စစ်ကော်မရှင်တပ် – Page 2 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Tag Archive

Tag: စစ်ကော်မရှင်တပ်

သီပေါမြို့ကို စစ်တပ်က တစ်နှစ်အကြာ၌ ပြန်လည်သိမ်းပိုက်၊ TNLA တပ်ဆုတ်၍ မြို့ပြင်၌ တိုက်ပွဲပြင်းထန်ဆဲ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၀ ရက်။ ရှမ်းပြည် မြောက်ပိုင်း၌ တအာင်းတပ် (TNLA) ထိန်းချုပ်ထားသော သီပေါမြို့ကို စစ်ကော်မရှင် တပ်ဖွဲ့ဝင်များက တစ်နှစ်ခန့်အကြာတွင် ပြန်လည်သိမ်းပိုက်လိုက်ကြောင်း TNLA က အတည်ပြုခဲ့သည်။ TNLA ပြောရေးဆိုခွင့်ရှိသူ လွေးယေဦး၏ ပြောဆိုချက်အရ စစ်ကော်မရှင်တပ်များ မြို့တွင်းသို့ ဝင်ရောက်နိုင်ခဲ့ သဖြင့် TNLA တပ်ဖွဲ့များမှာ မြို့ပြင်ဘက်သို့ တပ်ဆုတ်ခဲ့ရကြောင်း သိရသည်။ စစ်ကော်မရှင်တပ်ဘက်ကမူ ၎င်းတို့၏ စစ်ကြောင်းများ မြို့တွင်းဝင်ရောက်သည့် ဓာတ်ပုံများကို အောက်တိုဘာ လ (၁၇) ရက်နေ့တွင် ထုတ်ပြန်ကာ မြို့ကို ပြန်လည်သိမ်းပိုက်ကြောင်း ကြေညာခဲ့သည်။ စစ်ကော်မရှင်တပ်က TNLA ပူးပေါင်းတပ်ဖွဲ့များသည် မြို့ပေါ်ရှိ အကျဉ်းဦးစီးဌာန၊ အထွေထွေအုပ်ချုပ်ရေးမှူးရုံး၊ မြေစာရင်းရုံးနှင့် သီပေါဟိုတယ် အပါအဝင် ဌာနဆိုင်ရာရုံးအချို့ကို မီးရှို့ဖျက်ဆီးပြီး ထွက်ပြေးသွားခဲ့သဖြင့် ရှင်းလင်းရေး ဝင်ရောက်ခဲ့သည်ဟု စွပ်စွဲဖော်ပြသည်။ လေ့လာသူများ၏ အမြင်အရ စစ်ကော်မရှင်တပ်၏ ယခု နယ်မြေ ပြန်လည်ထိုးစစ်ဆင်နိုင်မှုသည် တရုတ်အစိုးရ ၏ ဖိအားပေးမှုကြောင့် ၁၀၂၇ စစ်ဆင်ရေး ရပ်ဆိုင်းလိုက်ရသည့် နောက်ဆက်တွဲ အခြေအနေ တစ်ရပ်ဖြစ်သည်။ စစ်ကော်မရှင်တပ်သည် ဇူလိုင်လ (၁၆) ရက်နေ့တွင် နောင်ချိုမြို့၊ အောက်တိုဘာလ (၁) ရက်နေ့တွင် ကျောက်မဲမြို့တို့ကို ပြန်လည်ရယူခဲ့ပြီးနောက် သီပေါမြို့ကိုပါ ထပ်မံသိမ်းပိုက်နိုင်ခဲ့ခြင်းဖြစ်သည်။ လက်ရှိတွင် သီပေါမြို့ပြင်ဘက်ရှိ ခမရ ၅၀၃ နှင့် ၅၀၄ ဘက်၌ တိုက်ပွဲများ ဆက်လက်ပြင်းထန်နေဆဲ ဖြစ်ကြောင်း TNLA က အတည်ပြုထားသည်။ ထို့အပြင် စစ်ကော်မရှင်တပ်သည် TNLA ထိန်းချုပ်နယ်မြေ ဖြစ်သည့် မိုးကုတ်မြို့ဘက်ကိုပါ စစ်ကြောင်းထိုး နေပြီး၊ မန်တုံ၊ မိုင်းငေါ့၊ နမ့်ဆန်၊ နမ္မတူ၊ မိုးမိတ်နှင့် မိုးကုတ်မြို့များကို နေ့စဉ်နီးပါး လေကြောင်းမှ ဗုံးကြဲတိုက်ခိုက် မှုများ ပြုလုပ်လျက်ရှိသည်။

သီပေါမြို့ကို စစ်တပ်က တစ်နှစ်အကြာ၌ ပြန်လည်သိမ်းပိုက်၊ TNLA တပ်ဆုတ်၍ မြို့ပြင်၌ တိုက်ပွဲပြင်းထန်ဆဲ  

