ကနေဒါ – Network Media Group

Tag: ကနေဒါ

ကနေဒါ ရေငုပ်သင်္ဘောသစ် စီမံကိန်းတွင် ဗြိတိန်နှင့် နော်ဝေနိုင်ငံတို့ ပါဝင်နိုင်ရန် ကြိုးစား သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၁၂ ရက်။ ကနေဒါရေတပ်၏ အမေရိကန်ဒေါ်လာ ၄၀ ဘီလီယံတန်ဖိုးရှိ ရေငုပ်သင်္ဘောသစ် ၁၂ စင်း တည်ဆောက်ရေးစီမံကိန်း (CPSP) တွင် ဗြိတိန်နှင့် နော်ဝေနိုင်ငံတို့ ပူးပေါင်းပါဝင်လာသည်။ ဗြိတိန်၏ Babcock International ကုမ္ပဏီသည် တောင်ကိုရီးယား၏ Hanwha Ocean နှင့် မဟာမိတ်ဖွဲ့ကာ တင်ဒါဝင်ရောက်ခဲ့ပြီး၊ ဂျာမနီ၏ TKMS ကုမ္ပဏီဘက်တွင်မူ နော်ဝေနိုင်ငံက နည်းပညာပိုင်းဆိုင်ရာ ပူးပေါင်းဆောင်ရွက်လျက်ရှိသည်။ အဆိုပါစီမံကိန်းသည် ကနေဒါနိုင်ငံ၏ ဟောင်းနွမ်းနေပြီဖြစ်သော Victoria-class ရေငုပ်သင်္ဘောများနေရာတွင် ခေတ်မီ ဒီဇယ်-လျှပ်စစ် ရေငုပ်သင်္ဘောများဖြင့် အစားထိုးရန်ဖြစ်သည်။ ကိုရီးယားကုမ္ပဏီများဖြစ်သော Hanwha နှင့် Hyundai တို့က ၎င်းတို့၏ ရေငုပ်သင်္ဘောများကို ဝယ်ယူပါက ကနေဒါထံမှ သံမဏိနှင့် ရေနံစိမ်းများကို ပြန်လည်ဝယ်ယူမည့်အပြင်၊ ဟိုက်ဒရိုဂျင်နှင့် ဂြိုဟ်တုနည်းပညာရပ်ဝန်းများတွင်လည်း ရင်းနှီးမြှုပ်နှံမှုများ ပြန်လည်ပြုလုပ်ပေးမည်ဟု အခွင့်အလမ်းများ ကမ်းလှမ်းထားသည်။ #ကနေဒါရေငုပ်သင်္ဘောသစ်စီမံကိန်း #နော်ဝေ #ဗြိတိန်

ကနေဒါ ရေငုပ်သင်္ဘောသစ် စီမံကိန်းတွင် ဗြိတိန်နှင့် နော်ဝေနိုင်ငံတို့ ပါဝင်နိုင်ရန် ကြိုးစား

