Trump – Page 2 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Tag Archive

Tag: Trump

ဒေါ်နယ်ထရန့်ကို ရှီကျင့်ဖျင် ကော်ဇောနီဖြင့် ကြိုဆို သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၁၄ ရက်။ ကမ္ဘာ့အင်အားကြီးနှစ်နိုင်ငံဖြစ်သည့် တရုတ်ပြည်သူ့သမ္မတနိုင်ငံနှင့် အမေရိကန်ပြည်ထောင်စုတို့မှ ထိပ်သီးခေါင်းဆောင်နှစ်ဦးသည် ယနေ့တွင် ပေကျင်းမြို့ရှိ ပြည်သူ့ခမ်းမဆောင်ကြီးရှေ့၌ တွေ့ဆုံခဲ့ကြသည်။ တရုတ်သမ္မတ ရှီကျင့်ဖျင်သည် အမေရိကန်သမ္မတ ဒေါ်နယ်ထရမ့်အား ကော်ဇော်နီခင်း၍ ခမ်းနားထည်ဝါစွာ ကြိုဆိုခဲ့သည်။ အဆိုပါအခမ်းအနားတွင် စစ်ရေးပြအခမ်းအနားများနှင့် ကလေးငယ်များ၏ ကြိုဆိုနှုတ်ဆက်မှုများ ထည့်သွင်းကျင်းပခဲ့သည်။ တွေ့ဆုံဆွေးနွေးပွဲမစတင်မီ သမ္မတရှီကျင့်ဖျင်က နှစ်နိုင်ငံအကြား ပြိုင်ဘက်များအဖြစ် ရှုမြင်ခြင်းထက် မိတ်ဖက်များအဖြစ် လက်တွဲဆောင်ရွက်သွားရန် တိုက်တွန်းပြောကြားခဲ့သည်။ အလားတူ သမ္မတဒေါ်နယ်ထရမ့်ကလည်း သမ္မတရှီကျင့်ဖျင်အား ခေါင်းဆောင်ကောင်းတစ်ဦးအဖြစ် ချီးကျူးစကားဆိုခဲ့ပြီး ၎င်းနှင့် မိတ်ဆွေဖြစ်ရသည်ကို ဂုဏ်ယူကြောင်းနှင့် နှစ်နိုင်ငံဆက်ဆံရေးမှာ ယခင်ကထက် ပိုမိုခိုင်မာလာမည်ဖြစ်ကြောင်း တုံ့ပြန်ပြောကြားခဲ့သည်။ အဆိုပါခရီးစဉ်တွင် သမ္မတထရမ့်နှင့်အတူ Tesla အမှုဆောင်အရာရှိချုပ် အီလွန်မတ်စ်နှင့် Nvidia အမှုဆောင်အရာရှိချုပ် ဂျန်ဆင်ဟွမ်တို့ကဲ့သို့သော နည်းပညာထိပ်သီးလုပ်ငန်းရှင်များလည်း လိုက်ပါလာကြသည်။ အမေရိကန်ဘဏ္ဍာရေးဝန်ကြီးသည် အင်္ဂါနေ့က ဂျပန်နိုင်ငံတွင် ဝန်ကြီးချုပ် စနိုင်းတာကာအိချီနှင့် တွေ့ဆုံခဲ့ပြီး မနေ့က တောင်ကိုရီးယားနိုင်ငံတွင် တရုတ်ဒုသမ္မတဦးဆောင်သောအဖွဲ့နှင့် တွေ့ဆုံဆွေးနွေးခဲ့သည်။ သမ္မတထရမ့်သည် အမေရိကန်စက်မှုလုပ်ငန်းများအတွက် တရုတ်ဈေးကွက်သို့ ပိုမိုဝင်ရောက်ခွင့်ရရှိရန် တောင်းဆိုသွားမည်ဖြစ်ပြီး နှစ်နိုင်ငံကုန်သွယ်ရေးအဖွဲ့များကြား အပြုသဘောဆောင်သည့် ရလဒ်များ ထွက်ပေါ်နေကြောင်း တရုတ်အစိုးရပိုင်မီဒီယာများက ဖော်ပြသည်။ သို့သော်လည်း ဆွေးနွေးပွဲတွင် အခွန်တိုးမြှင့်မှု၊ နည်းပညာယှဉ်ပြိုင်မှု၊ အီရန်စစ်ပွဲနှင့် ထိုင်ဝမ်အရေးကဲ့သို့သော ထိရှလွယ်သည့် ကိစ္စရပ်များကိုလည်း ထည့်သွင်းဆွေးနွေးရန် ရှိနေသည်။ သမ္မတထရမ့်သည် ၂၀၁၇ ခုနှစ်နောက်ပိုင်း ပထမဆုံးအကြိမ် တရုတ်နိုင်ငံသို့ လာရောက်ခြင်းဖြစ်သည်။ ခေါင်းဆောင်နှစ်ဦးသည် ယနေ့ညနေပိုင်းတွင် ကျင်းပမည့် နိုင်ငံတော်ဧည့်ခံပွဲ အခမ်းအနားသို့ ဆက်လက်တက်ရောက်မည်ဖြစ်သည်။