ထိုင်းမြန်မာနယ်စပ် ကန်ချနဘူရီခရိုင် တဘက်ရှိ ထီးခီးဒေသကို စစ်ကော်မရှင် ဗုံးကြဲ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၁၆ ရက်။ ထိုင်း-မြန်မာနယ်စပ် ထီးခီးဒေသကို စစ်ကော်မရှင်တပ်က လေကြောင်းဖြင့် ထပ်မံ ဗုံးကြဲခဲ့ရာ အရပ်သား ၂ ဦး ဒဏ်ရာရခဲ့သည်။ စစ်ကော်မရှင်တပ်သည် ထိုင်း-မြန်မာနယ်စပ်ရှိ ကရင်အမျိုးသား အစည်းအရုံး (KNU) ထိန်းချုပ်နယ်မြေ ဖြစ်သော ထီးခီးကျေးရွာကို တိုက်ပွဲဖြစ်ပွားနေခြင်းမရှိဘဲ အောက်တိုဘာလအတွင်း တတိယအကြိမ်မြောက် လေယာဉ်ဖြင့် ဗုံးထပ်မံကြဲချတိုက်ခိုက်ခဲ့ရာ ရွာသားနှစ်ဦး ထိခိုက်ဒဏ်ရာရရှိခဲ့ကြောင်း ဒေသခံများက ပြော သည်။ နောက်ဆုံးတိုက်ခိုက်မှုကို အောက်တိုဘာလ ၁၄ ရက်နေ့၊ မွန်းလွဲ ၁၂ နာရီခွဲ အချိန်ခန့်က ဂျက်တိုက်လေယာဉ်ဖြင့် ဗုံး ၄ လုံး ကြဲချတိုက်ခိုက်ခဲ့ခြင်း ဖြစ်ပြီး၊ ဗုံးကြဲမှုကြောင့် ဈေးဆိုင်တစ်ဆိုင် မီးလောင်ပျက်စီးခဲ့ကာ အရပ်သား နှစ်ဦး ထိခိုက်ဒဏ်ရာရရှိခဲ့သည်။ ဒေသခံတစ်ဦးက “တိုက်ပွဲမရှိဘဲ ဗုံးလာကြဲနေတာက စစ်တပ်က ထိုးစစ်ဆင်ဖို့ ဖြစ်နိုင်ချေရှိနေတယ်။ ရွာသား တချို့လည်း နေမရဲတော့ဘူး၊ ရှောင်တိမ်းတဲ့သူတွေ ရှောင်နေကြပြီ” ဟု ပြောသည်။ ဗုံးကြဲတိုက်ခိုက်မှုများကြောင့် ကာစီနိုလောင်းကစားရုံများ အပါအဝင် အရပ်သားနေအိမ်များနှင့် အလုပ်ရုံ အဆောက်အအုံ အချို့ ထိခိုက်ပျက်စီးခဲ့ကြောင်း ၎င်းက ဆိုသည်။ စစ်ကော်မရှင်တပ်သည် အောက်တိုဘာလ ၈ ရက်နေ့မှ စတင်၍ ကေအန်ယူ တပ်မဟာ(၄) ထိန်းချုပ်နယ်မြေ ဖြစ်သည့် ထီးခီးဒေသကို စတင် ဗုံးကြဲတိုက်ခိုက်ခဲ့ခြင်း ဖြစ်ပြီး၊ အောက်တိုဘာလ ၁၀ ရက်နေ့တွင်လည်း တစ်ကြိမ် ထပ်မံဗုံးကြဲခဲ့သဖြင့် ယခုလအတွင်း ၃ ရက် ၃ ကြိမ်အထိ လေယာဉ်ဖြင့် တိုက်ခိုက်မှုများ ရှိလာခဲ့ သည်။ လက်ရှိတွင် ထားဝယ်ခရိုင်အတွင်းရှိ ကံပေါက်ဒေသနှင့် ထိစပ်နေသည့် နတ်အိမ်တောင်စခန်းမှလွဲ၍ ထိုင်း-မြန်မာ နယ်စပ်ဒေသ တစ်ခုလုံးကို ကေအန်ယူ (KNU) မှ ထိန်းချုပ်ထားသည်။ ယင်းဒေသ၌ ၂၀၂၅ ခုနှစ်၊ ဧပြီလ ၁၉ ရက်နေ့တွင် ထီးထစခန်း၊ မေလ ၉ ရက်နေ့တွင် ထီးခီးနယ်စပ်စခန်းနှင့် နယ်စပ် ကုန်သွယ်ရေးဂိတ်၊ ဇွန်လ ၁၀ ရက်နေ့တွင် ဗောဓိစခန်း၊ ဇူလိုင်လ ၇ ရက်နေ့တွင် သုခစခန်းများကို ကေအန်ယူ (KNLA) နှင့် ပြည်သူ့ကာကွယ်ရေး မဟာမိတ်ပူးပေါင်းတပ်ဖွဲ့များက တိုက်ခိုက်သိမ်းယူထားခဲ့သည်။ ထိုသို့ တိုက်ခိုက်သိမ်းယူခဲ့ပြီးနောက် စစ်ကော်မရှင်တပ်ဘက်မှ လေကြောင်းဖြင့် မကြာခဏ တိုက်ခိုက်လာခြင်း ဖြစ်သည်။

ထိုင်းမြန်မာနယ်စပ် ကန်ချနဘူရီခရိုင် တဘက်ရှိ ထီးခီးဒေသကို စစ်ကော်မရှင် ဗုံးကြဲ

ပူတာအိုတွင် စစ်တပ်ထောက်ခံပွဲကို လုံခြုံရေး အပြည့်ဖြင့် ကျင်းပ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၈ ရက်။ ကချင်ပြည် မြောက်ဖျားပိုင်းက ပူတာအိုမြို့တွင် စစ်ကော်မရှင်တပ်နှင့် ပြည်သူ့စစ် ထောက်ခံပွဲ လုပ်ခဲ့သည်ဟု ဒေသခံများက ပြောသည်။ စစ်တပ် ထောက်ခံပွဲကို လုံခြုံရေးအပြည့်ဖြင့် လုပ်ခဲ့ခြင်း ဖြစ်သည်ဟု မြို့ခံအချို့က ပြောသည်။ လက်နက် ယူနီဖောင်း အပြည့်အစုံနှင့် ပြည်သူ့စစ်အဖွဲ့ဝင်များ၊ ရဲတပ်ဖွဲ့ဝင်များက လုံခြုံရေး ယူထားပြီး ပူတာအို မြို့ပေါ်တွင် စစ်ကော်မရှင်နှင့် ပြည်သူ့စစ်အဖွဲ့တို့ကို ထောက်ခံသည့်ပွဲအား အောက်တိုဘာလ ၇ ရက်နေ့က လုပ်ခဲ့ ကြခြင်း ဖြစ်သည်။ လူအင်အား ၂၀၀ ကျော်ခန့်က လှည့်လည်စီတန်းပြီး စစ်တပ်နှင့် ပြည်သူ့စစ်အဖွဲ့တို့ကို ထောက်ခံကြောင်း၊ ကချင် လွတ်လပ်ရေး တပ်မတော် KIA ကို ဆန့်ကျင်ကြောင်း ဆန္ဒထုတ်ဖော်ခဲ့ကြခြင်း ဖြစ်သည်ဟု ဒေသခံတစ်ဦးက ပြောသည်။ ဦးတန်ဂူးတန် ပိုင်ဆိုင်သည့် ခြံဝန်းထဲတွင် လူစုပြီး ဆန္ဒပြမှုကို စစ်ကော်မရှင် လက်အောက်ခံ ခေါင်လန်ဖူးဌာနေ ပြည်သူ့စစ်အဖွဲ့နှင့် ၎င်းတို့ကို ကျောထောက်နောက်ခံပြုထားသည့် ရိုးရာယဉ်ကျေးမှုအဖွဲ့တို့က ဦးဆောင်ပြီး လုပ် ခဲ့ခြင်း ဖြစ်သည်။ ဘိုးဘွားပိုင်နယ်မြေများ တည်တံ့ရေး၊ တိုင်းရင်းသားများ စည်းလုံးညီညွတ်ရေး၊ လန်ဆယ်ဒေသ ပြန်လည်ရရှိ ရေး၊ လန်ဆယ်ဒေသ စစ်ဆင်ရေးများ အောင်ရမည်ဟု ကြွေးကြော်ခဲ့ကြသည့်အပြင် အဆိုပါ စာသားများပါသော ဗီနိုင်းများ ကိုင်ပြီး လှည့်လည်ခဲ့ကြခြင်း ဖြစ်သည်။ အလားတူ အောက်တိုဘာ ၄ ရက်နေ့တွင်လည်း ခေါင်လန်ဖူးမြို့၌ စစ်တပ် ထောက်ခံပွဲလုပ်ခဲ့ကြသေးသည်ဟု မြေပြင် သတင်းအရင်းအမြစ်က ဆိုသည်။

