နိုင်ငံတကာသတင်း

ရုရှားကို နေတိုး ပြင်းပြင်းထန်ထန် သတိပေး၊ EU က အကြီးမားဆုံး ပိတ်ဆို့မှု ထုတ်ပြန် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၁၃ ရက်။ ရုရှားနိုင်ငံနှင့် အနောက်နိုင်ငံများအကြား စစ်ရေးတင်းမာမှုများ မြင့်တက်နေစဉ် နာတိုး (NATO) စစ်ဘက်ဆိုင်ရာ အဆင့်မြင့် အရာရှိကြီးက ရုရှားဘက်မှ စတင် တိုက်ခိုက်လာပါက ရုရှား စစ်တပ်၏ စစ်ဆင်ရေး ယန္တရားတစ်ခုလုံးကို ချေမှုန်း ပျက်စီးပစ်မည်ဟု အပြင်းထန်ဆုံး သတိပေးလိုက်သည်။ တစ်ချိန်တည်းမှာပင် ဥရောပသမဂ္ဂ (EU) ကလည်း ရုရှား လက်နက်ထုတ်လုပ်ရေး ကဏ္ဍနှင့် ဆက်စပ်နေသည့် လူပုဂ္ဂိုလ်နှင့် ကုမ္ပဏီပေါင်း ၁,၆၀၀ နီးပါးကို သမိုင်းဝင် ပိတ်ဆို့အရေးယူမှုအဖြစ် ထပ်မံ ထုတ်ပြန်ခဲ့သည်။ အဆိုပါ သတိပေးချက်ကို ဥရောပဆိုင်ရာ နာတိုး မဟာမိတ်တပ်ပေါင်းစု မဟာဗျူဟာမှူး အမေရိကန် လေတပ်ဗိုလ်ချုပ်ကြီး အဲလက်ဆပ်စ် ဂရင်ကီဝစ်ချ် (Alexus Grynkewich) က ပိုလန်နိုင်ငံ၊ ဝါဆောမြို့၌ ကျင်းပသည့် လုံခြုံရေးဖိုရမ်တွင် ပြောကြားခဲ့ခြင်းဖြစ်သည်။ ရုရှားအနေဖြင့် နာတိုး အဖွဲ့ဝင် ၃၂ နိုင်ငံအနက် မည်သည့်နိုင်ငံကိုမဆို စတင်တိုက်ခိုက်လာပါက ရန်သူ့တပ်များကို ဟန့်တားမည်၊ ရိုက်ချိုးမည်၊ ချေမှုန်းမည် ဟူသော ဗျူဟာဖြင့် ပြန်လည် တုံ့ပြန်သွားမည်ဟု ဗိုလ်ချုပ်ကြီးက ဆိုသည်။ ထို့အပြင် တိုက်ခိုက်လာသည့် စစ်တပ်များတင်မကဘဲ ထိုစစ်တပ်ကို ထောက်ပံ့၊ ကူညီ၊ ထိန်းချုပ်ပေးနေသည့် အဆောက်အအုံနှင့် စနစ် အားလုံးကိုပါ တိုက်ခိုက်သွားမည်ဟု သတိပေးခဲ့သည်။ ယခုကဲ့သို့ သတိပေးချက်သည် ရုရှား ဒရုန်းများ နာတိုး အဖွဲ့ဝင်နိုင်ငံများ၏ လေပိုင်နက်အတွင်း ကျူးကျော်ဝင်ရောက်မှုများ၊ ပဟေဠိဆန်သည့် အဖျက်အမှောင့် လုပ်ရပ်များနှင့် ကာလင်နင်ဂရက် (Kaliningrad) နယ်မြေနှင့် ပတ်သက်၍ ရုရှား၏ နျူကလီးယား ခြိမ်းခြောက်မှုများ ထွက်ပေါ်လာပြီးနောက် ထွက်ပေါ်လာခြင်းဖြစ်သည်။ တစ်ချိန်တည်းမှာပင် ဥရောပသမဂ္ဂ (EU) ကလည်း ရုရှား၏ လက်နက် ထုတ်လုပ်ရေး ကဏ္ဍ၊ ဒရုန်းနှင့် ဒုံးပျံ အစိတ်အပိုင်းများ ထုတ်လုပ်ပေးနေသည့် ရုရှား စစ်ဘက်ဆိုင်ရာ စက်မှုကုန်ထုတ် လုပ်ငန်းများနှင့် ဆက်စပ်သူ လူပုဂ္ဂိုလ်နှင့် ကုမ္ပဏီပေါင်း ၁,၆၀၀ နီးပါးကို ပိတ်ဆို့အရေးယူကြောင်း ကြေညာခဲ့သည်။ အဆိုပါ အရေးယူမှုသည် ယူကရိန်းစစ်ပွဲ စတင်ခဲ့သည့် ၅ နှစ်နီးပါး ကာလအတွင်း အကြီးမားဆုံး အသုတ်လိုက် ပိတ်ဆို့အရေးယူမှု ဖြစ်ပြီး၊ ယခုအခါ EU ၏ အရေးယူ ပိတ်ဆို့ခြင်းခံရသည့် ရုရှား ပုဂ္ဂိုလ်နှင့် အဖွဲ့အစည်း စုစုပေါင်း ၄,၅၀၀ ကျော်အထိ ရှိလာပြီ ဖြစ်သည်။ #NATO #Russia

