ရဲစခန်း တိုက်ခံရပြီး စစ်ကူလာသော စစ်ကား ထပ်မံ တိုက်ခိုက်ခံရ၊ ၈ ဦးသေ
သတင်းနှင့်မီဒီယာ ကွန်ရက်။
၂၀၂၃ ခုနှစ်၊ ဖေဖော်ဝါရီလ ၂၂ ရက်။
မကွေးတိုင်းဒေသကြီးအတွင်း တိုက်နယ် ရဲစခန်း တိုက်ခိုက်ခံရပြီးနောက် စစ်ကူလာသည့် စစ်ကားထပ်မံ တိုက်ခိုက်ခံရမှုကြောင့် စစ်ကောက်စီလက်အောက်ခံ တပ်ဖွဲ့ဝင် ၈ ဦးသေဆုံးသွားသည်ဟု သရက်ခရိုင် PDF တပ်ရင်း ၄ ပြန်ကြားရေးကပြောသည်။
မကွေးတိုင်းဒေသကြီး၊ သရက်မြို့နယ်ထဲက ဆင်ကော် တိုက်နယ်ရဲစခန်းကို တနင်္လာနေ့ နံနက် အစောပိုင်းက ၄၀ မမ လောင်ချာဖြင့် ၃ ချက်ပစ်ခတ်တိုက်ခိုက်ခဲ့ရာ ဒုရဲအုပ်တစ်ဦး အပါအဝင် ၃ ဦး သေဆုံးသွားသည်။
သရက်ခရိုင် PDF တပ်ရင်း ၄ ပြန်ကြားရေးတာဝန်ခံ ကိုမြတ်က ”မိုင်းနဲ့ဆွဲတာ ကားပါ ပက်လက်လန်သွားတယ်။ မိုင်းကွဲပြီးတော့ နှစ်ဘက်ညှပ်ပစ်ကြတာဆိုတော့ အသေအပျောက်များနိုင်တယ်” ဟု ပြောသည်။
သရက်ခရိုင် PDF တပ်ရင်း ၄ နှင့် မိုးကြိုးပြောက်ကျား အဖွဲ့တို့ ပူးပေါင်းကာ ၃ ချက် ပစ်ခတ်ရာ ၂ ချက်မှာ ရဲစခန်း ထဲ တည့်တည့် ကျပြီး ဒုရဲအုပ်တဦးနှင့် ရဲတပ်ကြပ်တို့ ၃ ဦးသေဆုံးခဲ့သည် ဟု ဆိုသည်။
စစ်ကူလာသည့် ကာကွယ်ရေးပစ္စည်းစက်ရုံ ကပစ ၁၂ က အင်အား ၂၅ ဦးခန့်ပါသည့် လိုက်ထရပ်ကားကိုလည်း ပုဏ္ဍားကျေးရွာနှင့် တွင်းလည်ကျေးရွာကြားတွင် မိုင်းဆွဲတိုက်ခိုက်ရာ အဆိုပါ နေရာတွင်လည်း ၅ ဦးခန့် ထပ်မံ သေဆုံးခဲ့သည်ဟု ပြန်ကြားရေးတာဝန်ခံ ကိုမြတ်က ပြောသည်။
အလားတူ ဖေဖော်ဝါရီလ ၂၀ ရက်နေ့၊ နံနက်က မင်းတုန်းမြို့အဝင် ၅ မိုင် စစ်ဆေးရေးဂိတ်ကို ဒရုန်းနှင့် ဗုံးသီးချ တိုက်ခိုက် ခဲ့ရာတွင် ပေါက်ကွဲခြင်းမရှိဟု အသက် ၃၀ အရွယ် လူငယ်တစ်ဦး က ပြောသည်။
၅ မိုင် စစ်ဆေးရေးဂိတ်သည် ပုသိမ်-မုံရွာ လမ်းမပေါ်တွင်ရှိပြီး ဆင်ကော်ရဲစခန်းသည် သရက်မြို့နယ်ထဲတွင် ပါဝင်သော်လည်း မင်းတုန်းချောင်းဘေးတွင်ရှိပြီး မင်းတုန်းမြို့နယ် အဆုံးနားတွင်ရှိသည့် ချောင်ကျသည့် စခန်း ဖြစ်သည်ဟု ဒေသခံများက ပြောသည်။
သရက်ခရိုင်ဆေးရုံကို ရဲနှင့်စစ်သားအလောင်း ၈ လောင်းခန့် ရောက်လာသည်ဟု ခရိုင်ဆေးရုံနှင့် နီးစပ်သူတစ်ဦး က ပြောသည်။