ကနေဒါက အိန္ဒိယကို နျူကလီးယား စွမ်းအင်အတွက် ယူရေနီယံကို ၁၀ နှစ်ကြာ ထောက်ပံ့မည် သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ မတ်လ ၃ ရက်။ အိန္ဒိယနဲ့ ကနေဒါနိုင်ငံတို့အကြား နှစ်ရှည်လများ တင်းမာနေသည့် ဆက်ဆံရေးကို ပြန်လည်ကုစားပြီး "သမိုင်းဝင် နျူကလီးယားစွမ်းအင်ဆိုင်ရာ သဘောတူညီချက်" အပါအဝင် ကဏ္ဍစုံ ပူးပေါင်းဆောင်ရွက်ရန် မတ်လ ၂ ရက်နေ့တွင် လက်မှတ်ရေးထိုးလိုက်သည်။ ကနေဒါဝန်ကြီးချုပ် မာ့ခ် ကာနေး (Mark Carney) နှင့် အိန္ဒိယဝန်ကြီးချုပ် နရင်ဒရာ မိုဒီ (Narendra Modi) တို့ နယူးဒေလီမြို့တွင် တွေ့ဆုံခဲ့ကြခြင်း ဖြစ်သည်။ အိန္ဒိယကို ၁၀ နှစ်ကြာ ယူရေနီယံ (Uranium) ထောက်ပံ့ပေးမည့် သမိုင်းဝင် သဘောတူညီချက်ကို ရရှိခဲ့ကြသည်။ ထို့အပြင် အဆင့်မြင့် နျူကလီးယား ဓာတ်ပေါင်းဖို နည်းပညာများတွင် လည်း ပူးပေါင်းလုပ်ဆောင်သွားရန် သဘောတူထားကြသည်။ ယခင် ကနေဒါ ဝန်ကြီးချုပ် ဂျပ်စတင် ထရူးဒိုး လက်ထက်က ဆစ်ခ်ခွဲထွက်ရေးခေါင်းဆောင် လုပ်ကြံခံရမှုနှင့် ပတ်သက်ပြီး ဖြစ်ပွားခဲ့သည့် သံတမန်ရေး တင်းမာမှုများကို အဆုံးသတ်ရန် ကြိုးစားခဲ့ကြခြင်းလည်း ဖြစ်သည်။ ထို့အပြင် ၂၀၂၆ ခုနှစ် အကုန်တွင် လွတ်လပ်သော ကုန်သွယ်မှု သဘောတူညီချက် (Free Trade Deal) ကို အပြီးသတ်ရန် ရည်မှန်းထားသည်။ ကနေဒါ အိန္ဒိယ ဆက်ဆံရေးသည် အမေရိကန် သမ္မတ ထရမ့်ရဲ့ အခွန်တိုးမြှင့်မှု (Tariffs) များ ကြောင့် ဖြစ်လာမည့် စီးပွားရေး ရိုက်ခတ်မှုများကို လျှော့ချရန် နှစ်နိုင်ငံလုံးက ကြိုးစားခြင်းလည်း ဖြစ်သည်။ AI (ဉာဏ်ရည်တု)၊ စက်မှုနည်းပညာ၊ အာကာသ၊ ကာကွယ်ရေးနှင့် ပညာရေး ကဏ္ဍများတွင်လည်း ပူးပေါင်းဆောင်ရွက်သွားရန် သဘောတူခဲ့ကြသည်။ ကနေဒါနှင့် အိန္ဒိယနှစ်နိုင်ငံစလုံးမှာ အမေရိကန်၏ ကုန်သွယ်ရေးဖိအားများကို ခံနေရသောကြောင့် အချင်းချင်း မဟာမိတ်ပြန်လုပ်ပြီး "အမေရိကန်အပေါ် အားကိုးရမှု လျှော့ချရန်" ကြိုးစားလာခြင်းလည်း ဖြစ်သည်။ #ကနေဒါ #အိန္ဒိယ #ယူရေနီယံ #နျူကလီးယား