ရုရှားကို နေတိုး ပြင်းပြင်းထန်ထန် သတိပေး၊ EU က အကြီးမားဆုံး ပိတ်ဆို့မှု ထုတ်ပြန်

ရုရှားကို နေတိုး ပြင်းပြင်းထန်ထန် သတိပေး၊ EU က အကြီးမားဆုံး ပိတ်ဆို့မှု ထုတ်ပြန် သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၁၃ ရက်။ ရုရ…

  • October 13, 2026
။။။။။။။။။။။။။။ နီပေါနိုင်ငံ အလယ်ပိုင်း၌ မြေပြိုမှုကြောင့် ရေကြီးရေလျှံမှု ဖြစ်ပွား၊ လူ ၅ ဦး ပျောက်ဆုံးနေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၁၂ ရက်။ နီပေါနိုင်ငံ အလယ်ပိုင်းတွင် မြေပြိုမှုကြောင့် မြစ်ရေလျှံကာ ရေကြီးရေလျှံမှုများ ဖြစ်ပွားလျက်ရှိသဖြင့် မြစ်ကမ်းဘေး တစ်လျှောက် နေထိုင်သူများအား ဘေးလွတ်ရာသို့ အရေးပေါ် ရွှေ့ပြောင်းကြရန် အာဏာပိုင်များက သတိပေးချက် ထုတ်ပြန်ထားကြောင်း နိုင်ငံတကာ သတင်းဌာနများက ဖော်ပြသည်။ နီပေါနိုင်ငံ ဂေါ်ရခါး (Gorkha) ခရိုင်အတွင်း တောင်ပြိုကျမှုကြောင့် ဗုဒ္ဓဂန္ဓကီ (Budhi Gandaki) မြစ်ရေစီးကြောင်း ပိတ်ဆို့သွားခဲ့ပြီး၊ မြစ်အောက်ပိုင်း ဒေသများတွင် အရှိန်အဟုန်ဖြင့် ရေကြီးရေလျှံမှု ဖြစ်ပေါ်ခဲ့ခြင်း ဖြစ်သည်။ တောင်ပြိုချိန်တွင် ရေများ ပိတ်လှောင်မိသွားပြီးနောက်၊ ပိတ်ဆို့ထားသော မြေစာများ ပြန်လည် ပြိုကျရာမှ ပိတ်မိနေသည့် ရေများ အရှိန်အဟုန်ဖြင့် စီးဆင်းလာခြင်း ဖြစ်သည်။ ယင်းရေကြီးမှုကြောင့် နေအိမ် ၁၂ လုံးခန့်နှင့် ကြိုးတံတား ၂ စင်း မျောပါ ပျက်စီးခဲ့ပြီး၊ ရေအားလျှပ်စစ် စက်ရုံနှင့် အခြား တံတား အမြောက်အမြားလည်း ပျက်စီးဆုံးရှုံးခဲ့သည်။ လက်ရှိအချိန်တွင် အမျိုးသမီး ၂ ဦးနှင့် အမျိုးသား ၃ ဦး ပျောက်ဆုံးလျက်ရှိပြီး၊ နီပေါ အာဏာပိုင်များက စစ်တပ်နှင့် ရဟတ်ယာဉ်များကို အသုံးပြုကာ အရေးပေါ် ကယ်ဆယ်ရေး လုပ်ငန်းများကို ဆောင်ရွက်လျက် ရှိသည်။ #NepalFlood

နီပေါနိုင်ငံ အလယ်ပိုင်း၌ မြေပြိုမှုကြောင့် ရေကြီးရေလျှံမှု ဖြစ်ပွား၊ လူ ၅ ဦး ပျောက်ဆုံးနေ

နီပေါနိုင်ငံ အလယ်ပိုင်း၌ မြေပြိုမှုကြောင့် ရေကြီးရေလျှံမှု ဖြစ်ပွား၊ လူ ၅ ဦး ပျောက်ဆုံးနေ သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၁၂ ရက်…

