စစ်ကော်မရှင်တပ် – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Tag Archive

Tag: စစ်ကော်မရှင်တပ်

ကသာ အဝင်အထွက် ပိတ်ထားပြီး ဗုံးကြဲ တိုက်ခိုက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၂၄ ရက်။ လူပေါင်း ၈၀ ခန့် သေဆုံးခဲ့ရသည့် တိုက်ခိုက်မှု နောက်ပိုင်း စစ်ကိုင်းတိုင်း ဒေသကြီး၊ ကသာမြို့တွင် စစ်ကော်မရှင်တပ်က မြို့အဝင်အထွက် လမ်းကြောင်းအားလုံးကို ပိတ်ဆို့ထားပြီး လေကြောင်းမှတစ်ဆင့် နေ့ရောညပါ အပြင်းအထန် ဗုံးကြဲတိုက်ခိုက်နေခြင်းကြောင့် ဒေသခံ ပြည်သူ ၅,၀၀၀ ခန့် မြို့အတွင်း ပိတ်မိနေသည်။ ပြီးခဲ့သည့် မတ်လ ၂၀ ရက်နေ့က စစ်ဘေးရှောင်များ ခိုလှုံနေသည့် မဟာလေးထပ်ကျောင်းတိုက် ဗုံးကြဲခံရပြီး နောက်ပိုင်း စစ်ကော်မရှင်တပ်သည် ဂျက်လေယာဉ်၊ Y-12 အပါအဝင် လေယာဉ် ၁၀ စီးကျော်ဖြင့် ကသာမြို့ ပေါ်သို့ ၄ ရက်ဆက်တိုက် ဗုံးမိုးရွာချနေခြင်းဖြစ်သည်။ မတ်လ ၂၃ ရက်နေ့ (ယမန်နေ့) ကလည်း ရပ်ကွက် ၅ ထဲ လေကြောင်းမှ ဗုံးကြဲခဲ့သည့်အပြင် ယနေ့ထိ လေယာဉ်သံများ ဆက်ကြားနေရသည်ဟု မြို့ခံများက ပြောသည်။ လက်ရှိတွင် ဆက်သွယ်ရေးလိုင်းများနှင့် အင်တာနက်လိုင်းများ ဖြတ်တောက်ခံထားရသဖြင့် မြို့တွင်းရှိ မိသားစု ဝင်များနှင့် အဆက်အသွယ်ပြတ်တောက်ကာ စိုးရိမ်ပူပန်မှုများ မြင့်တက်နေသည်။ မြို့ခံအမျိုးသားတစ်ဦးက “မြို့ထဲမှာ ပိတ်မိနေတာ ၅,၀၀၀ ကျော်ပြီ။ စစ်တပ်က မြို့ပြင်ထွက်တဲ့သူမှန်သမျှ ပစ်သတ်မယ်လို့ ခြိမ်းခြောက်ထားတာ။ ကျနော်တို့ကို လူသားဒိုင်းလို လုပ်ထားပြီး မြို့ပေါ်ကို ဗုံးတွေ ဆက် တိုက်ကြဲနေတာပဲ။ ရပ်ကွက် (၅) ဘက်မှာလည်း ဗုံးတွေကျနေတယ်။ ဘယ်သူတွေ ထိခိုက်ကုန်ပြီလဲ ဆိုတာ တော့ အတိအကျ မသိရဘူး။ သွားကြည့်လို့လည်း မရဘူး” ဟု ပြောသည်။ မတ်လ ၂၀ ရက်နေ့ တိုက်ခိုက်မှုတွင် သံဃာတော်နှင့် အရပ်သား ၈၀ ခန့် သေဆုံးခဲ့ရပြီး အလောင်းအများစုမှာ မီးလောင်ကျွမ်းခဲ့သဖြင့် မည်သူမည်ဝါဖြစ်ကြောင်း ခွဲခြား၍မရမီ စစ်ကော်မရှင်က အလျင်အမြန် သင်္ဂြိုဟ်ခိုင်းခဲ့ ကြောင်း မြို့ခံများက ပြောသည်။ ထို့ပြင် ဒဏ်ရာရရှိသူ ၃၀ ကျော်မှာလည်း ဆေးရုံ၊ ဆေးခန်းများ ပိတ်ထားသဖြင့် လုံလောက်သော ဆေးဝါး ကုသခွင့်မရဘဲ အသက်အန္တရာယ် စိုးရိမ်နေရသည့် အခြေအနေဖြစ်နေသည်။ ကသာမြို့ပြင်တွင် စစ်ဘေးရှောင်နေရသူ မြို့ခံတစ်ဦးကလည်း “မြို့ထဲက လူတွေကတော့ အကုန်ထွက်ချင်နေ ကြတာပဲ။ ဒါပေမဲ့ လမ်းတွေကို သံချပ်ကာကားတွေနဲ့ ပိတ်ထားတော့ ဘယ်မှသွားလို့မရဘူး။ အခု ဖုန်းလိုင်းတွေ လည်း မရတော့ မိသားစုတွေ ဘာဖြစ်နေလဲဆိုတာ မသိရလို့ လူမှုကွန်ရက်ပေါ်မှာတင်ပြီး လူချင်း အဆက် အသွယ်ရအောင် လိုက်စုံစမ်းနေရတယ်” ဟု ပြောသည်။ ယခု ကသာမြို့တွင်း ပိတ်မိနေသည့် ပြည်သူများမှာ ၂၀၂၆ နှစ်ဆန်းပိုင်းတွင် တိုက်ပွဲများ ငြိမ်သက်လာသဖြင့် မြို့သို့ပြန်လည်ဝင်ရောက်လာသူများနှင့် ထွက်ပြေးတိမ်းရှောင်ခြင်း မရှိဘဲ ဆက်နေထိုင်နေသူများ ဖြစ်သည်။ ဒေသတွင်း တော်လှန်ရေးအင်အားစုများဘက်ကလည်း စစ်ကော်မရှင်သည် အရပ်သားပြည်သူများကို ဓားစာခံ အဖြစ် အသုံးချရန် မြို့တွင်းသို့ ပြန်လည်ဝင်ရောက်နေထိုင်ရန် ဖိအားပေးနေခြင်းဖြစ်ကြောင်း၊ ထို့ကြောင့် မြို့တွင်းသို့ ပြန်လည်ဝင်ရောက်ခြင်းမပြုဘဲ ဘေးလွတ်ရာတွင်သာ ဆက်လက်ခိုလှုံကြရန် သတိပေးချက်များ ထုတ်ပြန်ထားသည်။ ထို့ပြင် တိုက်ပွဲများမှာ အချိန်မရွေး ပြန်လည်ပြင်းထန်လာနိုင်သည့်အပြင် စစ်ကော်မရှင်၏ မြေပြင်စစ်ကြောင်း များမှာ လည်း မြို့တွင်းရှိ အရပ်သားများကို ပစ်မှတ်ထားကာ ဖမ်းဆီးနှိပ်စက်မှုများ ပြုလုပ်နိုင်သောကြောင့် တော်လှန်ရေးတပ်ဖွဲ့များက မြို့တွင်းသို့ ပြန်လည်ဝင်ရောက်ခြင်း မပြုကြရန် တိုက်တွန်းထားသည်။ စစ်ကော်မရှင်သည် ကသာမြို့အပြင် စစ်ကိုင်းတိုင်းအတွင်းရှိ ကနီ၊ မြောင်နှင့် ကျွန်းလှမြို့နယ်များကိုလည်း လေကြောင်းမှတစ်ဆင့် ဆက်တိုက် ဗုံးကြဲတိုက်ခိုက်နေသည်။ မတ်လ ၂၁ ရက်က ကနီမြို့နယ်ထဲက ဆူးလေကုန်းကျေးရွာရှိ စာသင်ကျောင်းနှင့် ဘုန်းကြီးကျောင်းကို ဂျက်ဖိုက် တာ ၇ စီးဖြင့် ဗုံးကြဲခဲ့သလို၊ မတ်လ ၂၃ ရက်နေ့ကလည်း မြောင်မြို့နယ် သောင်ကြီးကျေးရွာကို ဗုံးကြဲခဲ့သဖြင့် အရပ်သားများ ထပ်မံသေဆုံးခဲ့ရသည်။ ဓါတ်ပုံ - Indaw Revolution (IR) #ကသာမြို့ #စစ်ကိုင်းတိုင်း #ဗုံးကြဲတိုက်ခိုက်

