် မော်ချီးဒေသ တစ်ကြောတွင် ကလေးငယ်များ အပါအဝင် အရပ်သားပြည်သူ အယောက် (၂၀) နီးပါးခန့် ထိခိုက်သေဆုံးခဲ့ရပြီး ဖြစ်ကြောင်း မြေပြင်သတင်းရင်းမြစ်များက ပြောသည်။ ဓါတ်ပုံ - (ဒီးမော့ဆို အနောက်ဘက်ခြမ်းတွင် စစ်အုပ်စု၏ လေကြောင်းရန်ကြောင့် ဘေးလွတ်ရာသို့ ထွက်ပြေးနေကြရသည့် စစ်ဘေးရှောင် ကလေးငယ်များ။ / Crd) #နန်းမယ်ခုံ #ဒီးမော့ဆို #မိုးဗြဲ

ရှမ်း-ကရင်နီအစပ်တွင် စစ်အုပ်စု လေကြောင်းမှ ဆက်တိုက်ဗုံးကြဲ၍ ပြည်သူများ စိုးရိမ်ထိတ်လန့်နေ

ရှမ်း-ကရင်နီအစပ်တွင် စစ်အုပ်စု လေကြောင်းမှ ဆက်တိုက်ဗုံးကြဲ၍ ပြည်သူများ စိုးရိမ်ထိတ်လန့်နေ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၆ ရက်။ …

  • September 16, 2026
ဂျပန်တွင် အသက် ၁၀၀ ကျော် သက်ကြီးရွယ်အို ၁ သိန်းကျော်လာ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၆ ရက်။ ဂျပန်နိုင်ငံ၏ အသက် ၁၀၀ နှင့်အထက် သက်ကြီးရွယ်အို ဦးရေမှာ သမိုင်းတွင် ပထမဆုံးအကြိမ်အဖြစ် ၁၀၇,၆၇၇ ဦးအထိ စံချိန်တင် မြင့်တက်လာကြောင်း ကျန်းမာရေး ဝန်ကြီးဌာနက ထုတ်ပြန်သည်။ ၎င်းတို့အနက် ၈၈ ရာခိုင်နှုန်းမှာ အမျိုးသမီးများ ဖြစ်ကြပြီး၊ အသက်အကြီးဆုံး အဘွားမှာ ကျိုတိုမြို့မှ အသက် ၁၁၄ နှစ်အရွယ် ဖုယို ကိရှိမိုတို (Kishimoto Fuyo) ဖြစ်ကာ အသက်အကြီးဆုံး အဘိုးမှာ ခူမာမိုတိုမြို့မှ အသက် ၁၁၂ နှစ်အရွယ် ဟိခါရု ခါတိုး (Kato Hikaru) ဖြစ်သည်။ ဂျပန်ပြည်သူများ သက်ရှည်ကျန်းမာခြင်းမှာ ငါး၊ ဟင်းသီးဟင်းရွက်နှင့် ဆန်တို့ကို အဓိကထားသည့် အစားအသောက်ပုံစံ၊ တက်ကြွသည့် လူနေမှုဘဝနှင့် နည်းပညာ၊ ဆေးဝါးကုသမှု တိုးတက်မှုများကြောင့် ဖြစ်သည်။ သို့သော် အခြားတစ်ဖက်တွင် ဂျပန်နိုင်ငံ၏ ကလေးမွေးဖွားနှုန်းမှာ ၁.၁၄ အထိ စံချိန်တင် ကျဆင်းလျက်ရှိရာ၊ အသက် ၁၀၀ ကျော်သူဦးရေ စံချိန်တင် များပြားလာခြင်းနှင့်အတူ တိုင်းပြည်၏ လူမှုဖူလုံရေးစနစ်ကို ရေရှည်ထိန်းသိမ်းရေးမှာ အစိုးရအတွက် အဓိက စိန်ခေါ်မှုတစ်ရပ် ဖြစ်လာနေသည်။ #Kishimoto_Fuyo #Kato_Hikaru