  • October 12, 2026
အိန္ဒိယ ဆန္ဒပြ ခေါင်းဆောင်များ ပြန်လည် လွတ်မြောက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၁၂ ရက်။ အိန္ဒိယနိုင်ငံ၌ မဲဆန္ဒရှင် စာရင်း အငြင်းပွားဖွယ်ရာ ပြင်ဆင်မှုကို ကန့်ကွက် ဆန္ဒပြနေသည့် "ပိုးဟပ်" (Cockroach) ဟု အမည်ပေးထားသော လူငယ် လှုပ်ရှားမှု ခေါင်းဆောင်များသည် ရဲတပ်ဖွဲ့၏ ထိန်းသိမ်းခံရမှုမှ ပြန်လည် လွတ်မြောက်လာခဲ့ပြီး ဆန္ဒပြမှုများကို ဆက်လက် ပြုလုပ်သွားမည်ဟု ကတိပြု ပြောကြားခဲ့သည်။ အဆိုပါ လူငယ်လှုပ်ရှားမှုသည် မဲဆန္ဒရှင် စာရင်းမှ လူဦးရေ သန်း ၁၃၀ ကျော်ကို မတရား ပယ်ဖျက်လိုက်ခြင်းအပေါ် ကန့်ကွက်နေခြင်း ဖြစ်ပြီး၊ အိန္ဒိယ ရွေးကောက်ပွဲ ကော်မရှင် အကြီးအကဲကို ရာထူးမှ နုတ်ထွက်ပေးရန် တောင်းဆိုလျက် ရှိသည်။ ပြန်လည် လွတ်မြောက်လာသည့် ခေါင်းဆောင်များသည် "တစ်နှစ်အတွင်း ငြိမ်းချမ်းရေးကို မပျက်စီးစေရ" ဟူသော ခံဝန်ချက်ဖြင့် လွတ်မြောက်လာခြင်း ဖြစ်သည်။ သို့သော်လည်း လွတ်မြောက်လာပြီးနောက် ၎င်းတို့က ဝန်ကြီးချုပ် နာရင်ဒရာ မိုဒီအား ပြင်းထန်စွာ ဝေဖန်ခဲ့ပြီး၊ ထောက်ခံသူများကိုလည်း လမ်းပေါ်ထွက် ဆန္ဒပြကြရန် ဆက်လက် တိုက်တွန်းခဲ့သည်။ ပြီးခဲ့သည့်ရက်ပိုင်းအတွင်းက ပြုလုပ်ခဲ့သော ဆန္ဒပြပွဲများတွင် ရဲတပ်ဖွဲ့က ဆန္ဒပြသူ ၂,၀၀၀ ကျော်ကို ခေတ္တ ထိန်းသိမ်းခဲ့သည်။ ထို့အပြင် ဆန္ဒပြမှုများကို နှိမ်နင်းရန် အင်တာနက်လိုင်းများ ဖြတ်တောက်ခြင်းနှင့် ရထားလိုင်းအချို့ကို ပိတ်ပင်ခြင်းများလည်း ပြုလုပ်ခဲ့သည်။ အဆိုပါ "ပိုးဟပ်" လှုပ်ရှားမှုသည် အိန္ဒိယ တရားသူကြီးချုပ်က အလုပ်လက်မဲ့ လူငယ်များကို "ကပ်ပါးကောင်များ" ဟု ခိုင်းနှိုင်း ပြောဆိုခဲ့ရာမှ စတင် ပေါ်ပေါက်လာခြင်း ဖြစ်ပြီး၊ လူငယ်များက ဖိအားများကို ကြံ့ကြံ့ခံနိုင်သည့် ပိုးဟပ်၏ သဘာဝကို သင်္ကေတပြုကာ ဆန္ဒပြနေကြခြင်း ဖြစ်သည်။ #CockroachParty

အိန္ဒိယ ဆန္ဒပြ ခေါင်းဆောင်များ ပြန်လည် လွတ်မြောက်

အိန္ဒိယ ဆန္ဒပြ ခေါင်းဆောင်များ ပြန်လည် လွတ်မြောက် သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၁၂ ရက်။ အိန္ဒိယနိုင်ငံ၌ မဲဆန္ဒရှင် စာရင်း အ…

  • October 12, 2026
တရုတ်က ဥရောပကို ဟိုက်ဘရစ် ကား တင်ပို့မှု လျှော့ချရန် သဘောတူ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၁၂ ရက်။ တရုတ်နိုင်ငံမှ ဥရောပသမဂ္ဂ (EU) သို့ လျှပ်စစ်နှင့် လောင်စာဆီ နှစ်မျိုးသုံး ဟိုက်ဘရစ် (Hybrid) မော်တော်ယာဉ်များ တင်ပို့မှုကို ထက်ဝက်ကျော် လျှော့ချသွားရန် တရုတ်နှင့် EU တို့အကြား သဘောတူညီချက် ရရှိခဲ့ပြီဖြစ်ကြောင်း EU ကုန်သွယ်ရေး မဟာမင်းကြီး မာရို့စ် ဆက်ဖ်ကိုဗစ်ခ် (Maros Sefcovic) က ကြေညာခဲ့သည်။ အဆိုပါ သဘောတူညီချက်ကို ပေကျင်းမြို့တွင် နှစ်ရက်ကြာ ပြုလုပ်ခဲ့သော ဆွေးနွေးပွဲများအပြီးတွင် ရရှိခဲ့ခြင်း ဖြစ်သည်။ ယင်းသဘောတူညီချက်ကြောင့် ဥရောပ မော်တော်ယာဉ် ထုတ်လုပ်ရေး လုပ်ငန်းများအတွက် ဈေးကွက် ဖိအားများ လျော့ကျသွားစေခဲ့ပြီး သက်ဆိုင်ရာ ကုမ္ပဏီများ၏ စတော့ခ်ရှယ်ယာ ဈေးနှုန်းများလည်း ပြန်လည် မြင့်တက်လာခဲ့သည်။ ထို့အပြင် ဥရောပမှ တရုတ်နိုင်ငံသို့ တင်သွင်းနေသည့် တန်ဖိုး ယူရို ၄ ဘီလီယံရှိ ကားအပိုပစ္စည်းများ၊ သံလွင်ဆီနှင့် ဖိနပ် အစရှိသည့် ကုန်ပစ္စည်းများအပေါ် တရုတ်အစိုးရက ကောက်ခံလျက်ရှိသော သွင်းကုန်အခွန်များကိုလည်း လျှော့ချပေးမည် ဖြစ်သည်။ ယင်းသို့ လျှော့ချပေးခြင်းကြောင့် ဥရောပ ထုတ်ကုန်များ တရုတ်ဈေးကွက်သို့ ပိုမို ဝင်ရောက်နိုင်မည် ဖြစ်သည်။ တစ်ပြိုင်နက်တည်းတွင် ဥရောပနိုင်ငံများသို့ တင်ပို့မည့် မြေရှားသတ္တုနှင့် သံလိုက်များအတွက် တင်ပို့ခွင့် လိုင်စင် ခွင့်ပြုပေးမှုများကိုလည်း အဆင်ပြေ ချောမွေ့စေရန် တရုတ်ဘက်မှ လျှော့ပေါ့ ဆောင်ရွက်ပေးသွားမည် ဖြစ်သည်။ ယခု သဘောတူညီချက်သည် ဥရောပ သမဂ္ဂနှင့် တရုတ်နိုင်ငံတို့အကြား တစ်နေ့လျှင် ယူရို ၁ ဘီလီယံကျော်အထိ ရှိနေသော ကုန်သွယ်ရေး လိုငွေပြမှုကို လျှော့ချနိုင်ရေးအတွက် အရေးပါသော ပထမခြေလှမ်း ဖြစ်ကြောင်း EU ကုန်သွယ်ရေး မဟာမင်းကြီးက မှတ်ချက်ပြု ပြောဆိုခဲ့သည်။ #EU # HybridCars