ကသာ အဝင်အထွက် ပိတ်ထားပြီး ဗုံးကြဲ တိုက်ခိုက်

ပဲခူးတိုင်း ညောင်လေးပင်ခရိုင်အတွင်း စစ်ရှောင် ၄၀၀၀ ကျော် အကူအညီများ လိုအပ် သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ မတ်လ ၁၈ ရက်။   ပဲခူးတိုင်း၊ ညောင်လေးပင်ခရိုင်၊ ကျောက်ကြီးမြို့နယ်အတွင်း စစ်ကော်မရှင်၏ လူသားဒိုင်းကာပြုလုပ်မှုနှင့် အစုလိုက်အပြုံလိုက် သတ်ဖြတ်ခံရမှုများကြောင့် ထွက်ပြေးတိမ်းရှောင်နေရသည့် ပြည်သူ ၄,၀၀၀ ကျော် အတွက် အရေးပေါ် အကူအညီများ လိုအပ်နေသည်။ ကျောက်ကြီးတွင် စစ်ကော်မရှင်တပ်များ၏ ရက်စက်ကြမ်းကြုတ်သော စစ်ကြောင်းထိုးမှု၊ လေကြောင်း တိုက် ခိုက်မှုနှင့် လူသားဒိုင်းကာပြုလုပ်မှုများကြောင့် ကျေးရွာ ၅ ရွာမှ ဒေသခံပြည်သူ ၄,၀၀၀ ကျော်သည် ဘေးလွတ် ရာသို့ ထွက်ပြေးတိမ်းရှောင်နေရပြီး စားနပ်ရိက္ခာနှင့် ဆေးဝါးအကူအညီများ အရေးပေါ်လိုအပ်နေခြင်း ဖြစ်သည်။ ကရင်အရေးပေါ် ကူညီကယ်ဆယ်ရေးကော်မတီ (KRC) ၏ ပြောရေးဆိုခွင့်ရှိသူတစ်ဦးက “အခုလက်ရှိ စစ်ဘေး ရှောင်နေတဲ့သူတွေက အဓိက လိုအပ်တာကတော့ အခြေခံစားနပ်ရိက္ခာပေါ့နော်။ ပြီးတော့မှ ကျန်းမာရေး အတွက် လိုအပ်တဲ့ဆေးဝါးတွေ။ သက်ကြီးရွယ်အို၊ ကလေးသူငယ်တွေနဲ့ ကျန်းမာရေးမကောင်းတဲ့သူတွေလည်း ရှိနေတယ်။ အချို့ထဲမှာတောင် ကိုယ်ဝန်ဆောင်မိခင်တွေပါနေတယ်။ ပြောရရင်တော့ အစစအရာရာ လိုအပ်နေ တာပါပဲ” ဟု ပြောသည်။ ပြီးခဲ့သည့် မတ်လ ၅ ရက်နေ့မှ စတင်ကာ စစ်ကော်မရှင်တပ်များသည် ရေတွင်းကုန်းကျေးရွာအုပ်စု အတွင်းသို့ လေယာဉ်၊ ဒရုန်းနှင့် လက်နက်ကြီးများအသုံးပြု၍ အကြမ်းဖက်ဝင်ရောက်လာခဲ့ခြင်းဖြစ်သည်။ ထိုသို့ဝင်ရောက်လာပြီးနောက် အပြစ်မဲ့ပြည်သူ အယောက် ၃၀ ထက်မနည်းကို ရက်စက်စွာ သတ်ဖြတ်ခဲ့သည့် အပြင် ပြည်သူပိုင်ပစ္စည်းများကို လုယက်ကာ နေအိမ်များကို မီးရှို့ဖျက်ဆီးခြင်း၊ ပြည်သူများကို လူသားဒိုင်း အဖြစ် အသုံးပြုခြင်းစသည့် လူ့အခွင့်အရေးချိုးဖောက်မှုများကို ကျူးလွန်ခဲ့သည်။ လူပေါင်း ၃၀၀ ခန့်ကို လူသားဒိုင်းအဖြစ် ဖမ်းဆီးထားသည့်အတွက် ကရင့်အမျိုးသား အစည်းအရုံးနှင့် ပူးပေါင်း တပ်ဖွဲ့များက ကယ်ထုတ်ခဲ့ရသေးသည်။ စစ်ဘေးရှောင် ၄,၀၉၇ ဦးခန့်ရှိသည့် ရေတွင်းကုန်း၊ ကျောင်းကုန်း၊ ဝါချဲ၊ အင်းပရစ်နှင့် ဒလဆိပ်ကျေးရွာများမှ ပြည်သူများသည် လက်ရှိတွင် တောတောင်များထဲ၌ လည်းကောင်း၊ နီးစပ်ရာကျေးရွာရှိ အသိမိတ်ဆွေများ၏ နေအိမ်များတွင်လည်းကောင်း ခိုလှုံနေရကာ အစားအသောက်၊ ဆေးဝါး နှင့် အမိုးအကာ လိုအပ်နေကြသည်။ ကရင်လူ့အခွင့်အရေးအဖွဲ့ (KHRG) မှ ပြောရေးဆိုခွင့်ရှိသူ စောအဲလ်ဘတ်ကလည်း “အခုလက်ရှိ ဒုက္ခရောက် နေတဲ့ ပြည်သူလူထုကို နိုင်တဲ့ဘက်ကနေပြီးတော့မှ ပံ့ပိုးကူညီပေးဖို့၊ အထူးသဖြင့် ကျန်းမာရေး ဝန်ဆောင်မှု တွေ၊ လက်နက်ကြီးနဲ့ လေကြောင်းတိုက်ခိုက်မှုကြောင့် ဒဏ်ရာရနေတဲ့ ပြည်သူတွေအတွက် လိုအပ်တဲ့ ဆေးဝါး နဲ့ ကုသမှုတွေကို အချိန်မီပံ့ပိုးပေးဖို့ ကျနော်တို့ တောင်းဆိုချင်ပါတယ်” ဟု ပြောသည်။ စစ်ကော်မရှင်၏ အဆိုပါလုပ်ရပ်များကြောင့် ပြည်သူ ၁၆ ဦး အပြင်းအထန် ဒဏ်ရာရရှိခဲ့ပြီး ဒေသခံများ၏ စည်းစိမ်ဥစ္စာများမှာလည်း ဆုံးရှုံးခဲ့ရသည်။ ထိုသို့သော စစ်ရာဇဝတ်မှုများကို နိုင်ငံတကာက သိရှိနေသော်လည်း ထိရောက်သော အရေးယူဆောင်ရွက်မှု မရှိခြင်းအပေါ် ဝေဖန်မှုများလည်း ထွက်ပေါ်နေသည်။ ကရင်ငြိမ်းချမ်းရေး အထောက်အကူပြုကွန်ရက် (KPSN) မှ နော်ချယ်ရီက “သူတို့ စစ်ရာဇဝတ်မှုတွေကို အမြဲ တမ်းကျူးလွန်နေတာ ဒါက နိုင်ငံတကာလည်း သိအောင် လုပ်နေတာပဲ။ နေ့စဉ်ရက်ဆက်ပေါ့နော်။ သိသိကြီးနဲ့ ဘာမှမလုပ်ဆောင်၊ အရေးလည်းမယူဘူးဆိုတော့ ဒါက ဝေဖန်စရာတွေ အများကြီးပဲ။ ခံရတာ ကျမတို့ ပြည်သူ လူထုတွေပဲလေ” ဟု ပြောသည်။ လူ့အခွင့်အရေး လှုပ်ရှားသူများကမူ ကုလသမဂ္ဂအပါအဝင် နိုင်ငံတကာ အသိုင်းအဝန်းအနေဖြင့် စိုးရိမ်ပူပန် ကြောင်း ကြေညာချက်များ ထုတ်ပြန်နေရုံနှင့် မလုံလောက်ဘဲ စစ်ကော်မရှင်၏ လေယာဉ်ဆီ၊ လက်နက်နှင့် ဘဏ္ဍာငွေ လမ်းကြောင်းများကို အမြန်ဆုံး ဖြတ်တောက်ပေးရန် တောင်းဆိုထားကြသည်။ ထို့ပြင် စစ်ကော်မရှင်တပ်၏ လူ့အခွင့်အရေး ချိုးဖောက်မှုများကို ခံစားနေရသည် မြန်မာပြည်သူများအတွက် တရားမျှတမှု ပြန်လည်ရရှိအောင် ကူညီလုပ်ဆောင်ပေးရန်နှင့် ကျူးလွန်သူများကို တာဝန်ယူ၊ တာဝန်ခံမှုရှိလာ အောင် လုပ်ဆောင်ပေးရန် တိုက်တွန်း တောင်းဆိုနေ ကြသည်။ #ပဲခူးတိုင်း #ညောင်လေးပင်ခရိုင် #ကျောက်ကြီးမြို့နယ် #လယ်ဒိုမြို့နယ် #လူ့အခွင့်အရေးချိုးဖောက်မှု #စစ်ကော်မရှင်တပ်