ဒေါ်နယ်ထရန့်ကို ရှီကျင့်ဖျင် ကော်ဇောနီဖြင့် ကြိုဆို

ဒေါ်နယ်ထရန့် တရုတ်ခရီးစဉ် မတိုင်မီ ဘဏ္ဍာရေး ဝန်ကြီးက ဂျပန်နှင့် ကိုရီးယားတွင် ပြင်ဆင်မှုလုပ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၁၃ ရက်။ အမေရိကန် သမ္မတ ဒေါ်နယ်ထရန့်သည် တရုတ်သမ္မတ ရှီကျင့်ပင်နှင့် တွေ့ဆုံဆွေးနွေးရန်အတွက် ယနေ့တွင် ပီကင်း (Beijing) သို့ တရားဝင်ခရီးစဉ် စတင်မည်ဖြစ်သည်။ ဤခရီးစဉ်အတွင်း နှစ်နိုင်ငံအကြား တင်းမာနေသည့် စစ်ရေး၊ ကူးသန်းရောင်းဝယ်ရေး၊ အခွန်အကောက်ဆိုင်ရာ မူဝါဒများနှင့် အရေးပါသည့် ဉာဏ်ရည်တု (AI) အသုံးပြုမှုဆိုင်ရာ ကိစ္စရပ်များကို အလေးထား ဆွေးနွေးသွားမည်ဟု အိမ်ဖြူတော်က ထုတ်ပြန်ထားသည်။ သမ္မတ၏ ခရီးစဉ်မတိုင်မီ ကြိုတင်ပြင်ဆင်မှုများအတွက် အမေရိကန် ဘဏ္ဍာရေးဝန်ကြီး စကော့ ဘက်ဆင့်န် (Scott Bessent) သည် အာရှမိတ်ဖက်နိုင်ငံများနှင့် တွေ့ဆုံလျက်ရှိသည်။ ဝန်ကြီး ဘက်ဆင့်န်သည် အင်္ဂါနေ့က ဂျပန်ဝန်ကြီးချုပ် တာကာအီချီ၊ ဘဏ္ဍာရေးဝန်ကြီး ကာတာယားမားတို့နှင့် တွေ့ဆုံခဲ့ပြီး ငွေလဲလှယ်နှုန်း တည်ငြိမ်စေရေးအတွက် နှစ်နိုင်ငံ ဘဏ္ဍာရေးဌာနများအကြား အမြဲတစေ နီးကပ်စွာ ဆက်သွယ်ဆောင်ရွက်သွားရန် သဘောတူညီခဲ့ကြသည်။ ၎င်းက ဂျပန်နိုင်ငံ၏ စီးပွားရေး အခြေခံအချက်အလက်များ ခိုင်မာမှုသည် ငွေလဲလှယ်နှုန်းအပေါ် ကောင်းမွန်စွာ ရောင်ပြန်ဟပ်လာမည်ဖြစ်ကြောင်း မှတ်ချက်ပြုခဲ့သည်။ ဝန်ကြီးသည် ယနေ့တွင် တောင်ကိုရီးယားနိုင်ငံ၊ ဆိုးလ်မြို့၌ တရုတ် ဒုတိယဝန်ကြီးချုပ် ဟဲလီဖုန်း (He Lifeng) နှင့် ဆက်လက်တွေ့ဆုံမည်ဖြစ်ကာ၊ ကြာသပတေးနေ့တွင် ပီကင်းသို့ သွားရောက်၍ သမ္မတ ထရန့်၏ ခရီးစဉ်တွင် ပူးပေါင်းပါဝင်မည်ဖြစ်သည်။ #Japan #US #Korea

ဒေါ်နယ်ထရန့် တရုတ်ခရီးစဉ် မတိုင်မီ ဘဏ္ဍာရေး ဝန်ကြီးက ဂျပန်နှင့် ကိုရီးယားတွင် ပြင်ဆင်မှုလုပ်