ကနေဒါက အိန္ဒိယကို နျူကလီးယား စွမ်းအင်အတွက် ယူရေနီယံကို ၁၀ နှစ်ကြာ ထောက်ပံ့မည်

ကြယ်ငါးပွင့် အဆင့် သက်တောင့်သက်သာရှိစေမည်ဆိုက တောင်ကိုရီးယားက ကနေဒါကို ရေငုတ်သင်္ဘောရောင်းရန် ကမ်းလှမ်း သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၃၀ ရက်။ တောင်ကိုရီးယားနိုင်ငံက ကြယ်ငါးပွင့် အဆင့် သက်တောင့်သက်သာရှိမည့် ဒီဇိုင်း ထည့်သွင်းပေးမည်ဟု ဆိုကာ ကနေဒါက လိုအပ်နေသော ရေငုတ်သင်္ဘောများ ရောင်းချရန် ကမ်းလှမ်းလိုက်သည်။ ကနေဒါရေတပ်သည် ၁၉၉၀ ပြည့်လွန်နှစ်များကတည်းက အသုံးပြုခဲ့သော ဟောင်းနွမ်းနေသည့် ရေငုပ်သင်္ဘောများနေရာတွင် အစားထိုးရန်အတွက် အမေရိကန်ဒေါ်လာ (၁၂) ဘီလီယံကျော် တန်ဖိုးရှိသည့် ဒီဇယ်စွမ်းအင်သုံး တိုက်ခိုက်ရေးရေငုပ်သင်္ဘော (၁၂) စီး ဝယ်ယူရေးစီမံကိန်းကို ပြင်ဆင်လျက်ရှိသည်။ ယင်းစီမံကိန်းတွင် တောင်ကိုရီးယားနိုင်ငံက ၎င်းတို့၏ ရေငုပ်သင်္ဘောများကို "ကြယ်ငါးပွင့်ဟိုတယ်" အဆင့် သက်တောင့်သက်သာရှိစေမည့် ဒီဇိုင်းများဖြင့် ထည့်သွင်းတည်ဆောက်ပေးမည်ဟု ဆိုကာ တင်ဒါအောင်မြင်ရန် ကမ်းလှမ်းလာခဲ့သည်။ တောင်ကိုရီးယား သမ္မတ၏ စီမံကိန်းညွှန်ကြားရေးမှူးချုပ် ကန်ဟွန်းဆစ် (Kang Hoon-sik) ဦးဆောင်သောအဖွဲ့သည် ကနေဒါနိုင်ငံသို့ သွားရောက်၍ စည်းရုံးလှုံ့ဆော်မှုများ ပြုလုပ်ခဲ့သည်။ တောင်ကိုရီးယားက ၎င်းတို့၏ ရေငုပ်သင်္ဘောများကို "မိမိတို့၏ သားသမီးများ ကိုယ်တိုင်စီးနင်းမည့် သင်္ဘောကဲ့သို့ အန္တရာယ်ကင်းရှင်းရမည်ဖြစ်ပြီး သက်တောင့်သက်သာ နားနားနေနေ ရှိရမည်" ဟူသော စိတ်ဓာတ်ဖြင့် တည်ဆောက်ထားကြောင်း နှိုင်းယှဉ်တင်ပြခဲ့သည်။ ဤစီမံကိန်းသည် လက်နက်ဝယ်ယူရေးသက်သက်မဟုတ်ဘဲ ရေရှည်စက်မှုကဏ္ဍ ပူးပေါင်းဆောင်ရွက်ရေးကိုပါ ရည်ရွယ်သည်။ တောင်ကိုရီးယား၏ နာမည်ကြီး Hanwha နှင့် Hyundai ကုမ္ပဏီကြီးများသည် ကနေဒါကုမ္ပဏီများနှင့်အတူ AI နည်းပညာ၊ ဂြိုဟ်တုနှင့် အာရုံခံစနစ် (Sensor) ဆိုင်ရာ သဘောတူညီချက် (၆) ခုကို လက်မှတ်ရေးထိုးခဲ့ပြီး ကနေဒါနိုင်ငံတွင် အလုပ်အကိုင်ပေါင်း (၂၀,၀၀၀) ခန့် ဖန်တီးပေးရန် ကတိပြုထားသည်။ လက်ရှိတွင် တောင်ကိုရီးယားသည် ဤစီမံကိန်းအတွက် ဂျာမနီနိုင်ငံ၏ Thyssenkrupp (TKMS) ကုမ္ပဏီနှင့် ယှဉ်ပြိုင်နေရသည်။ အကယ်၍ တောင်ကိုရီးယားအနေဖြင့် ဤတင်ဒါကို အောင်မြင်ခဲ့ပါက ၎င်းတို့နိုင်ငံအတွက် အကြီးမားဆုံးသော အနောက်နိုင်ငံဈေးကွက် (NATO ဈေးကွက်) သို့ အလုံးအရင်းဖြင့် ထိုးဖောက်ဝင်ရောက်နိုင်မည့် သမိုင်းမှတ်တိုင်တစ်ခု ဖြစ်လာမည်ဖြစ်သည်။

ကြယ်ငါးပွင့် အဆင့် သက်တောင့်သက်သာရှိစေမည်ဆိုက တောင်ကိုရီးယားက ကနေဒါကို ရေငုတ်သင်္ဘောရောင်းရန် ကမ်းလှမ်း

