ရခိုင်ပြည်နယ်နှင့် ထိစပ်နေသော ဧရာဝတီတိုင်း ပင်လယ်ပြင်တွင် သွားလာမှုများကို စစ်တပ်ကပိတ်ထား
သတင်းနှင့်မီဒီယာကွန်ရက်။
၂၀၂၄ ခုနှစ်၊ ဖေဖော်ဝါရီလ ၂၉ ရက်။
ရခိုင်ပြည်နယ်နှင့် ထိစပ်နေသော ဧရာဝတီတိုင်းအနီး ပင်လယ်ပြင်၌ ရေယာဉ်များ၊ လှေနှင့် စက်လှေများ သွား လာမှုကို စစ်ကောင်စီက ရက်အကန့်အသတ်မရှိ ပိတ်ထားသည်ဟု ဒေသခံများက ပြောသည်။
စစ်ကောင်စီသည့် ပြီးခဲ့သည့် ဖေဖေါ်ဝါရီလ ၂၅ ရက်နေ့က စတင်ပြီး ဧရာဝတီတိုင်း ပင်လယ်ကမ်းရိုးတန်း တလျှောက်မှာ စစ်ရေးလေ့ကျင့်မှုရှိသည်ဟု ဆိုကာ ဒေသန္တရအမိန့်ထုတ်ပြီး ပင်လယ်ပြင် အတွင်း သွားလာမှုကို ပိတ်ထားသောကြောင့် ဒေသခံအများစုမှာ အခက်အခဲတွေ့နေကြသည်။
ငရုတ်ကောင်း ကမ်းခြေမြို့ခံ လုပ်ငန်းရှင်တစ်ဦးက “ပင်လယ် မထွက်ရဘူး။ တားထားတာ ၄ ရက်ရှိနေပြီ။ တနေ့ လုပ် တနေ့စား အလုပ်သမားတွေ အတွက် နေ့စဉ် ဝမ်းရေးအတွက် အခက်အခဲ ရှိသလို ပင်လယ်ပြင် ငါးဖမ်း ရာသီချိန်မှာ ရက်အကန့်အသတ် မရှိ ပိတ်တယ်ဆိုတော့ လုပ်ငန်းရှင်တွေလည်း နစ်နာတယ်” ဟု ပြောသည်။
ဒေသခံ အများစုမှာ ပင်လယ်ပြင်ကို အမှီပြု၍ ကမ်းနီး ကမ်းဝေး ငါးဖမ်းလုပ်ငန်းများဖြင့် ဝမ်းစာ ရှာဖွေရသူများ နှင့် ပင်လယ် ရေကြောင်းလမ်းကို အသုံးပြု၍ ခရီးသည်နှင့် ကုန်စည် ပို့ဆောင်ရေး လုပ်ငန်းများကို လုပ်ကိုင်ကြ သူများ ဖြစ်သည်။
ဧရာဝတီတိုင်း ပင်လယ်ကမ်းရိုးတန်း ဒေသများဖြစ်သော သာပေါင်း၊ ရွှေသောင်ယံ၊ ချောင်းသာ၊ ငွေဆောင်၊ ငပု တော၊ ငရုတ်ကောင်း၊ မော်တင်၊ ဟိုင်းကြီးကျွန်း၊ လပွတ္တာ၊ ဒေးဒရဲ၊ ဖျာပုံ၊ အမာ စသော ဒေသများတွင် ယခု အချိန်ကာလတွင် ကမ်းနီးကမ်းဝေး ငါးဖမ်းလုပ်ငန်း လုပ်ကိုင်ကြသည့် အချိန် ဖြစ်သည်။
စစ်ကောင်စီ၏ ရွှေသောင်ယံမြို့ အုပ်ချုပ်ရေး အဖွဲ့ဝင် တစ်ဦးက ”လက်နက်ကြီးတွေ စမ်းသပ် ပစ်ခတ်ဖို့ ရှိနေလို့ အန္တရာယ် မရှိအောင် အထက်က ပိတ်ခိုင်းထားတယ်။ ဘယ်နေ့ဘယ်အချိန် ပစ်မလဲဆိုတာ မသိဘူး။ တား ထား တဲ့က ထွက်ကြလို့ ထိခိုက်ရင် ထွက်သူအပြစ်ပဲ” ဟု ပြောသည်။