အီရန်၏ စစ်ရပ်စဲရေး တုန့်ပြန်ချက်ကို သမ္မတ ထရန့်ပယ်ချ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၁၁ ရက်။ အမေရိကန်သမ္မတ ဒေါ်နယ်ထရန့်သည် စစ်ပွဲအဆုံးသတ်ရန် အမေရိကန်ဘက်မှ ကမ်းလှမ်းချက်အပေါ် အီရန်၏ ပြန်လည်တုံ့ပြန်မှုကို “လုံးဝလက်ခံနိုင်စရာမရှိ” ဟု ဆိုကာ ယနေ့တွင် ပြတ်သားစွာ ပယ်ချလိုက်သည်။ အီရန်နိုင်ငံသည် ပါကစ္စတန်နိုင်ငံမှတစ်ဆင့် ၎င်းတို့၏ တုံ့ပြန်ချက်ကို ပေးပို့ခဲ့ခြင်းဖြစ်ပြီး၊ သမ္မတထရန့်က အီရန်သည် အမေရိကန်နှင့် တစ်ကမ္ဘာလုံးကို “ကစားပွဲတစ်ခုကဲ့သို့ ကစားနေခြင်းဖြစ်သည်” ဟု ၎င်း၏ Truth Social လူမှုကွန်ရက်တွင် ပြင်းပြင်းထန်ထန် စွပ်စွဲပြစ်တင်ခဲ့သည်။ အီရန်ဘက်မှ တုံ့ပြန်ချက်တွင် လက်ဘနွန်အရေးအပါအဝင် စစ်မျက်နှာအားလုံး၌ တိုက်ပွဲများရပ်တန့်ရန်၊ ပိတ်ဆို့ခံထားရသော ဟော်မုဇ်ရေလက်ကြားအပေါ် ၎င်းတို့၏ အချုပ်အခြာအာဏာကို အသိအမှတ်ပြုရန်နှင့် စစ်ပွဲနစ်နာကြေးပေးရန်တို့ကို တောင်းဆိုထားသည်။ သို့သော် အမေရိကန်က အဓိကကိုင်တွယ်လိုသည့် နျူကလီးယားအစီအစဉ်ကိစ္စကို အီရန်ဘက်က ထည့်သွင်းပြောကြားခြင်းမရှိသေးသည့်အပြင်၊ ဗြိတိန်နှင့် ပြင်သစ်နိုင်ငံတို့က ဟော်မုဇ်ရေလက်ကြားအတွင်းသို့ စစ်သင်္ဘောများ စေလွှတ်ပါက ပြတ်သားစွာတုံ့ပြန်သွားမည်ဟု ခြိမ်းခြောက်ထားသည်။ အလားတူ အစ္စရေးဝန်ကြီးချုပ် နေတန်ယာဟုကလည်း “စစ်ပွဲမပြီးသေးကြောင်းနှင့် အီရန်တွင် လုပ်ဆောင်ရန်များစွာ ကျန်ရှိနေသေးကြောင်း” ပြောကြားခဲ့သည်။ ယခုကဲ့သို့ ငြိမ်းချမ်းရေးဆွေးနွေးပွဲများ တစ်ကျော့ပြန်ရပ်တန့်သွားခြင်းကြောင့် ကမ္ဘာ့ရေနံဈေးနှုန်းများ ၃ ရာခိုင်နှုန်းကျော် ပြန်လည်မြင့်တက်လာပြီး ရေနံစိမ်းတစ်စည်လျှင် ၁၀၄ ဒသမ ၅၀ ဒေါ်လာအထိ ရောက်ရှိသွားခဲ့သည်။ #အီရန်စစ်ပွဲ #IranWar