ဂျပန်တွင် အသက် ၁၀၀ ကျော် သက်ကြီးရွယ်အို ၁ သိန်းကျော်လာ

ဂျပန်တွင် အသက် ၁၀၀ ကျော် သက်ကြီးရွယ်အို ၁ သိန်းကျော်လာ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၆ ရက်။ ဂျပန်နိုင်ငံ၏ အသက် ၁၀၀ နှင့်အထက်…

  • September 16, 2026
ဥရောပ လေပိုင်နက်အတွင်း ရုရှားဒရုန်းများ ကျူးကျော်ဝင်ရောက်မှုများလာနေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၆ ရက်။ နေတိုးနှင့် ဥရောပသမဂ္ဂ အဖွဲ့ဝင်နိုင်ငံများဖြစ်ကြသည့် လစ်သူယေးနီးယားနှင့် မော်ဒိုဗာနိုင်ငံတို့၏ လေပိုင်နက်အတွင်း ရုရှားဒရုန်းများ ဆက်တိုက် ကျူးကျော်ဝင်ရောက်မှုများ ဖြစ်ပွားခဲ့သည်ဟု ရိုက်တာ သတင်းတစ်ရပ်တွင် ဖော်ပြသည်။ ဘီလာရုစ်နိုင်ငံဘက်မှ လစ်သူယေးနီးယား လေပိုင်နက်အတွင်း ဝင်ရောက်လာသည့် ရုရှားဒရုန်းတစ်စင်းကို နေတိုးမဟာမိတ် အီတလီ တိုက်လေယာဉ်က ပစ်ချရှင်းလင်းခဲ့သည်။ အလားတူ ယူကရိန်းသမ္မတ ဇယ်လန်းစကီး မော်ဒိုဗာနိုင်ငံ၌ ရှိနေစဉ်အတွင်း ရုရှားဒရုန်းများက မော်ဒိုဗာ လေပိုင်နက်အတွင်းသို့ ၂ ကြိမ်တိုင်တိုင် ကျူးကျော်ဝင်ရောက်ခဲ့ကြောင်း သမ္မတ ဇာလန်းစကီးက အမေရိကန် သတင်းဌာနတစ်ခုသို့ ထုတ်ဖော်ပြောကြားခဲ့သည်။ စက်တင်ဘာ ၉ ရက်က နော်ဝေနိုင်ငံသို့ အသွားနှင့် ကနေဒါနိုင်ငံမှ အပြန် မော်ဒိုဗာနိုင်ငံ ခီဆီနောင် လေဆိပ်ကို ဖြတ်သန်းစဉ် ယင်းသို့ လေပိုင်နက် ကျူးကျော်မှုများ ဖြစ်ပွားခဲ့ခြင်းဖြစ်သည်။ ထို့ပြင် နေတိုးအဖွဲ့ဝင် ပိုလန်နိုင်ငံ နယ်စပ်အနီးရှိ ယူကရိန်း ခရီးသည်တင် ရထားတစ်စင်းကိုလည်း ရုရှားဒရုန်းက ပစ်ခတ်တိုက်ခိုက်ခဲ့သော်လည်း လူထိခိုက်ဒဏ်ရာရရှိမှု မရှိဟု ဆိုသည်။

ဥရောပ လေပိုင်နက်အတွင်း ရုရှားဒရုန်းများ ကျူးကျော်ဝင်ရောက်မှုများလာနေ

ဥရောပ လေပိုင်နက်အတွင်း ရုရှားဒရုန်းများ ကျူးကျော်ဝင်ရောက်မှုများလာနေ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၁၆ ရက်။ နေတိုးနှင့် ဥရောပသ…