မြန်မာစစ်တပ်အပေါ် ပိတ်ဆို့မှုများ ပြန်လည်စတင်ရန် ဗြိတိန်ကို တိုက်တွန်း သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၁၆ ရက်။ ဗြိတိန်အစိုးရအား မြန်မာစစ်တပ်အပေါ် ပိတ်ဆို့အရေးယူမှုများ ပြန်လည်စတင်ရန် Burma Campaign UK ထုတ်ပြန် တောင်းဆိုလိုက်သည်။ ဗြိတိန်အစိုးရသည် မြန်မာစစ်တပ်ထံ စီးဝင်နေသော ဝင်ငွေ၊ လက်နက်နှင့် စစ်ပစ္စည်းများကို ဖြတ်တောက်ရန် ပုံမှန်အရေးယူမှုများ ပြန်လည်ချမှတ်ရန် Burma Campaign UK က အောက်တိုဘာလ ၁၅ ရက်နေ့တွင် တောင်းဆိုလိုက်ခြင်း ဖြစ်သည်။ ဗြိတိန်အစိုးရက မြန်မာစစ်တပ်အပေါ် နောက်ဆုံးအကြိမ် ပစ်မှတ်ထားအရေးယူမှု ပြုလုပ်ခဲ့သည်မှာ ၂၀၂၄ ခုနှစ်၊ အောက်တိုဘာလ ၂၉ ရက်နေ့ နောက်ပိုင်းဖြစ်သဖြင့် တစ်နှစ်နီးပါး ကြာမြင့်ခဲ့ပြီ ဖြစ်ကြောင်း Burma Campaign UK က ထောက်ပြသည်။ ၂၀၂၁ ခုနှစ်တွင် မြန်မာနိုင်ငံ၌ စစ်အာဏာသိမ်းပြီးနောက်ပိုင်း ဗြိတိန်အစိုးရနှင့် မဟာမိတ်များသည် စစ်တပ်၏ လူ့အခွင့်အရေး ချိုးဖောက်မှုများနှင့် နိုင်ငံတကာ ဥပဒေ ချိုးဖောက်မှုများကို လျှော့ချနိုင်ရန်အတွက် ဝင်ငွေ၊ လက်နက်နှင့် စစ်ပစ္စည်းရင်းမြစ်များကို စနစ်တကျ ပစ်မှတ်ထား၍ အရေးယူရန် မူဝါဒကို ချမှတ်ခဲ့ပြီး ကမ္ဘာကို ဦးဆောင်ခဲ့သည်။ သို့သော်လည်း လက်ရှိတွင် ဗြိတိန်၏ အရေးယူဆောင်ရွက်မှုနှုန်းသည် ရပ်တန့်လုနီးပါး ဖြစ်နေပြီး အမေရိကန် (USA)၊ ဥရောပသမဂ္ဂ (EU)၊ ကနေဒါနှင့် သြစတြေးလျတို့ ချမှတ်ထားသည့် အရေးယူမှုများအားလုံးကိုပင် လိုက်မီခြင်း မရှိတော့ကြောင်း Burma Campaign UK က ဝေဖန်ခဲ့သည်။ ဗြိတိန်အစိုးရသည် မြန်မာစစ်တပ်အပေါ် ငါးနှစ်နီးပါးအတွင်း