အီရန်၏ စစ်ရပ်စဲရေး တုန့်ပြန်ချက်ကို သမ္မတ ထရန့်ပယ်ချ

သမ္မတ ထရန့်ရဲ့ မိတ်ဆွေကို စည်းရုံးလှုံ့ဆော်ပေးဖို့ စစ်အုပ်စု ငှားရမ်း သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၁ ရက်။ အမေရိကန်သမ္မတ ဒေါ်နယ်ထရမ့်ရဲ့ ရင်းနှီးတဲ့ မိတ်ဆွေတစ်ဦးဖြစ်သူ ရော်ဂျာစတုန်း (Roger Stone) ဟာ မြန်မာ စစ်အုပ်စုရဲ့ ဝန်ကြီးဌာနတစ်ခုအတွက် အမေရိကန်မှာ စည်းရုံးလှုံ့ဆော်ပေးဖို့ လက်မှတ်ရေးထိုး သဘောတူညီခဲ့တယ်လို့ Bloomberg သတင်းမှာ ဖော်ပြထားပါတယ်။ ဒီသဘောတူညီချက်အရ ရော်ဂျာစတုန်းဟာ မြန်မာနိုင်ငံအပေါ် ချမှတ်ထားတဲ့ အမေရိကန်ရဲ့ ပိတ်ဆို့အရေးယူမှုအချို့ကို ဖြေလျှော့ပေးဖို့နဲ့ နှစ်နိုင်ငံဆက်ဆံရေး ကောင်းမွန်လာစေဖို့အတွက် ဝါရှင်တန်ဒီစီမှာ ကြိုးပမ်းပေးရမှာ ဖြစ်ပါတယ်။ လက်ရှိ စစ်အုပ်စုက လွှမ်းမိုးထားတဲ့ မြန်မာ့နိုင်ငံရေး အခြေအနေတွေကြောင့် ဒီလုပ်ရပ်အပေါ် လူ့အခွင့်အရေးလှုပ်ရှားသူတွေနဲ့ နိုင်ငံရေးလေ့လာသူတွေက ဝေဖန်နေကြပါတယ်။ ရော်ဂျာစတုန်းဟာ အမေရိကန်နိုင်ငံရေးလောကမှာ အလွန်ထင်ရှားပြီး အငြင်းပွားဖွယ်ရာများတဲ့ "နိုင်ငံရေး မဟာဗျူဟာမြောက် အကြံပေးပုဂ္ဂိုလ်" (Political Strategist) တစ်ဦး ဖြစ်ပါတယ်။ သူဟာ အမေရိကန်သမ္မတ ဒေါ်နယ်ထရမ့်ရဲ့ ရင်းနှီးသူတစ်ဦးလည်း ဖြစ်ပါတယ်။ သူဟာ ဒေါ်နယ်ထရမ့်ကို နိုင်ငံရေးလောကထဲ ရောက်အောင် ကူညီပေးခဲ့တဲ့ နှစ်ရှည်လများ မိတ်ဆွေဖြစ်ပြီး ၂၀၁၆ ရွေးကောက်ပွဲမှာလည်း အဓိကနေရာက ပါဝင်ခဲ့သူပါ။ ဒါ့အပြင် သူဟာ နိုင်ငံရေးပြိုင်ဘက်တွေကို တိုက်ခိုက်ရာမှာ ပြင်းထန်ပြီး အငြင်းပွားဖွယ်ရာ ညစ်ပတ်တဲ့ နည်းလမ်းတွေကို အသုံးပြုတတ်တာကြောင့် "Dirty Trickster" လို့တောင် နာမည်ကျော်ပါတယ်။ အမေရိကန်ရွေးကောက်ပွဲကို ရုရှားနိုင်ငံက စွက်ဖက်မှုနဲ့ ပတ်သက်ပြီး စစ်ဆေးရာမှာ လွှတ်တော်ကို လိမ်ညာပြောဆိုမှု၊ သက်သေတွေကို ခြိမ်းခြောက်မှု စတဲ့ ပြစ်မှု ၇ ခုနဲ့ ထောင်ဒဏ် လ ၄၀ ချမှတ်ခံခဲ့ရဖူးပါတယ်။ ဒါပေမဲ့ ၂၀၂၀ ခုနှစ်မှာ သမ္မတထရမ့်က သူ့ကို ထောင်ကလွတ်အောင် ပြစ်ဒဏ်လျှော့ပေါ့ပေးခဲ့ပြီး နောက်ပိုင်းမှာ လွတ်ငြိမ်းချမ်းသာခွင့် အပြည့်အဝ ပေးခဲ့ပါတယ်။ သူဟာ ဆယ်စုနှစ်ပေါင်းများစွာအတွင်း အမေရိကန် ရီပတ်ဘလစ်ကန်ပါတီ သမ္မတတွေ ဖြစ်တဲ့ သမ္မတနစ်ဆင်၊ သမ္မတ ရော်နယ် ရေဂင် စသူတို့ အတွက်လည်း အလုပ်လုပ်ပေးခဲ့ဖူးတဲ့ ဝါရင့် နိုင်ငံရေးသမားတစ်ဦး ဖြစ်ပါတယ်။ အကျဉ်းချုပ်ရရင် သူဟာ အမေရိကန် ရှေးရိုးစွဲနိုင်ငံရေးလောကမှာ သြဇာညောင်းပြီး ထရမ့်နဲ့ အလွန်နီးစပ်တဲ့၊ နည်းလမ်းမျိုးစုံသုံးပြီး နိုင်ငံရေး ရည်မှန်းချက်အောင်မြင်အောင် လုပ်ဆောင်တတ်သူတစ်ဦး ဖြစ်ပါတယ်။ သူ့ကို စစ်အစိုးရက အမေရိကန်ရဲ့ အရေးယူ ပိတ်ဆို့မှုတွေ ဖယ်ရှားနိုင်ဖို့အတွက် စည်းရုံးလှုံ့ဆော်ပေးဖို့ ငှားရမ်းလိုက်တာ ဖြစ်ပါတယ်။ #Trump #RogerStone #Bloomberg