တရုတ်က ဥရောပကို  ဟိုက်ဘရစ် ကား တင်ပို့မှု လျှော့ချရန် သဘောတူ

တရုတ်က ဥရောပကို  ဟိုက်ဘရစ် ကား တင်ပို့မှု လျှော့ချရန် သဘောတူ သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၁၂ ရက်။ တရုတ်နိုင်ငံမှ ဥရောပသမဂ္…

  • October 12, 2026
ရုရှားနှင့် ယူကရိန်း 'စွမ်းအင်ဆိုင်ရာ အပစ်အခတ် ရပ်စဲမည်' ဟု အမေရိကန် သမ္မတ ပြော သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၁၂ ရက်။ ရုရှားနှင့် ယူကရိန်း နိုင်ငံတို့အကြား စွမ်းအင်ဆိုင်ရာ အဆောက်အအုံများကို အပြန်အလှန် တိုက်ခိုက်ခြင်း မပြုလုပ်ကြရန် အပစ်အခတ် ရပ်စဲရေး သဘောတူညီချက် ရရှိခဲ့ပြီဟု အမေရိကန် သမ္မတ ဒေါ်နယ်ထရန့်က ပြောကြားလိုက်သည်။ ယင်းကြေညာချက်ကို ယူကရိန်း သမ္မတ ဇယ်လန်းစကီးက ကြိုဆိုခဲ့သော်လည်း ရုရှားဘက်မှမူ တရားဝင် တုံ့ပြန်မှု မရှိသေးပေ။ သမ္မတ ထရန့်က အဆိုပါ စွမ်းအင်ဆိုင်ရာ အပစ်အခတ် ရပ်စဲရေးသည် ချက်ချင်း အကျိုးသက်ရောက်မှု ရှိမည်ဟု ပြောဆိုခဲ့သော်လည်း အသေးစိတ် အချက်အလက်များကိုမူ ထုတ်ဖော် ပြောဆိုခြင်း မရှိသေးပေ။ ယူကရိန်း သမ္မတ ဇယ်လန်းစကီးက အဆိုပါ သဘောတူညီချက်ကို ရုရှားဘက်မှ လိုက်နာမည်ဆိုပါက ယူကရိန်းကလည်း လိုက်နာသွားမည်ဖြစ်ကြောင်း တုံ့ပြန်ပြောဆိုသည်။ သို့သော်လည်း သမ္မတ ထရန့်၏ ထုတ်ပြန်ချက် ထွက်ပေါ်ပြီးနောက်တွင်ပင် ရုရှားက ယူကရိန်း၏ ဓာတ်အားပေးစက်ရုံများကို ဒရုန်းများဖြင့် ဆက်လက် တိုက်ခိုက်ခဲ့သည်ဟု ဇယ်လန်းစကီးက ပြစ်တင် ဝေဖန်ခဲ့သည်။ အမေရိကန် သမ္မတ ထရန့်သည် လာမည့် ကြားဖြတ်ရွေးကောက်ပွဲ မတိုင်မီ အမေရိကန် ပြည်တွင်းရှိ စက်သုံးဆီ ဈေးနှုန်းများ ကျဆင်းစေရန် ရည်ရွယ်၍ ရုရှားထံမှ ဒီဇယ်ဆီများ ပြန်လည် ဝယ်ယူရန် သဘောတူညီချက်ကို ပြုလုပ်ခဲ့ခြင်း ဖြစ်သည်။ ထို့ကြောင့် ယူကရိန်းက ရုရှား၏ လောင်စာဆီ သန့်စင်စက်ရုံများကို ပစ်မှတ်ထား တိုက်ခိုက်နေမှုများကို ရပ်ဆိုင်းရန် သမ္မတ ထရန့်က ဖိအားပေးနေခြင်း ဖြစ်ကြောင်း လေ့လာသူများက သုံးသပ်ကြသည်။ #Russia #Ukraine #American

