စစ်ကော်မရှင် – Page 7 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Tag Archive

Tag: စစ်ကော်မရှင်

ဝန်ထမ်းများနှင့် ဝန်ထမ်းမိသားစုများ မဲထည့်ရန် USDP ဖိအားပေး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၂၈ ရက်။ ပုသိမ်မြို့တွင် ဝန်ထမ်းများနှင့် မိသားစုဝင်များအား ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီ (USDP) ကို မဲထည့်ရန် စစ်ကော်မရှင်က ဖိအားပေးနေ သည်ဟု ဒေသခံများက ပြောသည်။ စစ်ကော်မရှင်က ကျင်းပရန်ပြင်ဆင်နေသည့် ရွေးကောက်ပွဲ နီးကပ်လာချိန်တွင် ဧရာဝတီတိုင်းဒေသကြီး၊ ပုသိမ် မြို့ရှိ ဌာနဆိုင်ရာဝန်ထမ်းများနှင့် ၎င်းတို့၏ မိသားစုဝင်များအား (USDP) ကို မပျက်မကွက် မဲပေးကြရန် စစ်ကော်မရှင်ဘက်က ဖိအားပေး ခြိမ်းခြောက်မှုများ ပြုလုပ်နေကြောင်း ဝန်ထမ်းအသိုင်းအဝိုင်းက ပြောသည်. အဆိုပါ ရွေးကောက်ပွဲအတွက် ဝန်ထမ်းများကိုသာမက ၎င်းတို့၏ မိသားစုဝင်များကိုပါ မဲစာရင်းတွင် မဖြစ်မနေပါဝင်စေရန်နှင့် မဲထည့်သည့်အခါတွင်လည်း USDP ပါတီ ကိုသာ ရွေးချယ်ရန် ဌာနဆိုင်ရာအကြီးအကဲများက တိုက်ရိုက်ညွှန်ကြားနေခြင်း ဖြစ်သည်။ ဝန်ထမ်းမိသားစုဝင်တစ်ဦးက “မဲမပေးရင် ဘာဖြစ်သွားမယ် ညာဖြစ်သွားမယ်ဆိုပြီး ကြမ်းကြမ်းတမ်းတမ်းကြီး တော့ မဟုတ်ဘူးပေါ့။ ခုကျင်းပမယ့် လွတ်လပ်ပြီး တရားမျှတတဲ့ ရွေးကောက်ပွဲကနေပြီး ပြည်သူရွေးချယ်တဲ့ ကောင်းမွန်တဲ့ အစိုးရတစ်ရပ် ပေါ်ပေါက်လာမှ တိုင်းပြည် ငြိမ်းချမ်းသာယာဝပြောမှာ၊ အဲဒါကြောင့် မဲထည့်ကြ ရမယ်၊ ကြံ့ခိုင်ရေးပါတီကိုသာ ထည့်ကြဆိုပြီးကို ဒဲ့ပြောတာ” ဟု ပြောသည်။ ထို့ပြင် ဝန်ထမ်းများသည် မိမိတို့နေထိုင်သည့် ရပ်ကွက်များတွင် မဲစာရင်းပါဝင်ခြင်း ရှိ၊ မရှိကို မဖြစ်မနေ သွားရောက် ကြည့်ရှုရပြီး၊ အကယ်၍ မဲစာရင်းတွင် အမည်မပါဝင်ပါက ပုံစံ (၃) ဖြင့် လျှောက်ထားကာ မိမိတို့၏ ဌာနသို့ ပြန်လည်တင်ပြရကြောင်း ဆိုသည်။ အသက် ၅၀ အရွယ် အမျိုးသားဝန်ထမ်းတစ်ဦးက “ကိုယ်တစ်ယောက်တည်းတင် မဟုတ်ဘူး၊ မိသားစုဝင်တွေရဲ့ နာမည်ပါ မပါလာရင် ပြန်ပြီး လျှောက်လွှာတင်ပေး ရသေးတာ။ နောက် ဘယ်ရပ်ကွက်က မဲရုံ၊ မဲနံပါတ်က ဘယ်လောက်ဆိုတာတွေ ဌာနကို ပြန်တင်ပြရသေးတာ” ဟု ဆိုသည်။ ပုသိမ်မြို့ပေါ်တွင် ရွေးကောက်ပွဲ ကျင်းပရန် ရက်ပိုင်းသာ လိုသည့် အချိန်အထိ နိုင်ငံရေးပါတီများ၏ မဲဆွယ် စည်းရုံးမှုမှာ အလွန်အားနည်းနေပြီး၊ မြို့တော်ခန်းမရှေ့တွင် ရွေးကောက်ပွဲတိုက်တွန်းသည့် ဆိုင်းဘုတ်တစ်ခုနှင့် ရေပေါ်ဈေးရှေ့တွင် ပြည်သူ့အကျိုးပြုပါတီ (PPP) ၏ ဆိုင်းဘုတ်တစ်ခုသာ မြင်တွေ့ရကြောင်း မြို့ခံများက ပြောသည်။ နိုင်ငံရေးလေ့လာသူများကမူ ယခုရွေးကောက်ပွဲသည် USDP ပါတီ အသာစီးရစေရန် စနစ်တကျ ရေးဆွဲထား သည့် ပုံစံဖြစ်သည်ဟု ဝေဖန်နေကြသည်။ ပါတီတစ်ခုမှ နုတ်ထွက်စာတင်ထားသူတစ်ဦးက “ကန့်သတ်ချက်တွေ ချုပ်ချယ်ထားတာတွေ အများကြီးပဲ၊ ဘာမှလှုပ်လို့မရဘူး။ နိုင်သူအကုန်ယူရော၊ PR ဆိုပြီး အမျိုးမျိုးလုပ်ထားတာ ကြံ့ခိုင်ရေးအတွက် အသာစီးတွေ ချည်းပဲ။ ရွေးကောက်ပွဲ ဝင်ပြိုင်တာကိုက သူတို့ရဲ့ ရည်ရွယ်ချက် ပြည့်စုံအောင် ဖြည့်ဆည်းပေးနေကြတာ” ဟု ပြောဆိုသည်။ လက်ရှိတွင် ပုသိမ်မြို့၌ လူထုကြား မဲဆွယ်စည်းရုံးမှုများ ထင်သာမြင်သာ မရှိသော်လည်း ရပ်ကွက်များအတွင်း အသံချဲ့စက်များဖြင့် မဲပေးရန် နှိုးဆော်ခြင်းနှင့် ဝန်ထမ်းများကို ဌာနဆိုင်ရာ လမ်းကြောင်းမှ တစ်ဆင့် ဖိအားပေး စည်းရုံးခြင်းများကိုသာ အဓိက လုပ်ဆောင်နေခြင်း ဖြစ်သည်။ စစ်ကော်မရှင်သည် ၎င်းတို့၏ ရွေးကောက်ပွဲကို တရားဝင်မှုရှိစေရန်အတွက် ဝန်ထမ်းထုကို အဓိကအသုံးချကာ မဲရုံများသို့ ပို့ဆောင်ရန် ကြိုးပမ်းနေခြင်းဖြစ်သည်ဟု ဒေသခံများက သုံးသပ်နေကြသည်။