သမ္မတ ထရန့်ရဲ့ မိတ်ဆွေကို စည်းရုံးလှုံ့ဆော်ပေးဖို့ စစ်အုပ်စု ငှားရမ်း

NATO မှ နုတ်ထွက်ရန် ဒေါ်နယ်ထရန့် နည်းလမ်းရှာနေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၃ ရက်။ အမေရိကန်သမ္မတ ဒေါ်နယ်ထရန့်သည် မြောက်အတ္တလန္တိတ်စစ်စာချုပ်အဖွဲ့ (NATO) မှ အမေရိကန်ပြည်ထောင်စု နုတ်ထွက်ရေးကို အလေးအနက် စဉ်းစားလျက်ရှိကြောင်း ထုတ်ဖော်ပြောကြားလိုက်သည်။ လက်ရှိဖြစ်ပွားနေသော အီရန်စစ်ပွဲတွင် NATO အဖွဲ့ဝင် ဥရောပနိုင်ငံများက ဟော်မုဇ်ရေလက်ကြား (Strait of Hormuz) ပိတ်ဆို့မှုအား ဖြေရှင်းရန် အမေရိကန်က တောင်းဆိုခဲ့သော်လည်း စစ်သင်္ဘောများ စေလွှတ်ခြင်းမရှိခဲ့ပေ။ ထို့အပြင် ဗြိတိန်၊ စပိန်နှင့် အီတလီနိုင်ငံတို့က အမေရိကန်စစ်လေယာဉ်များအား ၎င်းတို့၏ ဝေဟင်ပိုင်နက် အသုံးပြုခွင့်နှင့် စခန်းချနားခွင့်ကို ပိတ်ပင်ခဲ့ခြင်းတို့ကြောင့် သမ္မတထရမ့်က ယခုကဲ့သို့ တုံ့ပြန်ခဲ့ခြင်းဖြစ်သည်။ သို့ရာတွင် ၂၀၂၃ ခုနှစ်၌ အမေရိကန်လွှတ်တော်က ပြဋ္ဌာန်းထားသည့် ဥပဒေအရ သမ္မတသည် အထက်လွှတ်တော်အမတ် ၁၀၀ အနက် ၆၇ ဦး (နှစ်ပုံသုံးပုံ) ၏ ထောက်ခံမှုမရှိဘဲ NATO မှ နုတ်ထွက်ခွင့်မရှိပေ။ အိမ်ဖြူတော်အစိုးရအဖွဲ့ကမူ ထိုဥပဒေသည် အခြေခံဥပဒေနှင့် ညီညွတ်ခြင်းမရှိကြောင်းနှင့် နိုင်ငံတကာစာချုပ်များမှ နုတ်ထွက်ခွင့်မှာ သမ္မတ၏ လုပ်ပိုင်ခွင့်သာဖြစ်ကြောင်း တုံ့ပြန်ရန် ပြင်ဆင်နေသည်။ အကဲခတ်များကမူ အမေရိကန်သည် NATO စစ်အသုံးစရိတ်၏ ၆၂ ရာခိုင်နှုန်းကို ကျခံထားခြင်းကြောင့် အမေရိကန်၏ ပူးပေါင်းဆောင်ရွက်မှုမပါဝင်ပါက ဥပဒေကြောင်းအရ မည်သို့ပင်ရှိစေကာမူ NATO အဖွဲ့၏ စစ်ရေးစွမ်းဆောင်ရည်မှာ အလွန်အမင်း အားနည်းသွားမည်ဖြစ်ကြောင်း သုံးသပ်ထားကြသည်။