ပဲခူးတိုင်း ညောင်လေးပင်ခရိုင်အတွင်း စစ်ရှောင် ၄၀၀၀ ကျော် အကူအညီများ လိုအပ်

ဖလမ်းမြို့နယ်တွင် စစ်ကော်မရှင် တပ်စခန်းကို ချင်းတော်လှန်ရေးတပ်များ ဝင်ရောက်တိုက်ခိုက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၂၂ ရက်။ ချင်းပြည်၊ ဖလမ်းမြို့နယ်အတွင်း စစ်ကြောင်းထိုးလာသည့် စစ်ကော်မရှင်တပ်နှင့် ချင်းတော်လှန်ရေး ပူးပေါင်း တပ်များအကြား တိုက်ပွဲပြင်းထန်နေပြီး၊ စစ်တပ်ဘက်မှ အကျအဆုံးများသည့်အပြင် လက်နက်ခဲယမ်းများပါ သိမ်းဆည်းရရှိထားကြောင်း စစ်ရေးအရင်းအမြစ်များက ပြောသည်။ ဖေဖော်ဝါရီလ ၂၂ ရက်နေ့၊ နံနက်ပိုင်းတွင် ဖလမ်းမြို့နယ်၊ ထင်းရှူးစခန်း၌ တပ်စွဲထားသည့် စစ်ကော်မရှင်တပ်ဖွဲ့ ကို CNA၊ CNDF နှင့် CDF ပူးပေါင်းတပ်များက ဝင်ရောက်တိုက်ခိုက်ခဲ့ခြင်းဖြစ်သည်။ အဆိုပါ တိုက်ပွဲအတွင်း လက်နက် ၉ လက်နှင့်အတူ စစ်ကော်မရှင်တပ်သား ရုပ်အလောင်းအချို့ကို သိမ်းဆည်း ရရှိသည်ဟု ချင်းသတင်းရင်းမြစ်တစ်ဦးက ပြောသည်။ တိုက်ပွဲနောက်ပိုင်း မြေပြင်အခြေအနေနှင့်ပတ်သက်၍ သူက ယခုကဲ့သို့ ပြောပြသည်။ “ဒီမနက်မှာလည်း နယ်မြေရှင်းလင်းရေး လုပ်နေတုန်း ကျန်ရှိနေတဲ့ စကစတွေနဲ့ တိုက်ပွဲထပ်ဖြစ်တယ်။ စကစက လေယာဉ်နဲ့ ဗုံးကြဲတိုက်ခိုက်တာတွေရှိသလို ကျနော်တို့ဘက်ကလည်း ဒဏ်ရာရသူတွေရှိပါတယ်။ CDF KKG က ရဲဘော်တစ်ယောက် ကျဆုံးခဲ့ရတယ်။” ထို့အပြင် ယနေ့ နံနက် ၁ နာရီဝန်းကျင်တွင်လည်း CNDF ၏ လက်ဖြောင့်တပ်သားများက စစ်ကော်မရှင်တပ်ကို ပစ်ခတ်တိုက်ခိုက်ခဲ့ရာ စစ်တပ်ဘက်မှ ၁၀ ဦးထက်မနည်း သေဆုံးခဲ့ကြောင်း CNDF က ထုတ်ပြန်ထားသည်။ ဖေဖော်ဝါရီလ ၂၁ ရက်နေ့ကလည်း ခွန်လီကျေးရွာအနီး တိုက်ပွဲတွင် စစ်ကော်မရှင် တပ်သား ၂ ဦး သေဆုံးကာ ၁ ဦးကို အရှင်ဖမ်းမိခဲ့သည့်အပြင် လက်နက်အချို့ပါ သိမ်းဆည်းရရှိခဲ့သည်။ စစ်ကော်မရှင်တပ်သည် မြေပြင်တွင် အထိနာနေသဖြင့် လေကြောင်းပစ်ကူကို အလွန်အကျွံအသုံးပြုနေပြီး ယနေ့ နံနက် ၁၁ နာရီခန့်တွင် ဖလမ်းမြို့နယ် အနောက်မြောက်ခြမ်းသို့ Yak-130 ဂျက်ဖိုက်တာနှစ်စီးဖြင့် ဗုံး ၃ လုံး ကြဲချခဲ့သည်။ ပြီးခဲ့သည့် ဖေဖော်ဝါရီ ၂၀ ရက်နေ့ ချင်းအမျိုးသားနေ့တွင်လည်း ဖလမ်းမြို့နယ်အတွင်းရှိ ကျေးရွာ ၆ ရွာထက် မနည်းကို အကြိမ်ရေ ၅၀ ကျော်အထိ လေကြောင်းမှ ဗုံးကြဲတိုက်ခိုက်ခဲ့ကြောင်း မြေပြင်သတင်းရင်းမြစ်များက ပြောသည်။ စစ်ကော်မရှင်တပ်သည် ချင်းမြောက်ပိုင်း နယ်မြေများ ပြန်လည်ရရှိရန် စစ်အင်အားထောင်ဂဏန်းဖြင့် စစ်ကြောင်းထိုးနေသည်မှာ ၄ လခန့် ရှိလာပြီဖြစ်သော်လည်း အထိနာနေသဖြင့် တပ်ဖွဲ့ဝင်များ လက်နက်ချခြင်း နှင့် ထွက်ပြေးခြင်းများ မကြာခဏ ဖြစ်ပွားနေသည်။     လက်ရှိတွင် ဖလမ်းမြို့နယ်အတွင်းရှိ ကျေးရွာပေါင်း ၁၀၀ ခန့်မှ ဒေသခံပြည်သူ ၂ သောင်းကျော်မှာ စစ်ကော်မရှင် တပ်၏ လေကြောင်းနှင့် လက်နက်ကြီးအန္တရာယ်ကြောင့် ဘေးလွတ်ရာ တောတောင်များအတွင်း ထွက်ပြေးတိမ်း ရှောင်နေကြရသည်။ အခြားတစ်ဖက်တွင်လည်း ဟားခါးမြို့၌ ကျင်းပသည့် စစ်ကော်မရှင်၏ ချင်းအမျိုးသားနေ့ အခမ်းအနားသို့ စစ်ကော်မရှင်အဖွဲ့ဝင် ဒုတိယဗိုလ်ချုပ်ကြီး ရာပြည့် ရောက်ရှိနေစဉ် (CDF-Hakha) က ဒရုန်းများဖြင့် ဝင်ရောက် တိုက်ခိုက်ခဲ့သည်။ ထိုသို့ တိုက်ခိုက်ခံရမှုကြောင့် ဒုတိယဗိုလ်ချုပ်ကြီး ရာပြည့်သည် အခမ်းအနားမှ ချက်ချင်းတိမ်းရှောင်သွားခဲ့ရပြီး၊ စစ်ကော်မရှင်ဘက်ကမူ အဆိုပါ ဒရုန်းများကို လက်ဦးမှုရယူ ဟန့်တားနိုင်ခဲ့ကြောင်း သတင်းထုတ်ပြန်ထား သော်လည်း တိုက်ခိုက်မှုဖြစ်စဉ် ရုပ်သံဖိုင်များ လူမှုကွန်ရက်တွင် ပျံ့နှံ့လျက်ရှိသည်။