ပူတာအိုတွင် စစ်တပ်ထောက်ခံပွဲကို လုံခြုံရေး အပြည့်ဖြင့် ကျင်းပ

မုံရွာ နမခ တိုက်ခိုက်ခံရမှု အရာရှိ/စစ်သား ၁၂ ဦး သေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာ ၈ ရက်။ မုံရွာမြို့အခြေစိုက် အနောက်မြောက်တိုင်း စစ်ဌာနချုပ် (နမခ) ကို ဒေသခံ တော်လှန်ရေးတပ်ဖွဲ့များက ရော့ကတ် ၁၀ လုံးနှင့် ပစ်ခတ် တိုက်ခိုက်ခဲ့ရာ စစ်တပ်ဘက်က အရာရှိ ၅ ဦး အပါအဝင် ၁၂ ဦး သေဆုံးခဲ့သည်။ အဆိုပါ တိုက်ခိုက်မှုမှာ စစ်ကိုင်းတိုင်းဒေသကြီး၊ မုံရွာမြို့ပေါ်ရှိ အရေးပါသော စစ်ရေးပစ်မှတ်တစ်ခုကို တော် လှန်ရေး အဖွဲ့များဘက်က ကြီးမားသည့် ထိုးစစ်ဆင် တိုက်ခိုက်မှု ဖြစ်ပြီး ရိက္ခာဂိုဒေါင် ၂ လုံးလည်း ပျက်စီး သွားခဲ့သည်။ စစ်တိုင်းရုံးက အရာရှိ ၅ ဦး ပွဲချင်းပြီး သေဆုံးခဲ့ပြီး ရိက္ခာဂိုထောင်စောင့် စစ်သား ၂ ဦးလည်း ပွဲချင်းပြီး သေဆုံး ခဲ့သည်ဟု Chindwin Rocket Brother (CRB) အဖွဲ့က အောက်တိုဘာလ ၇ ရက်နေ့တွင် သတင်းထုတ်ပြန်သည်။ ထို့အပြင် တပ်တွင်းမိသားစု ၅ စု ထိခိုက်ခဲ့ပြီး အဆိုပါ ထိခိုက်မှုထဲ၌ မိသားစုဝင် ၅ ဦးက ပွဲချင်းပြီး သေဆုံး သွားခဲ့သည်။ အလားတူ ထိမှန် ဒဏ်ရာရသွားသည့် သူများကိုမူ တပ်ဆေးရုံသို့ အရေးပေါ်ပို့ခဲ့ရသည်ဟု ဆိုသည်။ ထိုတိုက်ခိုက်မှုကို အောက်တိုဘာလ ၂ ရက်နေ့၊ ည ၈ နာရီအချိန်၌ တော်လှန်ရေးတပ်များ ပူးပေါင်းပြီး လုပ်ခဲ့ခြင်း ဖြစ်သည်ဟုလည်း ဗမာ့တပ်တော်က ထုတ်ပြန်ထားသည်။ ရိက္ခာဂိုဒေါင် ၂ ခု ပျက်စီးခဲ့ခြင်းကြောင့် ရှေ့တန်း စစ်ဆင်ရေးအတွက် စစ်ရေးအရ အရေးပါသည့် ထောက်ပံ့ရေး ပိုင်းကို ထိခိုက်စေနိုင်သည်ဟု သုံးသပ်မှုများ ရှိနေသည်။ မုံရွာ နမခ ကို တိုက်ခိုက်နိုင်ခဲ့ခြင်းမှာ စစ်ကိုင်းတိုင်းအတွင်းက ဒေသခံ တော်လှန်ရေးအင်အားစုများ အတွက် အရေးပါသည့် စစ်ရေးအောင်မြင်မှု တစ်ခုအဖြစ် တော်လှန်ရေး တပ်ဖွဲ့များက သုံးသပ်ထားသည်။ နမခ သည် စစ်ကိုင်းတိုင်းနှင့် ချင်းပြည် မြောက်ပိုင်းက စစ်ဆင်ရေးတို့ကို ဦးဆောင်ကွပ်ကဲသည့် ဗဟိုဌာန ဖြစ် သောကြောင့် အဆိုပါ ဌာနချုပ်ကို တိုက်ခိုက်နိုင်ခြင်းမှာ ဒေသတွင်း စစ်တပ်၏ ထိန်းချုပ်မှုနှင့် လုံခြုံရေး အားနည်းချက်ကို မီးမောင်းထိုးပြရာ ရောက်သည်ဟုလည်း ဆိုကြသည်။ သို့သော် စစ်ကော်မရှင်တပ်ဘက်ကမူ ယခု တိုက်ခိုက်ခံရမှုနှင့် ပတ်သက်၍ တစ်စုံတစ်ရာ ထုတ်ဖော်ပြောဆိုခြင်း မျိုး မရှိသေးပေ။