ဝန်ထမ်းများနှင့် ဝန်ထမ်းမိသားစုများ မဲထည့်ရန် USDP ဖိအားပေး

ရွေးကောက်ပွဲနေ့တွင် မကျင်းပနိုင်သည့် မြို့နယ် ၉ ခု ထပ်တိုး သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၂၈ ရက်။ ရွေးကောက်ပွဲ ကျင်းပသည့် ယနေ့ ဒီဇင်ဘာလ ၂၈ ရက်နေ့တွင် ရွေးကောက်ပွဲ မကျင်းပနိုင်သည့် မြို့နယ် ၉ ခုကို ထပ်မံ ဖြည့်စွက်ခဲ့သည်။ စစ်ကော်မရှင် ရွေးကောက်ပွဲ မကျင်းပနိုင်သည့် မြို့နယ် ၆၅ ခုအထိ ရှိလာပြီး စံချိန်တင်နယ်မြေများ ဆုံးရှုံးနေ သည်။ စစ်ကော်မရှင်က အတင်းအကျပ် ကျင်းပရန် ကြိုးပမ်းနေသည့် ရွေးကောက်ပွဲကို ယနေ့တွင် စတင်လိုက်သော် လည်း ရွေးကောက်ပွဲကျင်းပရန် နာရီပိုင်းအလိုအထိ မကျင်းပနိုင်သည့် မြို့နယ်စာရင်းကို ထပ်မံတိုးမြှင့် ကြေညာခဲ့သည်။ ထို့ကြောင့် တစ်နိုင်ငံလုံးအတိုင်းအတာဖြင့် မြို့နယ် ၆၅ ခုအထိ ရှိလာပြီး ရွေးကောက်ပွဲ သမိုင်းတစ်လျှောက် မကျင်းပနိုင်သည့် နယ်မြေအရေအတွက် အများဆုံးအဖြစ် စံချိန်တင်သွားခဲ့သည်။ စစ်ကော်မရှင် လက်အောက်ခံ ပြည်ထောင်စု ရွေးကောက်ပွဲကော်မရှင် (UEC) သည် ရွေးကောက်ပွဲ ကျင်းပရန် နာရီပိုင်းအလိုတွင် ချင်းပြည်မှ ၃ မြို့နယ်၊ စစ်ကိုင်းတိုင်းမှ ၂ မြို့နယ်နှင့် ရခိုင်ပြည်မှ ၄ မြို့နယ်၊ စုစုပေါင်း မြို့နယ် ၉ ခုကို ရွေးကောက်ပွဲ မကျင်းပနိုင်သည့် မြို့နယ်စာရင်းထဲသို့ ထပ်မံဖြည့်စွက်ခဲ့ခြင်း ဖြစ်သည်။ ယခင်က ရွေးကောက်ပွဲ မကျင်းပနိုင်ဟု ကြေညာထားသည့် မြို့နယ် ၅၆ မြို့နယ်ရှိရာမှ ယခုထပ်တိုးစာရင်းအရ မြန်မာနိုင်ငံရှိ မြို့နယ်ပေါင်း ၃၃၀ အနက် မြို့နယ် ၆၅ ခုတွင် ရွေးကောက်ပွဲ လုံးဝကျင်းပနိုင်ခြင်း မရှိတော့ကြောင်း စစ်ကော်မရှင်က တရားဝင်ဝန်ခံလိုက်ရခြင်းလည်း ဖြစ်သည်။ အဆိုပါ ထပ်တိုးမြို့နယ်များမှာ ချင်းပြည်ရှိ တွန်းဇံ၊ ဖလမ်းနှင့် ထန်တလန်၊ စစ်ကိုင်းတိုင်းရှိ ကောလင်းနှင့် ဗန်းမောက်၊ ရခိုင်ပြည်ရှိ အမ်း၊ သံတွဲ၊ ဂွနှင့် တောင်ကုတ်မြို့နယ်တို့ ဖြစ်သည်။ မြို့နယ်အဆင့်သာမက ရပ်ကွက် နှင့် ကျေးရွာအုပ်စုအဆင့်တွင်လည်း မကျင်းပနိုင်သည့် နေရာများစွာ ရှိနေသည်။ ဒီဇင်ဘာလ ၂၇ ရက်နေ့ ထုတ်ပြန်ချက်အရ ရွေးကောက်ပွဲ အပိုင်း (၃) တွင် မကျင်းပနိုင်သည့် ရပ်ကွက်နှင့် ကျေးရွာ အုပ်စုပေါင်း ၁,၀၆၄ ခု ရှိနေပြီး ယခင်အပိုင်း (၁) နှင့် (၂) တို့ရှိ မကျင်းပနိုင်သည့် နေရာ ၂,၉၃၁ ခုနှင့် ပေါင်းစပ်လိုက်ပါက တစ်နိုင်ငံလုံးတွင် ရွေးကောက်ပွဲ တစ်စိတ်တစ်ပိုင်း မကျင်းပနိုင်သည့် ရပ်ကွက်၊ ကျေးရွာအုပ်စု ၄,၀၀၀ နီးပါးအထိ ရှိလာသည်။ ယခုကဲ့သို့ စစ်ကော်မရှင်က မကျင်းပနိုင်သည့် နယ်မြေစာရင်းကို နောက်ဆုံးအချိန်အထိ ထုတ်ပြန်နေရခြင်းမှာ မြေပြင်တွင် တော်လှန်ရေးအင်အားစုများ၏ စိုးမိုးမှုနှင့် တိုက်ပွဲများကြောင့်ဖြစ်ကြောင်း ဒေသခံများက သုံးသပ်ကြသည်။ စစ်ကိုင်းတိုင်းမှ ဒေသခံတစ်ဦးက "သူတို့ ဘယ်လိုပဲ အတင်းလုပ်ချင်လုပ်၊ ကျနော်တို့ဆီမှာတော့ ဘယ်သူမှ မဲမပေးသလို သူတို့လည်း ရုံးမဖွင့်နိုင်ဘူး။ မဲစာရင်းကပ်တဲ့ရက်ကတည်းက မြို့ထဲမှာ ပေါက်ကွဲသံတွေ ကြားနေရတာ။ မနေ့ညကဆိုရင်လည်း ဗန်းမောက်ဘက်မှာ အသံတွေ ကြားနေရတယ်။ ဒီရွေးကောက်ပွဲက စာရွက်ပေါ်မှာပဲ ရှိတာပါ” ဟု မြေပြင်အခြေအနေကို ပြောပြသည်။ ထို့အပြင် ရွေးကောက်ပွဲကျင်းပသည့် မြို့ကြီးများတွင်လည်း မဲရုံများအနီး ပေါက်ကွဲမှုများ ဖြစ်ပွားနေသဖြင့် ပြည်သူများမှာ စိုးရိမ်ထိတ်လန့်နေကြသည်။ ဧရာဝတီတိုင်းမှ ဝန်ထမ်းမိသားစုဝင်တစ်ဦးက "မနက်ပိုင်းကစပြီး မဲရုံတွေ ဖွင့်တယ်ဆိုပေမယ့် လမ်းပေါ်မှာ လူသူသိပ်မရှိဘူး။ စစ်တပ်နဲ့ ပျူစောထီးတွေတော့ ရှိတယ်။ မဲမပေးရင် အိမ်တွေကို ချိပ်ပိတ်မယ်၊ တော်လှန် ရေး အဖွဲ့တွေနဲ့ ပတ်သက်တယ်လို့ သတ်မှတ်မယ်ဆိုပြီး ခြိမ်းခြောက်ထားလို့သာ လူတချို့ ထွက်လာကြတာ" ဟု ပြောသည်။ စစ်ကော်မရှင်၏ ၂၀၂၅ ရွေးကောက်ပွဲသည် နိုင်ငံတကာ၏ အသိအမှတ်ပြုမှုရရန်နှင့် နိုင်ငံရေးထွက်ပေါက်ရှာရန် ကြိုးပမ်းခြင်းဖြစ်သော်လည်း၊ မြေပြင်တွင် နယ်မြေ အများအပြား ဆုံးရှုံးနေခြင်းနှင့် ပြည်သူလူထု၏ သပိတ်မှောက် ဆန့်ကျင်မှုများကြောင့် ရွေးကောက်ပွဲမှာ တရားဝင်မှု ကင်းမဲ့နေကြောင်း နိုင်ငံရေးလေ့လာသူများ က သုံးသပ်နေကြသည်။