အရေးယူခဲ့သည့် ပမာဏထက် ရုရှားအပေါ် တစ်ရက်တည်းတွင် ပိုမိုအရေးယူမှုများ ပြုလုပ်ခဲ့သည်ဟုလည်း ၎င်းတို့က ထောက်ပြသည်။ Burma Campaign UK ၏ ဒါရိုက်တာ မာ့ခ် ဖာမာနာ (Mark Farmaner) က “၂၀၂၁ အာဏာသိမ်းပြီးနောက် ဗြိတိန်အစိုးရဟာ မြန်မာစစ်တပ်ကို ပစ်မှတ်ထား အရေးယူရာမှာ ကမ္ဘာကို ဦးဆောင်ခဲ့တယ်။ အခုတော့ သူတို့ကိုယ်တိုင်တောင် နောက်ကနေ လိုက်မလုပ်နိုင်တော့ဘူး” ဟု ပြောကြားသည်။ “မြန်မာပြည်သူတွေဟာ စစ်အုပ်ချုပ်ရေးကို ခုခံဖို့ သူတို့တတ်နိုင်သမျှ အရာအားလုံး လုပ်ဆောင်နေချိန်မှာ၊ ကျွန်တော်တို့ အနည်းဆုံးလုပ်နိုင်တာက စစ်တပ်ဆီကို ရောက်နေတဲ့ ငွေကြေးနဲ့ လက်နက်တွေကို လျှော့ချဖို့ပါ ပဲ” ဟု ၎င်းက ဆက်ပြောသည်။ ဗြိတိန်အစိုးရ၏ အရေးယူမှုများ ဆက်လက်မချမှတ်ခြင်းသည် လာမည့် ဒီဇင်ဘာလတွင် ပြုလုပ်ရန် စီစဉ်ထား သည့် ရွေးကောက်ပွဲ ဟန်ဆောင်ပွဲ (sham elections) မတိုင်မီ တိုက်ခိုက်မှုများကို တိုးမြှင့်နေသော မြန်မာစစ်တပ်အား အားပေးရာရောက်ပြီး စစ်တပ်၏ အားတက်စရာ ဖြစ်စေခဲ့ကြောင်း Burma Campaign UK က သုံးသပ်သည်။ ထိုရွေးကောက်ပွဲများသည် မြန်မာနိုင်ငံအပေါ် စစ်တပ်၏ ထိန်းချုပ်မှုကို အကန့်အသတ်မရှိ ဆက်လက် တည်မြဲ စေရန် ရည်ရွယ်သည်။ ထိရောက်မှုရှိစေရန်အတွက် အရေးယူမှုများကို ပစ်မှတ်အမျိုးမျိုး အပေါ် စုပေါင်းသက်ရောက်မှု ရှိစေရန်နှင့် စဉ်ဆက်မပြတ် ချမှတ်ရန် လိုအပ်ကြောင်း Burma Campaign UK က တိုက်တွန်းထားသည်။ Burma Campaign UK သည် ၎င်းတို့၏ ထောက်ခံသူများကို ဗြိတိန်နိုင်ငံခြားရေးဝန်ကြီး Yvette Cooper ထံသို့ စာရေးသား၍ မြန်မာစစ်တပ်အပေါ် အရေးယူမှုများ ပြန်လည်စတင်ရန် တောင်းဆိုစေရန်လည်း တိုက်တွန်းလျက် ရှိသည်။

