ပွင့်ဖြူ ပြည်တွင်း အခွန်ရုံး ဗုံးဖြင့် တိုက်ခိုက်ခံရ
သတင်းနှင့် မီဒီယာ ကွန်ရက်။
၂၀၂၂ ခုနှစ်၊ ဇန္နဝါရီလ ၁ ရက်။
မကွေးတိုင်းဒေသကြီး၊ ပွင့်ဖြူမြို့နယ်ရှိ ပြည်တွင်းအခွန်ဦးစီးဌာနရုံးကို ဇန္နဝါရီလ ၁ ရက်နေ့၊ နံနက် ၅ နာရီ အချိန် ခန့်က လက်လုပ်ဗုံးဖြင့် တိုက်ခိုက်ခဲ့သည်ဟု ပွင့်ဖြူ PDF က ထုတ်ပြန်ကြေညာသည်။
ပွင့်ဖြူမြို့တွင် ဒီဇင်ဘာလ ၂၇ ရက်နေ့ ကတည်းက ပုဒ်မ ၁၄၄ ထုတ်ပြန်ထားပြီး ည ၈ နာရီမှ နံနက် ၄ နာရီ အိမ် ပြင် မထွက်ရန် တားမြစ်ထားသည်။
”မနက် ၅ နာရီလောက်က အုန်းကနဲ့အသံကြားလိုက်ရတယ်။ နေမြင့်မှ သွားကြည့်တော့ အမိုးတွေလန်ပြီး တော် တော်လေး ပျက်ဆီးသွားတယ်။ လူတော့ထိခိုက်သံမကြားဘူး” ဟု ပွင့်ဖြူမြို့ခံ လူငယ်တစ်ဦးက ပြောသည်။
စစ်ကောင်စီအတွက် အခွန်တွေ တိုးကောက်ပြီး ထောက်ပံ့နေသည့်အတွက် လူရှင်းချိန်ကို ရွေးပြီး သတိပေး ဗုံးခွဲ ရခြင်းဖြစ်ပြီး တိုက်ခိုက်ခဲ့သူမှာ ဘေးကင်းလုံခြုံသည့်နေရာကို ရောက်နေသည်ဟု ပွင့်ဖြူ PDF က ထုတ်ပြန်ကြေငြာထား သည်။
ပွင်ဖြူမြို့နယ် စစ်ကောင်စီခန့် လက်ပံနွယ်ကျေးရွာ အုပ်ရေးမှူးအိမ်လည်း ဇန္နဝါရီလ ၁ ရက်နေ့၊ နံနက် ၆ နာရီ အချိန်ခန့်က ဗုံးဖြင့်တိုက်ခံရသည်ဟု ရွာသားများက ပြောသည်။
လက်ပံနွယ်ကျေးရွာဗုံးကွဲမှုနှင့် ပတ်သက်၍ “အဲ့အုပ်ချုပ်ရေးမှူးက နိုင်ငံရေး တက်ကြွလှုပ်ရှားနေတဲ့ လူငယ်တွေ အဖမ်းခံရအောင် သတင်းပေး ဒလံလုပ်လို့ ဖောက်ခွဲခံရတာ” ဟု လက်ပံနွယ်ကျေးရွာက အသက် ၆၀ နှစ် အရွယ် ဒေသခံ အမျိုးသား တစ်ဦး က ပြောသည်။
ထိုကဲ့သို့ ဗုံးပေါက်ကွဲမှုအပြီး စစ်ကောင်စီတပ်ဖွဲ့ဝင်များနှင့် ရဲတပ်ဖွဲ့ဝင်များက ပွင့်ဖြူမြို့ အဝင်လမ်းနှင့် အထွက် လမ်းများ အားလုံးကို ပိတ်ဆို့ရှာဖွေစစ်ဆေးနေသည်ဟု သိရသည်။