NATO မှ နုတ်ထွက်ရန် ဒေါ်နယ်ထရန့် နည်းလမ်းရှာနေ

သမ္မတ ဒေါ်နယ်ထရမ့်၏ နေအိမ်အနီး ချည်းကပ်လာသူကို သေနတ်ဖြင့် ပစ်သတ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၂၃ ရက်။ အမေရိကန်သမ္မတ ဒေါ်နယ်ထရမ့်ရဲ့ ဖလော်ရီဒါပြည်နယ်၊ Mar-a-Lago အိမ်တော် လုံခြုံရေး နယ်မြေအတွင်းသို့ လက်နက်ကိုင်ဆောင်ပြီး ကျူးကျော်ဝင်ရောက်ခဲ့သူတစ်ဦးကို လုံခြုံရေး တပ်ဖွဲ့ဝင်များက ပစ်သတ်ခဲ့သည်။ ၂၀၂၆ ခုနှစ်၊ ဖေဖော်ဝါရီ ၂၂ ရက် (တနင်္ဂနွေနေ့) မနက်အစောပိုင်းတွင် သမ္မတထရမ့်၏ Mar-a-Lago နေအိမ် လုံခြုံရေးနယ်မြေအတွင်းသို့ လက်နက်ကိုင်ဆောင်ထားသူတစ်ဦး ကျူးကျော်ဝင်ရောက်ခဲ့သဖြင့် လုံခြုံရေးအဖွဲ့ (Secret Service) က ပစ်သတ်ခဲ့ခြင်းဖြစ်သည်။ ထိုအချိန်တွင် သမ္မတထရမ့်မှာ ဝါရှင်တန်ဒီစီတွင် ရောက်ရှိနေခဲ့သည်။ ပစ်သတ်ခံရသူမှာ အသက် ၂၁ နှစ်အရွယ် Austin T Martin ဖြစ်ပြီး မြောက်ကာရိုလိုင်းနား ပြည်နယ်သား ဖြစ်ပါသည်။ ၎င်း၏မိသားစုက တနင်္ဂနွေနေ့ မနက်အစောပိုင်းမှာပင် လူပျောက်တိုင်ကြားထားသူ ဖြစ်ပါသည်။ ၎င်းသည် မြောက်ကာရိုလိုင်းနားမှ ဖလော်ရီဒါသို့ ကားမောင်းလာစဉ် လမ်းခရီးတွင် သေနတ်ဝယ်ယူခဲ့ခြင်း ရှိ၊ မရှိကို အာဏာပိုင်များက စုံစမ်းနေပါသည်။ တရားခံကို Shotgun (ပြောင်းချောသေနတ်) တစ်လက်နှင့် လောင်စာဆီပုံး တစ်ပုံးကို ကိုင်ဆောင်ပြီး အိမ်တော်၏ မြောက်ဘက်ဂိတ်အနီးတွင် တွေ့ရှိခဲ့ခြင်း ဖြစ်သည်။ လုံခြုံရေးအဖွဲ့က လက်နက်ချရန် အမိန့်ပေးသော်လည်း ၎င်းက ဆီပုံးကိုချပြီး သေနတ်ဖြင့် ပြန်လည်ပစ်ခတ်မည့် အနေအထား ပြုလုပ်ခဲ့သဖြင့် လုံခြုံရေးအေးဂျင့်များက ပစ်ခတ်နှိမ်နင်းခဲ့ခြင်း ဖြစ်ပါသည်။ သမ္မတထရမ့်သည် ယခင်ကလည်း လုပ်ကြံသတ်ဖြတ်ရန် ကြိုးပမ်းမှုအချို့နှင့် ရင်ဆိုင်ခဲ့ရဖူးသည်။ ၂၀၂၄ ခုနှစ်၊ ဇူလိုင်လက ပင်ဆယ်လ်ဗေးနီးယားတွင် နားရွက်ကို သေနတ်မှန်ခဲ့ဖူးသလို၊ နောက်ပိုင်းတွင်လည်း ဂေါက်ကွင်း၌ လုပ်ကြံရန် ကြိုးပမ်းမှုတစ်ခု ရှိခဲ့ဖူးပါသည်။

သမ္မတ ဒေါ်နယ်ထရမ့်၏ နေအိမ်အနီး ချည်းကပ်လာသူကို သေနတ်ဖြင့် ပစ်သတ်

ဂါဇာပြန်လည်ထူထောင်ရေးအတွက် အသစ်ဖွဲ့လိုက်သော ငြိမ်းချမ်းရေးဘုတ်အဖွဲ့က ဒေါ်လာ ၇ ဘီလီယံ ကူညီမည်