ရွေးကောက်ပွဲနေ့တွင် မကျင်းပနိုင်သည့် မြို့နယ် ၉ ခု ထပ်တိုး

ရွေးကောက်ပွဲမတိုင်မီ အကြမ်းဖက်မှုနှင့် ဖိနှိပ်မှုများ အရှိန်မြင့်လာကြောင်း ကုလသမဂ္ဂ သတိပေး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၂၃ ရက်။ မကြာမီကျင်းပတော့မည့် စစ်ကောင်စီ၏ ရွေးကောက်ပွဲ မတိုင်မီ အကြမ်းဖက်မှုများ၊ ဖိနှိပ်မှုများနှင့် ခြိမ်းခြောက်မှုများ ပိုမိုပြင်းထန်လာကြောင်း ကုလသမဂ္ဂ လူ့အခွင့်အရေးဆိုင်ရာ မဟာမင်းကြီးရုံးက ယနေ့ (အင်္ဂါနေ့) တွင် ထုတ်ပြန် သတိပေးလိုက်သည်။ ကုလသမဂ္ဂ လူ့အခွင့်အရေးဆိုင်ရာ မဟာမင်းကြီး ဗော့လ်ကာ တာ့ခ် (Volker Türk) က "မြန်မာစစ်အာဏာပိုင်တွေအနေနဲ့ လူထုကို မဲပေးဖို့အတွက် ရက်စက်တဲ့ အကြမ်းဖက်မှုတွေနဲ့ ဖိအားပေးတာတွေကို ရပ်တန့်ရမှာဖြစ်သလို၊ သဘောထားကွဲလွဲမှုကို ဖော်ပြသူတွေကို ဖမ်းဆီးနေတာတွေကိုလည်း အဆုံးသတ်ရမယ်" ဟု တိုက်တွန်း ပြောကြားခဲ့သည်။ အဆိုပါ ထုတ်ပြန် ကြေညာချက်တွင် ဒီဇင်ဘာ ၂၈ ရက်တွင် ကျင်းပတော့မည့် ရွေးကောက်ပွဲနှင့် ပတ်သက်၍ လွတ်လပ်စွာ ထုတ်ဖော်ပြောဆိုခွင့်ကို ပိတ်ပင်ထားကြောင်း ထောက်ပြထားသည်။ လွတ်လပ်စွာ ထုတ်ဖော်ခွင့် ကျင့်သုံးသူ အမြောက်အမြားသည် "ရွေးကောက်ပွဲ ကာကွယ်ရေးဥပဒေ" ဖြင့် ဖမ်းဆီးခံနေရကြောင်း သိရသည်ဟု ဖော်ပြထားသည်။ ရန်ကုန်တိုင်း၊ လှိုင်သာယာမြို့နယ်အတွင်း ရွေးကောက်ပွဲ ဆန့်ကျင်ရေး ပိုစတာများ ကပ်ခဲ့သည့် လူငယ် ၃ ဦးကို ထောင်ဒဏ် ၄၂ နှစ်မှ ၄၉ နှစ်အထိ ပြင်းထန်သော ပြစ်ဒဏ်များ ချမှတ်ခဲ့သည့် ဖြစ်စဉ်များကိုလည်း ထောက်ပြထားသည်။ ထို့အပြင် ရွေးကောက်ပွဲ ဝါဒဖြန့်ရုပ်ရှင်ကို ဝေဖန်ခဲ့သည့် ရုပ်ရှင်ဒါရိုက်တာ မိုက်တီး၊ သရုပ်ဆောင် ကျော်ဝင်းထွဋ်နှင့် လူရွှင်တော် အုန်းဒိုင်တို့အား ပြည်သူလူထု၏ ယုံကြည်မှု ပျက်ပြားအောင် လုပ်ဆောင်သည်ဟုဆိုကာ ထောင်ဒဏ် ၇ နှစ်စီ ချမှတ်ခဲ့ကြောင်းလည်း ထောက်ပြထားသည်။ မန္တလေးတိုင်း အပါအဝင် ဒေသအသီးသီးရှိ စစ်ဘေးရှောင် ပြည်သူများသည် မဲပြန်ပေးရန် ပျက်ကွက်ပါက တိုက်ခိုက်ခံရမည် သို့မဟုတ် နေအိမ်များ သိမ်းဆည်းခံရမည်ဟု ခြိမ်းခြောက်ခံနေရကြောင်း ကုလသမဂ္ဂက ဆိုသည်။ "မဲပြန်ပေးဖို့ မြို့ကိုပြန်လာကြ၊ ပြန်မလာရင် ဆက်ပြီး ဗုံးကြဲမယ်" ဟု ခြိမ်းခြောက်ပြောဆိုမှုများ ရှိနေကြောင်း သတင်းရင်းမြစ်များကို ကိုးကား၍ ဖော်ပြထားသည်။ မဟာမင်းကြီး တာ့ခ်က စစ်ဘေးရှောင်များအား ၎င်းတို့၏ ဆန္ဒမပါဘဲ ဘေးကင်းမှုမရှိသော နေရာများသို့ အဓမ္မပြန်ခိုင်းခြင်းသည် လူ့အခွင့်အရေး ချိုးဖောက်မှုဖြစ်ကြောင်း ပြောကြားခဲ့သည်။ တစ်ဖက်တွင်လည်း စစ်ကောင်စီကို ဆန့်ကျင်သည့် လက်နက်ကိုင် အဖွဲ့အစည်းများထံမှ ခြိမ်းခြောက်မှုများ ရှိနေကြောင်း ကြေညာချက်တွင် ပါရှိသည်။ ပြီးခဲ့သည့် နိုဝင်ဘာလက ကျိုက်ထိုမြို့နယ်၌ မဲပေးရန် သင်တန်းတက်ရောက်မည့် ဆရာမ ၉ ဦး ဖမ်းဆီးခံရပြီး သတိပေးချက်များဖြင့် ပြန်လည်လွတ်မြောက်ခဲ့သည့် ဖြစ်စဉ်နှင့် ရန်ကုန်ရှိ လှည်းကူးနှင့် မြောက်ဥက္ကလာပ အုပ်ချုပ်ရေးရုံးများတွင် ဗုံးပေါက်ကွဲမှုများကြောင့် ရွေးကောက်ပွဲ ဝန်ထမ်းအချို့ ဒဏ်ရာရရှိခဲ့သည့် ဖြစ်စဉ်များကို ထောက်ပြထားသည်။ "အခုကျင်းပမယ့် ရွေးကောက်ပွဲဟာ အကြမ်းဖက်မှုနဲ့ ဖိနှိပ်မှုတွေကြားမှာ ကျင်းပနေတာ ဖြစ်ကြောင်း သိသာထင်ရှားနေပါတယ်" ဟု လူ့အခွင့်အရေးဆိုင်ရာ မဟာမင်းကြီး က ဆိုသည်။ လက်ရှိ အခြေအနေတွင် လွတ်လပ်စွာ ဖော်ပြခွင့်၊ သင်းပင်းဖွဲ့စည်းခွင့်နှင့် ငြိမ်းချမ်းစွာ စုဝေးခွင့်များ မရှိသည့်အတွက် ပြည်သူများအနေဖြင့် အနှစ်သာရရှိရှိ လွတ်လပ်စွာ ပါဝင်နိုင်သည့် အခြေအနေ မရှိကြောင်း ၎င်းက ကောက်ချက်ချ ပြောကြားခဲ့ပါသည်။

ရွေးကောက်ပွဲမတိုင်မီ အကြမ်းဖက်မှုနှင့် ဖိနှိပ်မှုများ အရှိန်မြင့်လာကြောင်း ကုလသမဂ္ဂ သတိပေး

