မြန်မာစစ်အုပ်စု ခေါင်းဆောင်များ အာဆီယံ ထိပ်သီးအစည်းအဝေး တက်ရောက်နိုင်ရေး အလှမ်းဝေးနေဆဲဟု ဆို
သတင်းနှင့် မီဒီယာ ကွန်ရက်။
၂၀၂၆ ခုနစ်၊ ဇူလိုင်လ ၂၄ ရက်။
မြန်မာနိုင်ငံ စစ်ကောင်စီ ခေါင်းဆောင်များအနေဖြင့် အာဆီယံ အဆင့်မြင့် ထိပ်သီးအစည်းအဝေးများသို့ ပြန်လည်တက်ရောက်နိုင်ရေးမှာ အလှမ်းဝေးနေဆဲ ဖြစ်ကြောင်း အာဆီယံ၏ မြန်မာနိုင်ငံဆိုင်ရာ အထူးသံတမန်က ထုတ်ဖော်ပြောကြားလိုက်သည်။
ဖိလစ်ပိုင်နိုင်ငံ မနီလာမြို့၌ ကျင်းပခဲ့သည့် အာဆီယံ နိုင်ငံခြားရေးဝန်ကြီးများ အစည်းအဝေးအပြီး သတင်းစာရှင်းလင်းပွဲတွင် အာဆီယံ အထူးသံတမန်ဖြစ်သူ ဖိလစ်ပိုင် နိုင်ငံခြားရေးဝန်ကြီး ထရီဆာ လာဇာရို (Theresa Lazaro) က ထိုသို့ ပြောဆိုခဲ့ခြင်းဖြစ်သည်။
အာဆီယံ ဘုံသဘောတူညီချက် ၅ ချက်အပေါ် မြန်မာစစ်ကောင်စီ၏ လိုက်နာဆောင်ရွက်မှု အခြေအနေများကို ဆက်လက် သုံးသပ်နေဆဲဖြစ်သဖြင့် အဆင့်မြင့် အစည်းအဝေးများသို့ ပြန်လည်တက်ရောက်ခွင့်ပြုရန် မဖြစ်နိုင်သေးကြောင်း ပြောကြားခဲ့သည်။
ထို့အပြင် အာဆီယံအနေဖြင့် ငြိမ်းချမ်းရေး လမ်းပြမြေပုံ တိုးတက်မှုကို တိုင်းတာနိုင်မည့် စံသတ်မှတ်ချက်များ ထုတ်ပြန်သွားမည်ဖြစ်ပြီး ယင်းအချက်များကို လိုက်နာရန် ပျက်ကွက်ပါက လိုက်နာမှုမရှိဟု အတည်ပြု သတ်မှတ်သွားမည်ဟု ဆိုသည်။
အာဆီယံ အထူးသံတမန်သည် ယခုနှစ်ကုန်ပိုင်းတွင် မြန်မာနိုင်ငံသို့ လူသားချင်းစာနာမှုဆိုင်ရာ မစ်ရှင်ဖြင့် လာရောက်ရန် ရှိနေသော်လည်း ထိန်းသိမ်းခံထားရသည့် ဒေါ်အောင်ဆန်းစုကြည်နှင့် တွေ့ဆုံခွင့် ရ၊ မရ ဆိုသည်ကိုမူ အတည်ပြုနိုင်ခြင်း မရှိသေးပေ။
မြန်မာစစ်ကောင်စီ ခေါင်းဆောင်များသည် ၂၀၂၁ ခုနှစ်က အာဆီယံနှင့် သဘောတူထားသည့် ဘုံသဘောတူညီချက်များကို အကောင်အထည်ဖော်ရန် ပျက်ကွက်ခဲ့သည့်အတွက် အာဆီယံ အဆင့်မြင့် ထိပ်သီးအစည်းအဝေးများ တက်ရောက်ခွင့် ပိတ်ပင်ခံထားရခြင်း ဖြစ်သည်။
Photo:Reuters