မုံရွာ နမခ တိုက်ခိုက်ခံရမှု အရာရှိ/စစ်သား ၁၂ ဦး သေဆုံး

မိုင်းလုံနှင့် မိုင်းငေါ့ လေကြောင်း တိုက်ခိုက်ခံရမှုထဲ အရပ်သား တစ်ဒါဇင်သေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၈ ရက်။ ရှမ်းပြည် မြောက်ပိုင်း၊ ကျောက်မဲခရိုင်ထဲက မြို့နယ်ခွဲ အဆင့်ရှိသည့် မိုင်းလုံမြို့နယ်နှင့် မိုင်းငေါ့မြို့နယ်တို့ကို စစ်ကော်မရှင်တပ်က လေကြောင်းမှ ဗုံးကြဲတိုက်ခိုက်ခဲ့ရာ အရပ်သား တစ်ဒါဇင်သေဆုံးခဲ့သည်။ မိုင်းလုံမြို့နယ်ထဲက မန်ဟုန်းကျေးရွာ လေကြောင်း တိုက်ခိုက်ခံရမှုထဲ ဒေသခံ ၁၀ ဦး သေဆုံးခဲ့ပြီး ၃ ဦး ထိမှန် ဒဏ်ရာ ရခဲ့သည်။ အလားတူ အောက်တိုဘာလ ၈ ရက်နေ့၊ နံနက်ပိုင်း ၁၁ နာရီအချိန်ခန့်တွင် မိုင်းငေါ့မြို့ကို လေကြောင်းကနေ ဗုံးကြဲတိုက်ခိုက်ခဲ့ရာ ပြည်သူ ၂ ဦးသေဆုံးခဲ့ပြီး ၂ ဦး ဒဏ်ရာ ရရှိခဲ့သည်။ မိုင်းလုံမြို့နယ်နှင့် မိုင်းငေါ့မြို့နယ်တို့ကို နှစ်ရက် ဆက်တိုက် ဗုံးကြဲတိုက်ခိုက်သွားခဲ့ခြင်း ဖြစ်သည်။ အဆိုပါ မြို့နယ်တို့မှာ တအာင်းတပ် TNLA က ထိန်းချုပ်ထားသည့် ဒေသများ ဖြစ်သည်။ မိုင်းလုံးဖြစ်စဉ်နှင့် ပတ်သက်၍ ဒေသခံတစ်ဦးက “ဖြစ်တဲ့နေရာက မိုးကုတ် လမ်းမကြီးကနေ သွားရတာ။ တော် တော်လေး သွားရတဲ့ရွာပါ။ ဒီရွာကို မနေ့က နေ့လည် ၁၂ နာရီခွဲလောက်မှာ လာကြဲသွားတာပါ။ မိုင်းလုံမြို့နယ် ထဲက ရွာပါ။ ရွာနာမည်လား မန်ဟုန်းရွာလို့ ခေါ်တယ်။ ပေါင် ၂၅၀ ဗုံးနှစ်လုံး ကြဲသွားတယ်ဆိုတာ မှန်ပါတယ် ဗျ။ TNLA က ထုတ်ထားသလိုပဲ ဒီ သေတဲ့လူတွေ ကလေးတစ်ယောက်ပါတာလည်း မှန်ပါတယ်ဗျ။ သေဆုံး အားလုံးက ၁၀ ယောက်ပါ” ဟု ပြောသည်။ မန်ဟုန်းကျေးရွာကို အောက်တိုဘာလ ၇ ရက်နေ့၊ နေ့လည် ၁၂ ခွဲအချိန်ခန့်တွင် စစ်ကော်မရှင်တပ်က လေကြောင်းမှ ပေါင် ၂၅၀ ဗုံး ၂ လုံးကြဲခဲ့ခြင်း ဖြစ်သည်ဟု ဒေသခံများက ပြောသည်။ လေကြောင်း တိုက်ခိုက်ခံရမှုထဲ အသက် ၂ နှစ်အရွယ် ကလေးတစ်ဦး အပါအဝင် ပြည်သူ ၁၀ ဦး သေဆုံးခဲ့ပြီး ၃ ဦး ထိမှန်ဒဏ်ရာ ရခဲ့သည်ဟု တအာင်းတပ် TNLA က ထုတ်ပြန်ထားသည်။ ထို့အပြင် ကျေးရွာထဲက အရပ်သား နေအိမ်များလည်း ထိမှန်ပျက်စီးကုန်သည်ဟု ဆိုသည်။ အလားတူ အောက်တိုဘာလ ၈ ရက်နေ့ (ယနေ့)၊ နံနက်ပိုင်း ၁၁ နာရီအချိန်ခန့်ကလည်း မိုင်းငေါ့မြို့ကို လေကြောင်းမှ ဗုံးကြဲတိုက်ခိုက်ခဲ့သောကြောင့် ပြည်သူ ၂ ဦး သေဆုံးပြီး ၂ ဦး ထိမှန်ဒဏ်ရာ ရရှိခဲ့သည်။ မိုင်းငေါ့မြို့ကို ပေါင် ၂၅၀ ဗုံးနှင့် ကြဲခဲ့ရာ အရပ်သား ထိမှန်သေဆုံးဒဏ်ရာ ရရှိမှုများအပြင် အိမ် ၈ လုံး ထက် မနည်း ထိမှန်ပျက်စီးသွားခဲ့သည်ဟု မြေပြင် သတင်းအရင်းအမြစ်က ပြောသည်။ မိုင်းငေါ့ဒေသခံ အမျိုးသား တစ်ဦးက “လေယဉ်ကျသွားတာ ရဲစခန်းရှေ့မှာ ၂ လုံးကျတာ၊ အဲ့ဘက်မှာ လူထိ သွားတယ် ဒဏ်ရာလည်းရတယ်၊ ရော့ကဒ်လည်း ပစ်တယ်၊ ရော့ကဒ်က ထွေအုပ်ရုံးမှာနဲ့ ရဲစခန်း လမ်းကြားမှာ ကျတာ၊ ဘန်ခေါက်ရွာသွားတဲ့လမ်းပေါ့၊ အခုလောလောဆယ် လေယဉ်က မြို့ထဲမှာ ကြဲသွားပြီ” ဟု တအာင်း အမျိုးသမီးဖွဲ့ TWO ကို ပြောသည်။ စစ်ကော်မရှင်တပ်က မိုင်းငေါ့မြို့က စျေးရပ်ကွက်တွင် ရော့ကဒ် ဗုံး (၂) လုံး၊ တာလုံရပ်ကွက်တွင် ရော့ကဒ် ဗုံး (၂) လုံး ကြဲချတိုက်ခိုက်ခဲ့ခြင်း ဖြစ်သည်။ အသက် (၅၀) နှစ် အရွယ်ရှိ ဒေါ်လှရီ၊ အသက် (၅၆) နှစ်အရွယ် ဦးရွှေဟုန်း ထိမှန်သေဆုံးခဲ့ပြီး အသက် (၁၈) နှစ် အရွယ်ရှိ မထွေးထွေးအောင်နှင့် အသက် (၅၀) နှစ် အရွယ် ဦးတင်မောင်အေးတို့ကို ထိမှန်ဒဏ်ရာရရှိခဲ့သည်ဟု တအာင်းတပ် TNLA က ထုတ်ပြန်သည်။