ရွေးကောက်ပွဲကျင်းပရန် ၁၀ ရက်အလို လားရှိုးမြို့တွင် တစ်ရက်တည်း ဗုံး ၃ ကြိမ်ပေါက်ကွဲ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၂၂ ရက်။ စစ်ကော်မရှင်က ကြီးမှူးကျင်းပမည့် ရွေးကောက်ပွဲ အတွက် ပြင်ဆင်မှုများ ပြုလုပ်နေသည့် ရှမ်းပြည် မြောက်ပိုင်း၊ လားရှိုးမြို့ပေါ်တွင် တစ်ရက်တည်း၌ပင် ဗုံးပေါက်ကွဲမှု သုံးကြိမ် ထက်မနည်း ဖြစ်ပွားခဲ့ရာ မြို့ခံများ ထိတ်လန့်စိုးရိမ်နေကြသည်။ ရွေးကောက်ပွဲကျင်းပရန် ၁၀ ရက်ခန့်သာ လိုတော့သည့်အချိန်တွင် ဖြစ်ပွားခဲ့သော အဆိုပါပေါက်ကွဲမှုများသည် ဒီဇင်ဘာလ ၂၁ ရက်နေ့၊ နံနက် ၉ နာရီကျော်တွင် အမှတ် (၁၂) ရပ်ကွက်၌ တစ်ကြိမ်၊ ညနေ ၅ နာရီနှင့် ၆ နာရီ ဝန်းကျင်တို့တွင် အမှတ် (၂) အုပ်ချုပ်ရေးမှူးရုံးအနီးနှင့် အမှတ် (၅) ရပ်ကွက်တို့တွင် တစ်ကြိမ်စီ ဖြစ်ပွားခဲ့ခြင်း ဖြစ်သည်။ ပေါက်ကွဲမှု ဖြစ်ပွားခဲ့သည့် အခြေအနေနှင့် ပတ်သက်၍ လားရှိုးမြို့ခံတစ်ဦးက “မနက်ပိုင်း တစ်ခါကြားရပြီး ညနေပိုင်းမှာ နှစ်ခါဆင့်တိုက်သံ ကြားလိုက်ရတာ။ ရပ်ကွက်ရုံးနားဆိုတော့ ပိုလန့် သွားတယ်” ဟု ပြောသည်။ လားရှိုးမြို့ကို စစ်ကော်မရှင်တပ်က ယခုနှစ် ဧပြီလအတွင်း တရုတ်အစိုးရ၏ ကြားဝင်ညှိနှိုင်းမှုဖြင့် ကိုးကန့်တပ် (MNDAA) ထံမှ ပြန်လည်လွှဲပြောင်းရယူခဲ့ခြင်းဖြစ်သော်လည်း မြို့ပတ်ပတ်လည်ရှိ ကျေးရွာအုပ်စု ၇၅ အုပ်စု ခန့်ကိုမူ MNDAA က ဆက်လက် ထိန်းချုပ်ထားဆဲ ဖြစ်သည်။ စစ်ကော်မရှင်တပ်သည် လားရှိုးမြို့ပေါ် ရပ်ကွက် (၁၂) ခုအပြင် MNDAA ထိန်းချုပ်နယ်မြေအချို့တွင်ပါ ရွေးကောက်ပွဲ ကျင်းပရန် ကြိုးပမ်းနေသော်လည်း MNDAA ဘက်ကမူ ၎င်းတို့နယ်မြေအတွင်း မဲပုံးချခွင့် ပေးမည်မဟုတ်ကြောင်း ပြောဆိုထားသည်။ လက်ရှိ အခြေအနေအပေါ် လားရှိုးမြို့မှ ရှမ်းလူငယ်တစ်ဦးက “ဒီပေါက်ကွဲမှုတွေဟာ ရွေးကောက်ပွဲကို ဆန့် ကျင်တဲ့ နိုင်ငံရေး သတိပေးချက်လို့ မြင်ပါတယ်။ မြို့ပေါ်ကို စစ်တပ်က ထိန်းထားတယ်ဆိုပေမဲ့ ပတ်ပတ်လည် မှာ တော်လှန်ရေး အင်အားစုတွေ ရှိနေကြတယ်။ အခု အခြေအနေကို ပြောရမယ်ဆိုရင်လည်း လုံခြုံရေးက ဘယ်လိုမှ စိတ်မချရဘူး။ အခုလို အခြေအနေမျိုးမှာ ကျင်းပမယ့် ရွေးကောက်ပွဲက ပြည်သူတွေအတွက်တော့ အန္တရာယ်ကြားက ပွဲတစ်ခုလို ဖြစ်နေတယ်” ဟု ပြောသည်။ စစ်ကော်မရှင်၏ အစီအစဉ်အရ လာမည့် ဒီဇင်ဘာ ၂၈ ရက်နေ့မှ စတင်ကာ ရွေးကောက်ပွဲကို အပိုင်း ၃ ပိုင်းခွဲ၍ နှစ်ပတ်စီခြား ကျင်းပသွားရန် ရည်ရွယ်ထားသော်လည်း ယခုကဲ့သို့ မြို့ပြပြောက်ကျား တိုက်ခိုက်မှုများနှင့် နယ်မြေ မတည်ငြိမ်မှုများကြောင့် ရွေးကောက်ပွဲ ဖြစ်မြောက်နိုင်စွမ်းအပေါ် မေးခွန်းထုတ်မှုများ ရှိနေသည်။  ဓါတ်ပုံ - Wa News Land

ရွေးကောက်ပွဲကျင်းပရန် ၁၀ ရက်အလို လားရှိုးမြို့တွင် တစ်ရက်တည်း ဗုံး ၃ ကြိမ်ပေါက်ကွဲ

ရွေးကောက်ပွဲမှာ စစ်တပ် အကျိုးစီးပွားသာဖြစ်ဟု KNU ဥက္ကဌ ပြော သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၂၀ ရက်။ စစ်ကော်မရှင်က ပြုလုပ်ရန် ပြင်ဆင်နေသည့် ရွေးကောက်ပွဲသည် စစ်တပ်နှင့် အပေါင်းအပါတစ်စု၏ အကျိုး စီးပွား အတွက်သာ ဖြစ်ပြီး အာဏာရှင်စနစ် ထာဝရတည်မြဲရေးကို ရည်ရွယ်ခြင်းဖြစ်ကြောင်း ကရင်အမျိုးသား အစည်းအရုံး (KNU) ဥက္ကဋ္ဌ ပဒိုစောကွယ်ထူးဝင်းက ပြောဆိုလိုက်သည်။ ဒီဇင်ဘာလ ၁၉ ရက်တွင် ကျရောက်သည့် ၂၇၆၅ ခုနှစ်၊ ကရင်အမျိုးသားနှစ်သစ်ကူးနေ့သို့ ပေးပို့သည့် သဝဏ်လွှာ၌ ဥက္ကဋ္ဌက ထိုသို့ ထည့်သွင်းပြောဆိုခဲ့ခြင်းဖြစ်သည်။ စစ်အုပ်စုသည် ၎င်းတို့၏ အာဏာကို ၂၀၀၈ ဖွဲ့စည်းပုံအခြေခံ ဥပဒေအတိုင်း ဆက်လက် ထိန်းချုပ်နိုင်ရန်အတွက် အတုအယောင်ရွေးကောက်ပွဲကို နည်းလမ်းမျိုးစုံဖြင့် ပြင်ဆင်နေခြင်းဖြစ်သည်ဟု ဆိုသည်။ ပဒိုစောကွယ်ထူးဝင်းက “အခုအချိန်မှာ ဗမာစစ်အာဏာရှင်အုပ်စုဟာ သူတို့ရဲ့ အာဏာ ထာဝရ တည်တံ့ခိုင်မြဲ နိုင်ဖို့အတွက် ကြိုးပမ်းဆောင်ရွက်နေရာမှာ အတုအယောင်ရွေးကောက်ပွဲတစ်ရပ်ကို ၂၀၀၈ ဖွဲ့စည်းပုံ အခြေခံ ဥပဒေအတိုင်း ကျင်းပနိုင်ရန် ပြင်ဆင်ဆောင်ရွက်နေပါတယ်။ အဓိကရည်ရွယ်ချက်ကတော့ စစ်တပ်ဟာ ဒီနိုင်ငံ ရဲ့ နိုင်ငံရေးကို အမြဲတမ်းချုပ်ကိုင်ချယ်လှယ်ပြီး ထာဝရအာဏာတည်တံ့ခိုင်မြဲနေစေဖို့အတွက်ပဲ ဖြစ်ပါတယ်” ဟု ပြောသည်။ ထို့အပြင် ယခုရွေးကောက်ပွဲသည် စစ်ခေါင်းဆောင်များ၏ ဆွေမျိုးသားချင်းများနှင့် မိတ်ဖက်အစုအဖွဲ့များ ကြီးပွားချမ်းသာရေးအတွက် အခြေခံထားသည့် လုပ်ရပ်ဖြစ်ကြောင်းလည်း ၎င်းက ဆက်လက်ပြောဆိုသည်။ “ဒီအတုအယောင်ရွေးကောက်ပွဲမှာ သေချာပေါက် အနိုင်ရဖို့အတွက်ကို ပြင်ဆင်စီမံနေပြီး စစ်ခေါင်းဆောင် အများအပြားဟာ ရွေးကောက်ပွဲမှာ ပါဝင်အရွေးခံပြီး အနိုင်ရဖို့ နည်းလမ်းမျိုးစုံသုံးနေတာ ဖြစ်ပါတယ်။ စစ်အာဏာရှင်အုပ်စုဟာ စစ်တပ်ထဲမှာရှိနေတဲ့ ဗမာလူမျိုးတွေနဲ့ မိတ်ဖက်ဆွေမျိုးများ အာဏာရရှိရေးနဲ့ ကြီးပွားတိုးတက်ရေးအတွက်ကို လုပ်ဆောင်နေတာ ဖြစ်ပါတယ်” ဟု KNU ဥက္ကဋ္ဌက ပြောသည်။ မြန်မာနိုင်ငံတွင် ၁၉၆၂ ခုနှစ် အာဏာသိမ်းချိန်မှစ၍ စစ်အုပ်ချုပ်ရေးပုံစံအမျိုးမျိုး ပြောင်းလဲခဲ့သော်လည်း မဟာ လူမျိုးကြီး ဝါဒကိုမူ စွန့်လွှတ်ခြင်းမရှိကြောင်း၊ ၂၀၂၁ ခုနှစ် ဖေဖော်ဝါရီလတွင် ထပ်မံ အာဏာသိမ်း လိုက်ခြင်း သည် ပြည်သူများလိုလားသည့် ဖက်ဒရယ် ဒီမိုကရေစီ ပြည်ထောင်စု တည်ဆောက်ရေးကို စစ်တပ်က လုံးဝ လက်မခံနိုင်ကြောင်း ပြသလိုက်ခြင်းပင် ဖြစ်သည်ဟု KNU က သုံးသပ်သည်။ ပဒိုစောကွယ်ထူးဝင်းက “ဗမာစစ်တပ်အနေနဲ့ ဒီလိုအဓမ္မ အာဏာသိမ်းမှုဟာ လူမျိုးစုတွေနဲ့ ပြည်သူလူထုတွေ လိုလားတဲ့ ဒီနိုင်ငံကို ဖက်ဒရယ်ဒီမိုကရေစီပြည်ထောင်စုအနေနဲ့ တည်ထောင်ဖို့ဆိုတာကို လုံးဝလက်မခံနိုင်ဘူး ဆိုတာ ရှင်းရှင်းလင်းလင်း ဖော်ပြတာပဲ ဖြစ်ပါတယ်။ ဗမာစစ်တပ်အနေနဲ့ ၂၀၀၈ ဖွဲ့စည်းပုံအခြေခံဥပဒေက ရေးသားထားတဲ့ အခွင့်အာဏာပေးထားတဲ့အတိုင်းပဲ စစ်တပ်ကနေ ကြီးစိုးချုပ်ကိုင်လိုတဲ့ ဆန္ဒပဲ ရှိပါတယ်” ဟု ပြောသည်။ KNU ၏ တော်လှန်ရေး ရည်မှန်းချက်သည် အာဏာရှင်စနစ် ပုံသဏ္ဍာန် အမျိုးမျိုးကို ဖြိုချဖျက်ဆီးပြီး တန်းတူရေးနှင့် ကိုယ်ပိုင်ပြဋ္ဌာန်းခွင့်ရှိသည့် ဖက်ဒရယ်ဒီမိုကရေစီ ပြည်ထောင်စု တည်ဆောက်ရေး ဖြစ်ကြောင်း၊ ယင်းရည်မှန်းချက် အောင်မြင်ရန် နိုင်ငံရေးနည်းလမ်း တစ်ခုတည်းနှင့် မလုံလောက်ဘဲ စစ်ရေးနည်းလမ်းဖြင့် လည်း အကောင်အထည် ဖော်ဆောင်ရွက်သွားမည် ဖြစ်ကြောင်း KNU ဥက္ကဋ္ဌက ပြောသည်။