ထရန့်က အီရန်ကို ၁၀ ရက် အချိန်ပေး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၂၀ ရက်။ အမေရိကန်သမ္မတ ဒေါ်နယ်ထရန့်က အီရန်နိုင်ငံနှင့် နျူကလီးယားဆိုင်ရာ သဘောတူညီချက်အသစ် တစ်ရပ် ရရှိခြင်း ရှိ၊ မရှိကို လာမည့် (၁၀) ရက်အတွင်း သိရှိရမည်ဖြစ်ကြောင်း ထုတ်ဖော်ပြောကြား လိုက်သည်။ သမ္မတထရန့်က အီရန်အနေဖြင့် အဓိပ္ပာယ်ရှိသော သဘောတူညီချက်တစ်ရပ်ကို အဆိုပါကာလအတွင်း မရရှိခဲ့ပါက "မကောင်းသော အကျိုးဆက်များ" ဖြစ်ပေါ်လာလိမ့်မည်ဟု သတိပေးခဲ့ရာ၊ ယင်းမှာ စစ်ရေးအရ အရေးယူဆောင်ရွက်မှုများ ပြုလုပ်လာနိုင်သည့် အခြေအနေကို ဆိုလိုခြင်းဖြစ်သည်။ လက်ရှိတွင် အမေရိကန်ပြည်ထောင်စုသည် အရှေ့အလယ်ပိုင်းဒေသသို့ လေယာဉ်တင်သင်္ဘော အပါအဝင် စစ်အင်အားများကို တိုးမြှင့်စေလွှတ်ထားပြီး ဖြစ်သည်။ အိမ်ဖြူတော်ကမူ အီရန်အနေဖြင့် ဆိုးကျိုးများကို ရှောင်လွှဲနိုင်ရန် သဘောတူညီချက်တစ်ရပ် ရရှိအောင် ကြိုးပမ်းခြင်းမှာ အသိဉာဏ်ရှိသော လုပ်ရပ်ဖြစ်လိမ့်မည်ဟု တိုက်တွန်းထားသည်။ တစ်ဖက်တွင်လည်း ဆွစ်ဇာလန်နိုင်ငံ၌ အမေရိကန်နှင့် အီရန် ကိုယ်စားလှယ်များအကြား ဆွေးနွေးမှုများ ရှိနေသည်။ သမ္မတထရန့်၏ အထူးစေလွှတ်ရေးမှူးများဖြစ်သည့် စတိဗ်ဝတ်ကော့ဖ် (Steve Witkoff) နှင့် ဂျာရက် ကပ်ရှ်နာ (Jared Kushner) တို့သည် အီရန်ကိုယ်စားလှယ်များနှင့် တွေ့ဆုံဆွေးနွေးမှုများ ပြုလုပ်လျက်ရှိကြောင်း သိရသည်။ သမ္မတထရန့်အနေဖြင့် အီရန်အပေါ် စစ်ရေးအရ အရေးယူရန် ပြင်ဆင်နေသော်လည်း အခြားတစ်ဖက်တွင် ဖိအားပေး ကန့်ကွက်မှုများနှင့် ရင်ဆိုင်နေရသည်။ ဗြိတိန်အစိုးရက အမေရိကန်အနေဖြင့် အီရန်ကို တိုက်ခိုက်မည်ဆိုပါက ဗြိတိန်ပိုင် စစ်အခြေစိုက်စခန်းများကို အသုံးပြုခွင့်ပေးမည်မဟုတ်ကြောင်း အတိအလင်း ပြောကြားထားသည်။ အမေရိကန်လွှတ်တော်တွင် ဒီမိုကရက်တစ်နှင့် ရီပတ်ဘလီကန် အမတ်အချို့က လွှတ်တော်၏ ခွင့်ပြုချက်မပါဘဲ အီရန်ကို စစ်မတိုက်ရန် ကန့်ကွက်နေကြသည်။ ၎င်းတို့သည် "စစ်ပွဲအာဏာဥပဒေ" (War Powers Act) ကို အသုံးပြု၍ သမ္မတ၏ စစ်ရေးဆိုင်ရာ လုပ်ပိုင်ခွင့်ကို ထိန်းချုပ်နိုင်ရန် ကြိုးပမ်းလျက်ရှိသည်။ အီရန်၏ အဓိပတိခေါင်းဆောင် အယာတိုလာ ခါမေနီ ကမူ အမေရိကန်၏ ခြိမ်းခြောက်မှုကို လူမှုကွန်ရက်မှတစ်ဆင့် တုံ့ပြန်ခဲ့သည်။ ၎င်းက အမေရိကန်၏ စစ်သင်္ဘောများကို ပင်လယ်အောက်ခြေသို့ နှစ်မြှုပ်ပစ်နိုင်သည့် လက်နက်များ အီရန်တွင် ရှိနေကြောင်း သတိပေး ခြိမ်းခြောက်ထားသည်။

ထရန့်က အီရန်ကို ၁၀ ရက် အချိန်ပေး

ရုရှားရေနံဝယ်ယူသည့် နိုင်ငံများကို သွင်းကုန်ခွန် ၅၀၀% ထိ စည်းကြပ်နိုင်သည့် ဥပဒေ အတည်ပြု သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၉ ရက်။ သမ္မတထရန့်သည် ရုရှားထံမှ ရေနံကို ဈေးနှုန်းသက်သာစွာဖြင့် ဝယ်ယူနေသည့် နိုင်ငံများကို အရေးယူပိတ်ဆို့မည့် "Sanctioning Russia Act 2025" ဥပဒေကြမ်းကို အတည်ပြုပေးခဲ့သည်။ အဆိုပါဥပဒေသည် ရုရှားရေနံကို အဓိကဝယ်ယူနေသည့် တရုတ်၊ အိန္ဒိယနှင့် ဘရာဇီးနိုင်ငံများကို ပစ်မှတ်ထားခြင်းဖြစ်ပြီး၊ ထိုနိုင်ငံများမှ အမေရိကန်သို့ တင်သွင်းသော ကုန်ပစ္စည်းများအပေါ် သွင်းကုန်ခွန် ၅၀၀ ရာခိုင်နှုန်းအထိ တိုးမြှင့်ကောက်ခံရန် ခွင့်ပြုထားသည်။ တစ်ချိန်တည်းမှာပင် ယူကရိန်းသမ္မတ ဗိုလိုဒီမာ ဇယ်လန်းစကီးက ၂၀၂၆ ခုနှစ်၏ ပထမနှစ်ဝက်အတွင်း စစ်ပွဲကို အဆုံးသတ်နိုင်မည်ဟု ယုံကြည်ကြောင်း ပြောကြားခဲ့သည်။ သို့သော်လည်း ဗြိတိန်နှင့် ပြင်သစ်တို့က ယူကရိန်းမြေပေါ်တွင် နိုင်ငံစုံတပ်ဖွဲ့များ ဖြန့်ကျက်ထားရန် စီစဉ်နေခြင်းအပေါ် ရုရှားနိုင်ငံခြားရေးဝန်ကြီးဌာနက အပြင်းအထန် သတိပေးခဲ့ပြီး ယူကရိန်းသို့ လာရောက်သည့် မည်သည့်နိုင်ငံခြားတပ်ဖွဲ့ဝင်မဆို ရုရှားစစ်တပ်၏ တရားဝင် တိုက်ခိုက်မည့် ပစ်မှတ်များ ဖြစ်လာမည်ဟု ထုတ်ပြန်ထားသည်။