ရုရှားနှင့် ယူကရိန်း ‘စွမ်းအင်ဆိုင်ရာ အပစ်အခတ် ရပ်စဲမည်’ ဟု အမေရိကန် သမ္မတ ပြော

ရုရှားနှင့် ယူကရိန်း 'စွမ်းအင်ဆိုင်ရာ အပစ်အခတ် ရပ်စဲမည်' ဟု အမေရိကန် သမ္မတ ပြော သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၁၂ ရက်။ ရုရှာ…

  • October 12, 2026
ထိုင်း ခရီးသွားအခွန်သစ် ဝင်ကြေး ဘတ် ၄၅၀ နှင့် ထွက်ကြေး ဘတ် ၁,၀၀၀ ကောက်ခံရန် စီစဉ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၁၂ ရက်။ ထိုင်းနိုင်ငံသို့ လာရောက်လည်ပတ်မည့် နိုင်ငံတကာခရီးသွားများနှင့် ပြည်ပသို့ ထွက်ခွာမည့်သူများထံမှ အခွန်အသစ် နှစ်ရပ်ကောက်ခံရန် ထိုင်းအစိုးရက ပြင်ဆင်လျက်ရှိသည်။ ထိုင်းနိုင်ငံသားများနှင့် မြန်မာများအပါအဝင် ပြည်ပ ခရီးသွားများ ထံမှာ ပြည်ဝင်ခွန် ၄၅၀ ဘတ်နှင့် ပြည်ပထွက်ခွာ ခွန် ဘတ် ၁၀၀၀ ကောက်ခံရန် စီစဉ်နေခြင်း ဖြစ်သည်။ အဆိုပါ အခွန်များကို ခရီးသွားများ၏ လုံခြုံရေး၊ ဆေးကုသမှုအာမခံနှင့် ခရီးစဉ်ဒေသများ ပြုပြင်ထိန်းသိမ်းရေးကဏ္ဍများတွင် အသုံးပြုသွားမည်ဖြစ်ကြောင်း ထိုင်းနိုင်ငံ ခရီးသွားလာရေးနှင့် အားကစားဝန်ကြီးဌာနက ဆိုသည်။ အဆိုပါအခွန်ကို နိုင်ငံခြားသားများသာမက ထိုင်းနိုင်ငံသားများကိုပါ လေယာဉ်လက်မှတ်ခတွင် တစ်ပါတည်း ထည့်သွင်းကောက်ခံသွားရန် စီစဉ်နေခြင်းဖြစ်သည်။ ယင်းအခွန်များကို အတည်ပြုပါက ယခင်က လေယာဉ်လက်မှတ် တန်ဖိုးများတွင် ထည့်သွင်းထားသည့် အခွန်များနှင့် ပေါင်းပါက လေကြောင်းခရီးသည်တစ်ဦးလျှင် အခွန်အခချည်းသက်သက် စုစုပေါင်း ဘတ် ၂,၅၇၀ အထိ ကုန်ကျနိုင်ဖွယ်ရှိသည်ဟု ဆိုသည်။ လက်ရှိတွင် ထိုင်းနိုင်ငံရှိ အဓိက လေဆိပ်ကြီး (၆) ခုမှ ပြည်ပသို့ ထွက်ခွာသူများထံမှ လေဆိပ်ဝန်ဆောင်ခ (Passenger Service Charge) အဖြစ် ဘတ် ၁,၁၂၀ ကို ကောက်ခံလျက်ရှိသည်။ သို့ဖြစ်ရာ ယခု အခွန်သစ် နှစ်ရပ်ကိုပါ ထပ်မံပေါင်းထည့်ပါက ခရီးသွားများအတွက် ငွေကြေးအရ ပိုမိုဝန်ထုပ်ဝန်ပိုး ဖြစ်စေနိုင်ကြောင်း သုံးသပ်မှုများ ထွက်ပေါ်နေသည်။ ယခုကဲ့သို့ အခွန်သစ်များ ထပ်မံကောက်ခံမည့် အစီအစဉ်အပေါ် ထိုင်းခရီးသွားလုပ်ငန်းရှင်များအသင်း (ATTA) က ပြင်းထန်စွာ ကန့်ကွက်ထားသည်။ အထူးသဖြင့် နိုင်ငံပေါင်း (၆၀) အား ဗီဇာကင်းလွတ်ခွင့် ရက် ၆၀ မှ ၃၀ သို့ လျှော့ချလိုက်သည့် အချိန်နှင့် တိုက်ဆိုင်နေသဖြင့် ဤအခွန်သစ်များက ထိုင်းနိုင်ငံ၏ ခရီးသွားလုပ်ငန်း ဈေးကွက်ကို ကြီးမားစွာ ထိခိုက်စေနိုင်ကြောင်း အဆိုပါအသင်းက သတိပေးထားသည်။ လက်ရှိအခြေအနေတွင် အဆိုပါ အခွန်သစ်စီမံကိန်း နှစ်ရပ်လုံးမှာ အများပြည်သူ၏ သဘောထားမှတ်ချက် တောင်းခံနေဆဲအဆင့်သာ ရှိနေသေးပြီး တရားဝင် အတည်ပြု ပြဋ္ဌာန်းထားခြင်း မရှိသေးပေ။ #Thialand

ထိုင်း ခရီးသွားအခွန်သစ် ဝင်ကြေး ဘတ် ၄၅၀ နှင့် ထွက်ကြေး ဘတ် ၁,၀၀၀ ကောက်ခံရန် စီစဉ်

