မြောင်မြို့နယ်အတွင်း ဗုံးကြဲသဖြင့် အရပ်သား ၆ ဦးသေဆုံးပြီး အိမ်ခြေ ၅၀ ကျော် မီးလောင်
သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မတ်လ ၂၄ ရက်။
မြောင်မြို့နယ်ထဲက သောင်ကြီးကျေးရွာကို စစ်ကော်မရှင်တပ် လေကြောင်းမှ ဗုံးကြဲခဲ့ရာ ကလေးငယ်အပါအဝင် ၆ ဦး သေဆုံးကာ အိမ်ခြေ ၅၀ ကျော် မီးလောင်ပြာကျသွားသည်။
စစ်ကိုင်းတိုင်းဒေသကြီး၊ မြောင်မြို့နယ်အတွင်းရှိ သောင်ကြီးကျေးရွာကို စစ်တပ်က တိုက်လေယာဉ်ဖြင့် ဗုံးကြဲ တိုက်ခိုက်ခဲ့ခြင်းကြောင့် အသက် ၆ နှစ်အရွယ် ကလေးငယ်တစ်ဦး အပါအဝင် ဒေသခံ ၆ ဦးထက်မနည်း သေဆုံးပြီး၊ လူနေအိမ် ၅၀ ကျော် မီးလောင်ပျက်စီးခဲ့ကြောင်း ဒေသတွင်းသတင်းရင်းမြစ်များက ပြောသည်။
မြောင်မြို့နယ်မှာ စစ်ကိုင်းတိုင်း တောင်ဘက်စွန်း မြို့နယ်ဖြစ်ပြီး မန္တလေးတိုင်း၊ မကွေးတိုင်းတို့နှင့် ဆက်လျက် တည်ရှိသည်။
ပြီးခဲ့သည့် မတ်လ ၂၃ ရက်နေ့၊ မွန်းလွဲ ၁၂ နာရီခန့်တွင် မန္တလေးမြို့၊ တံတားဦးလေတပ်စခန်းမှ တက်လာသည့် ဂျက်ဖိုက်တာ တိုက်လေယာဉ်တစ်စင်းသည် တိုက်ပွဲဖြစ်ပွားခြင်းမရှိသည့် သောင်ကြီးကျေးရွာအတွင်းသို့ ဗုံး ၄ လုံး ကြဲချတိုက်ခိုက်ခဲ့ခြင်းဖြစ်သည်။
အဆိုပါ ဗုံးသီးများသည် ကျေးရွာလူနေရပ်ကွက်များအတွင်း တည့်တည့်ကျရောက်ပေါက်ကွဲခဲ့သဖြင့် နေအိမ်များ နှင့်အတူ လူများပါ မီးလောင်သေဆုံးခဲ့ရသည်။
ဒေသခံတစ်ဦးက မြေပြင်အခြေအနေနှင့် ပတ်သက်၍ “ဗုံးက ရွာလယ်ခေါင် အိမ်တွေပေါ်ကိုပဲ တည့်တည့် ကျ တာ။ အိမ်တွေကလည်း စိပ်တော့ မီးက ချက်ချင်းကို ဟုန်းခနဲ လောင်သွားတာပဲ။ သေတဲ့သူတွေဆိုရင် မီးထဲ ပါသွားလို့ ဘယ်သူဘယ်ဝါမှန်းတောင် ခွဲမရတော့ဘူး။ အခုထိလည်း မီးလောင်နေတဲ့ အပျက်အစီးပုံတွေထဲမှာ အလောင်းတွေ ထပ်ရှိဦးမလားဆိုပြီး ရှာနေရတုန်းပဲ” ဟု ပြောသည်။
ထိုတိုက်ခိုက်မှုကြောင့် အသက် ၆ နှစ်အရွယ် ယောက်ကျားလေးတစ်ဦးနှင့် လူကြီး ၅ ဦး နေရာတွင်ပင် သေဆုံးခဲ့ပြီး၊ ကလေးငယ်များ အပါအဝင် ၂၀ ကျော် ဒဏ်ရာရရှိခဲ့သည်။
ထို့ပြင် ကျေးရွာအတွင်းရှိ လယ်ယာသုံးနွား အကောင် ၂၀ ကျော်လည်း သေဆုံးခဲ့ရကြောင်း ဒေသခံများက ပြောသည်။
မြောင်မြို့နယ်အတွင်း၌ စစ်ကော်မရှင်တပ်သည် အရပ်သားပစ်မှတ်များကို လေကြောင်းမှတစ်ဆင့် ဆက်တိုက် ပစ်မှတ်ထားနေပြီး ပြီးခဲ့သည့် မတ်လ ၂၀ ရက်နေ့ကလည်း နဘက်ကျေးရွာကို ဗုံးကြဲတိုက်ခိုက်ခဲ့သဖြင့် ရက်သားအရွယ် ကလေးငယ်တစ်ဦး သေဆုံးခဲ့ရသည့်ဖြစ်စဉ် ဖြစ်ပွားခဲ့ပါသေးသည်။
လက်ရှိတွင် အိမ်ခြေ ၁,၀၀၀ ခန့်ရှိသည့် သောင်ကြီးကျေးရွာမှ ဒေသခံ ၄,၀၀၀ နီးပါးမှာ ဘေးလွတ်ရာသို့ ထွက်ပြေးတိမ်းရှောင်နေကြရသည်။