ဖလမ်းမြို့နယ်တွင် စစ်ကော်မရှင် တပ်စခန်းကို ချင်းတော်လှန်ရေးတပ်များ ဝင်ရောက်တိုက်ခိုက်

ဖယ်ခုံ အနောက်ခြမ်း ကျေးရွာများအတွင်း စစ်ကော်မရှင် လက်နက်ကြီးဖြင့်ပစ်၊ အရပ်သား တစ်ဦးသေ သတင်းနှင့်မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၉ ရက်။ ရှမ်းပြည်တောင်ပိုင်း၊ ဖယ်ခုံမြို့နယ် အနောက်ဘက်ခြမ်းရှိ တော်လှန်ရေး တပ်ဖွဲ့များ ထိန်းချုပ်ထားရာ ကယန်းကျေးရွာများအတွင်းသို့ စစ်ကော်မရှင်တပ်က လက်နက်ကြီးဖြင့် ပစ်ခတ်တိုက်ခိုက်ခဲ့ရာ အရပ်သားတစ်ဦး ပွဲချင်းပြီး သေဆုံးသွားသည်။ နေအိမ်၌ ရှိနေသည့် အရပ်သားတစ်ဦး ပွဲချင်းပြီး သေဆုံးကာ နောက်ထပ်တစ်ဦး ပြင်းထန်ဒဏ်ရာရရှိခဲ့ကြောင်း ဒေသခံများနှင့် စစ်ဘေးရှောင်ကူညီသူများက ပြောသည်။ ဖြစ်စဉ်နှင့်ပတ်သက်၍ အနောက်ကယန်းဒေသ၌ ခိုလှုံနေသည့် CDM တစ်ဦးက “ထိတာကတော့ အိမ်မှာ နေရင်း ထိုင်ရင်း ထိတာပါ။ တစ်လုံးပဲ ကျတာလေ။ ဝုန်းဆို တစ်ချက်ပဲ။ ပွဲချင်းပြီးပဲ။ အကုန်လုံး ကျဉ်းထဲ ရောက်တော့ ထပ်မကျတော့ဘူး။ တော်တော်ဆန်းတယ်။ ခါတိုင်းဆို ဆက်တိုက် အတွဲလိုက် ချတာ” ဟု ပြောသည်။ ဖယ်ခုံမြို့အခြေစိုက် ခမရ (၃၃၆) တပ်ရင်းမှနေ၍ ဖေဖော်ဝါရီ ၆ ရက်နေ့ နံနက် ၁၀ နာရီဝန်းကျင်ခန့်တွင် တိုက်ပွဲ ဖြစ်ပွားခြင်းမရှိဘဲ ၁၂၀ မမ လက်နက်ကြီးဖြင့် အရပ်သားများရှိရာသို့ ရည်ရွယ်ချက်ရှိရှိ ဦးတည် ပစ်ခတ်ခဲ့ခြင်း ဖြစ်သည်ဟု ဒေသခံများက ပြောသည်။ အဆိုပါ လက်နက်ကြီးကျည်မှာ ကယန်းကျေးရွာတစ်ရွာအတွင်း ကျရောက်ပေါက်ကွဲခဲ့သဖြင့် အသက် ၅၆ နှစ် အရွယ် ဦးစိုးဏ ဆိုသူ သေဆုံးခဲ့ရပြီး ၎င်းနှင့်အတူရှိနေသည့် အမျိုးသားတစ်ဦးလည်း ပြင်းထန် ဒဏ်ရာများ ရရှိခဲ့သည်။ ဖယ်ခုံမြို့နယ် အနောက်ဘက်ခြမ်း ကျေးရွာများသည် ပြီးခဲ့သည့် ဇန်နဝါရီ ၈ ရက်နေ့ကလည်း လက်နက်ကြီး ပစ် ခတ်ခံရမှုကြောင့် အမျိုးသမီးတစ်ဦး ဒဏ်ရာရရှိခဲ့ဖူးပြီး ယခုအခါ စစ်ကော်မရှင်တပ်က ပအိုဝ်းပြည်သူ့စစ် အဖွဲ့ (PNA) အကူအညီဖြင့် ဒေသအတွင်းသို့ ထပ်မံစစ်ကြောင်းထိုးရန် ပြင်ဆင်နေကြောင်း မြေပြင်သတင်းရင်းမြစ် များက ပြောသည်။ အနောက်ကယန်းဒေသသည် စစ်ဘေးရှောင်စခန်းများစွာ အပြင် ရှမ်း၊ ကရင်နီနှင့် ပြည်မဘက်မှ လာရောက်သည့် တော်လှန်ရေးတပ်ရင်းများ ခိုလှုံရာဒေသလည်းဖြစ်သည်။ စစ်ကော်မရှင်တပ်သည် အဆိုပါဒေသကို ပြန်လည်စိုးမိုးနိုင်ရန်အတွက် လက်နက်ကြီးဖြင့် ပစ်ခတ်ခြင်းနှင့် လေကြောင်းမှ ဗုံးကြဲတိုက်ခိုက်ခြင်းများကို မကြာခဏဆိုသလို ပြုလုပ်လျက်ရှိသည်။

ဖယ်ခုံ အနောက်ခြမ်း ကျေးရွာများအတွင်း စစ်ကော်မရှင် လက်နက်ကြီးဖြင့်ပစ်၊ အရပ်သား တစ်ဦးသေ