ထိုင်း ခရီးသွားအခွန်သစ် ဝင်ကြေး ဘတ် ၄၅၀ နှင့် ထွက်ကြေး ဘတ် ၁,၀၀၀ ကောက်ခံရန် စီစဉ် သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၁၂ ရက်။ ထို…

  • October 12, 2026
နိုဘယ်ဆု ကြေညာပြီး နာရီပိုင်းအကြာတွင် ICC ကို ဒဏ်ခတ်ပိတ်ဆို့မည်ဟု အမေရိကန်ကြေညာ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၁၀ ရက်။ အပြည်ပြည်ဆိုင်ရာ ပြစ်မှုဆိုင်ရာ တရားရုံး (ICC) ၏ တရားသူကြီးဟောင်း နာဗီ ပိလီး (Navi Pillay) ၂၀၂၆ ခုနှစ်အတွက် နိုဘယ် ငြိမ်းချမ်းရေးဆု ရရှိကြောင်း ကြေညာပြီး နာရီပိုင်းအကြာတွင် အမေရိကန် သမ္မတ ဒေါ်နယ်ထရန့် အစိုးရက ICC တရားရုံးအပေါ် နည်းပညာနှင့် ဘဏ္ဍာရေးဆိုင်ရာ ပိတ်ဆို့ အရေးယူမှုများ ချမှတ်လိုက်သည်။ အမေရိကန် နိုင်ငံခြားရေးဝန်ကြီး မာကို ရူးဘီယို (Marco Rubio) က ICC ကို "တရားဥပဒေမဲ့ တရားရုံး" အဖြစ် စွပ်စွဲလိုက်ပြီး အမေရိကန် နိုင်ငံသားများကို တရားစွဲဆိုခွင့် ပေးမည် မဟုတ်ကြောင်းနှင့် တရားရုံး၏ ဘဏ္ဍာရေးနှင့် ဝန်ဆောင်မှု ကွန်ရက်များကို ဖြတ်တောက်ရန် ပိတ်ပင်သွားမည်ဟု ထုတ်ပြန်သည်။ ယခု ချမှတ်လိုက်သည့် ဒဏ်ခတ်ပိတ်ဆို့မှုတွင် အမေရိကန် ကုမ္ပဏီများအနေဖြင့် ICC ထံ နည်းပညာ၊ ဘဏ်လုပ်ငန်းနှင့် အာမခံ ဝန်ဆောင်မှုများ ပေးအပ်ခြင်းကို တားမြစ်ထားပြီး၊ သက်ဆိုင်ရာ နိုင်ငံများနှင့် ဆွေးနွေးညှိနှိုင်းရန်အတွက် အကူးအပြောင်း ကာလ ရက်ပေါင်း ၁၈၀ (၆ လ) ဆိုင်းငံ့ ပေးထားသည်။ အမေရိကန် အစိုးရသည် အစ္စရေး ဝန်ကြီးချုပ် နက်တန်ယာဟု အပါအဝင် အရာရှိများအပေါ် ICC က ဖမ်းဝရမ်း ထုတ်ပြန်ခဲ့သည့် ဖြစ်စဉ်များနှင့် ပတ်သက်၍ မကျေမနပ် ဖြစ်ခဲ့ခြင်းဖြစ်သည်။ အခြားတစ်ဖက်တွင်လည်း သမ္မတ ဒေါ်နယ်ထရန့်သည် အစောပိုင်းကတည်းက နိုဘယ် ငြိမ်းချမ်းရေးဆုကို ရရှိလိုကြောင်း လူထုကို ထုတ်ဖော် ပြောဆိုထားသူ ဖြစ်သည်။ ICC တရားရုံးဘက်ကမူ ယခု လုပ်ရပ်သည် "အပြည်ပြည်ဆိုင်ရာ တရားဥပဒေ စိုးမိုးရေး၏ အုတ်မြစ်ကို တိုက်ခိုက်ခြင်း" ဖြစ်ကြောင်း တုံ့ပြန်ခဲ့ပြီး၊ ဥရောပသမဂ္ဂ (EU) အပါအဝင် အဖွဲ့ဝင် ၁၂၅ နိုင်ငံကို တရားရုံး ရပ်တည်နိုင်ရေးအတွက် ကာကွယ်ပေးကြရန် တောင်းဆိုထားသည်။ သို့သော်လည်း အမေရိကန်၏ ဖိအားပေးမှုများ ရှိနေသော်လည်း ၎င်းတို့၏ စုံစမ်းစစ်ဆေးရေးနှင့် တရားစွဲဆိုရေး လုပ်ငန်းများကို မပြတ် ဆက်လက် ဆောင်ရွက်သွားမည်ဟု ICC က အတည်ပြု ပြောကြားခဲ့သည်။ #ICC

နိုဘယ်ဆု ကြေညာပြီး နာရီပိုင်းအကြာတွင် ICC ကို ဒဏ်ခတ်ပိတ်ဆို့မည်ဟု အမေရိကန်ကြေညာ

နိုဘယ်ဆု ကြေညာပြီး နာရီပိုင်းအကြာတွင် ICC ကို ဒဏ်ခတ်ပိတ်ဆို့မည်ဟု အမေရိကန်ကြေညာ သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၁၀ ရက်။ အပြည်…