ရွေးကောက်ပွဲမှာ စစ်တပ် အကျိုးစီးပွားသာဖြစ်ဟု KNU ဥက္ကဋ္ဌ ပြော

စစ်ကော်မရှင်က AI နည်းပညာသုံး၍ ပြည်သူများအား စောင့်ကြည့်ထောက်လှမ်းခြောက်လှန့် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၂၀ ရက်။ စစ်ကော်ရှင်တပ်သည် AI နည်းပညာနှင့် မျက်နှာမှတ်သားသည့်စနစ်များကို အသုံးပြုကာ ပြည်သူများကို အစုလိုက်အပြုံလိုက် စောင့်ကြည့်ထောက်လှမ်းနေကြောင်း သံအမတ်ကြီး ဦးကျော်မိုးထွန်းက ကုလသမဂ္ဂတွင် ထုတ်ဖော် သတိပေးလိုက်သည်။ နယူးယောက်မြို့၌ ကျင်းပသည့် ကုလသမဂ္ဂ အဆင့်မြင့်အစည်းအဝေးတွင် သံအမတ်ကြီးက စစ်အုပ်စုသည် ဒစ်ဂျစ်တယ် နည်းပညာဖြင့် ပြည်သူများကို ခြေရာခံကာ ကြောက်ရွံ့ထိတ်လန့်အောင် ပြုလုပ်နေကြောင်း တင်ပြခဲ့ခြင်းဖြစ်သည်။ အထူးသဖြင့် ပြည်သူတစ်ဦးချင်းစီ စောင့်ကြည့်ရေးစနစ် (PSMS) ကို အသက်သွင်းပြီး လူ့အခွင့်အရေး လှုပ်ရှား သူများကို ဖမ်းဆီးရန် ကြိုးပမ်းနေခြင်းဖြစ်ကြောင်း ၎င်းက ဆိုသည်။ သံအမတ်ကြီး ဦးကျော်မိုးထွန်းက “ပြည်သူတစ်ဦးချင်းကို စိစစ်စောင့်ကြည့်ရေး စနစ် (PSMS) ကို အသက် သွင်းပြီး ပြည်သူလူထုအပေါ် အစုလိုက်အပြုံလိုက် စောင့်ကြည့် ထောက်လှမ်းမှုကို တိုးမြှင့် ဆောင်ရွက်န ေတယ်၊ ပြည်သူများအနေဖြင့် စိုးရိမ်ပူပန်မှုများ တိုးပွားလျက်ရှိပြီး၊ ပြည်သူတွေဟာ အမြဲတစေ ကြောက် ရွံ့ထိတ်လန့်မှုအောက်တွင် နေထိုင်နေရတယ်” ဟု အလေးပေး ပြောကြားခဲ့သည်။ မြေပြင်တွင်လည်း စစ်ကော်မရှင်တပ်သည် မြို့ကြီးများ၌ CCTV ကင်မရာအမြောက်အမြား တပ်ဆင်ကာ အသွားအလာများကို စောင့်ကြည့်နေသဖြင့် လုံခြုံရေးအတွက် စိုးရိမ်နေရကြောင်း ဒေသခံများက ပြောဆိုသည်။ ရန်ကုန်မြို့မှ လူငယ်တစ်ဦးက “အခုက လမ်းတိုင်းမှာ CCTV တွေ ရှိနေတော့ ကျနော်တို့ ဘယ်သွားသွား စောင့် ကြည့်ခံနေရသလိုပဲ။ လမ်းမှာ ဖုန်းထဲက VPN ကို စစ်ဆေးပြီး ငွေတောင်းတာ၊ ဖမ်းဆီးတာတွေ ရှိနေလို့ အပြင် ထွက်ရင် ဖုန်းကို အိမ်မှာပဲ ထားခဲ့ရတဲ့အထိ ဒစ်ဂျစ်တယ်လုံခြုံရေးက စိုးရိမ်နေရတယ်” ဟု ပြောသည်။ မန္တလေးကဲ့သို့ မြို့ကြီးများ၏ လမ်းဆုံလမ်းခွများတွင်လည်း CCTV ကင်မရာအမြောက်အမြား တပ်ဆင်ကာ အသွားအလာများကို စောင့်ကြည့်နေသည်ဟု မြို့ခံများက ပြောသည်။ မန္တလေးမြို့ခံ လူငယ်တစ်ဦးက “အခုနောက်ပိုင်း လမ်းဆုံလမ်းခွတွေမှာ CCTV တွေ တော်တော်များလာတယ်။ ကျနော်တို့ အပြင်ထွက်ရင် ဘယ်နားမှာ ကင်မရာရှိလဲဆိုတာကို အမြဲကြည့်ပြီး သွားနေရတယ်။ ဖုန်းထဲမှာ VPN ရှိမရှိ လမ်းမှာ အစစ်ခံရမှာကိုလည်း ကြောက်ရသလို၊ ကိုယ့်မျက်နှာကို ကင်မရာကနေတစ်ဆင့် မှတ်သားထား ပြီး တစ်နေရာရာမှာ အဖမ်းခံရမလားဆိုတဲ့ စိုးရိမ်စိတ်က အိမ်ထဲမှာနေရင်တောင် မပျောက်ဘူး။ ကိုယ့်ကိုကိုယ် အမြဲတမ်း စောင့်ကြည့်ခံနေရသလို ခံစားချက်က တကယ့်ကို စိတ်ကျဉ်းကျပ်စရာပါ” ဟု ပြောသည်။ ထို့အပြင် စစ်အုပ်စုသည် အာဏာသိမ်းပြီးချိန်မှ စ၍ သတင်းထောက် ၂၂၅ ဦးကို ဖမ်းဆီးခဲ့ပြီး ၉ ဦးကို သတ်ဖြတ် ခဲ့သည့်အထိ သတင်းလွတ်လပ်ခွင့်ကို ဖိနှိပ်ထားကြောင်း သံအမတ်ကြီးက ထောက်ပြသည်။ အင်တာနက် ဖြတ်တောက်ခြင်းနှင့် VPN အသုံးပြုမှုကို ကန့်သတ်ခြင်းတို့ဖြင့် ပြည်သူများ၏ သတင်းအချက် အလက် ရယူခွင့်ကိုလည်း ပိတ်ပင်ထားသည်ဟု ဆိုသည်။ အထူးသဖြင့် ၂၀၂၅ ခုနှစ် မတ်လအတွင်း ငလျင်ဘေးသင့်ချိန်၌ပင် သတင်းအချက်အလက် စီးဆင်းမှုကို ပိတ်ပင်ခဲ့ ခြင်းမှာ လူသားချင်းစာနာမှုကင်းမဲ့သည့် လုပ်ရပ်ဖြစ်သည်ဟု ဆိုသည်။ သံအမတ်ကြီး ဦးကျော်မိုးထွန်းက ယခုကဲ့သို့ ပြည်သူကို စောင့်ကြည့်ဖိနှိပ်နေသည့် အခြေအနေတွင် စစ်အုပ်စု ကျင်းပမည့် အတုအယောင်ရွေးကောက်ပွဲသည် လွတ်လပ်ပြီး တရားမျှတမည်မဟုတ်ဘဲ အကြမ်းဖက်မှုများ ကိုသာ ပိုမိုဆိုးရွားစေမည်ဖြစ်ကြောင်း သတိပေးလိုက်သည်။ ထို့ကြောင့် နိုင်ငံတကာအနေဖြင့် အဆိုပါ ရွေးကောက်ပွဲကို ပယ်ချရန်နှင့် မြန်မာပြည်သူများ၏ နွေဦး တော်လှန်ရေးကို ထောက်ခံပေးရန် သံအမတ်ကြီးက တိုက်တွန်းတောင်းဆိုခဲ့သည်။

