အာဆီယံထိပ်သီးအစည်းအဝေးတွင် မြန်မာ့အရေး သုံးသပ်ဆုံးဖြတ်မည်
သတင်းနှင့် မီဒီယာ ကွန်ရက်။
၂၀၂၆ ခုနှစ် နိုဝင်ဘာလ ၁၃ ရက်။
ဖိလစ်ပိုင်နိုင်ငံ မနီလာမြို့တော်၌ နိုဝင်ဘာ ၁၅ ရက်မှ ၁၇ ရက်အထိ ကျင်းပမည့် ၄၉ ကြိမ်မြောက် အာဆီယံထိပ်သီးအစည်းအဝေးနှင့် ဆက်စပ်အစည်းအဝေးများအတွင်း အာဆီယံခေါင်းဆောင်များသည် မြန်မာ့အရေး ဘုံသဘောတူညီချက် ငါးရပ် အကောင်အထည်ဖော်မှုကို ပြန်လည်သုံးသပ်၍ ဆုံးဖြတ်ချက် ချမှတ်သွားရန် ရှိနေကြောင်း ဖိလစ်ပိုင်သတင်းအေဂျင်စီ (PNA) က ဖော်ပြသည်။
အာဆီယံ နိုင်ငံရေးအဆင့် အစည်းအဝေးများတွင် မြန်မာခေါင်းဆောင်များကို ပြန်လည်လက်ခံခြင်း ရှိ၊ မရှိ ဆိုသည်ကို ထိပ်သီးအစည်းအဝေးအပြီး ထုတ်ပြန်မည့် သဘောတူညီချက် စာတမ်း၌ ဖော်ပြသွားမည်ဖြစ်ကြောင်း ဖိလစ်ပိုင် နိုင်ငံခြားရေးဝန်ကြီးဌာန အာဆီယံရေးရာ ပြောခွင့်ရသူ ဒက်စ် အင်ပီးရီးယဲလ် (Dax Imperial) က ယနေ့ နိုဝင်ဘာ ၁၃ ရက် သတင်းစာရှင်းလင်းပွဲတွင် ပြောကြားခဲ့သည်။
ထိုင်းနိုင်ငံခြားရေးဝန်ကြီး ဆီဟာဆတ် ဖွမ်ကက်ကောင်းက မြန်မာဘက်မှ အာဆီယံနှင့် ပြန်လည်ထိတွေ့ဆက်ဆံလိုသည့် ဆန္ဒရှိနေကြောင်း ပြောဆိုထားသည်။
သို့သော်လည်း ယခုထိပ်သီးအစည်းအဝေးသို့ မြန်မာနိုင်ငံခြားရေးဝန်ကြီးဌာန အာဆီယံရေးရာ ညွှန်ကြားရေးမှူးချုပ်သာ နိုင်ငံရေးအဆင့် မဟုတ်သည့် ကိုယ်စားလှယ်အဖြစ် တက်ရောက်မည် ဖြစ်သည်။
၂၀၂၆ ခုနှစ် အာဆီယံ အလှည့်ကျဥက္ကဋ္ဌ ဖိလစ်ပိုင်နိုင်ငံက အိမ်ရှင်အဖြစ် လက်ခံကျင်းပမည့် အဆိုပါ ထိပ်သီးအစည်းအဝေးသို့ အာဆီယံအဖွဲ့ဝင် နိုင်ငံခေါင်းဆောင်များအပြင် ဆွေးနွေးဖက် ကမ္ဘာ့ခေါင်းဆောင်များလည်း တက်ရောက်ကြမည် ဖြစ်သည်။
သို့သော် ဆွေးနွေးဖက်နိုင်ငံအဖြစ် အမေရိကန်သမ္မတ ဒေါ်နယ်ထရမ့် ပါဝင်တက်ရောက်မည့်အပေါ် ကန့်ကွက်သည့်အနေဖြင့် ယမန်နေ့ နိုဝင်ဘာ ၁၂ ရက်က မနီလာမြို့ မာကာတီရပ်ကွက်ရှိ ထရမ့်တာဝါ (Trump Tower) အပြင်ဘက်တွင် ဆန္ဒပြသူ ဒါဇင်နှင့်ချီ၍ စုဝေးဆန္ဒပြခဲ့ကြသည်။
တစ်ဖက်တွင်မူ အိမ်ရှင်ဖိလစ်ပိုင် အစိုးရသည် ပြည်တွင်းပြည်ပ သတင်းထောက်များ သတင်းရယူနိုင်ရန်အတွက် ပါဆေးမြို့ ကမ္ဘာ့ကုန်သွယ်ရေးစင်တာ၌ နိုင်ငံတကာ မီဒီယာစင်တာ (IMC) ကို ယနေ့ တရားဝင် ဖွင့်လှစ်ပေးလိုက်ပြီ ဖြစ်သည်။