မိုင်းလုံနှင့် မိုင်းငေါ့ လေကြောင်း တိုက်ခိုက်ခံရမှုထဲ အရပ်သား တစ်ဒါဇင်သေဆုံး

ကျောက်မဲက ပြည်သူ ၈,၀၀၀ ကျော် စစ်ဘေးတိမ်းရှောင်နေရ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၉ ရက်။ ရှမ်းပြည်မြောက်ပိုင်း၊ ကျောက်မဲမြို့နယ်ထဲက ပြည်သူ ၈,၆၀၀ ကျော် စစ်ဘေးလွှတ်ရာသို့ ထွက်ပြေးတိမ်းရှောင် နေကြရသည်။ စစ်ကော်မရှင်တပ်၏ လေကြောင်းအပြင် မြေပြင်မှ ထိုးစစ်များ၊ လက်နက်ကြီးဖြင့် ပစ်ခတ်မှုများနှင့် တိုက်ပွဲများ ကြောင့် ကျောက်မဲ ပြည်သူ ၈,၆၀၀ ကျော် နေရပ်မှ ထွက်ပြေး တိမ်းရှောင်နေရသည်ဟု ရှမ်း လူ့အခွင့်အရေး မဏ္ဍိုင် SHRF က စက်တင်ဘာလ ၉ ရက်နေ့တွင် ထုတ်သည်။ SHRF က “ကျောက်မဲမြို့နယ်၌ စစ်ကောင်စီ၏ လေကြောင်းနှင့် မြေပြင်မှ ထိခိုက်သေဆုံးစေနိုင်သော ပစ်ခတ် တိုက်ခိုက်မှုများကြောင့် အရပ်သားပြည်သူ ၂၉ ဦးသေဆုံးကာ အများစုမှာ ဘုန်းကြီးကျောင်းများတွင် ဖြစ်ပြီး ၆၆ ဦး ဒဏ်ရာရရှိခဲ့ရာ အရပ်သားပြည်သူ ၈,၆၀၀ ကျော် မှာ ထွက်ပြေးတိမ်း ရှောင်ခဲ့ကြရသည်” ဟု ဆိုသည်။ အဆိုပါ စာရင်းမှာ ဩဂုတ်လ ၁၈ ရက်နေ့မှ ၃၀ ရက်နေ့ အတွင်း ထွက်ပြေးတိမ်းရှောင်ရသည့် စာရင်းဟု ဆိုရမည်။ ကျောက်မဲမြို့နယ်ထဲ စစ်တပ်၏ ပစ်ခတ်တိုက်ခိုက်မှုများကြောင့် အရပ်သားပြည်သူ ၂၉ ဦး သေဆုံးပြီး ၆၆ ဦး ထိမှန်ဒဏ်ရာ ရခဲ့သည်ဟု SHRF က ဆိုသည်။ ဖြစ်စဉ်အများစုမှာ ဘုန်းကြီးကျောင်းနေရာများ၌ ဖြစ်ခဲ့သည်ဟု ထုတ်ပြန်ထားသည်။ စစ်တပ်က လေကြောင်းအပြင် လက်နက်ကြီးဖြင့် ပစ်ခတ်တိုက်ခိုက်ရာ ကျောက်မဲမြို့နယ်ထဲက နောင်ပိန် ကျေးရွာအုပ်စုကို အဓိက ပစ်မှတ်ထားခဲ့သည်ဟု ဒေသခံများက ပြောသည်။ ဗုံးများနှင့် လက်နက်ကြီးကျည်များသည် နောင်ပိန်ကျေးရွာအုပ်စုကို ဖြတ်သန်းသွားသည့် တရုတ်နိုင်ငံ၏ ရေနံနှင့် သဘာဝဓာတ်ငွေ့ပိုက်လိုင်းများအနီး အန္တရာယ် ရှိလောက်အောင် ကျရောက်ပေါက်ကွဲခဲ့သည်ဟု SHRF က ဆိုသည်။ ဒေသခံတစ်ဦးက “အခုက လေယာဉ်လည်း နေ့တိုင်းလာတယ်လို့ ပြောလို့ရတယ်။ တိုက်ပွဲကလည်း ဆက်တိုက် ဖြစ်နေတော့ လူတောင် မရှိတော့ဘူး။ မြို့ထဲဆိုလည်း လူပြတ်တယ်။ ရွာလမ်းတွေပေါ်လည်း လူက မရှိတော့ ဘူး။ ရှောင်တဲ့လူတွေက ရှောင်ကုန်တာပေါ့နော်။ ရွာမှာ မြို့မှာ ကျန်ခဲ့တဲ့လူတွေကလည်း အရင်လို ဘယ်သူမှ အပြင် မထွက်ကြတော့ဘူး သတိနဲ့နေရတာပေါ့ဗျာ။ ကျောက်မဲ ဗဟိုစျေး၊ မနက်စျေးတွေမှာလည်း လူမရှိ တော့ဘူး” ဟု ပြောသည်။ နောင်ချိုမြို့နယ်ဘက်မှ စစ်ကြောင်းထိုးလာသည့် စစ်ကော်မရှင်တပ်က မူဆယ် - မန္တလေး ကားလမ်းမပေါ်မှ တအာင်း တပ်မတော် (TNLA) ကို ရှင်းလင်းဖယ်ရှားနိုင်ရေး ကြိုးပမ်းနေသည်ဟု SHRF က ဆိုသည်။ ကျောက်မဲမြို့ခံ အမျိုးသားတစ်ဦးက “ဒီနေ့မနက် အစောကြီးနော် ၁ နာရီလောက်မှာပဲ ကျောက်မဲမြို့က လွယ် ခေါ် ရွာဖက် လေယာဉ်နဲ့ ဗုံးကြဲသွားသေးတယ်။ နောက်ပြီးတော့ ပြီးခဲ့တဲ့ ၇ ရက်နေ့တုန်းကရော၊ ၆ ရက်နေ့မှာ ရော လေယာဉ်က ဗုံးကြဲသွားတယ်ဗျ။ ၇ ရက်နေ့ရော ၆ ရက်ရော ညပိုင်းပဲ ကျောက်မဲ (၇) ရပ်ကွက် မြောက် ကုန်းကို ကြဲတာ၊ အိမ်တွေ ပျက်ကုန်တယ်။ ကုန်စုံဆိုင်နားလေးကို ကြဲတာဗျ။ လူတော့ ထိတာမရှိဘူး” ဟု ပြော သည်။ စစ်ရှောင် ၈,၆၀၀ ကျော်မှာ လက်ရှိတွင် ကျောက်မဲမြို့နယ် တောင်ပိုင်းက ရှမ်းပြည်တိုးတက်ရေးပါတီ (SSPP) ထိန်းချုပ်နယ်မြေထဲသို့ ထွက်ပြေးခိုလှုံနေကြရခြင်း ဖြစ်သည်။ ထိုစစ်ရှောင်ပြည်သူများမှာ သောက်သုံးရေ၊ အစားအသောက်၊ ဆေးဝါးနှင့် အခြား အခြေခံလိုအပ်ချက်များ ပြတ်လပ်မှုနှင့် ရင်ဆိုင်နေရသောကြောင့် အကူအညီများ လိုအပ်နေသည်ဟု ၎င်းတို့အား ကူညီပေးနေသူများက ပြောသည်။