ယခုကဲ့သို့ ပိတ်ပင်ခဲ့ပြီးနောက်ပိုင်း ဧရာဝတီတိုင်းအနီး ပင်လယ်ပြင်ရှိ ဟိုင်းကြီးကျွန်းမြို့ ပတ်ဝန်းကျင်တွင် ဖေ ဖေါ်ဝါရီလ ၂၆ ရက်နေ့က အမြောက် ပစ်ခတ်သံများ ကြားရသော်လည်း ပင်လယ်ပြင် သွားလာခွင့် ပိတ်ထား သည့် အခြား အခြားဒေသများတွင်မူ ပစ်ခတ်မှုများ မရှိဘူးဟု ဧရာဝတီတိုင်း ပင်လယ် ကမ်းရိုးတန်းအနီး နေထိုင် သူ အချို့က ပြောသည်။
စစ်ကောင်စီတပ်များ ပင်လယ်ပပြင်၌ စစ်ရေးလေ့ကျင့်နှင့် ပတ်သက်၍ ဧရာဝတီတိုင်း ကမ်းရိုးတန်း တလျှောက် ရှိ အမြောက်စခန်းများက စမ်းသပ်ပစ်ခတ်ခြင်း၊ ကြည်း ရေ လေ ပူးပေါင်းစစ်ဆင်ရေး ကမ်းတက် တိုက်ပွဲ အတွက် လေ့ကျင့်ခြင်း၊ ဟိုင်းကြီးကျွန်းရှိ ပမ္မဝတီ ရေတပ်စခန်းဌာနချုပ်ရှိ စစ်သင်္ဘောများ စမ်းသပ်ပစ်ခတ်ခြင်း များ ဖြစ်နိုင်သည်ဟု ရေတပ် တပ်ကြပ်ကြီးဟောင်း တစ်ဦး က ပြောသည်။
ထို့အပြင် ရခိုင်ပြည်နယ်အတွင်း တိုက်ပွဲများ၌ အထိနာနေသော စစ်ကောင်စီ အနေဖြင့် ရခိုင်ပြည်နယ်အား ရေလမ်း၊ ကုန်းလမ်း၊ လေကြောင်းလမ်းများပါ ပိတ်နေပြီး ဧရာဝတီတိုင်းနှင့် ရခိုင်ပြည်နယ်တို့ ထိစပ်နေသော ရေကြောင်း၊ ကုန်းကြောင်းကိုပါ ပိတ်ဆို့ပြီး နယ်မြေစိုးမိုးမှု လုပ်နေခြင်းဖြစ်သည်ဟု နိုင်ငံရေး စစ်ရေး အတွေ့ အကြုံရှိသူ အသက် ၇၀ ခန့်အရွယ် ဗိုလ်ကြီးဟောင်း ကြည်ဝင်းက ဆိုသည်။
စစ်ကောင်စီသည် ဧရာဝတီတိုင်း၏ ကမ်းရိုးတန်း တလျှောက် စိုးမိုးရေး အတွက် ရွှေသောင်ယံ၊ ထိတ်စွန်း၊ အုန်း ကျွန်း၊ လိပ်ကျွန်း နှင့် ဟိုင်းကြီးကျွန်း တို့တွင် အမြေက်တပ်များ ထားရှိသည့်အပြင် ကမ်းရီုးတန်းဒေသ စိုးမိုးရေး အတွက် ခလရ ၂၇၁ နှင့် အခြားခြေလျှင် တပပ်ဖွဲ့များ စုဖွဲ့ထားပြီး ဧရာဝတီတိုင်း ပင်လယ်ပြင် စိုးမိုးရေး အတွက် ပမ္မဝတီ ရေတပ်စခန်း ဌာနချုပ်၊ ပုသိမ်ရေတပ် ရေယာဉ်စု တပ်ဖွဲ့ နှင့် ကဒုံကနိ ရေတပ် ရေ ယာဉ်စု တပ်ဖွဲ့များ ထားရှိသည်။
ဧရာဝတီတိုင်း ပင်လယ်ကမ်းရိုးတန်း ဒေသသည် ဘင်္ဂလားဒေ့ရှ်နိုင်ငံနှင့် ရေလမ်းနယ်နိမိတ် ဆက်စပ်နေပြီး ရက္ခိုင့်တပ်တော် AA ထိုးစစ်ကြောင့် စစ်ကောင်စီ၏ စိုးမိုးနယ်မြေ အများအပြား လက်လွှတ်နေရသည့် ရခိုင် ပြည်နယ်နှင့်လည်း ရေလမ်း၊ ကုန်းလမ်း တဆက်စပ်တည်း ရှိနေသည်။