  • September 16, 2026
အီရန်စစ်ပွဲတွင် အမေရိကန် စစ်စရိတ် ဒေါ်လာ ၃၈ ဘီလီယံအထိ မြင့်တက်လာ သတင်းနှင့် မီဒီယာ ကွန်ရက် ၂၀၂၆ ခုနှစ်၊ စက်တင်ဘာလ ၁၆ ရက်။ အမေရိကန်နှင့် အီရန်တို့ကြား ဖြစ်ပွားနေသည့် ၆ လတာ စစ်ပွဲအတွင်း အမေရိကန်အစိုးရ၏ စစ်စရိတ် ကုန်ကျမှုမှာ ဒေါ်လာ ၃၈ ဘီလီယံအထိ ရှိလာကြောင်း ကွန်ဂရက် ဘတ်ဂျက်ရုံး (CBO) က ထုတ်ပြန်ခဲ့သည်။ ဩဂုတ်လ ၁ ရက်အထိ စာရင်းများအရ စစ်စရိတ်မှာ တစ်လလျှင် ဒေါ်လာ ၃ ဘီလီယံနှုန်း ပုံမှန် တိုးမြင့်လျက်ရှိပြီး၊ ၂၀၂၇ ခုနှစ် ပထမသုံးလပတ်တွင် အမေရိကန်၏ ငွေကြေးဖောင်းပွမှု နှုန်းထား ဝ.၅ ရာခိုင်နှုန်းအထိ ထပ်မံ မြင့်တက်လာနိုင်ကြောင်း CBO က သတိပေးထားသည်။ စစ်ပွဲအတွင်း ကုန်ခန်းသွားသည့် စစ်လက်နက်ပစ္စည်းများကို မူလအတိုင်း ပြန်လည်ဖြည့်တင်းရန် အနည်းဆုံး ၅ နှစ်ခန့် အချိန်ယူရမည်ဖြစ်သဖြင့် ထိုင်ဝမ်အရေး အပါအဝင် အခြားသော ဒေသတွင်း ပဋိပက္ခများကို တုံ့ပြန်နိုင်စွမ်း လော့ကျသွားနိုင်ကြောင်း သုံးသပ်ထားသည်။ ပင်တာဂွန် စစ်ဌာနချုပ်အနေဖြင့် စစ်လက်နက် ဖြည့်တင်းရေးအတွက် အရေးပေါ် ဘတ်ဂျက် ဒေါ်လာ ၉၀ ဘီလီယံနီးပါး တောင်းခံထားသည်။ ထို့ပြင် အီရန်၏ ဒရုန်းနှင့် ဒုံးကျည် တိုက်ခိုက်မှုများကြောင့် ဆော်ဒီအာရေဗျ၊ ကူဝိတ်၊ ဘာရိန်း၊ ကာတာနှင့် ဂျော်ဒန်နိုင်ငံတို့ရှိ အမေရိကန် စစ်အခြေစိုက်စခန်းများ အကြီးအကျယ် ပျက်စီးခဲ့သည်။ စုံစမ်းထောက်လှမ်းရေး လေယာဉ်ကြီးတစ်စင်း အပါအဝင် လေယာဉ် ၆၀ နီးပါးနှင့် အဆောက်အအုံများ၊ ယာဉ်များ ပျက်စီးခဲ့ပြီး စုစုပေါင်း ဆုံးရှုံးမှုတန်ဖိုး ဒေါ်လာ ၃.၇ ဘီလီယံဖိုးခန့် ရှိကြောင်း စစ်ဘက်ဆိုင်ရာ အစီရင်ခံစာများတွင် ဖော်ပြထားသည်။ Photo:Seaman Andrew Eggert/Reuters #အီရန် #အမေရိကန်စစ်ပွဲ

အီရန်စစ်ပွဲတွင် အမေရိကန် စစ်စရိတ် ဒေါ်လာ ၃၈ ဘီလီယံအထိ မြင့်တက်လာ

အီရန်စစ်ပွဲတွင် အမေရိကန် စစ်စရိတ် ဒေါ်လာ ၃၈ ဘီလီယံအထိ မြင့်တက်လာ သတင်းနှင့် မီဒီယာ ကွန်ရက်၂၀၂၆ ခုနှစ်၊ စက်တင်ဘာလ ၁၆ ရက်။ အမေရိကန်နှင့် အီရန်တို့…