ကျောက်မဲက ပြည်သူ ၈,၀၀၀ ကျော် စစ်ဘေးတိမ်းရှောင်နေရ

သပိတ်ကျင်းတွင် စာသင်နေသည့်အိမ် လေကြောင်းမှ ဗုံးကြဲခံရ၊ ကလေးတစ်ဦးသေ၊ ၇ ဦးဒဏ်ရာရ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၉ ရက်။ မန္တလေးတိုင်း၊ သပိတ်ကျင်းမြို့နယ်ထဲက ကျောက်ဖြူကျေးရွာရှိ ကလေးငယ်များ စာသင်နေသည့် နေအိမ်ကို စစ်ကော်မရှင်တပ်က လေကြောင်းမှာ တိုက်ခိုက်ခဲ့ရာ ကလေးငယ်တစ်ဦး သေဆုံးပြီး ၇ ဦး ထိမှန် ဒဏ်ရာရခဲ့ သည်။ တော်လှန်ရေးတပ်များ ထိန်းချုပ်ထားသည့် သပိတ်ကျင်းမြို့နယ်ထဲက ကျောက်ဖြူကျေးရွာကို စစ်တပ်က လေယာဉ်သုံးပြီး ဗုံးကြဲတိုက်ခိုက်ခဲ့ခြင်း ဖြစ်သည်ဟု မန္တလေး PDF အဖွဲ့က ထုတ်ပြန်ထားသည်။ ဒေသခံတစ်ဦးက “လေယာဉ်နဲ့ ပစ်သွားတာပါဗျ။ ကျနော်တို့ဆီက ကလေးတွေ စာသင်နေတဲ့ အိမ်ထိသွားတာ ပါ။ စာသင်ဝိုင်းလို့ပဲ ပြောရမှာပေါ့နော်။ အဲ့ဒီစာသင်ဝိုင်းကို ဗုံးကြဲတာ၊ ကလေးတစ်ယောက်သေတယ်။ ၇ ယောက် ဒဏ်ရာရတဲထဲမှာ ဆရာမက တစ်ယောက်ပေါ့နော်။ အသက်လား အသက်က ၁၀ နှစ်အောက် ကလေး တွေပါဗျ။ လေယောဉ်က တစ်ခါတည်းလာတာမဟုတ်ဘူးနော်၊ နှစ်ခါလာပြီး ကြဲသွားတာပါဗျ” ဟု ပြောသည်။ သပိတ်ကျင်းမြို့နယ်၊ ကျောက်ဖြူကျေးရွာမှာ တော်လှန်ရေး တပ်ဖွဲ့များ ထိန်းချုပ်ထားသည့် နေရာ ဖြစ်သော် လည်း တိုက်ပွဲဖြစ်ပွားခြင်းမျိုး မရှိဘူးဟုဆိုသည်။ တိုက်ပွဲဖြစ်ပွားခြင်း မရှိဘဲ စက်တင်ဘာလ ၇ ရက်နေ့၊ နေ့လည်ပိုင်း ၂ နာရီခန့်အချိန်၌လည်းကောင်း၊ ည ၁၁ နာရီကျော် အချိန်တွင်လည်းကောင်း စစ်ကော်မရှင်တပ်က အကြောင်းမဲ့ လေကြောင်းမှ ဗုံးကြဲတိုက်ခိုက်ခဲ့ခြင်း ဖြစ်သည်ဟု ဆိုသည်။ ကျောက်ဖြူကျေးရွာထဲက ကလေးငယ်များအား စာသင်ကြားပေးနေသည့် နေအိမ် လေယာဉ်ဖြင့် ဗုံးကြဲခံရမှုထဲ အသက် ၁၀ နှစ်အရွယ် ကလေးငယ် ၁ ဦးသေဆုံးခဲ့ပြီး ကလေးငယ် ၅ ဦး အပါအဝင် အရပ်သား ၇ ဦး ထိမှန်ဒဏ်ရာ ရခဲ့သည်။ သပိတ်ကျင်းမြို့ တောင်ဘက် ၁၀ မိုင်ခန့်အကွာက မန္တလေး - မြစ်ကြီးနား လမ်းပေါ်ရှိ ကျောက်ဖြူကျေးရွာကို စစ်ကော်မရှင်တပ်က လေယာဉ်သုံး ဗုံးကြဲ တိုက်ခိုက်ခဲ့သည့်အပြင် လေယာဉ်ပေါ်မှလည်း စက်သေနတ်ဖြင့်ပါ ပစ်ခတ်တိုက်ခိုက်ခဲ့သည်ဟု ဒေသခံများက ပြောသည်။ စစ်ကော်မရှင်တပ်က အရပ်သား ပစ်မှတ်များ ဖြစ်သည့် ရပ်ရွာများ၊ ဆေးရုံ ဆေးခန်းများ၊ ဘုန်းကြီးကျောင်း များနှင့် စာသင်ကျောင်းများကို မကြာခဏ ဦးတည်တိုက်ခိုက်နေသည်ဟု မန္တလေး PDF အဖွဲ့က ဆိုသည်။ ထိုသို့ အရပ်သားပစ်မှတ်များကို တိုက်ခိုက်နေခြင်းသည် စစ်ရာဇဝတ်မှုမြောက်ပြီး အောက်တန်းကျသည့် လုပ်ရပ်ဖြစ်သည်ဟုလည်း မန္တလေး PDF အဖွဲ့၏ ထုတ်ပြန်ချက်ထဲတွင် ရေးသားဖော်ပြထားသည်။