ရုရှားရေနံဝယ်ယူသည့် နိုင်ငံများကို သွင်းကုန်ခွန် ၅၀၀% ထိ စည်းကြပ်နိုင်သည့် ဥပဒေ အတည်ပြု

« Prev 1 2 3 Next »

ဗုဒ္ဓဟူးနေ့ည ရုပ်သံသတင်း (၇-၁၀-၂၆)

ဗုဒ္ဓဟူးနေ့ညပိုင်း ရုပ်သံသတင်း(၇-၁၀-၂၆)

ဒီကနေ့ အစီအစဉ်ထဲမှာတော့-

– ကျိုက်ထိုမြို့နယ်မှာ တိုက်ပွဲမဖြစ်ပဲ စစ်အုပ်စုက အရပ်သားရွာတွေကို ဗုံးကြဲလို့ ထောင်နဲ့ချီထွက်ပြေးနေရ

– ရခိုင်-ဧရာဝတီ အစပ်မှာ တိုက်ပွဲ ပြင်းထန်ပြီး စစ်အုပ်စုက အစုအပြုံလိုက် ကျဆုံးနေ

– ကချင်ပြည်က ရွှေကူ-ငအိုး လမ်းပိုင်း သုံးသူတွေကို အရေးယူသွားမယ်လို့ KIAသတိပေး

– အလုပ်သမားတွေ ဆီက အခွန်နဲ့ လွှဲငွေ ရရှိဖို့ ပိုမို တင်းကြပ်သွားမယ်လို့ စစ်အုပ်စုပြော

– စစ်အုပ်စု ခေါင်းဆောင် ၇-၈ ရက်နေ့တွေမှာ မလေးရှားကို သွားမည်

– လာအို ဒုတိယမြို့တော်လေဆိပ် ကိုယ်ပိုင်လေယာဉ်ပေါ်တင်တဲ့ မူးယစ်ဆေးဝါး ကီလို ၅၀၀ ကျော်ဖမ်းမိ

– မက်ဒေါ်နယ်(McDonald’s)ကုမ္ပဏီဟာ AI သုံးစွဲပြီး လွတ်လပ်စွာ ယှဉ်ပြိုင်ခွင့်ကို ချိုးဖောက်တယ်ဆိုပြီး တရားစွဲခံရ

– ပထမဆုံး FIFA အာဆီယံ ဖလားကို အင်ဒိုနီးရှား အသင်း ပင်နယ်တီ အဆုံးအဖြတ်နဲ့ ဆွတ်ခူး…..စတာတွေ တင်ဆက်ထားပါတယ်။

×Close

News

FATF က မြန်မာကို အမည်ပျက်စာရင်း၌ ၅ နှစ်မြောက် ဆက်လက်ထားရှိ၊ — October 31, 2026 7:09 pm
အမေရိကန်နှင့် ဂျပန် ပူးတွဲ ဒုံးကျည်ထုတ်လုပ်ရေးနှင့် ဆိုင်ဘာလုံခြုံရေး သဘောတူညီချက် ရရှိ — October 30, 2026 5:33 pm
မြောက်ကိုရီးယား ပဲ့ထိန်းဒုံးကျည် ၁၀ စီးခန့် အရှေ့ဘက် ပင်လယ်သို့ ပစ်ခတ် — October 30, 2026 5:27 pm

Recent Posts

FATF က မြန်မာကို အမည်ပျက်စာရင်း၌ ၅ နှစ်မြောက် ဆက်လက်ထားရှိ၊
ဧရာဝတီတိုင်းတွင် AA နှင့်ဆက်စပ်သည်ဟုဆိုကာ ဖမ်းဆီးမှုများ ဆက်ရှိနေ
မလေးပြန်ရခိုင်ဒေသခံအချို့ကို ဆက်လက်ထိန်းသိမ်းထားဆဲဖြစ်
ထားဝယ်ခရိုင် အတွင်း ရွာသားတစ်ဦးကို စစ်အုပ်စုတပ် ဖမ်းဆီးသတ်ဖြတ်
အမေရိကန်နှင့် ဂျပန် ပူးတွဲ ဒုံးကျည်ထုတ်လုပ်ရေးနှင့် ဆိုင်ဘာလုံခြုံရေး သဘောတူညီချက် ရရှိ

Archives

Archives

×Close