မြန်မာစစ်တပ်အပေါ် ပိတ်ဆို့မှုများ ပြန်လည်စတင်ရန် ဗြိတိန်ကို တိုက်တွန်း

၂၀၂၆ ကမ္ဘာ့ဖလားအတွက် FIFA က စေတနာ့ဝန်ထမ်း ခေါ်ယူနေ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၂ ရက်။ လာမယ့် ၂၀၂၆ ခုနှစ် အမေရိကန်၊ ကနေဒါနှင့် မက္ကစီကို နိုင်ငံ သုံးနိုင်ငံတွင် ကျင်းပမည့် ကမ္ဘာ့ဖလား ဘောလုံးပွဲအတွက် စေတနာ့ဝန်ထမ်းများကို ကမ္ဘာ့ ဘောလုံးအဖွဲ့ချုပ် FIFA (ဖီဖှာ) က ခေါ်ယူနေသည်။ စေတနာ့ဝန်ထမ်းများသည် ကမ္ဘာ့ဖလား အားကစားသမားများနှင့် အနီးကပ် လုပ်ငန်းများ လုပ်ဆောင်ရမည် ဖြစ်သည်။ စုစုပေါင်း စေတနာ့ ဝန်ထမ်း ၆၅,၀၀၀ အတွက် လျှောက်လွှာခေါ်ယူထားခြင်း ဖြစ်သည်။ လျောက်ထားချိန်တွင် အသက် ၁၈ နှစ်ပြည့်သည့် မည်သူ မဆို လျောက်ထားနိုင်သည်ဟု ပြောသည်။ သို့သော်လည်း အမေရိကန်နှင့် ကနေဒါ နိုင်ငံများတွင် စေတနာ့ ဝန်ထမ်းလုပ်ရန် ထိုနိုင်ငံများက သတ်မှတ်ထားသော ဗီဇာ လိုအပ်ချက်များကို ပြည့်မီဖို့ လိုအပ်သည်ဟု ဆိုသည်။ စေတနာ့ဝန်ထမ်း အစီအစဉ်ဆိုသည့် အတိုင်း လုပ်အားခ ပေးခြင်း မရှိသော်လည်း FIFA ကမ္ဘာ့ဖလား ၂၀၂၆ စေတနာ့ ဝန်ထမ်း ယူနီဖောင်း၊ သီးခြား ဆုလာဘ်များနှင့် အသိအမှတ်ပြုလက်မှတ်များနှင့် လက်ဆောင်များ ရမည်ဖြစ်သည့်အပြင် ကျွမ်းကျင်မှု အခြေပြု သင်တန်းများကိုလည်း တက်ရောက်ခွင့် ရမည်ဖြစ်သည်။ စေတနာ့ ဝန်ထမ်း တာဝန်ထမ်းဆောင်စဉ် အချိန်အတွင်း အစားအသာက်များကို FIFA က တာဝန်ယူပေးမည်ဟု ဆိုသည်။ စိတ်ဝင်စားသူများ အနေနှင့် အခု စက်တင်ဘာလ ကုန်အထိ လျောက်ထားနိုင်သေးသည်ဟု ကြေညာထားသည်။ နေရာထိုင်ခင်းနှင့် ခရီးသွား ကုန်ကျစားရိတ်များကိုမူ ကိုယ်တိုင် ကျခံရမည်ဟု FIFA က ဆိုသည်။ လျောက်ထားလိုပါက FIFA အင်တာနက် စာမျက်နှာ fifaworldcup.com/volunteers တွင် ရှာဖွေနိုင်သည်။

၂၀၂၆ ကမ္ဘာ့ဖလားအတွက် FIFA က စေတနာ့ဝန်ထမ်း ခေါ်ယူနေ

သောကြာနေ့ည ရုပ်သံသတင်း (၁၀-၁၀-၂၅)

ဒီကနေ့ အစီအစဉ်ထဲမှာတော့ … မိုးမိတ်မှာ ဗုံးကြဲတိုက်ခိုက်ခဲ့လို့ ကလေးတွေ အပါအဝင် အရပ်သားတွေ အသက်ဆုံးရှုံးခဲ့ရပါတယ်။ မွန်နဲ့ တနင်္သာရီမှာလည်း အရပ်သားတွေ လေကြောင်းတိုက်ခိုက်မှု ခံရပါတယ်။ ဖားကန့်မှာ စစ်ကော်မရှင်က ဘာကြောင့် ညမထွက်ရ အမိန့်ထုတ်လိုက်တာပါလဲ

ထိုင်းရောက် အလုပ်သမားတွေအတွက် ပန်းရောင်ကတ် ပြုလုပ်ရမယ့် နေရာတွေက ဘယ်နေရာတွေလဲ၊ ဘယ်လိုလုပ်ရမှာလဲ။ ယူကရိန်းတိုက်ပွဲမှာ လောင်စာ အရင်းအမြစ်တွေကို ဘာလို့ အပြန်အလှန် တိုက်ခိုက်နေကြတာလဲ။ ယူကေက အိန္ဒိယ နိုင်ငံကို အပေါ့စား ဒုံးကျည်တွေ ရောင်းပေးလိုက်ပါတယ်။

ကမ္ဘာကျော် မုဒိမ်းမှုတစ်ခုမှာ အယူခံဝင်တဲ့သူကို တရားရုံးက ဘယ်လို အမိန့်ချမှတ်လိုက်သလဲ … စတာတွေတင်ဆက်ထားပါတယ်။