စစ်ကော်မရှင် လက်နက်ကြီးကြောင့် ကလေး တစ်ဦးအပါအဝင် ရွာသား ၃ ဦး ဒဏ်ရာရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၈ ရက်။ တနင်္သာရီမြို့နယ်အတွင်း စစ်ကော်မရှင်တပ်က လက်နက်ကြီးဖြင့် ရမ်းသန်းပစ်ခတ်မှုကြောင့် အသက် ၁၂ နှစ်အရွယ် ကလေး အပါအဝင် ရွာသားသုံးဦး ဒဏ်ရာရခဲ့သည်ဟု ဒေသခံများက ပြောသည်။ တနင်္သာရီတိုင်း၊ မြိတ်ခရိုင်၊ တနင်္သာရီမြို့နယ်အတွင်းရှိ ကျေးရွာများသို့ စစ်ကော်မရှင်တပ်က လက်နက်ကြီးများ ဖြင့် ရည်ရွယ်ချက်ရှိရှိ ရမ်းသန်းပစ်ခတ်ခဲ့သဖြင့် ၁၂ နှစ်အရွယ် ကလေးတစ်ဦးအပါအဝင် ကျေးရွာသားသုံးဦး ထိခိုက်ဒဏ်ရာရရှိခဲ့ခြင်း ဖြစ်သည်။ ဖြစ်စဉ်နှင့်ပတ်သက်၍ မုတ်ဆိတ်ကွင်းရွာသားတစ်ဦးက “ကလေးတစ်ယောက်က ခြေမှာဒဏ်ရာရတယ်၊ လူကြီးတစ်ယောက်မှာက ဒဏ်ရာရများတယ်၊ နောက်ထပ် လူကြီးတစ်ယောက်မှာကတော့ ဒဏ်ရာနည်းတယ်” ဟု ပြောသည်။ ဇန်နဝါရီလ ၆ ရက်နေ့ ညနေပိုင်းတွင် တနင်္သာရီအခြေစိုက် စစ်ကော်မရှင်၏ အမှတ် (၅၆၁) ခြေမြန်တပ်ရင်းကို ပြည်သူ့ကာကွယ်ရေးတပ်ဖွဲ့များက ဝင်ရောက်တိုက်ခိုက်ခဲ့ပြီးနောက်၊ စစ်ကော်မရှင်တပ်က ကျေးရွာများအတွင်း သို့ လက်နက်ကြီးများဖြင့် တန်ပြန်ပစ်ခတ်ခဲ့ခြင်း ဖြစ်သည်။ အဆိုပါ ပစ်ခတ်မှုကြောင့် မုတ်ဆိတ်ကွင်းကျေးရွာအတွင်း လက်နက်ကြီးကျည် ကျရောက်ပေါက်ကွဲခဲ့ပြီး အသက် ၁၂ နှစ်အရွယ် ကလေးငယ်တစ်ဦး၏ ခြေထောက်တွင် ဒဏ်ရာရရှိခဲ့သလို၊ ကျန်အမျိုးသားနှစ်ဦးမှာ လည်း ခြေနှင့်လက်တို့တွင် ထိခိုက်ဒဏ်ရာများ ရရှိခဲ့သည်။ ၎င်းလက်နက်ကြီးကျည်များသည် မုတ်ဆိတ်ကွင်းရွာအပြင် အနီးနားရှိ အခြားကျေးရွာနှစ်ရွာအတွင်းသို့လည်း ကျရောက်ပေါက်ကွဲခဲ့သဖြင့် ဒေသခံများမှာ ဘေးလွတ်ရာသို့ တိမ်းရှောင်နေကြရသည်။ တနင်္သာရီမြို့နယ်အတွင်းရှိ စစ်ကော်မရှင်တပ်များသည် တိုက်ပွဲဖြစ်ပွားသည့် အခါတိုင်း အရပ်သားများနေထိုင် ရာ ကျေးရွာများကို ပစ်မှတ်ထားကာ လက်နက်ကြီးများဖြင့် တုံ့ပြန်လေ့ရှိကြောင်း ဒေသခံများက ဆိုသည်။ ပြီးခဲ့သည့် ၂၀၂၅ ခုနှစ်၊ ဩဂုတ်လအတွင်းကလည်း မုတ်ဆိတ်ကွင်းရွာအပါအဝင် ကျေးရွာလေးရွာကို တိုက်ပွဲ ဖြစ်ပွားခြင်းမရှိဘဲ စစ်ကော်မရှင်က လေကြောင်းမှ ဗုံးကြဲတိုက်ခိုက်ခဲ့သည့် သာဓကများ ရှိခဲ့သည်။ လက်ရှိတွင် တနင်္သာရီမြို့နယ်အတွင်း စစ်ရေးတင်းမာမှုများ ဆက်ရှိနေပြီး စစ်ကော်မရှင်တပ်၏ လက်နက်ကြီး အန္တရာယ်ကြောင့် ဒေသခံရွာသားများမှာ လုပ်ငန်းခွင်သို့ မသွားရဲဘဲ စိုးရိမ်ထိတ်လန့်နေကြရသည်။ နိုင်ငံတကာလူ့အခွင့်အရေး စံနှုန်းများအရ အရပ်သားများကို ပစ်မှတ်ထားတိုက်ခိုက်ခြင်းမှာ စစ်ရာဇဝတ်မှု မြောက်သော်လည်း စစ်ကော်မရှင်တပ်ကမူ ယခုကဲ့သို့ ကျေးရွာများအတွင်းသို့ ရည်ရွယ်ချက်ရှိရှိ ပစ်ခတ်မှုများ ကို ဆက်တိုက်ကျူးလွန်လျက်ရှိသည်ဟု ဒေသတွင်း ကူညီကယ်ဆယ်ရေး လုပ်ဆောင်နေသူများက ပြောသည်။

