အမေရိကန် အဆင့်မြင့် AI ကို ဝေမျှသုံးစွဲနိုင်ရေး G7 မဟာမိတ်များ ဆွေးနွေး
သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇွန်လ ၁၈ ရက်။
G7 ထိပ်သီးအစည်းအဝေးအတွင်း ကမ္ဘာ့ခေါင်းဆောင်များနှင့် ထိပ်တန်းဉာဏ်ရည်တု (AI) ကုမ္ပဏီကြီးများမှ အမှုဆောင်အရာရှိချုပ်များ တွေ့ဆုံခဲ့ကြပြီး၊ ဆိုက်ဘာတိုက်ခိုက်မှုများမှ ကာကွယ်ရန်အတွက် အမေရိကန်၏ အဆင့်မြင့် AI မော်ဒယ်များကို မဟာမိတ်နိုင်ငံများပါ ကျယ်ပြန့်စွာ ခွဲဝေအသုံးပြုခွင့်ရရှိရေး ကိစ္စရပ်များကို အလေးထားဆွေးနွေးခဲ့ကြသည်။
အထူးသဖြင့် ဆိုက်ဘာလုံခြုံရေး ခုခံကာကွယ်မှုပိုင်းတွင် ကုတ်ဒင်း (Coding) အားနည်းချက်များကို ရှာဖွေဖော်ထုတ်ရန် ထုတ်လုပ်ထားသည့် Anthropic ကုမ္ပဏီ၏ “မစ်သတ်စ်” (Mythos) အဆင့်မြင့် AI မော်ဒယ်ကို မဟာမိတ်နိုင်ငံများပါ ပိုမိုကျယ်ပြန့်စွာ အသုံးပြုခွင့်ရရှိရန် လာမည့်သီတင်းပတ်များအတွင်း တိုးတက်မှုများ ရှိလာလိမ့်မည်ဟု မျှော်လင့်ကြောင်း ပြင်သစ်သမ္မတ အီမန်နျူရယ် မက်ခရွန် (Emmanuel Macron) က ပြောကြားခဲ့သည်။
ပြီးခဲ့သည့်သီတင်းပတ်က အမေရိကန်သမ္မတ ဒေါ်နယ်ထရမ့်က အမျိုးသားလုံခြုံရေး အကြောင်းပြချက်ဖြင့် Anthropic ၏ အဆင့်မြင့် AI မော်ဒယ်များကို နိုင်ငံခြားသားများ အသုံးပြုခွင့်မရစေရန် ပိတ်ပင်ဖို့ ညွှန်ကြားခဲ့ပြီးနောက်၊ အဆိုပါ G7 အစည်းအဝေးတွင် “ယုံကြည်စိတ်ချရသည့် မဟာမိတ်များ” (Trusted Partners) အစီအစဉ်ကို ဖော်ဆောင်ရန် ခေါင်းဆောင်များအကြား ဆွေးနွေးလာကြခြင်း ဖြစ်သည်။
ဒီအစီအစဉ်အရ အမေရိကန်၏ ပိတ်ပင်မှုကို ကျော်လွန်၍ မဟာမိတ်နိုင်ငံများနှင့် ကုမ္ပဏီများအနေဖြင့် အဆိုပါ AI ကို အသုံးပြုကာ တရုတ်ကဲ့သို့သော ပြိုင်ဘက်နိုင်ငံများ၏ ဆိုက်ဘာတိုက်ခိုက်မှုအန္တရာယ်မှ ကာကွယ်နိုင်မည်ဖြစ်သည်။
အဆိုပါ G7 လုပ်ငန်းခွင် နေ့လယ်စာစားပွဲသို့ OpenAI ၏ အမှုဆောင်အရာရှိချုပ် ဆမ် အော့တ်မန်း (Sam Altman) နှင့် Google DeepMind ၏ အမှုဆောင်အရာရှိချုပ် ဒဲမစ် ဟက်ဆာဘစ် (Demis Hassabis) တို့ အပါအဝင် ထိပ်တန်းနည်းပညာရှင်များ တက်ရောက်ခဲ့ကြသည်။
ထိုတွေ့ဆုံမှုတွင် OpenAI ဥက္ကဋ္ဌ ဆမ် အော့တ်မန်းက AI နည်းပညာ ထိန်းကျောင်းကွပ်ကဲရေး ဥပဒေများကို ချမှတ်ရန်ကိစ္စသည် AI ကုမ္ပဏီများ၏ တာဝန်မဟုတ်ဘဲ ဒီမိုကရေစီအစိုးရများ၏ တာဝန်သာဖြစ်ကြောင်း ပြောကြားခဲ့သည်။
၎င်းက အစိုးရများအနေဖြင့် လုပ်ငန်းရှင်များကို လုပ်ပိုင်ခွင့်များ ပုံမအပ်လိုက်ရန် တိုက်တွန်းခဲ့ပြီး၊ ကုမ္ပဏီများက နည်းပညာများကို တီထွင်မည်ဖြစ်ကာ လွတ်လပ်သည့် ကမ္ဘာကြီးမှ ပြည်သူများကသာ စည်းမျဉ်းစည်းကမ်း များကို သတ်မှတ်ရမည်ဖြစ်ကြောင်း အလေးအနက် ထည့်သွင်းပြောကြားသွားခဲ့သည်။