  • October 10, 2026
ဂမ်ဘီယာ-မြန်မာ အမှု အထူးတရားသူကြီး နာဗီ ပိလီး ၂၀၂၆ နိုဘယ် ငြိမ်းချမ်းရေးဆု ချီးမြှင့်ခံရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာ ၉ ရက်။ မြန်မာနိုင်ငံအား လူမျိုးတုံး သတ်ဖြတ်မှုဖြင့် စွပ်စွဲ တရားစွဲဆိုထားသည့် အပြည်ပြည်ဆိုင်ရာ တရားရုံး (ICJ) ၏ ဂမ်ဘီယာ-မြန်မာ အမှုတွင် အထူးတရားသူကြီးအဖြစ် ပါဝင်ဆောင်ရွက်နေသူ၊ ကုလသမဂ္ဂ လူ့အခွင့်အရေး မဟာမင်းကြီးဟောင်း Navi Pillay ကို ၂၀၂၆ ခုနှစ်အတွက် (၁၂၅) ကြိမ်မြောက် နိုဘယ် ငြိမ်းချမ်းရေးဆု ပေးအပ်ချီးမြှင့်ကြောင်း နော်ဝေ နိုဘယ်ကော်မတီက အောက်တိုဘာ ၉ ရက်တွင် ကြေညာသည်။ တောင်အာဖရိကနိုင်ငံသူ၊ အသက် ၈၅ နှစ်အရွယ် ဥပဒေပညာရှင် နာဗီ ပိလီးသည် အပြည်ပြည်ဆိုင်ရာ ဥပဒေစိုးမိုးရေးနှင့် ငြိမ်းချမ်းရေး ဖော်ဆောင်မှုများအပြင် စစ်ရာဇဝတ်မှု၊ လူသားမျိုးနွယ်အပေါ် ကျူးလွန်သည့် ရာဇဝတ်မှုနှင့် လူမျိုးတုံး သတ်ဖြတ်မှုများကို အပြစ်ပေး အရေးယူနိုင်ရေးအတွက် အရေးပါသော ဆောင်ရွက်မှုများ ပြုလုပ်ခဲ့ခြင်းကြောင့် ယခုဆုကို ချီးမြှင့်ခြင်းဖြစ်ကြောင်း နိုဘယ်ကော်မတီ၏ ထုတ်ပြန်ချက်တွင် ဖော်ပြထားသည်။ ကမ္ဘာတစ်ဝန်း စစ်ပွဲများနှင့် ပဋိပက္ခများ ပိုမိုတိုးပွားလာပြီး အပြည်ပြည်ဆိုင်ရာ ဥပဒေစနစ်များ ဖိအားပေးခံနေရချိန်တွင် အပြည်ပြည်ဆိုင်ရာ ဥပဒေစိုးမိုးရေးသည် ရွေးချယ်စရာ မဟုတ်ဘဲ မရှိမဖြစ် လိုအပ်ချက်ဖြစ်ကြောင်း နိုဘယ်ကော်မတီ ဥက္ကဋ္ဌ ရော်ဂန် ဝက်တနီ ဖရစ်ဒ်နက်စ် (Jørgen Watne Frydnes) က ပြောကြားခဲ့သည်။ အိန္ဒိယ တမီလ် မျိုးနွယ်ဖွား နာဗီ ပိလီးသည် အပါသာဟိုက် (Apartheid) လူမျိုးရေးခွဲခြားမှု ဆန့်ကျင်ရေး လှုပ်ရှားသူ နိုဘယ်ငြိမ်းချမ်းရေးဆုရှင် နယ်လ်ဆင် မန်ဒဲလား၏ အကျိုးဆောင် ရှေ့နေအဖြစ် ဆောင်ရွက်ခဲ့ဖူးသူ ဖြစ်သည်။ ထို့ပြင် ရဝမ်ဒါဆိုင်ရာ အပြည်ပြည်ဆိုင်ရာ ပြစ်မှုဆိုင်ရာ ခုံရုံး (ICTR)၊ အပြည်ပြည်ဆိုင်ရာ ပြစ်မှုဆိုင်ရာ တရားရုံး (ICC) နှင့် ကုလသမဂ္ဂ လူ့အခွင့်အရေး မဟာမင်းကြီးအဖြစ် တာဝန်ထမ်းဆောင်ခဲ့ပြီး လက်ရှိတွင် ICJ တရားရုံး၏ ဂမ်ဘီယာ-မြန်မာ အမှု၌ အထူးတရားသူကြီးအဖြစ် ပါဝင်ဆောင်ရွက်လျက်ရှိသည်။ ယခုနှစ် နိုဘယ် ငြိမ်းချမ်းရေးဆုအတွက် ပုဂ္ဂိုလ်နှင့် အဖွဲ့အစည်း စုစုပေါင်း ၂၈၇ ခု အဆိုပြုခံခဲ့ရပြီး အခြား ရေပန်းစားခဲ့သည့် အဆိုပြုချက်များတွင် အပြည်ပြည်ဆိုင်ရာ အာကာသစခန်း (ISS)၊ ဆူဒန်နိုင်ငံမှ အရေးပေါ် ကူညီရေးအဖွဲ့များ၊ ယူကရိန်း ကလေးသူငယ် အခွင့်အရေး ကာကွယ်သူများနှင့် အပြည်ပြည်ဆိုင်ရာ တရားရုံးကြီးနှစ်ခုတို့ ပါဝင်ခဲ့သည်။ #NaviPillay