စစ်ကော်မရှင် လက်နက်ကြီးကြောင့် ကလေး တစ်ဦးအပါအဝင် ရွာသား ၃ ဦး ဒဏ်ရာရ

စစ်ကော်မရှင်၏ ဝါဒဖြန့်မှုများ နားမယောင်ရန် နိုင်ငံတကာကို တိုက်တွန်း သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၂၈ ရက်။ စစ်ကော်မရှင်၏ ဝါဒဖြန့်မှုများအပေါ် အခြေခံ၍ မြန်မာ့အရေးကို အဆုံးအဖြတ်မပေးရန် နိုင်ငံတကာ အသိုင်း အဝိုင်းကို တော်လှန်ရေးအင်အားစုများ တိုက်တွန်းလိုက်သည်။ စစ်ကော်မရှင်က ကျင်းပရန် ပြင်ဆင်နေသည့် ရွေးကောက်ပွဲသည် ၎င်းတို့၏ ရာဇဝတ်မှုများကို ဖုံးကွယ်ရန် လုပ်ဆောင်သည့် ဝါဒဖြန့်မှုသာဖြစ်ပြီး ယင်းအချက်အပေါ် အခြေခံ၍ မြန်မာ့အရေးကို အဆုံးအဖြတ်မပေးရန် တော်လှန်ရေး အင်အားစုများက နိုင်ငံတကာအသိုင်းအဝိုင်းသို့ တိုက်တွန်းပြောဆိုလိုက်သည်။ စစ်ကော်မရှင်၏ ရွေးကောက်ပွဲ ကော်မရှင်သည် ဒီဇင်ဘာလ ၂၈ ရက်နေ့မှ စတင်ကာ အပိုင်း ၃ ပိုင်းခွဲ၍ ရွေး ကောက်ပွဲ ကျင်းပမည်ဟု ထုတ်ပြန်ထားချိန်တွင် တော်လှန်ရေး အင်အားစုများက မြေပြင်ပကတိ အခြေအနေကို ရှုမြင်ပေးရန် ယခုကဲ့သို့ တုံ့ပြန်လိုက်ခြင်း ဖြစ်သည်။ ကရင်နီပြည်နယ် အင်အားစုကိုယ်စားလှယ် ခွန်းသောမတ်စ်က “နိုင်ငံတကာ အသိုင်းအဝိုင်းတွေကလည်း ကျနော် တို့ရဲ့ ပကတိ အခြေအနေကို မျှော်ကြည့်ပေးဖို့ လိုပါမယ်။ ကျနော်တို့ လူထုတွေရဲ့ အခြေအနေကို မျှော်ကြည့် ပေးဖို့ လိုမယ်ပေါ့နော်။ စစ်ကောင်စီရဲ့ မဟုတ်မမှန် ဝါဒဖြန့်မှုတွေကို ကြည့်ပြီးတော့ ကျနော်တို့ရဲ့ နိုင်ငံကို ဆုံးဖြတ်လိုက်တာမျိုး၊ အဆုံးအဖြတ်တွေ ပေးတာမျိုးကတော့ မလုပ်သင့်ဘူးလို့ ကျနော်ယူဆတယ်” ဟု ပြော သည်။ လက်ရှိတွင် စစ်ကော်မရှင်သည် ရွေးကောက်ပွဲတွင် မဲပေးရန် ပြည်သူများကို နည်းမျိုးစုံဖြင့် ခြိမ်းခြောက်နေ ခြင်း ဖြစ်သည်။ ကရင်နီပြည်တွင် စစ်ဘေးရှောင်များ ပြန်မလာပါက နေအိမ်များကို ချိတ်ပိတ်မည်ဟု အကျပ်ကိုင်နေသည့်အပြင်၊ တက္ကသိုလ် ကျောင်းသားများကိုလည်း ကြိုတင်မဲမပေးပါက ကျောင်းတက်ခွင့်မပေးဟု ဆိုကာ လူ့အခွင့်အရေး ချိုးဖောက်လျက်ရှိသည်။ ကျေးလက်မြေအဖွဲ့ ဒါရိုက်တာ ဒေါ်မူစဲက “ကရင်နီမှာ ကြည့်မယ်ဆိုလို့ရှိရင် စစ်ဘေးရှောင်တွေကို ပြန်မလာလို့ ရှိရင် နေအိမ်တွေ ချိတ်ပိတ်မယ်၊ ပြီးတော့မှ တော်လှန်ရေးအဖွဲ့နဲ့ တစ်ဖွဲ့တည်းလို့ သတ်မှတ်မယ်ဆိုတဲ့ အရာ တွေက ဒါက ခြိမ်းခြောက်မှု ဖြစ်တယ်။ ဒါသည် လူ့အခွင့်အရေးနဲ့ လုံးဝဆန့်ကျင်တယ်။ ဒီအတွက်ကြောင့်မို့လို့ ဒီရွေးကောက်ပွဲ အတုအယောင်ကို နိုင်ငံတကာက လက်မခံဖို့ လိုအပ်တယ်” ဟု ထောက်ပြသည်။ စစ်ကော်မရှင်၏ ရွေးကောက်ပွဲသည် လက်ရှိမြန်မာ့နိုင်ငံရေး အကျပ်အတည်းအတွက် အဖြေမဟုတ်ကြောင်း KNU-NUG (တပ်မဟာ ၄ ပူးပေါင်းညှိနှိုင်းရေးအဖွဲ့) – BCT-4 ပြောရေးဆိုခွင့်ရှိသူ ဦးဟိန်းထက်ကလည်း သတိပေးထားသည်။ “အကြမ်းဖက် စစ်အုပ်စုရဲ့ အတုအယောင် ရွေးကောက်ပွဲဟာ တိုင်းပြည်ရဲ့ လက်ရှိ ဖြစ်ပျက်နေတဲ့ ဒီအကြမ်း ဖက် လုပ်ရပ်တွေ၊ ဒီမငြိမ်းချမ်းမှုတွေကို ဖြေရှင်းဆောင်ရွက်နိုင်လိမ့်မယ်လို့ ဒါ ယုံကြည်နေကြတဲ့ နိုင်ငံတကာ အစိုးရတွေ၊ နိုင်ငံတကာ အသိုင်းအဝန်းကိုလည်း ဒါက အကြမ်းဖက်စစ်အုပ်စုရဲ့ သူ့ရဲ့ အကြမ်းဖက်လုပ်ရပ်တွေ ကို ဖုံးဖိနိုင်ဖို့အတွက် ဒီလှည့်ဖျားတဲ့ လုပ်ရပ်တစ်ခုသာ ဖြစ်တယ်။ ဒီငြိမ်းချမ်းတဲ့ မြန်မာနိုင်ငံရဲ့ လူ့ဘောင် အဖွဲ့ အစည်းကို တည်ဆောက်ဖို့တဲ့နေရာမှာ ဘယ်လိုမှ ဒီရွေးကောက်ပွဲက အဖြေမဟုတ်ဘူး ဆိုတာကို ကောင်းစွာ သိရှိနားလည်စေချင်တယ်။” စစ်ကော်မရှင်သည် ရွေးကောက်ပွဲအတွက် ပြင်ဆင်နေစဉ်အတွင်း၌ပင် အရပ်သားပစ်မှတ်များကို လေကြောင်းမှ ဗုံးကြဲခြင်း၊ ကျေးရွာများကို မီးရှို့ခြင်းနှင့် ပြည်သူများကို သတ်ဖြတ်ခြင်းများကို ဆက်တိုက်ကျူးလွန်နေကြောင်း လူ့အခွင့်အရေး လှုပ်ရှားသူများက ပြောသည်။ ဦးဟိန်းထက်က “ဒီအကြမ်းဖက် စစ်အုပ်စုအနေနဲ့ သူ့ရဲ့ ဒီအကြမ်းဖက် သတ်ဖြတ်မှုတွေ အပါအဝင် သူ့ရဲ့ ရပ် တည်မှုအတွက်၊ သူ့ရဲ့ ကိုယ်ကျိုးအတွက်ဆိုရင် သေချာတာတစ်ခုကတော့ ဒီလိုမျိုး ဒီရွေးကောက်ပွဲကနေ တစ်ဆင့် အဖြေဟုတ်မနေဘဲနဲ့ ပြည်သူတွေကို ဆက်လက်ပြီးတော့ သတ်ဖြတ်မှုတွေကို လုပ်ဆောင်နေဦးမယ် ဆိုတဲ့ဟာကိုလည်း ကျနော်တို့ လက်ခံယုံကြည်ထားတယ်” ဟု ဆက်ပြောသည်။ တော်လှန်ရေး အင်အားစုများက နိုင်ငံတကာ အသိုင်းအဝိုင်းအနေဖြင့် စစ်ကော်မရှင်၏ လုပ်ရပ်များကို အသိ အမှတ် မပြုရန်နှင့် လက်ရှိ တော်လှန်ရေး အင်အားစုများ ဖော်ဆောင်နေသည့် အုပ်ချုပ်ရေးဆိုင်ရာ ကိစ္စရပ်များ ကိုသာ အမြန်ဆုံး အသိအမှတ်ပြု ကူညီပေးကြရန် တောင်းဆိုထားသည်။