စစ်ကော်မရှင်က AI နည်းပညာသုံး၍ ပြည်သူများအား စောင့်ကြည့်ထောက်လှမ်းခြောက်လှန့်

ရွေးကောက်ပွဲမှာ စစ်အုပ်စုအား လူသတ်လိုင်စင် ပေးမည့် လုပ်ရပ်ဖြစ်ဟု တက်ကြွလှုပ်ရှားသူများ ထောက်ပြ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၁၇ ရက်။ စစ်ကော်မရှင်က ကျင်းပရန် ပြင်ဆင်နေသည့် ရွေးကောက်ပွဲသည် လူ့အခွင့်အရေး ချိုးဖောက်မှုများကို ဆက် လက် ကျူးလွန်ရန်နှင့် စစ်အုပ်စုအတွက် ‘လူသတ်လိုင်စင်’ တရားဝင်ရရှိအောင် ပြုလုပ်ပေးမည့် လုပ်ရပ်သာ ဖြစ်ကြောင်း တက်ကြွလှုပ်ရှားသူများက ဝေဖန်ထောက်ပြလိုက်သည်။ အဆိုပါ ရွေးကောက်ပွဲသည် လူ့အခွင့်အရေး ချိုးဖောက်မှုများကို တရားဝင် ကျူးလွန်နိုင်အောင် ဖန်တီးမည့် အခင်းအကျင်း ဖြစ်သောကြောင့် ပြည်သူများအနေဖြင့် ဆန့်ကျင်ကြရန်နှင့် နိုင်ငံတကာကလည်း လက်မခံဘဲ ကန့်ကွက်ပေးရန် လိုအပ်ကြောင်း ကျေးလက်မြေအဖွဲ့ ဒါရိုက်တာ ဒေါ်မူစဲက တိုက်တွန်းပြောဆိုသည်။ မတရားမှုများကို နှုတ်ဆိတ်မနေဘဲ ထုတ်ဖော်ပြောဆိုရန် အရေးကြီးပုံနှင့် ပတ်သက်၍ ဒေါ်မူစဲက “လူ့အခွင့် အရေး ချိုးဖောက်မှုနဲ့ ပတ်သက်ပြီးတော့ မြန်မာပြည်သား တစ်ဦးချင်းစီရော၊ နိုင်ငံတကာကရောပေါ့နော်။ ချိုး ဖောက် ခံရမှုတွေကို တွေ့ရှိတဲ့အခါ ခံရတဲ့အခါမှာ ဆိတ်ဆိတ် မနေပဲနဲ့ ဖွင့်ပြောရမယ်ပေါ့နော်။ ထုတ်ဖော်ရ မယ်။ ကျမ တို့က တိတ်ဆိတ်နေမယ် နှုတ်ဆိတ်နေမယ် ဆိုလို့ရှိ ရင်တော့ ဒီစစ်အုပ်စုကို လူသတ်လိုင်စင်တွေ သူတို့လက်ထဲ ပေးလိုက်သလို ဖြစ်မှာပဲပေါ့” ဟု ပြောသည်။ လက်ရှိတွင် စစ်ကော်မရှင်တပ်သည် ၎င်းတို့၏ ရွေးကောက်ပွဲကို ဝေဖန်သူများအား ဖမ်းဆီးနှိပ်စက်ခြင်း၊ ပြည်သူ များအား မဲထည့်ရန် အကျပ်ကိုင် ခြိမ်းခြောက်ခြင်းနှင့် ကြိုတင်မဲမထည့်ပါက တက္ကသိုလ်တက်ခွင့် မပေးခြင်း စသည့် လူ့အခွင့်အရေး ချိုးဖောက်မှုများကို ဗြောင်ကျကျ ကျူးလွန်နေသည်ဟု လူ့အခွင့်အရေး လှုပ်ရှားသူ များက ဆိုသည်။ လွတ်လပ်စွာ ဆန္ဒမဲပေးပိုင်ခွင့် ချိုးဖောက်ခံနေရသည့် အခြေအနေနှင့် ပတ်သက်၍ ရှမ်းလူ့အခွင့်အရေးမဏ္ဍိုင် (SHRF) ၏ ပြောရေးဆိုခွင့်ရှိသူ ယိင်းလျန်းဟန်က ယခုကဲ့သို့ ထောက်ပြသည်။ “အဓိကကတော့ ရွေးကောက်ပွဲဆိုတာ ဒီမိုကရေစီနည်းလမ်း ကျကျနဲ့ပေါ့နော် ဖိအားပေးပြီး မဲပေးတာမျိုး မရှိရဘူး။ ကိုယ်မဲပေးချင်တဲ့လူ ပေးလို့ရတယ်။ မဲမပေးချင်တဲ့သူ မပေးရဘူး။ ဒီလိုပြည်သူတွေ လွတ်လပ်စွာ ဆန္ဒမဲပေးပိုင်ခွင့် ရှိတယ်။ ဒါပေမဲ့ အခုလိုမျိုး ဖိအားပေးတာက ဒါကလွတ်လပ်စွာ မဲပေးပိုင်ခွင့်ကို ချိုးဖောက် ရာ ကျနေတယ်ရှင့်။” ဤကဲ့သို့ လွတ်လပ်စွာ ရွေးချယ်ပိုင်ခွင့်ကို ပိတ်ပင်တားဆီးနေသည့်အပြင် စစ်ကော်မရှင်သည် ၎င်းတို့၏ ရွေးကောက်ပွဲ အောင်မြင်ရေးအတွက် ပြည်သူများအား နည်းလမ်းမျိုးစုံဖြင့် အကျပ်ကိုင်လျက်ရှိသည်။ မဲပေးပိုင်ခွင့်ကို ခြိမ်းခြောက်ခံနေရသည့် အခြေအနေနှင့် ပတ်သက်၍လည်း ဒေါ်မူစဲက “ပြည်သူတွေကနေပြီး တော့မှ အခုက ပြည်သူတွေမှာ ဆုပ်လည်း စူး စားလည်းရူး သူတို့က အမျိုးမျိုး ဒီရွေးကောက်ပွဲမှာ အတု အယောင် ရွေးကောက်ပွဲမှာ သူတို့က မဲထည့်ခိုင်းမယ်။ ဖိအားပေးတယ်။ တကယ်က ဆိုလို့ရှိရင် ဒီဟာက ပြည် သူတွေက နိုင်ငံသားတိုင်း နိုင်ငံရေး အခွင့်အရေးကို ချိုးဖောက်ခံနေရတာ ဖြစ်တယ်။ ပြည်သူတွေသည် သူတို့ မဲပေးချင်ပေးမယ်။ မပေးချင်မပေးဘူး။ ဒါပေမယ့် အခုက ခြိမ်းခြောက်တယ်။ မပေးလို့ရှိရင် ဘယ်လို ဆိုပြီး တော့ ခြိမ်းခြောက်တယ်” ဟု ပြောသည်။ ထို့အပြင် မွန်ပြည်လူ့အခွင့်အရေးဖောင်ဒေးရှင်း (HURFOM) ဒါရိုက်တာ နိုင်အဲမွန်ကလည်း ရွေးကောက်ပွဲ ကာ လနှင့် နီးကပ်လာချိန်တွင် လေကြောင်းတိုက်ခိုက်မှုနှင့် ရွာမီးရှို့မှုများ ပိုမိုများပြားလာပုံကို ယခုကဲ့သို့ ပြောသည်။ “တော်တော်များများက ရွေးကောက်ပွဲနဲ့ ဆက်စပ်ပြီးတော့ကို ချိုးဖောက်မှုတွေ ပြန်ပြီးတော့ တိုးပွားနေတာ တွေ ရှိတယ်။ Airstrike တွေက အများကြီး တိုးလာတာတွေ့ရတယ်။ နောက်တစ်ခုက ခုနကလိုမျိုး အမျိုး သမီးတွေ ကလေးတွေ နောက်တစ်ခါ ရွာတွေ မီးရှို့ခံရတာတွေပိုများလာတယ်။ အခုလိုမျိုး ရွေးကောက်ပွဲ ကာလနဲ့ နီးလာလေ ချိုးဖောက်မှုတွေက များလာလေဆိုတဲ့ အနေအထားကို ပြနေပါတယ်။” စစ်ကော်မရှင်၏ အစီအစဉ်အရ ရွေးကောက်ပွဲကို အပိုင်း ၃ ပိုင်း ခွဲ၍ ကျင်းပသွားမည်ဖြစ်ပြီး၊ ပထမပိုင်းကို လာမည့် ဒီဇင်ဘာလ ၂၈ ရက်နေ့တွင် လည်းကောင်း၊ ဒုတိယပိုင်းကို ၂၀၂၆ ခုနှစ် ဇန်နဝါရီလ ၁၁ ရက်နေ့တွင် လည်းကောင်း ကျင်းပသွားရန် သတ်မှတ်ထားသည်။ အပိုင်း ၃ ကိုမူ ဇန်နဝါရီလ ၂၅ ရက်နေ့တွင် ကျင်းပမည်ဟု ကြေညာထားသည်။ သို့သော်လည်း ဤရွေးကောက်ပွဲသည် စစ်တပ်၏ အကျိုးစီးပွားအတွက်သာဖြစ်ပြီး ပြည်သူများ စစ်ကျွန်ဘဝမှ ရုန်းထွက်၍ မရအောင် အစီအစဉ်တကျ ပြုလုပ်ခြင်းသာ ဖြစ်သည်ဟု တက်ကြွလှုပ်ရှားသူများက ရှုမြင်ကြ သည်။ ပြည်သူတို့၏ လူ့အခွင့်အရေး ဆုံးရှုံးနေရမှုများကို အဆုံးသတ်နိုင်ရန် စစ်အာဏာရှင် အမြစ်ပြတ်ရေးအတွက် အားသွန်ခွန်စိုက် လုပ်ဆောင်ကြရန် NUG ယာယီသမ္မတ ဒူဝါလရှီးက ၇၇ နှစ်မြောက် အပြည်ပြည်ဆိုင်ရာ လူ့အခွင့်အရေးနေ့တွင် တိုက်တွန်းထားသည်။ အလားတူ သြစတြေးလျ၊ ယူကေ၊ ကနေဒါနှင့် ဥရောပသမဂ္ဂ (EU) တို့ကလည်း စစ်ကော်မရှင်၏ ရွေးကောက်ပွဲ သည် အကြမ်းဖက်မှုများကို ပိုမိုဆိုးရွားစေပြီး စစ်မှန်သည့် ဖြေရှင်းနည်းနှင့် ပိုမိုဝေးကွာစေနိုင်ကြောင်း ပူးတွဲသတိပေး ထုတ်ပြန်ထားကြသည်။