သပိတ်ကျင်းတွင် စာသင်နေသည့်အိမ် လေကြောင်းမှ ဗုံးကြဲခံရ၊ ကလေးတစ်ဦးသေ၊ ၇ ဦးဒဏ်ရာရ

ဖရူဆိုသို့ စစ်ကြောင်းထိုးလာသော စစ်ကော်မရှင်တပ်များ တိုက်ခိုက်ခံနေရ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၇ ရက်။ ကရင်နီပြည်၊ ဖရူဆိုမြို့နယ်ထဲသို့ စစ်ကြောင်းထိုးလာနေသည့် စစ်ကော်မရှင်တပ် တိုက်ခိုက်ခံရပြီး ထိခိုက် သေဆုံးမှုများ ရှိနေသည်။ ကရင်နီ တော်လှန်ရေး ပူးပေါင်းအဖွဲ့က စစ်ကော်မရှင် စစ်ကြောင်းကို ဟန့်တား တိုက်ခိုက်နေသဖြင့် မြေပြင်တွင် နှစ်ဖက်ကြား တိုက်ပွဲများ ပြင်းထန်နေသည်ဟု မြေပြင် သတင်းအရင်းအမြစ်က ပြောသည်။ ကရင်နီ တော်လှန်ရေး ပူးပေါင်းအဖွဲ့ တာဝန်ရှိသူတစ်ဦးက “သူတို့ ‘ကဒါးလား’ အထိတော့ ရောက်ပြီပေါ့နော်။ မနေ့က စဖြစ်တယ်။ တိုက်ပွဲတွေတော့ တောက်လျှောက် ဆက်ပြီးတော့ ဖြစ်နေသေးတယ်ပေါ့နော်” ဟု ပြော သည်။ နှစ်ဖက်ကြား တိုက်ပွဲမှာ ဩဂုတ်လ ၂၅ ရက်နေ့က စဖြစ်ခဲ့သည်ဟု ဆိုသည်။ ဩဂုတ်လ ၂၅ ရက်နေ့က တိုက်ခိုက်ခံရမှုထဲ စစ်သား ၃ ဦး သေဆုံးခဲ့သည့်အပြင် ၆ ဦး ထိမှန် ဒဏ်ရာ ရခဲ့သည်ဟု ကရင်နီ တော်လှန်ရေး ပူးပေါင်းတပ်ဘက်က ပြောသည်။ ဒီးမော့ဆိုမြို့နယ်ဘက်မှ ထိုးစစ်ဆင်လာသည့် အင်အားရာဂဏန်းပါရှိသော စစ်ကြောင်းသည် လက်ရှိတွင် ဖရူဆို မြို့မှ ၈ မိုင်ခန့် အကွာတွင်ရှိသော ထီးသော်ကူးနှင့် ကဒါးလားကျေးရွာထဲ၌ ဝင်ရောက်နေရာယူထားပြီး စစ်ရေး ဆက်လက်တင်းမာနေသည်ဟု ဆိုသည်။ ထို့အပြင် ဒီးမော့ဆိုမြို့နယ်ထဲ၌လည်း တိုက်ပွဲများ ဆက်လက်ပြင်းထန်နေပြီး စစ်ကော်မရှင်တပ်၏ ဒရုန်းနှစ်စီး ကို ကရင်နီ ပူးပေါင်းတပ်ဖွဲ့ဘက်က ဖျက်ဆီးနိုင်ခဲ့သည်။ ဒီးမော့ဆိုမြို့နယ်မှ ဖရူဆိုမြို့နယ်ဘက်ကို ပြည်ထောင်စု လမ်းမကြီးအတိုင်း စစ်ကော်မရှင်တပ်က စစ်ကြောင်း ထိုးနေခြင်း ဖြစ်သည်။ ကရင်နီ တော်လှန်ရေး တပ်ဖွဲ့ဝင်တစ်ဦးက “တိုက်ပွဲက ဆက်တိုက်ဖြစ်တော့ ချေမှုန်းရေးတက်တဲ့ အချိန် သူ့တို့ ဘက်က ထိခိုက်ကျဆုံးမှု နည်းနည်းရှိတယ်ပေါ့နော်။ လောလောဆယ် ကဒါးလား၊ ထီးသော်ကူး အထိတော့ သူတို့ နေရာယူထားတယ်ပေါ့နော်” ဟု ပြောသည်။ စစ်ကော်မရှင်တပ်ဘက်က သေဆုံးဒဏ်ရာရသူများကို ဆိုင်ကယ်ဖြင့် လာရောက်သယ်ဆောင်ကာ ဒီးမော့ဆိုမြို့ ဘက်သို့ ပြန်လည်ပို့ဆောင်ခဲ့သည်ဟု ဆိုသည်။ ဩဂုတ်လ ၂၅ ရက်နေ့တွင် ဖရူဆိုအခြေစိုက် စစ်ကော်မရှင် တပ်စခန်းသည် ပြည်သူများ အစုလိုက်အပြုံလိုက် မီးရှို့သတ်ဖြတ်ခံခဲ့ရသော ဖရူဆိုအနောက်ခြမ်းရှိ မိုဆိုကျေးရွာအနီးထဲ နေရာအထိ စစ်ကြောင်းထိုးလာခဲ့သည်ဟု ဒေသခံများက ပြောသည်။ ဖရူဆိုမြို့နယ်တွင် စစ်ကော်မရှင်တပ် လက်အောက်ခံ အမှတ် (၁၄) တန်းမြင့် စစ်ရေးလေ့ကျင့်ရေးကျောင်း အပြင် ခမရ - ၄၂၈၊ ခမရ - ၅၃၁ တို့ အခြေချ တပ်စွဲထားသည်။ ဒီးမော့ဆိုမြို့နယ်ဘက်မှ ထွက်လာသော အဆိုပါ စစ်ကြောင်းသည် ဆက်လက် စစ်ကြောင်းထိုးရန် ပြင်ဆင်နေပြီး ဘောလခဲ အထိ စစ်ကြောင်းထိုးနိုင်သည်ဟု စစ်ရေးလေ့လာသုံးသပ်သူများက ပြောသည်။ Photo - CJ ဖရူဆိုမြို့အတွင်း ဝင်ရောက်စစ်ကြောင်းထိုးနေသည့် စစ်ကောင်စီတပ်သားများ (ပုံဟောင်း )