  • September 16, 2026
ဇနီးဖြစ်သူအား ဆေးခတ်၍ နှစ် ၂၀ ကြာ ပြုကျင့်ခဲ့သူ ဗြိတိန်အမျိုးသား အပြစ်ရှိကြောင်း ဝန်ခံ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၅ ရက်။ ဗြိတိန်နိုင်ငံတွင် အသက် ၆၀ အရွယ် ခင်ပွန်းဖြစ်သူသည် ဇနီးဖြစ်သူအား နှစ် ၂၀ ကျော်ကြာ ဆေးခတ်၍ အဓမ္မပြုကျင့်မှု၊ လိင်ပိုင်းဆိုင်ရာ စော်ကားမှု အပါအဝင် စွပ်စွဲချက်ပေါင်း ၆၀ စလုံးအတွက် အပြစ်ရှိကြောင်း တရားရုံး၌ အပြည့်အဝ ဝန်ခံလိုက်သည်။ မန်ချက်စတာမြို့ တရားရုံး ကြားနာပွဲ၌ စတော့ပို့တ် (Stockport) ဒေသမှ အဆိုပါ အမျိုးသားသည် ၂၀၀၄ ခုနှစ်မှ ၂၀၂၅ ခုနှစ် အောက်တိုဘာလအထိ နေအိမ်၌ ဇနီးဖြစ်သူအား သတိလစ် မေ့မောစေရန် ဆေးခတ်ကာ မုဒိမ်းကျင့်မှု၊ မုဒိမ်းကျင့်ရန် ကြိုးပမ်းမှုနှင့် လိင်ပိုင်းဆိုင်ရာ စော်ကားမှုများကို ကျူးလွန်ခဲ့ကြောင်း ဝန်ခံခဲ့ခြင်းဖြစ်သည်။ နစ်နာသူ၏ အထောက်အထား မပေါ်လွင်စေရန် ဗြိတိန်ဥပဒေအရ တရားခံ၏ အမည်ကို ထုတ်ဖော်ဖော်ပြခြင်း မရှိပေ။ တရားခွင်၌ ဇနီးဖြစ်သူ တက်ရောက်နေချိန်တွင် ခင်ပွန်းဖြစ်သူက မျက်ရည်ကျလျက် ပြစ်မှုများကို ဝန်ခံခဲ့သည်။ အဆိုပါ အမျိုးသမီးအပေါ် လိင်ပိုင်းဆိုင်ရာ ပြစ်မှုကျူးလွန်ကြောင်း စွပ်စွဲခံထားရသူ အခြား အမျိုးသား ၁၂ ဦးကမူ စွပ်စွဲချက်များကို ငြင်းဆိုထားသည်။ ဂရိတ်တာ မန်ချက်စတာ ရဲတပ်ဖွဲ့က နစ်နာသူအား အထူးကူညီစောင့်ရှောက်ပေးလျက်ရှိပြီး ဆေးခတ်၍ လိင်ပိုင်းဆိုင်ရာ စော်ကားခံရသည့် မသင်္ကာဖွယ်ရာများရှိပါက တိကျသည့် သက်သေ သို့မဟုတ် မှတ်ဉာဏ်အတိအကျ မရှိသေးလျှင်ပင် ရဲတပ်ဖွဲ့ထံ အကြောက်အရွံ့မရှိ သတင်းပို့ တိုင်ကြားကြရန် တိုက်တွန်းထားသည်။ Photo:Reuters

ဇနီးဖြစ်သူအား ဆေးခတ်၍ နှစ် ၂၀ ကြာ ပြုကျင့်ခဲ့သူ ဗြိတိန်အမျိုးသား အပြစ်ရှိကြောင်း ဝန်ခံ

ဇနီးဖြစ်သူအား ဆေးခတ်၍ နှစ် ၂၀ ကြာ ပြုကျင့်ခဲ့သူ ဗြိတိန်အမျိုးသား အပြစ်ရှိကြောင်း ဝန်ခံ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၅ ရက်။ …