စစ်ကော်မရှင်၏ ဝါဒဖြန့်မှုများ နားမယောင်ရန် နိုင်ငံတကာကို တိုက်တွန်း

လွိုင်ကော်တွင် မထည့်မနေရ မဲထည့်ရန် စစ်တပ်က ဖိအားပေး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၂၀ ရက်။ ကရင်နီ (ကယား) ပြည်၊ လွိုင်ကော်မြို့တွင် စစ်ကော်မရှင်တပ်က မဲမထည့်မနေရ ဖိအားပေးနေပြီး အတုအယောင် ရွေးကောက်ပွဲအတွက် မြို့တွင်းလုံခြုံရေး အတင်းအကျပ် တင်းကြပ်ထားသည်ဟု မြို့ခံများက ပြောသည်။ လွိုင်ကော်မြို့တွင် စစ်ကော်မရှင်က ကျင်းပရန်ပြင်ဆင်နေသည့် အတုအယောင် ရွေးကောက်ပွဲရက် နီးကပ်လာသည်နှင့် အမျှ မြို့တွင်းသွားလာ လှုပ်ရှားမှုများကို ယခင်ကထက် ပိုမိုတင်းကြပ်ထားပြီး ပြည်သူများ အား မဲမထည့်မနေရ ဖိအားပေးမှုများ ဆက်တိုက်လုပ်ဆောင်နေကြောင်း မြို့ခံများက ပြောသည်။ လက်ရှိတွင် လွိုင်ကော်မြို့အတွင်း လမ်းများပိတ်ဆို့ကာ စစ်ဆေးရေးဂိတ်များ တိုးချဲ့ထားပြီး ဆိုင်ကယ်၊ ကားနှင့် လူလိုင်စင်များအား အသေးစိတ်စစ်ဆေးမှုများ လုပ်ဆောင်နေသည်။ လွိုင်ကော်မြို့ခံ အမျိုးသမီးတစ်ဦးက “ကိုယ့်အိမ်ကိုယ်အိုးနဲ့ တိုးတိုးတိတ်တိတ်ပဲ နေကြရတယ်။ ညဆို ဘယ်သူ မှ အပြင်မထွက်ရဲတော့ဘူး။ သွားရင်လည်း ၇ နာရီ၊ ၈ နာရီလောက်အထိပဲ။ အခုက ကားတွေ၊ ဆိုင်ကယ်တွေကို တအား Check လုပ်တယ်။ ဖမ်းတယ်၊ လိုင်စင်တွေရော လူလိုင်စင်တွေပါ အကုန်စစ်နေတာ” ဟု ပြောသည်။ စစ်ကော်မရှင် လက်အောက်ခံ ရွေးကောက်ပွဲကော်မရှင် (UEC) က ရွေးကောက်ပွဲကို အပိုင်းနှစ်ပိုင်းခွဲ၍ ယခုနှစ် ဒီဇင်ဘာလ ၂၈ ရက်တွင် အပိုင်း (၁)၊ လာမည့် ဇန်နဝါရီလ ၁၁ ရက်နေ့တွင် အပိုင်း (၂) နှင့် ဇန်နဝါရီလ ၂၅ ရက်နေ့တွင် အပိုင်း (၃) အဖြစ် ကျင်းပမည်ဟု ထုတ်ပြန်ထားသည်။ လွိုင်ကော်မြို့နယ် အတွင်းရှိ ပါလောင်းနှင့် တီးလုံကျေးရွာအုပ်စုတို့မှလွဲ၍ ကျန်သည့် ကျေးရွာအုပ်စုအားလုံးတွင် မဖြစ်မနေ ကျင်းပသွားရန် စစ်ကော်မရှင်က စီစဉ်နေခြင်းဖြစ်သည်။ စစ်ကော်မရှင်တပ်သည် မဲဆွယ်စည်းရုံးရေးကာလအတွင်း ရပ်ကွက်များ၌ ဆန်နှင့် ဆီများဝေငှကာ လူစုဆောင်း ခြင်း၊ မဲစာရင်းတွင် အမည်သွားရောက်ရှာဖွေရန် အတင်းအကျပ်ခိုင်းစေခြင်းများ ပြုလုပ်နေသည်။ အခြားမြို့ခံ အမျိုးသမီးတစ်ဦးကလည်း “ရပ်ကွက်မှာ စည်းရုံးရေးတွေ ဆင်းတယ်လေ။ ဆီတွေ၊ ဆန်တွေ ပေး ပြီးတော့ ခေါ်တယ်။ မသွားမနေရပဲ။ နာမည်တောင် သွားရှာရပြီ။ ဒီမှာနေတော့လည်း ဒီအတိုင်းပဲ လိုက်သွား ရမှာပေါ့” ဟု ၎င်းတို့ ကြုံတွေ့နေရသည့် ပြောပြသည်။ တစ်ဖက်တွင်လည်း စစ်ကော်မရှင်တပ်သည် လွိုင်ကော်မြို့အနီးရှိ စစ်ဘေးရှောင်ပြည်သူများကို မြို့ထဲသို့ ပြန်ဝင်လာစေရန် စစ်ရေးအရ ဖိအားပေးနေသည်။ ပြန်မဝင်လာသည့် ဒေသများသို့ လက်နက်ကြီးနှင့် လေကြောင်းဖြင့် တိုက်ခိုက်ခြင်းများ ပြုလုပ်နေသဖြင့် စစ်ဘေးရှောင်များမှာ မြို့ထဲသို့ ပြန်လည်ဝင်ရောက်နေရပြီး ယင်းသို့ ပြန်ဝင်လာပါက မဲမဖြစ်မနေ ပေးရမည့် အခြေအနေရှိနေကြောင်း ကရင်နီပြည်လူငယ်များသမဂ္ဂ (UKSY) က ထောက်ပြသည်။ UKSY ပြောရေးဆိုခွင့်ရှိသူက “လွိုင်ကော်မြို့အရှေ့ခြမ်းကို စစ်ကြောင်းထိုးတာတွေ သူတို့ ဆောင်ရွက်နေတာ ရှိတယ်။ စစ်ရှောင်တွေက စစ်ရေးအချိန်မရွေး ထဖြစ်နိုင်တဲ့အတွက် မြို့ပေါ်ကို ပြန်ဝင်လာရတယ်။ ဒါဟာ စစ် ရေးအရ ပြည်သူလူထုအပေါ် ဖိအားပေးတဲ့ အနေအထားပါ။ မြို့ထဲရောက်ပြီဆိုရင်တော့ မဲကတော့ မဖြစ်မနေ ပေးရမယ့် အခြေအနေ ဖြစ်သွားပါလိမ့်မယ်” ဟု သုံးသပ်ပြောဆိုသည်။ လွိုင်ကော်မြို့ပေါ် ရပ်ကွက်များတွင် နေထိုင်သူများ၏ အမည်စာရင်းကို စစ်ကော်မရှင်က အတိအကျကောက်ခံ ထားပြီးဖြစ်၍ ဒေသခံအများစုမှာ မိမိတို့ ဆန္ဒမပါဘဲ မဖြစ်မနေ မဲသွားပေးရမည့် အခြေအနေဖြစ်ကြောင်း ဒေသခံများက ပြောသည်။ ယခုကဲ့သို့ စစ်ကော်မရှင်တပ်က နည်းပညာသုံး ခြေရာခံစောင့်ကြည့်မှုများ၊ CCTV ကင်မရာများနှင့် AI မျက်နှာ မှတ်သားစနစ်များကို အသုံးပြုကာ ပြည်သူများကို ခြိမ်းခြောက်နေသည့် အပေါ် သံအမတ်ကြီး ဦးကျော်မိုးထွန်း ကလည်း ကုလသမဂ္ဂတွင် သတိပေးခဲ့ပြီးဖြစ်သည်။ ပြည်သူလူထု၏ ဆန္ဒမပါဘဲ အတင်းအကျပ် ဖိအားပေး ကျင်းပမည့် ဤရွေးကောက်ပွဲသည် လွတ်လပ်မှုနှင့် တရားမျှတမှု လုံးဝမရှိနိုင်ကြောင်း လူ့အခွင့်အရေး လှုပ်ရှားသူများနှင့် စောင့်ကြည့်လေ့လာသူများက ဝေဖန် ရှုတ်ချနေကြသည်။ ဓာတ်ပုံ - INFORMATION AND PUBLIC RELATIONS DEPARTMENT