ဂမ်ဘီယာ-မြန်မာ အမှု အထူးတရားသူကြီး နာဗီ ပိလီး ၂၀၂၆ နိုဘယ် ငြိမ်းချမ်းရေးဆု ချီးမြှင့်ခံရ

ဂမ်ဘီယာ-မြန်မာ အမှု အထူးတရားသူကြီး နာဗီ ပိလီး ၂၀၂၆ နိုဘယ် ငြိမ်းချမ်းရေးဆု ချီးမြှင့်ခံရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာ ၉ ရက်။ …

  • October 9, 2026
ဝတ်စားဆင်ယင်မှုကြောင့် တာလီဘန်အာဏာပိုင်များက အမျိုးသမီး ၅၀ ကျော် ဖမ်းဆီး သတင်းနှင့် မီဒီယာ ကွန်ရက်။ ၂၀၂၆ ခုနှစ် အောက်တိုဘာလ ၉ ရက်။ အာဖဂန်နစ္စတန်နိုင်ငံတွင် ဝတ်စားဆင်ယင်မှု စည်းကမ်းဖောက်ဖျက်သည်ဟူသော စွပ်စွဲချက်များဖြင့် အမျိုးသမီးများကို တာလီဘန်အာဏာပိုင်များက ဆက်တိုက် ဖမ်းဆီးမှုများ လုပ်ဆောင်လျက်ရှိသည်။ အချို့သော အမျိုးသမီးများမှာ အမျိုးသား အစောင့်အရှောက်မပါဘဲ ပြင်ပသို့ထွက်ခွာမှုကြောင့် ဖမ်းဆီးခံရခြင်းဖြစ်သည်။ ကုလသမဂ္ဂ၏ ကြာသပတေးနေ့ ထုတ်ပြန်ချက်အရ ပြီးခဲ့သည့် ဇူလိုင်လမှ စက်တင်ဘာလအတွင်း နိုင်ငံအတွင်းရှိ အဓိကမြို့ကြီးနှစ်မြို့၌ အမျိုးသမီး ၅၂ ဦးနှင့် မိန်းကလေးငယ် ၁ ဦး ဖမ်းဆီးထိန်းသိမ်းခံခဲ့ရသည်။ ဖမ်းဆီးခံရသည့် အဓိကအကြောင်းရင်းများတွင် ခန္ဓာကိုယ်အပြည့်ဖုံးသည့် ချာဒေါ (chador) ဝတ်ရုံ မဝတ်ဆင်ခြင်း၊ ဆံပင်ပေါ်လွင်နေခြင်း၊ အရောင်တောက်သော ခေါင်းစီးပုဝါများ ဝတ်ဆင်ခြင်းနှင့် မိတ်ကပ်လိမ်းခြယ်ခြင်းတို့ ပါဝင်သည်။ ထို့ပြင် အပြင်ထွက်ရာတွင် အမျိုးသား အစောင့်အရှောက် မပါဝင်ခြင်းကြောင့်လည်း ဖမ်းဆီးခံရမှုများလည်း ရှိသည်ဟု ဆိုသည်။ ဖမ်းဆီးခံရသူများကို နာရီအနည်းငယ်အကြာတွင် ပြန်လွှတ်ပေးခဲ့သော်လည်း မြေပြင်အခြေအနေတွင် ဖမ်းဆီးခံရသူ အရေအတွက်မှာ ယခုထက် ပိုမိုများပြားနိုင်ကြောင်း ကုလသမဂ္ဂက သတိပေးထားသည်။ တာလီဘန်တို့၏ ယခုလုပ်ရပ်များသည် အမျိုးသမီးများ၏ လွတ်လပ်ခွင့်ကို ပြင်းပြင်းထန်ထန် ချိုးဖောက်နေခြင်းဖြစ်ကြောင်း ကုလသမဂ္ဂက ထောက်ပြထားသည်။ တာလီဘန်တို့သည် ၂၀၂၁ ခုနှစ်တွင် အာဏာရရှိလာပြီးနောက်ပိုင်း အမျိုးသမီးများအပေါ် တင်းကျပ်သည့် ကန့်သတ်ချက်များ ချမှတ်ခဲ့သည်။ အာဖဂန်အမျိုးသမီးများအနေဖြင့် ပြင်ပသို့ထွက်ခွာပါက မျက်နှာဖုံးသည့်အထိ ခန္ဓာကိုယ်အပြည့် ဖုံးကွယ်ထားရသော ဟီဂျပ် (Hijab) ဝတ်စုံရှည်ကို မဖြစ်မနေ ဝတ်ဆင်ရမည်ဖြစ်သည်။

ဝတ်စားဆင်ယင်မှုကြောင့် တာလီဘန်အာဏာပိုင်များက အမျိုးသမီး ၅၀ ကျော် ဖမ်းဆီး

ဝတ်စားဆင်ယင်မှုကြောင့် တာလီဘန်အာဏာပိုင်များက အမျိုးသမီး ၅၀ ကျော် ဖမ်းဆီး သတင်းနှင့် မီဒီယာ ကွန်ရက်။၂၀၂၆ ခုနှစ် အောက်တိုဘာလ ၉ ရက်။ အာဖဂန်နစ္စတန်န…

  • October 9, 2026
×Close