ဖရူဆိုသို့ စစ်ကြောင်းထိုးလာသော စစ်ကော်မရှင်တပ်များ တိုက်ခိုက်ခံနေရ

စစ်ကော်မရှင် တပ်နှင့် ဆက်စပ်သည်ဆိုသော ဆီအုန်းခြံမှ ဝန်ထမ်းခြောက်ဦး ဖမ်းဆီးခံရ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၆ ရက်။ စစ်ကော်မရှင်တပ်နှင့် ဆက်စပ်မှု ရှိနေသည်ဟု ဆိုကာ ဦးပိုင်ကုမ္ပဏီပိုင် ဆီအုန်းခြံမှ ဝန်ထမ်း ခြောက်ဦးနှင့် မိသားစုဝင်တစ်ဦးတို့ ဖမ်းဆီးခံလိုက်ရသည်။ ထားဝယ်ခရိုင်၊ ရေဖြူမြို့နယ်၊ ကံပေါက်ကျေးရွာအုပ်စု ဂန့်ဂေါ်တောင်ကျေးရွာတွင် ရှိသည့် ဦးပိုင်ကုမ္ပဏီပိုင် ဆီအုန်းခြံမှ ဝန်ထမ်း ခြောက်ဦးနှင့် မိသားစုဝင်တစ်ဦးကို ပြည်သူ့ကာကွယ်ရေး ပူးပေါင်းတပ်က ဖမ်းဆီး ခေါ်ဆောင် သွားသည်ဟု ရွာသားများက ပြောသည်။ ပြည်သူ့ကာကွယ်ရေး ပူးပေါင်းတပ်ဖွဲ့၏ ပြန်ကြားရေး တာဝန်ရှိသူက “ဖမ်းဆီးထားတဲ့ ဝန်ထမ်းတွေက စစ်ကော် မရှင် တပ်ဖွဲ့နဲ့ ဆက်စပ်နေတာမျိုး ရှိတယ်လို့ ဆိုတာကြောင့် မေးမြန်းစစ်ဆေးနေတာပါ။ ပြီးရင်တော့ ပြန်လွှတ် ပေးသွားမှာပါ။ မဆိုင်တဲ့ ရွာသားတွေကိုတော့ ပြန်လွှတ်ပေးလိုက်ပြီးပါပြီ” ဟု ပြောသည်။ သြဂုတ်လ၂၃ ရက်နေ့ နံနက်ပိုင်းက ဂန့်ဂေါ်တောင်ကျေးရွာရှိ ဆီအုန်းခြံနှင့် ဘူတာရုံအနီးမှ နာရေး အိမ်တစ်အိမ် တွင် အခြားရွာသား အယောက် ၂၀ ကျော်နှင့်အတူ ဖမ်းဆီးခံရခြင်း ဖြစ်သည်။ ထိုနေ့ ညပိုင်းတွင်ပင် ရွာသား ၂၀ကျော်ကို ပြန်လွှတ်ခဲ့သော်လည်း ဆီအုန်းခြံ ဝန်ထမ်း ခြောက်ဦးနှင့် မိသားစုဝင် တစ်ဦးတို့ကိုမူ ပြည်သူ့ ကာကွယ်ရေး ပူးပေါင်းတပ်ဖွဲ့က ထိန်းသိမ်း စစ်ဆေးနေသည်ဟု ဂန့်ဂေါ်တောင် ရွာသားတစ်ဦးက ဆိုသည်။ ဆီအုန်းခြံသည် ကလိန်အောင် - ကံပေါက် လမ်းပိုင်းတွင် တည်ရှိကာ ဆီအုန်းခြံအပြင် ဆီအုန်းကြမ်း စက်ရုံ လည်းရှိပြီး ဝန်ထမ်းအများစုသည် စစ်ကော်မရှင်တပ်၏ စစ်မှုထမ်းဟောင်းများ ဖြစ်ကြသည်။ ဆီအုန်းခြံဝန်ထမ်းများ ဖမ်းဆီးခံရပြီးသည့်နောက် စစ်ကော်မရှင်တပ်ဖွဲ့မှ ကံပေါက် - ကလိန်အောင် လမ်းပိုင်း တွင် စစ်ကြောင်းထိုးကာ တောနင်းရှာဖွေနေသည်ဟု ရွာသား အချို့က ဆိုသည်။ ကလိန်အောင် - ကံပေါက် လမ်းပိုင်းတွင် စစ်ရေးလှုပ်ရှားမှု လုပ်နေစဥ် ရွာသားများ ကြားညှပ်နိုင်သဖြင့် ဆီ အုန်းဝန်ထမ်းများကို ခေတ္တခေါ်ယူကာ ထိန်းသိမ်းခဲ့ခြင်းသာ ဖြစ်သည်ဟု ပြည်သူ့ကာကွယ်ရေး ပူးပေါင်းတပ်ဖွဲ့၏ ပြန်ကြားရေး တာဝန်ရှိသူက ပြောသည်။ စစ်ကြောင်းထိုးနေသည့် အခြေအနေကြောင့် ကံပေါက် ဆီအုန်းခြံနှင့် ဘူတာရုံအနီး နေထိုင်သည့် ရွာသားများ နေအိမ်တွင် မနေရဲဘဲ ယာယီပြောင်းရွှေ့နေထိုင် နေကြရသည်ဟု ဆိုသည်။ ကံပေါက် ဆီအုန်းခြံအနီးရှိ ဖားချောင်းကျေးရွာအုပ်စုထဲမှ ရွာသားများမှာလည်း စစ်ကော်မရှင်တပ်မှ စစ် ကြောင်း ထိုးလာမည်ကို စိုးရိမ်၍ ဘေးလွှတ်ရာသို့ တိမ်းရှောင်နေကြကြောင်း ရွာသားများက ဆိုသည်။

စစ်ကော်မရှင် တပ်နှင့် ဆက်စပ်သည်ဆိုသော ဆီအုန်းခြံမှ ဝန်ထမ်းခြောက်ဦး ဖမ်းဆီးခံရ

သောကြာနေ့ည ရုပ်သံသတင်း (၁၀-၁၀-၂၅)

သောကြာနေ့ည ရုပ်သံသတင်း (၁၀-၁၀-၂၅)

ဒီကနေ့ အစီအစဉ်ထဲမှာတော့ … မိုးမိတ်မှာ ဗုံးကြဲတိုက်ခိုက်ခဲ့လို့ ကလေးတွေ အပါအဝင် အရပ်သားတွေ အသက်ဆုံးရှုံးခဲ့ရပါတယ်။ မွန်နဲ့ တနင်္သာရီမှာလည်း အရပ်သားတွေ လေကြောင်းတိုက်ခိုက်မှု ခံရပါတယ်။ ဖားကန့်မှာ စစ်ကော်မရှင်က ဘာကြောင့် ညမထွက်ရ အမိန့်ထုတ်လိုက်တာပါလဲ

ထိုင်းရောက် အလုပ်သမားတွေအတွက် ပန်းရောင်ကတ် ပြုလုပ်ရမယ့် နေရာတွေက ဘယ်နေရာတွေလဲ၊ ဘယ်လိုလုပ်ရမှာလဲ။ ယူကရိန်းတိုက်ပွဲမှာ လောင်စာ အရင်းအမြစ်တွေကို ဘာလို့ အပြန်အလှန် တိုက်ခိုက်နေကြတာလဲ။ ယူကေက အိန္ဒိယ နိုင်ငံကို အပေါ့စား ဒုံးကျည်တွေ ရောင်းပေးလိုက်ပါတယ်။

ကမ္ဘာကျော် မုဒိမ်းမှုတစ်ခုမှာ အယူခံဝင်တဲ့သူကို တရားရုံးက ဘယ်လို အမိန့်ချမှတ်လိုက်သလဲ … စတာတွေတင်ဆက်ထားပါတယ်။

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

အမေရိကန်က ဟော်မုဇ်ရေလက်ကြားတွင် အီရန်ကို ပိတ်ဆို့
BBC က ဝန်ထမ်း ၂၀၀၀ လျှော့မည်
ဥရောပတွင် လေယာဉ်ဆီ ၆ ပတ်စာသာကျန်တော့သည်ဟု IEA ဆို
အငြင်းပွား တောင်တရုတ်ပင်လယ်တွင် တရုတ်လှေမှ ပြင်းထန်သော အဆိပ်ငွေ့များ ဖမ်းဆီးရမိ
ဟော်မုဇ် ရေလက်ကြားကို ပိတ်ဆို့ရန် ဒေါ်နယ် ထရမ့်အမိန့်ပေး

Archives

Archives

×Close