ရွေးကောက်ပွဲမှာ စစ်အုပ်စုအား လူသတ်လိုင်စင် ပေးမည့် လုပ်ရပ်ဖြစ်ဟု တက်ကြွလှုပ်ရှားသူများ ထောက်ပြ

တနိုင်းပယင်းမှော်ကို စစ်တပ် လေကြောင်းဖြင့် ထိုးစစ်ဆင်  သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာ ၁၆ ရက်။ စစ်ကော်မရှင်တပ်ဖွဲ့များသည် တစ်နိုင်ငံလုံး အတိုင်းအတာဖြင့် လေကြောင်းတိုက်ခိုက်မှုများကို အရှိန်မြှင့်တင်နေ သည့် ကြားမှ စီးပွားရေးအရ အရေးပါသည့် ကချင်ပြည်၊ တနိုင်းမြို့နယ်ရှိ ပယင်းမှော်ဒေသကို ပစ်မှတ်ထားကာ စစ်ကြောင်းထိုးပြီး လေကြောင်းပါသုံး၍ အပြင်းအထန် ထိုးစစ်ဆင် တိုက်ခိုက်ခဲ့သည်။ အဆိုပါ တနိုင်းဒေသရှိ ပယင်းမှော်နှင့် ရွှေမှော် နေရာများကို ဒီဇင်ဘာ ၁၃ ရက်နေ့တွင် လေကြောင်းမှ ဗုံးကြဲခဲ့ သည့်အပြင် ဒီဇင်ဘာလ ၁၅ ရက်နေ့အထိ စစ်ကြောင်းထိုးမှုများ ဆက်ရှိနေသည်ဟု မြေပြင် သတင်းရင်းမြစ်က ပြောသည်။ အဆိုပါ တိုက်ခိုက်မှုမှာ ကချင်လွတ်လပ်ရေးတပ်မတော် (KIA) တပ်ရင်း ၁၄ နယ်မြေ ကို ဦးတည်ခဲ့ခြင်းဖြစ်ပြီး၊ တနိုင်း ပယင်းမှော်ဒေသသည် ပယင်းနှင့် ရွှေမှော်များ ပေါများသည့်အတွက် စစ်ကော်မရှင်အတွက် စီးပွားရေးအရ အရေးပါသော နယ်မြေတစ်ခု ဖြစ်သည်။ KIA က အဆိုပါ စခန်းကို ၂၀၂၄ ခုနှစ်၊ ဧပြီလတွင် သိမ်းပိုက်ထားခဲ့ရာ၊ ယခု စစ်ကော်မရှင်၏ လုပ်ရပ်သည် နယ်မြေပြန်လည် သိမ်းပိုက်ရန် ကြိုးပမ်းခြင်းဖြစ်သည်ဟု ဒေသခံအချို့က သုံးသပ်ပြောဆိုနေကြသည်။ ဒေသခံများ၏ ပြောဆိုချက်အရ တိုက်ပွဲ ပြင်းထန်လာချိန် ဒီဇင်ဘာလ ၁၃ ရက်နေ့၊ နေ့ခင်း ၁ နာရီကျော်ခန့်တွင် စစ်ကော်မရှင်တပ်သည် တိုက်ပွဲဖြစ်ပွားရာ ပတ်ဝန်းကျင်ကို ဂျက်တိုက်လေယာဉ်များဖြင့် ဗုံးကြဲတိုက်ခိုက်ခဲ့ သည်ဟု သိရသည်။ ဒေသခံတစ်ဦးက “စစ်တပ်က မြေပြင်ကနေ ထိုးစစ်ဆင်ရုံမကဘဲ လေကြောင်း အင်အားနဲ့ပါ အပြင်းအထန် တိုက်ခိုက်ခဲ့တာပါ။ ဒီပယင်းမှော်ဒေသကို သူတို့ ဘယ်လောက် အရေးထားလဲဆိုတာ ပြတာပဲ။ တိုက်ပွဲဖြစ်တဲ့ ပတ်ဝန်းကျင်မှာ အရပ်သားလုပ်သားတွေလည်း ရှိနေတာကို ဂရုမစိုက်ပါဘူး” ဟု ပြောသည်။ တိုက်ပွဲများကြောင့် ပယင်းမှော်လုပ်ကွက်များ အားလုံး ရပ်နားထားရပြီး ဒေသခံလုပ်သား ထောင်ပေါင်းများစွာ မှာ ဘေးလွတ်ရာသို့ ထွက်ပြေးတိမ်းရှောင်နေကြရသည်။ တနိုင်းဒေသ တိုက်ခိုက်မှုသည် စစ်အုပ်စု၏ လက်ရှိ စစ်ရေးရည်မှန်းချက်ကို ထင်ဟပ်နေကြောင်း ဒေသခံများက သုံးသပ်သည်။ စစ်တပ်သည် ယခုရက်ပိုင်းအတွင်း ချင်းပြည်နှင့် ရခိုင်ပြည် (မြောက်ဦး၊ ပုဏ္ဏားကျွန်းတို့အပြင် AA က သိမ်းပိုက် ထားသည့် နယ်မြေများကိုလည်း လေကြောင်းတိုက်ခိုက်မှုများကို တစ်နိုင်ငံလုံး အတိုင်းအတာဖြင့် ဆက်တိုက် ပြုလုပ်နေသည်ကို တွေ့ရသည်။ ဒေသခံများက ယခုတနိုင်း တိုက်ခိုက်မှုသည် စစ်အုပ်စု၏ နယ်မြေပြန်သိမ်းပိုက်ရေး စစ်ရေးရည်မှန်းချက်ကို ပြသနေပြီး၊ အရပ်သားပြည်သူများ၏ အသက်အိုးအိမ်စည်းစိမ်ကို ထိခိုက်စေသည့် လုပ်ရပ်ဖြစ်ကြောင်း ဝေဖန် ပြောဆိုလျက်ရှိသည်။