  • September 15, 2026
အသက် ၁၅ နှစ်အောက် ကလေးများ ဆိုရှယ်မီဒီယာနှင့် AI Chat Bot သုံးစွဲခွင့် အီးယူ တားမြစ်မည် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၅ ရက်။ ဥရောပသမဂ္ဂ (EU) သည် ကလေးသူငယ်များကို အွန်လိုင်း ဘေးအန္တရာယ်နှင့် စွဲလမ်းစေမှုများမှ ကာကွယ်ရန် အသက် ၁၅ နှစ်အောက် ကလေးငယ်များ ဆိုရှယ်မီဒီယာ၊ ဗီဒီယိုမျှဝေရေး ပလက်ဖောင်း၊ AI ချတ်ဘော့နှင့် အွန်လိုင်းဂိမ်း သုံးစွဲခွင့် ပိတ်ပင်မည့် "EU Kids Act" ဥပဒေကြမ်းကို တင်သွင်းရန် ပြင်ဆင်လျက်ရှိသည်။ ဥရောပကော်မရှင်က တင်သွင်းမည့် ဥပဒေကြမ်းအသစ်အရ နည်းပညာကုမ္ပဏီများသည် ကလေးသူငယ်များ၏ အသက်အရွယ်အလိုက် သုံးစွဲခွင့်ကို တင်းကျပ်စွာ ကန့်သတ်ရမည်ဖြစ်သည်။ အသက် ၃ နှစ်အောက်ကလေးများ မှာ ဒစ်ဂျစ်တယ် ဝန်ဆောင်မှုများ အသုံးပြုခွင့် လုံးဝ မရှိပါ။ အသက် ၃ နှစ်မှ ၁၂ နှစ်ကြားကလေးများကမူ မိဘများ၏ အပြည့်အဝ ကြီးကြပ်မှုအောက်၌ ကလေးသူငယ်များနှင့် သင့်လျော်သော ဝန်ဆောင်မှုများကိုသာ သုံးစွဲခွင့်ပြုမည်။ အသက် ၁၃ နှစ်မှ ၁၄ နှစ်ကြားကလေးများကို မိဘများ၏ ခွင့်ပြုချက်ဖြင့် အချိန်နှင့် ထိတွေ့ဆက်ဆံမှု အကန့်အသတ်ရှိသော မိတ်ဆက်အကောင့် (Introductory accounts) များကိုသာ အသုံးပြုခွင့်ပေးမည်။ အသက် ၁၅ နှစ်နှင့်အထက်ကလေးများကတော့ ကိုယ်ပိုင်အကောင့်များ သီးသန့်ဖွင့်လှစ် အသုံးပြုနိုင်မည်ဖြစ်သည်။ ယင်းဥပဒေကြမ်းအရ Facebook၊ TikTok နှင့် Google အပါအဝင် နည်းပညာကုမ္ပဏီများသည် ကလေးသူငယ်များ အကောင့်ဖွင့်လှစ်ရာ၌ အသက်စိစစ်သည့်စနစ် (Age verification) မဖြစ်မနေ ထည့်သွင်းရမည်ဖြစ်သည်။ ထို့ပြင် စွဲလမ်းစေသည့် ဒီဇိုင်းများနှင့် အန္တရာယ်ရှိသော အကြောင်းအရာများ မပေါ်လွင်စေရန် ဆောင်ရွက်ရမည်ဖြစ်ပြီး စည်းကမ်းထိန်းသိမ်းရေးဆိုင်ရာ ကြီးကြပ်ကြေးများကိုလည်း ပေးဆောင်ရမည်ဖြစ်သည်။ Photo: Håkon Mosvold Larsen / NTB

အသက် ၁၅ နှစ်အောက် ကလေးများ ဆိုရှယ်မီဒီယာနှင့် AI Chat Bot သုံးစွဲခွင့် အီးယူ တားမြစ်မည်

အသက် ၁၅ နှစ်အောက် ကလေးများ ဆိုရှယ်မီဒီယာနှင့် AI Chat Bot သုံးစွဲခွင့် အီးယူ တားမြစ်မည် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၅ ရက်။ …

  • September 15, 2026
×Close