လွိုင်ကော်တွင် မထည့်မနေရ မဲထည့်ရန် စစ်တပ်က ဖိအားပေး

ကန်ပက်လက် မင်္ဂလာပွဲ ဗုံးကြဲခံရ၊ အရပ်သား ၄ ဦး သေဆုံး၊ ၁၅ ဦး ဒဏ်ရာရ သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၅ ရက်။ ချင်းပြည်၊ ကန်ပက်လက်မြို့ အနီးရှိ မင်္ဂလာဆောင်ပွဲတစ်ခုကို စစ်ကော်မရှင်တပ်က ဂျက်ဖိုက်တာဖြင့် ဗုံးကြဲ တိုက်ခိုက်ခဲ့ရာ အရပ်သား ၄ ဦး သေဆုံးပြီး၊ ၁၅ ဦးထက်မနည်း ထိခိုက်ဒဏ်ရာရခဲ့သည်ဟု ဒေသခံများထံမှ သိရသည်။ ဖြစ်စဉ်မှာ အောက်တိုဘာလ ၂၄ ရက်နေ့၊ နံနက်ပိုင်း ၉ နာရီ ၂၀ မိနစ်ခန့်က ဖြစ်ပွားခဲ့ခြင်းဖြစ်ပြီး၊ စစ်တပ်က နှစ်ကြိမ်ဆက်တိုက် လေကြောင်းမှ တိုက်ခိုက်ခဲ့သည်။ ပထမအကြိမ်တွင် ဗုံးတစ်လုံး၊ ဒုတိယအကြိမ်တွင် ဗုံးနှစ်လုံးဖြင့် စုစုပေါင်း ဗုံးသုံးလုံး ကြဲချခဲ့ကြောင်း ဒေသခံတစ်ဦးက ပြောသည်။ ဗုံးကြဲတိုက်ခိုက်ခံရသည့် နေရာသည် CDF - ကန်ပက်လက် စစ်ဦးစီးချုပ် ဆလိုင်းအောင်လိန်း၏ မင်္ဂလာဆောင် ပွဲ ကျင်းပသည့်နေရာဖြစ်ပြီး၊ စစ်တပ်သည် မင်္ဂလာဆောင်ဖိတ်စာမှတစ်ဆင့် နေရာနှင့် အချိန်အတိအကျကို သိရှိ၍ ပစ်မှတ်ထား တိုက်ခိုက်ခဲ့ခြင်းဖြစ်ကြောင်း သတင်းများက ဖော်ပြသည်။ CDF - ကန်ပက်လက် ပြောရေးဆိုခွင့်ရှိသူကလည်း လေကြောင်းတိုက်ခိုက်မှု ဖြစ်ပွားခဲ့သည်ကို အတည်ပြုသည်။ ဗုံးကြဲတိုက်ခိုက်မှုကြောင့် သေဆုံးသူ အရပ်သား ၄ ဦးတွင် NLD လွှတ်တော်အမတ်ဟောင်း ဦးစံခင်၏သား ဦးခင်မောင်ရင် အပါအဝင် အမျိုးသားသုံးဦးနှင့် အမျိုးသမီးတစ်ဦး ပါဝင်ကြောင်း ချင်းသတင်းဌာနများက ရေးသားသည်။ ဒဏ်ရာရရှိသူ ၁၅ ဦးအနက် ၅ ဦး၏ ဒဏ်ရာအခြေအနေမှာ ပြင်းထန်သည်ဟု သိရသည်။ စစ်အုပ်စုသည် အောက်တိုဘာလအတွင်း ချင်းပြည်နယ်ရှိ မင်းတပ်၊ မတူပီ၊ ဟားခါး၊ တွန်းဇံမြို့နယ်များ တွင် လည်း လေကြောင်းတိုက်ခိုက်မှုများ ဆက်တိုက်ပြုလုပ်ခဲ့ရာ ကလေးငယ်များအပါအဝင် ဒေသခံ အရပ်သားများ ထိခိုက်သေဆုံးမှု များပြားခဲ့သည်။

ကန်ပက်လက် မင်္ဂလာပွဲ ဗုံးကြဲခံရ၊ အရပ်သား ၄ ဦး သေဆုံး၊ ၁၅ ဦး ဒဏ်ရာရ

စစ်ကော်မရှင်၏ စစ်မှုထမ်းအင်အားဖြည့်တင်းရေးအတွက် စစ်သင်တန်းကျောင်း (၂၇) ခုအထိ တိုးချဲ့ဖွင့်လှစ်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၀ ရက်။ မြန်မာ့စစ်ဖက်ရေးရာနှင့် လုံခြုံရေးဆိုင်ရာ လေ့လာရေးအဖွဲ့ (MDSI) ၏ အောက်တိုဘာလ (၁၇) ရက်နေ့ ထုတ်ပြန်ချက်အရ စစ်ကော်မရှင်တပ်သည် မတရားဖမ်းဆီး စုဆောင်းထားသည့် လူငယ်များကို လေ့ကျင့်ပေးနိုင်ရန်အတွက် စစ်သင်တန်းကျောင်းပေါင်း (၂၇) ခုအထိ ထပ်မံ တိုးချဲ့ဖွင့်လှစ်လိုက်ကြောင်း သိရသည်။ ဖမ်းဆီးရရှိမှု အင်အား များပြားလာသည့်အတွက် စစ်တပ်သည် ခြေလျင်အကူလက်နက်ကြီးသင်ကျောင်း (ခအက) နှင့် ရေတပ်လေ့ကျင့်ရေးတပ် (ရလတ ၅၇) တို့ကဲ့သို့သော နေရာများကိုပါ အရန်သင်တန်းကျောင်းများ အဖြစ် အသုံးပြုနေရသည်။ စစ်ကော်မရှင်တပ် စိုးမိုးမှုအားကောင်းသော ရှမ်း၊ ရန်ကုန်၊ မန္တလေးနှင့် ပဲခူးတိုင်းများရှိ စစ်သင်တန်းကျောင်း (၁၅) ခုသည် ပင်မသင်တန်းကျောင်းများ အဖြစ် အခြေခံတပ်သားသစ် သင်တန်းများကို ဖွင့်လှစ်နေသည်။ သို့သော်လည်း တိုက်ပွဲများ ပြင်းထန်နေသည့် သပိတ်ကျင်းနှင့် ရွှေဘိုဒေသများရှိ သင်တန်းကျောင်းအချို့မှာမူ လုံခြုံရေးအရ သင်တန်းများကို ရပ်နားထားရသည်။ စစ်ကော်မရှင်တပ်သည် နောက်ထပ်အပတ်စဉ် ဖြစ်သည့် အပတ်စဉ် (၁၈) ကို မကြာမီ ဖွင့်လှစ်နိုင်ရန် ပြင်ဆင်နေ ကြောင်း MDSI က ဆိုသည်။

စစ်ကော်မရှင်၏ စစ်မှုထမ်းအင်အားဖြည့်တင်းရေးအတွက် စစ်သင်တန်းကျောင်း (၂၇) ခုအထိ တိုးချဲ့ဖွင့်လှစ်  

သောကြာနေ့ည ရုပ်သံသတင်း (၁၀-၁၀-၂၅)

သောကြာနေ့ည ရုပ်သံသတင်း (၁၀-၁၀-၂၅)

ဒီကနေ့ အစီအစဉ်ထဲမှာတော့ … မိုးမိတ်မှာ ဗုံးကြဲတိုက်ခိုက်ခဲ့လို့ ကလေးတွေ အပါအဝင် အရပ်သားတွေ အသက်ဆုံးရှုံးခဲ့ရပါတယ်။ မွန်နဲ့ တနင်္သာရီမှာလည်း အရပ်သားတွေ လေကြောင်းတိုက်ခိုက်မှု ခံရပါတယ်။ ဖားကန့်မှာ စစ်ကော်မရှင်က ဘာကြောင့် ညမထွက်ရ အမိန့်ထုတ်လိုက်တာပါလဲ

ထိုင်းရောက် အလုပ်သမားတွေအတွက် ပန်းရောင်ကတ် ပြုလုပ်ရမယ့် နေရာတွေက ဘယ်နေရာတွေလဲ၊ ဘယ်လိုလုပ်ရမှာလဲ။ ယူကရိန်းတိုက်ပွဲမှာ လောင်စာ အရင်းအမြစ်တွေကို ဘာလို့ အပြန်အလှန် တိုက်ခိုက်နေကြတာလဲ။ ယူကေက အိန္ဒိယ နိုင်ငံကို အပေါ့စား ဒုံးကျည်တွေ ရောင်းပေးလိုက်ပါတယ်။

ကမ္ဘာကျော် မုဒိမ်းမှုတစ်ခုမှာ အယူခံဝင်တဲ့သူကို တရားရုံးက ဘယ်လို အမိန့်ချမှတ်လိုက်သလဲ … စတာတွေတင်ဆက်ထားပါတယ်။

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

အမေရိကန်က ဟော်မုဇ်ရေလက်ကြားတွင် အီရန်ကို ပိတ်ဆို့
BBC က ဝန်ထမ်း ၂၀၀၀ လျှော့မည်
ဥရောပတွင် လေယာဉ်ဆီ ၆ ပတ်စာသာကျန်တော့သည်ဟု IEA ဆို
အငြင်းပွား တောင်တရုတ်ပင်လယ်တွင် တရုတ်လှေမှ ပြင်းထန်သော အဆိပ်ငွေ့များ ဖမ်းဆီးရမိ
ဟော်မုဇ် ရေလက်ကြားကို ပိတ်ဆို့ရန် ဒေါ်နယ် ထရမ့်အမိန့်ပေး

Archives

Archives

×Close