တနိုင်းပယင်းမှော်ကို စစ်တပ် လေကြောင်းဖြင့် ထိုးစစ်ဆင်

မိုးမိတ်မြို့နယ်အတွင်း ဗုံးကြဲတိုက်ခိုက်မှု အရပ်သား ၁၁ ဦးသေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၈ ရက်။ တအာင်းအမျိုးသား လွတ်မြောက်ရေးတပ်မတော် (TNLA) ထံမှ ပြန်လည် လွှဲပြောင်းပေးရန် သဘောတူညီ ထားသော မိုးမိတ်မြို့နယ်၊ မြစ်ဆုံကျေးရွာထဲရှိ အရပ်သားများ စုဝေးရာနေရာကို စစ်ကော်မရှင်တပ်က လေကြောင်းမှ ဗုံးကြဲတိုက်ခိုက်ခဲ့ရာ အရပ်သား ၁၁ ဦး သေဆုံးခဲ့သည်။ ဒီဇင်ဘာလ ၆ ရက်နေ့တွင် လေကြောင်းတိုက်ခိုက်မှု နှစ်ကြိမ်ပြုလုပ်ခဲ့ရာ စစ်ရှောင်များနှင့် ဒေသခံများ အပါအဝင် အရပ်သား ၁၁ ဦး သေဆုံး ခဲ့ကြောင်း ဒေသခံသတင်းရင်းမြစ်များက အတည်ပြုသည်။ စစ်ကော်မရှင်၏ လေယာဉ်သည် ဒီဇင်ဘာ ၆ ရက်နေ့ နံနက် ၉ နာရီခန့်တွင် မြစ်ဆုံကျေးရွာကို ဗုံးနှစ်ကြိမ် တိုင်တိုင် ကြဲချခဲ့ပြီးနောက် ဒီဇင်ဘာ ၇ ရက်နေ့တွင်လည်း ထပ်မံ၍ လေကြောင်းမှ ဗုံးကြဲတိုက်ခိုက်ခဲ့သေး ကြောင်း ဒေသခံများက ပြောသည်။ လေကြောင်းတိုက်ခိုက်ခံရသည့် နေရာသည် တိုက်ပွဲဖြစ်ပွားနေသည့် စစ်မြေပြင်နေရာမဟုတ်ဘဲ စစ်ဘေး ရှောင်များနှင့် ဒေသခံများ စုဝေးနေထိုင်သည့် နေရာဖြစ်သည်။ သေဆုံးသူ ၁၁ ဦးထဲတွင် ကိုယ်ဝန်ဆောင်အမျိုးသမီးတစ်ဦး အပါအဝင် မိုးကုတ်နှင့် မိုးမိတ်ဒေသများမှ စစ်ဘေးရှောင်လာသူများ ပါဝင်သည်။ စစ်ကော်မရှင်၏ ကျူးလွန်မှုတွင် ပိုမိုဆိုးရွားစေခဲ့သည်မှာ ပထမအကြိမ် ဗုံးကြဲမှုကြောင့် ထိခိုက်ဒဏ်ရာရ နေသူများကို ဒေသခံများက ကူညီကယ်ဆယ်နေစဉ် ဒုတိယအကြိမ် ထပ်မံပစ်ခတ်ခဲ့ခြင်း ဖြစ်သည်။ ယင်းလုပ်ရပ်ကြောင့် သေဆုံးသူများ ထပ်မံဖြစ်ပွားခဲ့ရသည်။ ဒေသခံအမျိုးသားတစ်ဦးက ဖြစ်ရပ်အခြေအနေကို ယခုကဲ့သို့ ပြောသည်။ “လေယာဉ်က ပထမတစ်ကြိမ် ဗုံးကြဲပြီး ထိခိုက်တဲ့သူတွေကို ကျနော်တို့ ဝိုင်းကူညီနေတုန်း ဒုတိယအကြိမ် ထပ်မံပစ်ခတ်ခဲ့တာပါ။ ဒီနေရာက စစ်မြေပြင်မဟုတ်ပါဘူး၊ စစ်ရှောင်ပြည်သူတွေ စုဝေးနေထိုင်တဲ့ အရပ် သားနေရာကို တမင်ပစ်မှတ်ထား တိုက်ခိုက်ခဲ့တာပါပဲ။” မိုးမိတ်မြို့နယ်ကို တအာင်းတပ် TNLA က သိမ်းပိုက်ခဲ့ပြီးနောက် မကြာသေးမီက တရုတ်နိုင်ငံ၏ ကြားဝင် စေ့စပ်မှု ဖြင့် မိုးမိတ်မြို့ကို စစ်ကော်မရှင်ထံ ပြန်လည်လွှဲပြောင်းပေးရန် သဘောတူညီမှု ရယူခဲ့သည်။ အဆိုပါ သဘောတူညီချက်အရ စစ်ကော်မရှင်တပ်သည် မိုးမိတ်မြို့ထဲသို့သာ ပြန်လည်ရောက်ရှိ တပ်စွဲထားဆဲ ဖြစ်ပြီး မြစ်ဆုံကျေးရွာအထိ မရောက်ရှိသေးပေ။ ဒေသခံတစ်ဦးက စစ်ကော်မရှင်တပ်၏ လုပ်ရပ်သည် တည်ဆဲ သဘောတူညီချက်ကို ထပ်မံ ချိုးဖောက်ခြင်း ဖြစ်ကြောင်း ယခုကဲ့သို့ ပြောသည်။ “တရုတ်နိုင်ငံက ကြားဝင်ပြီး မြို့နှစ်မြို့ကို ပြန်လွှဲဖို့ သဘောတူထားချိန်မှာ တိုက်ပွဲမရှိတဲ့ အရပ်သားရွာတွေကို လေကြောင်းနဲ့ တိုက်ရိုက်ပစ်မှတ်ထား တိုက်ခိုက်တာဟာ တည်ဆဲ ငြိမ်းချမ်းရေး သဘောတူညီချက်ကိုပါ စစ်တပ်က ထပ်ချိုးဖောက်တာ ဖြစ်တယ်ဗျ။” ထို့အပြင် တိုက်ခိုက်မှုပြီးနောက် မကွဲသေးသော လေယာဉ်ဗုံးတစ်လုံးသည် ကျေးရွာလမ်းမပေါ်၌ ကျန်ရှိနေခဲ့ရာ အဆိုပါ ဗုံးကြောင့် ရွာသူရွာသားများနှင့် စစ်ရှောင်များအတွက် ထပ်ဆင့်အန္တရာယ်တစ်ခု ဖြစ်ပွားလာနိုင်သည်ဟု စိုးရိမ်ပူပန်မှုများလည်း မြင့်တက်နေသည်။

မိုးမိတ်မြို့နယ်အတွင်း ဗုံးကြဲတိုက်ခိုက်မှု အရပ်သား ၁၁ ဦးသေဆုံး

« Prev 1 … 5 6 7 8 9 10 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

အထိနာနေသည့် စစ်တပ်က ချင်းတောင်ပိုင်းကို ဗုံးကြဲ
စစ်တပ်ပိုင် ဆက်သွယ်ရေးကွန်ရက်များမာား အပြီးပိတ်ရန် JFM တောင်းဆို
မောတောင်စစ်ဘေးရှောင် ၅,၀၀၀ ခန့် တောတောင်များအတွင်း ရိက္ခာပြတ်လပ်နေ
ရေးဘီလူးဌာနချုပ် ညသန်းခေါင်ဗုံးကြဲခံရ၊ ရဲဘော် ၁၀ ဦး သေဆုံး
ရေး-ထားဝယ်လမ်းပေါ်က ကျေးရွာတစ်ရွာကို တိုက်ပွဲမရှိဘဲ စစ်တပ် ဗုံးကြဲ

Archives

Archives

×Close